ལེའུ་སོ་ལྔ་པ། བྱང་ཆུབ་སྐྱོན་མེད་ལམ་ལ་འཇུག་པའི་ཕྱིར། །གོལ་ས་གཅོད་པ་མ་ནོར་ལམ་སྟོན་ཡོད། །
༼ཅི༽ རི་ཆོས་མཚམས་ཀྱི་ཞལ་གདམས་ལས། གོལ་ས་གཅོད་པ་མ་ནོར་ལམ་སྟོན་ཞེས་བྱ་བ་བཞུགས་སོ། །ན་མོ་གུ་རུ་མཉྫགྷོ་ཥ་ཡེ། ཤེས་རབ་སྟོང་པ་ཉིད་ཀྱི་རལ་གྲི་ལ། །ཐབས་མཆོག་སྙིང་རྗེ་ཆེན་པོའི་ངར་བཏགས་ནས། གོལ་སའི་མྱུ་གུ་གཅོད་པའི་རལ་གྲི་འདི། །འཇམ་དབྱངས་བླ་མས་གནང་བའི་ཕ་ནོར་ལགས། །དབང་ལུང་གདམས་པ་ཐོབ་ནས་ཀྱང་། །བསྐྱེད་རྫོགས་ཧ་གོ་ཡོད་པ་ཡིས། །
མཚམས་དང་སྒྲུབ་པ་བྱེད་ན་ཡང་། །གོལ་ས་ལེགས་པར་མ་ཆོད་ན། །དཀའ་སྤྱད་སྒྲུབ་པ་བྱས་གྱུར་ཀྱང་། །འབྲས་བུ་ཆེན་པོ་མི་ཐོབ་སྟེ། །དཔེར་ན་ཚོང་དཔོན་ཧ་ལོག་བཞིན་། །གསང་སྔགས་ལྟུང་བའི་སྒོ་དགུ་སོགས། །གོལ་ས་ཆེ་ཕྲ་མཐའ་ཡས་ཀྱང་། །བསྡུ་ན་ཆགས་སྡང་རྨོངས་གསུམ་ཡིན། །གཅོད་པའི་གདམས་པ་མཐའ་ཡས་ཀྱང་། །བསྡུ་ན་སྟོང་ཉིད་སྙིང་རྗེ་ཡིན། །ཚེ་འདིའི་ལོངས་སྤྱོད་སྙན་གྲགས་ལ། །ཆགས་པའི་དབང་གིས་འདོད་པ་སྐྱེས། །དབང་དང་རྒྱས་པའི་ལྷ་ཞིག་ལ། །རྩེ་གཅིག་སྒྲུབ་པ་བྱེད་པ་སྟེ་།ཙནྡན་སོལ་བ་བྱས་དང་མཚུངས། །གལ་ཏེ་དེ་འགྲུབ་དངོས་གྲུབ་ཐོབ། །འཆི་བ་རྗེས་སུ་མ་དྲན་པས། །ཟང་ཟིང་འདོད་ཡོན་སྲེད་པས་བཅིངས། །ཉོན་མོངས་འདོད་པ་མེ་ལྟར་འབར། །ད་ནི་བདག་གིས་ལྷ་འདི་འགྲུབ། །ཇི་ལྟར་བྱས་ཀྱང་བདག་གི་དཔལ། །ཉམས་པར་མི་འགྱུར་ཞེ་གདེང་བཅས། །ཤ་ཆང་ཟས་ཀྱིས་ཕོ་བ་བརྒྱངས། །རྩ་རླུང་ཉམས་ལེན་བདག་ལ་ཡོད། །བདག་ལ་མི་སྒྲིབ་ཁྱོད་ཀྱང་འདྲེན། །ཟེར་ཞིང་བཙུན་མ་མང་པོ་ཕབ། །ནལ་ཕྲུག་ལྐོག་གསོད་ཕུག་ན་འདུག །སྒྲུབ་པ་ཡེ་ཤེས་ལྷ་
བསྒྲུབས་ཀྱང་། །སེམས་བསྐྱེད་དབང་གིས་ལོག་པར་སོང་། །འགྲུབ་པ་ལྷ་བུའི་བདུད་དེ་འགྲུབ། །དེ་འདྲར་དགོངས་ནས་མཁའ་སྤྱོད་པས། །ལོ་བརྒྱར་སྒྲུབ་པ་བྱས་ཀྱང་དོན་མ་རིག །དེ་འདྲའི་མི་དེ་ཐེའུ་རིང་སློབ་བརྒྱུད་ཡིན། །གསུངས་པའང་དེ་འདྲར་དགོངས་པ་ཡིན། །དེ་ཡི་གོལ་ས་གཅོད་པ་ནི། །ཚེ་འདིའི་དཔལ་འབྱོར་ལྟ་ཅི་སྨོས། །ཕྱི་མ་ལྷ་མིའི་བདེ་སྐྱིད་དང་། །ཚངས་དང་བརྒྱ་སྦྱིན་འཁོར་ལོས་བསྒྱུར། །ཐོབ་ཀྱང་དགའ་བ་སྤུ་ཙམ་མེད། །བླ་མེད་བྱང་ཆུབ་ལ་དམིགས་ནས། །དབང་དང་རྒྱས་པའི་ཡེ་ཤེས་ལྷ། །བསྒྲུབས་པས་བསོད་ནམས་ཡེ་ཤེས་རྒྱས། །རླུང་སེམས་སྣང་བ་དབང་དུ་འདུས། །དཔེར་ན་ལོ་ལེགས་སྐྱ་རྒྱལ་ན། །སོག་ཕུབ་ཞོར་ལ་འབྱུང་བ་ལྟར། །ཚེ་འདིའི་དཔལ་འབྱོར་སྙན་གྲགས་ཀྱང་། །མ་དམིགས་ན་ཡང་ཞོར་ལ་འབྱུང་། །སྒྲུབ་ལུགས་ཁྱད་པར་མེད་ན་ཡང་། །སེམས་བསྐྱེད་བསམ་པའི་ཁྱད་པར་ཡིན། །དེ་ལས་་ཀྱང་ནི་ཆེར་ངན་པ། །འཇིག་རྟེན་དྲག་རྩལ་ཅན་བསྒྲུབས་ནས། །ཡེ་ཤེས་ལྷ་བས་འདི་ལྷག་སྟེ། །རྣོ་མྱུར་འཕྲལ་དུ་ཆེ་བསམ་ནས། །ཅི་མཛད་ཁྱེད་ཤེས་བློ་རྩེ་གཏད། །
དེས་ནི་སྐྱབས་འགྲོའི་སྡོམ་པའང་འཆོར། །དེ་ཕྱིར་བཀའ་གདམས་གླེགས་བམ་ནས། །ལྷ་ངན་ཕལ་ཆེར་འདྲེ་བས་བཙོག །གསུངས་པ་དེ་འདྲར་དགོངས་པ་ཡིན། །དཔེར་ན་སྔོན་འདས་བླ་ཆེན་ཞིག །པེ་ཧར་བསྒྲུབས་ཤིང་ཕྱག་རྟགས་བླངས། །རྒྱ་ནག་ཡུལ་དུ་བྱོན་པ་ལས། །རྒྱ་ནག་རྒྱལ་པོའི་དབུ་བླར་གྱུར། །ཇ་དར་གསེར་དངུལ་དཔག་མེད་རྙེད། །དེ་ནས་བོད་དུ་ཡར་བྱོན་ཏེ། །སྨར་ཤོད་ཕྱོགས་ཀྱི་ས་ཆར་འདས། །རྒྱལ་པོ་གདུག་རྩུབ་ཆེ་བ་དེས། །ཁོ་རང་དེ་ཡི་འཁོར་དུ་སྐྱེས། །ཛ་དེར་གསེར་དངུལ་ལོངས་སྤྱོད་ལ། །གནས་བཅས་ཆོ་འཕྲུལ་དཔག་མེད་བསྟན། །གྲྭ་འཁོར་རྣམས་ཀྱིས་ཁྱེར་མ་ཕོད། །ཕུག་སྟོང་ཆེན་པོའི་ཕུག་ཏུ་བརྩིགས། །ད་ལྟའང་གར་ཡོད་ཀུན་གྱིས་ཤེས། །བལྟ་བ་ཙམ་ཡང་མི་ཕོད་སྐད། །དེ་ཡང་བསྟེན་ལུགས་མ་ཤེས་སྟབས། །ལྷ་མ་བསྙེན་པར་འདྲེ་མ་སྒྲུབ། །ཨོ་རྒྱན་གསུངས་ཀྱང་དེ་འདྲར་དགོངས། །དང་པོ་ཡི་དམ་ལྷ་བསྙེན་ནས། །བསྐྱེད་རྫོགས་གསལ་སྣང་ཐོན་ཙམ་དང་། །རང་རྒྱུད་བྱིན་གྱིས་རློབས་ངེས་བྱ། །དེ་ནས་རྣོ་མྱུར་འདོད་པ་ན། འཇིག་རྟེན་དྲེགས་པ་གང་ཡིན་བསྒྲུབ། །སྐྱབས་སུ་
འཛིན་པ་མ་ཡིན་ཏེ། །རབ་ཀྱིས་བྲན་དང་གཡོག་པོའི་ཚུལ། །འབྲིང་གིས་སྤུན་དང་ཤ་རོག་ཚུལ། །ཐ་མས་ཕ་ཁུ་ཙམ་དུ་དམིགས། །བྱང་ཆུབ་བསྒྲུབ་པའི་མཐུན་རྐྱེན་སྒྲུབ། །འགལ་རྐྱེན་སེལ་བའི་སྡོང་གྲོགས་བཅོལ། །གསོལ་མཆོད་དེ་ཡི་རྔན་པ་ཙམ། །བསྐྱེད་རྫོགས་དགོངས་པ་གསལ་བ་ན། །ས་ལམ་བགྲོད་ལ་མི་སྒྲིབ་པར། །དངོས་གྲུབ་ཡེ་ཤེས་ལྷ་དང་མཚུངས། །རྟོགས་པ་ཤིན་ཏུ་མཐོ་བ་ན། །བཀའ་སྲུང་འཇིག་རྟེན་དྲེགས་པ་རྣམས། །རང་གི་རིག་པའི་རང་རྩལ་ལས། །གཞན་དུ་གྲུབ་པ་མ་དམིགས་གསུངས། །དེ་གཉིས་ཆགས་པའི་གོལ་ས་ཡིན། །གོལ་ས་ལེགས་པར་མ་ཆོད་ན། །ཕྱི་རོལ་མུ་སྟེགས་པ་རྣམས་ཀྱིས། །དབང་ཕྱུག་སྒྲུབ་དང་ཁྱད་པར་མེད། །དེ་ནས་སྡང་བའི་གོལ་ས་ནི། །དུས་ངན་སྙིགས་མར་དགྲ་རྐུན་མོད། །ཉམ་ཆུང་མི་ལ་རྔན་ཆེན་མང་། །གཤིན་རྗེ་ལ་སོགས་དྲག་པོའི་ལྷ། །བདག་གིས་བསྒྲུབས་ནས་འགྲུབ་བྱས་ཏེ། །ཀླུ་བདུད་གདུག་པ་ཅན་བཞིན་དུ། །འགྲས་ཚད་ཐམས་ཅད་རྩད་ནས་བརླག །ཟས་ནོར་ཀ་ཆ་རྟ་ཕྱུགས་རྣམས། །བཙན་དུག་སྡོང་པོ་ཇི་བཞིན་དུ། །སུས་འོས་མི་
ལ་རྟགས་མྱུར་བ། །དེ་འདྲ་འདོད་ནས་སྒྲུབ་པ་བྱེད། །ཚེ་འདིར་གཞན་ཕུང་ཕྱི་མ་ནི། །རང་ཉིད་ཕུང་བའི་རྩ་བ་ཡིན། །དེ་འདྲའི་སྒྲུབ་པ་ལ་དགོངས་ནས། །མི་བསྐྱོད་ཞབས་ཀྱི་ཞལ་ནས་ཀྱང་། །སྒོམ་ཆེན་མཐུ་མཁན་དང་། སྒོམ་ཆེན་འཆལ་བ་ལ་ཡུད་ཙམ་འཕྲད་ཀྱང་མི་རུང་གསུངས་སོ། །དེ་དོན་འཇམ་དཔལ་རྩ་རྒྱུད་ལས། །རྒྱལ་པོའི་བློན་པོ་བྲམ་ཟེ་ཞིག །རྒྱལ་ཁྲིམས་མ་ནོན་ངོ་ལོག་མང་། །བྲམ་ཟེས་གཤིན་རྗེ་གཤེད་པོ་བསྒྲུབས། །ཁྲིམས་དང་སུ་འགལ་ཐམས་ཅད་བསད། །ལོ་ནི་དུ་མར་བློན་པོ་བྱས། །བྲམ་ཟེ་དེ་ཉིད་ཚེ་འཕོས་ནས། །ཡུལ་འདྲེ་གདུག་པ་ཅན་དུ་སྐྱེས། །ཡུན་རིང་འགྲོ་བའི་སྲོག་དབུགས་བསྡུས། །ཚེ་འཕོས་མནར་མེད་དམྱལ་བར་སོང་། །ལོ་གྲངས་བྱེ་བ་འབུམ་ཕྲག་ཏུ། །དམྱལ་བའི་སྡུག་བསྔལ་བརྗོད་མི་ལངས། །སྒྲིབ་པ་ཟད་ནས་མི་ལུས་ཐོབ། །ཡི་དམ་གཤིན་རྗེ་གཤེད་པོ་ཡིས། །རྗེས་བཟུང་རང་རྒྱལ་འབྲས་བུ་ཐོབ། །ལ་ལས་ཡེ་ཤེས་ལྷ་ཡིས་ནི། །ལས་སྦྱོར་སྒོ་ནས་བསྒྲལ་ན་ཡང་། །སྐྱོན་མེད་ལྷ་དེས་འདྲེན་འགྱུར་པས། རང་གིས་འདྲེན་མ་ཐུབ་ཀྱང་བཟོད། །ཟེར་བ་མི་བདེན་
གོང་དུ་གསལ། །དེ་བས་ཀྱང་ནི་ཆེར་ལོད་པ། །འཇིག་རྟེན་དྲེགས་པ་བསྒྲུབས་ནས་བསྒྲལ། །གཏད་དང་སེར་ནག་རླུང་འཁོར་སོགས། །ངན་སྔགས་སྦྱོར་བསད་པ་ནི། །འདུལ་བའི་ལུགས་ལ་སྡོམ་པ་འཆོར། །འདུལ་བའི་ལས་ཆོག་ལས། མིའམ་མིར་ཆགས་པ་བསད་དམ། མཚོན་ཐོགས་པ་གཉེར་གཏམ། འཆིར་བཅུག་གམ།་འཆི་བའི་བསྔགས་པ་བརྗོད་ཀྱང་རུང་སྟེ་དགེ་སློང་དེ་ནི་ཕམ་པར་འགྱུར་བ་ཡིན་ཏེ། གནས་པར་མི་བྱའོ། །ཞེས་གསུངས་སོ། །འོན་ཀྱང་བླ་མེད་བྱང་ཆུབ་བསྒྲུབ་པ་ལ། །བར་དུ་གཅོད་པའི་དགྲ་བགེགས་ཚར་གཅོད་དང་། །འགྲོ་བ་ཀུན་གྱི་བདུད་བཞི་ཉོན་མོངས་ཚོགས། །ཚར་གཅོད་བླ་མེད་བྱང་ཆུབ་སར་འགོད་དང་། །བསྟན་པ་སྤྱི་དང་རྩ་བའི་བླ་མ་ཡི། །སྐུ་ཆེ་ཕྲིན་ལས་བར་ཆད་བཟློག་པའི་ཕྱིར། །ཡི་དམ་མཁའ་འགྲོ་ཆོས་སྐྱོང་བཀའ་སྲུང་ཚོགས། །བསྟེན་ཅིང་བསྒྲུབ་པ་མཁས་གྲུབ་ཀུན་གྱི་ལུགས་། །བསྟེན་ལུགས་འདྲ་ཡང་སེམས་བསྐྱེད་ཁྱད་པར་ཡིན། །དཔེར་ན་ཆོས་རྗེ་རང་བྱུང་རྡོ་རྗེ་ལ། །སྔགས་པ་དགུ་ཡིས་གཤིན་རྗེ་བསྒྲུབས་ནས་བྲུབ། །དེ་ཚེ་བསྙུང་གཞི་
བཟློག་པ་དགོས་འདུག་གསུངས། །གྲགས་པ་སེང་གེས་གཤིན་རྗེ་ཁ་ཐུན་གྱི། །བཟློག་པ་མཛད་པས་སྔགས་པའི་ཕུག་པ་རྡིབ། །སྔགས་པ་དགུ་ཤི་སྔགས་གྲོང་ནད་ངན་འཕྱུར། །ཆོས་རྗེ་སྐུ་ཁམས་གསིང་ཞིང་བསྟན་འགྲོར་ཕན། །དེ་འདྲའི་ནུས་པ་རང་རེར་མེད་ན་ཡང་། །སེམས་བསྐྱེད་བཟང་ན་བྱང་ཆུབ་ལམ་དུ་འགྲོ། །དེ་རྣམས་སྡང་བའི་གོལ་ས་བཀག་པ་ཡིན། །ཡི་དམ་ཁྲོ་བོ་ཨ་འཐས་ཐེར་ཟུགས་སུ། །ལྡེར་སྐུ་བཞིན་དུ་དངོས་པོར་བསྒོམ་པ་ན། །གཤིན་རྗེ་དང་ནི་སྲིན་པོར་གོལ་བ་ཡིན། །རྟ་ཕག་ཡབ་ཡུམ་ལ་སོགས་མགོ་བརྙན་ཅན། །དུད་འགྲོ་དེ་འདྲའི་མགོ་ཅན་ཡིན་སྙམ་ན། །ཤ་ཟ་ཕྲ་མེན་མགོ་བརྙན་ཅན་དུ་གོལ། །ཞི་བའི་ལྷ་རྣམས་ཐེར་ཟུག་ལྡེར་སྐུ་བཞིན། །བསྒོམས་ན་གཟུགས་ཁམས་ལྷ་རུ་གོལ་བ་ཡིན། །དེ་འདྲའི་ཐེར་ཟུག་བསྐྱེད་རིམ་བརྟན་པོ་ནི། །ཤི་དུས་ཐུགས་དམ་བརྟན་ཞིང་བར་དོ་ན། །སྐུ་གཟུགས་ལྷ་དེ་འདྲ་བའི་འབྱུང་པོའི་རིགས། །རིག་འཛིན་ཞེས་བྱ་རླུང་ལྷའི་འཁོར་དུ་སྐྱེ། །དེ་བཞིན་ཐུགས་ཀའི་ས་བོན་ཧཱུྃ་ཡིག་ཡང་། །དངོས་པོར་བསྒོམས་པས་སྦྲུལ་དུ་སྐྱེ་བར་གསུངས། །དེ་བཞིན་དམ་པ་
རིགས་རྒྱའི་ལྷ་གྲངས་བརྒྱ། །ཐེར་ཟུག་བསྒོམས་པས་གོལ་ས་བརྒྱ་རུ་བཤད། །གོལ་ས་དེ་དག་གཅོད་པའི་གདམས་པ་ནི། །གོ་བས་གཅོད་དང་སྒོམ་པས་གཅོད་པ་དང་། །ལྟ་བས་གཅོད་དང་རྣམ་པ་གསུམ་དུ་འདུས། །དང་པོ་སངས་རྒྱས་རྣམས་ནི་ཆོས་སྐུར་གཅིག །སྐུ་མདོག་ཕྱག་མཚན་ངེས་པ་ཡོད་པ་མིན། །དཔེར་ན་ཤེལ་གོང་ཤིན་ཏུ་དྭངས་པ་དེ། །གདན་ནི་གང་བཞག་དེ་ཡི་མདོག་ཏུ་འགྱུར། །དེ་བཞིན་ཡི་དམ་ལྷ་ཡི་ཆ་ལུགས་ཀྱང་། །ཞི་དང་ཁྲོ་དང་ཞི་མ་ཁྲོ་ལ་སོགས། །དབུ་ཕྱག་མང་ཉུང་སྣ་ཚོགས་ཅིར་ཡང་འཆར། །དེ་ལྟར་འཆར་བའི་རྒྱུ་མཚན་གང་ཞེ་ན། །ལོངས་སྐུ་དག་པའི་ཞིང་ཁམས་ཐམས་ཅད་ན། །གཙོ་བོའི་ཞལ་ནས་ཆོས་གསུང་མི་དགོས་ཏེ། །གཙོ་བོའི་སྐུ་མདོག་ཕྱག་མཚན་ཙམ་མཐོང་བས། །འཁོར་རྣམས་ཀུན་གྱིས་དེ་དོན་ཆོས་ཀུན་རྟོགས། །ཞལ་གསུམ་སྐུ་གསུམ་ཕྱག་དྲུག་ཕར་ཕྱིན་དྲུག །གཤོག་པ་གཉིས་ནི་ཐབས་དང་ཤེས་རབ་སྟེ། །ཞབས་བཞི་ཚད་མེད་བཞི་ཡི་བརྡ་དོན་ཡིན། །དེ་བཞིན་ཡི་དམ་ལྷ་ཚོགས་ཐམས་ཅད་ཀྱི། །ཆ་ལུགས་བརྡ་ཡི་སྒོ་ནས་ཆོས་སྟོན་ཡིན། །རྒྱལ་བ་ཐམས་ཅད་ཡེ་
ཤེས་ཀློང་དུ་གཅིག༔ ཆོས་ཉིད་དོན་ལ་ཆ་ལུགས་མི་མངའ་ཡང་༔ ཐབས་མཁས་གང་འདུལ་སོ་སོའི་སྐུར་སྟོན་པ༔ ཨོ་རྒྱན་ཆེན་པོས་གསུངས་པ་དེ་ཡི་དོན། །རྟ་ནི་མགྱོགས་ཤིང་ས་ཆོད་ཆེ་བ་ལྟར། །སངས་རྒྱས་ས་ལམ་མྱུར་དུ་བགྲོད་པའི་རྟགས། །རྟ་མགྲིན་དབུ་ལ་རྟ་ཞལ་བྱུང་བ་ཡིན། །ཕག་ལ་གཙང་བཙོག་རྣམ་རྟོག་མེད་པ་ལྟར། །ཕག་ཞལ་སྲིད་ཆོས་སྐུ་མཚོན་པ་ཡིན།། །མི་ལ་ཤ་ཚུགས་ལེགས་ཉེས་ཡོད་པ་ལྟར། །ལྷ་ཡི་ཆ་ལུགས་དེ་བཞིན་ངེས་པ་མེད་། །དེ་ནི་གོ་བས་གོལ་ས་གཅོད་པ་ཡིན། །དེ་ནས་སྒོམ་པས་གོལ་ས་གཅོད་པ་ནི། །བསྐྱེད་རིམ་རྣམ་པ་གསལ་དང་རྣམ་དག་དྲན།། །རྣམ་པ་གསལ་བ་མེ་ལོང་གཟུགས་བརྙན་བཞིན། །རྣམ་དག་དྲན་པ་བར་སྣང་འཇའ་ཚོན་བཞིན། །ང་རྒྱལ་རང་ཉིད་ལྷ་ཡི་ང་རྒྱལ་ཏེ། །ལྟ་བའི་སྒོ་ནས་གོལ་ས་གཅོད་པ་ནི། །ལྟ་བ་སྟོང་ཉིད་རྩི་དང་མ་བྲལ་བ། །ནམ་མཁའི་འཇའ་བཞིན་ཟུང་འཇུག་ཐུབ་ན་རབ་། །མ་ཐུབ་བསྐྱེད་རྫོགས་རེས་མོས་བྱ་བར་གསུངས། །དེ་ནས་གོལ་ས་ཕྲན་ཚེགས་འགའ་ཞིག་ནི། །འབྱོར་པ་ཡོད་ཀྱང་སེར་སྣས་འབྱོར་ཚོགས་ཆུང་། །མཆོད་པ་མུག་
ཚུལ་རྒྱུན་ནི་མ་ཆད་ཙམ། །དེ་ནི་ཡི་དྭགས་གནས་སུ་གོལ་བར་གསུངས། །མེད་ན་མ་གཏོགས་མཆོད་པ་བློ་སྟོབས་བསྐྱེད། །བྱ་སྤྱོད་རྒྱུད་ལ་མཆོད་རོ་བཟའ་མི་རུང་། །རྣལ་འབྱོར་རྒྱུད་ལ་མཆོད་རོ་འགོམ་མི་རུང་། །བླ་མེད་རྒྱུད་འདིར་མཆོད་རོ་དངོས་གྲུབ་རོལ། །དེ་བཞིན་ཤ་ཐུད་མར་སོགས་ཚོགས་ལ་བསྔོ། །རྒྱུ་ནི་མི་གོད་བསོད་ནམས་ཚོགས་ཆེན་རྫོགས། །ཤ་ཆང་ལ་སོགས་ཚོགས་ཀྱི་དམ་རྫས་རྣམས། །ཐ་མལ་ཟས་ཀྱི་སྲེད་པས་མང་ཟོས་ན། །ཡི་དྭགས་མཆུ་བཅིངས་གནས་སུ་གོལ་བར་གསུངས། །ཚོགས་རྫ་ས་ཐ་མལ་ཟས་ཀྱི་འདུ་ཤེས་ཀྱིས། །འདུལ་ཁྲིམས་བསྲུང་ཕྱིར་དེ་ལ་འཛེམ་བྱས་ན། །དམྱལ་བ་ཆུ་བུར་ཅན་དུ་གོལ་བར་གསུངས། །གོལ་བ་ཞེས་བྱའི་དོན་དེ་གང་ཞེ་ན། །ལམ་ནོར་ཅུང་ཟད་བྱུང་ན་འགོར་བ་ལྟར། །རེ་ཞིག་དེ་རུ་སྐྱེ་བ་ལེན་པའི་དོན། །དེ་རྣམས་བསྐྱེད་རིམ་གོལ་ས་གཅོད་པ་ཡིན། །དེ་ནས་ཐབས་ལམ་རྩ་རླུང་སྒོམ་པའི་སྒྱུ་དུས། །དྲོད་སྐྱེས་རས་གོས་ཐུབ་ན་མི་སྔོན་མཛེས། །རྩ་རླུང་ནུས་རྟགས་ཐོན་ན་བག་མེད་དུ། །མི་ཚངས་སྤྱོད་ཀྱང་གཞན་གྱིས་འཕྱ་རྒྱུ་མེད། །དེ་ལྟར་མིན་ཡང་བདག་ལུས་
བདེ་ཉམས་ཀྱིས། །འདོད་ཆགས་ཚོར་བདེ་དེ་ཉིད་དོན་གཉེར་ནས། །རྩ་རླུང་འཁྲུལ་འཁོར་དག་ལ་སྦྱོང་བ་ནི། །འདོད་ཆགས་ཆོས་སུ་སྨྲ་བའི་མུ་སྟེགས་པས། །རྩ་རླུང་སྦྱོང་བ་དེ་དང་འདྲ་བ་ཡིན། །དེ་ལ་དགོངས་ནས་མཁས་པ་འགའ་ཞིག་གིས། །བརྐམ་ཆགས་ཅན་གྱི་རྩ་རླུང་ཉོན་མོངས་རྒྱུ། །གསུངས་པ་དེ་ཡང་དེ་ལ་དགོངས་པ་ཡིན། །ཚོར་བདེའི་ཆགས་པ་དོན་དུ་གཉེར་བ་མིན། །འགྲོ་བའི་དོན་དུ་རྡོ་རྗེ་འཆང་དབང་ཉིད། །རབ་ཀྱིས་ཟླ་གསུམ་འབྲིང་གིས་ཟླ་བ་དྲུག །ཐ་མས་ཀྱང་ནི་ལོ་གསུམ་ཕྱོགས་གསུམ་ན། །རྡོ་རྗེ་འཆང་དབང་འགྲུབ་པར་བྱ་ཕྱིར་དུ། །རྩ་རླུང་ཉམས་སུ་ལེན་པའི་སེམས་བསྐྱེད་དེས། །གོལ་ས་དེ་ཉིད་ཆོད་པར་འགྱུར་བ་ཡིན། །དེ་ནས་རྫོགས་རིམ་སེམས་ངོའི་གོལ་ས་ནི། །བདེ་ཉམས་ལུས་བདེ་སེམས་བདེ་ཞུ་ལ་ཁད། །དེ་ལ་ཆགས་ན་འདོད་ཁམས་ལྷ་རུ་གོལ། །གསལ་ཉམས་སྟོང་རྗེན་ནམ་མཁའ་དྭངས་པ་བཞིན། །གཞན་གྱིས་སེམས་རྒྱུད་ཀྱང་ནི་ཤེས་སྙམ་བྱེད། །དེ་ལ་ཆགས་ན་གཟུགས་ཁམས་ལྷ་རུ་གོལ། །སྟོང་ཉམས་ཐམས་ཅད་སྟོང་པ་ཧད་དེ་བ། །རང་གི་ལུས་ཀྱང་མེད་དམ་སྙམ་པ་འབྱུང་། །དེ་ལ་ཆགས་
ན་གཟུགས་མེད་ཁམས་སུ་གོལ། །ཆགས་པ་ཞེས་བྱ་དེ་ལ་མཆོག་ཏུ་འཛིན། །ངེས་ཤེས་སྐྱེས་ཤིང་སེམས་ལ་འཆང་བ་ཡིན། །གང་ཤར་དེ་ཡི་ངང་ལ་ཅེ་རེ་བལྟ་། །ཆགས་ཞེན་མེད་ན་བྱང་ཆུབ་ལམ་དུ་འགྲོ། །དགེ་སློང་དགེ་ཚུལ་རི་ཁྲོད་འགྲིམ་པའི་དུས། །ཆོས་གོས་སྣམ་སྦྱར་ཤམ་ཐབས་ལ་སོགས་པ། །ཚད་ལྡན་མེད་ཀྱང་སྐྱོན་དུ་མི་འགྱུར་ཏེ། །ཤམ་ཐབས་ཁྲུ་གང་ཡོད་ཀྱང་ཆོག་པ་དང་། །སྐྲ་དང་ཁ་སྤུ་རིང་ཡང་སྐྱོན་མེད་པ། །འདུལ་བའི་གླེང་གཞི་རྣམས་ན་གསལ་བར་ཡོད། །ཟས་ཀྱང་ནང་གི་སྲེག་ཚོགས་འཁོར་སོགས། །བྱེད་ན་དགོང་ལའང་ཉེས་པ་མེད་མོད་ཀྱི། །ཆང་ནི་དམ་རྫས་ཙམ་ལས་བཏུང་མི་བྱ། །ལར་ནི་གདན་གཅིག་དགོང་བཅད་བྱས་ན་བཟང་། །དེ་ཡི་སྤྱོད་པ་ལོག་པར་གོལ་མི་འགྱུར། །དཔེར་ན་གསེར་འགྱུར་རྫས་ནི་ཁྱད་པར་ཅན། །ལྕགས་རིགས་གང་ལ་བྱུགས་ཀྱང་གསེར་དུ་འགྱུར། །དེ་བཞིན་བྱང་ཆུབ་སེམས་བསྐྱེད་བརྟན་པ་ན། །མི་དགེ་ཕལ་ཆེར་དགེ་བར་འགྱུར་བ་དང་། །དགེ་བ་ཐམས་ཅད་བྱང་ཆུབ་ལམ་དུ་འགྲོ། །དེ་ཕྱིར་གོལ་ས་ཐམས་ཅད་གཅོད་པའི་མཆོག །བྱང་ཆུབ་སེམས་
བསྐྱེད་ཡིན་པས་སྙིང་ལ་ཆོངས། །དཔེར་ན་རལ་གྲི་བསམ་གཅོད་འབར་བ་དེས། །གང་ལ་ཚད་པ་ཐམས་ཅད་དུམ་བུར་གཅོད། །དེ་བཞིན་ཤེས་རབ་སྟོང་ཉིད་རལ་གྲི་དེས། །དངོས་འཛིན་མཚན་མའི་གོལ་ས་ཐམས་ཅད་གཅོད། །དེ་བཞིན་སྟོང་ཉིད་སྙིང་རྗེ་ཟུང་འབྲེལ་ན། །གོལ་ས་མང་ཡང་གོལ་བའི་དོགས་པ་མེད། །དེ་སྐད་ཤིང་སྦྲུལ་བདུད་རྩི་འཁྱིལ་བའི་ལོ། །རྒྱུ་སྐར་མགོ་ཡི་ཟླ་བའི་ཡར་ཚེས་དྲུག །ཕྱིར་ནུབ་དང་བཅས་དགོང་མོའི་ཐུན་སྐབས་གཉིས། །རཱ་ག་ཨ་སྱས་འཕྲལ་དུ་གང་དྲན་སྨྲས། །དེ་ཚེ་བླ་མ་བརྩོན་འགྲུས་རྒྱ་མཚོ་ཡིས། །སོར་མོ་རླུང་གི་རྟ་ལ་ཞོན་ནས་བྲིས། །དགེ་བས་བློ་དམན་རི་ཁྲོད་འཛིན་རྣམས་ལ། །འགྲོ་དོན་རྒྱ་མཚོ་ལྟ་བུ་འབྱུང་བར་ཤོག །ལེའུ་སོ་ལྔ་པའོ་མངྒ་ལཾ།།