བཟའ་བཏུང་ཚོགས་འཁོར་བྱིན་རླབས།
བཟའ་བཏུང་ཚོགས་འཁོར་བྱིན་རླབས་བཞུགས་སོ། །ཚོགས་འཁོར་གཏེར་གཞུང་རྣམས་བྱིན་རླབས་ཆེ་བས་ལེགས། འོན་ཀྱང་གཉན་པས་བཟའ་ཚོགས་ལ་འདི་བཏོན་ན་ལེགས། ཧྲཱིཿ ཆོས་རྣམས་ཡེ་ནས་རྫོགས་པ་ཆེ། །དོན་སྟོང་ཉིད་སྨྲ་བསམ་བརྗོད་ལས་འདས། །དཔེ་ནམ་མཁའ་མཐའ་དབུས་བྲལ་བ་བཞིན། །དོན་ཅི་ཡང་མེད་བཞིན་ཅི་ཡང་སྣང་། །དཔེ་མཁའ་ལ་འཇའ་སྤྲིན་ཤར་བ་བཞིན། །སེམས་ཆོས་སྐུ་ངོ་བོ་ཀུན་ཏུ་བཟང་། །དེ་གཟུགས་སུ་སྣང་བ་པད་འབྱུང་སྐུ། །ཐུགས་ཡིག་འབྲུ་རིག་རྩལ་འགགས་མེད་ལ། །གསུང་ཡིག་འབྲུ་རཾ་ཡཾ་ཁཾ་དང་གསུམ། །རཾ་འཕྲོས་པས་མི་གཙང་དྲི་མ་བསྲེགས། །ཡཾ་འཕྲོས་པས་དངོས་འཛིན་ཨ་འཐས་གཏོར། །ཁཾ་འཕྲོས་པས་ཐ་མལ་བག་ཆགས་བཀྲུས། །གསུང་ཡིག་འབྲུ་རཾ་ཡཾ་ཁཾ་གསུམ་པོ། །དེ་གནས་འགྱུར་སྐུ་གསུམ་ཡིག་འབྲུ་གྱུར། །ཧཱུཾ་ཐུགས་ཀྱི་ཡི་གེས་རྣམ་རྟོག་སྦྱངས། །ཨཱགསུང་གི་ཡི་གེས་བདུད་རྩིར་བསྒྱུར། །ཨོཾ་སྐུ་ཡི་ཡི་གེས་མཆོད་སྤྲིན་གྱུར། །ཧིཐུགས་ལས་མཆོད་ལྷ་གྲངས་མེད་འཕྲོས། །གནས་འོག་མིན་ཆོས་དབྱིངས་ཞིང་ཁམས་ནས། །དཔལ་ཀུན་བཟང་རྡོ་རྗེ་འཆང་ཆེན་ལ། །
རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རང་སེམས་དང་གཉིས་སུ་མེད་པར་མཆོད། །གནས་དག་པའི་ཞིང་ཁམས་ལྔ་པོ་ནས། །དཔལ་རྒྱལ་བ་རིགས་ལྔ་ཡབ་ཡུམ་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རང་ལུས་དང་གཉིས་སུ་མེད་པར་མཆོད། །གནས་འཛམ་གླིང་བྱེ་བ་ཕྲག་བརྒྱ་ནི། །དཔལ་སྤྲུལ་སྐུ་སངས་རྒྱས་སྟོང་རྩ་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རང་སྣང་དང་གཉིས་སུ་མེད་པར་མཆོད། །གནས་གྲུ་འཛིན་བྱེ་བ་ཕྲག་བརྒྱ་ན། །དཔལ་སྤྱན་རས་གཟིགས་དབང་བྱེ་བ་བརྒྱར། །རྫ་ས་ཟག་མེད་བདུད་རྩིའི་ཚོགས་མཆོད་འབུལ། །དོན་ཐུགས་རྗེ་དང་གཉིས་སུ་མེད་པར་མཆོད། །གནས་རི་བོ་རྩེ་ལྔ་ཕྲག་བརྒྱ་ན། །དཔལ་འཇམ་དབྱངས་བྱེ་བ་ཕྲག་བརྒྱ་ལ། །རྫ་ས་ཟག་མེད་བདུད་རྩིའི་ཚོགས་མཆོད་འབུལ། །དོན་མཁྱེན་རབ་དང་གཉིས་སུ་མེད་པར་མཆོད། །གནས་ལྕང་ལོ་ཅན་བྱེ་བ་ཕྲག་བརྒྱ་ན།དཔལ་ཕྱག་ན་རྡོ་རྗེ་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་མཐུ་སྟོབས་དང་གཉིས་སུ་མེད་པར་མཆོད། །གནས་རྔ་ཡབ་བྱེ་བ་ཕྲག་བརྒྱ་
ན། །དཔལ་པདྨ་འབྱུང་གནས་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རིག་རྩལ་དང་གཉིས་སུ་མེད་པར་མཆོད། །གནས་ཨོཾ་རྒྱན་བྱེ་བ་ཕྲག་བརྒྱ་ན། །དཔལ་རྟ་ཕག་ཡབ་ཡུམ་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་བདེ་སྟོང་དང་གཉིས་སུ་མེད་པར་མཆོད། །གནས་རིགས་དྲུག་བྱེ་བ་ཕྲག་བརྒྱ་ན། །ཐུབ་དྲུག་པད་འབྱུང་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་ཕྱིན་དྲུག་དང་གཉིས་སུ་མེད་པར་མཆོད། །གནས་རྒྱ་གར་བྱེ་བ་ཕྲག་བརྒྱ་ན། །གྲུབ་ཆེན་བྱེ་བ་བརྒྱད་ཅུ་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་བླ་མ་དང་གཉིས་སུ་མེད་པར་མཆོད། །གནས་གངས་ཅན་བྱེ་བ་ཕྲག་བརྒྱ་ན། །དཔལ་རྗེ་འབངས་ཉེར་ལྔ་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རིག་སྟོང་དང་གཉིས་སུ་མེད་པར་མཆོད། །གནས་གང་ལ་གང་འདུལ་གྱི་ཞིང་ཁམས་ན། །དཔལ་རྩ་བ་བརྒྱུད་པའི་བླ་མ་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་པད་འབྱུང་དང་གཉིས་སུ་མེད་པར་
མཆོད། །གནས་ཞི་བ་དབྱིངས་ཀྱི་དཀྱིལ་འཁོར་ན། །ལྷ་བུདྡྷ་བཞི་བཅུ་རྩ་གཉིས་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རང་སྙིང་དང་གཉིས་སུ་མེད་པར་མཆོད། །གནས་ཁྲག་འཐུང་རོལ་པའི་དཀྱིལ་འཁོར་ན། །འབར་བ་ཁྲག་འཐུང་ལྔ་བཅུ་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་ཕུང་ཁམས་དང་གཉིས་སུ་མེད་པར་མཆོད། །གནས་འོག་མིན་མཁའ་སྤྱོད་རྣམ་གསུམ་ན། །དཔལ་དག་པ་རིག་འཛིན་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་མགྲིན་པ་དང་གཉིས་སུ་མེད་པར་མཆོད། །ཡུལ་ཆེན་པོ་ཉི་ཤུ་རྩ་བཞི་ན། །དཔལ་དཔའ་བོ་དང་མཁའ་འགྲོ་བྱེ་བ་བརྒྱར། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་རྩ་བྲན་དང་གཉིས་སུ་མེད་པར་མཆོད། །གནས་རབ་འཇིགས་དུར་ཁྲོད་ཆེན་པོ་ན། །དཔལ་མ་མགོན་དམ་ཅན་རྒྱ་མཚོ་ལ། །རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་དམ་ཚིག་དང་གཉིས་སུ་མེད་པར་མཆོད། །གནས་སྟོང་གསུམ་མི་མཇེད་ཞིང་ཁམས་ན། །དྲེགས་པ་སྣང་སྲིད་ལྷ་འདྲེ་ལ། །།རྫས་ཟག་མེད་བདུད་རྩིའི་ཚོགས་
མཆོད་འབུལ། །དོན་རྣམ་རྟོག་དང་གཉིས་སུ་མེད་པར་མཆོད། །གནས་ནམ་མཁའི་མཐར་ཐུག་ཞིང་ཁམས་ན། །མ་འགྲོ་དྲུག་སེམས་ཅན་ཐམས་ཅད་ལ།། རྫས་ཟག་མེད་བདུད་རྩིའི་ཚོགས་མཆོད་འབུལ། །དོན་ཡི་དམ་དང་གཉིས་སུ་མེད་པར་མཆོད། །བདག་དེ་ལྟར་ཚོགས་མཆོད་ཕུལ་བའི་མཐུས། །གནས་ཡུལ་འབྲོག་དང་རི་ཁྲོད་གྲོང་གི་གསེབ། །གར་འདུག་ཀྱང་འོག་མིན་བདེ་བ་ཅན། །ཞིང་ཡོངས་སུ་དག་པར་བྱིན་གྱིས་རློབས། །མཁར་ཁང་ཁྱིམ་སྦྲ་གུར་སྤྱིལ་པོ་ཕུག །གར་འདུག་ཀྱང་གཞལ་ཡས་སུ་བྱིན་གྱིས་རློབས། །གྲོགས་སྐྱེས་པ་དང་བུད་མེད་བྱིས་པ་སོགས། །སུ་འགྲོགས་ཡི་དམ་ལྷ་རུ་བྱིན་གྱིས་རློབས། །གདན་ཕྱིང་པ་གཡང་གཞི་རྩྭ་སོགས་ཤིང་། །དེ་གསེར་ཁྲི་པདྨར་བྱིན་གྱིས་རློབས། །སྣོད་ཟངས་ལྕགས་འཁར་བ་ཤིང་གི་སྡེར། །དེ་པདྨ་བྷནྡཱར་བྱིན་གྱིས་རློབས། །ཟས་ཤ་ཆང་ཇ་ཞོ་ཟན་དང་ཐུད། །ཁ་མེ་ཐབ་ལག་གཉིས་དགང་གཟར་སྣོད། །སེམས་ཡི་དམ་ཨ་ཐུང་ཡེ་ཤེས་མེ། །ཟས་བཟའ་བཏུང་སྦྱིན་སྲེག་ཏུ་བྱིན་གྱིས་རློབས། །རླུང་འབྱུང་འཇུག་གནས་གསུམ་རྡོ་རྗེའི་སྔགས། །གཉིད་རྨི་ལམ་ཐ་
མལ་སྙོམས་འཇུག་བཞི། །དོན་སྐུ་བཞི་ལྷུན་གྲུབ་ཏུ་བྱིན་གྱིས་རློབས། །དོན་རང་སེམས་དང་ཆོས་དབྱིངས་ནམ་མཁའ་གཉིས། །སྣང་སྲིད་ཀུན་རང་སེམས་རོ་གཅིག་འདྲེས། །ལྷ་སྤྱན་འདྲེན་དང་བཞུགས་གསོལ་མི་དགོས་པས། །འཁོར་འདས་མཉམ་ཉིད་དུ་བྱིན་གྱིས་རློབས། །ཟས་ཞིམ་བཙོག་མངར་སྐྱུར་གྱི་རྟོག་པ་ལ། །དེ་ངོ་བོར་བལྟས་པས་སྟོང་པར་མཉམ། །ཚོགས་ཕྱི་ནང་ཟག་མེད་བདུད་རྩིར་དམིགས། །ལུས་ཕུང་ཁམས་སྐྱེ་མཆེད་ལྷ་ལ་འབུལ། །དེ་ཟ་འཐུང་ཚོགས་འཁོར་གྱི་གདམས་པ་ཡིན། །།གུ་རུ་དྷེ་ཝ་ཌཱཀྐི་ནི་ས་པ་རི་ཝཱ་ར་གྷ་ན་ཙཀྲ་ལ་ཁ་རཾ་ཁཱ་ཧི་ཁཱ་ཧི། ཞེས་རོལ། ལྷག་མ་ནི། རང་ཉིད་ཡི་དམ་ལྷ་ཡི་ཡར་མར་རྐན། །ལྷ་སྣང་མཐའ་གོས་དཀར་སྦྱོར་མཚམས་ནས། །བདུད་རྩི་བྱང་སེམས་ཀྱི་ཐིགས་པ་སྤྲོས། །རྗེས་ལྷག་མ་ཤ་ལྔ་བདུད་རྩི་ལྔ། །དོན་ཟག་མེད་ཡེ་ཤེས་བདུད་རྩི་ལྔ། །གཟུགས་ཤ་ཁྲག་རུས་པའི་རྒྱ་མཚོར་གྱུར། །སྔགས་ཧ་ཧོ་ཧྲི༔ཡིས་བྱིན་གྱིས་རློབས། །རྫས་ཁ་དོག་དྲི་རོ་ཕུན་སུམ་ཚོགས། །དོན་རང་གི་རྩལ་སྣང་འགགས་མེད་ལས། །ཕྱི་དབང་ཕྱུག་མ་མོ་ཞིང་སྐྱོང་ཚོགས། །གནས་དུར་ཁྲོད་འགྲིམ་ཞིང་ཚོགས་
ཁང་ཉུལ། །བུ་དམ་ཚིག་ཅན་ལ་དངོས་གྲུབ་སྟེར། །བཀའ་དམ་ཉམས་རྣམས་ལ་ཆད་པ་འབེབས། །མི་ཉམས་རྟོགས་ཅན་གྱི་དྲོད་ཚད་འབེབས། །མཐོ་ནམ་མཁའི་དབྱིངས་ནས་བྱ་ར་བྱེད། །བར་སྣང་སྲིད་ལྷ་འདྲེ་འཁོར་དུ་ཁྲིད། །དམའ་ས་གཞི་ལེགས་ཉེས་སྟངས་རྣམས་གཅོད། །ཕོ་འཕྱོར་པོ་ཀུན་གྱི་བླ་ཡིད་འཕྲོག །མོ་འཕྱོར་མོ་ཀུན་གྱི་ཡིད་སེམས་བསླུས། །དུས་སྙིགས་མར་དལ་ཡམས་རྐྱེན་ཁ་འབེབས། །དགྲ་ཞིང་བཅུ་ཚང་བའི་ཚེ་སྲོག་གཅོད། །གནས་སྒྲུབ་ཁང་དུར་ཁྲོད་གནས་རི་ཉུལ། ཟས་ཤ་ཁྲག་བདུད་རྩིའི་གཏོར་མ་ཟ། །མི་དམ་ཚིག་ཅན་ལ་སྲིང་བས་གདུང་། །ཆོས་སྙིང་ནས་བྱེད་ན་མ་བས་བྱམས། །མི་བསྟན་བཤིག་རྣམས་ལ་ཞེ་རེ་གནག །སྟོབས་རྫུ་འཕྲུལ་གནམ་ས་ཁ་ཞབས་སྒྱུར། །བང་མགྱོགས་པ་གློག་དང་སྐར་མདའ་འདྲ། །མཐུ་དྲག་རྩལ་ནམ་མཁའི་ཐོག་བས་ཆེ། །སྔོན་དཔལ་ཆེན་རིག་འཛིན་སྤྱན་སྔ་རུ། །དུས་མ་འོངས་གསང་སྔགས་ཉམས་ལེན་པ། །དེ་སྤྱི་བོའི་གཙུག་ཏུ་བཀུར་བ་དང་། །སྙིང་ཐག་པའི་བུ་བཞིན་མི་སྐྱོང་རེ། །དེ་རང་དམ་བཅས་ནས་ཐ་ཚིག་བཞག །དོན་རྫོགས་སངས་
རྒྱས་དང་དབྱེར་མེད་ཀྱང་། །འཕྲལ་གསང་སྔགས་བསྟན་པ་བསྲུང་བའི་ཕྱིར། །ལུས་བྲན་གཡོག་ཕོ་མོའི་ཚུལ་འཛིན་པས། །ཁྱེད་མཉེས་པའི་ལྷག་གཏོར་ངས་འབུལ་གྱིས། །ང་རྣལ་འབྱོར་དགའ་བའི་དངོས་གྲུབ་བྱིན། །དོན་སྡོང་གྲོགས་མེལ་ཚེ་དགའ་བཞིན་མཛོད། །སརྦ་པྲ་ཏ་བ་ལི་ཏ་ཁཱ་ཧི། ཞེས་ཕུལ་ནས། མི་བདག་གི་དུས་གསུམ་དགེ་བསགས་དང་། །ཟས་ཚོགས་ཀྱི་འཁོར་ལོ་བསྐོར་བའི་མཐུས། །ཚེ་འདི་ལ་ནད་གདོན་བར་ཆད་ཞི། །ཚེ་བསོད་ནམས་ཉམས་རྟོགས་འཕེལ་ཞིང་རྒྱས། །རང་རླུང་སེམས་སྣང་བ་དབང་དུ་འདུས། །དགྲ་བདུད་བཞིའི་གཡུལ་ལས་རབ་རྒྱལ་ནས། །ཚེ་འདི་ལ་པད་འབྱུང་སྐུ་འགྲུབ་ཤོག །དོན་སྣང་སྲིད་དག་པ་རབ་འབྱམས་ཞིང་། །དེ་ཡི་དམ་ཡིན་པ་ངོ་འཕྲོད་ནས། །དེ་དངོས་སུ་འཆར་བའི་བཀྲ་ཤིས་ཤོག །ཅེས་མེ་ཡོས་ས་གའི་ཉེར་གཅིག་ལ། །རང་རྣམ་གཡེང་མང་པོས་ཡེང་སྐབས་ལ། །བུས་བྲིས་ཤོག་གལ་ཆེན་བསྐུལ་བའི་ངོར། །འཕྲལ་གང་དྲན་བྲིས་པའི་ཚོགས་མགུར་འདི། །ཁྱེད་དུས་མིན་ཤ་ཆང་ལོངས་སྤྱོད་ཚེ། །འདི་བཏོན་པས་སྔགས་ནུས་མི་ཉམས་ཤིང་། །ཟས་ཤ་ཆང་ལ་སོགས་ཟ་འཐུང་ཚེ། །འདི་བཏོན་པས་བསོད་ནམས་ཚོགས་སུ་འགྱུར། །ཚོགས་ཇི་བཞིན་བཤམས་ནས་བཏོན་ན་
ཡང་། །དོན་མ་ཚང་ཆད་ལྷག་འདི་ལ་མེད། །ཚིག་རིས་ཀྱི་དོན་རྩ་འདི་ལས་མེད། །དེ་བྱེད་ན་ཉམས་རྟོགས་བོགས་སུ་འགྱུར། །ཚིག་དེ་སྐད་རཱ་ག་ཨ་སྱས་སྨྲས། ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།