ལེའུ་སོ་གསུམ་པ། རྟེན་འབྲེལ་ལུས་ལ་བསྒྲིག་པར་བྱ་བའི་ཕྱིར། །འཁྲུལ་འཁོར་རྩ་ཚིག་འཛམ་བུ་ཆུ་གསེར་ཡོད། །
༼གི༽ རི་ཆོས་མཚམས་ཀྱི་ཞལ་གདོམས་ལས། འཁྲུལ་འཁོར་རྩ་ཚིག་སླད་མེད་འཛམ་བུ་ཆུ་གསེར་ཞེས་བྱ་བ་བཞུགས་སོ། །ན་མོ་གུ་རུ་ཛྙཱ་ན་ཌཱ་ཀི་ཡེ། བླ་མེད་སྤྱི་ཡི་ཡང་གསང་སྒྲུབ་པ་དང་། །གཏུམ་མོའི་ཁྲིད་རིམ་ཀུན་ལ་སྦྱར་རུང་བའི། །གསོལ་འདེབས་ཉུང་ངུ་འཁྲུལ་འཁོར་རྩ་ཚིག་ནི། །རྡོ་རྗེའི་གསུང་ཡིན་བྱིན་རླབས་ཆེ་བའི་ཕྱིར། །བདག་གི་སྐྱབས་གནས་རྒྱལ་བ་
འོད་དཔག་མེད། །དྷརྨེ་ཤྭ་རའི་གསུང་ཉིད་སླད་མེད་ནི། །རྗེ་སྐྱབས་གསུམ་གྱི་ངོ་བོ་བླ་མ་རྗེ། །ཕ་རྟོགས་ལྡན་གྱི་རྒྱལ་པོ་དགོངས་སུ་གསོལ། །ཙཎྜི་བདེ་སྟོང་དུ་འབར་བར་བྱིན་གྱིས་རློབས། །སྒྱུ་ལུས་ལྷ་སྐུ་རུ་འཆར་བར་བྱིན་གྱིས་རློབས། །གཉིད་འོད་གསལ་དུ་ཐིམ་པར་བྱིན་གྱིས་རློབས། །རྨི་ལམ་སྒྱུ་ལུས་སུ་འཆར་བར་བྱིན་གྱིས་རློབས། །འདའ་ཀ་སྐུ་གསུམ་དུ་འཕོ་བར་བྱིན་གྱིས་རློབས། །བར་དོ་ཆོས་ཉིད་དུ་གྲོལ་བར་བྱིན་གྱིས་རློབས། །ཞེས་པ་འདི་ཉིད་འབྲེལ་བའི་གསོལ་འདེབས་སུའོ། །རྩ་ཁྲུས་ཡན་ལག་ལྔ་སྦྱོང་ནི། །སྐྱིལ་ཀྲུང་རྡོར་སྟབས་དཔུང་སྟེང་སྦུབ། །རླུང་བཟུང་ལག་གཉིས་བརླ་སྟེང་ནས། །ནུ་སྟེང་རྒྱུད་བཤད་མདུན་དུ་བརྐྱང་། །ནུ་སྟེང་གཉིས་སུ་ལན་གསུམ་བརྡབ། །གཡས་གཡོན་ལག་པ་ལན་གསུམ་བཤད། །ཐལ་མོ་གསུམ་ཕུར་མགོ་བོ་དང་། །རོ་སྟོད་རྒྱབ་མདུན་རོ་སྨད་འཕུར། །མཆོན་བརྡབ་བྱས་ལ་རྐང་གཡས་གཡོན། །བརྐྱང་པ་ལན་གསུམ་མཉེ་བར་བྱ། ཞེས་པའང་བཀའ་སྩལ་ཏོ། །སྐེད་པ་གཡས་བསྐོར་གཡོན་བསྐོར་གྱིས། །ལྟེ་བའི་རྩ་མདུད་གྲོལ་བ་ཡིན། །རོ་སྟོད་གཡས་
གཡོན་གཅུད་པ་ཡིས། །སྙིང་གའི་རྩ་མདུད་གྲོལ་བ་ཡིན། །མགྲིན་པ་བསྐོར་ཞིང་དགྱེ་དགུ་ཡིས། །སྤྱི་བོ་མགྲིན་པའི་རྩ་མདུད་གྲོལ། །རྐང་ལག་བརྐྱང་བསྐུམ་བྱས་པ་ཡིས། །ཚིགས་ཀྱི་རྩ་མདུད་གྲོལ་བ་ཡིན། །ལུས་སྤྲུག་འཕུར་སྲུབ་བྱས་པ་ཡིས། །རྩ་རྣམས་ཐམས་ཅད་འདུལ་བ་ཡིན། ༈ །སོ་བདུན་མ་ནི། ས་ནོན་བྱས་ལ་ཕོ་བ་ནི། །གཡས་གཡོན་གསུམ་གསུམ་བསྐོར་བས་དྲུག །པུས་མོ་གཡས་པར་འཇུས་ནས་ནི། །དེ་བཞིན་དྲུག་དང་གཡོན་ལའང་དྲུག །མཐེ་བོང་སྲིན་རྩ་མནན་ནས་ཀྱང་། །གཡས་གཡོན་ཁུ་ཚུར་ཞགས་འཕེན་དྲུག །གཡས་གཡོན་མདའ་འགེངས་བྱེད་པ་དྲུག །གཡས་གཡོན་ལག་པའི་ནང་བཤད་དྲུག །ལུས་ཀུན་སྤྲུག་དང་སོ་བདུན་ནོ། །མཁས་པ་ནཱ་རོ་པཎ་ཆེན་གྱིས། །བླ་མེད་སྤྱི་ཡི་རྫོགས་རིམ་དུ། །ནཱ་རོ་ཆོས་དྲུག་མཛད་པ་ཡི། །རྩ་བའི་འཁྲུལ་འཁོར་འདི་ཡིས་ཚང་། །རྗེས་ནས་ཏི་ཕུ་པ་ལ་སོགས། །སློབ་མ་རྣམས་ཀྱིས་མང་བསྣུན་ཀྱང་། །རྩ་བ་འདི་ཡིས་ཆོག་པའི་ཕྱིར། །བདག་གི་འདྲེན་མཆོག་རྒྱལ་བ་ཡིས། །མཛད་པའི་ཆོས་དྲུག་རྒྱས་བསྡུས་ལའང་། །འདི་ལས་གཞན་པའི་
འཁྲུལ་འཁོར་མེད། །གསར་རྙིང་བླ་མེད་སྤྱི་དང་ནི། །ཁྱད་པར་ནག་རྒྱལ་ཕག་གསུམ་དང་། །གནམ་ཆོས་ལ་སོགས་གཏུམ་མོ་ལའང་། །འཁྲུལ་འཁོར་འདི་ཀས་ཆོག་པ་ཡིན། །ཁྱད་ཆོས་སྐུ་གསུམ་ངོ་སྤྲོད་དང་། །རླུང་སེམས་གཉིས་མེད་ལ་ཡང་ཆོག །འདི་ཡི་འབུད་པ་དགུ་སྤྲུག་དང་། །ལག་པའི་འཁྱེར་ལུགས་སྟངས་སྟབས་ཟློརྣམས། །ཞིབ་པར་མཐོང་བ་བརྒྱུད་པར་ལྟོས། །འབེབས་ནི་ཆེ་ཆུང་གང་རིགས་སྦྱོར། །དེ་ཡང་སྟོད་འཚང་ལ་སོགས་པའི། །རླུང་ནི་ཐུར་དུ་དབབ་ཕྱིར་ཡིན། །དོན་གཞན་མེད་ཕྱིར་གལ་ཡང་ཆུང་། །རབ་ཏུ་འཁྲུལ་འཁོར་ཚན་གསུམ་པོ། །མ་རྫོགས་བར་དུ་རླུང་མི་གཏང་། །འབྲིང་དུ་ཚན་གསུམ་མཚམས་སུ་གཏོང་། །དང་པོ་སྦྱོང་དུས་མི་ཐུབ་པས། །མ་ཐུབ་སོ་བར་བཏང་ཞིང་བཟུང་། །རླུང་དང་འཁྲུལ་འཁོར་དམིགས་པ་གསུམ། །དར་དྲག་བར་མེད་བརྩོན་བྱས་པས། །ཡུན་རིང་མི་ཐོག་རས་རྐྱང་ཐུབ། །ཐུན་རེ་ཐུན་གཉིས་ཡུད་རེས་ཀྱང་། །ཕན་ཡོན་ཆེ་སྟེ་དྲོད་མི་སྐྱེ། །རླུང་དང་འཁྲུལ་འཁོར་མ་བརྩོན་ན། །སྒོམ་བཟླས་ཕན་ཡོན་ཡོད་མོད་ཀྱི། །དྲོད་ནི་སྐྱེ་བར་མི་འགྱུར་རོ། །
གསར་བུ་རྣམས་ལ་ཕན་པའི་ཕྱིར། །རཱ་ག་ཨ་སྱས་བསྒྲིག་བཅུག་པ། །བརྩོན་འགྲུས་རྒྱ་མཚོས་ཡི་གེར་བྱས། །འདི་ཉིད་བསྒྲིགས་ལ་ཉེས་འགལ་མེད། །དགེ་བས་ན་གཞོན་ཆོས་འདོད་པའི། །རྟོགས་ལྡན་འགའ་ལ་ཕན་ཐོགས་ཤོག །ལེའུ་སོ་གསུམ་པའོ་མངྒ་ལཾ།། །།