དབུ་མཛད་གུ་ཎེ་ཤྭ་ར་སོགས་དོན་གཉེར་འགའ་ཡི་དྲིས་ལེན་ཐོར་བུ།
དབུ་མཛད་གུ་ཎེ་ཤྭ་ར་སོགས་དོན་གཉེར་འགའ་ཡི་དྲིས་ལེན་ཐོར་བུ་བཞུགས་སོ། །
དགོངས་འདུས་ཀྱི་ཆོས་སྐབས་ཀྱི་དྲི་བའི་དོགས་གཅོད་དུ་སྨྲས་པ། བདག་བསྐྱེད་བསྒོམས་ཚར་ནས་བསྡུ་ཆོག་མ་བྱས་བར་དུ་ལྷ་གཞན་བསྒོམ་པའམ་དམིགས་པ་གཞན་བྱ་མི་རུང་ཟེར་བ་དག་ནི་ཆོ་གའི་གོ་དོན་གཏན་ནས་མ་ལོན་པར་ཟད་དེ། ཇི་སྐད་དུ། འཕྲོ་འདུའི་དམིགས་པ་མ་ཤེས་ན། །ཕྱོགས་གཅིག་ཀྱང་གིས་ཀུན་མི་འགྲུབ། །འདབ་གཤོག་ཚག་པའི་བྱ་དང་འདྲ། །ཞེས་པ་ལྟར་འགྱུར་བས་ན་ཏིང་འཛིན་འཕྲོ་འདུ་སྐད་ཅིག་རེ་རེ་ལ་ཡང་གང་ལ་གང་དགོས་སུ་བསྒྱུར་ཤེས་པ་གལ་ཆེ། མདོ་ལས་ཀྱང་། ཏིང་ངེ་འཛིན་གྱི་སྒོ་བརྒྱ་ཕྲག་མང་པོ་གསུངས་པ་དེ་དག་ཀྱང་འདི་
ལྟ་བུ་ལ་གསུངས་པ་ཡིན་པས། དེས་ན། དགོངས་འདུས་ཀྱི་བསྐང་བཤགས་ལྟ་བུའི་སྐབས་སུ། ཐོག་མར་སྔོན་འགྲོ་དཀར་ཕྱོགས་གཞི་བདག་གནས་བདག་ཡུལ་བདག་ལ་གསེར་སྐྱེམས་ཕུལ་ཞིང་བཀའ་བསྒོ་བའི་དུས་སུ། རང་ཉིད་སྤྱན་རས་གཟིགས་སུ་བསྐྱེད་དེ་ཞི་བ་བྱང་ཆུབ་སེམས་ཀྱིས་བཏུལ། ཞི་བས་མི་ཐུལ་བའི་བགེགས་དང་འབྱུང་པོ་བསྐྲད་པའི་ཚེ་སྤྱན་རས་གཟིགས་ཁྲོས་པའི་ཚུལ་གྱིས་རྟ་མགྲིན་དུ་བསྒྱུར། དེ་ནས་མཚམས་གཅོད་སྲུང་འཁོར་སོགས་ནས་བཟུང་སྟེ་རང་སེམས་གསལ་སྟོང་འདི་ཉིད་རྒྱུའི་ཧེ་རུ་ཀ་ཞེས་བྱ་བ་ངོ་བོ་སེམས་ཉིད་ཀ་དག་ལ་རྣམ་པ་རྡོར་
སེམས་སྐུ་མདོག་དམར་པོ་ནམ་མཁས་གར་ཁྱབ་སྐུ་ཡིས་ཁྱབ་ཅིང་ཨ་འཐས་ཀྱི་མཚན་མར་མ་གྲུབ་པ་ཆོས་ཀྱི་དབྱིངས་ཁྱབ་པ་གཅིག་ཏུ་མོས་ཏེ། དམིགས་པའི་སྤྲོ་བསྡུ་གང་བྱེད་ཐམས་ཅད་དེའི་རྫུ་འཕྲུལ་གྱི་རོལ་པས་བྱ་སྟེ། མཆོད་གཏོར་བསང་སྦྱང་བྱིན་རླབས་ཏིང་ངེ་འཛིན་རྣམ་གསུམ་རང་ལུས་གཞལ་ཡས་ཁང་དང་ལྷ་ཚོགས་སེམས་ཉིད་དུ་བསྐྱེད་པ་ཐམས་ཅད་དེའི་ངང་ནས་བྱ་སྟེ། དེ་ནས་གཞི་ཀ་དག་ཆོས་དབྱིངས་ཡིན་པས་སྣང་སྲིད་འཁོར་འདས་ཐམས་ཅད་བྱུང་ཡང་དེ་ལས་བྱུང་ཞིང་ཐིམ་ཡང་དེ་ལ་ཐིམ་པ་ཡིན། འདི་ལ་ཡང་བཀའ་བརྒྱད་དང་ཕུར་པ་སོགས་བསྐྱེད་པ་མ་ཧཱ་ཡོ་གའི་རྒྱུད་སྡེ་ཐབས་བསྐྱེད་རིམ་གཙོ་བོར་བཤད་པའི་སྐབས་དག་ཏུ་ནི། ཆོས་དབྱིངས་སྟོང་ཉིད་ལས་རིགས་པའི་ཡེ་ཤེས་རྒྱུའི་ཡི་གེ་ཧཱུྃ་མཐིང་ནག་ཏུ་ཤར།། དེ་ལས་ཨེ་ཡཾ་ཁཾ་སུཾ་ཀཾ་རཾ་འཕྲོས་ནས་འབྱུང་བ་རིམ་བརྩེགས་དང་། ཧཱུྃ་འཕྲོས་པས་གཞལ་ཡས་ཁང་། པཾ་ལས་པདྨ། ཨ་ལས་ཟླ་གདན། མ་ལས་ཉི་གདན་གྱི་ཁར་རྒྱུའི་ཡི་གེ་ཧཱུྃ་དེ་ཉིད་བབ་པ་ལས་ལྷ་བསྐྱེད་པ་ཡིན་ཀྱང་། དགོངས་འདུས་ཀྱི་ལུང་ཨ་ནུ་ཡོ་ག་དབྱིངས་དང་ཡེ་ཤེས་སུ་གཉིས་མེད་དུ་དམ་པ་སྟོན་པའི་སྐབས་ཡིན་པའི་གནད་ཀྱིས་རྒྱུའི་ཧེ་རུ་ཀ་ཕྱིའི་ཁོག་པ་
ལྟ་བུ་ནམ་མཁའ་ཁྱབ་པའི་ཁོངས་ནས་སྣོད་བཅུད་ཐམས་ཅད་སྤྲོ་བསྡུ་བྱེད་པ་ཡིན་ནོ། །བདག་མདུན་བུམ་གསུམ་དཀྱིལ་ཆོག་དངོས་གཞི་ཡིན་པ་གྲུབ་ནས། བཤགས་སྐོང་སོགས་ཡན་ལག་གི་ཆོ་ག་བྱེད་པའི་སྐབས་སུ། སྡིག་སྒྲིབ་ཉམས་ཆག་སོགས་སྦྱོང་བའི་ཕྱིར་རེ་ཞིག་ལ་རང་ལུས་ཐ་མལ་པའི་འདུ་ཤེས་དང་། དེ་ལ་ཡང་། ལུས་ཀྱི་སྒོ་ནས་མོས་གུས་ཕྱག་གི་བཤགས་པའི་ཚེ། རང་ལུས་གཅིག་པུ་མ་ཡིན་པར་རང་འདྲ་བྱེ་བ་དུང་ཕྱུར་གྲངས་མེད་དུ་སྤྲུལ་ནས་ཕྱག་འཚལ་བར་དམིགས་པས་ཕྱག་རྡོག་རེ་ལའང་རང་ལུས་ཀྱི་གྲངས་དེ་དག་དང་མཉམ་པའི་ཕྱག་ཏུ་འགྱུར་བ་སྟེ། ཞིང་རྡུལ་ཀུན་གྱི་གྲངས་སྙེད་ཀྱི། ལུས་བཏུད་པ་ཡིས། ཞེས་པའི་གོ་དོན་འདི་ཡིན་ནོ། །ངག་གི་སྒོ་ནས་བྱིན་རླབས་སྔགས་ཀྱི་བཤགས་པའི་སྐབས་སུ་ཡང་རང་ཉིད་ཐ་ལམ་པའི་སྤྱི་བོར་རྡོར་སེམས་བསྒོམ་ཚུལ་འདོན་ཆ་ལྟར་དང་། ཡིད་ཀྱི་སྒོ་ནས་རྟོག་ཚོགས་ལྟ་བའི་བཤགས་པ་ནི་ཐུགས་དམ་ངེས་དོན་རྟོགས་ཤིང་དྲན་ན་ཀླུ་སྒྲིབ་པ་བཤགས་ཡུལ་བཤགས་བྱ་བཤགས་བྱེད་ཐམས་ཅད་འཁོར་གསུམ་ཡོངས་དག་ཆེན་པོ་ལས་མི་འདའ། ལུས་ངག་ཡིད་གསུམ་གྱི་སྒོ་ནས་སྨྲེ་སྔགས་འགྱོད་ཚིག་གིས་བཤགས་པ་
ནི། དོན་དམ་པར་འཁོར་གསུམ་ཡོངས་དག་ལས་མ་འདས་ཀྱང་། གནས་སྐབས་ཀུན་རྫོབ་སྒྱུ་མ་ལྟ་བུའི་རོལ་པར་བདག་དང་དམིགས་ཡུལ་མཁའ་ཁྱབ་སེམས་ཅན་ཀུན་གྱི་སྡིག་སྦྱང་ཕྱིར་དད་མོས་གདུང་ཤུགས་ཀྱི་སྒོ་ནས་བཤགས་པ་སྨོན་ལམ་སོགས་བྱའོ། །དེ་ནས་སྔར་བཞིན་བདག་བསྐྱེད་དྲན་པའི་ངང་ནས་ཚོགས་བྱིན་རླབས་སོགས་བྱ་བའམ། ཆོས་སྐྱོང་བསྐང་གསོལ་སོགས་བྱས་ལ། སྐོང་ཆོག་སོགས་ཀྱང་མདུན་བསྐྱེད་གཙོ་བོར་བྱས་པའི་བདག་མདུན་གྱི་ལྷ་ཚོགས་ཐུགས་དམ་བསྐང་ཞིང་། ཚོགས་དང་མདངས་བསྐང་སོགས་ཀྱང་དེ་བཞིན་བྱའོ། །སྤྱིར་ཡང་བདག་བསྐྱེད་ལས་བྱང་གང་བཏོན་ཡང་ལྷ་དང་དཀྱིལ་འཁོར་བདག་ཁོ་ན་ཡིན་ཕྱིར། གཏོར་མཆོད་སོགས་བདག་བསྐྱེད་ལ་འབུལ་བ་མ་གཏོགས་ཕྱི་རོལ་དུ་དཀྱིལ་འཁོར་བཤམ་རྒྱུ་མ་ཡིན་ཚེ། གཏོར་མཆོད་ཀྱང་རང་གི་མདུན་ནམ་གང་འོས་སུ་བཤམས་པས་ཆོག་ལ། དཀྱིལ་ཆོག་སྐོང་བཤགས་སོགས་མདུན་བསྐྱེད་དགོས་པའི་རིགས་ཐམས་ཅད་ལ་གཏོར་མཆོད་སྤྱན་གཟིགས་སོགས་གང་འབྱོར་ཐམས་ཅད་མདུན་བསྐྱེད་ལ་སྤུངས་དགོས་པ་སྟེ། དེ་ལྟ་བུའི་སྐབས་དོན་དབྱེ་བ་ཤེས་དགོས་ཕྱིར། ཐམས་ཅད་ལ་མདུན་དུ་བཤམས་ཕྱིན་
ཆད་དཀྱིལ་འཁོར་ཡིན་པར་མི་བསམ་མོ། །བསྡུ་ཆོག་གི་སྐབས་རྣམས་ལ་ཡང་། མདུན་བསྐྱེད་དཀྱིལ་འཁོར་གྱི་ཡེ་ཤེས་པ་རང་བཞིན་གྱི་གནས་སུ་གཤེགས་ཤིང་དམ་ཚིག་པ་བདག་བསྐྱེད་ཀྱི་ཐུགས་སྲོག་ས་བོན་ལ་བསྡུ། བདག་བསྐྱེད་ལ་ནི་ཡེ་ཤེས་པ་ནམ་ཡང་གཤེགས་མི་རུང་ཞིང་། ནམ་རྣལ་འབྱོར་པ་རང་ཉིད་འཆི་བའི་དུས་ལ་བབས་ཚེ་འཕོ་བ་སྤར་བ་དེ་བདག་བསྐྱེད་ཀྱི་ཡེ་ཤེས་པ་གཤེགས་གསོལ་ཡིན། གཞན་ནམ་དུའང་དམ་ཡེ་དབྱེར་མེད་རྫོགས་རིམ་ལ་བསྡུ་བ་དེ་རེ་ཞིག་རྟག་མཐའ་གསལ་ཞིང་སྤྲོས་པ་ཉེ་བར་ཞི་ཕྱིར་བསྡུ་ཚུལ་བསྟན་པ་ཙམ་ལས། སླར་ལྷའི་ངོ་བོར་རྒྱུན་དུ་ངེས་ཤེས་དང་མ་ལྡན་ན་སྒོ་གསུམ་ཐ་མལ་དུ་ཞེན་པས་ནི་གསང་སྔགས་དབང་བཞི་བསྐྱེད་རྫོགས་ཐམས་ཅད་ཀྱི་དམ་ཚིག་ལས་འདས་པར་གྱུར་པས་ན། སྒོ་གསུམ་དཀྱིལ་འཁོར་གསུམ་གྱི་འདུ་ཤེས་དང་ལྡན་དགོས་སོ། །ཡེ་ཤེས་པ་རང་བཞིན་གྱི་གནས་སུ་གཤེགས་ཞེས་པ་འདི་ནི་གོ་མཁན་དཀོན་ཏེ། རང་བཞིན་གྱི་གནས་ཞེས་པ་ནི་གོང་དུ་རྒྱུའི་ཧེ་རུ་ཀའི་འཕྲོས་ལས་བཤད་པ་བཞིན། སེམས་ཉིད་ཀ་དག་ཆོས་ཀྱི་དབྱིངས་དེ་འཁོར་འདས་ཐམས་ཅད་ཀྱི་འབྱུང་ཁུངས་ཡིན་ཕྱིར། དང་པོ་ཡང་དེ་ནས་
བྱུང་བས། མཐར་གཤེགས་བསྡུ་བྱེད་པ་ཡང་དེ་ཀ་མ་གཏོགས། རང་བཞིན་གནས་ཞེས་པའི་ཡུལ་ཞིག་ག་ཤེད་ན་མངོན་སུམ་ཨ་འཐས་སུ་ཡོད་པ་མ་ཡིན་པ་ཡང་གོ་བར་བྱའོ། །སྔགས་དྲུག་ཕྱག་དྲུག་སྐབས་དོན་གྱི་དྲི་བ་ལེན་དུ་བརྗོད་པ་ནི། གཏོར་མཆོད་མདོས་གླུད་ལ་སོགས་བྱིན་གྱིས་བརླབ་པར་བྱ་བ་ལ། བསྐྱེད་པའི་ལྷ་དྲུག །བཟླ་བའི་སྔགས་དྲུག །ས་བོན་གྱི་ཡིག་འབྲུ་དྲུག །བཅའ་བའི་ཕྱག་རྒྱ་དྲུག །བྱིན་རླབས་ཀྱི་ཡོན་ཏན་དྲུག་དང་བཅས་པ་ཡོད་དེ་རིམ་པ་བཞིན། སྦྱང་བའི་ལྷ་ཤཱཀྱ་ཐུབ་པ། བཟླ་བའི་སྔགས། ཨོཾ་སྭ་བྷ་ཝ་ཤུདྡྷསརྦ་དྷརཿསྭ་བྷ་ཝ་ཤུདྡྷོཉཧཾ། བཅའ་བའི་ཕྱག་རྒྱ་ནི། ཆོས་དབྱིངས་སྟོང་པ་ཉིད་མཚོན་པའི་བརྡར། ཐལ་མོ་ཁོང་སྟོང་དུ་སྦྱར་བའི་ནང་ནས་ས་བོན་གྱི་ཡིག་འབྲུ་ནི་ཡི་གེ་དཀར་པོ་ཞིག་ལས་འོད་འཕྲོས་ནས་གཏོར་རྫས་རྣམས་ལ་ཕོག་པས། བྱིན་རླབས་ཀྱི་ཕན་ཡོན་ནི། འབག་བཙོག་ར་རི་ཉེས་སྐྱོན་སེར་སྣ་སོགས་མ་དག་པའི་སྐྱོན་མཐའ་དག་སྦྱང་ཞིང་རྣམ་པར་དག་པར་བྱེད་པའོ། །སྤེལ་བའི་ལྷ་རྣམ་པར་སྣང་མཛད། སྔགས་ནམ་མཁའ་མཛོད་ཀྱི་སྔགས་ཞེས། ན་མསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷསརྦ་ཐཱ་ཁཾ་ཨུཏཱ་ཏེ་སྤ་ར་ཎ་ཨི་མཾ་
ག་ག་ན་ཁཾ་སྭཱ་ཧཱ། ཕྱག་རྒྱ་ནི་དཔྲལ་བར་མཛོད་སྤུའི་ཐད་དུ་ལག་པའི་རྟིང་པ་སྤྱད་ཅིང་གུང་མོ་གཉིས་དང་སྲིན་ལག་གཉིས་པོ་སོ་སོར་སྤྱད་ནས་ཚིགས་པ་དབུས་བཅག །མཐེབ་མཛུབ་གཞན་ཐམས་ཅད་བསྒྲེང་བ་ནི་རིན་པོ་ཆེའི་སྒྲོམ་བུའི་ཕྱག་རྒྱ་སྟེ། ས་བོན་གྱི་སྒྲོམ་བུའི་ནང་དེར་ཡི་གེ་ཁཾ་སྔོན་པོ་ལས་འོད་འཕྲོས་པས། བྱིན་རླབས་ནི། གཏོར་མཆོད་ཐམས་ཅད་འདོད་ཡོན་ནམ་མཁའི་མཛོད་བཞིན་ཟད་པ་མེད་ཅིང་རྒྱུན་མི་འཆད་པར་སྤེལ་བའོ། །བསྒྱུར་བའི་ལྷ་བདུད་རྩི་འཁྱིལ་པའི་སྔགས་ནི། བདུད་རྩི་ཐབས་སྦྱོར་ཞེས། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཕྱག་རྒྱ་ནི། མགྲིན་པར་ཐལ་མོ་ཁ་བྱེ་བ་པདྨའི་དབྱིབས་ལྟ་བུའི་དབུས་སུ། ས་བོན་ནི་ཧྲིདམར་པོ་ལས་འོད་འཕྲོས་པས། བྱིན་རླབས་ནི། གཏོར་རྫས་དེ་དག་ཐམས་ཅད་དངོས་པོ་གཅིག་ཙམ་མ་ཡིན་པར། གཟུགས་སྒྲ་དྲི་རོ་རེག་བྱ་དཀར་མངར་ཤ་ཁྲག་ལ་སོགས་མགྲོན་སོ་སོར་རང་རང་ཅི་འདོད་པའི་དངོས་པོར་བསྒྱུར་བའོ། །ཐོབ་པའི་ལྷ་རིན་ཆེན་འབྱུང་ལྡན། སྔགས་ནི་རྒྱ་ཆེན་ཤུགས་ལྡན་འོད་ཀྱི་གཟུངས་ཞེས། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ། ཕྱག་རྒྱ་ནི།
གཡོན་མཛུབ་མོ་ཐུགས་ཀར་བསྒྲེང་ཞིང་། གཡས་མཆོག་སྦྱིན་ཐུར་དུ་བརྐྱངས་བའི་རྩེ་མོར། ས་བོན་ཧཱུྃ་སེར་ལས་འོད་འཕྲོས་པས། བྱིན་རླབས་ནི། མགྲོན་སོ་སོའི་ལས་སྒྲིབ་ཀྱིས་མ་བསྔོས་ན་མི་འཐོབ་པའམ། དབང་ཆེ་བ་དག་གིས་ཀྱང་ཁས་ཉན་དབང་ཆུང་རྣམས་ཀྱིས་མི་འཐོབ་པ་ཡོད་པས། ཆེ་ཆུང་ཐམས་ཅད་ལ་ཉེ་རིང་ཕམ་རྒྱལ་འཐབ་རྩོད་སོགས་མེད་པར་ཀུན་སྙོམས་ཆེན་པོར་ཐོབ་ཕར་བྱེད་པའོ། །ཚིམ་པའི་ལྷ་དོན་ཡོད་གྲུབ་པ། སྔགས་ནི་ཡེ་ཤེས་སྐར་མདའི་གཟུངས་ཏེ། ཨོཾ་ཛྙཱ་ན་ཨ་བ་ལོ་ཀི་ཏེ་ས་མནྟ་སྤ་ར་ཎ་རསྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུཾ། ཕྱག་རྒྱ་ནི། གཡོན་ཐལ་མོ་གྱེན་དུ་ཁ་བཟེད་པ་ལྟ་བུའི་སྟེང་ན། གཡས་ཁུ་ཚུར་ཁ་སྦུབ་མཐེ་བོང་བསྒྲེངས་ཤིང་མཛུབ་མོ་གཅིག་རྒྱབ་གཅིག་བསྐོར་བ་ནི་དྲིལ་བུའི་ཕྱག་རྒྱར་གྲགས་པ་བྱས་པའི་ནང་དུ་ས་བོན་ཧཱ་ལྗང་གུ་ལས་འོད་འཕྲོས་པས། བྱིན་རླབས་ནི། མགྲོན་རྣམས་ཀྱི་རེ་བ་ཡིད་བཞིན་དུ་སྐོངས་ཤིང་ཚིམས་ནས་འདོད་པ་རྫོགས་པར་བྱེད་པའོ། །དབང་དུ་བྱེད་པའི་ལྷ་ཕྱག་ན་རྡོ་རྗེ། སྔགས་ནི་དབང་བསྒྱུར་མཆོག་གི་གཟུངས་ཏེ། ནུ་མས་མནྟ་བུདྡྷཱ་ནཾ་གྲ་ཧེ་ཤྭ་རི་པྲ་བྷ་ཏེ་ཛོ་བ་ཏི་ནི་མ་ཧཱ་ས་མ་ཡ་སྭཱ་
ཧཱ། ཕྱག་རྒྱ་ནི། སོར་མོ་རྒྱབ་སྤྲད་པ་གཅིག་ལ་གཅིག་འཁྱུད་མཐེ་བོང་རང་རང་གི་ལག་མཐིལ་དུ་བཀུག་པ་ལ་དབང་བསྒྱུར་འཁོར་ལོའི་ཕྱག་རྒྱ་ཟེར་བ་དེའི་མཐིལ་དུ། ས་བོན་ཛདམར་པོ་ལས་འོད་འཕྲོས་པས། བྱིན་རླབས་ནི། མགྲོན་རིགས་མཆོག་དམན་མཐའ་དག་བདག་གི་དབང་དུ་འདུས་ནས་ཇི་ལྟར་བཀའ་བསྒོ་ཞིང་ཕྲིན་ལས་བཅོལ་བ་ཐམས་ཅད་ཐོག་པ་མེད་པར་བསྒྲུབ་པར་འགྱུར་བར་བསམ་པའོ། །དེ་ལྟར་ལྷ་དྲུག་པོ་རྣམས་རང་ཉིད་སྤྱན་རས་གཟིགས་སྐད་ཅིག་སྐད་ཅིག་ལ་དེ་དང་དེར་གནས་འགྱུར་བར་བསྒོམ་པ་སྟེ། ལྷ་ཐམས་ཅད་དོན་ལ་ཐ་མི་དད་ཀྱང་གང་ལ་གང་འདུལ་དུ་སྤྲུལ་པས་ཤེས་པར་བྱའོ། །བཟླས་པ་བྱེད་པའི་བར་མཚམས་སུ་གཞན་ལ་གཏམ་བྱ་དགོས་བྱུང་ན་སྣ་ཕུག་ཏུ་ཕུས་འདེབས་པ་ནི་སྔགས་ཀྱི་ནུས་པ་མི་ཉམས་པའི་ཕྱིར་ལ་བསམ་པ་སྟེ། འདི་ཙམ་དུ་མ་ཟད་སྤྱིར་ཡང་སྒོ་གསུམ་དཀྱིལ་འཁོར་གསུམ་དང་མི་འབྲལ་བའི་རྣལ་འབྱོར་དམ་པ་དག་ལ་ནི་ནུས་པ་ཉམས་མི་ཉམས་སོགས་ཀྱི་སྐྱོན་ཡོད་ལས་འདས་མོད། དེ་ལས་གཞན་པའི་གང་ཟག་དཀྱུས་མ་རྣམས་ལ་ནི་སྔགས་ཀྱི་དམ་ཚིག་རྣམས་ཚུལ་བཞིན་ངོ་ཤེས་མཁན་ཡང་དཀོན་ལ། ཤེས་ཀྱང་སྤང་
བླང་ཇི་ལྟར་བྱེད་རང་དབང་འདུ་བ་ཡང་དཀའ་མོད་ཀྱི། གཞུང་ནས་གང་གསུངས་བྱེད་པའི་ཚེ་ན་སྔགས་ཀྱི་ནུས་པ་ཉམས་པར་འགྱུར་བའི་སྤང་བྱ་ལ། རྫུན་དང་ཕྲ་མ་ངག་འཁྱལ་ཚིག་རྩུབ་སྟེ༔ ངག་གི་ཉེས་པ་རྣམ་བཞི་དང་། ཁྱད་པར་བླ་མ་དཀོན་མཆོག་གསུམ་ལ་སྐུར་པ་འདེབས་པ། གྲུབ་མཐའ་ཆོས་ལུགས་ཐ་དད་ལ་ཆགས་སྡང་ཀུན་སློང་གི་ངག་སྒྲིབ་བསགས་པ་རྣམས་སྐྱོན་ཆེ་ཞིང་གསུང་གི་དམ་ཚིག་ཉམས་པའི་རྩ་བ་ཡིན་ཀྱང་དེང་སང་གསུང་མཁན་མི་རྙེད་དོ། །གཞན་གང་སྔགས་ཀྱི་ནུས་པ་ཟས་ལོག་གིས་འཕྲོག་པ་ཞེས། བྱིན་བརླབས་མ་བྱས་པའི་ཤ་ཆང་མདོ་སྔགས་གཉིས་ཀའི་དམ་ཚིག་ལས་འགལ་བ་དང་། སེམས་ཅན་གྱི་ལྕེ་ཟོས་པས་སྔགས་ཀྱི་ནུས་པ་གཏན་རླག་ཏུ་འགྱུར་བ་དང་། ལན་ཚྭའི་རིགས་ཐམས་ཅད་ཧ་ཅང་མང་བས་ཀྱང་ནུས་པ་ཆུང་དུ་འགྲོ་བར་བཤད། སྒོག་པས་ཞག་བདུན་གྱི་བར་དུ་ནུས་པ་ཉམས་པར་བྱེད། བཙོང་གི་རིགས་དམར་པྲ་དང་། རི་སྒོག་གི་རིགས་ཐམས་ཅད་ཀྱིས་ཞག་བཅུ། ལ་ཕུག་གིས་ཞག་བཅུ། ཟྭ་ཚོད་ཀྱིས་ཞག་བཅོ་ལྔའི་བར་དུ་སྔགས་ཀྱི་ནུས་པ་ཉམས་པར་གསུངས་ཤིང་། ཕ་དམ་པའི་གདམས་ངག་རྟེན་འབྲེལ་བརྒྱ་རྩ་སོགས་ནས་ལྕེ་མ་གཏོགས་པའི་
ཟས་ལོག་སོ་སོའི་གཉེན་པོར་དབྱངས་གསལ་གྱི་སྔགས་ཐ་དད་པ་རེ་རེ་བཟླ་ཚུལ་སོགས་ཡོད་ཀྱང་། དགོངས་འདུས་ཀྱི་བཟླས་བརྗོད་ནུས་པ་སྟོབས་འབྱིན་གྱིས་ནི་དེ་ཐམས་ཅད་སྤྱིར་དྲིལ་བའི་གཉེན་པོ་ཡིན་པས་ཅིས་ཀྱང་གལ་ཆེ་བར་གསུངས་སོ། །གཞན་ཡང་སྔགས་བཟླས་པས་མཆིལ་མ་གཞན་གྱི་འགོང་སར་བོར་བ་དང་། མཚོན་ཆའི་རིགས་ཀྱི་རྩེ་མོ་ཁ་ནང་དུ་བཅུག་པ་དང་། དམ་ཉམས་ཀྱི་རིགས་དང་ཁ་བསྡོང་བ་སོགས་འཛེམ་ཆ་མང་དུ་གསུངས་ནའང་། དེང་སང་ནི་སྤྱིར་ཡང་དེ་ཐམས་ཅད་བསྲུང་ཐུབ་པ་དཀའ་ལ། ཁྱད་པར་དམ་ཉམས་མིན་པའི་གང་ཟག་དཀོན་པའི་གཤིས་ཀྱིས་དཀའ་ལས་ཆེ་བར་སྣང་ཚེ། ཡིག་བརྒྱ་དང་དབྱངས་གསལ་རྟེན་འབྲེལ་སྙིང་པོ་སོགས་ལ་བློ་གཏད་པ་ལས་གཞན་པའི་ཐབས་མ་མཆིས། མེད་དོ། །ཇི་སྐད་དུ། རྗེ་བཙུན་ས་སྐྱ་པཎྜི་ཏའི་ཞལ་ནས། དེས་ན་འདུལ་བའི་བསྟན་པ་ནི། །གཟུགས་བརྙན་ཙམ་ཞིག་དེང་སང་སྣང་། །འབྲས་བུ་གསང་སྔགས་བསྟན་པ་ནི། །གཟུགས་བརྙན་ཙམ་ཡང་མི་སྣང་ངོ། །ཞེས་གསུངས་པ་ཐུགས་བདེན་པར་བྱེད་དོ། །དེས་ན་དེང་སང་གི་བསྐལ་དུས་ཀྱི་དབང་གིས་གསང་སྔགས་སྤྱི་མཐུན་གྱི་དམ་
ཚིག་བསྲུང་བྱའི་ལབ་བརྗོད་ཇི་བཞིན་པ་བཏང་ཡང་དགོས་མེད་དུ་འགྱུར་བར་གདའ་བས་ན། དེ་བས་ཀྱང་ཐེག་པ་དང་རྒྱུད་སྡེ་གོང་མ་ལྟར་གཟུགས་སུ་སྣང་བ་ཐམས་ཅད་ཡི་དམ་གྱི་ལྷ། སྒྲ་རུ་གྲག་ཚད་ཐམས་ཅད་སྔགས་སྒྲ། དྲན་རྟོག་གི་འཆར་སྒོ་ཐམས་ཅད་ཆོས་ཉིད་ཡེ་ཤེས་ཀྱི་རོལ་པ་འབའ་ཞིག་ཡིན་པར་མོས་པའི་འཁྱེར་སོ་ལ་བློ་ཐག་གཅོད་པ་ཐམས་ཅད་མཆོག་ཏུ་གལ་ཆེ་བར་གདའ་འོ། །ཐུགས་དམ་ངེས་དོན་གྱི་དོན་ཆ་ལྟར། མི་ཚེ་སྤྲིན་བར་གྱི་ཉི་མ་ཙམ་འདི་ལ་ལྟོ་གོས་མ་འདང་གི་དོགས་པས། རྩོལ་སྒྲུབ་ཀྱི་ངང་ལ་ཤི་བ་སླེབས་པ་ཟློམིག་གིས་མཐོང་བཞིན་ད་དུང་རང་ལ་འདི་འདྲ་འོང་སྙམ་པ་ཡིད་ལ་མི་དྲན་པར་འཇིག་རྟེན་གྱི་ཤོམ་ར་མང་པོ་བྱེད་པའི་བཙུན་པ་འདི་ཚོ་ལ་བལྟས་ནས། རང་གིས་རང་ལ་དྲན་བསྐུལ་བྱེད་དགོས་པ་དང་། ཆོས་དང་ཡོན་ཏན་ཤེས་ཤེས་མང་ཡང་ཤི་དུས་དགོས་ངེས་ཀྱི་སྒོམ་ཞིག་མེད་ན་གཞན་གང་གིས་ཀྱང་འཆི་ཁར་མི་ཕན་པའི་ཚུལ་ལ་བསམ་བློ་ཐེངས་པ་དགའ་རབ་ཡིན། །དེས་ན། མཁའ་ཁྱབ་ཀྱི་མ་རྒན་སེམས་ཅན་ཐམས་ཅད་བྱང་ཆུབ་ལ་འགོད་ཕྱིར་བདག་གི་དགེ་སྦྱོར་བྱའོ་སྙམ་པའི་སེམས་བསྐྱེད་ཀྱི་ངང་ནས། བླ་མའི་རྣལ་འབྱོར་བསྒོམ་ཞིང་གསོལ་བ་
བཏབ་སྟེ། ༈ རང་སེམས་རང་ངོ་ཤེས་པར་བྱིན་གྱིས་རློབས། །བློ་རྒྱུད་ཆོས་དང་འདྲེས་པར་བྱིན་གྱིས་རློབས། །རང་རིག་ཆོས་སྐུར་རྟོག་པར་བྱིན་གྱིས་རློབས། །ཚེ་གཅིག་སངས་རྒྱས་ཐོབ་པར་བྱིན་གྱིས་རློབས། །སྙམ་པ་ཞེ་ཐག་པ་ནས་མོས་གུས་གདུང་ཤུགས་བསྐྱེད་ལ་གསོལ་བ་བཏབ་པས། བླ་མའི་གནས་གསུམ་ནས་འོད་ཟེར་སྣ་ཚོགས་འཕྲོས་པ་རང་གི་གནས་གསུམ་དུ་ཐིམ་པས། །སྒོ་གསུམ་གྱི་སྒྲིབ་པ་དག་པར་བྱེད་པ་དེ་ལ་ཐག་བཅད། དེའི་ངང་ནས་འགྱུ་བ་གང་བྱུང་ཡང་འཕྲལ་བརླག་འགྲོ། གང་ཡང་མི་ཚོར་བའི་ནག་ཐོམ་བྱུང་ན་བླ་མ་དྲན་པའམ། དེར་མ་ཟད་ནག་ཐོམ་དེའི་ངང་ལ་མི་བཞག་པར། ཁ་འདོན་བཟླས་བརྗོད་ལྟ་བུའམ། ལག་ལས་སམ། འགྲོ་འདུག་ལྟ་བུ་བྱས་ཏེ། མདོར་ན་ནག་ཐོམ་དེ་ལ་མ་ཤོར་བར་བྱ། གཞན་རྣམ་རྟོག་འགྱུ་བ་མང་བ་སྐྱོན་མེད་དེ། གང་འགྱུ་འགྱུ་དེ་ངོས་ཟིན་པར་བྱ་ཞིང་། འགྱུ་བ་འཕྲོ་མ་མཐུད་པ་ཞིག་ལ་བསླབ། གལ་ཏེ་ཞེ་སྡང་དྲག་པོའམ། ན་ཚ་ཟུག་གཟེར། སྡུག་བསྔལ་ཆེན་པོའི་རྣམ་རྟོག་རགས་པོ་ཚབས་ཆེན་རྣམས་ལ་ནི། ཐབས་གཞན་མི་བསྒོམ་པར། རྣམ་རྟོག་ཚབས་ཆེན་དེ་ཀའི་ཚོར་བ་མ་བདེ་ཀར་
རེ་དེ་རང་ལ་རིག་པ་གཏད་ནས། མ་བདེ་བ་དེ་དང་རིག་པ་རྗེན་པ་གཉིས་ངོ་བོ་གཅིག་ལས་མེད་པས། དེ་ཀ་ཧྲིག་གེ་བའི་ངང་ལ་བཞག་པས་ཞེ་སྡང་ལྟ་བུ་ལ་ནི་ཡུན་གཅིག་སོང་བ་དང་། འཁྱགས་པ་ཆུར་ཞུ་བ་ལྟར་འགྲོ། དེ་ལྟ་བུ་ཉོན་མོངས་ཐམས་ཅད་ལ་འདྲ། མདོར་ན། དུས་རྒྱུན་དུ་བྱ་བྱེད་དང་རྐྱེན་གཞན་མེད་དུས་ལ་ནི་ཧ་ཅང་སྒྲིམ་མི་དགོས་པས་རང་བབ་ལྷོད་དེ། གུ་ཡངས་སང་ངེ་བའི་ངང་ལ་བཞག་པ་ཁོ་ནས་ཆོག་ལ། ལག་ལས་དང་། མི་མང་ཁྲོད་དང་། འགྲོ་འདུག་ཟ་འཐུང་སོགས་ཀྱི་སྐབས་སུ་ནི་ཅུང་ཟད་རིག་པ་ངར་ཆེ་ཙམ། གསལ་ཧྲིག་ཙམ་དུ་མ་བཏང་ན་ཚོད་མི་ཟིན་པར་དྲན་རིག་ཤུགས་ཆེ་ཙམ་བྱེད་དགོས། ཉལ་བའི་ཚེ་ཡང་རྟོག་པ་རྒྱ་ཡན་མི་བཏང་བར་དྲན་རིག་ཟིན་རུང་ལ་གཉིད་དུ་འགྲོ་བ་ཞིག་རྒྱུན་དུ་བསླབ་པར་བྱའོ།། ༈ སྲུང་འཁོར་ལས་འཕྲོས་པའི་དྲི་བ་དེ་ཚོ་ཁག་ཆེ་ས་ཡིན་སྣང་བས་གལ་ཆེན་དུ་བརྗོད་པ་ནི། སྤྱིར་སྔགས་ནས་བཤད་པ་ལྟར། དམིགས་པའི་སྤྲོ་བསྡུ་རྣམས་སྐད་ཅིག་རེ་རེ་ལ་རྣམ་པར་འགྱུར་བ་མཐའ་ཡས་པར་བསྒྱུར་དགོས་ཏེ། ཏིང་ངེ་འཛིན་གྱི་སྒོ་རབ་འབྱམས་མཐའ་ཡས་ཞེས་བྱ་བ་ཉིད་ཡིན་པས་ན། དམིགས་པ་གཅིག་
བསྒོམས་ཚར་ནས་གཞན་བསྒོམ་ཐམས་མེད་པ་ལྟ་བུ་མ་ཡིན་ཞིང་། ཐམས་ཅད་སེམས་ཀྱི་རྣམ་རོལ་ཡིན་པ་ལ་འདི་དང་འདི་མི་འཕྲུག་པར་འདུག་སྙམ་པ་ལྟ་བུའི་གུ་དོག་བྱར་མི་རུང་བ་ནི་སྤྱིའི་གནད་ཆེ་ཤོས་ཡིན་ནོ། །བྱེ་བྲག་ཏུ། གསང་སྔགས་རྒྱུད་སྡེའི་རིམ་པ་སོ་སོ་ལ་བསྐྱེད་རྫོགས་བསྒོམ་ཚུལ་གྱི་རིམ་པ་ཡང་ཐ་དད་ཡོད་མོད་ཀྱང་། རྙིང་ལུགས་ཀྱི་གཙོ་ཆེ་བ་བཀའ་བརྒྱུད་དགོངས་འདུས་གཉིས་ཀྱང་མ་ཧཱ་ཨ་ནུ་སོ་སོའི་ཁྱད་ཀྱི་རྒྱ་ཆེ་བ་བསྐྱེད་རིམ་གཙོར་སྟོན་པ་གཏེར་ཁ་སོ་སོའི་བཀའ་བརྒྱད་ཕུར་པ་སོགས་དང་། ཟབ་པ་རྫོགས་རིམ་གཙོར་སྟོན་པ་དགོངས་འདུས་སོགས་བསྒོམ་ཚུལ་མི་འདྲ་བ་སྣ་ཚོགས་ཡོད་མོད་ཀྱིས། སྐབས་འདིའི་བརྗོད་བྱ་དགོངས་འདུས་ཉིད་ཀྱི་དཀྱིལ་ཆོག་གི་དབང་དུ་བགྱིས་པའི་གོ་དོན་ལ། ཐོག་མར་སྐྱབས་སེམས་ཡན་ལག་བདུན་སོགས་ལ་ནི་རང་ཉིད་ཐ་མལ་པའི་ཚུལ་དང་། དེ་ནས་སྔོན་གཏོར་གཞི་བདག་གསེར་སྐྱེམས་སྐབས་སུ། རང་ཉིད་ཁ་སར་པཱ་ཎི་དང་། །བགེགས་གཏོར་སྐབས་སུ་དེ་རྟ་མགྲིན་དུ་བསྒྱུར་བ་སོགས་ནི་གོ་སླ་ཞིང་། དེ་ནས་སྲུང་འཁོར་མཚམས་གཅོད་སོགས་ལ་བབ་ཚེ། རང་གི་རིག་པའི་ངོ་བོ་ནི་སྐད་ཅིག་གི་དྲན་རྫོགས་ཀྱིས་
རྒྱུའི་ཧེ་རུ་ཀར་གསལ་ཏེ། དེ་ཡང་སྐུའི་ཁྱོན་ཆུང་ངུ་མ་ཡིན་པར་ནམ་མཁས་གར་ཁྱབ་ཀྱིས་འཇིག་རྟེན་ཁམས་མ་ལུས་ཁྱབ་པ། དག་དང་མ་དག་པའི་ཞིང་མཐའ་དག་དེ་ཉིད་ཀྱི་སྐུའི་ཁོག་པའི་ནང་ཆུད་པ་ལ། གདོས་བཅས་ཀྱི་སྐུ་མ་ཡིན་པའི་ཕྱིར་ཕྱི་ནང་ཐམས་ཅད་ཟང་ཐལ་སྒྲིབ་གཡོགས་མེད་པ་གཅིག་ཏུ་བསམ། དེ་ནས་བདག་གི་རྒྱུའི་ཧེ་རུ་ཀའི་ཐུགས་ཀར། ཞེས་་་སོགས་བརྒྱུད་པ་དང་མཐུན་པར་པད་ཉིའི་གདན་གྱི་སྟེང་དུ་སྣ་ཚོགས་རྡོ་རྗེའི་ལྟེ་བར་ཧཱུྃ་དམར་པོས་མཚན་པ་དེ་ནི་ཐུགས་སྲོག་གི་ས་བོན་ཡིན། ཧཱུྃ་ལས་འོད་འཕྲོས་པས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་ས་གཞི་དང་གུར་དུ་བྱིན་གྱིས་བརླབ་ཅིང་། མཚོན་ཆ་མེ་དཔུང་གི་སྲུང་གུར་དུ་བསྐྱེད་པ་ཡིན་ནོ། །ལས་བྱང་དུ། ས་བོན་ཧཱུཾ་ལས་སྣ་ཚོགས་རྡོ་རྗེ་འཕྲོས།། ཞེས་པ་ཡང་འདི་ཡིན། སྲུང་གུར་རྒྱ་ཆེན་པོ་དེའི་ནང་དུ་ཐུགས་སྲོག་ཧཱུྃ་ལས་ཧཱུཾ་སེར་གཅིག་འཕྲོས་པ་དེ་གནས་གྱུར་ཏེ་འཁོར་ལོ་སེར་པོ་རྩིབས་བཅུ་པར་གྱུར་པ་སྟེ། རྩིབས་བཅུ་ཞེས་པ་དེ་ཡང་ཕྱོགས་མཚམས་ལ་རྩིབས་བརྒྱད་དང་། སྟེང་འོག་གཉིས་སུ་རྩིབས་རི་རེ་སྟེ་དེ་གཉིས་ནི་དཔེར་ན་མ་ཎིའི་འཁོར་ལོའི་ལྕགས་ཀྱི་སྲོག་ཤིང་གི་སྐལ་པ་ལྟ་བུ་དང་། འཁོར་ལོའི་
རྩིབས་རྣམས་ཀྱང་ལེབ་མོ་མ་ཡིན་ཏེ་སིལ་སྙན་ཁ་སྦྱར་བ་ལྟ་བུའམ། ཕུབ་གཉིས་ཁ་སྦྱོར་ལྟ་བུ་ནང་ཁོང་སེང་ཡོད་པ་དང་། སྟེང་འོག་གི་རྩིབས་གཉིས་ཀྱང་མདུང་གི་ལྕགས་སྦུབ་ལྟ་བུ་ནང་ཁོང་སྟོང་ཅན་ནོ། །མདོར་ན་སྲུང་འཁོར་གྱི་འཁོར་ལོ་ནི་ཕུབ་ཁ་སྦྱོར་ལྟ་བུ་ནང་ཁོང་སྟོང་ཅན་འདི་མ་ཤེས་ན། འཁོར་ལོ་ལེབ་མོར་བྱས་ན་ནང་དུ་ལྷ་བཞུགས་མི་འབྱུང་ཞིང་། སྟེང་འོག་གི་རྩིབས་གཉིས་པོ་མེད་ན་ཧཱུཾ་ཀར་སྟོབས་ཆེན་གཉིས་པོ་བཞུགས་ཐབས་མི་འབྱུང་ཕྱིར། །དེས་ན་ཕྱི་འཁོར་ལོའི་དབྱིབས་ཡིན་པ་ལ་ནང་ཐམས་ཅད་ཁོང་སྟོང་གི་རྣམ་པ་ཡིན་ནོ། །འཁོར་ལོའི་རྒྱ་ཁྱོན་ནི་ཤིན་ཏུ་ཆེ་བ་འཇིག་རྟེན་གྱི་ཁམས་དང་མཉམ་པར་མོས་ལ། ཁོང་སྟོང་གི་ནང་དེར་དབུས་དང་རྩིབས་བཅུ་སོ་སོའི་ནང་གི་དཀྱིལ་དུ་ཉི་མའི་གདན་རེ་རེ་ལ། རྒྱུའི་ཧེ་རུ་ཀའི་ཐུགས་སྲོག་ཧཱུྃ་ལས་འཕྲོས་པའི་བྷཾ་དང་ཧཱུྃ་བཅུ་རྣམས་གནས་འགྱུར་བ་ལས་འཁོར་ལོའི་བསྒྱུར་བ་དང་ཁྲོ་བོ་བཅུ་རྣམས་བསྐྱེད་ཅིང་། ཡེ་ཤེས་པ་སྤྱན་དྲངས་ཤིང་་བསྟིམ་པ་དང་། དབང་བསྐུར་རྒྱས་གདབ་སོགས་གཞུང་ཚིག་དང་མཐུན་པར་བསྐྱེད་དོ། །འདི་སྐབས་སུ། སྒྲུབ་པ་པོ་རང་ཉིད་ཀྱིས་སྲུང་སྐྱོབ་བྱ་དགོས་པའི་རིགས་ཀྱི་སྦྱིན་བདག་
སོགས་བསྲུང་བྱ་ཡོད་ན་དེ་ཐམས་ཅད་སྲུང་གུར་གྱི་ནང་ཁོངས་སུ་ཆུད་ནས་ཡོད་པར་བསམ་པ་དང་། ལུས་ཐམས་ཅད་རྡོ་རྗེའི་གོ་ཁྲབ་དང་། ཞུབ་ཆེན་ལུགས་སུ་གྱུར་པས། བར་ཆད་ཀྱིས་མི་ཚུགས་པར་བསྒོམ་པར་གསུང་འདུག་མོད་ཀྱིས། བདག་སོགས་ནི་མཁའ་མཉམ་སེམས་ཅན་སྐྱབས་འོག་འཇུག་ཁུལ་མ་གཏོགས་ཕྱི་ནང་གི་དབྱེ་བ་བྱར་མེད་དོ།། ༈ དེ་ལྟར་སྲུང་འཁོར་བསྒོམ་ཚུལ་བསྟན་ནས། ཆོ་ག་དངོས་ཀྱི་སྐབས་ལ་བབ་ཚེ། བདག་བསྐྱེད་ལ་ནི་ཏིང་འཛིན་རྣམ་གསུམ་དང་གཞལ་ཡས་ཁང་བསྐྱེད་པའི་ཚིག་རྣམས་དོན་དང་མཐུན་པར་བྱ་ཞིང་། སྲུང་འཁོར་འཁོར་ལོ་དང་བཅས་པའི་དབུས་སུ་གཙུག་ཏོར་འཁོར་སྒྱུར་གྱི་སྐུ་རབ་ཏུ་ཆེ་བའི་ལྟོ་བའི་ནང་དུ་བདག་མདུན་ཐམས་ཅད་བསྐྱེད་པའི་ཡུལ་ཡིན་ཚེ། དང་པོར་བདག་བསྐྱེད་ལ་ཡང་། ཆོ་ག་གཞུང་བཞིན་སོ་སོར་ནི་རང་གི་རྒྱུད་སྡེའི་རིམ་པ་དང་མཐུན་པའི་བསྒོམ་ཚུལ་ཐ་དད་འབྱུང་མོད་ཀྱིས། ལས་བྱང་མེ་ཏོག་ཕྲེང་མཛེས་འདི་ནི་ལུང་ཨ་ནུ་ཡོ་ག་དང་མཐུན་པར། མ་སྐྱེས་རྫོགས་པའི་ཚུལ་དུ་བསྒོམ་པ་ཞེས་བྱ་བ་ཡིན་ཕྱིར། བློ་འབྱུང་བ་མེ་རླུང་འཁྲུགས་པའི་ཞེས་སོགས་ཀྱི་གཞལ་ཡས་ཁང་བསྐྱེད་པ་དེ་དག་ཀྱང་འབྱུང་འདུས་ཀྱི་ཕུང་པོ་
འདི་བཟོ་དབྱིབས་བསྒྱུར་ནས་གཞལ་ཡས་སུ་བསྒོམ་རྒྱུ་ནི་མ་ཡིན། གཟུགས་ཕུང་ཁོ་རང་ཡེ་ནས་དཀྱིལ་འཁོར་གཞལ་ཡས་སུ་ལྷུན་གྱིས་གྲུབ་པ་ཡིན་པའི་ཡིན་ཚུལ་གསལ་འདེབས་པ་ཡིན་ལ། དེ་བཞིན་དུ་གདན་ཡང་རྣམ་ཤེས་ཚོགས་བརྒྱད་ནི་པདྨ་འདབ་བརྒྱད་དང་། ཐབས་ཤེས་ནི་ཉི་ཟླའི་གདན་ཡིན་པར་ཤེས་རྒྱུ་དང་། སྐབས་འདིར། སྔར་གྱི་རང་རིག་རྒྱུའི་ཧེ་རུ་ཀའི་ཐུགས་སྲོག །དེ་ཉིད་ནམ་མཁའ་ནས་བྱ་བབས་པ་ལྟར་བྱུང་སྟེ། རྣམ་ཤེས་འདབ་བརྒྱད་ཀྱི་གདན་ལ་བབས་པ་དེ་ཉིད་གཙོ་བོ་པདྨ་བཛྲ་ཡབ་ཡུམ་དུ་ལྷུན་གྱིས་གྲུབ་པ་དང་། འཁོར་གྱི་ལྷ་ཚོགས་ཐམས་ཅད་ཀྱང་དེའི་ཉི་མ་དང་འོད་ཟེར་གྱི་ཚུལ་དུ་བཞུགས་པར་ངེས་ཤེས་བསྐྱེད་ཅིང་། རྒྱུའི་ཧེ་རུ་ཀའི་རྣམ་པ་ནི་ཆོས་ཀྱི་དབྱིངས་སུ་འཇའ་སྤྲིན་ནམ་མཁར་ཡལ་བ་བཞིན་ནོ།། ༈ དེ་ལྟར་བདག་བསྐྱེད་ཀྱི་ལས་གཞུང་རྣམས་ཐམས་ཅད་མཐར་ཆགས་སུ་བགྱིས་གྲུབ་པ་དང་། མདུན་བསྐྱེད་ལ་བབ་པ་ན། བདག་བསྐྱེད་སྔགས་ཀྱི་ཐུགས་སྲོག་ཧཱུྃ་དེ་ཉིད་པདྨ་བཛྲ་ལ་ཧྲིདམར་པོ་བསྒྱུར་ཞིང་དེ་ལ་འབྱུང་བ་རིམ་བརྩེགས་ཀྱི་ས་བོན་རྣམས་འཕྲོས་ཏེ། ཨེ་ལས་ནམ་མཁའ་ཡཾ་ལས་རླུང་སོགས་དང་། བྷྲུཾ་ལས་གཞལ་ཡས་
ཁང་སོགས་མངོན་རྟོགས་ཉིད་ཀྱི་ཚིག་དང་མཐུན་པར་མདུན་བསྐྱེད་དཀྱིལ་འཁོར་ལྷར་བཅས་ཀྱང་གཙུག་ཏོར་འཁོར་སྒྱུར་གྱི་ལྟོ་བར་བདག་བསྐྱེད་དང་ཞལ་སྤྲོད་ཀྱི་ཚུལ་དུ་གསལ་ནས་ཆོ་གའི་ལས་རིམ་རྣམས་ཐམས་ཅད་བྱའོ། །མཐར་བསྡུ་ཆོག་སྐབས་ལ་ནམ་བབས་པའི་ཚེ། ཨོ་ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མདུན་བསྐྱེད་ཀྱི་ཡེ་ཤེས་པ་གཤེགས་སུ་གསོལ་ལ། ཕྱི་སྣོད་ནང་བཅུད་ཐམས་ཅད་དང་། སྲུང་བའི་གུར་ཁང་འཁོར་ལོས་སྒྱུར་བ་ལ་ཐིམ། འཁོར་སྒྱུར་ཉིད་གཞལ་ཡས་ཁང་ལ། དེ་ལྷ་ཚོགས་ལ། ལྷ་ཡང་འཁོར་ཐམས་ཅད་གཙོ་བོ་ཡབ་ཡུམ་ལ། ཡུམ་ཡབ་ལ། ཡབ་ཀྱང་ཐུགས་སྲོག་ས་བོན་ལ། ཐུགས་སྲོག་བདག་བསྐྱེད་ཀྱི་ཐུགས་ཀར་བསྡུའོ། །བདག་བསྐྱེད་ཀྱི་རྐྱེན་བཞི་པོ་གསུང་རབ་སྤྱི་བབ་ཀྱིས་རྐྱེན་བཞི་དང་སྒོ་བསྟུན་ནས་བཤད་པ་སྟེ། དེ་ཡང་རྒྱུའི་རྐྱེན་ནི། བདུད་རྩི་སྨན་གྱི་རྒྱུ་དང་ཐམས་ཅད་འཛོམས་ཞིང་གཙང་ལ་དག་ལ། བདག་པོའི་རྐྱེན་ནི་སྟོན་པ་རྡོ་རྗེའི་སློབ་དཔོན་ཡིན་པས། དེའི་དམ་ཚིག་རྒྱུད་སྡེ་རྣམས་ལས་ཇི་ལྟར་གསུངས་བའི་ཡོན་ཏན་ཚང་བ། དམིགས་པའི་རྐྱེན་ནི་བདུད་རྩི་སྨན་དེ་ཉིད་སྒྲུབ་པའི་ཏིང་ངེ་འཛིན་ཚུལ་ལྡན་དང་།
དེ་མ་ཐག་པའི་རྐྱེན་ནི་སྒྲུབ་ལུགས་ཀྱི་ཕྱག་བཞེས་ཆོ་ག་སྦྱོར་དངོས་རྗེས་གསུམ་རྣམ་པར་དག་ཅིང་ངེས་ལ། གཟུ་ལུམ་དང་རས་གཅོད་ཟོལ་ཟོག་གི་མ་བསླད་པར། །གཞུང་དང་མཐུན་པར་སྒྲུབ་པའི་བདུད་རྩི་དགོས་པ་ཉིད་དོ། །དེ་ལྟར་ན་བདུད་རྩི་སྨན་གྱི་སྐབས་དོན་རྒྱུ་དྲུག་རྐྱེན་བཞི་ནི་འདི་དག་ཡིན་ནོ།། ༈ ཨོའབད་ཛྲ་ས་ཏོ་ས་མཱ་ཡ། མ་ནུ་པཱ་ལ་ཡ། འབད་ཛྲ་ས་ཏོ་ཏྭེ་ནོ་པ། ཏིས་སེ་ཋ་ཌི་རྟོ་མེ་བྷ་ཝ། སུ་ཏོས་སེ་ཡོ་མེ་བྷ་ཝ། སུ་པོས་སེ་ཡོ་མེ་བྷ་ཝ། ཨ་ནུ་རག་ཏོ་མེ་བྷ་ཝ། སརྦ་སིད་དྷིམ་མེ་པྲ་ཡད་ཚ། སར་བ་ཀར་མ་སུ་ཙ་མེ། ཙི་ཏང་ཤེ་ཡས། ཀུ་རུ་ཧཱུཾ། ཧ་ཧ་ཧ་ཧ་ཧོ༔ བྷ་ག་ཝཱན། སར་བ་ཏ་ཐཱ་ག་ཏ། འབད་ཛྲ་མཱ་མེ་མུན་ཙ། འབད་ཛཱི་བྷ་ཝ་མ་ཧཱ་ས་མ་ཡ་ས་ཏོ་ཨཱ་ཡིག་བརྒྱའི་འདོན་ཚུལ་འདི་བཞིན་ཡིན་མིན་གྱི་དྲི་བའི་ལན་དུ་བརྗོད་པར་བྱ་སྟེ། བཛྲ་ཞེས་པ་འདི་སྔགས་ཐམས་ཅད་ལ་ཡོད་མོད་ཀྱང་།་འདོན་ལུགས་ལ་ཆོས་རྒྱུད་སོ་སོའི་མིག་སྲོལ་སྟབས་ཀྱིས། ལ་ལས་འབད་ཛྲ་ཟེར་འདུག་སྟེ་འདི་ལ་ད་ཡི་སྒྲ་དེ་དགོས་དོན་མེད་ཕྱིར་འབའ་ཛྲ་ཞེས་བརྗོད། པ་ཏིཥྛ་འདི་ལ་པ་ཏིས་ཋ་ཞེས་པ་མ་གཏོགས་སོའི་སྒྲ་མི་དགོས་ཤིང་འདི་
བཞིན་སུ་ཏོས་ཡོ་དང་། སུ་པོས་ཡོ་དང་བཅས་པ་ཐམས་ཅད་འདྲ་བར་སེ་དེ་མི་དགོས། དྲི་བྷྱོ་ལ་དེང་སང་འདྲི་བའི་སྐབས་སུ་ཡང་ཊཱི་ཞེས་འབྲི་བ་དང་། ཞབས་དྲུང་ལོ་ཆེན་སོགས་ཀྱི་གསུང་སྒྲོས་ལ་ཞིབ་ཆ་ཡང་ཡང་ཞུས་པ་ཡིན་པས། འདི་ནི་འབྲི་བའི་སྐབས་སུ་ཡང་ཌི་མི་བྲི་སྟེ། དྲི་གསལ་བྱེད་ད་ཡི་ཁོངས་སུ་དབྱངས། རི་ཞུགས་པ་ཡིན་པས་ད་ལ་ར་བཏགས་གི་གུ་ཕྱིར་ལོག་ངེས་པར་འབྲི་དགོས་ལ་འདོན་ལུགས་ཀྱང་འདི་རུ། ཞེས་པ་དང་ཕྱོགས་འདྲ་མ་གཏོགས། འདྲི་ཟེར་རྒྱུ་མིན་ཏེ་གསུངས་འདུག་པས། རྗེ་རྣོ་ཞེས་པའི་འདོན་ལུགས་འདི་རི་སྒྲོ་ཞེས་པ་ལྟ་བུ་བྱའོ། །ཙིཏྟཾ་ཤེ་ཡ། ཞེས་པའི་སྐབས་འདིར་ཏའི་ཀླད་ཀོར་འདོན་ཚུལ་དགའ་འདམས་ཡོད་དེ། སྔགས་ཀློག་གཞུང་ལས་རང་རང་སྡེ་པའི་ལྔ་རུ་བཀླག །ཅེས་གསུངས་པ་ལྟར་ན། ཏ་ཐ་ད་དྷ་ན། ཏའི་སྡེ་ཚན་ལྔ་པ་ན་ཡིན་པའི་ཕྱིར་ཙིད་ཏན། ཞེས་པ་ན་རུ་བཀླག་ཀྱང་རུང་ལ། ཡང་། ཤད་ཀྱི་ཆོད་ན་རང་ཉིད་རྩི་ཞེས་པའི་དོན་ཡང་འདི་ཀ་ཡིན་ཞིང་། ཤད་མེད་ན་ནི་འོག་མ་རྩི། ཞེས་པའི་ལུགས་དང་བསྟུན་ནས་ཐེའི་ཤ་དང་བསྟུན་རྒྱུ་ཚེ། དེ་བྱས་ན་ཡ་ར་ལ་ཝ་ཤ་ཥ་ས་ཧ། ཡ་སོགས་བརྒྱད་ལ་ང་རུ་བཀླག །ཅེས་པའི་
ལུགས་ལྟར་བྱས་ན། ཙིད་ཏང་ཞེས་འདོན་པ་ཡིན་པས་དེས་ན་འདི་དང་ན་འདི་དང་དང་ང་གཉིས་གང་མོས་བྱ་ཆོག་པར་རྩིས་མཁན་མང་འདུག་ཀྱང་། སྐད་དོད་གོང་འོག་ཆ་ཤས་འབྲེལ་འབྲེལ་ལ་ཞིབ་ཏུ་བརྟག་ན་ནི། སྲིད་ཏན་ཞེས་ན་རུ་བཀླག་དགོས་མདོག་ཁ་འདུག་གོ །བྱེ་དང་ཤྲཱི་གཉིས་ནི་གང་ཡང་བྲིས་ཡོད་འདུག་པ་སྐད་དོད་ལ་སོང་ན་ཐེ་བྲི་དགོས་པར་སྣང་སྟེ། ཤི་ནི་བོད་སྐད་དུ། དཔལ་ཡིན་ཞིང་། ཐེ་ནི་བདེ་ལེགས་ལ་འཇུག་པ་ཡིན་ཕྱིར་ཡིག་བརྒྱའི་སྐབས་འདིར་ཙིཏྟཾ་ཤེ་ཡཋཀུ་རུ་ཞེས་པ་བདག་གིས་སེམས་ལ་བདེ་ལེགས་སུ་མཛོད་ཅིག །ཅེས་པ་ཡིན་པས་ན། བྲེ་དགོས་པར་གསུངས། ཡཞེས་པ་དང་། ཡཾ་ཞེས་པ་འགའ་འདམ་བྱས་ཆོག་སྟེ། དེ་གཉིས་ཀ་རྣམ་དབྱེའི་བསྒྲུབ་ཚུལ་གྱི་ཁྱད་ཙམ་མ་གཏོགས་འགལ་མེད་དུ་བཤད། བྷ་ག་ཝཱན། ཞེས་པ་ནི་བཅོམ་ལྡན་འདས་ཞེས་པའི་སྐད་དོད་ཡིན་ཏེ། བྷ་ག་ཝ་ཏི་ཞེས་པ་ནི། བཅོམ་ལྡན་འདས་མ་ཞེས་ཏེ་དེའི་ནུས་པས་མའི་སྒྱུ་སྒྲའི་སྒྲར་འགྱུར་བ་སྟེ། འདི་གཉིས་དང་གུ་རུ་དྲག་པོའི་སྔགས་ཀྱི་བྷ་ག་ཝ་ཏེ་དང་། གཞན་ཡང་ཚེ་གཟུངས་སོགས་ཐམས་ཅད་ལ་འདྲ་བར་བྷ་འདི་ལ་འབའ་ཟེར་རྒྱུ་མིན་ཏེ་སྦ་ཟེར་
དགོས་པ་དང་། འདིའི་ག་དེ་ལ་འགའ་ཟེར་མཁན་པོ་སྣང་ཡང་མ་ཡིན་པས། ག་གཅིག་པུ་རང་ཡིན། བུད་མེདཀྱི་མཚན་མའི་སྐད་དོད་བྷ་ག་ཞེས་པ་ཡང་འདི་དང་འདོན་ཚུལ་འདྲ། ལར་གྷ་ཛྷ་ཌྷ་དྷ་བྷ། འདི་ཐམས་ཅད་ལ་འོག་ཏུ་ཧ་ཡོད་པའི་སྒྲ་ཡི་དབང་གིས། ས་སྔ་སྒྲ་སྡ་སྦ། ཞེས་པ་དང་འདྲ་བར་བརྗོད་པ་མ་གཏོགས། འགའ། འཛའ། འདྲ། །འདའ། འབའ། ཞེས་བརྗོད་དུ་མི་རུང་ངོ། །གཞན་ཡིག་བརྒྱའི་འདོན་ལུགས་ཁྱེད་རང་གི་འདི་ཀས་འཐུས་སྣང་ཞིང་། འབད་དྲ་ཞེས་པའི་ད་ཡིག་དེ་མི་དགོས་ཏེ་འབའ་ཛྲ་ཞེས་བརྗོད་པར་བྱའོ། །ཨོཾ་ཨ་ཀཱ་རོ་མུ་ཁཾ། སརྦ་དྷརྨ་ཎཾ། ཨ་དྱ་ནུཏྤནྣ་ཏྭཱཏ། ཨོཾ་ཨཱཿ ཧཱུྃ་ཕཊ་སྭཱ་ཧཱ། འདིའི་འདོན་ལུགས་ལ་དཔེར་ན། ཨོ་ཨ་ཀཱ་རོ་མུ་ཁང་། སརྦ་དྷར་མ་ཎན། །ཨ་དཱས་ནུད་པན་ན་ཏོད་ཅེས་པ་ལྟ་བུར་བརྗོད་ཅིང་། ཨཱརྱ་འདི་ཨཱརྱ་ནོར་མཁན་ཤིན་ཏུ་མང་ཞིང་། ད་ལ་ཡ་བཏགས་པ་དང་། ར་ལ་ཡ་བཏགས་པ་ནོར་བ་ཡན་སྣང་བ་དང་། འདི་གཉིས་ནོར་ན་ནོར་ཚབས་ཤིན་ཏུ་ཆེན་པོར་འགྱུར་བ་སྟེ། ཨ་དས་ནུད་པན་ཞེས་པ། གདོད་ནས་མ་སྐྱེས་པ་ཞེས་པ་ཡིན་ལ། ཨཱརྱ་ནུད་པན་བྱས་ན་འཕགས་པའི་ཕོ་མཚན་ཞེས་པར་
འགྱུར་བས་འཆུག་ཚབས་ཆེའོ།། ༈ གཞན་ཡང་བཛྲ་བི་དྱ་རཱ་ཛཱ་ཡ་ཞེས་རྡོ་རྗེ་རིག་པའི་རྒྱལ་པོ་ཞེས་པ་འདི་ལ་ཡང་། བིརྱ་རཱ་ཛཱ་ཞེས་མཁན་རྣམས་འཆུགས་པ་སྟེ༔ བི་དས་ན་རིག་པའི་སྐད་དོད་ཡིན་ཞིང་། བིརླ་ནི་བརྩོན་འགྲུས་ཀྱི་སྐད་དོད་ཡིན་པས་མི་གཅིག་གོ། ༈ ན་མོ་གུ་རུ། གང་ཞིག་འཆི་བའི་ནད་པ་ལ་གསལ་འདེབས་བྱ་དགོས་པར་གྱུར་པ་ལ། དེ་ཡང་ཕ་རོལ་པོ་དེ་གང་ཟག་རབ་འབྲིང་ཐ་མའི་ཁྱད་པར་ཤེས་དགོས་ཏེ། གང་ཟག་སྐྱེས་ཆེན་དམ་པའམ། ཐུགས་དམ་མངོན་གྱུར་གྱི་རིགས་ལ་ནི་གསལ་འདེབས་བྱ་དགོས་ཀྱང་མི་འབྱུང་ལ། གལ་ཏེ་བྱེད་པའི་ཚེ་ནའང་མཚན་ནས་བོས་ལ། སྐུ་ཉིད་ད་ནི་འབྱུང་བཞི་ཐིམ་རིམ་དང་འོད་གསལ་སྣང་མཆེད་ཐོབ་གསུམ་རྣམས་རིམ་པར་འཆར་བའི་སྐབས་ལ་བབ་འདུག་པས། ཐུགས་དམ་ལས་མ་ཡེངས་བར་མཛད་ནས་འཆི་བ་འོད་གསལ་ཆོས་ཀྱི་སྐུའི་ངང་ལ་འཇོག་པར་ཞུ་ལགས། ཞེས་པ་ཙམ་ལས་མི་དགོས་མོད་ཀྱང་དེང་སང་དེ་ལྟ་བུའི་གང་ཟག་ནི་དཀོན་མོད། ཡང་སོ་སོའི་སྐྱེ་བོ་ཐ་མ་ཆོས་ཀྱི་བག་ཆགས་གཏན་ནས་མེད་པ་དུད་འགྲོ་ལྟ་བུ་དག་ལ་ནི། དམིགས་པའི་རིགས་གང་བསྒོམ་མི་ཤེས་ཚེ་སྔས་
མགོ་ནས་བོས་ལ། ཁྱོད་ཤི་བ་ཡིན་འདུག་གོ །སེམས་གཞན་དུ་མ་ཡེངས་བར། ཇོ་བོ་ཐུགས་རྗེ་ཆེན་པོ་ལ་སྐྱབས་སུ་མཆིའོ། །ཐུགས་རྗེས་གཟིགས་ཤིག་སྙམ་པ་གྱིས་ཤིག །ཅེས་པ་ཙམ་དང་། སངས་རྒྱས་རིན་ཆེན་གཙུག་ཏོར་ཅན་ལ་ཕྱག་འཚལ་ལོ། །ཞེས་པ་ལ་སོགས་སངས་རྒྱས་བྱང་སེམས་ཀྱི་མཚན་དང་གཟུངས་སྔགས་བྱིན་རླབས་ཅན་བསྒྲག་ཅིང་སྨོན་ལམ་གང་མང་འདོན་ནོ། །དེ་ལྟར་གང་ཟག་རབ་ཐ་མ་གཉིས་ལས་གཞན་པའི་བར་པ་སྐྱ་སེར་གང་ཡིན་ཀྱང་དད་མོས་དང་གོ་རྟོགས་ཡོད་ཙམ་གྱི་རིགས་རྣམས་ལ་འཕོ་བ་བྱ་སྟེ། ལུས་གནད་ཙོག་པུའམ། གཞོགས་གཡས་ཕབ་དགོས་པར་བཤད་ཀྱང་། དབུགས་མ་ཆད་པ་ནས་ལུས་བཅོས་ཐུབ་ན་མ་རྟོགས། ཕྱི་དབུགས་ཆད་ནས་ནི་ཕུང་པོ་ལ་བཟོ་བཅོས་ཐུག་རག་ལར་མི་རུང་ངོ། །དེ་ནས་ཉེ་འཁོར་དུ་ངུ་སྐད་སོགས་འཚམས་སྦྱོར་ངན་པའི་རྐྱེན་མེད་ཅིང་། འཇམ་སིམ་མེ་བར་བྱས་ལ། སྔས་མགོའི་ཕྱོགས་ནས་སྐད་ཆེ་ཆུང་མཚམས་ལ་བརྡ་འཇམ་པོས་ཁོ་ཡི་མིང་ཡག་པ་ནས་བོས་ལ་འདི་ལྟར་བརྗོད་དོ། །ད་ནི་ཁྱོད་ལ་འདུས་བྱས་མི་རྟག་འཆི་བའི་དུས་ལ་བབ་པ་ཡིན་འདུག་པས། ཤི་བ་ཡིན་པར་ངོ་ཤེས་པར་གྱིས་ཤིག །ཁྱེད་
རང་ལ་ཚེ་འདིའི་ཡུལ་དང་ཁང་ཁྱིམ་ནོར་རྫས་ཡོ་བྱད་གྲོགས་དང་གཉེན་འཁོར་ལས་དང་བྱ་བྱེད་ཀྱིས་འཕྲོ་སོགས་ཅི་དང་ཅི་ལྟ་བུ་ཡོད་ཀྱང་ཆགས་ཞེན་དང་འཛིན་པ་གཏན་ནས་མ་བྱེད་ཅིག །དེ་དག་ལ་ཞེན་པ་ཡོད་ཀྱང་མི་ཕན་པའི་ཁར། །ཐར་པའི་ལམ་གྱི་གེགས་དང་བར་ཆད་དུ་འགྱུར་བས་བློས་ལིངས་ཀྱིས་ཐོངས་ལ་ཁོ་ཐག་ཆད་ཀྱིས་ཆོད་པར་གྱིས་ཤིག་འདུས་བྱས་ཀྱི་ཆོས་ཐམས་ཅད་མི་རྟག་པའི་རང་བཞིན་ཡིན་པས་སྐྱེས་པའི་མཐའ་མ་ནི་འཆི། འདུས་པ་མཐའ་མ་ནི་འབྲལ། བསགས་པའི་མཐའ་མ་ནི་ཟད་པའི་ཆོས་ཅན། །འཆི་བའི་སྡུག་བསྔལ་ནི་ཁྱོད་ཅིག་པུ་ལ་འབྱུང་བ་མ་ཡིན་ཏེ། སྟོང་འཁོར་ལོས་སྒྱུར་བའི་རྒྱལ་པོ་མན་ཆད་ནས། མདངས་སྐྱེས་ཀྱི་བུ་ཆུང་ཡན་ཆད་འཆི་བ་མ་གཏོགས་འགྲོ་ས་གང་ཡང་མེད་པས་ན། ཁྱོད་ཅིག་པུས་འཇིགས་ཚོར་དང་སྡུག་བསྔལ་བྱས་པས་དོན་མེད་ཅིང་།་གདམས་ངག་ཟབ་མོ་དང་འཕྲད་ནས་འཆི་བ་ལ་བྲོད་གསལ་རེ་བྱས་ཆོག་པའི་བསོད་ནམས་དང་། སྐལ་པར་ལྡན་པ་ཡིན་པས་སེམས་གཞན་དུ་མ་ཡེངས་བར་དམིགས་པ་འདི་ལྟར་སྒོམས་ཤིག། ༈ ཁྱོད་རང་གི་ལུས་འདི་ཉིད་ཡི་དམ་ཐུགས་རྗེ་ཆེན་པོའི་སྐུའི་རྣམ་པར་ཡོད་
དམ་སྙམ་པའི་ཁོང་པའི་ནང་ཐམས་ཅད་ལ་ཤ་ཁྲག་སོགས་གང་ཡང་མེད་པར་སྟོང་སང་ངེ་ཡོད་པར་བསམ་པའི་དབུས་དྲང་པོར་རྩ་དབུ་མ་ཁོང་སྟོང་སྦ་མཁར་ཙམ་གྱི་ཕྱི་གསལ་ནང་གསལ་ཀ་བ་བཙུགས་པ་ལྟར་ཡོད་པའི་མར་སྣ་ལྟེ་བའི་ཐད་ཙམ་དུ་སྨྱུག་ཚིགས་བཞིན་བུག་པ་མེད་པ། ཡར་གྱི་སྣ་སྤྱི་གཙུག་ཚངས་བུག་ཁ་བྱེ་བའི་དཀར་སང་ངེ་བ་ལ་ཐུག་ནས་ཟང་ཐལ་དུ་ཡོད་པར་བསམ༔ སྤྱི་བོའི་སྟེང་ཁྲུ་གང་ཙམ་གྱི་ནམ་མཁར་པདྨ་ཉི་ཟླའི་གདོན་ལ། ཁྱེད་རང་གང་ལ་མོས་ཤིང་དད་པའི་རྩ་བའི་བླ་མ་དེ་ཉིད། ཆོས་སྐུ་ཀུན་བཟང་རྡོ་རྗེ་འཆང་ངམ། སངས་རྒྱས་འོད་དཔག་མེད་དམ། ཨོ་རྒྱན་རིན་པོ་ཆེའི་ལུགས་སུ་འཇའ་འོད་འཁྱིལ་ལེ་བཞུགས་པར་བསྒོམ། དེ་ནས་ཁྱེད་རང་གི་སེམས་རིག་རྣམ་པར་ཤེས་པའི་ངོ་བོ་དེ་འོད་ཀྱི་ཐིག་ལེ་དཀར་ཟཔོ་ཤེལ་ཕྲེང་གི་རྡོག་པོ་ལྟ་བུ་དཀར་ཧྲི་ལེ་བ་སྲན་མ་ཙམ་ཞིག་རྩ་དབུ་མའི་ནང་དུ་ཡོད་པར་བསམ་པ་དེ། བདག་གི་གསོལ་འདེབས་ཀྱི་མཇུག་ཏུ་ཕཊཀྱིས་སྒྲ་དང་བསྟུན་ནས། ཁྱེད་རང་གི་རིག་པའི་ངོ་བོ་ཐིག་ལེ་དཀར་པོ་དེ་རྩ་དབུ་མའི་ནང་དུ་ཡར་འཕག་སྟེ་སྤྱི་བོ་ཚངས་པའི་བུ་ག་ནས་ཇུར་གྱིས་ཐོན་པ་རྩ་བའི་བླ་མའི་ཐུགས་ཀར་ཐིམ་ནས་དབྱེར་མེད་དུ་འདྲེས་ཤིང་བླ་མ་ཡང་
དག་པ་མཁའ་སྤྱོད་ཀྱི་ཞིང་དུ་གཤེགས་པར་མོས་ལ། སེམས་གཞན་དུ་སྐད་ཅིག་ཀྱང་མ་ཡེངས་བར་བླ་མ་ལ་གཏོད་ཅིག །ཅེས་དམིགས་པ་སྤྱད་ནས། དབྱངས་སྙན་པོ་བྱས་ལ། ན་མོ་གུ་རུ། བདེ་ཆེན་འཁོར་ལོའི་དོན་གྱི་འོག་མིན་ན། །བརྒྱུད་པ་ཀུན་འདུས་རྩ་བའི་བླ་མ་ཉིད། །སངས་རྒྱས་ཀུན་ལས་ལྷག་པའི་ཐུགས་རྗེ་ཅན། །མཚན་དཔེའི་གཟི་འབར་འཇའ་འོད་སྐུ་རུ་བཞུགས། །བདག་དང་འགྲོ་བའི་ལུས་སྲོག་ལོངས་སྤྱོད་ཀུན། །ལྟོས་མེད་མཆོད་པར་འབུལ་གྱི་བཞེས་ནས་ཀྱང་། །ཚད་མེད་ཐུགས་རྗེ་མྱུར་མགྱོགས་ལྕགས་ཀྱུ་ཡིས། །སྡུག་བསྔལ་ཉམས་ཐག་བུ་འབངས་དྲང་དུ་གསོལ། །ཚེ་འདིའི་སྣང་བ་རྨི་ལམ་ལྟ་བུ་ནུབ། །བཟློག་མེད་འཆི་བདག་ཞགས་པ་དམ་པོས་བཅིངས། །རབ་འཇིགས་བར་དོའི་འཕྲང་ཆེན་འགྲིམ་ཁ་འདིར། །ཐུགས་རྗེས་མྱུར་དུ་གཟིགས་དང་བླ་མ་རྗེ། །ལོངས་སྤྱོད་གཉེན་འདུན་གཅེས་པའི་ལུས་དང་བཅས། །ཕན་མེད་ཤུལ་དུ་བཞག་ནས་རང་རིག་འདི། །དབང་མེད་འཁྲུལ་སྣང་རླུང་གིས་མི་བསྐྱོད་པར། །ལམ་མཆོག་འཕོ་བའི་ཟབ་དོན་མངོན་གྱུར་ཤོག །བསླུ་བྱེད་ཚེ་འདིའི་ཞེན་འཛིན་བྲལ་བ་དང་། །ལོག་ལམ་
འཁྲུལ་པའི་བག་ཆགས་མི་འཆར་བར། །གསལ་སྟོང་འཛིན་མེད་རིག་པ་རྗེན་པ་འདི། །རྗེ་བཙུན་བླ་མའི་ཐུགས་དང་དབྱེར་མེད་པར། །ཆོས་དབྱིངས་སྐྱེ་མེད་ཀློང་དུ་གྲོལ་བར་ཤོག །ཕཊཕཊཕཊ༔ ཕཊཕཊཕཊ༔ རང་གིས་ཀྱང་ཁོ་ཡི་ལུས་ནང་དབུ་མའི་མཐིལ་གྱི་ཐིག་ལེ་དེ་ཉིད་ཡར་འཕར་ནས་བླ་མའི་ཐུགས་ཀར་འདྲེས་པར་དམིགས་པ་གཏད་ཅིང་ཕཊསྐད་ཆེ་ཆུང་འཚམ་པ་ལན་ལྔའམ་བདུན་ཙམ་ཞིག་བྱས་ཏེ་ཡུད་ཙམ་སྤྲོས་མེད་ཀྱི་ངང་ལ་མཉམ་པར་བཞག །དེ་ནས་བཟང་པོ་སྤྱོད་པ་སོགས་སྨོན་ལམ་རྒྱ་ཆེར་གདབ་པར་བྱའོ། །ཕཊ༔ བརྗོད་པའི་དུས་སུ་ཕ་རོལ་པོའི་སྤྱི་གཙུག་གི་སྐྲ་ནས་ཚོར་ངེས་ཤེས་པ་ཙམ་དུ་འཐེན་པའམ། ལོང་ཁྱབ་ཤོམ་ན། རྡོ་ལེབ་སོར་གསུམ་ཙམ་མམ། རྫ་མ་དུམ་བུ་སོགས་མེ་ལ་ཚ་ཚིལ་བསྲོས་པ་ཚངས་བུག་ཐད་དུ་ཡུད་ཙམ་གླན་ན་ཡང་རྣམ་ཤེས་དེར་ཐོན་པའི་ཁྱད་པར་གསུངས་སོ། །རྣམ་ཤེས་མ་ཐོན་པའི་རིགས་ལ་རོ་ལ་ཐུག་རག་འགུལ་སྐྱོད་མེད་པ་དང་། ཉེ་སྐོར་དུ་སྒོ་བརྡབ་པའམ། ཆས་བོར་བ་སོགས་རྡོག་རྡོག་གི་སྒྲ་མེད་གལ་ཆེ་བས་ན། གཅོད་པ་ཡིན་ཟེར་ནས་ཕུང་པོ་རྡོག་སྒྱུར་དང་དྲག་སྤྱོད་མང་པོ་བྱེད་པ་ནི་མཚམས་སྦྱར་ལོག་མིན་དུ་འགྲོ་
བས་མི་བྱའོ། །དེ་ལྟར་འཕོ་བའི་དམིགས་པ་འདི་ནི་རང་ཉིད་ཀྱང་སྔ་གོང་ནས་བསྒོམ་པ་སྟེ་ཡིད་ལ་འཇག་པར་བྱས་ན་ནམ་འཆི་བའི་དུས་སུ་གཞན་ལ་རེ་མི་དགོས་པ་འོང་ངོ། །ལར་འཕོ་བའི་དམིགས་པ་འདི་ཙམ་སྤྱོད་ཉན་པ་ཡང་དེང་སང་ཨ་རེ་དཀོན་མ་མཆིས་ཏེ། ད་ལྟ་གསོན་པོའི་དུས་ན་དམིགས་པའི་རིགས་ལ་གོལ་ས་ཆ་ཅུང་ཟད་མེད་ན། དེ་སྐབས་སུ་གནད་གཅོད་ཟུག་རྔུའི་དབང་གིས་དམིགས་པ་གསལ་ཐུབ་པ་དཀའ་བས་ད་ལྟ་ནས་གོམས་འདྲིས་གལ་ཆེ། ཡང་ནད་པ་བསོད་ནམས་ཡོད་པ་ལ་ལ་མ་ཤི་ཙམ་ནས་འཕོ་བའི་ཀླུ་དམིགས་པ་བསླབ་ཐུབ་ན་རབ་ཡིན་ཀྱང་དེ་ལྟ་བུ་འགྲུབ་པ་ཡང་དཀའ། ཕྱི་དབུགས་ཆད་ནས་ནང་དབུགས་མ་ཆད་པས་དྲོད་མ་ཡལ་བ་དེ་ལ་མ་བྱུང་ན། དེང་སང་མི་ཤི་ནས་ཡུན་རིང་པོར་ཚར་བ་ལ་འཕོ་བ་སྤར་བར་འདོད་པ་ནི་དོན་མེད་ཀྱི་བྱ་བ་ཁོ་ནའོ། །འཕོ་བའི་དམིགས་གསལ་མི་ཤེས་པའི་རིགས་རྣམས་ལ་ནི། མིང་ནས་བོས་ལ། ད་ནི་ཁྱོད་ཤི་བ་ཡིན་འདུག་གོ་་སེམས་མ་ཡེངས་བར་སྤྱི་བོར་བླ་མ་ཨོ་རྒྱན་རིན་པོ་ཆེ་བཞུགས་ཡོད་པར་མོས་རྩེ་གཅིག་གྱིས་ཤིག །ཅེས་པ་ཙམ་གྱིས་ཆོག་གོ། ༈ གང་ཟག་ཆོས་ལ་ཉམས་ལེན་དང་གོ་
རྟོགས་ཡོད་རིགས་ལ་ནི། ཐིམ་རིམ་ནས་བཟུང་སྟེ་བར་ད་སྔ་ཕྱི་ཐམས་ཅད་ཀྱི་ངོ་སྤྲོད་རྒྱས་པ་ནི་ཐོས་གྲོལ་ཆེན་མོ་དཔེ་ཚན་གཉིས་པ་ཁོ་ན་ལེགས་སོ། །དེ་ལྟར་ཚུལ་འདི་དག་ཀྱང་དབུ་མཛད་ཡོན་ཏན་དབང་ཕྱུག་སོགས་དོན་གཉེར་འགའ་ཡི་ངོར་བྲིས་པ་དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།