བཟླས་བརྗོད་ནུས་པ་སྟོབས་འབྱིན།
བཟླས་བརྗོད་ནུས་པ་སྟོབས་འབྱིན་བཞུགས་སོ། །བདག་ཉིད་མོས་པའི་ཡི་དམ་ལྷར་གསལ་ཞིང་༔ དེ་ཡི་སྤྱི་བོར་རྩ་བའི་བླ་མའམ་པདྨ་འབྱུང་གནས་ལོངས་སྐུའི་ཆ་ལུགས་ཅན༔ བག་དྲོ་ལྷུན་ཆགས་གཟི་བརྗིད་ལྡན་པའོ༔ དགྱེས་བཞིན་བདག་ལ་དབང་བསྐུར་བྱིན་རླབས་ཚུལ༔ རྡོ་རྗེ་དྲིལ་བཅས་ཕྱག་རྒྱ་བསྒྱུར་བ་དང་༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ༔ བརྒྱུད་པའི་བླ་མ་རྣམས་ཀྱིས་བསྐོར་བཞུགས་དམིགས༔ དེ་ལ་གདུང་བས་མོས་གུས་བསྐྱེད་བྱས་ནས་ཨོ་ཨཱཧཱུྃ་བཛྲ་གུ་རུ་དྷརྨ་ཀཱ་ཡ༔ ནིར་མ་ཀཱ་ཡ༔ སཾ་བྷྱོ་ཀཱ་ཡ༔ ཨ་བྷ་ཝ༔ སྭ་བྷ་ཝ༔ ཨ་དྷིཥྛ་ན༔ ཨ་དྷིཥྛིཏེ༔ སརྦ་སིདྡྷི་ཕ་ལ་ཧཱུྃ་ཨཱཿ ཞེས་ལན་གསུམ་བརྗོད་པ་ཙམ་གྱིས་ནི། བླ་མའི་སྐུ་གསུང་ཐུགས་ལས་ཐུགས་རྗེ་སྒྱུ་ཡི༔ ཡེ་ཤེས་འོད་ཟེར་ཁ་དོག་ལྔ་འཕྲོས་པས༔ བདག་ལུས་འབྱུང་བ་ལྔ་ལས་གྲུབ་པ་ཡི༔ གདོས་བཅས་ལུས་ནི་རང་བཞིན་མེད་གྱུར་ཏེ༔ སྣང་ལ་རང་བཞིན་མ་གྲུབ་འོད་ཀྱི་སྐུ༔ རྒྱུ་ཡིས་མ་བསྐྱེད་རྐྱེན་གྱིས་མི་འཇིག་པ༔ རང་བྱུང་ལྷུན་གྲུབ་རྡོ་རྗེའི་སྐུར་གྱུར་པའི༔ ལྗགས་ཀྱི་སྟེང་དུ་པདྨ་ཟླ་གདན་ལ༔ ཧཱུྃ་དཀར་ལས་བྱུང་རྡོ་རྗེ་སེམས་དཔའི་སྐུ༔
རྡོ་རྗེ་དྲིལ་འཛིན་གངས་ལ་ཉི་ཤར་ལྟར༔ གསལ་འཚེར་ལྷུན་སྡུག་ལོངས་སྐུའི་ཆ་ལུགས་ཅན༔ ཐུགས་ཀར་རྡོ་རྗེ་རྩེ་ལྔ་ཧཱུྃ་གིས་མཚན༔ ཧཱུྃ་ལ་ཡི་གེ་བརྒྱ་པའི་སྔགས་ཕྲེང་བསྐོར༔ རྡོ་རྗེ་ལ་ནི་ཨཱ་ལི་བཅུ་དྲུག་བསྐོར༔ སེམས་དཔའ་ཉིད་ལ་ཀཱ་ལི་སོ་བཞིས་བསྐོར༔ དེ་ཡི་ངང་ལས་སྔགས་གསུམ་བདུན་བདུན་བཟླ༔ སྒྲ་དག་ལྷག་ཆད་མེད་པ་ཤིན་ཏུ་གཅེས༔ ཨོཾ་བཛྲ་སཏཱ་སོགས། ཨ་ཨསོགས། ཀ་ཁ་སོགས། དེ་དག་གསུམ་ལས་འོད་ཟེར་དཀར་དམར་མཐིང་༔ ཡར་འཕྲོས་རྒྱལ་བའི་སྐུ་གསུང་ཐུགས་རྒྱུད་བསྐུལ༔ བླ་མ་སངས་རྒྱས་བྱང་སེམས་ཚོགས་རྣམས་ཀྱིས༔ སྐུ་གསུང་ཐུགས་ལས་སྔགས་གསུམ་དཔག་མེད་འཕྲོས༔ ཆར་བཞིན་བབས་ནས་བདག་ལ་སོ་སོར་ཐིམ༔ སྔགས་གསུམ་ལས་ཀྱང་སོ་སོའི་རང་སྒྲ་དང་༔ འོད་ཟེར་དཀར་དམར་མཐིང་གསུམ་འཕྲོས་པ་ཡིས༔ འདས་དང་མ་འོངས་ད་ལྟ་དུས་གསུམ་གྱི༔ ངག་སྒྲིབ་ཉེས་སྐྱོན་མ་ལུས་ཀུན་སྦྱངས་ཤིང་༔ མར་འཕྲོས་འགྲོ་རྣམས་ལུས་ངག་ཡིད་རྒྱུད་སྦྱངས༔ སླར་ཡང་འོད་ཟེར་ཐམས་ཅད་ཚུར་འདུས་ནས༔ ཡིག་བརྒྱ་ཧཱུྃ་ལ་ཨཱ་ལི་རྡོ་རྗེ་དང་༔ ཀཱ་ལི་རྡོ་རྗེ་སེམས་དཔའ་ཉིད་ལ་ཐིམ༔ དེ་དག་གསུམ་ཀྱང་ལྕེ་ལ་ཐིམ་
པ་ནི༔ དཔེར་ན་རྡོ་ཚན་སྟེང་དུ་མར་བཞག་བཞིན༔ ལྗགས་དང་དབྱེར་མེད་གྱུར་ནས་ངག་དབང་བསྐུར༔ བླ་མ་སངས་རྒྱས་བྱང་སེམས་ཚོགས་རྣམས་ཀྱང་༔ འོད་ཀྱི་ཚུལ་དུ་རང་གི་ལྗགས་ལ་ཐིམ༔ དབང་བསྐུར་བྱིན་རླབས་དབྱེར་མེད་ལུ་གུ་རྒྱུད༔ རྒྱལ་བ་རྣམས་ཀྱི་གསུང་གི་དབང་ཕྱུག་དེ༔ བདག་གི་ངག་དང་དབྱེར་མེད་གྱུར་བསམས་ལ༔ སླར་ཡང་སྔགས་གསུམ་གོང་བཞིན་ཉེར་གཅིག་བཟླ༔ དེ་ནས་རྟེན་འབྲེལ་སྙིང་པོ་ལན་གསུམ་བརྗོད༔ དེ་རྗེས་འདི་ལྟར་མ་ཉམས་བརྗོད་པར་བྱ༔ ཧྲཱིཿ ངག་གི་དབང་ཕྱུག་སངས་རྒྱས་བཅོམ་ལྡན་འདས༔ བླ་མ་ཡི་དམ་མཁའ་འགྲོ་ཐུགས་རྗེ་ཅན༔ སྔགས་ཀྱི་སྙིང་པོ་འབྲས་བུའི་བཅུད་དང་ལྡན༔ གྲག་སྟོང་ཚངས་པའི་དབྱངས་ལ་ཕྱག་འཚལ་ལོ༔ མི་ཟད་གསུང་གི་སྒྱུ་འཁོར་ལོ་གང་བསྐོར་བ༔ དེང་འདིར་བདག་གི་ངག་ལ་བསྐོར་ནས་ཀྱང་༔ དཔལ་དང་གཟི་བརྗིད་ལྡན་པ་འགྲུབ་མཛད་དེ༔ བྱིན་རླབས་དབང་དང་དངོས་གྲུབ་བསྩལ་དུ་གསོལ༔ ཨོ་་ཆོས་སྐུ། ཨཱ་ལོངས་སྐུ། ཧཱུྃ་སྤྲུལ་སྐུ། ཧོ་་ངོ་བོ་ཉིད་སྐུ། ཝཀྐ་པདྨ་མཎྜལ་ལ་ཨ་བྷི་ཥིཉྩ་ཨཱ་་གསུང་མ་ཆགས་པདྨའི་དཀྱིལ་འཁོར་དུ་མངོན་པར་དབང་བསྐུར་དུ་གསོལ། ནངས་སྔ་གཞན་ལ་
ངག་ནི་མ་བསྟན་དུས༔ འདི་ནི་རྒྱུན་དུ་བཟླས་པ་བྱ་བ་ཡིན༔ རིབ་ཀྱིས་ཞག་གཅིག་འབྲིང་གིས་ཟླ་བ་གཅིག༔ ཐ་མས་ཀྱང་ནི་ལོ་གཅིག་དུང་ཕྱུར་འགྲོ༔ ཞེས་པ་འདི་ནི་དགོངས་པ་འདུས་པ་ལས༔ རཱ་ག་ཨ་སྱས་འདོན་བདེའི་ཚུལ་དུ་བསྒྲིགས༔ བདག་གཞན་སརྦ་མངྒ་ལཾ༔ ༈ སྟོང་པའི་ངང་ལས་རང་ལྕེ་རལ་གྲི་ནི། །སོར་བཞི་ཆང་ཟུང་ཏཱཾ་ཡིག་ལྗང་ཁུས་མཚན། །དེ་ལས་འོད་འཕྲོས་འཁོར་འདས་ཐམས་ཅད་ཀྱི། །ནུས་མཐུ་དངོས་གྲུབ་ནས་ལྕེ་ལ་ཐིམ། །ཨོཾ་ཧཱུྃ་ཧཱུྃཔ་ལ་རཀྵ་སྭཱ་ཧཱ། ཞེས་ཉིན་རེ་མ་ཆག་པར་བཟླས་པས་འཆིང་བར་མི་ནུས་བཟླས་བརྗོད་ནུས་པ་དང་ལྡན་པར་འགྱུར། ཞེས་པའང་ཨ་རཱ་གས་སོ། །སརྦ་མངྒ་ལཾ།། །།