ལེའུ་ཞེ་དགུ་པ། བར་ཆད་ཀུན་སེལ་ཅི་བསམ་འགྲུབ་པའི་ཕྱིར། །གཏོར་མའི་ཡིག་སྣ་ལྷ་ཡི་ནོར་བུ་ཡོད། །
༼ཛི༽ རི་ཆོས་མཚམས་ཀྱི་ཞལ་གདམས་ལས། ཆོས་སྐྱོང་སྤྱིའི་རྟེན་གཏོར་སོགས་གཏོར་མའི་ཡིག་སྣ་ལྷའི་ནོར་བུ་ཀེ་ཀེ་རུ་ཞེས་བྱ་བ་བཞུགས་སོ། །གསང་རྒྱའོ། །ན་མོ་གུ་རུ་མ་ཧཱ་ཀཱ་ལ་ཡེ། བླ་མ་མགོན་པོ་དབྱེར་མེད་ཞབས་ལ་འདུད། །བཀའ་ཡི་གནང་བ་སྩོལ་ལ་བྱིན་གྱིས་རློབས། །སྔགས་ལ་མོས་པའི་བླ་མ་་བརྩོན་འགྲུས་ཀྱིས། །རྟེན་གཏོར་ལ་སོགས་གཏོར་མའི་རྣམ་དབྱེ་རྣམས། །ཆོས་སྐྱོང་སྤྱི་ལ་ཕན་པའི་ཞལ་གདམས་ཞུས། །དེ་དོན་གསར་རྙིང་རྒྱུད་གཞུང་རྒྱ་མཚོ་དང་། །ཁྱད་སྒྱུ་པར་གཏོར་མའི་ལས་རྒྱུད་ལ་སོགས་ནས། །གཏོར་མ་མེད་ན་བར་ཆད་སེལ་བར་དཀའ། །གཏོར་མར་བརྩོན་ན་བར་ཆད་མི་ཚུགས་ཤིང་། །མཆོག་ཐུན་དངོས་གྲུབ་སྒྲུབ་པའི་
མཆོག་ཏུ་གསུངས། །ཕྱི་ཡི་གཏོར་མ་ཆུ་གཏོར་བརྒྱ་རྩ་སོགས། །གསང་བའི་གཏོར་མ་ལུས་སྦྱིན་ཀུ་སུ་ལུ། །གསང་སྔགས་ནང་གི་གཏོར་མ་གཏོར་བསྔོས་ཏེ། །འདི་གསུམ་མ་ཆག་བསོད་ནམས་ཚོགས་བསགས་མཆོག །ནང་གཏོར་མ་གཏོགས་ཆོས་སྐྱོང་གཏོར་མ་ལ། །རྟེན་གཏོར་རིགས་གཉིས་གཏའི་གཏོར་རྟག་གཏོར་དང་། །རྒྱུན་གཏོར་ཐུན་གཏོར་དུས་གཏོར་རྣམ་དབྱེའོ། །རྟེན་གཏོར་འཕྲལ་དུ་སྒྲུབ་པའི་རྟེན་གཏོར་ནི། །སྒྲུབ་ཚེ་ལྷར་བསྐྱེད་ཚར་ནས་དབང་ལེན་པ། །དགོན་གནས་ལ་སོགས་བཞག་རྒྱུའི་རྟེན་གཏོར་ནི། །མ་མགོན་ལ་སོགས་དྲག་པོའི་ལྷ་ཡིན་ན། །ནས་ནག་གཙང་མ་སྣོད་དུ་བླུགས་བྱས་ལ། །སྭ་བྷ་ཝ་ཡི་སྔགས་ཀྱིས་སྟོང་པར་སྦྱངས། །ནས་འབྲུ་རེ་རེ་ཧཱུྃ་ཡིག་སྔོན་པོར་བསྒོམ། །དེ་ནས་མི་དམིགས་བྱས་ལ་རྗེན་འཐག་བྱ། །ཞི་བར་ནས་དཀར་སོ་སོའི་ས་བོན་དམིགས། །དེ་ཡང་རྗེན་འཐག་བྱ་བ་གོང་དང་འདྲ། །ཆུ་ཆང་ཟན་ཆང་བྱས་ན་རུལ་བས་སྤང་། །མར་ཁུ་བྱས་ན་གཏོར་གཟུགས་བཅའ་མི་ཉན། །མར་དཀར་ཆུ་བཅག་ཆང་གི་ཉིང་ཁུས་སྦྲུས། །གཙང་མའི་ཁྲག་དང་བདུད་རྩིའི་རིལ་བུ་བསྲེ། །ཞི་བའི་རིགས་ལ་དེ་
དག་མི་བསྲེ་སྟེ། །ནོར་ལྷའི་རིགས་ལ་མངར་གསུམ་ཤིང་ཏོག་རིགས། །ཀླུ་ཡི་རིགས་ལ་ཀླུ་སྨན་ཕྱེ་མ་དང་། །བ་དཀར་ར་དཀར་འབྲི་ཟལ་འོ་མ་བསྲེས། །དྲག་པོ་ཡིན་ན་ཟངས་ལྕགས་སྣོད་ལེགས་ཏེ། །ཞི་བར་ལིའམ་ཤིང་སྣོད་ཤིང་ཤུན་རུང་། །རྫ་ལས་གྲུབ་པའི་ཟླ་གམ་གཏོར་སྣོད་དབྱིབས། །དེ་ནི་མ་མགོན་གཏོར་མར་མཆོག་ཏུ་བཤད། །བསེ་དང་ར་གན་རྡོ་ལེབ་སྡོད་མི་རུང་། །གཏོར་མ་ཆེ་ན་འོག་གདན་སྟེགས་བུའི་སྟེང་། །ཡང་ན་གཏོར་སྣོད་ནང་དུ་བརྡའ་ཙམ་བྲི། །ཟླུམ་པོ་དཀར་པོའི་ནང་དུ་གྲུ་བཞི་སེར། །དེ་ནང་ཟླ་གམ་དམར་ནག་གྲུ་གསུམ་མཐིང་། །དེ་ནི་ལས་བཞིའི་དཀྱིལ་འཁོར་བརྡའ་མཚོན་ཡིན། །གྲུ་བཞི་ཟླུམ་པོ་ཕྱི་ནང་བརྗེས་ཀྱང་རུང་། །དེ་སྟེང་གཏོར་མ་དབྱིབས་ནི་དབང་གཏོར་བཞིན། །རང་རང་གཏོར་གཟུགས་ལྷུན་མཐུག་ཟུར་མི་རྣོ། །གཏོར་མ་ཆེ་ན་སྟོད་སྨད་རྣམ་པ་ལྔར། །སོ་སོར་ཤོག་དྲིལ་བཅུག་པར་བྱ་བ་སྟེ། །བརྒྱུད་པའི་བླ་མ་སྟོད་རིམ་ས་ཐོབ་རྣམས། །སོ་སོའི་མཚན་སྔགས་ཤོག་དྲིལ་བྲི་བ་སྟེ། །ས་ཐོབ་མིན་པར་བླ་བརྒྱུད་མི་བྲི་བར། །ཨོཾ་ཨཱ༔སརྦ་གུ་རུ་ཧཱུཾ་གིས་ཆོག །དེ་འོག་ཆོས་སྐྱོང་དེ་
ཉིད་འདུལ་བའི་ལྷ། །ཡི་དམ་གང་ཡིན་དེ་ཡི་སྙིང་པོ་བཙུག །གཏོར་མའི་སྟོད་དེར་བསྙེན་སྔགས་འབོད་སྔགས་བཅུག །རྐེད་པར་སྒྲུབ་སྔགས་དངོས་གྲུབ་ཤམ་བུ་དང་། །རྦད་སྔགས་སྔགས་རིང་བཅས་པར་བཅུག་པར་བྱ། །རྩ་བར་བསད་སྔགས་སྔགས་རིང་བཅུག་པར་བྱ། །གཏོར་མ་ཆུང་ན་ཟངས་ལྕགས་སྦུ་གུའང་། །སྨྱུག་ཚིགས་ནང་དུ་སྟོད་སྨད་སོ་སོར་བཅུག་།དེ་ཉིད་གཏོར་མའི་སྲོག་ཤིང་བྱས་པས་འཐུས། །འཇིག་རྟེན་ལྷ་ལ་བླ་མའི་མཚན་མི་བཅུག །གོང་ནོན་གཉེན་པོའི་ལྷ་ཡི་སྔགས་ཀྱིས་ཆོག །གཏོར་མའི་དབུས་སུ་རིན་ཆེན་སྣ་ཚོགས་པ། །བཅུག་ན་ལོངས་སྤྱོད་འཕེལ་བའི་རྟེན་འབྲེལ་ཟབ། །སྨན་སྣ་ཀུན་བཅུག་ནད་ཉུང་རྟེན་འབྲེལ་འགྱུར། །ཡེ་ཤེས་པ་ལ་བདུད་རྩི་རིལ་བུ་དང་།འཇིག་རྟེན་པ་ལ་ཀླུ་སྨན་རིལ་བུ་བཅུག །གསེར་དང་གསེར་ཤོག་མང་པོ་བཙུག་པ་ལ། །གསེར་གཏོར་ཞེས་བྱ་ཁམས་ཆེན་བརྩི་སྲོལ་གདའ། །ཞི་དྲག་མར་རྒྱན་སོ་སོ་གང་འོས་དང་། །སོ་སོའི་ས་བོན་ཡིག་འབྲུ་བཀོད་པར་བྱ། །ཡབ་སྲས་ལ་སོགས་སྟོབས་ཆེན་ཕྱག་ལེན་ལ། །གོས་ཆེན་བཟང་པོར་གཏོར་མའི་དབྱིབས་དྲུབ་ནས། །ནང་དུ་
འབྲུ་སྨན་རིན་ཆེན་ཤོག་དྲིལ་བཀང་། །དངུལ་གྱི་མར་རྒྱུན་བརྡུང་ནས་བཏགས་པ་ལགས། །ཆུ་མ་འདྲེས་པའི་ཨ་བསྣོའི་གཏོར་མ་དེ། །ལོ་སྟོང་སོང་ཡང་མི་རུལ་ཞིག་མི་འགྱུར། །དེ་ནི་མྱོང་བས་གྲུབ་པའི་ལོ་རྒྱུས་ཐོས། །ཤ་རྒྱན་འོས་པའི་གཏོར་མ་ཡིན་ན་ནི། །ཤ་མ་འདྲེས་པའི་ཚིལ་ལ་དྲས་བྱས་ཏེ། །དེ་ཡང་མར་ཁུའི་ནང་ནས་དྲངས་ལ་འཛུགས། །རྩེ་ལ་སོ་སོའི་ཙཀཱི་དར་གདུགས་ཕུབ། །ཆེ་ཆུང་མདའ་གང་ཁྲུ་གང་མཐོ་གང་དང་། །ཐ་ན་མཛུབ་གང་གིས་ཀྱང་ཆོག་པ་ཡིན། །ཆེ་ན་རང་མདོག་མདའ་དར་བཙུགས་པར་བྱ། །དང་པོ་བཤམས་ནས་སྤོས་བདུག་ཆབ་ཀྱིས་བྲན། །ཆང་རྒོད་ནང་མཆོད་བྲན་ཅིང་བསྒུལ་མི་བྱ། །རང་ཉིད་ཡི་དམ་ལྷར་གསལ་ཐུགས་ཀ་ནས། །རཾ་ཡཾ་ཁཾ་འཕྲོས་མེ་ཆུ་རླུང་གསུམ་གྱིས། །བསྲེགས་གཏོར་བཀྲུས་ནས་སྟོང་པ་ཉིད་དུ་བསམ། །གཏོར་སྣོད་ཕྲིན་ལས་བཞི་ཡི་དཀྱིལ་འཁོར་ནི། །ལྕགས་རི་རིམ་པ་ཕྱི་ནང་བཞི་འདྲ་བ། །ནང་མ་ཀུན་ལ་སྒེས་སྐར་འདྲ་བའི་ནང་། །དབུས་སུ་རླུང་མེ་ཐོད་སྐྱེད་སྤྱི་ལྟར་སྟེང་། །བྷན་སྟོང་གསུམ་མཉམ་པ་གཅིག་བསྒོམས་ཏེ། །ནང་དུ་ཤ་ལྔ་ཡེ་ཤེས་བདུད་རྩི་
ལྔ། །དེ་མན་གཏོར་མའི་སྨད་ཆ་གཏོར་སྣོད་བཅས། །གཏོར་མའི་སྐེད་པར་ཆོས་སྐྱོང་གཞལ་ཡས་གསལ། །རྩེ་རུ་བླ་མ་ཡི་དམ་སྤྲིན་ལྟར་གཏིབས། །ཞི་བའི་ཆོས་སྐྱོང་ནོར་ལྷ་སོགས་ཡིན་ན། །རླུང་མེ་ཐོད་སྐྱེད་བྷན་མི་བསྒོམ་པར། །རིན་ཆེན་སྣ་ཚོགས་བདུད་རྩིས་གང་བར་བསྒོམ། །གཏོར་ཆོག་བཞིན་དུ་ཆོས་སྐྱོང་སྤྱན་འདྲེན་བསྟིམ། །བྷནྡྷའམ་ནི་རིན་ཆེན་སྣོད་དེ་ནས། །བདུད་རྩི་འཕྱུར་པས་ཕྲིན་ལས་རྣམ་བཞི་ཡི། །དཀྱིལ་འཁོར་བཞི་པོ་བདུད་རྩིས་ལྡེམས་སེ་གང་། །བདུད་རྩིའི་རླངས་པ་མཆོད་རྫས་དཔག་མེད་པ། །བཀྲ་ཤིས་རྟགས་བརྒྱད་རིན་ཆེན་རྣམ་པ་བདུན། །མཆོད་པའི་ལྷ་མོ་བཅུ་དྲུག་སྤྲིན་ལྟར་གཏིབས། །ཞི་བའི་དཀྱིལ་འཁོར་ནང་དུ་དཀར་གསུམ་དང་། །རྒྱས་པའི་དཀྱིལ་འཁོར་ནང་དུ་ནོར་བུའི་རིགས། །དབང་གི་དཀྱིལ་འཁོར་ནང་དུ་དར་ཟབ་ཚོགས། །དྲག་པོའི་དཀྱིལ་འཁོར་དགྲ་བགེགས་ཤ་ཁྲག་སོགས། །ཕུད་རླངས་བསྐང་རྫ་ས་སྒྲུབ་རྫས་རྟེན་པའི་རྫས། །ཟད་མེད་དཔག་མེད་འཕྲོ་ཞིང་འདུ་བ་ལས། །ཆོས་སྐྱོང་འཁོར་བཅས་དེ་ལ་ཐུགས་མཉེས་ནས། །བྱིས་པ་གཞོན་ནུ་རྩེད་མོར་ཡེངས་པའམ། །འདོད་སྲེད་ལྡན་པ་ནོར་
ལ་ཆགས་པ་བཞིན། །རྟག་ཏུ་དགྱེས་ཤིང་འཁོར་ཞིང་བཞུགས་པ་དེ། །བསིལ་བ་ཚལ་སོགས་རང་རང་བཞུགས་གནས་དང་། །གཏོར་མ་དེ་ཉིད་དབྱེར་མེད་རོ་གཅིག་བསམ། །རྟག་ཏུ་མི་གཤེགས་མི་བསྡུ་དེ་ལྟར་བཞག །བདུན་གཉིས་བདུན་གསུམ་བར་དུ་ཐུན་རེ་རེ། །གཏོར་མར་སེམས་གཏད་སྟོང་ཕྲག་ཙམ་རེ་བསྙེན། །དེ་ནི་རྟེན་གཏོར་བསྙེན་པའི་རིམ་པ་སྟེ། །རྗེས་ནས་དགུ་གཏོར་དུས་ཀྱང་དེ་ལ་བསྟིམ། །དུས་བཟང་སྐར་བཟང་དུས་སུ་གསོ་བྲན་བྱ། །རྒྱུན་དུ་མི་ཡིས་མི་མཐོང་སྦས་ཏེ་བཞག །ཤོག་བུར་བྲིས་སམ་ཤིང་ལ་བརྐོས་པ་ཡི། །ཟླ་ཕྱེད་རྡོ་རྗེ་གཅིག་དང་སྲུང་སྐུད་ནི། །བལ་ལམ་དར་རས་གཙང་མར་མདུད་བྱས་ལ། །རྩ་སྔགས་ཤམས་བུར་བདག་དང་བུ་སློབ་དང་། །རྟ་ཕྱུགས་དགོན་སྐོར་ལ་སོགས་སྲུངས་ཤིག་དང་། །རཀྵ་རཀྵ་སྭཱ་ཧཱ་སྤེལ་བའི་སྔགས། །བརྒྱ་རྩས་སྔགས་ཏེ་རྟེན་གཏོར་ལ་བཏགས་བྱ། །དེ་ནི་སྤྱི་ཡི་མི་ནོར་སྲུང་བའི་ཁྱུ་མཆོག་ཁྱད་པར་ཞིང་སྐྱོང་རྟེན་གཏོར་གདམས་ངག་ནི། །སེང་གདོང་ཡབ་ཡུམ་བམ་རོ་ཕོ་མོའི་སྔགས། །དེ་མཇུག་སྡེ་བརྒྱད་སྔགས་ནི་མི་འབྱར་བར། །ཀ་ཆ་མཆོད་ཆ་བྲང་
ང་ལ་སོགས་པ། །མིང་བྲིས་མཇུག་ཏུ་ཞིང་སྐྱོང་ཡབ་ཡུམ་ལ། །བཅོལ་ལོ་གཏད་དོ་མ་བསྐུར་ཐུབ་པར་སྲུངས། །རཱ་ག་ར་ཏི་ནོར་སྲུངས་ཤིག །ཅེས་བྲིས་ཤོག་དྲིལ་གཏོར་མར་བཏགས་པར་བྱ། །དེ་ནི་དཀོར་ནོར་སྲུང་བའི་མཆོག་ཏུ་གསུངས། །གལ་ཏེ་ཁྱེར་ན་ཆད་མི་དགོས་པར་བཤད། །ཞིག་རལ་བྱུང་ན་བརྗེ་བ་མ་གཏོགས་པ། །དེ་མིན་རྟེན་གཏོར་བརྗེ་བར་བྱ་བ་མིན། །བསྟན་ལ་ཐུག་པའི་དགྲ་བོ་བྱུང་སྲིད་ན། །ཟོར་དུ་འཕངས་ན་ཧུར་ཐུམ་འགྲོ་བར་བཤད། །རང་ཉིད་ཡི་དམ་ང་རྒྱལ་བརྟན་པོ་ཡིས། །ལྷ་ཉིད་གདན་དང་བཅས་ཏེ་འཕངས་བསྒོམ་པས། །ཕ་རོལ་རྡུལ་དུ་བརླག་པར་གདོན་མི་ཟ། །ནུས་པ་ཆུང་ན་རང་ལ་ལྡོག་དོགས་ཆེ། །བསྐུལ་པ་བཏོན་ནམ་ལྷ་དེ་ནམ་མཁར་བཏེག །སེར་སྤྲིན་བཞིན་དུ་འུར་ཆོམ་བཅས་ཏེ་སོང་། །གཏོར་མ་མེ་དཔུང་མཚོན་ཆར་དམིགས་ཏེ་འཕངས། །དེ་ཡིས་རང་ལ་ལྡོག་དོགས་ཡོད་པ་མིན། །རྟེན་གཏོར་བརྗེའམ་འཕེན་དགོས་བྱུང་བའི་རྗེས། །དེ་ཉིན་ཉིད་དུ་གྲུབ་ན་རབ་ཡིན་ཏེ། །མ་གྲུབ་ཡུན་རིང་མ་འགོར་སྔར་བཞིན་བཅལ། །རང་ཉིད་གནས་དེར་མི་འདུག་འགྲོ་དགོས་ན། །
གཏོར་མར་དབང་བླངས་བཀྲ་ཤིས་གཤེགས་གསོལ་བྱ། །གཏོར་མའི་རུ་རྩི་སྔགས་ཀྱི་ཤོག་དྲིལ་དང་། །ཙཀ་ལི་ལ་སོགས་ཆས་རྣམས་རང་གིས་ཁྱེར། །གཏོར་མ་ཅུང་ཟད་ཟོས་འཕྲོ་གཏོར་བདུག་སྦྱིན། །དེ་ནས་རྟག་འདུག་གནས་དེར་སྔར་ལྟར་བཅལ། །དེ་ལྟར་སྒྲུབ་པའི་ཚེ་ཡི་རྟེན་གཏོར་དང་། །བསྟན་པ་ཇི་སྲིད་གནས་ཀྱི་རྟེན་གཏོར་རྫོ་གས། །རྟག་གཏོར་ཕུག་གཏོར་གོང་གཏོར་དོན་གཅིག་སྟེ། །ལོ་རེ་ལན་རེ་བརྗེ་བའི་ཕུག་གཏོར་ཡིན། །རིམ་གྲོ་ཡིན་ན་མ་གྲོལ་བར་དུའོ། །རག་རིམ་ལྷ་གྲངས་བཅའ་བ་ཀུན་གྱིས་ཤེས། །གཏོར་མའི་རྩེ་ཐད་རང་རང་ལྷ་རྣམས་བསྒོམ། །རྟག་པར་འཇོག་པས་རྟག་གཏོར་ཞེས་བྱའོ། །དེ་འདྲ་བསྡུས་པ་ནུབ་རེ་རྒྱུན་དུ་བཅའ། །དེ་ནུབ་ཉིད་ནས་བསྡུ་བ་རྒྱུན་གཏོར་ཏེ། །ཕུག་གཏོར་རྒྱུན་དུ་བཅའ་བ་མི་ཁྱོལ་ཕྱིར། །རྟག་གཏོར་རྒྱུན་དུ་གསོ་བ་རྒྱུན་གཏོར་ཡིན། །གཏའ་གཏོར་ཞེས་བྱ་གཏའ་མར་བཟུང་བ་དེ། །གཏོར་མ་ཀླུ་ཤིན་ཏུ་བཟང་བ་གཅིག་བཤམས་ཏེ། །ཆོས་སྐྱོང་དྲག་པོའི་ལས་ལ་ཟད་པའི་དུས། །ལས་འདི་འགྲུབ་རྟགས་བྱུང་དུས་འབུལ་ལོ་བྱ། །ལས་གྲུབ་རྨིས་ལྟས་ལ་སོགས་གསལ་བྱུང་
ཚེ། །གསོལ་མཆོད་རྒྱས་པར་བྱས་ལ་དེ་ཉིད་འབུལ། །ཐུན་གཏོར་ཞེས་བྱ་ཐུན་མཚམས་གཏོར་ཆུང་ཉིད། །དུས་གཏོར་ཞེས་བྱ་དགུ་གཏོར་ཚེས་བཅུ་འམ། །ལྷ་དེ་རྒྱུ་དུས་དུས་མཆོད་བཟུང་ལ་འབུལ། །གཞན་དུ་ལོ་སྒྲུབ་གཅིག་ནི་བྱས་པ་བས། །རྒྱུ་དུས་མཆོད་གཏོར་བྱས་ན་མཐུ་ཆེ་གསུངས། །ལས་གཏོར་ཞེས་བྱ་ངེས་མེད་རང་ཉིད་ལ། །བྱ་བ་སྒྲུབ་དགོས་བྱུང་ཚེ་གཏོར་མ་འབུལ། །ང་ཡི་དོན་འདི་སྒྲུབ་ཞེས་ཕྲིན་ལས་བཅོལ། །དེ་ནི་གློ་བུར་ལས་བཅོལ་གཏོར་མ་ཟེར། །ལས་དེ་ཞི་རྒྱས་དབང་དྲག་གང་ཡིན་དང་། །ལྷ་དེ་ཞི་བ་དྲག་པོ་གང་ཡིན་དང་། །དམར་གཏོར་དཀར་གཏོར་ཇི་ལྟར་འོས་པ་དང་།་་།ཞི་རྒྱས་དབང་གི་ལས་ལ་གསོལ་མཆོད་བྱ། །བཟློག་བསད་ཆོ་འཕྲུལ་ལས་ལ་དྲག་ཏུ་བསྐུལ། །ཐེབ་ལྡོག་མི་འགལ་དགྲ་ཕྱོགས་ཟོར་དུ་འཕངས། །རྦད་བསད་སྔགས་བརྗོད་ཞྭ་གོས་དར་ནག་བརྡབ། །ཐག་རིང་འགྲོའམ་ཞི་རྒྱས་དབང་གི་ལས། །འགྲོ་བའི་ཕྱོགས་སུ་གཏོར་མའི་རྩེ་སྟོན་འབུལ། །འདི་ལ་ཕྱོགས་དང་ཐེབ་ལྡོག་བརྩི་མི་དགོས། །ཕྱོགས་དེར་སྲུང་མ་གཤར་ནས་སོང་བར་བསྒོམ། །འགྲོ་ཕྱོགས་མིན་པར་ཕུལ་ལ་ཕྱི་དལ་
རྒྱུ། །ཞི་རྒྱས་དབང་གི་གཏོར་མ་དངོས་གྲུབ་བཟའ། །དྲག་པོའི་གཏོར་མ་ཚུར་ལ་བླངས་མི་རུང་། །གཏོར་མ་ཕུལ་ནས་གཏོར་སྣོད་ཁྱེར་འོང་ཚེ། །ཁ་ཕྱིར་བསྟན་ནས་ཁྱེར་ན་དངོས་གྲུབ་ཡལ། །ཁ་ནང་བསྟན་ནས་ཁྱེར་ན་དངོས་གྲུབ་འདུ། །དེ་ལྟར་གཏོར་མའི་ཞལ་གདམས་མདོར་བསྡུས་འདི། །གསར་རྙིང་གཏེར་ཁ་ཀུན་གྱི་དོན་བསྡུས་ཡིན། །རྟ་ལོ་ཁྲུམས་ཟླའི་མར་ངོའི་བཅུ་གཉིས་ཀྱི། །དགོང་ཐུན་ཚིགས་སུ་བཅད་དེ་སྨྲས་པ་རྣམས། །བརྩོན་འགྲུས་རྒྱ་མཚོས་མགྱོགས་པར་ཡི་གེར་བྲིས། །སྦ་འོས་གསལ་བཀོད་ཉེས་པ་ལྷ་ལ་བཤགས། །ཕྱི་རབས་སྔགས་ལ་མོས་པའི་གང་ཟག་ལ། །ཕྲིན་ལས་ཀུན་འགྲུབ་ཡིད་བཞིན་ནོར་བུར་ཤོག །ལེའུ་ཞེ་དགུ་པའོ་མངྒ་ལཾ།། །།