ལེའུ་ང་བཞི་པ། གསང་སྔགས་མི་འཆལ་བྱིན་རླབས་བཅུད་ལྡན་ཕྱིར། །གཅིག་བརྒྱུད་ཨུ་པ་ཚེས་ཀྱི་གྲངས་ལྡན་ཡོད། །
༼ཡི༽ རི་ཆོས་མཚམས་ཀྱི་ཞལ་གདམས་གནང་དུས། རྗེ་ལ་བརྟན་བཞུགས་སུ་ཕུལ་བའོ། །སྤྱན་རས་གཟིགས་དངོས་དཔལ་ལྡན་བླ་མ་མཆོག །བསྟན་འགྲོའི་དོན་ལ་ཐུགས་རྗེས་ཉེར་དགོངས་ནས། །ཞིང་འདིར་
སྤྲུལ་པའི་སྐུར་བཞེངས་གུ་རུ་རྗེ། །ཀརྨ་རཱ་ག་ཨ་སྱཱ་ཞབས་བརྟན་ཤོག །ཁྱེད་སྔོན་སངས་རྒྱས་ཡིན་ཀྱང་སྙིགས་དུས་སུ། །ཐུབ་བསྟན་གསལ་མཛད་མདོ་སྔགས་ཐུགས་སུ་ཆུད། །སྡོམ་གསུམ་མཐར་ཕྱིན་བསླབ་གསུམ་རྒྱན་གྱིས་སྤྲས། །སྤྲུལ་སྐུ་རཱ་ག་ཨ་སྱ་ཞབས་བརྟན་ཤོག །ཉིད་སྐུ་འཁྲུངས་ནས་སྒྲུབ་པ་དཔག་མེད་མཛད། །མཆོག་གསུམ་རྩ་བ་གསུམ་གྱི་ལྷ་ཚོགས་རྣམས། །སྐར་ཚོགས་ལྟ་བུར་དཔག་མེད་ཞལ་གཟིགས་པའི། །གུ་རུ་རཱ་ག་ཨ་སྱ་ཞབས་བརྟན་ཤོག །ཁྱད་པར་རྒྱུད་སྡེ་བཞི་དང་སྡེ་སྣོ་གསུམ། །དམ་ཆོས་ཐུགས་ཉམས་བཞེས་ནས་འགྲོ་བའི་དོན། །ཆོས་ཀྱི་འཁོར་ལོ་ཕྱོགས་བཅུར་བསྐོར་མཛད་པའི། །སྤྲུལ་སྐུ་རཱ་ག་ཨ་སྱ་ཞབས་བརྟན་ཤོག །གཞན་ཡང་མཐོང་ཐོས་དོན་ལྡན་འགྲོ་བ་རྣམས། །སྨིན་གྲོལ་ལམ་དུ་དངོས་སུ་འགོད་མཛད་པའི། །རཱ་ག་ཨ་སྱ་ལོ་བརྒྱར་ཞབས་བརྟན་ཅིང་། །བསྟན་པ་ཉི་ཟླ་ལྟ་བུར་གསལ་བ་དང་། །བརྒྱུད་འཛིན་བསྟན་པ་འཛིན་པའི་གྲྭ་སློབ་རྣམས། །ཆུ་བོའི་རྒྱུན་བཞིན་རྒྱུན་ཆད་མེད་པར་ཤོག །དུས་གསུམ་སངས་རྒྱས་བྱང་སེམས་སྨོན་ལམ་ལ། །དབང་བའི་བླ་མ་ཡི་དམ་
མཁའ་འགྲོ་དང་། །ཆོས་སྐྱོང་ནོར་ལྷ་དམ་ཅན་རྒྱ་མཚོ་ཡི། །བདེན་པའི་སྟོབས་དང་དགེ་ཚོགས་སྟོབས་རྣམས་ཀྱིས། །སྨོན་ལམ་ད་ལྟ་ཉིད་དུ་འགྲུབ་གྱུར་ཅིག །ཅེས་པ་འདི་ཤུགས་འཆང་ཅང་ཤེས་རྒྱལ་པོའི་ལོ་རྒྱལ་ཟླ་བའི་ཡར་ཚེས་ལ་གནས་མཆོག་དཔལ་རིའི་རྩེར། རྗེ་ལ་བརྟན་བཞུགས་སུ་བླ་མ་ཀརྨ་བཱིརླ་སཱ་ག་རས་ཕུལ་བའོ།། མངྒ་ལཾ།། བླ་མ་རིན་པོ་ཆེའི་ཞལ་ནས། མ་འོངས་པའི་གང་ཟག་རི་ཁྲོད་འགྲིམས་ཤིང་། མདོ་སྔགས་ཀྱི་ཉམས་ལེན་དང་། གསར་རྙིང་ཐམས་ཅད་གཅིག་ཏུ་དྲིལ་བའི་སྒྲུབ་པ་གཅིག་ཤེས་ཀུན་ཁྲོལ། རང་གཞན་གྱི་དོན་ཐམས་ཅད་སྒྲུབ་པར་འདོད་ན། རི་ཆོས་མཚམས་ཀྱི་ཞལ་གདམས་འདི་ལ་ཚང་བ་ཡིན་ཏེ། ང་དང་དངོས་སུ་འཕྲད་ཀྱང་། འདི་ལས་ལབ་རྒྱུ་མེད་པར་ཤེས་པར་བྱོས་ལ། གླེགས་བམ་འདི་བྲི་བར་འདོད་པ་དག་གིས་ལེའུ་སོ་སོར་མི་ཕྱེ་བར། མགུར་འབུམ་བྲིས་པ་ལྟར་ཕྱོགས་གཅིག་ཏུ་བསྒྲིགས་ནས་གླེགས་བམ་བཟང་པོ་གཅིག་གྱིས་ལ་ཞོགས་དང་། དཔེ་ཆ་ཁ་མི་འཐོར་བ་སོགས་འོང་བས་བློ་ཆུང་རྣམས་ལ་འགྲོ་དོན་རྒྱ་ཆེན་པོ་ཞིག་འབྱུང་ངམ་སྙམ་པ་ཁོ་བོས་སེམས་སོ། །ཞེས་དང་། འོག་ནས་འབྱུང་བའི་རྩ་རླུང་གི་གདམས་པ་དང་། ཆོས་
སྐྱོང་སྤྱི་སྒྲུབ་ཀྱི་སྐོར་རྣམས་དབང་ལུང་མ་ཐོབ་པ་དང་། སྒྲུབ་པ་མི་བྱེད་པ་སོགས་སྣོད་མིན་རྣམས་ལ་གསང་བར་བྱ་སྟེ་ཤེས་པར་བྱོས་ཤིག །ཅེས་པའི་ཞལ་ཤེས་འདི་ཡང་ཀརྨ་བིརླས་བྲིས་པའོ། །མངྒ་ལཾ། ། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།