ལེའུ་ལྔ་བཅུ་པ། གཞུང་དང་མན་ངག་གཉིས་པོ་གབ་འཕྲོད་ཕྱིར། །པཀྵིའི་ཁྱད་ཆོས་མ་མགོན་ཞལ་སྦྱོར་ཡོད།
༼ཝི༽ རི་ཆོས་མཚམས་ཀྱི་ཞལ་གདམས་ལས། མ་མགོན་སྒྲུབ་པའི་ཟིན་བྲིས་གྲུབ་ཆེན་ཀརྨ་པཀྵིའི་ཁྱད་ཆོས་བཞུགས་སོ། །ན་མོ་གུ་རུ་མ་ཧཱ་ཉྩ་ཀཱ་ལ་ཡེ། བླ་མ་མགོན་པོ་དབྱེར་མེད་ཞབས་ལ་འདུད། །བླ་མ་རཱུ་པ་བརྩོན་འགྲུས་རྒྱ་མཚོ་ཡིས། །ཆོས་སྐྱོང་བཀའ་སྲུང་སྒྲུབ་ཐབས་དགོས་ཟེར་བ། །ཆོས་སྐྱོང་ཀུན་གྱི་སྤྲུལ་
གཞི་རྩ་བའི་ལྷ། །མ་མགོན་ལྕམ་དྲལ་འདི་ལས་ཟབ་པ་མེད། །སྟ་གོན་དཀྱིལ་འཁོར་ལ་སོགས་སྤྱི་སྒྲུབ་བཞིན། །དེ་ནས་འདོན་ལུགས་མི་འདྲ་སྣ་ཚོགས་ཏེ། །བདག་བསྐྱེད་ཕག་མོ་མདུན་བསྐྱེད་མགོན་པོ་བསྒོམ། །དགུ་གཏོར་བསྐང་གསོལ་ལ་སོགས་སྤྱི་འཚམས་ལུགས། །བདག་བསྐྱེད་ཕྱག་རྡོར་མདུན་བསྐྱེད་མགོན་པོ་བསྒོམ། །དེ་ནི་རྒྱུད་ནས་གསུངས་པའི་དགོངས་པ་ཡིན། །བདག་བསྐྱེད་གཤིན་རྗེ་ཕྱག་གཉིས་ཡུམ་འཁྲིལ་བ། །མདུན་བསྐྱེད་ལྷ་མོ་རིགས་གསུམ་གང་རུང་བསྒོམ། །ཨོ་རྒྱན་གྱིས་མཛད་དུས་མཁྱེན་ཡབ་ཆོས་ལུགས། །ཕྱག་བཞི་མ་དང་སྐུ་གསུམ་ལྷ་མོ་དང་། །གཙོ་འཁོར་གསུམ་ལ་ལྷ་མོ་རིགས་གསུམ་ཟེར། །བདག་མདུན་གཉིས་ཀ་རང་བྱུང་རྒྱལ་མོ་བསྒོམ། །དེ་ནི་དུས་གསུམ་མཁྱེན་པའི་ཁྱད་ཆོས་ཡིན། །བདག་བསྐྱེད་ལེགས་ལྡན་སྲུང་འཁོར་གཞུང་ལྟར་བསྒོམ། །མདུན་བསྐྱེད་ཡབ་རྐྱང་ཕྱོགས་བཅུ་མགོན་པོས་བསྐོར། །དེ་ནི་འགྲོ་མགོན་རས་ཆེན་བཞེད་པ་ཡིན། །བདག་མདུན་གཉིས་ཀ་ཡབ་རྐྱང་བེར་ཆེན་བསྒོམ། །དེ་ནི་རང་བྱུང་རྡོ་རྗེའི་བཞེད་པ་ཡིན། །ཞལ་སྦྱོར་རང་འདྲ་བརྒྱད་ཀྱིས་བསྐོར་བ་ནི། །པཀྵིའི་ཡབ་
ཆོས་ཞལ་གཟིགས་གཉིས་ཀ་ཡིན། །དེ་ལ་འཁོར་མང་བསྐོར་བ་དེང་སང་འདི། །རྟོགས་ལྡན་མཁའ་སྤྱོད་དབང་པོའི་བཞེད་པ་ཡིན། །དེ་ལ་འཇམ་དབྱངས་ཆེན་པོས་བཀག་མཛད་ཀྱང་། །མ་ཁོག་མཐོང་བ་དོན་ལྡན་དེ་རྗེས་འབྲང་། །མགོན་ཉོབ་མ་ཞེས་བྱ་བའི་ཆོག་ཆེན་མཛད། །རྒྱལ་དབང་བརྒྱད་པས་བཀའ་ཡིས་བསྐུལ་མཛད་པས་། །དཀོན་མཆོག་འབངས་ཀྱིས་དེང་སང་འདི་ཀ་བཏུས། །མེ་ལྕེ་ཕྲེང་བ་བེར་ཆེར་བརྩེགས་པ་སོགས། །བེར་ནག་ཅན་རྒྱུད་བརྒྱད་སྟོང་ཉུང་འགྱུར་ཙམ། །དངོས་གྲུབ་བསྟན་གཟིགས་ལྷ་མོའི་སྲོག་རྒྱུད་སོགས། །ལྷ་མོའི་རྒྱུད་ཀྱང་བརྒྱད་སྟོང་ཉུང་འགྱུར་ཙམ། །ཞིབ་པར་མཇལ་བས་ངེས་ཤེས་དད་པ་ཐོབ། །ཞལ་སྦྱོར་རྒྱུད་ལ་མ་གསུངས་ཟེར་མོད་ཀྱི། །རིན་ཆེན་དཔུང་རྒྱན་སྲོག་གི་འཁོར་ལོའི་རྒྱུད། །ལྷ་རྒྱུད་གསང་བ་ཆེན་པོ་གསུམ་ཀ་ལས། །ཞལ་སྦྱོར་འདི་ཉིད་གསལ་བར་གསུངས་པ་མཐོང་། །འདོན་ཆ་འདི་སྒྱུ་དག་ཕལ་ཆེར་རྒྱུད་ཚིག་ལགས། །མལ་གྱོ་ནས་བརྒྱུད་མགོན་པོའི་ཡིག་རྙིང་དང་། །ཞང་བཙུན་གཏེར་ཁ་ལྷ་མོའི་ཡིག་རྙིང་ནི། །འདྲ་མིན་རྫོགས་མཐའ་མེད་པ་དུ་མ་
མཐོང་། །དཀོན་མཆོག་འབངས་ཀྱིས་བསྒྲིགས་པའི་པོད་གཞུང་དང་། །རྒྱལ་དབང་དགུ་པས་བསྒྲིགས་པའི་པོད་གཞུང་མཇལ། །དེ་ཕྱིར་ཆོས་འདིའི་མཐའ་རྒྱ་བདག་གིས་ཆོད་། །སློབ་དཔོན་གཅིག་ནས་ཚང་མ་འོང་དཀའ་བས། །མཆོག་དམན་སློབ་དཔོན་བདུན་ལས་དབང་གདམས་ཐོབ། །རབ་རིབ་འཁྲུལ་པ་གཉིད་ཀྱི་སྣང་བ་ལ། །སི་ཏུ་མི་འཁྲུགས་ཆོས་ཀྱི་གོ་ཆ་དེས། །མགོན་པོའི་བཀའ་རྫོགས་ལུང་རྫོགས་གནང་བར་མཛད། །བསྙེན་ཅིང་སྒྲུབ་པའི་གཞུང་མཐུན་རྟགས་མཚན་ཐོབ། །ཉམས་དང་རྨི་ལམ་སྐབས་སུ་ལན་འགའ་མཇལ། །ང་ཡི་སྙིང་གི་ཆོས་སྐྱོང་འདི་ཡིན་པས། །བུ་ཁྱོད་སྙིང་གི་ཆོས་སྐྱོང་འདི་ལ་མཛོད། །གྲུབ་ཆེན་ཀརྨ་པཀྵིའི་ཞལ་སྔ་ནས། །མ་མགོན་ཡིག་སྣས་འཛམ་གླིང་ཁྱབ་ན་ཡང་། །དེ་ལ་བརྟེན་ནས་དངོས་གྲུབ་ཐོབ་པ་མེད། །དཔེ་རུལ་མང་པོས་དགོས་པ་ཅི་ཞིག་ཡོད། །ནམ་མཁའི་ལྷ་བཟུང་མན་ནས་ཁོང་རང་ཡན། །ཞལ་གཟིགས་གྲུབ་ཐོབ་བརྒྱུད་པ་རྒྱུན་མ་ཆད། །གྲུབ་རྟགས་འཛམ་གླིང་ཁྱབ་པར་མ་ཐོས་སམ། །ཕྱིན་ཆད་ཁོང་གི་ལུགས་འདི་གྱིས་གསུངས་ནས། །ཡབ་ཡུམ་ཞལ་སྦྱོར་སྒྲུབ་ཐབས་འདི་ག་
མཛད། །ཆོ་གའི་གཞུང་འདི་རྙིང་མ་སོར་བཞག་ཡིན། །འདི་ཡི་མན་ངག་པོ་ཏིའི་གཞུང་རྣམས་སུ། །ཚིག་རེ་ཚིག་གཉིས་སོ་སོར་འཐོར་ནས་ཡོད། །སློབ་དཔོན་ཞལ་ཁྲིད་མེད་པར་ཤེས་པར་དཀའ། །དེ་ཕྱིར་དེང་སང་མགོན་པོ་དར་ཆེ་ཡང་། །འདི་ཡི་བསྙེན་སྒྲུབ་ཐེམས་པར་དཀོན་པ་བྱུང་། །མན་ངག་སྙན་བརྒྱུད་ཤིན་ཏུ་གསང་ཕྱིར་ཡིན། །གོང་དུ་བཤད་པའི་ལུགས་ནི་མང་པོ་དག །ཕར་སྐྱུར་པཀྵིའི་དགོངས་པ་ཉིད་བཤད་ན། །འདི་ལ་གོང་ནོན་ཡི་དམ་མི་དགོས་ཏེ། །བླ་མ་ཡི་དམ་མ་མགོན་དབྱེར་མེད་ཡིན། །འདི་ལ་བདག་མདུན་སོ་སོར་མི་དགོས་ཏེ། །འདི་ནི་རྙིང་མ་སོར་བཞག་ལུགས་ཡིན་ཕྱིར། །ཆོ་ག་གཅིག་གིས་བདག་མདུན་དུས་གཅིག་བསྐྱེད། །བདག་བསྐྱེད་མགོན་པོར་ལྷ་མོས་ཚུར་འཁྱུད་བསྒོམ། །མདུན་བསྐྱེད་གཞུང་ལྟར་ལྷ་མོར་མགོན་པོས་འཁྱུད། །དེ་གཉིས་དམིགས་པས་ཕྱེ་བ་མ་གཏོགས་པ། །མངོན་རྟོགས་རྒྱས་བསྡུས་གང་ཀླུ་འདོད་གཞུང་དང་མཐུན། །རྒྱས་པའམ་མཚལ་མ་གཉིས་པོ་གང་འདོད་འདོན། །སྤྱན་འདྲེན་སྐབས་སུ་འོད་ཟེར་འཕྲོས་པ་དེས། །རི་རབ་རྩེ་མོའི་སུམ་རྩེན་ལྷ་ཡི་ཡུལ། །དེ་ཡི་
བྱང་ཕྱོགས་རྩུབ་འགྱུར་དུར་ཁྲོད་ཚལ། །དེ་དབུས་བྲག་སྟེང་གྲུ་གསུམ་མཐིང་ནག་སྟེང་། །མ་ཧཱ་ཀཱ་ལ་དངོས་སུ་བཞུགས་པ་དང་། །རི་རབ་བྱང་ཤར་དཔག་བསམ་ཡོངས་འདུའི་ཤིང་། །དེ་ལ་དཔལ་ལྡན་ལྷ་མོ་གནས་པ་ལ། །འོད་ཟེར་ཕོག་པས་སྔོན་གྱི་དམ་ཚིག་དྲན། །སྤྲིན་ནག་རླུང་གིས་བསྐྱོད་བཞིན་བྱོན་པར་དམིགས། །དམིགས་པ་མ་གསལ་བར་དུ་མ་མགོན་གྱི། །སྤྱན་འདྲེན་སྔགས་རིང་གཉིས་པོ་ཅི་ནས་བརྗོད། །མཆོད་ཅིང་བསྟིམ་དང་དབང་བསྐུར་གཞུང་དུ་གསལ། །དེ་ནས་བསྟོད་པ་མ་རྫོགས་བར་དུ་འདོན། །ལས་བྱང་དུས་བཞིར་དགོས་རྒྱུ་ཡིན་ན་ཡང་། །དེ་བྱས་བསྙེན་པ་འགའ་ཡང་མི་འགྲོ་བས། །སྔ་དྲོ་བསྟོད་པ་ཡན་དེ་ཐུན་གཅིག་བྱ། །ཉིན་གུང་གསོལ་ཁ་བཏང་བ་ཐུན་གཅིག་བརྩི་། །དགོང་མོ་བསྐང་གསོལ་བྱ་བ་ཐུན་གཅིག་བརྩི། །མཚན་མོ་མཚལ་མའི་བསྟོད་པ་ཡན་ཆད་དེ། །དེ་བཞི་ཐུན་བཞིའི་ལས་བྱང་གོ་ཆོད་ཡིན། །ཐུན་མཚམས་དམར་གཏོར་ཆུང་ངུ་རེ་འབུལ་བ། །གཞུང་གི་དགུག་གཞུག་ཉུང་ངུ་དེ་བྱས་ལ། །སྔ་དྲོའི་ཐུན་ལ་བྱང་ཕྱོགས་དུར་ཁྲོད་དང་། །ཡེ་ཤེས་དབྱིངས་མ་གཉིས་པོ་འདོན་ལ་འབུལ། །ཉིན་
གུང་རྟགས་བསྟོད་གཉིས་པོ་འདོན་པར་བྱ། །དགོང་མོ་འདས་དང་མ་བྱོན་ཡབ་ཡུམ་གཉིས། །མཚན་མོ་གང་ཞིག་བླ་མ་ལ་སྨོད་མ། །ཡུམ་ནི་ཡེ་ཤེས་མཁའ་འགྲོ་བར་ལ་མེད། །ཐུན་གཏོར་དཀྱིལ་འཁོར་དྲུང་ཕུལ་སྤྱི་དང་མཚུངས། །གསོན་ཅིག་མ་ནི་བསྙེན་སྒྲུབ་དུས་མི་འདོན། །དེ་ནས་བསྙེན་སྒྲུབ་དམིགས་པའི་བྱེ་བྲག་ནི། །རང་ཉིད་མགོན་པོ་ཡབ་ཡུམ་ཞལ་སྦྱོར་གྱི། །སྤྱི་བོར་རྩ་བརྒྱུད་བླ་མ་ཀུན་འདུས་པ། །གྲུབ་ཆེན་པཀི་སྐུ་མདོག་སྨུག་ནག་ལ། །ཆོས་གོས་རྣམ་གསུམ་ཞྭ་ནག་གསེར་མདོངས་ཅན། །སྤྱན་མིག་ཟུར་གསུམ་ཆོས་དབྱིངས་ནམ་མཁར་གཟིགས། །སྐུ་ཤ་རབ་རྒྱས་ཨག་ཚོམ་ཟུར་གསུམ་ལྡན། །ཕྱག་གཉིས་བདུད་འདུལ་ཕྱག་རྒྱ་ས་གནོན་གྱིས། །སྣང་སྲིད་ཟིལ་གྱིས་གནོན་པའི་ཚུལ་དུ་བསྐྱེད། །རང་ཉིད་མགོན་པོའི་ཐུགས་ཀའི་ཆ་སྟོད་དུ། །རང་སེམས་ཡི་དམ་སྐུ་ཚད་སོར་བཞི་ཙམ། །ཡེ་ཤེས་སེམས་དཔའི་ཚུལ་དུ་བསྒོམ་པར་བྱ། །ཡབ་ཀྱི་ཐུགས་ཀར་ཟླ་སྟེང་ཧཱུྃ་ཡིག་མཐར། །ཨོཾ་ཤྲཱི་མ་ཧཱ་ཀཱ་ལ་ཧཱུྃ། ཞེས་པའི་སྔགས་ཕྲེང་གཡས་སུ་འཁོར་བར་བསྒོམ། །ཡུམ་གྱི་ཐུགས་ཀར་ཉི་སྟེང་བྷྱོ་སྔོན་མཐར། །ཨོཾ་ཡཀྵ་
བཻ་ཏཱ་ལི་ཛཿ ཞེས་པའི་སྔགས་ཕྲེང་གཡོན་དུ་འཁོར་བ་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། །བླ་མ་ཡི་དམ་སངས་རྒྱས་བྱང་ཆུབ་སེམས། །དཔའ་བོ་མཁའ་འགྲོ་ཡེ་ཤེས་ཆོས་སྐྱོང་ཚོགས། །ཀུན་ལ་འོད་ཟེར་དེས་མཆོད་ཐུགས་རྒྱུད་མཉེས། །ཐམས་ཅད་མ་མགོན་ལྕམ་དྲལ་སྐུར་གྱུར་ནས། །ཁ་བ་བུ་ཡུག་འཚུབ་བཞིན་ཐམས་ཅད་བྱོན། །བདག་མདུན་ལྷ་ཚོགས་ཀུན་ལ་སིབ་སིབ་ཐིམ། །རྒྱུན་ཆད་མེད་པར་དམིགས་པ་དེ་བསྒོམ་ཞིང་། །དྲག་པོའི་ལྷ་རྒྱུད་གསང་བ་ལས་གསུངས་པའི། །ཞལ་སྦྱོར་སྐུ་གསུང་ཐུགས་ཀྱི་སྔགས་གསུམ་ལས། །སྐུ་ཡི་སྙིང་པོ་ལྷ་སྐུ་བསྒོམ་པས་འཐུས། །ཐུགས་ཀྱི་སྙིང་པོ་བསྐྱེད་རྫོགས་དོན་གྱིས་འཐུས། །བཟླས་གལ་ཆེ་བ་གསུང་གི་སྔགས་ཡིན་ཕྱིར། །ཨོཾ་ཤྲཱི་མ་ཧཱ་ཀཱ་ལ་ཡཀྵ་བེ་ཏཱ་ལི་ཧཱུྃ་ཛཿ ཞག་གསུམ་བྱ་བ་བསྙེན་པའི་རིམ་པ་ཡིན། །དེ་ནས་རང་གི་ཐུགས་ཀའི་སྔགས་འཁོར་ལས། །འོད་ཟེར་མཐིང་ཤས་ཆེ་བའི་ཁ་དོག་ལྔ། །ཞལ་ནས་ཐོན་ཅིང་མདུན་བསྐྱེད་ལ་ཉེ་ཆེ། །གཉིས་སུ་བྱས་ནས་ཡབ་ཡུམ་ཞལ་དུ་ཞུགས། །ཐུགས་ཀྱི་རྒྱུད་བསྐུལ་སྐུ་ཡི་དབྱིབས་བརྒྱུད་ནས། །སྦྱོར་མཚམས་ནས་
ཐོན་རང་གི་སྦྱོར་མཚམས་ཞུགས། །རྡོ་རྗེའི་སྦུབས་ནས་རང་གི་ཐུགས་ཀར་ཐིམ། །ཕར་ལ་མཆོད་པ་ཚུར་ལ་དངོས་གྲུབ་ཚུལ། །ཕྱིས་ནས་འོད་ཟེར་དེ་ཡང་སྔགས་ཕྲེང་བསྒྱུར། །བདག་མདུན་སྔགས་འཁོར་བཞི་དང་བར་གྱི་སྔགས། །སྔགས་ཕྲེང་ལྔ་པོ་མགལ་མེའི་འཁོར་ལོ་བཞིན། །དྲག་ཏུ་འཁོར་ལས་འོད་ཟེར་ཕྱོགས་བཅུར་འཕྲོས། །བླ་མ་ཡི་དམ་མ་མགོན་ལྕམ་དྲལ་ཚོགས། །ཕྱོགས་བཅུར་བཞུགས་པ་ཀུན་ལ་འོད་དེས་མཆོད། །དེ་དག་རྣམས་ལས་མ་མགོན་ཡབ་ཡུམ་སྐུ། །ཆེ་ཕྲ་སྣ་ཚོགས་སྔགས་ཕྲེང་ཡི་གེ་དང་། །རྡོ་རྗེ་རྩེ་ལྔ་ཧཱུཾ་མཐིང་བྷྱོསྔོན་སོགས། །རྒྱུན་ཆད་མེད་པར་ཆར་ཆེན་བབས་པ་བཞིན། །ལྷུག་ལྷུག་སིབ་སིབ་བདག་མདུན་རྣམས་ལ་ཐིམ། །དམིགས་པ་རྩེ་གཅིག་ཞག་གསུམ་སྒྲུབ་པ་ཡིན། །དེ་ནས་འོད་ཟེར་སྔགས་ཀྱི་ཕྲེང་བ་རྣམས། །སྔ་དྲོ་དཀར་དང་ཉིན་ཕྱེད་སེར་བ་དང་། །དགོང་ཀ་དམར་དང་སྲོད་ལ་མཐིང་ནག་བསྒྱུར་།ཕྲིན་ལས་རྣམ་བཞི་སོ་སོར་འགྲུབ་བསམ་ཞིང་། །ཞག་གཅིག་བཟླས་པ་ལས་སྦྱོར་རིམ་པའོ། །དེ་ནུབ་ཟན་གྱི་ལིང་ག་གཅིག་བྱས་ལ། །དགུག་གཞུག་ཕུར་གདབ་
ལ་སོགས་ལས་འགྲིག་བཞིན། །ལིང་རོ་དམར་གཏོར་ཆེ་བ་གཅིག་ནང་འབུལ། །ལས་འགྲིག་བཞིན་དུ་བསྐུལ་པ་ཐམས་ཅད་འདོན། །གསེར་སྐྱེམས་གྲུབ་ལེགས་མ་འཛོམ་དཀར་གཏོར་འབུལ། །རྒྱུ་ལྡོག་འགྲིགས་ནས་བཞེས་འབོད་ཟེར་དུ་འཕང་། །མ་འགྲིག་གནོད་པའི་ཕྱོགས་སུ་འབུལ་རྒྱུ་བསྐུར། །གཏོར་སྣོད་མདུན་དུ་སྒྲུབ་ལ་རྟ་བྲོ་འདོན། །ཕྱིར་ནངས་མཚལ་མ་ཚར་གཅིག་བསྡུས་པ་བྱས། །དངོས་གྲུབ་ལེན་ཆོག་འདོན་ཅིང་གཏོར་དབང་བླངས། །རྟགས་ཡིག་རྗེས་ཆོག་ལ་སོགས་སྤྱི་དང་མཐུན། །འདི་ཡི་བསྙེན་ཚད་ཞག་བདུན་ངེས་པ་སྟེ། །བདུན་གཉིས་བདུན་གསུམ་ལ་སོགས་བསྒྲུབ་ཀྱང་མཆོག །གྲངས་བསྙེན་འབྲུ་གྲངས་འབུམ་ཕྲག་བཅུ་གསུམ་ཡིན། །དེ་དག་མཚམས་དང་སྒྲུབ་པའི་ལུགས་ཡིན་ཏེ། །སྤྲོས་མེད་རྒྱུན་ཁྱེར་ཉམས་སུ་ལེན་འདོད་ན། །མངོན་རྟོགས་ཆོ་ག་ངག་ནས་འདོན་མི་དགོས། །དྲན་རྫོགས་བདག་ཉིད་ཡབ་ཡུམ་ཞལ་སྦྱོར་སྐུ། །སྤྱི་བོར་པཀིའི་སྙིང་གར་ཡི་དམ་ལྷ། །འཁོར་ལ་ནག་པོ་ཡབ་ཡུམ་བཅུ་དྲུག་ལས། །གཞན་པའི་འཁོར་མང་བསྒོམ་པར་མི་བྱ་ཞིང་། །འཁོར་མེད་གཙོ་རྐྱང་བསྒོམ་ཡང་རུང་བ་ཡིན།
བསྙེན་པའི་དམིགས་པ་གོང་དང་ཁྱད་པར་མེད། །འོད་ཟེར་སྔགས་ཕྲེང་རང་གི་ཞལ་ནས་ཐོན། །ཡུམ་གྱི་ཞལ་ཞུགས་ཡུམ་གྱི་ཐུགས་རྒྱུད་བསྐུལ། །བྷ་ག་ནས་ཐོན་རྡོ་རྗེ་ནས་ཞུགས་བསྟིམ། །ཡབ་ལ་བརྟེན་ནས་ཡུམ་ཉིད་སྒྲུབ་ཐབས་ཡིན། །རང་ཉིད་ལྷ་མོར་བསྒོམས་ནས་མགོན་པོར་འཁྱུད། །སྔགས་ཕྲེང་རང་ཉིད་ལྷ་མོའི་ཞལ་ནས་ཐོན། །མགོན་པོའི་ཞལ་དུ་ཞུགས་པས་ཐུགས་རྒྱུད་བསྐུལ། །རྡོ་རྗེའི་ལམ་ནས་རང་གི་བྷ་གར་ཞུགས། །ཐུགས་ཀར་ཞུགས་པས་དངོས་གྲུབ་ཐོབ་པར་དམིགས། །ལྷ་མོ་ལ་བརྟེན་མགོན་པོ་སྒྲུབ་པའི་ཐབས། །བསྐྱེད་རིམ་གོ་ཟློག་བོགས་འདོན་མཆོག་ཡིན་ཞེས། །རྒྱལ་དབང་བརྒྱད་པས་འདི་ལ་བསྔགས་པ་ཆེ། །དེ་ལྟར་དམིགས་པ་བསྒོམ་ཞིང་སྔགས་བཟླས་ཏེ། །སྒྲུབ་པའི་ཐུན་མཚམས་རྣམས་སུ་གེགས་སེལ་དང་། །རྒྱུན་བསྙེན་སྐབས་སམ་ཡང་ན་ནམ་དགོས་སུ། །བར་ཆད་སེལ་བའི་དམིགས་རིམ་ཟབ་མོ་ནི། །རང་ཉིད་མགོན་པོའི་ཕྲག་གོང་གཡས་གཡོན་དུ། །བྱ་རོག་ནག་པོ་ཅུང་ཟད་དམར་བའི་མདངས། །མཆུ་སྡེར་གནམ་ལྕགས་ཕ་ལམ་ལས་གྲུབ་པ། །མེ་སྟག་ཚྭ་ཚྭ་འཕྲོ་བ་གཉིས་
སྒོམ་སྟེ། །དེ་ལས་སྤྲུལ་པའི་བྱ་རོག་དཔག་མེད་པ། །ཆེ་ཆུང་འབྲོང་གཡག་ཙམ་པས་འཇིག་རྟེན་གང་། །འཕུར་ཞིང་ལྡིང་དང་འཇུམ་དང་འབབ་ལ་སོགས། །གཤོག་སྒྲ་འུར་སྒྲ་འབྲུག་ཆེན་ལྡིར་བ་བཞིན། །རང་ལ་གནོད་པར་བྱེད་པའི་དགྲ་དང་བགེགས། །ཐམས་ཅད་བྱིའུས་འབུ་སྲིན་ཐུས་བཞིན་ཟོས། །ཐམས་ཅད་ཚུར་འདུས་འོད་ཞུ་ཐུགས་ཀར་ཐིམ། །ཤཱ་ས་ན་ཡི་སྔགས་ནི་ཚར་གཅིག་བརྗོད། །འདི་ནི་བར་ཆད་སེལ་ཐབས་མཆོག་ཏུ་ཟབ། །སྤྲོས་མེད་བདག་བསྐྱེད་ཏིང་འཛིན་གསལ་བའི་དུས། །བཟའ་བཏུང་མཆོད་པར་དམིགས་པས་ཆོག་མོད་ཀྱི། །ནུབ་རེ་གཏོར་བསྔོས་རྒྱས་པ་ཐོན་ན་རབ། །མ་གྲུབ་མ་དག་མ་ཙམ་ཆག་མེད་བྱ། །མཚལ་མ་ཆག་མེད་ལ་སོགས་མ་གྲུབ་ཀྱང་། །མགོན་པོ་ཐུགས་དམ་གཙོ་བོ་བྱེད་ཆོག་པས། །འདི་འདྲ་ཆོས་ལུགས་འདི་ལ་གསེར་བས་ཕོངས། །གོང་གི་སྒྲུབ་པ་ཞག་གསུམ་མཚམས་དམ་པར། །སྒྲུབ་པ་རྟགས་མཚན་རང་ཉིད་ཡིད་ཆེས་པ། །བྱུང་བ་རང་དང་རང་གི་སློབ་མ་ནི། །དྲུག་བདུན་ཙམ་གྱིས་མྱོང་བས་གྲུབ་པ་བྱུང་། །འདི་འདྲའི་ཕྱག་ལེན་ཞལ་ཁྲིད་ཁོ་ན་སྟེ། །གསལ་པོ་ཕྱོགས་གཅིག་ཡི་གེ་བྲིས་
པ་མེད། །པོ་ཏི་གཞུང་ལ་སྦས་ཐབས་འཐོར་ནས་ཡོད། །ལུང་འདྲེན་ཚིག་རྣམས་བྲི་བ་ཡི་གེར་འཇིགས། །ཟབ་དང་མི་ཟབ་ཉམས་སུ་ལོངས་ལ་ལྟོས། །གྲུབ་མཐའ་མི་གཅིག་བརྒྱུད་པ་མི་འཛིན་པའོ། །མི་ལ་བསྟན་ན་བཀའ་ཆད་འབྱུང་ངོ་ཞེས། །གྲུབ་ཆེན་པཀཱིའི་བཀའ་རྒྱ་དམ་པར་འདུག །གྲུབ་མཐའ་འདི་འཛིན་ཉམས་སུ་ལེན་རྣམས་ལ། །ཀུན་ལ་ཤོད་ཅིག་སྟོན་ཞིག་བྲིས་ཤིག་གསུངས། །དེ་སྐད་མེ་འབར་ཅང་ཤེས་རྒྱལ་པོའི་ལོ། །དབང་ཕྱུག་ཆེན་པོའི་ཐེབས་ཆེན་ཁྲུམས་ཟླ་བའི། །མ་མགོན་རྒྱུ་དུས་ཉེར་དགུའི་སྔ་དྲོ་ལ། །མ་མགོན་རྣལ་འབྱོར་རཱ་ག་ཨ་སྱས་སྨྲས། །རུ་པ་སྔགས་འཆང་བརྩོན་འགྲུས་རྒྱ་མཚོས་བྲིས། །སྦ་འོས་གསལ་བཀོད་མ་མགོན་དྲུང་དུ་བཤགས། །དགེ་བས་བསྟན་པའི་རྒྱལ་མཚན་ཚུགས་པར་ཤོག །ལེའུ་ལྔ་བཅུ་པའོ་མངྒ་ལཾ།། །།