ལེའུ་ཞེ་གཅིག་པ། ཆོས་པ་རབ་འབྲིང་ཐ་མ་ཡང་ཐ་རྣམས། །འཆི་ལུགས་དཔག་བསམ་ཤིང་གི་འབྲས་བུ་ཡོད། །
༼དི༽ རི་ཆོས་མཚམས་ཀྱི་ཞལ་གདམས་ལས། ཆོས་བྱེད་པའི་གང་ཟག་རྣམས་འཆི་ལུགས་རབ་འབྲིང་ཐ་མ་ཡང་མཐའ་རྣམས་གསལ་བ་དཔག་བསམ་ཤིང་གི་འབྲས་བུ་ཞེས་བྱ་བ་བཞུགས་སོ། །ན་མོ་གུ་རུ་
བཛྲ་དྷ་ར་ཡེ། གསར་རྙིང་མདོ་རྒྱུད་མན་ངག་དུ་མ་ནས། །འབྲས་བུ་ཐོབ་པའི་ཚུལ་དང་ཤི་བའི་ཚུལ། །རྒྱ་ཆེར་བཤད་ཀྱང་གོ་བདེར་འདིར་བརྗོད་པ། །ཉམས་མྱོང་མེད་ཀྱང་གསར་རྙིང་རྒྱུད་སྡེའི་དོན། །ཐོས་པའི་ཤེས་རབ་ལ་བརྟེན་འདིར་བརྗོད་བྱ། །འཆི་བ་མེད་དང་འདའ་ཚུལ་འཆི་བ་གསུམ། །འཆི་མེད་འཇའ་ལུས་རྡོ་རྗེའི་སྐུ་འགྲུབ་པ། །གུ་རུ་པདྨ་འབྱུང་གནས་ལྟ་བུ་ལ། །ནམ་མཁའ་ཇི་སྲིད་འཆི་བ་མེད་པར་གསུངས། །ཕྱག་རྫོགས་ཟུང་འཇུག་བར་བསྐལ་རེ་རེ་ཙམ། །འཆི་བ་མེད་དེ་འཇའ་ལུས་འགྲུབ་པ་ནི། །འཕོ་བ་ཆེན་པོའི་སྐུ་ནི་འགྲུབ་པ་ཞེས། །པཎ་ཆེན་བི་མ་མི་ཏྲ་ལྟ་བུ་སྟེ། །དེ་ཡང་མཐར་ནི་མི་སྣང་འོད་དུ་ཡལ། །ཡི་དམ་ལྷ་ཡི་བྱིན་གྱིས་བརླབས་གྱུར་པས། །ལོ་ནི་སྟོང་ཕྲག་དུ་མར་འཆི་མེད་པ། །དཔེར་ན་གྲུབ་ཆེན་མི་ཏྲ་ཛཱ་ཀི་བཞིན། །དེ་ནི་ཚེ་ལ་དབང་བའི་རིག་འཛིན་ཡིན། །མཐར་ནི་ཕུང་པོ་མི་བཞག་མྱ་ངན་འདས། །ཟག་བཅས་ལུས་འདི་ཟག་མེད་ལུས་སུ་གྱུར། །ལོ་ནི་སྟོང་ཕྲག་ཁྲི་ཕྲག་ཙམ་གྱི་བར། །དཔའ་བོ་མཁའ་འགྲོའི་ཚོགས་དཔོན་མཛད་ན་ཡང་། །གང་ཟག་ཕལ་གྱིས་དེ་ཡི་སྐུ་མི་
མཐོང་། །དཔེར་ན་ས་ར་ཧ་དང་ཏེ་ལོ་བཞིན། །དེ་ནི་མཁའ་སྤྱོད་གཤེགས་ཞེས་མིང་འདོགས་ཏེ། །མཁའ་སྤྱོད་ཆུང་ངུ་མཁའ་འགྲོའི་ཚོགས་གྲལ་ཡིན། །འགའ་ཞིག་ཡི་དམ་དངོས་སུ་འགྲུབ་འགྱུར་ཏེ། །ངོ་བོ་ཡི་དམ་ལྷ་དང་དབྱེར་མེད་ཅིང་། །རྣམ་པ་གྲུབ་ཆེན་སྐུ་ཡི་ཆ་ལུགས་འཛིན། །འགྲོ་ལ་ཕན་ཕྱིར་མྱ་ངན་མི་འདའ་བཞུགས། །གསོལ་བ་བཏབ་ན་དངོས་གྲུབ་སྦྱིན་མཛད་ཀྱང་། །སྐུ་དེ་ཐ་མལ་པ་ཡིས་མི་མཐོང་སྟེ། །ནམ་མཁའི་དབྱིངས་སུ་རིན་ཆེན་གཞལ་ཡས་སུ། །མཁའ་འགྲོ་རྣམས་ཀྱི་ཚོགས་དཔོན་མཛད་ནས་བཞུགས། །དཔེར་ན་གྲུབ་ཆེན་ཀླུ་ཡི་བྱང་ཆུབ་བཞིན། །དེ་དོན་དུས་ཀྱི་འཁོར་ལོའི་རྒྱུད་འགྲེལ་དང་། །ས་སྐྱ་པཎ་ཆེན་རྣམ་ཐར་ནང་ནས་གསལ། །ཡེ་ཤེས་ལྷ་ཡི་རིག་སྔགས་ནུས་པ་ཡིས། །ཚེ་ལོ་དཔག་མེད་ཐུབ་པར་གསུངས་པ་ལྟར། །རྨ་བྱ་ཆེན་པོའི་རིག་སྔགས་གྲུབ་པའི་མཐུས། །སློབ་དཔོན་ཀླུ་སྒྲུབ་དགུང་ལོ་དྲུག་བརྒྱར་བཞུགས། །དེ་བཞིན་ཨཱརྱ་དེ་ཝས་བཞི་བརྒྱ་དང་། །སློབ་དཔོན་ཐོགས་མེད་ཉིས་བརྒྱ་བཞུགས་ཞེས་གྲགས། །དེ་བཞིན་ཚེ་སྒྲུབ་བྱས་པའི་ནུས་པ་ཡིས། །ཇོ་མོ་མཚོ་རྒྱལ་ཉིས་བརྒྱ་བཞུགས་པ་
དང་། །དམ་པ་རྒྱ་གར་ལྔ་བརྒྱ་བཅོ་ལྔ་བཞུགས། །སངས་རྒྱས་ཡེ་ཤེས་བརྒྱ་དང་ལྔ་བཅུ་བཞུགས། །དེ་དག་མཆོག་གི་ཚེ་ཡི་རིག་འཛིན་ལགས། །ཕྱི་རོལ་མུ་སྟེགས་པ་ཡི་དྲང་སྲོང་ཞིག །དབང་ཕྱུག་སྒྲུབ་པས་ཚེ་ལོ་སྟོང་ཐུབ་རྒྱུ། །དངོས་གྲུབ་འཁོང་པས་ལྔ་བརྒྱ་འགྲིབ་ཅེས་གྲགས། །བྱ་རི་ཀ་པས་དངུལ་ཆུའི་བཅུད་ལེན་གྱིས། །བྱམས་པ་མ་བྱོན་བར་དུ་མི་འཆི་སྐད། །པཎྜི་ཏ་པ་བེ་རོ་ཙ་ན་ཡིས། །དངུལ་ཆུའི་བཅུད་ལེན་ནུས་པས་སུམ་བརྒྱ་ཙམ། །ཐུབ་སྟེང་བོད་ཀྱི་ཡུལ་དུ་འདས་པར་སྣང་། །དེ་དག་ཐུན་མོང་ཚེ་ཡི་རིག་འཛིན་ལགས། །དེ་དག་འཆི་བ་མེད་པའི་ཁོངས་སུ་གཏོགས། །ཚེ་འདི་ཉིད་ལ་སངས་རྒྱས་ས་ཐོབ་ནས། །སྐུ་གདུང་མ་བཞག་ནམ་མཁར་འཇའ་ལྟར་ཡལ། །དགོངས་པ་སངས་རྒྱས་ཀུན་མཉམ་དབྱེར་མེད་པ། །རྒྱ་གར་ཡུལ་དུ་དགའ་རབ་ཤྲཱི་སེང་དང་། །བོད་དུ་ཨ་རོ་་་ཡོན་ཏན་འབྱུང་གནས། ཅོག་རོ་བསྒོམ་ཆུང་བཞིན། །དེ་ལ་ལྷག་མེད་ཀླུ་མངོན་པར་སངས་རྒྱས་ཟེར། །དེ་དོན་རྫོགས་ཆེན་ལོ་རྒྱུས་རྣམས་སུ་གསལ། །མ་དག་འབྱུང་ལྔའི་ཁམས་ལྔ་འོད་དུ་ཞུ། །དག་པ་ཡེ་ཤེས་འོད་ལྔའི་རང་བཞིན་གྱུར། །དེ་ཀུན་
ལྟེ་བའི་ཐད་དུ་ཐིམ་པ་དང་། །ལྟེ་བའི་རྩ་འདབ་ཕག་མོའི་དཀྱིལ་འཁོར་གྱུར། །དེ་ཉིད་དབུས་ཀྱི་ཧྲུའམ་ཐཾ་ལ་ཐིམ། །དེ་ནས་དངོས་མེད་སྟོང་པ་ཉིད་དུ་གྱུར། །ཞིང་ཁམས་གཞན་དུའང་གཤེགས་པ་མ་ཡིན་ཏེ། །ནམ་མཁའ་བཞིན་དུ་གར་བཞུགས་ངེས་པ་མེད། །ལས་ཅན་རྣམས་ལ་ནམ་མཁར་འཇའ་ཤར་བཞིན། །སྐུ་དངོས་སྟོན་ཅིང་དམ་ཆོས་སྟོན་པར་བྱེད། །མ་རྒྱུད་ལུགས་ཀྱི་འཇའ་ལུས་མཁའ་སྤྱོད་ཡིན། །དེ་དོན་མ་གཅིག་ལབ་སྒྲོན་གསུང་ལས་གསལ། །ཡི་དམ་ལྷ་བསྒྲུབ་ཕྱག་རྫོགས་བསྒོམ་པའི་མཐུས། །ཟག་བཅས་ཤ་ཁྲག་རུས་པའི་ཕུང་པོ་འདི། །ཟག་མེད་འཇའ་ལུས་སྒྲིབ་པ་མེད་པར་གྱུར། །ལུས་ཀྱི་རྫུ་འཕྲུལ་ཅི་ཡང་སྟོན་ནུས་ཏེ། །མ་འདས་སྔར་དུས་སྐུ་ལུས་འདྲ་བར་ཡོད། །བདེ་བ་ཅན་སོགས་ཞིང་ཁམས་བྱོན་ནས་བཞུགས། །རས་ཆུང་པ་དང་རྗེ་བཙུན་རྩེ་མོ་དང་། །ངོམ་པ་མཁའ་སྤྱོད་ནམ་མཁའ་རྒྱལ་མཚན་བཞིན། །ཕ་རྒྱུད་ལུགས་ཀྱི་འཇའ་ལུས་མཁའ་སྤྱོད་ལགས། །རྩ་རླུང་སྒྱུ་ལུས་རྟོགས་པ་མཐར་ཕྱིན་ནས། །བརྟུལ་ཞུགས་སྤྱོད་པས་དུར་ཁྲོད་གནས་ཆེན་འགྲིམ། །དེ་ཚེ་དག་སྣང་མཁའ་འགྲོའི་ཚོགས་གྲལ་ཕྱིན། །
ཚོགས་རྫས་བདུད་རྩི་དེ་ཉིད་ཟོས་མ་ཐག །གདོས་བཅས་ཤ་ཁྲག་ལུས་དེ་གནས་འགྱུར་ནས། །དངོས་མེད་འཇའ་ལུས་འཆི་བ་མེད་པར་འགྱུར། །དངོས་སུ་བྱོན་ཀྱང་ཐ་མལ་པས་མི་མཐོང་། །དཔེར་ན་རྒྱ་གར་གྲུབ་ཆེན་ཕལ་ཆེར་དང་། །བོད་དུ་ཐང་སྟོང་རྒྱལ་པོ་ལྟ་བུ་ཡིན། །དེ་དག་འཇའ་ལུས་མཁའ་སྤྱོད་གྲངས་སུ་འགྲོ། །སྤྱོད་པར་གཤེགས་ཞེས་བྱ་བའང་དེ་ལགས་སོ། །དེ་དག་འཆི་བ་མེད་པའི་སྡེ་ཚན་ནོ། །འཆི་བ་མེད་ཀྱང་འཆི་ཚུལ་སྟོན་པ་ནི། །སེམས་ནི་རྫོགས་པའི་སངས་རྒྱས་ཐོབ་ཚར་བས། །རང་གི་སྣང་ངོར་འཆི་བ་མེད་ན་ཡང་། །མ་དག་པ་ཡིས་འདས་ཤིང་གདུང་བཞུས་མཐོང་། །དེ་ཚེ་ཉིད་ནའང་ལས་འཕྲོ་དག་པ་རྣམས། །དངོས་སུ་བྱོན་ནས་ཆོས་བཤད་དབང་བསྐུར་མཐོང་། །ལ་ལས་སེང་གེ་རྟ་མཆོག་སོགས་ཆིབས་ནས། །མཁའ་འགྲོས་གདན་དྲངས་ཞིང་ཁམས་གཤེགས་པར་མཐོང་། །དོན་ལ་འཆི་བ་མེད་ཀྱང་འཆི་ཚུལ་བསྟན། །དག་དང་མ་དག་མཐོང་ཚུལ་སོ་སོར་སྣང་། །དེ་དོན་ནཱ་རོ་མི་ལའི་རྣམ་ཐར་དང་། །གྲུབ་ཆེན་པཀྵིའི་གསུངས་སོགས་རྣམ་ཐར་གསལ། །ཚེ་འདི་ཉིད་ལ་སངས་རྒྱས་ཐོབ་ཚར་
ཏེ། །ཐུགས་ནི་སངས་རྒྱས་ཀུན་དང་དགོངས་པ་མཉམ། །སྒོམ་མེད་ཆེན་པོའི་རྟོགས་པ་མངོན་གྱུར་པ། །དེ་འདྲ་ཐུགས་དམ་བཞུགས་པ་མ་ཡིན་ཏེ། །ཐུགས་དམ་བཟུང་རྒྱུ་སྒྲིབ་པ་སྦྱངས་རྒྱུདང་། །བསྒོམ་བྱ་སྒོམ་བྱེད་སྒོམ་པ་ཅི་ཡང་མེད། །དཔེར་ན་ཡབ་སྲས་ཐུགས་དམ་མི་བཞུགས་བཞིན། །འགྲོ་བའི་དོན་ཕྱིར་སྐུ་གདུང་རིང་བསྲེལ་བཞག། ཕུང་པོ་ལྷག་བཅས་རྫོགས་སངས་རྒྱས་པ་ཟེར། །ཚེ་འདིར་སྒོམ་མེད་ཆེན་པོ་མ་རྟོགས་ཤིང་། །སྒོམ་མེད་འབྲིང་མན་རོ་གཅིག་ཆེན་པོ་ཡན། །རྟོགས་པ་ཉིན་མཚན་འཁོར་ཡུག་ཡོད་པ་དེ། །བཅོ་ལྔ་ནུབ་མོར་མུན་པ་མེད་པ་བཞིན། །དབུགས་ཉིད་མ་སོང་བར་དུ་ཉམས་ལེན་དང་། །དབུགས་ཆད་ནག་ལམ་ཡལ་ནས་འོད་གསལ་ངང་། །ཞག་གསུམ་ཡན་ཆད་ཐུགས་དམ་བཞུགས་པ་དེས། །རྟོགས་པའི་ན་འཕར་སྒོམ་མེད་ཆེན་པོར་ཕྱིན། །འཆི་བ་ཆོས་སྐུར་རྫོགས་སངས་རྒྱས་ཞེས་བྱ། །དེ་ལ་བར་དོ་འཆར་བར་མི་འགྱུར་ཏེ་། །སངས་རྒྱས་ཀུན་དང་དབྱེར་མེད་རོ་གཅིག་འགྱུར། །རྫོགས་ཆེན་སྒོམ་པས་རིག་པ་ཚད་ཕེབས་ནས། །ཉིན་མཚན་མེད་པར་རྟག་ཏུ་འཇའ་འོད་དང་། །ཐིག་ལེ་ལྷ་སྐུ་ཁྲ་
ཆེམ་མཐོང་བའི་མི། །ཕྱི་དབུགས་ཆད་པར་གྱུར་བ་དེ་ཡི་ཚེ། །འོག་མིན་གནས་ནས་རྡོར་སེམས་ཐུགས་ཀ་ནས། །འོད་ཀྱི་མྱུ་གུ་མིག་གི་དཀྱིལ་དུ་ཟུག །དེ་ཡི་རྒྱུད་ལ་རྣམ་ཤེས་ཡར་དྲངས་ནས། །རྡོར་སེམས་ཐུགས་ཀར་ཐིམ་པས་དབྱེར་མེད་འདྲེས། །དེ་ལ་བར་དོ་ཡོད་པ་མ་ཡིན་ཏེ། །རྟགས་མཚན་འཇའ་འོད་དཔག་མེད་འབྱུང་བར་བཤད། །གལ་ཏེ་རྣལ་འབྱོར་རྟོགས་པར་ལྡན་པ་ཡིས། །འཆི་རྟགས་ཚང་ནས་འཕོ་བ་དྲག་ཏུ་སྦྱངས། །བུམ་ཆེན་རླུང་ལ་ནུས་པ་ཐོན་པ་དེས། །ཤི་ནད་མ་ཕོག་གོང་དུ་འཕོ་བྱས་ན། །བདེ་བ་ཅན་སོགས་དག་པའི་ཞིང་དུ་སྐྱེ། །དེ་ལ་བར་དོ་ཡོད་པ་མ་ཡིན་ནོ། །རྟགས་ནི་འཇའ་འོད་སྐུ་གཟུགས་འབྱུང་བར་བཤད། །རོ་གཅིག་འབྲིང་དང་ཆུང་ངུའི་གང་ཟག་རྣམས། །བདུན་གཅིག་བདུན་གཉིས་ཐུགས་དམ་བཞུགས་པ་ལ། །རྟོགས་པ་ན་འཕར་སྒོམ་མེད་ཆུང་འབྲིང་འགྱུར། །བར་དོ་འཆར་ཏེ་ལྷ་སྐུ་མི་འཆར་ཞིང་། །རང་སྒྱུ་ཉིད་གང་འདོད་སྐྱེ་བ་ལེན་པས་ཆོག །སྤྲོས་བྲལ་འབྲིང་དང་ཆུང་ངུའི་གང་ཟག་རྣམས། །ཐུགས་དམ་འདུག་དང་མི་འདུག་རང་དབང་ཆེ། །འོན་ཀྱང་རིག་པ་གསལ་རིག་དྭངས་
འདྲ་བས། །ཐུགས་དམ་འགྲོགས་པར་ཡང་ན་སླ་བ་ཡིན། །དེ་ཡན་ཐུགས་དམ་བསྐུལ་མ་མི་དགོས་ཏེ། །གོམས་ཆ་ཆེ་བས་ཤུགས་ཀྱིས་ཟིན་པར་འགྱུར། །བདུན་གསུམ་ཡན་ཆད་དགུང་བཞག་མན་ཆད་བར། །བཞུགས་ན་རྟོགས་པ་རོ་གཅིག་ཆུང་འབྲིང་འཕར། །འདི་དག་བདག་གི་འདྲེན་མཆོག་བླ་མ་རྗེ། །ཚེར་ལུང་ཀུན་དགའ་རྣམ་རྒྱལ་དེ་ཡིས་བཞེད་། །སྤྲོས་བྲལ་ཆུང་འབྲིང་ཆེན་པོའི་རྣལ་འབྱོར་པ། །མཚམས་སྦྱོར་མ་ཞན་གནད་གཅོད་ཆུང་བ་ན། །ཅི་བྱེད་རང་དབང་ཆེ་བ་འདྲ་ཞིག་འབྱུང་། །ཤི་ནས་གཞི་ཡི་འོད་གསལ་ཤར་བའི་ཚེ། །བདུན་ཕྲག་གཅིག་ཏུ་དེ་ཡི་ངང་ལ་གནས། །དེ་ནི་འཆི་བ་ཆོས་སྐུར་སྦྱོང་བ་ཡིན། །དེ་ཚེ་ཚངས་པའི་ལམ་ནས་འཕོ་བྱ་བས། །དེ་ནས་ལུས་སེམས་བྲལ་བར་གྱུར་མ་ཐག །བར་དོ་ངོ་ཤེས་ཡི་དམ་བསྐྱེད་རིམ་བསྒོམ། །འོད་འཕྲོས་སངས་རྒྱས་བྱང་སེམས་མཆོད་པ་དང་། །སེམས་ཅན་རྣམས་ཀྱི་སྒྲིབ་པ་སྦྱང་བ་སོགས། །ད་ལྟ་སྒྲུབ་དུས་དམིགས་པ་ཐམས་ཅད་བསྒོམ། །བར་དོའི་ཡིད་ལུས་དེ་ཉིད་གནས་འགྱུར་ནས། །ཡི་དམ་ལྷ་ཡི་སྐུ་རུ་དངོས་སུ་འགྱུར། །དེ་ནི་ལྷ་སྐུ་ཕྱག་རྒྱ་ཆེན་པོ་སྟེ། །ཕྱག་རྒྱ་ཆེན་
པོའི་རིག་འཛིན་ཐོབ་པ་ཡིན། །ཐུགས་རྗེ་བྱིན་རླབས་ཡི་དམ་དངོས་དང་མཉམ། །ཞག་བདུན་བར་དུ་དེ་ལྟར་བསྒོམ་པ་ནི། །བར་དོ་ལོངས་སྐུར་སྦྱང་བ་ཞེས་བྱའོ། །དེ་ནས་རང་ཉིད་ཡི་དམ་ལྷར་གསལ་བའི། །ཡབ་ཡུམ་ཞལ་སྦྱོར་ཐུགས་ཀའི་ས་བོན་ལས། །འོད་འཕྲོས་ཕྱོགས་བཅུའི་སངས་རྒྱས་ཐམས་ཅད་ཀྱི། །བྱིན་རླབས་བསྡུས་ནས་ཡབ་ཡུམ་ཞལ་དུ་ཞུགས། །བྱང་སེམས་ངོ་བོར་ཞུ་ནས་རྡོ་རྗེའི་ལམ། །ཡུམ་གྱི་པདྨར་ཕབ་པ་ཞེས་པ་དེ། །ཨོ་ཡིག་དཀར་པོའི་རྣམ་པར་གྱུར་པ་ལ། །སངས་རྒྱས་བྱང་སེམས་སྐུ་ཡི་ནུས་པ་བསྟིམ། །དེ་དུས་རང་ལ་མངོན་ཤེས་སྤྱན་ལྡན་པས། །སྐུ་ཡིས་གདུལ་བའི་གདུལ་བྱ་གང་ཡོད་པར། །རིགས་ལྡན་ཞིག་གི་མངལ་དུ་ཨོ་ཡིག་འཕང་། །དེ་ལ་སྐུ་ཡི་སྤྲུལ་པའི་སྤྲུལ་སྐུ་བྱོན། །སྐུ་ལུས་མཛེས་ཤིང་ཡིད་འོང་དང་བ་འདྲེན། །དེ་ཉིད་མཐོང་ཐོས་རེག་ཚད་འདྲེན་པར་ནུས། །དེ་བཞིན་གསུང་གི་བྱིན་རླབས་ཉྩ། བསྡུས་པ་ཡི། །ཨཱསྤྲོས་འཕངས་པས་གསུང་གི་སྤྲུལ་པ་འབྱོན། །གསུང་བཟང་དབྱངས་སྙན་སྡེ་སྣོད་བཤད་ལ་མཁས། །དེ་ཡིས་ཐོས་བསམ་བཤད་གྲྭའི་བསྟན་ལ་ཕན། །དེ་
བཞིན་ཧཱུཾ་ཡིག་སྤྲོས་འཕངས་ཐུགས་སྤྲུལ་འབྱུང་། །ཐུགས་གཏུམ་ཉམས་དང་རྟོགས་པ་ཤིན་ཏུ་མཐོ། །ཉམས་ལེན་སྒྲུབ་པའི་བསྟན་ལ་ཕན་པར་འགྱུར། །དེ་བཞིན་ཡོན་ཏན་ཀུན་བསྡུས་སྭཱ་ཡིག་སྤྲོས། །ཡོན་ཏན་སྤྲུལ་སྐུ་རིག་གནས་ཀུན་ལ་མཁས། །གདུལ་བྱ་ལོངས་སྤྱོད་ཀྱང་ནི་རྒྱུས་པར་འགྱུར། །ཕྲིན་ལས་བྱིན་རླབས་བསྡུས་ལ་ཧྭ་ལྗང་སྤྲོས། །ཕྲིན་ལས་སྤྲུལ་སྐུ་མཐུ་རྩལ་ནུས་པ་ཆེ། །འགྲོ་དོན་ཕྲིན་ལས་རླབས་ཆེན་འགྲུབ་པར་འགྱུར། །སྤྲུལ་གཞི་དངོས་ནི་ཡི་དམ་ལྷར་ཐིམ་ནས། །གུད་དུ་མེད་དེ་དབྱེར་མེད་རོ་གཅིག་གམ། །རིགས་འདུས་སྤྲུལ་སྐུ་དག་པའི་ཞིང་དུ་འབྱོན། །དེ་ལྟར་ཞག་བདུན་བསྒོམ་ཞིང་སྤྲུལ་སྐུ་སྤྲོ། །ཤིན་ཏུ་རྒྱས་པ་སྤྲུལ་པ་ལྔ་པོ་ལས། །ཡང་སྤྲུལ་ལྔ་རེ་སུམ་སྤྲུལ་དཔག་མེད་འགྱེད། །དེ་ནི་ས་ཐོབ་སེམས་དཔའི་སྤྱོད་ཡུལ་ལགས། །ས་ཐོབ་མིན་ན་སྤྲུལ་པ་འགྱེད་མི་ནུས། །དེ་ནས་ཡི་དམ་བསྐྱེད་རིམ་བསྡུས་བྱས་ལ། །རེ་ཞིག་སྟོང་པ་ཉིད་དུ་ཡུད་ཙམ་གནས། །དེ་ནས་ས་བོན་ནམ་ནི་ཕྱག་མཚན་ནམ། །ཡི་དམ་གཙོ་རྐྱང་སྐུ་རུ་སྤྲུལ་བྱས་ཏེ། །དག་པའི་ཞིང་དུ་སྐར་མདའ་འཕང་བཞིན་འགྲོ། །ཞིང་དེར་པདྨའི་སྦུབས་
ལས་བརྫུས་ཏེ་སྐྱེས། །ས་ཐོབ་སླར་ཡང་སྤྲུལ་པས་འགྲོ་དོན་བྱེད། །ཞིང་ཁམས་མི་བགྲོད་སྐྱེ་བ་ལེན་པ་ནི། །གང་ཡིན་མི་སྐྱེ་མངལ་ནི་གདམ་བྱ་སྟེ། །རིགས་རྒྱུད་གདུང་རྒྱུད་བཟང་པོར་བསམ་བཞིན་འཁྲུངས། །ལས་ཅན་སྐྱེས་བུ་དེ་འདྲ་མ་གཏོགས་པ། །བླ་མ་གོང་མའི་ཐུགས་བསྐྱེད་སྨོན་ལམ་དང་། །བཀའ་སྲུང་ཆོས་སྐྱོང་རྣམས་ལ་གཉེར་གཏད་པས། །ཕལ་པ་གདུང་རྒྱུད་བཟང་པོར་ཉེ་མི་ནུས། །གལ་ཏེ་སྐྱེས་ཀྱང་བཀའ་སྲུང་དེ་ཡིས་བསྒྲལ། །གདུང་རྒྱུད་ངོ་མཚར་ཆེ་དོན་དེ་ལྟར་ལགས། །སྙིང་རྗེ་ཆེ་ཞིང་སེམས་དཔའ་མཐུ་ཆེན་རྣམས། །ཕ་མ་སྡིག་ཅན་ནམ་ནི་དབུལ་ཕོངས་ལ། །སྙིང་རྗེའི་དབང་གིས་སྐྱོབ་ཕྱིར་སྐྱེ་བ་ལེན། །རྒྱལ་བ་མཆོག་སོགས་སྤྲང་པོར་སྐྱེ་དོན་དེ། །ཕ་མ་མ་རུང་ལས་ངན་བདུད་འདྲེའི་རིགས། །དེ་འདྲའི་ཁ་ནོན་ཕྱིར་དུ་འཁྲུངས་པའང་ཡོད། །ཕ་མ་སྦས་ཚུལ་དཔའ་བོ་མཁའ་འགྲོའི་རིགས། །རིགས་མཐུན་ཕྱིར་ན་དེ་འདྲར་སྐྱེ་ཉྩ་བའང་ཡོད། །ཕ་མ་སྔགས་འཆང་རྩ་རླུང་དབང་ཐོབ་པས། །སྐྱེས་མ་ཐག་ཏུ་ཆོས་དང་འཕྲད་ཕྱིར་སྐྱེ། །བསམ་བཞིན་སྐྱེ་བ་བཞེས་པ་དེ་ལགས་སོ། །བར་དོའི་སྐབས་སུ་ཕ་མ་
དེ་མཐོང་ཚེ། །འགྲོ་དོན་རྒྱ་ཆེན་བསྐྱེད་པའི་སེམས་བསྐྱེད་ཀྱིས། །ཕ་མ་གཉིས་པོ་ཡི་དམ་ཡབ་ཡུམ་བསྒོམ། །མ་ཡི་མངལ་དེ་རིན་ཆེན་གཞལ་ཡས་དབུས། །བྱང་སེམས་དཀར་དམར་ཉི་མ་ཟླ་བའི་གདན། །གསང་དབང་ཞུ་བའི་འདུན་པས་མངལ་དུ་ཞུགས། །།རང་གི་རྣམ་ཤེས་ཡི་དམ་ས་བོན་བསྒོམ། །དེ་ལས་འོད་འཕྲོས་རྒྱལ་ཀུན་བྱིན་རླབས་བསྡུས། །ཚུར་འདུས་བདག་ཐིམ་རྡོ་རྗེ་རྩེ་ལྔར་གྱུར། །དེ་ལས་རང་ཉིད་ལྷ་ཡི་སྐུར་བསྒོམ་སྟེ། །བསྟན་པའི་བདག་པོ་འདོད་ན་ཤཱཀྱ་ཐུབ། །དགེ་བཤེས་མཁས་པ་འདོད་ན་འཇམ་པའི་དབྱངས། །འགྲོ་དོན་རྒྱ་ཆེན་འདོད་ན་སྤྱན་རས་གཟིགས། །མཐུ་དང་སྟོབས་ཤུགས་ཆེ་འདོད་གསང་བའི་བདག་།མངོན་ཤེས་རྫུ་འཕྲུལ་ཆེ་འདོད་པདྨ་འབྱུང་། །དེ་ལྟར་བསྒོམ་པའི་གནས་གསུམ་ཡིག་འབྲུ་གསུམ། །།བྱིན་རླབས་ལུས་ངག་ཡིད་གསུམ་སྲུང་བར་བསམ། །གཞལ་ཡས་སྒོ་བཅད་རྟ་མགྲིན་གཅིག་གིས་སྲུང་། །དང་པོ་དེ་ལྟར་བསྒོམ་པར་བྱས་མོད་ཀྱི། །དེ་ནས་ཉམས་ལེན་ངང་ལ་བཞག་བྱས་པས། །ལུས་ནི་མ་རྫོགས་བར་དུ་མི་དྲན་ནོ། །ལུས་རྫོགས་སེམས་དཔའ་ཆེན་པོ་འགའ་རེས་དྲན། །གསུང་
བསྒྲག་ཡིག་དྲུག་ལ་སོགས་འདོན་པ་ལགས། །འཁྲུངས་ཚེ་ཉིད་ནས་དྲན་པར་མ་གསུངས་ཏེ། །འཁྲུངས་ནས་ལངས་གོག་བསྲེ་དུས་བར་དུ་དྲན། །དེ་ནས་བརྡབ་ལོག་རེ་ཕོག་བརྗེད་ཅེས་གྲགས། །སྟོབས་ཆེན་ཡིན་ན་མི་བརྗེད་སྨྲ་བ་ཡིན། །དེ་ཡང་ས་ལམ་མཐོ་བས་དྲན་པ་དང་། །སྨོན་ལམ་སྟོབས་ཀྱིས་དྲན་པ་གཉིས་སུ་ཡོད། །ཟློཕལ་ཆེར་ཆུང་ཚེ་དྲན་ཅིང་སྨྲ་བ་ལ། །ཆེ་ནས་མི་དྲན་གྲིབ་ཀྱིས་ཕོག་པའོ། །ཆུང་ཚེ་རྟགས་མེད་ཅི་ཡང་མི་དྲན་པ། །ཕྱིས་ནས་མཚམས་སྒྲུབ་བྱས་པ་མང་དུ་དྲན། །དེ་ནི་མངལ་གྱི་དྲི་མ་སངས་བ་ཡིན། །ཚེ་སྔོན་མཁས་གྲུབ་བཟང་པོ་ཡིན་ན་ཡང་། །ཕ་མའི་ཁུ་ཁྲག་མི་གཙང་རྫས་དེས་བསྒྲིབས། །རེ་ཞིག་ཉམས་རྟོགས་ཡོན་ཏན་ཀུན་མེད་ཀྱང་། །ཕྱིས་གི ནས་བརྡའ་སྟོན་ཙམ་གྱིས་ཆོག་པ་ལགས། །དེང་སང་སྐུ་སྐྱེ་ཞེས་བྱར་ཡོངས་སུ་གྲག །རྩེ་གཅིག་འབྲིང་དང་ཆེན་པོའི་རྣལ་འབྱོར་པ། །འཆི་རྐྱེན་བཟང་ཞིང་གནད་གཅོད་ཆུང་བ་དང་། །ཐུགས་དམ་བསྐུལ་མི་ཡོད་ན་ཟིན་མོད་ཀྱི། །དེ་ལ་གོལ་ས་མང་པོ་ཡོད་པའི་ཚུལ། །སྦྱོར་དྲུག་ལུགས་ཀྱི་ངོ་སྤྱོད་འགའ་ནས་གསལ། །རྩེ་གཅིག་ཉམས་ཡིན་རྟོགས་པ་
མ་ཐོབ་ཕྱིར། །བདེ་གསལ་ཉམས་ལ་ཆགས་ཞེན་ཆེ་ན་ནི། །ཐུགས་དམ་གསལ་ཞིང་ཤིན་ཏུ་བརྟན་ན་ཡང་། །འདོད་ཁམས་གཟུགས་ཁམས་གནས་སུ་སྐྱེ་བར་ངེས། །སྟོང་ཉམས་འཛིན་པ་ཞུགས་པའི་ཐུགས་དམ་དེས། །གཟུགས་མེད་སྐྱེ་མཆེད་མུ་བཞིར་སྐྱེ་འགྱུར་ཏེ། །མི་ཁོམ་གནས་ཏེ་ཚེ་རིང་ལྷ་ཡིན་ནོ། །དེ་ལ་ཐོས་གྲོལ་དབུ་ནས་བཤད་པ་ལྟར། །རྣ་བར་ཁ་གཏད་ངོ་སྤྲོད་ཡང་ཡང་བྱ། །དེ་ཡིས་ཉམས་ཀྱི་ཞེན་པ་དེ་དག་ནས། །སྤྲོས་བྲལ་རྟོགས་པའི་ངོ་བོ་མཐོང་བར་འགྱུར། །རྩེ་གཅིག་ཆུང་ངུས་ཐུགས་དམ་མི་ཟིན་གསུངས། །འོན་ཀྱང་བསྐྱེད་རིམ་ལྷ་ཡི་ང་རྒྱལ་ནི། །བརྟན་པོ་ཡོད་ན་ཟིན་ཅིང་ཡུན་རིང་བརྟན། །གསལ་སྟོང་མིན་པའི་ཐེར་ཟུག་བསྐྱེད་རིམ་ལ། །གོལ་ས་བརྒྱ་ཕྲག་ཡོད་པར་རྒྱུད་ལས་གསུངས། །ཞི་བ་བསྒོམ་པས་འདོད་ཁམས་གཟུགས་ཁམས་ལྷ། །ཁྲོ་བོ་བསྒོམ་པས་བདུད་དང་སྲིན་པོར་སྐྱེ། །མགོ་བརྙན་བསྒོམ་པས་ཤ་ཟ་ཕྲ་མེན་མ། །ཧཱུྃ་ཡིག་དངོས་པོར་གྲུབ་ལ་སེམས་གཏད་པས། །དེ་ནི་སྦྲུལ་གྱི་ལུས་སུ་སྐྱེ་བར་གསུངས། །དམ་ཚིག་ཉམས་ཤིང་ཁྲོ་བོའི་སྐུར་གསལ་བས། །ལྷ་དེའི་གཟུགས་ཅན་འདྲེ་ཡི་ལུས་
སུ་སྐྱེ། །དེ་འདྲ་བྱུང་ཚུལ་ལོ་རྒྱུས་དཔག་ཏུ་མེད། །དེ་འདྲ་ཐུགས་དམ་བརྟན་པའི་རིགས་བྱུང་ན། །ཁོ་རང་ཡི་དམ་གང་ཡིན་མངོན་རྟོགས་བཀླག །དེ་ཡང་གདོས་བཅས་ཐེར་ཟུག་མ་སྒོམས་ཤིག །སྣང་སྟོང་ཆུ་ཟླ་འཇའ་ཚོན་ལྟར་བསྒོམ་ཞེས། །ཡང་ཡང་གསལ་གདབ་གེགས་དེ་སེལ་བ་ཡིན། །ཞི་གནས་འཐོམ་པ་འཐུག་པོ་སྐྱེས་པ་ཡང་།ཐུགས་དམ་གྲངས་སུ་འགྲོ་བ་མ་ཡིན་ཏེ། །ཞག་བདུན་ཕུང་པོར་གནས་པ་ཡོད་པར་གསུངས། །དེ་ལ་གནས་པའི་ངོ་བོ་ལྟོས་ཤིག་དང་། །སྟོང་གསལ་ཅི་ཡང་མེད་པ་ཡིན་ནོ་ཞེས། །ངོ་སྤྲོད་གདབ་ན་ཅུང་ཞིག་ཕན་ནམ་སྙམ། །དེ་དག་ཆོས་སྒོར་ཞུགས་པ་རྣམས་ཡིན་ཏེ། །ཐ་མལ་པ་ལ་ངོ་སྤྲོད་གདབ་རྒྱུ་མེད། །སངས་རྒྱས་མཚན་བསྒྲགས་་འཕོ་བའི་དམིགས་པ་གཟབ། །སྔས་འགོར་འཕོ་འདེབས་ལན་གཅིག་ཡིན་མོད་ཀྱང་། །སྐེ་རྩིས་ཆད་ནས་ཞག་བདུན་ཞག་གསུམ་བར། །ཐུན་བཞིར་དམིགས་པས་ལན་གྲངས་བརྒྱ་ཙམ་སྤར། །ཚེ་འདས་སྐྱིད་སྡུག་དེ་ལ་རེ་བའི་ཕྱིར། །སྔས་མགོའི་གྱེར་དབྱངས་ཙམ་གྱིས་ཆོག་མི་འཛིན། །ཞག་སྐོར་འཕོ་བའི་སྒྲུབ་པ་འདྲ་བ་བྱ། །ཆོ་ག་ཆོས་སྤྱོད་གཞན་
ལས་དེ་གལ་ཆེ། །དམིགས་པ་མ་གཏོགས་གསོལ་འདེབས་མི་དགོས་སོ། །དེ་ནས་ལུས་སེམས་བྲལ་བར་གྱུར་པ་ནས། །ཕྱིར་ལྡོག་ལ་སོགས་སྒྲིབ་སྦྱོང་གང་འགྲུབ་དང། །དགོངས་ཞག་བར་དུ་ཐོས་གྲོལ་ངོ་སྤྲོད་བྱ། །ཁྱད་པར་བདུན་ཕྲག་གསུམ་པ་བཞི་པའི་སྐབས། །ཕལ་ཆེར་སྐྱེ་བ་ལེན་པའི་དུས་ཡིན་པས། །དག་པའི་ཞིང་དུ་ལམ་སྟོན་ཡང་ཡང་བྱ། །ཆགས་ཞེན་སྤང་ཕྱིར་འཁོར་བའི་ཉེས་དམིགས་བཤད། །ཏིང་འཛིན་གསལ་བས་རྣམ་ཤེས་ཞིང་དེར་འཕང་། །འཕེན་ཚུལ་དམིགས་པ་གུད་དུ་གསལ་བ་ལྟར། །དེ་སྐོར་ཞག་བར་ཐུན་བཞིར་རྩེ་གཅིག་བསྒོམ། །འདོད་པའི་དབང་གིས་བསྒོམས་ཀྱང་མི་ཕན་པས། །བསྐྱེད་རྫོགས་ཟུང་འཇུག་ཏིང་འཛིན་གསལ་བོའི་ངང་། །བྱམས་དང་སྙིང་རྗེ་དྲག་པོའི་ངང་ནས་བསྒོམ། །ཧ་ཅང་སྡིག་སྟོབས་ཆེན་པོ་མ་ཡིན་ན། །དེ་ཡིས་ཚེ་འདས་ངེས་པར་དྲང་བར་འགྱུར། །ཚེ་འདིར་མཚམས་མེད་བྱས་པའི་སྡིག་ཅན་ནི། །ཕྱི་དབུགས་ཆད་སྐབས་འཕོ་བ་ཐེབ་ན་དྲོངས། །དེ་ཡང་དག་པའི་ཞིང་དུ་མི་སྐྱེ་སྟེ། །ལྷ་ལུས་མི་ལུས་གཙང་མ་ཞིག་ཏུ་སྐྱེ། །གལ་ཏེ་འཕོ་བ་ཐེབ་པར་མ་གྱུར་ན། །བཤང་བའི་ལམ་ནས་
རྣམ་ཤེས་ཐོན་མ་ཐག །ཆུ་ནང་རྡོ་འཕང་བཞིན་དུ་དམྱལ་བར་འགྲོ། །དེ་ལ་བར་དོ་ཡོད་པ་མ་ཡིན་ཏེ། །དེ་ནི་མར་གྱི་ཟང་ཐལ་ཞེས་སུ་གྲགས། །དེ་དག་མ་གཏོགས་ཐམས་ཅད་བར་དོར་བགྲོད། །ངོ་སྤྲོད་སོ་སོར་བྱས་པས་གྲོལ་བ་མང་། །གྲོལ་ན་གཤིན་རྗེའི་ཁྲིམས་ར་འགྲིམ་མི་དགོས། །མ་གྲོལ་གཤིན་རྗེས་དགེ་སྡིག་གཤགས་ཟློརལ་བྱས། །གར་སྐྱེ་ལུང་སྟོན་དེ་ཡི་ཚེ་ཚད་ཀྱང་། །གཤིན་རྗེའི་ཁྲམ་ཡིག་བྲི་ནས་གཏོང་བ་ཡིན། །དགེ་སྡིག་ཅི་ཡང་མ་བྱས་བཏང་སྙོམས་པ། །གར་ཡང་མི་སྐྱེ་ལུས་ནི་མི་ལེན་པར། །རྣམ་ཤེས་འཁྱམས་པོ་གྲངས་མེད་བསམ་ལས་འདས། །གཟུགས་མེད་ཁམས་སུ་སྐྱེས་པའི་སེམས་ཅན་རྣམས། །དེ་དང་འདྲ་ལ་ཁད་ཀྱང་མི་འདྲ་སྟེ། །དྲན་པ་མེད་པར་རྣམ་ཤེས་རྒྱུན་ཙམ་ཞིག །བསྐལ་པ་བརྒྱད་ཁྲིའི་བར་དུ་ལུས་མི་ལེན། །དེ་ནས་ལུས་བླངས་སླར་ཡང་འཁོར་བར་འཁྱམ། །དེ་དག་ཐམས་ཅད་འཁོར་བའི་སེམས་ཅན་ཡིན། །ཐར་པ་མྱ་ངན་འདས་པ་ཞེས་བྱ་བ། །ཉན་ཐོས་དགྲ་བཅོམ་རང་རྒྱལ་དགྲ་བཅོམ་གཉིས། །ཚེ་འདིར་ཉོན་མོངས་ཐམས་ཅད་རྩད་ནས་བཅོམ། །གཏན་ནས་སྐྱེ་རྒྱུ་མེད་པས་
དགྲ་བཅོམ་ཟེར། །དེ་ཉིད་སྐུ་ཚེའི་འདུ་བྱེད་གཏོང་བའི་ཚེ། །ནམ་མཁའི་དབྱིངས་སུ་འཕགས་ནས་སྐུ་ལུས་ལས། །མེ་དང་ཆུ་ཡི་རྒྱུན་བབ་རྫུ་འཕྲུལ་སྟོན། །ཐུགས་ལས་མེ་འབར་སྐུ་ལུས་ཕུང་པོ་སྲེག །རིང་བསྲེལ་ཆར་བབས་ལྷུང་བཟེད་ཆོས་གོས་ལྟུང་། །སེམས་ནི་སྟོང་ཉིད་ངང་ལ་བཞུགས་པ་ལས། །བསྐལ་པ་བརྒྱད་ཁྲིའི་བར་དུ་ལུས་མི་ལེན་། །དེ་ནས་སངས་རྒྱས་འོད་ཟེར་ཕོག་པ་ཡིས། །དྲན་པ་རྙེད་ནས་བྱང་ཆུབ་སེམས་བསྐྱེད་ནས། །རིམ་གྱིས་བླ་མེད་བྱང་ཆུབ་སྒྲུབ་པར་གསུངས། །ཐར་པ་ཞེས་བྱ་དགྲ་བཅོམ་ཞེས་བྱ་ཡིན། །སངས་རྒྱས་ཐམས་ཅད་ཆོས་སྐུ་གཅིག་པ་སྟེ། །གཟུགས་དང་ཁ་དོག་དངོས་པོ་མེད་ན་ཡང་། །འགྲོ་བའི་ཚོགས་བསགས་དོན་དུ་གཟུགས་སྤྲུལ་པ། །ཀུན་བཟང་རྡོ་རྗེ་འཆང་དང་ཡུམ་ཆེན་མོ། །སངས་རྒྱས་ཐམས་ཅད་ལོངས་སྐུ་ལྔ་ཡིན་ཏེ། །ཕུང་ལྔ་རྣམ་དག་རྒྱལ་བ་རིགས་ལྔའོ། །རང་རེ་སེམས་ཅན་རྒྱུད་ཀྱི་ཡེ་ཤེས་ནི། །བུམ་པའི་ནང་གི་ནམ་མཁའ་ལྟ་བུ་སྟེ། །ནམ་མཁའ་ཆུང་ངུ་གཅིག་ལས་ཡོད་པ་མིན། །བུམ་པ་ཆག་ཚེ་ཕྱི་ཡི་ནམ་མཁའ་དང་། །དབྱེར་མེད་འདྲེས་ནས་སོ་སོར་ཕྱེ་རྒྱུ་མེད། །
དེ་བཞིན་སེམས་ཅན་སངས་རྒྱས་ཐོབ་པའི་དུས། །སངས་རྒྱས་ཀུན་དང་ཆོས་སྐུ་གཅིག་ཏུ་གྱུར། །དུས་སྐབས་སོ་སོར་འཇའ་ཚོན་ཤར་ན་ཡང་། །ཁ་དོག་ལྔ་ཡི་ངོ་བོ་གཅིག་པ་ལྟར། །ལོངས་སྐུ་ཐམས་ཅད་རིགས་ལྔའི་ངོ་བོར་གཅིག །དཔེར་ན་མཚན་མོ་ལྷ་ཁང་ཆེན་པོའི་ནང་། །མར་མེ་བརྒྱ་སྟོང་དུས་གཅིག་སྦྱར་བ་ན། །མར་མེ་སོ་སོར་ཡོད་པ་སྤྲུལ་སྐུའི་དཔེ། །འོད་རྣམས་གཅིག་ཏུ་འདྲེས་པ་ལོངས་སྐུའི་དཔེ། །དེ་རྣམས་ལྷ་ཁང་ནང་གི་ནམ་མཁའ་ནི། །གཅིག་གི་ཁོང་དུ་ཚུད་པ་ཆོས་སྐུའི་དཔེ། །དེ་ནི་སེམས་ཅན་མང་པོ་གསར་དུ་ནི། །ཡར་ལ་སངས་རྒྱས་ཐོབ་དུས་དབྱེར་མེད་དམ། །ཡབ་སྲས་ལ་སོགས་སྔར་ནས་སངས་རྒྱས་པ། །སྤྲུལ་པ་བྱེ་བ་ཕྲག་བརྒྱ་འབྱོན་པའི་དཔེ། །མཚན་མོ་སྤྲིན་མེད་ནམ་མཁའ་ཆོས་སྐུའི་དཔེ། །དེ་ལ་ཉ་རྒྱས་ཟླ་ཤར་ལོངས་སྐུའི་དཔེ། །ས་གཞིར་མཚོ་ཆུང་དྭངས་པ་དུ་ཡོད་པ། །དེ་ནི་གདུལ་བྱ་འགྲོ་བ་རྣམས་ཀྱི་དཔེ། སྒྱུ་དེ་ནང་ཟླ་བའི་གཟུགས་བརྙན་ཤར་བ་དེ། །སྤྲུལ་སྐུ་བྱེ་བ་ཕྲག་བརྒྱའི་དཔེ་ཡིན་ཏེ། །ཆུ་རྙོག་ཕྱིར་ན་ཟླ་གཟུགས་མི་སྣང་བ། །སྤྲུལ་སྐུ་མྱ་ངན་འདས་པའི་དཔེ་ཡིན་ཏེ། །
འདས་དང་བལྟམས་དང་བཞུགས་པ་ལ་སོགས་པ། །དོན་ལ་མ་གྲུབ་གདུལ་བྱའི་མཐོང་ཚུལ་ལགས། །བསྟན་པ་འཕེལ་འགྲིབ་ཀྱང་ནི་དེ་དང་འདྲ། །སྐྱེ་དགུ་རྣམས་ཀྱིས་བསོད་ནམས་ཆེ་ཆུང་ཁྱད། །དེ་དག་མྱོང་བས་གྲུབ་པ་མ་མཆིས་ཀྱང་། །མདོ་རྒྱུད་བཀའ་གཏེར་གསར་རྙིང་དུ་མ་ནས། །དགོངས་པ་མཐུན་དང་འདྲ་མིན་དུ་མའི་ཚོགས། །རྒྱ་ཆེར་བཤད་པ་ཐོས་པའི་ཤེས་རབ་ཀྱིས། །དེ་དོན་ཅུང་ཟད་ཡིད་ལ་ཡོད་པ་རྣམས། །གོ་རིམ་མེད་པ་གང་དྲན་སྨྲས་པ་ཡིན། །ལུང་འདྲེན་བྲིས་ན་ཡི་གེས་འཇིགས་པས་བཞག །བཤད་ཕྱོགས་རེ་རེ་ཙམ་རེ་མ་མཐུན་ཡང་། །འགལ་བར་མི་སེམས་བཤད་ལུགས་མང་པོའི་དོན། །མདོ་རྒྱུད་གསར་རྙིང་ཀུན་ལ་གཟིགས་པས་གསལ། །དེ་དོན་ཉམས་སུ་ལོན་པར་དཀའ་ན་ཡང་། །སོ་སོའི་དབྱེ་བ་ཤེས་པར་བྱ་བའི་ཕྱིར། །རྟ་ལོ་ཁྲུམས་ཟླའི་དམར་པོའི་ཚེས་བཅུ་གཅིག །བཅུ་གཉིས་སྔ་དྲོའི་ཐུན་མཚམས་གཉིས་ཀྱི་ཚེ། །དགེ་སློང་རཱ་ག་ཨ་སྱས་སྨྲས་པ་རྣམས། །དགེ་བའི་བཤེས་གཉེན་བརྩོན་འགྲུས་རྒྱ་མཚོ་ཡིས། །བློ་དམན་གསར་བུ་རྣམས་ལ་ཕན་པའི་ཕྱིར། །ཚགས་ལ་མ་བརྩིས་མང་ཡང་ཡི་གེར་
བཀོད། །འདི་ནི་ཧ་ཅང་ཟབ་ཅིང་རྒྱ་ཆེ་བའི། །སྐྱེས་ཆེན་ཆོས་ཀྱི་སྤྱན་ལྡན་མ་གཏོགས་པ། །མཁས་པ་རྣམས་ཀྱིས་ཇི་བཞིན་རྟོགས་དཀའ་བས། །དཔེར་ན་ཡང་དགོན་པ་ཡི་རི་ཆོས་ལས། །རྡོ་རྗེ་ལུས་ཀྱི་སྦས་བཤད་གསུངས་པ་ཡང་། །ཉིད་ཀྱི་རྩ་རླུང་ཐིག་ལེའི་གནས་ཚུལ་རྣམས། །མངོན་སུམ་གཟིགས་ནས་གསུངས་པ་ཡིན་མོད་ཀྱང་། །དེ་ནི་ཕྱོགས་རེ་ཙམ་ལས་མ་རྟོགས་ཞེས། །རང་བྱུང་རྒྱལ་བས་ནང་དོན་ཊི་ཀར་བཀག །དེ་བཞིན་འདིར་ཡང་མ་རྟོགས་ལོག་རྟོག་དང་། །ཕྱོགས་རྟོགས་འཁྲུལ་པའི་ཆ་ནི་གང་མཆིས་པ། །མཁས་གྲུབ་ཆོས་ཀྱི་སྤྱན་ལྡན་རྣམས་ལ་བཤགས། །འདི་ནི་བསྟན་བཅོས་བརྩམས་པའང་མ་ཡིན་པས། །དཔེ་ལ་མ་བལྟས་བསམ་བློ་མ་བཏང་བར། །བྱུང་རྒྱལ་ཉམས་མགུར་ཚུལ་དུ་སྨྲས་པ་ལ། །གོ་རིམ་མང་པོ་འཆོལ་བར་གྱུར་པ་རྣམས། །དགེ་བཤེས་མཁས་པ་རྣམས་ཀྱིས་བཟོད་པར་མཛོད། །བཀྲ་ཤིས་དཔལ་འབར་འཛམ་སྒྲ་གླིང་དར་རྒྱས་ཤོག །ལེའུ་ཞེ་གཅིག་པའོ་མངྒ་ལཾ།། །།