ལེའུ་ང་གཅིག་པ། དཔལ་འབྱོར་མངའ་ཐང་ཤུགས་ལ་འཕེལ་བའི་ཕྱིར། །རས་ཆེན་ཁྱད་ཆོས་མགོན་པོའི་ནོར་སྒྲུབ་ཡོད། །
༼ཞི༽ རི་ཆོས་མཚམས་ཀྱི་ཞལ་གདམས་ལས། འགྲོ་མགོན་རས་ཆེན་ཀླུ་གྱིས་མཛད་པའི་མགོན་པོ་ནོར་ལྷ་ལྟར་སྒྲུབ་པ་རྒྱུན་ཁྱེར་དུ་བྱ་བའི་ཟིན་བྲིས་བཞུགས་སོ། །ན་མོ་གུ་རུ་མ་ཧཱ་ཀཱ་ལ་ཡ། ཌོམྦི་ཧེ་རུ་ཀ་ཡི་སྤྲུལ་པའི་སྐུ། །འགྲོ་མགོན་རས་པ་ཆེན་
པོས་མཛད་པ་ཡི། །མགོན་པོ་ནོར་ལྷ་ལྟར་དུ་སྒྲུབ་པ་འདི། །གཞུང་གི་དཔེ་མོད་ཀུན་གྱིས་ཤེས་མོད་ཀྱང་། །ཞལ་ཁྲིད་མེད་ཕྱིར་ཕྱག་ལེན་བདེ་བ་མིན། །བཅའ་ཚོགས་གསོལ་ཁ་གཞུང་ལྟར་རྒྱས་པར་བྱ། །འདི་ཡི་སྒྲུབ་པ་གུད་དུ་མ་བྱས་ཀྱང་། །བདེ་རིམ་བསྐང་གསོལ་བྱེད་པའི་སྐབས་རྣམས་སུ། །སྔགས་དང་དམིགས་པ་ཐུན་རེ་བསྒོམ་པ་ཡིས། །ལོངས་སྤྱོད་མངའ་ཐང་ཤུགས་ཀྱིས་འདུ་བ་ཡིན། །དེ་ཕྱིར་བསྐང་གསོལ་ཤེས་ཚད་རྣམས་ལ་ཕན། །ཐུན་མཚམས་སྐད་ཅིག་ཡི་དམ་གནས་འགྱུར་ནས། །།རང་ཉིད་བེར་ཅན་ཡབ་རྐྱང་གཞུང་ལྟར་ལ། །དོན་ལ་ཕྱོགས་བཅུའི་མགོན་པོ་ཡིན་པ་ལ། །ཆ་ལུགས་རང་འདྲ་བེར་ཅན་བཅུ་ཡིས་བསྐོར། །ཀུན་ཀྱང་དབུ་ལ་རིན་ཆེན་རྩེ་བྲན་ལྔ། །ཀུན་ཀྱང་རིན་ཆེན་རྒྱན་ཆ་དུ་མས་བཀླུབས། །ནོར་ལྷ་མཆེད་བརྒྱད་ལ་སོགས་ནོར་ལྷས་བསྐོར། །རང་གི་ཐུགས་ཀར་རང་གི་ཡི་དམ་ལྷ། །བསྙེན་སྒྲུབ་ཐེམས་པའི་ཡི་དམ་གཞན་མེད་ན། །ཡེ་ཤེས་མགོན་པོ་ལེགས་ལྡན་བསྒོམ་པས་ཆོག །དེ་གཉིས་གང་བྱེད་ཐུགས་ཀར་ཉི་མའི་སྟེང་། །ཧཱུཾ་མཐིང་མཐའ་མར་བཟླས་སྔགས་གཡས་སུ་འཁོར། །
མདུན་དུ་ཞལ་སྦྱོར་འཁོར་མང་གཞུང་ལྟར་བསྒོམ། །དེ་དག་ཀུན་ཀྱང་རིན་ཆེན་རྒྱན་ཆས་ཀླུབས། །རང་གི་ཐུགས་ཀའི་སྔགས་ལས་འོད་ཟེར་འཕྲོས། །རང་འདྲ་མགོན་པོ་བཅུ་ལ་འོད་ཟེར་ཕོག །དེ་ཡི་འོད་ཟེར་ནོར་ལྷ་མཆེད་བརྒྱུད་བསྐུལ། །དེ་ལས་འོད་འཕྲོས་འཇིག་རྟེན་ཐམས་ཅད་ཀྱི། །ཚེ་བསོད་དཔལ་འབྱོར་བཅུད་བསྡུས་བདག་ལ་བསྟིམ། །ཡང་ནི་བདག་ལས་འོད་ཟེར་མདུན་བསྐྱེད་བསྐུལ། །མདུན་བསྐྱེད་ཕྱོགས་བཅུ་མགོན་པོའི་གྲལ་བཞུགས་པའི། །གཏེར་བདག་ཛམ་བྷ་ལ་དང་རྣམ་ཐོས་སྲས་། །ཕྱུགས་ལྷ་ཤ་བ་རི་དང་རེ་མནྟ། །རེ་མན་ནི་དཔལ་རབ་འཆང་བ་ཡིན། །ནོར་ལྷ་བཞི་པོ་དེ་ལས་འོད་ཟེར་འཕྲོས། །རྟ་གཡང་ནོར་གཡང་ཟས་ནོར་ལོངས་སྤྱོད་གཡང་། །ཐམས་ཅད་བསྡུས་ནས་བདག་དང་གནས་ཁང་བསྟིམ། །རེས་འགའ་དེ་དག་སྐུ་ཡི་འོད་ཟེར་གྱིས། །དགོས་འདོད་རིན་ཆེན་སྣ་ཚོགས་ཆར་འབེབས་བསམ། །གསོལ་ཁའི་མཇུག་ཏུ་སྔགས་འདི་ཅི་ནུས་འབད། །ཨོཾ་མ་ཧཱ་ཀཱ་ལ་ཧཱུྃ་ཕཊ། བདག་ལ་རཏྣ་སིདྡྷི་སིདྡྷི་ཧཱུྃ། ཞེས་པའི་སྔགས་དེ་ཅི་ནུས་བཟླས་པར་བྱ། །དེ་ནི་ནོར་སྒྲུབ་མཆོག་ཏུ་
གྱུར་པ་སྟེ། །གསོལ་ཁ་ནམ་བྱེད་དུས་སུ་སྔགས་དམིགས་ཆོག །ཁྱད་པར་དམིགས་པའི་བསྒྱུར་ཁ་ཅུང་ཟད་ནི། །བདག་བསྐྱེད་འོད་ཟེར་མདུན་བསྐྱེད་མ་མགོན་བསྐུལ། །མ་མགོན་འོད་ཟེར་རྣམ་སྲས་ཛམ་ལྷ་གཉིས། །དྲག་ཏུ་བསྐུལ་བས་དེ་གཉིས་འོད་ཟེར་གྱིས། །ཟས་ནོར་ལོངས་སྤྱོད་རིན་ཆེན་སྣ་ཚོགས་པ། །ཆར་ལྟར་འབེབས་ཤིང་ན་བུན་ལྟར་འཕྱུར་དམིགས། །ཡང་ནི་འོད་ཟེར་དཔལ་རབ་མགོན་པོ་བསྐུལ། །རྟ་གཡང་ཀུན་བསྡུས་རྟ་ལ་ཐིམ་པར་བསམ། །བདག་མདུན་འོད་ཟེར་ནུབ་བྱང་མགོན་པོ་བསྐུལ། །ནོར་གཡང་ཀུན་འདུས་ནོར་ལ་ཐིམ་བསམ་པས། །གོད་ཁ་ཆོད་ཅིང་སྒྲུབ་འཕེལ་གཡང་ཆགས་འགྱུར། །སྤྱིར་ནི་མ་མགོན་འཁོར་བཅས་སྒྲུབ་པ་འདི། །འཇིག་རྟེན་མཆོད་བསྟོད་རྒྱུད་ཟླ་༡་དུ་གཏོགས་པར་གསུངས། །འཇིག་རྟེན་མཆོད་དང་བསྟོད་པས་འགྲུབ་པའི་ཕྱིར། །བརྒྱུད་པ་འཛིན་ཞིང་དམ་ཚིག་སྲུང་བ་དང་། །མཆོད་བསྟོད་རྒྱ་ཆེར་འབུལ་ཞིང་བསྟོད་བསྐུལ་གྱིས། །བསྒྲུབ་མི་དགོས་པས་ཕྲིན་ལས་རྣམ་པ་བཞི། །འགྲུབ་པར་འགྱུར་ཞེས་གྲུབ་ཆེན་པཀིས་གསུངས། །དེ་ཕྱིར་གསོལ་ཁ་དག་ལ་བརྩོན་བྱ་ཞིང་། །སྔགས་དང་དམིགས་
པ་ཤམ་བུ་དེ་ཡོད་ན། །འཛམ་བུ་གླིང་རྣམས་དབང་དུ་བསྡུ་བ་དང་། །དགོས་འདོད་སྣ་ཚོགས་ཆར་ལྟར་འབེབས་པའི་ཕྱིར། །ནོར་ལྷ་རྣམས་ཀྱི་མཆོག་ཀྱང་འདི་ཡིན་ཏེ། །འདི་འདྲ་གཞན་ལ་མེད་ཅེས་གསུངས་པ་ཡིན། །དེ་སྐད་ཅང་ཤེས་པད་མ་རཱ་གའི་མདོག །དབང་ཕྱུག་ཆེན་པོའི་དུས་ཆེན་ཁྲུམས་ཟླ་ཡི། །གནམ་གང་མགོན་པོ་ལན་གསུམ་རྒྱུ་བའི་ཉིན། །དགེ་སློང་རཱ་ག་ཨ་སྱས་སྨྲས་པ་དེ། །བླ་མ་བརྩོན་འགྲུས་རྒྱ་མཚོས་ཡི་གེར་བཀོད། །སྒྲ་འོས་གསལ་བཀོད་ཉེས་པ་ལྷ་ལ་བཤགས། །དགེ་བས་བསྟན་པ་ཕྱོགས་བཅུར་འཕེལ་གྱུར་ཅིག །ལེའུ་ང་གཅིག་པ་སྣོད་མིན་ལ་གསང་རྒྱའོ།། བཀྲ་ཤིས། །