དབང་གི་ཞལ་གདམས།
དབང་གི་ཞལ་གདམས་བཞུགས་སོ།
ན་མོ་བཛྲ་དྷ་ར་ཡེ། བཙུན་པ་ཏིང་འཛིན་ཞེས་བྱ་བས། །དབང་གི་ཞལ་གདམས་དགོས་ཟེར་བ། །སྤྱིར་ན་ཐེག་པ་ཆེན་པོ་དང་། །ཁྱད་པར་གསང་སྔགས་ཆོས་རྣམས་ཀྱི། །གཞི་དང་རྩ་བ་སེམས་བསྐྱེད་ཡིན། །དབང་བསྐུར་ཞུ་དང་བདག་འཇུག་དང་། །གཞན་ལ་བསྐུར་བ་ཐམས་ཅད་ལ། །འགྲོ་བའི་དོན་དུ་བཅོམ་ལྡན་འདས། །བདག་གིས་ཐོབ་ཕྱིར་བྱའོ་ཞེས། །སེམས་བསྐྱེད་ལྡན་ན་ལམ་དུ་འགྲོ། །ཟང་ཟིང་བསྡུ་ཕྱིར་ཞི་བ་དང་། །ནད་གདོན་ཞུ་ཕྱིར་བདག་འཇུག་དང་། །ཟས་ནོར་འདོད་ཕྱིར་དབང་བསྐུར་བ། །ངན་སོང་ས་བོན་ཁོ་ན་
ཡིན། །ཟས་ནོར་བསྡུ་ལ་ཁྱད་མེད་ཀྱང་། །བསམ་པའི་དབང་གིས་ཆོས་དང་སྡིག །རང་གིས་དབང་ལུང་མ་ཐོབ་པར། །དཔེ་ཆ་རྙེད་ཅིང་བློར་བཟུང་པས། །གཞན་ལ་གཤར་ཅིང་དབང་བསྐུར་བ། །མཚམས་མེད་ལྔ་ལས་སྡིག་ཆེ་བས། །དམྱལ་བ་རང་གིས་ཉོ་བ་སྟེ། །ཅི་ཕྱིར་རྒྱལ་བའི་བཀའ་བཅག་ཅིང་། །དམ་ཆོས་བརྐུས་ནས་བཙོང་བའོ། །ཟས་ནོར་ཨེ་རྙེད་ཁོ་ན་ཡིས། །དབང་བསྐུར་ཆོས་བཤད་བྱེད་པ་ནི། །དབང་ལུང་ལེགས་པར་ཐོབ་ན་ཡང་། །གསང་སྔགས་ནོར་ལ་བཙོང་བ་སྟེ། །ཡི་དྭགས་རྟེན་ཡུལ་བྱེད་འདོད་ཡིན། །གཞན་ཕན་
བསམ་པ་རྣམ་དག་ཅིང་། །ལེགས་པར་ཐོབ་ནས་བྱེད་པ་ནི། །རྒྱལ་བའི་ཕྲིན་ལས་བསྒྲུབ་པ་ཡིན། །ཨེ་རྙེད་སྙིང་ལ་མ་འཆང་ཡང་། །ཤུགས་ཀྱིས་རྗེས་གནང་རེ་རེ་ལ། །གསེར་སྲང་བརྒྱ་སྟོང་བྱུང་བ་ཡང་། །དཀོར་གྱི་སྒྲིབ་པས་མི་གོས་ཤིང་། །སྦྱིན་བདག་བསོད་ནམས་ཚོགས་རྫོགས་པ། །དམ་པའི་ཆོས་ཀྱི་རིན་ཐང་ཡིན། །དེ་གཉིས་བསམ་པའི་ཁྱད་ཀྱིས་བསྒྱུར། །དབང་ཐོབ་ཕྱག་ལེན་མཁས་ན་ཡང་། །རྩ་བའི་ཡི་དམ་གཅིག་ཙམ་གྱི། །དུས་རྟག་གྲངས་ཀྱི་བསྙེན་པ་གསུམ། །དེ་གཉིས་ལྡན་པ་ཅིག་མེད་ན། །གསང་སྔགས་ཡན་ལག་དམ་ཚིག་ཉམས། །དེ་ཡང་དམྱལ་བའི་ས་བོན་ཡིན། །བསྐྱེད་རིམ་རྩལ་ནི་མ་འབྱོང་ན། །ཆོ་གའི་ཆ་ལག་ཚང་དགོས་ཏེ། །མ་ཚང་བསྐུར་ན་ཉེས་སྒྲིབ་ཆེ། །བསྐྱེད་རིམ་འབྱོངས་ནས་བདག་མདུན་བུམ། །སོ་སོར་རྒྱས་པར་མ་གྲུབ་ཀྱང་། །སྐད་ཅིག་དྲན་རྫོགས་འཇའ་ཚོན་བཞིན། །བསྒོམ་པར་ནུས་ན་ཆོ་ག་ཡང་། །ཚང་མ་མི་དགོས་བསྐུར་ཆོག་པ། །པཎ་ཆེན་རྡོ་རྗེ་གདན་པས་བཞེད། །འོན་ཀྱང་བསྙེན་པ་བརྒྱ་ཙ་བརྒྱད། །མ་ཐོན་བསྐུར་བར་མི་རུང་བ། །རྒྱུད་སྡེ་རྣམས་ནས་གསལ་བ་ཡིན། །
དེ་ནི་བུམ་བསྐྱེད་གཙོ་ཆེའོ། །དམ་ཚིག་ཉམས་ཆག་ཡེ་མེད་ན། །བདག་འཇུག་ལེན་ནི་མི་དགོས་ལ། །ཐེ་ཚོམ་ཡོད་ན་བླང་དགོས་ཏེ། །ཆག་ཉམས་ཀྱིས་ནི་གཞན་ལ་དབང་། །བསྐུར་ཀྱང་བྱིན་རླབས་འབྱུང་བ་མིན། །གསང་སྔགས་རྙིང་མ་ཕལ་ཆེར་ལ། །ཏིང་ངེ་འཛིན་གྱིས་བདག་འཇུག་བླངས། །དབང་ཚིག་འདོན་ནི་མི་དགོས་སོ། །དབང་ཚིག་བརྗོད་ཅིང་དབང་ལེན་པ། །འདོད་ན་རྙིང་མ་ལ་ཡང་རུང་། །དགོངས་འདུས་འོད་འབར་སོགས་ན་གསལ། །རཏྣ་ལུག་ལ་ཕྱག་སྲོལ་མེད། །འོན་ཀྱང་སྒྲུབ་པ་ཐམས་ཅད་མཇུག །དངོས་གྲུབ་ལེན་ཆོག་དོན་ལ་གཅིག །རྗེས་གནང་མི་འདྲ་དུ་མ་ཡི། །ཐམས་ཅད་བསྙེན་པ་ཐོན་དཀའ་ཡང་། །ཆོ་འཕྲུལ་ཆེན་པོའི་ཟླ་བ་དང་། ཉི་ཟླ་གཟས་འཛིན་བྱུང་བའི་ཚེ། །ཕྲེང་སྐོར་འགའ་ཟུང་བཟླས་པ་ཡིས། །འགྱུར་གྱི་དབང་གིས་བསྙེན་པ་ཐེམ། །དེ་ནི་དུས་ཀྱི་འགྱུར་ཡིན་ལ། །གནས་རི་བཟང་བར་བསྙེན་ན་ཡང་། །སུམ་བརྒྱ་དྲུག་ཅུའི་འགྱུར་དུ་ངེས། །དེ་དག་མཁས་པའི་གསུང་རྒྱུན་ཡིན། །དབང་བསྐུར་ཚར་མ་ཐག་གི་ཚེ། །བསྙེན་པ་མང་ཉུང་ཅི་རིགས་བརྗོད། །དེ་ཚེ་ཏིང་
འཛིན་དབང་བླང་བས། །རང་གིས་ནུས་པ་མི་ཉམས་པ། །ཨོ་རྒྱན་ཆེན་པོས་གསུངས་པ་ཡི། །མན་ངག་ཁྱད་དུ་འཕགས་པ་ཡི། །དེ་འདྲའི་གནད་ཟབ་མ་ཤེས་པར། །དབང་བསྐུར་མང་ན་བྱིན་རླབས་ཟད། །ཚེ་ཐུང་བསོད་ནམས་ཇེ་ཞན་འགྲོ། གཉེན་ཅིང་ཟབ་པའི་དབང་ལུང་ཡང་། །སྣོད་ལྡན་དམ་ཆོས་བསྒྲུབ་པ་དང་། །ཆོས་དེས་བསྟན་ལ་ཕན་ནུས་ལ། །ཕྱག་རྟེན་ཆུང་བས་མ་བསྟན་ན། །སེམས་ཅན་བློས་བཏང་ལྟུང་བ་སྟེ། །མཁའ་འགྲོ་ཆོས་བདག་ཐུགས་ཀྱིས་ཁྲེལ། །སྣོད་མིན་ཉམས་སུ་མི་ལེན་པར། །ཟས་ནོར་ངོ་ཡིས་དབང་དང་ལུང་། །བྱས་ཀྱང་ཆོས་བདག་སྲུང་མ་ཁྲོ། །བར་ཆད་བཀའ་ཡི་ཆད་པ་འོང་། །གལ་ཏེ་ཚེ་འདིར་མ་བསྐྱོན་ཀྱང་། །བཀའ་ལས་འདས་ཕྱིར་ནང་འགྲོར་ལྟུང་། །དེ་ཕྱིར་སྤེལ་དང་མི་སྤེལ་བའི། །དམ་སློད་ཚོད་ཟིན་གནད་དུ་ཆེ། །ཁྱད་པར་རྩ་བའི་ཡི་དམ་དམ། །ཉམས་སུ་ལེན་ངེས་མ་གཏོགས་པ། །སྤེལ་ན་བསྙེན་པ་བསྐྱར་དགོས་སོ། །རྩེ་གཅིག་ཉམ་ལེན་བྱེད་ངེས་ན། །མ་སྤེལ་བྱང་སེམས་དམ་ཚིག་ཉམས། །དེ་ཕྱིར་སློབ་མའི་རྒྱུད་ལ་བརྟགས། །འཁོར་འདས་དབྱེར་མེད་ལྟ་བ་སྟེ། །
སངས་རྒྱས་སེམས་ཅན་ངོ་བོ་ཅིག །འཁོར་བ་ཉིད་ཀྱང་མྱ་ངན་འདས། །འགྲོ་ཀུན་གདོད་ནས་སངས་རྒྱས་ཉིད། །དེ་ལྟར་རྟོགས་པའི་རྣལ་འབྱོར་པས། །གསང་སྔགས་ཁྲོམ་དུ་གྱུར་ན་ཡང་། །གསང་སྒྲོགས་ལྟུང་བ་མི་འབྱུང་ངོ། །དེ་འདྲ་མ་རྟོགས་གང་དག་གིས། །ཁྲོམ་ཆོས་རྒྱུ་འབྲས་གཙོར་བོ་བཤད། །ཕྱགས་རྫོགས་ལ་སོགས་གསང་སྔགས་གི །ངོ་སྤྲོད་ཧ་ཅང་གསལ་མི་རུང་། །དེ་ཕྱིར་ཚད་ལྡན་བླ་མ་རྣམས། །ཁྲོམ་དུ་ངོ་སྤྲོད་མི་གསལ་བ། །དེ་ཡི་དོན་ལ་དགོངས་པ་ཡིན། །རྟོགས་འབུལ་སོ་སོར་ངོ་སྤྲོད་གཟབ། །ཁྲོམ་ཆེན་རྣམས་ལ་དབང་བསྐུར་བ། །དམ་ཚིག་སྲུང་མཁན་ཆེར་མེད་པས། །ལྟུང་བའི་ཆར་པ་ཕབ་འདྲ་བས། །ངན་སོང་ས་བོན་བཏབ་འདྲ་ཡང་། །ཉམས་ལས་མ་ཐོབ་ཉེས་པ་ཆེ། །རེ་ཞིག་ངན་སོང་ལྟུང་ན་ཡང་། །ཚན་ཆེ་དར་དྲག་ཡུན་ཐུང་བས། །ཐར་བས་དམ་ཆོས་དེ་དང་འཕྲད། །རིམ་གྱིས་བྱང་ཆུབ་ཐོབ་པའི་ཕྱིར། །མཐའ་ཡོད་ཕྱིར་ན་ཕན་པ་ཡིན། །མ་ཐོབ་ངན་སོང་ལྟུང་བ་སྟེ། །ཡུན་རིང་ཐར་ཀྱང་དམ་ཆོས་དང་། །མི་འཕྲད་མཐའ་མེད་འཁོར་བར་འཁྱམས། །དེ་ཕྱིར་སྤྱོད་
པའི་རྒྱུད་སྡེ་ལས། །ཁམས་གསུམ་སེམས་ཅན་ཐམས་ཅད་ལ། །དབང་བསྐུར་བྱ་ཞེས་གསུངས་པ་ཡིན། །དབང་སྐུར་བྱེད་པའི་གང་ཟག་ཀྱང་། །རབ་ཀྱིས་བསྐྱེད་རྫོགས་ཟུང་དུ་ཆུད། །གཞན་རྒྱུད་ལུས་ངག་ཡིད་གསུམ་ལ། །སྐུ་གསུམ་ས་བོན་ཐེབ་པ་དགོས། །འབྲིང་ཡན་རྩ་བའི་དམ་ཚིག་གཙང་། །བསྙེན་སྒྲུབ་རྟགས་མཚན་ཐོབ་པ་དགོས། །ཐ་མ་རྩ་བའི་སྡོམ་ཁྲིམས་གཙང་། །བསྐྱེད་རིམ་གསལ་ཞིང་རྩ་བ་ནི། །ཡི་དམ་གཅིག་ལ་གྲངས་བསྙེན་ཐེམ། །དེ་ཙམ་མེད་ན་བསྐུར་ཐབ་མེད། །བྱང་ཞིང་ཕྱག་ལེན་མཁས་ན་ཡང་། །བསྐུར་ན་ངན་འགྲོའི་ས་བོན་འཕེལ། །དེ་ཕྱིར་རང་ཚོད་རང་གིས་ཟུང་། །སེམས་བསྐྱེད་བསམ་པ་བཟང་བ་ནི། །མི་དགེ་འགའ་ཞིག་དགེ་བར་འགྱུར། །བསམ་པའི་སེམས་བསྐྱེད་ཞན་པ་ན། །དམ་ཆོས་འགའ་ཞིག་མི་དགེར་འགྱུར། །དེ་ཕྱིར་སེམས་བསྐྱེད་བཟང་བ་གཅེས། །མཇུག་ཏུ་བསྔོ་བ་སྨོན་ལམ་ནི། །རྣམ་པར་དག་པས་རྒྱས་བཏབ་ན། །རྡོ་རྗེ་འཆང་ལ་བསྟེན་དྲོང་ཆོག །སངས་རྒྱས་ཐོབ་པའི་ཐབས་ཟབ་ཡིན། །དབང་སྐུར་བྱེད་ཁ་སྔོན་འགྲོ་ཡི། །གཏོར་མ་བགེག་བསྐད་མ་བྱས་ན། །ནག་ཕྱོགས་
ལྷ་འདྲེས་བར་ཆོད་དེ། །བྱིན་རླབས་མི་འབྱུང་བར་ཆད་འཇུག །ལོ་རྒྱུས་སྐྱེར་སྒང་རྣམ་ཐར་གསལ། །ཨ་བྷི་ཊི་ཀ་ཏེ་ཞེས་པ། །ལེགས་སྦྱར་སཾ་སྐྲྀ་ཏ་ཡི་སྐད། །གཏོར་དང་བླུག་པ་ཞེས་བྱ་སྟེ། །སྡིག་སྒྲིབ་གཏོར་ཞིང་ཡེ་ཤེས་བླུག །དོན་འགྱུར་དབང་དུ་འཇུག་པ་ཡིན། །དབང་གི་ཞལ་གདམས་གོ་བདེ་འདི། །ལྕི་སྟོད་རྒོད་ཀྱི་ལྕམ་ཞེས་པ། །རྨ་གཡང་ཆགས་པའི་ས་ཆ་རུ། །ཨོ་རྒྱན་རིག་འཛིན་གྱིས་བསྐུལ་བས། །སྔགས་འཆང་རཱ་ག་ཨ་སྱ་ཡིས། །གང་དྲན་འཕྲལ་དུ་བྲིས་པ་དང་། །བློ་ཆུང་གསར་པ་འགའ་ཞིག་ལ། །ཕན་པ་ཅུང་ཟད་འབྱུང་བར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།