གསར་རྙིང་ཡི་དམ་ཆོས་སྐྱོང་སྤྱི་ཡི་སྲུང་ཟློག་མན་ངག་ཞལ་ཤེས།
གསར་རྙིང་ཡི་དམ་ཆོས་སྐྱོང་སྤྱི་ཡི་སྲུང་ཟློག་མན་ངག་ཞལ་ཤེས་བཞུགས། །
ན་མོ་གུ་རུ་དྷེ་ཝ་དྷཱ་ཀི་ནཱི་ཧཱུྃ། རྩ་བ་གསུམ་ལ་གུས་པས་ཕྱག་འཚལ་ནས། །གསར་རྙིང་སྤྱི་ཡི་མན་ངག་ལ། །སྲུང་བ་བསྐང་བཟློག་བྱ་བ་ནི། །བཅས་དང་དམིགས་པ་ཕུལ་ལུགས་གསུམ། །དང་པོ་བཅའ་ལུགས་འདི་ལྟར་ཏེ། །བླ་མ་གཏོར་མ་ཟླུམ་པོ་སྟེ། །ཡི་དམ་གཏོར་མ་སྟོད་ཟུར་གསུམ། །མཁའ་འགྲོ་ཟླུམ་པོ་སྟོད་ཟུར་གཉིས། །ཆོས་སྐྱོང་གཏོར་མ་ཟུར་གསུམ་པ། །ལྷ་མོ་ལ་ཡང་དེ་ལྟ་བུ། །ནོར་ལྷ་ནོར་བུའི་དབྱིབས་ཅན་ཏེ། །ཕྱི་རྒྱུད་པ་ལ་དཀར་གཏོར་དང་། །བདུན་པོ་ཕུགས་གཏོར་ཡིན་པ་སྟེ། །དབུས་སུ་བླ་མ་གཡས་ཡི་དམ། །དེ་གཡས་
ཆོས་སྐྱོང་ཕོ་རྒྱུད་དེ། །དེ་ཡི་གཡས་སུ་ནོར་ལྷའོ། །བླ་མའི་གཡོན་དུ་མཁའ་འགྲོ་སྟེ། །དེ་གཡོན་ལྷ་མོ་དེ་ཡི་གཡོན། །ཕྱི་རྒྱུད་པ་དེ་གཏོར་མ་བདུན། །དེ་ལ་ཅི་ཡང་འདོན་དུ་རུང་། །ཀ་ཏོ་རའམ་སྡེར་ནང་དུ། །རི་རབ་བང་རིམ་བཞི་པའི་སྟེང་། །ཞི་དང་སྲུང་བར་ཟླུམ་པོ་སྟེ། །ནོར་དང་རྒྱས་པར་ཟུར་བཞི་པ། །དབང་ལ་ཟུར་གཉིས་དྲག་པོ་ལ། །བསྐང་གཏོར་ཟུར་གསུམ་བྱ་བ་སྟེ། །རྩེ་ལ་བཀྲ་ཤིས་རྟགས་བརྒྱད་དང་། །དེ་འོག་རྒྱལ་སྲིད་རིམ་པ་ལྟར། །བྱ་དང་རི་དྭགས་གཅན་གཟན་དང་། །རྟ་ནག་གཡག་ནག་ལུག་ནག་སོགས། །གཡུང་དྭགས་དེ་འོག་ཆུ་
གནས་བཙུགས། །རྟ་གཡག་བྱ་ལུག་ནག་པོ་ནི། །བཅུ་གསུམ་བདུན་ལྔ་གསུམ་སོགས་བཙུགས། །མར་ཐུད་རིལ་བུ་ཤ་སོགས་བརྒྱན། །དེ་ནི་བསྐང་བའི་གཏོར་མ་སྤྱི། །གཟུགས་འགྲོས་ཁ་ཡི་སྟོན་ལུགས་ནི། །སྲུང་བ་ཐམས་ཅད་ནང་ན་སྟོན། །ཟློག་པ་ཕྱི་ལ་སྟོན་པ་སྟེ། །ཕྱོགས་ཀུན་ཁ་སྟོན་དམག་ཐབ་ཡིན། །ཐམས་ཅད་མདུན་དུ་ཁ་བསྟན་པ། །ཇག་ཐབས་བསད་པའི་ལས་ལ་ཤེས། །སྤྱི་འགྲོས་ཟློག་པའི་བཅའ་ཐབས་ནི། །ལྕགས་སྣོད་ནང་དུ་ལུག་རིལ་ལམ། །ས་ཉོབ་སྟེང་དུ་འཇིམ་པས་གཡོགས། །དབུས་སུ་གྲུ་གསུམ་ཅུང་ཟད་བྲུ། །དེ་སྟེང་དམར་གཏོར་ཆེ་བ་གཅིག །ཟུར་རེར་རྩང་ཐུར་བདུན་རེའོ། །དེ་རྒྱབ་དམར་གཏོར་ཆུང་བ་ནི། །བརྒྱད་དམ་ཡང་ན་བཅུ་ཡིས་བསྐོར། །རེ་རེར་རྩང་ཐུར་བདུན་རེ་དང་། །གཙོ་བོའི་རྩེ་ལ་མེ་རི་བྱ། །དེ་སྟེང་དར་ནག་གདུགས་ཆུང་ཕུབ། །མེད་ན་མདའ་དར་ནག་པོ་དང་། །ཁྱུང་གི་ཙཀླུ་བཙུགས་པར་བྱ། །ཐམས་ཅད་ལིང་ཆུང་མགོ་ཐུར་དང་། །སྙིང་གི་གཟུགས་དང་ཤས་བརྒྱན་ནོ། །དེ་རྒྱབ་རྩང་རིང་བརྒྱ་རྩའམ། །རེ་གཅིག་གམ་ནི་ཉེར་བརྒྱད་བཙུགས། །ཡོད་ན་སྒོ་རྩང་བཞི་པོ་ནི། །ཤར་ཟླུམ་ལྷོ་རུ་གྲུ་
བཞི་པ། །ནུབ་ཏུ་ཟླ་གམ་བྱང་ཟུར་གསུམ། །དེ་བཞི་ཐད་ཁར་བསླང་སྟེ་འཛུགས། །གཞན་རྣམས་རྒྱ་གྲམ་སྲིན་མོ་འགྲོས། །དེ་ལ་ཡི་དམ་ཆོས་སྐྱོང་ནི། ཟློག་གཞུང་ཡོད་ཚད་འདོན་རུང་སྟེ། །ཟློག་དཔུང་ཞེས་པའི་མིང་འདོགས་སོ། །བསྐང་གཏོར་བསྐང་བ་ཡོད་ཚད་འདོན། །ནུབ་རེ་ཚོགས་རེ་གཏོར་འབུལ་རེ། །དེ་ལྟར་ཞག་མང་བྱས་ན་ལེགས། །ཉིན་རྫོགས་བྱེད་ཀྱང་རུང་བ་སྟེ། །གྲྭ་པ་མང་ན་ཚར་མང་འགྲོ། །བཅའ་ཚོགས་མདོར་བསྡུས་སྤྱི་འགྲོས་སོ། །དེ་ནས་འདོན་ལུགས་རིམ་པ་ནི། །དང་པོ་སྐྱབས་སེམས་མཆོད་བྱིན་རླབས། །དེ་ནས་སྔོན་འགྲོ་དཀར་བགེགས་བཏང་། །ཀུན་རིག་ནང་གི་སྔོན་འགྲོ་དང་། །བགེགས་གཏོར་གཉིས་པོ་བྱས་ཀྱང་རུང་། །དེ་ནས་ཡི་དམ་གང་བྱེད་ཡ་ཀུན། །དེ་ནས་ཆོས་སྐྱོང་གང་ཡོད་ཀྱི། །ལས་བྱང་ཐམས་ཅད་རིམ་པར་འདོན། །དེ་ནས་བསྐང་བ་ཐམས་ཅད་འདོན། །དེ་ནས་ཟློག་པ་ཐམས་ཅད་འདོན། །དེ་ནས་ཚོགས་བྱེད་དེ་ནས་ནི། །གཏོར་འབུལ་དཀར་གཏོར་མཉམ་དུ་འབུལ། །མདོ་སྒྲུབ་སེང་གདོང་ཐལ་བརྡེབ་བྱ། །ཕྱིར་ནངས་ཡང་ནི་དེ་ལྟར་གྱིས། །སྔགས་པ་སྤྱི་ཡི་ཕྱག་ལེན་ནོ། །ཡི་དམ་
ཆོས་སྐྱོང་གཉིས་ཀྱི་མཚམས། །གཏོར་བསྔོས་བྱེད་པ་རྙིང་ལུགས་དེ། །ཚོགས་བྱས་ཚོགས་ཕུད་ཕུལ་བྲན་ནས། །གཏོར་བསྔོས་བྱེད་པ་ཀར་ལུགས་སོ། །རྙིང་མའི་ཚོགས་ཕུད་རིམ་པ་གསུམ། །དང་པོ་ཕུད་ལ་གཏོར་བསྔོས་བྱེད། །གཉིས་པར་བསྐང་བ་གསོས་ལ་འདོན། །གསུམ་པ་ཟན་ལིང་དང་བཅས་བསྒྲལ། །ཟློག་པ་གསོས་ལ་ཟློག་པ་འདོན། །ཚོགས་རོལ་ལྷག་མ་གཙང་ལྷག་བྱ། །ཟློག་པའི་མཐའ་ཡི་རྩང་ནང་དུ། །འབུལ་བ་རྙིང་ལུགས་འཆུགས་མེད་ཡིན། །དེ་ནས་དམིགས་པའི་བྱེ་བྲག་ནི། །ཕུགས་གཏོར་སོ་སོའི་རྩེ་ཡི་ཐད། །ལྷ་ཚོགས་སོ་སོར་བཞུགས་པ་ཡི། །ལྗགས་ཀྱི་འོད་ཟེར་སྦྲ་གུ་ཡིས། །གཏོར་མ་དྲངས་གསོལ་གསར་མ་སྟེ། །གཏོར་མའི་སྟོད་ནི་ལྷ་ས་སོ། །སྨད་ནི་བདུད་རྩི་མཆོད་པའི་སྤྲིན། །བསྒོམ་པ་རྙིང་མའི་ལུགས་ལགས་སོ། །བསྐང་གཏོར་གླིང་བཞིའི་རི་རབ་དང་། །ལྷ་མིའི་ལོངས་སྤྱོད་བསམ་ཡས་དམིགས། །དེ་ཡི་སྟེང་གི་ནམ་མཁའ་ལ། །ཟློག་པའི་སྟོད་ནི་ལྷ་རྣམས་ཏེ། །སྨད་ནི་གྲུ་གསུམ་ཧོམ་ཁུང་ནང་། །གནོད་བྱེད་དགྲ་བགེགས་དངོས་སུ་གསལ། །སྐེད་པ་ཤ་ཁྲག་རྒྱ་མཚོ་སྟེ། །མཐའ་རྩང་དབང་ཕྱུག་སྲིན་མོའི་ཚོགས། །ཟན་ལིང་
བཀུག་གཞུག་བསྒྲལ་ལས་བྱ། །དགྲ་བགེགས་ཤ་ཁྲག་ཞལ་དུ་བསྟབ། །ཟློག་གཞུང་འདོན་ཚེ་ལྷ་ཚོགས་ཀྱིས། །སྐུ་ལས་སྤྲུལ་པའི་ཁྲོ་ཆུང་ཚོགས། །ཁྱུང་དང་མེ་རླུང་འཚུབ་མ་འཕྲོས། །དགྲ་བགེགས་ནད་གདོན་ལྟས་ངན་དང་། །བྱེད་ཁ་ཚིག་ཆེན་ཉམ་ང་རྣམས། །བྱ་སྤུ་རླུང་གིས་གཏོར་བ་ལྟར། །རྒྱ་མཚོའི་ཕ་མཐར་བསྐྲད་པར་བསྒོམ། །ཟློག་གཞུང་སྤྱི་ཡི་དམིགས་པའོ། །ནམ་མཁར་བླ་མ་ཡི་དམ་དང་། །མཁའ་འགྲོ་ཆོས་སྐྱོང་སྤྲིན་ལྟར་འཁྲིགས། །བསྐང་གཏོར་ལྷ་མིའི་ལོངས་སྤྱོད་ཚོགས། །རང་རང་མཐུན་རྫས་གཞུང་ལྟར་དུ། །ཡིད་སྤྲུལ་ཅི་འདོད་ཟག་མེད་འབུལ། །ལྷ་ཚོགས་རྣམས་ཀྱི་གནས་གསུམ་དུ། །ཨོ་དཀར་ཨཱདམར་ཧཱུྃ་མཐིང་མཐར། །ཡིག་བརྒྱ་དཀར་དམར་མཐིང་གསུམ་དམིགས། །དེ་ཡི་སྟེང་གི་ནམ་མཁའ་ལ། །སངས་རྒྱས་བྱང་སེམས་ཐམས་ཅད་ནི། །དཀར་དམར་མཐིང་གསུམ་རིམ་པར་བཞུགས། །དེ་ལས་བདུད་རྩི་དཀར་དམར་མཐིང་། །ལྷ་ཚོགས་ཐམས་ཅད་ཀུན་ལ་ཐིམ། །ཐམས་ཅད་ཐུགས་དགྱེས་འཁོན་འགྲས་ཞི། །ལྷ་ཚོགས་ཀུན་གྱི་གནས་གསུམ་གྱི། །ཡིག་བརྒྱ་དཀར་དམར་མཐིང་གསུམ་ལས། །བདུད་རྩི་
དཀར་དམར་མཐིང་གསུམ་བབས། །བདག་ཅག་དཔོན་སློབ་ཡོན་བདག་བཅས། །ཀུན་གྱི་སྤྱི་བོའི་གཙུག་ནས་ཞུགས། །སྡིག་སྒྲིབ་དམ་ཚིག་ཚེག་ཉམས་དང་། །ལྷ་དང་བླ་མ་དགེ་འདུན་སོགས། །འཁོན་འགྲས་ཞུགས་པ་ཐམས་ཅད་དག །ལུས་ནི་ཤེལ་སྒོང་ལྟར་གྱུར་བསྒོམ། །བྱད་ཁ་ཆེ་བའི་ཡོན་བདག་ལ། །དམིགས་པ་འདི་དང་མ་ལྡན་ན། །རང་ལ་རྩུབ་ཅིང་ཕན་ཐོགས་དཀའ། །དེ་ཕྱིར་འདི་ལ་རྩེ་གཅིག་བྱ། །ཁྱད་པར་སུ་དང་འགྲས་པའི་མི། །ལྷ་དང་བླ་མ་ཐམས་ཅད་ནི། །སྤྱན་དྲངས་རང་གི་ལྷ་བླ་མར། །བསྟིམ་ལ་བསྐང་བ་གང་མང་འདོན། །འཁོན་འདྲས་སྦྱངས་བའི་དམིགས་པའོ། །ཐུན་གཏོར་དགྲ་བགེགས་དངོས་སུ་དམིགས། །བཀུག་གཞུག་བྱས་ནས་དབྱེར་མེད་བསྟིམས། །དེ་ཡི་སྙིང་ཁར་ཟངས་ལྕགས་ཀྱི། །འཁོར་ལོ་རྩིབས་བརྒྱད་གཡས་གཡོན་འཁོར། །ཤ་ཁྲག་ཐམས་ཅད་གཏུབས་པ་ཡི། །དམར་ལྟེམ་གང་བ་བདུད་རྩིར་གྱུར། །དམར་གཏོར་གཅིག་ལ་ཆོས་སྐྱོང་ནི། །ཀུན་གྱི་བསྐུལ་ཐུང་འདོན་པ་དང་། །དཀར་གཏོར་གཞི་བདག་ཀུན་ལ་བསྔོ། །ཆད་མདོ་བརྟེན་སྐྱོང་ཟློག་ཐུང་འདོན། །དེ་ནས་ཕྱི་རོལ་ཕྱོགས་གཙང་ནི། །རང་དང་ཡོན་བདག་
གཉིས་ཀ་ཡི། །ལོ་ཐོག་མིན་པར་ཕུལ་བཅུག་སྟེ། །མཚན་མོ་ཡིན་ན་མེ་རུ་འཛུགས། །ཚུར་ལམ་གཏོར་སྣོད་ཁ་དེ་ནི། །ཚུར་ལ་བསྟན་ནས་འོང་བ་ཡིན། །ལོངས་སྤྱོད་འདུ་བའི་རྟེན་འབྲེལ་ལོ། །མདུན་དུ་སྒྲུབ་ལ་རྟ་བྲོ་འདོན། །དེ་ནས་ཟབ་མདོ་སེང་གདོང་སོགས། །བདུད་བཟློག་བྱ་ཞིང་ནད་པའི་དོན། །ཡིན་ན་དུས་མིན་འཆི་བཟློག་འདོན། །རྗེས་ཆོག་མི་བྱ་བདག་མདུན་གྱི། །བསྐྱེད་རིམ་མི་བསྡུ་དེ་གར་བཞག །ཉལ་ཁ་དང་ནི་སྔ་དྲོའི་ཚེ། །སྲུང་བའི་དམིགས་པ་གལ་ཆེ་སྟེ། །བསྲུང་བྱ་ཡིན་ཙམ་ཐམས་ཅད་ནི། །མེ་རི་རྡོ་ར་ལ་སོགས་པའི། །གུར་ཁང་ནང་དུ་ཚུད་ཙམ་བྱ། །དེ་བས་ཅུང་ཟད་གལ་ཆེ་ན། །རང་ཉིད་ཡི་དམ་མཐའ་ལ་བསྐོར། །དེ་རྒྱབ་འཁོར་ལྷ་བསྒོམས་པ་ཡིན། །ངོ་ལོག་བྱེད་དོགས་མེད་པ་ལ། །ཤིན་ཏུ་གལ་ཆེའི་བསྲུང་བྱ་ནི། །རང་ཉིད་ཡི་དམ་གང་ཡིན་གྱི། །ཐུགས་སྲོག་ཧཱུྃ་འམ་གྷིཡིག་གི །ཧཱིའམ་ཧཱུྃ་གི་ཁོག་པ་ནི། །ལྕགས་སྦུབ་འདྲ་བ་ཁོང་སྟོང་ནང་། །དབུས་སུ་རང་གི་བླ་དང་སྲོག །ནཾ་ཡིག་ལྗང་གུ་བཀྲག་མདངས་ལྡན། །དེ་ཡི་གཡས་སུ་བསྲུང་བྱ་ནི། །ཕོ་རིགས་གཡས་དང་མོ་རིགས་གཡོན། །མདུན་དུ་རྟ་
ནོར་ཟས་ལོངས་སྤྱོད། །རྒྱབ་ཏུ་སྦྲ་ཁང་ཐམས་ཅད་དམིགས། །དེ་དག་དངོས་སུ་བསྒོམ་པ་ཟབ། །མིང་ཡིག་བསྒོམ་དང་ལྷ་སྐུར་བསྒོམ། །བྱེད་སྲོལ་ཡོད་ཀྱང་མི་ཟབ་བོ། །ཧཱིའམ་ཧཱུྃ་གི་མགོ་ཐད་དུ། །བླ་རྒན་ལ་སོགས་བསྲུང་བྱ་བསྒོམ། །ཧཱུྃ་གི་ཟླ་ཚེས་ཧཱིཝཡི་གུར། །རང་གི་ཡི་དམ་གཞན་རྣམས་དང་། །ཧཱུྃ་གི་ཐིག་ལེའི་ཧཱིའི་གི་གུའི་སྟོད། །ཡབ་སྲས་ལ་སོགས་དད་འདུན་ཡུལ། །ཧཱུྃ་གི་འ་ཆུང་ཧྲི༔ཡིག་སྨད། །རང་གི་ཆོས་སྐྱོང་རྩིས་ཆེན་རྣམས། །བསྒོམ་པའི་ལྷ་དབྱེའི་མི་ཚུགས་གནད། །ཧཱུྃ་གི་ཞབས་ཀྱུའམ་ཧཱིའི་ར་བཏགས་ཀྱི། །ནང་དུ་སྡེ་བརྒྱད་སྲོག་ཡིག་རྣམས། །ཨ་ཡ་མ་དུ་རུ་ཙ་ཤ་ན། །མགོ་མཇུག་ལྡོག་པ་སྤུས་བྲིས་ཙམ། །དེ་བསྒོམ་བུ་རྟིས་ཟིན་པ་ལྟར། །རང་སྲོག་རང་གིས་གཅོད་མི་སྲིད། །དེ་དག་སྲུང་དམིགས་མདོར་བསྡུས་པའོ།། ༈ །དེ་ནས་ཞག་གྲངས་ཚང་བ་དང་། །འབུལ་ལུགས་རིམ་པ་འདི་ལྟ་སྟེ། །ཐེབ་ལྡོག་རྒྱུ་བ་ལ་སོགས་ནི། །སྐར་ཡིག་ནང་ལྟར་ལེགས་པར་བརྩིས། །ཐེབ་དུས་སྐར་མ་ངན་ན་ལེགས། །གཟའ་དང་དབང་ཕྱུག་སྡེ་བརྒྱད་སོགས། །ལྡོག་དུས་དྲག་ལས་རང་ལ་ལྡོག །གཟའ་དང་མཁའ་འགྲོ་བིཊྚི་
སོགས། །ཚུར་ལ་རྒྱུ་དུས་འཛེམ་བྱ་ཞིང་། །ཕར་ལ་རྒྱུ་ན་རང་གི་གྲོགས། །རང་ཉིད་རྡོ་རྗེ་སློབ་དཔོན་དང་། །ཡོན་བདག་དྲགས་རིམ་ལོ་སྟེང་འཛེམ། །ས་བདག་ཐེ་སེ་ཧལ་ཁྱི་དང་། །སེ་བ་བླ་མཁྱེན་གསུམ་ལ་འཛེམ། །གཞན་རྣམས་ཐམས་ཅད་རྩི་མི་ནུས། །ད་ནངས་ལས་བྱང་ཉུང་བསྡུས་དང་། །བསྐང་བ་ཉུང་བསྡུས་ཟློག་གཞུང་འདོན། །དཀར་གཏོར་གཅིག་དང་དམར་གཏོར་ནི། །ཆོས་སྐྱོང་དུ་ཡོད་གྲངས་ཀ་བཅའ། །གཏོར་ཁ་སྟོན་ན་རྩང་དང་ནི། །མེ་རུ་རེ་ཡང་བཙུགས་པར་བྱ། །གསེར་སྐྱེམས་ཕུལ་ལ་སྒོ་དབྱེ་བྱ། །དེ་ནས་དཀར་གཏོར་དམར་གཏོར་རྣམས། །གྲལ་བྱས་བཤམས་ལ་དཀར་གཏོར་ཕུལ། །དེ་ནས་ཆོས་སྐྱོང་གཏོར་མ་རྣམས། །ཆད་མདོ་བརྟེན་སྐྱོང་ནས་བཟུང་ནས། །ཞན་ཞན་སྔོན་ལ་དྲགས་རིམ་རྗེས། །མཇུག་ནས་ཡར་འདོན་དམག་ཐབས་ཡིན། །དེ་དག་ཕྱོགས་དེར་འབུལ་བར་བྱ། །ཟོར་ནི་ཡག་ཉེས་ཆེ་བའི་ཕྱིར། །མི་འཕེན་འཇམ་ཐབས་བྱ་བ་ལེགས། །ཟློག་པའི་ལྷ་ཚོགས་ནམ་མཁར་བཏེག །གཏོར་མ་མེ་ཕུང་མཚོན་ཆའི་ཆར། །བར་སྣང་གཟའ་རྒོད་རྒྱུག་པ་ལྟར། །དགྲ་བགེགས་ཐོག་ཏུ་སོང་བ་
ཡིས། །གདོན་རྣམས་རྩྭ་སྐྱ་མེ་ཕུང་ལྟར། །དགྲ་རྣམས་གྲོག་ཚང་སེར་བ་ལྟར། །བྱེ་མའི་རྩིག་པར་སྒྲོགས་ཕོག་ལྟར། །ཐལ་བ་རྡུལ་དུ་བརླག་པར་བསམ། །བསམ་ལ་ཕྱོགས་སུ་ཕུལ་བའམ། །གལ་ཆེ་ན་ནི་ཟོར་དུ་འཕེན། །ཚུར་ལམ་ཁྱུང་གིས་རྗེས་བཅད་བསྒོམ། །གཉན་དང་ཚད་པ་གཟའ་མིན་པའི། །གདོན་ཆེན་ནད་པར་གཏོར་ཁ་སྟོན། །ནད་པའི་རྣམ་ཤེས་ཚེ་བསོད་ནམས། །ཡར་སྤར་ནམ་མཁའ་ཨོ་རྒྱན་ནམ། །བླ་མ་ཡི་དམ་ཐུགས་ཀར་བསྟིམ། །ལུས་ནི་ཧོམ་ཁུང་གསལ་བའི་ནང་། །གདོན་དེ་ལིངྒའི་གཟུགས་སུ་བསྐྱེད། །གཏོར་མ་ཡི་དམ་ཆོས་སྐྱོང་གི །ཕྱག་མཚན་མེ་ཕུང་འབར་བ་རྒྱབ། །རྩྭ་སྐྱ་བཞིན་དུ་དངོས་མེད་བསྲེགས། །བདེ་རིམ་གཏོར་ཁ་སྟོན་མི་བྱ། །ཅིས་ཀྱང་བྱེད་དགོས་ཟེར་ན་ནི། །ཡོན་བདག་རྒྱབ་ཕྱོགས་ནམ་མཁའ་ལ། །ཡི་དམ་ཆོས་སྐྱོང་གང་ཡིན་བསྒོམ། །གཏོར་མ་བདུད་རྩིའི་རང་བཞིན་དེ། །ལྷ་དེའི་ཞལ་དུ་ཕུལ་བར་བསྒོམ། །ཡོན་བདག་དེ་ཡི་མཐུ་བའམ། །སྟེང་དུ་གཏོར་མ་རྒྱག་གམ་ཕུལ། །རང་གི་རྣམ་རྟོག་དགག་ཕྱིར་ཏེ། །སྐྱོན་ཡོན་ཅི་ཡང་མེད་དོ་ཧ། །གཏོར་གཞོང་ཁ་སྦུབ་དམ་སྲི་རྣམས། །རི་རབ་
མནན་བསམ་རྟ་བྲོ་བྱ། །ཚེ་དབང་ཡང་ན་ཚེ་འགུགས་དང་། །ཚོགས་དང་བཀྲ་ཤིས་རྒྱས་པར་བྱ། །ཕྱིར་ནངས་རྗེས་ཆོག་རྒྱས་པ་དང་། །གཤེགས་གསོལ་རྫོགས་རིམ་བསྡུ་ཆོག་བྱ། །བསང་བྱ་དེ་ནས་རང་གནས་འོང་། །སྤྱི་འགྲོས་སྲུང་ཟློག་བསྐང་གསོལ་ཡི། །ཟིན་བྲིས་ཉུང་བསྡུས་དགོས་གསུངས་ནས། །སྒེས་སྣ་བླ་མས་བསྐུལ་བའི་ཕྱིར། །རཱ་ག་ཨ་སྱས་བྲིས་པ་དགེ། །མངྒ་ལཾ། ཞལ་དྲོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།