ལེའུ་སུམ་ཅུ་པ། ཨ་ནུ་ཡོ་གའི་རྒྱུད་གཞུང་ཉམས་ལེན་ཐབས། །ཡང་གསང་སྒྲུབ་པ་བདེ་ཆེན་རབ་འབར་ཡོད། །
རི་ཆོས་མཚམས་ཀྱི་ཞལ་གདམས་ལས། བླ་མེད་གསར་རྙིང་ཡི་དམ་ཌཀྐི་སྤྱིའི་ཡང་གསང་བླ་ན་མེད་པའི་སྒྲུབ་པོ་བདེ་ཆེན་རབ་འབར་ཞེས་བྱ་བ་བཞུགས་སོ། །ན་མོ་གུ་རུ་དེ་ཝ་ཌཱཀི་ནཱི་ཡེ།། གསར་རྙིང་བླ་མེད་ཡི་དམ་གང་རུང་ལ། །སྦྱར་དུ་རུང་བའི་ཡང་གསང་སྒྲུབ་པ་ནི། །གྲུབ་ཆེན་པཀྵིའི་དགོངས་པ་བཞིན་བཤད་ན། །བདེ་དགྱེས་གསང་གསུམ་ཕག་མོ་སེང་གདོང་མ། །རྒྱལ་བ་རྒྱ་མཚོ་ལ་སོགས་གང་ཡང་རུང་། །སྒྲུབ་རྫས་གཏོར་བསྔོས་རྟེན་གྱི་མཆོད་གཏོར་ཙམ། །ཡོད་ན་ལེགས་ཤིང་མེད་ན་འདིར་མི་དགོས། །ཡང་གསང་རྩ་རླུང་ཐིག་ལེའི་སྒྲུབ་པ་ཡིན། །མཚམས་བསྡམས་བདེ་བའི་གདན་ལ་ལུས་གནད་བསྲང་། །རང་ལུས་ཡི་དམ་གཙོ་རྐྱང་གསལ་བར་བསྒོམ།་་་་་གང་ཡིན་པ་མཆན། །སྐུ་ནང་སྟོང་པ་ཕྲུ་མ་ཕུས་བཏབ་བཞིན། །གསང་གནས་ནས་བཟུང་ཚངས་པའི་བུ་གའི་བར། །ཨ་ཝ་དྷུ་ཏི་ཁང་སྟོང་ཀ་བ་བཞིན། །མདའ་སྨྱུག་ཙམ་པ་ཁ་དོག་སྔོན་པོ་སྟེ། །གཡས་པ་རོ་མ་དམར་པོ་དེ་ལས་ཕྲ། །གཡོན་པ་རྐྱང་མ་དཀར་པོ་དེ་ཙམ་སྟེ། །ཡར་སྣེ་སྤྱི་བོ་ནས་ནི་ཐུར་དུ་གུག །སྣེ་མོ་སྣ་བུག་གཉིས་སུ་ཡོད་པར་བསམ། །
དབུ་མའི་ཡར་སྣེ་ཚངས་བུག་སྟེང་ཉིད་དུ། །སྣ་ཚོགས་རྡོ་རྗེས་མཚན་ཞིང་བཀག་པར་བསྒོམ། །ལྟེ་འོག་མན་ཆད་རྩ་གསུམ་གཅིག་ཏུ་གྱུར། །མར་སྣེ་གསང་བའི་གནས་སུ་ཟུག་པ་ཡང་། །གསང་རྡོར་ཉིད་དང་ཅུང་ཟད་མ་འབྲེལ་བསྒོམ། །དེ་ནི་ཚུལ་ཁྲིམས་མི་འཆལ་གནད་ཟབ་ཡིན། །།འབྲེལ་ན་ཆགས་པ་ཆེ་ཞིང་འཆལ་དོགས་གསུངས། །རྩ་གསུམ་སྐུ་གསུང་ཐུགས་ཀྱི་ངོ་བོ་མཚོན། །རྩ་འདབ་བསྒོམ་ལུགས་བཞེད་པ་མང་ན་ཡང་། །ཐང་ཤིང་ཡལ་གའམ་ནི་གདུགས་རྩིབས་བཞིན། །སྤྱི་བོའི་རྩ་འདབ་སུམ་ཅུ་སོ་གཉིས་དཀར། །ཅུང་ཟད་ཐུར་དུ་གུག་ཚུལ་ཝཾ་ཡིག་མཚོན། །མགྲིན་པའི་རྩ་འདབ་བཅུ་དྲུག་ཁ་དོག་དམར། །རྩེ་མོ་ཡར་ལ་གུག་པ་ཨེ་ཡིག་མཚོན། །སྙིང་གའི་རྩ་འདབ་བརྒྱད་པོ་ཁ་དོག་མཐིང་། །ཅུང་ཟད་ཐུར་དུ་སྦུབ་ཚུལ་ཝཾ་ཡིག་མཚོན། །ལྟེ་བའི་རྩ་འདབ་དྲུག་ཅུ་རྩ་བཞི་ནི། །མདོག་སེར་གྱེན་དུ་ཁ་ཕྱོགས་ཨ་ཡིག་མཚོན། །གསང་གནས་རྩ་འདབ་ཉི་ཤུ་རྩ་བརྒྱད་ནི། །ལྗང་གུ་ཕྲད་དུ་ཐད་ཀར་ཡོད་པའོ། །རྩ་འཁོར་ལྔ་པོ་རིགས་ལྔའི་ཕོ་བྲང་དངོས། །ཕྱི་རོལ་ཞིང་ཁམས་ལྔ་དང་ངོ་བོ་གཅིག །འདི་
དག་ཡོན་ཏན་བསྐྱེད་པ་རྩ་ཡི་མཆོག །དེ་མིན་རྩ་འདབ་གྲངས་ལས་འདས་པ་རྣམས། །སྐྱོན་དང་ཡོན་ཏན་རྣམ་གྲངས་མང་པོ་བསྐྱེད། །དེ་ཕྱིར་ཡིད་ལ་མི་དམིགས་པ་ཉིད་ལེགས། །དེ་ནས་རླུང་ནི་དགུ་ཕྲུགས་བུས་བྱས་ཏེ། །འཇམ་རླུང་ཅུང་ཟད་དལ་བུས་བཟུང་བྱས་ཏེ། །འཁྲུལ་འཁོར་ཡན་ལག་ལྔ་སྦྱོང་བྱ་བ་ནི། །དེ་ནི་རིགས་ལྡན་གྱི་ནི་གཞི་བཟུང་བ། །དཔག་བསམ་གྱི་ནི་ཤིང་འཛུགས་ཅེས་བྱ་སྟེ། །ལུས་དང་རྩ་ཡི་སྟོང་ར་བསྒོམ་པ་ཡིན། །དེ་ནས་རླུང་གི་རྣལ་འབྱོར་བསྒོམ་པ་ནི། །སྣ་བུག་གཡོན་དང་མཉམ་དུ་རྒྱུ་དུས་བཟུང་། །གཡས་ནས་རྒྱུ་དུས་བཟུང་ན་གེགས་སྐྱོན་འཕེལ། །སྣ་རྩེ་སོར་ནི་བཅུ་དྲུག་ཚད་ཙམ་ནས། །རླུང་ནི་ཁ་དོག་ལྔ་ལྡན་སྟོང་སྐུད་བཞིན། །སྣ་སྒོ་ནས་ཞུགས་རོ་རྐྱང་ནས་བརྒྱུད་དེ། །ནང་དུ་ཞུགས་པ་དམིགས་ཤིང་དལ་བུས་རྡུབ། །འོག་སྒོ་བསྡམས་ཤིང་གསུས་པ་ཐེར་གྱིས་དགང་། །འོག་སྒོའི་ཞབས་སུ་གོས་སྣེ་ཧྲིལ་པོ་བཞག །དེ་ཡིས་འོག་རླུང་ཤུགས་ཀྱིས་ཟིན་པའི་གནད། །སྟེང་རླུང་མགྲིན་པ་མན་ཆད་བཀང་བ་ནི། །བུམཅན་ཡིན་ཏེ་སྟོད་འཚང་ལ་སོགས་སེལ། །སྙིང་ག་མན་ཆད་བཀང་བ་ལེགས་པ་
ཡིན། །དྲག་ཏུ་རྔུབ་ཅིང་དགང་ན་ནག་ཐོམ་འགྲོ། །དལ་བུས་འཇམ་ལ་རིང་བར་རྔུབ་བྱས་ཏེ། །གསུས་པ་ཐེར་གྱིས་དགང་ལ་ཅི་ནུས་བཟུང་། །དམིགས་པ་རོ་རྐྱང་ནས་ཞུགས་རླུང་དེ་ནི། །དབུ་མའི་ནང་ནས་སྙིང་གར་ཐིམ་པར་བསྒོམ། །མ་ཐུབ་གྲུ་མོ་གཡས་གཡོན་མཚན་བརྡབ་བྱ། །དམིགས་པ་ལུས་ཀྱི་བ་སྤུའི་བུ་ག་ནས། །རླུང་ནི་སྔོ་དངས་སིབ་སིབ་ཕྱིར་ཐོན་བསམ། །དེ་ཡིས་རླུང་ཁུག་ཅུང་ཟད་རིང་བར་ནུས། །དེ་ནས་བཟུང་བར་མ་ནུས་གཏོང་དགོས་ཚེ། །སྣ་བུག་གཉིས་ནས་ལྷག་མ་མེད་པར་བུས། །གེགས་སྐྱོན་སྡིག་སྒྲིབ་དང་བཅས་ཕྱིར་ཐོན་ནས། །རྩ་དང་ལུས་ནང་སྟོང་པ་སང་ངེ་བསྒོམ། །ཟིན་རྟགས་སྔར་ལས་རླུང་ཁུག་རིང་འགྱུར་ཞིང་། །ཡུན་རིང་བཟུང་ཡང་མི་བདེ་མེད་པ་འབྱུང་། །རང་ཉིད་ལུས་གནད་བཅས་ཤིང་རླུང་བཟུང་ཚེ། །མདུན་དུ་མཆེད་གྲོགས་གྲྭ་པ་ཞིག་བཞག་སྟེ། །སྐྱིལ་ཀྲུང་བཅས་ཏེ་ལག་གཡོན་ཕྲེང་བ་བཟུང་། །ལྟ་མགྱོགས་པར་ལག་གཡས་པུས་མོ་གཡས་དང་གཡོན། །དཔྲལ་བར་རེག་ཅིང་སེ་གོལ་གཅིག་བརྡབ་སྟེ། །དེ་ནས་ཕྲེང་བ་གཅིག་ནི་བཅད་བྱ་བ། །དེ་འདྲ་བརྒྱ་དང་བརྒྱད་ཀྱི་ཡུན་
གྱི་བར། །རླུང་ནི་གཏོང་མི་དགོས་པར་བཟུང་ཐུབ་ན། །རླུང་ནི་འབྱངས་པའི་ཚད་དུ་བཞག་པ་ཡིན། །དེ་འབྱངས་འཕོ་བ་བསྒོམ་ཡང་ནུས་པ་ཐོན། །གཏུམ་མོ་བསྒོམ་ཡང་། དྲོད་སོགས་སྐྱེ་བ་ཡིན། །དེ་ལ་བུམ་ཅན་མིང་དུ་བཏགས་པའང་ཡོད། །དེ་ཉིད་བུམ་ཅན་མིན་གསུངས་བཀག་པའང་མཛད། །འོན་ཀྱང་སྡོམ་འབྱུང་རྒྱུད་ལས་དེ་གསལ་ཕྱིར། །རླུང་གི་རྟགས་ཐོན་ཚད་དེ་ངེས་པ་ཡིན། །དེ་ནས་ཐིག་ལེའི་རྣལ་འབྱོར་བསྒོམ་པ་ནི། །ཐུན་མོང་མ་ཡིན་པཀཱིའི་ཟབ་གནད་ནི། །རྩ་འཁོར་ལྔ་ཡི་དབུས་མ་དབུ་མའི་ནང་། སྤྱི་བོར་གཏི་མུག་ངོ་བོ་ཨོ་དཀར་པོ། །མགྲིན་པར་འདོད་ཆགས་ངོ་བོ་ཨཱཋདམར་པོ། །སྙིང་གར་ཞེ་སྡང་ངོ་བོ་ཧཱུྃ་མཐིང་ནག །ལྟེ་བར་ང་རྒྱལ་ངོ་བོ་ཧཱུྃ་སེར་པོ། །གསང་བར་ཕྲག་དོག་ངོ་བོ་ཨ་ལྗང་གུ། །དུག་ལྔ་ཡེ་ཤེས་ལྔ་དང་རིགས་ལྔ་རྣམས། །རྒྱུ་དང་འབྲས་བུའི་ཚུལ་དུ་གཅིག་ཕྱིར་བསྒོམ། །དབུ་མའི་མར་སྣེ་གསང་གནས་འཁོར་ལོའི་འོག །ཐིག་ལེ་དམར་པོ་རཾ་གྱིས་མཚན་པ་ཞིག །ཨ་ཐུང་གཏུམ་མོའི་ངོ་བོར་བསྒོམ་པར་བྱ། །དེ་ནི་པཀཱིའི་གདམས་ངག་ལུགས་ཡིན་གྱི། །གཏུམ་མོའི་རང་གནས་ལྟེ་འོག་སོར་བཞིའི་
ཐད། །དེ་རུ་བསྒོམ་ན་རྒྱུད་དང་མཐུན་པ་ཡིན། །ཨ་ཐུང་ཐིག་ལེ་རཾ་ཡིག་གང་ཡང་རུང་། །ཨ་ཡིག་རིང་ཆ་མེད་པ་ལྕགས་སྲེག་མདོག །ཐིག་ལེ་བསྒོམ་པའི་རྩེ་མོར་མེ་ལྕེ་ནི། །སུམ་འཁྱོགས་དམར་པོ་གཅན་གཟན་སྤུ་ཙམ་པ། །སུམ་འཁྱོགས་དམར་པོ་ཨ་ཡིག་འཕྲེད་བསྟན་དབྱིབས། །།རཾ་ཡིག་བསྒོམ་པའི་རྩེ་མོར་དེ་དང་འདྲ། །ཨ་ཐུང་ཕག་མོའི་ངོ་བོ་ཞེས་བྱ་བ། །མ་ལས་ཐོབ་པའི་ཐེག་ལེ་དམར་པོ་ནི། །ཕག་མོ་དངོས་ཡིན་དེ་ཉིད་བསྒོམ་པའི་རྟེན། །ལུས་ཀྱི་དྲོད་རྣམས་ཐམས་ཅད་དེས་བསྐྱེད་ཕྱིར། །ཐ་མལ་པ་ཡིས་ཕོ་བའི་མེ་དྲོད་ཟེར། །རླུང་བཟུང་རོ་རྐྱང་ནས་ཞུགས་དེ་ལ་ཕོག །སོལ་བའི་མེ་ལ་སྦྱད་པ་བརྒྱབ་བཞིན་འབར། །གསང་གནས་འོག་ཏུ་བསྒོམ་ན་ཡར་འབར་ཏེ། ། ལྟེ་འོག་བསྒོམ་ན་རེ་ཞིག་ཕྱིར་ལ་འབར། །དམར་དང་ཁྱུག་ཁྱུག་ཅུང་ཟད་འབར་བར་བསམ། །སྐད་ཅིག་མི་སྡོད་འཁྱུག་འཁྱུག་གཡོ་བར་བསམ། །དབུ་མའི་ཡར་སྣེ་ཚངས་པའི་བུ་ག་རུ། །ཐིག་ལེ་དཀར་པོ་དངུལ་ཆུའི་རྡོག་པོ་བཞིན། །ཧཾ་ཡིག་དཀར་པོ་མགོ་བོ་ཐུར་བསྟན་མཚན། །ཕ་ལས་ཐོབ་པའི་བྱང་སེམས་ཀུན་གྱི་བཅུད། །བཀྲག་མདངས་ལུས་
སྟོབས་ཐམས་ཅད་སྐྱེད་པའི་གཞི། །བདེ་མཆོག་ལ་སོགས་ཧེ་རུ་ཀ་དངོས་ཉིད། །དེ་ལྟར་ཐིག་ལེ་དཀར་དམར་གསལ་བཏབ་ནས། །རླུང་གཅིག་ཚུར་ལ་རྔུབ་པ་དང་བསྟུན་ནས། །དུག་ལྔའི་སྒོ་ནས་བསགས་པའི་སྡིག་སྒྲིབ་དང་། །ལམ་རྒྱུད་ལྔ་རུ་སྐྱེ་བའི་སྡིག་སྒྲིབ་ཀུན་་་་ངན་སོང་གསུམ་དང་ལྷ་དང་ལྷ་མིན་གཅིག་ཏུ་རྩི་བ་ཡིན་ཀྱང་འདིར་ལྷ་མི་གཉིས་གཅིག་ལ་བརྩི་མཆན། །འོད་ཟེར་ལྔ་ཡི་ཚུལ་དུ་ཚུར་བསྡུས་ཏེ། །གནས་ལྔའི་ཡིག་འབྲུ་ལྔ་ལ་ཐིམ་པར་བསྒོམ། །དེ་ནས་རླུང་བཟུང་གཏུམ་མོ་འབར་བ་ཡིས། །ཕྲག་དོག་སྒྲིབ་པ་ལྷ་མིན་སྐྱེ་བའི་རྒྱུ། །ཨ་ཡིག་ལྗང་གུ་ཡེ་ཤེས་མེ་ཡིས་བསྲེགས། །དེ་ཉིད་ཡི་དམ་གང་ཡིན་ལྗང་གུར་གྱུར། །རྩ་འདབ་རེ་ལ་ཌཱ་ཀི་ལྗང་མོ་རེ། །སྣ་ཚོགས་རྡོ་རྗེས་མཚན་པའི་གྲི་ཐོད་དང་། །ཁ་ཊཱ་མཆན་བཅུག་གར་སྟབས་བཞུགས་པར་དམིགས། །དེ་ནས་གཏུམ་མོ་ཡར་ལ་སྦྱར་བ་ཡིས། །ང་རྒྱལ་སྒྲིབ་པ་ལྷ་རུ་སྐྱེ་བའི་རྒྱུ། །ཏཱཾ་ཡིག་བསྲེགས་ནས་ཡི་དམ་སེར་པོར་བསྒྱུར། །རྩ་འདབ་གྲངས་ཀྱི་ཌཱཀི་སེར་མོ་རྣམས། །རིན་ཆེན་མཚན་པའི་གྲི་ཐོད་ཁཊཾ་ག །དེ་ནས་གཏུམ་མོ་ཡར་འབར་སྙིང་ག་གང་། །ཞེ་སྡང་སྡིག་སྒྲིབ་དམྱལ་བར་སྐྱེ་བའི་
རྒྱུ། །ཧཱུྃ་བསྲེགས་ཡི་དམ་མཐིང་ཀའི་སྐུ་རུ་གྱུར། །རྩ་འདབ་ཌཱཀི་རྡོ་རྗེ་གྲི་ཐོད་ཅན། །གཏུམ་མོ་ཡར་འབར་མགྲིན་པའི་རྩ་འདབ་གང་། །འདོད་ཆགས་སྒྲིབ་པ་ཡི་དྭགས་སྐྱེ་བའི་རྒྱུ། །ཨཱཙྪཡིག་བསྲེགས་ནས་ཡི་དམ་དམར་པོར་བསྒྱུར། །རྩ་འདབ་གྲངས་ཀྱི་ཊཱཀི་དམར་མོ་ནི། །པདྨས་མཚན་པའི་གྲི་ཐོད་ཁཊཾ་ག །དེ་ནས་ཡར་འབར་སྤྱི་བོའི་རྩ་འདབ་གང་། །གཏི་མུག་སྒྲིབ་པ་དུད་འགྲོར་སྐྱེ་བའི་རྒྱུ། །ཨོ་ཡིག་བསྲེགས་ནས་ཡི་དམ་དཀར་པོར་བསྒྱུར། །རྩ་འདབ་གྲངས་ཀྱི་ཌཱ་ཀི་དཀར་མོ་ནི། །འཁོར་ལོས་མཚན་པའི་གྲི་ཐོད་ཁཊཾ་ག །འཁོར་རྣམས་ཐམས་ཅད་གཙོ་བོར་ཞལ་གཟིགས་བསྒོམ། །དེ་ལྟར་རྩ་གནས་ལྷ་ཚོགས་གསལ་ཐེབས་ནས། །རྩ་འདབ་ལྔ་ཡི་གཙོ་བོའི་ཐུགས་ཀ་རུ། །ཞི་བར་ཟླ་བ་ཁྲོ་བོར་ཉི་མའི་གདན། །དེ་དབུས་ས་བོན་རང་རང་སྔགས་ཀྱིས་བསྐོར། །ཕོ་རིགས་གཡས་འཁོར་མོ་རིགས་གཡོན་དུ་འཁོར། །ས་བོན་སྔགས་ཀྱི་ཁ་དོག་སྐུ་མདོག་གཅིག །འཁོར་རྣམས་ཐུགས་ཀར་ཡིག་འབྲུ་རེ་རེ་སྟེ། །དཀར་མོའི་ཐུགས་ཀར་ཧཱི༔ཡིག་དཀར་པོ་དང་། །ཨོ་བོ་གསུམ་པོ་གང་རུང་བསྒོམ་ཡང་རུང་། །སྔོན་མོའི་
ཐུགས་ཀར་ཧ་ཡིག་སྔོན་པོ་དང་། །སེར་མོའི་ཐུགས་ཀར་རཾ་ཡིག་སེར་པོ་དང་། །དམར་མོའི་ཐུགས་ཀར་ནི་ཡིག་དམར་པོ་རེ། །ལྗང་མོའི་ཐུགས་ཀར་ས་ཡིག་ལྗང་གུའོ། །དེ་ལྟར་གསལ་བཏབ་སྔགས་ནི་ཡིད་བཟླས་བྱ། །རླུང་ཞིག་ཕར་ལ་བུས་པ་དང་བསྟུན་ནས། །རང་མདོག་འོད་ཟེར་ཁ་དོག་རྣམ་པ་ལྔ། །ནམ་མཁའ་ཁྱབ་པར་འཕྲོས་པས་སངས་རྒྱས་དང་། །བྱང་སེམས་ཡི་དམ་ཌཱཀི་ཐམས་ཅད་མཆོད། །ཐམས་ཅད་བསྒོམས་འདྲའི་རིགས་ལྔའི་ལྷར་གྱུར་ནས། །རླུང་ཞིག་ཚུར་ལ་རྔུབ་པ་དང་བསྟུན་ནས། །གནས་ལྔའི་ལྷ་ལ་རང་རང་སོ་སོར་ཐིམ། །ཡེ་ཤེས་གཞུག་དང་དབང་བསྐུར་བྱིན་རླབས་ཐོབ། །དབང་རྟགས་རིགས་ལྔ་སོ་སོའི་དབུ་བརྒྱན་པ། །དཔྲལ་བའི་གཙོ་བོ་རྣམ་སྣང་དབུ་བརྒྱན་དང་། །འཁོར་རྣམས་ཕྱག་མཚན་འཁོར་ལོ་དཀར་པོས་བརྒྱན། །དེ་བཞིན་མགྲིན་པར་སྣང་མཐའ་པདྨ་དང་། །སྙིང་གར་རྡོར་སེམས་རྡོ་རྗེ་རྩེ་ལྔ་པ། །ལྟེ་བར་རིན་འབྱུང་རིན་ཆེན་ཟུར་བརྒྱད་པ། །གསང་བར་དོན་གྲུབ་སྣ་ཚོགས་རྡོ་རྗེས་བརྒྱན། །དེ་ལྟར་གནས་ལྔར་སྒྲིབ་པ་སྦྱོང་ཚུལ་དང་། །ལྷ་བསྒོམ་ཡེ་ཤེས་བསྟིམ་དང་དབང་བསྐུར་བ། །ཁྲིད་
ལྟར་བྱེད་ན་རྩ་གནས་རེ་རེ་ལ། །ཞག་བདུན་ལྔའམ་གསུམ་སོགས་རྩེ་གཅིག་སྦྱོང་། །ཐོན་ཆོས་སྔོན་ལྟར་དུས་གཅིག་བསྒོམ་པ་སྟེ། །ཡང་གསང་སྒྲུབ་པའི་དུས་སམ་རྒྱུན་ཁྱེར་དུས། །འདི་ལྟར་དུས་གཅིག་བསྒོམ་པ་ཕྱག་ལེན་ལགས། །འདི་སྐབས་འཁྲུལ་འཁོར་ནཱ་རོ་དྲུག་སྐོར་ཏེ། །གསང་གནས་དམིགས་ཚེ་རྐང་ལག་བརྐྱང་བསྐུམ་ཡིན། །ལྟེ་བའི་སྐབས་སུ་སྐེད་པ་བསྐོར་བ་དང་། །སྙིང་གའི་དུས་སུ་རོ་སྟོད་གཡས་གཡོན་གཅུ། །མགྲིན་པའི་དུས་སུ་མགྲིན་པ་གཡོན་ནས་བསྐོར། །སྤྱི་བོའི་སྐབས་སུ་མགོ་བོ་དགྱེ་རྒུའོ། །འདི་སྐབས་བསྙེན་པ་གཙོ་ནི་མི་ཆེ་སྟེ། །རླུང་དང་སྔགས་དང་ངག་གསུམ་དོན་གཅིག་ཕྱིར། །རླུང་དང་འཁྲུལ་འཁོར་ཁོ་ན་གལ་ཆེན་ཡིན། །གལ་ཏེ་རྒས་སམ་ནད་བུ་ཅན་ལ་སོགས། །རླུང་དང་འཁྲུལ་འཁོར་མི་ལྕོགས་མི་ཆུན་ན། །སྔགས་བཟླ་དམིགས་པ་ཁོ་ནས་ཆོག་པ་ཡིན། །དེ་ཡིས་དྲོད་དང་བདེ་བ་མི་སྐྱེ་ཡང་། །ཡང་གསང་སྒྲུབ་པ་ཐེམ་ཞིང་བྱིན་རླབས་འབྱུང་། །དེ་ནས་རླུང་བཟུང་གཏུམ་མོ་དྲག་ཏུ་སྦྱར། །གསང་གནས་ནས་བཟུང་རྩ་འཁོར་ལྔ་པོ་ཡི། །ལྷ་ཚོགས་ཐམས་ཅད་གཏུམ་མོའི་མེ་ཡིས་ཞུ། །སྐུ་
མདོག་དང་མཚུངས་ཐིག་ལེ་རེ་རེར་གྱུར། །སྤྱི་བོའི་ཧཾ་ལས་བྱང་སེམས་དཀར་པོ་ཡི། །ཐིགས་པ་ཆར་ཟིམ་ལྟ་བུར་བབས་པ་ཡིས། །རྩ་གནས་ཐིག་ལེ་རྣམས་ལ་དེས་བྲན་པས་། །ལྷ་རྣམས་སྔར་དང་མཐུན་པར་སྐད་ཅིག་གསལ། །བཀྲག་དམངས་གཟི་བརྗིད་སྔར་ལས་བདུན་འགྱུར་ཚེ། །སླར་ཡང་རླུང་བཟུང་གཏུམ་མོའི་མེ་སྦར་བས། །སྤྱི་བོའི་ཧཾ་ལས་བྱང་སེམས་རྒྱུན་བབས་པས། །རྩ་གནས་ལྷ་ཚོགས་ཀུན་གྱི་ཞལ་དུ་ཞུགས། །སྐུ་ལུས་བདེ་བ་རྒྱས་ཤིང་བཀྲག་མདངས་འཕེལ། །གཙོ་བོ་ལྔ་པོ་ཡབ་ཡུམ་སྦྱོར་བ་མཛད་། །སྦྱོར་མཚམས་བྱང་སེམས་དཀར་དམར་བབ་པའི་རྒྱུན། །རྩ་འདབ་ལྔ་གང་ལྷག་མས་ལུས་ཀུན་གང་། །བདག་ལུས་བདེ་བ་ཚད་མེད་སྐྱེས་པར་བསྒོམ། །འདི་སྐབས་ལུས་སྦྱོང་སོ་བདུན་འཁྲུལ་འཁོར་བྱ། །གལ་ཏེ་ལུས་ལ་བདེ་བ་དངོས་སྐྱེ་ཚེ། །བདེ་བའི་ངོ་བོ་བལྟས་ལ་བདེ་སྟོང་བསྲེ། །འདི་ལ་བསྙེན་སྒྲུབ་ལས་སྦྱོར་ཐ་སྙད་མེད། །རྩ་རླུང་ཐིག་ལེ་གསུམ་གྱི་རྣལ་འབྱོར་ཡིན། །ཐིག་ལེ་སྒོམ་པར་ཆུ་ཟླའི་གར་བསྒྱུར་ཟེར། །འདི་ལ་སྒྲུབ་པའི་ཚད་དང་ཞག་གྲངས་མེད། །རྟགས་ཐོན་བྱེད་ན་རྩེ་གཅིག་བསྒོམ་པ་
དང་། །རྒྱུན་ཁྱེར་བྱེད་ན་ཐུན་རེ་སྒོམ་ཡང་རུང་། །བདག་ཀྱང་སྔ་སོར་རྩེ་གཅིག་སྒོམ་པ་དང་། །ཕྱིས་ནི་རྒྱུན་ཁྱེར་ཆག་མེད་ཐུན་རེ་སྟེ། །རླུང་དང་འཁྲུལ་འཁོར་ལྕོགས་དང་མི་ལྕོགས་དེ། །རང་གི་དལ་ཁོམས་བསྟུན་ཏེ་གང་འདོད་རུང་། །དམིགས་པ་ཐུན་རེ་འཁྲུལ་འཁོར་མ་ཆག་ན། །ཁམས་བདེ་ནད་རིགས་ཀུན་ལ་ཕན་པར་མཐོང་། །རང་གི་ཉམས་མྱོང་དང་བསྟུན་གོ་བདེ་བར། །ཤིན་ཏུ་བསྡུས་པ་ས་བོན་ཙམ་ཡིན་གྱི། །རྒྱས་པ་གྲུབ་ཆེན་ཀརྨ་པཀྴི་ཡི། །གདམས་ངག་རྒྱ་མཚོ་མཐའ་ཡས་གཞུང་ཆེན་དང་། །ཟབ་ཆོས་རྒྱ་མཚོ་མཐའ་ཡས་གཉིས་པོ་ཡི། །གཞུང་དང་ཆ་ལག་ཡིག་ཆ་དཔག་མེད་པ། །བཀའ་འབུམ་ནང་ནས་འབྱུང་བ་གཟིགས་པས་གསལ། །བླ་མེད་རྒྱུད་སྡེ་ཀུན་གྱི་བཅུད་ཡིན་ཏེ། །གྲུབ་ཆེན་པཀྴི་རྒྱ་ནག་ཧོར་གྱི་མཚམས། །གྲུབ་རྟགས་མང་པོ་བསྟན་པ་རྗེས་དང་ནི། །གདམས་ངག་ཡིན་སྙམ་ཕྱག་དཔེ་ཐམས་ཅད་དང་། །སྐུ་ཆས་ཐམས་ཅད་བཅོམ་ནས་གཅིག་པུར་བཞག །དེ་ཚེ་ཕྱག་དཔེ་ཅི་ཡང་མེད་པའི་དུས། །རྒྱ་གར་གྲུབ་ཆེན་ཐམས་ཅད་ཞལ་གཟིགས་ཏེ། །ཐམས་ཅད་ཨ་ཙ་ར་ཡི་ཆ་ལུགས་
ཀྱི། །མི་རེས་གདམས་ངག་སྣ་རེ་བྲི་བར་གཟིགས། །དེ་དོན་ཐུགས་སུ་ཆུད་པའི་སྙིང་པོ་སྟེ། །རླུང་དང་དམིགས་པའི་འཕྲོ་འདུ་མ་གཏོགས་པ། །རྫས་དང་འཁོར་ལོ་སྔགས་སོགས་མི་དགོས་པར། །མཆོག་ཐུན་ཕྲིན་ལས་རྣམ་བཞི་ཀུན་འགྲུབ་པའི། །སྙན་བརྒྱུད་གདམས་ངག་རྩ་བ་འདི་ཡིན་ཏེ། །འདི་ཡི་ཆ་ལག་བྱེ་བྲག་དཔག་ཏུ་མེད། །པཀྴིས་གསུངས་པའི་ཟབ་ཆོས་ཕལ་ཆེར་རྣམས། །རྩ་བ་འདི་ལས་འཕྲོས་པའི་ཡན་ལག་ཡིན། །གསར་རྙིང་བླ་མེད་རྒྱུད་སྡེ་ཀུན་ལ་སྦྱར། །ཁྱད་པར་བླ་མེད་བདེ་དགྱེས་གསང་གསུམ་དང་། །ནག་རྒྱལ་ཕག་གསུམ་རྣམས་ཀྱི་ཁྱད་ཆོས་ཡིན། །འདི་ནི་ཟབ་མོའི་བསྐྱེད་རིམ་ཞེས་ཀྱང་བྱ། །རྩ་རླུང་ཡིན་པས་རྫོགས་རིམ་ཕྱོགས་སུའང་གཏོགས། །ཡང་གསང་བླ་ན་མེད་པའི་སྒྲུབ་ཐབས་ཡིན། །ཞག་རེའི་ནང་དུ་གཏོར་བསྔོས་རེ་བྱས་ཏེ། །གཏོར་མགྲོན་ཡེ་ཤེས་སྐད་ཅིག་སྤྱན་དྲངས་ལ། །གཏོར་མ་བསྔོ་ཞིང་མཆོད་བསྟོད་ཕྲིན་ལས་བཅོལ། །ཡེ་ཤེས་རང་བསྟིམ་འཇིག་རྟེན་གཤེགས་པར་དམིགས། །དེ་མིན་མདུན་བསྐྱེད་ལ་སོགས་འདི་ལ་མེད། །གསང་བ་རྩ་རླུང་ཐིག་ལེའི་དཀྱིལ་འཁོར་ལ། །བརྟེན་
ནས་སྒྲུབ་པ་ཨ་ནུ་ཡོ་གའི་ལུགས། །གསར་མའི་ལུགས་ལ་ལུས་དཀྱིལ་ཞེས་ཀྱང་བྱ། །པཀྵིའི་དགོངས་པ་གསར་རྙིང་ཟུང་འཇུག་དང་། །ཕྱག་རྫོགས་ཟུང་། །འཇུག་དགོངས་པའི་མཐར་ཐུག་ཡིན། །དེ་སྐད་རྟ་ལོ་ཁྲུམས་ཟླའི་ཉེར་གསུམ་ལ། །སྔ་དྲོའི་ཐུན་སྐབས་རཱ་ག་ཨ་སྱས་སྨྲས། །བླ་མ་བརྩོན་འགྲུས་རྒྱ་མཚོས་ཡི་གེར་བྲིས། །འགལ་འཁྲུལ་ཉེས་པ་སྲུང་མ་རྣམས་ལ་བཤགས། །དགེ་བས་འགྲོ་ཀུན་རྡོ་རྗེ་འཆང་འགྲུབ་ཤོག །ལེའུ་སུམ་ཅུ་ཐཾ་པ་མངྒ་ལཾ།། །