ལེའུ་བཞི་བཅུ་པ། བསྟན་དང་འགྲོ་བའི་དོན་ཆེན་བསྒྲུབ་པའི་ཕྱིར། །འགྲོ་དོན་གདམས་པ་ཕྲིན་ལས་རྒྱ་མཚོ་ཡོད། །
༼ཐི༽ རི་ཆོས་མཚམས་ཀྱི་ཞལ་གདམས་ལས། འགྲོ་དོན་ཕྲིན་ལས་རྒྱ་མཚོ་བཞུགས་སོ། །ན་མོ་གུ་རུ་ལོ་ཀི་ཤྭ་ར་ཡེ། གསོན་དང་བརྩོན་འགྲུས་རྒྱ་མཚོ་བ། །འགྲོ་དོན་འདི་ལ་ལུགས་གཉིས་ཡོད། །ཤཱཀ་ཐུབ་བསྟན་པ་ལུང་རྟོགས་གཉིས། །ལུང་གི་བསྟན་པ་བཤད་པས་འཛིན། །ཤེས་རབ་བརྩོན་འགྲུས་ལྡན་པའི་མིས། །དགེ་བཤེས་མཁས་པ་མང་པོ་བསྟེན། །རིག་གནས་ཀུན་ལ་མ་རྨོངས་ཤིང་། །སྒྲ་དང་ཚད་མ་མངོན་པ་དང་། །དབུ་ཕར་འདུལ་བའི་གཞུང་རྣམས་ལ། །བགྲོ་གླེང་རྩོད་པའི་རིག་པ་བྱང་། །འབྲུ་སྦྱོར་འཕྲོས་ལེན་བཤད་པ་མཁས། །ཉམས་དང་རྟོགས་པ་མེད་ན་ཡང་། །དང་པོ་ཆོས་སྒོར་ཞུགས་པ་ནས། །མངོན་པར་རྫོགས་པར་སངས་རྒྱས་བར། །ས་ལམ་བཤད་པ་ཞིབ་རྒྱས་ཤེས། །བཀའ་
བཅུ་རབ་འབྱམས་མཁས་མིང་ཐོགས། །སློབ་མ་ལ་ཡང་དེ་ལྟར་བསླབ། །སློབ་མ་དགེ་བཤེས་མང་པོ་ཐོན། །གྲྭ་ས་ཆེན་པོའི་ཆོས་ལུགས་ཡིན། །དེ་དོན་མི་ལ་རས་ཆེན་། གྱིས་། །དབུས་གཙང་རུ་བཞིའི་རྒྱལ་ཁམས་ན། །ཆོས་སྒོམ་པ་མི་འགྲིམ་བཤད་པ་འགྲིམ། །གསུངས་ལྟར་དེ་འདྲར་རྩིས་ཆེའོ། །ཚེ་འདིར་ཉམས་རྟོགས་འདོད་པ་མེད། །ཚུལ་ཁྲིམས་གཙང་མ་བསྲུང་བའི་འབྲས། །སྐྱེ་བ་ཀུན་ཏུ་མི་ལུས་ཐོབ། །བག་ཆགས་བཟང་བས་མཁས་པ་འབྱུང་། །དེ་འདྲའི་སྐྱེ་བ་གྲངས་མེད་གསུམ། །དེ་ནས་སྟོང་ཉིད་རྟོགས་པར་འདོད། །དེ་དང་ཆ་མཐུན་དབང་ལུང་རྣམས། །རྒྱ་ཆེན་ཐོབ་ཅིང་དེ་དོན་ཤེས། །ཉམས་དང་རྟོགས་པ་མ་སྐྱེས་ཀྱང་། །དབང་རྒྱུན་ལུང་རྒྱུན་གཞན་ལ་སྤེལ། །དཔེར་ན་འོན་པས་དུང་བུས་བཞིན། །དེ་དོན་རང་གིས་མ་རྟོགས་ཀྱང་། །ལས་འཕྲོ་ཅན་ལ་ཕན་པ་སྲིད། །དེ་ཚོ་ལུང་གི་བསྟན་པ་སྟེ། །དེང་སང་ཤཱཀ་ཐུབ་བསྟན་པ་ཡང་། །རྟོགས་པའི་བསྟན་པ་ཡོལ་ནས་ནི། །ལུང་གི་བསྟན་པའི་དུས་ལ་བབས། །དེ་ཕྱིར་བཤད་རྒྱུན་ལུང་རྒྱུན་ཙམ། །སྤེལ་ཐུབ་ལུང་གི་བསྟན་འཛིན་ཡིན། །སློབ་མར་ཉམས་
རྟོགས་མི་སྐྱེ་ཡང་། །ཤེས་རབ་ལྡན་ན་ལུང་རྒྱུན་འཕེལ། །རྨོངས་པས་ཐོས་པའི་བསོད་ནམས་ཐོབ། །དུས་ལ་དཔག་པའི་འགྲོ་དོན་ཡིན། །རྟོགས་པའི་བསྟན་པ་སྒྲུབ་པས་འཛིན། །དྭགས་བརྒྱུད་པ་དང་རྙིང་མ་གཉིས། །གཙོ་ཆེར་སྒྲུབ་རྒྱུན་བསྟན་པ་ཡིན། །སྒྲུབ་བརྒྱུད་འགྲོ་དོན་ལུགས་ལ་ནི། །རྩེ་གཅིག་མཐོ་དམན་རྟོགས་པ་དེས། །གཞན་ལ་ཁྲིད་སོགས་འཆད་པ་ན། །གཞན་ལ་མི་ཕན་རང་ལ་གནོད། །དེ་ཕྱིར་སྒྲུབ་ལ་འབད་དུས་ཡིན། །སྤྲོས་བྲལ་མཐོ་དམན་ཉམས་རྟོགས་ཀྱིས། །ཞིབ་རྒྱས་ནན་གྱིས་བཤད་ན་ཕན། །འོན་ཀྱང་རང་ལ་ཅུང་ཞིག་གནོད། །རོ་གཅིག་རྟོགས་པའི་རྣལ་འབྱོར་དེས། །འགྲོ་དོན་དུས་ལ་བབས་པའི་ཕྱིར། །མ་འབད་ལོངས་སྤྱོད་ཆར་ལྟར་འབེབས། །ཅི་སྨྲས་གཞན་གྱིས་གུས་ཤིང་ཉན། །གཞན་རྒྱུད་བྱིན་གྱིས་བརླབ་ནུས་ཕྱིར། །ཉམས་དང་རྟོགས་པ་བསྐྱེད་པར་ནུས། །རང་གིས་དེ་ལྟར་མ་རྟོགས་ན། །བརྐོས་ཕོར་རི་མོ་སཱཙྪའི་དཔེ། །ཁྲིད་ཀྱང་ལུང་རྒྱུན་ཙམ་དུ་འགྱུར། །སྒོམ་མེད་རྟོགས་པའི་གང་ཟག་གིས། །ཧ་ཅང་བཤད་ཀྱང་མི་དགོས་ཏེ། །ཞལ་མཇལ་ཕྱག་དབང་ཐོབ་
ཙམ་མམ། །མ་མཇལ་དད་པས་གསོལ་བཏབ་ཀྱང་། །ཉམས་དང་རྟོགས་པ་བསྐྱེད་ནུས་པར། །བཀའ་བརྒྱུད་རྣམས་ཀྱི་བཞེད་པ་ཡིན། །དེ་དག་གཉིས་ཀར་གལ་ཆེ་བས། །བྱང་ཆུབ་སྒྲུབ་པའི་ཐབས་དེ་ནི། །རྒྱས་པ་འམ་ནི་བསྡུས་པའང་རུང་། །མ་ནོར་བ་ཞིག་བཤད་ཤེས་དགོས། །མི་ཤེས་བཞིན་དུ་བཤད་པ་ནི། །ཁམས་གསུམ་སེམས་ཅན་བསད་པ་བས། །གཏི་མུག་ཅན་ཀྱིས་ཆོས་བཤད་པ། །ཉེས་པ་ཆེ་བར་ཐུབ་པས་གསུངས། །ཤེས་ཤིང་ཟང་ཟིང་འདོན་ཕྱིར་མིན། །གཞན་ལ་སྙིང་རྗེས་ཆོས་སྦྱིན་པ། །སྟོང་གསུམ་རིན་ཆེན་སྣ་བདུན་གྱིས། །བཀང་ནས་སངས་རྒྱས་མཆོད་པ་བས། །དམ་ཆོས་ཚིགས་བཅད་གཅིག་བཤད་པ། །བསོད་ནམས་ཆེ་བར་ཐུབ་པས་གསུངས་། །ཟང་ཟིང་འདོད་པ་མེད་བཞིན་དུ། །སློབ་མས་དད་པས་ཕུལ་བ་ནི། །ཚིག་གཅིག་བཤད་པའི་ཡོན་ལ་ནི། །གསེར་ནི་རང་ལུས་ཙམ་ཕུལ་ཡང་། །དེ་ཡི་དྲིན་ལན་མི་འཁོར་ཕྱིར། །རང་ལ་དཀོར་སྒྲིབ་འབྱུང་དོགས་མེད། །སློབ་མའང་བསོད་ནམས་ཚོགས་རྫོགས་ཏེ། །ཕྱོགས་བཅུའི་སངས་རྒྱས་ཀུན་མཆོད་བས། །བླ་མའི་བ་སྤུ་
གཅིག་མཆོད་ལྷག །སྐྱེ་བ་དེར་ཡང་ལོངས་སྤྱོད་ལྡན། །མཐར་ནི་སངས་རྒྱས་རྒྱུ་རུ་འགྱུར། །ཟས་ནོར་ལོངས་སྤྱོད་དོན་གཉེར་ནས། །དབང་ལུང་གདམས་ངག་སྤེལ་བ་ནི། །དམ་ཆོས་བཙོང་ནས་ཟོས་པའི་ཕྱིར། །བཤས་ཁེ་ཚྭ་ཁེ་བྱས་ལས་ལོད། །དེ་གཉིས་བྱེད་ལུགས་འདྲ་ན་ཡང་། །བསམ་པའི་ཁྱད་ཀྱིས་དབྱེ་བ་ཡིན། །བསྡུ་བའི་དངོས་པོ་རྣམ་པ་བཞི། །བྱང་ཆུབ་སེམས་དཔའ་ཐམས་ཅད་ཀྱི། །འགྲོ་དོན་བྱེད་པའི་སྒོ་བཞི་ཡིན། །དེ་དོན་རྒྱལ་བ་འབྲོམ་སྟོན་གྱིས། །ཇོ་བོ་རྗེ་ལ་བསྟོད་པ་ལས། །མཁོ་བ་སྦྱིན་དང་སྙན་པར་སྨྲ་བ་དང་། །འཇིག་རྟེན་དོན་མཐུན་གདུལ་བྱའི་དོན་སྤྱོད་པ། །བསྡུ་བའི་དངོས་པོ་བཞི་ཡི་དཔལ་འབྱོར་གྱིས། །གཞན་དོན་ལྷུར་མཛད་ཁྱོད་ལ་ཕྱག་འཚལ་ལོ། །ཞེས་གསུངས་དོན་དེ་ཞིབ་བཤད་ན། །སྒྲུབ་པ་བྱེད་པའི་དུས་སུ་ཡང་། །ཆོས་དང་འཇིག་རྟེན་རྒྱབ་འགལ་ཡང་། །འགྲོ་དོན་བྱེད་པའི་དུས་སུ་ནི། །བསམ་པའི་ཁྱད་པར་མ་གཏོགས་པ། །ཆོས་དང་འཇིག་རྟེན་ཟུང་འཇུག་ཡིན། །ཡོན་བདག་གྲྭ་རིས་སུ་ལ་ཡང་། །ཟས་ནོར་ཆུང་ངུ་བྱིན་བྱས་ནས། །དེ་ལན་ཆེན་པོ་འདོད་པ་ནི། །ལོག་
པའི་འཚོ་བ་ངན་འགྲོའི་རྒྱུ། །འགྲིམ་འགྲུལ་བཀྲེས་ཤིང་སྐོམ་པ་ལ། །འཕྲལ་དུ་གང་འབྱོར་ཟས་སྐོམ་སྦྱིན། །ཐག་རིང་ནས་འོང་འགྲིམ་འགྲུལ་ལ། །ལམ་ཆས་འཁྱོལ་བར་བསྐུར་བ་དང་། །གནང་སྦྱིན་འོས་པའི་ཡོན་བདག་ལ། །གནང་སྦྱིན་ཕྱག་མདུད་ལ་སོགས་པ། །ཆོས་དང་གདམས་ངག་འདོད་དྲག་པར། །སྣག་སྨྱུག་ཤོག་བུ་སྦྱིན་པ་དང་། །ཆོས་རྒྱགས་ཆད་ནས་ཆོས་ཤོལ་ཕྱིར། །རྒྱགས་མཐུད་ཆོས་དེ་ཚང་ཐབས་དང་། །སློབ་མ་གཞན་དོན་ནུས་པ་ལ། །གང་འོས་དཔེ་དང་མཆོད་ཆ་སྦྱིན། །དེ་ལ་བཟང་ལན་བཀུར་སྟི་སོགས། །ཆེན་པོ་ཨེ་འོང་རེ་བ་སྤངས། །དེ་ནི་མཁོ་བའི་སྦྱིན་པ་སྟེ། །བྱང་ཆུབ་སེམས་དཔའི་སྤྱོད་པ་ཡིན། །བྱེད་ལུགས་གོང་དང་ཁྱད་མེད་ཀྱང་། །བསམ་པའི་ཁྱད་ཀྱིས་དགེ་སྡིག་གཉིས། །ཕྱོགས་ནས་འོང་ལ་ཕྱག་ཕེབས་དང་། །འགྲོ་ཁ་ཐུགས་དམ་གོང་འཕེལ་སོགས། །མྱ་ངན་ཅན་ལ་སེམས་གསོ་དང་། །གྲུབ་མཐའ་ལོག་ཆོས་སྤྱོད་པ་ལའང་། །གཤེ་སྐུར་མི་བྱ་ཡོན་ཏན་བརྗོད། །མི་ཉན་དོགས་པའི་ཁ་ད་ལ། །ཚིག་ངན་མི་བརྗོད་དལ་བུས་སྨྲས། །ཐབས་ཀྱིས་ལེགས་པའི་ཕྱོགས་སུ་ཁྲིད། དེ་
ནི་བྱང་ཆུབ་སེམས་དཔའ་ཡིན། །སྙན་པར་སྨྲ་བའི་འགྲོ་དོན་སྒོ། །ཁ་སྡུག་ཁོག་སྐྱིད་ཟེར་བའི་དཔེ། །ལོག་པར་སྤྱོད་ལ་བསྟོད་ར་དང་། །ཁས་བསྟོད་ཞེ་ཡིས་ཁྲེལ་བ་དང་། །ཁ་འཇམ་ཁོག་རྩུབ་སོ་དཀར་སྟོན། །བློ་ངན་དེ་འདྲ་ངན་འགྲོའི་རྒྱུ། །དེ་གཉིས་བྱེད་ལུགས་མཚུངས་ན་ཡང་། །དོན་ལ་མི་མཚུངས་བསམ་པའི་ཁྱད། །རང་ལ་བརྩི་ཞིང་ཁར་ཉན་ན། །འཐབ་རྩོད་འཁྲུག་པ་བཟླུམ་པ་དང་། །ཡོན་བདག་རྣམས་ཀྱི་རྐྱེན་སེལ་ཐབས། །རེ་བ་གང་བཅས་བསྐང་བ་དང་།། །ཆོས་ཀྱི་ཕྱོགས་སུ་ཁྲིད་|ཐུབ་ན། །རུས་དབོན་སྣག་དབོན་སོགས་ཀྱང་བསྐོར། །ཉེ་དུ་ཡོན་བདག་ལ་སོགས་ཀྱང་། །སེམས་ལ་ཆགས་ཞེན་མེད་ན་ཡང་། །འཇིག་རྟེན་པ་དང་མཐུན་པར་སྐྱོང་། །དེ་ནི་འཇིག་རྟེན་དོན་མཐུན་ཞེས། །བྱང་ཆུབ་སེམས་དཔའི་འགྲོ་དོན་སྒོ། །རུས་དབོན་སྣག་དབོན་ཉེ་དུ་སོགས། །ཆོས་ལ་སྦྱོར་བ་མི་ནུས་ཀྱང་། །ཆགས་ཞེན་དབང་གིས་དཀོར་གྱིས་གསོ། །ཕྱི་མ་རྔ་མོང་ལུས་ལེན་པར། །སྲོང་བཙན་སྒམ་པོས་གསུངས་པ་ཡིན། །གཉེན་དང་གྲྭ་རིས་སྐྱོང་བ་དང་། །ཆགས་ཞེན་ཕོ་རུས་བསམ་པ་ཡིས། །བསྐྱང་ན་
ངན་འགྲོའི་རྒྱུ་རུ་ངེས། །རིམ་གྱིས་ཆོས་ཕྱོགས་དཀྲི་བའི་ཕྱིར། །ཡིན་ན་དེའང་འགྲོ་དོན་ཉིད། །ཡོན་དང་ལྷ་རྟེན་འདོད་པའི་ཕྱིར། །ཟློག་པ་སྦྱིན་སྲེག་དབང་བསྐུར་དང་། ཆོ་ག་ཕྱིར་ལྡོག་བྱང་བུ་དང་། །དབང་ལུང་ཁྲིད་སོགས་གང་བྱས་པ། །ཚེ་འདིའི་རྐྱེན་དང་ཡུན་གྱི་སྒྲིབ། །བྱང་ཆུབ་ཐོབ་པའི་གེགས་སུ་ཆེ། །འགྲོ་ཀུན་ཕ་མར་ཤེས་བྱས་ཏེ། །ལྷག་པར་རང་ལ་རེ་བཅས་པ། །ཡོན་བདག་ཚེ་འདིའི་རྐྱེན་སེལ་དང་། །ཡོན་ཏན་མཁན་ལ་ཡོན་ཏན་སློབ། །དེ་ནི་ཚེ་འདིར་ཕན་པ་སྟེ། །ཡོན་བདག་དབང་བསྐུར་བྱང་བུ་དང་། །ཡོན་ཏན་མཁས་ལ་བསྙེན་སྒྲུབ་སློབ། །།ཉམས་དང་རྟོགས་པའི་ངོ་སྤྲོད་སོགས། །དེ་ནི་ཕྱི་མར་བདེ་ཐོབ་ཐབས། །འགྲོ་བ་ཕན་བདེ་ལ་འགོད་པ། །སངས་རྒྱས་བསྟན་པའི་དོན་རྩ་ཡིན། །དེ་གཉིས་བྱེད་ཚུལ་ཁྱད་མེད་ཀྱང་། །བསམ་པའི་ཁྱད་ཀྱིས་ཐ་དད་པ། །བྱང་ཆུབ་སེམས་དཔའི་འགྲོ་དོན་སྒོ། །གདུལ་བྱའི་དོན་སྤྱོད་ཅེས་བྱ་དང་། །ལྟོ་ཕྱིར་གནམ་སྡིབ་གྲོང་ཆོག་གཉིས། །འདྲ་འདྲ་འདྲ་སྟེ་ནོར་དོགས་ཆེ། །མ་ནོར་རང་གི་སེམས་ཀྱིས་ཤེས། །གྲྭ་པ་གཟུགས་མཛེས་གོས་བཟང་བ། །འདོན་པ་
འགྲིགས་པ་མང་པོ་ཞིག །འཛོམ་ན་བླ་ཆེན་ཤུགས་ཀྱིས་འོང་། །གང་དུ་ཕྱིན་ཡང་གདུལ་བྱ་འདུ། །བསམས་ནས་མི་གཞོན་མང་པོ་བསྐོར། །འདོན་པའི་ཁ་ཕྲལ་ཆོས་ཡིན་བསམ། །སེམས་རྒྱུད་དུལ་ཞིང་ཉམས་རྟོགས་ཅན། །ཉིན་མོའི་སྐར་མ་བཞིན་དུ་དཀོན། །བསྒོམ་བྱའི་གཙོ་བོ་ཁེ་དང་ཚོང་། །ཆགས་སྡང་འདོད་ཆགས་མེ་ལྟར་འབར། །གསོན་པོའི་རིམ་གྲོ་གཤིན་པོའི་ཆོས། །ཁར་མ་དེ་ཡིས་ཆོག་པར་སེམས། །དཀོར་ལ་རྔམ་ཆེ་ཆོག་ཤེས་མེད། །སྡོམ་པ་དམ་ཚིག་ཐམས་ཅད་ནི། །བླ་མ་ཆོས་ཁྲིམས་པ་སོགས་ཀྱིས། །མ་ཐོས་ན་ནི་དེས་ཆོག་སེམས། །ཕོ་ཁྲོམ་ཁྲོམ་འདུས་འཚོགས་པ་ཡིན། །འཚོགས་པ་བཟང་ངན་འབྲིང་གསུམ་ཡང་། །དགེ་འདུན་དངོས་ཀྱི་དག་སྣང་གི །ངུར་སྨྲིག་ཆོས་གོས་ཤམ་ཐབས་སོགས། །སྐྱེ་བ་སྟོང་ཕྲག་མང་པོ་ལ། །ལན་རེ་ཙམ་ཡང་གྱོན་པར་དཀའ། །བསྟན་པ་འཇིག་པའི་ཚེ་ན་ཡང་། །ངུར་སྨྲིག་གོས་ཉྩ་རྣམས་ཐམས་ཅད་ཀུན། །ལྷ་ཡིས་ཁྱེར་ནས་ལྷ་ཡུལ་དུ། །མཆོད་རྟེན་བྱས་ནས་མཆོད་པར་གསུངས། །ཐམས་ཅད་གྲ་མཉམ་དཀའ་ན་ཡང་། །གྲྭ་མང་ནང་ནས་འགའ་ཟུང་
ཙམ། །བསྟན་ལ་ཕན་པའི་དགེ་བཤེས་དང་། །ཉམས་རྟོགས་ཡོད་པའི་རྟོགས་ལྡན་དང་། །བསྙེན་སྒྲུབ་ཐེམ་པའི་སྔགས་འཆང་དང་། །སྡོམ་པ་མཐར་ཕྱིན་དགེ་སློང་ནི། རེ་རེ་བྱུང་ཡང་རིན་ཐང་ཆེ། །སྔོན་གྱི་འདུལ་བ་འཛིན་པ་རྣམས། །དཀོར་རྫས་དངོས་པོ་གང་བྱུང་བ། །གྲྭ་མང་ཞལ་དུ་ཐོངས་མཛོད་དང་། །དགེ་འདུན་སྡེ་འཕེལ་བསྟན་ལ་ཕན། །ཞེས་པ་འདས་ཁར་ཞལ་ཆེམས་བཞག །དཀོར་ཕུད་བྱེད་ལུགས་མང་ན་ཡང་། །ཆོས་མཐུན་གྲྭ་རིས་བསྐོར་བ་ནི། །བསྟན་དང་སེམས་ཅན་གཉིས་ཀར་ཕན། །། འབྲུག་པ་ངག་དབང་བཟང་པོ་དང་། །ཀརྨ་བསྟན་འཕེལ་རྒྱ་ར་བ། །དེ་སོགས་བླ་མ་མང་པོའི་འགས། །ལྷ་བྲི་རྟེན་བཞེངས་ལ་སོགས་པའི། །དཀོར་ཕུད་ཅི་ཡང་མ་མཛད་ཀྱང་། །དཀོར་གྱིས་གྲྭ་རིས་སྐྱོང་བ་དེས། །བསྟན་པས་མདོ་ཁམས་ཤར་ཕྱོགས་ཁྱབ། །དྭགས་པོ་ཕག་གྲུ་ལ་སོགས་པའི། །བཀའ་བརྒྱུད་ཕ་རྒན་དེ་རྣམས་ཀྱང་། །དེ་ལྟར་མཛད་པས་བསྟན་པ་འཕེལ། །དེ་དོན་མདོ་སྡེ་པད་དཀར་ལས། །དགེ་སློང་འཚོ་མཛད་ལུང་བསྟན་སྐབས། །དག་པའི་སློབ་མ་ལྔ་བརྒྱ་དང་། །མ་དག་སློབ་མ་ལྔ་བརྒྱ་
སོགས། །འདུས་པའི་འཁོར་ཚོགས་ཐམས་ཅད་ལ། །དགེ་འདུན་དངོས་ཀྱི་འདུ་ཤེས་ཀྱིས། །བསྙེན་བཀུར་ཞབས་ཏོག་ཕུན་ཚོགས་ཤིང་། །བླ་མེད་བྱང་ཆུབ་ཕྱིར་བསྔོས་པས། །སྐུ་དེ་མྱ་ངན་འདས་མ་ཐག །བདེ་བ་ཅན་དུ་སྐྱེ་འགྱུར་ཞིང་། །བླ་མེད་བྱང་ཆུབ་ལུང་ཡང་བསྟན། །རྗེས་འཇུག་རྣམས་ཀྱིས་ཕྱག་ལེན་ཡང་། །འདི་ལ་གོ་རྒྱུ་ཆེན་པོ་ཡོད། །ཞེ་འདོད་ཆོས་བརྒྱད་འཁོར་སྡུད་དང་། །བསྟན་དོན་དགེ་འདུན་སྡེ་བཙུགས་གཉིས། ། །འདྲ་འདྲ་འདྲ་ལ་ནོར་དོགས་ཡོད། །མ་ནོར་བསམ་པའི་ཁྱེར་སོ་གཟོབས། །དེ་བཞིན་རྟ་དྲེལ་ནོར་ཕྱུགས་སོགས། །ཆགས་ཞེན་དབང་གི་བྲང་ང་ཡང་། །དགྲ་འདྲེའི་གཡབ་མོ་ངན་སོང་རྒྱུ། །འབྲོག་པ་རྣམས་དང་ཁྱད་པར་མེད། །སྒྲུབ་མཆོད་དུས་མཆོད་དགུ་གཏོར་དང་། །ཉམས་ལེན་སྒྲུབ་པའི་མཚམས་རྒྱགས་དང་། །གྲྭ་ཚོགས་དགེ་འདུན་སྡེ་སྐྱོང་ཕྱིར། །ཇི་ལྟར་མང་ཡང་སྐྱོན་མེད་དེ། །གྲུབ་ཆེན་ཀརྨ་པཀྴི་དེ། །རྒྱ་ནག་ཡུལ་དུ་འབྱོན་ཁ་དུས། །མཚུར་ཕུའི་བྲང་ང་ཐམས་ཅད་ནི། །གཅིག་ཀྱང་མེད་པར་གཏོར་དགོངས་ཚེ། །རང་བྱུང་རྒྱལ་མོ་དངོས་སུ་བྱོན། །ད་རུང་ཁྱོད་ཀྱིས་
ཚེ་འདི་ལ། །བྱ་བ་མང་པོ་བྱེད་དགོས་ཡོད། །བྲང་ང་གཅིག་ཀྱང་མ་གཏོར་གསུངས། །ནོར་ཀུན་ཤེ་བཏང་བཞག་ཅེས་བཤད། །ཕྱིས་དུས་མཚུར་ཕུའི་ལྷ་ཆེན་དང་། །རིགས་ལྔ་སྤྱན་རས་གཟིགས་སོགས་བཞེངས། །དེ་བཞིན་དཀོན་མཆོག་མཆོད་པ་དང་། །དགེ་འདུན་སྐྱོང་ཕྱིར་བྲང་ང་དང་། །སེར་སྣས་སྡུག་བཙིར་བྱེད་པ་གཉིས། །བྱེད་ལུགས་འདྲ་ཡང་བསམ་པའི་ཁྱད། །དེ་དོན་འདུལ་བའི་གཞུང་ལས་ཀྱང་། །དགེ་ཚུལ་དང་ནི་དགེ་སློང་གིས། །གསེར་དངུལ་ལེན་པ་མི་རུང་སྟེ། །གཙུག་ལག་ཁང་དང་དགེ་འདུན་དོན། །གསེར་དངུལ་སྲང་ཆེན་བརྒྱ་སྟོང་ཡང་། །ཉ་ར་རུང་བར་གསུངས་པའོ། །དེ་བཞིན་འབུལ་བ་གདུལ་བྱ་སོགས། །དཔག་ཏུ་མེད་པ་བྱུང་ན་ཡང་། །རང་གི་ཕུགས་སྲས་མནོག་དོན་དུ། །བསམས་ནས་བླངས་ན་དཀོར་སྒྲིབ་ཆེ། །དཀོན་མཆོག་མཆོད་དང་དགེ་འདུན་སྐྱོང་། །སྤྱི་ཡི་དོན་དུ་དམིགས་བྱ་ཡི། །རང་གིས་སྒེར་ནོར་བཅངས་བཟུང་དུ། །ལུས་གང་གོས་དང་ཕོར་པ་ཙམ། །དེ་ལས་ཅི་ཡང་མེད་པར་གཅེས། །དེ་ནི་འདུལ་བའི་དོན་དང་མཐུན། །དཀོར་སྒྲིབ་ཤིན་ཏུ་ཆེ་བ་ཡིན། །བྱང་ཆུབ་
སེམས་བསྐྱེད་ལྡན་རྣམས་ཀྱིས། །བསྡུ་དངོས་བཞི་ཡི་འགྲོ་དོན་ནི། །ཉམས་མྱོང་ལག་ཏུ་ལོན་ཚོད་ཙམ། །གླུ་ཡི་སརྒ་དང་པོའོ། ༈ །གསོན་དང་བརྩོན་འགྲུས་རྒྱ་མཚོ་བ། །རང་གཞན་དོན་གཉིས་སྒྲུབ་པའི་ཐབས། །རང་ཉིད་སྒྲུབ་པ་བྱེད་པའི་སྐབས། །བསྐྱེད་རྫོགས་ངེས་པ་ཅུང་ཟད་རྙེད། །སྙིང་ནས་དམ་ཆོས་འདོད་པའི་མིས། །རང་ལ་སྙིང་ནས་རེ་བཅས་པ། །དེ་ཡི་རེ་བ་མ་བསྐང་ན། །སེམས་ཅན་བློས་སྤངས་ལྟུང་བར་འགྱུར། །ཧ་ཅང་ཡངས་ན་སྒྲུབ་པ་རལ། །རང་གི་སྒྲུབ་པའི་བར་ཆད་འོང་། །ང་རྒྱལ་རང་མཐོང་དད་གུས་མེད། །གདམས་ངག་རྐུ་ཐབས་བརྒྱུད་པ་གསོང་། །ཞུས་པར་ཐོས་ན་ངོ་ཚར་སེམས། །རིག་པ་རྣོ་ཡང་དད་འདུན་མེད། །ཡོན་ཏན་མི་མཐོང་སྐྱོན་ལ་བལྟ། །རྗེས་ནས་གཤེ་སྐུར་ཀུན་ཏུ་སྒྲོག །ལ་ལ་ཆོས་འདོད་དད་ལྡན་ཡང་། །བཤད་ཀྱང་མི་གོ་བོང་བུ་འདྲ། །ལ་ལ་ཅལ་སྒྲོག་རྗེས་སུ་རྒྱུག །འདི་བསམ་་མེད་པར་ཆོས་ཞུར་འོང་། །ཚང་བོར་མི་ཉེན་ཕྱིར་ལ་རྒྱུགས། །དེ་འདྲ་བརྒྱ་སྟོང་འཚོགས་པ་ལས། །དད་ཅན་ཤེས་རབ་བརྩོན་འགྲུས་ལྡན། །རང་ལ་གུས་ཤིང་གང་ཟེར་ཉན། །
རང་ཉིད་བླ་མར་འཛིན་པ་ཡི། །སློབ་མ་འགའ་ཟུང་བསྟེན་ན་ཡང་། །འགྲོ་དོན་འབྲས་བུ་དེ་ཆེའི་ཕྱིར། །བཀའ་བརྒྱུད་གོང་མའི་གསུང་ལ་ནི། །ར་ཁྲིད་ལུག་ཁྲིད་ཅེས་ཀྱང་བྱ། །ཁྲོམ་ཆེན་བསྡུ་བ་མ་ཡིན་ཕྱིར། །ཕུག་སྒོར་ཆོས་བཤད་ཅེས་ཀྱང་བྱ། །ཀཿཐོག་རྙིང་མའི་ལུགས་ལ་ནི། །གཅིག་ཁྲིད་ཅེས་བྱ་ཟབ་པར་བརྩི། །དེ་ལ་བྱེད་ལུགས་རིགས་མང་སྟེ། །ཤེས་རབ་ཕུན་སུམ་ཚོགས་པ་ལ། །འཕྲལ་དུ་སྒྲུབ་པ་བྱེད་རྒྱུ་ཡི། །དབང་ལུང་ཉི་མ་གཉིས་ཙམ་བྱ། །དབང་ཞོར་ངོ་སྤྲོད་བཙན་ཐབས་གདབ། །སྒྲུབ་རྒྱགས་ཁང་པ་སོགས་འཛོམ་ན། །ཉེ་ལོགས་དེ་རུ་མཚམས་བསྡམས་ནས། །ལོ་གསུམ་ཕྱོགས་གསུམ་དམ་བཅའ་བླངས། །ཞག་པོ་དྲུག་བདུན་ཙམ་གྱི་སོར། །དམིགས་ཐུན་བསྒོམ་བྱ་རྡུལ་བྱང་བསྐུར། །ལོ་གསུམ་ཕྱོགས་གསུམ་མཐར་ཐོན་ཚེ། །།བསྙེན་སྒྲུབ་ཐེམས་དང་ཉམས་རྟོགས་སྐྱེས། །བླ་མ་འོང་བ་དུས་མཉམ་འབྱུང་། །ཉེ་ལོགས་མཚམས་བསྡམས་མ་འགྲིགས་ན། །ཉམས་ལེན་དབང་ལུང་ཉེར་མཁོ་སྦྱིན། །ངོ་སྤྲོད་གདམས་ངག་ནན་གྱིས་བཏབ། །ཉམས་སུ་ལེན་ཚུལ་ཟིན་བྲིས་བསྐུར། །རྒྱུན་དུ་གེགས་སེལ་
དམིགས་པ་དང་། །བྱིན་འབེབས་དམིགས་པས་བྱིན་གྱིས་བརླབ། །དེས་ཀྱང་སྒྲུབ་ཐེམས་ཉམས་རྟོགས་སྐྱེ། །མ་མཇལ་ས་ཐག་རིང་པོ་ནས། །དད་ལྡན་འབུལ་བ་བསྐུར་སོགས་ལ། །གསོལ་འདེབས་ངོ་སྤྲོད་ཡི་གེ་བསྐུར། །འགྲོ་མགོན་སངས་རྒྱས་དབོན་པོ་ཡིས། །ཡི་གེ་བསྐུར་བས་གྲོལ་བ་ཡི། །སློབ་མ་བརྒྱ་རྩ་ཡོད་དོ་སྐད། །དེ་ཙམ་རང་རེ་འོང་དཀའ་ཡང་། །བློ་སེམས་ཆོས་ལ་འགྱུར་བ་དང་། །སེམས་ངོ་འཕྲོད་དང་བོགས་ཐོན་སོགས། །འབྱུང་བ་མྱོང་བས་གྲུབ་པ་ཡིན། །དེ་བཞིན་བཀའ་བསྒོ་དམིགས་ཐུན་དང་། །ཕྱིར་ལྡོག་བྱང་བུ་བསྔོ་སྨོན་སོགས། །མཚམས་ཀྱི་ཁོང་ནས་བྱེད་པ་རྣམས། །རང་གཞན་གཉིས་དོན་སྒྲུབ་པ་ཡིན། །རང་གི་སྒྲུབ་ལ་མི་གནོད་པར། །གཞན་ཕན་ཅི་ནུས་མ་སྒྲུབ་ན། །ཐེག་པ་དམན་པར་གོལ་བ་ཡིན། །སེམས་བསྐྱེད་བསམ་པ་བཟང་བ་ན། །དེ་ཀ་ཙམ་གྱིས་འགྲོ་དོན་ཡང་། །ཆུང་རྒྱུ་མེད་པས་ཆེན་པོར་ངེས། །ཐུབ་དབང་བྱ་ནི་ཤིང་རྟ་རུ། །བསམ་ཞིང་སྐྱེ་བ་བཞེས་པའི་དུས། །སེང་གེའི་གྲེ་ཕུག་རུས་སོ་ཟུགས། །ཟུག་གཟེར་ཆེན་པོ་ལྡན་པ་དེ། །སྙིང་རྗེའི་
དབང་གིས་འདོན་རོགས་མཛོད། །དེ་ལས་འགྲོ་དོན་གཞན་མེད་ཀྱང་། །ངོ་མཚར་སྐྱེས་རབས་གྲར་བརྩིས་ན། །འགའ་ཟུང་ནད་གདོན་ཞི་བ་དང་། །འགའ་ཟུང་བསྙེན་སྒྲུབ་ཐོན་པ་དང་། །འགའ་ཟུང་ཉམས་རྟོགས་སྐྱེ་ཐུབ་ན། །འགྲོ་དོན་ལེགས་པ་མ་ལགས་སམ། །རང་གཞན་གཉིས་དོན་སྒྲུབ་པ་ཡི། །གླུ་ཡི་སརྒ་གཉིས་པའོ། ༈ །གསོན་དང་བརྩོན་འགྲུས་རྒྱ་མཚོ་བ། །གཞན་དོན་གཙོ་བོར་བྱེད་པ་ལ། །ཕྱི་ནང་གསང་གསུམ་རྟེན་འབྲེལ་བརྟག །ཕྱི་ལྟར་ལོ་ལེགས་ཡུལ་འཁྲུག་མེད། །ནང་ལྟར་སྒར་ཆས་སྒྲུབ་ཚོརྫས་འཛོམ། །གསང་བ་བསྐྱེད་རྫོགས་གདེང་དང་ལྡན། །ཀུན་སློང་བྱང་ཆུབ་སེམས་བསྐྱེད་ནས། །ཕྱོགས་རྣམས་ཀུན་ཏུ་འགྲོ་བའི་ཚེ། །རང་ཉིད་རྒྱལ་བ་རྒྱ་མཚོ་སྒོམ། །སྤྱི་བོར་བྱ་ཁྱུང་རྒྱལ་པོ་ལྡིང་། །ས་བདག་ཀླུ་གཉན་ཟིལ་གྱིས་མནན། །ཆིབས་པའི་གོང་དུ་འདུག་པའི་ཚེ། །ཆིབས་པ་པད་ཟླའི་གདན་དུ་སྒོམ། །རྐང་ལག་མཁའ་འགྲོ་སྡེ་བཞིས་བཏེག །འགྲོ་བའི་དོན་དུ་བྱོན་པའི་ཚེ། །སྟེང་དུ་བཀའ་བརྒྱུད་བླ་མ་རྣམས། །སྤྲིན་ཕུང་བཞིན་བཞུགས་བྱིན་གྱིས་རླབས། །རྒྱབ་ཏུ་ཡི་དམ་ལྷ་ཚོགས་རྣམས། །རྒྱབ་
རྟེན་ཚུལ་དུ་རྗེས་རྗེས་བྱོན། །གཡས་ནས་སེང་ཆེན་གཡུ་རལ་བསིག །གཡོན་ནས་སྟག་མོ་འཛུམ་དྲུག་རྒྱས། །མདུན་གྱི་སྒར་སྣར་གླང་པོ་ཆེ། །སྨོན་པའི་བརྟུལ་ཞུགས་ལྡན་པ་ཡི། །སྣ་ལ་མཚོན་ཆའི་འཁོར་ལོ་བསྐོར། །སྒར་གྱི་སྣ་ནས་མིག་མཐོང་སོར། །རྡོ་རྗེ་ལེགས་པ་སེང་གེ་ཆིབས། །སྟེང་དུ་ཁྲ་དང་བྱ་ནག་ལྡིང་། །སྟག་སྤྱང་འཕར་བ་རོལ་དུ་ཁྲིད། །བཙན་དམག་སྟོང་གི་འཁོར་ཚོགས་བཅས། །ཀུན་ཀྱང་དར་མདུང་དམར་པོ་ཕྱར། །བསྲོ་སྒྲ་ཆ་སྒྲ་སྒྲོག་ཅིང་སོང་། །ལམ་དགྲའི་བར་ཆད་སེལ་བ་དང་། །མཐུན་རྐྱེན་དགོས་འདོད་བསྒྲུབ་པར་བསམ། །རང་ཉིད་སྤྱན་རས་གཟིགས་དབང་གི །སྤྱན་གྱིས་གཟིགས་པའི་སྲོག་ཆགས་ཀུན། །སྡིག་སྒྲིབ་མ་ལུས་བྱང་བར་བསྒོམ། །དེ་ནས་སྒར་ནི་བརྒྱབ་པའི་ཚེ། །ས་གཞི་སྣ་ཚོགས་རྡོ་རྗེ་ནི། །སྲ་ཞིང་བརྟན་པའི་ལྟེ་བ་ལ། །པདྨའི་སྡོང་པོ་ཆེན་པོ་སྐྱེས། །འདབ་མས་ས་ཕྱོགས་དེ་ཀུན་ཀླུ་ཁྱབ་། །དེ་སྟེང་པདྨ་ཟླ་བའི་སྟེང་། །རང་ཉིད་ཐུགས་རྗེ་ཆེན་པོ་ཡིས། །རྡོ་རྗེ་སྐྱིལ་ཀྲུང་བཅས་མ་ཐག །ས་ཡང་རྣམ་པ་དྲུག་ཏུ་གཡོས། །འཇའ་གུར་མེ་ཏོག་ཆར་པ་འབབ། །
ཕྱོགས་དེའི་མི་དང་ལྷ་འདྲེ་ཀུན། །འདུས་ནས་ཕྱག་འཚལ་བསྐོར་བ་བྱེད། །གཏོང་ལེན་དམིགས་པ་ཐུན་གཅིག་བསྒོམ། །བདག་གི་འོད་ཟེར་ཕོག་པ་ལས། །ཐམས་ཅད་སྤྱན་རས་གཟིགས་སུ་གྱུར། །ཡིག་དྲུག་དིར་དིར་འདོན་པར་བསྒོམ། །ཕྱག་དབང་ཞུ་མི་བྱུང་བའི་ཚེ། །སོར་མོ་རྒྱལ་བ་རིགས་ལྔ་ལས། །ཡེ་ཤེས་ལྔ་ཡི་རང་བཞིན་གྱི། །འོད་ཟེར་ཁ་དོག་ལྔ་འཕྲོས་པས། །དུག་ལྔའི་སྒྲིབ་པ་དག་པར་བསྒོམ། །བཟའ་བཏུང་རུང་བའི་འབུལ་བ་ཀུན། །ཨོཾ་ཨཱཧཱུྃ་གིས་བྱིན་བརླབས་པས། །ཡེ་ཤེས་བདུད་རྩིའི་རྒྱ་ཟླུམཚོར་དམིགས། །མགྲོན་རིགས་བཞི་པོ་ཐམས་ཅད་ནི། །སྤྱན་རས་གཟིགས་དང་ཛམ་ལྷ་དཀར། །ལོ་མ་གྱོན་མའི་སྐུར་གྱུར་ནས། །བདུད་རྩི་གསོལ་བས་མཉེས་པར་བསྒོམ་། །སོ་སོའི་སྔགས་ལ་ཁཱ་ཧི་བཏགས། །དཀོན་མཆོག་མཆོད་པས་མཉེས་གྱུར་ཅིག །དམ་ཅན་ཐུགས་དམ་བསྐང་གྱུར་ཅིག །རིགས་དྲུག་འདོད་པ་ཚིམ་གྱུར་ཅིག། ལན་ཆགས་བུ་ལོན་བྱང་གྱུར་ཅིག །རྣམ་བཞིའི་མགྲོན་གྱི་ཚོགས་རྣམས་ལ། །ཚད་མེད་མཆོད་སྦྱིན་འདི་བསྔོས་པས། །བདག་དང་སེམས་ཅན་ཐམས་ཅད་ཀུན། །ལོངས་སྤྱོད་
ལྡན་ཞིང་ཚོགས་རྫོགས་ནས། །མྱུར་དུ་སངས་རྒྱས་ཐོབ་པར་ཤོག །ཅེས་བརྗོད་དམིགས་མེད་ངང་ལ་བཞག །དེ་བཞིན་འབྲུ་དང་རིན་ཆེན་སོགས། །སྐམ་ཆས་མཎྜལ་དམིགས་ལ་འབུལ། །རྟ་ཕྱུགས་གོ་མཚོན་ལ་སོགས་པ། །གཏོར་བསྔོས་ཞོར་གྱི་བསྐང་ཐུང་ཞོར། །བསྐང་བའི་རྫས་སུ་དམིགས་ཏེ་འབུལ། །བར་ཆད་སེལ་ཞིང་ལོངས་སྤྱོད་འདུ། །དཀོར་སྒྲིབ་ཆུང་བའི་གདམས་ངག་ཡིན། །དེ་བཞིན་ཤི་ཤོག་གསོན་ཤོག་ཀྱང་། །བསྔོ་བའི་སྐབས་སུ་དམིགས་པས་བཞུ། །རྗེས་ནས་རྒྱས་པར་ཆོ་གས་བཞུ། །ཤི་གསོན་འབྲེལ་པ་ཐོགས་ཚད་ཅེས། །རྒྱུན་དུའང་བསྔོ་སྨོན་མ་བརྗེད་བྱ། །ལྷ་དང་བླ་མས་བཀའ་རྒྱ་ཡིས། །རབ་ཏུ་བསྡམས་པའི་དབང་ལུང་དང་། །དྲག་སྔགས་རིགས་དང་ངན་སྔགས་རིགས། །རྐུན་ནོར་བཞིན་དུ་སྦ་བར་བྱ། །འདོད་ཅིང་དྲི་བ་བྱུང་བ་ན། །མི་ཤེས་མ་ཐོབ་དཔེ་ཆ་མེད། །ཟེར་བའི་ལན་དེ་ཁོ་ན་གདབ། །འདི་ཕྱིར་སྒྱུ་ཕན་པའི་དབང་ལུང་དང་། །ཁྲིད་དང་གདམས་ངག་ཟབ་མོའི་རིགས། །སྦྲ་སྲི་མེད་པ་སྟོན་མོར་འགྱེད། །སྣོད་དང་ལྡན་ནམ་མི་ལྡན་པ། །བརྟག་དགོས་མི་དགོས་རྟོགས་པས་
ཤེས། །འཁོར་འདས་དབྱེར་མེད་དོན་རྟོགས་ན། །སྣོད་མིན་དབང་བསྐུར་ཆོས་བཤད་ཀྱང་། །དེ་ལ་ཉེས་པ་མེད་པར་གསུངས། །རྟོགས་པ་དེ་ཙམ་མེད་ན་ནི། །སྣོད་མ་ཡིན་དང་དམ་ཉམས་ལ། །དབང་དང་གདམས་པ་ཟབ་སྤེལ་ན། །གསང་བ་ཐུགས་ཀྱི་དམ་ཚིག་ཉམས། །ཚེ་འདིར་མཁའ་འགྲོའི་བཀའ་ཆད་ཀྱིས། །སྨྱོ་འབོག་ལ་སོགས་མི་ལྷོ་དགེ་འབྱུང་། །ཕྱི་མ་དམྱལ་བར་ལྟུང་བར་བཤད། །དེ་ཕྱིར་སྡིག་ཆེན་དམ་ཉམས་སོགས། །ཕྱག་རྟེན་བཟང་བའི་ངོ་བྱས་ནས། །ཤིན་ཏུ་ཟབ་གཉན་དབང་བཞི་དང་། །གསང་སྔགས་ཟབ་གནད་བསྟན་མི་བྱ། །ཀུན་ལ་ཕན་ཞིང་སྤེལ་རུང་བ། །སྐྱབས་སྡོམ་བསྙེན་གནས་སྡོམ་པ་དང་། །སྨྱུང་གནས་ངག་བཅད་སྡོམ་པ་དང་། །ཟབ་མོ་ལྟ་བའི་བརྒྱུད་པའི་ལུགས། །བྱང་ཆུབ་སེམས་བསྐྱེད་སྡོམ་པ་དང་། །སྨན་བླ་ཀུན་རིག་མི་འཁྲུགས་པ། །ཚེ་དཔག་ལྷ་དགུ་འབྱུང་འདུལ་དང་། །ཞི་ཁྲོ་ཐུགས་རྗེ་ཆེན་པོ་སོགས། །བཀའ་རྒྱ་ཡངས་ཤིང་འགྲོ་དོན་ལ། །གཞུང་ནས་བསྔགས་པའི་དབང་རྣམས་བསྐུར། །ཅུང་ཞིག་བཀའ་རྒྱ་དོག་པ་རྣམས། །སུ་ཡིན་མི་བཙུད་ཉུང་དབང་བྱ། །དབང་བསྐུར་
ཀུན་གྱི་ཐོག་མར་ནི། །ཁྲོམ་རྣམས་འདུ་བའི་རྟེན་འབྲེལ་དུ། །འགྲོ་བ་དགེ་ལ་བསྐུལ་བའི་ལྷ། །བསྐུལ་བྱེད་མ་ཡི་དབང་བསྐུར་བྱ། །ཁྲོམ་ཚོགས་ཆོས་ཁྲིར་་འདུག་མ་ཐག་།བདུད་ཀྱི་དཔུང་རྣམས་འཇོམས་པའི་གཟུངས། །ཐར་རྒྱན་ནང་ནས་འབྱུང་བ་ལྟར། །སྐད་གསང་མཐོན་པོས་ཚར་གཅིག་བརྗོད། །ཁྲོམ་ལ་རིམས་ནད་མི་འབྱུང་ཕྱིར། །དེ་ནས་ལོ་མ་གྱོན་མ་བསྐུར། །ཉིན་བཞིན་སྔགས་ཐུང་འུར་འདོན་བཅུག །ཁྲོམ་པར་ནད་ཡམས་མི་འབྱུང་བའི། །གདམས་ངག་མཆོག་ཏུ་གྱུར་པ་ཡིན། །དེ་ནས་སྒྲུབ་ཆེན་ཚུགས་ན་རབ། །ཁྲོམ་པ་འཚོགས་དང་འཚོགས་རྒྱུ་ཀུན། །རྒྱལ་ཐོ་སྲུང་འཁོར་ནང་ཚུད་དམིགས། །ཡིག་བདུན་བོ་དྷི་ཙིཏྟ་སོགས། །ཁྲོམ་གྱིས་འུར་འདོན་ཐུན་རེས་བྱས། །དེ་ཡིས་ཐུན་པའི་གོ་ཆོད་ཡིན། །གཞུང་བསྲང་ཚར་རེ་བྱེད་དུ་བཅུག །རང་གི་དམིགས་པས་གསལ་ཡང་བཏབ། །ཕྱག་ལེན་མཐོང་བ་བརྒྱུད་པས་ཤེས། །གལ་ཀླུ་ཏེ་སྒྲུབ་ཆེན་མ་ཚུགས་ན། །ཁྲོམ་དབང་ཞོར་ལ་སྤྱི་ཆོས་བཤད། །ཁྲིད་ཞུ་རྣམས་ལ་ཉུང་ཆོས་བཤད། །གྲོལ་ཁ་ཚེ་དབང་བསྐུར་བ་དང་། །བསྔོ་བ་བཀྲ་ཤིས་རྒྱས་པར་བྱ། །
དེ་དག་རྣམས་ཀྱི་བར་སྐབས་སུ། །འདོད་ཆོས་དབང་ལུང་གདམས་ངག་སྤེལ། །ཚོང་དཔོན་ལྟ་བུའི་འགྲོ་དོན་ཡིན། །དཔེར་ན་ཚོང་དཔོན་ཆེན་པོ་ཡིས། །མཁོ་དགུའི་ལོངས་སྤྱོད་སྣ་ཚོགས་ཁྱེར། །གང་ལ་གང་དགོས་ཡོ་བྱད་ཚང་། །རང་ལ་ཅི་འདོད་ལོངས་སྤྱོད་འབྱུང་། །དེ་བཞིན་དབང་ལུང་ཕུན་ཚོགས་པས། །གང་ལ་གང་དགོས་དབང་ལུང་སྤེལ། །རང་ལ་ཆོས་དང་ལོངས་སྤྱོད་ཀྱི། །དངོས་གྲུབ་སྣ་ཚོགས་འབྱུང་བ་ནི། །ཚོང་དཔོན་ལྟ་བུའི་འགྲོ་དོན་ཞེས། །དགོངས་འདུས་གཞུང་ལས་གསུངས་པ་ཡིན། །ཚོང་དཔོན་ལྟ་བུའི་འགྲོ་དོན་གྱི། །གླུ་ཡི་སརྒ་གསུམ་པའོ།། ༈ །།གསོན་དང་བརྩོན་འགྲུས་རྒྱ་མཚོ་བ། །མཉན་པ་ལྟ་བུའི་འགྲོ་དོན་ནི། །ས་འགག་ཆུ་བོ་ཆེན་པོའི་འགྲམ། །གནས་བཅས་གྲུ་དང་སྐྱ་བ་འཚགས། །འགྲིམ་འགྲུལ་ཕར་ཀ་འགྲོ་འདོད་ཀུན། །གྲུ་ཡིས་སྒྲོལ་ནས་གཏོང་བ་ལྟར། །རྒས་སམ་ལུས་པོ་མི་སྲ་འམ། །སྒར་བཅས་གྲྭ་སློབ་ཁལ་རྟ་མེད། །གྲུ་དང་སྐྱ་བ་འདྲ་བ་ཡི། །དབང་ལུང་གདམས་ངག་ཟབ་དགུ་ཡོད། །དགོན་པ་འམ་ནི་རི་ཁྲོད་ཀྱི། །གནས་མལ་ཞིག་ཏུ་རྟག་ཏུ་འདུག །འཁོར་བ་སྡུག་བསྔལ་རྒྱ་
མཚོ་ལས། །ཐར་འདོད་དད་གུས་བརྩོན་འགྲུས་ཅན། །དབང་ཞུ་ཆོས་ཞུ་སུ་བྱུང་ལ། །སོ་སོའི་འདོད་པ་བསྐང་སྟེ་གཏོང་། །མཉན་པ་ལྟ་བུའི་འགྲོ་དོན་ནི། །ཨོ་རྒྱན་ཆེན་པོས་གསུངས་པ་ཡིན། །རྒྱལ་པོ་ལྟ་བུའི་འགྲོ་དོན་ནི། །འབྲི་སྟག་ས་ཀར་ལ་སོགས་ཀྱི། །ཆེན་པོ་རྣམས་ཀྱི་སྤྱོད་ཡུལ་ཏེ། །རང་རེ་རྣམས་ཀྱིས་ག་ལ་འོང་་། །འོན་ཀྱང་དེ་ཡི་ཆ་མཐུན་ཙམ། །རང་ལ་ཆོས་དང་འཇིག་རྟེན་གྱི། །ཁ་ཐབས་ཅི་ཙམ་ཡོད་པའི་ཚོད། །རང་ལ་རེ་ཞིང་ལྟོས་པ་ཡི། །སྐྱ་སེར་སྐྱེས་པ་བུད་མེད་སོགས། །ཚེ་འདིར་ནད་གདོན་ཞི་ཐབས་དང་། །ཕྱི་མ་ངན་སོང་སྤོང་བའི་ཐབས། །རང་གིས་ཇི་ལྟར་ནུས་པ་ལྟར། །གཡོ་སྒྱུ་མེད་པར་བྱས་པས་འཐུས། །རང་གི་འབྱོར་པ་དང་དཔག་ནས། །བླ་མ་དགོན་པ་ལ་སོགས་ལ། །དཀོར་ཕུད་འབུལ་བ་མང་ཇ་དང་། །ཀློག་འདོན་སཱཙྪ་ཆུ་གཏོར་དང་། །ལོ་དུས་བསྐང་གསོ་མདོས་སོགས་བཅའ། །ཀླུ་དབུལ་ཕོངས་རྣམས་ལ་ཅི་འབྱོར་སྦྱིན། །ཁྱད་པར་ཆོ་འཕྲུལ་ཡར་ངོ་ལ། །བྱ་བྱེའུ་རྣམས་ལ་ཡོས་སྦྱིན་བཏང་། །ཆུ་སྟོད་ཟླ་བའི་ཚེས་བཞི་ལ། །རྒྱ་གྲོག་ཕུང་པོ་མང་པོ་
གསོ། །སངས་རྒྱས་སྟོང་སྐུ་ལ་སོགས་དང་། །ཡི་དམ་ཆོས་སྐྱོང་སྐུ་རྣམས་བཞེངས། །རང་གི་ཡི་དམ་ཆོས་སྐྱོང་གི །རྒྱུད་གཞུང་གཞུང་པོད་ཅི་ནུས་བཞེངས། །གྲྭ་པ་རབ་འབྲིང་ཐ་མ་རྣམས། །ཀ་ཚར་ཡན་ནས་དབང་བསྐུར་མན། །།བློ་ཚོད་དཔག་པའི་ཡོན་ཏན་བསླབ། །།ཇ་མར་ཤ་ཐུད་གང་བྱུང་རྣམས། །བུམ་སྒྲུབ་ལ་སོགས་བསྙེན་སྒྲུབ་འབད། །ཞག་བདུན་ལ་སོགས་སྔགས་རྒྱུན་བྱ། །ཆུ་འཁོར་རླུང་འཁོར་ཇོ་དར་དང་། །དུང་འཁོར་ལ་སོགས་དགེ་བའི་ཚོགས། །ཀུན་ལ་འབྲེལ་བ་འཇོག་པ་ཡིན། །རྒྱལ་པོ་ལྟ་བུའི་འགྲོ་དོན་འདི། །གུ་རུའི་ཐུགས་སྒྲུབ་གཞུང་ནས་གསུངས། །དེ་རྣམས་རླབས་ཆེན་འགྲོ་དོན་ཏེ། །སརྦ་དེ་ནི་བཞི་པའོ།། ༈ །།གསོན་དང་བརྩོན་འགྲུས་རྒྱ་མཚོ་བ། །རླབས་ཆེན་འགྲོ་དོན་མ་བྱུང་ཡང་། །བསྐྱེད་རྫོགས་ཉམས་ལེན་ཡོད་པའི་མིས། །གྲོང་ཆོག་བྱས་ཀྱང་འགྲོ་དོན་དང་། །རྟོགས་པའི་བོགས་འདོན་གཉིས་ཀ་འོང་། །རྒྱུད་སྡེ་རྣམས་ནས་གསུངས་པ་ཡི། །སྤྱོད་པའི་རྣམ་གྲངས་མང་པོ་ཡང་། །ཞོར་ལ་ཤུགས་ཀྱིས་འགྲུབ་པ་ཡིན། །བོགས་འདོན་གཅོད་ཀྱི་ཁྲིད་ཅེས་པ། །རི་གཉན་མཚོ་གཉན་
ལ་སོགས་པའི། །གཉན་ཐོག་ཞོར་ལ་གཅོད་པས་ཆོག །སྙིགས་དུས་རྒྱུན་དུ་ཆར་ཆུ་དཀོན། །ལྗང་བུ་སྐམ་ཞིང་མི་རྣམས་སྐྲག །བླ་མ་ཀུན་ཀྱང་ཆར་འབོད་འཚེར། །ནམ་མཁའ་བེང་ལྟར་དྭངས། །ཐན་པ་དུས་མཐའི་མེ་བཞིན་འབར། །མི་ཀུན་སྡུག་ཅིང་གནམ་ལ་བལྟ། །གནས་ཆེན་པ་ཀུན་ཁོག་རྒོད་འཆོར། །དབུལ་པོ་རྣམས་ནི་སྙིང་རྩ་འདར། །སྤྲང་པོ་རྣམས་ཀྱང་ཡི་མུག་སྐྱེ། །འཆི་ནད་མུ་གེ་ཡིན་ནོ་བསམ། །འབུ་སྲིན་རྣམས་ཀྱིས་ཚ་དམྱལ་མྱོང་། །བསམ་ཡོད་ཀུན་གྱིས་སྨེ་སྔགས་འདོན། །དེ་དུས་གདམས་ངག་ཟབ་པ་ཡི། །གཞན་དང་མི་འདྲ་ཁྱད་ཆོས་གཅིག །རྟགས་ཐོན་བསམ་པ་དྲན་མི་རུང་། །འགྲོ་བ་འདི་དག་སྙིང་རྗེ་བས། །འབུ་སྲིན་རྣམས་ལ་སྐྱབས་ཀྱི་སྦྱིན། །འགྲོ་བ་སྤྱི་ལ་བྱམས་པའི་སྦྱིན། །དབུལ་ཕོངས་རྣམས་ལ་ཟང་ཟིང་སྦྱིན། །ཀླུ་དང་ལྷ་འདྲེར་ཆོས་ཀྱི་སྦྱིན། །ཆར་པ་ལེགས་པོ་གཅིག་ཁུག་ན། །སྦྱིན་པ་རྣམ་བཞི་དུས་གཅིག་ཚང་། །ཀླུ་ཡི་དུག་ལྔ་ལྷ་འདྲེའི་ཟེར། །རང་ཉིད་ཤི་ཡང་ཆོས་ཕྱིར་ཡིན། །ནམ་ཡང་ལུས་འདི་སྐྱུར་དགོས་ན། །ཆོས་ཕྱིར་ཤི་ན་དོན་དང་ལྡན། །དེ་
ལྟར་བློ་ཐག་བཅད་ལ་འགྲོ། །ཡི་དྭགས་ལྷ་འདྲེ་ཕྲན་བུ་དང་། །ཆུ་མིག་ཙག་རྩིག་ནུས་པ་མེད། །ནུས་མེད་ལྷ་འདྲེ་བརྡུང་ན་བྲོས། །ཆུ་མིག་ཕལ་ཆེར་ཐན་པས་སྐམ། །རི་གཉན་ཆུ་མིག་མང་བའམ། །མཚོ་གཉན་ཀླུ་བདུད་གནས་སར་འགྲོ། །སྔགས་ལུགས་ཆར་འབོད་བྱེད་ན་ཡང་། །ཐུན་མཚམས་གཅོད་དམིགས་ལུས་སྦྱིན་གཏོང་། །སྤྲིན་ཚོགས་ཡོད་པ་འཇའ་བཞིན་ཡལ། །ཉི་མ་སྔར་ལས་ཚ་བ་འདྲ། །དངོས་ཉམས་རྨི་ལམ་ཆོ་འཕྲུལ་ཆེ། །འོང་དྲན་བསམ་པའི་འགྱོད་པ་འཆོར། །དེ་ཚེ་དེ་ཡི་ངོ་བོར་བལྟ། །བོགས་འདོན་མགོ་བོ་དེ་ནས་བཙུགས། །ཤིང་གཉན་བཅད་དང་བྲག་གཉན་བཤིག །མཚོ་དཀྲུག་ཆུ་མིག་རྨོག་ལ་སོགས། །རླབ་གཏོང་ལ་སོགས་རྩིང་སྤྱོད་དང་། །དམིགས་པས་དྲག་ཏུ་གཟིར་བའི་ཚེ། །སྤྲིན་ནག་གཡག་ཁྱུ་འགྲོགས་པ་འདྲ། །ས་འབྲུག་ལྡིར་ཞིང་ས་གཞི་ཁོལ། །རྐང་པ་འཕོང་རྣམས་སྦྱིད་ཆིལ་ཆིལ། །འབྲུག་སྒྲས་ཀླད་པ་འགེམས་པ་འདྲ། །གློག་ཞགས་སིལ་སྒྲ་རྭ་གཞོབ་འཚུབས། །སྐག་ཅིང་སྙིང་འདར་བ་སྤུ་གཟིངས། །འབྲོས་ས་མེད་དེ་གནམ་གྱི་ཞབས། །སྟེང་ནས་ཐོག་མདའ་འོང་ལ་ཁད། །འོག་
ནས་འཁྱུག་ཀྱང་འོང་ལ་ཉེ། །ཆར་པ་མི་ཁུག་ཕ་རོལ་ནས། །ཡུལ་ཁམས་སེར་བས་འཇོམས་ལ་ཁད། །དེ་དུས་མ་སྐྲག་མ་འབྲོས་ལ། །བསྐྱེད་རྫོགས་ཟུང་འཇུག་ཉམས་ལེན་སྐྱོང་། །དེ་དུས་ཟིན་ན་བར་དོར་ཟིན། །བར་དོ་ཆུང་ཆུང་དེ་ན་ཡོད། །བོགས་གཅིག་ཐོན་ན་དེ་དུས་ཐོན། །ཉམས་ལེན་སྟེང་དུ་འདུག་ནུས་ན། །དངོས་ཉམས་རྨི་ལམ་ཡད་ཡུད་སྐབས། །ལྷ་འདྲེས་ཕྱག་འཚལ་དངོས་གྲུབ་སྟེར། །ཐོག་དང་སེར་བ་འཇའ་ལྟར་ཡལ། །ཆར་པས་འགྲོ་བ་ཐམས་ཅད་ཚིམ། །ཚར་སློང་གཉིས་ཀ་དུས་གཅིག་རྫོགས། །མི་རྣམས་དགའ་ཞིང་ལེགས་སོ་བརྗོད། །དཀར་གསུམ་ཁྱེར་བའི་བཀུར་སྟི་མང་། །རང་ཡང་ཡིད་དགའ་ང་རྒྱལ་སྐྱེ། །བྱིན་རླབས་ནུས་པ་ང་ཆེ་སྙམ། །ཆར་འབོད་གཞན་ཚོས་མ་ཁུག་པས། །རང་གིས་ཁུག་པའི་ཟུར་ཟ་སྨྲ། །དགའ་བྲོད་བདུད་པོ་དེ་རུ་སླེབས། །དེ་དུས་དགའ་བའི་ངོ་བོ་ལྟ། །རང་གིས་ཡིན་སྙམ་ང་རྒྱལ་སྤངས། །ང་ཡི་བྱིན་རླབས་མ་ཡིན་ཏེ། །དགེ་འདུན་མང་དྲིན་ཡིན་ཞེས་བརྗོད། །བསྔོ་བ་སྨོན་ལམ་རྒྱ་ཡིས་གདབ། །གཞི་བདག་ལྷ་འདྲེ་ཐམས་ཅད་ལ། །མཁོན་
སེམས་དོགས་པ་མི་བཟུང་བར། །ཡོན་བདག་འདྲིས་ཆེན་ལྟ་བུར་བསམ། །གལ་ཏེ་འགྲོ་བའི་བསོད་ནམས་སམ། །བསྐལ་པའི་ཁུག་ཟུར་ལོ་ཉེས་འདོད། །གནས་དེའི་ས་བདག་ཀླུ་གཉན་ལ། །ནད་ཀྱིས་ཟིན་ནམ་ཆར་པ་མེད། །རང་གིས་ཆར་པ་མ་ཁུག་ཅིང་། །ཆར་གཡོག་གྲྭ་ཁལ་ལ་སོགས་ལ། །ནད་ཀྱིས་ཐེབ་བམ་གོད་ཚོགས་འབྱུང་། །དངོས་ཉམས་རྨི་ལམ་ལྟས་ངན་མང་། །ཡིད་ཕམ་སྐྲག་འཇིགས་སྐྱེས་པ་དང་། །ངོ་ཚ་སྙམ་པའི་ངོ་གནོང་ཆེ། །ལྷ་ལ་ཕམ་ལྟུང་བྱུང་བ་འདྲ། །སེམས་སྡུག་ངོ་ཚའི་ངོ་བོར་ལྟ་།ལྷ་དང་གདམས་ངག་ལོག་ལྟ་སྤང་། །སི་ཏུ་ཆོས་ཀྱི་རྒྱལ་མཚན་སོགས། །སྐྱེས་ཆེན་དམ་པ་མང་པོས་ཀྱང་། །ས་ཚིག་ཆེན་པོ་བྱུང་བའི་དུས། །ཆར་མ་ཁུག་པའི་ལོ་ཡོ་རྒྱུས་བསམ། །གནས་གཅིག་ཡུན་རིང་མི་སྡོད་པར། །རི་གཉན་མཚོ་གཉན་ཆུ་མིག་སོགས། །མང་པོ་འགྲིམ་ཞིང་ལུས་སྦྱིན་དང་། །བྱམས་དང་སྙིང་རྗེ་སྟོང་ཉིད་བསྒོམ། །སྔགས་ལུགས་ཆར་འབོད་གང་བདེ་རྣམས། །སྐབས་སུ་གང་བབས་བྱ་བ་དང་། །དོན་ལ་བབས་རུང་མ་བབས་རུང་། །བོགས་འདོན་གཉན་ཁྲོད་འགྲིམ་པ་ཡིན། །ཆར་པ་
བབས་ལ་དགའ་བ་དང་། །མ་བབས་སྡུག་པའི་རོ་སྙོམས་བྱ། །གཉན་ཐོག་རི་འགྲིམ་དེ་གས་འཐུས། །རི་འགྲིམ་སརྒ་ལྔ་པའོ།། ༈ །།ཡང་གཅིག་གསོན་དང་བརྩོན་འགྲུས་པ། །བོགས་འདོན་ནཱ་རོ་གསང་སྤྱོད་ལུགས། །དུར་ཁྲོད་གྲོང་མཐའ་ལ་སོགས་པ། །མཚན་མོ་འགྲོ་བ་སྐུར་འདེབས་རྒྱུ། །དེ་འདྲ་བྱུང་བ་མཐོང་ཐོས་མང་། །དུར་ཁྲོད་ཞོར་ལ་གཅོད་པས་ཆོག །བཙན་ཐབས་ཤི་དང་གྲི་ཁར་ཤི །གཉའ་བ་བཅིངས་སོགས་གཞོན་ཤིའི་རོ། །ཟ་འདྲེ་རྒོད་པས་འཇིགས་སྐྲག་ཆེ། །མི་གཞོན་རྣམས་ཀྱང་སྐྱིད་རྩ་འདར། །བུད་མེད་རྣམས་དང་བྱིས་པ་ཚོ། །མུན་འགོ་རུབ་ནས་ཆབ་གསིལ་དཀའ། །གྲོང་ཆོག་བླ་མ་དེ་འདྲར་ཕྱིན། །སྦྲ་དང་ཁྱིམ་ནི་ཤིན་ཏུ་དོག །རོ་དང་བླ་མ་མཉམ་དུ་བསྒྲིག །ཉེ་དྲག་ཤི་ཤིག་རྣམས་ཀྱང་འགོས། །མཛེ་ནད་བྱུང་ལྟར་སོར་མོ་འཛད། །དབྱར་ཁ་ཡིན་ན་རུལ་དྲི་འཚུབ། །རླུང་ཁ་གྱུ་དུས་སྐྱུགས་ལ་ཁད།། རོ་ལ་གྲིབ་གཞི་བསྣན་པའམ། །སྦྱོང་མ་འགྲིམ་པའི་སྨན་ནད་ཀྱིས། །རོ་འཕགས་སྐྱངས་ཏེ་གཡག་རོ་ཙམ། །ཁ་ནས་གྲེ་སོགས་བཅའ་འདྲ་བའི། །སྒྲ་སྐད་དང་བཅས་ཁྲག་
རྒྱུན་འབབ། །ནུབ་མོ་ཉལ་ཁའི་དུས་ཙམ་ནས། །མི་ཀུན་ཐབས་ཀྱིས་ཕྱིར་ལ་བྱེར། །རོ་དང་བླ་མ་མཉམ་དུ་ལུས། །མར་མེ་ལ་ཡང་གྲིབ་ཕོག་ནས། །ཚག་ཚག་ཟེར་ཞིང་ཇེ་ཇེ་ནག །བསྐལ་པ་ཡར་དར་མ་གཏོགས་པ། །རོ་ལངས་དངོས་ནི་མི་འབྱུང་ཡང་། །མིག་གིས་ལྟ་དང་བཤུད་པ་བྱེད། །གཞོགས་བརྗེ་ཚིག་ངན་བརྗོད་པ་སོགས། །དུས་ཕྱིས་དེ་འདྲ་མཐོང་ཐོས་མང་། །རོ་ཡིས་དེ་ལྟར་མ་བྱས་ཀྱང་། །སྐག་དྲག་རྣམ་རྟོག་དགྲར་ལངས་པས། །ལྟ་སྣང་འགུལ་ཡོལ་བྱེད་སྣང་དང་། །སྦྱོང་མ་འགྲིམ་པའི་སྨན་གྱི་མཐུས། །ཁ་ནས་ཧ་རྩི་བྱེད་འདྲ་འབྱུང་། །འབྲོས་ན་ངོ་ཚ་བྲོས་ཐབས་མེད། །བསྡད་ན་གཉིད་མེད་ནམ་མི་ཆོད། །ས་སྟོང་དུར་རྙིང་མང་པོ་བས། །འཇིགས་པའི་དུར་ཁྲོད་དེ་ན་ཡོད། །དེ་དུས་སྐྲག་སྣང་བཙོག་སྣང་སྒྱུར། །བདག་གི་ལུས་ཀྱང་འདི་དང་འདྲ། །སྙམ་དུ་མི་རྟག་འཆི་བ་བསྒོམ། །འདི་ལ་སྐྲག་དང་བཙོག་པ་དང་། །རང་གི་ལུས་ལའང་སྐྲག་ཅིང་བཙོག །མི་རོ་རང་རོ་གཅིག་ཏུ་བསྲེ། །ཚེ་འདས་དེ་ཡི་རྣམ་ཤེས་ཀྱང་། །རང་གི་སེམས་དང་དབྱེར་མེད་བསྲེས། །ཉམས་ལེན་ཕྱག་རྒྱ་ཆེན་པོ་ལ། །ས་ལེ་སེང་ངེ་
མཉམ་པར་བཞག །ད་རུང་སྐག་སྣང་བཙོག་སྣང་སྐྱེ། །དེ་ཡི་ངོ་བོར་གཏེར་གྱིས་བལྟས། །ཕྱག་རྒྱ་ཆེན་པོ་ཝལ་གྱིས་འཆར། །འཇིགས་སྐྲག་བཙོག་སྣང་་འཇའ་ལྟར་ཡལ། །བག་ཕེབས་གྲོ་ལྷུབ་གཉིད་དུ་འགྲོ། །གསང་སྤྱོད་དུར་འགྲིམ་དེ་ཀས་འཐུས། །གསང་སྤྱོད་དུར་གཅོད་བོགས་འདོན་གྱི། །གླུ་ཡི་སརྒ་དྲུག་པའོ།། །།ཡང་གཅིག་གསོན་དང་བརྩོན་འགྲུས་པ། །རྟོགས་པའི་བོགས་འདོན་བྱེད་པའི་ཚེ། །སྟན་ཐོག་ལོ་གཅིག་བསྒོམ་པ་ལས། །ལྷ་འདྲེ་དྲག་པོ་གནས་པ་ཡི། །གཉན་སར་ཞག་གཅིག་བོགས་ཆེ་གསུངས། །གཉན་ས་ཆེད་དུ་ཚོལ་མི་དགོས། །བསོད་ནམས་ཆུང་ངམ་ཕོག་ཐུག་ཤོར། །བན་བོན་ནུས་ཅན་འགྲས་པའམ། །རི་དྭགས་བསད་དམ་ཤིང་གཉན་གཅད། །དེ་འདྲའི་ཕོག་ཐུག་ཤོར་བའམ། །ཚེ་སྔོན་བསོད་ནམས་མ་བསག་པའི། །རྒྱལ་འགོང་དམ་སྲི་གཟའི་ཀླུ་སོགས། །སྡེ་བརྒྱད་དྲེགས་པ་དགྲ་རུ་ལངས། །ཤི་སྒྱུ་འཕྲོ་མི་ཆད་ཤི་ཆད་མང་། །ན་འཕྲོ་མི་ཆད་ནད་པ་མང་། །ལྟས་ངན་ཆོ་འཕྲུལ་རྒྱུན་མི་ཆད། །བསོད་ཆུང་འགྲིམ་པ་ཕྱིན་ན་ཡང་། །དེ་ལ་ནད་ཀག་རྐྱེན་ཁ་ལངས། །ཁྱིམ་
དེར་འདྲེ་ཡི་ཚང་བཅས་ནས། །འགྲིམ་པ་ཕྱིན་ཀྱང་གཉིད་མི་ཟིན། །ནད་བུ་ཅན་ཕྱིན་དབང་པོ་འཆོར། །ཆང་བཟི་ཕྱིན་ན་སྨྱོ་རྒོད་འབྱུང་། །དེ་འདྲའི་གདོན་ཅན་ཁྱིམ་དེ་རུ། །གྲོང་ཆོག་བླ་མ་གདན་འདྲེན་འབྱུང་། །མདོས་ཟློག་བསྐང་གསོལ་གཅོད་ཚོགས་སོགས། །བར་ཆད་རྐྱེན་སེལ་བླ་མར་རེ། །གདོན་བྱིང་ཆེ་ཞིང་ཚ་ངད་ལྡན། །གཟི་བརྗིད་ཆོ་འཕྲུལ་འཇིགས་སྐྲག་སྐྱེ། །བ་སྤུ་གྱེན་ལང་ཚ་འུབ་བེ། །དགྱེ་དགྱེ་མི་ཕོད་རྒུ་སྙིང་འདོད། །ལྟག་པའི་བདུད་སྒོའི་ཕྱོགས་ནས་སྐྱག །སྡིག་ཅན་མི་ངན་འདི་ཚང་ན། །མི་འོང་ཀ་མེད་ནན་གྱིས་བོས། །མི་ངན་གར་འདུག་དུ་བའི་ལམ། །ང་ཡང་བསོད་ཆུང་འདི་ན་ཕྱིན། །ཕན་ཐོགས་མ་བྱུང་ངོ་ཡང་ཚ། །དྲག་ལས་དམིགས་པས་གཟིར་དྲག་ན། །རང་གི་སྲོག་ལ་ཡ་ང་ཟ། །གཉན་ས་ཆུང་ཆུང་དེ་ན་ཡོད། །དེ་དུས་འགྱོད་པ་མི་སྐྱེད་ལ། །རྟོགས་པའི་བོགས་འདོན་དྲན་པར་བྱ། །གདོན་དང་ཡོན་བདག་གཉིས་ཀ་ལ། །བྱམས་དང་སྙིང་རྗེས་གཏོང་ལེན་བསྒོམ། །འཇིགས་སྐྲག་རྣམ་རྟོག་གང་སྐྱེས་ཀྱང་། །ངོ་བོ་བལྟས་ལ་མཉམ་པར་བཞག་།འདྲེར་འཛིན་རྣམ་རྟོག་དེ་ཆོད་ན། །
བོགས་འདོན་མཆོག་ཏུ་དེ་འགྱུར་རོ། །གདོན་ཞི་ནད་ཕན་ལྷ་ངོ་འབྱུང་། །དེ་ཚེ་གདོན་དེས་ཡོན་བདག་གི །སེམས་བསྒུལ་རང་ལ་ལེ་ལན་གྱི། །ལེགས་སོ་བཀུར་སྟི་མི་བྱེད་པར། །ཅུང་ཟད་མི་དགའི་ཚུལ་ཞིག་སྟོན། །ཁྱོད་ཀྱི་བཀའ་དྲིན་མ་ཡིན་ཏེ། །ག་ཤད་གཞན་ནས་སུ་ཞིག་གིས། །ཅི་ཞིག་བྱས་པས་ཕན་སྐད་སྨྲ། །དེ་ཚེ་སེམས་ལ་ཞེ་སྡང་སྐྱེས། །འདྲེ་ཡི་ཁ་ནས་དངོས་སུ་བླངས། །ཡོན་དང་འབུལ་བ་མི་གཟབ་སྟེང་། །ཁ་བཟང་ཙམ་ཡང་མི་བྱེད་པར། །ད་ཕྱིན་ཁོ་ལ་དགོས་བྱུང་ན། །ཕན་ཐོགས་བྱེད་རེའི་རྟོག་པ་འཆང་། །བྱང་ཆུབ་སེམས་བསྐྱེད་དེ་རུ་ཤོར། །དེ་ཚེ་སློངས་སུ་ངོས་བཟུང་སྟེ། །ཀྱེ་མ་ཁོ་ལ་རང་དབང་མེད། །དམ་སྲི་རྒྱལ་འགོང་སེམས་ངན་པས། །ཡོན་བདག་སེམས་རྒྱུད་བསྐུལ་ནས་ཀྱང་། །བདག་ལ་ཞེ་ལན་ལེན་པ་ཡིན། །གདོན་དང་ཡོན་བདག་གཉིས་ཀ་ནི། །ཚེ་རབས་མང་པོའི་ཕ་མ་ཡིན། །བཟང་ལན་འདོད་པའི་ཕན་བཏགས་ནི། །ཐ་མལ་སྐྱེ་བོའི་བྱ་བ་ཡིན། །ལན་དང་རེ་བ་མི་འདོད་པའི། །ཕན་གདགས་བྱང་ཆུབ་སེམས་དཔའི་སྲོལ། །གདོན་དང་ཡོན་བདག་ཐོགས་
དྲངས་པའི། །ཁམས་གསུམ་སེམས་ཅན་མ་ལུས་པ། །སངས་རྒྱས་ས་ལ་སྐྱེལ་བར་ཤོག །བསམ་པར་བྱས་ལ་གཏོང་ལེན་བསྒོམ། །དེ་ཡིས་གདོན་འདིའི་བསམ་ངན་ཞི། །ཡོན་བདག་དེ་ཡང་ཇེ་གུས་འགྱུར། །གཉན་ཐོག་ཞོར་ལ་གཅོད་པ་ཡི། །གླུ་ཡི་སརྒ་བདུན་པའོ།། ༈ །།གསོན་དང་ཀརྨ་བརྩོན་འགྲུས་པ། །ནཱ་རོ་པཎ་ཆེན་ཐུགས་ཀྱི་བཅུད། །སྤྱོད་པ་རོ་སྙོམས་སྐོར་དྲུག་སྟེ། །རྟོགས་པས་རོ་ནི་སྙོམས་ནུས་ན། །རོ་སྙོམས་ཞོར་ལ་འོང་ཞིང་གདའ། །དམའ་ན་མི་དགའ་མཐོ་ན་དགའ། །འཇིག་རྟེན་ཆོས་བརྒྱད་རྣམ་གཉིས་ཏེ། །གདན་དང་ཁྲི་ལ་མི་དུམ་རྩོད། །རྒྱལ་བ་རིགས་ལྔར་ཁྲི་རྐང་ལྔ། །དུག་ལྔ་རྣམ་པར་དག་རྟགས་ལགས། །རྒྱ་གར་རྡོ་རྗེ་གདན་དྲུང་དུ། །རྒྱལ་བུ་དོན་གྲུབ་སངས་རྒྱས་ཚེ། །སངས་རྒྱས་སྟོང་དང་རྩ་གཉིས་ཀྱི། །གདན་ཁྲི་ས་ལ་རང་བྱུང་སྐྱེས། །འཁོར་འཇིག་གསེར་ཐུབ་འོད་སྲུང་གི །ཁྲི་ལ་ཕྱག་དང་བསྐོར་བ་མཛད། །ཤཱཀ་ཐུབ་ཁྲི་ལ་བཞུགས་མ་ཐག །ཁྲི་གཞན་ནུབ་སྟེ་མི་སྣང་གྱུར། །བསྐལ་པ་གྲངས་མེད་གསུམ་གྱི་བར། །ཚོགས་བསགས་སྒྲིབ་སྦྱངས་མཛད་པ་ཡི། །བསོད་ནམས་ལས་
གྲུབ་གདན་ཁྲི་ལགས། །ཤཱཀ་ཐུབ་མྱ་ངན་འདས་རྗེས་སུ། །དགྲ་བཅོམ་ལྔ་བརྒྱའི་སྣམ་སྦྱར་བརྩེགས། །དེ་སྟེང་ཉན་ཐོས་འོད་སྲུང་དང་། །ཉེ་བར་འཁོར་དང་ཀུན་དགའ་བོ། །རིམ་བཞིན་བཞུགས་ནས་སྡེ་སྣོད་གསུམ། །ཐུགས་ནས་ཚར་རེ་གསུངས་ཚར་ནས། །ཁྲི་ལ་མ་བཞུགས་ས་ལ་བབས། །མི་བརྗེད་གཟུངས་ཐོབ་གདན་ཁྲི་ལགས་། །དེ་ཚོ་ཕྱག་འཚལ་མཆོད་པའི་ཞིང་། །དེ་མིན་ལུང་དང་ལས་ཀ་དང་། །གདན་སའི་ཐོབ་དང་ཁྲི་ལ་སོགས། །འཇིག་རྟེན་ཆོས་བརྒྱད་ཕྱོགས་དང་མཐུན། །ཅི་ཕྱིར་ལས་ཀ་ཁྲི་ལ་སོགས། །ཕུགས་ནི་རྒྱ་ནག་རྒྱལ་པོ་ཡིན། །འཛམ་གླིང་ཕྱེད་ལ་དབང་བསྒྱུར་ནས། །ལྕགས་ཀྱི་འཁོར་ལོས་བསྒྱུར་རྒྱལ་ནི། །རྒྱ་ནག་རྒྱལ་པོ་ཡིན་པར་འདོད། །ཁོང་གིས་བླ་མར་བསྐོས་པ་ན། །ཀུན་གྱིས་བླ་མར་བཀུར་དགོས་པའི། །རྟགས་ལ་ཐིལ་དམར་གདན་དམར་དང་། །ཁྲི་དང་རྒྱ་གླིང་རྒྱ་དར་སོགས། །རྒྱ་འཇང་སྒྱུ་རྒྱལ་པོའི་ལག་རྟགས་ཡིན། །འཇིག་རྟེན་ངོས་ནས་ཁུར་དགོས་ཀྱི། །ཆོས་ནས་བརྩིས་ན་ལྷག་རྒྱུ་མེད། །མར་མི་དྭགས་པོ་དུས་མཁྱེན་དང་། །སྐྱོབ་པ་ཐང་པ་སོགས་ལའང་། །
ངོ་བོ་སངས་རྒྱས་ཡིད་མོད་ཀྱི། །ལས་ཀ་ཐེའུ་དམར་གདན་ཁྲི་མེད། །འགྲོ་མགོན་ཆོས་རྒྱལ་འཕགས་པ་ཡི། །ལས་ཀའི་འཐོབ་ཆ་གདན་ཡིག་ལ། །ཀརྨ་པཀྴིར་ཀར་རྩག་དང་། །ཀོམ་སྟན་ཞིག་ལས་མེད་དོ་སྐད། །འོན་ཀྱང་རྫུ་འཕྲུལ་མངོན་ཤེས་རྣམས། །ཀརྨ་པཀྴི་མ་དོ་བས། །རྒྱ་ནག་རྒྱལ་པོའི་ཞལ་ནས་ཀྱང་། །བླ་མ་བླ་མ་སྟེ། བླ་མཚན་རྒྱ་འབིར་བ་དེ། གསུངས་པའི་ཁ་དཔེ་ཀུན་ལ་འཇག །འགྲོ་མགོན་ཕག་མོ་གྲུ་པ་ཡི། །སློབ་མ་དབུ་ལ་གདུགས་བསྐོར་བ། །ལྔ་སྟོང་བརྒྱད་བརྒྱ་འཚོགས་པ་ལའང་། །དབང་ལུང་གདམས་ངག་གནང་བའི་ཚེ། །ཀོམ་སྟན་གཅིག་ལས་གདན་མེད་སྐད། །དེ་ཕྱིར་རང་ལ་ཉམས་རྟོགས་དང་། །ཡོན་ཏན་ལེགས་པོ་ཡོད་པ་ན། །གདན་ཁྲི་དམའ་ཡང་སྐྱོན་མེད་དོ། །མཚུར་ཕུ་འཇམ་དབྱངས་ཆེན་པོ་དེ། །གདུང་རུས་ཆེ་ཞིང་ཡོན་ཏན་མཁས། །དེ་ཕྱིར་རྒྱ་ནག་རྒྱལ་པོ་ཡིས། །གསེར་ཁྲི་རྒྱབ་ཡོལ་བཅས་པ་བསྐུར། །མཁས་ཤིང་ང་རྒྱལ་ཆེན་པོ་ཡིས། །ཞྭ་དམར་པ་ལ་ཟུར་ཟ་ཆེ། །མཚུར་ཕུའི་དགེ་འདུན་སྟོང་ཕྲག་གི །ཁང་ཚན་མགོ་ཡང་མ་ནོན་པས། །གཟའ་བསྒྲུབས་
གཏད་མནན་མཚུར་ཕུ་ཉམས། །ཁོང་རང་ཆོས་ཀྱི་བརྒྱུད་པ་ཆད། །བཀྲ་ཤིས་དཔལ་འབྱོར་ཞེས་བྱ་བ། །ཞྭ་དམར་བཞི་པའི་ཆིབས་ཁ་ཁྲིད། །དཀོར་ལ་འཛེམ་ནས་ཕོག་མ་གསོལ། །ཇ་ལོ་གསོལ་བས་སྔོན་པོར་སོང་། །མིང་ཡང་གཉན་ལ་སྔོ་འཁྱོག་ཟེར། །གདན་ཁྲི་མེད་པའི་བྱ་བྲལ་དེ། །མི་བསྐྱོད་རྡོ་རྗེའི་རིགས་བདག་གྱུར་། །ཀཾ་ཚང་བསྟན་པ་གནས་ཀྱི་བར། །ཁོང་གི་བརྒྱུད་པ་མ་ཆད་དོ། །དེ་དག་རྣམས་ལ་དཔྱད་པ་ན། །གདན་ཁྲི་རྩོད་པ་འཁྲུལ་པ་རང་། །གྲལ་གྱི་མཐོ་དམན་དེ་དང་འདྲ། །རས་ཆུང་རྡོ་རྗེ་གྲགས་པ་ཡང་། །ཞལ་སྐྱེམས་མང་ཇ་ཨེ་རག་གིས། །བཀའ་གདམས་པ་ཡི་གྲལ་མཇུག་བསྡད། །ན་བཟའ་ངུར་སྨྲིག་མེད་པ་དེས། །ར་དཀར་ལུག་གི་གྲལ་མི་ཚུད། །ཟེར་ནས་ཕྱག་ནས་བཟུང་སྟེ་ཕུད། །འབྱོན་ལོང་མ་བྱུང་སྒོ་འདན་པས། །ཞབས་ཡ་སྒོ་ཡི་བར་དུ་བཅིར། །ཟུག་གཟེར་ཆེ་བས་མགུར་དབྱངས་འཐེན། །ཉྩ། ཆོས་རྗེ་བྱ་ཡུལ་པ་ཡིས་གསན། །དད་པའི་དབང་གིས་སྤྱན་ཆབ་ཤོར། །ལྐོག་ཏུ་རྩ་བའི་བླ་མར་བསྟེན། །དེས་ན་དོན་ལ་ཁྲི་དང་ནི། །གྲལ་གྱི་མཐོ་དམན་ཁྱད་པར་མེད། །
སྔར་དུས་རྒྱལ་བ་ཡབ་སྲས་རྣམས། །ཇོ་བོ་མཇལ་དུ་བརྫུས་ཏེ་ཕེབས། །དྲུང་འཁོར་རྣམས་ཀྱི་གྲལ་མཇུག་ཏུ། །ཡབ་སྲས་བཞུགས་ཀྱང་སུས་མ་ཤེས། །བུད་མེད་ཌཱཀིའི་རིགས་ཅན་གྱིས། །ཤེས་ནས་སྔོན་དུ་ཇ་དྲངས་སྐད། །ཡབ་སྲས་མཇུག་ཏུ་བཞུགས་པ་དེས། །ཆུང་དུ་སོང་སྐད་མི་འདུག་གོ །འདུལ་བའི་ལུགས་ལ་བསླབ་གྲལ་ཏེ། །སྡོམ་པ་ཞུས་རིམ་སྔ་རིམ་མཐོ། །འོན་ཀྱང་ངེས་པ་མེད་པ་སྟེ། །བསླབ་པ་རྒན་དང་ཡེ་ཤེས་རྒན། །བསླབ་པ་ཞུ་ནི་གང་སྔ་སྟེ། །རྟོགས་པ་ཡོན་ཏན་མེད་པ་ན། །ལོ་བརྒྱ་ལོན་ཡང་བྱིས་པ་ཉིད། །ཡོན་ཏན་ཆེའམ་རྟོགས་པ་མཐོ། །དེ་ནི་ཡེ་ཤེས་རྒན་པ་སྟེ། །སྡོམ་པ་ཞུ་ནི་ཕྱི་ན་ཡང་། །དེ་ཉིད་གོང་དུ་བཞག་པར་གསུངས། །འོན་ཀྱང་གྲལ་རིམ་མ་བསྒྲིགས་པར། །མགྱོགས་གྲལ་བྱས་པས་དགེ་འདུན་སྡེ། །ཚོགས་པ་ཆེ་བའི་རྟེན་འབྲེལ་ཡོད། །དེ་ཕྱིར་ངམ་རིང་ལ་སོགས་པའི། །དགོན་ཆེན་ཕལ་ཆེར་མགྱོགས་གྲལ་ཡིན་། །གཙང་གི་ས་སྐྱའི་དགོན་ཆེན་ན། །གྲལ་ལ་རྩོད་པ་ཆེ་བའི་ཕྱིར། །མཁས་པ་གཙང་ནག་རས་པ་དེ། །གྲལ་གྱི་མཇུག་ལས་མ་ཚུད་པས། །གཙང་ནག་རས་པས་
ནངས་སྔ་དུས། །ནམ་ལངས་མ་ལངས་ཚོགས་འཚོགས་སྐབས། །བོང་བུ་ཞིག་ལ་ཤམ་ཐབས་དང་། །ཆོས་གོས་རྣམ་པ་གསུམ་བཀལ་ནས། །གྲལ་གྱི་སྟོད་ལ་ཁྲིད་དོ་སྐད། །ནམ་ལངས་ཅི་ཡིན་སྨྲས་པ་ན། །འདི་ནི་སྐད་བཟང་ན་བཟའ་བཟང་། །གྲལ་མགོ་འདི་ལ་འཇོག་འོས་གསུངས། །འཇམ་དབྱངས་སྤྲུལ་པ་གཙང་ནག་པའི། །གསུངས་དེ་གོ་རྒྱུ་ཆེན་པོ་གདའ། །གོ་རྒྱུ་དེ་ཉིད་ཅི་ཡིན་ན། །ཡོན་ཏན་ལྡན་ནམ་རྟོགས་པ་མཐོ། །གྲལ་མཇུག་བསྡད་ཀྱང་གྲལ་མགོ་ཡིན། །ལུང་དང་རྟོགས་པའི་ཡོན་ཏན་མེད། །ཚུལ་ཁྲིམས་རྣམ་པར་མ་དག་ན། །གྲལ་མགོར་བསྡད་ཀྱང་གྲལ་མཇུག་ཏུ། །སངས་རྒྱས་བྱང་སེམས་ཡི་དམ་ལྷ། །མཁའ་འགྲོ་ཆོས་སྐྱོང་གཞི་བདག་སོགས་། །མངོན་ཤེས་ལྡན་པ་ཀུན་གྱིས་མཐོང་། །ལུང་རྟོགས་ཡོན་ཏན་ལྡན་པ་དང་། །ཚུལ་ཁྲིམས་རྣམ་པར་དག་པ་ཡི། །གོང་དུ་འདུག་པ་ཉེས་པ་ཆེ། །མཁས་པའི་གོང་ལྕི་ཅེས་གསུངས་སོ། །ཕྱག་ཀྱང་དེ་དང་འདྲ་བ་སྟེ། །ལུང་རྟོགས་ཡོན་ཏན་ལྡན་པའི་ཕྱག །རང་ལས་ཐེག་པ་མཐོ་གྱུར་ན། །རིང་གི་བསོད་ནམས་ཟད་འགྱུར་ཞིང་། །སྲུང་
སྐྱོབ་འཇིག་རྟེན་ལྷ་ཀུན་འབྲོས། །ལྷ་དབྱེ་འབྱུང་སྟེ་མཐུ་བས་ཐུ། །ཁྲི་དང་གྲལ་གྱི་མཐོ་དམན་གྱི། །གླུ་ཡི་སརྒ་བརྒྱད་པའོ།། ༈ །།གསོན་དང་བརྩོན་འགྲུས་རྒྱ་མཚོ་བ། །འདྲ་འདྲའི་བླ་མ་མང་འཚོགས་ཚེ། །འཇིག་རྟེན་ཆོས་བརྒྱད་མཐོ་དམན་གཉིས། །རོ་སྙོམས་ཉམས་ལེན་དེ་ན་ཡོད། །མཐོ་བར་འདོད་པའི་བླ་མ་ཀུན། །གུས་ཞབས་བཅས་ཏེ་ཡར་ལ་བཞག །རང་ཉིད་དམའ་བའི་སྡུག་སྣང་གིས། །རྣམ་རྟོག་དེ་ལ་ཧྲིག་གེར་ལྟ། །གཞི་མེད་ཉམས་ལེན་ཀློང་དུ་བསྐྱུར། །མཐོ་འདོད་ཁོང་རྣམས་དགའ་བ་དང་། །དགེ་འདུན་བཀུར་བའི་བསོད་ནམས་འཐོབ། །དེ་ཚེ་དོན་ལ་ང་བཟང་སྟེ། །རྒྱལ་ཁ་ཁོང་ལ་འབུལ་ལོ་བསམ། །ཞེ་ནས་བརྙས་པའི་རྣམ་རྟོག་འབྱུང་། །དེ་ཕྱིར་རོ་སྙོམས་ལམ་མི་འགྲོ། །ཁོང་རྣམས་ལུང་དང་རྟོགས་པ་ཡི། །ཡོན་ཏན་དངོས་སུ་མི་སྣང་བ། །ང་རང་བསམ་པ་མ་དག་ཅིང་། །མངོན་ཤེས་སྤྱན་དང་མི་ལྡན་པས། །གང་ཟག་ཚོད་འཛིན་ག་ལ་ནུས། །ཆོས་རྒྱལ་སྲོང་བཙན་སྒམ་པོ་ཡིས། །ཁྲ་འབྲུག་མཆོད་རྟེན་རྩ་བ་རུ། །དགེ་སློང་ཆོས་གོས་རུལ་བ་ཅན། །ཤིག་མང་ཤིག་རྣམས་སྤར་བས་
ཆུ། །མེ་ཡི་ནང་དུ་འདེབས་པ་གཟིགས། །ཁྱེད་ཉིད་དགེ་སློང་ཆོས་གོས་ཅན། །ཤིག་རྣམས་སྲེག་པ་མི་ལེགས་གསུངས། །དགེ་སློང་སྡིགས་མཛུབ་རྩེ་མོ་རུ། །ཁྲ་འབྲུག་མཆོད་རྟེན་བཞག་ནས་བསྐོར། །རྒྱལ་པོ་ཞལ་སྐྱེངས་ལ་ཐོད་ཕུད། །འོད་དཔག་མེད་ཀྱི་དབུ་བསྟན་པས། །དགེ་སློང་གྲི་གུ་བཏོན་ནས་ཀྱང་། །དགེ་སློང་ཉིད་ཀྱི་བྲང་གཤགས་ནས། །དགྱེས་རྡོར་སྤྲུལ་པའི་ལྷ་དགུ་བསྟན། །རྒྱལ་པོས་རྟག་ཏུ་བླ་མཆོད་བྱས། །དེ་བཞིན་བླ་མ་འདི་རྣམས་ལ། །ཕལ་ཆེར་སོ་སྐྱེ་ཡིན་ངེས་མེད། །བྱང་ཆུབ་སེམས་དཔའ་རྐུན་མ་གཉིས། །གར་ཡོད་མི་ཤེས་ཟེར་བའི་དཔེ། །ཕལ་ཆེར་བྱང་ཆུབ་སེམས་དཔའ་ཉིད། །སྔོན་དུས་བསྐལ་པ་བཟང་བའི་དུས། །དགྲ་བཅོམ་ནམ་མཁར་འཕུར་བ་བས། །དེང་སང་ཆོས་གོས་གྱོན་ཙམ་ཡང་། །ཕན་ཡོན་ཆེ་བར་གསུངས་པ་དང་། །སྔོན་དུས་གྲུབ་རྟགས་ཐོགས་མེད་ལས། །དེང་སང་སེམས་ངོ་སྐྱོང་ཤེས་ཙམ། །ཕན་ཡོན་ཆེ་བར་གསུངས་པ་རྣམས། །ཡིད་ལ་བསམ་ཞིང་དག་སྣང་སྦྱངས། །བདག་ཉིད་ཀུན་ལས་དམན་པར་བལྟ། །དེ་དོན་གླང་རི་ཐང་པ་ཡིས། །གང་དུ་སུ་
དང་འགྲོགས་པའི་ཚེ། །བདག་ཉིད་ཀུན་ལས་དམན་ལྟ་ཞིང་། །གཞན་ལ་བསམ་པ་ཐག་པ་ནས། །མཆོག་ཏུ་གུས་པར་འཛིན་པར་ཤོག །གསུངས་པའི་ཉམས་ལེན་དེ་ལགས་སོ། །མཐོ་དང་དམའ་བའི་རྣམ་རྟོག་གཉིས། །རོ་སྙོམས་ལམ་དུ་ཁྱེར་བ་ཡི། །གླུ་ཡི་སརྒ་དགུ་པའོ།། ༈ །།ཡང་གཅིག་གསོན་དང་བརྩོན་འགྲུས་པ། །རྟོགས་པར་ལྡན་པའི་རྟོགས་ལྡན་གྱིས། །སྒེ་བ་ཀ་བླ་རྐང་དུང་ཁྱེར། །འགྲང་ལྟོགས་དྲོ་འཁྱགས་རོ་སྙོམས་ཕྱིར། །རྒྱལ་ཁམས་ཕྱོགས་མེད་བསྐོར་བ་ནི། །ན་མེད་རླུང་ཁྱེར་ཆོས་པར་བརྩི། །འདུལ་ཁྲིམས་ཞུས་པའི་བཙུན་པ་ཡང་། །དབུས་གཙང་དྭགས་ཀོང་འཁྱམས་པ་ན། །བཏུང་བ་ཆང་ལས་གཞན་མ་མཆིས། །ཆང་ཚུག་མང་བས་ཆང་གིས་བཟི། །སྡེ་དགོན་གྲོང་ནག་སྲང་མདོར་ཉལ། །སྡེ་ཡི་ཆོས་ལད་དམིགས་ལྟོས་ངན། །ཆོས་རྣམས་ཀུན་གྱི་རྩ་བ་སྟེ། །བོད་ཀྱི་སྡོམ་གཅིག་འཆོར་ཉན་གདའ། །དེ་འདྲ་བྱུང་བ་མཐོང་ཐོས་མང་། །ཉམས་ལེན་རྟོགས་པ་ཡོད་པ་ན། །རྙེད་ན་དགའ་དང་མ་རྙེད་སྡུག །འཇིག་རྟེན་ཆོས་བརྒྱད་རྣམ་གཉིས་ཡིན། །མཚམས་དང་སྒྲུབ་པའི་མཐུན་རྐྱེན་རྒྱགས། །
དབྱར་སྟོན་ལྡོམ་བུ་བྱེད་པའི་ཚེ། །རྙེད་དང་མ་རྙེད་རོ་སྙོམས་ན། །སྤྱོད་པ་མཆོག་ཏུ་གྱུར་པ་ཡིན། །མིང་ཡང་རོ་སྙོམས་ལྡོམ་བུ་ཟེར། །ཆེད་དུ་ཁྱི་འགྲམ་གཅོག་མི་དགོས། །འདྲིས་ཆེ་ལྷ་དྲིན་ཡོད་པ་ཡི། །ཡོན་བདག་ཞིག་ལ་གཏད་ནས་འགྲོ། །གདུལ་བྱ་ལོངས་སྤྱོད་འོང་སྙམ་ཙ། །བུ་ཆུང་ཐལ་མདོག་སྒོ་ནས་བྱུང་། །དེ་རིང་ཨ་ཕ་ག་ཤེད་སོང་། །ཨ་མས་ཇ་མེད་ཅི་བྱེད་ཟེར། །གྲོང་པ་རྣམས་ཀྱང་མུ་གེ་ཆེ། །གཙང་ལངས་དགོས་སམ་མ་དགོས་ཙམ། །གྲྭ་པ་རྣམས་ཀྱང་ངོ་འཛུམ་ནག་།ཡོན་ཀླུ་བདག་དེ་ལ་གནད་ཚིག་བརྗོད། །བླ་མ་གུང་ཚིགས་མ་ཐེབས་ནས། །དཔོན་སློབ་ཐམས་ཅད་ལྟོགས་ཡུས་ལུགས། །དཔོན་སློབ་ཀུན་གྱི་ངོ་དང་སེམས། །ཆ་ལུགས་མཐུན་པར་ནག་ཐུག་གེ །དེ་དུས་བོགས་འདོན་དུས་གཅིག་ཡིན། །མ་རྙེད་སྙམ་པའི་ཡི་མུག་དེ། །འཇིག་རྟེན་ཆོས་བརྒྱད་སྣ་གཅིག་ཡིན། །དེ་ཡི་ངོ་བོ་ཧྲིག་གེར་བལྟ། །ལྟ་བའི་ངང་ལ་ཕྱམ་མེར་བཞག །བཅོམ་ལྡན་ཤཱཀྱ་ཐུབ་པ་ཡིས། །དཀོར་གྱི་ཉེས་པ་གསུངས་པའི་ཚེ། །དགེ་སློང་མང་པོས་སྡོམ་པ་ཕུལ། །དེ་ལ་སྟོན་པས་ཡི་རངས་མཛད། །དེ་
ཕྱིར་གདུལ་བྱ་མ་རྙེད་པར། །དཀོར་སྒྲིབ་ཆུང་བའི་དགའ་བ་བསྒོམ། །ཡོན་བདག་དེ་དང་རུ་བ་དེར། །མི་དགའི་བསམ་པ་རྩད་ནས་སྤང་། །བྱམས་དང་སྙིང་རྗེས་གཏོང་ལེན་བསྒོམ། །དེ་ནས་ཡང་ཅིག་བྱོན་པ་དང་། །རྒྱུས་མེད་ངོ་ཤེས་མེད་པ་ཡི། །གྲོང་ངམ་རུ་པར་འགྲོ་བསམ་པས། །གྲྭ་པ་དམུས་ནས་མི་འགྲོ་ཟེར། །མི་ལ་རས་པའི་གསུངས་བཞིན་དུ། །ཆེ་བའི་སྦྲ་ལ་མ་རྔམ་པར། །ཆུང་བའི་སྦྲའུ་མི་སྐྱུར་དཔེ། །ལམ་ཞོར་རེད་པས་འགྲོ་གསུངས་འབྱོན། །རྒྱུས་མེད་མི་ཚང་བྲེལ་ཚུབ་བེ། །གདན་བཏིང་དུ་བ་ནག་ཕྱུར་རེ། །བྱིན་རླབས་ཞུ་དང་བཀའ་བསྒོ་ཞུ། །དབང་བསྐུར་ཞུ་དང་ཞལ་ཕུ་ཞུ། །བྱང་བུ་ཞུ་དང་བསྔོ་བ་ཞུ། །རུ་བའི་ལྡོམ་བུ་ཆི་ལེར་འདུས། །བཟའ་བཏུང་འཚོ་བས་མདུན་རྣམས་བཀང་། །རྒྱུས་མེད་འདྲིས་མེད་འོས་མེད་པར། །འདི་ཚང་བཀུར་སྟེ་འདི་ཙམ་གཟབ། །ཅི་ཡིན་བསམ་ཞིང་དཔོན་སློབ་ཀུན། །ཐུགས་དགོངས་དགྱེས་ཤིང་ཞལ་རས་འཛུམ། །ཇ་སྙིགས་ཕོས་པ་ཐམས་ཅད་ཀྱང་། །མིག་ལ་བྱུགས་དང་རྐེ་ལ་བྱུགས། །དད་པ་ཆེ་འོས་མེད་པར་ཆེ། །དེ་ཚེ་རྙེད་པ་རྙེད་པ་ཡི། །དགའ་ཚོར་སེམས་དཔང་
མཐོ་བ་དེ། །འཇིག་རྟེན་ཆོས་བརྒྱད་སྣ་གཅིག་ལགས། །དགའ་བའི་བསམ་པ་གཞི་མེད་དུ། །ལྟ་བའི་ཀློང་དུ་ཡལ་བཅུག་སྟེ། །རྙེད་དང་མ་རྙེད་བསམ་པ་གཉིས། །ཁྱད་མེད་ངེས་པར་རོ་སྙོམས་ན། །རོ་སྙོམས་ཆུང་ཆུང་དེ་ན་ཡོད། །བོགས་གཅིག་ཐོན་ན་དེ་དུས་ཐོན། །རྙེད་དང་མ་རྙེད་རོ་སྙོམས་ཀྱི། །གླུ་ཡི་སརྒ་བཅུ་པའོ།། ༈ །།གསོན་དང་བརྩོན་འགྲུས་རྒྱ་མཚོ་བ། །དཀར་ལྡོམ་ཐག་རིང་བགྲོད་པའི་ཚེ། །ལ་མཐུར་ཆེ་བས་བླ་རྐང་ལོག །ཚུགས་ཐག་རིང་བས་ལྟོ་བ་བཀྲེས། །ཆར་དྲག་སེར་བས་ནག་ནུ་རེ། །ཇག་རྐུན་ཁྱི་སྨྱོན་སྤྱང་ཀིར་སྐྱག །མི་རྙེད་སྡུག་དང་མི་ཁྱག་སྡུག །མགོ་ཐོན་དཀའ་བའི་སྡུག་དང་གསུམ། །སྡུག་བསྔལ་འཇིག་རྟེན་ཁྱིམ་ཐབས་སྤངས། །ང་ལ་སྡུག་བསྔལ་འོང་དོན་མེད། །ངེད་རང་དཔོན་སློབ་འདི་རྣམས་ཀྱིས། །ཁ་རྒྱབ་ཙམ་ཞིག་མ་གཏོགས་པ། །མི་སོས་རྒྱུ་ཡང་གཞན་མེད་པར། །འདི་འདྲའི་སྡུག་བསྔལ་ཅི་ཡིན་ཨང་། །ཚེ་སྤང་དུས་འཁྱམས་ངོ་ཡང་ཚ། །ཡོན་བདག་རྣམས་ཀྱང་ཨེ་མི་སུན། །ཆོས་སྒོར་ཞུགས་པ་བཟང་ལགས་ཏེ། །མི་ཚེར་སྤྲང་དགོས་སྡུག་པོར་གདའ། །སྤྲང་
མི་དགོས་པའི་ལོངས་སྤྱོད་ཅིག །ཡོད་ན་ཅི་མ་རུང་སྙམ་ནས། །ཕྱུག་པོའི་མི་ལ་ཡིད་སྨོན་འཆོར། །དབུལ་པོས་བཙལ་བས་མི་རྙེད་སྡུག །ཕྱུག་པོས་འཚོ་སྐྱོང་མི་ཐུབ་སྡུག །དེ་གཉིས་མི་རྣམས་ཀུན་ལ་ཡོད། །ཆོས་སྒོར་ཞུགས་པས་ལན་པ་མིན། །མི་ལུས་བླངས་པས་ལན་པ་ཡིན། །རྣམ་རྟོག་དེ་ཡི་ངོ་བོར་བལྟ། །དཀའ་ལས་ཆེ་བའི་སྡུག་བསྔལ་དང་། །ངོ་བོ་བསྲེས་པས་བོགས་གཅིག་འབྱུང་། །རྟོགས་ལྡན་རྒྱལ་ཁམས་བསྐོར་བ་རྣམས། །དཀའ་ལས་དེ་ཉིད་ཚོལ་ཕྱིར་བྱོན། །དཀའ་ལས་ཚོལ་དུ་མ་སོང་ཡང་། །ཤུགས་ཀྱིས་འབྱུང་ལ་བསྲེ་ཐུབ་བྱ། །ཆགས་ཞེན་མེད་པའི་ལྡོམ་བུ་ནི། །ཐུབ་པས་གནང་བའི་ཕ་འབབ་ལགས། །དེ་ལ་དཀོར་སྒྲིབ་ཡོད་པ་མིན། །ཡང་གཅིག་བྱོན་པའི་ལམ་ཀ་ནས། །འབྱོར་ལྡན་རུ་ཆེན་མང་པོའི་གསེབ། །ཤ་ཐུད་མར་སོགས་ཁུར་ཞིང་སྤྱང་། །རི་དང་ས་ཕྱོགས་ཐམས་ཅད་ཀུན། །རྟ་ལུག་ནོར་གྱིས་ཁྲ་ལྟེམ་མེ། །ཉི་མ་དྲོ་ཞིང་འཇའ་སྤྲིན་འཁྲིགས། །སྤང་ལྗོངས་གཡུ་ཡི་ཁ་དོག་ལ། །མེ་ཏོག་སྣ་ཚོགས་ཚལ་ཆེན་རྒྱས། །བུང་བ་ཁུ་བྱུག་གསུང་སྙན་སྒྲོག །འབབ་ཆུ་ཏུང་ཏུང་སྙན་པའི་སྒྲ། །སེམས་
ཀྱང་དགའ་སྤྲོ་སྣང་བ་སྐྱིད། །སྤང་ལྗོངས་དེ་རུ་འདུག་སྙིང་སྤྲོ། །གསོལ་འདེབས་མགུར་དབྱངས་བྱེད་སྙིང་འདོད། །དེ་ཚེ་མེ་ཏོག་ཐམས་ཅད་ནི། །ཡིད་ཀྱིས་ཡི་དམ་ལྷ་ལ་འབུལ། །དེ་མིན་མེ་ཏོག་སྔོན་པོ་ལ། །འགོང་ན་གསང་བདག་དམ་ཚིག་ཉམས། །མེ་ཏོག་ཚལ་གྱི་དཀྱིལ་དེ་རུ། །གདིང་བ་གཏིང་ཞིང་ལུས་གནད་བསྲང་། །སྣང་བ་དགའ་དང་ཡལ་ལེ་བའི། །རྣམ་རྟོག་དེ་ལ་ཧྲིག་གེར་བལྟ། །དགའ་དང་ཡི་མུག་བསམ་པ་གཉིས། །ལྟ་བའི་ངང་དུ་རོ་སྙོམས་ན། །རོ་སྙོམས་ཆུང་ཆུང་དེ་ན་ཡོད། །བོགས་འདོན་ཆུང་ཆུང་དེ་ཡིས་འོང་། །དེ་བཞིན་ལུས་བདེ་སེམས་སྡུག་མེད། །ཉི་མ་དྲོ་ཞིང་བཟའ་བཏུང་འཛོམས། །ཆོས་ཀྱི་གནད་འགག་ང་རང་ཤེས། །སུ་ལ་ཞུ་དགོས་འདྲི་དགོས་མེད། །ཤི་ཡང་ངན་སོང་འགྲོ་དོགས་མེད། །མི་ཚེ་ཆོས་ལ་བསྐྱལ་བ་ཡིན། །བསམ་པས་ཡིད་དགའ་བློ་བདེ་དང་། །ན་ཚ་སྡུག་བསྔལ་དུ་མས་མནར། །ང་ལ་འདི་འདྲ་ཅི་ལ་འོང་། །བློ་ཕུགས་དཀོན་མཆོག་གསུམ་ལ་གཏད། །སྐུ་རིམ་རྐྱེན་ཟློག་གསོལ་མཆོད་གཟབ། །བདུད་དང་དམ་སྲིའི་བར་ཆད་དམ། །ཕ་རོལ་གཏད་མནན་ངན་
སྔགས་སམ། །སྔོན་གྱི་ལས་ངན་སྨིན་པའམ། །སྣང་སྲིད་ལྷ་འདྲེའི་གཡོས་ཆེན་འདི། །ཅིས་དྲག་ཅིས་ཕན་བློ་སྣ་མང་། །དེ་ལྟར་སྐྱིད་སྡུག་བསམ་པ་གཉིས། །ལྟ་བའི་ངང་དུ་རོ་མཉམ་ན། །པཎ་ཆེན་ཤཱཀྱ་ཤྲཱིའི་ལུགས། །སྐྱིད་སྡུག་ལམ་ཁྱེར་གདམས་པ་ཡིན། །སྐྱིད་སྡུག་ལམ་དུ་ཁྱེར་བ་ཡི། །གླུ་ཡི་སརྒ་བཅུ་གཅིག་གོ། ༈ །།ཡང་གཅིག་གསོན་དང་བརྩོན་འགྲུས་པ། །སྙན་གྲགས་དགའ་དང་མི་སྙན་སྡུག །འཇིག་རྟེན་ཆོས་བརྒྱད་སྣ་གཉིས་ཡིན། །རང་ལ་ལུང་དང་རྟོགས་པ་ཡི། །བསྟོད་འོས་ཡོན་ཏན་མི་ཆེ་ཡང་། །ཡོན་བདག་ལ་སོགས་བླུན་དད་ཅན། །མང་པོས་དུས་གསུམ་སངས་རྒྱས་ཟེར། །ལ་ལས་གྲུབ་ཐོབ་ཡིན་ནོ་ཟེར། །རང་ཉིད་ནམ་འཆི་མི་ཤེས་ཀྱང་། །གཞན་གྱིས་་མངོན་ཤེས་ཡོད་ཟེར་བསྟོད། །གོས་དུམ་སྐྲ་སེན་ཆབ་བསིལ་ཡང་། །དད་ཅན་མང་པོས་འཁྱེར་དང་བཏུང་། །སྡེ་དཔོན་ཤོག་དཔོན་ཡུལ་དཔོན་དང་། །སྐུ་སྐྱེ་དགེ་བཤེས་དཔོན་རིགས་སོགས། །འཐོབ་ཐང་ཆེ་ཞིང་ང་རྒྱལ་ཅན། །མང་པོས་ཕྱག་འཚོལ་དབང་ཆོས་ཞུ། །རྒྱུས་མེད་ཕྱོགས་ཕྱོགས་སྡེ་རྣམས་ཀྱང་། །གཞན་ཟེར་ཅལ་སྒྲོག་རྗེས་རྒྱུག་
གི །དེ་བ་བཟང་པོ་རེད་ཅེས་གླེང་། །དེ་ཚེ་རང་མཐོང་ང་རྒྱལ་སྐྱེ། །ཀུན་གྱིས་བཀུར་སྟི་ཆེ་བ་དེས། །རང་ཡང་བཟང་པོ་ཡིན་སྙམ་བྱེད། །སྙན་གྲགས་ལྷ་ཡི་བུ་ཡི་བདུད། །ང་རྒྱལ་སྐྱེས་ན་ཐར་ལམ་བཀག །སྙན་གྲགས་བྲག་ཆ་འདྲ་བ་དེ། །གྲག་སྟོང་ལྟ་བའི་ཀློང་དུ་བསྒྱུར། །མཐོན་པོའི་ཁྲི་ལ་འདུག་པ་དང་། །མི་ཆེན་བླ་ཆེན་ཕྱག་འཚལ་ཚེ། །ཆོས་དང་དབང་གི་ཆེ་བ་ཡིན། །བདག་ནི་མཐོན་པོའི་ཁྲིར་འདུག་དང་། །གཞན་གྱིས་ཕྱག་འཚལ་ག་ལ་འོས། །དབང་ལུང་ལ་སོགས་བྱེད་པ་ཡང་། །ཆོས་ནི་མཎྜལ་ཚུལ་དུ་འབུལ། །བླ་འདོད་བླ་མ་ཡིན་སྙམ་སྤང་། །སྙན་གྲགས་ལམ་དུ་ཁྱེར་བ་ཡིན། །དེ་བཞིན་རང་ལ་ཉེས་མེད་པར། །དོན་མེད་གཤེ་སྐུར་འདེབས་པ་དང་། །རྫུན་མ་ཟོག་པོ་ཡིན་ཟེར་དང་། །སུ་ཞིག་བུ་དང་མ་དེའི་བུ། །ཟེར་ཞིང་རུས་ཀྱི་མཚང་ནས་བརྗོད། །ཕོ་མགོ་བསྐོར་ཞིང་མོ་མགོ་གཡོག །སོ་ཞོ་མིག་ཚིལ་ཡན་ཆད་ཀྱི། །སྡེ་ཡི་བཅུད་ཚོ་འདིས་བསྡུས་ཟེར། །རང་ནོར་ཕྲོག་པ་ཙམ་དུ་འབར། །དབང་ལུང་གདམས་ངག་སྤེལ་བ་ན། །ཁོ་ལ་ཕུགས་མེད་རྫུན་ཡིན་ཟེར། །གདམས་ངག་ཟིན་བྲིས་
ཟབ་བསྟན་ན། །རང་བཟོ་རྫུན་གྱིས་མགོ་བསྐོར་ཟེར། །ནད་ཞི་གདོན་ཞི་ཕན་ཐོགས་ན། །འདྲེ་ཡི་ཟ་ཁ་ཕྱེས་སོ་ཟེར། །ལེགས་ཉེས་གང་སྨྲས་ཐོགས་བབས་ན། །ཐེའུ་རང་ལྟག་རྗེས་ཡིན་ནོ་ཟེར། །ཆོས་ར་འགྲོ་དོན་ཆེ་བ་ན། །དབང་སྡུད་ངན་སྔགས་ཡོད་དོ་ཟེར། །དེ་སོགས་མི་སྙན་སྒྲ་ཐོས་ཚེ། །ཉེས་མེད་པ་ལ་ཅི་ཕྱིར་འབར། །རྫུན་ནི་ང་ཡིས་སྨྲ་མ་མྱོང་། །གནོད་པའི་བྱ་བ་ངས་མ་བྱས། །དད་ལྡན་གདུལ་བྱ་བྱུང་བ་ལ། །ཁོང་རྣམས་སེར་སྣ་ཆེ་དོན་ཅི། །སྙམ་དུ་སེམས་རྩུབ་མི་དགའ་ཚེ། །ངོ་བོ་བལྟས་ལ་ཀློད་ཉལ་བཏང་། །བྱམས་དང་སྙིང་རྗེ་གཏོང་ལེན་བསྒོམ། །རང་གིས་ཉེས་པ་བྱས་པ་ན། །རང་གི་མ་ཕེར་སྡུག་པ་ཡིན། །རང་གིས་ཉེས་པ་མ་བྱས་པར། །འབར་ཤ་གཏམ་ངན་མང་པོ་དེ། །སྡིག་སྒྲིབ་ཕྱགས་མས་འདེབས་པ་ཡིན། །ང་ཡི་སྡིག་སྒྲིབ་སྦྱོང་རོགས་དེ། །དོན་མེད་ཁོང་ཚོས་བྱེད་པ་ལ། །མི་དགའ་ཅི་ཡོད་འོར་ཆེ་བསྒོམ། །དེ་ལྟར་སྙན་དང་མི་སྙན་གཉིས། །རྟོགས་པའི་ངང་དུ་རོ་སྙོམས་ན། །རོ་སྙོམས་ཆེན་པོ་དེ་ན་ཡོད། །བོགས་འདོན་དེ་ཡིས་ཆེན་པོ་འོང་། །སྙན་དང་མི་སྙན་འཇིག་རྟེན་ཆོས། །
རོ་སྙོམས་གླུ་ཡི་སརྒ་སྟེ། །ལེའུ་བཅུ་གཉིས་པ་ཡིན་ནོ།། ༈ །།གསོན་དང་ཀརྨ་བརྩོན་འགྲུས་པ། རང་འདོད་ཁོག་ཏུ་བཅུག་པ་ཡིས། །དོན་མཐུན་འགྲོ་དོན་འོང་བ་མེད། །སྙིང་ནས་རང་འདོད་མེད་པ་ཡིས། །འགྲོ་རྣམས་སངས་རྒྱས་སར་འགོད་པའི། །སེམས་བསྐྱེད་བཟང་པོའི་རྩིས་ཟིན་ན། །གསེར་འགྱུར་རྩི་ཡིས་ཟིན་པ་ཡི། །ལྕགས་རྣམས་གསེར་དུ་འགྱུར་བ་བཞིན། །ཅི་བྱས་བྱང་ཆུབ་ལམ་དུ་འགྲོ། །མི་དགེ་ཕལ་ཆེར་དགེ་བར་འགྱུར། །ལོ་ཏོག་ཤིན་ཏུ་ལེགས་པ་ན། །སོག་ཕུབ་ཞོར་ལ་འབྱུང་བ་ལྟར། །རང་དོན་མ་བསམ་ལྷུན་གྲུབ་ཡིན། །ཐུབ་པས་རྟག་ཏུ་གཞན་དོན་མཛད། །རང་དོན་མངོན་པར་སངས་རྒྱས་ཐོབ། །ཐ་མལ་སྐྱེ་བོས་རང་དོན་བསྒྲུབས། །རང་དོན་མ་གྲུབ་ངན་སོང་ལྟུང་། །འདི་ཉིད་ཁྱད་པར་ལྟོས་ཤིག་ཅེས། །རྒྱལ་སྲས་ཞི་བ་ལྷ་ཡིས་གསུངས། །འདི་འདྲའི་སེམས་བསྐྱེད་མ་ཤེས་ན། །གསང་སྔགས་བླ་མེད་ཉམས་བླངས་ཀྱང་། །བྱང་ཆུབ་ལམ་དུ་འགྲོ་བར་དཀའ། །འདི་དོན་དྭགས་པོ་ལྷ་རྗེ་ཡིས། །ཆོས་ནི་ཆོས་སུ་འགྲོ་བའི་ཐབས། །གདམས་ངག་ཟབ་པར་གསུངས་པ་ཡིན། །
འགྲོ་དོན་རྩ་བ་སེམས་བསྐྱེད་ཀྱི། །གླུ་ཡི་སརྒ་བཅུ་གསུམ་པ། །གླུ་ཆུང་སརྒ་བཅུ་གསུམ་འདི། །བརྩོན་འགྲུས་རྒྱ་མཚོས་བསྐུལ་བྱས་ནས། །ཤིང་སྦྲུལ་མགོ་ཟླའི་དམར་པོའི་ཕྱོགས་། །དྲུག་བདུན་བརྒྱད་ཀྱི་དགོང་ཐུན་མཚམས། །རང་གི་མྱོང་བ་དང་བསྟུན་ནས། །རཱ་ག་ཨ་སྱས་སྨྲས་པ་དེ། །བླ་མ་བཱིརྨ་སཱ་ག་རིས། །སོར་མོ་གློག་གི་རྟ་ལ་ཞོན་། །མགོ་རྒྱལ་ཟླ་བའི་ཚ་ངར་ལ། །བཟོད་པ་ཆེན་པོའི་གོ་ཆ་བགོས། །ཕྱི་རབས་གཞན་ལ་ཕན་པའི་ཕྱིར། །མྱུར་མགྱོགས་བརྩོན་པའི་ཅང་ཤེས་བཅིབས། །དུང་མདོག་ཤོག་བུའི་ངོས་ཉིད་ལ། །བཻཌཱུར་མདོག་འདྲ་སྣག་ཚས་བྲིས། །བདག་འདྲའི་བྱ་བྲལ་ཉམ་ཆུང་འགའ། །སྤྱོད་པ་ལམ་དུ་བསླངས་ནས་ཀྱང་། །དངོས་མཚན་ཆེན་པོ་མེད་པའི་ངོས། །ས་ལམ་རིམ་པ་མང་བགྲོད་ནས། །རྫོགས་སངས་ས་ལ་འགོད་པར་ཤོག །ལེའུ་བཞི་བཅུ་པའོ་མངྒ་ལཾ།། །།