ལེའུ་ཞེ་བཞི་པ། འཆི་དུས་གཞི་ཡི་འོད་གསལ་ངོ་འཕྲོད་ཕྱིར། །ཐུགས་དམ་གསལ་འདེབས་རྒྱལ་པོའི་བཀའ་ཕྲིན་ཡོད། །
༼ཕི༽ རི་ཆོས་མཚམས་ཀྱི་ཞལ་གདམས་ལས། །ཐུགས་དམ་གསལ་འདེབས་རྒྱལ་པོའི་བཀའ་ཕྲིན་ཞེས་བྱ་བ་བཞུགས་སོ། །ན་མོ་གུ་རུ་མ་ཧཱ་ཀ་རུ་ཎི་ཀ་ཡེ། འགྲོ་དྲུག་འདྲེན་མཛད་མགོན་པོ་སྤྱན་རས་གཟིགས་། །འགྲོ་དྲུག་སེམས་ཅན་རྣམས་ལ་ཐུགས་རྗེས་གཟིགས། །དགེ་བའི་བཤེས་གཉེན་བརྩོན་འགྲུས་རྒྱ་མཚོ་པས། །འཆི་དུས་ཐུགས་དམ་གསལ་འདེབས་དགོས་ཞེས་ཟེར་། །དེ་ལ་སོ་སོའི་ཐུགས་དམ་གང་ཡིན་པའི། །དེ་དང་མཐུན་པའི་གསལ་འདེབས་དགོས་མོད་ཀྱང་། །འདིར་ནི་མདོར་བསྡུས་སྤྱི་མཚམས་ཉུང་བསྡུས་བརྗོད། །འཆི་ཁའི་གསལ་འདེབས་འཆི་དུས་གསལ་འདེབས་དང་། །བར་དོའི་གསལ་འདེབས་དང་ནི་གསུམ་དུ་འདུས། །ཤི་བར་ཐག་བཅད་ཁ་ཆེམ་བཞག་པའི་རྗེས། །རབ་ཏུ་བླ་མ་འབྲིང་དུ་མཆེད་གྲོགས་དང། །ཐ་ན་ཡི་གེ་ཤེས་པ་ཞིག་གིས་བརྗོད། །ཀྱེ་མ། བདག་ལ་འཆི་ཁ་བར་དོ་འཆར་དུས་འདིར། །ཀུན་ལ་ཆགས་སེམས་ཞེན་འཛིན་སྤངས་བྱས་ནས། །གདམས་ངག་གསལ་བའི་ངང་ལ་མ་ཡེངས་འཇུག །རང་རིག་སྐྱེ་མེད་ནམ་མཁའི་དབྱིངས་སུ་འཕོ། །འདུས་བྱས་ཤ་ཁྲག་ལུས་དང་བྲལ་ལ་ཁད། །མི་རྟག་སྒྱུ་མ་ཡིན་པ་ཤེས་
པར་བྱ། །དེ་སྐད་བར་དོ་རྩ་བའི་ཚིག་ལས་གསུངས། །ཁྱེད་རང་ཡི་དམ་ཐུགས་རྗེ་ཆེན་པོར་བསྒོམ། །མ་དག་འཁོར་བར་འགྲོ་བའི་སྒོ་བརྒྱད་པོ། །།ཧཱི༔ཡིག་ཚེགས་དྲག་ལྡན་པ་རེ་རེས་བཀག །སྐུ་ལུས་སྟོང་པ་ཕྲུ་མ་ཕུས་བཏབ་བཞིན། །ལུས་དབུས་དབུ་མ་ཁང་སྟོང་ཀ་བ་ལྟར། །མར་སྣེ་ལྟེ་འོག་ཕུག་རྡུགས་ལྟེ་བའི་ཐད། །པད་མ་དམར་པོ་ཟླ་བའི་དཀྱིལ་འཁོར་སྟེང་། །རང་གི་རླུང་སེམས་རྣམ་ཤེས་ངོ་བོ་དེ། །ཐིག་ལེ་དཀར་པོ་འཕུར་ལ་ཁད་དུ་བསྒོམ། །དབུ་མའི་ཡར་སྣེ་ཚངས་བུག་ཐར་པའི་སྒོ། །སྐར་ཁུང་ཕྱེས་འདྲའི་སྟེང་དུ་ཁྲུ་གང་སོར། །པདྨ་སྟོང་ལྡན་ཟླ་བའི་དཀྱིལ་འཁོར་སྟེང་། །དཀོན་མཆོག་ཀུན་འདུས་རྩ་བའི་བླ་མ་ནི། །སངས་རྒྱས་འོད་དཔག་མེད་པའི་སྐུ་རུ་བཞུགས། །སྐུ་མདོག་དམར་པོ་མཚན་དང་དཔེ་བྱད་ལྡན། །ཆོས་གོས་གསུམ་གསོལ་རྡོ་རྗེ་སྐྱིལ་མོ་ཀྲུང་། །མཉམ་བཞག་ཕྱག་རྒྱས་བདུད་རྩིའི་ལྷུང་བཟེད་བསྣམས། །སྐུ་ཡི་འོད་ཟེར་ཉི་མ་འབུམ་བཞིན་འབར། །བདེ་ཆེན་ཞིང་གི་བཀོད་པ་སྐུ་ལ་རྫོགས། །ཡེ་ཤེས་དམ་ཚིག་དབྱེར་མེད་གཅིག་ཏུ་བསྒོམ། །དེ་ལ་ཡིད་ཀྱིས་སྐྱབས་སུ་འགྲོ་བར་གྱིས། །འགྲོ་བ་སེམས་ཅན་
ཀུན་ལ་ཕན་པའི་ཕྱིར། །ད་རེས་འཆི་བ་ཆོས་སྐུར་སྦྱང་བྱས་ནས། །རྫོགས་པའི་སངས་རྒྱས་བསྒྲུབ་པའི་སེམས་བསྐྱེད་བསྒོམ། །ལུས་དང་ལོངས་སྤྱོད་ཉེ་དུ་ནོར་རྫས་སོགས། །ཆགས་དང་ཞེན་པའི་འཁྲི་བ་གཏན་ནས་ཆོད། །ཆགས་ཀྱང་ཆགས་ནས་འདུག་པའི་དབང་ནི་མེད། །མི་རྟག་སྒྱུ་མ་རྨི་ལམ་ཡིན་པར་སོམས། །རང་སེམས་ཐིག་ལེ་དབུ་མའི་ལམ་ནས་འཕང། །འོད་དཔག་མེད་པའི་ཐུགས་ཀར་ཡང་ཡང་བསྟིམ།་་་ཚེ་འདས་ཐ་མལ་པ་ལ་འདི་ཡན་བསྒོམ་པ་གཙོ་ཆེ་གསུངས། །དེ་རྗེས་རང་གི་སྙིང་དབུས་པད་ཟླའི་སྟེང་། །ཐུགས་སྲོག་ཧྲཱིཿཡིག་གསལ་སྟོང་ཤེལ་སྒོང་བཞིན། །དེ་ལ་ཡུད་ཙམ་རིག་པ་གཏད་པའི་རྗེས། །དེ་ནས་ཅི་ཡང་ཡིད་ལ་མི་བསྒོམ་པར། །སེམས་ལ་གང་ཤར་དེ་ལ་ངོ་བོར་ལྟོས་། །གསོན་དུས་བདེ་དུས་ལོ་ཟླར་བསྒོམ་པ་བས། །ད་ལྟ་སྐད་ཅིག་བསྒོམ་པས་ཕན་སྟོབས་ཆེ། །ད་ལྟ་ཉམས་ལེན་སྙིང་རུས་མ་བྱས་ན། །ཆོས་སྒོར་ཞུགས་ལ་དོན་གོ་མེད་པ་ཡིན། །དེ་ཕྱིར་རིག་པ་སྒྲིམ་ལ་སྙིང་རུས་གྱིས། །ལུས་ཚུགས་མ་ཐུབ་པ་ལ་སྐྱོན་མེད་པས། །ཐུབ་པའི་དབང་པོ་མྱ་ངན་འདས་པ་བཞིན། །སེང་གེ་ཉལ་སྟབས་གྱིས་ལ་ངོ་བོ་
སྐྱོངས། །ག་ཟེར་ན་གཟེར་མཁན་ངོ་བོ་དེ་ལ་ལྟོས། །འགྲོ་བ་ཀུན་གྱི་ན་གོ་ཆོད་པར་སྒོམས། །ལྤགས་བཞི་སར་ལྷུང་ས་ནི་ཆུར་ཐིམ་རྟགས། །ཡིད་ཀྱི་ཡུལ་དུ་སེར་པོའི་སྣང་བ་འཆར། །དེ་ལ་བལྟས་པས་སེར་པོའི་ངོ་བོ་སྟོང་། །ཡུམ་ཆེན་སངས་རྒྱས་སྤྱན་མའི་སྐུ་ཐོབ་འགྱུར། །ཁ་དང་སྣ་སྐམ་ལྕེ་ནི་གྲེ་ཁུང་འགྲོ། །ཆུ་ནི་མེར་ཐིམ་ཡིད་ཡུལ་དཀར་པོ་འཆར་། །དེ་ལ་བལྟས་པས་དཀར་པོའི་ངོ་བོ་སྟོང་། །ཡུམ་ཆེན་མཱ་མ་ཀཱི་ཡི་སྐུ་ཐོབ་འགྱུར། །མེ་ནི་རླུང་ཐིམ་ལུས་དྲོད་མཐའ་ནས་སྡུད། །ཡིད་ཡུལ་དམར་པོ་འཆར་བའི་ངོ་བོར་ལྟོས། །ཡུམ་ཆེན་གོས་དཀར་མོ་ཡི་སྐུ་ཐོབ་འགྱུར། །རླུང་ནི་རྣམ་ཤེས་ལ་ཐིམ་དབུགས་ཕྱིར་འཕོ། །ཡིད་ཡུལ་ལྗང་གུ་འཆར་བའི་ངོ་བོར་ལྟོས། །ཡུམ་ཆེན་དམ་ཚིག་སྒྲོལ་མའི་སྐུ་ཐོབ་འགྱུར། །སྤྱི་བོའི་བྱང་སེམས་ཐིག་ལེ་ཐུར་དུ་ལྷུང་། །ཕྱི་རྟགས་ཟླ་བ་ཤར་བའི་དཀར་ལམ་ཤར། །ནང་རྟགས་དུ་བ་སྨིག་སྒྱུ་ལྟ་བུ་འཆར། །ཞེ་སྡང་ལས་གྱུར་རྟོག་པ་སོ་གསུམ་འགག །དགའ་བའི་ཡེ་ཤེས་སྐད་ཅིག་གཅིག་ལ་སྐྱེ། །དེ་དུས་མ་ཡེངས་དེ་ཡི་ངོ་བོར་ལྟོས། །ཞེ་སྡང་རྣམ་དག་བཅོམ་ལྡན་རྡོ་རྗེ་སེམས། །སྐུ་ཡི་རྡོ་རྗེ་འགྲུབ་པའི་
ངེས་པ་ཡིན། །ལྟེ་འོག་མ་ལས་ཐོབ་པའི་ཐིག་ལེ་ནི། །ཨ་ཐུང་ཕག་མོའི་ངོ་བོ་གྱེན་དུ་འཕར། །ཕྱི་རྟགས་ཉི་མ་འཆར་འདྲའི་དམར་ལམ་འཆར། །ནང་རྟགས་མེ་ཁྱེར་ལྟ་བུར་དམར་ཕྲོམ་ཕྲོམ། །འདོད་ཆགས་ལས་གྱུར་རྟོག་པ་བཞི་བཅུ་འགག །མཆོག་དགའི་ཡེ་ཤེས་སྐད་ཅིག་གཉིས་ལ་སྐྱེ། །དེ་ཉིད་ངོས་བཟུང་དེ་ཡི་ངོ་བོར་ལྟོས། །འདོད་ཆགས་རྣམ་དག་བཅོམ་ལྡན་སྣང་མཐའ་ཡས། །གསུང་གི་རྡོ་རྗེ་འགྲུབ་པའི་ངེས་པ་ཡིན། །དེ་དུས་རྩ་རླུང་བསྒོམ་མཁན་གྲོལ་བར་གསུངས། །རླུང་ནི་རྣམ་པར་ཤེས་ལ་ཐིམ་པ་དང་། །ཕྱི་དབུགས་ཆད་དང་ནག་ལམ་དུས་མཉམ་སྟེ། །ཕྱི་ཡི་རྣམ་ཤེས་ཚོགས་བརྒྱད་ཐམས་ཅད་འགག །སེ་རུ་སོང་ཟེར་ནད་གཡོག་མཆི་མ་འབྱིན། །གཟུགས་མི་མཐོང་ཞིང་སྒྲ་མི་ཐོས་པ་དང་། །ལུས་ཚུགས་མི་ཐུབ་མཉེལ་ཞིང་མ་མཁལ་བྲུལ། །ཕྱི་རྟགས་ཉི་ཤུ་དགུ་ཡི་སྨུག་ནག་འདྲ། །ནང་རྟགས་རྣམ་ཤེས་བུམ་ནང་མར་མེ་བཞིན། །གཏི་ཉྩ་མུག་ལས་གྱུར་རྟོག་པ་བདུན་པོ་འགག །ཐིག་ལེ་དཀར་དམར་སྙིང་གར་འཕྲད་པའི་བར། །རྣམ་པར་ཤེས་པ་འཐུམ་སྟེ་གནས་པ་ཡི། །དགའ་བྲལ་ཡེ་ཤེས་སྐད་ཅིག་གསུམ་ལ་
སྐྱེ། །མ་ཡེངས་དེ་ཡི་ངོ་བོར་ལྟོས་མཛོད་དང་། །ངོས་ཟིན་ན་ནི་ཡུན་རིང་གནས་པ་ཡིན། །གནས་ན་གཏི་མུག་རྣམ་དག་རྣམ་སྣང་མཛད། །ཐུགས་ཀྱི་རྡོ་རྗེའི་གོ་འཕང་ཐོབ་པར་འགྱུར། །ཐིག་ལེ་དཀར་དམར་ཕྲད་པ་མཐོང་བ་དེ། །མ་དག་པ་ཡི་ཕྱི་མའི་ཕ་མར་མཐོང་། །ཕྱི་མ་གར་སྐྱེའི་ལུས་ཀྱང་ཡུད་ཙམ་འཆར། །དག་པ་རྣམས་ཀྱིས་ཡི་དམ་ཡབ་ཡུམ་མཐོང་། །འདི་སྐབས་ཞི་ཁྲོའི་ལྷ་ཚོགས་དཔག་མེད་ཅིག །འཆར་བར་ཇོ་བོ་རྗེ་དང་ལབ་སྒྲོན་བཞེད། །བསྐྱེད་རིམ་པ་རྣམས་གྲོལ་བའི་དུས་ཡིན་པས། །ཁྱེད་རང་ཡི་དམ་ལྷ་ཡི་བསྐྱེད་རིམ་བསྒོམ། །ཐུགས་སྲོག་ས་བོན་ཡི་གེར་རིག་པ་གཏོད། །དེ་ཚེ་ལུས་ལ་ཚོར་བ་མེད་པའི་ཕྱིར། །གདུང་གཡོག་པ་ཡིས་གདུང་བཅས་གཟབ་པ་ཡིན། །མ་ཟིན་ན་ནི་སྐད་ཅིག་གསུམ་ཡིན་ཡང་། །ཟིན་ན་ཡུན་ནི་རྒྱང་ཙམ་གནས་པ་ཡིན། །འཕོ་བའི་དུས་གནད་མཆོག་ནི་འདི་ཡིན་ཏེ། །ཐིག་ལེ་དཀར་དམར་སེམས་སུ་དབྱེར་མེད་འདྲེས། །ཚངས་པའི་ལམ་དུ་རྒྱངས་སེ་འཕོ་བ་ཡིན། །མ་ཟིན་ན་ནི་ཐིག་ལེའི་གནས་འཆུག་སྟེ། །དཀར་པོ་ཐུར་ལྟུང་དམར་པོ་གྱེན་དུ་ཡལ། །སྣ་བུག་གཡོན་ནས་ཁྲག་དང་ཆུ་
སེར་འབྱུང་། །དེ་ལྟར་ཐིག་ལེའི་གནས་ནི་མ་འཆུག་གོང་། །ནག་ལམ་ཡལ་རྗེས་གཞི་ཡི་འོད་གསལ་འཆར། །ཕྱི་རྟགས་སྐྱ་རེངས་འཆར་འདྲ་ཅུང་ཟད་གསལ། །སྤྲིན་ཐག་ཆད་པའི་ནམ་མཁའ་ཇི་བཞིན་དུ། །ཚུར་ལ་འཆར་ཞིང་རྣམ་རྟོག་འཛིན་པ་མེད། །ལྷན་ཅིག་སྐྱེས་དགའི་ཡེ་ཤེས་ཕྱག་རྒྱ་ཆེ། །སྐད་ཅིག་བཞི་ཡི་ཡུན་བར་ཀུན་ལ་འཆར། །དེ་ཉིད་ངོས་ཟིན་ཡུན་རིང་གནས་པ་ན། །འཆི་བ་ཆོས་སྐུར་སངས་ཆུང་རྒྱ་བ་སྟེ། །སྐུ་གསུམ་ལྷུན་གྲུབ་ཡེ་ཤེས་རྡོ་རྗེ་ཡི། །གོ་འཕང་མཆོག་ནི་དེ་དུས་ཐོབ་པར་གསུངས། །དེ་དུས་ངས་ཀྱང་ཁྱོད་ལ་གསལ་འདེབས་བྱེད། །དེ་དུས་ངོས་བཟུང་དེ་ཡི་ངང་ལ་བཞུགས། །དེ་ཡན་འཆི་ཁ་དབང་པོ་གསལ་དུས་བརྗོད། །དུས་གཅིག་མ་ཡིན་དལ་བུས་ལན་གསུམ་གདབ། །དེ་ནས་ཕྱི་དབུགས་ཆད་པར་གྱུར་མ་ཐག །སྐེ་རྩིས་གཉིས་པོ་ལག་པས་མྱང་བྱས་ཏེ། །སྐེ་རྩིས་མ་ཆད་བར་དུ་མི་མནན་ཞིང་། །སྐེ་རྩིས་ཆད་ནས་ཡུད་ཙམ་དྲག་ཏུ་མནན། །དེ་ཡིས་རོ་རྐྱང་རླུང་གཉིས་ནང་དུ་ལོག །དེ་ཉིད་དབུ་མར་ཐིམ་པས་ཐུགས་དམ་ཟིན། །མི་ཟིན་མི་སྲིད་པ་ཡི་གནད་ཟབ་མོ། །བར་དོ་
ཐོས་གྲོལ་གཞུང་ནས་གསུངས་པ་ཡིན། །ས་པཎ་ལུགས་ལ་སྐེ་རྩ་ཆད་མ་ཐག །མགྲིན་པ་དར་གྱིས་དམ་དུ་བཅིང་པར་གསུངས། །བུམ་པ་མིན་ཡང་མགུལ་ཆིངས་དགོས་ཞེས་བཤད། །དེ་གཉིས་གནད་འགག་གཅིག་ཏུ་བབ་པ་ཡིན། །ཕྱི་དབུགས་ཆད་ནས་ཡུན་ནི་མི་བསྲིང་བར། །གདུང་བཅས་རྣམས་ཀྱང་མགྱོགས་ཤིང་ལེགས་པར་བྱས། །དེ་ནས་ངོ་སྤྲོད་གདབ་པའི་དུས་སུ་ཡང་། །དང་པོ་ཉིད་ནས་མིང་ནས་མི་འབོད་དེ། །བོས་ན་རྣ་བའི་རྒྱུད་དུ་འཕོ་ཉན་ཡོད། །ནག་ལམ་ཡལ་རྗེས་ཚུར་ལ་གསལ་ནས་ཀྱང་། །ཆེ་ཆུང་རན་པས་བོས་ན་གོ་བར་བཤད། །དེ་ཕྱིར་རྣ་བའི་དྲུང་ནས་འབོད་བྱས་ཏེ། །གཞི་ཡི་འོད་གསལ་ཁྱེད་ལ་ཤར་ནས་ཡོད། །ཉམས་ལེན་སྟེང་དུ་འཇོག་པར་ཞུ་ཞེས་པ། །ལན་གསུམ་བརྗོད་རྗེས་མིང་ནས་ལན་གསུམ་འབོད། །ཀྱེ་མ་ཁྱོད་ནི་ཚེ་འདིའི་སྣང་བ་ནུབ། །འཇིག་རྟེན་ཕྱི་མའི་སྣང་བ་མ་ཤར་ཏེ། །འཆི་བ་ཆོས་སྐུར་སྦྱོང་བའི་དུས་ལ་བབ། །རང་གི་ཤེས་རིག་ངོ་བོ་སྟོང་སང་ངེ་། །དངོས་པོ་ཁ་དོག་ཅིར་ཡང་མ་གྲུབ་པ། །འདི་ཀ་སངས་རྒྱས་ཀུན་བཟང་ཡབ་ཡུམ་ཡིན། །ཁྱོད་རང་ཤེས་རིག་ངོ་བོ་སྟོང་པ་ལ། །སྟོང་པ་
ཕྱལ་ཆད་ཅི་ཡང་མེད་པ་མིན། །ས་ལེ་སིང་ངེ་ཝ་ལེ་གསལ་བ་འདི། །རང་རིག་ཡེ་ཤེས་ཕྱག་རྒྱ་ཆེན་པོ་ཡིན། །ངོ་བོ་སྟོང་པ་ཅི་ཡང་མ་གྲུབ་པ། །རྣམ་པ་འགགས་མེད་གསལ་དྭངས་ཝ་ལེ་བ། །དབྱེར་མེད་འདི་ཀ་ཆོས་སྐུ་སངས་རྒྱས་ཡིན། །རང་རིག་གསལ་སྟོང་འོད་ཀྱི་ཕུང་པོ་འདི། །དང་པོའི་སངས་རྒྱས་འོད་མི་འགྱུར་བ་ཡིན། །རང་གི་སེམས་ཉིད་ཡེ་ནས་སངས་རྒྱས་ལ། །རང་གིས་བལྟས་ལ་དེ་ཡི་ངང་དུ་ཞོག །དེ་ལ་ཡུན་ནི་རིང་དུ་གནས་ནུས་ན།་་།འཆི་བ་ཆོས་ཀྱི་སྐུ་རུ་སངས་རྒྱས་གསུངས། །དེ་ཉིད་ལན་གཅིག་གམ་ནི་ལན་གསུམ་བརྗོད། །ཤི་ནས་ཞག་པོ་དུ་སོང་མི་ཤེས་པས། །ཁྱོད་ལ་གཞི་ཡི་འོད་གསལ་ཤར་ནས་ཡོད། །ཐུགས་དམ་མ་ཡེངས་བརྗོད་རྗེས་མིང་ནས་བོས། །ཁྱོད་ཉིད་ཤི་ནས་ཞག་པོ་རྒེ་སོང་། །ད་རུང་ཐུགས་དམ་ངང་དུ་འདི་ལྟར་བཞུགས། །ཞེས་བརྗོད་ཉིན་རེ་བཞིན་དུ་གསལ་འདེབས་བྱ། །དེ་ནི་སྤྱི་མཚམས་ཐུགས་དམ་གསལ་འདེབས་ཡིན། །ཉམས་ལེན་རྟོགས་པ་ཧ་ཅང་མི་མཐོ་ཞིང་། །མོས་གུས་དྲག་པོ་ཡོད་ལ་གསལ་འདེབས་ནི། །སྙན་པའི་དབྱངས་ཀྱིས་མགུར་གྱི་ཚུལ་
དུ་བརྗོད། །ཀྱེ་མ། སྐལ་ལྡན་རིགས་ཀྱི་བུ། །སྙིང་ག་ཆོས་ཀྱི་འཁོར་ལོ་ན། །ཙིཏྟ་རིན་ཆེན་སྙིང་གི་དབུས། །པདྨ་ཉི་ཟླ་བརྩེགས་པའི་སྟེང་། །དྲིན་ཆེན་རྩ་བའི་བླ་མ་དེ། །རྡོ་རྗེ་འཆང་གི་ཆ་ལུགས་རྫོགས། །མཚན་དང་དཔེ་བྱད་རྒྱུན་དང་ལྡན། །འོད་དང་འོད་ཟེར་འབར་ཞིང་གདའ། །སངས་རྒྱས་ཐམས་ཅད་འདུས་པའི་སྐུ། །བླ་མ་ཆོས་སྐུ་རྡོ་རྗེ་འཆང་། །ཁྱེད་ཀྱི་སེམས་ཉིད་ཆོས་སྐུ་དང་། །དབྱེར་མེད་གཅིག་ཏུ་འདྲེས་ནས་གདའ། །སེམས་ཀྱི་སེམས་ལ་ཚུར་ལྟོས་དང་། །ངོ་བོ་སྟོང་པར་འདུག་པ་དེ། །བླ་མ་ཆོས་སྐུ་ཡིན་པར་གདའ། །རང་བཞིན་གསལ་བར་འདུག་པ་དེ། །བླ་མ་ལོངས་སྐུ་ཡིན་པར་གདའ། །སྣ་ཚོགས་འགག་མེད་འཆར་བ་དེ། །བླ་མ་སྤྲུལ་སྐུ་ཡིན་པར་གདའ། །དེ་གསུམ་དབྱེར་མེད་དོན་གཅིག་པ། །སྐུ་གསུམ་དབྱེར་མེད་ངོ་བོ་ཉིད། །བླ་མ་སངས་རྒྱས་རིན་པོ་ཆེ། །ཁྱེད་དང་དབྱེར་མེད་གཅིག་ནི་གདའ། །མོས་གུས་བསྒོམས་པའི་དོན་གོ་དེ། །བླ་མའི་བྱིན་རླབས་སེམས་ལ་ཞུགས། །ཐུགས་ཡིད་གཅིག་ཏུ་འདྲེས་ནས་གདའ། །སྤྲིན་ཐག་ཆད་པའི་ནམ་མཁའ་བཞིན། །གཞི་ཡི་འོད་གསལ་ཤར་ནས་
གདའ། །མ་ཡེངས་དེ་ཡི་ངང་ལ་ཞོག །སངས་རྒྱས་ཟེར་བའི་གཡེར་པོ་ཆེ། །ད་ནི་ཐོབ་ལ་ཁད་དུ་གདའ། །སྐལ་ལྡན་ཁྱོད་ལས་སྐྱིད་པ་མེད། །ཅེས་བརྗོད་གསལ་འདེབས་དེ་ཡིས་ཆོག །ཉམས་རྟོགས་མེད་པའི་བསྐྱེད་རིམ་མཁན། །དེ་ལ་གསལ་འདེབས་འདི་ལྟར་བརྗོད། །ཀྱེ། གསོན་དང་སྐལ་ལྡན་རིགས་ཀྱི་བུ། །དགྲ་འཆི་བདག་གཤིན་རྗེ་དབང་ཆེ་བས། །ཁྱོད་མི་རྟག་ཚེ་ལས་འདས་ནས་སོང་། །དུས་ད་དུང་བེམ་རིག་མ་བྲལ་སྐབས། །ལྷ་ཡི་དམ་བསྒོམ་པའི་དུས་ལ་བབས། །རྒྱན་ཆ་ལུགས་ཕྱག་མཚན་ཡོངས་སུ་རྫོགས། །དཔེ་མེ་ལོང་ནང་གི་གཟུགས་བརྙན་བཞིན། །དེ་གསལ་ལ་སྤུ་རིས་དོད་པར་བསྒོམ། །སྐུ་ཨ་འཐས་ཐེར་ཟུག་མ་ཡིན་པར། །དཔེ་གསལ་སྟོང་ནམ་མཁའི་འཇའ་བཞིན་བསྒོམ། །དེ་མོས་པ་ཡིད་བྱེད་མ་ཡིན་པར། །རང་ཡི་དམ་དངོས་ཀྱི་ང་རྒྱལ་བསྐྱེད། །ལུས་ཙིཏྟ་སྙིང་གི་གཞལ་ཡས་ནས། །གདན་པད་ཟླ་མ་ཉི་མ་ཟླ་བའི་སྟེང་། །སེམས་ཐུགས་སྲོག་ས་བོན་ཡི་གེ་དེ། །དཔེ་རླུང་མེད་མར་མེ་བཞིན་དུ་གསལ། །དེ་རྣམ་པ་གསལ་ཡང་ངོ་བོ་སྟོང་། །དཔེ་ཆུ་ནང་ཟླ་བའི་གཟུགས་
བརྙན་བཞིན། །ཁྱོད་རིག་པ་རྩེ་གཅིག་དེ་ལ་གཏོད། །ཁྱོད་ནམ་ཞིག་ལུས་སེམས་བྲལ་བའི་ཚེ། །ཁྱོད་བར་དོའི་ཡིད་ལུས་མི་འཆར་བར། །ལུས་ཡི་དམ་ལྷ་ཡི་སྐུར་གྱུར་ནས། ཤུ་ལྷ་དེ་དང་དབྱེར་མེད་སངས་རྒྱས་ཏེ། །དོན་ཕྱག་རྒྱ་ཆེན་པོའི་རིག་འཛིན་ཐོབ། །དོན་དེ་ཕྱིར་ཐུགས་དམ་ཡུན་རིང་ཟུངས། །ཚིག་དེ་སྐད་ལན་གསུམ་དབྱངས་བཅས་བརྗོད། །དེས་ཐུགས་དམ་བརྟན་པོ་འོང་བར་ངེས། །དེ་ཉིན་བཞིན་བརྗོད་པས་གོལ་ས་ཆོད། །ཡང་རྩེ་གཅིག་མིན་གྱི་རྣལ་འབྱོར་པ། །དེ་དང་པོ་ཐུགས་དམ་གསལ་འདེབས་དང་། །རྗེས་གོལ་ས་གཅོད་པ་མཉམ་དུ་བྱ། །ཁྱོད་ཐུགས་དམ་མ་ཡེངས་བརྗོད་པའི་རྗེས། །ཀྱེ། གསོན་དང་སྐལ་ལྡན་རིགས་ཀྱི་བུ། །བུ་ཁྱོད་ནི་ཚེ་ལས་འདས་པ་ཡིན། །ད་ཐུགས་དམ་བཟུང་བའི་དུས་ལ་བབས། །ཁྱོད་སེམས་ཀྱིས་སེམས་ལ་ཚུར་ལྟོས་དང་། །སེམས་སྟོང་པ་གཟུགས་དང་ཁ་དོག་མེད། །དེ་མེད་པ་མ་ཡིན་རང་མདངས་གསལ། །དེ་ཏིལ་གྱི་མར་མེ་རླུང་མེད་བཞིན། །སེམས་རྩེ་གཅིག་དེ་ཡི་ངང་ལ་ཞོག །སེམས་བདེ་བ་ཆེན་པོའི་ཉམས་རྟོགས་ལ། །ཁྱོད་མ་ཆགས་མ་ཞེན་ངོ་བོ་ལྟོས། །དོན་
བདེ་སྟོང་ཕྱག་རྒྱ་ཆེན་པོ་ཡིན། །སེམས་གསལ་རིག་སྟོང་རྗེན་ལྷང་ངེ་བ། །དེ་མཆོག་ཏུ་མ་འཛིན་ངོ་བོར་ལྟོས། །དོན་གསལ་སྟོང་ཕྱག་རྒྱ་ཆེན་པོ་ཡིན། །དོན་ཅི་ཡང་མ་གྲུབ་སྟོང་པ་ཉིད། །དེ་སྟོང་པར་འཛིན་པའི་འཁྲི་བ་ཆོད། །སེམས་གང་ཤར་མ་བཅོས་སོ་མར་ཞོག །ཁྱོད་ཡུན་རིང་ཐུགས་དམ་ཟུངས་མཛོད་དང་། །ཁྱེད་སྟོང་ཉིད་རྟོགས་པ་མངོན་དུ་གྱུར། །སང་ལུས་སེམས་སོ་སོར་བྲལ་ཙམ་ན། །རང་གར་སྐྱེ་རང་དབང་འཐོབ་པ་ཡིན། །ཞེས་ལན་གསུམ་བརྗོད་པས་གོལ་ས་ཆོད། །སྒོམ་སྤྲོས་བྲལ་ཡིན་ཆད་རྟོགས་པ་ལ། །དེར་ངོ་སྤྲོད་གསལ་འདེབས་དགོས་རྒྱུ་མེད། །ཁྱེད་ཐུགས་དམ་མ་ཡེངས་བརྗོད་པས་འཐུས། །ཐུགས་དམ་མ་ཟིན་ཐ་མལ་པ་རྣམས་ལ། །སངས་རྒྱས་མཚན་བརྗོད་འཕོ་བ་འདེབས་པ་ཡིན། །ཐུགས་དམ་ཡུན་རིང་གདུང་གཡོག་མ་འཁྱོལ་ན། །སྤོས་དང་རོལ་མོ་སོགས་ཀྱིས་དཀྲོགས་པ་ནི། །ཏིང་འཛིན་བར་ཆད་ཉེས་པ་དཔག་སྒྱུ་ཏུ་མེད། །དེ་བས་འཕོ་བ་བཏབ་པར་བྱས་ན་ནི། །རྟ་བཟང་སྒ་སྲབ་བྱས་པར་བསྐྱོན་འདྲ་ཟེར། །ཕན་ཡོན་མ་གཏོགས་ཉེས་པ་ཅི་ཡང་མེད། །དེ་ཕྱིར་ཐུགས་དམ་ཡུན་རིང་
གྲོལ་འདོད་དམ། །ཐུགས་དམ་གྲོལ་དང་མ་གྲོལ་མི་འབྱེད་དམ། །ཐུགས་དམ་ཟིན་དང་མ་ཟིན་ཐེ་ཚོམ་ན། །འཕོ་བ་འདེབས་པ་འདི་ནི་ཤིན་ཏུ་ལེགས། །དེ་སྐད་རྟ་ལོ་ཐ་སྐར་ཚེས་གཉིས་ཀྱི། །དགོང་ཐུན་རཱ་ག་ཨ་སྱས་སྨྲས་པ་སྟེ། །སྒོམ་ཆེན་ཀརྨ་བཱིརྱས་ཡི་གེར་བྲིས། །ལེའུ་ཞེ་བཞི་པའོ་མངྒ་ལཾ།། །།