ལེའུ་ཞེ་དྲུག་པ། ཆོས་སྐྱོང་ཕྲིན་ལས་མྱུར་དུ་འགྲུབ་པའི་ཕྱིར། །བུ་ཡིག་མདེའུ་ཐུང་ཕྲིན་ལས་ཀུན་འགྲུབ་ཡོད། །
༼མོ༽ རི་ཆོས་མཚམས་ཀྱི་ཞལ་གདམས་ལས། །ཆོས་སྐྱོང་སྤྱི་སྒྲུབ་ཀྱི་བུ་ཡིག་མདེལ་ཐུང་ཕྲིན་ལས་ཀུན་འགྲུབ་ཅེས་བྱ་བ་བཞུགས་སོ། །ན་མོ་མ་ཧཱ་ཀཱ་ལ་ཀཱ་ལི་ཡེ། མ་མགོན་ལྕམ་དྲལ་ཚོགས་ལ་གུས་བཏུད་ནས། །ཆོས་སྐྱོང་སྤྱི་སྒྲུབ་བུ་ཡིག་གསལ་བཀོད་བྱ། །བཀའ་ཡི་གནང་བ་སྩོལ་ལ་བྱིན་གྱིས་རློབས། །གཞན་རྣམས་ཆོས་སྐྱོང་སྤྱི་སྒྲུབ་གཞུང་བཞིན་ལ། །རང་བྱུང་མ་དང་དུད་སོལ་རེ་མ་ཏི། །ཨེ་ཀ་ཙ་ཏི་ལ་སོགས་ཡེ་ཤེས་ཀྱི། །ལྷ་མོ་སྒྲུབ་ཚེ་དམིགས་རིམ་མི་འདྲ་སྟེ། །རང་གི་ཐུགས་ལས་འོད་ཟེར་ཁ་དོག་ལྔ། །སྟོང་སྐུད་ལྟ་བུ་རང་གི་ཞལ་ནས་ཐོན། །ལྷ་མོའི་ཞལ་ཞུགས་ཐུགས་ཀར་ཐིམ་པའི་མོད། །སྔགས་ཕྲེང་དྲག་འཁོར་ལྷ་མོའི་ཐུགས་རྒྱུད་བསྐུལ། །ལྷ་མོས་བདག་ལ་བུ་ཡི་འདུ་ཤེས་སྐྱེས། །བདག་ལ་ཤིན་ཏུ་བྱམས་པའི་རང་བཞིན་གྱི། །འོད་ཟེར་ཚུར་བྱུང་རང་གི་སྙིང་གར་ཞུགས། །ལྷ་མོའི་བྱིན་རླབས་དངོས་གྲུབ་བདག་ལ་ཐིམ། །ལྷ་མོར་མ་ཡི་འདུ་ཤེས་དད་གུས་བསྐྱེད། །དེ་ནི་མ་ལྟར་སྒྲུབ་པའི་དམིགས་རིམ་ཡིན། །སྔོན་ལྟར་རང་གི་འོད་ཟེར་ལྷ་མོར་ཕོག །ལྷ་མོས་བདག་ལ་མིང་པོའི་འདུ་ཤེས་སྐྱེས། །ལྷ་མོ་བདག་ལ་བརྩེ་ཞིང་གདུང་བ་ཡི། །རང་བཞིན་འོད་ཟེར་ལྟེ་
བ་ནས་ཚུར་བྱུང་། །རང་གི་ལྟེ་བར་ཞུགས་ནས་ཐུགས་ཀར་ཐིམ། །ལྷ་མོར་སྲིང་མོའི་འདུ་ཤེས་བརྩེ་གདུང་བསྐྱེད། །དེ་ནི་སྲིང་ལྟར་སྒྲུབ་པའི་དམིགས་རིམ་ཡིན། །རང་གི་ཐུགས་ལས་འོད་ཟེར་སྔར་བཞིན་འཕྲོས། །ལྷ་མོའི་ཐུགས་ཀར་ཕོག་པས་ཐུགས་རྒྱུད་བསྐུལ། །ལྷ་མོས་བདག་ལ་ཁྱོ་ཡི་འདུ་ཤེས་སྐྱེས། །ལྷ་མོ་བདག་ལ་དགྱེས་ཤིང་ཆགས་པ་ཡི། །འོད་ཟེར་ཐུགས་ཀ་ནས་བྱུང་བྷ་གར་ཐོན། །རང་གི་རྡོ་རྗེ་ནས་ཞུགས་ཐུགས་ཀར་ཐིམ། །དངོས་གྲུབ་ཐོབ་ཅིང་བདེ་བ་རྒྱས་པར་བསམ། །འདི་ནི་ཁྱིམ་པ་རྣམས་ཀྱིས་མི་རུང་སྟེ། །ལྷ་མོ་ཕྲག་དོག་ཆེ་བས་ཆུང་མ་འཆི། །བཙུན་པས་བྱས་ན་འདུལ་ཁྲིམས་གཙང་བ་ཡིས། །གདམས་ངག་མཆོག་ཏུ་ཟབ་པ་ཡིན་པ་སྟེ། །ལྷ་མོ་ཚུལ་ཁྲིམས་སྙིང་ཉེ་མ་ཞེས་བྱ། །རང་ཉིད་ཡི་དམ་ང་རྒྱལ་བརྟན་པ་ཡིས། །འོད་ཟེར་མི་སྤྲོ་སྔགས་ནི་བཀའ་བསྒོའི་ཚུལ། །བརྗོད་པས་ལྷ་མོས་སྔོན་གྱི་དམ་ཚིག་དྲན། །ལྷ་མོས་བདག་ལ་རྗེ་དཔོན་འདུ་ཤེས་སྐྱེ། །ཐུགས་ལ་གང་བཞེད་ཁོ་མོས་བསྒྲུབ་བོ་ཞེས། །ཁས་བླངས་ཞལ་བཞེས་དམ་བཅའ་ཡང་ཡང་མཛད། །རང་འདྲའི་སྤྲུལ་པས་འཇིག་རྟེན་
ཁམས་ཀུན་གང་། །དཀར་མོས་ཞི་བྱས་སེར་མོས་ཚེ་བསོད་སྤེལ། །དམར་མོས་དབང་བསྡུས་ནག་མོས་དགྲ་བགེགས་བསྒྲལ། །ཀུན་ཀྱང་ཚུར་འདུས་ལྷ་མོ་ཉིད་ལ་ཐིམ། །བྲན་ལྟར་སྒྲུབ་འདི་ཤིན་ཏུ་རྣོ་མྱུར་ཏེ། །ཀོ་ལོང་ཕྲག་དོག་རྩུབ་འགྱུར་ཆེ་བ་ཡིན། །དེ་ཕྱིར་ལྷ་མོ་བསྟེན་དཀའ་མ་ཞེས་བྱ། །དེ་དག་སྒྲུབ་པའི་དུས་ཀྱི་དམིགས་རིམ་སྟེ། །བསྙེན་དང་ལས་སྦྱོར་དམིགས་རིམ་སྤྱི་སྒྲུབ་ལྟར། །ཁྱད་པར་ལྷ་མོ་མ་ལྟར་སྒྲུབ་ན་ནི། །ལས་སྦྱོར་ཞི་རྒྱས་དབང་གསུམ་གང་རུང་སྟེ། །ཁྱད་པར་ཞི་བ་བསྒྲུབ་ན་ཐུན་གྱི་མཇུག ༈ རྩ་སྔགས་ཀཱ་ཡ་ཝཱཀྐ་ཙིཏྟ་དང་། །སརྦ་སིདྡྷི་ཧཱུྃ་ཞེས་སྦྱར་བ་ཡི། །སྔགས་ནི་ཕྲེང་སྐོར་ཙམ་རེ་བཟླས་པའི་ཚེ། །མ་གཅིག་ལྷ་མོའི་ནུ་མ་བདག་གིས་ནུས། །མཆོག་དང་ཐུན་མོང་དངོས་གྲུབ་ཐོབ་པར་བསྒོམ། །སྲིང་ལྟར་སྒྲུབ་ན་སྲིང་མོའི་འདུ་ཤེས་ཀྱིས། །ངོ་ཚ་སྲུང་ཞིང་གསང་གནས་སྦ་བ་གཅེས། །མཛའ་ལྟར་བསྟེན་ན་རང་ཉིད་ཡི་དམ་གསལ། །ཁྱད་པར་གཤིན་རྗེ་གཤེད་དང་རྟ་མགྲིན་བསྒོམ། །ལྷ་མོ་དང་སྦྱོར་གསང་མཆོད་ཕུལ་བར་་བསྒོམ། །བྲན་ལྟར་སྒྲུབ་ན་བྱ་ནག་ལུག་ནག་ནི། །དངོས་སམ་ཟན་ལ་
བཟོས་པ་མཆོད་པར་བྱ། །དེ་དག་སྒྲུབ་ཐབས་སྤྱི་དང་མི་འདྲ་བའི། །ལྷ་མོ་ཁོ་ནའི་ཟབ་གནད་ངོ་མཚར་ཆེ། །ཨྠྀི། །ཡེ་ཤེས་ལྷ་མོ་རྣམས་ནི་མ་ལྟར་བསྟེན། །ལས་ཀྱི་ལྷ་མོ་སྲིང་དང་མཛའ་ལྟར་བསྟེན། །འཇིག་རྟེན་ལྷ་མོ་བྲན་ལྟར་བསྟེན་པ་སྟེ། །མཛའ་བྲན་གཉིས་ཀ་ལྟར་བསྟེན་འཁོར་ཚབས་ཆེ། །ལྷ་མོའི་རིགས་ནི་མང་པོ་འདོན་ན་ནི། །ལ་ལ་མ་དང་ལ་ལ་གྲོགས་དང་སྲིང་། །དེ་དག་སོ་སོར་བསྟེན་པས་ཤིན་ཏུ་ལེགས། །ཨྠྀི། །དེ་ནས་ཆོས་སྐྱོང་སྤྱི་ཡི་སྒྲུབ་པ་ཡི། །ཟབ་ཁྱད་རྣོ་མདེལ་སྔགས་ཀྱི་ཤམ་བུ་ནི། །བསྙེན་སྒྲུབ་བྱས་ཀྱང་རྟགས་མཚན་ཡེ་མེད་ན། །རྩ་སྔགས་ཤམ་བུར་སྔགས་འདི་སྦྱར་ལ་བཟླས། །ཨུ་ནེ་ཨུ་ནེ་ཨུ་ནེ། ཨ་ཨ་ཨཱ། ཨི་ཨི་ཨཱི། ཨུ་ཨུ་ཨཱུ། ཨ་ཀརྨ་ཡ་ས་མ་ཡ་ཛ་ཛཿ ཅེས་བཟླས་རྟགས་མཚན་མེ་ལོང་བལྟས་ལྟར་གསལ། །བསྙེན་སྒྲུབ་རྟགས་ཐོན་ལས་ལ་སྦྱར་བ་ནི། །རྩ་སྔགས་གང་ཡིན་མཇུག་ཏུ་སྔགས་འདི་སྦྱར། །ནད་གདོན་བར་ཆད་སརྦ་ཤཱནྟཾ་ཀུ་རུ་ཡེ་སྭཱ་ཧཱ། རྒྱས་པའི་ལས་སྒྲུབ་སྔགས་ཀྱི་ཤམ་བུ་ནི། །ཚེ་བསོད་དཔལ་འབྱོར་པུཏྟིཾ་ཀུ་རུ་ཧཱུཾ་སྭཱ་ཧཱ། དབང་གི་ལས་སྒྲུབ་
དུས་སུ་སྔགས་ཤམ་ནི། །ལོ་ཀཱ་སིདྡྷི་པཱ་ཤཾ་ཀུ་རུ་ཧཱུྃ་སྭཱ་ཧཱ། དྲག་པོའི་ལས་སྒྲུབ་དུས་སུ་སྔགས་ཤམ་ནི། །རྩ་སྔགས་མཇུག་ཏུ་ཧཱུྃ་ཕཊ་མི་འབྱར་ན། །གནོད་བྱེད་སརྦ་ཤ་ཧཱུཾ་མཱ་ར་ཡ་ཕཊ། །ཧཱུཾ་ཕཊ་འབྱར་ན་ཧཱུྃ་གི་གོང་དེ་རུ། །མཱ་ར་ཡ་ཡན་སྔགས་དེ་འཛུད་པ་ཡིན། །འདི་དག་སྤྱི་མཚམས་ཆོས་སྐྱོང་བསྙེན་སྒྲུབ་སྟེ། །འབོད་རྦད་བསད་གསུམ་ལྟ་བུ་མ་ཡིན་ནོ། །དེ་ཕྱིར་འདི་དག་ནམ་ཡང་བསྒྲུབ་ཏུ་རུང་། །ཆོས་སྐྱོང་འབོད་རྦད་བསད་གསུམ་སྒྲུབ་པ་དང་། །དེ་གསུམ་གཅིག་དྲིལ་སྒྲུབ་པ་མང་ན་ཡང་། །དགྲ་གཅིག་ངེས་པར་གསོད་ན་མ་གཏོགས་པ། །ནམ་དགའ་རང་གར་སྒྲུབ་པ་རུང་བ་མིན། །དེ་ཕྱིར་སྤྱི་སྒྲུབ་འདི་ནི་ཀུན་ལ་ཕན། །ཆོས་སྐྱོང་སྤྱི་སྒྲུབ་བུ་ཡིག་མདེལ་ཐུང་འདི། །རྟ་ལོ་ཁྲུམས་ཟླའི་མར་ངོའི་ཚེས་བཅུའི་གུང་། །སྔགས་འཆང་རཱ་ག་ཨ་སྱས་སྨྲས་པ་དེ། །བླ་མ་བརྩོན་འགྲུས་རྒྱ་མཚོས་བརྗེད་ཐོར་བྲིས། །གསང་སྔགས་སྔ་འོས་གསལ་བར་བཀོད་པའི་ཉེས། །མ་གཅིག་ལྷ་མོ་སྟོང་རྩའི་དྲུང་དུ་བཤགས། །དགེ་བས་བུ་སློབ་ཡང་སློབ་བརྒྱུད་པར་བཅས། །ཕྲིན་ལས་རྣམ་བཞི་ལྷུན་གྱིས་འགྲུབ་པར་ཤོག །ལེའུ་ཞེ་དྲུག་པའོ་མངྒ་ལཾ།་་་་འདིའང་སྣོད་མིན་ལ་ཤིན་ཏུ་གསང་བ་དམ་ཚིག་གོ། །