ལེའུ་སོ་གཅིག་པ། ཨ་ཏི་ཡོ་གའི་རྒྱུད་ཀྱི་ཉམས་ལེན་ཐབས། །དེ་བཞིན་ཉིད་སྒྲུབ་དག་པ་རབ་འབྱམས་ཡོད། །
༼ཀི༽ རི་ཆོས་མཚམས་ཀྱི་ཞལ་གདམས་ལས། བླ་མེད་ཡི་དམ་སྤྱིའི་དེ་ཁོ་ན་ཉིད་ཀྱི་སྒྲུབ་པ་སྣང་སྲིད་དག་པ་རབ་འབྱམས་ཞེས་བྱ་བ་བཞུགས་སོ། །ན་མོ་མ་ཧཱ་གུ་རུ་ཌཱཀི་ནཱི་ཡེ། བླ་མ་མཆོག་དང་ཡི་དམ་ཌཀི་ལ། །ཕྱག་འཚལ་གུས་བཏུད་བཀའ་ཡི་གནང་བ་ཞུ། །རྫོགས་པ་ཆེན་པོ་ཨ་ཏི་ཡོ་གའི་ལུགས། །དེ་ཁོ་ན་ཉིད་སེམས་ཀྱི་དཀྱིལ་འཁོར་དུ། །སྣང་སྲིད་གཞིར་བཞེངས་དག་པ་རབ་འབྱམས་ལྷ། །གསར་མའི་ཆོས་ལུགས་སྐད་ཅིག་དྲན་རྫོགས་ཟེར། །སྭ་བྷ་ཝ་སོགས་སྔགས་ཀྱིས་སྦྱོང་མི་དགོས། །སྟོང་ཉིད་ལྟ་བའི་ངང་ལ་གནས་བཞིན་
དུ། །ངག་ཏུ་མངོན་རྟོགས་ཆོ་ག་འདོན་མི་དགོས། །དྭངས་པའི་མཁའ་ལ་འཇའ་ཚོན་ཤར་བ་བཞིན། །རང་ཉིད་ཡི་དམ་ལྷ་ཡི་སྐུར་བསྒོམས་ཏེ། །སྣོད་ཀྱི་འཇིག་རྟེན་འདི་ནི་གཞལ་ཡས་ཁང་། །བཅུད་ཀྱི་སེམས་ཅན་བདག་བསྐྱེད་ལྷ་ཡི་འཁོར། །གདོད་ནས་དམ་ཚིག་ཡེ་ཤེས་དབྱེར་མེད་དེ། །རང་ལུས་གདོད་ནས་དམ་ཚིག་སེམས་དཔའ་ཉིད། །རང་གི་སེམས་ཉིད་ཡེ་ཤེས་སེམས་དཔའ་སྟེ། །ཡིན་ལ་ཡིན་ཤེས་གསལ་གདབ་དབང་བསྐུར་ཉིད། །སྟོང་ཉིད་རྩི་དང་མ་བྲལ་ལྟ་བའི་ངང་། །ཡི་དམ་ལྷ་སྐུ་གསལ་སྟོང་ཟུང་དུ་འཇུག །འདི་ཉིད་བསྐྱེད་རྫོགས་ཟུང་འཇུག་བསྒོམ་པའི་མཆོག །གསང་སྔགས་བསྟན་པའི་དངོས་གཞི་དེ་ཡིན་ཏེ། །དེ་སྐད་རྡོ་རྗེ་འཆང་གིས་བཀའ་སྩལ་པ། །བསྐྱེད་པ་ཡི་ནི་ཀཾ་རིམ་པ་དང་། །རྫོགས་པ་ཡི་ནི་རིམ་པ་སྟེ། །རིམ་གཉིས་མཉམ་པར་གང་གནས་པ། །འདི་ནི་སངས་རྒྱས་བསྟན་པ་ཡིན། །ཅེས་གསུངས་སོ། །ལྕེ་རྐན་ཕྲེང་བ་བྲལ་བའི་བཟླས་པ་སྟེ། །རླུང་གི་འབྱུང་འཇུག་གནས་གསུམ་དང་སྤྱད་ནས། །ཡིག་འབྲུའི་གཟུགས་ནི་བསྒོམ་པ་མ་ཡིན་ཏེ། །རླུང་ནི་ནང་དུ་འཇུག་པ་ཡི་གེ་ཨོ། །ཁོང་དུ་གནས་པ་ཡི་གེ་
ཨཱཿཡིན་ཏེ། །ཕྱི་རུ་འབྱུང་བ་ཡི་གེ་ཧཱུྃ་དུ་ཤེས། །དེ་ལྟར་མ་ཡེངས་ཡིད་ཀྱིས་དབུགས་གྲངས་བརྩི། །དབུགས་ནི་ཤུགས་འབྱུང་བརྩི་བ་མ་གཏོགས་པ། །ནང་དུ་བཟུང་བ་ལ་སོགས་མ་ཡིན་ནོ། །དེ་ལྟར་ནངས་སྔ་བརྒྱའམ་ཉེར་གཅིག་བགྲང་། །དེ་ནས་ཉིན་གུང་དེ་ལྟར་ཡིན་ཤེས་པས། །ཉལ་ཁ་བདུན་ནམ་ཉེར་གཅིག་དེ་ལྟར་བགྲང་། །དེ་ནས་གཉིད་ཚེའང་དེ་ལྟར་ཡིན་པར་བསམ། །དེ་ཡིས་ཞག་གཅིག་འབྱུང་གནས་དབྱུང་དང་གསུམ། །གཅིག་ཏུ་བརྩི་བའི་སྔགས་ཀྱི་གྲངས་ཀ་ནི། །ཉི་ཁྲི་ཆིག་སྟོང་དྲུག་བརྒྱ་འགྲོ་བའི་ཕྱིར། །འབད་རྩོལ་མེད་པར་ལྷ་འགྲུབ་བཟླས་པ་ཐེམ། །འདི་ནི་འབྲུ་གསུམ་རྡོ་རྗེའི་བཟླས་པ་སྟེ། །གསར་རྙིང་རྒྱུད་སྡེ་ཀུན་ནས་རྒྱ་ཆེར་གསུངས། །རྒྱུད་སྡེ་ལ་ལར་རྡུབ་པ་ཧཱུཾ་དང་ནི། །གནས་པ་ཨཱསོགས་གོ་རིམ་མི་མཚུངས་ཡང་། །འོན་ཀྱང་གོང་གི་དེ་དག་ཀུན་དང་མཐུན། །ཞི་གནས་སྐྱེ་བའི་མཆོག་ཀྱང་དེ་ཡིན་ཏེ། །་ཉོན་མོངས་ཐམས་ཅད་ཤུགས་ཀྱིས་འགག་པར་གསུངས། །དེ་ནས་འདི་ཡི་སྒྲུབ་པའི་དམིགས་པ་ནི། །ནང་དུ་འཇུག་པ་ཡི་གེ་ཨོཾ་དུ་བསམ། །ཁོང་དུ་ཅུང་ཟད་རླུང་ནི་བཟུང་བ་
དེས། །གང་ཡིན་སྔགས་དེ་དངོས་གཞི་ཡིན་པར་བསམ། །ཕྱི་རུ་དབྱུང་ཚེ་ཧཱུྃ་དང་སྭཱ་ཧཱ་སོགས། །སྔགས་མཇུག་ཡི་གེ་གང་ཡིན་དེ་རུ་བསམ། །དཔེར་ན་ནང་དུ་འཇུག་པ་ཡི་གེ་ཨོཾ། །ཁོང་དུ་གནས་པ་མ་ཎི་པདྨེ་སྟེ། །ཕྱི་རུ་དབྱུང་བ་ཧཱུྃ་དུ་ཤེས་པར་བྱ། །དེ་ནི་ཡིད་ཀྱི་བཟླས་པ་ཡིན་པའི་ཕྱིར། །ངག་ཏུ་མི་བརྗོད་ཕྲེང་བ་བགྲང་མི་བྱ། །སྔགས་གྲངས་འགྲོ་ཚུལ་ཕན་ཡོན་གོང་དང་མཚུངས། །འདི་ཡི་གཏོར་མཆོད་ལ་སོགས་བྱ་ཚུལ་ནི། །ཕོར་པ་ལ་སོགས་ཟས་ཀྱི་སྣོད་དེ་ནི། །རིན་ཆེན་ལས་གྲུབ་བྷནྡྷ་དུམ་གཅིག་དབྱིབས། །བཟའ་བཏུང་བསྲེག་རྫས་ཤ་ལྔ་བདུད་རྩི་ལྔ། །ཡིག་འབྲུ་གསུམ་པོ་བརྗོད་པས་བྱིན་གྱིས་བརླབ། །ལྟེ་འོག་གཏུམ་མོ་ཡེ་ཤེས་མེ་ཡིན་ཏེ། །ཁ་ནི་ཐབ་ཁུང་ལྕེ་ནི་མེ་ལྕེ་ཡིན། །ལག་པ་དགང་གཟར་བླུགས་གཟར་ཤེས་པར་བྱ། །དེ་ཡི་གཟུགས་སུ་བསྒོམ་པ་མ་ཡིན་ནོ། །ཡང་གསང་སྒྲུབ་པའི་ལུས་དཀྱིལ་གསལ་བཏབ་སྟེ། །དེ་དག་རྣམས་ལ་སྲེག་བླུགས་མཆོད་པ་འབུལ། །མདུན་བསྐྱེད་ལོགས་སུ་དགོས་པ་མ་ཡིན་ཏེ། །རྡོ་རྗེ་རིགས་ཀྱི་ཡི་དམ་ཡིན་ན་ནི། །།ཤར་དུ་ཁ་བལྟས་མངོན་དགའི་ཞིང་ཁམས་དང་། །མི་འཁྲུགས་རྒྱལ་
བ་མདུན་བསྐྱེད་རྟེན་དུ་བསྒོམ། །དེ་བཞིན་ཚེ་དཔག་རྒྱལ་བ་རྒྱ་མཚོ་སོགས། །པདྨ་རིགས་ཀྱི་ཡི་དམ་ཡིན་ན་ནི། །ནུབ་ཏུ་ཁ་བལྟས་བདེ་ཆེན་ཞིང་ཁམས་ཀྱི། །སྣང་བ་མཐའ་ཡས་མདུན་བསྐྱེད་གཙོ་བོ་སྟེ། །ཆ་ལུགས་རང་གི་ཡི་དམ་གང་ཡིན་བསྒོམ། །དེ་ལ་ཕྱག་དང་མཆོད་བསྟོད་གསོལ་བ་འདེབས། །དེ་ཚེ་བདག་བསྐྱེད་སྐྱིལ་ཀྲུང་སྟོང་གསུམ་ཁྱབ། །སྐུ་ཡང་སྲིད་པའི་རྩེ་མོ་ཡར་བརྒལ་བ། །བསྒོམས་པས་ཐག་རིང་ཞིང་ཁམས་ལྷ་དེ་ཡང་། །རང་དང་ཞལ་སྤྲོད་མདུན་བསྐྱེད་ཉེ་བར་ཡོང་། །ཐུགས་ལས་སྤྲོས་པའི་མཆོད་པའི་སྤྲིན་ཕུང་ནི། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །གདོད་ནས་གྲུབ་པ་ལྷ་མིའི་ལོངས་སྤྱོད་ཚོགས། །བློ་ཡིས་བླངས་ཏེ་ཡང་ཡང་མཆོད་པར་བྱ། །མདུན་བསྐྱེད་རྟེན་དང་མཆོད་རྫས་གཞན་མི་དགོས། །རྫོགས་རིམ་བསྡུ་དང་རྗེས་ཆོག་གཤེགས་གསོལ་མེད། །སྣང་སྲིད་གཞིར་བཞེངས་རང་བྱུང་དཀྱིལ་འཁོར་ཡིན། །རྫོགས་པ་ཆེན་པོ་ཨ་ཏི་ཡོ་གའི་ལུགས། །དེ་ཁོ་ན་ཉིད་སེམས་ཀྱི་དཀྱིལ་འཁོར་ལ། །བརྟེན་ནས་སྒྲུབ་པའི་མན་ངག་ཟབ་མོ་སྟེ། །འདི་དོན་པད་སྡོང་བརྩེགས་པའི་
རྒྱུད་འབྲེལ་དང་། །མཐར་ཐུག་བླ་མེད་རྒྱུད་སྡེ་རྣམས་ནས་གསུངས། །དག་པ་རབ་འབྱམས་འཆར་ཐབས་ངོ་མཚར་ཆེ། །དཔེར་ན་གུ་རུ་ཞི་དྲག་སྒྲུབ་པའི་ཚེ། །རྔ་ཡབ་གླིང་ཕྲན་མདུན་བསྐྱེད་དཀྱིལ་འཁོར་ཡིན། །ཐུགས་རྗེ་ཆེན་པོའི་སྒྲུབ་པ་གང་བྱེད་ཀྱང་། །ལྷོ་ཕྱོགས་རི་བོ་གྲུ་འཛིན་མདུན་བསྐྱེད་བྱ། །སྒྲོལ་མའི་རིགས་ལའང་དེ་དང་མཚུངས་པ་ཡིན་། །བདེ་མཆོག་ཕག་མོ་ལ་སོགས་སྒྲུབ་པའི་ཚེ། །ནུབ་ཕྱོགས་ཨོ་རྒྱན་ཡུལ་དེ་མདུན་བསྐྱེད་བྱ། །དེ་བཞིན་ཡི་དམ་ཆོས་སྐྱོང་གང་སྒྲུབ་ཀྱང་། །སོ་སོ་གར་བཞུགས་གནས་དེ་མདུན་བསྐྱེད་གཙོ། །སོ་སོ་གང་བཞུགས་ཕྱོགས་དེར་ཁ་རྒྱུ་ནས། །གནས་དེ་ཚུན་ཆད་བདག་བསྐྱེད་ཀྱིས་ཁྱབ་པའི། །ཆེན་པོ་བསྒོམ་པ་དེ་ནི་གནད་ཡིན་ཏེ། །འདི་དག་མི་འཐད་བློ་བཟོ་ཡིན་དགོངས་ན། །ཏིང་འཛིན་རྒྱལ་པོའི་ཆོས་ཀྱི་རྣམ་གྲངས་ཏེ། །ད་ལྟའི་སངས་རྒྱས་མངོན་སུམ་བཞུགས་མདོ་ལ། །ལེགས་པར་བལྟས་ན་ཐེ་ཚོམ་ཆོད་པ་འོང་། །དེ་བཞིན་རྩ་རྒྱུད་པད་སྡོང་བརྩེགས་པ་ཡི། །འགྲེལ་པ་ཨོ་རྒྱན་ཉིད་ཀྱིས་མཛད་པ་ལས། །དབང་པོ་རབ་ཀྱི་བསྐྱེད་རིམ་འདི་ལྟར་གསུངས། །མདུན་དུ་དཀྱིལ་འཁོར་
བཞེངས་ཤིང་སྤྱན་འདྲེན་པ། །བློ་ཆུང་དབང་པོ་ཐ་མའི་གང་ཟག་གོ །དེ་ཁོ་ན་ཉིད་སྒྲུབ་ཐབས་ཟབ་མོ་འདི། །ཐེག་དགུའི་ཡང་རྩེ་ཨ་ཏི་ཡོ་གའི་ལུགས། །བདག་ཀྱང་ད་ནི་ན་སོ་སོང་བ་དང་། །སྤྲོས་བཅས་མང་པོ་ལྟོགས་པར་དཀའ་བའི་ཕྱིར། །སྒྲུབ་ཐབས་འདི་ཉིད་ཉམས་སུ་ལེན་པ་ཡིན། །གནམ་ཆོས་དཀྱིལ་འཁོར་མེད་ཅིང་གཏོར་མ་མེད། །མངོན་རྟོགས་ཉུང་བསྡུས་ཙམ་དང་སྙིང་པོ་ལས། །གཞན་མེད་སྡུམ་སྡུམ་འདྲ་བ་འབྱུང་བ་རྣམས། །སྒྲུབ་ཐབས་འདི་ལྟར་ཉམས་སུ་ལེན་ཕྱིར་ལགས། །མཁས་ཤིང་ཆེན་པོར་རློམ་པ་འགའ་ཞིག་གིས། །ཆ་ཚང་མི་འདུག་སྨྲ་བ་ཐོས་མོད་ཀྱི། །ཐེག་དགུ་སོ་སོར་སྒྲུབ་ལུགས་མི་གཅིག་པ། །དེ་དག་མ་ཤེས་པ་ཡི་རང་མཚང་ལགས། །དེ་སྐད་རྟ་ལོ་ཁྲུམས་ཀྱི་ཟླ་བ་ཡི། །དམར་པོའི་ཚེས་བརྒྱད་ཉིན་གུང་ཐུན་མཚམས་ལ། །སྔགས་འཆང་རཱ་ག་ཨ་སྱས་སྨྲས་པ་རྣམས། །བུ་ཆེན་བཱིརྱ་སཱ་ག་ར་ཡིས་བྲིས། །འདི་ལ་སྦ་འོས་གསལ་བཀོད་ཉེས་མཆིས་ན། །ཆོས་བདག་ཊཱ་ཀི་སྲུང་མའི་ཚོགས་ལ་བཤགས། །དགེ་བས་རྟོགས་ལྡན་འགའ་ལ་ཕན་ཐོགས་ཤོག །ལེའུ་སོ་གཅིག་པའོ་མངྒ་ལཾ། །