ལེའུ་ཞེ་ལྔ་པ། སངས་རྒྱས་བསྟན་པ་དར་ཞིང་རྒྱས་པའི་ཕྱིར། །ཆོས་སྐྱོང་སྤྱི་སྒྲུབ་ཕྲིན་ལས་རླབས་ཕྲེང་ཡོད། །
༼བི༽ རི་ཆོས་མཚམས་ཀྱི་ཞལ་གདམས་ལས། ཡེ་ཤེས་དང་འཇིག་རྟེན་གྱི་ཆོས་སྐྱོང་སྤྱིའི་སྒྲུབ་ཐབས་ཕྲིན་ལས་རྒྱ་མཚོའི་རླབས་ཕྲེང་ཅེས་བྱ་བ་བཞུགས་སོ། །ན་མོ་གུ་རུ་མ་ཧཱ་ཀཱ་ལ་དྷམཱ་པཱ་ལ་ཡེ།། སྔགས་ཆུང་གསར་བུ་ཐོས་རྒྱ་ཆུང་བ་ལ། །ཕན་ཕྱིར་ཆོས་སྐྱོང་སྤྱི་སྒྲུབ་གདམས་པ་བྲི། །དམ་ཅན་རྒྱ་མཚོས་བཀའ་གནང་བྱིན་གྱིས་རློབས། །མ་མགོན་ལ་སོགས་ཡེ་ཤེས་ཆོས་སྐྱོང་དང་། །མ་གཟའ་དམ་གསུམ་ལ་སོགས་འཇིག་རྟེན་པ། །དེ་བཞིན་ནོར་ལྷ་གཏེར་སྲུང་ལ་སོགས་པ། །གང་ཡང་འདྲ་སྟེ་སྤྱི་མཐུན་སྒྲུབ་པའི་ཐབས། །དཀྱིལ་འཁོར་རྟེན་རྫ་ས་བླ་རྡོ་ལ་སོགས་པ། །རྒྱས་པར་སོ་སོའི་གཞུང་ལས་འབྱུང་བ་ལྟར། །བསྡུ་ན་ས་སྟེགས་སམ་ནི་མཆོད་གཞིའི་སྟེང་། །འབྲུ་ཡི་ཚོམ་བུ་ལྷ་གྲངས་བཀོད་པའམ། །གཙོ་རྐྱང་
ཡིན་ན་པདྨ་འདབ་བརྒྱད་བྲི། །དེ་སྟེང་ཁྲི་འམ་མཉྫིལ་བཞག་པའི་སྟེང་། །ཟངས་ལྕགས་ཐོད་པ་ལ་སོགས་གང་འོས་སྣོད། །དེ་ནང་སོ་སོའི་གཏོར་མ་རྒྱན་ལྡན་བཤམས་། །འཁོར་རྣམས་གཏོར་ཆུང་ལྷ་གྲངས་འབྱོར་ནི་བཅའ། །འཁོར་རྣམས་མེད་ཀྱང་རུང་སྟེ་གཙོ་བོས་ཆོག །རྩེ་ལ་སོ་སོའི་ཙཀཱི་བཙུགས་པར་བྱ། །ཡོད་ན་ཐང་སྐུ་རྒྱབ་ནས་ཚུར་ལ་བཤམ། །ཡང་ན་གཏོར་མའི་ཐོད་དེར་བརྐྱངས་ལ་བཤམ། །སྐུ་གཟུགས་སྐུ་དང་གཏོར་མ་གསུང་གི་རྟེན། །ཚོམ་བུ་ཐུགས་རྟེན་ཡིན་པར་རྒྱ་འགྲེལ་གསལ། །གཏོར་མ་དེ་ཉིད་ལྷ་བསྐྱེད་ཡིན་པའི་ཕྱིར། །དང་པོ་བྲན་ནས་མི་བསྒུལ་གསོ་མི་དགོས། །དེ་མདུན་དེ་ལས་ཆུང་ཙམ་གཏོར་མ་གཅིག །རྒྱུན་དུ་ནམ་འདོན་གསོ་བྲན་བྱ་བ་སྟེ། །དེ་ནི་རྟག་གཏོར་རྒྱུན་གཏོར་དོན་གཅིག་གོ །དྲག་པོ་ཡིན་ན་གཡས་གཡོན་སྨན་རཀ་བཤམ། །ནོར་ལྷའི་རིགས་ལ་ཟས་སྣ་གང་འཛོམས་བཤམ། །ཀླུ་རིགས་ཡིན་ན་འོ་མར་ཀླུ་སྨན་བཏབ། །བཙན་དང་འཇིག་རྟེན་གཞི་བདག་རིགས་ཡིན་ན། །ཟན་གྱི་གཡག་ལུག་བྱ་རིའི་གཟུགས་བཤམ་མོ། །དྲག་པོའི་རིགས་ལ་གཏོར་མ་ཤ་ཁྲག་བརྒྱན། །མཁའ་
རིར་ར་ཤ་དམ་ཅན་མཛོ་ཤ་སྤང་། །གཟའ་དང་དམ་ཅན་བཙན་རིགས་ར་ཤ་ལེགས། །ཀླུ་ཡི་རིགས་ལ་ཤ་ཆང་སྤང་བར་བྱ། །མཐའ་སྐོར་མཆོད་པ་སྣ་བདུན་སྐོར་བཤམ་བྱེད། །ཡོན་ཆབ་ཁྲག་དང་འོ་མ་ཞི་དྲག་ཁྱད། །ཐུན་མཚམས་འབུལ་རྒྱུའི་གཏོར་ཆུང་མང་དུ་བསག །བགེགས་བསྐྲད་མཚམས་གཅོད་ལ་སོགས་སྤྱི་དང་མཐུན། །དེ་ནས་རང་གི་ཡི་དམ་བདག་བསྐྱེད་བྱ། །དེ་ཡི་བསྙེན་པ་ཅུང་ཙམ་བྱས་པའི་རྗེས། །ལྷ་དེའི་གོང་ནོན་གཉེན་པོའི་ལྷར་བསྒྱུར་ཏེ། །དཔེར་ན་ཕྱག་བཞི་པ་ལ་བདེ་མཆོག་བཞིན། །།ཡེ་ཤེས་པ་ཡི་ཆོས་སྐྱོང་ཡིན་ན་ནི། །སྤྲུལ་གཞིའི་ལྷ་དེ་བསྒོམས་པས་འགྲུབ་པར་སླ། །འཇིག་རྟེན་པ་ལ་གང་འདུལ་གཉེན་པོའི་ལྷ། །གཟའ་ལ་ཕྱག་རྡོར་ཀླུ་ལ་རྟ་མགྲིན་དང་། །ཕོ་རྒྱུད་འདུལ་བའི་ལྷ་ནི་གཤིན་རྗེ་གཤེད། །མོ་རྒྱུད་འདུལ་བའི་ལྷ་ནི་ཧེ་རུ་ཀ །ཐམས་ཅད་ཀུན་ལ་གུར་དྲག་གྲོ་ལོད་སོགས། །བསྒོམ་པ་གཉེན་པོ་ཡེ་ཤེས་ལྷ་ཞེས་བྱ། །བསྐྱེད་རིམ་གསལ་ན་བྲན་གྱིས་རྗེ་མཐོང་འདྲ། །སྣང་སྲིད་འཁོར་འདས་ཐམས་ཅད་རང་གི་སེམས། །ཆོས་སྐྱོང་བཀའ་སྲུང་དྲེགས་པ་ཐམས་ཅད་ཀྱང་། །སེམས་ཀྱི་ཆོ་འཕྲུལ་ལས་གཞན་མེད་པར་
རྟོགས། །དེ་ནི་ལྟ་བ་གྱད་ཀྱི་ལྷ་ཞེས་བྱ། །དེ་ཡོད་རྩུབ་ཆག་འཁུ་ལྡོག་འབྱུང་མི་སྲིད། །བླ་མ་རིགས་བདག་དམ་ཆོས་སྙིང་གི་ནོར། །དམ་ཚིག་གཙང་ཞིང་། སྙིང་ནས་བྱང་ཆུབ་སྒྲུབ། །བསྟན་དང་བླ་མའི་དོན་ལ་སེམས་ཁུར་ཆེ། །ཡེ་ཤེས་ཆོས་སྐྱོང་ཕ་ཁུ་མ་སྲིང་ཚུལ། །འཇིག་རྟེན་ཆོས་སྐྱོང་སྤུན་དང་སྙིང་གི་གྲོགས། །ཁ་ཙམ་མིན་པ་སྙིང་ནས་དེ་ཡོད་ན། །བླ་རྡོ་སྲོག་འཁོར་རྟེན་རྫས་དེ་ལ་ཚང་། །བགེགས་དང་བར་ཆད་རང་གི་རྣམ་རྟོག་སྟེ། །རྣམ་རྟོག་ཡེ་ནས་ཆོས་སྐུ་རྗེན་པ་ཉིད། །དེ་ལྟར་རྟོགས་པས་།དམ་སྲི་མནན་པ་ཚང་། །ཀུན་རྫོབ་རྟེན་འབྲེལ་བགེགས་གཏོར་བྱིན་ལ་བསྐྲད། །མཚམས་བཅད་གུ་གུལ་བདུག་ལ་སྲུང་འཁོར་བསྒོམ། །རང་ཉིད་གོང་ནོན་གཉེན་པོའི་ལྷར་གསལ་བས། །མངོན་རྟོགས་བཞིན་དུ་མདུན་བསྐྱེད་གཏོར་མ་དེ། །ཆོས་སྐྱོང་གང་ཡིན་བསྒོམ་ཞིང་སྤྱན་འདྲེན་བྱ། །ཡེ་ཤེས་ཆོས་སྐྱོང་གུ་གུལ་ཤ་ཆེན་བསྲེག །འཇིག་རྟེན་ལྷ་ཀླུ་ལ་སྤོས་དཀར་དུད་པ་བཏང་། །གཟའ་དང་དམ་ཅན་བཙན་རིགས་ར་ཚིལ་གསུར། །སྤོས་དཀར་ནཱ་གི་སྦྱར་བ་ཀླུ་ཡི་སྤོས། །དེ་དག་མེད་ན་དྲི་བཟང་གང་འབྱོར་བཏང་། །གླ་
རྩི་འདྲེས་པའི་སྤོས་ནི་ཀླུ་ལ་སྤང་། །ཅི་ཡང་མེད་ན་ཤུག་དུད་ཙམ་གྱིས་འོང་། །དང་པོ་ཡིན་གྱི་རྒྱུན་དུ་དགོས་པ་མིན། །ཡེ་ཤེས་པ་ལ་སོ་སོར་གཏོར་ཆོག་ནས། །ཉིན་བར་ཐུན་གསུམ་མཚན་དང་ཐུན་བཞི་བྱེད། །མ་མགོན་ལ་སོགས་གཏོར་ཆོག་རྒྱས་པའི་རིགས། །སྔ་དྲོ་མངོན་རྟོགས་ནས་བཟུང་བསྟོད་པ་ཡན། །ཉིན་གུང་གསོལ་ཁ་དགོང་མོ་བསྐང་གསོལ་དང་། །མཚན་མོ་མཚལ་མའི་བསྟོད་པ་ཡན་ཆད་བྱ། །འཇིག་རྟེན་ཆོས་སྐྱོང་མཆོད་བསྟོད་གལ་ཆེའི་ཕྱིར། །ཉིན་གསུམ་མཚན་གསུམ་ཐུན་དྲུག་ལས་བྱང་བཏོན། །ལས་བྱང་ནམ་འདོན་རྒྱུན་གཏོར་གསོ་བྲན་བྱ། །ལས་བྱང་ཚར་ནས་ཐུན་གྱི་བསྙེན་པ་བྱ། །ཐུན་མཇུག་མཚམས་དེར་གཏོར་ཆུང་རེ་རེ་ལ། །བྱིན་རླབས་རྩ་བའི་སྔགས་ཀྱིས་ཁཱ་ཧི་སྦྱར། །སོ་སོའི་བསྟོད་བསྐུལ་རྒྱས་བསྡུས་གང་རིགས་ཤིག །དབྱངས་དང་རོལ་མོར་བཅས་པས་བཏོན་བྱས་ལ། །དཀྱིལ་འཁོར་འགྲམ་དེར་ཡར་ལ་ཕུལ་བའམ། །ཡང་ན་བསྒྲིགས་ཏེ་བཞག་ཀྱང་རུང་བ་ཡིན། །དེ་ནས་བསྙེན་ཚེ་དམིགས་པའི་རིམ་པ་ནི། །རང་ཉིད་ཡི་དམ་སྐུ་ཆེ་ནམ་མཁའ་ཁྱབ། །མདུན་དུ་ཆོས་སྐྱོང་རང་ལས་ཅུང་ཟད་དམའ། །
དབུ་ནི་རང་གི་སྙིང་ཐད་སླེབ་པ་ཙམ། །གཙོ་འཁོར་རྒྱན་དང་ཆ་ལུགས་མངོན་རྟོགས་བཞིན། །ཐུགས་ཀར་ཞི་བ་ཡིན་ན་ཟླ་བ་དང་། །དྲག་པོ་ཡིན་ན་ཉི་མའི་གདན་གྱི་སྟེང་། །རང་སྲོག་ས་བོན་མཐའ་མར་སྔགས་ཀྱིས་བསྐོར། །རང་གི་ཐུགས་ལས་འོད་ཟེར་འཕྲོས་པ་ཡིས། །ཁོ་ཡི་ཐུགས་ཀའི་ས་བོན་སྔགས་ལ་ཕོག །དཔེར་ན་རླུང་འཁོར་ལ་ནི་རླུང་ཕོག་བཞིན། །ཕོ་རིགས་གཡས་འཁོར་མོ་རིགས་གཡོན་དུ་འཁོར། །དེ་ལས་འོད་ཟེར་རང་མདོག་ལྕགས་ཀྱུའི་དབྱིབས། །རང་རང་གནས་པའི་ཕོ་བྲང་དེར་འཕྲོས་པས། །རང་རང་ལྷ་དེའི་ཐུགས་ཀའི་ས་བོན་ལ། འོད་ཟེར་ལྕགས་ཀྱུའི་རྩེ་མོ་དེ་ཡིས་འཁྱུད། །དཔེར་ན་ཞགས་པས་ཐེབས་པའི་དུད་འགྲོ་བཞིན། །འོད་དེས་འཐེན་པས་འཁོར་བཅས་མྱུར་དུ་བྱོན། །མདུན་བསྐྱེད་སྐུ་ལ་དབྱེར་མེད་ཐིམ་པར་བསམ། །དེ་ནས་རང་གི་ཞལ་ནས་གང་ཡིན་སྔགས། །བརྗོད་པས་སྔོན་གྱི་ཁས་བླངས་དམ་ཚིག་དྲན་། །དཔའ་བོ་ཆེན་པོས་ཅི་གསུངས་བཀའ་བསྒྲུབ་ཅེས། །རབ་ཏུ་དགྱེས་ཤིང་རང་ལ་གུས་འདུད་བསམ། །དམིགས་པ་དེ་ཉིད་ཁོ་ན་ཝིག་བྱ་ཞིང་། །ཞག་གསུམ་ལས་ནི་མི་
ཉུང་ཙམ་ཞིག་བཟླས། །དེ་ནི་བསྙེན་པའི་དམིགས་རིམ་ཡིན་པའོ། །དེ་ཚེ་སྐྱེས་པ་བུད་མེད་ཆས་བཟང་དང་། །སློབ་དཔོན་བཙུན་པ་ཁྲིམས་ལྡན་དཔོན་རིགས་དང་། །དམག་དང་ཁྲོམ་ཚོགས་ངོ་མི་ཤེས་པ་ཡི། །འདུ་འཚོགས་ཟང་ཟིང་བླ་རྟགས་སྲོག་ཆགས་རྨིས། །སྒོ་བརྡུང་ཁང་པ་འཚགས་དང་ཐུག་ཆོམ་དང་། །རླུང་ཐོག་སེར་ཕྲན་ཆར་དྲག་འབྲུག་སྒྲ་འབྱུང་། །དངོས་ཉམས་སེམས་འཁྲུགས་འཇིགས་སྐྲག་བློ་མི་བདེ། །དེ་ཡི་ས་བསྙེན་པའི་དྲོད་ཚད་གཏན་ལ་ཕེབས། །དེ་ནས་ཐུན་དང་འདོན་ལུགས་གོང་དང་མཚུངས། །རང་གི་ཐུགས་ལས་འོད་ཟེར་སྣ་ཚོགས་འཕྲོས། །མདུན་བསྐྱེད་ལ་ཕོག་སྔགས་དེ་དྲག་ཏུ་འཁོར། །དེ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས། །ཆོས་སྐྱོང་སྲུང་མ་འཇིག་རྟེན་སྐྱོང་བ་དང་། །ལྷ་སྲིན་དྲེགས་པ་སྟོབས་ལྡན་བདུད་རིགས་ཀྱི། །མཐུ་དང་ནུས་པ་སྟོབས་དང་གཟི་བརྗིད་དང་། །འཇིག་རྟེན་ཁམས་ཀྱི་ཚེ་དང་བསོད་ནམས་དང་། །འོད་ཟེར་ཁ་དོག་སྣ་ཚོགས་རྣམ་པར་བསྡུས། །ཆོས་སྐྱོང་ལ་ཐིམ་གཟི་བརྗིད་བདུན་འགྱུར་འཕེལ། །དེ་ཉིད་དངོས་གྲུབ་འབུལ་བའི་ཚུལ་ཉིད་དུ། །འོད་ཟེར་རྣམ་པར་ཚུར་བྱུང་བདག་ལ་
ཐིམ། །དམིགས་པ་དེ་ཉིད་བསྒོམ་ཞིང་ཞག་གསུམ་བསྙེན། །དེ་ཚོ་སྔར་རྨིས་སྐྱེས་པ་བུད་མེད་ཚོགས། །དེ་འདྲས་གུས་འདུད་ཕྱག་སྐོར་བྱེད་པ་དང་། །དཀར་གསུམ་ཟས་གོས་འབྲུ་དང་རིན་ཆེན་ཚོགས། །དངོས་སུ་བག་དྲོ་བྱིན་ཆགས་རིག་པ་དྭངས། །དེ་ཚེ་སྒྲུབ་པའི་དྲོད་ཚད་གཏན་དུ་ཕེབས། །དེ་ནས་ཞག་གཅིག་ལས་སྦྱོར་བྱ་བ་ནི། །ལྷ་དེ་ཞི་དྲག་གང་ཡིན་དེ་དང་བསྟུན། །རང་ཉིད་ཐུགས་ལས་འོད་ཟེར་སྔར་ལྟར་འཕྲོས། །མདུན་བསྐྱེད་ལ་ཕོག་མདུན་བསྐྱེད་ཐུགས་ཀ་ནས། །འོད་ཟེར་དཀར་པོ་ཟླ་བ་ཤར་བཞིན་དུ། །བདག་ཅག་དཔོན་སློབ་བསྲུང་བྱ་ཐམས་ཅད་ཀྱི། །ནད་གདོན་དགྲ་དང་བར་ཆད་ཐམས་ཅད་ཀུན། །མུན་པ་ལ་ནི་ཟླ་བ་ཤར་བའམ། །བ་མོར་ཉི་ཟེར་པོ་ཕོག་བཞིན་ཞི་བར་བྱས། །འཇིག་རྟེན་ཁམས་ཀྱི་ཞི་བའི་དངོས་གྲུབ་ཀུན། །འོད་ཟེར་དཀར་པོར་བསྡུས་ནས་བདག་ལ་ཐིམ། །ཞི་བའི་ཕྲིན་ལས་འགྲུབ་པའི་དངོས་གྲུབ་ཐོབ། །དཀར་གསུམ་བརྒྱན་པའི་གཏོར་མ་བཟང་པོ་འབུལ། །རང་ལ་གནོད་པའི་འཇིགས་པ་གང་ཡོད་པ། །ཞི་བའི་བཅོལ་གཏམ་བཀའ་བསྒོ་དྲག་ཏུ་བྱ། །རྨིས་ལྟས་ནམ་
ལངས་ཉི་མ་ཤར་བ་དང་། །ནད་གདོན་ཞི་བའི་བརྡའམ་ལུང་བསྟན་འབྱུང་། །རྒྱས་པར་རང་གི་འོད་ཟེར་མདུན་བསྐྱེད་ཕོག །མདུན་ལས་འོད་ཟེར་གསེར་མདོག་ཕྱོགས་བཅུར་འཕྲོས། །རང་དང་དམིགས་ཡུལ་འཁོར་སློབ་རིགས་རྒྱུད་སོགས། །པདྨ་ཆུ་ཡིས་བྲན་ལྟར་བཀྲག་མདངས་རྒྱས། །འཇིག་རྟེན་ཁམས་ཀྱི་ཚེ་བསོད་སྙན་དང་གྲགས། །འོད་ཟེར་སེར་པོར་བསྡུས་ནས་བདག་ལ་ཐིམ། །ཚེ་བསོད་རྒྱས་ཤིང་རྒྱས་པའི་དངོས་གྲུབ་ཐོབ། །ཁྱད་པར་ནོར་ལྷའི་རིགས་ནི་ཡིན་ན་ནི། །ཆོས་སྐྱོང་སྐུ་ལུས་བ་སྤུའི་བུ་ག་དང་། །ཐུགས་ཀའི་འོད་ཟེར་ཉི་ཟེར་འདྲ་བ་ལས། །རིན་ཆེན་ཟས་གོས་ལོངས་སྤྱོད་སྣ་ཚོགས་པ། །ཆར་བཞིན་བབས་པས་དགོས་འདོད་ལྷུན་གྲུབ་བསམ། །རྨི་ལམ་རིན་ཆེན་ཆར་པ་འབེབས་པ་དང་། ཁྲི་ལ་འདུག་དང་དར་ཕྱར་ལོ་ལེགས་རྨིས། །དངོས་སུ་ཟས་མ་ཟོས་ཀྱང་འགྲང་སྙམ་འབྱུང་། །སེམས་མཐོ་ང་རྒྱལ་ཁེངས་པའི་སྣང་བ་འཆར། །གཏོར་མ་རིན་པོ་ཆེ་ཡི་དབྱིབས་འདྲ་ལ། །འབྲུ་སྣ་ཟས་སྣ་ཤིང་ཏོག་བླུགས་པ་འབུལ། །སྟོབས་དང་འབྱོར་པ་རྒྱས་པའི་འདོད་གསོལ་བྱ། །དབང་ལ་རང་ལས་འོད་ཟེར་གོང་ལྟར་
འཕྲོས། །མདུན་བསྐྱེད་བསྐུལ་བས་མདུན་བསྐྱེད་ཐུགས་ཀ་ནས། །འོད་ཟེར་དམར་པོ་གློག་ཞགས་ལྟ་བུ་ནི། །ཕྱོགས་བཅུར་འཕྲོ་འམ་གང་དམིགས་ཕྱོགས་སུ་འཕྲོས། །རྒྱལ་བློན་ཡུལ་ཁམས་ལོངས་སྤྱོད་སྙན་གྲགས་བཅས། །འོད་ཟེར་དམར་པོར་བསྡུས་ནས་རང་ཉིད་ཀྱི། །གདན་ཁྲིའམ་ནི་སྐུ་ཡི་སྨད་ལ་བསྟིམ། །སྣང་སྲིད་དབང་སྡུད་དངོས་གྲུབ་ཐོབ་པར་བསམ། །ཁྱད་པར་དམིགས་ཡུལ་ངེས་པ་ཅན་ཡོད་ན། །དེ་ཉིད་འོད་དམར་ཞུ་བཅུག་རང་ལ་བསྟིམ། །གཏོར་མ་ཟུར་གཉིས་འབྲི་མོག་བྱུགས་པ་ལ། །མངར་གསུམ་ཆང་སོགས་བྲན་ནས་གཏོར་མར་འབུལ། །རང་གི་གང་དགོས་བཀའ་བསྒོ་དྲག་ཏུ་བྱ། །རྨི་ལམ་དུང་འབུད་ཁྲོམ་ཆེན་འདུ་བ་དང་། །ཕྱག་འཚལ་བུད་མེད་རྒྱན་ལྡན་འདུ་བ་འབྱུང་། །དངོས་སུ་བདེ་ཉམས་འདོད་ཆགས་འདྲེས་མ་སྐྱེ། །ཡང་ན་ཞེན་མེད་དགོས་མེད་རྟོགས་པ་འཆར། །དྲག་པོ་ཡིན་ན་དམར་གཏོར་ལིང་གར་བཅས། །དགྲ་བགེགས་དགུག་གཞུག་དྲག་ཏུ་བྱ་བའམ། །རྒྱས་པར་སྤྲོ་ན་ཕུར་གདབ་ལིང་ག་བསྒྲལ། །ལིང་རོ་དམར་གཏོར་ནང་དུ་འབུལ་བར་བྱ། །རང་གི་ཐུགས་ལས་འོད་ཟེར་མཐིང་
ནག་འཕྲོས། །མདུན་བསྐྱེད་ལྷ་ཡི་ཐུགས་ཀར་ཕོག་པ་ཡིས། །མཚང་ཆེན་གནད་ལ་ཕོག་པ་ཇི་བཞིན་འཕྲོས། །ཐུགས་ལས་འོད་ཟེར་མཐིང་ག་ཚ་ཞིང་རྩུབ། །འཁོར་ལ་ཕོག་པས་རང་དབང་མེད་པར་རྒྱུག །རང་འདྲ་སྤྲུལ་པའི་ཁྲོ་བོས་འཇིག་རྟེན་བཀང་། །གནོད་ཅིང་འཚེ་བའི་དགྲ་བགེགས་ལོག་འདྲེན་ཀུན། །ལ་ལས་བཟུང་ཞིང་ལ་ལས་གསོད་པར་བྱེད་། །ལ་ལས་ཤ་ཟོས་ལ་ལས་ཁྲག་ལ་འཐུང་། །ལ་ལས་གློ་སྙིང་ནང་ཁྲོལ་ཕྱོགས་ཀུན་ཁྱེར། །ལ་ལས་ལྤགས་གྱོན་ལ་ལས་རུས་པ་མུར། །བྱ་གཅན་ཐེད་ལ་རུབ་པ་ལྟ་བུར་དམིགས་། །ཐུན་གཏོར་བྲན་ལ་སོ་སོའི་བསྐུལ་པ་འདོན། །ཐེབ་ལྡོག་བརྩིས་ལ་ཕྱི་རོལ་ཟོར་དུ་འཕང་། །དངོས་ཉམས་ཞེ་སྡང་རྔམས་རྔམས་རྩིག་རྩིག་སྐྱེ། །ཉམས་དང་རྨི་ལམ་ཤ་ཁྲག་དོན་སྙིང་སྟེར། །སྲོག་ཆགས་བསད་སོགས་དྲག་པོའི་རྨིས་ལྟས་འབྱུང་། །རང་ལ་དགྲ་སོགས་དམིགས་ཡུལ་མེད་ན་ཡང་། །བསྟན་པའི་སྤྱི་དགྲ་བགེགས་སོགས་ལ་དམིགས་ནས། །དྲག་ལས་བརྡའ་མཚོན་འདི་ཙམ་མ་བྱས་ན། །མགོན་པོའི་རིགས་སོགས་བཀའ་སྲུང་དྲག་པོའི་རིགས། །བསྒྲུབ་ན་རང་གི་ཚེ་ལ་གནོད་པ་སྟེ། །དཔེར་ན་དགྲ་
ཡ་མེད་པར་དམག་བསྡུས་བཞིན། །དེ་དོན་མགོན་པོའི་རྒྱུད་སྡེ་རྣམས་སུ་གསལ། །བསྒྲལ་ཞིང་མ་ཚང་ཆོས་པའམ་དོན་མེད་མི། །དེ་ལ་དམིགས་ན་ཆོས་སྐྱོང་ཐུགས་ཀྱིས་ཁྲེལ། །འཁུ་ལྡོག་འབྱུང་ཞིང་ཕྱི་མའང་ངན་འགྲོའི་རྒྱུ། །བསྟན་པ་སྤྱི་ཡི་དོན་ལ་དམིགས་བྱས་ན། །ཆོས་སྐྱོང་དང་ནི་རང་ཉིད་བསམ་པ་གཅིག །ཞོར་ལ་རང་གི་དོན་ཡང་འགྲུབ་པ་ཡིན། །རང་འདོད་ཁོ་ནར་ལྷ་དེས་ལས་མི་བྱེད། །དེ་ལྟར་བསྙེན་པ་ཞག་གསུམ་བསྒྲུབ་པ་གསུམ། །ལས་སྦྱོར་ཞག་གཅིག་ཀུན་འདུས་ཞག་བདུན་ཚང་། །དེ་ནི་རྣལ་འབྱོར་རབ་ཀྱི་ལུགས་ཡིན་ཏེ། །འབྲིང་གི་གཉིས་འགྱུར་ཐ་མ་སུམ་འགྱུར་དང་། །ཡང་མཐའ་བཞི་འགྱུར་བྱས་ན་མི་འགྲུབ་མེད། །དེ་ནས་ལྷ་དེ་ཡེ་ཤེས་པ་ཡིན་ན། །བེར་ཆེན་ལ་སོགས་མཇུག་ནས་འབྱུང་བ་ལྟར། །དངོས་གྲུབ་ལེན་ཆོག་བཏོན་ལ་རྟེན་གཏོར་དེས། །རང་གིས་རང་ལ་བདག་འཇུག་གཏོར་དབང་བྱ། །རང་རང་སོ་སོའི་རྩ་སྔགས་གང་ཡིན་མཇུག །ཀཱ་ཡ་སིདྡྷི་ཨོ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུཾ། སརྦ་སིདྡྷི་ཧཱུྃ༔ ཞེས་བརྗོད་དཔྲལ་མགྲིན་སྙིང་ག་ལྟེ་བར་གཏུགས། །འཇིག་རྟེན་པ་ལ་གཏོར་དབང་
མི་བྱའོ། །དེ་ནས་ཡེ་ཤེས་འཇིག་རྟེན་གང་ཡིན་ཀྱང་། །གཏོར་མ་ལྷར་བསྐྱེད་ནམ་མཁར་བཏེགས་བྱས་ལ། །དེ་ནས་གཏོར་མ་དེ་ཉིད་གསོ་བྲན་བྱ། །མཆོད་པ་རྣམས་ཀྱི་ཁ་ཡང་ལེགས་པར་གསོས། །རང་རང་ལས་བྱང་གཏོར་ཆོག་འདོན་ལ་བསྔོ། །སྐབས་དེར་དགའ་སྟོན་ཚོགས་འཁོར་འབྱོར་ན་རབ། །ཚོགས་གཞུང་རང་གི་ཡི་དམ་བཞིན་དུ་བྱ། །ཆོས་སྐྱོང་གང་ཡིན་རྩ་སྔགས་ཤམ་བུ་རུ། །གྷ་ན་ཙཀྲ་ཁཱ་ཧི་སྦྱར་བས་འཐུས། །ལྷ་དེ་ཞི་བའི་སྒྲུབ་པ་ཡིན་ན་ནི། །གཏོར་མ་རང་དང་བསྲུང་བྱ་ཀུན་གྱིས་བཟལ། །གཏོར་བདུག་བྱིན་ཡང་ཕན་པ་ཆེ་བ་ཡིན། །རྒྱས་པ་ཡིན་ན་རང་གིས་ཅུང་ཟད་བཟའ། །རང་གི་ཁྱིམ་ཕུག་མཛོད་ཕུག་གང་བདེར་སྦ། །འབྲོག་པ་ཡིན་ན་གཏོར་རྩེ་རྐང་རྩེར་བཅུག །ལྷག་མ་ནང་འཁོར་མི་དང་ཆིབས་པར་སྦྱིན། །བ་གླང་བོང་བུ་བྱ་ཁྱིར་སྦྱིན་མི་རུང་། །དབང་གི་སྒྲུབ་པ་ཡིན་ན་གཏོར་མ་དེ། །རང་གིས་ཟོས་འཕྲོ་ཐབ་ཀྱི་མེ་ལ་བསྲེག །ལྷ་དེ་ཀླུ་རིགས་ཡིན་ན་བསྲེག་མི་རུང་། །མཚོའམ་ཆུ་ཆེན་ནང་དུ་ཕུལ་བར་བྱ། །དྲག་པོའི་སྒྲུབ་པ་གནད་ཆེན་ཡིན་ན་ནི། །སླ་ང་ལ་སོགས་ལྕགས་སྣོད་ཆེན་པོའི་ནང་། །སྒྲུབ་རྟེན་
གཏོར་མ་ཆེ་བ་གཉིས་ཀ་བཞག །མཐའ་རུ་གཏོར་ཆུང་ཕུལ་ཚད་རྣམས་ཀྱང་སྤུངས། །ཙཀྱི་ཡར་ཤབ་ཤ་ཁྲག་ཆང་གིས་བྲན། །དང་པོ་དཀར་གཏོར་ཕུལ་ཞིང་གསེར་སྐྱེམས་གཏོར། །མདུན་དུ་དཀར་གཏོར་དེ་རྒྱབ་གཏོར་ཆེན་དེ། །གནོད་པའི་ཕྱོགས་སུ་གཏོར་ཞལ་ཕར་ལ་བསྒྱུར། །མར་རྒྱན་ཐམས་ཅད་དངོས་གྲུབ་ཚུལ་དུ་བླངས། །དེ་ནི་སྔགས་མར་རྩིས་ཆེན་བསྲུང་བྱར་སྦྱིན། །སླར་ཡང་གཏོར་མ་གསོ་བྲན་བྱས་པ་ལ། །དགུག་གཞུག་བྱས་ཤིང་དགྲ་བགེགས་ཤ་ཁྲག་དམིགས། །ནམ་མཁར་བཏེག་པའི་ཆོས་སྐྱོང་ལྷ་ཚོགས་ལ། །དམག་ལྟོ་སྦྱིན་པའི་ཚུལ་དུ་ཁཱ་ཧིས་བསྔོས། །ལྷ་དེའི་བསྐུལ་པ་གང་ཡོད་ཐམས་ཅད་བཏོན། །ཐེབ་ལྡོག་རྩིས་ལ་ཕྱོགས་ནི་གཙང་བའི་སར། །དཀར་གཏོར་གཏོར་ཆེན་དར་ནག་རིམ་པས་ཁྱེར། །གོམ་པ་རེ་བཞི་ལས་ནི་ཐུང་མི་རུང་། །ཐུང་ན་རང་གི་འཁོར་ལ་རྐྱེན་ཁ་འབྱུང་། །དེ་བས་རིང་ཡང་ཉེས་སྐྱོན་མེད་པར་གསུངས། །ཅུང་ཟད་ས་གཞི་ཁོད་སྙོམས་ས་རུ་བསྡད། །སྤྲོ་ན་གསེར་སྐྱེམས་བསྔོ་ཞིང་དཀར་གཏོར་འབུལ། །དེ་ནས་བསྐུལ་པ་ཆུང་ངུ་གཅིག་བྱ་སྟེ། །དེ་ནས་བཞེས་འབོད་གང་ཤེས་དྲག་ཏུ་
བྱ། །དེ་ནས་དྲག་སྔགས་བརྗོད་ཅིང་གཏོར་ཆུང་རྣམས། །རིམ་པར་འཕངས་རྗེས་གཏོར་ཆེན་གཉིས་ཀྱང་འཕེན། །དམིགས་པ་དགྲ་ལ་མཚོན་ཆའི་ཆར་པ་སྟེ། །བགེགས་ལ་མེ་ཡི་ཕུང་པོ་ཆེན་པོར་དམིགས། །དགྲ་རྣམས་ཕྱོགས་མང་སེར་བ་བརྒྱབ་འདྲར་གཙགས། །དར་ནག་བརྡབས་པས་ནམ་མཁའི་ལྷ་ཚོགས་ཀུན། །སེར་སྤྲིན་དྲག་པོ་རླུང་གིས་བསྐྱོད་པ་བཞིན། །འུར་སྒྲ་ཐུག་ཆོམ་དང་བཅས་དགྲ་ཡུལ་སོང་། །དེ་རུ་གནས་བཅས་ཟ་སྐལ་གཏད་པར་བསམ། །གཏོར་མ་མ་གྱུ་ལན་གསུམ་འཕེན་ཝིག་བྱ། །གཏོར་མ་བྱ་ཁྱིས་ཟོས་ཀྱང་འགལ་བ་མེད། །གཏོར་ཟན་དེ་ཉིད་དགྲ་ལ་འཁྱར་དོགས་ན། །མེ་ཧོམ་སྦར་ལ་དེ་རུ་བསྲེག་པར་བྱ། །དེ་ཡང་ཤིང་དེ་གྲུ་གསུམ་བསྒམ་བྱས་ལ། །མེ་སྦར་མེ་ནང་སྐད་ཅིག་ཆོས་སྐྱོང་དམིགས། །གཏོར་མ་དགྲ་བགེགས་དམིགས་ལ་ཞལ་དུ་བསྟབ། །ཚིག་རྗེས་གཤེགས་གསོལ་མི་དགོས་མི་དམིགས་བྱ། །གཏོར་གཞོང་སྒྲུབ་པ་རི་རབ་ཆེན་པོའི་འོག །དམ་སྲི་བཀུག་མནན་དམིགས་ལ་རྟ་བྲོ་བརྡུང་། །གྲྭ་སློབ་སྔོན་བཏང་རང་ཉིད་ཕྱི་ནས་འོང་། །བྱ་ཁྱུང་འཇིགས་པས་ཕྱིར་གཟིགས་རྗེས་བཅད་བསམ། །ཕྱི་མིག་མི་
བལྟ་ཁྱུང་སྔགས་བགྲང་ཞིང་འོང་། །གལ་ཏེ་མཐུ་བྱས་ཟོར་སོགས་དགོས་ཡོད་ན། །ནམ་ཕྱེད་སུས་ཀྱང་མི་གོ་གསང་ཐབས་བྱ། །ནང་དུ་ཕྱིན་ནས་བཀྲ་ཤིས་བརྗོད་པ་དང་། །ཡེ་ཤེས་པ་ནི་གཤེགས་སམ་རྟེན་ལ་བསྟིམ། །བསྐྱེད་པའི་དམ་ཚིག་པ་རྣམས་རང་ལ་བསྟིམ། །འཇིག་རྟེན་པ་ཡི་ལྷ་རྒོད་ཡིན་ན་ནི། །སྤྱན་དྲངས་པ་ཡི་ལྷ་དེ་རང་གནས་གཤེགས། །བསྐྱེད་པའི་དམ་ཚིག་པ་དེ་རྟེན་ལ་བསྟིམ། །དེ་ལྟར་ཡེ་ཤེས་ལས་དང་འཇིག་རྟེན་གྱི། །ཆོས་སྐྱོང་དམ་ཅན་རྒྱ་མཚོའི་སྤྱི་སྒྲུབ་འདི། །རྟ་ལོ་ཁྲུམས་ཀྱི་ཟླ་བའི་དམར་པོ་ཡི། །མར་ངོའི་ཚེས་བཅུའི་སྔ་དྲོའི་ཐུན་མཚམས་ལ། །རཱ་ག་ཨ་སྱས་ངག་ཁྲིད་ཚུལ་དུ་སྨྲས། །བརྩོན་འགྲུས་རྒྱ་མཚོས་བརྗེད་ཐོ་ཡི་གེར་བཀོད། །འདི་ལ་སྔ་འོས་གསལ་བཀོད་ཉེས་མཆིས་ན། །བཀའ་སྲུང་དམ་ཅན་རྒྱ་མཚོའི་ཚོགས་ལ་བཤགས། །དགེ་བས་དཀོན་མཆོག་དབུ་འཕང་ཆེར་མཐོ་ཞིང་། །སངས་རྒྱས་བསྟན་པ་ཡུན་རིང་གླུ་རྒྱས་པར་ཤོག །ལེའུ་ཞེ་ལྔ་པའོ་མངྒ་ལཾ།།་་་་་སྣོད་ལྡན་མ་གཏོགས་པ་འདིའང་བསྟན་པར་མི་བྱ་གསུངས་པས་ཤེས་པར་བྱོས་ཤིག། །།