ལེའུ་ཉེར་བཞི་པ། དད་ལྡན་འབྱོར་ལྡན་སྒྲིབ་པ་སྦྱོང་བའི་ཕྱིར། །གསོན་བྱང་བཞུ་ཐབས་འབྲེལ་ཚད་དོན་ལྡན་ཡོད། །
༼ཡ༽ རི་ཆོས་མཚམས་ཀྱི་ཞལ་གདམས་ལས། སྤྲོས་མེད་སྤྲོས་བཅས་ཀྱི་གསོན་བྱང་བཞུ་ཐབས་མཐའ་གཅོད་དང་
བཅས་པ་འབྲེལ་ཚད་དོན་ལྡན་ཞེས་བྱ་བ་བཞུགས་སོ། །ན་མོ་བུདྡྷཱ་བོ་དྷི་སཏྭ་ཡེ། སྲས་བཅས་རྒྱལ་བའི་ཐུགས་རྗེའི་ལྷ་ལམ་ན། །གདམས་ངག་འོད་སྟོང་ལྡན་པ་འདི་ཤར་བས། །འགྲོ་བའི་སྒྲིབ་གཉིས་མུན་པ་མཐར་བྱེད་ཅིང་། །བཤེས་གཉེན་གསར་བུའི་བློ་ཡི་པདྨོ་འབྱེད། །ཀྱེ་མ་ཐོབ་དཀའི་དལ་འབྱོར་ལུས་ཐོབ་ནས། །ཚེ་འགང་སྡིག་ལ་སྤྱོད་འབྲས་ཟས་དང་ནོར། །ཆ་ཤས་ཙམ་ཞིག་བཤེས་གཉེན་རྣམས་ལ་ཕུལ། །གསོན་ཤོག་དགོས་ཞེས་ཕྱི་མའི་བདེ་སྐྱིད་རེ། །དེ་བས་སྙིང་རྗེ་བ་ནི་ཅི་ཞིག་ཡོད། །རྒྱལ་བ་རྒྱ་མཚོ་ལ་སོགས་རང་ཉིད་ཀྱི། །ཡི་དམ་གང་ཡིན་སྐད་ཅིག་དྲན་རྫོགས་གསལ། །རླུང་ཞིག་ཚུར་རྔུབ་ཁོ་ཡི་སྡིག་སྒྲིབ་རྣམས། །རང་ལ་བསྟིམས་པས་གཟི་བརྗིད་འོད་དུ་འབར། །རླུང་ཞིག་ཕར་བུས་རང་གི་བསོད་ནམས་ཚོགས། །ཁོ་ལ་བསྟིམ་པས་བདེ་བའི་རྒྱུ་འབྲས་ཐོབ། །ཁོ་ཡི་སྙིང་དབུས་པཾ་ཡིག་ནག་པོ་ལ། །ཐོག་མེད་ནས་སྒྱུ་བསགས་སྡིག་སྒྲིབ་ཐམས་ཅད་ཐིམ། །རྐང་མཐིལ་གཉིས་ལས་ཡཾ་ལས་རླུང་གཡོས་པས། །ལྟེ་བའི་རཾ་ལས་མེ་འབར་མེ་ལྕེ་དེས། །པཾ་ཡིག་གྱེན་དེད་སྣ་སྒོ་གཡས་པ་ནས། །
སྡིག་པ་རྭ་ཅན་གཟུགས་སུ་ཐོན་པ་དེ། །མདུན་དུ་རང་བྱུང་མེ་ཡི་དཀྱིལ་འཁོར་དབུས། །དྲན་རྫོགས་རྡོ་རྗེ་མཁའ་འགྲོ་སྐུ་མདོག་མཐིང་། །ཁྲོ་མོའི་ཆས་རྫོགས་རྡོ་རྗེ་དྲིལ་བུ་འཛིན། །མེ་ཡི་རང་བཞིན་ཞལ་ནི་རབ་གདངས་པའི། །ནང་དུ་སྡིག་སྒྲིབ་སོང་བས་དངོས་མེད་བསྲེག །ཁྲོ་མོ་མེ་དཀྱིལ་མི་དམིགས་འཇའ་ལྟར་ཡལ། །སྦྱིན་བདག་ལྟེ་འོག་གཏུམ་མོའི་མེ་འབར་བས། །མ་དག་ཕུང་ཁམས་སྐྱེ་མཆེད་སྡིག་སྒྲིབ་བསྲེག །དག་པ་ཡེ་ཤེས་ཡི་དམ་ལྷ་སྐུར་བསྒྱུར། །རང་གི་ཐུགས་ལས་འོད་ཟེར་འཕྲོས་པ་ཡིས། །ཕྱོགས་བློབཅུའི་སངས་རྒྱས་བྱང་སེམས་ཐམས་ཅད་ནི། །རྡོར་སེམས་ལ་སོགས་སྐུ་མདོག་དཀར་པོ་ཡི། །རྣམ་པར་སྤྱན་དྲངས་ཁོ་ཡི་ལུས་ལ་བསྟིམ། །ལས་དང་ཉོན་མོངས་སྒྲིབ་པ་ནད་གདོན་ཞི། །རིན་འབྱུང་ལ་སོགས་རྒྱས་པའི་སངས་རྒྱས་ཀུན། །ཛམ་སེར་ལ་སོགས་སྐུ་མདོག་སེར་པོ་ཡི། །རྣམ་པར་སྤྱན་དྲངས་ཁོ་ལ་སིབ་སིབ་བསྟིམ། །ཚེ་དང་བསོད་ནམས་ཡེ་ཤེས་རྒྱས་པར་བྱས། །ཚེ་དཔག་ལ་སོགས་དབང་གི་ལྷ་ཚོགས་རྣམས། །མཚོ་ལ་ཆར་བབས་བཞིན་དུ་དེ་ལ་བསྟིམ། །རླུང་སེམས་སྣང་བ་དབང་དུ་འདུས་པར་
གྱུར། །བདེ་མཆོག་ཕྱག་རྡོར་ལ་སོགས་དྲག་པོའི་ལྷ། །བུ་ཡུག་འཚུབ་ལྟར་སྤྱན་དྲངས་དེ་ལ་བསྟིམ། །བདུད་བགེགས་ཐར་པའི་བར་ཆད་ཚར་བཅད་བསམ། །དེ་ཉིད་ཟླ་གདན་སྟེང་དུ་མེ་དཔུང་དབུས། །གནས་གསུམ་འབྲུ་གསུམ་མཚན་པས་སྲུང་བར་བསམ། །དེ་ནི་ཕྱི་ཡི་གསོན་ཤོག་དམིགས་པ་སྟེ། །བདེ་མཆོག་རྡོ་རྗེ་མཁའ་འགྲོའི་རྒྱུད་ཀྱི་དོན། །ཆོས་ཀྱི་དབང་ཕྱུག་གསུང་རྒྱུན་ལས་བྱུང་ངོ་། །དེ་ནས་སྦྱིན་བདག་ལུས་དང་རང་གི་ལུས། །གཅིག་ཏུ་བསྲེས་ལ་རྒྱལ་བ་རྒྱ་མཚོ་འམ། །ཕག་མོ་ལ་སོགས་བླ་མེད་ལྷ་རུ་བསྒོམ། །རྩ་གསུམ་འཁོར་ལོ་བཞི་ཡང་གསལ་བཏབ་སྟེ། །ལྟེ་འོག་ཨ་ཐུང་གཏུམ་མོའི་མེ་སྦར་བས། །སྡིག་སྒྲིབ་མ་དག་ཕུང་ཁམས་སྐྱེ་མཆེད་བསྲེག །བུམ་ཆེན་བཟུང་ངམ་མ་ལྕོགས་བར་རླུང་བཟུང་། །ཕྱོགས་བཅུའི་ཡི་དམ་དཔའ་བོ་མཁའ་འགྲོ་ཡི། །སྦྱོར་མཚམས་བྱང་སེམས་དཀར་དམར་སྤྱན་དྲངས་ཏེ། །སྤྱི་བོའི་ཧཾ་ལ་ཐིམ་པས་བྱང་སེམས་བབས། །རྩ་འཁོར་བཞི་གང་དགའ་བཞི་རྒྱུད་ལ་སྐྱེས། །བདེ་སྟོང་འདྲེས་པས་བདེ་དྲོད་མེ་དཔུང་འབར། །བདུད་བགེགས་བར་ཆད་དཔག་ཚད་མི་
གནས་བསམ། །དེ་ནི་ནང་ལྟར་གསོན་བྱང་བཞུ་ཐབས་ཏེ། །ཕ་རྒྱུད་གསང་བ་འདུས་པའི་རྒྱུད་གཞུང་དང་། །གཏུམ་མོའི་ཁྲིད་རིམ་རྣམས་ཀྱི་ཟུར་ནས་འབྱུང་། །རྩ་བརྒྱུད་བླ་མ་ཡི་དམ་ལྷ་ཚོགས་དང་། །སངས་རྒྱས་བྱང་སེམས་རྣམས་ཀྱི་སྐུ་གསུང་ཐུགས། །རང་དང་སྦྱིན་བདག་ལུས་ངག་ཡིད་གསུམ་རྣམས། །དབྱེར་མེད་བསྲེས་ལ་ཉམས་ལེན་ངང་ལ་བཞག །དང་པོ་བསྲེས་པའི་དམིགས་པ་བྱས་མོད་ཀྱི། །དེ་ནས་དབྱེར་མེད་འདྲེས་པའི་ཉམས་རྟོགས་འཆར། །ངོ་བོ་སྟོང་པ་རང་བཞིན་གསལ་བ་དང་། །རྣམ་པ་འགག་མེད་རྒྱུའཆར་བར་ཁྱད་པར་མེད། །སྟོང་ཉིད་མེ་ཡིས་དངོས་འཛིན་སྒྲིབ་གཉིས་སྲེག །དེ་ནི་ཕྱག་རྫོགས་ཁྲིད་རིམ་ཀུན་ནས་གསལ། །གསང་བ་དེ་ཁོ་ན་ཡི་གསོན་ཤོག་ཡིན། །དེ་ལ་བྱང་བུ་ཁྲི་སོགས་སྤྲོས་བཅས་མེད། །ཡོན་བདག་སྒྲིབ་སྦྱོང་རང་གི་དཀོར་སྦྱོང་ལ། །ནམ་དྲན་ཡང་ཡང་བསྒོམ་པ་མན་ངག་ཡིན། །དེ་ནི་སྤྲོས་མེད་དམིགས་པའི་གསོན་བྱང་ངོ་། །དེ་ནས་སྤྲོས་བཅས་གཟུགས་དང་མིང་བྱུང་བྲིས། །ཀུན་རིག་ཞི་ཁྲོ་མི་འཁྲུགས་པ་ལ་སོགས། །ཆོ་ག་ཆ་ཚང་སྐབས་ལ་བབས་པའི་ཚེ། །འདི་རུ་ཁུག་དང་མཆིས་པར་
གྱུར་མི་བརྗོད། །སྐད་ཅིག་ཉིད་ལ་འདི་དང་དབྱེར་མེད་གསལ། །སྦྱིན་བདག་དེ་དང་བྱང་བུ་དབྱེར་མེད་བསྒོམ། །གལ་ཏེ་སྦྱིན་བདག་ས་ཐག་རིང་ན་ཡང་། །བདག་བསྐྱེད་རི་རབ་ཙམ་བསྒོམ་དྲུང་དུ་འོང་། །ཚེ་འདས་ཟེར་ས་རྣམས་སུ་ཚེ་ལྡན་འཛུད། །ཟས་བསྔོ་ལམ་བསྟན་གནས་སྤར་གསུམ་པོ་སྐྱུར། །དེ་མིན་གཤིན་པོའི་དུས་དང་འདྲ་བ་ལ། །གཏུམ་མོའི་མེ་སྦར་ལས་བཞིའི་ལྷ་ཚོགས་བསྟིམ། །དམིགས་པ་གོང་དུ་བཤད་པ་དེ་ཉིད་སྦྱར། །བསོད་ནམས་རི་བོ་ལ་སོགས་བཀྲ་ཤིས་བརྗོད། །དེ་ནི་སྤྲོས་བཅས་གསོན་ཤོག་ཕྱག་ལེན་ཡིན། །དེ་ནི་རང་ལུགས་རང་གི་ཉམས་མྱོང་དང་། །རྡོ་རྗེ་མཁའ་འགྲོའི་རྒྱུད་དང་ལམ་འབྲས་དང་། །དཀྱིལ་ཆོག་ཀུན་གྱི་སློབ་མ་སྟ་གོན་སྐབས་། །ཟ་བྱེད་རྡོ་རྗེ་མཁའ་འགྲོ་བསྐྱེད་བྱས་ནས། །ཏིལ་ནག་ཁོ་ན་སྦྱིན་སྲེག་གཅིག་པུ་དེས། །གསོན་ཤོག་གོ་ཆོད་མིང་ཡིག་བསྲེག་པའི་ལུགས། །རྒྱལ་ཚབ་གྲགས་པ་མཆོག་དབྱངས་ཀྱིས་མཛད་དང་། །འབྲི་གུང་ཞབས་དྲུང་མཛད་པའི་ཡིག་ཆ་ལ། བརྟེན་ནས་དེང་སང་བླ་མ་ཀུན་གྱིས་མཛད། །ནད་པ་ཡུན་རིང་ན་འམ་སྐག་ཆེ་ན། །སྐག་
བསྒྱུར་དཀྱིལ་འཁོར་ཞལ་བསྒྱུར་བྱེད་པའི་ཐབས། །གཏོ་གཅིག་ཡོད་པ་བསྒོམ་པ་རྣམས་ཀྱིས་བྱེད། །བླ་མས་བྱེད་རྒྱུའི་དཀྱིལ་འཁོར་ཞལ་བསྒྱུར་ནི། །འགུག་གཞུག་ཟས་བསྔོ་གནས་སྤར་མ་གཏོགས་པ། །ཕྱིར་ལྡོག་གཞུང་ལྟར་བྱས་ནས་ཚེ་དབང་བསྐུར། །དེ་ཡིས་སྐག་ཆེན་འཆི་བ་བཟློག་པར་བཤད། །དེ་ནི་སློབ་དཔོན་འགའ་ཡི་གསུང་ལས་བྱུང་། །ཁྲུས་དང་དུག་བཅོམ་དབང་བསྐུར་ལ་སོགས་པ། །ནད་གདོན་འཇོམ་པའི་མཆོག་ཏུ་བཤད་པ་ཡིན། །སྦྱོང་རྒྱུད་གྲྭ་ལྔ་སོགས་ལས་གསལ་ལྟར་ཡིན། །སྙེ་མོ་ལ་སོགས་གཙང་ཕྱོགས་ཡུལ་གྲུ་འགར། །གསོན་དགེ་བྱེད་ཟེར་ཞག་འགའ་ཆོ་ག་བསོག །མཇུག་ཏུ་སྦྱིན་བདག་དེ་ལ་ཕྱིར་ལྡོག་ནི། །འགུག་གཞུག་ཟས་བསྔོ་གནས་སྤར་མ་གཏོགས་བྱེད། །ཐེག་དམན་མདོ་སྡེ་བདེན་བཞིའི་ཆོས་འཁོར་ལས། །རང་གིས་བྱས་པའི་ལས་འབྲས་ཆུད་མི་ཟ། །མ་བྱས་པ་ཡི་ལས་དང་འཕྲད་མི་སྲིད། །གཞན་གྱིས་བྱས་པ་རང་ལ་སྨིན་པ་མེད་། །གསུངས་ཕྱིར་ཚེ་འདས་རྗེས་ནས་ཆོས་བྱས་ཀྱང་། །དམིགས་མེད་བསྔོ་བས་རྒྱ་ཡིས་མ་ཐེབས་ན། །གཤིན་པོས་མི་འཐོབ་གསོན་པོ་ཉིད་ལ་སྨིན། །དེ་ཕྱིར་རྗེ་བཙུན་
མི་ལ་རས་ཆེན་གྱིས། །མདངས་གསུམ་ནོར་བུ་བོར་བ་ལ། །རྐུན་མའི་རྒྱབ་ཏུ་རྡོ་འཕངས་འདྲ། །གསུངས་ཕྱིར་གསོན་ཚེའི་དགེ་བ་ཡོད་ངེས་ཟེར། །དེ་ཡང་ལེགས་པར་དཔྱད་ན་མི་འཐད་མེད། །དེ་ཚེ་དཀོན་མཆོག་རིན་ཆེན་དཔལ་ཞིང་སོགས། །ལམ་སྦྱང་བཏོན་ལ་འགལ་བ་མེད་པ་སྟེ། །སོ་སོའི་སྐྱེ་བོའི་ཚོགས་ལམ་ནས་བཟུང་སྟེ། །སངས་རྒྱས་ས་རུ་འགྲོ་བའི་ལམ་སྟོན་ཡིན། །ད་ལྟ་ཁྲིད་རྣམས་ཞུ་བའང་དེ་ཡིན་མོད། །དེ་བཞིན་པདྨ་འདམ་སོགས་ལམ་སྟོན་ཡང་། །འདོན་དུ་རུང་སྟེ་མྱུར་དུ་མི་འགྲོ་ཡང་། །ལོ་ཟླ་འགའ་ཞིག་སོང་ནས་འགྲོ་དགོས་པའི། །ས་རྒྱུས་མེད་པའི་ལམ་དེ་བསླབ་དང་འདྲ། །དེ་ནས་རྣམ་ཤེས་སྤར་ཆོག་མི་བྱ་བར། །ལོ་བརྒྱ་ཐུབ་སོགས་ཚེ་འཕེལ་བཀྲ་ཤིས་བྱ། །དེ་དག་བཤེས་གཉེན་འགའ་ཡི་གསུང་ལས་བྱུང་། །སྔོན་ཚེ་ཆོས་ཀྱི་དབང་ཕྱུག་ཞལ་བཞུགས་སྐབས། །གསོན་ཤོག་རྒྱུད་སྡེ་རྣམས་ནས་གསུངས་པ་མེད། །རུང་དང་མི་རུང་རྩོད་གཞི་མང་པོ་བྱུང་། །གང་ནས་བཤད་ཅེས་རྗེ་ཡི་དྲུང་དུ་ཞུས། །རྡོ་རྗེ་མཁའ་འགྲོའི་རྒྱུད་ལས་བཤད་ཅེས་གསུངས། །དེ་རུ་དམིགས་རིམ་དོན་གྱིས་གསལ་
མོད་ཀྱི། །མིང་དང་གཟུགས་བྲིས་སྲེག་པ་མི་གསལ་ཡང་། །ངན་སོང་སྦྱོང་བའི་རྒྱུད་ལས་གསུངས་པ་ནི། །མིང་ལ་ཡང་དབང་བསྐུར་བར་གྱིས་ཤིག །ཅེས་གསུངས་པ་ཡི་དོན་ལ་འཐུས་པ་སྟེ། །སྤྱིར་དུ་རྒྱུད་ཚིག་ཤོ་ལོ་ཀ་རེར་ཡང་། །དངོས་བསྟན་དོན་དང་ཤུགས་ལས་བསྟན་པའི་དོན། །འབྲུ་དོན་ཚིག་དོན་རྣམ་པ་བཞི་རེ་འབྱུང་། །ཤི་བྱང་དངོས་སུ་བསྟན་པའི་ཞོར་ཉིད་ལ། །གསོན་བྱང་ཡང་ནི་ཤུགས་ལ་བསྟན་པ་ཡི། །སྲོང་བཙན་སྒམ་པོས་རང་རོ་རང་གིས་སྐྱེལ། །རང་གི་ཕུང་པོ་རང་གིས་སྲེག་ཐབས་གསུངས་། །དེ་ཡང་དོན་གྱིས་གསོན་བྱང་ཉིད་དུ་ངེས། །དེ་བཞིན་གཏུམ་མོའི་ཁྲིད་རིམ་ཐམས་ཅད་དང་། །ཕྱག་རྫོགས་བསྲེ་བ་རོ་སྙོམས་དམིགས་རིམ་ཀུན། །བདག་གཞན་ཀུན་གྱི་སྒྲིབ་གཉིས་སྲེག་ཐབས་ལགས། །དེ་ཕྱིར་གསོན་ཤོག་མ་གསུངས་སྨྲ་མི་རུང་། །སྔོན་དུས་མཆོག་གི་སྤྲུལ་སྐུས་གསོན་ཤོག་མཛད། །རྒྱལ་བའི་དབང་པོས་སྐུ་ཚེ་ལ་གནོད་གསུངས། །དེ་ཕྱིར་མ་མཛད་ཟེར་བ་མི་བདེན་ཏེ། །བདེ་མཆོག་རྡོ་རྗེ་མཁའ་འགྲོའི་རྒྱུད་དེ་ལས། །དེ་ལྟར་བསྒོམ་ན་ཏིང་ངེ་འཛིན། །ཉམས་པར་མི་འགྱུར་འཕེལ་བར་
འགྱུར། །གསུངས་ཕྱིར་སྐུ་ཚེར་གནོད་དོན་མ་མཆིས་སོ། །གསོན་ཤོག་མང་པོ་བཞུས་ན་སྦྱིན་བདག་དེ། །།ཚེ་ཐུང་ཟེར་བ་མི་བདེན་སེར་སྣའི་གཏམ། །ནུས་ལྡན་མང་པོས་དགུག་གཞུག་གནས་སྤར་རྣམས། །ཡང་ཡང་བྱས་ན་ཚེ་ལ་གནོད་མོད་ཀྱིས། །དེ་དག་བྱེད་སྲོལ་མེད་པས་ག་ལ་གནོད། །རིན་འབྱུང་ཚེ་དཔག་ཛམ་བྷ་ལ་ལ་སོགས། །བསྟིམ་པས་ཚེ་བསོད་སླར་ལ་འཕེལ་བ་ཡིན། །གླུད་གཏོར་ཁྲུས་དང་དུག་བཅོམ་ལ་སོགས་ཀྱིས། །རྐྱེན་བཟློག་རིམ་གྲོ་ཞོར་ལ་འོང་བ་ཡིན། །ཤི་གསོན་བྱང་བུ་བྱེད་ལུགས་ཕལ་ཆེར་འདྲ། །དུར་ངོ་ཡོད་ཀྱང་དུར་ལོས་འོང་བ་ཡིན། །བླ་མ་བརྩོན་འགྲུས་རྒྱ་མཚོ་ཞེས་བྱ་བའི། །བསྐུལ་བ་པོ་དེས་ཡི་གེ་པ་བྱས་ཏེ། །ཤིང་སྦྲུལ་སྨིན་དྲུག་ཟླ་བའི་ཉེར་དགུའི་ནུབ། །དགུ་གཏོར་ཚར་སྐབས་རཱ་ག་ཨ་སྱས་སྨྲས། །ལུང་འདྲེན་ཚིག་རྣམས་ཡིད་ལ་མ་ངེས་པས། །ཐེ་ཚོམ་ཡོད་ན་ལུང་ཁུངས་རྒྱུད་རྣམས་གཟིགས། །དོན་རྩ་བསྒོམ་བྱ་ཡིད་ལ་གསལ་བ་རྣམས། །གབ་སྦས་མེད་པར་གཞན་ལ་ཕན་ཕྱིར་བཀོད། །འགྲོ་དོན་འབྲེལ་ཚད་དོན་དང་ལྡན་པར་ཤོག །ལེའུ་ཉེར་བཞི་པའོ་མངྒ་ལཾ།། །།