ལེའུ་སོ་བརྒྱད་པ། ཉོན་མོངས་དུག་ལྔའི་སྒྲིབ་པ་སྤང་བའི་ཕྱིར། །རྒྱབ་ཆོས་དུག་འཇོམ་རྨ་བྱ་ཆེན་མོ་ཡོད།
༼ཉི༽ རི་ཆོས་མཚམས་ཀྱི་ཞལ་གདམས་ལས་། རྒྱབ་ཆོས་དུག་ལྔ་སྤང་བ་དང་འདུལ་བ་དང་བསྒྱུར་བ་དང་རང་བཞིན་ཤེས་པ་དང་ལམ་དུ་ཁྱེར་ཐབས་དུག་འཇོམས་རྨ་བྱ་ཆེན་མོ་བཞུགས་སོ། །ན་མོ་ཤཱཀྱ་མུ་ནེ་ཡེ། རྣམ་པ་ཀུན་མཁྱེན་ཡང་དག་རྫོགས་སངས་རྒྱས། །བདེན་པར་གསུངས་པ་དེ་ལ་ཕྱག་འཚལ་ལོ། །བླ་མ་ཀརྨ་བརྩོན་འགྲུས་རྒྱ་མཚོ་བས། །ཀྱེ་མ་ཇི་ལྟར་བྱས་ཀྱང་དུག་ལྔ་འདི། །སྟོང་ཉིད་ངང་དུ་གྲོལ་བར་མ་ནུས་པས། །དུག་ལྔ་འདི་ཡིས་དབང་དུ་མི་འཆོར་བའི། །གདམས་པ་ཟབ་མོ་གནང་བར་ཐུགས་རྗེས་ཟུངས། །དེ་སྐད་ཟེར་བའི་ལན་དུ་
སྨྲ་བ་ན། །དུག་ལྔ་སྤང་དང་གཉེན་པོས་འདུལ་བ་དང་། །རང་བཞིན་ཤེས་པར་བྱེད་པ་ལམ་ཁྱེར་བཞི། །དང་པོ་བདེན་བཞི་ཆོས་ཀྱི་འཁོར་ལོའི་དོན། །རྒྱུ་འབྲས་བསླུ་མེད་དོན་ལ་ཡིད་ཆེས་པས། །ཉེས་དམིགས་དྲན་ནས་སྤང་བར་བྱེད་པ་ཡིན། །སྐྱེ་བ་འདི་དང་སྐྱེ་བ་གཞན་དག་ཏུ། །མི་འདོད་འོང་དོགས་ཆེ་བ་སྡུག་བསྔལ་ཡིན། །ཟློསྡུག་བསྔལ་འབྱུང་བའི་རྒྱུ་ནི་མི་དགེ་བ། །དུག་ལྔས་བསླང་བའི་ཉེས་པ་གང་བསྒྲུབས་པ། །དེ་དག་མི་དགེ་ཡིན་ཕྱིར་སྤང་བར་བྱ། །མི་དགེ་བ་ལས་སྡུག་བསྔལ་འབྱུང་ངེས་པས། །སྡུག་བསྔལ་དེ་ནི་བདེན་གྲུབ་ལུས་ཀྱིས་མྱོང་། །དེ་ནི་སྡུག་བསྔལ་བདེན་པ་ཞེས་བྱའོ། །དུག་ལྔ་ལས་ནི་མི་དགེ་ཀུན་འབྱུང་བ། །དེ་ནི་ཀུན་འབྱུང་བདེན་པ་ཞེས་བྱའོ། །དུག་ལྔ་བཀག་ན་ཐར་བའི་ས་ལམ་ཐོབ། །དེ་ནི་འགོག་པའི་བདེན་པ་ཞེས་བྱའོ། །ས་ལམ་བགྲོད་པས་འབྲས་བུ་དགྲ་བཅོམ་ཐོབ། །དེ་ནི་ལམ་གྱི་བདེན་པ་ཞེས་ཝཱ་རཱ་ཎ་སཱིར་ཆོས་འཁོར་བསྐོར་བ་ཡི། །དོན་གྱི་རྩ་བ་དེ་ལ་འདུས་པ་ཡིན། །འདོད་ཆགས་འབྲས་བུས་ཡི་དྭགས་སྐྱེ་བར་གསུངས། །ཞེ་སྡང་དམྱལ་བ་གཏི་མུག་དུད་
འགྲོའི་རྒྱུ། །ཕྲག་དོག་ལྷ་མིན་ང་རྒྱལ་ལྷ་དང་མི། །ངན་སོང་གསུམ་ན་སྡུག་བསྔལ་བཟོད་གླགས་མེད། །མཐོ་རིས་གནས་སུ་གནས་སྐབས་བདེ་ན་ཡང་། །མི་རྟག་མྱུར་དུ་སྡུག་བསྔལ་རྒྱུ་རུ་འགྱུར། །སྐྱེ་རྒ་ན་འཆི་གྲངས་མེད་ཐར་དུས་མེད། །དེ་ཡི་རྩ་བ་དུག་ལྔ་ཡིན་ཕྱིར་སྤང་། །ད་ལྟ་དུག་ལྔའི་རྣམ་རྟོག་བསྲན་ཀྱང་ཚུགས། །ངན་སོང་འཁོར་བའི་སྡུག་བསྔལ་བཟོད་གླགས་མེད། །དེ་ཕྱིར་དུག་ལྔ་སྐྱེས་ཀྱང་བསྲན་ཅིང་བསྒྱུར། །རྒྱལ་པོ་བཙན་པོའི་བཀའ་ཁྲིམས་དམ་པོ་བཞིན། །ཆོས་ཀྱི་རྒྱལ་པོ་སངས་རྒྱས་བཅོམ་ལྡན་གྱིས་།ཁྲིམས་སུ་བཅས་པའི་འདུལ་ཁྲིམས་ལས་འདས་ན། །སྐྱེ་བ་འབུམ་ཕྲག་བརྒྱ་ཡི་བར་དག་ཏུ། །ངན་སོང་སྡུག་བསྔལ་མྱོང་བའི་ཆད་པ་ཡོད། །འཇིག་རྟེན་འདི་ན་ཤི་བ་ཐུ་མོད་ཀྱི། །དི་བས་ཚུལ་ཁྲིམས་འཆལ་བ་འབུམ་འགྱུར་སྡུག །ཚུལ་ཁྲིམས་ལྡན་པ་ཤི་ཡང་ཤི་བ་མིན། །དེ་མ་ཐག་ཏུ་ལུས་བཟང་ལེན་པས་ཆོག །གཟུགས་མཛེས་ལ་ཆགས་སྡོམ་པ་གཏོར་བ་ནི། །མར་མེའི་གཟུགས་ལ་བྱེ་ལྷབ་ཆགས་གྱུར་ན། །བྱེ་ལྷབ་མཆོངས་པ་དག་དང་མཚུངས་པ་ཡིན། །ཉོན་མོངས་འཁྲིག་པའི་བདེ་ལ་ཆགས་པ་ནི། །མེ་
མདག་ཆེན་པོའི་སྟེང་དུ་རྩྭ་སྐྱ་བཏིང་། །མལ་ས་བདེ་སྙམ་གཉིད་ཀྱིས་ལོག་དང་མཚུངས། །ཤ་ཆང་དགོང་སོགས་ཟས་ཀྱི་ཚུལ་ཁྲིམས་འཆལ། །སྤུ་གྲིའི་རྩེ་ཡི་སྦྲང་རྩི་བལྡག་དང་མཚུངས། །འཇིག་རྟེན་དགྲ་བོ་ཇི་ལྟར་བཙོག་ན་ཡང་། །ཚེ་འདིའི་སྲོག་གཅོད་ལོངས་སྤྱོད་འཕྲོག་པ་ལས། །སྐྱེ་བ་མང་པོའི་བདེ་སྐྱིད་ཕྲོག་མི་ཐུབ། །བསྐལ་པ་བརྒྱ་རུ་བསོད་ནམས་གང་བསགས་པའི། །བསོད་ནམས་དགེ་ཚོགས་ཁོང་ཁྲོ་གཅིག་གིས་འཇོམས། །དེ་ཕྱིར་དགྲ་འདི་སྤང་བ་ཤིན་ཏུ་གཅེས། །སྦྲང་མ་སྦྲང་རྩི་ལ་ནི་ཆགས་པ་ཡིས། །སྦྲང་རྩིར་འབྱར་ནས་ཁོ་རང་འཆི་བར་འགྱུར། །དེ་བཞིན་ཚེ་འདིའི་བདེ་སྐྱིད་འདོད་པ་ལ། །ཆགས་པས་འཁོར་བར་འབྱར་ནས་ཐར་དུས་མེད། །དེ་ཕྱིར་འདོད་པ་ཆུང་ཞིང་ཆོག་ཤེས་བྱ། །གཏི་མུག་གཉིད་འདི་དགེ་བའི་ཆོམ་པོ་སྟེ། །ལོ་བརྒྱ་ཐུབ་ཀྱང་ལྔ་བཅུ་རོ་ལྟར་ཉལ། །གཉིད་ལ་ཉེས་པ་ཉི་ཤུ་ཡོད་པར་བཤད། །དེ་ཕྱིར་གཉིད་སྲབ་དགེ་སྦྱོར་བརྩོན་པར་བྱ། །རང་ཉིད་མི་ཤེས་གཏི་མུག་དབང་བཙན་པས། །ཆོས་མ་ཡིན་ལ་ཆོས་སུ་སྨྲ་བ་དང་། །ཆོས་ལ་ཆོས་མ་ཡིན་ཞེས་སྐུར་འདེབས་པ། །ཟ་
རྒྱུ་མེད་པར་ཞལ་ལྕེ་གཅོད་པ་ཞེས། །དོན་མེད་སྡིག་པ་ཆེན་པོའི་ལས་འདི་སྤང་། །རྒྱུ་འབྲས་ཕན་ཡོན་ཉེས་དམིགས་ལ་སོགས་པ། །དེ་ལྟར་མི་བདེན་བཤད་ཚོད་ཡིན་སེམས་པ། །ལོག་ལྟ་འདི་ནི་གཏི་མུག་ཆེན་པོ་སྟེ། །བཤགས་ཐབས་མེད་པའི་ལས་ངན་འདི་ཉིད་སྤང་། །རང་ཉིད་མཐོ་འདོད་གཞན་ལ་ཕྲག་དོག་པས། །བྱང་ཆུབ་སེམས་དཔའ་རྣམས་ལ་སྐུར་པ་བཏབ། །ཁམས་གསུམ་སེམས་ཅན་བསད་ལས་སྡིག་ཆེ་གསུངས། །ཕྲག་དོག་ལས་གྱུར་ལས་ངན་འདི་ཉིད་སྤང་། །ང་ནི་སྡོམ་ལྡན་ཚུལ་ཁྲིམས་གཙང་མ་ཅན། །སེར་ཆགས་ཕལ་པ་རྣམས་དང་མི་འདྲ་སྙམ། །དེ་ཡིས་རང་གི་ཚུལ་ཁྲིམས་མི་གཙང་འགྱུར། །དེ་དོན་དབུ་མ་འཇུག་པའི་གཞུང་ལས་གསུངས། །སེར་གོས་གྱོན་ཚད་དགེ་འདུན་དཀོན་མཆོག་སྟེ། །ཕྱི་ཡི་སྤྱོད་ལམ་མི་བཙུན་རྩིང་ན་ཡང་། །ནང་དེར་ཡོན་ཏན་ཅི་ཡོད་རྟོགས་དཀའ་བས། །གཞན་ལ་སྙིང་ནས་དག་སྣང་སྦྱོང་བ་དང་། །རང་ཉིད་ཀུན་ལས་དམན་པར་བལྟ་བ་གཅེས། །དེ་དག་དུག་ལྔ་སྤང་བའི་ལམ་ཞེས་པ། །ཉན་ཐོས་ལུགས་ཀྱི་བསྒོམ་བྱའི་གཙོ་བོ་ཡིན། །སྐྱེས་པ་བུད་མེད་མཛེས་ཤིང་མདོག་ལེགས་པ། །དེ་
མཐོང་རང་ཉིད་ཆགས་པ་སྐྱེས་པའི་ཚེ། །དཔེར་ན་གསེར་བུམ་གཅིན་རྟོག་བཀང་བ་བཞིན། །ཕྱི་ནི་ལེགས་ཀྱང་ནང་ནི་མི་གཙང་རྫས། །ཁོག་སྟོད་ཁྲག་རྣག་ཁོག་སྨད་གཅིན་རྟུག་གང་། །སྣབ་དང་ལུད་པ་ཀླད་པ་མཁྲིས་པ་སོགས། །མི་གཙང་རྫས་ནི་སུམ་ཅུ་སོ་གཉིས་ཀྱིས། །གང་བའི་རྐྱལ་པ་དེ་ལ་ཅི་ཞིག་དགའ། །ལུས་ལ་སྲིན་བུ་བརྒྱད་ཁྲི་བཞི་སྟོང་གནས། །གྲོག་མའི་འབུ་དང་སྲིན་བུ་བཤང་གཅི་སོགས། །གྲོག་ཚང་བཞིན་དུ་འབུ་སྲིན་གྱིས་གང་བ། །དེ་ལ་དགའ་བཞིན་འདོད་པ་འཁྲུལ་པར་བསམ། །དེ་ནི་མི་གཙང་སྒོམ་པའི་ཏིང་འཛིན་ཡིན། །མི་རོ་རྒོད་ཀྱིས་ཟོས་པའི་ཀེང་རུས་ལ། །ཇི་ལྟར་ཡོད་པའི་འཇིགས་རུང་བཙོག་པ་དེ། །རང་གཞན་ཀུན་གྱི་ལུས་པོའི་་ནང་དེར་ཡོད། །དེ་དོན་ཤེས་པས་ཆགས་པ་སྐྱེ་མི་འགྱུར། །རང་གི་མདུན་དུ་རོ་རུལ་འབུས་གཡེང་བ། །དེ་བཞིན་བམ་དང་རུལ་དང་དྲི་མ་མནམ། །ཀེང་རུས་ཤ་མེད་མིག་རྗེས་དམར་ཧ་རེ། །དེ་འདྲ་གཅིག་བསྒོམ་དེ་ནས་ས་ཕྱོགས་དེར། །དེ་འདྲ་ཁོ་ནས་གང་བ་གསལ་བར་བསྒོམ། །ཡང་ནི་རང་དང་རང་གི་ཆགས་པའི་ཡུལ། །ཐོད་པ་ནས་གས་
ལྤགས་པ་ཐམས་ཅད་བཤུས། །ལུས་ཀུན་ཀེང་རུས་སྐམ་པོར་གྱུར་པར་བསམ། །ཡང་ནི་རང་གི་ལུས་འདི་ཕྱི་ནང་བསྒྱུར། །གློ་སྙིང་ཐམས་ཅད་རྒྱབ་ཏུ་ཕྲ་ལེར་བསྒོམ། །དེ་དག་མི་སྡུག་བསྒོམ་པའི་ཏིང་འཛིན་ཡིན། །འདོད་ཆགས་འཇོམས་པའི་ཐབས་སུ་གསུངས་པ་ཡིན། །འདུལ་བའི་སྡེ་སྣོད་བསྒོམ་བྱའི་གཙོ་བོ་ཡིན། །སེམས་ཅན་ཐམས་ཅད་སྐྱེ་བ་དཔག་མེད་ཀྱི། །ཕ་དང་མ་རུ་མ་གྱུར་གཅིག་ཀྱང་མེད། །ལན་གཅིག་མ་ཡིན་ལན་གྲངས་དཔག་མེད་བྱས། །ཁོང་ཚོ་འཁྲུལ་པའི་གདོན་གྱིས་ཟིན་ནས་སྨྱོ། །ང་ལ་བུ་རུ་མ་ཤེས་གནོད་འཚེ་བྱས། །ངས་ནི་ཤེས་བཞིན་ཕ་མ་སྨྱོ་བ་ལ། །ཅི་ཕན་མ་གཏོགས་ལན་བྱེད་ག་ལ་རུང་། །སྙམ་དུ་དགྲ་ལ་བྱམས་པ་ཚད་མེད་བསྒོམ། །བདག་གིས་རྫོགས་པའི་བྱང་ཆུབ་སྒྲུབ་པ་ལ། །བཟོད་པའི་ཕར་ཕྱིན་ཡོངས་སུ་རྫོགས་དགོས་པས། །གནོད་བྱེད་མེད་ན་བཟོད་པ་སུ་ལ་བསྒོམ། །དེ་ཕྱིར་དགྲ་འདི་བདག་གི་དགེ་བའི་གྲོགས། མ་ཉེས་ཁ་ཡོག་སྐུར་པ་འདེབས་པ་ལ། །བཟོད་པ་བསྒོམ་ན་སྡིག་སྒྲིབ་དཔག་མེད་བྱང་། །སྐུར་འདེབས་མཁན་སོགས་ང་ཡི་སྒྲིབ་སྦྱོང་གྲོགས། །དབུལ་ཕོངས་སྡུག་བསྔལ་ཅན་
དག་མ་མཐོང་ན། །སྙིང་རྗེ་བསྒོམ་པའི་ཡུལ་དང་སྦྱིན་ཡུལ་མེད། །སྙིང་རྗེ་མེད་ན་བྱང་ཆུབ་ཐོབ་ཐབས་མེད། །དབུལ་ཕོངས་མེད་ན་སྦྱིན་པ་སུ་ལ་གཏོང་། །ངན་པ་འདི་ཚོ་བྱང་ཆུབ་སྒྲུབ་པའི་གྲོགས། །བདག་གིས་བླ་མེད་བྱང་ཆུབ་སྒྲུབ་པ་ལ། །སངས་རྒྱས་བས་ཀྱང་སེམས་ཅན་དྲིན་ཆེ་སྟེ། །སྦྱིན་དང་ཚུལ་ཁྲིམས་བཟོད་པའི་ཕར་ཕྱིན་གསུམ། །སེམས་ཅན་རྣམས་ཀྱི་དྲིན་ལ་བརྟེན་ནས་འབྱུང་། །དྲིན་ཅན་རྣམས་ལ་ཁོང་ཁྲོ་བྱ་མི་འོས། །ལྷ་སྦྱིན་དྲིན་ལ་བརྟེན་ནས་ཤཱཀ་ཐུབ་ཀྱང་། །བྱམས་པའི་སྔོན་ལ་རྫོགས་སངས་རྒྱས་ཞེས་གསུངས། །དེ་ལྟར་ཤེས་ཀྱང་ཁོང་ཁྲོ་མ་ཞི་ན། །དགྲ་དེ་ཚེ་འདིའི་མ་དེ་ཡིན་པར་བསྒོམ། །བསྒོམ་ལྟར་ཚེ་རབས་དུ་མའི་མ་ཡིན་ངེས། །དེ་ལ་གནོད་འཚེ་རུང་ངམ་མི་རུང་བརྟག །རང་ཉིད་དགྲར་བསྒོམ་དགྲ་དེ་རང་ཉིད་བསྒོམ། །འདུན་པ་བསྒྱུར་བས་ཞེ་སྡང་ཞི་བར་གསུངས། །བྱམས་པའི་ཏིང་འཛིན་ཞེ་སྡང་འདུལ་ཐབས་སོ། མདོ་སྡེའི་སྡེ་སྣོད་བསྒོམ་བྱའི་གཙོ་བོ་ཡིན། །ཐུབ་པ་ལྷ་ལས་བབས་དང་ལྷུམས་སུ་ཞུགས། །མཛད་པ་བཅུ་གཉིས་ཡིད་ལ་བརྩི་བགྲང་བྱ། །འཁོར་བར་འཁྱམས་པའི་རྩ་བ་མ་
རིག་པ། །དེ་ལས་འདུ་བྱེད་ལས་བྱུང་སྐྱེ་བའི་བར། །སྐྱེ་དང་རྒས་དང་འཆི་བ་ལ་སོགས་པ། །རྒ་ཤི་ཞེས་བྱ་ཆེས་དང་ཤི་བའི་མིང་། །དེ་ལས་མྱ་ངན་སྡུག་བསྔལ་ཡིད་མི་བདེ། །འཁོར་བར་འཁྱམས་ཕྱིར་སྲིད་པའི་འཁོར་ལོ་སྟེ། །ཐམས་ཅད་འཆི་བདག་གཤིན་རྗེའི་ཁར་འགྲོ་བས། །འགྲོ་དྲུག་གཤིན་རྗེ་འཆར་ཁའི་ལྟོ་བར་གནས། །དེ་དོན་དགེ་འདུན་རྣམས་ཀྱིས་གོ་བའི་ཕྱིར། །གཙུག་ལག་ཁང་གི་སྒོ་གཡོན་བྲི་སྲོལ་ཡོད། །མ་རིག་འགག་པས་འདུ་བྱེད་འགགས་པ་ནས། །སྐྱེ་བ་འགགས་ནས་རྒ་ཤི་འགགས་པའི་བར། །རྟེན་འབྲེལ་ལུགས་བཟློག་ཐར་པའི་འཁོར་ལོ་སྟེ། །འཕགས་ལམ་ཡན་ལག་བརྒྱད་པོ་མཚོན་པའི་ཕྱིར། །འཁོར་ལོ་དཀར་པོ་རྩིབས་བརྒྱད་ལྡན་པ་ཞིག །གཙུག་ལག་ཁང་གི་སྒོ་གཡས་བྲི་སྲོལ་ཡོད། །རྟེན་འབྲེལ་ལུགས་འབྱུང་ལུགས་བཟློག་ཡིད་ལ་བགྲངས། །དེ་ཡང་མ་རིག་པ་དེ་གང་ཞེ་ན། །རང་སེམས་རང་གིས་མ་རིག་པ་དེ་ཡིན། །དེ་ལ་བརྟེན་ནས་སྲིད་པའི་འཁོར་བར་འཁྱམས། །རང་སེམས་རང་གིས་རིག་པས་མ་རིག་འགག །དེ་ལ་གོམས་པས་འཕགས་པའི་ལམ་ཐོབ་འགྱུར། །སྲོད་དང་ཐོ་རངས་གཉིད་
ནི་བསྲབས་པའི་ཕྱིར། །ཁྱིམ་དུ་འཆག་པར་བྱ་བ་གསུངས་ན་ཡང་། །ལག་ལེན་བདེ་བར་ཀ་བར་རྟེན་གསུམ་བཅིང་། །དེ་ལ་བསྐོར་བ་བྱ་ཞིང་བཟླས་བརྗོད་འབད། །ཡང་ན་ནུབ་མོ་རང་གི་སྤྱི་བོའི་གཙུག །མར་མེ་གསལ་བ་གཅིག་བསྒོམ་རིག་པ་གཏད། །དེ་ཡིས་གཉིད་སྲབ་གཏི་མུག་སེལ་བར་གསུངས། །དམ་ཆོས་མངོན་པའི་བསྒོམ་བྱའི་རྩ་བ་སྟེ། །གཏི་མུག་གཉེན་པོར་རྟེན་འབྲེལ་སྒོམ་ཐབས་སོ། །ཀྱེ་མ་གྲངས་མེད་བསྐལ་པའི་སྔོན་རོལ་ནས། །བདག་ནི་མཐའ་མེད་འཁོར་བར་འདི་ཙམ་འཁྱམས་། །ད་རུང་སུན་སྣང་མེད་པའི་སྙིང་སྲན་ཅན། །སྔོན་བྱོན་སངས་རྒྱས་བྱེ་བ་གྲངས་མེད་ཀྱི། །བསྟན་པའི་ཡུན་ལ་མ་གྲོལ་ལས་ངན་པོ། །དབང་ལུང་ཁྲིད་དང་མན་ངག་ཅི་ཐེབ་ཀྱང་། །རང་རྒྱུད་གྲོལ་བར་མ་ནུས་ཆོས་སྡུག་པོ། །བསྟན་ལ་ཞུགས་ནས་སྡོམ་པ་གསུམ་ཞུས་ཀྱང་། །ཉེས་ལྟུང་ཆར་པ་བབས་པའི་ཁྲིམས་འཆལ་པོ། །ཡི་དམ་བསྙེན་སྒྲུབ་དཔག་མེད་བྱས་ན་ཡང་། །ལྷ་ཞལ་ཟུར་ཙམ་མ་མཐོང་སྒྲིབ་འཐུག་པོ། །ཆུང་ནས་མ་ཤི་བར་དུ་དཀོར་ཟོས་ཀྱང་། །ད་རུང་ཚིམ་པ་མེད་པའི་དཀོར་དྲེད་པོ། །ནང་དུ་
ཉོན་མོངས་དུག་ལྔས་གང་བཞིན་དུ། །ཕྱི་རུ་ཆོས་གོས་གཟབ་པའི་ཟོབ་རྫུ་མཁན། །གཞུང་གཅིག་ཙམ་ཡང་འཆད་རྩོད་མི་ཤེས་པར། །ད་རུང་མཁས་འདོད་ཆེ་བའི་ཧམ་པ་ཅན། །དུག་ལྔའི་མགོ་བོ་ཅུང་ཟད་མི་ནོན་པའི། །བཟང་པོ་ཡིན་སྐད་སྨྲ་བའི་མགོ་གཡོགས་མཁན། །རང་ཉིད་གར་འགྲོའི་གཏད་སོ་མེད་བཞིན་དུ། །ཚེ་འདས་མང་པོ་འདྲེན་པའི་སྙིང་ཁམས་ཅན། །རང་ཉིད་ནམ་འཆི་ངེས་པ་མེད་བཞིན་དུ། །གཞན་གྱི་བར་ཆད་སེལ་བའི་བྱིན་རླབས་ཅན། །ལེགས་པར་བསམ་ན་རང་ལ་ཡི་རེ་མུག །བསམ་ཞིང་རང་གི་བྲང་ལ་ཏུག་ཏུག་བྱ། །དེ་ཡིས་ང་རྒྱལ་ཁེངས་པ་འཇོམས་པར་འགྱུར། །ཀྱེ་མ་བདག་གིས་བྱང་ཆུབ་སེམས་བསྐྱེད་ཞུས། །དེ་དུས་སངས་རྒྱས་ཀུན་གྱི་མཁྱེན་ཅིང་དགོངས། །འགྲོ་ཀུན་སངས་རྒྱས་སར་འགོད་དམ་བཅའ་བྱས། །དགེ་སྦྱོང་བྱས་ཚད་འགྲོ་བའི་དོན་ཡིན་ཅིང་། །འགྲོ་ཀུན་བདེ་དང་བདེ་བའི་རྒྱུར་ལྡན་པའི། །སྨོན་ལམ་འདི་ཡང་རྒྱུན་དུ་བརྗོད་བཞིན་དུ། །མི་གཞན་མཐོ་ཞིང་སྐྱིད་ན་མི་དགའ་བའི། །ཕྲག་དོག་སེམས་འདི་གང་ནས་དྲན་ན་ཨང་། །འགྲོ་ཀུན་བདེ་ཞིང་སྐྱིད་ན་དགའ་བའི་སེམས། །དེ་
ཉིད་ཁོ་ནས་ཚངས་པའི་ལུས་ཐོབ་གསུངས། །གཞན་ལ་ཕྲག་དོག་མཐོ་ན་མི་དགའི་སེམས། །བསྡུས་འཇོམས་དམྱལ་བ་ལྷ་མིན་ས་བོན་ལགས། །དེ་འདྲ་བསམ་པས་ཕྲག་དོག་ཞི་བར་འགྱུར། །དེ་དག་དུག་ལྔ་གཉེན་པོས་འདུལ་བ་སྟེ། །ཐེག་པ་ཆེ་ཆུང་ཐུན་མོང་མདོ་ཡི་ལུགས། །སེམས་ལ་དུག་ལྔའི་རྟོག་པ་གང་ཤར་ཚེ། །སྭ་བྷཱ་ཝ་ཡི་སྔགས་ཀྱིས་སྟོང་པར་སྦྱང་། །ཞེ་སྡང་རྡོར་སེམས་ང་རྒྱལ་རིན་ཆེན་འབྱུང་། །འདོད་ཆགས་སྣང་མཐའ་ཕྲག་དོག་དོན་ཡོད་གྲུབ། །གཏི་མུག་རྣམ་སྣང་སྐུ་རུ་གསལ་བར་བསྒོམ། །དེ་ལས་འོད་འཕྲོས་འགྲོ་བའི་དུག་ལྔ་སྦྱོང་། །ལམ་རྒྱུད་ལྔ་རུ་སྐྱེ་བའི་སྐྱེ་སྒོ་གཅོད། །ཚུར་འདུས་འོད་ཞུ་མི་དམིགས་སྟོང་པར་བསྒོམ། །སྐྱེ་བ་འདི་ནས་ཚེ་རབས་ཐམས་ཅད་དུ། །བདག་ཉིད་མཐོང་ཐོས་དྲན་པའི་འགྲོ་ཀུན་གྱི། །དུག་ལྔའི་སྒྲིབ་པ་སྦྱངས་ཤིང་དག་ནུས་ཤོག །ནམ་ཞིག་བདག་ཉིད་མངོན་པར་བྱང་ཆུབ་ཚེ། །ཞིང་དེར་དུག་ཉྩ་ལྔ་གཏན་ནས་མེད་པར་ཤོག །དེ་སྐད་ཡིད་ཀྱིས་བསྒོམ་མམ་ངག་གིས་བརྗོད། །དོན་ལ་ཕྱི་སྣོད་གདོད་ནས་གཞལ་ཡས་ཁང་། །ནང་བཅུད་སེམས་ཅན་ཐམས་ཅད་ཡི་དམ་
ལྷ། །གདོད་ནས་ཡིན་བཞིན་གསལ་བཏབ་གཏི་མུག་ཞི། །ཐ་མལ་འདོད་ཆགས་ཡི་དམ་ལྷར་མི་སྐྱེ། །ཡི་དམ་ལྷ་ལ་ཁྲོའམ་ཚིག་ངན་མེད། །ཐམས་ཅད་ལྷ་མཉམ་སུ་མཐོ་སུ་ཞིག་དམའ། །།ཡི་དམ་ལྷ་ལ་མཐོ་དོག་ཕྲག་དོག་གམ། །དེ་ལྟར་ཤེས་པས་དུག་ལྔ་ཤུགས་ཀྱིས་འགག །དེ་ནི་བསྐྱེད་རིམ་པ་ཡི་ཉམས་ལེན་ཏེ། །དུག་ལྔ་བསྒྱུར་བའི་ལམ་ཞེས་བྱ་བ་ཡིན། །གསང་སྔགས་མི་སྤང་པ་ཡི་དམ་ཚིག་ལྔ། །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་ལྔ་པོ་སྤང་བར་མི་བྱ་སྟེ། །དུག་ལྔ་སྤང་བའི་ཡེ་ཤེས་ལོགས་ཤིག་མེད། །དུག་ལྔ་སྤང་ན་ཐེག་དམན་ཉན་ཐོས་ལམ། །དུག་ལྔའི་རྗེས་སུ་འབྲང་ན་ཐ་མལ་པ། །དུག་ལྔ་འཇོལ་ཉོག་སྤྱོད་ན་བདུད་ཀྱི་ལས། །དུག་ལྔ་རང་ངོ་བལྟས་ན་ཡེ་ཤེས་ལྔ། །ཞེ་སྡང་མེ་ལོང་ཡེ་ཤེས་རྡོ་རྗེ་སེམས། །ང་རྒྱལ་མཉམ་ཉིད་ཡེ་ཤེས་རིན་ཆེན་འབྱུང་། །འདོད་ཆགས་སོར་རྟོག་ཡེ་ཤེས་སྣང་མཐའ་ཡས། །ཕྲག་དོག་བྱ་གྲུབ་ཡེ་ཤེས་དོན་ཡོད་གྲུབ།། གཏི་མུག་ཆོས་དབྱིངས་ཡེ་ཤེས་རྣམ་སྣང་མཛད། །དུག་ལྔ་མ་སྤང་རང་རང་ངོ་བོར་ལྟ། །མ་སྤང་གནས་སུ་དག་ན་ཡེ་ཤེས་ལྔ། །རྒྱལ་བ་རིགས་ལྔའི་
དགོངས་པར་ལྷུན་གྱིས་གྲུབ། །དེ་ནི་ཕྱག་རྫོགས་ལུགས་ཀྱི་ཉམས་ལེན་ཡིན། །ནད་བརྒྱ་སྨན་གཅིག་ངོ་ལྟ་གཅིག་པུས་ཆོག །རབ་ལ་སྐྱེས་མ་ཐག་ནས་འབུར་འཇོམ་བྱ། །དཔེར་ན་རྩྭ་གསེབ་མེ་སྟག་བསད་པ་བཞིན། །འབྲིང་ནི་དངོས་གཞི་སྐྱེ་དུས་ཅེར་གྱིས་ལྟ། །རང་ཞི་རང་གྲོལ་ཆུ་དང་ཆུ་རླབས་བཞིན། །ཐ་མ་དྲན་པ་རྗེས་སླེབས་རྗེས་མི་འབྲང་། །དཔེར་ན་སྨྱོན་པས་དྲན་པ་རྙེད་པ་བཞིན། །ཉམས་ལེན་ཕན་ཆེ་སྟབས་བདེ་འདི་ཀ་ཡིན། །རང་ཡང་ཅུང་ཟད་ཉམས་ལེན་བྱས་སྙམ་བགྱིད། །བརྩོན་འགྲུས་རྒྱ་མཚོས་ཉམས་ལེན་དེ་ལ་མཛོད། །དེ་ནས་དུག་ལྔ་མི་སྤང་ལམ་ཁྱེར་ནི།་་་་་་ཐ་མལ་སྣོད་མིན་ལོག་ལྟ་ཅན་ལ་གསང་། །ཐུབ་དང་མི་ཐུབ་རང་གི་ཉམས་ཚོད་དཔག །གང་ཟག་ཕལ་གྱིས་ཉམས་སུ་ལེན་བྱ་མིན། །འདི་ལ་ནུས་ལྡན་རྟོགས་པ་མཐོན་པོ་དགོས། །གཏི་མུག་ཉིད་ཀྱིས་གཏི་མུག་འཇོམ་པའི་ཐབས། །གཙང་ཞིང་དབེན་པར་དཀོར་ཟས་གྲིབ་ལ་སྒྱུ་འཛེམ། །ཁྲུས་བྱས་སྤོས་བདུག་མི་དང་ངོ་མི་གཏུགས། །ཚོགས་ཀྱི་འཁོར་ལོ་བསྐོར་ཞིང་ཡིག་བརྒྱ་བཟླས། །ཉིན་ལ་ཡུད་ཙམ་མི་གཉིད་གཉིད་བསྲུང་བྱ། །ཕྱག་དང་བསྐོར་
བས་ལུས་པོ་ཐང་ཆད་བཅུག །བདེ་བའི་མལ་དུ་སེང་གེའི་ཉལ་སྟབས་ཉལ། །རང་ཉིད་ཡི་དམ་ལྷར་གསལ་ཐུགས་ཀ་རུ། །པདྨ་འདབ་བཞིའི་དབུས་སུ་ཨོཾ་དཀར་པོ། །ཤར་དུ་ཨ་སྔོན་ལྷོ་རུ་ནུ་སེར་པོ། །ནུབ་ཏུ་ཏ་དམར་བྱང་དུ་ར་ལྗང་བསྒོམ། །དེ་ནས་གཉིད་ནི་རབ་གཅིག་ཧུར་བ་དང་། །ཡི་གེ་བཞི་པོར་རིམ་བཞིན་དམིགས་པ་གཏད། །གཉིད་ཁ་དབུས་ཀྱི་ཨོ་ལ་སེམས་གཏད་ནས། །མ་ཡེངས་སེམས་ངོའི་རྩི་དང་མ་བྲལ་གཉིད། །གཉིད་ཚེ་ཚོགས་བརྒྱད་མི་གསལ་གཅིག་ཏུ་བསྡུས། །ཡུད་ཙམ་དབུ་མར་ཞུགས་ཚེ་འོད་གསལ་འཆར། །དེ་ཉིད་ངོས་ཟིན་ངང་ལ་མཉམ་པར་གཞག །འོད་གསལ་ཟིན་པ་ཕྱི་ནང་གསལ་བར་དྲན། །དེ་ནི་སྲབ་མོའི་འོད་གསལ་ཟིན་པ་ཡིན། །མ་གཉིད་བར་དུ་ཉམས་ལེན་ངང་དུ་གནས། །གཉིད་ནས་མ་དྲན་རྨི་ལམ་ཅུང་ཟད་མེད། །སད་མ་ཐག་ཏུ་སེམས་ངོའི་ཐོག་ཏུ་གནས། །སེམས་དགའ་ཁམས་བདེ་ལུས་ཀྱི་ཤ་མདོག་དཀར།། འོད་གསལ་ཟིན་ནམ་མ་ཟིན་མ་ཤེས་ཀྱང་། །འཐུག་པོའི་འོད་གསལ་ཡིན་པར་དྭགས་པོས་གསུངས། །དེ་ནི་གཏི་མུག་ལམ་ཁྱེར་གདམས་ངག་ཡིན། །འདོད་ཆགས་ལམ་ཁྱེར་
ཕྱག་རྒྱ་རྣམ་བཞི་སྟེ། །ལས་ཀྱི་ཕྱག་རྒྱ་རིག་མ་མཚན་ལྡན་ནི། །ས་ཐོབ་རྫུ་འཕྲུལ་སྟོན་ནུས་མ་ཡིན་པའི། །འདུལ་ཁྲིམས་ཞུས་པས་བརྟེན་ན་ངན་སོང་རྒྱུ། །འདུལ་ཁྲིམས་མ་ཞུས་རྩ་རླུང་ལས་རུང་བས། །ཁྱིམ་པ་རྡོ་རྗེ་འཛིན་པས་བརྟེན་བྱ་སྟེ། །གཏེར་སྟོན་རྣམས་དང་ས་འབྲིའི་གདུང་རྒྱུད་བཞིན། །དམ་ཚིག་ཕྱག་རྒྱ་གཏུམ་མོ་ཙཎྜ་ལི། །བསྒོམ་པས་དྲོད་འབར་བྱང་སེམས་འཕེལ་འགྱུར་བས། །འདོད་ཆགས་སྐྱེ་བ་གཏུམ་མོ་འདོད་ཆགས་དུས། །དེ་དུས་སྟོང་པས་རྒྱས་གདབ་བདེ་སྟོང་བསྲེ། །ཐིག་ལེ་མ་ཉམས་སྲོག་ལྟར་བསྲུང་བར་བྱ། །དྭགས་པོ་བཀའ་བརྒྱུད་རྣམས་ཀྱི་ཕྱག་སྲོལ་ལགས། །ཡིད་རིག་ཡེ་ཤེས་ཕྱག་རྒྱ་ཞེས་བྱ་བ། །ཡི་དམ་ཡབ་ཡུམ་ཞལ་སྦྱོར་བསྒོམ་པ་ཡིན། །རང་གི་སེམས་ཉིད་སྟོང་ཉིད་ཕྱག་རྒྱ་ཆེ། །ཉན་ཐོས་རང་རྒྱལ་བྱང་སེམས་རྫོགས་སངས་རྒྱས། །འཕགས་པ་བཞི་ཀ་དེ་ལས་སྐྱེས་པའི་ཕྱིར། །དུས་གསུམ་རྒྱལ་བའི་ཡུམ་ཞེས་སྨྲ་བརྗོད་པ་ཡིན། །དེ་ཉིད་ཉམས་ལེན་ཕྱག་རྒྱ་ཆེན་པོའི་ཡུམ། །རྩ་རླུང་མི་ཆུན་རྒན་པོ་རྣམས་ཀྱིས་བརྟེན། །དེ་རྣམས་འདོད་ཆགས་ལམ་ཁྱེར་གདམས་པ་ཡིན། །བསྒྲལ་བའི་
ཞིང་བཅུ་ཚང་བ་མ་གཏོགས་པའི། །དགྲ་བོ་བྱུང་ཡང་བཟོད་པ་བསྒོམ་དགོས་སོ། །ཞིང་བཅུ་ཚང་ཞིང་རང་གི་དགྲར་གྱུར་ཀྱང་། །དེ་ལ་དྲག་པོའི་ལས་སྦྱོར་རུང་མི་རུང་། །ཡི་དམ་ལྷ་ལ་གསོལ་བཏབ་རྨི་ལམ་བརྟག །རུང་བའི་གནང་བ་བྱུང་ན་ལས་བྱ་བར། །དཔལ་ལྡན་ལྷ་མོའི་རྒྱུད་གཞུང་རྣམས་ནས་གསུངས། །རང་དགྲ་མིན་ཡང་ཐུབ་བསྟན་སྤྱི་བཤིག་པ། །རང་གིས་བསྒྲལ་བའི་ནུས་པ་ལྡན་བཞིན་དུ། །བཏང་སྙོམས་བཞག་ན་དེ་ཉིད་ཉེས་པ་ཆེ། །དེ་ཉིད་མི་མིན་སྤྲུལ་པ་ཡིན་ཤེས་དང་། །རང་ལས་ལྷག་པའི་བསྟན་འཛིན་གཞན་ཡོད་དམ། །རང་ལ་ནུས་པ་མེད་ན་ཉེས་པ་མེད། །ཞེ་སྡང་མ་ཡིན་ཁོ་ལ་སྙིང་རྗེ་ཡིས། །སྡིག་འཕྲོ་གཅོད་ཅིང་བདེ་བར་འདྲེན་པ་དང་། །སངས་རྒྱས་བསྟན་པ་མི་ནུབ་རྒྱས་པའི་ཕྱིར། །དྲག་སྔགས་ནུས་པས་དེ་ཉིད་ཚར་བཅད་དེ། །ཤ་ཁྲག་ཕུང་པོས་ལྷ་དང་སྲུང་མ་མཆོད། །རྣམ་ཤེས་དག་པའི་ཞིང་ངམ་མཐོ་རིས་སུ། །།སྤར་ནས་ཐུགས་རྗེས་ནམ་ཡང་མི་བཏང་བར། །རང་གིས་རིམ་གྱིས་སངས་རྒྱས་སར་འགོད་པའི། །སེམས་བསྐྱེད་སྨོན་ལམ་དང་བཅས་བསྒྲལ་བ་སྟེ། །དཔེར་ན་མུ་སྟེགས་སྤྱང་པོ་ཉི་མ་དེས། །
ལོ་གྲངས་བཅུ་གཉིས་མིག་བཙུམ་ཉི་མ་བསྒྲུབས། །རྡོ་རྗེ་གདན་དུ་འོང་ནས་མིག་བལྟས་པས། །མིག་ནས་མེ་འབར་རྡོ་རྗེ་གདན་གྱི་ནི། །གཙུག་ལག་ཁང་དང་དམ་ཆོས་ཐམས་ཅད་བསྲེགས། །སངས་རྒྱས་བསྟན་པའི་རུ་ཏྲར་གྱུར་པའི་ཚེ། །བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས། །ཆོས་སྐྱོང་མང་པོ་རྦད་ཀྱང་རྟགས་མ་བྱུང་། །དེ་ནས་རྣམ་སྲས་རྟ་སྔོན་ཅན་ཆད་པས། །ཁོ་ཡི་ཙིཏྟ་དངོས་སུ་ཁྱེར་ནས་བྱུང་། །ཆོས་སྐྱོང་ཡོངས་ཀྱི་གཙོ་བོར་མངའ་གསོལ་མཛད། །སྡིག་ཅན་མུ་སྟེགས་སྤྲང་པོ་ཉི་མ་དེ། །ཀླུ་སྒྲུབ་ཀྱིས་བསྒྲལ་ཐུགས་རྗེས་མ་བཏང་ཕྱིར། །བོད་དུ་མཁོན་རིགས་ཀླུ་ཡི་དབང་པོར་སྐྱེས། །མཁས་གྲུབ་ཆེན་པོ་བསྟན་པའི་བདག་པོར་གྱུར། །དེ་ལྟར་བསྒྲལ་ནས་ཐུགས་རྗེས་འཛིན་པ་དེ། །ཞེ་སྡང་ལམ་ཁྱེར་གདམས་ངག་ཡིན་མོད་ཀྱི། །དེ་ལྟར་ཁོ་ཉིད་འདྲེན་པར་མ་ནུས་ན། །འདུལ་བའི་ལུང་ནས་གསོད་དམ་འཆིར་བཅུག་ཅེས། །སྲོག་བཅད་ཕམ་ཀླུ་པ་འབྱུང་བ་མཚུངས་འདྲ་བས། །མཐུ་དགའ་མི་ཆེ་མཐུ་སྡིག་མི་བྱེད་པར། །དམ་ཚིག་གཙང་ཞིང་བསྙེན་སྒྲུབ་ཐེམས་པ་དང་། །གཏོར་བསྔོས་དགུ་གཏོར་བསྐང་གསོལ་བརྩོན་
བྱས་ན། །ཆེད་དུ་ལས་སྦྱོར་དམིགས་ངན་མ་བྱས་ཀྱང་། །དགྲ་ལ་རྟགས་དང་ཆོ་འཕྲུལ་མང་དུ་འབྱུང་། །མ་བསྐུལ་བར་ཡང་གནོད་པའི་དགྲ་བསྒྲལ་ཞེས། །དམ་ཚིག་གཙང་ཞིང་ལྷ་སྲུང་འཁོར་རྟགས་ཡིན། །དེ་འདྲ་བྱུང་ཡང་རང་ལ་སྒྲིབ་པ་མེད། །འདི་ཡང་མྱོང་བས་ལན་མང་གྲུབ་པ་ཡིན། །འདི་ཡི་གནད་ལ་ཁོ་བོས་འདི་འདྲ་མཐོང་། །དངོས་སུ་དྲག་སྔགས་ལས་སྦྱོར་མ་བྱས་ཀྱང་། །སེམས་ལ་ཞེ་སྡང་ཁོང་ཁྲོ་ཡོད་ན་ནི། །དེ་ལ་བཀའ་ཆད་དག་ནི་འབྱུང་མི་འགྱུར། །ཕ་རོལ་པོ་དེས་མི་འོས་གནོད་བྱས་ཀྱང་། །སེམས་ལ་ཁོང་ཁྲོ་ཞེ་སྡང་མ་སྐྱེས་ན། །གནོད་པ་ཆེ་ཆུང་གང་བྱས་ཚོད་དེ་དང་། །འཚམས་པའི་བཀའ་ཆད་མི་དགེ་སྣ་ཚོགས་པས། །ལོ་ཟླ་མི་འགྱང་མྱུར་དུ་འོང་བ་ནི། །ལན་གཅིག་མ་ཡིན་ལན་མང་མྱོང་བས་གྲུབ། །གུ་རུ་ཆོས་དབང་ལ་ཡང་དེ་འདྲ་བྱུང་། །མཐུ་བཞེས་གཏོར་གསུམ་བྱས་ཀྱང་རྟགས་མེད་པ། །བྱམས་དང་སྙིང་རྗེ་བསྒོམས་པས་གཏན་ནས་བརླག །དེ་དོན་ཅི་ལགས་ཨོ་རྒྱན་ལ་ཞུས་པས། །དགྲ་ལ་ཞེ་སྡང་གཉེན་ལ་གདུང་སེམས་ནི། །རང་སེམས་སྣང་བའི་དབང་དུ་ཕར་ཤོར་བས། །བསམ་བཞིན་མི་འགྲུབ་ལོག་
པར་འགྲོ་བ་ཡིན། །དགྲ་ལ་མི་སྡང་བྱམས་དང་སྙིང་རྗེ་སྐྱེས། །སྣང་བ་རང་སེམས་དབང་དུ་ཚུར་འདུས་པས། །རང་གིས་ཅི་བསམ་འགྲུབ་པ་ཡིན་ནོ་གསུངས། །བཀའ་བརྒྱུད་བཞེད་པའང་དེ་དང་མཐུན་པར་སྣང་། །མངོན་ཤེས་མེད་པས་མངོན་སྤྱོད་མི་རུང་སྟེ། །ཚེ་སྟོད་བསྟན་ལ་གནོད་པའི་དགྲ་བོ་ཡང་། །ཚེ་སྨད་བསྟན་ལ་ཕན་པ་ཆེ་སྲིད་གསུངས། །མདོ་ལུགས་དཀོན་མཆོག་གསུམ་ལ་གནོད་མི་མངའ། །དཀོན་མཆོག་གསུམ་པོ་ཡིད་ལ་དྲན་པས་ཀྱང་། །གནོད་པ་ཐམས་ཅད་སྐྱོབ་པར་གསུངས་པ་ཡིན། །སངས་རྒྱས་བསྟན་ལ་གནོད་པར་བྱེད་པའི་དགྲ། །ཐེག་དམན་ལུགས་ལ་བདུད་དང་བསྟན་དགྲ་སྟེ། །ཐེག་ཆེན་ལུགས་ལ་ཆེ་བ་འདོན་པའི་ཕྱིར། །སངས་རྒྱས་ཉིད་ཀྱི་སྤྲུལ་པ་ཡིན་པ་སྟེ། །དཔེར་ན་བདུད་རྒྱལ་ལྷས་བྱིན་ལྟ་བུའོ། །བཀའ་གདམས་ལུགས་ལ་བདུད་རྒྱལ་གླང་དར་ཡང་། །སངས་རྒྱས་བསྟན་ལ་བཀའ་དྲིན་ཆེན་པོ་སྟེ། །སྔགས་ལ་ཁ་གཡར་ཆོས་ལོག་དར་བ་རྣམས། །ཁོ་ཡིས་ཚར་བཅད་ས་ཕྱོགས་གཙང་བར་བྱས། །དེ་ནས་སངས་རྒྱས་གཉིས་པ་ཨ་ཏི་ཤ །བྱོན་པས་དམ་ཆོས་སླད་མེད་འདི་དར་ཞེས། །
རྔོག་ལོ་ཆེན་པོ་སོགས་ཀྱིས་གསུངས་པ་ཡོད། །དེ་ཕྱིར་བསྟན་དགྲ་ཡིན་ཡིན་འདྲ་ན་ཡང་། །ལས་སྦྱོར་བྱེད་ཐག་ཆོད་པ་མ་ཡིན་ནོ། །དེ་དག་ཞེ་སྡང་ལམ་ཁྱེར་གནད་འགག་མདོ་ལུགས་རང་སེམས་མི་གཙང་ཤ་ཁྲག་ལུས། །བྱང་ཆུབ་སེམས་བསྐྱེད་ཕར་ཕྱིན་དྲུག་སྤྱོད་ཀྱང་། །བསྐལ་པ་གྲངས་མེད་གསུམ་པར་འཚང་མི་རྒྱ། །སྔགས་ལུགས་ཚེ་གཅིག་ལུས་གཅིག་སངས་རྒྱ་བ། །རང་ལུས་ལྷ་རུ་ཤེས་པའི་ཟབ་ཁྱད་ཡིན། །ཕུང་པོ་ལྔ་ནི་རྒྱལ་བ་རིགས་ལྔ་སྟེ། །ཁམས་ལྔ་ཡུམ་ལྔ་ཚོགས་བརྒྱད་སེམས་དཔའ་བརྒྱད། །ཡིན་ལ་ཡིན་པར་ཤེས་པའི་ངེས་ཤེས་ཀྱིས། །རང་ཉིད་ཡི་དམ་ལྷ་ཡི་ང་རྒྱལ་བསྐྱེད། །སྲིད་གསུམ་འདི་ན་འགྲན་ཟླ་མེད་པར་བསྒོམ། །ང་རྒྱལ་ངེས་ཤེས་བརྟན་ན་བྱིན་རླབས་འབྱུང་། །དེ་ནི་ང་རྒྱལ་ལམ་དུ་ཁྱེར་བ་ཡིན། །རང་ལུས་ལྷ་ཡི་ཐུགས་ཀའི་འོད་ཟེར་གྱིས། །སྲིད་པ་གསུམ་གྱི་ཚེ་བསོད་དཔལ་འབྱོར་རྣམས། །ཐམས་ཅད་བསྡུས་ནས་རང་ལ་ཐིམ་པར་བསྒོམ། །སྲུང་ཟློག་བྱེད་པའི་དམིགས་རིམ་སྐབས་རྣམས་སུ། །གནོད་ཅིང་འཚེ་བའི་བགེགས་དང་དགྲ་ཡི་ཚོགས། །གཏུབ་ཅིང་བསྒྲལ་ཏེ་ཤ་ཁྲག་སྲུང་མས་
ཟོས། །གཏོར་གཞོང་གླིང་བཞི་རི་རབ་འབར་བའི་འོག །མནན་པར་བསྒོམ་སོགས་ཕྲག་དོག་ལམ་ཁྱེར་ཡིན། །དེ་ལྟར་དུག་ལྔ་སྤངས་དང་འདུལ་བ་དང་། །བསྒྱུར་དང་རང་བཞིན་ཤེས་དང་ལམ་ཁྱེར་བའི། །གདམས་ངག་ཚན་ལྔ་འཕྲལ་དུ་གང་དྲན་རྣམས། །རྟ་ལོ་ཐ་སྐར་ཟླ་བའི་ཚེས་གཉིས་ཉིན། །སྔ་དྲོའི་ཐུན་ལ་རཱ་ག་ཨ་སྱས་སྨྲས། །བླ་མ་བརྩོན་འགྲུས་རྒྱ་མཚོས་ཡི་གེར་བཀོད། །རྒྱུད་གཞུང་རྣམས་དང་འགལ་བའི་ཆ་མཆིས་ན། །མང་ཐོས་སྡེ་སྣོད་འཛིན་པ་རྣམས་ལ་བཤགས། །དགེ་བས་རབ་བྱུང་གསར་བུ་མང་པོ་ལ། །སེམས་རྒྱུད་ཆོས་དང་མཐུན་པ་འོང་བར་ཤོག །ལེའུ་སོ་བརྒྱད་པའོ་མངྒ་ལཾ།།