བསྐང་རྫས་བྱིན་རླབས་བསམ་འཕེལ་ཡིད་བཞིན་འདོད་འཇོའི་གཏེར།
བསྐང་རྫས་བྱིན་རླབས་བསམ་འཕེལ་ཡིད་བཞིན་འདོད་འཇོའི་གཏེར་ཞེས་བྱ་བ་བཞུགས་སོ།། ཨོཾ་ཧཱིཔདྨནྟ་ཀྲྀཏ་བཛྲ་ཀྲོ་དྷ་ཧ་ཡ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཀྱིས་བགེགས་དང་མ་ཟདག་པ་བསང་ངོ། །ཨོཾ་སྭ་བྷཱ་ཝ་ཤུདྡྷསརྦ་དྷརྨཱསྭ་བྷཱ་ཝ་ཤུདྡྷོཉཧཾ། དངོས་གཞི་སྦྱངས། སྟོང་པར་གྱུར། སྟོང་པའི་ངང་ལས་འབྱུང་བ་རིམ་བརྩེགས་རི་རབ་གླིང་བཞི་ལྕགས་རི་མུ་ཁྱུད་དང་བཅས་པ། རི་རབ་ཀྱི་སྟེང་དུ་རླུང་མེ་ཐོད་སྐྱེད་ཀྱི་སྟེང་དུ། ཀ་པཱ་ལ་རྒྱ་ཁྱོན་དཔག་ཏུ་མེད་པའི་ནང་དུ། ཤ་ལྔ་བདུད་རྩི་ལྔ་ཞུ་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ། ལྦུ་བ་ལ་གཟུགས་མཛེས་པ་སྣ་ཚོགས་འཕྱུར་བ། རྦ་རླབས་ལ་སྒྲ་སྙན་པ་སྣ་ཚོགས་གྲག་པ། ངད་པ་ལ་དྲི་ཞིམ་པ་སྣ་ཚོགས་ཀྱིས་ངད་ལྡང་བ། ལྗགས་ལ་བརྡར་བས་རོ་བརྒྱ་དང་ལྡན་པ། ལུས་ལ་རེག་བྱ་འཇམ་ཞིང་གསོལ་བས་ཟག་མེད་ཀྱི་བདེ་བ་སྐྱེད་པ། དེ་ཡི་ཕུད་རླངས་ལས་འདོད་ཡོན་གྱི་ལྷ་མོས་ནམ་མཁའ་གང་བ་རྒྱུན་མི་འཆད་པར་འཕྲོ་ཞིང་སོ་སོ་རང་རང་གིས་མཆོད་རྫས་དུ་མ་ཐོགས་ཏེ། ལྷ་སོ་སོའི་དབང་པོ་དྲུག་ལ་མཆོད་ཅིང་ཐིམ་པས་མཉེས་ཤིང་ཐུགས་དམ་གྱི་རྒྱུད་བསྐང་བར་བྱེད་པ། བཀྲ་ཤིས་པའི་ལྷ་མོ་བརྒྱད་དང་མཆོད་
པའི་ལྷ་མོ་བཅུ་དྲུག་གིས་རང་རང་གི་མཆོད་རྫས་ཐོགས་ནས། བདེ་བ་ཆེན་པོའི་ལྷ་རྣམས་སོ་སོའི་དགྱེས་པ་བསྐྱང་བར་བྱེད་པ། རྒྱལ་སྲིད་སྣ་བདུན་དང་། ངོ་མཚར་བའི་མཆོད་པ་བཅོ་བརྒྱད་དང་། ཉེ་བར་སྤྱོད་པའི་མཆོད་པ་བདུན་ལ་སོགས་ལྷ་དང་མི་ཡི་ལོངས་སྤྱོད་སྤྲིན་ལྟར་གཏིབས་ཤིང་ཆར་ལྟར་འབེབས་པ། སོ་སོའི་རྟེན་རྫས་དང་། སྒྲུབ་རྫས་དང་། མཆོད་རྫས་དང་། བསྐང་རྫས་ཐམས་ཅད་མ་ཚང་བ་མེད་ཅིང་ཕུན་སུམ་ཚོགས་པ། བྱ་ཅན་རི་དྭགས་ཆུ་གནས་ཐམས་ཅད་ཀྱང་ཆེ་བ་ཚོ་བ་སྟོབས་དང་ལྡན་པ། ཕུང་པོ་ཁམས་དང་སྐྱེ་མཆེད་ཡོངས་སུ་རྫོགས་པ། རེ་རེ་ལའང་གྲངས་མེད་འཕྲོ་ཞིང་འབྱུང་བ་དེ་ལྟ་བུའི་གླིང་བཞི་རི་རབ་དང་བཅས་པ། དེ་ལྷ་དང་སྲུང་མ་ཐམས་ཅད་ལ་རེ་རེའི་སྤྱན་སྔར་ཡོངས་སུ་རྫོགས་པ་རེ་རེ་འབྱུང་ཞིང་། གྲངས་མེད་འཕྲོ་བས་ནམ་མཁའི་མཐར་ཁྱབ་ཅིང་། འཁོར་བ་མ་སྟོང་གི་བར་དུ་རྒྱུན་མི་འཆད་པར་འབྱུང་བའི་རང་བཞིན་ཅན་དུ་གྱུར་ཅིག །ཨོཾ་སརྦ་དྷརྨཱ་པཱུ་ཙྪཔཉྩརཏ་ཀཱ་ཡ་ཀོ་ཏི་བྷི་བྷཱ་ཝ་ཀ་སྭ་བྷ་ཝ་ཤུདྡྷོཉཧཾ། བསམ་གྱིས་མི་ཁྱབ་པར་སྤེལ་བའི་སྔགས་སོ། །ཨོཾ་སརྦ་དྷརྨཱ་ཨ་བྷི་བརྟ་ཧི་ཀོ་ཧ་ཡ་ན་གྷ་མི་སྭ་བྷཱ་ཝ་ཤུདྡྷོཉཧཾ།
དཔག་ཏུ་མེད་པར་བྱིན་གྱིས་རླབས་པའི་སྔགས་སོ། །ཨོཾ་སརྦ་དུཏྟཾ་ཤྲཱིཧ་གྲོསྭཱ་གརྫ་ཧཱུྃ་ཕཊ༔ དེ་ནས་ནུས་པ་བསམ་གྱིས་མི་ཁྱབ་པར་བྱེད་པའི་སྔགས་ཏེ། རྒྱ་མཚོའི་རྒྱུད་ལས་གསུངས་སོ། །ཚུལ་དེ་ལྟ་བུས་མ་ཡེངས་པའི་ངང་ལས་དམིགས་པ་དང་བཅས་འདོན་སྒོམ་སྦྲགས་ལ་འདོན་པར་བྱའོ། །ཨ་རཱ་གས་སྦྱར་བའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།