ལེའུ་ཉེརབདུན་པ། མཆོད་གཏོར་སྒྲུབ་རྫས་ལ་སོགས་འཛོམ་པ་ལ། །ནང་ལྟར་སྒྲུབ་པ་དཔའ་བོའི་རྔམ་སྐད་ཡོད། །
༼ཤ༽ རི་ཆོས་མཚམས་ཀྱི་ཞལ་གདམས་ལས། བླ་མེད་གསར་རྙིང་ཡི་དམ་ཌཱ་ཀི་སྤྱིའི་ནང་སྒྲུབ་དཔའ་བོ་དཔལ་ཆེན་འབར་བའི་
རྔམ་སྐད་ཅེས་བྱ་བ་བཞུགས་སོ། །ན་མོ་གུ་རུ་ཤྲཱི་ཧེ་རུ་ཀ་ཡེ། གར་གྱི་དབང་ཕྱུག་པདྨ་ཧེ་རུ་ཀ །ཁྲག་འཐུང་དྷརྨེ་ཤྭ་རས་བདག་ལ་སྲུངས། །གསོན་དང་གུ་རུ་བཱིརྱ་སཱ་ག་ར། །རི་ཁྲོད་འགྲིམ་པའི་སྐལ་ལྡན་སྐྱེས་བུ་ཡིས། །ཡི་དམ་ལྷ་ཡི་ནང་སྒྲུབ་བྱེད་འདོད་ན། །རྒྱས་པར་ས་དང་ཐིག་ཆོག་གཞུང་ལྟར་ལས། །ས་སྟེགས་སྟེང་དུ་རྡུལ་ཚོན་དཀྱིལ་འཁོར་བྲི། །འབྲིང་དུ་སྒོ་ཁྲི་ལ་སོགས་སྟེགས་ཀྱི་ཁར། །རས་བྲིས་དཀྱིལ་འཁོར་བཏིང་བར་བྱ་བ་ཡིན། །ཐ་མ་གནས་དང་འཚམས་པའི་སྟེགས་ཀྱི་ཁར། །འབྲུ་ཡི་ཚོམ་བུ་ལྷ་གྲངས་བཀོད་པས་འཐུས། །དེ་ལྟར་རྒྱུས་བསྡུས་དཀྱིལ་འཁོར་གང་ལྕོགས་དབུས། །མཉྫི་འམ་ནི་སྣོད་གཙང་འབྲུས་བཀང་སྟེང་། །བུམ་པ་མགུལ་ཆིངས་ཁ་རྒྱན་གཟུངས་ཐག་བཅས། །དེ་ནང་རབ་ནི་དངོས་གྲུབ་རིལ་བུས་བཀང་། །འབྲུ་སྣ་སྨན་སྣ་རིན་ཆེན་སྣ་ཚོགས་དང་། །དཀར་གསུམ་མངར་གསུམ་མེ་ཏོག་སྣ་ཚོགས་ལ། །གཞི་བླངས་བྱིན་རླབས་རྟེན་ནི་རྙེད་ཚད་དང་། །བདུད་རྩི་རིལ་བུ་དམ་རྫས་ཕབ་བཏབ་སྟེ། །སྲན་མ་དཀར་ནག་གང་རུང་ཚད་ཙམ་ལ། །སྣུམ་ཤས་ཆུང་ན་ལེགས་པར་བསྐམ་བྱ་ཞིང་། །སྣུམ་
གྱིས་སྦྲུས་ན་སྐམ་ཡང་མི་དགོས་ཏེ། །དམར་པོས་མདོག་བསྒྱུར་བུམ་པ་བཀང་བར་བྱ། །མ་འཛོམ་འོ་མ་ཆུ་གཙང་བུམ་རྫས་བཏབ། །སྒྲུབ་ཡུན་ཐུང་ན་ཆང་གིས་རུ་ར་བ་ཡིན། །དེ་སྟེང་རྐང་གསུམ་མམ་ནི་ཁྲིའུ་ཁར། །ཐོད་པ་མཚན་བཟང་རིལ་བུ་དེ་འདྲས་བཀང་། །མེད་ན་ཆང་ལ་བདུད་རྩི་བཏབ་པས་འཐུས། །དེ་སྟེང་ཐུར་མ་རྒྱ་གྲམ་བཅིངས་ལ་བཞག །དེ་སྟེང་དར་རས་དམར་པོས་ཁ་བཀབ་བོ། །མེ་ལོང་ཆང་བྱུག་དེ་སྟེང་སིནྡས་བྱུག །པདྨ་འདབ་བཞི་ཆོས་འབྱུང་བཅས་པ་བྲི། །དབུས་སུ་ཡི་དམ་གང་ཚཡིན་ས་བོན་དང་། །འདབ་བཞིའི་ཤར་དུ་ཧ་རིའི་ཡིག་འབྲུ་གཉིས། །ལྷོ་རུ་རི་ཙ་ནུབ་ཏུ་ནི་ཧྲིདང་། །བྱང་དུ་ས་ཡ་དེ་རྒྱབ་མུ་ཁྱུད་ལ། །ཡི་དམ་གང་ཡིན་བསྙེན་སྔགས་ཚང་བར་བྲི། །དེ་རྣམས་ཡིག་འགོ་ཕྱི་ལ་བསྟན་པའོ། །དེ་ནི་དར་དམར་དགབ་པའི་སྟེང་དེར་བཞག །དེ་སྟེང་ཤེལ་ལམ་རྡོ་རྗེ་རྩེ་ལྔ་བཞག །དེ་སྟེང་ཁྲིའུ་འམ་ནི་རྐང་རིང་གླུ་སྟེང་། །སྒྲུབ་གཏོར་རིན་ཆེན་འབར་བ་རྒྱན་བཟང་བ། །ཡི་དམ་ཙཀླི་དར་གདུགས་བཅས་པ་བཤམ། །གལ་ཏེ་དེ་ལྟར་རྩེག་པར་མི་ཤོང་ན། །བུམ་པའི་མདུན་དེར་བཤམ་
ཡང་འགལ་བ་མེད། །རྙིང་མ་ཡིན་ན་བུམ་པའི་གཡས་གཡོན་གཉིས། །མཉྫིལ་གཉིས་སྟེང་བྷནྡྷ་གཉིས་ཀྱི་ནང་། །གཡས་སུ་བདུད་རྩི་གཡོན་དུ་རཀྟ་བཤམ། །གསར་མ་ཡིན་ན་དེ་གཉིས་མི་དགོས་སོ། །གསར་རྙིང་གང་ལའང་རྒྱས་པར་ལྷ་གྲངས་ཀྱི། །གཏོར་མ་ཕྱག་ལེན་བཞིན་དུ་བཅའ་བ་སྟེ། །འཁོར་རྣམས་ཕྱོགས་མཚམས་སོ་སོའི་གནས་ཀྱི་ཐད་། །གཙོ་བོ་བུམ་པའི་གཡས་གཡོན་གང་བདེར་བཤམ། །བསྡུ་ན་ཀ་ཊོ་རའམ་སྡེར་ཆེན་ནང་། །ལྷ་གྲངས་གཏོར་ཚོམ་བཤམ་པ་འབྲིང་ཡིན་ལ། །བསྡུ་ན་རིན་ཆེན་འབར་བ་ལ་སོགས་པའི། །དབང་གཏོར་འདྲ་བ་རྒྱན་གཟབ་ཆེ་བ་གཅིག །དེ་ནི་གཏོར་བསྔོས་རྒྱུན་དུ་གསོ་རྒྱུ་ཡིན། །སྔོན་མ་སྒྲུབ་གཏོར་ལྷ་བསྐྱེད་ཡིན་པའི་ཕྱིར། །དང་པོ་བྲན་ནས་རྒྱུན་དུ་གསོ་མི་དགོས། །ལྷ་དེའི་བཀའ་སྲུང་གེལ་པ་ཡོད་ན་ནི། །དེ་ཡི་གཏོར་མ་དཀྱིལ་འཁོར་ཟུར་དུ་བཞག །དཀྱིལ་འཁོར་ཕྱོགས་བཞིར་ལས་བཞིའི་གཏོར་མ་ནི། །ཤར་དུ་ཟླུམ་པོ་མར་རྒྱུན་ཟླུམ་པོ་ཅན། །ལྷོ་རུ་སྟོད་ཟུར་བཞི་པ་གྲུ་བཞིའི་དབྱིབས། །མར་རྒྱན་ཀྱང་ནི་གྲུ་བཞིའི་དབྱིབས་ཀྱིས་བརྒྱན། །ནུབ་ཏུ་ཟུར་གཉིས་ཟླ་གམ་དབྱིབས་
ཅན་ཏེ། །མར་རྒྱན་ཚེས་བརྒྱད་ཟླ་བ་ཡུ་བ་ཅན། །བྱང་དུ་དྲག་པོའི་གཏོར་མ་ཟུར་གསུམ་ནི། །མར་རྒྱན་ཀྱང་ནི་ཟུར་གསུམ་དབྱིབས་ཅན་ཏེ། །ཟླུམ་པོ་མར་ཁུ་བྱུགས་པས་དཀར་པོ་སྟེ། །སེར་པོ་ཡུང་བ་མར་བསྲེས་བྱུགས་པས་སེར། །ཟུར་གཉིས་འབྲི་མོག་ཟུར་གསུམ་དྲག་སྣུམ་བྱུག །དཀྱིལ་འཁོར་ཤར་ལྷོ་ནུབ་བྱང་ཕྱོགས་བཞིར་བཀོད་། །ཕྲིན་ལས་རྣམ་བཞི་འགྲུབ་པའི་གཏོར་མ་སྟེ། །གསར་མ་ལ་ནི་མ་བཤད་མེད་ཀྱང་ཆོག །དེ་རྒྱབ་དཀྱིལ་འཁོར་ཕྱོགས་མཚམས་བརྒྱད་པོ་རུ། །ཤར་དུ་མཆོད་ཡོན་ཤར་ལྷོར་ཞབས་བསིལ་དང་། །ལྷོ་རུ་མེ་ཏོག་ལྷོ་ནུབ་བདུག་སྤོས་དང་། །ནུབ་ཏུ་མར་མེ་ནུབ་བྱང་དྲི་ཆབ་དང་། །བྱང་དུ་ལྷ་བཤོས་བྱང་ཤར་རོལ་མོའི་སར། །ཏིང་ཤགས་ལ་སོགས་རོལ་ཆ་གང་བཟང་བཞིག །མེད་ན་ནས་བཞག་མཚམས་འཛིན་མེ་ཏོག་ཟེར། དེ་དག་རྣམས་ནི་ངེས་པར་དགོས་པ་སྟེ། །དེ་རྒྱབ་དཀྱིལ་འཁོར་ཟུར་བཞིར་རྒྱལ་མཚན་ལྟ་བཞི། །མདའ་བཞི་གྲི་བཞི་ཚོན་སྐུད་དྲ་བ་དང་། །མེ་ལོང་བཞི་དང་དར་གྱི་འཕན་བཞི་དང་། །སྟག་གི་སྒྲུབ་སྐོར་ཕུར་ཆུང་བཅུ་གཉིས་དང་། །ཤེལ་སོགས་རིན་ཆེན་དྲྭ་བ་དྲྭ་
ཕྱེད་དང་། །སྟེང་དུ་དར་གྱི་བླ་བྲེ་ལ་སོགས་པ། །རྙིང་མའི་སྒྲུབ་ཆེན་ཆས་ནི་ཡིན་མོད་ཀྱི། །སྨན་བླ་རྔོག་དཀྱིལ་བདུན་སོགས་གསར་མ་ལའང་། །དེ་ལྟར་བྱ་བ་གཞུང་ནས་བཤད་འདུག་གོ །ནང་སྒྲུབ་འདི་ནི་མ་ཧཱ་ཡོ་གའི་ལུགས། །སྤྲོས་པ་ཇི་ལྟར་རྒྱས་བཞིན་བསོད་ནམས་ཆེ། །དེ་ཕྱིར་དེས་ཆོག་མི་བྱ་འབད་པས་བསྒྲུབ། །མ་རྙེད་པ་ལ་སྒྲུབ་པ་བཤོལ་མི་དགོས། །གང་འཛོམ་བརྡའ་ཙམ་བསགས་ལ་སྒྲུབ་ཀྱང་རུང་། །གཞན་ཡང་སྦྱིན་སྲེག་ཚོགས་འཁོར་མཆོད་གཏོར་གྱི། །ཡོ་བྱད་འཛོམ་ཞིང་སྒྲུབ་གཡོག་འཛོམ་ན་ལེགས། །སྟ་གོན་འདི་ནི་ནང་སྒྲུབ་གསང་སྒྲུབ་གཉིས། །ཁྱད་པར་མེད་ཅིང་གསར་རྙིང་སྤྱི་འགྲོ་ཡིན། །མཆོད་རྫས་ཞི་དྲག་ཁྱད་པར་རིག་པས་དཔྱད། །འུ་ཐུག་ངག་ཁྲིད་ཏུག་གུ་ཕྲེང་འདྲ་འདི། །མཁས་པས་གཟིགས་ན་བཞད་གད་གནས་ཡིན་ཀྱང་། །རྨོངས་པ་རྣམས་ལ་སློབ་དཔོན་དཔེ་ཆས་ཆོག །དེ་ཕྱིར་རཱ་ག་ཨ་སྱས་གང་སྨྲས་པ། །བཱིརྱ་སཱ་ག་ར་ཡིས་ཡི་གེར་བཀོད། །རྨོངས་ཕྱིར་མ་ཡིན་གཞན་ལ་ཕན་ཕྱིར་བྲིས།། ༈ །།ན་མོ་གུ་རུ་སརྦ་དེ་བ་ཡེ། དེ་ནས་ཡི་དམ་ནང་སྒྲུབ་ཉམས་ལེན་ཚུལ། །ཐུན་བཞིར་བདག་
མདུན་གཉིས་ཀ་ཚར་རེ་འདོན། །ཐུན་མཚམས་རང་གཞུང་གཏོར་བསྔོས་ཚར་རེ་བྱ། །ཉི་མའི་གུང་ལ་སྦྱིན་སྲེག་རེ་རེ་སྟེ། །ཞི་རྒྱས་དབང་གསུམ་རེས་མོས་གང་འདོད་བྱ། །མ་འབྱོར་རྫ་ས་གཅིག་སྦྱིན་སྲེག་བྱས་ཀྱང་ཆོག །ནུབ་མོ་ཚོགས་འཁོར་རྒྱས་པ་རེ་རེ་འམ། །ཅི་འབྱོར་བློ་སྟོབས་བསྐྱེད་པའི་ཚོགས་རེ་བྱ། །དེ་ལྟར་ཟླ་གཅིག་ཉེར་གཅིག་བཅུ་བཞིའམ། །ཐ་ན་ཞག་བདུན་བསྒྲུབ་ཀྱང་ཆོག་པ་ཡིན། །ཆོ་ག་བཞིན་དུ་བདག་མདུན་གསལ་བ་ཡི། །ཐུགས་ཀར་ས་བོན་སྔགས་འཁོར་འཁོར་བཞིན་པ། །དེ་ལས་འོད་ཟེར་ཁ་དོག་སྣ་ལྔ་པོ། །ལྷ་ཡི་ཁ་དོག་གང་ཡིན་ཤས་ཆེ་བ། །རང་གི་ཞལ་ནས་ཐོན་ཅིང་མཆོད་པའི་ཚུལ། །མདུན་བསྐྱེད་ཞལ་དུ་ཞུགས་ཤིང་ཐུགས་ཀར་ཐིམ། །སྔགས་འཁོར་དྲག་འཁོར་ཐུགས་བསྐྱེད་སྨོན་ལམ་བསྐུལ། །སླར་ཡང་འོད་ཟེར་གསང་བའི་སྦུབས་ནས་ཐོན། །ཞལ་སྦྱོར་ཡོད་ན་ཡབ་ཡུམ་སྦྱོར་མཚམས་ནས། །ཡུམ་གྱི་འོག་ཁྱུ་ནས་ཚུར་བྱུང་རང་ཉིད་ཀྱི། །སྦྱོར་མཚམས་གསང་བའི་སྦུབས་ནས་ཐུགས་ཀར་ཐིམ། །དེ་ལྟར་བར་མཚམས་མེད་པར་འཁོར་དམིགས་བཟླས། །དེ་ནི་མདུན་བསྐྱེད་བསྙེན་པའི་
དམིགས་རིམ་ཡིན། །དེ་ནས་འོད་ཟེར་དེ་ཉིད་སྔགས་ཕྲེང་གྱུར། །དང་པོ་དལ་བུ་དེ་ནས་ཇེ་མགྱོགས་སུ། །དེ་ནས་དྲག་ཏུ་འཁོར་བ་ཉེ་བསྙེན་ཡིན། །བར་དུ་འཁོར་ཚེ་སྔགས་ཕྲེང་དེ་དག་ལས། །འོད་ཟེར་སྣ་ཚོགས་ཕྱོགས་བཅུ་ཁྱབ་པར་འཕྲོས། །རབ་འབྱམས་ཞིང་ཁམས་ཀུན་ན་བཞུགས་པ་ཡི། །རྒྱལ་བ་སྲས་བཅས་ཡི་དམ་ཌཱ་ཀིའི་ཚོགས། །ཀུན་ལ་མཆོད་སྤྲིན་རྒྱ་མཚོས་མཉེས་པར་བྱས། །དེ་དག་ཀུན་གྱི་སྐུ་གསུང་ཐུགས་རྣམས་ལས། །རང་གི་ཡི་དམ་སྐུ་དང་སྔགས་ཕྲེང་དང་། །ཕྱག་མཚན་ས་བོན་ཡིག་འབྲུས་མཚན་པ་རྣམས་། །ཆར་བཞིན་བབས་ནས་བདག་མདུན་གཉིས་ཀར་ཐིམ། །སྔགས་ཀྱི་འོད་ཟེར་སེམས་ཅན་ཀུན་ལ་ཁྱབ། །སྒྲིབ་གཉིས་སྦྱངས་ནས་སངས་རྒྱས་སར་བཞག་སྟེ། །ཚེ་བསོད་དཔལ་འབྱོར་འོད་ཟེར་རྣམ་པར་བསྡུས། །བདག་མདུན་ཐུགས་ཀའི་སྔགས་ཕྲེང་ལ་ཐིམ་བསམ། །དེ་ནི་སྒྲུབ་པའི་དམིགས་པ་དངོས་ཡིན་ཏེ། །གསང་སྔགས་རྙིང་མ་པ་ཡི་ལུགས་ལ་ནི། །མགལ་མེ་ཀླད་ལ་བསྐོར་འདྲའི་ཛབ་དགོངས་ཟེར། །དེ་ཡན་མཚམས་ལ་ཇི་ཙམ་འདུག་པ་ཡི། །རུ་གཉིས་ཙམ་ལ་བྱ་བ་བསྙེན་སྒྲུབ་ཡིན། །དེ་ནས་བདག་
མདུན་བར་གྱི་སྔགས་ཕྲེང་དེ། །མུ་ཏིག་ཕྲེང་བ་ལྟ་བུ་དཀར་པོར་བསྒོམ། །རང་གི་ཞལ་ནས་ཕར་ལ་འཕྲོ་བའི་དུས། །ཞི་བའི་མཆོད་པ་ཕུལ་བའི་མོས་པ་བྱ། །མདུན་གྱི་ཞལ་ཞུགས་སྐུ་ལུས་བརྒྱུད་པའི་ཚེ། །ཞི་བའི་ལས་ལ་དགོངས་པ་གཏད་པར་བསམ། །སྔགས་ཕྲེང་ཚུར་ལ་འཕྲོས་ནས་བྱུང་བའི་དུས། །ཞི་བའི་དངོས་གྲུབ་བདག་ལ་སྩོལ་བར་བསམ། །རང་གི་ལུས་བརྒྱུད་ཐུགས་ཀར་ཐིམ་པའི་ཚེ། །ནད་གདོན་སྡིག་སྒྲིབ་ཉོན་མོངས་ཞི་བར་བསམ། །དེ་བཞིན་ཉིན་གུང་སྔགས་ཕྲེང་སེར་པོ་ལ། །འོད་ཟེར་ཁ་དོག་སྣ་ལྔས་བརྒྱན་པ་ཅན། །དཔེར་ན་རྨ་བྱའི་སྒྲོ་ཡི་ཆུན་པོའི་དབྱིབས། །མཆོད་པ་ཕུལ་དང་ཐུགས་དགོངས་གཏད་པ་དང་། །།དངོས་གྲུབ་གནང་སོགས་ཚེ་བསོད་རྒྱས་པར་དམིགས། །དེ་བཞིན་དགོང་མོ་ནས་བཟུང་སྔགས་ཕྲེང་དམར། །འཁྱོག་ཅིང་འགུག་པ་ལྕགས་སྒྲོག་དབྱིབས་ཅན་དེ། །མཆོད་དང་དགོངས་གཏད་དངོས་གྲུབ་གནང་བ་དང་། །རང་གི་ཐུགས་ཀའི་སྔགས་ཕྲེང་ལ་ཐིམ་པས། །རླུང་སེམས་སྣང་སྲིད་དབང་དུ་འདུས་པར་བསམ། །དེ་ནས་སྲོད་ནས་བཟུང་སྟེ་སྔགས་ཕྲེང་མཐིང་། །ཐག་འཁྱུག་རྣམ་
པར་འཁོར་བར་གྱུར་པ་ནི། །དྲག་པོའི་མཆོད་པ་དགོངས་གཏད་དངོས་གྲུབ་གནང་། །ཐུགས་ཀར་ཐིམ་པས་བདུད་བཞི་ཚར་གཅོད་བསམ། །དེ་ནི་སྒྲུབ་པ་ཆེན་པོའི་དམིགས་པ་སྟེ། །རྙིང་མའི་ལུགས་ལ་ལས་སྦྱོར་ཞེས་བྱའོ། །ཕྱི་སྒྲུབ་བཞིན་དུ་སྔགས་ཤམ་སོ་སོར་སྦྱར། །དེ་ནས་རབ་ཏུ་ལས་བཞིའི་སྦྱིན་སྲེག་བྱ། །འབྲིང་དུ་ཕུན་སུམ་ཚོགས་པའི་སྦྱིན་སྲེག་གཅིག །ཐ་ན་རྫས་གཅིག་སྦྱིན་སྲེག་མན་ངག་ལྟར། །སྒྲུབ་པ་ཐོན་ནས་དངོས་གྲུབ་ལེན་ཆོག་ནི། །གསར་མ་ཡིན་ན་བདག་འཇུག་ཚར་གཅིག་བླངས། །རྙིང་མ་ཡིན་ན་དངོས་གྲུབ་ལེན་ཆོག་བྱ། །དེ་ཡང་གང་ཡིན་གསལ་ཁ་མི་ཤེས་ན། །མདུན་སྐྱེད་དཔྲལ་མགྲིན་ཐུགས་ཀ་ལྟེ་བ་ནས། །ཨོ་དཀར་ཨཱདམར་ཧཱུྃ་མཐིང་ཧྲིལྗང་ཁུ། །འོད་དང་ལྡན་པ་རིམ་བཞིན་འཕྲོས་ནས་ཀྱང་། །རང་གི་དཔྲལ་མགྲིན་ཐུགས་ཀ་ལྟེ་བར་ཐིམ། །རྩ་བའི་སྔགས་ལ་ཤམ་བུ་འདི་བཏགས་ཏེ། །ཀཱ་ཡ་སིདྡྷི་ཨོཾ། ཝཱཀྐ་སིདྡྷི་ཨ༔ ཙིཏྟ་སིདྡྷི་ཧཱུཾ། སརྦ་སིདྡྷི་ཧྲཱིཿ སྒྲིབ་བཞི་དག་ཅིང་དབང་བཞི་ཐོབ་པ་དང་། །སྐུ་བཞི་མངོན་དུ་བྱེད་པའི་སྐལ་ལྡན་བསམ། །རྡོར་དྲིལ་དང་བཅས་ལག་གཡས་སྒྲུབ་བུམ་དང་། །གཡོན་པས་
སྒྲུབ་གཏོར་བཟུང་སྟེ་ལག་གཉིས་བསྣོལ། །མོས་གུས་བསྐྱེད་ཅིང་རང་གི་གནས་བཞིར་གཏུགས། །དངོས་གྲུབ་ཐམས་ཅད་ཐོབ་པར་ངེས་ཤེས་བསྐྱེད། །བུམ་ཆུ་བཏུང་དང་ཁྲུས་བྱ་རིལ་བུ་བཟའ། །དེ་ནས་རྗེས་ཆོག་ཆོ་གའི་གཞུང་ལྟར་ཏེ། །མདུན་བསྐྱེད་གཤེགས་སམ་ཡང་ན་རྟེན་ལ་བསྟིམ། །བདག་བསྐྱེད་སྟོང་པར་བསྡུ་བ་མ་གཏོགས་པ། །བྱང་ཆུབ་མ་ཐོབ་བར་དུ་མི་གཤེགས་ཏེ། །ཕྱག་རྒྱ་སྒོ་བཅད་སྒྲུབ་པ་ཞེས་བྱའོ། །རིལ་བུ་དམ་རྫས་རྟེན་དུ་བཅང་པ་སྟེ། །གཏོར་མོ་ཕྱི་རྒྱབ་མི་འཁྱར་དངོས་གྲུབ་རོལ། །དེ་ནི་ཡི་དམ་ཌཱ་ཀི་སྤྱི་ཁྱབ་བོ། །རང་བཟོ་མ་ཡིན་གསར་རྙིང་སྒྲུབ་གཞུང་ནི། །རྒྱ་མཚོ་ཀུན་ལ་ཤིན་ཏུ་འདྲིས་པའི་མཐུས། །ལག་ཏུ་བླངས་བདེ་སྙིང་དམར་ལག་ཏུ་བཞག །ཀྱེ་མ་དུས་ངན་སྙིགས་མའི་འགྲོ་བ་རྣམས། །ཞིམ་པོ་མི་ལ་བྱིན་ན་སྐྱུགས་པའི་དཔེ། །སྐལ་མེད་རྣམས་ཀྱིས་ཅིར་ཡང་མི་བརྩི་སྟེ། །སྐལ་ལྡན་ལས་ཅན་སྒྲུབ་ལ་སྒྱུ་བརྩོན་པ་རྣམས། །འདི་མཐོང་ལག་པའི་མཐིལ་ནས་གཏེར་རྙེད་ལྟར། །དགའ་སྤྲོ་འཕེལ་ཞིང་དངོས་གྲུབ་གཉིས་ཀྱིས་ཕྱུག །དེ་ཕྱིར་སྔགས་རྒན་རཱ་ག་ཨ་སྱ་ངས། །ཚིགས་སུ་
བཅད་དེ་སྨྲས་རྣམས་ཡིད་ལ་ཟུངས། །དེ་སྐད་སྨྲས་ཚེ་བཱིརྱ་སཱ་ག་རས། །ཤིན་ཏུ་མགྱོགས་པ་རྫུ་འཕྲུལ་ལྟ་བུ་ཡིས། །རབ་ཏུ་གསལ་བ་ཞུན་མར་ངོགས་ལ་བྲིས། །སྦ་འོས་གསལ་བཀོད་ཉེས་པ་མཆིས་པ་རྣམས། །ཆོས་བདག་ཌཱ་ཀི་སྲུང་མའི་ཚོགས་ལ་བཤགས། །འདི་ཕྱིར་སྒྲིབ་པར་མི་འགྱུར་དངོས་གྲུབ་སྩོལ། །དགེ་བས་འགྲོ་ཀུན་རྡོ་རྗེ་འཆང་འགྲུབ་ཤོག །དེ་སྐད་རྟ་ལོ་རྒྱལ་ཟླའི་ཉེར་གཅིག་ནུབ། །རང་གིས་གསང་སྔགས་ཉམས་སུ་བླང་ཚུལ་དང་། །བསྟུན་ནས་སྒྲུབ་ཐབས་ཉམས་མགུར་ཚུལ་དུ་སྨྲས། །ལེའུ་ཉེར་བདུན་པའོ་མངྒ་ལཾ།། །།