ཆོས་སྤྱོད་རབ་གསལ་གྱི་དམིགས་རིམ་མདོར་བསྡུས།
ཆོས་སྤྱོད་རབ་གསལ་གྱི་དམིགས་རིམ་མདོར་བསྡུས་བཞུགས་པའི་དབུ་ཕྱོགས་ལགས་སོ། །
ན་མོ་གུ་རུ་དྷརྨཱ་དྷརྟུ་བཛྲ་ཡེ། སྐྱབས་གནས་དམ་པའི་ཞབས་ལ་འདུད། །དགེ་སློང་དབོན་པོ་འཚོ་མཛད་ལ། །འཕྲལ་དུ་གང་ཕན་བསླབ་བྱ་ཞུ། །བླ་མ་ཆོས་ལྡན་རབ་འབྱོར་དེ། །སི་ཏུ་དྲུང་པའི་ཐུགས་ཀྱི་སྲས། །ཆོས་ཀྱི་དབང་ཕྱུག་ཐུགས་ལ་བཏགས། །རང་སེམས་ཡེ་ཤེས་ངོ་འཕྲོད་ནས། །ཀཾ་པོ་གངས་ཀྱི་ར་བ་རུ། །ལོ་གྲངས་བཅུ་གསུམ་སྒྲུབ་བརྒྱུད་བཟུང་། །རག་གྱང་སྟག་ལེབ་ལ་སོགས་སུ། །ངེས་མེད་བྱ་བྲལ་རྣམ་ཐར་བཟུང་། །ས་ཕྱོགས་འདི་རུ་ཕེབས་པ་ལ། །བདག་དང་ཆོས་མཐུན་གྲོགས་པོར་གྱུར། །ང་ཡི་ངག་ལ་ཉན་མཛད་ནས། །ལོ་འགའ་
བླ་ཚུགས་འགྲོ་དོན་མཛད། །སྐྱབས་མཆོག་རྒྱལ་བ་ཡབ་སྲས་ལ། །མོས་གུས་འགྱུར་མེད་གཏིང་ཚུགས་པས། །འཕྲལ་དུ་མཛད་སྤྱོད་ཅི་འདྲ་ཡང་། །ཁོང་ནི་འབྲེལ་ཚད་དོན་ལྡན་ཡིན། །ཅི་ཕྱིར་ཁོང་གི་མོས་གུས་འདྲ། །སུ་ལ་ཡོད་པ་མ་མཐོང་ངོ། །དེ་ལྟར་རྩེ་གཅིག་དད་པ་ཡིས། །གསོལ་བ་བཏབ་པའི་མི་དེ་ལ། །ཡབ་སྲས་ཐུགས་རྗེས་བཏང་མི་སྲིད། །སྐུ་ཚེ་མཐར་ཕྱིན་དུས་བབ་ནས། །འདས་ལ་ཐུགས་ནད་མཛད་དོན་མེད། །ད་ནི་དབོན་པོ་ཁྱོད་རང་ཡང་། །བླ་མའི་རྣམ་ཐར་ཇི་བཞིན་དུ། །ཡབ་སྲས་རྣམས་ལ་འདི་ཕྱི་ཡི། །བློ་སེམས་གཏོད་ལ་དམ་
ཆོས་མཛོད། །ཅི་ཕྱིར་དལ་འབྱོར་ཐོབ་དཀའ་ཞིང་། །ཚེ་འདི་མི་རྟག་མྱུར་དུ་འཆི། །དེང་སང་མི་རྣམས་ཚེ་ཡི་ཚད། །བཞི་བཅུ་ཁ་རལ་སུམ་ཅུར་ཉེ། །མང་པོ་བསླབ་པའི་ལོང་ཁོམ་མེད། །ཚིག་ནི་ནམ་མཁའ་འདོམ་འཇལ་འདྲ། །ཅི་ཙམ་བསླབ་ཀྱང་ཟད་པ་མེད། །ཡོན་ཏན་སྣ་ཁ་མང་པོ་ཡང་། །ཟས་ནོར་བསྡུ་ཕྱིར་མ་གཏོགས་པ། །དམ་ཆོས་སྒྲུབ་ལ་དགོས་རྒྱུ་ཆུང་། །ཆོས་སྤྱོད་རབ་གསལ་ཐོ་རམ་པ། །ཡོད་ན་དེ་རང་ཉམས་ལེན་ཆོག །དེ་ཡི་ཉམས་ལེན་མདོ་ཙམ་བཤད།། ༈ མདུན་གྱི་ནམ་མཁར་སྐད་ཅིག་ལ། །སངས་རྒྱས་ཀུན་འདུས་ཀརྨ་པ། །ཕྱོགས་དུས་རྒྱལ་བ་སྲས་བཅས་རྣམས། །སྤྲིན་ཕུང་ལྟ་བུར་བཞུགས་པར་བསྒོམ། །འགྲོ་དྲུག་སེམས་ཅན་མ་ལུས་པ། །ས་གཞི་གང་བར་ཁྲོམ་ལྟར་འཚོགས། །དེ་ཡི་འདྲེན་དཔོན་རང་གིས་བྱ། །ཁམས་གསུམ་འཁོར་བའི་སྡུག་བསྔལ་ལ། །བདག་སོགས་འགྲོ་ཀུན་འཇིགས་སྐྲག་ནས། །སྐྱབས་འགྲོ་དིར་དིར་བྱེད་བསྒོམས་ལ། །མ་ནམ་མ་དང་སྐྱབས་འགྲོ་རྣམས། །ཆོས་སྤྱོད་ནང་ལྟར་ལན་གསུམ་བྱ། །འཇིགས་པ་བརྒྱད་དང་བཅུ་དྲུག་ལས། །སྐྱབས་པར་འདོད་ན་ནམ་མཁའ་དེར། །རྗེ་བཙུན་སྒྲོལ་
མ་སྔོན་མོ་ནི། །ཤིན་ཏུ་གསལ་བར་བསྒོམ་གལ་ཆེ། །དེ་ནས་སྐྱབས་ཡུལ་རང་ལ་བསྟིམ། །རང་གི་སེམས་ལ་ཧྲིག་གེར་བལྟ། །བསྐྱབ་བྱ་སྐྱོབ་བྱེད་མི་དམིགས་པ། །དེ་ནི་དོན་དམ་སྐྱབས་འགྲོ་ཡིན། །འགྲོ་དྲུག་སེམས་ཅན་མ་ལུས་པར། །བྱམས་དང་སྙིང་རྗེ་ཚད་མེད་བསྒོམ། །དེ་ཡང་རླུང་དང་བསྲེ་བྱས་ཏེ། །སྣ་ནས་རླུང་གཅིག་ཕར་བཏང་ཚེ། །རང་གི་བདེ་སྐྱིད་བསོད་ནམས་རྣམས། །སེམས་ཅན་ཀུན་ལ་ཐིམ་གྱུར་ནས། །ཐམས་ཅད་བདེ་དང་ལྡན་པར་བསྒོམ། །རླུང་གཅིག་ཚུར་ལ་རྔུབ་པའི་ཚེ། །འགྲོ་དྲུག་ཀུན་གྱི་སྡུག་བསྔལ་དང་། །སྡིག་སྒྲིབ་ཐམས་ཅད་རང་ལ་ཐིམ། །འགྲོ་དྲུག་སྡུག་བསྔལ་བྲལ་བར་བསྒོམ། །འགྲོ་ཀུན་བདེ་ན་དགའ་བ་དང་། །རིས་མེད་འགྲོ་ལ་སེམས་མཉམ་བྱ། །དེ་དག་བསྒོམ་ཞིང་ཆོས་སྤྱོད་ནང་། །སེམས་ཅན་ཐམས་ཅད་བདེ་བ་དང་། །ཞེས་སོགས་ཚད་མེད་བཞི་པོ་ནི། །ལན་གསུམ་འདོན་སྒོམ་སྦྲག་པར་བྱ། །དེ་ནས་ཆོས་སྤྱོད་གཞུང་ལྟར་དུ། ༈ ས་ཕྱོགས་འདི་ཉིད་སངས་རྒྱས་ཞིང་། །བདེ་བ་ཅན་དང་འདྲ་བའི་དབུས། །སེང་ཁྲི་མཆོད་རྫས་དཔག་མེད་བསྒོམ། །ཐུབ་དབང་འཁོར་བཅས་སྤྱན་
དྲངས་ནས། །སེང་ཁྲི་དེ་ལ་བཞུགས་བསྒོམ་ཞིང་། །སྤྱན་འདྲེན་བཞུགས་གསོལ་གཞུང་ལྟར་བྱ། །དེ་ལ་སྐུ་ཁྲུས་གསོལ་བ་དང་། །ན་བཟའ་འབུལ་དང་མཆོད་པ་འབུལ། །མཎྜལ་ཡན་ཆད་གཞུང་ལྟར་འདོན། །ཇི་སྙེད་སུ་དག་མ་དེ་ཡང་། །མཆོད་པ་རྒྱ་ཆེན་སྣ་ཚོགས་ནི། །ཡིད་ཀྱིས་བསྒོམས་ཏེ་མཆོད་པ་དང་། །ཕྱོགས་བཅུའི་ཞིང་ན་ཡོད་པ་ཡི། མཆོད་པ་བློ་ཡིས་བླངས་ཏེ་མཆོད། ༈ སེམས་ཅན་ཐམས་ཅད་ཕ་མ་སྟེ། །འཁོར་བའི་གནས་སུ་སྡུག་བསྔལ་ཆེ། །དེ་རྣམས་སངས་རྒྱས་སར་འགོད་པར། །རང་ཉིད་ཁོ་ནས་བྱེད་འདོད་དེ། །དེ་ནི་ད་ལྟ་མི་ཐུབ་སྟེ། །བྱང་ཆུབ་མཆོག་ཏུ་སེམས་བསྐྱེད་ནས། །ནམ་ཞིག་བྱང་ཆུབ་ཐོབ་པའི་ཚེ། །འགྲོ་ཀུན་བདག་གིས་འདྲེན་བསམ་པའི། །བསམ་པ་བཟང་པོ་དང་ལྡན་པའི། །བྱང་ཆུབ་སྙིང་པོར་མཆིས་ཀྱི་བར། །ཞེས་སོགས་ཤོ་ལོ་ཀ་གསུམ་པོ། །ལན་གསུམ་བར་དུ་བརྗོད་པར་བྱ། །དེ་ནས་རང་ཉིད་སེམས་དཔར་གྱུར། །དེ་ཕྱིར་རང་ཉིད་དགའ་བ་བསྒོམ། །ལྷར་བཅས་འགྲོ་བའི་དོན་ཆེན་རྣམས། །བདག་གིས་བསྒྲུབ་ཕྱིར་ལྷ་ཀླུ་སོགས། །འགྲོ་བ་ཡི་རང་སྒོམས་ཤིག་ཅེས། །གཞན་རྣམས་དགའ་བ་
བསྒོམ་བཅུག་དང་། །རང་གི་སྡོམ་པ་དམ་བཅའ་སོགས། །དེ་འཕྲོ་ཚིག་རྣམས་ཚར་གཅིག་ཆོག །འདི་ཡིས་བྱང་སེམས་སྡོམ་པ་རྣམས། །མ་སྐྱེས་པ་དག་གསར་དུ་སྐྱེ། །ཉམས་པ་སོར་ཆུད་འགྱུར་བ་དང་། །མ་ཉམས་པ་ཡང་གོང་དུ་འཕེལ། །ཐེག་ཆེན་ཉམས་ལེན་རྩ་བ་ཡིན། །དེ་ནས་ཐུབ་པ་འཁོར་དང་བཅས། །འོད་ཞུ་བདག་ལ་ཐིམ་པར་བསྒོམ། །མ་ཡེངས་རང་གི་སེམས་ལ་བལྟ། །གཟུགས་དང་དངོས་པོ་མ་མཐོང་ཡང་། །མ་མཐོང་བ་དེ་མཐོང་བའི་མཆོག །སྟོང་ཉིད་ངོ་བོ་མཐོང་བ་སྟེ། །དོན་དམ་སེམས་བསྐྱེད་དེ་ཡིན་ནོ། །དེ་ཡན་ཙམ་ཞིག་མ་ཆག་པར། །ཉམས་སུ་བླངས་བར་བྱས་ན་ཡང་། །སྐྱབས་འགྲོ་ཐེག་དམན་ཉམས་ལེན་ཚང་། །སེམས་བསྐྱེད་ཚད་མེད་བཞི་བསྒོམ་པ། །ཐེག་པ་ཆེན་པོའི་ཉམས་ལེན་ཚང་། །ཐུབ་པ་སྤྱན་འདྲེན་ཡན་ལག་བདུན། །བྱ་རྒྱུད་དོན་ཡང་ཚང་བ་སྟེ། །ཐུབ་པ་བླ་མ་དབྱེར་མེད་བསྒོམ། །བླ་མེད་བླ་མའི་མཆོད་ཆོག་ཚང་། །རང་སེམས་ངོ་བོ་སྐབས་སུ་བལྟ། །དབུ་ཕར་ལྟ་བའི་ཉམས་ལེན་ཚང་། །ཤཱཀ་ཐུབ་བསྟན་པའི་གཞུང་ཤིང་གི །ཉམས་ལེན་གཙོ་བོ་དེར་འདུས་པས། །ཆོས་སྡེ་རྣམས་སུ་ཆགས་མེད་
དུ། །ཐུགས་དམ་མཛད་པ་དེ་ལྟར་ལགས། །དབོན་པོ་ཁྱེད་རང་ཐུགས་དམ་མཛོད། །འདོན་སྒོམ་སྦྲག་པ་གལ་ཆེའོ།། ༈ ལྟུང་བཤགས་འདོན་པའི་ཚེ་ན་ཡང་། །མདུན་གྱི་ནམ་མཁར་སེང་ཁྲིའི་སྟེང་། །སངས་རྒྱས་ཀུན་འདུས་ཀརྨ་པར། །ལྟུང་བཤགས་ལྷ་ཚོགས་རྣམས་ཀྱིས་བསྐོར། །སྐད་ཅིག་ཉིད་ལ་གསལ་བར་བསྒོམ། །རང་ལུས་བྱེ་བ་དུང་ཕྱུར་སྤྲུལ། །དེ་དག་རྣམས་ལ་ཕྱག་འཚལ་ཞིང་། །བདག་སོགས་འགྲོ་བ་མ་ལུས་པའི། །སྡིག་ལྟུང་ཐམས་ཅད་བཤགས་པར་བསྒོམ། །སྤྲོ་ན་དངོས་སུ་ལྷ་གྲངས་ལ། །འདོན་པ་དང་བསྟུན་ཕྱག་འཚལ་ན། །ཉེས་ལྟུང་སྦྱོང་བའི་མཆོག་ཡིན་ནོ། །མཐར་ནི་ལྷ་ཚོགས་རང་ལ་བསྟིམ། །བདེ་བར་གཤེགས་པ་དེ་རྣམས་དང་། །རང་ཉིད་དབྱེར་མེད་གྱུར་བསམས་ལ། །མ་ཡེངས་རང་གི་སེམས་ལ་བལྟ། །བཤགས་བྱ་བཤགས་བྱེད་བྲལ་བ་ཡི། །དོན་དམ་བཤགས་པའི་མཆོག་ཡིན་ནོ།། ༈ མདུན་གྱི་ནམ་མཁར་ངོ་བོ་ནི། རྒྱལ་བའི་དབང་པོ་ཉིད་ཡིན་ལ། །རྣམ་པ་ཤཱཀྱའི་སྐྱེས་མཆོག་ནི། །དམ་ཚིག་ཡེ་ཤེས་དབྱེར་མེད་བསྒོམ། །དེ་ནས་ཤཱཀྱ་ཐུབ་པ་ཡི། །སྐྱེས་རབས་དང་ནི་རྣམ་ཐར་སོགས། །ཡིད་ཀྱིས་
ཡང་ཡང་དྲན་བྱས་ཏེ། །དང་པོ་བྱང་ཆུབ་ཐུགས་བསྐྱེད་ཅིང་། །གྲངས་མེད་གསུམ་དུ་ཚོགས་གཉིས་བསགས། །འཕོ་དང་ལྷུམས་ཞུགས་ལ་སོགས་པའི། །མཛད་པ་དེ་དང་དེ་མཛད་ཅེས། །ཡིད་ཀྱི་ཡུལ་དུ་རྩིས་བགྲང་ཞིང་། །ངག་ཏུ་སྐྱེས་རབས་སྡོམ་ཚིག་དང་། །མཛད་བཅུ་ལ་སོགས་འདོན་བྱ་ཞིང་། །མཐར་ནི་ཐུབ་དབང་རང་ལ་བསྟིམ། །འདི་ནི་གཏི་མུག་འདུལ་བའི་མཆོག །རྟེན་འབྲེལ་བསྒོམ་པའི་མན་ངག་ཡིན། །གཉིད་དང་བྱིང་རྨུགས་ཞི་བ་དང་། །ཤེས་རབ་ཆེ་སོགས་ཕན་ཡོན་འབྱུང་།། ༈ ཡང་ན་ནམ་མཁར་ཤཱཀ་ཐུབ་བསྒོམ། །སེམས་ནི་འཕྲོ་རྒོད་ཆེ་བ་ན། །སྐྱིལ་ཀྲུང་བསྣོལ་མཚམས་རིག་པ་གཏད། །སེམས་ནི་བྱིང་རྨུགས་འཐིབས་གྱུར་ན། །དཔྲལ་བའི་མཛོད་སྤུར་རིག་པ་ལ་གཏད། །བྱིང་རྒོད་མེད་ན་ཐུགས་ཀར་གཏད། །སེམས་ནི་གཞན་དུ་མི་འཕྲོ་བ། །ཐུབ་པའི་སྐུ་ལ་སེམས་གནས་ན། །དེ་ནི་ཐུན་མོང་ཞི་གནས་ཡིན། །འདི་ཡི་ཕན་ཡོན་མཐའ་ཡས་པ། །ཏིང་འཛིན་རྒྱལ་པོའི་མདོ་ལས་གསུངས། །དེ་ལྟར་ཡིད་ལ་བསྒོམ་བྱ་ཞིང་། །སེམས་བརྩེ་མ་ལ་སོགས་པ་ཡི། །ཐུབ་པའི་བསྟོད་པ་འདོན་སྒོམ་སྦྲག། ༈ ནམ་
མཁར་ངོ་བོ་ཀརྨ་པ། །རྣམ་པ་ཐུབ་པའི་དབང་པོ་ལ། །ཉེ་སྲས་བརྒྱད་ཀྱིས་བསྐོར་བར་བསྒོམ། །སྤྱན་འདྲེན་ལ་སོགས་མི་དགོས་ཏེ། །གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །བདག་དང་ཚེ་འདས་ཡོན་བདག་སོགས། །སེམས་ཅན་ཀུན་གྱིས་རྩེ་གཅིག་ཏུ། །གསོལ་བ་མགྲིན་གཅིག་འདེབས་བསམ་ཞིང་། །གཙོ་རྒྱལ་མ་ཡི་གསོལ་འདེབས་བྱ། །ཐུབ་དབང་སྲས་བཅས་སྐུ་ལས་ནི། །འོད་ཟེར་ཁ་དོག་སྣ་ཚོགས་འཕྲོས། །རང་དང་ཚེ་འདས་ལ་སོགས་པའི། །སེམས་ཅན་ཀུན་ལ་ཐིམ་པ་ཡིས། །ལས་དང་ཉོན་མོངས་སྒྲིབ་པ་བསལ། །འཁོར་བའི་འཇིགས་ལས་སྐྱོབ་པར་བསྒོམ། །མཐར་ནི་ལྷ་ཚོགས་རང་ལ་བསྟིམ། །རང་གི་སེམས་ལ་ཚུར་བལྟས་པས། །ངོ་བོ་སྟོང་པ་ཆོས་ཀྱི་སྐུ། མ་འགགས་རང་གསལ་ལོངས་སྤྱོད་རྫོགས། །སྣ་ཚོགས་འགགས་མེད་སྤྲུལ་པའི་སྐུ། །དེ་གསུམ་དབྱེར་མེད་ངོ་བོ་ཉིད། །ཡར་ལ་རྒྱལ་བའི་ཐུགས་རྒྱུད་དང་། །མར་ལ་འགྲོ་དྲུག་སེམས་རྒྱུད་དང་། །རྣལ་འབྱོར་རང་གི་སེམས་ཉིད་གསུམ། །ཆོས་ཉིད་སྟོང་པའི་ངང་དུ་གཅིག །ལྟ་བ་འཁོར་འདས་དབྱེར་མེད་ཡིན།། ༈ མདུན་གྱི་ནམ་མཁར་
རྒྱལ་བའི་དབང་། །ཐུགས་རྗེ་ཆེན་པོ་སྤྱན་རས་གཟིགས། །འགྲོ་འདུལ་ཁ་སར་པཱ་ཎི་བསྒོམ། །ཡང་ན་བདག་གཞན་ཐམས་ཅད་ཀྱི། །སྤྱི་བོར་རེ་རེ་བསྒོམ་ཡང་་ལེགས།བདག་དང་སེམས་ཅན་ཐམས་ཅད་ཀུན། །འཁོར་བའི་འཇིགས་པས་ཉམ་ཐག་ནས། །སྨྲེ་སྔགས་འོ་དོད་འབོད་བསམ་ཞིང་། །སྨྲེ་སྔགས་བསྟོད་པ་འདོན་པར་བྱ། །སྐུ་ལས་བདུད་རྩིའི་རྒྱུན་བབས་ནས། །སྤྱི་བོ་ཚངས་པའི་བུག་ནས་ཞུགས། །སྡིག་སྒྲིབ་ནད་གདོན་ཐམས་ཅད་ནི། །དུད་ཁུ་ལྟ་བུར་ས་འོག་སོང་། །ལས་ཀྱི་གཤིན་རྗེས་འཐུང་བས་ཚིམ། །དུས་མིན་འཆི་བའི་བར་ཆད་ཞི། །བདག་ལུས་བདུད་རྩིས་ལྟེམས་སེ་གང་། །ཐུགས་རྗེ་ཆེན་པོ་འོད་དུ་ཞུ། །བདག་གཞན་ཀུན་ལ་ཐིམ་པར་བསྒོམ། །རང་རིག་ཡེ་ཤེས་སྤྱན་རས་གཟིགས། །རང་གི་སེམས་ལ་གཟིགས་མོ་བྱ། །གསལ་སྟོང་རང་རིག་རྗེན་པར་མཐོང་། །དོན་དམ་ཆོས་སྐུ་སྤྱན་རས་གཟིགས། །མཐོང་བ་མེད་པའི་ཚུལ་དུ་མཐོང་། །འདི་ཉིད་རྙིང་མའི་རྒྱུད་ཚིག་སྟེ། །གསར་མའི་ལུགས་ལ་རྒྱ་གཞུང་འདོད། །རྒྱུད་དང་རྒྱ་གཞུང་གཉིས་ཀའི་ཕྱིར། །བྱིན་རླབས་ཤིན་ཏུ་ཆེ་བ་ཡིན།། ༈ མདུན་གྱི་ནམ་
མཁར་སྤྱན་རས་གཟིགས། །ཆ་ལུགས་ཞལ་ཕྱག་གང་འདོད་བསྒོམ། །དེ་མདུན་ངག་གི་ཉེས་བྱས་བཤགས། །སེམས་ཅན་ཀུན་གྱི་ངག་སྒྲིབ་རྣམས། །ཐམས་ཅད་རང་ལ་ཐིམ་པར་བསྒོམ། །དེ་ཡི་ནུས་པས་རང་གི་ངག །རྡོ་རྗེའི་ལྗགས་སུ་གྱུར་པར་བསྒོམ། །ནམ་ཞིག་བྱང་ཆུབ་ཐོབ་པའི་ཚེ། །འགྲོ་བ་ཀུན་ལ་ཆོས་སྟོན་པར། །ཤོག་ཅིག་སྙམ་པ་ཡིད་ལ་བསྒོམ། །ཀྱེ་ལགས་མ་ཡི་སྨྲེ་སྔགས་འདོན། །སེམས་བསྐྱེད་ལན་གཅིག་ཐོབ་པ་ལའང་། །སྐུར་བ་བཏབ་ན་དམྱལ་བ་རུ། །ལྕེ་ལ་གླང་དོར་ལྔ་བརྒྱས་རྨོ། །དགོན་སྡེའི་ཕྱོགས་སུ་འདུག་པ་ལ། །གྲུ་རོགས་གྲོགས་མཆེད་ལ་སོགས་ལ། །གཤེ་སྐུར་མི་འཆོར་དཀའ་བའི་ཕྱིར། །བཤགས་པ་འདི་ཡང་གནད་ཆེན་ཡིན།། ༈ མདུན་གྱི་ནམ་མཁར་འཛམ་དཔལ་དབྱངས། །མཆོག་གི་སྤྲུལ་སྐུ་དབྱེར་མེད་པ། །དམར་སེར་རལ་གྲི་པོ་ཏི་འཛིན། །གསལ་བར་བསྒོམས་པའི་གནས་ལྔ་ནས། །འོད་ཟེར་ཁ་དོག་རྣམ་ལྔ་འཕྲོས། །།བདག་དང་སེམས་ཅན་ཀུན་ལ་ཕོག །དུག་ལྔའི་སྒྲིབ་པ་བསལ་ནས་ཀྱང་། །ཡེ་ཤེས་ལྔ་པོ་རྒྱས་པར་བསྒོམ། །གང་གི་བློ་གྲོས་མ་དང་ནི། །ཤེས་བྱའི་མཁའ་དབྱིངས་མ་སོགས་འདོན། །
མཐར་ནི་འཇམ་དབྱངས་རང་ལ་བསྟིམ། །རང་གི་སེམས་ལ་ཧྲིག་གེར་བལྟ། །རྣམ་རྟོག་ཉོན་མོངས་སྦྱོར་རྩུབ་འཇོམས། །ཡེ་ཤེས་ལྔ་ཡི་དཔལ་འབྱོར་རྒྱས། །རང་སེམས་བསྒྲེས་རྒུད་སྐྱེ་འཆི་བྲལ། །དོན་དམ་འཇམ་དཔལ་གཞོན་ནུ་ནི། །རང་སེམས་ཡིན་ནོ་སྐལ་ལྡན་ཀྱེ།། ༈ མདུན་དུ་པདྨའི་སྡོང་པོ་ནི། །འདབ་མ་ཉི་ཤུ་ཡོད་པར་བསྒོམ། །པོ་ཊ་ལ་ནས་སྒྲོལ་སྔོན་ལ། །སྒྲོལ་མ་ཉི་ཤུས་བསྐོར་བ་ནི། །སྐད་ཅིག་ཙམ་ལ་སྤྱན་དྲངས་ཏེ། །པདྨའི་ལྟེ་བར་སེང་ལྡེང་སྒྲོལ། །འདབ་མར་སྒྲོལ་མ་གཞན་རྣམས་བཞུགས། །དེ་ལ་ཡན་ལག་བདུན་མ་འབུལ། །བདག་དང་སེམས་ཅན་ཐམས་ཅད་དང་། །ཁྱད་པར་རང་དང་བསྲུང་བྱ་རྣམས། །སྒོ་གསུམ་གུས་པས་ཕྱག་འཚལ་བསྒོམ། །ཕྱག་འཚལ་ཉེར་གཅིག་ཚར་གསུམ་མམ། །བདུན་ནམ་ཉེར་གཅིག་ཚར་གཅིག་སོགས། །དལ་ཁོམ་བསྟན་ལ་འདོན་བྱ་ཞིང་། །དེ་ཡི་ཕན་ཡོན་རྣམ་སྣང་གིས། །གསུངས་པའི་དོན་ཡང་དྲན་བྱ་ཞིང་། །ལྷ་མོ་ལ་གུས་ལ་སོགས་བརྗོད། །མཐར་ནི་སྒྲོལ་མ་གཙོ་འཁོར་རྣམས། །རང་དང་བསྲུང་བྱ་རྣམས་ལ་བསྟིམ། །དེ་ནས་རང་གི་སེམས་ལ་བལྟ། །བལྟས་པས་མི་
མཐོང་དངོས་པོ་མེད། །སྟོང་པ་ཉིད་ཅེས་དེ་ལ་བརྗོད། །རང་གི་སེམས་ལ་གསལ་ན་ཡང་། །ངག་ཏུ་དེ་དོན་བརྗོད་མི་ཤེས། །སྨྲ་བསམ་བརྗོད་མེད་ཅེས་བྱའོ། །དེ་ཤེས་ཤེས་བྱ་ཀུན་གྱི་རབ། །ཤེས་རབ་ཕ་རོལ་ཕྱིན་མ་ཟེར། །རྒྱལ་ཡུམ་སྒྲོལ་མའང་དེ་ཡིན་ནོ།། ༈ མདུན་གྱི་ནམ་མཁར་པད་ཟླའི་སྟེང་། །སྒྲོལ་མ་དཀར་མོ་གཞུང་ལྟར་བསྐྱེད། །རང་དང་བསྲུང་བྱ་ཡོན་བདག་དང་། །ནད་པ་ལ་སོགས་ཐམས་ཅད་ཀྱི། །ཐད་ཀྱི་ནམ་མཁར་རེ་རེ་བསྒོམ། །སྒྲོལ་དཀར་བསྟོད་པ་འདོན་བྱ་ཞིང་། །ཕྱག་གཡས་མཆོག་སྦྱིན་མཐིལ་ནས་ནི། །བདུད་རྩི་འོ་རྒྱུན་ལྟ་བུར་བབས། །བདག་དང་བསྲུང་བྱ་ཐམས་ཅད་ཀྱི། །ནད་གདོན་སྡིག་སྒྲིབ་བར་ཆད་དག །ཚེ་དང་བསོད་ནམས་ཡེ་ཤེས་ཀྱི། །ངོ་བོ་བདུད་རྩིས་ལུས་གང་བསྒོམ། །མཐར་ནི་སྒྲོལ་མ་རང་ལ་བསྟིམ། །བསྲུང་བྱ་རྣམས་ལ་སོ་སོར་བསྟིམ། །བར་ཆད་ཞི་ཞིང་བཀྲ་ཤིས་པ། །སྲུང་བ་ཀུན་གྱི་མཆོག་ཡིན་ནོ། །རང་སེམས་སྐྱེ་འཆི་བསྒྲེས་རྒུད་མེད། །དེ་ཡི་དོན་ལ་མཉམ་བཞག་ན། །འཇིག་རྟེན་འཇིག་རྟེན་འདས་པ་ཡི། །དཔལ་དང་བསོད་ནམས་ཐམས་ཅད་འཕེལ། །འདི་ནི་རྒྱུན་དུ་ཉམས་སུ་ལོངས། །
༈ ས་ཕྱོགས་དག་པའི་ཞིང་ཁམས་དབུས། །སེང་ཁྲི་པདྨ་ཉི་ཟླ་བསྒོམ། །སྤྱན་འདྲེན་གཞུང་གི་ཚིག་བརྗོད་པས། །ཐུབ་དབང་གནས་བརྟན་འཁོར་དང་བཅས། །བྱོན་ཏེ་གཙོ་འཁོར་འཚམས་པར་བཞུགས། །དེ་མདུན་རང་གི་ལུས་གཅིག་ལ། །ཞིང་རྡུལ་གྲངས་རྙེད་ལུས་སྤྲུལ་ནས། །འཁོར་བཅས་སོ་སོར་ཕྱག་འཚལ་བསྒོམ། །ཐུབ་པ་གནས་བརྟན་འཁོར་བཅས་ལས། །འོད་ཟེར་སྣ་ཚོགས་འཇིག་རྟེན་གང་། །ཐུབ་པ་མཆོག་དང་ཁྱད་པར་དུ། །ཀཾ་ཚང་བསྟན་པ་རྒྱས་པར་བྱས། །དེ་བསྒོམ་མུ་ནེ་ཕྲེང་སྐོར་འདོན། །མཐར་ནི་འཁོར་ཚོགས་གཙོ་ལ་ཐིམ། །གཙོ་བོ་རང་ལ་ཐིམ་པའམ། །ཡང་ན་རྟེན་ལ་ཐིམ་པར་བསྒོམ། །།དེ་ནས་ལྟ་བའི་ངང་ལ་བཞག །ལྟ་བ་འདོད་ལུགས་མང་ན་ཡང་། །སེམས་ཀྱིས་སེམས་ལ་ལྟ་བ་དེ། །དྭགས་བརྒྱུད་ལུགས་ཀྱི་ལྟ་བ་ཡིན། །འདུལ་བའི་ཞི་གནས་གསོ་སྦྱོང་ཡང་། །དེ་ཉིད་ལ་ནི་འདུས་པ་སྟེ། །ཉེས་ལྟུང་ཕྲ་མོ་ཐམས་ཅད་དག །རང་ཉིད་ཆོས་མགོ་ཐོན་པ་དང་། །རྒྱལ་བའི་བསྟན་པའི་རིམ་གྲོར་འགྱུར། །དེ་ཕྱིར་ཆོས་སྡེ་ཐམས་ཅད་དུ། །འདི་ལ་འཚོགས་འདོན་བྱེད་པ་ཡིན།། ༈ མཆོད་པ་
འབུལ་ཚེ་མདུན་གྱི་མཁར། །རྒྱལ་བའི་དབང་པོ་རབ་བཅུ་དང་། །ཞྭ་དམར་རབ་དྲུག་ལ་སོགས་བསྒོམ། །ཇ་དེ་བདུད་རྩིའི་རྒྱ་མཚོ་ལ། །རང་ལས་སྤྲུལ་པའི་མཆོད་པའི་་ཚོགས། །ལྷ་མོ་དཔག་ཏུ་མེད་པ་ཡིས། །ཡེ་ཤེས་ཀ་པཱ་ལ་ཐོགས་ཏེ། །བདུད་རྩི་བཅུས་ཤིང་མཆོད་པར་དམིགས། །དྲུག་སེང་གར་དབང་མ་སོགས་འདོན། །དེ་ནི་ཕྱི་ཡི་ཇ་མཆོད་ཡིན། །རང་ཉིད་ཕག་མོར་བསྒོམ་པ་ནི། །སྙིང་ཁར་སངས་རྒྱས་ཀུན་འདུས་པ། །ཀརྨ་པ་ཉིད་གསལ་བར་བསྒོམ། །ཞལ་བུ་ཡེ་ཤེས་ཀ་པཱ་ལར། །ཇ་ནི་ཟག་མེད་བདུད་རྩི་མཚོ། །ལག་པ་དགང་གཟར་བླུགས་གཟར་ཚུལ། །ཁ་ནི་མེ་ཐབ་ལྕེ་མེ་ལྕེ། །མེ་ལྷ་རྒྱལ་བ་མཆོག་ཉིད་ལ། །སྦྱིན་སྲེག་འབུལ་བའི་དམིགས་པར་བཅས། །ངེས་འབྱུང་ལ་སོགས་ཇ་མཆོད་འདོན། །དམིགས་པ་བསྒོམ་ཞིང་འཐུང་བ་སྟེ། །ཟས་གཞན་ཟ་དུས་དེ་ལྟར་བསྒོམ། །ཅི་ཟ་ཅི་འཐུང་བསོད་ནམས་འཕེལ། །དང་པོ་དམིགས་པ་ཐུན་གཅིག་བསྒོམ། །དེ་ནས་སེམས་ངོ་སྐྱོང་བཞིན་དུ། །ཟ་འཐུང་གང་དང་གང་བྱས་པ། །ཟ་འཐུང་ཚོགས་ཀྱི་འཁོར་ལོ་ཡིན།། ༈ མར་པ་མི་ལ་དྭགས་པོ་དང་། །ཇོ་བོ་རྔོག་ལོ་
མཉན་པ་དང་། །ཡབ་སྲས་ན་རིམ་སོ་སོ་ཡི། །བསྟོད་པ་འདོན་པ་དེ་ཡི་ཚེ། །རང་ཉིད་ཕག་མོར་གསལ་བ་ཡི། །སྤྱི་བོར་གང་ཡིན་བླ་མ་བསྒོམ། །ཡེ་ཤེས་དམ་ཚིག་དབྱེར་མེད་པ། །དྲན་པ་ཙམ་གྱིས་རྫོགས་པ་སྟེ། །སྤྱན་འདྲེན་ལ་སོགས་མི་དགོས་སོ། །དེ་ནས་སོ་སོར་གསོལ་འདེབས་བྱ། །མཐར་ནི་བླ་མ་རང་ལ་བསྟིམ། །ཉམས་རྟོགས་སྐྱེ་དང་འཕེལ་བའི་ཐབས། །འདི་ལས་ཟབ་པ་ཡོད་མ་ཡིན།། ༈ དེ་བཞིན་སྤྱི་གཙུག་ནམ་མཁའ་ལ། །བཀའ་བཞི་བརྒྱུད་པའི་བླ་མ་སོགས། །རྩ་བརྒྱུད་བླ་མ་ཐམས་ཅད་ནི། །ཁྲོམ་ཚོགས་ལྟ་བུར་བསྒོམ་པ་ཡི། །གཙོ་བོ་ཡབ་སྲས་གང་མོས་བསྒོམ། །བཀའ་བཞི་བརྒྱུད་པའི་གསོལ་འདེབས་འདོན། །མཐར་ནི་བླ་མ་རང་ལ་བསྟིམ། ༈ །རང་ཉིད་ཕག་མོའི་དབུ་གཙུག་ན། །རྒྱལ་དབང་བཅུ་པ་གསལ་བར་བསྐྱེད། །དེ་ཡི་དབུ་གཙུག་ནམ་མཁའ་ལ། །ཟུང་འཇུག་བརྒྱུད་པའི་བླ་མའམ། །ཕྱག་ཆེན་བརྒྱུད་པའི་བླ་མའམ། །ཆོས་དྲུག་བརྒྱུད་པའི་བླ་མའམ། །བློ་སྦྱོང་བརྒྱུད་པའི་བླ་མ་རྣམས། །གང་འདོད་ཐོ་བརྩེགས་ཚུལ་དུ་ནི། །མུ་ཏིག་སྟར་ལ་བརྒྱུས་ལྟར་བསྒོམ། །ཟུང་འཇུག་མ་དང་དངོས་
ཀུན་མ། །བདེ་སྟོང་མའམ་མཚུངས་མེད་མ། །སོ་སོར་བརྒྱུད་རིམ་གསོལ་འདེབས་བྱ། །མཐར་ནི་ཡས་རིམ་འོད་དུ་ཞུ། །ཐམས་ཅད་རྒྱལ་དབང་ཉིད་ལ་ཐིམ། །དེ་ཉིད་རང་ལ།ཐིམ་གྱུར་ནས། །དབང་དང་བྱིན་རླབས་དངོས་གྲུབ་རྣམས། །གཅིག་ཆར་ཉིད་དུ་ཐོབ་པར་བསྒོམ། །འདི་ནི་དམིགས་རིམ་བསྡུས་པ་ཡིན། །རྒྱས་པར་དབང་བཞི་ལེན་ལུགས་ཡང་། །རང་ཉིད་ཕག་མོའི་དབུ་གཙུག་ན། །རྒྱལ་དབང་རིམ་པ་བཅུ་པོ་ནི། །ཐོ་བརྩེགས་ཚུལ་དུ་བསྒོམས་བྱས་ལ། །མ་འོངས་སངས་རྒྱས་མ་འདོན་ཞིང་། །སྐུ་ལས་བདུད་རྩིའི་རྒྱུན་བབས་པས། །རང་གི་ཚངས་བུག་ནས་ཞུགས་ཏེ། །ལུས་ཀྱི་གནས་བཞི་རིམ་པར་གང་། །སྒྲིབ་པ་བཞི་དག་དབང་བཞི་ཐོབ། །སྐུ་བཞི་མངོན་དུ་བྱེད་པར་བསྒོམ། །༈ རང་ཉིད་ཡི་དམ་སྤྱི་བོ་ནས། །ཞྭ་དམར་རབ་བདུན་ཐོ་བརྩེགས་བསྒོམ། །མཁའ་ཁྱབ་མ་སོགས་གསོལ་འདེབས་བྱ། །སྐུ་ལས་འོད་ཟེར་དཀར་དམར་མཐིང་། །ལྗང་སེར་བཞི་འཕྲོས་རང་ཉིད་ཀྱི། །སྤྱི་མགྲིན་སྙིང་ལྟེ་བཞིར་ཐིམ་པས། །སྒྲིབ་བཞི་དག་ཅིང་དབང་བཞི་ཐོབ། །སྐུ་བཞི་ས་བོན་ཐོབ་པར་བསྒོམ། །མཐར་ནི་དེ་རྣམས་འོད་དུ་ཞུ། །ཇི་
ལྟར་ཆུ་ལ་ཆུ་བཞག་ལྟར། །རང་དང་དབྱེར་མེད་གཅིག་པར་བསྒོམ། །དེ་ལྟར་སྒོམ་མཁན་སེམས་ཡིན་པས། །སེམས་ལ་མ་ཡེངས་བལྟས་ཙ་ན། །བླ་མའི་ཐུགས་དང་རང་གི་སེམས། །དབྱེར་མེད་ཆོས་ཀྱི་དབྱིངས་སུ་གཅིག །བླ་མ་དང་ནི་སངས་རྒྱས་དང་། །སྣང་སྲིད་འཁོར་འདས་ཐམས་ཅད་ཀུན། །སེམས་ལས་གཞན་དུ་གྲུབ་པ་མེད། །ཐུགས་ཡིད་གཅིག་ཏུ་འདྲེས་པའི་ཐབས། །བླ་མ་ཆོས་སྐུའི་མོས་གུས་ཏེ། །མོས་གུས་ཕྱག་རྒྱ་ཆེན་པོ་ཡིན། །དེ་ཕྱིར་ཆོས་སྤྱོད་རབ་གསལ་ལ། །གསོལ་འདེབས་མང་བ་དེ་ལྟར་རོ།། ༈ རང་ཉིད་ཐ་མལ་སྤྱི་གཙུག་ཏུ། །ཡབ་སྲས་ཐུབ་དབང་དབྱེར་མེད་པ། །རྒྱན་དྲུག་མཆོག་གཉིས་བསྐོར་བར་བསྒོམ། །ཚོགས་གཉིས་ཆུ་གཏེར་མ་འདོན་ཞིང་། །མཐར་ནི་རང་ལ་བསྟིམ་པ་ཡིས། །ཡོན་ཏན་འགོས་ཤིང་ཤེས་རབ་འཕེལ།། ༈ གུང་ཚིགས་བྱེད་པའི་ཚེ་ན་ཡང་། །དཀོན་མཆོག་གསུམ་གྱི་ཡོན་ཏན་རྣམས། །ཐམས་ཅད་ཡིད་ལ་དྲན་བྱ་ཞིང་། །ཐུབ་དབང་སངས་རྒྱས་མ་སྔ་ན། །འཁོར་ལོས་སྒྱུར་རྒྱལ་ལྔ་བརྒྱ་རུ། །སྐྱེ་རྒྱུ་བསོད་ནམས་ལུས་ཡོད་པ། །རབ་བྱུང་ཀུན་གྱི་འཚོ་བའི་ཕྱིར། །སྟོན་པས་
བསྔོ་བར་མཛད་པའི་ཕྱིར། །མུ་ཏིག་བྲེ་ནི་རེ་རེ་ཡིས། །འབྲས་བྲེ་གང་ལས་མ་ཁུག་ཀྱང་། །རབ་བྱུང་འཚོ་བས་མི་ཕོངས་གསུངས། །དེ་སོགས་དྲིན་ལས་དྲན་བྱས་ལ། །དཀོན་མཆོག་རྗེས་དྲན་འདོན་བྱ་ཞིང་། །སྟོན་པ་ལ་སོགས་དཀོན་མཆོག་ལ། །སྔགས་དང་བཅས་པས་ཕུད་མཆོད་འབུལ། །འཕྲོག་མ་སོགས་ལ་ཆངས་བུ་ཡང་། །གུང་ཚིགས་དུས་སུ་མ་ཆག་ན། །ནོར་སྒྲུབ་མཆོག་ཏུ་འགྱུར་བ་ཡིན། །རྗེས་སུ་དཀོར་སྦྱོང་གཟུངས་དང་ནི། །བསྔོ་བ་གཞུང་ལྟར་བྱས་པས་ན། །རི་རབ་ཙམ་གྱི་དཀོར་ཡང་འཇུ། ༈ མདོ་སྒྲུབ་དམིགས་པ་གྲངས་མང་ཡང་། །རང་ཉིད་ཤཱཀྱ་ཐུབ་པ་ལ། །དགྲ་བཅོམ་ལྔ་བརྒྱས་བསྐོར་བར་བསྒོམ། །ཐུགས་ཀར་ཟླ་སྟེང་བོ་ཡིག་ལ། །ཤེར་སྙིང་མདོ་དང་སྙིང་པོས་བསྐོར། །དེ་ལས་འོད་འཕྲོས་སྣོད་བཅུད་ཀུན། །སྒྱུ་མ་རྨི་ལམ་ལྟ་བུར་གྱུར། །དེ་ནས་རང་སེམས་ངོ་བོར་བལྟ། །ཟབ་དོན་ཡིད་ལ་བསམ་པ་ཡིན། །ཐལ་མོ་རྡེབ་པའི་དུས་དེ་ལ། །དགྲ་བཅོམ་ལྔ་བརྒྱ་ཐམས་ཅད་ཀྱིས། །སྣམ་སྦྱར་ཕྱོགས་གཅིག་ཏུ་བརྡབས་པས། །བར་ཆད་བགེགས་ཀུན་བཟློག་པར་བསྒོམ།། ༈ རང་ཉིད་སེང་གདོང་ལྷ་མོ་བསྒོམ། །ཕྱག་
གཉིས་ཉི་མ་ཟླ་བ་བསྣམས། །དེ་གཉིས་བརྡབས་པས་གནོད་བྱེད་རྣམས། །ཐལ་བ་རྡུལ་དུ་བརླག་པར་བསྒོམ།། ༈་རང་ཉིད་ཕག་མོའི་སྤྱི་གཙུག་ན། །རྩ་བའི་བླ་མ་སི་ཏུ་པ། །ཚེ་དཔག་མེད་པའི་སྐུ་རུ་བསྒོམ། །དེ་ཡི་དབུ་གཙུག་བཀའ་བརྒྱུད་རྣམས། །ཕྱག་རྣམས་གཡས་པས་སྐྱབས་སྦྱིན་དང་། །གཡོན་པས་ཚེ་ཡི་བུམ་པ་འཛིན། །ཚེ་བུམ་བདུད་རྩིའི་རྒྱུན་བབས་པས། །ཚངས་བུག་ནས་ཞུགས་ལུས་གང་བསྒོམ། །མཐར་ནི་ཐམས་ཅད་སི་ཏུར་ཐིམ། །དེ་ཉིད་འོད་ཞུ་རང་ཐིམ་བསྒོམ། །ནད་པ་ལ་སོགས་དོན་ཡིན་ན། །དེ་ཡི་སྤྱི་བོར་དེ་ལྟར་བསྒོམ། །བདུད་རྩི་བབས་དང་བསྟིམ་སོགས་བྱ། །ཐམས་ཅད་སྐྱབས་འཇུག་མཆོག་ཏུ་འགྱུར། །མཐར་ནི་སྐྱེ་འཆི་མེད་པའི་དོན། །རང་སེམས་ངོ་བོ་རྗེན་པར་སྐྱོང་། །སྨོན་ལམ་རིགས་ནི་གང་འདོན་ཀྱང་། །རིག་པ་གཞན་དུ་མ་ཡེངས་པར། །དེ་དང་དེ་ལྟར་འགྱུར་བར་ཤོག །སྙམ་དུ་འདུན་པ་རྩེ་གཅིག་བྱ། །དེ་ལྟར་ཆོས་སྤྱོད་ཧྲག་བསྡུས་ཀྱི། །དམིགས་རིམ་མདོར་བསྡུས་བྲིས་པ་ཡིན། །རྒྱས་པར་བྱས་ན་མཐའ་ཡས་ཏེ། །དམ་ཆོས་ཀུན་གྱི་གནད་འགག་རྣམས། །ཆོས་སྤྱོད་རབ་གསལ་འདི་ལ་
ཚང་། །དེ་ཕྱིར་དགེ་འདུན་ཐམས་ཅད་ཀྱིས། །ཉམས་ལེན་གཙོ་བོ་འདི་ལ་མཛོད། །འཕྲལ་དུ་ཡིད་ལ་གང་ཤར་ཙམ། །དབོན་པོ་ཀརྨ་འགྲོ་དོན་གྱི། །ཐུགས་ལ་ཕན་པར་བྱ་བའི་ཕྱིར། །དགེ་སློང་རཱ་ག་ཨ་སྱས་བྲིས། །བློ་གསལ་ཉམས་ལེན་འདོད་པ་ཡི། །གཉོམ་ཆུང་གཞན་ལ་ཕན་པར་ཤོག །ཅེས་པ་མེ་སྤྲེལ་ཁྲུམས་ཟླ་ཡི། །བཅོ་བརྒྱད་ཉིན་པར་བྲིས་པ་དགེ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།