སློབ་དཔོན་པདྨའི་རྫོང་ཆེན་བཅོ་བརྒྱད་ཀྱི་ཡ་གྱལ།
སློབ་དཔོན་པདྨའི་རྫོང་ཆེན་བཅོ་བརྒྱད་ཀྱི་ཡ་གྱལ། གནས་ན་བུན་རྫོང་ཆེན་གྱི་གནས་ཀྱི་གསོལ་འདེབས་བཞུགས་སོ། །ན་མོ་གུ་རུ་དེ་ཝ་ཌཱ་ཀི་ནཱི་ཧཱུཾ། གནས་ན་བུན་ཡེ་ཤེས་ཀྱི་ཕུག་པ་ན། །རྟེན་སྐུ་ཚབ་དང་ཤོག་སེར་གཏེར་ཁ་མང་། །གནས་པདྨ་འོད་དང་གཉིས་སུ་མེད། །ཨོ་རྒྱན་རྗེ་འབངས་ཉེར་ལྔ་ལ་གསོལ་བ་འདེབས། །བྱིན་རླབས་སེམས་ལ་འཇུག་པར་བྱིན་གྱིས་རློབས། །གནས་རྩ་གསུམ་འཁོར་ལོ་ལྔ་ཡི་ཚུལ། །དག་པ་མཁའ་སྤྱོད་གནས་དང་གཉིས་སུ་མེད། །ཡི་དམ་ཞི་ཁྲོ་རབ་འབྱམས་ལ་གསོལ་བ་འདེབས། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །གནས་ཧྲིམ་ཧཱུྃ་གི་ཡིག་འབྲུ་གསལ། །རང་བྱུང་ཨོ་རྒྱན་གྱི་གནས་དང་གཉིས་སུ་མེད། །དབང་ཆེན་རྟ་ཕག་ཡབ་ཡུམ་ལ་གསོལ་བ་འདེབས། །འཇའ་ལུས་མཁའ་སྤྱོད་འགྲུབ་པར་བྱིན་གྱིས་རློབས། །གནས་ཤར་ཕྱོགས་ཧདང་རཡིག་དཀར། །ཤར་གཏུམ་དྲག་གནས་དང་གཉིས་སུ་མེད། །རྡོ་རྗེ་མཁའ་འགྲོ་ཡབ་ཡུམ་ལ་གསོལ་བ་འདེབས། །ནད་གདོན་བར་ཆད་ཞི་བར་བྱིན་གྱིས་རློབས། །གནས་ལྷོ་ཕྱོགས་རི་དང་ཙཡིག་སེར། །ལྷོ་གད་རྒྱངས་ཀྱི་གནས་དང་གཉིས་སུ་མེད། །
རིན་ཆེན་མཁའ་འགྲོ་ཡབ་ཡུམ་ལ་གསོལ་བ་འདེབས། །ཚེ་དང་ལོངས་སྤྱོད་རྒྱས་པར་བྱིན་གྱིས་རློབས། །གནས་ནུབ་ཕྱོགས་ནི༔དང་གྷིཡིག་དམར། །ནུབ་པདྨ་འཁྱིལ་དང་གཉིས་སུ་མེད། །པདྨ་མཁའ་འགྲོ་ཡབ་ཡུམ་ལ་གསོལ་བ་འདེབས། །རླུང་སེམས་དབང་དུ་འདུ་བར་བྱིན་གྱིས་རློབས། །གནས་བྱང་ཕྱོགས་སདང་ཡཡིག་ལྗང་། །བྱང་ཀཱི་ལ་ཡ་དང་གཉིས་སུ་མེད། །ལས་ཀྱི་མཁའ་འགྲོ་ཡབ་ཡུམ་ལ་གསོལ་བ་འདེབས། །བདུད་བཞིའི་གཡུལ་ལས་རྒྱལ་བར་བྱིན་གྱིས་རློབས། །དྷ་ཀི་དང་ཞིང་སྐྱོང་གནས་བདག་ཚོགས། །རྐྱེན་ཕྱི་ནང་གི་བར་ཆད་ཞི་བ་དང་། །དོན་ཆོས་མཐུན་གྱི་བསམ་པ་ཡིད་བཞིན་འགྲུབ། །བཀྲ་ཤིས་དང་བདེ་ལེགས་མཛད་དུ་གསོལ། །ཅེས་པ་འདི་རིག་སྔགས་འཆང་བའི་ཟདགེ་སློང་རཱ་ག་ཨ་སྱས་གནས་འབྲེལ་བྱེད་དུས་བྲིས་པའོ། །སརྦ་མངྒ་ལཾ།། །།