ལེའུ་སོ་དགུ་པ། སྤྱོད་པ་རྒྱལ་བའི་བཀའ་དང་མཐུན་པའི་ཕྱིར། །སྤྱོད་པའི་གདམས་པ་རྒྱལ་སྲས་ལག་ལེན་ཡོད། །
༼ཏི༽ རི་ཆོས་མཚམས་ཀྱི་ཞལ་གདམས་ལས་སྤྱོད་པ་རྒྱལ་སྲས་ལག་ལེན་བཞུགས་སོ། །ན་མོ་བཛྲ་དྷ་ར་ཡེ། བོགས་འདོན་རྩ་བ་སྤྱོད་པ་སྟེ། །སྒྱུ་རྣལ་འབྱོར་པ་ཡི་གང་ཟག་གིས། །གྲུབ་ཐོབ་སྤྱོད་པ་མི་བྱའོ། །གྲུབ་པ་ཐོབ་པ་རྣམས་ཀྱིས་ཀྱང་། །སངས་རྒྱས་སྤྱོད་པ་མི་རུང་གསུངས། །འོག་མས་གོང་མའི་སྤྱོད་པ་
བྱས། །སེངྒེའི་རྗེས་སུ་ཝ་མཆོངས་དཔེ། །གོང་མས་འོག་མའི་སྤྱོད་པ་བྱས། །མི་རྒན་རྩེད་མོ་རྩེས་དང་འདྲ། །རིག་པ་བརྟུལ་ཞུགས་སྤྱོད་པ་དང་། །ཕྱོགས་ལས་རྣམ་རྒྱལ་སྤྱོད་པ་དང་། །ཁྱི་ཕག་ལྟ་བུའི་སྤྱོད་པ་དང་། །སྨྱོན་པ་ལྟ་བུའི་སྤྱོད་པ་དང་། །སེང་གེ་ལྟ་བུའི་སྤྱོད་པ་རྣམས། །གྲུབ་ཐོབ་རྣམས་ཀྱི་སྤྱོད་པ་སྟེ། །རང་ལ་མྱོང་བ་མེད་ཕྱིར་དང་། །མཁོ་དགོས་མེད་ཕྱིར་སྤྲོས་པ་བསྐྱུངས། །ཤ་བཙོན་ལྟ་བུའི་སྤྱོད་པ་ནི། །ཉེས་ཆེན་ཤ་རྩ་ས་བཙོན་བཟུང་ན། །མ་ཐར་ན་ནི་མཐའ་རྒྱུ་གཅིག །ཨེ་ཐར་ཐབས་ལ་འབད་པ་ལྟར། །དང་པོ་ཆོས་སྒོར་ཞུགས་པའི་དུས། །ཁྱིམ་པའི་གྲ་ནས་ཅི་ཐར་བྱ། །དེ་ནས་སེར་གཟུགས་ཆོས་མེད་ཀྱི། །གྲ་ནས་རང་ཉིད་ཅི་ཐར་བྱ། །དེ་ནས་རིགས་དྲུག་འཁོར་བ་ཡི། །གནས་ནས་ཐར་ཏེ་བདེ་ཆེན་ཞིང་། །ཕྱིར་མི་ལྡོག་པར་འགྲོ་རྩིས་བྱ། །བུང་བ་ལྟ་བུའི་སྤྱོད་པ་ནི། །དབང་ལུང་གདམས་ངག་ཞུ་བའི་དུས། །དཔེར་ན་བུང་བས་མེ་ཏོག་ཀུན། །བཅུད་འཇིབ་མི་ཆགས་མི་སྡང་བར། །སྦྲང་རྩི་འཇིབ་ནས་འགྲོ་བ་ལྟར། །དམ་སེལ་ངན་པས་མ་ཆོད་པའི། །དགེ་བའི་བཤེས་གཉེན་ཐམས་ཅད་
ལ། །དབང་ལུང་གདམས་པ་ཅི་ཐོབ་བྱ། །དེ་ལ་ཆགས་ནས་མི་འདུག་ཅིང་། །དམ་ཚིག་ཆག་པར་མི་བྱའོ། །དམ་ཚིག་མི་གཙང་དམ་སེལ་ཅན། །དེ་འདྲར་དབང་ལུང་ཐོབ་གྱུར་ཀྱང་། །ལུང་ཡིག་གྲ་རུ་མི་འབྲི་ཞིང་། །ཉམས་ལེན་མི་བྱ་སྤྲེལ་མི་བྱ། །དེ་སྐད་བདུད་འདུལ་རྡོ་རྗེས་གསུངས།་་་གཏེར་སྟོན་ཡིན་མཆན། །བྱ་རྒྱུད་དོན་ཡོད་ཞགས་པ་སོགས། །དབང་བསྐུར་ཐོབ་པར་མ་གྱུར་ཀྱང་། །གསོ་སྦྱོང་ལེན་ཞིང་དཀར་ཕྱོགས་སྲུང་། །གཟུངས་བཟླ་རུང་ཞེས་ས་པཎ་གསུངས། །དེ་མིན་གསང་སྔགས་སྒྲུབ་ཐབས་ཀུན། །དབང་མ་ཐོབ་ན་མི་རུང་སྟེ། །དབང་ཚུའམ་དབང་གི་ཆུ་བོ་ཞེས། །དབང་རྒྱུན་མ་ཆད་པ་ཞིག་དགོས། །དབང་རྒྱུན་ཆད་ན་བདག་འཇུག་སོགས། །བླངས་ཀྱང་མི་ཕན་གནོད་པ་ཆེ། །དབང་རྫོགས་ལུང་རྫོགས་རབ་ཡིན་ཏེ། །དབང་རྫོགས་འདོན་ཆའི་ལུང་ཙམ་འབྲིང་། །ཐ་མ་ལུང་ནི་མ་ཐོབ་ཀྱང་། །མངོན་རྟོགས་དང་ནི་སྔགས་གཉིས་པོ། །དབང་གི་ཞོར་ལ་ཐོབ་པས་འཐུས། །དེ་ཡི་རྒྱུད་དང་རྒྱ་གཞུང་དང་། །སྒྲུབ་ཐབས་ལས་ཚོགས་དཔག་མེད་དང་། །མདོ་སྔགས་ཁྲིད་རིམ་གདམས་པའི་
ཚོགས། །རང་ཉིད་ཤིན་ཏུ་དེ་ལ་མོས། །ལུང་རྒྱུན་ཐོབ་པའི་ཁུངས་མེད་པ། །དཔེ་ཆ་བལྟས་ཙམ་དེ་དོན་ཤེས། །དོན་མེད་ལག་ཏུ་འཁྱར་བྱུང་ཚེ། །མཎྜལ་འབུལ་ཞིང་སྤྱི་བོར་བཞག །ཆོས་བདག་མཁའ་འགྲོས་གཏད་པར་མོས། །ཨོ་རྒྱན་ལ་སོགས་སྨོན་ལམ་ལས། །ལས་ཅན་གཅིག་དང་འཕྲད་པར་ཤོག །གསུངས་ཕྱིར་ལས་ཅན་སྐྱེས་བུ་ལ། །མཁའ་འགྲོས་ཆོས་དེ་གཏད་པ་ཡི། །དངོས་བསྟན་གཏེར་སྟོན་རྣམས་ཡིན་ཀྱང་། །ཤུགས་བསྟན་དེ་དང་ཆ་འདྲ་ཙམ། །རང་གི་ཡི་དམ་སྒྲུབ་སྐོར་སོགས། །མེད་ཐབས་མེད་པ་རྙེད་མེད་ནི། །ལག་ཏུ་ཕྱིན་ཞིང་ཕན་ཐོགས་པ། །མཁའ་འགྲོ་གཏད་རྒྱའི་བརྒྱུད་པ་རུ། །བརྩི་བར་དྲི་མེད་ཀུན་དགས་གསུངས། །འོན་ཀྱང་གཞན་ལ་སྤེལ་ཐབས་མེད། །བཀའ་བརྒྱུད་ཆོས་སྐོར་ཡིན་ན་ནི། །ཡབ་སྲས་ལ་སོགས་ཞབས་རྗེས་བཀྲམ། །ཡང་ན་ཐུབ་པའི་ཞབས་རྗེས་ནི། །པར་མ་རྙེད་ན་མཆོག་ཡིན་ཏེ། །ཕྱག་ཞབས་རྗེས་བཀྲམ་མཆོད་པ་བཤམས། །ཆོས་དེའི་མངའ་བདག་བླ་མ་དེ། །ཞབས་རྗེས་དེ་ཉིད་ཡིན་པར་བསྒོམ། །སྤྱན་འདྲེན་མཆོད་བསྟོད་མཎྜལ་འབུལ། །མངོན་སུམ་
བཞུགས་པའི་ངེས་ཤེས་བསྐྱེད། །ལུང་དེ་གནང་བར་གསོལ་བ་གདབ། །དེ་ནས་ལུང་དེ་གནང་བར་བསྒོམ། །བདག་གིས་ཉན་པའི་མོས་པ་ཡིས། །རང་གིས་ཚར་གཅིག་འདོན་པར་བྱ། །བླ་མའི་ཞལ་ནས་ཡིག་འབྲུ་རྣམས། །བྱོན་ནས་རང་ལ་ཐིམ་པར་བསྒོམ། །གླེགས་བམ་རང་གི་སྤྱི་བོར་བཞག །དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱི་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་དེ་བཞིན་དུ་འགྲུབ་པར་གྱུར་ཅིག །ཅེས་དང་། རྟེན་འབྲེལ་སྙིང་པོ་ཚར་གསུམ་བརྗོད། ཞབས་རྗེས་གསང་སྤྱོད་མ་ཞེས་པ། །མཉམ་མེད་དྭགས་པོས་མཛད་པ་དང་། །མི་བསྐྱོད་ཞབས་ཀྱིས་མཛད་པའི་དོན། །རང་གི་ཉམས་ལེན་ཀུན་ལ་ནི། །དེ་ཡིས་ཆོག་པར་གཉིས་ཀས་གསུངས། །དྭགས་པོས་གཞན་ལ་སྤེལ་ཆོག་གསུངས། །མི་བསྐྱོད་ཞབས་ཀྱིས་ཞབས་རྗེས་དེ། །བླ་མར་དངོས་སུ་བྱོན་ན་ཆོག །དེ་མིན་སྤེལ་དུ་མི་བཏུབ་གསུངས། །ཡེ་ཤེས་མགོན་པོ་ཕྱག་བཞི་
པའི། །བྱ་རོག་ཆེན་པོའི་རྒྱུད་ལས་ནི། །བླ་མར་ཐོབ་དང་ཁྱད་མེད་གསུངས། །ཨོ་རྒྱན་ཆེན་པོས་མཛད་པ་ཡི། །དགོངས་འདུས་པོ་ཏིའི་ལུང་དབང་ནི། །རང་གིས་བླང་བའི་ཆོ་གའི་དོན། །གསར་རྙིང་མདོ་རྒྱུད་གང་འདོད་ཀྱི། །གླེགས་བམ་ཁྲི་སྟེང་གཡས་སུ་བཞག །གཡོན་དུ་འབྲུ་ཡི་འདབ་བརྒྱད་སྟེང་། །འཛོམ་ན་ཐུབ་དབང་གསེར་སྐུ་བཤམ། །དགེ་འདུན་བཞི་སྡེ་འཛོམ་ན་རབ། །མེད་ན་ཡིད་ཀྱིས་བསྒོམ་གསུངས་པས། །དོན་ལ་གནས་ཆོག་རྒྱས་པའམ། །ས་གཞི་བྱིན་རླབས་རྒྱས་པར་འདོན། །ཐུབ་པར་ལུང་གནང་གསོལ་བ་གདབ། །ཚངས་པའི་དབྱངས་ནི་སྙན་པ་ཡིས། །ལུང་དེ་ཡོངས་རྫོགས་གནང་བར་བསམ། །ཚར་གཅིག་འདོན་སོགས་མི་དགོས་སོ། །གླེགས་བམ་སྤྱི་བོའི་གཙུག་ཏུ་བཟུང་། །རྟེན་འབྲེལ་སྙིང་པོ་ཚར་གསུམ་བརྗོད། །དེ་ཚེ་ཐུབ་པའི་ཞལ་ནས་ནི། །གླེགས་བམ་དེ་ཡི་ཡིག་འབྲུ་རྣམས། །དཀར་པོ་སིལ་སིལ་ཆར་ལྟར་བབས་། །ཚངས་བུག་ནས་ཞུགས་རང་ཐིམ་བསྒོམ། །མཎྜལ་བསྔོ་སྨོན་བཀྲ་ཤིས་བརྗོད། །དེ་ནས་དམིགས་མེད་ངང་ལ་བཞག །རྗེས་ནི་བསྔོ་བ་སྨོན་ལམ་དང་། །སྤྲང་པོར་
སྦྱིན་གཏོང་ལ་སོགས་པ། །ཅི་འབྱོར་བསོད་ནམས་ཚོགས་གསོག་བྱ། །དེ་ཡིས་མདོ་རྒྱུད་སྒྲུབ་ཐབས་སོགས། །ཐུབ་པ་ཉིད་ལས་ཐོབ་དང་མཉམ། །རང་ལ་ཉམས་མྱོང་ལེགས་སྐྱེས་ནས། །གཞན་ལའང་ལུང་རྒྱུན་སྤེལ་ཆོག་གསུངས། །རྩོམ་པ་ལ་སོགས་བྱེད་དུས་སུ། །བན་བོན་མདོ་རྒྱུད་གསར་རྙིང་སོགས། །ཀུན་གྱི་ལུང་འདྲེན་འདྲི་དགོས་པས། །བརྩམས་དེའི་ལུང་རྒྱུན་སྤེལ་དུས་སུ། །སྔོན་ལ་འདི་ལྟར་བྱ་བ་གཅེས། །བརྒྱུད་པ་མི་གཙང་དམ་སེལ་ཅན། །ཕལ་གྱི་ལུང་རྒྱུན་དོ་ཟླ་མིན། །ཐུབ་པའི་བཀའ་དང་ཨོ་རྒྱན་གསུངས། །དེ་ལ་ཐེ་ཚོམ་ག་ལ་ཡོད། །བུང་བ་ལྟ་བུའི་སྤྱོད་པ་འདི། །རྔོག་ལོ་བློ་ལྡན་ཤེས་རབ་དང་། །མཁས་པ་མང་པོའི་རྣམ་ཐར་ཡིན། །ཇོ་བོ་དཔལ་ལྡན་ཨ་ཏི་ཤས། །ཉིད་ཀྱི་ཡོན་ཏན་བརྒྱ་སྟོང་གི །ཆ་ཤས་ཙམ་ཡང་མེད་པ་ཡི། །བླ་མ་མང་པོ་བསྟེན་ཞེས་གསུངས། །གྲུབ་ཐོབ་ཐང་སྟོང་རྒྱལ་པོ་ཡིས། །ཡུགས་ས་ཡ་ཕོ་ཡན་ཆད་ཀྱི། །བླ་མ་ལྔ་བརྒྱ་བཅོ་ལྔ་བསྟེན། །དེ་བཞིན་རང་གི་ཆོས་འབྲེལ་གྱི། །བླ་མ་ཆེ་ཕྲ་ཐམས་ཅད་ལ། །སྐྱོན་ལ་མི་ལྟ་ཡོན་ཏན་ལེན། །བུང་བས་སྦྲང་རྩི་འཇིབ་པ་
ལྟར། །རང་ཉིད་དབང་ལུང་གདམས་པས་ཕྱུག །བུང་བས་སྦྲང་རྩི་བསགས་པ་འདྲ། །བརྒྱུད་པའི་གང་ཟག་ཞན་ན་ཡང་། །ཆོས་ལ་སྒྲིབ་པར་མི་འགྱུར་ཏེ། །ཆུ་ནི་ཞིང་ལ་ཐེབས་པ་ན། །ཡུར་བ་གཙང་བཙོག་བཟང་ངན་མེད། །དེ་ནི་བོད་ཀྱི་པཎྜི་ཏ། །བློ་ལྡན་ཤེས་རབ་བཞེད་པ་ཡིན། །འབྲོམ་དང་རྒྱ་རས་མི་བསྐྱོད་ཞབས། །དེ་དག་ལ་སོགས་བཞེད་པ་ལ། །འཇིག་རྟེན་ཀ་ཆ་ཉོ་ན་ཡང་། །བརྟག་གཞིག་ལེགས་པར་བྱེད་དགོས་ན། །སྐྱེ་བ་གཏན་གྱི་འདུན་མ་སྟེ། །ཆོས་བརྒྱུད་བླ་མའི་བཟང་ངན་སོགས། །ལེགས་པར་མ་བརྟག་ཞུ་མི་རུང་། །ཀུན་ལ་ཆོས་འབྲེལ་ཞུ་བ་དེ། །དམ་ཚིག་ཉམས་པ་རིན་གྱིས་ཉོས། །བརྒྱུད་པ་ཐག་རུལ་བྲེང་རུལ་མཐུད། །གདམས་ངག་སྤྲང་པོའི་རྩམ་པ་འདྲ་། །ཕ་མང་བུ་ལྟར་རིགས་འཆོལ་བའི། །བརྒྱུད་པ་གང་གིའང་རྐང་མི་ཟིན། །བླ་མ་འཆུག་མེད་གཅིག་བཙལ་ནས། །དེ་ཡི་གདམས་པ་ཉམས་བླངས་པས། །བཀའ་བརྒྱུད་རྒྱལ་ས་ཟིན་ནས་ཀྱང་། །བསྟན་ལ་ཕན་པ་ཡིན་ནོ་གསུངས། །དེ་དག་གཉིས་ཀའི་དོན་བསྡུས་པ། །རྒྱལ་བ་ཆོས་ཀྱི་དབང་ཕྱུག་གིས། །རྒྱ་གར་ལུགས་དང་རྒྱ་ནག་
ལུགས། །པཎ་ཆེན་ལུགས་དང་གྲུབ་ཐོབ་ལུགས། །མང་པོ་ཤེས་ནི་དགོས་རྒྱུར་འདུག །ཉམས་སུ་ལེན་བྱ་དེ་ཚོ་ལ། །བྱ་བྱེད་མང་པོ་བྱས་པ་ན། །ཆོས་དང་བླ་མ་གཞན་གྱིས་བསྒྱུར། །སྒར་དང་ཆོས་སྡེ་ངེས་མེད་དུ། །རླུང་འཚུབ་མང་པོའི་དཔལ་འབྱོར་ཅན། །འབྱུང་བར་དོགས་པ་ཁོ་བོས་སེམས། །གསུངས་ཕྱིར་མང་པོ་ཐོབ་ན་ཡང་། །ཉམས་སུ་ལེན་བྱའི་སྙིང་པོ་དེ། །བརྒྱུད་པ་གཙང་བའི་ཆོས་ཤིག་དགོས། །བླ་མ་སློབ་དཔོན་མང་བསྟེན་ཡང་། །གསོལ་བ་འདེབས་ཡུལ་བླ་མ་དེ། །མོས་བློས་ཡར་གཞལ་མི་དགོས་པའི། །སངས་རྒྱས་དངོས་སུ་ཐག་ཆོད་པ། །རྒྱལ་བ་ཡབ་སྲས་ལྟ་བུར་བྱ། །མ་མཇལ་ཆོས་འབྲེལ་མ་ཐོབ་ཀྱང་། །རྩ་བའི་བླ་མར་བཟུང་བྱས་ནས། །རྩེ་གཅིག་གསོལ་བ་བཏབ་པ་ན། །བྱིན་རླབས་ཉམས་རྟོགས་སྐྱེ་བ་ཡི། །ཞལ་བཞེས་དྭགས་པོ་ལྷ་རྗེ་དང་། །དུས་མཁྱེན་རྒོད་ཚང་པ་རྣམས་ཀྱིས། །ཞལ་ཆེམ་བཞག་པ་ཡིན་པར་བཞེད། །གནད་དེ་གོ་བ་གལ་ཆེའོ། །ཁྱིམ་པ་ལྟ་བུའི་སྤྱོད་པ་ནི། །བསམ་བློ་འཕྲོད་ནས་མ་ཤི་བར། །ཟས་ནོར་བསག་ཕྱིར་འབད་པ་ཡིན། །དེ་བཞིན་ཆོས་སྒོར་
ཞུགས་ཕྱིན་ནས། །མ་ཤི་བར་གྱི་བྱ་བ་རྣམས། །ཚོགས་གཉིས་བསག་ཕྱིར་འབད་པ་ཡིན། །དེ་བཞིན་འཇིག་རྟེན་ཁྱིམ་པ་ཡིས། །དོམ་བཏང་རྒྱ་འགྲོ་དབུས་བསྐོར་སོགས། །ཁེ་ནི་གང་ཆེ་བྱེད་པ་ཡིན། །དེ་བཞིན་ཆོས་སྒོར་ཞུགས་པ་རྣམས། །དགེ་བ་འགྱུར་ནི་གང་ཆེ་བྱེད། །གང་ཟག་འགྱུར་དང་གནས་ཀྱི་འགྱུར། །དུས་ཀྱི་འགྱུར་དང་རྣམ་གསུམ་ལས། །དུས་འགྱུར་བདེ་ཕྱིར་ཀུན་གྱིས་བྱེད། །མདོ་སྡེ་འཇིག་རྟེན་བསྟན་བཞག་ལས། །ཡར་ངོའི་ཚེས་བརྒྱད་མར་ངོས་བརྒྱད་ཉེར་གསུམ། །རྒྱལ་ཆེན་སྡེ་བཞིའི་གཡོག་རྣམས་ཀྱིས། །འཛམ་གླིང་ཐམས་ཅད་ཁྱབ་པར་ཉུལ། །དགེ་སྡིག་གང་བྱས་ཡི་གེར་བྲིས། །བརྒྱ་བྱིན་ལྷ་ཡི་དབང་པོར་གཏད། །དགེ་བ་མང་ན་ལྷ་རྣམས་དགའ། །སྡིག་བྱེད་མང་ན་ལྷ་རྣམས་སྡུག །ཡི་གེ་གཤིན་རྗེའི་ཡུལ་དུ་བསྐུར། །གཤིན་རྗེའི་ཡིག་ཆུང་དེ་ཡིན་གསུངས། །དེ་བཞིན་ཡར་མར་བཅུ་བཞི་ལ། །རྒྱལ་ཆེན་སྡེ་བཞིས་བུ་རྣམས་ཉུལ། །དེ་བཞིན་ཡར་མར་བཅོ་ལྔ་ལ། །རྒྱལ་པོ་ཆེན་པོ་སྡེ་བཞི་དང་། །ལྷ་དབང་བརྒྱ་བྱིན་བཅས་པས་ཉུལ། །དུས་ཚོད་དེ་དག་རྣམས་ལ་ནི། །དགེ་སྡིག་གང་བྱས་
འབུམ་འགྱུར་ཡིན། །དེ་བཞིན་ཚེས་བརྒྱད་སྨན་བླ་འབྱོན། །སྒྲོལ་དཀར་དང་ནི་ཚེ་རིང་མ། །ཀུ་རུ་ཀུལླེ་ཞིང་སྐྱོང་དུས། །ཡར་ངོ་མར་ངོའི་ཚེས་བཅུ་ལ། །པད་འབྱུང་ཕག་ཁྲོས་བདེ་མཆོག་དང་། །མ་ནིང་དཔའ་བོ་མཁའ་འགྲོ་ཀུན། །ཁྱད་པར་ཉི་ཤར་ཨོ་རྒྱན་འབྱོན། །བཅོ་ལྔ་འོད་དཔག་མེད་པའི་དུས། །དགུ་གསུམ་ལྷ་འདྲེ་ཟློཐམས་ཅད་རྒྱུ། །བཅུ་དགུར་མཁའ་སྤྱོད་དབང་པོ་གཤེགས། །ཡར་མར་དགུ་དང་བཅུ་གཅིག་དུས་་་་་ཡར་གྱི་ཚེས་དགུ་དང་བཅུ་གཅིག་མར་གྱི་ཉེར་དྲུག་དང་ཉེར་བཞིའོ། །དཔལ་ལྡན་ལྷ་མོ་དཔོན་གཡོག་རྒྱུ། །ཉི་ཤུ་བརྒྱད་ལ་མི་བསྐྱོད་ཞབས། །དབང་ཕྱུག་རྡོ་རྗེ་ཆོས་དབང་ཕྱུག །གཤེགས་ཕྱིར་ཉི་ཤུ་བརྒྱད་མཆོད་ཟེར། །དེ་ཉིན་གཤིན་རྗེའི་རིགས་ཀུན་རྒྱུ། །བླ་མའི་དུས་མཆོད་བཟུང་བ་ནི། །བསོད་ནམས་བསམ་གྱིས་མི་ཁྱབ་པར། །མགོན་པོའི་རྒྱུད་སོགས་མང་པོར་བཤད། །གནམ་གང་བཅོམ་ལྡན་ཤཱཀྱ་ཐུབ། །བསྐལ་བཟང་སངས་སྒྱུ་རྒྱས་སྟོང་བཅས་འབྱོན། །དེ་ལྟར་ཉ་མཚམས་བརྒྱད་གསུམ་ལ། །སྟོན་པ་རྣམ་གསུམ་འབྱོན་པའི་ཚེ། །དགེ་བ་འབུམ་འགྱུར་ཡོད་པའི་ཚུལ། །ཇོ་བོ་རྗེ་དང་སྲོང་བཙན་
གསུངས། །ཉི་ཤུ་དགུ་དང་གནམ་གང་ལ། །མགོན་པོའི་རིགས་ཀུན་རྒྱུ་བ་སྟེ། །ལོ་གཅིག་སྒྲུབ་པ་བྱས་པ་བས། །རྒྱུ་དུས་མཆོད་པ་གཅིག་དགའ་བར། །གྲུབ་ཆེན་མཚོ་སྐྱེས་རྡོ་རྗེ་དང་། །ཨོ་རྒྱན་ལ་སོགས་གསུངས་པ་ཡིན། །དེ་ནི་ཟླ་བའི་དུས་ཡིན་ལ། །མཆུ་ཡི་ཟླ་བའི་ཚེས་གཅིག་ནས། །བཅོ་ལྔའི་བར་དུ་ཤཱཀ་ཐུབ་ཀྱིས། །མུ་སྟེགས་བཏུལ་ཞིང་ཆོ་འཕྲུལ་བསྟན། །ས་ག་ཟླ་བའི་བཅོ་ལྔ་ལ། །ལྷུམས་ཞུགས་རབ་བྱུང་མངོན་སངས་རྒྱས། །རྣམ་གསུམ་འཛོམ་པའི་དུས་ཞེས་བྱ། །ཆུ་སྟོད་ཟླ་བའི་ཚེས་བཞི་ལ། །ཆོས་ཀྱི་འཁོར་ལོ་བསྐོར་བའི་དུས། །ཐ་སྐར་ཟླ་བའི་བཅོ་ལྔ་ལ། །ལྷ་བབས་ཞལ་གྱིས་བཞེས་པའི་དུས། །ཉེར་གཉིས་ལྷ་བབས་དངོས་ཀྱི་དུས། །དེ་གཉིས་གཅིག་ཏུ་བརྩི་བ་ཡིན། །སྟོན་པའི་དུས་ཆེན་བཞི་ཞེས་གྲགས། །དགེ་བ་བྱེ་བ་བརྒྱ་འགྱུར་དུ། །མདོ་སྡེ་མང་པོ་ཞལ་མཐུན་ནོ། །འདི་དག་ཟླ་བ་ངོས་འཛིན་ལ། །རྒྱ་བོད་ཀུན་ཏུ་མི་མཐུན་མང་། །ཨོ་རྒྱན་དགོངས་འདུས་སྐར་མཛོད་ལས། །ཞལ་ནི་གང་འཚམ་བསྟན་གསུངས་ལྟར། །ཁ་ཆེའི་པཎ་ཆེན་ཤཱཀྱ་ཤིས། །མདོ་རྒྱུད་མང་པོ་གུང་བསྟུན་ནས། །
ཟླ་བ་ངོས་འཛིན་བསྟན་བཅོས་མཛད། །དེ་ཕྱིན་རྒྱ་བོད་ཐམས་ཅད་ཀྱིས། །ཟླ་བ་འདི་བཞི་ཐག་ཆོད་ཡིན། །གཏོར་མ་ཚར་གཅིག་བཏང་ན་ཡང་། །གཏོར་མ་བྱེ་བ་བརྒྱ་རུ་ངེས། །དེ་འདྲ་ཅི་ཡི་ཕྱིར་ཞེ་ན། །སྟོན་པས་བྱིན་གྱིས་བརླབས་པ་ཡིན། །ཁྱད་པར་སྔགས་ཀྱི་བཟླས་བརྗོད་ལ། །ཉི་ཟླ་གཟའ་ཡིས་བཟུང་ནས་ཀྱང་། །སོས་ཡག་མ་རེད་བར་དེ་ལ། །ཟླ་བ་བྱེ་བ་བརྒྱ་འགྱུར་ཏེ། །ཉི་མ་བྱེ་བ་འབུམ་འགྱུར་ཡིན། །དེ་ནི་མདོ་རྒྱུད་མང་པོ་མཐུན། །དེ་ཕྱིར་དབང་ནི་ཐོབ་ཚད་ཀྱི། །ལྷ་ནི་སྐད་ཅིག་དྲན་རྫོགས་བསྒོམ། །སྔགས་ནི་ཕྲེང་སྐོར་རེ་བཟླས་པས། །དེ་དག་ཀུན་གྱི་བསྙེན་པ་ཐེམས། །དབང་བསྐུར་རབ་གནས་སྦྱིན་སྲེག་སོགས། །སོ་སོའི་ལས་ཚོགས་བྱ་རུང་བ། །མཁས་པ་ཐམས་ཅད་ཞལ་མཐུན་ཕྱིར། །དགེ་བཤེས་གསར་པ་ཀུན་གྱིས་མཛད། །དེ་དག་བསོད་ནམས་ཞིང་ས་བཟང་། །དགེ་བའི་ས་བོན་ཐོབ་ཅིག་ཅེས། །བཀའ་གདམས་ཀླུ་པ་ཀུན་ཞལ་གདམས་ཡིན། །དེ་ནས་ཞག་གི་དུས་ཚོད་ལ། །ཐོ་རངས་མངོན་པར་སངས་རྒྱས་དུས། །རླུང་བཟུང་ཚེ་སྒྲུབ་བྱ་བར་བཟང་། །ནམ་ལངས་ནས་ནི་ཉི་དྲོས་
བར། །ཞི་བའི་བཟླས་པ་གང་བྱས་འགྲུབ། །ཉི་དྲོས་ནས་ནི་ཉིན་ཕྱེད་བར། །རྒྱས་པའི་བཟླས་པ་གང་བྱས་འགྲུབ། །ཕྱེད་ཡོལ་ནས་ནི་ཉི་ནུབ་བར། །དབང་གི་བཟླས་པ་གང་བྱས་འགྲུབ། །ཉི་མ་གདུང་གང་ཙམ་ནས་བཟུང་། །ཉི་མ་ནུབ་ཡག་མ་རེད་བར། །གཟའ་དང་ཟློག་པ་ཐམས་ཅད་འགྲུབ། །མུན་རུབ་ནས་ནི་ནམ་ཕྱེད་བར། །དཔའ་བོ་མཁའ་འགྲོ་ཀུན་འདུ་བས། །གཏོར་བསྔོས་ཚོགས་འཁོར་ལ་སོགས་བཟང་། །དྲག་པོའི་སྔགས་ཀྱང་གང་བཟླས་འགྲུབ། །ཁྱད་པར་སྲོད་ཀྱི་དུས་དེ་ཉིད། །ཐུབ་པས་བདུད་བཏུལ་དུས་ཡིན་པ། །བདུད་ཀྱི་བར་ཆད་བརྩམ་དུས་ཡིན། །ཡི་དམ་ཁྲོ་བོའི་བཟླས་པ་བྱ། །ནམ་ཕྱེད་ནས་བཟུང་ཐོ་རངས་ཕྱེད། །གཉིད་ཀྱི་འོད་གསལ་བཟུང་དུས་ཡིན། །དུས་ཚོད་དེ་དང་དེ་རྣམས་སུ། །སོ་སོའི་བཟླས་པ་བྱེད་པ་མཆོག །རི་དྭགས་སྨྲས་མའི་སྤྱོད་པ་ནི། །རི་དྭགས་གྲྭ་རུ་མི་སྡོད་པར། །དབེན་པར་གབ་ནས་འདུག་པ་ལྟར་།མཚམས་དང་སྒྲུབ་པ་བྱེད་པའི་དུས། །རང་ཉིད་གཅིག་པུར་འདུག་པའམ། །མཚམས་གཡོག་ལ་སོགས་ཡོད་གྱུར་ཀྱང་། །མི་གཏུགས་ལུས་ནི་སྦས་ཏེ་འདུག་
སྨྱོན་པ་ལྟ་བུའི་སྤྱོད་པ་ཡང་། །ཆ་མཐུན་ཞོར་ལ་འབྱུང་བ་སྟེ། །ཉེ་དུ་ལ་སོགས་ངོ་ཆེན་གྱིས། །འབོད་མི་ལ་སོགས་བྱུང་ན་ཡང་། །ངོ་མི་སྲུང་བར་སྨྱོན་པ་བཞིན། །ཁྱི་ཕག་ལྟ་བུའི་སྤྱོད་པ་ཡང་། །ཆ་མཐུན་ཙམ་ཞིག་ཞོར་ལ་འབྱུང་། །དྲི་ཆུ་ཐིག་ལེ་ལ་སོགས་པ། །བཙོག་པའི་འདུ་ཤེས་མི་བྱེད་པར། །ཁྲུས་དང་བཏུང་སོགས་དགོས་དུས་བྱ། །ཐི་བྱ་ཚང་ཞུགས་སྤྱོད་པ་ཡང་། །དེ་ཡི་ཞོར་ལ་འབྱུང་བ་སྟེ། །དབང་ལུང་གདམས་ངག་ཁྲིད་རིམ་སོགས། །སྔར་ནས་ལེགས་པར་རྩད་བཅད་པས། །དེ་དུས་ཐེ་ཚོམ་སོམ་ཉི་མེད། །ཉམས་ལེན་ཉིད་ལ་འཇུག་པ་ཡིན། །སྦྱིར་ནི་སྤྱོད་པ་འདི་དག་ལ། །མིང་གཅིག་དོན་ནི་མི་གཅིག་པའི། །བཤད་ཚུལ་རྣམ་གྲངས་མང་ན་ཡང་། །ཀུན་ཏུ་བཟང་པོའི་སྤྱོད་པ་དང་། །ཚངས་སྤྱོད་ཅེས་བྱ་དོན་གཅིག་སྟེ། །དྭགས་པོ་བཀའ་བརྒྱུད་ཕལ་ཆེར་གྱི། །སྤྱོད་པ་དེ་ཉིད་ཁོ་ན་ཡིན། །ས་ལམ་ཐམས་ཅད་བགྲོད་པར་བྱེད། །དེ་ཡི་སྤྱོད་པ་གང་ཞེ་ན། །ལུས་ཀྱི་ཆ་ལུགས་སྤྱོད་པ་རྣམས། །འདུལ་ཁྲིམས་བཞིན་དུ་དངོས་ཚུགས་བཟུང་། །དེ་ཡང་དམ་ལྷོད་རན་བྱས་ཏེ། །ཆོས་ཀྱི་
དབང་ཕྱུག་ཞལ་སྔ་ནས། །དཔེར་ན་སྟག་མོའི་བུ་ཁུར་བ། །དམ་ན་མཆེ་བས་བུ་འཆི་ལ། །ལྷོད་ན་བུ་ནི་ས་ལ་འབྲུལ། །དམ་ལྷོད་རན་པར་ཁུར་བ་ལྟར། །གུང་ཚིགས་ཅུང་ཙམ་ཕྱི་བ་དང་། །ཆབ་ལེན་རུང་ཆུ་བརྗེད་སོགས་ལ། །སྲོག་ཆད་ཙམ་དུ་སྐྱག་པ་ནི། །མ་དྲག་རྣམ་པར་རྟོག་པས་བཅིངས། །དགོང་ཟ་ཆང་ནི་བག་མེད་བཏུང་། །ཆབ་རིལ་ཆུ་དང་ལོ་མང་བྲལ། །ཡོད་ཀྱང་ཆོས་གོས་ལྷུང་བཟེད་བསྐྱུར། །དགེ་བསྙེན་དང་ནི་དགེ་སློང་གཉིས་་་དགེ་ཚུལ་སོགས་མཚན། །རྒྱུས་ཡོད་མིན་པས་འབྱེད་དཀའ་བས། །དེ་འདྲ་ཧ་ཅང་ལྷོད་པའི་སྐྱོན། །རྒྱུན་དུ་གདན་གཅིག་བྱུང་ན་རབ། །ནའམ་ཡང་ན་ཚོགས་འཁོར་ཉིད། །མིན་པར་དགོང་ནི་བཟའ་མི་བྱ། །ཚོགས་ཤ་མིན་པའི་ཤ་མི་བཟའ། །བསྔོས་ཤ་གཏན་ནས་སྤང་བར་བྱ། །ཆང་ནི་དུག་ལྟར་སྤང་བར་བྱ། །ཚོགས་ཆང་དམ་ཚིག་མི་འགལ་ཕྱིར། །ཐུར་འགྱེད་དམ་ནི་སོར་རྩེས་བླངས། །མང་ཡང་བྷན་འབྲིང་ཚད་།གང་། །དེ་བས་མང་བ་མི་རུང་བ། །བདེ་མཆོག་སྡོམ་འབྱུང་རྒྱུད་ན་གསལ། །ཚོགས་ཤ་བཟའ་བར་རུང་བ་སྟེ།་་་་་རྩ་རླུང་འཁྲུལ་འཁོར་སྦྱོང་དུས་སོགས་ལ་ལུས་གསོ་བའི་ཕྱིར་མཆན། །ཁམས་དང་
ཐིག་ལེ་རྒྱས་ཕྱིར་རོ། །དེ་ཡང་བསྔོས་ཤ་ཡིན་ན་སྤང་། །བསྔོས་ཤ་ཡིན་ཀྱང་ཚོགས་ཤུ་ལ། །བསྔོས་ན་དུད་འགྲོ་དེར་ཕན་པ། །འཇའ་ཚོན་སྙིང་པོའི་གསུང་ལས་གསལ། །འདུལ་ཁྲིམས་ཕྲ་ཞིབ་ཐམས་ཅད་ཀྱང་། །ཇི་ལྟར་ནུས་པ་སྲུང་བྱ་སྟེ། །མ་ཐུབ་བམ་ནི་མ་ཤེས་པས། །ལྟུང་བ་ཉེས་བྱས་མང་སོགས་པ། །ཟླ་བ་ཕྱེད་ཕྱེད་གསོ་སྦྱོང་དུས། །དགེ་འདུན་སྡེ་ནི་མེད་པའི་ཕྱིར། །གསོ་སྦྱོང་དངོས་ནི་མི་འོང་ཡང་། །གསོ་སྦྱོང་བྱིན་གྱིས་རླབས་པའམ། །ཡང་ན་ཞི་གནས་གསོ་སྦྱོང་བྱ། །མེད་ན་མ་གཏོགས་གུང་ཚིགས་ཀྱང་། །ལྷུང་བཟེད་ནང་དུ་བཟའ་བྱ་སྟེ། །ཕུད་མཆོད་ཆངས་བུ་ལ་སོགས་ཀྱང་། །གཞུང་ལྟར་རྒྱུན་དུ་མ་བརྗེད་བྱ། །བག་ཡོད་དྲན་ཤེས་སྐྱེ་བའི་ཕྱིར། །ཆོས་གོས་རྣམ་གསུམ་ཆུ་ཚགས་བཅངས། །དུས་བཟང་སྐབས་སུ་བྱང་སྡོམ་ལེན། །ལས་དང་བྱ་བ་གང་བྱེད་ཀྱང་། །སེམས་བསྐྱེད་བཟང་པོའི་ཀུན་སློང་གཟབ། །འགྲོ་བ་སེམས་ཅན་ཀུན་དོན་དུ། །བླ་མེད་བྱང་ཆུབ་བསྒྲུབ་པ་ལས། །དོན་གྱི་གཙོ་བོ་གཞན་མེད་བྱ། །ཉམས་ལེན་བསྐྱེད་རྫོགས་ཟུང་འཇུག་སྟེ། །གཙོ་བོར་ངོ་བོ་སྐྱོང་བར་
བྱ། །རྒྱལ་བ་ཆོས་ཀྱི་དབང་ཕྱུག་གིས། །ཕྱི་ལྟར་སོ་ཐར་དགེ་སློང་། ནང་ལྟར་བྱང་ཆུབ་སེམས་དཔའ། གསང་བ་སྔགས་ཀྱི་རྣལ་འབྱོར། སུམ་ལྡན་རྡོ་རྗེ་འཛིན་པ། །བསམ་ཞིང་དགའ་བོ་སྐྱིད་དོ། །གསུངས་པའང་དེ་ཡི་དོན་ལ་དགོངས། །སྤྱོད་པ་དེ་ནི་མཚམས་སྒྲུབ་དང་། །གྲོང་དང་དགོན་པ་གར་འདུག་ཀྱང་། །ཐང་ལྷོད་མེད་པར་མཐར་ཕྱིན་བྱ། །དེ་ནི་ཧ་ཅང་དཀའ་བའང་མིན། །དཀའ་ཞིང་མཐར་མི་ཐོན་པ་ཡི། །དམ་བཅའ་བརྩམས་པའང་ཉམས་པའི་རྒྱུ། །དེ་ཀ་ཙམ་ཡང་མི་ཐུབ་སྙམ། །སྒྱིད་ལུགས་པའང་ཉམས་པའི་རྒྱུ། །དེ་ལས་གཞན་པའི་སྤྱོད་པ་རྣམས། །སྐབས་སུ་བབས་ན་བོགས་ཆེ་སྟེ། །ཁྲིགས་སུ་མ་འཕྲོད་གེགས་སུ་ཆེ། །སྤྱོད་པ་གཞན་རྣམས་མ་བྱས་ཀྱང་། ཀུན་བཟང་སྤྱོད་པ་གཅིག་པུ་དེས། །ས་ལམ་ཐམས་ཅད་བགྲོད་པར་གསུངས། །དྭགས་བརྒྱུད་རྣམས་ཀྱི་གཤེགས་ཤུལ་ལམ། །སངས་རྒྱས་བསྟན་ལ་ཕན་པ་དང་། །རང་ཉིད་ཆོས་སྒོ་མཐར་ཐོན་ཅིང་། །རང་ལ་ཡོན་ཏན་གང་ཡོད་ཀྱི། །འགྲོ་དོན་རྒྱ་ཆེན་འབྱུང་བ་དང་། །སྦྱིན་བདག་རྣམས་ཀྱང་དྭངས་བ་འདྲེན། །རྒྱུན་དུ་སྤྱོད་པ་དེ་རང་བྱ། །ཉ་
ཚེས་བཅོ་ལྔ་མཚམས་་་་གནམ་གང་། བརྒྱད་གསུམ་་་ཚེས་བརྒྱད། ཉི་ཤུ་གསུམ།་་འདི་མར་ངོའི་ཚེས་བརྒྱད་ཡིན་གསུངས། །ཚེས་བཅུ་དང་བཅུ་་་ཉེར་དགུ། དགུ་གཉིས་ཉི་ཤུ་བརྒྱད། །དེ་དག་རྣམས་སུ་དུས་མཆོད་གཟབ། །གཏོར་མ་ཆག་མེད་གཏོང་ཐོན་རོབ། །མ་འགྲུབ་ན་་་་་ཚེས་བཅོ་ལྔ་མཚམས་་་་གནམ་གང་བརྒྱད་གསུམ་ཚེས་བརྒྱད། གཏོང་། །དེ་ནི་ཛམ་ལྷའི་དམ་ཚིག་ཡིན། །སུ་རཱུ་པ་ཡི་གཏོར་མ་དང་། །བརྒྱ་རྩ་ཤིན་ཏུ་བསྡུས་པ་གཉིས། །ནངས་སྔ་རྩ་སྟོང་ཆག་མེད་བྱ། །ནུབ་མོ་གསུམ་གྱི་མཆོད་པ་དང་། །ལུས་སྦྱིན་རྒྱས་པ་འམ་མ་ལྕོགས་ན། །ཀུ་ས་ལི་ཡི་ཚོགས་གསོག་བྱ། །རྩ་བའི་ཡི་དམ་བདག་བསྐྱེད་དང་། །བསྙེན་པ་གཏོར་བསྔོས་མ་ཆག་པས། །གསར་མའི་བསྐྱེད་རིམ་ཉམས་ལེན་དང་། །སྙིང་མའི་མ་ཧཱ་ཡོ་ག་ཡི། །ཉམས་ལེན་དོན་རྩ་འདུས་པ་ཡིན། །འགྲུབ་སྦྱོར་ལ་སོགས་བཟང་པོའི་དུས། །ཆོས་སྐྱོང་བསྐང་གསོལ་རྒྱས་པ་དང་། །ཞི་རྒྱས་དབང་གི་སྦྱིན་སྲེག་བྱ། །དེས་ནི་བསྐྱེད་རིམ་བོགས་འདོན་འོང་། །རྒྱུན་དུ་ཡི་དམ་ལུས་དཀྱིལ་བསྒོམ། །བཟའ་བཏུང་ནང་གི་སྦྱིན་སྲེག་བྱ། །དབུགས་ཀྱི་འབྱུང་འཇུག་གནས་དང་གསུམ། །
འབྲུ་གསུམ་རྡོ་རྗེའི་བཟླས་པར་དམིགས། །ཁོམ་ན་རླུང་བཟུང་འཁྲུལ་འཁོར་བྱ། །མ་ཁོམ་ལུས་ཀྱི་འགུལ་སྤྱོད་ཀུན། །འཁྲུལ་འཁོར་གར་དང་ཕྱག་རྒྱུར་དམིགས། །དེ་ཡིས་གསར་མའི་ལུས་དཀྱིལ་དང་། །རྙིང་མའི་ཨ་ནུ་ཡོ་ག་ཚང་། །རབ་ཀྱིས་བསྐྱེད་རྫོགས་ཟུང་འཇུག་གམ། །མེད་ཀྱང་ངོ་བོ་སྐྱོང་བར་བརྩོན། །དྲན་རྗེས་ཡང་ཡང་གསལ་འདེབས་བྱ། །ཕྱག་ཆེན་ཁྲེགས་ཆོད་ཉམས་ལེན་ཚང་། །ཟེར་གཉིས་ཐོད་རྒལ་བལྟས་པ་ཡིས། །ཨ་ཏི་ཐེག་དགུའི་ཡང་རྩེ་ཚང་། །དེ་ཉིན་དགེ་སྦྱོར་གང་བྱས་རྣམས། །དོ་དགོང་བསྔོ་སྨོན་རྒྱ་ཡིས་གདབ། །དེ་ཡིས་དགེ་བ་མི་ཉམས་འཕེལ། །དེ་ལྟར་སྤྱོད་པའི་རྣམ་དབྱེ་འདི། །བརྩོན་འགྲུས་རྒྱ་མཚོས་བསྐུལ་བྱས་ནས། །གཞུང་གི་བཤད་པ་མ་བྱས་པར། །རང་གིས་ཉམས་སུ་བླངས་ཚོད་ཙམ། །རང་འདྲ་དམན་པ་གཞན་ལ་ཡང་། །ཕན་པར་འགྱུར་རམ་བསམ་པ་དེས། །ཤིང་སྦྲུལ་མགོ་ཟླའི་བཅོ་བརྒྱད་དང་། །བཅུ་དགུའི་དགོང་མོའི་ཐུན་སྐབས་གཉིས། །རཱ་ག་ཨ་སྱས་སྨྲས་པ་རྣམས། །གུ་རུ་བིདྱས་ཡི་གེར་བྲིས། །ལྟ་སྤྱོད་མཐོན་པོའི་གང་ཟག་གིས། །གཟིགས་ན་སྙིང་རྗེའི་གནས་
སུ་མཛོད། །ཐ་སྙད་མཁས་པའི་གང་ཟག་གིས། །གཟིགས་ན་བཞད་གད་གནས་སུ་མཛོད། །བདག་འདྲ་བློ་དམན་གང་ཟག་གིས། །གཟིགས་ན་ཉམས་སུ་བླང་བར་མཛོད། །ཤིན་ཏུ་དམན་པའི་གང་ཟག་ནི། །མང་པོ་འགའ་ལ་ཕན་པར་ཤོག །ལེའུ་སོ་དགུ་པའོ་མངྒ་ལཾ།། །།