ལེའུ་ཞེ་བདུན་པ། སྒྲུབ་པ་ཀུན་ལ་བར་ཆད་མེད་པའི་ཕྱིར། །སྒབ་འདྲེ་མནན་ཐབས་ཧ་ལའི་རི་རབ་ཡོད། །
༼ཙི༽ རི་ཆོས་མཚམས་ཀྱི་ཞལ་གདམས་ལས། སྒྲུབ་པ་སྤྱིའི་དམ་སྲི་སྒབ་འདྲེ་མནན་ཐབས་སྟོབས་ཆེན་ཧྭ་ལ་འབར་བའི་རི་རབ་ཅེས་བྱ་བ་བཞུགས་སོ། །ན་མོ་བཛྲ་ཀྲོ་དྷ་མ་ཧཱ་བ་ལ་ཡེ། ཁྲོ་བཅུའི་ནང་ནས་འོག་ཕྱོགས་ཁྲོ་བོ་ལ། །གུས་པས་ཕྱག་འཚལ་སྟོབས་ཀྱི་དངོས་གྲུབ་སྩོལ། །ལྷ་རྣམས་ཀུན་ལ་སྒབ་འདྲེ་རེ་རེ་ཡོད། །དཔེར་ན་ཤཱཀ་ཐུབ་ལ་ནི་ལྷས་བྱིན་བཞིན། །སེམས་ཅན་ཀུན་ལ་ལྷན་ཅིག་སྐྱེས་པའི་བདུད། །འབྲལ་བ་མེད་ཅིང་གནོད་པའི་སྨོན་ལམ་ཅན་། །དེ་ཕྱིར་འཇིག་རྟེན་ལྷ་ལའང་སྒབ་འདྲེ་རེ། །དེ་སྒྲུབ་སྔགས་པའི་ཚེ་དང་བསོད་ནམས་རྐུ། །དེ་དག་མནན་ཐབས་སོ་སོའི་སྒྲུབ་ཐབས་ལས། །སོ་སོར་གསུངས་ཀྱང་རྟགས་ཐོན་བསྒྲུབ་དགོས་ཤིང་། །རྫས་སོགས་ཕྱག་ལེན་དཀའ་བས་ལག་མི་ལོན། །དེ་ཕྱིར་སྒྲུབ་པ་མི་དགོས་རྫས་མི་དགོས། །གློ་བུར་འདྲེ་རིགས་བཙན་ཐབས་མནན་པའི་ཐབས། །གཏེར་ཁ་གསར་རྙིང་འགའ་ནས་གསུངས་མོད་ཀྱང་། །ཤིན་ཏུ་སླ་བ་གསར་མའི་ལུགས་འདི་ནི། །བྲམ་གཟུགས་མགོན་པོའི་ཆོས་སྐོར་གཉན་ལོའི་ལུགས། །ཤོག་
བུ་གཅིག་ལ་མ་ཧཱ་བ་ལའི་སྐུ། །གླང་མགོ་དམར་པོ་རྭ་ནི་གདེངས་པའི་བར། །ཁྲོ་ཞལ་དམར་པོ་ཞལ་དུ་སྦྲུལ་ཟ་བ། །དེ་སྟེང་མི་མགོ་སྔོན་པོ་མིག་གཅིག་པ། །དབུ་སྐྲ་དར་སྔོན་གྱིས་བཅིངས་དར་དཔྱངས་འཕུར། །འོག་མའི་མགོ་ལ་སྦྲུལ་གྱི་གདེངས་ཀ་བདུན། །ལྟེ་བ་ཟུར་གསུམ་ཧོམ་ཁུང་ཐུར་བསྟན་ནང་། །དགྲ་བགེགས་ས་བོན་ནི་དྲི་མགོ་ཐུར་བསྟན། །སྐུ་མདོག་དུད་ཁ་ཕྱག་གཉིས་ཐུགས་ཀར་སྦྱར། །ཕྱག་བར་ཕུར་བུ་ཀྲྀ་ཏྲི་ལ་ཚད་བྲི། །སྐུ་སྨད་སྦྲུལ་མཇུག་ལྗང་གུ་གཡས་འཁྱིལ་ལོ། །དེ་ཡི་རྒྱབ་ཏུ་སྔགས་འདི་ཐུར་དུ་བརྩེགས། །སྔགས་ཕྲེང་གཅིག་ལ་བྲི་བ་ཤོང་བར་བྱ། །ཨོཾ་ཤ་མ་ར་ན་པྲ་ཤག་དུན་ཧཱུྃ་ཧཱུྃ་ནན་དུལ་དུལ་ནན་རྦད་སོད། སྙིང་ལ་མཱ་ར་ཡ་སོད། ཅེས་བྲི་གཏོར་མ་གཅིག་ཀྱང་བཤམས་བྱས་ལ། །བ་ལང་སྤྱོད་ནས་བསྒོམ་འདྲ་སྤྱན་དྲངས་བསྟིམ། །ཨོཾ་མ་ཧཱ་བ་ལ་ཧཱུྃ། ཅེས་པ་བརྒྱ་རྩ་རྟེན་འབྲེལ་རབ་གནས་བྱ། །རྩི་སྔགས་ཁཱ་ཧི་བཏགས་པས་གཏོར་མ་སྦྱིན། །ཨརྒྱུ་ལ་སོགས་སྔགས་ཀྱིས་མཆོད་བྱས་ནས། །ཧཱུྃ། འཇིག་རྟེན་ལྷ་འདྲེ་ཀུན་གྱི་གཤེད་པོ་སྟེ། །ལས་ཀྱི་མཐུ་ལས་གྲུབ་པ་བདུད་ཀྱི་བུ། །བ་ལང་སྤྱོད་ཀྱི་གླིང་ལ་
དབང་བསྒྱུར་བ། །སྟོབས་ཆེན་མ་ཧཱ་བ་ལ་ཁྱོད་ལ་བསྟོད། །སྐུ་གཟུགས་འདི་དང་དབྱེར་མེད་བརྟན་བཞུགས་ལ། །ཁྱོད་ཀྱི་འདུལ་སྐལ་ཡིན་པས་འདྲེ་འདི་ནོན་། །སྟོབས་ཆེན་ཁྱོད་ཀྱི་དམ་ཚིག་དུས་ལ་བབ། །ཅེས་བརྗོད་སྐུ་གཟུགས་དེ་དང་དབྱེར་མེད་བསྟིམ། །ཤོག་བུ་གཙང་མར་ལིང་ག་སྤྱི་མཚམས་བྲི། །ཡན་ལག་འབྲུ་བཞི་ཕྱི་རོལ་ཛ་ཁྲོ་བསྐོར། །སྙིང་གར་ཛཡིག་ཁ་སྤྲོད་གཉིས་ཀྱི་བར། །ནི་ཏྲི་ཁུག་གསུམ་བརྩེགས་མར་བྲི་བར་བྱ། །ལྟོ་བའི་ནང་དུ་སྒྲུབ་ལ་བར་གཅོད་པའི། །དམ་སྲི་སྒབ་འདྲེ་ཤི་གཤེད་གསོན་འདྲེ་སོགས། །གདོན་རིགས་གང་གནོད་མིང་མཇུག་ཁུག་ནན་བྲི། །རང་མིང་ལྷ་མིང་དེ་རུ་བྲི་མི་རུང་། །དྲི་མ་སོང་དོགས་མེ་དང་རླུང་ལ་གཡུག །མདུན་དུ་བཞག་ལ་དགུག་གཞུག་སྤྱི་ལྟར་ལས། །ཆོས་སྐྱོང་འདི་དང་འདི་ཞེས་བསྒྲུབ་པ་ལ། །བར་དུ་གཅོད་པའི་སྒབ་འདྲེ་གང་ཡིན་པ། །ཁུག་ཅིག་ཛཧཱུྃ་བཾ་ཧོ༔ཞེས་པ་དེ། །བརྒྱའམ་ཉེར་གཅིག་བདུན་སོགས་ནན་ཏན་བྱ། །རང་ཉིད་ཡི་དམ་ཁྲོ་བོའི་ཐུགས་ཀ་ཡི། །འོད་ཟེར་ལྕགས་ཀྱུས་ཡང་ཡང་བཀུག་ལ་བསྟིམ། །ཕྱི་སྒོའི་ཐེམ་འོག་གྲུ་གསུམ་དོང་བྲུས་
ལ། །དེ་ནང་ལིང་ག་གན་རྐྱལ་མགོ་ཕྱིར་བསྟན། །དེ་སྟེང་མ་ཧཱ་བ་ལའི་སྐུ་དེ་སྒྲུབ། །དབུ་ནི་ཕྱིར་བསྟན་ཁ་སྦྱོར་བྱས་ལ་མནན། །ཤུགས་ཆེན་མི་ཡིས་བྱིས་པ་མནན་པ་ལྟར། །མ་ཧཱ་བ་ལས་ནམ་ཡང་མི་བཏང་བསམ། །ས་ཁོད་རིམ་གཅིག་མནན་པའི་སྟེང་དུ་ནི། །རོ་གཡམ་གཅིག་གི་ངོས་ནི་གཉིས་པོ་ལ། །རྡོ་རྗེ་རྒྱ་གྲམ་རི་རབ་གླིང་བཞི་བྲི། །དམྱལ་ཡུལ་ཙམ་དུ་ཐུག་པར་ཐུར་མནན་སྟེང་། །རླུང་ནི་རྡོ་རྗེ་རྒྱ་གྲམ་འབྱུང་རིམ་བརྩེགས། །དེ་སྟེང་རི་རབ་གླིང་བཞིས་མནན་པར་དམིགས། །བྱམས་པ་མ་བྱོན་བར་དུ་མ་ལྡང་ཞིག །དེ་ནས་ལོངས་ལ་བྱང་ཆུབ་སེམས་བསྐྱེད་ཞུས། །དེ་བར་མ་ཧཱ་བ་ལས་མ་བཏང་ཞིག །ཅེས་བརྗོད་ས་རིམ་དགུ་ལ་རྒྱ་གྲམ་རེ། །དེ་སྟེང་མེ་ཁྲོལ་དེ་སྟེང་ཆུ་ཡང་བླུགས། །ས་ཡིས་བཀབ་ལ་བཅག་བརྡུང་མི་མངོན་བྱ། །རྟ་བྲོ་གང་ཤེས་བརྡུང་རྗེས་དམིགས་མེད་བཞག །དེ་ནི་ཡེ་ཤེས་ལྷ་དང་འཇིག་རྟེན་པ། །ཀུན་གྱི་སྒབ་འདྲེ་མནན་ཐབས་ཐུན་མོང་སྟེ། །ཤི་སྲི་ཆུང་སྲི་གོད་འདྲེའི་མནན་པ་དང་། །རྒྱལ་འགོང་འདྲེ་མོ་མནན་ཡང་མིང་གིས་བསྒྱུར། །འདྲེ་མནན་གཅིག་ཆོག་ཟབ་མོ་སྤྱི་རྒྱ། །འདི་ལ་རྙིང་
མའི་གུར་དྲག་ལུགས་ཡོད་ཀྱང་། །དེ་ནི་སྒྲུབ་པ་རྟགས་ཐོན་དགོས་ཕྱིར་དཀའ། །གནམ་ཆོས་ལུགས་ལ་འདི་ཉིད་ཡོད་ན་ཡང་། །དེ་ཡི་བཀའ་གཏད་དབང་ལུང་མེད་མི་རུང་། །འདི་ནི་ལས་ཚོགས་ཡན་གར་ཡིན་པའི་ཕྱིར། །མ་ཧཱ་བ་ལའི་བཀའ་གཏད་ཐོབ་མི་དགོས། །འདི་ནི་འཇིག་རྟེན་ལྷ་འདྲེ་ཀུན་གྱི་བདུད། །འཇིག་རྟེན་ལྷ་འདྲེ་།ཀུན་ནི་འཇོམས་པ་ཡི། །ལས་ལ་གྲུབ་པའི་དྲེགས་པ་ཅན་ཡིན་གྱི། །ཡེ་ཤེས་པ་ཡི་ལྷ་ནི་མ་ཡིན་ཏེ། །རྒྱ་གར་ཆོས་ལུགས་རྒྱ་ནག་རྩིས་གཞུང་ལུགས། །ཀུན་ལས་འདྲེ་གསོད་ཤན་པར་འདི་བསྔགས་སོ། །དེ་སྐད་ཆོས་སྐྱོང་སྤྱི་སྒྲུབ་ཆ་ལག་ཏུ། །རྟ་ལོ་ཁྲུམས་ཟླའི་མར་ངོའི་བཅུ་གཉིས་གུང་། །རཱ་ག་ཨ་སྱས་ཕྱག་ཁྲིད་ཚུལ་དུ་སྨྲས། །རིག་སྔགས་འཆང་བ་བརྩོན་འགྲུས་རྒྱ་མཚོ་ཡིས། །ཕྱི་རབས་སྔགས་ཆུང་ཀུན་ལ་ཕན་ཕྱིར་བཀོད། །གབ་སྦས་གསལ་བར་བཀོད་པའི་ཉེས་མཆིས་ན། །སྟོབས་ཆེན་མ་ཧཱ་བ་ལ་ཉིད་ལ་བཤགས། །དགེ་བས་སྒྲུབ་ལ་བར་ཆད་མེད་པར་ཤོག །ལེའུ་ཞེ་བདུན་པའོ་མངྒ་ལཾ།། །།