ལེའུ་ང་གཉིས་པ། རྩ་རླུང་སྒོ་ནས་ཕྲིན་ལས་ཀུན་འགྲུབ་ཕྱིར། །སྙན་བརྒྱུད་ལྷོ་བྲག་མགོན་པོའི་གདམས་ངག་ཡོད། །
༼ཟི༽ རི་ཆོས་མཚམས་ཀྱི་ཞལ་གདམས་ལས། མ་མགོན་གྱི་རྫོགས་རིམ་རྩ་རླུང་གི་གདམས་པ་མར་པའི་སྙན་བརྒྱུད་ལྷོ་བྲག་མགོན་པོ་ཞེས་བྱ་བའི་ཟིན་བྲིས་བཞུགས་སོ། །ན་མོ་གུ་རུ་མ་ཧཱ་ཀཱ་ལ་ཡེ། མགོན་པོ་ལྷ་མོའི་ཚོགས་ལ་ཕྱག་འཚལ་ནས། །སྙན་བརྒྱུད་མ་མགོན་རྩ་རླུང་གདམས་པ་བྲི། །ཆོས་བདག་མཁའ་འགྲོས་བཀའ་གནང་བྱིན་གྱིས་རློབས། །གྲུབ་ཆེན་ཌོམྦི་ཧེ་རུ་ཀ་ཆེན་པོར། །མ་མགོན་
ལྕམ་དྲལ་ཉིད་ཀྱིས་ལུང་བསྟན་ནས། །མགོན་པོའི་རྒྱུད་དགུ་ལྷ་མོའི་རྒྱུད་དགུ་དང་། །བཅོ་བརྒྱད་དོན་བསྡུས་མ་མགོན་ཞལ་སྦྱོར་གྱི། །སྒྲུབ་ཐབས་རྫོགས་རིམ་དང་བཅས་རྩ་ཚིག་མཛད། །རྒྱ་གཞུང་ཉུང་ཞིང་མན་ངག་སྙན་དུ་བརྒྱུད། །མར་པའི་སྙན་བརྒྱུད་ལྷོ་བྲག་མགོན་པོ་ཟེར། །ཏེ་ལོ་ནཱ་རོ་མར་མི་དུས་མཁྱེན་བར། །གཅིག་བརྒྱུད་ཡིན་ཏེ་གཞན་གྱིས་ཐོས་པ་མེད། །རྗེ་བཙུན་མི་ལ་རས་པའི་ཞལ་ནས་ཀྱང་། །ཆོས་སྐྱོང་མ་མགོན་ལྕམ་དྲལ་ཡིན་གསུངས་པ། །རྩ་བ་དེ་ཡི་དོན་ལ་དགོངས་པ་ཡིན། །ཌོམྦིས་མཛད་པའི་སྒྲུབ་ཐབས་དྲག་སྔགས་བསྐོར། །མལ་གྱོ་ནས་བརྒྱུད་འགྲོ་མགོན་རས་པས་གསན། །སྒྲུབ་པས་ཞལ་གཟིགས་མགོན་པོའི་སྐོར་འདི་ལ། །ང་ལས་མཁས་མེད་སྙམ་པའི་ང་རྒྱལ་ཡོད་། །ཡབ་ཡུམ་གཙང་ཡིན་ཁམས་སུ་བྱོན་པའི་ཚེ། །ཀཾ་པོ་གནས་ནང་དུས་མཁྱེན་སྙན་གྲགས་ཆེ། །ཆོས་ཞུ་མ་བསམ་གྲུབ་རྟགས་འགྲན་དུ་བྱོན། །དུས་མཁྱེན་མཇལ་བས་འགྲོ་མགོན་ཆས་ཇ་ལ། །བྷནར་འཇལོ་བའི་ཆུ་བླུགས་ཐུག་པ་བསྐོལ། །ཚ་དང་རྡོར་གྱི་ཚབ་ལ་ཐབ་གཉའ་ནས། །བོང་བུའི་རུས་པ་ཨོ་ཐོ་རུ་ལུ་གཅིག །བླངས་ནས་ཚྭ་རྡོར་
ཚབ་ལ་ཐུག་པ་དཀྲུག །རྒྱུན་དུ་ལན་རེ་ལས་ནི་མི་དཀྲུག་སྟེ། །དེ་རིང་གལ་ཆེ་ལན་གཉིས་དཀྲུག་དགོས་གསུངས། །འགྲོ་མགོན་རས་པས་འདི་འདྲའི་མུ་གེ་ལ། །དགོངས་ནས་ཡི་མུག་ཐུགས་ཁྲེལ་བཞག་པར་བྱས། །དེ་ནས་དཔོན་སློབ་གཉིས་ཀྱི་བྷནྡཱར་བླུགས། །འགྲོ་མགོན་རས་པས་གསོལ་ཉན་མེད་དགོངས་ཛ། །རོ་མཆོག་བརྒྱད་ལྡན་དེ་འདྲ་གསོལ་མ་མྱོང་། །དེ་ནས་རས་ཆེན་དད་པ་ཅུང་ཙམ་སྐྱེས། །ཁྱེད་དང་ང་གཉིས་རླུང་ནུས་འགྲན་དགོས་ཞུས། །ང་ནི་རྒས་དྲག་ཁྱོད་ཀྱི་ཡ་མི་འོང་། །ཕ་ཀིར་སོང་དང་ང་ཡི་སློབ་བུ་གཅིག །ཡོད་པས་དེ་དང་འགྲན་པར་གྱིས་ཤིག་གསུངས། །དེ་རུ་སོང་བས་ཕུག་པ་གཅིག་གི་ནང་། །སྟག་གཅིག་ཉལ་འདུག་སྐྲག་ནས་མྱུར་དུ་བྱོན། །དུས་མཁྱེན་ལ་ཞུས་ད་རུང་སོང་དང་གསུངས། །སོང་བས་མཚོ་གཅིག་སྔོ་ལྟེམ་འཁྱིལ་ནས་འདུག །མཚོ་ཡི་ནང་དུ་རྡེལ་བུ་འགའ་རེ་འཕངས། །མི་ནི་མི་འདུག་ཚུར་ལ་ལོག་ནས་འོང་། །དུས་མཁྱེན་ལ་ཞུས་ད་རུང་སོང་དང་གསུངས། །སོང་བས་སྒོམ་ཆེན་དབུ་སྐྲ་སེ་ཅོག་གེ །གཅིག་གིས་སྐྱིལ་ཀྲུང་བཅས་ནས་བཞུགས་འདུག་པའི། །པང་དུ་ད་ཅིའི་
འཕངས་པའི་རྡེའུ་འདུག །དེ་ལ་རླུང་ནུས་འགྲན་དགོས་ཞུས་པ་ཡིས། །དགུན་ཁ་ལུང་པ་ཆབ་རོམ་གང་བ་དེ། །སྟོད་དུ་འབའ་ཚ་སྟག་དིལ་བ་དེ་བཞུགས། །གཉིས་ཀ་གཅེར་བུ་རས་རྐྱང་ཆུ་རས་མཛད། །འབའ་ཚ་སྟག་དིལ་སྐུ་ཡི་མདའ་འབེན་ཚུན། །འཁྱགས་ཞུ་སྐྱིལ་ཀྲུང་གྲམ་པ་ལ་ཐུག་ཅིང་། །ཆུ་ཁོལ་རླངས་པ་ན་བུན་ལྟར་འཁྲིགས་ཀྱང་། །ཆུ་དེ་བཏང་ན་འཁྱག་དེ་ཞུ་དོགས་ནས། །མར་ལ་མ་བཏང་ཡར་ལ་འཁྱིལ་ཞིང་འཕྱུར། །རས་ཆེན་འཁྱགས་ཞུ་ཐུབ་ཀྱང་ཆུ་མ་དྲོས། །སྐུ་སྨད་ཆུར་ནུབ་ཤིན་ཏུ་འཁྱགས་པར་བྱུང་། །ཐོ་རངས་དུས་སུ་དུས་གསུམ་མཁྱེན་པ་ཉིད། །སེང་གེ་ཆིབས་ནས་ནམ་མཁར་དངོས་སུ་བྱོན། །བུ་འབའ་ཚ་སྟག་དིལ་བ། །ཁྱོད་ཀྱིས་སྒོམ་ཆུང་གསར་བུ་དེ་འཁྱགས་གྲིར་མ་བསད། །གསུངས་པས་སྐུ་ལ་འཁྱིལ་བའི་ཆུ་ཚན་བཏང་། །ལུང་པ་དེ་ཡི་འཁྱགས་རྣམས་ཐམས་ཅད་ཞུ། །སློབ་བུ་འདི་ལ་རྫུ་འཕྲུལ་འདི་འདྲ་ན། །བླ་མར་འགྲན་དགོས་སྨྲས་པ་ང་རེ་འཁྲུལ། །དགོངས་ཤིང་འགྲོ་མགོན་རས་པའི་ང་རྒྱལ་ཆག །ཆོས་འབྲེལ་ཙམ་ཞིག་ཞུ་བ་མ་གཏོགས་པ། །དུས་མཁྱེན་སློབ་མ་བྱེད་བསམ་མེད་པ་ལ། །
ཁྱོད་ཀྱི་ཡོན་ཏན་གང་ཤེས་གསུངས་པ་ལ། །ང་ནི་མགོན་པོར་མཁས་ཞེས་ཤེས་ཚད་སྨྲས། །དུས་མཁྱེན་ཞལ་ནས་དེ་ཚོ་ཕྱི་སྒྲུབ་སྐོར། །ཕྲིན་ལས་དགྲ་བགེགས་བསྒྲལ་བའི་སྔགས་ནག་ཡིན། །སྟོད་ལས་བྱང་ཆུབ་སྒྲུབ་ཐབས་མེད་དམ་གསུངས། །མ་མཆིས་ཉིད་ལ་བདོག་ན་གནོང་ཞུས་པས། །མར་པའི་སྙན་བརྒྱུད་མ་མགོན་རྩ་རླུང་གནང་། །དེ་ཡིས་ཡིད་ཆེས་དད་པའི་གདེང་ཚུད་ནས། །དུས་མཁྱེན་ཆོས་བརྒྱུད་འཛིན་པ་དེས་བྱུང་གསུངས། །འདི་ཉིད་སྙན་བརྒྱུད་ཤིན་ཏུ་ཟབ་པའི་ཕྱིར། །རྒྱ་གཞུང་རྩ་བ་སྡེབ་ངོས་ཙམ་ལས་མེད། །མཁའ་སྤྱོད་དབང་པོ་དོན་ལྡན་ལ་སོགས་པའི། །དམ་དུམ་བརྗེད་ཐོ་ལྟ་བུར་མཛད་པ་མང་། །ཁྲིད་ཡིག་ཆ་ཚང་ཡི་གེར་བྲིས་པ་མེད། །ཕྲིན་ལས་སྒྲུབ་པའི་དམིགས་རིམ་བརྒྱ་རྩ་སོགས། །ཡོད་པར་གསུངས་ཀྱང་དེ་ཡི་རྩ་བ་ནི། །ཡབ་ཡུམ་ཞལ་སྦྱོར་རབ་ཀྱིས་དབང་བཞིའམ། །ཐ་ན་ཞལ་སྦྱོར་གཏོར་དབང་ཐོབ་པར་བྱ། །རབ་ཏུ་སྔོན་ལ་བསྙེན་པ་ཐོན་ན་མཆོག །མ་ཐོན་ན་ཡང་བསྒོམ་ལ་ཉེས་འགལ་མེད། །སྐྱབས་འགྲོ་སེམས་བསྐྱེད་སྔོན་དུ་སོང་བས་འཐུས། །རང་ཉིད་མགོན་པོ་རྐང་
ཐང་གྲི་ཐོད་ཅན། །བེར་ཅན་མངོན་རྟོགས་སྤྱི་དང་མཐུན་པར་བསྒོམ། །ལྷ་མོ་ཕྱག་གཉིས་གྲི་ཐོད་འཛིན་པས་འཁྱུད། །ཕྱག་བཞི་མ་ཡིས་འཁྱུད་པར་རང་བྱུང་བཞེད། །སྐུ་ནང་སྟོང་པ་ཕྲུ་མ་ཕུས་བཏབ་བཞིན། །འདི་སྐབས་རླུང་ནི་འབུད་པ་དགུ་ཕྲུག་བྱ། །དམིགས་པ་མ་གསལ་བར་དུ་འཇམ་རླུང་བཟུང་། །དེ་ནས་ཡུམ་དེ་ཡབ་ལ་ཐིམ་པའི་མཐུས། །ནང་གི་མཁའ་འགྲོ་མ་ནི་རྩ་ཡིན་ཕྱིར། །རྩ་གསུམ་་་་་་་ལུས་དང་རྩ་ཡི་སྟོང་ར་ཐིག་ལེའི་རྣལ་འབྱོར་སོགས་ཡང་གསང་བླ་མེད་ཀྱི་སྒྲུབ་པ་བདེ་ཆེན་རབ་འབར་ནང་དུ་བལྟ་བར་བྱའོ། མཆན། འཁོར་ལོ་ལྔ་ལྡན་ཆོས་དྲུག་བཞིན། །པཀྵིའི་བཞེད་ལྟར་གནས་ལྔར་ཡིག་འབྲུ་ལྔ། །དུག་ལྔའི་ངོ་བོ་གཏུམ་མོའི་མེས་བསྲེགས་པས། །མགོན་པོ་རིགས་ལྔར་ལྷ་མོ་རིགས་ལྔས་འཁྱུད། །འཁོར་གྱི་ལྷ་མོ་རྩ་ཡི་གྲངས་རྣམས་དང་། །ཁ་ཊོ་མེད་དེ་གཡས་བརྐྱང་གཡོན་བསྐུམ་བཞུགས། །གནས་ལྔའི་ལྷ་ཡི་ཐུགས་ཀར་རང་མདོག་གི །ཧཱུྃ་དང་བྷྱོ་ཡིག་སོ་སོར་བསྒོམ་པར་བྱ། །མགོན་པོའི་ཐུགས་ཀར་ཨོཾ་མ་ཧཱ་ཀཱ་ལ་ཡ་ཧཱུྃ་ཕཊ། ལྷ་མོའི་ཐུགས་ཀར་ༀ་ཏྲཀ་རཀྵ་མ་ཧེ་དུན་བྷྱོ་མ་ཧཱ་ཡཀྵ་ཏིཀ་ཎ་ཀཱ་ལི་དུན་བྷྱོ། ཞེས་པ་དེ་གཉིས་བསྒོམ་རྒྱུ་ཡིན་ན་ཡང་། །
ཀརྨ་པཀིས་ཁྱད་ཆོས་ཟབ་ཁྱད་ནི། །ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཕཊ༔ འདི་ནི་བེར་ནག་ཅན་གྱི་སྙིང་པོར་བཞེད། །གསར་རྙིང་མགོན་པོའི་རྒྱུད་གཞུང་ཐམས་ཅད་ནས། །འདི་ལས་ཕན་ཡོན་ཆེ་བའི་སྔགས་མ་མཆིས། །ཨོཾ་རུ་རུ་རོ་རུ་ཙ་པ་ལ་ཨ་ཤུག་མེ་མ་ཧཱུྃ་མ་བྷྱོ་ཛ་ཛཿ དེ་ནི་ལྷ་མོ་སྤྱི་ཡི་སྔགས་ཡིན་ཞིང་། །ཁྱད་པར་རང་བྱུང་མ་ཡི་ཡང་སྙིང་ཡིན། །ལྷ་མོའི་རྒྱུད་སྡེ་སྲིད་དོ་འཚལ་ཀུན་ལས། །དེ་ལས་ཕན་ཡོན་ཆེ་བའི་སྔགས་མ་མཆིས། །དེ་ཕྱིར་དེ་གཉིས་གནས་ལྔར་གཡས་གཡོན་འཁོར། །རླུང་བཟུང་འཁྲུལ་འཁོར་ཡན་ལག་ལྔ་སྦྱོང་བྱ། །དེ་ནས་སུམ་མདོའམ་ལྟེ་འོག་སོར་བཞི་ནས། །གཏུམ་མོའི་མེ་འབར་ལུས་ཀུན་མེ་ཡིས་གང་། །མེ་ལྕེ་བ་སྤུའི་བུ་གར་ཕྱིར་ཐོན་པས། །ང་ལུས་ཀུན་མེ་འབར་མེ་དཔུང་ཇེ་ཆེར་མཆེད། །གནས་དེའམ་ནི་བསྲུང་བྱ་གར་ཡོད་ཁྱབ། །གནོད་བྱེད་བསྲེག་དམིགས་འཁྲུལ་འཁོར་དྲུག་བསྐོར་བྱ། །རླུང་དང་འཁྲུལ་འཁོར་བརྩོན་ན་དྲོད་སྐྱེ་འགྱུར། །ཐུན་མཚམས་མེ་དཔུང་ཚུར་འདུས་རང་ལ་བསྟིམ། །ཡང་ནི་མེ་སྦར་སྤྱི་བོའི་ཧཾ་ཡིག་ཞུ། །རྩ་གནས་ཀུན་གང་བདེ་བས་ལུས་གང་བསམ། །དམིགས་
པ་གསལ་ན་བདེ་ཉམས་གནས་ཉམས་སྐྱེ། །དེ་ཚེ་ངོ་བོ་བལྟས་ལ་བདེ་སྟོང་བསྲེ། །སྔགས་འཁོར་བསྒོམ་ཞིང་སྔགས་རྣམས་ཡིད་ཀྱིས་བཟླ། །གནས་ལྔའི་མགོན་པོ་ལྔ་ལས་འོད་ཟེར་དང་། །རང་མདོག་ལྷ་ཚོགས་མང་པོ་སྤྲོས་པ་ཡིས། །རིགས་ལྔའི་ལྷར་གྱུར་ལྷ་ཀུན་མཆོད་བྱེད་ཅིང་། །དེ་དག་མ་མགོན་རིགས་ལྔའི་སྐུར་གྱུར་ནས། །ཚུར་བྱོན་གནས་ལྔའི་ལྷ་ལ་བསྟིམ་པ་ཡིས། །སྐུ་གསུང་ཐུགས་ཡོན་ཕྲིན་ལས་ལྔ་པོ་ཡི། །མཆོག་ཐུན་དངོས་གྲུབ་ཐམས་ཅད་ཐོབ་པར་བསྒོམ། །དཔྲལ་བའི་མ་མགོན་དཀར་པོའི་འོད་ཟེར་གྱིས༔ །རང་གཞན་ནད་གདོན་བར་ཆད་ཞི་བ་དང་། །མགྲིན་པའི་མ་མགོན་དམར་པོའི་འོད་ཟེར་གྱིས། །ལྷ་འདྲེ་མི་གསུམ་དབང་དུ་སྡུད་པ་དང་། །ཐུགས་ཀའི་མ་མགོན་མཐིང་ཀའི་འོད་ཟེར་གྱིས། །རྒྱལ་བ་ཀུན་གྱི་ཐུགས་ཀྱི་ཡེ་ཤེས་བསྡུས། །རང་ཐིམ་ཉམས་དང་རྟོགས་པ་གོང་དུ་འཕེལ། །ལྟེ་བའི་མ་མགོན་སེར་པོའི་འོད་ཟེར་གྱིས། །ཚེ་དང་བསོད་ནམས་བསྟན་པ་རྒྱས་པར་སྤེལ། །གསང་གནས་མ་མགོན་ལྗང་ནག་འོད་ཟེར་གྱིས། །བདུད་དང་དགྲ་བགེགས་ཐམས་ཅད་ཚར་གཅོད་སོགས། །དམིགས་པའི་བསྒྱུར་ཁ་
བརྒྱ་རྩ་ཡོད་པར་གསུངས། །འདི་དག་སྐབས་སུ་འཁྲུལ་འཁོར་སོ་བདུན་བྱ། །དམིགས་པའི་བསྒྱུར་ཁ་རྒྱས་པར་མང་མཆིས་ཀྱང་། །རྩ་བའི་དམིགས་རིམ་དེ་ཙམ་ཞིག་གིས་འཐུས། །རྩ་རླུང་ལ་བརྟེན་དགྲ་བགེགས་བསྒྲལ་བ་ནི། །ཤིན་ཏུ་ཟབ་གཉན་གྲུབ་ཆེན་པཀཱིའི་ལུགས། །རང་ཉིད་མགོན་པོ་ཡབ་རྐྱང་གནམ་ས་ཙམ། །སྐུ་ལུས་སྟོང་གསལ་བསྒོམ་པའི་ལྟེ་འོག་ཐད། །མེ་ཡི་རང་བཞིན་གྲུ་གསུམ་རྒྱ་ཆེའི་དབུས། །ཞལ་སྦྱོར་རམ་ནི་གཙོ་རྐྱང་གང་ཡང་རུང་། །ཞལ་ནི་ཟུར་གསུམ་ཡར་ལ་གདངས་པ་དེ། །མེ་ཡི་རང་བཞིན་མེ་དཔུང་འབར་བར་བསྒོམ། །རང་གི་ཐུགས་དབུས་ཟླ་སྟེང་ཧཱུཾ་མཐིང་མཐར། །ཤཱ་ས་ན་སོགས་མགོན་པོའི་སྔགས་ཀྱིས་བསྐོར། །དེ་ལས་འོད་ཟེར་དམར་ནག་འཕྲོས་པ་དེ། །ཤངས་བུག་གཡས་ཐོན་ལྕགས་ཀྱུའི་དབྱིབས་ལྟ་བུས། །གནོད་བྱེད་དགྲ་བགེགས་གང་ཡིན་ཐམས་ཅད་བཀུག །ཤངས་བུག་གཡོན་ཞུགས་ལྟེ་བའི་མ་མགོན་གྱི་།ཞལ་དུ་རྐང་རྟིང་སྐྱ་ལྷག་སོང་བར་བསམ། །ལུས་ངག་ཡིད་གསུམ་ནུས་པ་ཚེ་སྲོག་རྣམས། །བྱ་སྒྲོ་མེ་ལ་སྲེག་བཞིན་རྡུལ་དུ་བརླག །རླུང་ནི་ཕར་འཕྲོས་འོད་ཟེར་ཕར་
འཕྲོ་དང་། །ཚུར་ལ་རྔུབ་དུས་བཀུག་པའི་དམིགས་པ་དང་། །ནང་དུ་དགོང་ཚེ་ཞལ་དུ་སྲེག་པ་དང་། །ཁོ་ཡི་སེམས་ཉིད་ཆོས་དབྱིངས་ཀློང་ཐིམ་པར། །བསྒོམ་ལ་ཉམས་ལེན་ངང་ལ་ཐུན་གཅིག་བཞག །དེ་ཚེ་ཤཱ་ས་ན་དང་ཧུ་ར་སོགས། །དྲག་སྔགས་ཡིད་ཀྱིས་བཟླས་པར་བྱ་བ་ཡིན། །རྩ་རླུང་གོམས་ཤིང་དམིགས་པ་གསལ་བའི་མིས། །དགྲ་བསྒྲལ་བགེགས་འདུལ་འདི་ལས་ཟབ་པ་མེད། །མཆོད་གཏོར་ཆད་བསྐུལ་ཅི་ཡང་མི་དགོས་གསུངས། །གོང་མ་སྒྲུབ་པ་འདི་ནི་ལས་སྦྱོར་ཡིན། །འདི་ཉིད་སྙན་བརྒྱུད་ཤིན་ཏུ་ཟབ་པའི་ཕྱིར་། །འཁྲུགས་མེད་གསལ་བར་བཀོད་ན་བཀའ་ཆད་འབྱུང་། །དེ་ཕྱིར་བསྙེན་པའི་དམིགས་རིམ་མཇུག་འདིར་བྲི། །རང་ཉིད་མགོན་པོ་ཡབ་རྐྱང་གོང་ལྟར་གསལ། །དེ་ཡི་དཔྲལ་མགྲིན་ཐུགས་ཀ་གསུམ་པོ་རུ། །ཨོ་དཀར་ཨཱདམར་ཧཱུྃ་མཐིང་གསལ་བར་དམིགས། །དེ་ལས་འོད་ཟེར་དཀར་དམར་མཐིང་གསུམ་དང་། །སྣ་བུག་ནས་ཐོན་འཇིག་རྟེན་ཀུན་ཁྱབ་པས། །འཇིག་རྟེན་འདས་པ་དང་ནི་མ་འདས་པའི། །འཁོར་འདས་ཀུན་ལ་འོད་དེས་ཕོག་པའི་མཐུས། །ས་འོག་གནས་རྣམས་སྐུ་ཡི་མགོན་པོ་དཀར། །ས་སྟེང་
གནས་རྣམས་གསུང་གི་མགོན་པོ་དམར། །ས་བླར་གནས་རྣམས་་་་བར་སྣང་ཡན་ཆོད་ཡིན་གསུངས་མཆན། ཐུགས་ཀྱི་མགོན་པོ་མཐིང་། །རང་མདོག་བེར་གསོལ་ཀུན་ཀྱང་སྔགས་སྒྲ་སྒྲོག །རླུང་ཞིག་ཚུར་ལ་རྔུབ་པ་དང་བསྟུན་ནས། །དེ་ཀུན་ཨོ་དཀར་ཨཱཋདམར་ཧཱུྃ་མཐིང་གྱུར། །སྣ་གཡོན་ནས་ཞུགས་གནས་གསུམ་ཡིག་འབྲུར་ཐིམ། །སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ། །རླུང་བཟུང་མི་དམིགས་ངང་ལ་ཅུང་ཟད་གཞག །སླར་ཡང་རླུང་ཞིག་ཕར་ལ་གཏོང་བའི་ཚེ། །སྣོད་ཀྱི་འཇིག་རྟེན་ཆོས་འབྱུང་གཞལ་ཡས་ཁང་། །བཅུད་ཀྱི་སེམས་ཅན་ཐམས་ཅད་མགོན་པོའི་སྐུ། །ཕོ་རྣམས་མགོན་པོ་མོ་རྣམས་དཔལ་ལྷ་མོ། །སྒྲ་སྐད་ཐམས་ཅད་མ་མགོན་སྔགས་སུ་བསམ། །དེ་ཡང་སེམས་ལས་གཞན་དུ་མ་གྲུབ་པས། །སེམས་ཉིད་ངོ་བོ་སྟོང་པ་དཔལ་ལྷ་མོ། །རང་བཞིན་གསལ་བ་ཡེ་ཤེས་མགོན་པོ་ཉིད། །སྟོང་གསལ་དབྱེར་མེད་ཡབ་ཡུམ་ཞལ་སྦྱོར་བ། །སྣ་ཚོགས་འཕྲོས་པ་ལས་བྱེད་དྲེགས་པའི་འཁོར། །ཡེ་ནས་ལྷུན་གྲུབ་རང་ལ་གནས་པ་སྟེ། །ཡེ་ནས་ཆོས་སྐུ་རྗེན་པ་ཡིན་པ་སྟེ། །རང་ངོ་རང་གིས་ཤེས་པས་ཡེ་ཤེས་ཟེར། །དེ་
རྟོགས་འཁོར་བའི་སྡུག་བསྔལ་ཐམས་ཅད་ལས། །སྐྱོབ་པའི་སྐྱབས་དང་མགོན་ནི་དེ་ཡིན་ཕྱིར། །ཡེ་ཤེས་མགོན་པོ་རང་གི་སེམས་ཉིད་ཡིན། །དེ་དོན་མགོན་པོའི་རྒྱུད་ཆེན་རྣམས་སུ་གསལ། །འཕགས་བཞི་བསྐྱེད་བྱེད་ལྷ་མོ་ཡུམ་ཆེན་མོ། །རང་གི་སེམས་ལས་གུད་དུ་མེད་པའི་ཚུལ། །ལྷ་མོའི་རྒྱུད་གཞུང་རྣམས་ལས་ཤིན་ཏུ་གསལ། །དེ་ཉིད་རྟོགས་ན་རྩུབ་ཆགས་འཁུ་ལྡོག་མེད། །མ་མགོན་ལུས་དང་གྲིབ་བཞིན་འབྲལ་མི་སྲིད། །བསྙེན་པའི་དམིགས་རིམ་དོན་ལྡན་ཞབས་ཀྱི་ལུགས། །དཔལ་འབྱོར་དོན་གྲུབ་ཉིད་ལ་ཚོགདམས་པ་ཡིན། །དེ་ལྟར་མ་མགོན་རླུང་ཁྲིད་མདོར་བསྡུས་འདི། །རཱུ་པ་བརྩོན་འགྲུས་རྒྱ་མཚོས་ནན་གྱིས་བསྐུལ། །བཀའ་རྒྱ་དམ་པས་སྨྲ་བར་དཀའ་ན་ཡང་། །མ་མགོན་སྲུང་མ་རྣམས་ལ་གསོལ་བཏབ་པས། །འདིར་མོས་གསར་བུ་རྣམས་ལ་ཕན་སྙམ་ནས། །ལོ་ཡི་རྒྱལ་པོ་ཅང་ཤེས་མེ་འབར་ལོ། །དབང་ཕྱུག་ཆེན་པོའི་དུས་ཆེན་ཁྲུམས་ཟླ་ཡི། །ཉེར་དགུ་མ་མགོན་དུས་ཆེན་དགུ་གཏོར་ཉིན། །ཉིན་གུང་རྣལ་འབྱོར་རཱ་ག་ཨ་སྱས་སྨྲས། །རཱུ་པའི་རིགས་ལས་བྱུང་བའི་སྔགས་འཆང་ནི། །བརྩོན་འགྲུས་མཆོག་ལྡན་བརྩོན་
འགྲུས་རྒྱ་མཚོས་བྲིས། །གསང་སྔགས་སྔ་འོས་གསལ་བར་བཀོད་པའི་ཉེས། །གང་མཆིས་མ་མགོན་སྲུང་མའི་ཚོགས་ལ་བཤགས། །དགེ་བས་སྒྲུབ་བརྒྱུད་བསྟན་པ་དར་རྒྱས་ཤོག །ལེའུ་ང་གཉིས་པའོ་མངྒ་ལཾ།་་་་་དབང་ལུང་མ་ཐོབ་པ་དང་ཉམས་སུ་མི་ལེན་པ་ལ་གསང་བར་ཞེས་གསུངས་ཨྠྀི།། །།