ལེའུ་ཉེར་གསུམ་པ། རི་ཁྲོད་ཆོམ་རྐུན་འཚེ་བ་མེད་པའི་ཕྱིར། །མྱ་ངན་མེད་པའི་ཤིང་གི་བསིལ་གྲིབ་ཡོད། །
༼འ༽ རི་ཆོས་མཚམས་ཀྱི་ཞལ་གདམས་ལས། དགྲ་ཇག་ཆོམ་རྐུན་བཅིང་བའི་གདམས་པ་མྱ་ངན་མེད་པའི་ཤིང་གི་བསིལ་གྲིབ་ཅེས་བྱ་བ་བཞུགས་སོ། །ན་མོ་གུ་རུ་དྷ་ཀི་མཱ་རཱི་ཙེ། གཅིག་པུར་སྒྲུབ་པ་བྱེད་འདོད་ཆེ་བ་ཡི། །བླ་མ་བརྩོན་འགྲུས་རྒྱ་མཚོ་ཞེས་བྱ་བས། །ཉམ་ཆུང་གཅིག་པུར་དམ་ཆོས་སྒྲུབ་པ་ལ། །དགྲ་དང་ཆོམ་ཀུན་གནོད་པ་འབྱུང་དོགས་པས། །དེ་ཉིད་སྲུང་ཟློག་གདམས་པ་དགོས་ཞེས་ཞུས། །བླ་མ་ཁྱེད་ཉིད་ཡོན་ཏན་སྣ་མང་བས། །གྲྭ་པ་མེད་པའི་གཅིག་འདུག་མི་དགོས་ཏེ། །ཆིབས་རྟ་གྲྭ་ཁལ་ནོར་ཕྱུགས་བྲང་ང་སོགས། །ཧ་ཅང་མང་ན་དགྲ་བོའི་གཡབ་མོ་ཡིན། །སྙིགས་དུས་ལོག་སྤྱོད་སྡིག་རྒྱལ་སྟོབས་ལྡན་མང་། །ཕྲ་མར་དགའ་བས་ཉེས་མེད་སྲོག་དང་ཕྲལ། །དེ་དག་སྲུང་བའི་གདམས་པ་མང་མཆིས་ཀྱང་། །གསར་རྙིང་མདོ་རྒྱུད་གཏེར་ཁ་ཐམས་ཅད་ནས། །འོད་ཟེར་ཅན་སྒྱུ་ལས་ལྷག་པ་མེད་པར་གསུངས། །དེ་ལ་ཞལ་ཕྱག་མང་པོ་འཁོར་མང་སོགས། །རྡོར་ཕྲེང་སོགས་ནས་དཀྱིལ་འཁོར་ཆེར་བཤད་ཀྱང་། །ཕྱག་གཉིས་མ་འདི་རྟོགས་པའི་རྒྱུད་དང་
མཐུན། །སྒྲུབ་ཐབས་རྒྱ་མཚོ་དགོངས་གཏེར་གཉིས་ནས་གསུངས། །ངོ་བོ་དཔལ་ལྡན་ལྷ་མོ་རང་བྱུང་མ། །ཆོམ་རྐུན་ཟློག་བྱེད་བཅུ་བཞི་མཱ་རི་ཙེ། །དེ་ཡི་མན་ངག་ཟབ་མོ་འདི་ལྟ་སྟེ། །དབང་ལུང་ཐོབ་དགོས་ཉམས་སུ་ལེན་བྱ་ནི། །སྐད་ཅིག་དྲན་རྫོགས་པདྨ་ཟླ་བའི་སྟེང་། །རང་ཉིད་འོད་ཟེར་ཅན་མ་གསེར་མདོག་མཛེས། །ཞལ་གཅིག་ཞི་འཛུམ་ཐོར་ཚུགས་དབུ་རྒྱན་ཅན། །སྟོད་གཡོགས་སྔོན་པོ་ཨང་རག་ཤམ་ཐབས་དཀར། །བཅུ་དྲུག་ན་ཚོད་དར་དང་རིན་ཆེན་བརྒྱན། །ཕྱག་གཉིས་གཡས་གཡོན་ཁབ་དང་སྐུད་པ་འཛིན། །ཕྱེད་སྐྱིལ་ཕག་རྒོད་སེར་པོའི་སྟེང་ན་བཞུགས། །རང་གི་གཡས་གཡོན་བསྲུང་བྱ་ཐམས་ཅད་གསལ། །དེ་རྒྱབ་ཉི་ཟླའི་གའུ་རིམ་པ་གསུམ། །ནང་མ་ཉི་མ་འོག་དང་ཟླ་བ་སྟེང་། །བར་མ་ཉི་མ་གཡོན་དང་ཟླ་བ་གཡས། །ཕྱི་མ་ཉི་མ་སྟེང་དང་ཟླ་བ་འོག །ཉི་ཟླའི་འོད་ཟེར་ཤིན་ཏུ་བཀྲག་ཆེ་བས། །སུས་ཀྱང་བལྟ་བར་མི་བཟོད་མིག་ཚིག་གོ །དེ་རྒྱབ་ཕག་རྒོད་སེར་པོའི་ར་བ་ནི། །སུམ་རིམ་ཤིན་ཏུ་ཆེ་ཞིང་འཇིགས་སུ་རུང་། །ཀུན་གྱི་ཕྱི་རུ་ཁ་གྱུ་ངུར་སྒྲ་སྒྲོག །རང་གི་ཐུགས་ཀར་ཟླ་སྟེང་མཾ་ཡིག་མཐར། །
སྔགས་ཕྲེང་གཡོན་དུ་འཁོར་ལས་འོད་འཕྲོས་པས། །རྒྱ་གར་མྱ་ངན་མེད་པའི་ཤིང་དྲུང་ནས། །རང་འདྲ་དཔག་མེད་སྤྱན་དྲངས་དབྱེར་མེད་ཐིམ། །ཡེ་ཤེས་དབང་ཐོབ་རྣམ་སྣང་དབུ་བརྒྱན་གྱུར། །དམིགས་པ་བསྒོམ་ཞིང་ཅི་ནུས་བསྙེན་པ་བྱ། །ཨོཾ་མཱ་རཱི་ཙྩཾ་སྭཱ་ཧཱ། སྔ་དྲོ་ལ་སོགས་སྲུང་བའི་སྔགས་ནི་འདི། ཨོཾ་མཱ་རཱི་ཙེ་འོད་ཟེར་ཅན་བདག་ཅག་མི་ནོར་ཐམས་ཅད་ལ་སྐྱོབས་ཤིག་སྭཱ་ཧཱ། །ཕྱི་དྲོ་དགྲ་ཆིངས་རྐུན་ཆིངས་སྔགས་དམིགས་འདི། །རང་གི་ཐུགས་ལས་སྤྲུལ་པའི་ལྷ་མོ་དང་། །རང་བཞིན་གནས་ནས་བྱོན་པའི་ལྷ་མོ་ནི། །རང་འདྲ་ཕག་སེར་ཞོན་པས་འཇིག་རྟེན་ཁྱབ། །གློག་ལྟར་འཁྱུག་ཅིང་རླུང་ལྟར་ཕྱོགས་བཅུར་རྒྱུག །རང་ལ་གནོད་པའི་དགྲ་ཇག་ཆོམ་རྐུན་དང་། །ངན་སྨྲས་ཕྲ་མ་བྱེད་པ་ཐམས་ཅད་ཀྱི། །ཁ་དང་མིག་རྣམས་ལྷ་མོས་དྲུབ་པར་བསྒོམ། ཨོཾ་མཱ་རཱི་ཙེ། བཏ་ཏ་ལི། བ་དཱ་ལི། བ་རཱ་ལི། བ་ར་ཧ་མུ་ཁི། སརྦ་དུཥྛ། པྲ་དུཏྟཱ་ཀླུ་ནཾ། གནོད་བྱེད་དགྲ་ཇག་ཆོམ་རྐུན་ཐམས་ཅད་ཙཀརླུ་ཁཾ་བནྡྷ་བནྡྷ་སྭཱ་ཧཱ། །དེ་དག་མང་ཉུང་གལ་དང་བསྟུན་ཏེ་བཟླས། །དེ་ནི་རྒྱུན་ཁྱེར་སྲུང་བ་ཡིན་པ་སྟེ། །མཚམས་
བསྡམས་གོང་གི་དམིགས་པ་འབྲུ་དྲུག་པོ། །དྲུག་འབུམ་བཟླ་བ་བསྙེན་པའི་ཚད་དུ་བཤད། །འདི་རང་གུད་དུ་བསྙེན་པ་མ་གྲུབ་ཀྱང་། སྒྲོལ་དཀར་ཀུ་རུ་ཀུལླེ་ལོ་མ་ཅན། །རང་བྱུང་རྒྱལ་མོ་རྣམས་ནི་རྒྱུད་གཅིག་གསུངས། །གཞན་གྱི་བསྙེན་པ་ཐོན་ན་དོན་གྱིས་གཅིག །གལ་ཏེ་གོང་དུ་བསྙེན་སྒྲུབ་མ་ཐོན་ཡང་། །རྒྱུན་དུ་བསྙེན་པ་ཐུན་རེ་བྱ་བའམ་། །ཡང་ན་གལ་ཆེན་དུས་སུ་ཚན་ཆེར་བཟླ། །དགྲ་ཇག་ཆོམ་ཀུན་རྒྱལ་པོའི་འཇིགས་པ་ལ། །འདི་ལས་ཟབ་པའི་གདམས་ངག་ཡོད་མ་ཡིན། །རྟ་དྲེལ་ལ་སོགས་གལ་ཆེན་སྲུང་བ་ལ། །བུ་མོ་གཙང་མས་བཀལ་ན་རབ་ཡིན་གྱི། །བལ་གཙང་སྲུང་སྐུད་ཕྲ་སྦོམ་གང་ཡང་རུང་། །རིང་ཐུང་མདའ་ཚད་དམ་ནི་འདོམ་ཚད་ཙམ། །དང་པོ་ལྷ་བསྒོམ་བསྙེན་པ་ཉུང་ཙམ་བྱ། །དེ་ནས་མིག་བཙུམ་ཁ་བསྡམ་དབུགས་མ་བཏང་། །སྲུང་སྐུད་རེ་ལ་མདུད་པ་ཉེར་གཅིག་རེ། །ཡིད་བཟླས་སྔགས་ཚར་རེ་དང་མདུད་པ་སྤྱད། །སྲུང་སྐུད་གཅིག་ཚར་མཚམས་སུ་དབུགས་གཏོང་རུང་། །མདུད་པ་རེ་རེ་ལྷ་མོ་རེ་རེར་བསྒོམ། །སྔགས་རིང་བརྒྱ་སྟོང་ཅི་འགྲུབ་བཟླས་ལ་སྔགས། །ཡེ་ཤེས་ལྷ་མོ་གྲངས་མེད་བཀུག་
ལ་བསྟིམ། །ལྷ་མོ་འོད་ཞུ་མདུད་པར་ཐིམ་པར་བསྒོམ། །རྟེན་འབྲེལ་སྙིང་པོས་རབ་གནས་བྱས་པ་དེ། །མི་དང་རྟ་དྲེལ་ནོར་ཕྱུགས་གང་བཏགས་དེ།་་སྲུང་སྐུད་དཀར་བོ་ཡིན་གསུངས། །དགྲ་ཇག་ཆོམ་རྐུན་གཅན་གཟན་སྲུང་བའི་མཆོག །ལས་ཚོགས་དེ་ནི་རྒྱུད་དང་གདམས་ངག་མཐུན། །རང་གི་ཡི་དམ་གཙོ་བོ་གཅིག་ཡིན་ཏེ། །སྒྲུབ་པ་མང་སོང་བཀའ་རྒྱ་དམ་ན་ཡང་། །སྙིང་གི་སློབ་བུ་བརྩོན་འགྲུས་ཁྱེད་ལ་གདམས། །གསར་རྙིང་བཀའ་གཏེར་གནམ་ཆོས་ལ་སོགས་ཀྱི། །གདམས་ངག་བྱེ་བ་རིང་བསྲེལ་གཅིག་ཏུ་བསྡུས། །ཚིག་ཉུང་དོན་ཆེ་ཉམས་སུ་མྱོང་བས་གྲུབ། །སྦ་འོས་གསལ་བཀོད་ཉེས་པ་ལྷ་ལ་བཤགས། །དགེ་བས་སྙིགས་དུས་དམ་ཆོས་སྤྱོད་པ་ཀུན། །དགྲ་དང་ཆོམ་རྐུན་འཚེ་བ་བྲལ་བར་ཤོག །ཁ་སྨྲས་གླེང་གཞི་གཤེ་སྐུར་མེད་པར་ཤོག །དེ་སྐད་གནམ་ལོ་ཤུགས་འཆང་རཱ་གའི་མདོག །ཆོམ་རྐུན་སྲུང་བྱེད་ཁྱི་ཡི་ཟླ་བ་ཡི། །ཉེར་བརྒྱད་དགྲ་འཇོམ་གཤིན་རྗེ་རྒྱུ་བའི་ཉིན། །ཀུན་གྱི་མིག་འགྲིབས་མུན་པ་སྨག་པའི་དུས། །སྔགས་ནག་རཱ་ག་ཨ་སྱས་སྨྲས་པ་དེ། །རུ་པ་བརྩོན་འགྲུས་རྒྱ་མཚོས་ཡི་གེར་བཀོད། །རྟགས་ནི་སྦྲུལ་
སྤྲེལ་བྱི་ལ་བོང་བུ་དང་། །རྟ་དང་གླང་ཆེན་མ་ཧེ་དྲེད་དང་ཁྱི། །ཕན་ཚུན་འཐབས་དང་རང་ཉིད་སྐྲག་པ་རྨིས། །སྔགས་ནི་ད་རུང་གཉིས་འགྱུར་ལ་སོགས་བཟླས། །རྒྱ་མཚོ་བསྒལ་དང་རི་བོ་ལ་གནས་དང་། །སངས་རྒྱས་བྱང་སེམས་ལ་སོགས་མཇལ་བ་དང་། །བུད་མེད་གཞོན་ནུ་མཛེས་མ་རྒྱན་ལྡན་དང་། །འོད་ཟེར་ཅན་མ་མཇལ་དང་ལུང་སྟོན་དང་། །དྲི་བཟང་འཐུལ་དང་མར་མེ་འཛིན་པ་སོགས། །འགྲུབ་པའི་རྟགས་ཏེ་མཚན་མའི་བསྙེན་པའོ། །ཟླ་དྲུག་གསུམ་མམ་ཉེར་གཅིག་ལ་སོགས་དུས། །འབུམ་ཕྲག་ཉེར་བཞི་ཡང་ན་བྱེ་ཆུང་གཅིག །ཐ་མ་དྲུག་འབུམ་བཟླས་ཀྱང་འགྲུབ་པ་སྟེ། །འབྲུ་དྲུག་ཁོ་ན་ཡིན་ཡང་གསུམ་ཀ་བརྩི། །ཅེས་པ་འདི་ཡི་བསྙེན་སྒྲུབ་ལས་སྦྱོར་མཆོད་ཕྲེང་རིན་པོ་ཆེས་མཛད་པ་ནས་ཁོལ་དུ་ཕྱུངས་ཏེ། བློ་དམན་རྣམས་ལ་ཕན་ཕྱིར་སྒྲུབ་ཐབས་འདི་ཡི་མཚན་བུར་བྲིས་པའོ། །ཨོཾ་མཱ་རཱི་ཙྩཾ་སྭཱ་ཧཱ། ཙེ་ཡེ་ཞེས་པའི་ཡེ་དེ་མགྱོགས་དགོས་གསུངས་སོ། །ལེའུ་ཉེར་གསུམ་པའོ་མངྒ་ལཾ། །