ལེའུ་ཉེརབརྒྱད་པ། བསྐྱེད་རིམ་དམིགས་པ་ཤིན་ཏུ་གསལ་བ་ལ། །གསང་སྒྲུབ་ཡེ་ཤེས་མཁའ་འགྲོའི་གདུང་གླུ་ཡོད། །
༼ས༽ རི་ཆོས་མཚམས་ཀྱི་ཞལ་གདམས་ལས། བླ་མེད་གསང་སྔགས་གསར་རྙིང་ཡི་དམ་ཌཱ་ཀི་སྤྱི་ཡི་གསང་སྒྲུབ་ཡེ་ཤེས་མཁའ་འགྲོའི་གདུང་གླུ་ཞེས་བྱ་བ་བཞུགས་སོ། །ན་མོ་གུ་རུ་ཌཱ་ཀི་ནཱི་སིདྡྷི་ཧཱུྃ། གསང་སྔགས་ཀུན་གྱི་བདག་མོ་རྣལ་འབྱོར་མ། །ལྷན་སྐྱེས་ཌཱ་ཀིས་བདག་ལ་བྱིན་གྱིས་རློབས། །གསོན་དང་བླ་མ་བཱིརྱ་སཱ་ག་ར། །གསར་རྙིང་ཡི་དམ་མཁའ་འགྲོ་གང་ཡང་རུང་། །གསང་སྔགས་སྙིང་པོ་གསང་བའི་སྒྲུབ་པ་ནི། །ནང་སྒྲུབ་ཚར་རྗེས་ཉིད་དུ་བྱེད་ན་ནི། །
མཆོད་གཏོར་མི་བསྡུ་ཁ་གསོ་ཙམ་གྱིས་ཆོག །དུས་གཞན་ཡིན་ན་ནང་སྒྲུབ་བཞིན་དུ་བཅའ། །ཐུན་བཞི་བྱེད་ལུགས་ནང་སྒྲུབ་ཁྱད་མེད་ཀྱང་། །ཉིན་གུང་སྦྱིན་སྲེག་འདི་ལ་མི་དགོས་སོ། །བདག་མདུན་ཚང་མ་དུས་བཞིར་བཏང་བྱ་ཞིང་། །བདག་མདུན་གཙོ་བོ་གཉིས་ཀྱི་སྐུ་ལུས་ནང་། །སྟོང་ཞིང་གསལ་བ་ཕྲུ་མ་ཕུས་བཏབ་བཞིན། །རྩ་གསུམ་འཁོར་ལོ་ལྔ་པོ་མོས་ཙམ་བསྒོམ།། །ཧ་ཅང་གསལ་པོ་མ་ཟིན་ན་ཡང་རུང་། །བདག་མདུན་གཉིས་ཀྱི་དཔྲལ་བ་མགྲིན་པ་དང་། །ཐུགས་ཀ་ལྟེ་བ་གསང་གནས་ལྔ་ཡི་༈ དབུས། །རང་གི་ཡི་དམ་གང་ཡིན་དེ་ཉིད་ནི། །དཀར་པོ་དམར་པོ་མཐིང་ག་སེར་པོ་དང་། །ལྗང་གུ་ལྔ་པོ་མངོན་རྟོགས་བཞིན་དུ་བསྒོམ། །ཞལ་སྦྱོར་ལ་སོགས་ཡོད་མེད་མངོན་རྟོགས་བསྟུན། །འཁོར་དུ་རྩ་འདབ་དང་མཉམ་མཁའ་འགྲོ་མ། །སྤྱི་བོར་དཀར་མོ་སུམ་ཅུ་རྩ་གཉིས་ཏེ། །མགྲིན་པར་དམར་མོ་བཅུ་དྲུག་བསྒོམ་པར་བྱ། །སྙིང་གར་སྒྱུ་སྔོན་མོ་བརྒྱད་དང་ལྟེ་བར་ནི། །སེར་མོ་དྲུག་ཅུ་རྩ་བཞི་བསྒོམ་པར་བྱ། །གསང་བར་ལྗང་མོ་ཉི་ཤུ་རྩ་བརྒྱད་དེ། །རང་རྟགས་ཀྱིས་མཚན་གྲི་ཐོད་ཁཊཾ་བསྣམས། །གཙོ་བོ་
རྣམས་ལ་པདྨ་ཉི་ཟླའི་གདན། །འཁོར་རྣམས་ཟླ་བའམ་རོ་ཡི་གདན་ཅན་ནོ། །གཙོ་བོ་ལྔ་ཡི་ཐུགས་ཀར་པད་ཟླའི་གདན། །རང་མདོག་ས་བོན་རང་མདོག་སྔགས་ཕྲེང་འཁོར་། །ཕོ་ལ་གཡས་དང་མོ་ལ་གཡོན་དུ་འཁོར། །རང་གི་ཐུགས་ཀའི་སྔགས་ཕྲེང་འཁོར་བཞིན་ལས། །འོད་ཟེར་སྣ་ལྔ་སྟོང་སྐུད་སྒྲིམ་འདྲ་ཞིག །ཐུགས་ཀའི་ཡི་དམ་མཐིང་ཀའི་ཞལ་ནས་ཐོན། །མགྲིན་པའི་ཡི་དམ་དམར་པོའི་གསང་གནས་ཞུགས། །ཐུགས་ཀར་ཕོག་པས་སྔགས་ཕྲེང་དྲག་ཏུ་འཁོར། །འོད་ཟེར་ཞལ་ནས་ཐོན་ཏེ་གྱེན་དུ་སོང་། །སྤྱི་བོའི་ཡི་དམ་དཀར་པོའི་གསང་བར་ཞུགས། །ཐུགས་ཀར་ཕོག་པས་སྔགས་ཕྲེང་དྲག་ཏུ་འཁོར། །འོད་ཟེར་ཞལ་ནས་ཐོན་ཏེ་ཐུར་དུ་སོང་། །རང་ཉིད་བདག་བསྐྱེད་ཞལ་ནས་ཕར་སོང་སྟེ། །མཆོད་པའི་ཚུལ་དུ་མདུན་བསྐྱེད་ཞལ་དུ་ཞུགས། །གྱེན་དུ་སོང་ནས་སྤྱི་བོའི་ལྷ་དཀར་པོའི། །ཞལ་དུ་ཞུགས་ཤིང་ཐུགས་ཀར་ཕོག་པ་ཡིས། །སྔགས་ཕྲེང་དྲག་འཁོར་འོད་ཟེར་གསང་གནས་ཐོན། །ཐུར་དུ་བྱོན་ནས་མགྲིན་པའི་ལྷ་ཞལ་ཞུགས། །ཐུགས་ཀར་ཐིམ་པས་སྔགས་ཕྲེང་དྲག་ཏུ་འཁོར། །གསང་བ་ནས་ཐོན་
ཐུགས་ཀའི་ལྷ་ཞལ་ཞུགས། །སྔགས་ཕྲེང་དྲག་འཁོར་འོད་ཟེར་གསང་བར་ཐོན། །ལྟེ་བའི་ལྷ་ཞལ་དུ་ཞུགས་སྔགས་ཕྲེང་མྱུར། །གསང་སྦུབས་ནས་ཐོན་གསང་བའི་ལྷ་ཞལ་ཞུགས། །སྔགས་ཕྲེང་དྲག་འཁོར་གསང་བའི་སྦུབས་ནས་ཐོན། །མདུན་བསྐྱེད་གསང་སྦུབས་སམ་ནི་སྦྱོར་མཚམས་ཐོན། །བདག་བསྐྱེད་གསང་སྦུབས་སམ་ནི་སྦྱོར་མཚམས་ཞུགས། །གྱེན་བརྒྱུད་ཐུགས་ཀར་ཐིམ་པས་དངོས་གྲུབ་ཐོབ། །ཕར་ལ་མཆོད་པ་ཚུར་ལ་དངོས་གྲུབ་ཚུལ། །སྔགས་ཕྲེང་དྲག་ཏུ་འཁོར་བས་ཐུགས་དམ་བསྐུལ། །དེ་ལྟར་འོད་ཟེར་རྒྱུན་དུ་འཁོར་བར་བསྒོམ། །དེ་ནི་གསང་སྒྲུབ་བསྙེན་པའི་དམིགས་པའོ། །གསང་སྔགས་རྙིང་མ་པ་ཡི་ལུགས་ལ་ནི། །བ་དག་ཁྲིད་པ་ལྟ་བུའི་ཛབ་དགོངས་ཟེར། །དེ་ནས་འོད་ཟེར་དེ་ཉིད་སྔགས་ཕྲེང་བསྒྱུར། །འཁོར་ལུགས་ཐམས་ཅད་གོང་ལྟར་འཁོར་བར་བསྒོམ། །དེ་ནི་གསང་སྒྲུབ་ཉེ་བར་བསྙེན་པའོ། །དེ་ནས་སྔགས་ཕྲེང་དེ་སྒྱུ་ལྟར་འཁོར་བཞིན་ལས། །འོད་ཟེར་དཔག་ཡས་ནམ་མཁའ་ཁྱབ་པར་སྤྲོས། །བླ་མ་ཡི་དམ་སངས་རྒྱས་བྱང་སེམས་དང་། །དཔའ་བོ་ཌཱཀི་ཆོས་སྐྱོང་སྲུང་མའི་ཚོགས། །ཀུན་
ལ་ཟག་མེད་བདེ་བའི་མཆོད་སྤྲིན་ཕུལ། །དེ་དག་རྣམས་ཀྱི་དཔྲལ་མགྲིན་ཐུགས་ཀ་ནས། །རང་གི་ཡི་དམ་དེ་ཡི་སྐུ་གཟུགས་ནི། །དཀར་སེར་དམར་ལྗང་ཆེ་བ་རི་རབ་ཙམ། །་ཆུང་བ་ཡུངས་འབྲུ་ཙམ་ལ་གྲངས་མེད་པ། །གསུང་ནི་དབྱངས་དང་གསལ་བྱེད་རྟེན་འབྲེལ་སྙིང་། །ཡི་དམ་སྔགས་ཕྲེང་དཀར་སེར་དམར་ལྗང་ཚོགས། །ཐུགས་ནི་རྡོ་རྗེ་རིན་ཆེན་པདྨ་དང་། །རྒྱ་གྲམ་འཁོར་ལོ་ཡི་དམ་ས་བོན་མཚན། །བུ་ཡུག་བཞིན་དུ་ཕྱོགས་རྣམས་ཀུན་ནས་བྱོན། །བདག་མདུན་གནས་ལྔའི་ལྷ་ཚོགས་སོ་སོར་ཐིམ། །རིགས་ལྔའི་རིགས་ཀྱི་དངོས་གྲུབ་ཀུན་ཐོབ་བསམ། །འོད་ཟེར་འགྲོ་དྲུག་སེམས་ཅན་ཀུན་ལ་ཕོག །རིགས་ལྔའི་ཡི་དམ་གོ་འཕང་ལ་བཞག་ནས། །ཀུན་གྱི་ཚེ་བསོད་དཔལ་འབྱོར་འོད་ལྔ་ཡི། །རྣམ་པར་བསྡུས་ནས་བདག་མདུན་ལ་ཐིམ་བསམ། །དེ་ནི་གསང་སྒྲུབ་སྒྲུབ་པའི་དམིགས་པའོ། །དེ་ཡན་གསང་སྒྲུབ་ཅི་ཙམ་བྱེད་པ་ཡི། །རུ་གཉིས་ཙམ་ལ་བསྙེན་དང་སྒྲུབ་པ་བྱ། །དེ་ནས་ལས་སྦྱོར་སྒྲུབ་པ་ཆེན་པོ་ནི། །སྔ་དྲོའི་དུས་སུ་སྔགས་ཕྲེང་དཀར་པོར་བསྒྱུར། །འོད་ཟེར་དཀར་པོས་བདག་དང་འགྲོ་ཀུན་གྱི། །ནད་གདོན་སྡིག་སྒྲིབ་
བར་ཆད་ཐམས་ཅད་ཞི། །ཉིང་གུང་དུས་སུ་སྔགས་ཕྲེང་སེར་པོར་བསྒྱུར། །འོད་ཟེར་སེར་པོས་བདག་དང་འགྲོ་ཀུན་གྱི། །ཚེ་དང་བསོད་ནམས་ཡོན་ཏན་ཡེ་ཤེས་རྒྱས། །དགོང་མོའི་དུས་སུ་སྔགས་ཕྲེང་དམར་པོར་བསྒྱུར། །འོད་ཟེར་དམར་པོས་བདག་དང་འགྲོ་ཀུན་གྱི། །རླུང་སེམས་སྣང་བ་དབང་འདུས་རང་དབང་ཐོབ། །སྲོད་ཀྱི་དུས་སུ་སྔགས་ཕྲེང་མཐིང་ཀར་བསྒྱུར། །འོད་ཟེར་མཐིང་ག་ཚ་ཞིང་སྲེག་པ་ཡིས། །བདུད་བཞི་ལོག་འདྲེན་ཐམས་ཅད་བསྲེག་པར་བྱས། །མཇུག་ཏུ་ལས་བཞིའི་སྦྱིན་སྲེག་འགྲུབ་ན་ལེགས། །གསར་མ་ཡིན་ན་བདག་འཇུག་བླང་བའམ། །རྙིང་མ་ཡིན་ན་དངོས་གྲུབ་ལེན་ཆོག་དང་། །རྗེས་ཆོག་བྱ་ཚུལ་ནང་སྒྲུབ་དག་དང་མཚུངས། །སྒྲུབ་ཡུན་ཞག་བདུན་བཅུ་བཞི་ཉེར་གཅིག་གམ། །ཟླ་གཅིག་ལ་སོགས་རང་གི་ཁམས་དང་བསྟུན། །ཡི་དམ་མཁའ་འགྲོ་སྤྱི་ཡི་གསང་སྒྲུབ་འདི། །རྟ་ལོ་རྒྱལ་ཟླའི་ཉེར་གསུམ་དགོང་ཐུན་སྒྱུ་ལ། །རཱ་ག་ཨ་སྱས་རང་གི་མྱོང་བ་དང་། །བསྟུན་ནས་གསར་རྙིང་ཀུན་གྱི་བཅུད་བསྡུས་ཏེ། །གུ་རུ་བཱིརྱ་སཱ་ག་ར་ལ་གདམས། །དེས་ཀྱང་བརྗེད་པར་ཕངས་ཏེ་ཡི་གེར་
བཀོད། །སྦྲ་འོས་གསལ་བཀོད་ཉེས་པོ་གང་མཆིས་རྣམས། །ཆོས་བདག་ཌའི་སྲུང་མའི་ཚོགས་ལ་བཤགས། །འདི་ཕྱིར་སྒྲིབ་པར་མི་འགྱུར་དངོས་གྲུབ་སྩོལ། །འདིར་འབད་དགེ་བས་འདི་ལ་འབྲེལ་ཐོགས་རྣམས། །མཆོག་ཐུན་དངོས་གྲུབ་དཔལ་ལ་ལོངས་སྤྱོད་ཤོག །ལེའུ་ཉེར་བརྒྱད་པའོ་མངྒ་ལཾ།། །།