གསང་སྔགས་སྤྱིའི་ཞལ་ཤེས་ཟིན་བྲིས་བསྡུས་པ།
གསང་སྔགས་སྤྱིའི་ཞལ་ཤེས་ཟིན་བྲིས་བསྡུས་པ་བཞུགས་སོ། །
ན་མོ་གུ་རུ་དྷེ་ཝ་ཌཱཀྐི་ནི་ཧཱུཾ། རྙིང་མའི་ཆོ་གའི་མིང་ལ་ནི། །ལས་བྱང་ཞེས་པ་བརྡ་རྙིང་སྐད། །རྙིང་མ་གྱེར་སྒོམ་ཞེས་བྱ་སྟེ། །ངག་ནས་འདོན་རྒྱུ་དེ་རྣམས་ནི། །ཡིད་ལ་བྷེ་རྒྱུ་ཁོ་ན་སྟེ། །ཚིག་ལ་རིགས་པའི་དཔྱད་པས་གསལ། །ལོགས་ནས་བསྒོམ་བྱ་ཚོལ་མི་དགོས། །གཞན་དང་མི་འདྲའི་ཁྱད་ཆོས་ཡིན། །མངོན་རྟོགས་ཚར་གཅིག་འདོན་པ་དེས། །བདག་ཉིད་ལྷ་རུ་བསྐྱེད་པ་དང་། །མདུན་བསྐྱེད་བུམ་བསྐྱེད་གཏོར་བསྐྱེད་རྣམས། །དུས་གཅིག་ཉིད་དུ་གསལ་བཏབ་སྟེ། །སྤྱན་འདྲེན་བྱས་པས་ཡེ་ཤེས་པ། །གྲངས་མེད་སྤྱན་དྲངས་བདག་མདུན་དང་། །
བུམ་པ་གཏོར་མ་ཀུན་ལ་བསྟིམ། །ཀུན་གྱི་དབུ་རྒྱན་ནང་དུ་ནི། །རིགས་ལྔ་གསལ་བའི་དཀྱིལ་འཁོར་ལྔས། །དབང་བསྐུར་བསམ་པར་བྱ་བ་དང་། །རང་ལས་སྤྲུལ་པའི་མཆོད་པ་ཡི། །ལྷ་མོ་བྱེ་བ་དུང་ཕྱུར་གྱིས། །བདག་མདུན་ལྷ་ཚོགས་ཐམས་ཅད་ལ། །ཕྱག་འཚལ་ཕྱི་ནང་གསང་བ་ཡི། །མཆོད་འབུལ་བསྟོད་པ་བྱེད་དམིགས་ཤིང་། །རང་གི་ངག་ནས་ལས་བྱང་ནི། །ཚར་གཅིག་འདོན་པར་བྱ་བའོ། །ཕུགས་གཏོར་སྟོད་ཆར་ལྷ་སོ་སོའི། །དཀྱིལ་འཁོར་རམ་ནི་འཁོར་བཅས་བསྒོམ། །སྨད་ཆ་མཆོད་པ་བདུད་རྩིའི་མཚོ། །ལྷ་བརྒྱ་གཏོར་གཅིག་བྱེད་ན་
ནི། །ལྷ་ཚོགས་ནམ་མཁར་བསྒོམས་བྱས་ནས། །གཏོར་མ་བདུད་རྩིའི་རྒྱ་མཚོ་ནས། །མཆོད་པའི་ལྷ་མོས་བྷནྡྷས་བཅུས། །ལྷ་ཚོགས་སོ་སོར་མཆོད་པར་བྷྱོ། །རྡུལ་ཚོན་ཡོད་ན། མདུན་བསྐྱེད་གཙོ། །མེད་ན་བདག་བསྐྱེད་གཙོ་ཆེའོ། །ཐུགས་སྒྲུབ་ལ་སོགས་རྩ་བ་ཡིན། །ཡི་དམ་དཀྱིལ་འཁོར་བསྒོམ་པ་ཡི། །མེ་རི་རྡོ་ར་དུར་ཁྲོད་ནང་། །དཀྱིལ་འཁོར་གྲུ་བཞི་ཕྱི་ཡི་བར། །ལྷ་གྲངས་གང་ཡོད་སོ་སོར་བསྒོམ། །བདག་བསྐྱེད་མང་པོ་བྱེད་ན་ནི། །ནུབ་ངོས་ཁྱམས་དེར་བདག་བསྐྱེད་ཀྱི། །ལྷ་ཚོགས་མང་པོ་གྲལ་རིམ་བསྒོམ། །ཡང་ན་རང་ཉིད་སྐད་ཅིག་ལ། །གནས་འགྱུར་ཡི་དམ་རྗེས་མ་བསྒོམ། །མདུན་བསྐྱེད་ཤར་ངོས་དཀྱིལ་འཁོར་ཁྱམས། །ཐད་གྲལ་རིམ་པ་བཞིན་དུ་བསྒོམ། །བདག་བསྐྱེད་ཡི་དམ་ཐུགས་ཀ་རུ། །ཞི་བར་ཟླ་བ་དྲག་པོ་ལ། །ཉི་སྟེང་ས་བོན་ལངས་ཏེ་གནས། །དེ་མཐར་སྔགས་ཕྲེང་བསྐོར་བ་ནི། །མི་ཡིས་མཆོད་རྟེན་བསྐོར་བ་འདྲ། །ཕོ་རིགས་གཡས་དང་མོ་གཡོན་བསྐོར། །ཟླ་སྐར་ཕྲེང་བའི་བཟླས་པའོ། །དེ་ལས་འོད་ཟེར་འཕྲོས་པ་ཡིས། །སངས་རྒྱས་ཀུན་མཆོད་སེམས་ཅན་གྱི། །དོན་བྱས་ལྷ་དེའི་གོ་འཕང་བཀོད། །འོད་ཟེར་ཚུར་
འདུས་བདག་ལ་ཐིམ། །བྱིན་རླབས་དངོས་གྲུབ་ཐོབ་པར་བསམ། །རང་ཐུགས་སྔགས་ཕྲེང་འཁོར་བཞིན་ལས། །འོད་ཟེར་ཁ་དོག་ལྔ་ལྡན་པ། །ཚོན་སྐུད་ལྟ་བུ་ཞལ་ནས་ཐོན། །མདུན་བསྐྱེད་ཞལ་ནས་ཐུགས་ཀ་ཡི། །སྔགས་ཕྲེང་ལ་ཐིམ་དྲག་ཏུ་འཁོར། །དེ་ལས་འོད་ཟེར་སྐུད་པ་བྱུང་། །གསང་བའི་གནས་སམ་ལྟེ་བ་ནས། །ཚུར་འདུས་རང་གི་ལྟེ་བའམ། །གསང་བ་ནས་ཞུགས་ཐུགས་ཀར་ཐིམ། །བྱིན་རླབས་དངོས་གྲུབ་ཐོབ་པར་བསམ། །དེ་ནི་སྒྲུབ་པའི་དམིགས་པའོ།། ༈ དེ་ནས་འོད་ཟེར་དེ་ཉིད་ནི། །སྔགས་སུ་བསྒྱུར་ལ་འཁོར་བ་ཡི། །ཕར་ལ་མཆོད་ནས་ཚུར་ལ་འཕྲོས། །ཚུར་ལ་དངོས་གྲུབ་ཚུལ་དུ་ཐིམ། །བར་དུ་འཁོར་ཚེ་དེ་ཉིད་ལས། །འོད་ཟེར་འཕྲོས་པས་སངས་རྒྱས་མཆོད། །བྱིན་རླབས་དངོས་གྲུབ་བསྡུས་ནས་ནི། །སྔགས་ཕྲེང་དེ་ལ་ཐིམ་པ་དང་། །འགྲོ་བའི་སྡིག་སྒྲིབ་སྦྱང་བར་དམིགས། །དེ་ནི་སྒྲུབ་པ་ཆེན་པོ་ཡིན། །རྒྱལ་པོའི་ཕོ་ཉ་ལྟ་བུ་ཡི། །དམིགས་པ་ཧྲག་བསྡུས་དེས་ཚང་ངོ།། ༈ དེ་ནས་ཕྲིན་ལས་བཞི་སྒྲུབ་ནི། །སྔ་དྲོ་སྔགས་ཕྲེང་དཀར་པོ་ཡིས། །ནད་གདོན་སྡིག་སྒྲིབ་ཞི་བར་བསྒོམ། །ཉིན་ཕྱེད་
སྔགས་ཕྲེང་གསེར་གྱི་མདོག །ཚེ་དང་བསོད་ནམས་ཡེ་ཤེས་རྒྱས། །དགོང་མོ་སྔགས་ཕྲེང་དམར་པོ་ཡིས། །སྣང་སྲིད་རླུང་སེམས་དབང་དུ་འདུ། །སྲོད་ལ་སྔགས་ཕྲེང་ལྗང་ངམ་ནག །གནོད་བྱེད་དགྲ་བགེགས་ཚར་བཅད་བསམ། །དེ་ཡིས་བསྙེན་སྒྲུབ་དམིགས་རིམ་འདུས།། ༈ བསྐང་གཏོར་རི་རབ་གླིང་བཞི་ལ། །ལྷ་མིའི་ལོངས་སྤྱོད་དཔག་མེད་དམིགས། །ཆོས་སྐྱོང་སོ་སོའི་མཐུན་པའི་རྫས། །བྱ་ནག་གཡག་ནོག་ལ་སོགས་པ། །རེ་རེ་ལ་ཡང་བརྒྱ་སྟོང་འཕྲོ། །ནམ་མཁའ་བར་སྣང་ཁྱབ་གྱུར་པ། །བསྐང་ཡིག་གཞུང་ལྟར་ཐམས་ཅད་ཀུན། །ཚང་བར་དམིགས་ཏེ་འབུལ་བའོ།། ༈ གཏོར་ཟློག་སྟོད་ཆ་ལྷར་བསྒོམ་སྟེ། །བར་དུ་དྲག་པོའི་མཆོད་རྫས་རྣམས། །སྨད་ནི་དགྲ་བགེགས་ཤ་ཁྲག་སྟེ། །ཤ་རི་ཁྲག་མཚོ་རུས་པའི་གྲམ། །དཔག་མེད་ཡིད་ཀྱིས་དམིགས་ཏེ་འབུལ། །ལིངྒ་བསྒྲལ་བའི་ལིང་རོ་དང་། །གཏོར་ཆུང་དགྲ་བགེགས་ཤ་ཁྲག་ནི། །ཞལ་དུ་བསྟབ་བསྟིམ་ཕུལ་བསམ་བསྟབ།། ༈ ཟློག་གཞུང་འདོན་ཚེ་དམིགས་པ་ནི། །ལྷ་དེ་སྤྲུལ་པའི་ཁྲོ་ཆུང་ནི། །རང་འདྲ་དཔག་མེད་འཕྲོས་པ་ཡིས། །གནོད་བྱེད་བྱ་སྤུ་རླུང་ཁྱེར་
ལྟར། །ནམ་མཁའི་མཐའ་ལ་བསྐད་བྱས་ཏེ། །བར་མཚམས་མཚོན་ཆའི་མེ་རི་ཡིས། །གུར་གྱིས་མཚམས་བཅད་ལྡོག་མེད་བསམ། ༈ གཏོར་ཟློག་འབུལ་ཁ་གཏོར་མ་ལ། །ཡིད་ཀྱིས་ནམ་མཁར་བཏེག་བྱས་ཏེ། །སེར་སྤྲིན་དྲག་ཏུ་འཁྲུགས་པ་ལྟར། །འུར་འུར་ཆེམ་ཆེམ་དགྲ་བགེགས་ཕྱོགས། །དམག་དཔུང་ཆས་པའི་ཚུལ་དུ་བསྒོམ། །གཏོར་མ་ལྷ་དེའི་ཕྱག་གཡས་ཀྱིས། །ཕྱག་མཚན་བསྐལ་པའི་མེ་དཔུང་འབར། །དགྲ་བགེགས་སྟེང་དུ་བརྒྱབ་པ་ལ། །དེ་ཡི་ཕྱོགས་སུ་ཕུལ་བ་ཡིས། །བར་སྣང་གཟའ་རྒོད་རྒྱུག་པ་ལྟར། །མེ་དཔུང་འུར་སྒྲ་དང་བཅས་སོང་། །གནོད་བྱེད་གང་ཡིན་དེ་ལ་ཕོག །རྩྭ་སྐྱའི་སྟེང་དུ་མེ་དཔུང་གི །ཐོག་བརྒྱབ་ལྟར་དུ་རྗེས་མེད་བསམ།། །༈ དཀར་གཏོར་དཀར་གསུམ་བདུད་རྩིའི་མཚོ། །བསྔོས་པ་ཙམ་གྱིས་ལྷ་འདྲེ་རྣམས། །ཐམས་ཅད་དགའ་མགུ་ཚིམ་པར་དམིགས།། ༈ ཐུན་གཏོར་ཤ་ཁྲག་དམར་གཏོར་དེ། །བྷན་ཡངས་ཤིང་རྒྱ་ཆེའི་ནང་། །གནམ་ལྕགས་ཁ་ཊཾ་རྩེ་གསུམ་པ། །བྲག་རི་ལྟ་བུ་ཆེ་ཞིང་ས། །སྤུ་གྲི་ལྟ་བུ་རྣོ་བ་ལས། །བཀུག་གཞུག་བྱས་པས་དགྲ་བགེགས་རྣམས། །
ཁོ་ཤོག་རླུང་གིས་ཁྱེར་ལྟར་བཀུག །ལས་ཀྱི་རླུང་ཤུགས་དྲག་པོ་ཡིས། །ཁ་ཊཾ་དེ་ལ་བརྒྱབ་མ་ཐག །ཤ་ཁྲག་དམར་ཆིལ་གཏོར་སྣོད་གང་། །ཁ་ཊཾ་འོད་ཞུ་ངོ་བོ་ནི། །གནོད་བྱེད་དེ་ཡི་ཤ་ཁྲག་སྲོག །རྣམ་པ་ཡེ་ཤེས་བདུད་རྩི་དེ། །ཆོས་སྐྱོང་སོ་སོ་ལ་ཕུལ་བས། །ཐམས་ཅད་གསོལ་ཞིང་དགྱེས་པར་དམིགས། །ཕྱི་རོལ་གཏོར་ཁྲིའི་ཕྱོགས་དེ་ནས། །བསྔོས་པ་ཆོས་སྐྱོང་བཞུགས་པ་ཡི། །ཞལ་དུ་གཏོར་མ་ཕུལ་བས་མཉེས། །གནོད་བྱེད་དགྲ་བགེགས་ཐམས་ཅད་ནི། །།བཙོན་དུ་ཁྱེར་ནས་རང་གནས་ཀྱི། །དུར་ཁྲོད་སོགས་སུ་ཁྱེར་བར་བསྒོམ། །དེ་ནི་ཞི་བའི་ལུགས་ཡིན་ཏེ། །དྲག་པོའི་དམིགས་པ་གཏོར་ཟློག་ནི། །ཕུལ་དང་ཐུན་གཏོར་ཕུལ་བ་གཅིག། ༈ གཏོར་རྒྱབ་གཏོར་ཁ་སྟོན་པ་ལ། །རུང་དང་མི་རུང་ཁྱད་པར་ཆེ། །ཀླུ་བདུད་གདོན་དང་མ་མོ་དང་། །གཟའ་དང་ལྷ་གནད་བྱད་ཁ་དང་། །ཚད་པ་གཉན་དང་ནད་ངན་རིམས། །དེ་ལ་གཏོར་མ་བརྒྱབ་ན་ཐུ། །ཡང་ན་རྐྱེན་ངན་སྣ་ཚོགས་འབྱུང་། །རྒྱལ་འགོང་དམ་སྲི་ཐེའུ་རང་དང་། །རླུང་ནད་སྨྱོ་འབོག་སྨྱོ་རྒོད་དང་། །བྱིས་པ་ཤི་བའི་བུད་མེད་དང་། །ལམ་འདྲེ་གློ་བུར་གདོན་རྒོད་དང་། །ཤི་འཕྲོ་མ་ཚོད་
མང་དུ་ཤི། །ནད་ངོས་མ་ཟིན་ནད་ཡུན་རིང་། །འགྲིམ་སྣ་རྒོད་ཅིང་ལོག་གྱུ་མང་། །དེ་ཚོ་གཏོར་ཁ་བསྟན་ན་ཕན།། ༈ དཀར་གཏོར་བགེགས་གཏོར་བདེན་པ་བདར། །ཆོས་བཤད་གནོད་པ་མ་བྱེད་སྨྲ། །ནད་པའི་ཚེ་བསོད་སྲོག་རྣམ་ཤེས། །ཐིག་ལེ་དཀར་པོ་མཐེ་བོང་ཙམ། །དབུ་མའི་ལམ་ནས་སྤྱི་བོར་སྤར། །ནམ་མཁའི་ཨོ་རྒྱུན་ཐུགས་ཀར་བསྟིམ། །ལུས་དེ་ཧོམ་ཁུང་བསྒོམ་པའི་ནང་། །གདོན་དེ་ལིངྒའི་གཟུགས་སུ་བསྐྱེད། །བཀའ་དང་དམ་ལ་མི་གནས་པ། །གནོད་བྱེད་བཀུག་གཞུག་ལན་གསུམ་བྱ། །གཏོར་མ་ལྷ་རང་སོ་སོ་ཡི། །བསྐུལ་པ་རེ་དང་གྱེར་བ་སྟེ། །ཆད་མདོ་བརྟན་སྐྱོང་སྤུ་གྲི་གསུམ། །སྨྱོ་ཁ་ཞིང་སྐྱོང་མ་ནིང་དང་། །སེང་གདོང་རྟ་ནག་དྲག་པོ་སོགས། །སོ་སོའི་སྔགས་མཐར་གནོད་བྱེད་པའི། །གདོན་བགེགས་མཱ་ར་ཡ་ཧཱུྃ་ཕཊ། །ཅེས་བཏགས་བརྒྱབ་ཅིང་དར་ནག་གམ། །ཐུན་བྲབ་དྲག་སྔགས་ཤེས་ཚད་བརྗོད། །དམིགས་པ་ཆོས་སྐྱོང་སོ་སོ་ཡི། །ཕྱག་མཚན་བསྐལ་པའི་མེ་འབར་བས། །བརྒྱབས་པས་གནོད་བྱེད་གཞོབ་ཐུལ་བསྲེགས། །སྟོང་པར་བསམས་ལ་དམིགས་མེད་བཞག །ནམ་མཁའི་ཨོ་རྒྱན་ཐུགས་ཀ་
ཡི། །ཐིག་ལེ་སྤྱི་བོ་ནས་མར་བསྟིམ། །གནས་གསུམ་ཨོཾ་ཨཱཧཱུྃ་བསྒོམ་བསྲུང་། །ཚེ་འགུགས་བྱས་ལ་བཀྲ་ཤིས་བརྗོད། །གདོན་དང་ནད་ཀྱིས་མ་མནར་བར། །བདེ་རིམ་གཏོར་ཁ་སྟོན་མི་རུང་། །འོན་ཀྱང་སྐྱེ་བོ་བླུན་པོ་ཡིས། །མི་རུང་བཞིན་དུ་དགོས་སྨྲ་ཞིང་། །མ་བྱས་རྣམ་རྟོག་མི་ཞི་ན། །ཁོ་ཡི་རྒྱབ་ངོས་ཆོས་སྐྱོང་བསྒོམ། །གཏོར་མ་བདུད་རྩིའི་རང་བཞིན་ཏེ། །ཆོས་སྐྱོང་ཞལ་དུ་ཕུལ་བར་བསྒོམ། །དེ་ལ་ཡག་ཉེས་ཅི་ཡང་མེད། །ཁོ་རང་སེམས་ཡིད་ཚིམ་ཕྱིར་ཡིན།། ༈ ལར་ནི་བསྲུང་བའི་དམིགས་རིམ་ནི། །རང་ཉིད་ཡི་དམ་གང་ཡིན་གྱི། །ཐུགས་སྲོག་ཧཱུྃ་གི་ཐིག་ལེའི་ནང་། །སྐྱབས་གནས་བླ་མ་རྡོ་རྗེ་འཆང་། །རང་ལ་བྱིན་རླབས་འཇུག་ཕྱིར་བསྒོམ། །བླ་མའི་སྐུ་སྲུང་བྱེད་དགོས་ན། །དེ་མཐར་བསྲུང་བྱའི་བླ་མ་ཀུན། །རྡོ་རྗེ་འཆང་ལ་བསྐོར་བར་བསྒོམ། །ཧཱུྃ་གི་ཟླ་ཚེས་ནང་དུ་ནི། །རང་གི་ཡི་དམ་རྩིས་ཆེན་དང་། །འ་ཆུང་ཆོས་སྐྱོང་རྩིས་ཆེན་རྣམས། །བསྒོམས་པས་ཕ་རོལ་བྱད་མ་ཡིས། །ལྷ་དབྱེ་བྱས་ཀྱང་དབྱེ་མི་ཐུབ། །ཧཱུྃ་གི་ཞབས་ཀྱུའི་ནང་དུ་ནི། །ཨཿཡཿམཿདུཿརཿཙཿནཿ མགོ་མཇུག་ལྡོག་པ་སྤུས་བྲིས་ཙམ། །བསྒོམས་པས་བུ་
རྟིས་བཟུང་དང་མཚུངས། །སྡེ་བརྒྱད་རང་སྲོག་གཅོད་མི་སྲིད། །ཧཱུྃ་གི་སྡོང་པོ་ལྕགས་སྦུབ་ལྟར། །ཁོག་སྟོང་དབུས་ཀྱི་ཧ་ཁོག་ནང་། །རང་གི་བླ་སྲོག་ཚེ་བསོད་ནམས། །ངོ་བོ་ནི་ཡིག་ལྗང་གུ་ནི། །འོད་ཟེར་བཀྲག་མདངས་ལྡན་པ་ཡི། །གཡས་སུ་བསྲུང་བྱ་ཕོ་རིགས་རྣམས། །གཡོན་དུ་མོ་རིགས་སྦྲ་ཞིང་ཁང་། །མདུན་དུ་ཟས་ནོར་ཐམས་ཅད་རྣམས། །མངོན་སུམ་ལྟ་བུར་དངོས་སུ་བསྒོམ། །བསྲུང་བྱ་བློ་གཏད་མི་ཕེར་བར། །རྒྱབ་ནས་ངོ་ལོག་འོང་དོགས་ན། །རང་ཉིད་ཡི་དམ་ཕྱི་རོལ་གྱི། །དཀྱིལ་འཁོར་ནང་དུ་ཚུད་ཙམ་བྱ། །དེ་བས་ཞན་པའི་ཡོན་བདག་ལ། །རྡོ་ར་མེ་རིའི་ནང་ཚུད་ཙམ། །བསྲུང་བྱ་བྱད་ཁ་མང་བ་ལ། །སྲུང་འཁོར་དམ་པོར་བསྒོམ་པ་ནི། །སྔགས་པ་མ་ཐུབ་བར་དུ་ནི། །དེ་ལ་ཐུབ་རྒྱུ་མེད་པའོ། །སྔོན་ལས་མིན་པའི་འཕྲལ་རྐྱེན་ནི། །སྲུང་འཁོར་བསྒོམས་པས་ངེས་པར་ཟློག །འོན་ཀྱང་རང་ལ་དེ་ཙམ་རྩུབ། །སྒོམ་ལུགས་བློ་གཏད་ཆེ་ཆུང་ལྟོས། །ཞེས་པ་འདི་སྔགས་རྒན་ཨ་རཱ་གས་ཕྱི་རབས་རྗེས་འཇུག་སྔགས་འཆང་རྣམས་ཀྱི་དོན་དུ་བྲིས་པ་མངྒ་ལཾ།།