ལེའུ་ང་གསུམ་པ། དགེ་རྩ་འཛད་མེད་གཏེར་དུ་སྦ་བའི་ཕྱིར། །བསྔོ་བའི་ཞལ་གདམས་ནོར་བུ་རིན་ཆེན་ཡོད། །
༼འི༽ རི་ཆོས་མཚམས་ཀྱི་ཞལ་གདམས་ལས། བསྔོ་བའི་ཞལ་གདམས་ནོར་བུ་རིན་ཆེན་ཞེས་བྱ་བ་བཞུགས་སོ། །ན་མོ་ཤཱཀྱ་མུ་ནེ་ཡེ། ཀུན་མཁྱེན་ཐུབ་པའི་ཞབས་ལ་ཕྱག་འཚལ་ལོ། །བསྔོ་བའི་ཟབ་གནད་ཞལ་གྱི་གདམས་པ་ནི། །རང་རེ་སེམས་ཅན་འཁོར་བར་འཁྱམས་པ་འདི། །ཚོགས་མ་བསག་པས་འཁོར་བར་འཁྱམས་པ་མིན། །ཚོགས་བསག་དཔག་ཏུ་མེད་པ་བྱས་མོད་ཀྱི། །རྫོགས་པའི་བྱང་ཆུབ་རྒྱུ་རུ་མ་བསྔོས་པས། །འབྲས་བུ་ལྷ་མིའི་བདེ་སྐྱིད་མང་པོ་ཞིག །མྱོང་བས་དགེ་འབྲས་ཟད་ནས་ལྟུང་བ་ཡིན། །དགེ་བ་བྱང་ཆུབ་མཆོག་ཏུ་བསྔོས་ན་་ནི། །སྐྱེ་བ་ཀུན་ཏུ་བདེ་སྐྱིད་མྱོང་ན་ཡང་། །བསོད་ནམས་མི་ཟད་མཐར་ཐུག་བྱང་ཆུབ་ཐོབ། །དགེ་བ་ཟད་མེད་གདམས་ངག་བསྔོ་བ་ཡིན། །ཚེ་འདིར་དགེ་བ་མང་པོ་བསྒྲུབ་
ན་ཡང་། །མི་དམིགས་བསྔོ་བས་རྒྱས་འདེབས་མ་ཤེས་ན། །སོ་མ་བཏང་བའི་རྫ་མ་གསར་པ་བཞིན། །དགེ་བ་དེ་ཡང་ཉམས་པར་སླ་བ་སྟེ། །སྦྱིན་དང་ཚུལ་ཁྲིམས་དགེ་བ་བསྐལ་པ་བརྒྱར། །བསགས་པ་ཁོང་ཁྲོ་གཅིག་གིས་འཇོམ་པར་གསུངས། །དགེ་བ་བཅོམ་པ་ཞེས་བྱ་རང་ཉིད་ཀྱིས། །དགེ་བ་གང་བྱས་ངོམས་ན་འཛད་པར་བཤད། །ཟང་ཟིང་དགེ་བ་རླབས་ཆེན་བསྒྲུབས་པའི་རྗེས། །སེར་སྣའི་དབང་གིས་འགྱོད་པ་སྐྱེས་ན་འཛད། །དགེ་བ་གང་འགྲུབ་བསྔོ་བས་རྒྱས་བཏབ་ན། །ཁྲོ་དང་བཅོམ་དང་འགྱོད་པས་ཉམས་མི་འགྱུར། །དགེ་བ་མི་ཉམས་ཐབས་ལ་བསྔོ་བ་ཟབ། །བསྔོ་བས་རྒྱས་མ་ཐེབ་པའི་དགེ་བ་རྣམས། །ལོ་བརྒྱ་སོང་ཡང་སྐྱེད་མེད་དེ་ཀ་རང་། །བསྔོ་བས་རྒྱས་ཐེབ་ཕྱིན་ནས་དགེ་བ་དེ། །ཞག་རེ་སོང་ཞིང་སྐྱེད་རེ་འཕེལ་བ་སྟེ། །དགེ་བ་ཆུང་ངུ་ལ་ཡང་ཆེན་པོར་འགྱུར། །གླིང་བཞི་འཇིག་རྟེན་ལོ་ལེགས་སྙེ་མ་བཞིན། །དགྲ་བཅོམ་རང་རྒྱལ་བར་མེད་གང་བ་ལ། །ཇི་སྲིད་འཚོ་བར་བསྙེན་བཀུར་བྱས་པ་བས། །དགེ་བ་བྱང་ཆུབ་མཆོག་ཏུ་བསྔོ་བྱས་ན། །ཕན་ཡོན་ཆེ་སོགས་བསྔགས་པ་མཐའ་ཡས་པ། །སྟོང་ཕྲག་ཉི་ཤུ་ལྔ་
པའི་མདོ་ལས་གསུངས། །དེ་ནི་ཡོངས་སུ་བསྔོ་བ་ཁྱད་པར་ཅན། །དམིགས་མེད་འཁོར་གསུམ་ཡོངས་དག་བསྔོ་བ་ཡིན། །འཁོར་གསུམ་དམིགས་པ་ཅན་གྱི་བསྔོ་བ་ནི། །བསྔོ་བ་དུག་ཅན་ཞེས་བྱ་ཕན་ཡོན་ཆུང་། །འཇིག་རྟེན་ལྷ་མིའི་བདེ་སྐྱིད་རྒྱུར་འགྱུར་གྱི། །འཕགས་ལམ་ཐོབ་པའི་རྒྱུ་རུ་འགྱུར་བ་མིན། །འཁོར་གསུམ་ཡོངས་དག་བསྔོ་བའི་བཞེད་པ་ནི། །སྟོང་ཉིད་མངོན་སུམ་རྟོགས་པའི་འཕགས་པ་ཡིས། །མཛད་རྒྱུ་ཡིན་ཅིང་སོ་སྐྱེས་མི་འགྲུབ་པས། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ། །དགོངས་གསོལ་ཚིག་གིས་སྙན་གསན་དབབ་བྱས་ཏེ། །དགེ་བ་འདི་ཡང་འཁོར་གསུམ་ཡོངས་དག་གི །བསྔོ་བར་འགྱུར་བར་མཛད་དུ་གསོལ་ལོ་ཞེས། །གུས་པའི་ཡིད་ཀྱིས་གསོལ་བ་འདེབས་པ་དང་། །འདས་དང་མ་བྱོན་ད་ལྟའི་སངས་རྒྱས་དང་། །ཀུན་ཏུ་བཟང་པོ་འཇམ་དབྱངས་ལ་སོགས་པའི། །མཁས་པ་རྣམས་ཀྱིས་བསྔོ་བ་མཛད་པ་ལྟར། །དགེ་བ་འདི་ཡང་དེ་ལྟར་གྱུར་ཅིག་ཅེས། །མོས་པ་ཙམ་གྱིས་བསྔོ་བ་བྱེད་པ་ནི། །མདོ་ལུགས་བསྟན་པ་སྤྱི་ཡི་བསྔོ་བ་ཡིན། །དེ་དོན་བཟང་སྤྱོད་ལྟུང་བཤགས་སོགས་
ལས་གསལ། །བསྔོ་བ་བསྔོ་མཁན་བསྔོ་རྒྱུ་རྣམ་པ་གསུམ།་་།སྒྱུ་མ་རྨི་ལམ་ལྟ་བུའི་བློ་གཞག་སྟེ། །བསྔོས་ན་འཁོར་གསུམ་ཡོངས་དག་བསྔོ་བ་ཡི། །ཕྱོགས་མཐུན་འབྱུང་བར་ཇོ་བོ་རྗེ་ཡིས་བཞེད། །དེ་དོན་བཀའ་གདམས་གླེབས་བམ་ནང་དུ་གསལ། །ཕྱག་རྫོགས་དགོངས་པ་བཀའ་བརྒྱུད་བཞེད་པ་ལ། །སྤྲོས་བྲལ་རྟོགས་པ་སྐྱེས་པའི་རྟོགས་ལྡན་དེས། །ཉམས་ལེན་ངང་ནས་བསྔོ་བ་བྱེད་པ་དེ། །འཁོར་གསུམ་ཡོངས་དག་བསྔོ་བ་ཡིན་པ་སྟེ། །སྤྲོས་བྲལ་སྟོང་ཉིད་མངོན་སུམ་རྟོགས་པར་བཞེད། །དེ་ལ་འགྲོ་མགོན་ས་སྐྱ་པཎྜི་ཏས། །སྤྲོས་བྲལ་སྟོང་ཉིད་མངོན་སུམ་ཡིན་ན་ནི། །སྟོང་ཉིད་མངོན་སུམ་རྟོགས་དང་ས་ཐོབ་མཉམ། །དང་པོའི་ས་ཐོབ་བྱང་ཆུབ་སེམས་དཔའ་དེས། །སྐད་ཅིག་ལག་པ་བརྐྱང་བསྐུམ་ཡུད་ཙམ་ལ། །སྤྲུལ་པ་བརྒྱ་ཡིས་དག་པའི་ཞིང་ཁམས་བརྒྱར། །སངས་རྒྱས་བརྒྱ་མཇལ་དམ་ཆོས་ཉན་པ་དང་། །སྤྲུལ་པ་བརྒྱ་ཡིས་མ་དག་འཇིག་རྟེན་བརྒྱར། །རེ་རེས་སེམས་ཅན་བརྒྱ་རེའི་དོན་མཛད་དང་། །འཇིག་རྟེན་ཁམས་བརྒྱ་ཀུན་ནི་གཡོ་ནུས་པའི། །ཡོན་ཏན་དེ་དག་མེད་པ་ཅི་ཡིན་གསུངས། །ཁྱུང་ནི་སྒོ་ངའི་ནང་དུ་
གཤོག་དྲུག་རྒྱས། །སྒོ་ང་མ་ཆག་བར་དུ་འཕུར་མི་ནུས། །སེང་གེ་མ་ཡི་ཁོག་ནས་རྩལ་གསུམ་རྫོགས། །མ་སྐྱེས་བར་དུ་ལུས་རྩལ་སྟོན་མི་ནུས། །དེ་བཞིན་སྟོང་ཉིད་མངོན་སུམ་རྟོགས་ན་ཡང་། །རྣམ་སྨིན་ལུས་རྒྱས་གཏུམ་ཕྱིར་རྟགས་མི་གསལ། །ཤི་ཚེ་བར་དོར་རྟགས་རྣམས་འབྱུང་བའི་ཕྱིར། །བཀའ་བརྒྱུད་པ་རྣམས་དངོས་སུ་བཞུགས་ཚེ་ལས། །འདིས་ན་བྱིན་བརླབས་ཆེ་རུ་འགྲོ་བར་བཤད། །དེ་ལ་མཁས་པ་ས་སྐྱ་པཎྜི་ཏས། །ཉི་མ་དེ་རིང་ཤར་བར་གྱུར་པ་ལ། །འོད་ནི་དེ་རིང་མེད་དེ་སང་ཡོད་པ། །བླུན་པོའི་ཚིག་གིས་མགོ་བསྐོར་ཡིན་ནོ་གསུངས། །དེ་ལ་སྐྱོབ་པ་འཇིག་རྟེན་གསུམ་མགོན་གྱིས། །རྟགས་ཡོད་ན་ནི་ས་ཐོབ་ཡིན་ངེས་ཤིང་། །རྟགས་དེ་མེད་ན་ས་ཐོབ་མིན་ངེས་པའི། །ཚད་ལྡན་མདོ་རྒྱུད་ལུང་ཞིག་སུས་རྙེད་ལ། །ཆིབས་པ་འདི་ལ་གོས་ཡུག་བཏགས་ནས་སྦྱིན། །གསུངས་ཀྱང་དེ་དུས་སུས་ཀྱང་མ་རྙེད་སྐད། །དེ་དོན་བྱམས་ཀླུ་པ་ལུང་བསྟན་མདོ་སྡེ་ལས། །བྱམས་པ་དགེ་སློང་མ་ཕམ་པར་གྱུར་པས། །ཤཱཀྱ་ཐུབ་པའི་དྲུང་དུ་བཞུགས་པ་ལ། །འདི་ནི་མ་འོངས་སངས་རྒྱས་བྱམས་པ་ཡིན། །ཐུབ་པས་
གསུངས་ཀྱང་འཁོར་རྣམས་ཡིད་མ་ཆེས། །འདི་ལ་རྟགས་དང་ཡོན་ཏན་གཅིག་ཀྱང་མེད། །ཉོན་མོངས་མ་སྤང་ཐ་མལ་དགེ་སློང་རང་། །འདི་འདྲ་སངས་རྒྱས་ལྔ་པར་འགྱུར་སྲིད་དམ། །བསམ་ཚེ་བྱམས་པ་ལུང་བསྟན་མདོ་སྡེ་གསུངས། །དེ་ཕྱིར་རྟགས་དང་ཡོན་ཏན་མེད་ན་ཡང་། །སྟོང་ཉིད་མ་རྟོགས་མིན་པར་མདོ་དེར་གསལ། །དེ་ཕྱིར་ཕྱག་རྫོགས་གཉིས་ཀྱི་བཞེད་པ་ལ། །སྤྲོས་བྲལ་ཡན་ཆད་རྟོགས་པའི་གང་ཟག་དེས། །ཉམས་ལེན་མ་ཡེངས་བསྔོ་བ་བྱེད་པ་དེ། །འཁོར་གསུམ་ཡོངས་དག་བསྔོ་བ་ཡིན་པར་ངེས། །སངས་རྒྱས་བྱང་སེམས་ཉན་ཐོས་རང་རྒྱལ་དང་། །སོ་སོའི་སྐྱེ་བོས་དགེ་བ་གང་མཛད་ལ། །བསམ་པ་དག་པས་རྗེས་སུ་ཡི་རང་བསྒོམ། །དེ་དག་དགེ་རྩ་རང་གིས་མཉམ་དུ་ཐོབ་། །དེ་ལྟར་ཡི་རང་བསྒོམས་པའི་དགེ་བ་དང་། །སྦྱིན་བདག་དེ་ཡིས་རང་ལ་བྱིན་པ་སོགས། །བསྔོ་རྒྱུའི་དགེ་བ་གང་ཡིན་གཅིག་ཏུ་བསྡོམས། །སངས་རྒྱས་ཀུན་ལ་མཆོད་པའི་སྤྲིན་དུ་བསྔོ། །སངས་རྒྱས་བསྟན་པ་དར་ཞིང་རྒྱས་ཕྱིར་བསྔོ། །བསྟན་འཛིན་སྐུ་ཚེ་ཕྲིན་ལས་རྒྱས་ཕྱིར་བསྔོ། །འཇིག་རྟེན་ཐམས་ཅད་བདེ་ཞིང་སྐྱིད་ཕྱིར་བསྔོ། །སེམས་
ཅན་ཐམས་ཅད་བྱང་ཆུབ་ཐོབ་ཕྱིར་བསྔོ། །དེ་ལྟར་བསྔོ་ཚུལ་དེ་དག་རེ་རེས་ཀྱང་། །དགེ་བ་ཆུང་ངུ་དཔག་མེད་ཆེན་པོར་འཕེལ། །དེ་དོན་རྡོ་རྗེ་རྒྱལ་མཚན་བསྔོ་བའི་མདོ། །ལ་སོགས་མདོ་སྡེ་མང་པོ་རྣམས་ནས་གསུངས། །དེ་ནས་དེ་དག་ཐམས་ཅད་གཅིག་བསྡུས་ཏེ། །རང་ངམ་སྦྱིན་བདག་ཚེ་འདས་སོགས་ལ་བསྔོ། །སྐྱེ་བ་ཀུན་ཏུ་བདེ་སྐྱིད་ལྡན་པ་དང་། །མཐར་ཐུག་སངས་རྒྱས་ཐོབ་པའི་རྒྱུ་རུ་བསྔོ། །དེ་ནི་ཐ་མལ་ཤི་བསྔོ་གསོན་བསྔོ་ཡིན། །མཆོད་བསྔོ་ལ་ཡང་འབྲིང་དང་རབ་གཉིས་ཏེ། །འབྲིང་ནི་དགེ་རྩ་ཞིང་གཤེགས་ལ་སྨིན་ནས། །རང་དོན་ཆོས་སྐུ་མངོན་དུ་མཛད་པ་དང་། །གཟུགས་སྐུ་དག་པའི་ཞིང་ཁམས་ཐམས་ཅད་དུ། །ལོངས་སྤྱོད་རྫོགས་སྐུའི་བརྡ་ཆོས་སྟོན་པ་དང་། །སྤྲུལ་སྐུ་མ་དག་འཇིག་རྟེན་བྱེ་བ་བརྒྱར། །གང་འདུལ་སྤྲུལ་པས་འགྲོ་བ་འདྲེན་པ་དང་། །རྗེས་འཇུག་རྣམས་ཀྱང་བར་ཆད་རྐྱེན་ཞི་ཞིང་། །རིགས་རྒྱུད་ཆོས་བརྒྱུད་སྒྱུ་འཕེལ་བའི་བསྔོ་སྨོན་བྱ། །རབ་ནི་རྫོགས་པའི་སངས་རྒྱས་བླ་མ་དེ། །སྐུ་གསུམ་དག་པའི་ཞིང་དུ་བཞུགས་པ་ལ། །དགེ་རྩ་དེ་ཉིད་མཆོད་པའི་སྤྲིན་ཆེན་པོ། །བཀྲ་ཤིས་རྫ་ས་
རྟགས་བརྒྱད་དང་རིན་ཆེན་བདུན། །མཆོད་པའི་ལྷ་མོ་བཅུ་དྲུག་ནམ་མཁའ་བཀང་། །འཁོར་བ་ཇི་སྲིད་མཆོད་སྤྲིན་རྒྱུན་མི་འཆད། །ཟག་པ་མེད་པའི་ཐུགས་དགོངས་ཡོངས་སུ་རྫོགས། །གདུལ་བྱ་རྣམས་ལ་ཐུགས་རྗེས་ཉེར་གཟིགས་ནས། །བསམ་ཞིང་སྤྲུལ་པའི་སྐུ་མཆོག་མྱུར་དུ་བྱོན། །གདུལ་བྱའི་དོན་ཆེན་མཛད་ཕྱིར་བསྔོ་སྨོན་བྱ། །བླ་ཕྲན་ཡིན་ན་འདུས་པའི་དགེ་འདུན་རྣམས། །བསྔོ་བའི་མཐུན་འགྱུར་བྱ་ཚུལ་ཀུན་གྱིས་ཤེས། །བླ་ཆེན་དགོན་ཆེན་ཡིན་ན་མཐུན་འགྱུར་རྣམས། །ཚིགས་བཅད་ཤོ་ལོ་ཀ་རེ་བསྐུལ་འདོན་དང་། །བླ་ཕྲན་ཡིན་ན་དེ་ཡི་འཐོབ་ཆ་མེད། །དེ་ལྟར་བསྔོ་བའི་གདམས་པ་ཞལ་ཁྲིད་འདི། །རྟ་ལོ་ཐ་སྐར་ཟླ་བའི་ཡར་ཚེས་ལྔར། །རི་ཆོས་ཡོངས་སུ་རྫོགས་པའི་དུས་ཀྱི་ཚེ་། །དགེ་སློང་རཱ་ག་ཨ་སྱས་སྨྲས་པ་དེ། །བླ་མ་བརྩོན་འགྲུས་རྒྱ་མཚོས་ཡི་གེར་བཀོད། །ལེའུ་ང་གསུམ་པའོ་མངྒ་ལཾ།། །།