ལེའུ་ཞེ་བརྒྱད་པ། ཆོས་སྐྱོང་རང་བཞིན་ཤུགས་ལ་འཁོར་བའི་ཕྱིར། །བླ་རྡོ་བརྟེན་རྫས་ཤ་རུལ་སྦྲང་འཁོར་ཡོད། །
༼ཚི༽ རི་ཆོས་མཚམས་ཀྱི་ཞལ་གདམས་ལས། ཆོས་སྐྱོང་སྤྱི་སྒྲུབ་ཀྱི་བླ་རྡོ་རྟེན་རྫས་ཀྱི་ཡིག་ཆུང་ཤ་རུལ་སྦྲང་བུ་རང་འཁོར་ཞེས་བྱ་བ་བཞུགས་སོ། །ན་མོ་བཛྲ་པཱ་ཎི་ཡེ། ཆོས་སྐྱོང་སྤྱི་ཡི་བླ་རྡོ་སྲོག་འཁོར་དང་། །རྟེན་རྫས་སྒྲུབ་རྫས་སོ་སོའི་སྒྲུབ་ཐབས་ནས། །སོ་སོའི་གཞུང་བཞིན་གྲུབ་ན་མཆོག་ཡིན་ཏེ། །ཤེས་པར་དཀའ་ཞིང་ཤེས་ཀྱང་འཛོམ་པར་དཀའ། །གཏན་ནས་མེད་ན་འགྲུབ་པར་དཀའ་བ་སྟེ། །དཔེར་ན་རྔ་དང་པི་ཝཾ་ལ་སོགས་བཞིན། །རྫས་སྣ་གཅིག་མ་ཚང་ཡང་དོན་མི་འགྲུབ། །སྤྱིར་ནི་ལྷ་ཡི་བླ་རྡོ་ཤེལ་དཀར་རྡོ། །མི་ཡི་བླ་རྡོ་དྲུག་དམར་གཡུ་ཡིན་ཏེ། །འདྲེ་ཡི་བླ་རྡོ་ཕ་ཝང་ལོང་བུ་ཉིད། །མཁའ་འགྲོ་མ་ཡི་བླ་རྡོ་མུ་མེན་དང་། །ནོར་ལྷའི་བླ་རྡོ་གསེར་ནི་ས་བྱུང་བ། །ཀླུ་ཡི་བླ་རྡོ་མུ་ཏིག་ཉ་ཕྱིས་ཡིན། །ལྷ་མོའི་བླ་རྡོ་མཚོ་རྡེལ་སྔོན་པོ་དང་། །རྡོ་ནག་གྲུ་གསུམ་མགོན་པོའི་བླ་རྡོར་བཤད། །དེ་དག་སོ་སོར་ས་བོན་ཡི་གེ་བྲི། །སོ་སོར་མ་རྙེད་ལྷ་འདྲེ་ཐམས་ཅད་ཀྱི། །བླ་རྡོ་གཅིག་བསྡུས་ཕ་ཝང་ལོང་བུ་ཡིན། །རབ་གསེར་འབྲིང་དངུལ་ཐ་མ་མཚལ་གྱིས་ནི། །ཕྱོགས་བཞིར་ཛཧཱུྃ་བཾ་ཧོའི་ཡི་གེ་བཞི། །སྟེང་དུ་གཙོ་བོ་ཡབ་ཡུམ་ས་བོན་དང་། །ཡུམ་མེད་ན་ནི་གཙོ་བོའི་ས་བོན་
ཉིད། །འོག་ཏུ་ལས་མཁན་ཕོ་མོའི་ས་བོན་བྲི། །དེས་ནི་གང་ཡིན་ལྷ་དེའི་བླ་རྡོ་ཚང་། །རབ་ནི་དར་རམ་གོས་ཆེན་ལྷ་ཡི་མདོག །མ་རྙེད་གྲོ་ཤོག་གཙང་མ་ལ་ཡང་རུང་། །རྩ་སྔགས་ཕྲེང་གཅིག་བྲིས་པས་བླ་རྡོ་དྲིལ། །དེ་ཉིད་གོས་དར་ལྷ་ཡི་ཁ་དོག་བཏུམས། །དེ་ཉིད་མཚོན་སྐུད་སྣ་ལྔས་རྒྱ་གྲམ་བཅིང་། །དེ་ཉིད་ལྷར་བསྐྱེད་བསྐྱེད་བསྟིམ་གཏོར་མ་འབུལ། །མི་གཤེགས་དེར་བསྟིམ་རྟེན་འབྲེལ་རབ་གནས་བྱ། །དེ་ཉིད་སྒྲུབ་ཚེ་ག་འུར་ལུས་ལ་བཅང་། །ཚར་ནས་རྟེན་སྒམ་ནང་ངམ་མདའ་དར་བཏགས། །རྟག་ཏུ་མི་གཤེགས་དེ་ལ་ཐིམ་པར་དམིགས། །རྡོ་ནི་བླ་རྡོ་སྔགས་ནི་སྲོག་འཁོར་ཚང་། །ཕྱི་རྟེན་མགོན་པོར་གཡག་ནག་དར་སྣས་བརྒྱན། །ལྷ་མོར་ལུག་ནག་སྤྱི་དཀར་བྱ་མོ་་ནག །དམ་ཅན་ར་དཀར་གཉའ་ནག་རྔ་ཁྲས་བརྒྱན། །ནོར་ལྷའི་རིགས་ལ་རྟ་སྔོན་ཆུ་རིས་དང་། །བཙན་ལ་ཁྱི་དམར་རྟ་དམར་ཀླུ་ལ་ནི། །ཆུ་རྟ་སྔོན་པོ་སྦལ་པ་སྦྲུལ་གྱི་གཟུགས། །རབ་ནི་དར་རས་ཐ་ན་ཤོག་བུར་བྲིས། །མདའ་ལ་བཏགས་པས་ཕྱི་རྟེན་དེ་ཡིས་ཚང་། །མདའ་གཙང་རྒོད་སྒྲོ་མེ་ཡིས་མ་བཤུར་བ། །རང་མདོག་དར་བཏགས་དེ་
ཡི་ནང་རྟེན་ཚང་། །ཤོག་བུ་གཙང་མའམ་དར་རས་ཙཀྱི་བྲི། །དེ་ཡི་རྒྱབ་ཏུ་ཐུགས་ཐད་ས་བོན་བྲི། །དེ་རྒྱབ་གང་ཡིན་ཕྱག་གཡས་ཕྱག་མཚན་བྲི། །མཐའ་སྐོར་བསྙེན་སྔགས་སྒྲུབ་སྔགས་གཡས་བསྐོར་བྲི། །མ་ཤོང་སྔགས་མཇུག་ནང་དུ་བཅུག་པར་བྱ། །དེ་ཉིད་སྤྱན་དབྱེ་རབ་གནས་བརྡའ་ཙམ་བྱ། །གཟའ་སྐར་བཟང་ངམ་དུས་ཚོད་གཉན་པོ་ལ། །བྲི་དང་རབ་གནས་ཉིན་གཅིག་གིས་རྫོགས་བྱ། །རྟེན་རྫས་ཀུན་གྱི་མཆོག་ཏུ་གྱུར་པ་སྟེ། །སྒྲུབ་དུས་གཏོར་མའི་མགོ་ལ་བཙུགས་པ་སྟེ། །ཚར་ནས་མདའ་དར་མགུལ་བཏགས་རྟེན་སྒམ་སྦ། །སྐུ་ནི་སྐུ་རྟེན་སྔགས་ནི་གསུང་གི་རྟེན། །ཕྱག་མཚན་བྲིས་པས་ཐུགས་ཀྱི་རྟེན་ཚང་ངོ་། །གསུང་རྟེན་གོང་དུ་བཤད་པའི་བླ་རྡོའོ། །བསྐང་རྫས་རྣམ་པ་སྣ་ཚོགས་གསུངས་པ་རྣམས། །བསྐང་རྫས་ཐང་སྐུའམ་ཟན་ལ་པར་བཏབ་རུང་། །དངོས་སུ་མེད་ཀྱང་དམིགས་རྟེན་བརྡ་མཚོན་རེ། །མེད་ན་ལྷ་མོའི་རིགས་ནི་མི་འགྲུབ་སྟེ། །ཏིང་འཛིན་གསལ་ཡང་དེ་ཡིས་མི་ཆོག་ཕྱིར། །རྫས་ལ་དགའ་བས་རྫ་ས་དགའ་མ་ཞེས་བྱ། །བསྐང་བའི་ནང་ནས་གསུངས་པའི་རྫས་དེ་དག །དངོས་སུ་འཛོམ་ན་མ་བསྒྲུབ་ན་ཡང་
ཆོག །དཔེར་ན་ཤོ་རུལ་སྦྲང་མ་འདུ་མཚུངས་གསུངས། །དེ་དོན་མ་མགོན་རྒྱུད་གཞུང་རྣམས་སུ་གསལ། །རང་མདོག་དར་རམ་རས་ལ་སྐུ་བྲིས་པ། །དེ་ནི་ཕྱར་དར་ཀུན་ལ་ཡོངས་སུ་གྲགས། །རང་མདོག་དར་ཁ་མ་ཉམས་གཙང་མ་ལ། །བསྙེན་སྔགས་འབོད་སྔགས་སྤྱན་འདྲེན་སྔགས་བྲིས་པ། །ལྕགས་སམ་གང་རུང་རྡོ་རྗེའི་སྣེ་ལ་བཏགས། །སྤྱན་འདྲེན་སྐབས་སུ་ལག་གཡུག་ཚུལ་དུ་གཡབ། །དེ་ནི་གཡབ་དར་ཡིན་ཏེ་ཤེས་མཁན་དཀོན། །སྐྱེས་པ་ཐིག་ལེ་མ་ཉམས་གསང་རྡོར་ནི། །འབྲས་བུ་གཉིས་བཅས་མི་དབང་འབྲས་བུ་ཡིན། །མིང་སྲིང་སྦྱོར་བའི་བྱིས་པ་ནལ་བུ་སྟེ། །ཧ་ཏ་ཞེས་པ་ལག་པའི་མིང་ཡིན་ལ། །མཚལ་གྱི་ཤིང་ཏོག་པད་མ་རཀྟ་ཡིན། །སྟོན་ཁ་ལྕང་མའི་ལོ་མ་རླུང་ཁྱེར་བ། །ས་ལ་མ་ཕོག་བར་སྣང་ཁམས་ནས་བཟུང་། །དེ་ཡི་སྟོད་ལ་ལྷ་མོའི་སྐུ་བྲིས་ལ། །ཕྱེད་བཅད་སྨད་ལ་ལྷ་མོའི་སྙིང་པོ་བྲི། །དེ་གཉིས་ཞལ་སྦྱར་ཚོན་སྐུད་སྣ་ལྔས་བཅིངས། །ལྷ་མོ་བསྐྱེད་བསྟིམ་འབྲལ་མེད་ལུས་ལ་བཅངས། །ལྷ་མོ་ལུས་དང་གྲིབ་བཞིན་འགྲོགས་པར་གསུངས། །དེ་ནི་ལྷ་མོའི་རྟེན་རྫས་ཀུན་ལས་མཆོག །རི་རྒྱལ་
གཉེན་པོ་གྲགས་པ་ཅན་གྱི་རྩེ། །ཡང་ན་རི་མགུལ་རི་ཟུར་ཡིན་ཀྱང་རུང་། །རྡོ་ནག་ཟུར་གསུམ་ཤ་རིལ་མཛུབ་རྩེ་ཙམ། །གྲི་གུག་གམ་ནི་གྲི་ཡི་རྩེ་མོས་བླངས། །ལག་པས་མ་རེག་ཤོག་བུའི་ནང་བཏུམ་ལ། །ལོགས་གཅིག་གསེར་གྱི་ཧཱུྃ་ཡིག་བྲི་བ་དང་། །གཡས་སུ་དེ་ཡི་ལས་མཁན་གང་ཡིན་སྲོག །གཡོན་དུ་དེ་ཡི་ཡུམ་དེའི་ས་བོན་བྲི། །གོང་ལྟར་སྔགས་ཀྱི་ཤོག་དྲིལ་གྱིས་བཏུམས་ཏེ། །བཏག་གམ་བཅངས་པ་མགོན་པོའི་བླ་རྡོ་མཆོག །དེ་བཞིན་མཚོ་གཉན་རྡེའུ་སྔོན་པོ་གཅིག །ལག་པས་མ་རེག་ཁེམ་མམ་སྐྱོགས་ཀྱིས་བླངས། །བྷྱོའམ་མ་བྲིས་སྔགས་བཏུམས་ལྷ་མོའི་རྟེན། །ཕུབྲིས་སྔགས་གཏུམ་ཀླུ་ཡི་བླ་རྡོ་ཡིན། །གལ་ཏེ་ཕྱི་རྟེན་རྟ་དང་གཡག་རྩེན་ན། །དང་པོ་རྣམ་འཇོམས་གཟུངས་ཆུ་གཏོར་བས་བཀྲུ། །ར་ལ་བཙག་བྱུག་རྣ་བ་དཔུང་པ་གཉིས། །རྔ་ཚོན་སྔོ་དམར་དར་སྣ་སྲུང་སྐུད་གདགས། །གང་ཡིན་ལྷ་ཡི་སྙིང་པོའི་ཤོག་དྲིལ་ནི། །རྣ་བའམ་ནི་དཔུང་པའི་གསེབ་ཏུ་བཏགས། །བསྐང་གསོའི་སྐབས་སུ་འདི་ལ་རྟེན་ཆོས་ལ། །མི་ནོར་སྤེལ་ཞིང་སྲུང་བའི་ཕྲིན་ལས་བཅོལ། །སྤུ་མི་བྲེགས་ཤིང་ཤ་མི་གཅོད་པ་དང་། །ལུད་སོགས་
ངན་པའི་ཁལ་ནི་བཀལ་མི་བྱ། །སྐབས་སུ་ལྷ་ཡང་དེ་ལ་བསྟིམ་དམིགས་ན། །གཅན་གཟན་ཆོམ་རྐུན་རྣམས་ལ་དཔའ་བ་ཡིན། །རིགས་མཐུན་དུད་འགྲོའི་ཁྱུ་ཡང་སྲུང་བར་འགྱུར། །དེ་བཞིན་རྔ་ཐུག་བཙུག་པར་བྱ་བ་དང་། །ཁ་ཊཾ་སྡེ་ཆེན་བླ་ཆེན་དགོན་པ་སོགས། །འཐོབ་ཆ་ཡོད་པ་མིན་པས་མི་ཁྱག་ཟེར། །མདུང་ལྕགས་སྐྱ་སེར་སྔ་གས་པ་སུས་ཀྱང་རུང་། །ཐུགས་ཀྱི་རྩེ་སྟོད་སྲོག་ཤིང་དེ་ཡི་ནང་། །ཆོས་སྐྱོང་རྣམས་ཀྱི་འབོད་སྔགས་བསྙེན་སྔགས་བཅུག །རྐེད་པར་རྒད་པའི་སྔགས་རིང་ཤོག་དྲིལ་བཅུག །རྩ་བར་བསད་སྔགས་ཤོག་དྲིལ་བཅུག་པ་ནི། །མ་ནིང་རྔ་ཐུག་ཨོ་རྒྱན་གྱིས་མཛད་ལུགས། །རྔ་ཐུག་ནང་དུ་ཕྱོགས་གསུམ་ཤོག་དྲིལ་བཏགས། །ཡང་ན་ཤིང་གི་ནང་དུ་བཅུག་ཀྱང་རུང་། །དེ་ནི་རྔ་ཐུག་ཡུ་བ་མ་བརྟེན་ཏེ། །རྔ་ཐུག་ཁུར་དགོས་སྒར་པ་བྱེད་པའི་ལུགས། །ལྕགས་དེ་གནམ་ལྕགས་མ་ལ་ཡ་ཡི་རི། །རྔ་མ་མགོན་སྤྲུལ་བྱ་རོག་ནག་པོ་སྟེ། །ཡུ་བ་བྱང་ཤར་དཔག་བསམ་ལྗོན་པའི་ཤིང་། །དཔལ་ལྡན་ལྷ་མོའི་བཞུགས་གནས་མཚོན་པ་ཡིན། །དགུ་གཏོར་དུས་སུ་རྒྱུན་དུ་དེ་ལ་བསྟིམ། །དགོན་པ་ལྷ་ཆ་བྲང་ང་
ལ་སོགས་པ། །སྲུང་ཞིང་སྐྱོབ་པའི་བཅོལ་གཏམ་ཡང་ཡང་བྱ། །དེ་ཡིས་ཡུལ་ཕྱོགས་དགོན་གནས་སྲུང་བའི་མཆོག །དེ་ལས་ས་སེར་གནམ་སྔོན་དར་ལྕེ་དམར། །དར་ནག་ཆོས་སྐྱོང་སྔགས་བྲིས་བཏགས་པ་ཡིས། །ཆོས་སྐྱོང་སྲུང་མ་ཤུགས་ལ་འཁོར་བའི་གནད། །དར་ལ་འདུ་བ་ལྷ་འདྲེ་སྤྱི་ཡི་ལུགས། །ཞེས་པ་ཆོས་སྐྱོང་སྤྱི་ཡི་རྟེན་རྫས་རྣམས། །ཚེགས་ཆུང་དོན་ཆེ་སུས་ཀྱང་རྙེད་སླ་བ། །རྟ་ལོ་ཁྲུམས་ཟླའི་མར་ངོའི་བཅུ་གཉིས་གུང་། །རཱ་ག་ཨ་སྱས་ངག་ཁྲིད་ཚུལ་དུ་སྨྲས། །སྔགས་ཀྱི་རྣལ་འབྱོར་བརྩོན་འགྲུས་རྒྱ་མཚོ་བས། །སྔགས་ཆུང་གསར་བུ་རྣམས་ལ་ཕན་ཕྱིར་བྲིས། །སྦ་འོས་གསལ་བཀོད་ཉེས་འགལ་སྲུང་མར་བཤགས། །དགེ་བས་སྔགས་ཀྱི་བསྟན་པར་དར་རྒྱས་ཤོག །ལེའུ་ཞེ་བརྒྱད་པའོ་མངྒ་ལཾ།། །།འོ་སྐོར་གྱི་ཆོས་སྐྱོང་འདི་ཡི་མཚན་ནི། ལྷོ་བྲག་གི་མགོན་པོ་གཅིག་མགྱོགས་མ་ཞེས་ཀྱང་བྱ།་ཟངས་དཀར་ལོ་ཙཱ་བའི་ཤ་བ་རྒྱུག་འགྱེལ་ཞེས་ཀྱང་བྱ། གཉལ་པ་ཉི་མ་འབར་གྱི་ཕོ་རོག་ལྡིང་སྒྱུར་ཞེས་ཀྱང་བྱ། གཉལ་པ་ཇོ་སྲས་ཀྱི་མྱུར་བ་ཁྲག་སྐྱུགས་ཞེས་ཀྱང་བྱ། ཆོས་སྐྱོང་འདི་ནི་མགོན་པོ་སྤྱི་བསྡུས་ཀྱི་སྒྲུབ་པ་ཡིན་པ་
ལ། སློབ་དཔོན་ཨརྞ་པ་ཡི་མགོན་པོ་སྤྱི་སྒྲུབ་ཞེས་ཀྱང་བྱ། མལ་གྱོ་ལོ་ཙཱ་བའི་མགོན་པོ་མེ་ཡི་སྤུ་གྲི་ཞེས་ཀྱང་བྱ། སློབ་དཔོན་ཉི་མ་འབར་གྱི་མགོན་པོ་ཕུང་བྱེད་ཅེས་ཀྱང་བྱ། གཉལ་པ་ཇོ་སྲས་ཀྱི་ མགོན་པོ་བེང ་ཆེན་ཞེས་ཀྱང་བྱ། བླ་མ་རས་ཆེན་གྱི་མགོན་པོ་ལྕགས་པར་མ་ཞེས་ཀྱང་བྱ། དོན་དམ་པར་ནི། མགོན་པོ་འདི་ཡི་མཚན་ནི། དཔལ་ཡེ་ཤེས་ཀྱི་མགོན་པོ་བེར་ནག་ཅན་ཞེས་བགྱི་བ་ལགས་སོ། །མགོན་པོ་འདི་ནི་ཤིན་ཏུ་སྟོབས་དང་རྫུ་འཕྲུལ་ཆེ་བ་སྟེ། རྒྱུད་མེ་ལྕེ་ཕྲེང་བ་ལས། བཅོམ་ལྡན་འདས་ཀྱིས་མགོན་པོ་ནག་པོ་ལ་བཀའ་སྩལ་པ། །སྐྱེས་བུ་ཁྱོད་ཀྱི་མཐུ་རྩལ་ནི། །སྲིད་པ་གསུམ་ལ་བྱོལ་འདེབས་ཤིང་། །ཁམས་གསུམ་དབང་དུ་སྡུད་པར་བྱེད། །འདོད་ཁམས་དཀྲུག་ཅིང་ཟིལ་གྱིས་གནོན། །སྟོང་གསུམ་གཞན་དུ་འཕེན་པར་བྱེད། །འབྱུང་བ་ཀུན་གྱི་རྒྱུན་ལམ་གཅོད། །རྒྱ་མཚོ་ཆེན་པོ་ཧུབ་ཀྱིས་འདེབས། །རི་རབ་ལྷོ་རུ་སྒྱུ་ཟ་བར་བྱེད། །དགྲ་བགེགས་འབྱུང་པོ་ཚར་གཅོད་ཅིང་། །ཁྱོད་ཀྱི་གད་མོ་བགད་པ་ནི། །གཤེ་བའི་གད་མོས་ལྷ་རྣམས་བརྒྱལ། །བདུད་དང་མུ་སྟེགས་བསྔངས་བར་བྱེད། །།
ཤི་ལ་ཐུག་པར་བརྒྱལ་བར་འགྱུར། །ངོ་མཚར་གད་མོས་དབང་དུ་སྡུད། །མ་མོའི་ཚོགས་རྣམས་ཡིད་ཀྱང་འཕྲོག །ཧཱུྃ་སྒྲས་ཁམས་གསུམ་དབང་དུ་སྡུད། །ཕཊ་ཀྱིས་སྟོང་གསུམ་དུས་གཅིག་སྒྲོལ། །ལེ་ཕེ་ཕོ་ཀྱིས་འཇིག་རྟེན་གཡོ། །གཡོ་བས་ཐམས་ཅད་དབང་དུ་སྡུད། །བངས་ཀྱི་སྟོབས་ནི་གློག་དང་འདྲ། །སྟོང་གསུམ་དུས་གཅིག་ཁྱབ་པར་འགྲོ། །མངོན་ཤེས་ལྔ་དང་རབ་ལྡན་ཞིང་། །རྫུ་འཕྲུལ་སྣ་ཚོགས་རབ་བསྟན་ནས། །འགྲོ་བ་ལོག་རྟོག་སྒྲོལ་བར་བྱེད། །མཁའ་འགྲོ་ཀུན་གྱི་གཙོ་བོ་སྟེ། །དུར་ཁྲོད་ཀུན་གྱི་བདག་མོ་སྟེ། །ལྷ་ཆེན་ཚོགས་ཀྱི་བདག་པོ་སྟེ། །ཞིང་སྐྱོང་དཔའ་བོའི་དམག་དཔོན་བྱེད། །གཤིན་རྗེ་བདུད་ཀྱི་རྗེ་བོ་མཛད། །གནོད་སྦྱིན་ཀུན་ཀྱང་བྲན་དུ་ཁོལ། །དེ་ལྟར་དཔལ་ལྡན་དེད་དཔོན་ཁྱོད། །ཅེས་གསུངས་སོ། །རིན་ཆེན་དཔུང་རྒྱན་ལས། །གང་ཚེ་ཅི་ཡིས་འདུལ་བ་ཤེས་པ་པོ། །ཅི་དང་ཅི་འདུལ་སྤྲུལ་པ་ཤེས་པ་པོ། །ཞེས་གསུངས་པ་དང་། སྲོག་གི་འཁོར་ལོའི་རྒྱུད་ལས། མགོན་པོ་ཉིད་ཀྱིས་སྨྲས་པ། ཨེ་མ་ཧོ། བདག་ནི་ཤིན་ཏུ་མི་བསྲུན་པས། །སྲིན་པོ་རྣམས་ཀྱང་བྲན་དུ་ཁོལ། །ལྷ་མ་
ཡིན་རྣམས་བརླག་པར་བྱེད། །ལྷ་སྲིན་སྡེ་བརྒྱད་འཁོར་དུ་བཅས། །ལྷ་མ་ཡིན་གྱི་བུ་མོ་རྣམས། །སྲིན་མོར་བཅས་ཏེ་ཁས་བླངས་ནས། །སངས་རྒྱས་བསྟན་པ་བསྲུང་དུ་བཅུག །ཅེས་སོ། ཞེས་པ་ལུང་འདྲེན་འདི་ཡང་ཕྱག་དཔེ་ནས་ཁོལ་དུ་ཕྱུངས་ཏེ་རིན་པོ་ཆེའི་ཞལ་སྔ་ནས་ཀྱིས་བསྩལ་བ་ལྟར་བདག་ཀརྨ་བཱིརླ་སཱ་ག་རས་མགྱོགས་པར་བྲིས་པའོ།། །།