གདན་ས་ཆེན་པོ་འོག་མིན་དཔལ་གྱི་ཀརྨའི་གནས་བསྟོད་སྙན་གྲགས་ལྷ་ཡི་རྔ་ཆེན།
གདན་ས་ཆེན་པོ་འོག་མིན་དཔལ་གྱི་ཀརྨའི་གནས་བསྟོད། སྙན་གྲགས་ལྷ་ཡི་རྔ་ཆེན་ཞེས་བྱ་བ་བཞུགས་སོ།།
ན་མོ་གུ་རུ་ཀརྨ་ཀ་ཡེ། པོ་ཊ་ལ་རུ་མགོན་པོ་སྤྱན་རས་གཟིགས། །རྔ་ཡབ་གླིང་དུ་ཨོ་རྒྱན་སྤྲུལ་པའི་སྐུ། །ཁ་བ་ཅན་དུ་དཔལ་ལྡན་ཀརྨ་པ། །ཞྭ་ནག་ཅོད་པན་འཛིན་པ་རྣམས་ལ་འདུད། །འཕགས་ཡུལ་གྲུབ་པའི་ཌོམ་བྷི་ཧེ་རུ་ཀ །གངས་ཅན་ལྗོངས་སུ་སྒོམ་ཆུང་རས་ཆེན་དང་། །ད་ལྟ་རྒྱལ་བའི་ཕྲིན་ལས་མངའ་མཛད་པ། །སི་ཏུ་སྤྲུལ་པའི་སྐུ་ལ་ཕྱག་འཚལ་ལོ། །གནས་གདན་ས་ཆེན་པོ་འོག་མིན་ཀརྨའི་གནས་བཤད་འདི་ལ་ལོ་རྒྱུས་སྤྱི་དང་བྱེ་བྲག་གཉིས་ཏེ། སྤྱིར་ནི་འཕགས་པ་འཇིག་རྟེན་དབང་ཕྱུག་ཀརྨ་པ་དེ་ཉིད། འོག་མིན་ཆོས་དབྱིངས་ལྷུན་གྱིས་གྲུབ་
པའི་གནས་ན་ཐུགས་ཆོས་སྐུའི་ངོ་བོ་འཁོར་འདས་སྣང་སྲིད་ཐམས་ཅད་ཁྱབ་པར་བཞུགས་ཏེ། དེ་ནི་ས་བཅུའི་སེམས་དཔའ་རྣམས་ཀྱི་ཡང་མུན་པ་ནང་གི་གཟུགས་ཙམ་ལས་མཇལ་བའི་སྐལ་པ་མེད་པར་གསུངས་ན། བདག་ལྟ་བུའི་བརྗོད་པར་ཡང་ག་ལ་ནུས་ཏེ་དོན་དེ་ལ་དགོངས་ནས༔ བསམ་བརྗོད་རེ་བ་ལས་འདས་པ་ལ་གསོལ་བ་འདེབས་སོ། །ཞེས་གདམས་པར་མཛད་དོ།། ༧ འཕགས་པ་ཟ་མ་ཏོག་བཀོད་པའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེའི་བ་སྤུའི་བུ་ག་གཅིག་ནས་ཀྱང་། སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པ་ཞིག་སྤྲུལ་
ནས་འགྲོ་དོན་མཛད་པར་གསུངས་པས། དེ་ལྟ་བུའི་གནས་དེ་དག་བཤད་པར་ག་ལ་ནུས་ཏེ། དོན་དེ་ལ་དགོངས་ནས། རབ་འབྱམས་ཞིང་གི་བདག་པོ་ལ་གསོལ་བ་འདེབས་སོ། །ཞེས་རྗེས་འཇུག་རྣམས་ལ་གདམས་པར་མཛད་དོ། ༧ །ཆུ་ཀླུང་སྣ་ཚོགས་པའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དང་མཉམ་པའི་འཇིག་རྟེན་གྱི་ཁམས་རྣམས་སུ་སངས་རྒྱས་སྟོང་རྩ་གཉིས་སྤྲུལ་ནས་སེམས་ཅན་གྱི་དོན་མཛད་པར་གསུངས་པ་དང་། ༧ པུན་དྷ་རི་ཀའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བཀོད་པ་བར་མའི་འཇིག་རྟེན་གྱི་འབྱུང་བ་ཆེན་པོའི་རྡུལ་ཕྲ་རབ་དང་མཉམ་པའི་མཛད་པ་བཅུ་གཉིས་སུ་སྤྲུལ་ནས་སེམས་ཅན་གྱི་དོན་མཛད་པར་གསུངས་པ་དང་། སྙིང་རྗེ་སྣ་ཚོགས་རོལ་པ་ཞེས་སམ། སྙིང་རྗེ་རྣམ་པར་རྒྱལ་བའམ། སྙིང་རྗེ་རྣམ་པ་རོལ་པའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེས། འཛམ་གླིང་བྱེ་བ་ཕྲག་བརྒྱའི་རྡོ་རྗེ་གདན་བྱེ་བ་ཕྲག་བརྒྱ་ན། ཤཱཀྱ་ཐུབ་པ་བྱེ་བ་ཕྲག་བརྒྱ། པོ་ཊ་ལ་བྱེ་བ་ཕྲག་བརྒྱ་ན་
བྱང་ཆུབ་སེམས་དཔའ་སྤྱན་རས་གཟིགས་བྱེ་བ་ཕྲག་བརྒྱ། ར་ས་འཕྲུལ་སྣང་བྱེ་བ་ཕྲག་བརྒྱ་ན། སྤྲུལ་པའི་ཆོས་རྒྱལ་སྲོང་བཙན་སྒམ་པོ་བྱེ་བ་ཕྲག་བརྒྱར་སྤྲུལ་ནས་སེམས་ཅན་གྱི་དོན་མཛད་པར་གསུངས་པའི་ཕྱིར། དོན་དེ་ལ་དགོངས་ནས།་ཞིང་ཁམས་སྤྲུལ་པས་ཁྱབ་པ་ལ་གསོལ་བ་འདེབས་སོ། །ཞེས་རྗེས་འཇུག་རྣམས་ལ་གདམས་པར་མཛད་པའོ། །དེ་དང་མཚུངས་པར་དྭངས་སྙིགས་འབྱེད་པའི་མདོ་བསྡུས་པ་ལས། འཇིག་རྟེན་བྱེ་བ་ཕྲག་བརྒྱ་ན། །ཀརྨ་པ་ཞེས་བྱ་བ་ཡི། །སྤྲུལ་པ་བྱེ་བ་ཕྲག་བརྒྱ་འབྱུང་། །ཞྭ་ནག་གྱོན་ནས་འགྲོ་བ་འདུལ། །ཞེས་དང་། མདོ་སྡེ་རྒྱན་ལ་སོགས་པ་རྣམས་ནས། མཆོག་གི་སྤྲུལ་སྐུ་སངས་རྒྱས་ཤཱཀྱ་ཐུབ་པ་བྱེ་བ་ཕྲག་བརྒྱ་པོའི་འགྲོ་དོན་དང་བསྟན་པ་མཉམ་པར་གསུངས་པའི་ཕྱིར། འཛམ་གླིང་བྱེ་བ་ཕྲག་བརྒྱ་ན། གནས་ཆེན་ཀརྨ་ཡང་བྱེ་བ་ཕྲག་བརྒྱ། རྒྱལ་བ་ཀརྨ་པ་བྱེ་བ་ཕྲག་བརྒྱ། སི་ཏུ་སྤྲུལ་པའི་སྐུ་ན་རིམ་ཡང་བྱེ་བ་ཕྲག་བརྒྱ་འབྱོན་པར་ངེས་པས། དེ་ལྟ་བུའི་རྣམ་ཐར་རྒྱ་ཆེ་བ་ནི། རང་རེའི་སོ་སོའི་སྐྱེ་བོ་རྣམས་ཀྱི་བློ་ལ་ཤོང་བར་དཀའ་བས་སྤྲོས་པ་སྐྱུང་། ༈ སྤྱི་དོན་གཉིས་པ། གདན་ས་ཆེན་པོ་འདི་ཉིད་
ཀྱི་ལོ་རྒྱུས་ཁོལ་བུར་ཅུང་ཙམ་ཞུ་ན། དེ་ལའང་དང་པོ་གནས་ཀྱི་བྱུང་ཁུངས་དང་། གཉིས་པ་གནས་བྱིན་གྱིས་བརླབས་ཚུལ། གསུམ་པ་གནས་སྒོ་ཕྱེ་ཞིང་བསྟན་པའི་གཞི་མ་གདན་ས་བཞེངས་ཚུལ། བཞི་པ་གནས་བཤད་དཀར་ཆག །ལྔ་པ་ཕན་ཡོན་དགོས་ཆེད་དང་བཅས་པའོ།། ༈ དང་པོ་གནས་ཀྱི་བྱུང་ཁུངས་ནི། དང་པོ་སྲིད་པ་ཆགས་པའི་དུས། ཀུན་ཏུ་བཟང་མོའི་སྤྲུལ་པ་ལས་རྡོ་རྗེ་དབྱིངས་ཕྱུག་མའི་ངོ་བོ་ནམ་མཁའ་སྟོང་པའི་ངང་ལས། ཡུམ་ཆེན་མོ་དམ་ཚིག་སྒྲོལ་མའི་སྤྲུལ་པ་རླུང་གི་དཀྱིལ་འཁོར་ཆགས་སོ། །དེ་བཞིན་དུ་གོས་དཀར་མོའི་སྤྲུལ་པ་མེ་དང་། མ་མཱ་ཀིའི་སྤྲུལ་པ་ཆུ་དང་། སངས་རྒྱས་སྤྱན་མའི་སྤྲུལ་པ་ས་རྣམས་བྱུང་སྟེ། དེ་རྣམས་འདུས་ཤིང་འཚོགས་པ་ལས། གླིང་བཞི་རི་རབ་དང་བཅས་པ་ཆགས། འབྱུང་བའི་དྭངས་བཅུད་འདུས་པ་ལས། ཉི་ཟླ་ནོར་བུ་དཔག་བསམ་གྱི་ཤིང་དང་། གནས་ཆེན་དང་གནས་ཕྲན་རྣམས་གྲུབ་སྟེ། དེ་དག་ཐམས་ཅད་ཀྱང་ཕྱི་ལྟར་ན་སེམས་ཅན་སྤྱི་མཐུན་གྱི་ལས་ལས་བྱུང་། ནང་ལྟར་ན་ཡུམ་ཆེན་ལྔ་ཡི་རྫུ་འཕྲུལ་ལས་སྤྲུལ། གསང་བ་ལྟར་ན་འཕགས་པ་འཇིག་རྟེན་དབང་ཕྱུག་ཀརྨ་པའི་རྫུ་འཕྲུལ་ཆ་གཅིག་ཙམ་ཡིན་ཏེ།
དེའི་དོན་རྒྱས་པར་ནི། སངས་རྒྱས་ཕལ་པོ་ཆེ་དང་། གསང་བ་རྡོ་རྗེ་ཐེག་པའི་རྒྱུད། བཀའ་ཐང་སྡེ་ལྔ་དང་། ལུང་བསྟན་བཀའ་རྒྱ་མའི་དབུ་རྣམས་ལས་རྒྱ་ཆེར་གསུངས་སོ། །དེ་ལ་འཇིག་རྟེན་ཆགས་ནས་རིང་པོར་མ་ལོན་པར། སྲིད་པའི་མེས་པོ་ལྷ་ཆེན་དབང་ཕྱུག་ཆེན་པོས་དྲག་པོ་འཇིགས་བྱེད་ནག་པོ་དང་། ལྷ་མོ་ཨུ་མས་དུས་མཚན་དམར་མོར་སྤྲུལ། འཇིགས་བྱེད་དེས་དྲག་པོ་ཉི་ཤུ་རྩ་བཞི་དང་། ཨུ་མས་དྲག་མོ་ཉི་ཤུ་རྩ་བཞི་སྤྲུལ་ནས། ཡུལ་ཉི་ཤུ་རྩ་བཞི་བདག་ཏུ་བཟུང་། དེ་དག་རེ་ལ་ཡང་སྤྲུལ་པ་དཔག་ཏུ་མེད་པ་སྤྲུལ་ནས་གནས་ཆེན་དང་གནས་ཕྲན་ཐམས་ཅད་བདག་ཏུ་བཟུང་བའི་ཕྱིར། དབང་ཕྱུག་གི་རྒྱུད་དང་སྒྲུབ་ཐབས་བཤད་ནས་མི་རྣམས་མུ་སྟེགས་ཀྱི་ལམ་ལ་བཀོད་དོ། །དེའི་ཚེ་གནས་འདི་ཡང་དབང་ཕྱུག་དྲག་པོའི་གསུང་གི་སྤྲུལ་པ་ཞིག་གིས་བདག་ཏུ་བཟུང་བའི་ཕྱིར། བྲག་རི་ཁྲོ་བོའི་ཆ་བྱད་འདྲ་བ་དང་། རྡོ་རྣམས་དུར་ཁྲོད་ཀྱི་ཀེང་རུས་འཁྲོལ་མའི་ཚུལ་དུ་ཡོད་དོ། །དེ་ནས་འོག་མིན་འཐུག་པོ་བཀོད་པའི་ཞིང་ཁམས་ནས། འཕགས་པ་འཇིག་རྟེན་དབང་ཕྱུག་ཀརྨ་པ་ལོངས་སྤྱོད་རྫོགས་པའི་སྐུ་དང་། སངས་རྒྱས་རྣམ་པར་སྣང་མཛད་ཆེན་པོ་
བཅོམ་ལྡན་འདས་འཁོར་ལོ་སྡོམ་པར་སྤྲུལ། ཡུམ་རྡོ་རྗེ་དབྱིངས་ཕྱུག་མ་རྡོ་རྗེ་ཕག་མོར་སྤྲུལ། བྱང་ཆུབ་སེམས་དཔའ་ཉི་ཤུ་རྩ་བཞི་དཔའ་བོ་ཉི་ཤུ་རྩ་བཞིར་སྤྲུལ། བྱང་ཆུབ་སེམས་མ་ཉི་ཤུ་རྩ་བཞི་དཔའ་མོ་ཉི་ཤུ་རྩ་བཞིར་སྤྲུལ་ནས། འཁོར་ལོ་སྡོམ་པ་ལྷ་དྲུག་ཅུ་རྩ་བཞིའི་དཀྱིལ་འཁོར་གཅིག་འོག་མིན་ནས་འཛམ་བུ་གླིང་འདིར་བྱོན་ཏེ། འཇིགས་བྱེད་དང་ཡུམ་ཨུ་མ་གཉིས་ཞབས་འོག་ཏུ་མནན། དཔའ་བོ་ཉེར་བཞིས་དྲག་པོ་ཉེར་བཞི་དང་། དཔའ་མོ་ཉེར་བཞིས་དྲག་མོ་ཉེར་བཞི་བཏུལ་ནས་ཐིམ་པ་དང་། ལོངས་སྤྱོད་རྫོགས་པ་དང་། བདག་པོའི་ཚུལ་གྱིས། དབང་ཕྱུག་ཡབ་ཡུམ་གྱི་གནས་ཐམས་ཅད་བདེ་མཆོག་ཡབ་ཡུམ་གྱི་གནས་སུ་བྱིན་གྱིས་བརླབས་པ་སྟེ། རྒྱས་པར་ནི་བདེ་མཆོག་གི་རྒྱུད་འགྲེལ་རྣམས་ནས་གསུངས་སོ། །དེ་ལ་བོད་ཁ་བ་ཅན་འདིར། ཕག་མོ་ཡུམ་གྱི་གནས་གསུམ་བདེ་མཆོག་ཡབ་ཀྱི་གནས་གསུམ་དང་དྲུག་པོ་གཙོ་ཆེ་བ་ལས། ཡུམ་གྱི་གནས་གསུམ་ནི། སྟོད་ན་རྒྱ་ཆེ་བ་གངས་དཀར་གྱི་རྒྱལ་པོ་ཏི་སེ། སེང་གདོང་དཀར་མོ་སྐུ་ཡི་གནས། བར་དུ་ཡིད་ཆེས་ཤིང་ཁུངས་བཙུན་པ་ལ་ཕྱི་ཆུ་བར། སྟག་གདོང་དམར་མོ་གསུང་གི་གནས། སྨད་ན་ས་གསུམ་འགྲན་
ཟླ་དང་བྲལ་བ་ལྷོ་གནས་མཆོག་དཔལ་གྱི་ཙཱ་རི་ཏྲ། ཕག་གདོང་ནག་མོ་ཐུགས་ཀྱི་གནས། ཡབ་ཀྱི་གནས་གསུམ་ནི། ཤར་ཕྱོགས་ཀ་མ་རུ་པ་ཀཾ་པོ་གངས་ཀྱི་ར་བ་འཁོར་ལོ་སྡོམ་པ་སྐུ་ཡི་གནས་ས་སྤྱོད་སྐུའི་འཁོར་ལོ། མཚུར་མདོ་བོ་ལུང་ནི་བདེ་མཆོག་ཐུགས་ཀྱི་གནས་ཏེ་མཁའ་སྤྱོད་ཐུགས་ཀྱི་འཁོར་ལོ། ༧ བདེ་མཆོག་གི་གནས་འོག་མིན་ཀརྨ་ས་སྤྱོད་གསུང་གི་འཁོར་ལོ་ཡིན་ཏེ་རྒྱབ་རི་བྲག་བདེ་མཆོག་ཡབ་ཡུམ་གྱི་ཚུལ་དུ་ཡོད་དོ། །དོན་དེ་ལ་དགོངས་ནས་མི་བསྐྱོད་ཞབས་ཀྱི་བཀའ་འབུམ་ནས། རང་བདེ་མཆོག་ཡབ་ཡུམ་བསྒོམས་པའི་རྩ་དབུ་རྐྱང་རོ་གསུམ་གྱི་ནང་དུ་མཚུར་ཕུ་དང་ཀཾ་པོ་གནས་ནང་ཀརྨ་རི་གླིང་གསུམ་བསྒོམ། དེ་གསུམ་གྱི་དབུས་སུ་དུས་མཁྱེན་དང་གྲུབ་ཆེན་པཀྴི་དང་སངས་རྒྱས་མཉན་པ་གསུམ་བསྒོམ་ཞིང་། བདེ་མཆོག་དང་མཉན་པ་ཡབ་སྲས་དབྱེར་མེད་དུ་སྒྲུབ་པའི་ཟབ་ཆོས་རྒྱ་ཆེར་བཞུགས་སོ། །གནས་དེ་གསུམ་གྱི་བྱ་དང་རི་དྭགས་ཡན་ཆད་དཔའ་བོ་ཌཱ་ཀིའི་རང་བཞིན་དུ་རྣམ་པར་དག་ཚུལ་ཡང་གསུངས་སོ། །ཡང་སངས་རྒྱས་འོད་སྲུང་གི་བསྟན་པ་རྫོགས་ནས་ཤཱཀྱ་ཐུབ་པའི་བསྟན་པ་མ་བྱུང་གི་གོང་དུ། རུ་ཏྲ་ཐར་པ་ནག་པོ་ཞེས་བྱ་བ། ལུས་
གཅིག་ལ་མགོ་གསུམ། ལག་པ་དྲུག་དང་གཤོག་པ་ཅན། བ་སྤུ་མཚོན་ཆར་སྐྱེས་པ་ལ་མེ་འབར་བ་ཞིག་ལས་ཀྱི་དབང་གིས་བྱུང་སྟེ། དེས་ཡུལ་ཉི་ཤུ་རྩ་བཞིའི་ཞིང་སྐྱོང་དང་ཕྱོགས་སྐྱོང་དང་། འཇིག་རྟེན་སྐྱོང་བ་དང་། འཇིག་རྟེན་དཔའ་བོ་ཌཱ་ཀི་དྲེགས་པ་ཅན་ལྷ་སྲིན་བགེགས་རིགས་ཐམས་ཅད་བྲན་དུ་བཀོལ་ནས་གནས་ཆེན་དང་གནས་ཕྲན་ཐམས་ཅད་བདག་ཏུ་བཟུང་༔ ལྷ་མ་ཡིན་དང་སྲིན་པོའི་རྒྱལ་པོ་ཡང་བསད་ཅིང་ཟོས། རྫུ་འཕྲུལ་གྱི་སྟོབས་ཀྱིས་རི་རབ་ཀྱང་མཛུབ་མོའི་རྩེ་ལ་ལན་གསུམ་བསྐོར། སེམས་ཅན་རྣམས་བསད་ཅིང་ཟོས་ནས་འཇིག་རྟེན་སྟོང་ལ་ཁད་དུ་གྱུར་ཏེ། དེའི་ཚེ་སངས་རྒྱས་ཐམས་ཅད་བཀའ་བགྲོས་ནས་བདུད་དེ་འདུལ་བའི་གཉེན་པོར་འཕགས་པ་འཇིག་རྟེན་དབང་ཕྱུག་ཀརྨ་པར་བྱིན་གྱིས་བརླབས་ནས་བཏང་ངོ། །དེར་བདུད་དེ་ཐབས་ཀྱིས་འདུལ་བར་དགོངས་ནས་རྟེའུ་སྔོན་པོ་གཅིག་ཏུ་སྤྲུལ་ནས་བྱོན་པ་ལ། བདུད་ཀྱིས་རྟེའུ་གྱུར་མིད་དུ་བྱས་པ་དང་། ཁོག་ཏུ་བསླེབས་ནས་ཁོའི་རྣམ་པར་ཤེས་པ་འོག་མིན་དུ་གནས་སྤར། བདུད་ཀྱི་ལུས་དེ་ཡེ་ཤེས་ཀྱི་ལུས་སུ་བྱིན་གྱིས་བརླབས། སྤྱི་བོ་ནས་རྟ་དབུ་བསྟན་ནས་ཁམས་གསུམ་དབང་དུ་སྡུས། རུ་ཏྲའི་འཁོར་ཐམས་
ཅད་དམ་ལ་བཏགས། དེའི་ཚེ་གནས་ཆེན་གནས་ཕྲན་ཐམས་ཅད་ཀྱི་ཞིང་སྐྱོང་ཐམས་ཅད་དབང་དུ་སྡུས། རྟ་མགྲིན་ལ་སྤྲུལ་ནས་རྟ་མགྲིན་གྱི་གནས་སུ་བྱིན་གྱིས་རླབས་སོ། །དེའི་ཚེ་གནས་འདི་ཡང་རྟ་མགྲིན་པདྨ་དབང་ཆེན་གྱི་གནས་སུ་བྱིན་གྱིས་རླབས་པའི་ཕྱིར་རྒྱབ་རིའི་བྲག་ལ་ཟླ་གམ་དབང་གི་དཀྱིལ་འཁོར་འབུར་དུ་དོད་པ་གསལ་བར་ཡོད་དོ། །དེ་ནས་རྒྱལ་བ་ཤཱཀྱ་ཐུབ་པ་སྐུ་མྱ་ངན་ལས་འདའ་བའི་ཚུལ་སྟོན་པར་ཉེ་བ་ན། བདེ་བ་ཅན་གྱི་ཞིང་ཁམས་ནས་སངས་རྒྱས་འོད་དཔག་ཏུ་མེད་པས་གསེར་གྱི་པདྨའི་སྡོང་པོ་ཞིག །འཕགས་པ་འཇིག་རྟེན་དབང་ཕྱུག་ཀརྨ་པ་ལ་བསྐུར་ནས། ཁྱེད་སོང་ལ་སངས་རྒྱས་མྱ་ངན་ལས་མི་འདའ་བའི་གསོལ་བ་ཐོབ་གསུངས། དེ་ནས་སྤྱན་རས་གཟིགས་བྱོན་ནས་གསོལ་བ་བཏབ་པས། ཐུབ་པས་ངའི་གདུལ་བྱ་རྫོགས་པས་མྱ་ངན་ལས་འདའོ་གསུངས་སོ། །ད་དུང་བོད་ཁ་བ་ཅན་ཞབས་ཀྱིས་མ་བཅགས། སྐུའི་འོད་ཟེར་གྱིས་མ་ཁྱབ་པས་མྱ་ངན་ལས་མི་འདའ་བར་བཞུགས་པར་ཞུས་པས། བྱང་ཕྱོགས་ཁ་བ་ཅན་ནི་བྱང་ཆུབ་སེམས་དཔའ་ཁྱོད་ཀྱིས་འདུལ་ཞིང་ཡིན་པས་ཐུལ་ཅིག་གསུངས་ནས། ཐུབ་པའི་ཞལ་ནས་འོད་ཟེར་ཁ་
དོག་སྣ་ཚོགས་འཇའ་ཚོན་ལྟ་བུར་འཕྲོས་ཏེ་བོད་ཁ་བ་ཅན་དུ་སོང་བས། །འོད་དེ་གར་ཕོག་ས་ན་རང་བྱོན་རྣམས་བྱུང་ཚུལ་རྒྱས་པར་མ་ཎི་བཀའ་འབུམ་རྒྱས་པ་ནས་གསུངས་ཏེ། གནས་འདིར་ཡང་འོད་ཟེར་ཕོག་པའི་རྟགས། གཡོན་རིའི་ཀརྨ་སྤྱིས་ཤེའི་ལོགས་ལ། ཐུབ་པ་གནས་བཅུ་དང་བཅས་པ་སེར་ཕྲེང་གི་ཚུལ་དུ་བྱོན་ཏེ། དེ་ཐུབ་པ་དང་གནས་བཅུ་རང་བྱོན་ཡིན་པ་མི་འགྱུར་རྡོ་རྗེས་གསུངས་སོ། །དེ་ནས་འཕགས་པ་འཇིག་རྟེན་དབང་ཕྱུག་ཀརྨ་པ་ལ་སངས་རྒྱས་འོད་དཔག་ཏུ་མེད་པས་བཀའ་སྩལ་པ། བོད་ཁ་བ་ཅན་གྱི་འོག་ན་གྲང་བའི་དམྱལ་བ་ཟ་མ་ཏོག་ཁ་བཅད་པ་ལྟ་བུ་དེ་དྲོངས་ལ་དེ་ནས་མི་ཡི་འགྲོ་བ་སྤེལ། དེ་ནས་ཆོས་ཀྱིས་ཐུལ་ལ། སེམས་ཅན་དེ་དག་མཐར་ང་ཡི་དྲུང་དུ་ཁྲིད་ལ་ཤོག་ཅིག་གསུངས་སོ། །དེ་ནས་ང་ལ་འབྲེལ་པ་ཆེར་གྱིས་ཐུལ་བཞག་པ་རྣམས་ཁྲིད་ནི་འོང་ངོ་ཞུས་ནས། རི་པོ་ཊ་ལའི་རྩེ་ནས་ཞལ་བོད་དུ་གཟིགས་ནས་འོད་ཟེར་བཀྱེས་ཏེ། བོད་ཀྱི་འོག་ཏུ་གྲང་བའི་དམྱལ་བ་ཟ་མ་ཏོག་ཁ་བཅད་པ་ལྟ་བུ་དེ་ཚལ་པ་བཞིར་བཀས་ནས་དྲངས་སོ། །དེར་གངས་ཞུ་ནས་ས་གཞི་བྱུང་ངོ། །དེ་ནས་སྐུ་ལས་འོད་ཟེར་ཆེན་པོ་སྤྲོས་ཏེ་བོད་ཁ་བ་ཅན་ཁྱབ་པར་མཛད་དེ་ས་གཞི་བྱིན་
གྱིས་བརླབས་སོ། །དེའི་འོད་གང་དུ་ཐིམ་པའི་སར་རང་བྱོན་དང་གནས་རྣམས་བྱུང་སྟེ། དེ་ཡང་མ་ཎི་བཀའ་འབུམ་དང་། རྒྱལ་པོའི་བཀའ་ཆེམས་འགའ་ཞིག་ནས་རྒྱས་པར་གསུངས་ཏེ། གནས་འདིར་ཡང་སྤངས་ལ་གསེར་ཉ་རང་བྱོན་ཡོད་ཅིང་ཁྱད་པར་བོད་ཀྱི་ས་ཆ་ལ་ལེགས་སྦྱར་སཾ་སྐྲྀ་ཏ་ཡི་སྐད་དུ་ཀརྨ་ཞེས། ས་ཕྱོགས་འདི་ལ་ཀརྨ་མིང་དུ་ཆགས་པ་ནི། དེ་ཡང་སྒྲ་འགྱུར་ལ་ལས། དོན་འགྱུར་ལ་སངས་རྒྱས་ཐམས་ཅད་ཀྱི་ཕྲིན་ལས་ཏེ། འཕགས་པ་འཇིག་རྟེན་དབང་ཕྱུག་ཀརྨ་པའི་གནས་སུ་བྱིན་གྱིས་བརླབས་པའི་ཕྱིར། སྲིད་པ་ཆགས་ནས་ས་ཕྱོགས་འདི་ལ་ཀརྨ་ཞེས་མིང་ཐོགས་ཤིང་གནས་འདི་ལ་ཡུན་རིང་དུ་བཞུགས་པའི་གནད་ཀྱིས། གྲུབ་ཆེན་ཆོས་ཀྱི་བླ་མ་ལ་ཀརྨ་པ་ཞེས་ཡོངས་སུ་གྲགས་པའི་མཚན་དུ་འཇིགས་པའི་ཕྱིར། ཀརྨ་པའི་གདན་ས་གནས་ཐམས་ཅད་ཀྱི་གཙོ་བོ་འདི་ཉིད་ཡིན་ནོ། །གནས་ཀྱི་བྱུང་ཚུལ་ལོ།། ༈ །།དེ་ཡང་སངས་རྒྱས་ཀྱི་ཞབས་ཀྱིས་མ་བཅགས་ལྷ་སྲིན་བྱེ་བའི་ཡུལ་དུ་སོང་བས་ཆོས་དར་མ་བཙུག་པས། མངལ་སྐྱེས་ཤ་ཁྲག་གི་ལུས་ཀྱིས་ལྷ་འདྲེ་མི་ཐུལ་བས་འཕགས་པ་འཇིག་རྟེན་དབང་ཕྱུག་ཀརྨ་པ་དེ་ཉིད། བརྫུས་
སྐྱེས་ཀྱི་སློབ་དཔོན་པདྨ་འབྱུང་གནས་ཞེས་བྱ་བར་སྤྲུལ་ནས་བྱོན་ཏེ། བོད་ཀྱི་ལྷ་སྲིན་ཐམས་ཅད་དམ་ལ་བཏགས། དཔལ་གྱི་བསམ་ཡས་ལ་སོགས་གཙུག་ལག་ཁང་ཆེ་བ་བརྒྱ་དང་རྩ་བརྒྱད། ཕྲན་བུ་སྟོང་དང་རྩ་གཉིས་བཞེངས། མདོ་རྒྱུད་མན་ངག་ཐམས་ཅད་བོད་དུ་བསྒྱུར། སངས་རྒྱས་ཀྱི་བསྟན་པ་དར་ཞིང་རྒྱས། གྲུབ་ཐོབ་གནམ་གྱི་སྐར་མ་ཙམ་བྱུང་ངོ། །དེར་རྒྱལ་པོ་ཁྲི་སྲོང་ལྡེའུ་བཙན་གྱིས་ཞུས་པའི་ངོར། བསྟན་པའི་དར་རྒུད། སེམས་ཅན་གྱི་བདེ་སྡུག་འབྱུང་ཚུལ་ལུང་བསྟན་ཅིང་། རྒྱལ་པོའི་བཞེངས་པའི་གཙུག་ལག་ཁང་རྣམས་རིམ་པར་འཇིག་ཚུལ་གསུངས་པས་རྒྱལ་པོའི་ཐུགས་ཧ་ལས། སྤྱན་ཆབ་ཐབས་སུ་བཏོན། དབུ་ས་ལ་བརྡབས་ནས་ང་ཡིས་བཞེངས་པའི་གཙུག་ལག་ཁང་རྣམས་མི་རྟག་ཅིང་འཇིག་ན། །མ་འོངས་པའི་དུས་སེམས་ཅན་རྣམས་ཀྱི་བསོད་ནམས་བསགས་པ་དང་། སྡིག་སྒྲིབ་སྦྱངས་བའི་རྟེན་འཇིག་རྒྱུ་མེད་པའི་རྟེན་ཁྱད་པར་ཅན། སློབ་དཔོན་ཐབས་མཁས་ཤིང་ཐུགས་རྗེ་ཆེ་བས་བྱིན་རླབས་དགོས་ཞེས། མཎྜལ་མཆོད་པ་རྒྱ་ཆེར་ཕུལ་ནས་ཞུས་པས། ཨོ་རྒྱན་རིན་པོ་ཆེས་རྒྱལ་པོ་རྗེ་འབངས་རྣམས་སྤྲུལ་པ་དཔག་ཏུ་མེད་པ་སྤྲུལ་ནས། ཡུལ་ལྔ། ལྗོངས་
གསུམ། གླིང་གཅིག །སྒྲུབ་གནས་བརྒྱད། ཀཾ་པོ་གངས་ར་ལ་སོགས་གངས་ཉི་ཤུ་རྩ་གཅིག །ངོ་མཚར་བའི་གནས་མཆོག་ཉི་ཤུ་རྩ་ལྔ། འོག་མིན་ཀརྨ་ལ་སོགས་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་བྱིན་གྱིས་བརླབ་པར་མཛད་དོ། །དེ་དག་རྒྱས་པར་རྩྭ་རིའི་གནས་ཡིག་རྒྱས་པ་དང་།་ཨོ་རྒྱན་རིན་པོ་ཆེའི་རྣམ་ཐར་རྒྱས་པ་དང་། འབྲས་མོ་ལྗོངས་ཀྱི་གནས་ཡིག་རིག་འཛིན་རྒོད་ལྡེམ་གྱི་གཏེར་མ་དང་། ལུང་བསྟན་ཆེན་པོ་བཀའ་རྒྱ་མ་སོགས་ལས་རྒྱ་ཆེར་གསུངས་ཤིང་།་ཁྱད་པར་ཐུགས་རྗེ་ཆེན་པོ་གསང་འདུས་ཀྱི་ཆོས་ཚན་གུ་རུའི་རྣམ་ཐར་གསེར་གྱི་ཕྲེང་བ་དང་། དཀོན་མཆོག་སྤྱི་འདུས་ཀྱི་ཆོས་ཚན་བླ་མའི་རྣམ་ཐར་གཉིས་ཚིག་མཐུན་པར། དེ་ནས་བསམ་ཡས་མཆིམས་ཟླཕུ་ནས་བཟུང་བོད་ཡུལ་གྱི་ས་མ་ལུས་པར། གངས་ཏི་སེ་མན་ཆད་ནས། ཁམས་ཙོང་ཁ། རྒྱ་ནག །གན་འཇོང་། ཞང་ཞུང་དང་། མེ་ཉག །ཧོར། ལི་ཡུལ། གྲུ་གུ། ཀོང་པོ། རྒྱ་ལ། མཆིལ། ཉོང་ཁ། ལོང་བྲག །མོན་སྟག་སྒོ། བུམ་ཐང་། སྤ་གྲོ་ལ་སོགས་པ་ཐམས་ཅད་དུ་སྒྲུབ་གནས་སུ་བྱིན་གྱིས་རླབས་ཤིང་འགྲོ་བ་དཔག་
ཏུ་མེད་པ་སྨིན་གྲོལ་དུ་བཀོད་དོ། །དེ་ཡང་མཆོག་གི་སྒྲུབ་གནས་ལྔ། ངོ་མཚར་བའི་གནས་མཆོག་ཉི་ཤུ་རྩ་ལྔ་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་རྣམས་སུ། མ་འོངས་པའི་དུས་སུ་མཐོང་ཐོས་དྲན་རེག་ཀུན་གྲུབ་པ་ཐོབ་ཅིང་དངོས་གྲུབ་བརྙེས་སོ། །ཞེས་འབྱུང་བའི་ནང་ནས། གནས་ཆེན་བརྒྱ་རྩ་བརྒྱད་ཀྱི་ནང་ནས་ཡ་གྱལ་གཅིག་འོག་མིན་ཀརྨ་འདི་ཡིན་པར་འདུག་ཅེས་མི་འགྱུར་རྡོ་རྗེས་ཀྱང་གསུངས་སོ། །དེ་ནི་གནས་བྱིན་གྱིས་བརླབས་པའི་ཚུལ་ལགས་སོ།། ༈ །།དེ་ཡང་ཨོ་རྒྱན་རིན་པོ་ཆེས་ཡེ་ཤེས་དང་ལས་ཀྱི་མཁའ་འགྲོ་དང་། ཇོ་བོ་སྔགས་ཀྱི་བདག་པོ་དང་། ཡུལ་ལྷ་གཞི་བདག་དང་བཅས་པ་ལ་བཀའ་བསྒོས་ནས་སྲུང་མར་བསྐོས་ཏེ། དུས་ལ་བབ་དུས་ལས་ཅན་སྐྱེས་བུ། །གནས་འདི་ལ་དབང་བའི་གང་ཟག་ལ་གཏོད། དུས་ལ་མ་བབས་སྐལ་མེད་ཀྱིས་ཕྱེས་ན་དབང་པོ་བསྣུབས་ཞེས། དམ་ལ་བཞག་པའི་ཕྱིར། གནས་འདི་ཡང་རང་བཞིན་གྱིས་གབ་ཅིང་སྦས་པའི་ཚུལ་དུ་གནས་པའི་ཕྱིར། གནས་འདི་ལ་གནས་ཆེན་ཡིན་པར་སུས་མ་ཤེས་ཤིང་། གལ་ཏེ་ཤེས་ཀྱང་སུ་ཡིན་གྱིས་མི་ནོན་ཅིང་སྡོད་དུ་མི་དབང་བ་ཡིན་ནོ། །དོན་གསུམ་པ་
གནས་ཀྱི་སྒོ་ཕྱེ་བའི་ཚུལ་ནི། །ཏིང་འཛིན་རྒྱལ་པོའི་མདོ་ལས། །བྱང་ཆུབ་སེམས་དཔའ་ཟླ་འོད་གཞོན་ནུ་ལུང་བསྟན་པའི་སྐབས་སུ། འདི་ནི་ཕྱི་དུས་འཇིགས་པ་ཆེན་པོ་ལ། །འདི་ལ་མ་ཕམ་ཁྱོད་ཀྱི་ང་ཡིས་དབང་། །རྟག་ཏུ་ཚངས་སྤྱོད་གཙང་ལ་རབ་གནས་ནས། །ཏིང་འཛིན་འདི་ནི་ཤིན་ཏུ་རྒྱས་བྱེད་འགྱུར། །འདི་ལ་མ་ཕམ་ཁྱེད་ཉིད་ང་ཡིས་སྤྱོད། །ཏིང་འཛིན་དམ་པ་འདི་ནི་རབ་འཚོལ་ཞིང་། །ལམ་འདིར་ཞུགས་པས་བྱང་ཆུབ་དེ་ཐོབ་འགྱུར། །ཞེས་སོགས་ནས། །ཡེ་ཤེས་བླ་མེད་དེ་ནི་རབ་བསྒྲུབས་ནས། །ཕྱི་མའི་དུས་ན་དེ་ཉིད་འཇིག་རྟེན་མཆོག །རྒྱལ་བ་དྲི་མེད་འོད་ཅེས་བྱ་བར་འགྱུར། །ཞེས་དང་། མདོ་སྡེ་གཞན་དག་ལས། རྡོ་རྗེ་གདན་གྱི་བྱང་ཕྱོགས་ཁ་བའི་ལྗོངས། །ཆུ་བོ་མ་ཧཱ་ལོ་ཧེ་ཏ་ཡི་འགྲམ། །རི་བྲག་ཚང་ཚིང་ཅན་ན། །དགེ་སློང་འཚོ་བྱེད་ཅེས་གྲགས་པ། །དག་པའི་འཁོར་དང་མ་དག་པའི་འཁོར་འདྲེས་མ་ཞིག །བུ་ལྔ་བརྒྱ་ལས་མི་ཉུང་བ་ལ་ལྷན་དུ༔ དེ་བཞིན་གཤེགས་པའི་ཡེ་ཤེས་ལ་སྤྱོད་པ། ཞེས་དང་། ཨོ་རྒྱན་རིན་པོ་ཆེས། མེ་ཏོག་ཟླ་མཛེས་བྱང་སེམས་སྤྲུལ་པ་གཅིག །གདུལ་བྱའི་མངའ་བདག་དྭགས་པོ་ལྷ་རྗེ་
འབྱུང་། །ཞེས་བཀའ་གཏེར་གཉིས་ཀ་ནས་རྒྱ་ཆེར་ལུང་བསྟན་པའི། མཉམ་མེད་དྭགས་པོ་ལྷ་རྗེ་དེ་ཉིད་ཀྱི་སྲས་ཀྱི་ཐུ་བོ། དཔལ་ལྡན་དུས་གསུམ་མཁྱེན་པ་ལ། གནས་འདི་ཡི་ཁ་བྱང་ལུང་བསྟན་པ་རྒྱ་ཆེར་ནི། ཁྱེད་ཁམས་ཕྱོགས་གདུལ་བྱའི་དོན་དུ། སྔོན་གྱི་ཌཱ་ཀི་རྣམས་ཀྱི་མཚན་དོན་དང་མཐུན་པ། གླེ་ཐུའམ་ཀརྨ་ཞེས་གྲགས་པ། སངས་རྒྱས་བྱང་སེམས་རྣམས་ཀྱིས་བྱིན་གྱིས་བརླབས་པའི་བྲག་ཚེས་བརྒྱད་ཀྱི་ཟླ་བ་ལྟ་བུའི་རྩ་བར་དཔའ་བོ་དང་མཁའ་འགྲོ་ངང་གིས་འདུ་བ། ཕྱོགས་དེར་སྐལ་ལྡན་སློབ་མ་པདྨའི་མཚོ་ལ་རྐང་དྲུག་འདུ་བ་བཞིན་ཡོད་ཀྱི། དེར་གདན་ས་གྱིས་དང་བསྟན་པ་དང་འགྲོ་བའི་དོན་ཡིད་ལ་སྨོན་དགུ་འགྲུབ་པར་འགྱུར་རོ། །ཞེས་ལུང་བསྟན་ཏོ། ༧ །དེ་ཡང་ཏིང་འཛིན་རྒྱལ་པོའི་མདོ་ལས། ང་འདས་ལོ་ནི་ཉིས་སྟོང་ལ། །གདོང་དམར་ཡུལ་དུ་བསྟན་པ་འབྱུང་། །སྤྱན་རས་གཟིགས་ཀྱི་གདུལ་བྱར་འགྱུར། །དེ་ཡི་བསྟན་པའི་སྙིགས་མ་ལ། །བྱང་ཆུབ་སེམས་དཔའ་སེང་གེའི་སྒྲ།ཏིང་འཛིན་དབང་ཐོབ་འགྲོ་བ་འདུལ། །མཐོང་ཐོས་དྲན་རེག་བདེ་ལ་བཀོད། །ཅེས་དང་། ལང་ཀར་གཤེགས་པ་བསྡུས་པ་ལས། བྱང་ཆུབ་སེམས་དཔའ་སྤྱོད་པ་མ་ངེས་
པས་འགྲོ་བ་འདུལ་བ། གནས་མ་ངེས་པ་ཀུན་ཏུ་རྒྱུ་བ། ཞེས་དང་། ༧ སྲོང་བཙན་སྒམ་པོའི་ལུང་བསྟན་ལས། ཐུགས་རྗེ་ཆེན་པོའི་སྤྲུལ་པ་ཞིག །རྣལ་འབྱོར་ཞྭ་ནག་འཛིན་པ་གཅིག །ཐོག་བབས་ཚུལ་གྱིས་བྱོན་ནས་ཀྱང་། །བོད་ཡུལ་ཁ་བ་ཅན་དུ་འབྱུང་། །ཞེས་དང་། ཨོ་རྒྱན་རིན་པོ་ཆེའི་ལུང་བསྟན་འགྲོ་མགོན་ཞང་གིས། །འཕྲང་སོ་བྲག་ནས་བཏོན་པའི་ཤོག་སེར་ལས། །དུས་གསུམ་མཁྱེན་པའི་བླ་མ་འདི། །མཚན་ནི་དྷརྨ་ཀཱིརྟི་ཡིན། །བྱམས་པའི་བསྟན་པའི་རྗེས་ཐོག་ཏུ། །སངས་རྒྱས་སེང་གེ་ཞེས་བྱ་བ། །བསྟན་པ་རབ་ཏུ་རྒྱས་པར་འགྱུར། །དྷརྨ་ཀཱིརྟི་ཉིད་ཡིན་ནོ། །དེ་ནས་ཚེ་འཕོས་ཕྱི་མ་ལ། །ཀཱིརྟི་ཀ་ཡི་གྲོང་ཁྱེར་དུ། །ཁྲི་ཕྲག་དྲུག་དང་སྟོང་ཚོ་དྲུག །ཐེ་ཚོམ་མེད་པར་ཤེས་པར་གྱིས། །ཞེས་དང་། ཨོ་རྒྱན་རིན་པོ་ཆེའི་ལུང་བསྟན་ལས། ཆོས་རྒྱལ་རིན་ཆེན་གླིང་པས། མོན་སྟག་སྒོ་དོམ་ཚང་ནས་གཏེར་བཏོན་པ་ལས། ཨེ་མ་ཧོ༔ སྣང་མཐའ་རང་བྱུང་ཀུན་བཟང་ཀློང་༔ ཐུགས་རྗེ་ཆེན་པོའི་འོད་ཟེར་གྱིས༔ པདྨ་འབྱུང་གནས་རྒྱས་པར་འགྱུར༔ སྐུ་གསུང་ཐུགས་དང་ཡོན་ཏན་དང་༔ ཕྲིན་ལས་གསུམ་པོའི་དཀྱིལ་
འཁོར་ནས༔ སྤྲུལ་པ་གྲངས་མེད་མཐའ་ཡེས་སྤོ༔ མཁའ་མཉམ་འགྲོ་བའི་དོན་དུ་བྱོན༔ བྱེ་བྲག་མི་མཇེད་འཇིག་རྟེན་འདིར༔ སྤྲུལ་པ་ཡང་སྤྲུལ་བསམ་མི་ཁྱབ༔ ཁྱད་པར་འཇིག་རྟེན་འཛམ་གླིང་འདིར༔ རྒྱ་གར་བལ་ཡུལ་ཨོ་རྒྱན་དུ༔ འགྲོ་དོན་ཉི་ཟླ་ལྟ་བུ་འབྱུང་༔ སྒོས་སུ་བོད་འདིར་ཆོས་གཏེར་གྱིས༔ སངས་རྒྱས་བསྟན་པ་གསལ་བར་བྱེད༔ ང་ཡི་སྤྲུལ་པ་དུ་མ་འབྱུང་༔ འགྲོ་དོན་མ་ངེས་གར་ཡང་སྤྱོད༔ ང་ཡི་གནས་མཆོག་སྦྱངས་ནས་ནི༔ ཐུགས་རྗེ་ལས་བྱུང་རྟ་མགྲིན་དབང་༔ དབྱིངས་ནས་བསྐྱེད་པའི་ཕག་མོ་གཉིས་གཉིས་མེད་ཡེ་ཤེས་མཆོག་གི་སྲས༔ སྐྱེ་བ་མངལ་ནས་སྐྱེ་བ་ཡི༔ ཆོ་འཕྲུལ་ཅིར་ཡང་སྤྲུལ་ནས་སུ༔་མི་མཇེད་ཁམས་སུ་སྤྲུལ་པ་བསྟན་འགྲོ་དོན་ཨོ་རྒྱན་ཡུལ་དུ་མཛད། དགོངས་པ་ལྷ་ཡི་ཡུལ་དུ་རྫོགས༔ དངོས་ཉིད་འཛམ་གླིང་གདུལ་བྱ་སྐྱོངས༔ སྐྱེ་བ་བཅུ་གཅིག་རྒྱ་བོད་དུ༔ མཁས་གྲུབ་རྟོགས་ལྡན་ཚུལ་བཟུང་ནས༔ བསྟན་པ་ཀུན་ཏུ་དར་བ་ཡིས༔ ཟབ་རྒྱས་ཆོས་ཀྱི་ས་བོན་ཐེབ༔ ཨོ་རྒྱན་ང་ཡི་ཟབ་ཆོས་ལ༔ རྩལ་དང་ཡོན་ཏན་རྫོགས་པར་བརྟན༔ མ་འོངས་ལྔ་བརྒྱའི་ཐ་མ་ལ༔ མ་རུངས་གདུལ་བྱར་འདུལ་བ་ཡི༔
ཐུགས་རྗེ་ཆེན་པོ་སྤྱན་རས་གཟིགས༔ རྒྱལ་བ་རྒྱ་མཚོའི་ཕྲིན་ལས་ཀྱིས༔ རྒྱ་བོད་ཧོར་གསུམ་འདུལ་བ་ཡིས༔ དུས་གསུམ་མཁྱེན་པ་མཚུར་ཕུ་ཞེས༔ གྲགས་པ་ཀརྨའི་མིང་ཅན་འབྱུང་༔ ཞེས་དང་༔ མ་གཅིག་ལབ་སྒྲོན་གྱི་གཅོད་ཀྱི་རྣམ་བཤད་ལས། དགེ་སློང་གྲགས་པའི་མཚན་ཅན་ཞེས། དྭགས་པོ་འཛམ་གླིང་གྲགས་པ་དང་། རྒྱལ་བ་འབྲོམ་གྱི་སྐྱེ་བ་དུས་གསུམ་མཁྱེན་པ་ཡིན་པར་གསུངས་པ་ནི། དགེ་སློང་གྲགས་པའི་མཚན་ཐོག་པར་འབྱུང་བ་དང་། གཞན་ཡང་དེ་བས་སྔོན་ཅུང་ཞིག་བྱུང་དུས། རྒྱལ་བའི་རྒྱལ་ཚབ་དམ་པ་དེ་བོད་དུ་འབྱུང་སྟེ་རྒྱལ་བའི་མཚན་ཐོག་པ་དང་། འདི་གཉིས་ནི་བྱང་ཆུབ་སེམས་དཔའ་ཆེན་པོ་ཡིན་པས། འདི་གཉིས་དང་ཁ་ཐུག་པའི་སེམས་ཅན་དེ་དག་ནི། སྙིགས་དུས་བོད་དུ་སྐྱེས་ཀྱང་བསོད་ནམས་ཆེ་རབ་ཏུ་གདའ་ཡི། འདི་གཉིས་ཀྱི་ཡོན་ཏན་བརྗོད་ན། ཕ་མཐའ་ཡས་པ་ནི་རྙེད་དཀའ་དེ་འདུག་གོ །དེ་ཡང་དགེ་སློང་གྲགས་པའི་མཚན་ཅན་ནི། བོད་དུ་སྐྱེ་བ་དེ་ལས་མི་བཞེས་ལ། རྒྱལ་བའི་མཚན་ཅན་ནི་སྐྱེ་བ་ཐོག་མ་ཡིན་ལ། དེ་ཡི་སྐྱེ་བ་ཕྱིར་འབྱུང་བ་ནི། མཁྱེན་པ་གསུམ་དང་ལྡན་པའི་མཚན་ཐོགས་པ་འབྱུང་བ།
དེ་ནས་སྐྱེ་བ་མཚན་གཅིག་པར་བརྒྱུད་དེ་སྐྱེ་བ་འགའ་ཟུང་བར་ལ། བོད་དུ་བསོད་ནམས་བསགས་པའི་ཞིང་གི་མཚན་དུ་འབྱུང་བ་ཡིན་མོད། བྱང་ཆུབ་སེམས་དཔའ་འདི་ནས་བཟུང་ནས་སངས་རྒྱས་ཀྱི་བསྟན་པ་འཇིག་མཐར་བསྡུས་པའི་བར། འདི་གཉིས་དང་མཚུངས་པའི་བྱང་ཆུབ་སེམས་དཔའ་མི་འབྱུང་ལ། སེམས་ཅན་ཡ་ཟུང་ལ་ཕན་ཐོགས་པའི་སྐྱེས་བུ་དམ་པ་ནི་འགའ་རེ་འབྱུང་སྟེ། ཚིག་གི་འཇིགས་པས་ལན་གཅིག་ཕ་མཐར་བཞག་གོ །ཞེས་གསུངས་སོ། །དེ་ལྟར་སྟོན་པའི་བཀའ་དང་། ཨོ་རྒྱན་རིན་པོ་ཆེའི་གཏེར་ལུང་དང་། ཡེ་ཤེས་མཁའ་འགྲོའི་གསུངས་རྣམས་མཚུངས་པར། འཕགས་པ་འཇིག་རྟེན་དབང་ཕྱུག་ཀརྨ་པ། དུས་གསུམ་མཁྱེན་པ་དེ་ཉིད་ནི་ངོ་བོ་ཐུགས་རྗེ་ཆེན་པོ་ལ། རྣམ་པ་བསྐལ་བཟང་གི་སངས་རྒྱས་དྲུག་པ་སེང་གེ་སྒྲའི་དེ་ཉིད་དུ་ཐེ་ཚོམ་མེད་པ་དེས། གནས་ཆེན་པོ་འོག་མིན་ཀརྨ་འདི་གནས་སྒོ་ཕྱེ་བར་བཞེད་དེ། དགུང་ལོ་བདུན་ཅུ་དོན་གསུམ་ལ་ཀཾ་པོ་ནས་འདིར་ཕེབས་ཏེ། སློབ་དཔོན་རྣམས་གླེ་ཐུ་ནས་ཡར་ཕེབས་ཏེ། འགག་རོང་འདིར་ཕེབས་པ་ན། སྔོན་གྲུབ་ཆེན་ཏེ་ལོ་པས་ཨོ་རྒྱན་གྷནྡྷོ་ལའི་གནས་སུ་ཕེབས་པ་ན། སྒོ་སྲུང་ལས་དང་འཇིག་རྟེན་
གྱི་ཤ་ཟ་ཌ་ཀི་རྣམས་ཀྱིས་ཆོ་འཕྲུལ་ཆེན་པོ་བསྟན་ཞིང་ལམ་བཀག་པ་ལྟར། འདིའི་སྒོ་སྲུང་མཁའ་འགྲོ་མ་རྣམས་ཀྱིས་སྟག་དང་གཟིག་ཏུ་སྤྲུལ་ནས་ལམ་བཀག་པ་ན། རྗེ་དྭགས་པོ་རིན་པོ་ཆེས་ལུང་བསྟན་པའི་གནས་ཆེན་དེ་འདིར་ཡོད་པར་འདུག་དགོངས་ནས། གཡས་ལུང་མེ་རག་གི་ལ་ཁ་ནས་གཟིགས་པས། འབུམ་ཐང་སྤང་ལྗོངས་ཡིད་དུ་འོང་བར་མཁའ་འགྲོ་རྣམས་ཀྱིས་བྲོ་གར་བྱེད་པར་གཟིགས། ངར་གདོང་གི་མདོ་འདིར་ཕེབས་ནས་གཟིགས་པས། ལུང་པ་ཐམས་ཅད་སངས་རྒྱས་བྱང་སེམས་དཔའ་བོ་ཌཱ་ཀི་རྣམས་ཀྱིས་ཏིལ་གྱི་གོང་བུ་ཁ་བྱེ་བ་ལྟར་གང་བར་གཟིགས། ཤུག་སྡོང་ལ་སྐུ་རྒྱབ་བརྟེན་ཏེ་བཞུགས་པས་བྱིན་རླབས་ཀྱི་ཚན་ཁ་བླ་ལྷག་ཏུ་འཕེལ་ཏེ། དཔེར་ན་བྱང་ཆུབ་སེམས་དཔའ་རྒྱལ་བུ་དོན་འགྲུབ་བྱང་ཆུབ་ཤིང་དྲུང་དུ་སྐྱིལ་མོ་ཀྲུང་བཅས་པ་ལྟ་བུའོ། །ཡེ་གདོད་མ་ནས་གནས་འདི་ཡི་བདག་པོ་རྗེ་ཉིད་ཡིན་མོད་ཀྱང་། འདུལ་བ་ནས་ས་ཡི་བདག་པོས་མ་བྱིན་ན་སྤངས་བའི་ཁང་པ་དང་གཙུག་ལག་ཁང་སོགས་བྱས་ན་ལྟུང་བར་བཤད་པས། རྒྱུད་སྡེ་རྣམས་ནས་ཀྱང་དཀྱིལ་འཁོར་དང་སྒྲུབ་པའི་ས་གཞི་མི་དང་ས་དེའི་གནས་བདག་ལ་སླང་དགོས་པར་བཤད་པ་དང་མི་
འགལ་བར་བྱས་པའི་ཕྱིར། རུ་བ་འགའ་རེ་ཡོད་པ་ལ་འདིར་སྤྱིལ་པོ་བྱ་ཆོག་གམ་གསུངས་པས། ཆོག་པར་ཞུས། ཀླུ་ཡི་རྒྱལ་པོ་ཇོ་བོ་སྔགས་ཀྱི་བདག་པོ་ཁྱེའུ་ཡིད་དུ་འོང་བ་ཞིག་ཏུ་སྤྲུལ་ནས་ཕྱག་འཚལ་ཞིང་། ཞབས་ཀྱི་ཆུ་མིག་འདི་བདག་གི་ཕོ་བྲང་ལགས་ཏེ། འདིར་གདན་སའི་གཙུག་ལག་ཁང་མཛད་པར་ཞུ། བསྟན་པ་བདག་གིས་བསྲུང་ངོ་ཞེས་ཁས་བླངས། །ཆུ་མིག་གི་མགོ་དེར་ཐུགས་དམ་གཏོར་མ་མཛད་ནས། གདན་ས་མཛད་པར་དགོངས་པ་གཏད་པས། མཉམ་མེད་དྭགས་པོ་ལ་སངས་རྒྱས་བྱང་སེམས་ཀྱིས་བསྐོར་བ་དང་། དཔའ་བོ་ཌཱ་ཀི་མང་པོའང་གར་བསྒྱུར་བ་གཟིགས། བུ་སློབ་ནམ་མཁའི་སྐར་ཚོགས་ཙམ་འདུས་ཏེ་ཕྲིན་ལས་ཀྱི་སྒོ་བྱེ། བླ་མ་དང་ཡི་དམ་གྱིས་ལུང་བསྟན་པ་ལྟར། དཀར་འཛང་དུ་ཟླ་བ་དྲུག་ཕག་མོ་བསྒྲུབས་པས་ནུབ་ཕྱོགས་ནས་འོད་དམར་པོའི་སྣ་ལ། བཅོམ་ལྡན་འདས་མ་འཁོར་དང་བཅས་པ་ཞལ་གཟིགས་པས་གདན་ས་ཕག་མོའི་སྒྲུབ་གནས་མཆོག་ཏུ་གྱུར་ཏེ། དགུང་ལོ་བདུན་ཅུ་དོན་དྲུག་རབ་བྱུང་གསུམ་པའི་ཤིང་མོ་སྦྲུལ་གྱི་ལོ་ལ། ཆུ་མིག་གི་སྟེང་ལ། ད་ལྟ་བླ་མ་ལྷ་ཁང་འདི་དང་། ཕྱི་ཁྱམས་དགེ་འདུན་གྱི་འདུ་ཁང་གི་རྣམ་པ་ཙམ་མཛད་དེ། གཞི་
བདག་ལ་བཀའ་བསྒོས་པ་དང་། གནས་སྒོ་ཕྱེ་ཞིང་གདན་ས་ཆགས་བཏབ་པའི་ལེའུ་སྟེ་གསུམ་མོ།། ༈ །།བཞི་པ་གནས་བཤད་དཀར་ཆག་ལའང་གཉིས་ཏེ། ཕྱིའི་གནས་བཤད་དང་ནང་གི་རྟེན་བཤད་དོ། །དང་པོ་གནས་བཤད་ནི། འཕགས་པ་འཇིག་རྟེན་དབང་ཕྱུག་ཀརྨ་པའི་གནས། སྐུ་ཡི་གནས་ཀཾ་པོ་གངས་ཀྱི་ར་བ། གསུང་གི་གནས་ཀརྨ་རི་གླིང་། ཐུགས་ཀྱི་གནས་སྟོད་ལུང་མཚུར་ཕུ། ཡོན་ཏན་གྱི་གནས་འདབ་སྤང་ཕུག །ཕྲིན་ལས་ཀྱི་གནས་ཤར་ཕྱོགས་སྤུངས་རི། ཞེས་ཡོངས་སུ་གྲགས་ཤིང་། །གཞན་ཡང་ཀརྨ་པའི་གནས་དང་གདན་ས། དགོན་གནས་སྒྲུབ་སྡེ་རྣམས་གསར་རྙིང་དཔག་ཏུ་མེད་པ་ཡོད་ཅིང་། དེ་རྣམས་ཀྱི་ནང་ནས་གནས་དང་གདན་སའི་གཙོ་བོ་ནི། འོག་མིན་ཀརྨ་འདི་ཉིད་ཡིན་ཏེ། གནས་འདིར་བཞུགས་པ་ལ་བརྟེན་ནས་གནས་ཀྱི་མིང་གང་ཟག་ལ་ཐོགས་ནས་བླ་མ་ཀརྨ་པ་ཞེས་ཡོངས་སུ་གྲགས་པའི་ཕྱིར་ཏེ། དཔེར་ན་ས་སྐྱ་པ་ལ་གདན་ས་དཔག་ཏུ་མེད་ཀྱང་། གཙང་ས་སྐྱ་ལ་བརྟེན་ནས་ས་སྐྱ་ཞེས་མིང་ཐོགས་པས་གཙང་ས་སྐྱ་གདན་སའི་གཙོ་བོ་ཡིན་པ་ལྟ་བུའོ། །དེ་ལ་མདའི་ལུང་པ་འདི་གསུམ་དབུ་རྐྱང་རོ་གསུམ་གྱི་
མཚོན་བྱེད་ཡིན་ནོ། མདའ་ཡི་འགགས་འདི་ནང་ཕྱིའི་སྒོ་སྲུང་གི་ཚུལ་དུ་དམ་ཅན་སྐྱེས་བུའི་ཕོ་བྲང་ཡོད་པས། དམ་ཅན་འགགས་ཞེས་གྲགས། དེ་ནས་དཔལ་ལྡན་ལྷ་ཡི་ཕོ་བྲང་། །རྗེ་དུས་མཁྱེན་གྱི་དབུ་རྗེས་སོགས་ཡོད། གྲུབ་ཆེན་ཀརྨ་པ་རྒྱ་ནག་ནས་བྱོན་དུས་སྐྱེས་བུ་ཆེན་པོས་རྟག་ཏུ་ཆིབས་ཁ་བྱེད་པ་ལ།་ཡར་བྱོན་དུས་བྲག་འདི་ལ་ཐིམ་པར་གྲགས་སོ། །ལུང་མདའ་འདི་ན་རྗེ་དུས་མཁྱེན་གྱི་ལུས་མཆོད་སྦྱིན་གྱིས་ཏིང་ངེ་འཛིན་མཛད་པས། དངོས་སུ་གྱུར་པའི་རྗེས་ཕ་ཝང་ལ་གསལ་བར་ཡོད་པར་གྲགས་ཏེ་དུར་ཁྲོད་ཀྱི་མཚོན་བྱེད་རང་བྱུང་གི་དུར་ཁྲོད་ཡིན་ནོ། །རྗེ་དུས་མཁྱེན་གྱི་དབུ་ལོ་གཏོར་བ་ལས་སྐྱེས་པར་གྲགས་པའི་ནགས་རི་གསུམ་པོ་གདུགས་ཕུབ་པའི་ཚུལ། སྤངས་ལ་གསེར་ཉ་རང་བྱོན། དུས་མཁྱེན་གྱི་གྲུབ་ཆུ་ལ་དགུན་འཁྱག་ལ་དུང་དཀར་རང་བྱོན་གྱི་གཟུགས། རྒྱབ་རིའི་བྲག་གཉིས་བདེ་མཆོག་ཡབ་ཡུམ་གྱི་ཚུལ། དེའི་རྩེ་ལ་དུས་མཁྱེན་རང་བྱོན། རྗེ་ཞྭ་དམར་པས་གཟིགས་པ་ཡོད་དེ། །འདི་ཤིན་ཏུ་གསལ་ཞིང་བྱིན་རླབས་ཀྱང་དཔག་ཏུ་མེད་པ་འབྱུང་བ་ཡིན་ཏེ། ཕལ་པས་གསལ་པོར་མི་མཐོང་བ་དེ་ཅི་ཡིན་ཨང་། ཞེས་སྤྲུལ་སྐུ་མི་འགྱུར་རྡོ་རྗེས་ཀྱང་གསུངས་སོ། །རྒྱབ་
རིའི་བྲག་རྩ་ན་རྗེ་དོན་ལྡན་ཞབས་ཀྱིས་རྫུ་འཕྲུལ་གྱིས་བྲིས་པའི་ཡི་གེ་དྲུག་པ་དང་། གཞན་ཡོང་རྒྱབ་རིའི་བྲག་ལ་རང་བྱོན་མང་དུ་ཡོད་དེ། དེ་རྣམས་དུས་ལ་མ་བབ་སྟོན་མི་རུང་གསུངས་སོ། །གཏེར་ཁ་ཡང་མང་དུ་ཡོད་དེ་འདོན་མི་རུང་གསུངས། བཅུད་ཀྱི་གཏེར་ཡིན་པས་འདོན་རྒྱུ་མེད་གསུངས་སོ། །རྗེ་དྭགས་པོའི་ལུང་བསྟན་པའི་བྲག་ཚེས་བརྒྱད་ཀྱི་ཟླ་བ་འདྲ་བ་འདི་ནི། ཐུགས་རྗེ་ཆེན་པོ་རྒྱལ་བ་རྒྱ་མཚོའི་དཀྱིལ་འཁོར་པདྨ་དབང་གི་ཟླ་གམ་རང་བྱུང་ཡིན་པས་གནས་འདི་པདྨ་གསུང་གི་གནས་ཡིན་ནོ། །སྤྱིར་བྲག་སོགས་ས་འོག་ཏུ་གནས་མཇལ་རྒྱུ་ཡོད་པ་རྣམས་ནི། ས་འོག་སྐུའི་འཁོར་ལོའི་གནས། གངས་ཏི་སེའི་རི་རྩེ་ན་བདེ་མཆོག་གི་དཀྱིལ་འཁོར་ཡོད་པ་ལྟ་བུ་ནི། མཁའ་སྤྱོད་ཐུགས་ཀྱི་འཁོར་ལོའི་གནས་སོ། །ས་ཡི་སྟེང་ན་དཔའ་བོ་ཌཱ་ཀི་འདུ་བའི་གནས་རྣམས་ས་སྤྱོད་གསུང་གི་འཁོར་ལོའི་གནས་ཡིན་པས། འབུམ་ཐང་གི་སྤང་ལྗོངས་ཉམས་དགའ་བ། འབུ་སྲིན་སོགས་མེད་པ་འདི་ནི། གནས་འདི་ཡི་གཙོ་བོ་ཡིན་ཏེ། ལས་དག་པ་རྣམས་ཀྱི་གཟིགས་ངོར་གསུང་གི་བདེ་མཆོག་དམར་པོ་ཡབ་ཡུམ། ས་སྤྱོད་གསུང་གི་འཁོར་ལོ་དཔའ་བོ་བརྒྱད་དང་། །
དཔའ་མོ་བརྒྱད། རེ་རེ་ལ་འཁོར་དཔའ་བོ་ཌཱ་ཀི་འབུམ་ཕྲག་གིས་བསྐོར་ནས་བཞུགས་སོ། །རྗེ་དུས་གསུམ་མཁྱེན་པས་མཁའ་འགྲོ་མ་འབུམ་ཕྲག་གིས་བྲོ་གར་བྱེད་པར་གཟིགས་པས་འབུམ་ཐང་དུ་གྲགས་སོ། ༧ །གནས་འདི་ཡི་འོག་གཞི་སའི་འོག་ཏུ་དེ་བཞིན་གཤེགས་པ་ཀླུ་དབང་རྒྱལ་པོའི་ཕྲིན་ལས་སྤྲུལ་པ། ས་དྲུག་ལ་གནས་པའི་བྱང་ཆུབ་སེམས་དཔའ་ཀླུ་ཡི་རྒྱལ་པོའི་མི་ཚུལ་འཛིན་པ། ཇོ་བོ་སྔགས་བདག་སོག་མ་མེད་ཀྱི་ཕོ་བྲང་ཡོད་དེ། ཕྱག་ན་རྡོ་རྗེས་མཆོད་རྟེན་སྔོན་པོའི་རྒྱུད་ཆེན་པོ་དང་། རས་ཆུང་གི་ལུགས་ཀྱི་ཁྱུང་གི་ལོ་རྒྱུས་དང་སྒྲུབ་པ་བཀའ་བརྒྱད་ཀྱི་རྒྱུད་དང་འདུལ་བ་སོགས་ལས་སྔགས་བདག་ཀླུ་ཐམས་ཅད་ཀྱི་གཙོ་བོ་དང་རྒྱལ་པོ་ཡིན་ཅིང་། ཀླུ་ཆེན་བརྒྱད་ཀྱང་འདི་ཡི་འཁོར་ཡིན། ཀླུ་རིགས་ཐམས་ཅད་འདིའི་བྲན་དང་ཕོ་ཉ་ཡིན་ཅིང་། འཇིག་རྟེན་གྱི་བདེ་སྡུག་དང་སྐྱེ་འགྲོའི་དར་རྒུད། ལོ་ལེགས་ཉེས་ཐམས་ཅད་འདིའི་དབང་ཆེ་བར་བཤད་ཅིང་། འདིའི་སྲས་རི་བོ་ཞེས་བྱ་བ་ཤིན་ཏུ་ཁྲོ་གཏུམ་ཆེ་བ་ཞིག་ཡོད་པ་དེ་ལ་བཅོམ་ལྡན་འདས་ཀྱིས་ཀྱང་དགེ་བསྙེན་གྱི་སྡོམ་པ་མ་གནང་བར་ལས་མཁན་དུ་བཞག་པར་བཤད་པས། འདི་ཡི་གཡས་གཡོན་གྱི་ཆུ་མིག་རྣམས་ཤིན་ཏུ་
གཉན་པས། བཤང་གཅི་སོགས་ཆུ་མིག་གི་ཉེ་ལོགས་སུ་མ་སོང་བ་གལ་ཆེ། ཀླུ་གཏོར་དང་། ཀླུ་མཆོད་སོགས་བྱས་ན། ཀླུ་ནད་ཐམས་ཅད་ཞི་བ་དང་། ལོངས་སྤྱོད་མངའ་ཐང་རྒྱས་པའི་དངོས་གྲུབ་ཐམས་ཅད་ངེས་པར་འབྱུང་སྟེ། པཎ་ཆེན་ཤཱཀྱ་ཤྲཱིའི་ཛམ་བྷ་ལ་སེར་པོ་དང་སྔགས་བདག་གཉིས་ངོ་བོ་གཅིག་པར་གསུངས་སོ། །གནས་འདིའི་ཞིང་སྐྱོང་བཀའ་སྲུང་ནི། ཡེ་ཤེས་ཀྱི་མ་མགོན་ལྕམ་དྲལ་དང་། ལས་ལ་གྲུབ་པའི་ཀླུ་རྒྱལ་གཞོན་ནུ་གཏུམ་པོ། འཇིག་རྟེན་གྱི་དགེ་བསྙེན་དཔལ་ལྡན་ཤེས་རབ་དང་པདྨ་ཚུལ་ཁྲིམས་རྣམས་ཡིན་ཏེ། དཔལ་ལྡན་ཤེས་རབ་འདི་ནི་སངས་རྒྱས་སྟོང་གི་བསྟན་པ་སྲུང་བའི་དགེ་བསྙེན་ཆེན་པོ་གཅིག་ལགས་སོ། །དེ་ནི་ཕྱིའི་གནས་བཤད་མདོར་བསྡུས་པའོ། ༈ གཉིས་པ་ནང་གི་རྟེན་བཤད་ལ། འབུམ་གསུམ་དབུས་མའི་མཆོད་རྟེན་འདིའི་ནང་ན། རྗེ་དུས་གསུམ་མཁྱེན་པའི་རིང་བསྲེལ་གདུང་ཐལ་རུས། དབུ་ལོ་ན་བཟའ། བཅོམ་ལྡན་འདས་ཤཱཀྱ་ཐུབ་པའི་འཕེལ་གདུང་། རྒྱ་བོད་མཁས་གྲུབ་མང་པོའི་རིང་བསྲེལ་དཔག་ཏུ་མེད་པ་བཞུགས་ཤིང་འགྲོ་མགོན་རས་ཆེན་གྱིས་རབ་གནས་མཛད་ཉིན། རྗེ་དུས་མཁྱེན་ཉིད་
དངོས་སུ་བྱོན་ནས་བྱིན་གྱིས་བརླབས་པར་མི་ཐམས་ཅད་ཀྱིས་དངོས་སུ་མཐོང་ངོ། །གདུང་འབུམ་ཤར་གཡས་མ་འདི་སངས་རྒྱས་རས་པ་ཆེན་པོའི་གདུང་འབུམ་ཡིན་ཏེ། གདུང་ཐལ་རུས་རིང་བསྲེལ་བརྒྱུད་པའི་དབུ་ལོ་ན་བཟའ། སངས་རྒྱས་ཀྱི་འཕེལ་གདུང་། རྗེ་ཉིད་ཀྱི་གསོལ་ཞལ་སྡེར་སོགས་རྟེན་བཟང་དགུ་བཞུགས་སོ། །ནུབ་ངོས་གདུང་འབུམ་གཡོན་མ་འདི་དུས་མཁྱེན་དངོས་སློབ་མཁས་པ་དབང་གི་རྡོ་རྗེའི་གདུང་འབུམ་ཡིན་ཏེ་འབུམ་གསུམ་སྟེང་གི་གསེར་གདུགས་གསུམ་འདི་ནི། ཇོ་བོ་ཤཱཀྱ་མུ་ནེ་རྒྱ་ནག་ཡུལ་དུ་བཞུགས་དུས་ཀྱི་དབུ་གདུགས་ཏེ། མཆོག་ཟུང་གཉིས་དང་ཇོ་བོ་གཙོ་འཁོར་གསུམ་གྱི་དབུ་གདུགས་ཡིན་པ་ལ། ཇོ་བོ་བོད་དུ་བྱོན་རྗེས་རྒྱ་ནག་གིས་མ་ཆུན་ནས། དེ་མཇལ་བ་ཐམས་ཅད་ལ་ཆོ་འཕྲུལ་མ་རུངས་པ་ཁོ་ན་བྱུང་བས། བྱེ་མའི་འོག་ཏུ་སྦས་ནས་དེར་མི་འགྲོ་མི་ཕོད་པ་ལ། གྲུབ་ཆེན་ཀརྨ་པཀཱིས་བཏོན་ནས། ས་འོག་ནས་ཀླུ་ལ་བསྐུར་ནས་གསེར་རྟགས་སུམ་མདོ་ནས་བུད་པར་གྲགས་ཏེ། ལྟས་ངན་གཡང་དུ་ལེན་མི་དེ། །སྐྱེས་མཆོག་ཀརྨ་པཀྴི་ཡིན། །ཞེས་རྣམ་ཐར་འགའ་ཞིག་ལས་བྱུང་ངོ། །བཞུགས་ཁྲི་འདི་ནི་གྲུབ་ཆེན་ཀརྨ་པཀྵིའི་བཞུགས་ཁྲི་
སྟེ། ན་རིམ་ཐམས་ཅད་རིམ་པར་བཞུགས་པའི་བྱིན་རླབས་ཅན་ཡིན། རྡོ་འདི་ནི་སི་ཏུ་སྤྲུལ་པའི་སྐུ་འདི་ཉིད་སྐུ་ཕྲ་མོའི་དུས་སུ་ཆུ་འགྲམ་གྲམ་ཁྲོད་ནས་བཏོན་པ་ཡིན། ༧ གསེར་འབུམ་འདི་ནི་དཔལ་ལྡན་འབྲས་སྤུང་གི་མཆོད་རྟེན་གྱི་བཀོད་པ། གྲུབ་ཆེན་རིན་པོ་ཆེ་ཉིད་ཀྱི་ཞལ་བཀོད་གནང་ནས་བཞེངས་ཏེ། གྲུབ་ཆེན་ཀརྨ་པ་ཉིད་ཀྱི་ཚེམས་རིང་བསྲེལ་ཅན་དང་། སངས་རྒྱས་ཀྱི་འཕེལ་གདུང་ལ་སོགས་པ་རྟེན་བཟང་བར་བཞུགས་སོ། ༈ །ཡ་ཀིའི་ཁང་པ་འདི་ཡི་ནང་ན། རྗེ་དུས་མཁྱེན་གྱི་སྐུ་རྒྱབ་གཏད་པའི་ཤུག་སྡོང་བྱིན་རླབས་ཅན། མཆོད་རྟེན་སོགས་བཞུགས་པ་ནི། རྗེ་དུས་མཁྱེན་ཐོག་མར་བཞུགས་མལ་ཡིན་པས་བྱིན་རླབས་ཆེའོ། །སྤོམ་བྲག་གདོང་གི་མཆོད་རྟེན་ཡ་ཀི་ནི། རྗེ་སྤོམ་བྲག་པའི་གདུང་རིལ་པོར་བཞུགས་ཏེ། ཞལ་ཕུ་ལ་གཟིགས་པས་དགོན་པ་འདི་ལ་བཤའི་གནོད་པ་བཟློག་པ་ཞལ་ཙམ་ཡིན་ཏེ། དེ་ཡང་ཨོ་རྒྱན་རིན་པོ་ཆེ་པདྨ་འབྱུང་གནས་ཀྱི་ལུང་བསྟན་ཆེན་པོ་བཀའ་རྒྱ་མ་ལས། ད་ལྟའི་རྣལ་འབྱོར་ལོ་གྱི་ཆུང་བམ་ཁྱོད། །སྨོན་ལམ་དབང་གིས་སྦྱངས་བའི་ལས་སད་དེ། །དེང་སང་མངའ་བདག་ཐུགས་སྲས་སླད་ཀྱི་ཚེ། །མི་
འགྱུར་ལྷུན་པོའི་གནས་བརྟན་ཆོས་ཁྲིམས་བདག །སྐྱེ་བ་བདུན་ཕྲག་གསུམ་དུ་བྱེད་པ་སྟེ། །བར་ཚིག་ཞིག་རལ་གསོ་བྲན་བརྩོན་བྱེད་པ། །བསོད་ནམས་མིང་འཛིན་ལོངས་སྤྱོད་ཕུན་སུམ་ཚོགས། །མངའ་རིས་ཆོས་སྲིད་ལེགས་པའི་དཔལ་དང་ལྡན། །བག་དྲོ་ལྷུན་ཆགས་གཟི་བརྗིད་ལྡན་པ་འབྱུང་། །ཞེས་གསུངས་ཏེ། བཅོམ་ལྡན་འདས་བཛྲ་ཧེ་རུ་ཀའི་སྤྲུལ་པ། རྒྱ་གར་གྱི་རིག་འཛིན་ཧཱུཾ་ཆེན་ཀ་ར། བོད་ཀྱི་རྗེ་འབངས་ལོ་ཙཱ་ཁྱེའུ་ནམ་མཁའི་བྱ་འཛིན་དེ་ཉིད་གྲུབ་ཆེན་ཀརྨ་པ་ཆེན་པོའི་རིགས་ཀྱི་བདག་པོ་མཛད་པའི་ཕྱིར། བསམ་བཞིན་དུ་སྐྱེ་བ་བཞེས་ཏེ། སྤོམ་བྲག་པ་བསོད་ནམས་རྡོ་རྗེ་དེ་ཉིད་ཡིན་པས། འདི་ཡི་གདུང་འབུམ་འདི་ལ་ཕྱག་དང་བསྐོར་བ་མར་མེ་སོགས་ཕུལ་ན། དམ་ཚིག་དང་སྡོམ་པ་ཉམས་ཆག་ཐམས་ཅད་བསྐང་སྡིག་སྒྲིབ་ཐམས་ཅད་སྦྱངས། ཁྱད་པར་འདིའི་མདུན་དུ་གནས་ཞག་བྱས་ན་སོ་ནད་དང་བད་ཀན་སྨུག་པོའི་ནད་ལ་ཕན་པ། རྗེ་ཉིད་ཀྱི་འདའ་ཁའི་སྨོན་ལམ་ཡིན་པར་གྲགས་སོ། །རི་ཕའི་སྒྲུབ་སྡེ་འདི་ནི། རྗེ་རང་བྱུང་བས་བཙུགས་པ་སྟེ། དེ་ཡང་འཇམ་དཔལ་རྩ་རྒྱུད་ལེའུ་སོ་དྲུག་པ་ལུང་བསྟན་གྱི་ལེའུ་ལས། རྒྱ་གར་གྱི་སློབ་དཔོན་དཔའ་བོ་ལུང་བསྟན་
པ་ནི། དགེ་སློང་མང་དུ་ཐོས་པ་ནི། །།དེ་ཡི་ཚེ་ན་འབྱུང་འགྱུར་པ། །མ་ཁོལ་ཞེས་ཀྱང་བྱ་བ་སྟེ། །ང་ཉིད་ཀྱང་ནི་བསྟོད་བྱེད་པ། །ཞེས་སོགས་ནས་མཇུག་ཏུ། དེ་ལུས་ཞིག་ནས་མཐོ་རིས་འགྲོ། །ཞེས་གསུངས་ཤིང་། དེའི་སྐྱེ་བ་ཀརྨ་རང་བྱུང་རྡོ་རྗེ་ལུང་བསྟན་པ་ནི། ལྷ་རྣམས་ལས་ནི་ཚེ་འཕོས་ནས། །མི་རྣམས་ནང་དུ་ཉེ་བར་སྐྱེས་ནས་ནི། །ང་ནི་བསྟན་ལ་རབ་ཏུ་ཞུགས། །རང་བྱུང་བདག་ཉིད་ཆེན་པོ་ནི། །དེ་ཚེ་དེ་བཞིན་འབྱུང་བར་འགྱུར། །མ་ཁོལ་ཞེས་བྱ་བརྟུལ་ཞུགས་ཅན། །དེ་ཚེ་དེ་ནི་འབྱུང་བར་འགྱུར། །ཇི་བཞིན་དོན་ནི་སྟོན་པའི་མཆོག །རྣམ་པ་སྣ་ཚོགས་དཔེ་དག་གིས། །འབྱུང་པོ་ཀུན་ལ་ཕན་པའི་ཕྱིར། །ལེགས་པར་བཤད་པ་རབ་བྱེད་པ། །སེམས་ཅན་རྗེས་སུ་བཟུང་བའི་ཕྱིར། །བསྟོད་པ་བརྗོད་པ་གཙོ་བོར་བྱེད། །དུས་དེར་འཇིག་རྟེན་སྨད་པ་ལ། །དེ་ཡི་ཚེ་ནི་འབྱུང་བར་འགྱུར། །རྣམ་པར་སྨིན་པ་དེ་ཡི་ནི། །ལུས་ཞིག་ནས་ནི་མཐོ་རིས་འགྲོ། །བློ་ལྡན་དེ་ནི་མཐར་གྱིས་ནི། །སྡོམ་པ་སྣ་ཚོགས་བདེར་མྱང་ནས། །བསམ་གྱིས་མི་ཁྱབ་མཆོག་གསུངས་པའི། །ཐམས་ཅད་མཁྱེན་པའི་བྱང་ཆུབ་འཐོབ། །ཅེས་
དང་། ཨོ་རྒྱན་རིན་པོ་ཆེའི་ལུང་བསྟན་རིན་ཆེན་གླིང་པའི་གཏེར་མ་ལས། མི་ཡི་སེང་གེ་སྤྲེལ་ལོ་པ༔ དཔའ་བོ་ཆེན་པོ་གཟི་མདངས་ཅན༔ མིའུ་ཐུང་མགོན་པོ་གཟུགས་མཛེས་པ༔ རབ་བྱུང་ཆས་ལ་ཞྭ་ནག་འཛིན༔ སྤྱན་མིག་ཆོས་དབྱིངས་གྱེན་ལ་གཟིགས༔ སྨེ་བ་ཡི་གེ་ཤ་མཚན་ཅན༔ གསང་བའི་མིང་ནི་གྲགས་པ་ཡིས་རང་བྱུང་ཡེ་ཤེས་རཏྣའི་མཚན༔ ཆོས་རྣམས་ཀུན་གྱི་བདག་པོར་འགྱུར༔ ཡིད་བཞིན་ནོར་བུ་རིན་ཆེན་སྐུ༔ གང་གིས་མཐོང་ཐོས་དྲན་རེག་ཙམ༔ དོན་ཀུན་འགྲུབ་ཅིང་འབྲས་བུ་འཐོབ༔ གཞན་རྐྱེན་བར་ཆད་མ་བྱུང་ན༔ བརྒྱད་ཅུ་རྩ་གཅིག་བར་དུ་འཚོ༔ ས་སྐྱོང་རྒྱལ་པོའི་མཆོད་གནས་བྱེད༔ ཧོར་དང་སོག་པོ་ཐབས་ཀྱིས་འདུལ༔ རྒྱ་ནག་སྐུ་ཡི་གདུལ་བྱར་བཀོད༔ གསུང་དབྱངས་སེང་གེའི་ང་རོ་ཡིས༔ བདུད་དང་མུ་སྟེགས་ཚར་བཅད་ནས༔ ཟབ་དང་རྒྱ་ཆེའི་ཆོས་སྒྲ་སྒྲོག༔ དབུས་གཙང་ཁམས་གསུམ་གདུལ་བྱར་བཀོད༔ སྐལ་ལྡན་གསོལ་བཏབ་བརྒྱར་གཉེར་ན༔ སྟོང་ཕྲག་དྲུག་ཅུའི་འཁོར་ཚོགས་བསྐོར༔ འབུམ་ཕྲག་དྲུག་ཅུ་ཆོས་ལ་བཀོད༔ སྒོམ་བརྒྱུད་ཡོངས་ཀྱི་བསྟན་པ་འཛིན༔ དུས་གཅིག་སྐྱེ་བ་ལྔ་བཟུང་ནས༔ ཞིང་
ཁམས་ལྔ་ལ་དབང་སྒྱུར་བྱེད༔ ལྷན་སྐྱེས་ཡེ་ཤེས་མཆོག་རྩལ་སྦྱངས༔ ཐུགས་ཀྱི་དགོངས་པ་སྐད་ཅིག་ལ༔ དཔག་མེད་འགྲོ་བ་བདེ་ལ་བཀོད༔ ས་བཅུ་ལ་གནས་སེམས་དཔའ་ཆེ༔ ཀུན་མཁྱེན་ཡེ་ཤེས་ངང་གིས་གསལ༔ པདྨ་ང་དང་གཉིས་སུ་མེད༔ འབྲེལ་ཚད་དོན་ལྡན་སྟོབས་པོ་ཆེ༔ མཁའ་མཉམ་འགྲོ་བ་སྐལ་ལྡན་ལ༔ གསང་གསུམ་འབྲས་བུ་ངོ་སྤྱོད་ཀྱིས༔ བདེ་བ་ཆེན་པོར་འགོད་བྱེད་པ༔ བཅོམ་ལྡན་སེང་གེའི་མཚན་དང་ལྡན༔ བྱམས་མགོན་ཐུགས་རྗེ་ཆེན་པོའི་སྲས༔ འཁོར་བ་དོང་སྤྲུགས་ཞེས་བྱ་བ༔ བདེ་བར་གཤེགས་པའི་ལུང་བསྟན་པའི༔ ཕྱི་ཡི་ལུང་བསྟན་མདོ་ལས་འབྱུང་༔ ནང་གི་ལུང་བསྟན་བླ་མའི་གསུངས༔ འདི་ནི་གསང་བའི་ལུང་བསྟན་ཡིན་མངའ་བདག་རྗེ་བློན་ཐུགས་ལ་ཞོག༔ མ་འོངས་དུས་སུ་ཀུན་ལ་གྲགས༔ འཛམ་གླིང་ཀུན་གྱི་དཔལ་དུ་ཤོག༔ ཅེས་གསུངས་སོ། །ཞེས་ཐུབ་པ་ཨོ་རྒྱན་རིན་པོ་ཆེ་གཉིས་ཀས་གསལ་བར་ལུང་བསྟན་པའི། རང་བྱུང་རྒྱལ་བ་ཆེན་པོ་དེ་ཉིད་སྒོམ་བརྒྱུད་ཡོངས་ཀྱི་བསྟན་པའི་བདག་པོ་ཡིན་པས། ཀརྨ་རི་པ་བཙུགས་ནས་ཐུགས་རྩེ་གཅིག་ཏུ་གཏད་པ་ཡིན་པས། རི་པ་འདིར་
གནས་འབྲེལ་ཡུད་ཙམ་བྱས་ན་ཡང་། ཉམས་རྟོགས་ཀྱི་ཡོན་ཏན་གོང་དུ་འཕེལ། རྟོགས་པའི་བོགས་ཐོན་པ་ཡིན་པས། ཞི་ཕྱག་རྫོགས་གསུམ། དབུ་མ་བློ་སྦྱོང་། ཆོས་དྲུག་རིམ་ལྔ། དམར་ཁྲིད་སྦྱོར་དྲུག་གང་བསྒོམས་ཀྱང་། གནས་འདིར་བསྒོམས་ན་གེགས་དང་གོལ་ས་མེད་ཅིང་ཉམས་རྟོགས་ཀྱི་རྩལ་མྱུར་དུ་རྫོགས་པར་ངེས་སོ། །བྱམས་ཆེན་ལྷ་ཁང་དུ་ཕྱིན་ནས། དེ་ཡང་ཨོ་རྒྱན་རིན་པོ་ཆེས་མ་འོངས་ལུང་བསྟན་ལས༔ ད་ལྟའི་ལོ་ཙཱ་ཡེ་ཤེས་བྱ་བ་ཁྱོད༔ བོད་འདིར་སྦས་པའི་ཚུལ་གྱིས་གནས༔ དེ་རྗེས་སྤྱོད་པ་དཔག་མེད་རྣལ་འབྱོར་སྤྱོད་པ་བྱེད༔ ལན་གཅིག་ཨོ་རྒྱན་མཁའ་འགྲོའི་གནས་སུ་འགྲོ་དོན་མཛད༔ ལྔ་བརྒྱ་དུས་ཀྱི་ཐ་མ་ལ༔ དབུས་ཀྱི་ས་ཆ་འདི་ཉིད་དུ༔ དུས་གསུམ་མཁྱེན་པ་བྱ་བ་འབྱུང་༔ སྲོད་པ་རླབས་ཆེན་རྫུ་འཕྲུལ་སྟོན༔ འགྲོ་དོན་ཁམས་ཀྱི་ས་རུ་འོང་༔ སྐྱེ་བ་འདི་ཡི་ཕྱི་མ་ལ༔ ཀརྨ་པཀྴི་བྱ་བ་འབྱུང་༔ མཐའ་དམག་འདུལ་བའི་ཕ་ལྟར་འཁྲུངས༔ ཞེས་དང་༔ དེ་ཡང་བཙུན་པ་རྒྱལ་བ་མཆོག་དབྱངས་ཁྱོད༔ ཚེ་རབས་སྔོན་ནས་སེམས་བསྐྱེད་སྨོན་ལམ་ལྡན༔ རྒྱལ་བའི་མཐུ་རྩལ་ཤུགས་དང་དམ་ཚིག་ལྡན༔་དབང་ཆེན་ལྷ་ཡི་བརྟན་ཐོབ་དབང་སྐད་
སྒྲོགས༔ སྨོན་ལམ་མཐུ་བཙན་འཁོར་བ་མ་སྟོངས་བར༔ འགྲོ་བའི་དོན་བརྩོན་འཛམ་གླིང་ཡོངས་ལ་ཁྱབ་ཁྱད་པར་མ་འོངས་བསྐལ་པ་མར་འགྲིབ་དུས༔ ཤཱཀྱའི་ཞིང་ཁམས་ཁ་བ་ཅན་གྱི་ལྗོངས༔ སྤྱན་རས་གཟིགས་ཀྱི་ཕྲིན་ལས་ངེས་མཛད་ཅིང་༔ སྔགས་ཀྱི་རྣལ་འབྱོར་བརྟུལ་ཞུགས་ཉམས་དང་ལྡན༔ མི་སྨྱོན་ཀརྨའི་མིང་ཅན་རྒྱལ་ཁམས་ཉུལ༔ ས་སྐྱོང་རྒྱལ་པོའི་མཆོད་གནས་བྱེད་པར་འགྱུར༔ དེ་ཚེ་རིམ་བཞིན་བསྟན་པའི་མེ་རོ་བསླང་༔ འགྲོ་འདུལ་ཐབས་མཁས་སེམས་ཅན་སྐྱོབ་པར་བྱེད༔ ཞེས་ལུང་བསྟན་པའི་གྲུབ་ཆེན་ཀརྨ་པ་དེ་ཉིད་གདན་ས་འདིར་ཕེབས་པས། རྗེ་དུས་གསུམ་མཁྱེན་པ་ལ་བཀའ་བརྒྱུད་བླ་མ་དཔག་ཏུ་མེད་པ་དང་། མཁའ་འགྲོ་མ་དཔག་མེད་ཀྱིས་སྐོར་བ་བྱེད་པ་དང་། དེ་རྣམས་ཀྱིས་གདན་སར་དར་རྒྱས་གྱིས་གསུངས་པ་དང་ལུང་པ་འདི་ཐམས་ཅད་རིང་བསྲེལ་གྱི་ཕྱུར་བུར་གང་བ་གཟིགས་པས། གདན་ས་གཞན་ལས་ཁྱད་པར་དུ་འཕགས་པ་མཁྱེན་ནས། ཕྱོགས་བཅུའི་སངས་རྒྱས་དང་མཁའ་འགྲོ་མ་རྣམས་ཀྱིས་མཚན་ཀརྨ་པ་ཞེས་གསོལ་བ་དང་། གནས་ཀྱི་མིང་དང་མཐུན་པ་ཀརྨ་པ་ཞེས་ཡོངས་སུ་གྲགས་སོ། །སྤྱན་རས་
གཟིགས་ཀྱི་གནས་འདི་ན་བྱམས་ཆེན་ཀྱི་སྐུ་དང་ལྷ་ཁང་བཞེངས་པ་དང་། དགའ་ལྡན་ནས་འོད་ཟེར་མི་རྣམས་ལ་བཀྱེ་བས་འགྲོ་དོན་རྒྱ་ཆེན་པོ་འགྲུབ་བོ། །ཞེས་གསུངས་པས་བཞེངས་པར་དགོངས་པ་ན། སྟེང་ཕྱོགས་དགའ་ལྡན་ལྷ་ཡི་ཡུལ་ནས། རྒྱལ་བ་བྱམས་པའི་སྐུ་ལས་འོད་ཟེར་འབུམ་ཕྲག་དུ་མ་སྤྲོས་ཏེ་འཇིག་རྟེན་ཐམས་ཅད་སྣང་བར་མཛད་དོ། །འོད་དེ་གཅིག་ཏུ་འདུས་པ་ལས། བྱམས་ཁང་གི་ཐད་ཀྱི་ནམ་མཁའ་ལ། བྱམས་པ་སྐུ་ཚད་རྒྱན་ཆ་ལུགས་འདི་འདྲ་བ་ཞིག་གཟིགས་པ་ལ་བརྟེན་ནས་བཞེངས་པ་ཡིན་ཏེ། འདིའི་དབུ་ལ་སངས་རྒྱས་ཀྱི་འཕེལ་གདུང་ཕུལ་གང་དགྲ་བཅོམ་པ་ཉི་མ་གུང་པའི་སྣམ་སྦྱར། རྒྱ་བོད་ཀྱི་མཁས་གྲུབ་དཔག་ཏུ་མེད་པའི་གདུང་རིང་བསྲེལ་དབུ་ལོ་ཕྱག་སེན་དང་རྟེན་ཕྱག་ཏུ་བཞུགས་ཚད་ཀྱིས་ནང་གཞུག་མཛད། རྗེ་ཉིད་ཀྱི་རབ་གནས་མཛད་པ་ན། ཕྱོགས་བཅུའི་སངས་རྒྱས་དང་འཇམ་དབྱངས་སྤྱན་རས་གཟིགས་རྣམས་ཀྱིས་ཀྱང་བྱིན་གྱིས་བརླབས་སོ། །ལི་སེར་ལས་གྲུབ་པའི་པུ་རི་འདི་རྗེ་དུས་མཁྱེན་གྱི་གདུང་རྟེན་འགྲོ་མགོན་རས་ཆེན་གྱིས་བཞེངས་ནས། རབ་གནས་སྐབས་དུས་མཁྱེན་དངོས་སུ་བྱོན་ནས་བྱིན་གྱིས་རླབས་པ་ཡིན་ནོ། །པུ་རི་བར་མ་
ནི་གྲུབ་ཆེན་ཀརྨ་པཀྵིའི་གདུང་རྟེན་དུ་འཇམ་དབྱངས་བློ་གྲོས་སེང་གེས་བཞེངས་ཏེ། ནང་དུ་སྟོན་པའི་འཕེལ་གདུང་། སྟོན་པའི་གཏད་རབས་སོགས་པཎ་གྲུབ་ཐམས་ཅད་ཀྱི་གདུང་རིང་བསྲེལ། དབུ་ལོ་ཕྱག་སེན་ན་བཟའ་སྐུ་གསུང་ཐུགས་རྟེན་མང་དུ་བཞུགས་སོ། །པུ་རི་འོག་མ་འདི་སངས་རྒྱས་རས་པ་ཆེན་པོའི་གདུང་རྟེན་དུ། རྒྱལ་སྲས་སྤོམ་བྲག་པས་བཞེངས་ཏེ། འགྲོ་མགོན་གྱི་ཐུགས་ལྗགས་སྤྱན་གསུམ་གྱིས་གཙོས་པའི་བྱིན་རླབས་རྟེན་དཔག་ཏུ་མེད་པ་བཞུགས་ཏེ། དེ་ཡང་རཏྟའི་གཏེར་ཁ་ཨོ་རྒྱན་རིན་པོ་ཆེའི་བསྟན་པ་སྤྱི་ལུང་ཆེན་པོ་ལས། བྱམས་པའི་སྤྲུལ་པ་བསྟན་པའི་རྗེས་སྐྱོང་བ། དུས་གསུམ་མཁྱེན་པ་མཚུར་ཕུའི་ས་རུ་འབྱུང་༔ ཞེས་དང་། འགྲོ་མགོན་རས་ཆེན་གྱི་སྐུ་སྐྱེ་བ་གསུམ་ལས་གྲུབ་ཆེན་རི་མགོ་པའི་རྣམ་ཐར་ལས། བྱམས་པ་ཞལ་གཟིགས་གསུང་ཐོས། རང་ཅག་བྱམས་པའི་འོད་ཟེར་ཆ་གཅིག་ཡིན། ད་རེས་ང་དང་འབྲེལ་བ་དང་། ང་མཐོང་བ་དང་ཐོས་པ་ཙམ་ཡང་བྱམས་མགོན་འཛམ་བུའི་གླིང་དུ་སངས་རྒྱས་པའི་དུས་སུ་མངོན་པར་བྱང་ཆུབ་ཐོབ་པ་ཡིན་ནོ། །ཞེས་གསུངས་པས། འདི་ན་རྗེ་དུས་མཁྱེན་དང་རིས་ཆེན་པ་ཡབ་སྲས་ཀྱི་
གདུང་འབུམ་སངས་རྒྱས་རིང་བསྲེལ་བྱམས་ཆེན་གྱི་སྐུ་དང་བཅས་པ་བཞུགས་པ་འདི་ལ་ཕྱག་དང་བསྐོར་བ་མར་མེ་སྙན་དར་སོགས་ཕུལ་ན། རྒྱལ་བ་བྱམས་པས་རྗེས་སུ་འཛིན་ངེས་ཏེ། །བྱམས་པ་དགའ་ལྡན་དུ་སྐྱེ་བ་བླངས་པའི་མདོ་ལས་དོན་བསྡུས་ཏེ། ཅུང་ཟད་བརྗོད་ན། འདིའི་མདུན་དུ་ཕྱག་འཚལ་ཞིང་རྩེ་གཅིག་ཏུ་བཤགས་ནི་སྡོམ་པ་ཞིག་པ་ལ་སོགས་སྡིག་པ་དང་ལྟུང་བ་ཐམས་ཅད་བྱང་། མཆོད་པ་ཕུལ་བ་དང་ཕྱག་འཚལ་ན། འཆི་བའི་ཚེ་དགའ་ལྡན་ལྷ་ཡི་ཞིང་ནས། རྒྱལ་བ་བྱམས་པའི་མཛོད་སྤྱིའི་འོད་ཟེར་དང་ལྷ་ཐམས་ཅད་ཀྱི་མེ་ཏོག་གི་ཆར་གྱིས་བསུས་ནས། སྐད་ཅིག་ལ་དགའ་ལྡན་གྱི་ལྷའི་ཡུལ་དུ་སྐྱེས་ནས་རྒྱལ་བ་བྱམས་པའི་མཛོད་སྤུའི་འོད་ཟེར་དཀར་པོསརེག་པ་ཙམ་གྱིས། བྱམས་པའི་ཞལ་མཐོང་ཞིང་ཕྱིར་མི་ལྡོག་པ་ཐོབ། སངས་རྒྱས་གངྒའི་ཀླུང་གི་བྱེ་མ་སྙེད་ཞལ་མཐོང་བར་འགྱུར། བསྐལ་པ་དགུ་བཅུའི་སྡིག་པ་བྱང་། བྱམས་པས་ཆོས་གསུངས་པས་སྡིག་པ་ཐམས་ཅད་བྱང་ནས། མ་འོངས་པ་ན་རྒྱལ་བ་བྱམས་པ་འཛམ་བུའི་གླིང་འདིར་འབྱོན་དུས་ཞབས་འབྲིང་བྱེད་ཅིང་བསྐལ་པ་འདིའི་སངས་རྒྱས་སྟོང་དང་། བསྐལ་པ་སྐརྨ་ལྟ་བུའི་སངས་རྒྱས་ཐམས་ཅད་ཀྱང་མཇལ་
ནས། དེ་དག་གི་དྲུང་དུ་བྱང་ཆུབ་ཏུ་ལུང་བསྟན་པ་ཐོབ་པར་བཤད་དོ། །དེ་ནས་ཐུབ་ཆེན་ལྷ་ཁང་དུ་ཕྱིན་ནས། དེ་ཡང་ཨོ་རྒྱན་རིན་པོ་ཆེའི་ཟབ་ཆོས་ལས། ཐུགས་རྗེ་ཆེན་པོ་གསང་བ་འདུས་པ་དང་༔ རྟ་མགྲིན་གསང་བ་འདུས་པའི་ཆོས་སྐོར་ལུང་བསྟན་ལས། ཨེ་མ༔ དེ་ལྟར་ཆོས་བདག་མང་བསྟན་ཡང་༔ ངོ་མཚར་གསང་འདུས་ཞི་ཁྲོ་ཡི༔ ཁྱད་པར་ཆོས་ཀྱི་དར་བྱེད་པ༔ ས་ལ་གནས་པའི་བྱང་སེམས་འབྱུང་༔ ད་ལྟའི་བཙུན་པ་མཆོག་དབྱངས་ཁྱོད༔ རང་བཞིན་དབང་ཆེན་ཡབ་ཡུམ་གྱི༔ ངོ་བོ་རྣམ་པར་འཕྲུལ་ཕྲིན་ལས་སྤྱན་རས་གཟིགས་དབང་ཉིད༔ མ་འོངས་ཐ་མར་གྱུར་པ་ན༔ སྤྲུལ་པ་དུ་མས་འགྲོ་བ་འདུལ༔ གཅིག་ནི་དགའ་ལྡན་མི་ཕམ་དྲུང་༔ སེམས་དཔའ་ཆོས་ཀྱི་བློ་གྲོས་འགྱུར༔ གཅིག་ནི་ཤར་གྱི་གླིང་དག་ན༔ རྒྱལ་པོ་དགེ་བའི་རྫུ་འཕྲུལ་ཅན༔ གཅིག་ནི་ནུབ་ཕྱོགས་བདེ་ཆེན་ན༔ དགེ་སློང་ཆོས་ཀྱི་གྲགས་པ་ཞེས༔ དག་པའི་འཁོར་ཡང་འབུམ་ཕྲག་གཅིག༔ གཅིག་ནི་ནུབ་ཕྱོགས་ཨོ་རྒྱན་ན༔ རྣལ་འབྱོར་རོལ་པའི་རྡོ་རྗེ་ཞེས༔ སྔགས་ཀྱི་རྣལ་འབྱོར་བརྟུལ་ཞུགས་སྤྱོད༔ དེ་སོགས་གཞན་ཡང་སྤྲུལ་པ་ནི༔ རྣལ་
འབྱོར་མཐོང་ལམ་ཇི་བཞིན་དུ༔ ཁྱད་པར་ཆོས་འདིའི་བདག་པོ་ཡིན༔ ས་ལ་གནས་པའི་བྱང་ཆུབ་སེམས༔ སྤྲེལ་ལོ་སྨེ་བའི་ག་ཤལ་ཅན༔ དེ་ཡི་མགྲིན་པ་སྲིད་ལྟེ་ལའང་༔ སྨེ་བ་དཀར་དམར་མཚན་པ་ཅན༔ ཐབས་ཀྱི་བརླ་དང་ཐུགས་ལ་བྲིད༔ རྒྱལ་སྲས་དྷརྨཱ་ཀཱིརྟི་ཞེས༔ ངེས་པར་ཨོ་རྒྱན་ངས་ལུང་བསྟན༔ ཨོ་རྒྱན་བདག་དང་ས་ར་ཧ༔ ཏེ་ལོ་པ་དང་མ་ཕམ་སོགས༔ རྣལ་འབྱོར་དབང་ཕྱུག་མང་པོས་ཀྱང་༔ དེ་ལ་ཆོས་ཀྱང་སྟོན་པར་བྱེད༔ འབྲེལ་ཚད་དོན་ལྡན་སེམས་དཔའ་དེ༔ དམ་ཚིག་སེལ་གྱིས་སོ་བདུན་ལ༔ ཤིན་ཏུ་གཉན་བྷྱོཔས་ཚེ་སྒྲུབ་འབད༔ ཅེས་མཐོང་བ་དོན་ལྡན་མཚན་དངོས༔ ཆོས་ཀྱི་གྲགས་པ་ལུང་བསྟན་རྒྱས་པར་གསུངས༔ དེ་འོག་ཕྱི་མའི་དུས་ཀྱི་ཚེ༔ ཁམས་ཀྱི་སེར་རྟོགས་ལྷོ་ཡི་ཆར༔ རི་བོ་ཁྱུང་ལྡིང་འདྲ་བའི་ཞོལ༔ རྗོད་ཅེས་བྱ་བའི་ས་ཕྱོགས་སུ༔ པདྨ་ང་ཡི་རྣམ་འཕྲུལ་ཏེ༔ བྱའམ་ཁྱི་ཡི་ལོ་པ་གཅིག༔ རང་བྱུང་མཚོ་སྐྱེས་རྡོ་རྗེ་ཞེས༔ ས་ལ་གནས་པའི་བྱང་སེམས་འབྱུང་༔ ངན་ལམ་རྒྱལ་བ་མཆོག་དབྱངས་ཉིད༔ སྔོན་གྱི་བག་ཆགས་སད་དུ་འོང་༔ གསུང་གི་མཚན་མ་དག་དང་ལྡན༔ སྙིང་ཐིག་འདུས་པ་སྐོར་བཞི་དང་༔ ཁྱད་པར་རྟ་
མགྲིན་ཡང་གསང་བདག༔ ཡིན་ཕྱིར་ཚེ་རིལ་དང་བཅས་གཏད༔ མ་འོངས་ཕྱི་མའི་དུས་མཐའི་བར༔ རྒྱ་མཚོའི་མཐའ་ལ་ཐུག་གི་བར༔ དེ་ཡིས་རྒྱས་པར་བྱེད་པའི་ཕྱིར༔ གཏེར་འདི་སྦས་པ་དོན་ཡོད་འགྱུར༔ ཞེས་ལུང་བསྟན་གྱི་མཚན་དངོས་རང་བྱུང་མཚོ་སྐྱེས་རྡོ་རྗེ༔ ཡོངས་གྲགས་རྗེ་ཆོས་གྲགས་རྒྱ་མཚོ་ཞེས་བྱ་བ་ཉིད་དང་། གོའི་ཤྲཱི་དཔལ་འབྱོར་གཉིས་བཀའ་བགྲོས༔ ཐུབ་ཆེན་འདི་བཞེངས་ཤིང་རབ་ཏུ་གནས་པར་མཛད༔ ནང་ཞུགས་བྱིན་རླབས་རྟེན་བསམ་ལས་འདས་པ་བཞུགས་སོ། །དེ་ཡང་འཕགས་པ་༈ འཇིག་རྟེན་དབང་ཕྱུག་ཀརྨ་པ་ལོངས་སྤྱོད་རྫོགས་པའི་སྐུ་བརྙན་ཡིན་ཏེ༔ རྣམ་པར་སྣང་མཛད་མངོན་པར་བྱང་ཆུབ་སེམས་རྒྱུད་ཆེན་པོ་དང་༔ ཨོ་རྒྱན་རིན་པོ་ཆེའི་གསུང་ལ་སོགས་པའི་མདོ་རྒྱུད་དུ་མ་ནས་གསུངས་པའི་དོན་བསྡུས་ཏེ་བཤད་ན། འཕགས་པ་སྤྱན་རས་གཟིགས་དབང་ཕྱུག་ཀརྨ་པའི་མཆན་ཁུང་གཡོན་པའི་བ་སྤུའི་བུ་ག་གཅིག་ན་འོག་མིན་འཐུག་པོ་བཀོད་པའི་ཞིང་ཁམས་བསམ་ལས་འདས་པ་ཞིག་ཡོད་དོ། །དེའི་དབུས་ན་ནོར་བུ་རིན་པོ་ཆེའི་གཞལ་ཡས་ཁང་ན། འཕགས་པ་འཇིག་རྟེན་དབང་ཕྱུག་ཀརྨ་པ་དེས་སྤྲུལ་པའི་ཆ་གཅིག་ལ་ཐུབ་
པ་རྣམ་པར་སྣང་མཛད་གངས་ཆེན་མཚོ་ཞེས་བྱ་བའི་སངས་རྒྱས་གཅིག་བཞུགས་ཏེ། སངས་རྒྱས་འདིའི་སྐུའི་འོད་ཟེར་དཔག་ཏུ་མེད་པའི་འོད་ཟེར་རེ་རེའི་རྩེ་ལ་ཡང་སངས་རྒྱས་ཀྱི་ཞིང་ཁམས་དཔག་ཏུ་མེད་དོ། །སངས་རྒྱས་འདིའི་སྐུའི་བ་སྤུའི་བུ་ག་རེ་རེ་ན་ཡང་ཞིང་ཁམས་རེ་རེ་ཡོད་དོ། །སངས་རྒྱས་འདི་ཡི་ཕྱག་མཐིལ་ན་སྤོས་ཆུའི་རྒྱ་མཚོ་ཡོད་དོ། །དེ་ལ་པདྨའི་སྡོང་པོ་མེ་ཏོག་ཉི་ཤུ་རྩ་ལྔ་བརྩེགས་མར་ཡོད་དོ། །མེ་ཏོག་རེ་རེའི་སྟེང་ན་ཡང་འཇིག་རྟེན་གྱི་ཁམས་དཔག་ཏུ་མེད་པ་ཡོད་དོ། །འཇིག་རྟེན་ཁམས་འདི་ནི་མེ་ཏོག་བཅུ་གསུམ་པའི་སྟེང་ན་ཡོད་ཅིང་། མེ་ཏོག་དེ་ལ་ཡང་ཟེའུ་འབྲུ་དཔག་ཏུ་མེད་པའི་རེ་རེའི་ནང་ནའང་འཇིག་རྟེན་གྱི་ཁམས་དཔག་ཏུ་མེད་པ་ཡོད་ལ། ངེད་རང་རྣམས་ཀྱི་འཇིག་རྟེན་མི་མཇེད་ཁམས་ནི་ཟེའུ་འབྲུ་དབུས་མའི་སྟེང་ན་ཆགས་ནི་ཡོད་ཅིང་། སངས་རྒྱས་འདིའི་ཐུགས་ཀའི་ཐད་ཡིན་པས་འཇིག་རྟེན་གྱི་ཁམས་གཞན་དུ་དགེ་སྡིག་བསྐལ་པར་སྤྱད་པ་བས། འདིར་སྐད་ཅིག་སྤྱད་པ་སྟོབས་ཆེ་བར་བཤད་དོ། །འདི་ནི་ངེས་པ་ལྔ་དང་ལྡན་པ་ལོངས་སྤྱོད་རྫོགས་པའི་སྐུ་སྟེ། ཆོས་སྐུའི་རྟེན་དུ་པུ་རི་གསུམ་དང་འབུམ་པ་རྣམས། ལོངས་སྐུའི་རྟེན་འཇིག་རྟེན་དབང་ཕྱུག་ཀརྨ་པ་
ལོངས་སྤྱོད་རྫོགས་པ་ཐུབ་པ་གངས་ཆེན་མཚོའི་སྐུ་འདི་ཡིན། སྤྲུལ་སྐུའི་རྟེན་བླ་མ་ལྷ་ཁང་དང་ཐུབ་པ་ལྷ་ཁང་རྣམས་ཡིན་ནོ། ༈ །དེ་ནས་བླ་མ་ལྷ་ཁང་དུ་ཕྱིན་ནས། དེ་ཡང་ཨོ་རྒྱན་རིན་པོ་ཆེ་པདྨ་འབྱུང་གནས་ཀྱི་མ་འོངས་ལུང་བསྟན་སྤྲུལ་སྐུ་སངས་རྒྱས་གླིང་པའི་གཏེར་ཁ་ལས། ཀརྨ་པ་རབ་བཅུ་གཅིག་འབྱོན་པར་གསུངས་ཏེ། ཞྭ་ནག་འཛིན་པ་སྤྲུལ་པའི་སྐྱེས་མཆོག་གཅིག༔ རྣལ་འབྱོར་མཆོག་དབྱངས་འཛམ་གླིང་བདེ་ལ་བཀོད༔ ཀརྨ་པ་ཞེས་སྐྱེ་བ་བཅུ་གཅིག་ཏུ༔ སྤྱན་རས་གཟིགས་ཀྱི་ཕྲིན་ལས་སྐྱོང་བྱེད་པ༔ མཚུར་ཕུ་ཞེས་བྱར་དུས་གསུམ་མཁྱེན་པ་འབྱུང་༔ དེ་རྗེས་ཀརྨ་པཀཱིས་མཐའ་དམག་ཟློག༔ རང་བྱུང་རྡོ་རྗེ་མཁྱེན་པའི་དཀྱིལ་འཁོར་རྒྱས༔ རོལ་པའི་རྡོ་རྗེས་དུས་གསུམ་གསལ་བར་གཟིགས༔ ཆོས་དཔལ་བཟང་པོ་ཟག་མེད་ཏིང་འཛིན་རྒྱས༔ ཞྭ་ནག་དྲུག་པ་འཛམ་གླིང་ཆོས་གྲགས་དཔལ༔ ཡི་དམ་ལྷ་ཡི་གསལ་སྣང་རྒྱུན་ཆད་མེད༔ མཚོ་སྐྱེས་རྡོ་རྗེས་མ་རུངས་གདུག་པ་འདུལ༔ མི་བསྐྱོད་རྡོ་རྗེས་མཐའ་ཡི་དམག་དཔུང་ཟློག༔ དབང་ཕྱུག་རྡོ་རྗེས་མདོ་སྔགས་བསྟན་པ་བཙུགས༔ ཆོས་དབྱིངས་རྡོ་རྗེས་ཉམས་ལེན་སྒྲུབ་སྡེ་འཛུགས༔ ཡེ་ཤེས་
རྡོ་རྗེས་གདུལ་བྱའི་ལྷག་མ་སྐྱོང་༔ ཞེས་བཅུ་གཅིག་དང་༔ རཏྣ་གླིང་པའི་གཏེར་ཁ་ནས་བཅུ་གཉིས་བཤད་པའི་ཚིག་གོང་མ་ཐམས་ཅད་འདྲ་བ་ལས། བྱང་ཆུབ་རྡོ་རྗེ་དངོས་གྲུབ་དཔག་མེད་བརྙེས༔ ཞེས་དང་༔ བཅུ་གསུམ་འབྱོན་པ་ནི། རཏྣ་གླིང་པའི་ཨོ་རྒྱན་རིན་པོ་ཆེའི་བསྟན་པ་སྤྱི་ལུང་ཆེན་པོ་ལས། སྤྱན་རས་གཟིགས་དབང་བོད་ཡུལ་མིར་སྤྲུལ་པ། ཀརྨའི་མིང་ཅན་སྐྱེ་བ་བཅུ་གསུམ་དུ༔ འབྲེལ་ཚད་དོན་ལྡན་མཐའ་དམག་བཟློག་ཅིང་འདུལ༔ འབྲེལ་ཚད་བདེ་ཆེན་ཞིང་དུ་ཁྲིད་པ་འོང་༔ ཞེས་གསུངས་པའི་ན་རིམ་གོང་མ་རྣམས་ཀྱིས་གདུང་རྟེན་ལ་བཞེངས་པའི་སྐུ་འདྲ་རྣམས་ཏེ། རྟེན་གྱི་གཙོ་བོ་དུས་མཁྱེན་གྱི་སྐུ། ཁྱད་པར་འཕགས་པ་བདུན་དང་ལྡན་པ་ཡིན་ཏེ། བཟོ་བོ་ཁྱད་པར་དུ་འཕགས་པ་འཇམ་དབྱངས་ཀྱི་སྤྲུལ་པ་སྐྱུ་ར་ལྷ་ཆེན་གྱི་ཕྱག་བཟོ་ཡིན། སྐུ་ཁྱད་པར་འཕགས་པ་རིན་ཆེན་ཟི་ཁྱིམ་ལས་གྲུབ་པ།་བཟོ་ཁྱད་པར་དུ་འཕགས་པ་སྐུ་ཚད་ལས་གཉིས་འགྱུར་གྱི་ཚད་གཅིག་ལྡོགས་སུ་གྲུབ་པ། རབ་གནས་ཁྱད་པར་དུ་འཕགས་པ་འགྲོ་མགོན་རས་ཆེན་པས་རབ་གནས་མཛད་དུས། རྗེ་དུས་མཁྱེན་མངོན་སུམ་དུ་བྱོན་ནས་བྱིན་གྱིས་རླབས་པ། འགྲོ་དོན་
ཁྱད་པར་དུ་འཕགས་པ་ལས་ཅན་འགའ་རེ་ལ་ཆོས་དྲུག་གསུངས་པས་ཆོས་དྲུག་ཏུ་གྲགས་པ།་མཛད་པ་ཁྱད་པར་དུ་འཕགས་པ་ཀླུ་རྒྱལ་སྔགས་ཀྱི་བདག་པོའི་ཕོ་བྲང་ཆུ་མིག་སྟེང་དུ་བཞུགས་ནས་ཀླུའི་ཁ་གནོན་མཛད་པ། བྱིན་རླབས་ཁྱད་པར་དུ་འཕགས་པ་དུས་ཕྱིས་བར་དུ་གསུངས་ཡང་ཡང་བསྒྲགས་ཤིང་རྗེ་དངོས་དང་ཁྱད་པར་མེད་པ་ཡིན་ནོ། །སྐྱེས་མཆོག་ཀརྨ་པཀྵིའི་སྐུ་ཚད་ལས་ཆེ་བ་འདི་གསེར་གར་བླུགས་གཅིག་ལྡོགས་སུ་གྲུབ་ཅིང་ནང་རྟེན་བསམ་ལས་འདས་པ་བདུད་དཔུང་ཟིལ་གནོན་བྱིན་རླབས་དཔལ་འབར་ཞེས་བྱ་བ་ཡིན་ནོ། རྗེ་དབང་ཕྱུག་རྡོ་རྗེའི་འདྲ་སྐུ་འདི་ནི་ཕུན་སུམ་ཚོགས་པ་གསུམ་དང་ལྡན་ཏེ། རྒྱུ་ཕུན་སུམ་ཚོགས་པ་རྒྱུ་དངུལ་སྲང་ཆེན་ཉིས་སྟོང་ལས་གྲུབ་པ། བཟོ་ཁྱད་པར་འཕགས་པ་སྐུ་ཚད་ལས་ཉིས་འགྱུར་གྱིས་ཆེ་ཞིང་ཆོས་གོས་ཀྱི་རི་མོ་ལའང་ལཉྩའི་མཚན་སྔགས་བཀོད་པ་དང་བྱོན་གཙང་ཞིང་སྐུ་ཚུགས་འདྲ་སྐུར་བྱོན་པ། ནང་ཞུགས་ནི་བྱིན་རླབས་ཀྱི་གཏེར་མཛོད་དུ་བཞུགས་པ་བརྗོད་པར་མི་ནུས་པ་བཞུགས། སྦྱིན་བདག་དང་རབ་གནས་ཞལ་བཀོད་ཐམས་ཅད། ༧ སི་ཏུ་ཆོས་ཀྱི་རྒྱལ་མཚན་པ་ཉིད་ཀྱིས་མཛད་པ་བྱིན་རླབས་དཔག་ཏུ་མེད་
པའོ། །གཞན་རྣམས་ཀྱང་ན་རིམ་སོ་སོའི་འདྲ་སྐུ་གདུང་རྟེན་ལ་བཞེངས་པ་ཁོ་ན་སྟེ། ནང་རྟེན་ནི་བསམ་ལས་འདས་སོ། །དེང་སང་ཁ་ལ་བདུད་ཞུགས་ནས་ཕྱི་མ་ལྕེ་ལ་ལྕགས་སྲེག་གི་གླང་དོར་ལྔ་བརྒྱས་རྨོ་བར་འགྱུར་བའི་བསོད་ཟད་འགའ་ཞིག་ན་རེ། ཀརྨ་པ་རབ་བརྒྱད་ནི་སྤྱན་རས་གཟིགས་དངོས་ཡིན་ལ། རབ་བརྒྱད་ལས་མེད་པས། དེ་ཕྱིན་ཆད་ཀར་བརྫུ་ཡིན་ནོ་ཞེས་གཤེ་སྐུར་འདེབས་པ་ནི་ཤིན་ཏུ་ནས་སྙིང་རྗེ་བས། ལོག་ལྟ་ཅན་དེ་དག་ལ་ཕན་ཕྱིར་ཅུང་ཟད་བཤད་ན། སངས་རྒྱས་གླིང་པ་དང་རཏྣ་གླིང་པ་གཉིས་ཀའི་གཏེར་ཁ་ནས་ཚིག་མཚུངས་པར། དབང་ཕྱུག་རྡོ་རྗེའི་མདོ་སྔགས་བསྟན་པ་བཙུགས༔ ཞེས་དང་། ཞིག་པོ་གླིང་པའི་བསྟན་པ་སྤྱི་ལུང་ལས། དུས་རྟགས་རྣམས་ལུང་བསྟན་ཅིང་། ད་ལྟའི་ངན་ལམ་རྒྱལ་བ་མཆོག་དབྱངས་ཁྱོད༔ སྤྱན་རས་གཟིགས་དབང་ཐུགས་རྗེས་ཕྲིན་ལས་ཀྱི༔ ཀརྨའི་མིང་ཅན་ཁམས་ཀྱི་ཕྱོགས་ནས་འབྱུང་༔ ཡིག་དྲུག་སྒྲ་ཡིས་སྟོང་གསུམ་གང་བར་བྱེད༔ ཅེས་དང་། རྗེ་མི་བསྐྱོད་རྡོ་རྗེས། ཡུལ་ཏྲེ་ཤོད་གངས་ཀྱི་ར་བའི་སྟོད། །དཔལ་འཇིག་རྟེན་དབང་ཕྱུག་རང་བྱོན་དྲུང་། །ཆུ་སྒྲ་བཅས་དམ་ཆོས་ཉན་པ་ཡོད། །ས་དེ་དང་ཧ་ཅང་མི་རིང་
བར། །ང་སྐྱེ་བ་ལེན་པའི་མཚན་མ་མཐོང་། །ཞེས་དབང་ཕྱུག་རྡོ་རྗེ་ལུང་བསྟན་པ་དང་། ༈ རྗེ་དབང་ཕྱུག་རྡོ་རྗེས་ཆོས་དབྱིངས་རྡོ་རྗེ་ལུང་བསྟན་པ་ནི། ཡུལ་དེ་ལ་བེ་རི་མགོ་ལོག་ཟེར། །རྒྱབ་དེ་ན་ཕག་མོའི་ལྟོ་བ་འདྲ། །ཐད་དེ་ན་ཆོས་སྡེ་འབུམ་ཕྲག་སྣང་། །སྣ་དེ་ན་ལྕགས་ཀྱི་ཐག་པ་རྒྱུག །ཡབ་དེ་ལ་བེ་རུ་བཀྲ་ཤིས་གྲགས། །ཡུམ་དེ་ལ་སྤོས་རྡོ་ཨ་སྒྲོན་མ། །ང་སྐྱེ་བ་ལེན་པའི་མཚན་མ་མཐོང་། །ཞེས་ཕྱག་བྲིས་མཛད་ནས་ཞྭ་དམར་པ་ལ་གནང་བའོ། ༈ །བཀའ་ཐང་སྡེ་ལྔའི་ལོ་པཎ་བཙུན་མོ་བཀའ་ཐང་ལས། ཨོ་རྒྱན་རིན་པོ་ཆེའི་ལུང་བསྟན་པ། ལོ་ཙཱ་རྒྱལ་བ་མཆོག་དབྱངས་འདི༔ རྒྱ་གར་བྱང་ཕྱོགས་མུ་སྟེགས་ཡུལ༔ དྷེ་ཝ་ཙནྟར་སྐྱེ་བ་ལེན༔ བསྟན་ཞབས་ལྔ་བཅུ་ཁ་རལ་དུས༔ ཆོས་དབྱིངས་མཚན་ཅན་ཞེས་བྱ་འབྱུང་༔ མི་སྲིད་པ་གཅིག་སྲིད་ནས་འོང་༔ དུས་འདི་འགྱུར་ཞིང་མི་རྟག་སྟེ༔ མི་རབས་བཅོ་བརྒྱད་བརྗེས་པའི་དུས༔ རྒྱ་ནག་མ་ནུའི་གནམ་ས་འདྲེ་ལོག་འགྱུར་བ་འབྱུང་༔ ཞེས་དང་། རིག་འཛིན་ལས་འཕྲོ་གླིང་པས། ལྷ་རི་སྣང་མཐའི་སྐུ་རྒྱབ་ནས་བཏོན་པའི་རྟ་ཕག་ཡིད་བཞིན་ནོར་བུའི་ལུང་བསྟན་
ལས། ཆོས་དབྱིངས་རྡོ་རྗེ་ལུང་བསྟན་པ་ནི། ཆོས་འདིའི་བདག་པོ་ས་བཅུའི་སེམས་དཔའ་ཆེ༔ རྟ་ཕག་ཡིད་བཞིན་ནོར་བུའི་འོད་ཟེར་ནི༔ དགེ་སློང་ཀརྨའི་མིང་ཅན་འབྲུག་སྦྲུལ་ཡོས་ལོ་པ༔ སྐྱེ་བ་ཀུན་ཏུ་ཤཱཀ་ཐུབ་བསྟན་པ་སྐྱོང་༔ དེ་ལ་ཕྱི་ནང་གསང་བའི་བར་ཆད་མང་༔ དེ་ཡི་གཉེན་པོར་ཟབ་དོན་འདི་སྒྲུབས་ཤིག་ཉམས་ལེན་མཛད་པས་དངོས་གྲུབ་འཕྲལ་དུ་འོངས༔ རྨི་ལམ་ཉམས་ལ་དབུ་གཙུག་རྟ་སྐད་འཚེར༔ ཕྱག་མཚན་གསོར་བས་རི་ཉིལ་རྒྱ་མཚོ་འཐོར༔ སྡིགས་མཛུབ་གཏད་པས་རྡོ་རྗེའི་བྲག་རི་གས༔ ལྟ་སྟངས་གཟིགས་པས་འབྱུང་པོའི་ཡུལ་ཀུན་བསྐད༔ འབུམ་ཕྲག་བཅུ་ཡིས་འབྱུང་པོའི་གདུག་པ་ཟློག༔ ཁ་བ་ཅན་གྱི་སེམས་ཅན་བདེ་ལ་བཀོད༔ བསྐལ་པ་བཟང་པོའི་སྔར་སྲོལ་སླར་ཡང་དར༔ འབྲེལ་ཚད་དོན་ལྡན་དེ་ལ་གཏད་པས་ཕྱིས༔ དམ་ཉམས་བདུད་སྤྲུལ་ལྕེ་གཉིས་བརྡབ་པའི་མིས༔ བར་ཆད་བྱུང་ན་དེ་ནི་བསྒྲལ་ཤེས་གྱིས༔ ཞེས་དང་༔ ༧ ཚེ་སྒྲུབ་གནམ་ལྕགས་རྡོ་རྗེའི་ལུང་བསྟན་ལས༔ ཆོས་འདིའི་བདག་པོ་སྐལ་ལྡན་པ༔ ས་གནས་སེམས་དཔའ་ཆེན་པོ་གཅིག༔ དབང་ཆེན་རྟ་མཆོག་ཡབ་ཡུམ་གྱི༔ འོད་ཟེར་ལས་འཁྲུངས་
ཀརྨའི་མཚན༔ འབྲེལ་ཚད་དོན་ལྡན་རྒྱལ་བ་ནི༔ བཞིན་རས་ཡོ་བྱད་གསུང་དབྱངས་ཕྲ༔ ཞབས་བསྒྲོས་ངང་པ་ཇི་བཞིན་དང་༔ སྨེ་བ་བྱི་སྲིན་འདྲ་བ་ནི༔ དཀར་དམར་ནག་གསུམ་རྒྱབ་ཏུ་ཡོད༔ འགྲོ་བ་དབང་འདུས་རྟེན་འབྲེལ་ཡིན༔ ཧཱིཐཾ་འབྲུ་གཉིས་སྲོག་འདབ་ལ༔་ཤིན་ཏུ་གསལ་བའི་ཕྱག་བྲིས་ཡོད༔ དབང་ཆེན་འོད་ཟེར་ངེས་པའི་རྟགས༔ དེ་ལ་ཆོས་འདིའི་གཏད་རྒྱ་གྱིས༔ རྟེན་འབྲེལ་འཁྱུགས་དང་དུས་ཡོལ་ན༔ ཆོས་བདག་གཞན་ལ་གཏད་པར་འོས༔ ༨༡༥༠ དྱཉཤ༔ འགའ་ཞིག་སྙིང་ལ་རྭ་ཙ་ཞུགས༔ བདུད་སྤྲུལ་ལྕེ་གཉིས་བརྡབས་པ་ཡིས༔ བར་ཆད་འབྱུང་སྲིད་དྲག་པོས་སྒྲོལ༔ ལས་ངན་རྒྱུ་རྐྱེན་ཚར་གཅོད་གྱིས༔ ཡང་ན་གདུགས་དཀར་སྟོང་རྩས་ཟློག༔ ཅེས་དང་། ཡེ་ཤེས་མགོན་པོ་མ་ནིང་ནག་པོའི་ལུང་བསྟན་ཉི་ཟླ་ཁ་སྦྱོར་ལས༔ ཡེ་ཤེས་མགོན་པོ་མ་ནིང་ཟབ་ཆོས་འདི༔ ཆོས་བདག་རྩ་བ་མཆོག་དབྱངས་ཀརྨའི་མཚན༔ ངེས་མེད་འཁྲུལ་པ་ཞིག་ཚུལ་བག་ལ་ཉལ༔ གཞན་ཡང་བློ་སེམས་མི་མཐུན་སྤང་བླང་བྲལ༔ དེ་ཡང་རླུང་སེམས་ཨ་ཝ་དྷུ་ཏིར་གནས༔ འཛམ་གླིང་རྒྱན་གཅིག་དེ་ལ་གཏད་རྒྱུ་གྱིས༔ ཕྱི་ནང་
བར་ཆད་མི་མཐུན་ཆག་སྒོ་ཟློག༔ ཡང་གཅིག་བདུད་སྤྲུལ་ནག་པོའི་སྦྲུལ་ལྕེ་བརྟན༔ གལ་སྲིད་ཆོས་འདི་ཕྱག་ཏུ་མ་འབྱོར་ན༔ རྒྱ་འདྲེ་སྤུན་དགུའི་སྒྲིབ་གཡོགས་འབྱུང་དོགས་ཡོད་ངེས་མེད་བར་ཆད་གསུམ་གྱི་གཞན་སྣང་ལོག༔ ཕ་རོལ་ལྟས་ངན་ལས་བསགས་སྡིག་ཏུ་འགྲོ༔ ཉ ཀ།ཡརྒཐཾམ༔ དེས་ན་སོ་བདུན་ཞེ་དགུའི་མཚམས་སུ་བསྒྲིམས༔ དེ་ལས་སྒྲོལ་ཞིང་མཐོང་ཐོས་དྲན་རེག་ཀུན༔ ཚོགས་གཉིས་མཐར་ཕྱིན་དལ་འབྱོར་དོན་ལྡན་འགྱུར༔ ཞེས་དང་། ཡང་གཅིག་དཀོན་མཆོག་སྤྱི་འདུས་ཡང་ཟབ་ནོར་བུའི་ལྡེ་མིག་ལས། དེ་འོག་ལྟེ་མཐོ་འོག་མ་ནི༔ ས་ཡི་འོག་ནས་འབྱུང་བར་འགྱུར༔ དུས་རྟོགས་མེད་ན་འདོན་མི་གཏུབ༔ མཆོག་དབྱངས་སྤྲུལ་སྐུ་ཀརྨའི་དོན༔ གསེར་གྱི་རྡོ་རྗེ་འོད་འབར་དང་༔ དངུལ་དྲིལ་བྱི་རུའི་བུམ་ཆུང་ཤེལ༔ གྲི་གུག་གཡུ་ཡི་མཎྜལ་དང་༔ སྙིང་ཐིག་ཆོས་དབྱིངས་རང་གསལ་གཞུན༔ དེ་ཉིད་འདོན་པའི་དུས་འབྱུང་གི༔ རྒྱལ་བ་ཀུན་གྱི་ཕྲིན་ལས་དེ༔ ལུང་པ་དེ་རུ་སྙན་དྲག་པོས༔ འཆི་ལ་ཐུག་ཐབས་ཟད་དེ་འབྱུང་༔ ཡང་ན་གཏེར་གནས་དེ་ཀ་རུ༔ དགོན་སྡེ་ཆོས་གྲྭ་དར་བ་འབྱུང་༔ མཚོ་ཡི་ནང་ནས་མེ་དམར་འབར༔ ཉིན་མོ་ཀུན་
གྱིས་མཐོང་བར་འོང་༔ རྟགས་མཚན་དེ་ལྟར་བྱུང་ཚེ་སྟོན༔ དུས་རྟགས་མེད་པར་འདོན་མི་རུང་༔ སྲོག་གི་ཕྱིར་ཡང་ཁར་མ་འདོན༔ གལ་ཏེ་དེ་ལས་འདས་པ་ན༔ གཏེར་བདག་ཁྲོས་ནས་དབང་པོ་བསྣུབ༔ དེ་ཕྱིར་སྤྱོད་པ་གཟབ་པར་རིགས༔ ཞེས་གསུངས་སོ༔ ལུང་བསྟན་འོད་ཀྱི་མེ་ལོང་ལས༔ སྡོང་པོ་གཉིས་ནི་དམར་ནག་ཞྭ་ཡི་མཚན༔ གངས་ཅན་བདག་པོ་ཐུབ་བསྟན་འཛིན་པའི་དཔལ༔ སྐྱེས་མཆོག་ཟུང་ལ་ཆོས་འདི་འཕྲོད་པ་ན༔ སྐུ་ཚེ་མཐར་ཕྱིན་རྟེན་འབྲེལ་མང་དུ་འགྲིགས༔ བོད་ཁམས་ཅུང་ཟད་བདེ་ལ་འཁོད་པར་འགྱུར༔ ཞེས་གསུངས་པ་དང་༔ ཨོཾ༔ སྤྲུལ་སྐུ་མི་འགྱུར་རྡོ་རྗེའི་གནམ་ཆོས་ཐུགས་ཀྱི་གཏེར་ཁ་ལས༔ ཤམ ། ༔ ན་མོ་གུ་རུ༔ ད་བླ་མ་བཟང་ངན་ལུང་བསྟན་ནི༔ སྟོང་ཉིད་ཆོས་ཀྱི་དབྱིངས་རོལ་ནས༔ རྡོ་རྗེ་ཐུགས་ཀྱིས་འགྲོ་དོན་མཛད༔ དུས་གསུམ་སངས་རྒྱས་སྤྱན་རས་གཟིགས༔ མཐོང་ཐོས་དྲན་པ་བཟང་ངན་འབྲེལ༔ ཐམས་ཅད་ཆོས་ཀྱི་དབྱིངས་སུ་འདྲེན༔ ། འགྲོ་བ་ཀུན་གྱི་ཞྭ་ལྟར་དུ༔ སྤྱི་བོར་བཀུར་བ་སྣང་མཐའ་དམར༔ སྤྲུལ་སྐུ་ཅོད་པན་འཛིན་པ་ནི༔ འབྲེལ་ཐོགས་ངན་
སོང་འགྲོ་མི་སྲིད༔ ༈ གསང་བདག་དྲག་པོ་མཆོག་གི་སྤྲུལ༔ ཚངས་དབྱངས་གསུང་གི་སྤྲུལ་པ་ནི༔ འགྲོ་བའི་དོན་དུ་བྱོན་པ་འདི༔ མཐོང་བ་ངན་འགྲོར་ལྟུང་མི་སྲིད༔ ༈ རྟ་ཡི་སྣ་སྒྲ་སེ་སེར་བྱེད༔ དྷ་ཏི་རང་གྲོལ་རྟ་མགྲིན་པ༔ སྤྲུལ་པ་ཡིན་ནོ་མཐོང་དོན་ལྡན༔ ༈ སེམས་དཔའ་ཆེན་པོའི་སྤྲུལ་པ་སྟེ༔ མཐོང་ཚད་ངན་འགྲོར་འགྲོ་བ་མེད༔ ༈ དེས་གསུང་ཚད་མའི་ལུང་ལྟར་གྱིས༔ སེམས་ཅན་རྣམས་ཀྱི་དོན་ལས་ནི༔ གྲུབ་ཐོབ་ཆེན་པོའི་སྤྲུལ་པ་འདིའི༔ མཐོང་ཐོས་ངན་སོང་འགྲོ་བ་མེད༔ ཅེས་པ་དེང་སང་གི་གང་ཟག་བཟང་ངན་ཕལ་ཆེར་ལུང་བསྟན་སྐབས་ནས་གསུངས་སོ༔ དེ་ལྟར་རྒྱལ་བ་ཀརྨ་པ་རབ་བཅུ་གསུམ་འདི་ནི། ཤཱཀྱ་ཐུབ་པས་ལུང་བསྟན༔ ཨོ་རྒྱན་པདྨས་མཚན་གསོལ་བ་སྟེ༔ དགུ་པ་དབང་ཕྱུག་རྡོ་རྗེ༔ བཅུ་པ་ཆོས་དབྱིངས་རྡོ་རྗེ༔ བཅུ་གཅིག་པ་ཡེ་ཤེས་རྡོ་རྗེ༔ བཅུ་གཉིས་པ་བྱང་ཆུབ་རྡོ་རྗེ༔ ཨོ་རྒྱན་རིན་པོ་ཆེས་མཚན་གསོལ་བ་གཏེར་ཁ་དུ་མ་ནས་གསལ་ཞིང་༔ རབ་བཅུ་གསུམ་པའི་མཚན་ནི་མ་གསལ་ཡང་༔ བཅུ་གསུམ་པ་བདུད་འདུལ་རྡོ་རྗེ་ཡིན་ཟེར་བའི་ངག་རྒྱུན་ཐོས་སོ༔ ཇོ་བོ་ཆུས་གདན་དྲངས་ལྷ་སའི་གཙུག་ལག་ཁང་དེ་ཀརྨ་
པའི་སྤྲུལ་པ་ཀརྨའི་མཚན་ཅན་གྱིས་གསོ་བར་ལུང་བསྟན་ཅིང་༔ རབ་བཅུ་གསུམ་རྫོགས་ནས་ཞྭ་ནག་འཛིན་པའི་ཀརྨ་པ་ངོས་བཟུང་རྒྱུ་མི་འབྱུང་སྟེ༔ ༧ ལུང་བསྟན་ལས། དེ་ནས་ཀརྨ་པ་ཡི་མིང་གི་གྲངས༔ ཟངས་མདོག་དཔལ་རིའི་པདྨ་ང་ཉིད་དང་༔ བཀའ་བགྲོས་བསྟུན་ནས་སྤྲུལ་པ་དཔག་མེད་ཀྱིས༔ འགྲོ་བ་འཁོར་བ་མ་སྟོངས་བར་དུ་ཡང་༔ སྦས་པའི་ཚུལ་གྱིས་འགྲོ་བ་དཔག་མེད་འདྲེན༔ ཁྱད་པར་ཚེ་ལོ་གྲངས་མེད་འཕེལ་འགྱུར་པའི༔ རྒྱལ་པོ་དུང་ཞེས་ཆོས་ཀྱི་རྒྱལ་སྲིད་སྐྱོང་༔ བདེ་གཤེགས་བྱམས་པའི་སྦྱིན་བདག་ཆེན་པོར་འགྱུར༔ དེ་ནས་བྱམས་པ་མྱ་ངན་འདས་པའི་དུས༔ སྐྱེ་རྒུའི་ཚེ་ལོ་དྲུག་ཁྲིའི་དུས་ཀྱི་ཚེ༔ གྲོང་ཁྱེར་མེ་ཏོག་ལྡན་ཞེས་བྱ་བ་རུ༔ མཛད་པ་མཐར་ཕྱིན་རྫོགས་སངས་རྒྱས་ཚུལ་སྟོན༔ བདེ་གཤེགས་སངས་རྒྱས་སེང་གེ་སྟག་ཅེས་བྱ༔ རིགས་ནི་རྒྱལ་རིགས་འོད་ནི་དཔག་ཚད་གཅིག༔ ཡབ་ནི་རྒྱལ་པོ་སེང་གེ་སྟག་ཅེས་བྱ༔ ཡུམ་ནི་དགའ་བའི་དབང་མོ་ཞེས་བྱ་སྟེ༔ སྲས་ནི་སྟོབས་ཆེན་རིམ་གྲོ་དེས་པའོ༔ ཤེས་རབ་ཅན་གྱི་མཆོག་ནི་ཡེ་ཤེས་རྩལ༔ རྫུ་འཕྲུལ་ཅན་གྱི་མཆོག་ནི་སྤྲིན་ལྡན་ནོ༔ འདུས་པ་དང་པོ་ཉན་ཐོས་ཐེར་
འབུམ་གཅིག༔ གཉིས་པ་ཉན་ཐོས་ཐེར་འབུམ་ཕྲག་དགུ་འབྱུང་༔ གསུམ་པར་ཉན་ཐོས་དུང་ཕྱུར་ཕྲག་དགུ་འབྱུང་༔ སྐུ་ཚེའི་ཚད་ནི་བདུན་ཁྲིའི་བར་དུ་འོ༔ དམ་ཆོས་ཚད་ནི་བྱེ་བའི་བར་དུའོ༔ དེ་ལྟར་རྫོགས་སངས་རྒྱས་པའི་ཚུལ་བསྟན་ནས༔ སྤྲུལ་པས་འགྲོ་དོན་འཁོར་བ་མ་སྟོང་བར༔ མཁའ་མཉམ་སེམས་ཅན་རྣམས་ཀྱི་དོན་མཛད་དེ༔ ཞེས་པ་སངས་རྒྱས་གླིང་པའི་གཏེར་ཁ་ནས་བྱོན་པ་དང་༔ རིན་ཆེན་གླིང་པའི་ཤོག་སེར་ལས་ཀརྨ་པ་ཞེས་ཡོངས་སུ་གྲགས་ཤིང་རབ་བྱུང་ཆས་ལ་ཞྭ་ནག་འཛིན་པ་སྐྱེ་བ་བཅུ་གསུམ་གྱི་བར་དུ་རྒྱ་བོད་མཁས་གྲུབ་ཀྱི་ཚུལ་བཟུང་སྟེ་བསྟན་པ་ཕྱོགས་བཅུར་སྤེལ་བར་མཛད་དོ༔ ཞེས་དང་། ཞི་ཁྲོ་དགོངས་པ་རང་གྲོལ་གྱི་ལུང་བསྟན། ཀརྨ་གླིང་པའི་གཏེར་མ་ལས། སངས་རྒྱས་སྟོང་གི་བསྟན་པ་མ་རྫོགས་བར༔ འགྲོ་འདྲེན་ཀརྨའི་སྐྱེ་བ་རྫོགས་མི་འགྱུར༔ དེ་ལ་འདུན་བྱེད་བདེ་བ་ཅན་དུ་སྐྱེ༔ སྐད་ཅིག་ཆ་ཤས་དེ་ཡི་ཞལ་མཐོང་བ༔ སྐྱེ་བ་བདུན་གྱི་ལས་སྒྲིབ་ངེས་པར་འདག༔ ཐུགས་རྗེ་ཆེན་པོའི་སྤྲུལ་པ་བྱང་ཆུབ་སེམས༔ ངེས་པར་འབྱུང་འགྱུར་རྗེ་འབངས་སྤྱི་བ་གྱིས༔ དེ་ཉིད་གང་དུ་གནས་ཀྱང་ལོངས་སྤྱོད་འདུ༔ ཞེས་དང་། མདོ་སྡེ་
བསྐལ་བཟང་ལས། སེང་གེ་ཞེས་བྱ་སྣང་མཛད་འགྱུར། །སངས་རྒྱས་དགུ་བརྒྱ་དགུ་བཅུ་ཡི། །རྩ་དགུའི་མཛད་པ་ཇི་སྙེད་ཀུན། །དེ་ཀུན་དེ་ཡིས་མཛད་པར་འགྱུར། །འཇིག་རྟེན་ཕན་ཕྱིར་སངས་རྒྱས་སྙིང་པོ་དག །མྱ་ངན་འདས་པའི་དམ་ཆོས་གནས་འགྱུར་པའི། །ལོ་གྲངས་སྟོང་ཕྲག་དག་གི་མཐའ་ཡང་གནས། །ཞེས་གསུངས་པ་དང་། རྗེ་ཆོས་གྲགས་རྒྱ་མཚོས། རྒྱལ་བ་བྱམས་པའི་རྒྱལ་ཚབ་ཉིད་མཛད་ནས། །བསྐལ་བཟང་སངས་རྒྱས་དྲུག་པ་ནས་བཟུང་སྟེ། །སྣང་མཛད་བར་དུ་སྤྲུལ་པའི་རྫུ་འཕྲུལ་སྟོན། །ཀརྨ་པ་ཡི་སྨོན་ལམ་བདག་འགྲུབ་ཤོག །ཅེས་གསུངས་པས། ཀརྨ་པ་ཞྭ་ནག་ཅོད་པན་འཛིན་པ་བཅུ་གསུམ་ཁོ་ནའང་ཡིན། སྤྲུལ་པ་ནི་འཁོར་བ་མ་སྟོང་བར་ལ་རྒྱུན་མི་འཆད་དེ། སངས་རྒྱས་ཐམས་ཅད་ཀྱི་ཕྲིན་ལས་གང་ཞིག་སངས་རྒྱས་ཀྱི་ཕྲིན་ལས་རྒྱུན་གྱི་རྟག་པ་ཡིན་པའི་ཕྱིར་རོ། །དེ་ཡང་འདིར་ན་རིམ་སྔར་བྱོན་པ་རྣམས་ཀྱིས་འདྲ་སྐུ་བཞེངས་པའི་དོན་ནི། དུས་ཀྱི་འཁོར་ལོ་བླ་མ་ཡོངས་སུ་བཟུང་བའི་རྒྱུད་ལས། རྒྱལ་པོ་ཟླ་བ་བཟང་པོའི་མཁྱེན་སྤྱན་སྟོན་པ་ཉིད་ལ་ནི་འདི་སྐད་ཞུས། ༧ ཡོན་ཏན་འབྱུང་གནས་བླ་མ་དག་
འདས་པར་གྱུར་ན་བསྙེན་བཀུར་ཡུལ་མེད་པས། །དེ་ཚེ་བསྙེན་བཀུར་བགྱིད་ཐབས་མཆིས་སམ་ཅི། །བཅོམ་ལྡན་རྡོ་རྗེ་འཆང་གིས་བཀའ་སྩལ་པ། །མཚན་ཉིད་ལྡན་པའི་བླ་མ་འདས་པའི་ཚེ། །ཞེས་སོགས་ནས། གསེར་རམ་བཻཌཱུརྱ་སོགས་རིན་ཆེན་ནམ། །ཙནྡན་ཤིང་སོགས་འཇིམ་པའི་ལྡེག་སྐུ་ལ། །རི་མོ་ལས་གྲུབ་འདྲ་འབག་ལས་བྱས་ནས། །ཞེས་སོགས་ནས། མདུན་དུ་མཆོད་རྫས་ཇི་སྙེད་སོགས་བཤམས་ནས། །བཤགས་དང་ཕྱག་འཚལ་ལ་སོགས་བཅུ་བྱས་ན། །དེ་དང་མཚུངས་པའི་དགེ་བ་ངས་མི་རྙེད། །དེ་ཚེ་བླ་མའི་ཡོན་ཏན་དྲན་པ་དང་། །བཀའ་དྲིན་མཛད་པ་རྣམ་ཐར་བྱིན་རླབས་དང་། །རྣམ་པ་ཆ་ལུགས་རྗེས་སུ་དྲན་བྱས་ནས། །དད་མོས་གུས་ཤིང་ཤིན་ཏུ་གདུང་བ་ཡི། །ཐུན་མོང་མཆོག་གི་དངོས་གྲུབ་ཐོབ་པའི་བློས། །ཡང་དང་ཡང་དུ་གསོལ་བ་དྲག་པོ་གདབ། །དེ་ཡིས་མ་འོངས་འཁོར་གྱི་གཙོ་བོར་འགྱུར། །འབག་དང་དམ་ཚིག་ཉམས་ཆག་སོར་ཆུད་ནས། །བར་ཆད་ཞི་ཞིང་སྒྲིབ་གསུམ་མ་ལུས་བྱང་། །ཚོགས་གཉིས་རྫོགས་ནས་འགྲོ་བ་འདྲེན་པར་འགྱུར། །ཞེས་གསུངས་པས་སྐུ་འབག་འདི་རྣམས་ཀྱི་མདུན་དུ་ཞེ་ཐག་པ་ནས་བཤགས་ན་སྡིག་ལྟུང་
ཉམས་ཆག་ཐམས་ཅད་བྱང་། གསོལ་བ་བཏབ་ན་བར་ཆད་ཐམས་ཅད་ཞི་ཞིང་། ཤེས་བྱའི་སྒྲིབ་པ་ཉོན་མོངས་པའི་སྒྲིབ་པ་སྙོམས་འཇུག་གི་སྒྲིབ་པ་ཐམས་ཅད་བྱང་། ཚོགས་གཉིས་ཡོངས་སུ་རྫོགས་པའི་སངས་རྒྱས་ཀྱི་གོ་འཕང་ཐོབ་སྟེ། བཅོམ་ལྡན་འདས་ཀྱིས་གསུངས་པ་ལ་ཡིད་ཆེས་སོ། ༈ །དེ་ནས་བཀའ་བཞི་ལྷ་ཁང་དུ་ཕྱིན་ནས། །འོག་ན་ཐུབ་པའི་སྐུ་མང་དུ་བཞུགས་པས་ཐུབ་པ་ལྷ་ཁང་དུ་གྲགས། རྟེན་གྱི་གཙོ་བོར་འགྲོ་མགོན་རས་ཆེན་གྱི་སྐུ་འདི་ཡིན་ཏེ། དེ་ཡང་དཔལ་མཁའ་འགྲོ་ཡང་སྙིང་དྲྭ་བ་སྡོམ་པའི་རྒྱུད་ཆེན་ལས། ཕྱི་མར་གྱུར་པའི་དུས་ཀྱི་ཚེ། །སངས་རྒྱས་གཉིས་པ་ལྟ་བུ་ཡི། །རྣལ་འབྱོར་པ་ནི་རྣམ་པ་བརྒྱད། །འགྲོ་བའི་དོན་ཕྱིར་འབྱུང་བར་འགྱུར། །ཞེས་སོགས་ནས། མེ་མཚོ་དཔལ་འདྲེན་ཞེས་བྱ་བར། །རྒྱལ་སྲས་ཌོམྦྷི་ཧེ་རུ་ཀས། །སྟག་ཞོན་སྤྲུལ་གྱི་གདེངས་ཁར་བཅས། །རིགས་ངན་བུད་མེད་དང་བཅས་རོལ། །ཞེས་སོགས་ནས། རྣལ་འབྱོར་བརྒྱད་པོ་འདི་དག་ནི། །འབྲིའམ་དྲན་ནམ་མཚན་བརྗོད་དམ། །ཐོས་ནས་མོས་པ་གང་བྱེད་པ། །དེ་ནི་བདེ་མཆོག་གོ་འཕང་ཐོབ། །ཅེས་གསུངས་ཤིང་རྒྱ་གར་ན་ཌོམྦི་པའི་མཚན་
འཛིན་པ་གསུམ་འབྱུང་བའི་ནང་ནས། ཌོམྦྷི་ཧེ་རུ་ཀ་ཆེན་པོ་འདི་ནི་གུ་རུ་པདྨ་དང་ཐུགས་རྒྱུད་གཅིག་པ་སྟེ། པདྨ་བཀའ་ཐང་ལས། རེས་འགའ་པདྨ་ཌོམྦི་པ་ཞེས་གྲགས། ཞེས་གསུངས་པ་དང་། གྲུབ་ཆེན་ཀརྨ་པཀིས། ཌོམྦྷི་ཧེ་རུ་ཀ་དང་། སློབ་དཔོན་པདྨ་འབྱུང་གནས་གཉིས་མིང་ལ་ཐ་དད་ཡོད་ཀྱང་དོན་ལ་ཐ་དད་མེད་པ་སྟེ། ཞེས་གསུངས་པ་དང་། དུར་ཁྲོད་ཧ་ཧ་སྒྲོགས་པ་ཌོམྦྷི་ཧེ་རུ་ཀ་ཨཎྜི་རང་ཞེས་ཀྱང་བྱ་བ་ཡེ་ཤེས་མགོན་པོ་ཉིད་དང་ཐ་དད་མེད་པ་སྟེ། ཞེས་གསུངས་པའི་གྲུབ་ཆེན་དེ་བོད་དུ་སྐྱེ་བ་བཞེས་པ་ནི། འགྲོ་མགོན་རས་པ་ཆེན་པོ་དེ་ཉིད་ཡིན་པར་ངེས་པ་སྟེ། ཨོ་རྒྱན་ཆེན་པོའི་ལུང་བསྟན་བཀའ་རྒྱ་མ་ལས། སྔགས་ཀྱི་ཡེ་ཤེས་རྣལ་འབྱོར་མཐུ་ཆེ་བ༔ རྫུ་འཕྲུལ་མཐུ་ལྡན་སྤྲུལ་དང་སྤྲུལ་བསྒྱུར་སྟོན་རྣལ་འབྱོར་སྔགས་སྤྱོད་གྲགས་པའི་མིང་འཛིན་ཅིང་༔ བསྟན་པའི་སྲོལ་འཛིན་སྟོབས་དང་ལྡན་པར་འབྱུང་༔ ཞེས་ལུང་བསྟན་པའི་རས་ཆེན་དར་མ་གྲགས་དེ་ཉིད་ཀྱིས་བཅོམ་ལྡན་འདས་ཀྱི་བསྟན་པའི་སྙིང་པོ་འོག་མིན་ཀརྨའི་གདན་ས་འདི་ཉིད་དགེ་འདུན་གྱི་སྡེ་བཙུགས་པ་སོགས་དར་རྒྱས་སུ་མཛད། རྗེ་ཉིད་ཀྱི་གཟིམ་མལ་སྐུ་འདྲ་འདི།་རྒྱལ་སྲས་སྤོམ་བྲག་པས་
བཞེངས་ཤིང་རབ་གནས་མཛད། ནང་རྟེན་རྗེ་ཉིད་ཀྱི་འཕེལ་གདུང་དང་དབུ་ལོ་གདུང་ཐལ་རུས་སོགས་བཞུགས་ཤིང་། འགྲོ་མགོན་རས་ཆེན་ཉིད་མཇལ་བ་དང་ཁྱད་པར་མེད་ཅིང་གསུང་ལན་མང་དུ་བྱོན་པ་དང་། སྐྱེས་བུ་དམ་པ་རྣམས་ཀྱིས་མཇལ་བ་ན། ཞལ་དབུགས་རྒྱུ་བ་དང་སྤྱན་ལྡེབ་པ་སོགས་ཡ་མཚན་དཔག་ཏུ་མེད་དོ། །འདི་དང་མཉམ་དུ་རྗེ་དུས་མཁྱེན་གྱི་སྐུ་འདྲ་འདི་ཡང་བཞེངས་ཏེ། དད་རྟེན་རིང་བསྲེལ་རྣམས་ས་བཞིས་བཀང་གསུང་བསྒྲགས་པར་གྲགས་སོ། །གཞན་ཡང་རྟེན་བྱིན་རླབས་ཅན་དཔག་ཏུ་མེད་པ་བཞུགས་སོ། །སློབ་དཔོན་པདྨ་འབྱུང་གནས་དང་ཡེ་ཤེས་མགོན་པོ་དབྱེར་མེད་པའི་སངས་རྒྱས་ས་ལ་རབ་ཏུ་གནས་ཤིང་། མཆོད་གནས་ཆེན་པོ་བྱེད་པ་དང་གཞི་ལ་དེ་དག་ཀྱང་བྱང་ཆུབ་ཆེན་པོའི་གནས་སུ་འགྱུར་ཞིང་། སེམས་ཅན་དེ་དག་ཀྱང་བྱང་ཆུབ་ཆེན་པོའི་ལམ་ཚོལ་བའི་ངང་ཚུལ་ཅན། ཐེག་པ་ཆེན་པོ་ལ་དད་པས་ཏིང་ངེ་འཛིན་ལ་གཞོལ་བར་འགྱུར་རོ། །ཞེས་དང་། ལྷ་མོ་དྲི་མ་མེད་པའི་འོད་ཀྱིས་ཞུས་པའི་མདོ་ལས། །བསྐལ་པ་བཟང་པོའི་རྒྱལ་སྲས་རྣམས། །ལི་ཡུལ་བོད་ཀྱི་གྲོང་ཁྱེར་དེར། །སྐྱེ་བ་དག་ཀྱང་བཞེས་འགྱུར་ཞིང་། །
མི་དང་འདྲ་བར་སྣང་བར་འགྱུར། །ཞེས་ལུང་བསྟན་པ་ལྟར། སྤྱིར་བོད་དུ་ལུང་བསྟན་པ་ལྟར། སྤྱིར་བཏང་བོད་དུ་བསྟན་པ་དར་ཞིང་། ཁྱད་པར་ཀརྨ་སངས་རྒྱས་ཀྱི་གདན་ས་འདི་བྱང་ཆུབ་ཆེན་པོའི་གནས་ཡིན་ཅིང་། སྐལ་བཟང་སངས་རྒྱས་རྒྱལ་བ་ལྔ་པ་བྱམས་པའི་སྤྲུལ་པ། བྱང་ཆུབ་སེམས་དཔའ་སི་ཏུ་སྤྲུལ་པའི་སྐུ་ན་རིམ་རྣམས། མི་ལས་འདས་ཀྱང་མི་དང་འདྲ་བ་ཡང་ཡང་སྐྱེ་བ་བཞེས་ནས། གཙུག་ལག་ཁང་འདི་ཡི་ཞིག་གསོས་དང་བསྟན་པའི་བྱ་བ་རྒྱ་ཆེར་མཛད་པ་སྟེ། ཁྱད་པར་ཨོ་རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། མ་འོངས་འདི་འཛིན་ཆོས་ཀྱི་བཤེས་གཉེན་ཀྱང་༔ ཆོས་སྤྱོད་བསྟན་པའི་སྲོལ་འཛིན་རྣལ་འབྱོར་པ༔ འགྲོ་བའི་དོན་བརྩོན་རྒྱུད་མར་རིམ་བཞིན་དུ༔ ཆོས་ཀྱི་གྲགས་པ་ཆོས་ཀྱི་དབང་ཕྱུག་དང་༔ ཆོས་དབྱིངས་ཡེ་ཤེས་ཆོས་རྒྱལ་དཔལ་བཟང་པོ༔ ཆོས་ཀྱི་རྒྱལ་མཚན་ཆོས་ཀྱི་བློ་གྲོས་དང་༔ ཆོས་ཀྱི་སྤྱན་ཅན་བྱང་ཆུབ་སེམས་དཔའ་དྲུག༔ རྒྱལ་བའི་སྤྲུལ་པས་འདི་འཛིན་འགྲོ་བ་འདྲེན༔ ཞེས་ཆོས་ཀྱི་མཚན་ཅན་བྱང་ཆུབ་སེམས་དཔའ་དྲུག་ལུང་བསྟན་པའི་ནང་ནས་སི་ཏུ་ཆོས་ཀྱི་རྒྱལ་མཚན་པ་དེ་ཉིད་ཀྱིས། ༧ རྗེ་དབང་ཕྱུག་རྡོ་རྗེས་གདན་ས་ཀརྨའི་
གཙུག་ལག་ཁང་འདི་ཡི་ཞིག་གསོས་དང་སྔར་བས་ཆེར་བསྐྱེད་པར་མཛོད་གསུངས་པ་ལ་བརྟེན་ནས། གཅོ་ཁང་རྩག་རེ་ཡར་སྤར་བ་དང་། རྒྱ་ཆེར་བསྐྱེད་པ་དང་། སྟེང་ཤོད་ཀྱི་ལོགས་བྲིས་ཐམས་ཅད་བཞེངས་པ་སོགས། གདན་ས་འདི་ལ་བཀའ་དྲིན་མཛད་པ་ནི། ཁོང་ལས་ཆེ་བ་སྔར་མ་བྱུང་བ། རྗེ་ཉིད་ཀྱི་གདུང་ཐལ་རུས་སོགས་བཞུགས་ཤིང་གདུང་རྟེན་དུ་བཞེངས་པ་ཡིན་ནོ། །བླ་མའི་ཡོན་ཏན་ཡོངས་སུ་བཟུང་བའི་རྒྱུད་ལས། མཚན་ཉིད་ལྡན་པའི་བླ་མ་འདས་པའི་ཚེ། ཞེས་སོགས་ནས་གདུང་བཞུ་ལུགས་སོགས་གསུངས་ནས༔ ཐལ་བ་སྐུ་ཁྲུས་གསོལ་ནས་མཆོད་རྟེན་བཞེངས། །རབ་ཏུ་གནས་པ་བྱས་ཤིང་མཆོད་པ་འབུལ། །ཕྲ་རབ་རྡུད་སྙེད་འཁོར་ལོས་སྒྱུར་བ་ཐོབ། །མཚན་དང་དཔེ་བྱད་འབར་བའི་ས་ཐོབ་འགྱུར། །ཞེས་གསུངས་པས། འདིའི་མདུན་དུ་མར་མེ་མཆོད་པ་ཕྱག་དང་སྙན་དར་སོགས་ཕུལ་ན། ས་ཆེན་པོའི་རྡུལ་གྱི་གྲངས་དང་མཉམ་པའི་འཁོར་ལོས་སྒྱུར་བའི་རྒྱལ་པོ་ཐོབ་པ་དང་། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་འདོམ་གང་གིས་བརྒྱན་པའི་ལུས་ཀྱང་ཐོབ་པ་ནི། བཅོམ་ལྡན་འདས་ཀྱི་
བཀའ་ཡིན་ནོ། །གཞན་འདི་ན་རིས་སུ་བྲིས་པ་དང་། ལུགས་སུ་བླུགས་པའི་རྟེན་མང་དུ་བཞུགས་སོ། ༈ །དེ་ནས་བཀྲ་ཤིས་གསར་མའི་ནང་དུ་ཕྱིན་ནས། དེ་ནས་དཔལ། ལྡན་དུས་གསུམ་མཁྱེན་པ་དེ་ཉིད་སྐུ་ན་ཕྲ་མོའི་དུས་ན་ཡབ་ལ་ཞུས་པ་ལྷ་མོ་རང་བྱུང་རྒྱལ་མོ་བསྒྲུབས་པས་རྡོ་ལ་ཞབས་རྗེས་བཞག་སྟེ། ལྷ་མོའི་སྒོ་ནས་གྲུབ་པ་ཐོབ་པའི་ཚུལ་བསྟན། །དགྲ་ཞིག་ཡོད་པ་དེ་རྟས་བརྡབས་ནས་ཤི། དེ་ནས་བཟུང་སྟེ་དུས་གསུམ་མཁྱེན་པའི་གདན་ས་དང་ཆོས་བརྒྱུད་ལ་ལྷ་མོ་རྒྱུད་ལྷར་གྱུར། ༧ འགྲོ་མགོན་རས་ཆེན་གྱིས་བེར་ནག་ཅན་དངོས་སུ་འགྲུབ་ནས་བླ་མ་མགོན་པོ་དབྱེར་མེད་གྱུར་ནས། མཐུ་སྟོབས་དབང་ཕྱུག་འགྲོ་མགོན་རས་པ་ཆེན་པོ་ཡོངས་སུ་གྲགས་སོ། །གནས་འདིར་ལྷ་མོ་རང་བྱུང་རྒྱལ་མོ་ཡང་ཡང་དུ་ཞལ་གཟིགས་པ་ལ་བརྟེན་ནས་རྟེན་བཙུགས་སོ། །སྤོམ་བྲག་པས་ཀྱང་གནས་འདིར་ཆོས་སྐྱོང་མ་མགོན་སྤྲུལ་པ་བསམ་གྱི་མི་ཁྱབ་པ་ཞལ་གཟིགས། ཁྱད་པར་ཨོ་རྒྱན་རིན་པོ་ཆེའི་ལུང་བསྟན་ལས། བསིལ་བ་ཚལ་གྱི་ཆོས་སྐྱོང་གི༔ རྣམ་འཕྲུལ་ཀརྨ་པ་ཞེས་གྲགས༔ སྐྱེ་བ་དུ་མར་འགྲོ་དོན་མཛད༔ ཅེས་དང་། གྲུབ་ཆེན་ཀརྨ་པཀྵིའི་ཞལ་ནས། དཔལ་མགོན་
བེར་ནག་ཅན་དང་། མིང་ཡོངས་སུ་གྲགས་པའི་ཀརྨ་པ་གཉིས་ལ་ཐ་དད་མེད་པར་ཤེས་སམ་མི་ཤེས། དེའི་ཕྱིར་ན་དུས་གསུམ་དུས་མེད་ཐམས་ཅད་དུ། མགོན་པོ་འཁོར་དང་བཅས་པ་འདིའི་བྱ་བ་དང་ཕྲིན་ལས་ཐམས་ཅད་བསྒྲུབ་པ་ཡིན་པར་ཀུན་གྱིས་ཤེས་པར་མཛོད། ཅེས་དང་། ལྷ་མོའི་ཞལ་ནས། དུས་གསུམ་མཁྱེན་པའི་བརྒྱུད་པ་འཛིན་ཅིང་གདན་ས་སྐྱོང་བ་རྣམས། སྒྲུབ་ཐབས་མི་ཤེས་ཀྱང་སངས་རྒྱས་ཀྱི་བསྟན་པ་གནས་ཀྱི་བར་ངེད་ཀྱིས་སྡོང་གྲོགས་དང་ཕྲིན་ལས་ཐམས་ཅད་སྒྲུབ་པ་ཡིན་ཟེར་བ་ཡང་ཡང་བྱུང་གསུངས་བའི་ཕྱིར། གདན་ས་འདི་ལ་ཆོས་སྐྱོང་མ་མགོན་ལྕམ་དྲལ་དངོས་སུ་བཞུགས་པ་ཡིན་ལ། གྲུབ་ཆེན་ཀརྨ་པཀྵིའི་གནས་ཀྱི་གཙོ་བོ་བཀྲ་ཤིས་གསར་མ་འདི་ཡིན་ཏེ། རྗེ་དེ་ཉིད་ཀྱིས་མཛད་པའི་བཀྲ་ཤིས་སྒོ་མང་ལས། བཀྲ་ཤིས་གསར་མའི་དགོན་པ་ན། །སྣང་སྲིད་ཟིལ་གནོན་རྣལ་འབྱོར་པ། །ཀརྨ་པཀྵིའི་ཐུགས་དམ་བསྐང་། །ཞེས་གསུངས་སོ། །དེས་ན་འདི་ནི་གྲུབ་ཆེན་རིན་པོ་ཆེའི་གཟིམ་ཁང་ཡིན་པས་བྱིན་རླབས་ཆེ་ལ་ཤིན་ཏུ་གཉན། ༧ རྗེ་རང་བྱུང་བ། དེ་བཞིན་གཤེགས་པ། དོན་ལྡན་ཞབས་སོགས་ན་རིམ་མང་པོའི་རྟེན་གཏོར་
ཤིན་ཏུ་གཉན་པ་བཞུགས། ཁྱད་པར་བསྐང་གསོའི་རྒྱུན་འདི་ཡང་སྔར་ནས་མ་ཆད་ཅིང་། ༧ རྗེ་ཆོས་གྲགས་རྒྱ་མཚོའི་ཐུབ་ཆེན་བཞེངས་པའི་བླུགས་གཉའ་ལ་རང་བྱོན་དུ་གྲགས་པའི་ཟུམ་མགོན་གྱི་སྐུ་སོགས་ཕྱི་ནང་གསང་བའི་རྟེན་བསམ་ལས་འདས་པ་བཞུགས་སོ། །དེ་ཡང་འཕགས་པ་རིན་ཆེན་དཔུང་རྒྱན་ལས། བར་སྣང་གི་ལྷ་རྣམས་ཀྱིས་མགོན་པོ་ལ་བསྟོད་པ་ལས། བསྐལ་པ་གྲངས་མེད་འདས་པའི་སྔོན་རོལ་ནས། །མཐའ་ཡས་ཚོགས་རྫོགས་མངོན་པར་སངས་རྒྱས་ཀྱང་། །ཐུགས་རྗེས་དབང་གིས་འགྲོ་བའི་དོན་མཛད་པ། །མགོན་པོ་སྤྱན་རས་གཟིགས་ལ་ཕྱག་འཚལ་བསྟོད། །ཅེས་གསུངས་པས། འཕགས་པ་སྤྱན་རས་གཟིགས་དབང་ཕྱུག་ཀརྨ་པ་དེ་ཉིད་ཡེ་ཤེས་མགོན་པོར་སྐུར་བཞེངས་པ་ནི། བེར་ནག་ཅན་ཡིན་པས། འདིར་གསོལ་ཁ་མཆོད་བསྟོད་སྙན་དར་སོགས་བྱས་ན། བར་ཆད་སེལ་བ་དང་། བཀྲ་ཤིས་པ་དང་། ཕྱི་མ་ལམ་སྣ་འདྲེན་པ་དང་། འཕགས་པ་རིན་ཆེན་དཔུང་རྒྱན་དང་། སྲོག་གི་འཁོར་ལོའི་རྒྱུད་གཉིས་ཚིག་མཐུན་པར་བསྟོད་པའི་ལེའུ་ལས། སྐྱེ་བོ་ཕལ་ཆེར་རྣམས་ཀྱི་སྐྱབས་གྱུར་ཁྱོད། །ཐུགས་རྗེས་དབང་གིས་འགྲོ་བའི་དོན་མཛད་པ། །
ནད་རྣམས་སེལ་བར་བྱེད་པ་སྨན་པའི་མཆོག །ཚོགས་བདག་བྱིན་གྱིས་གྲུབ་པའི་གནོད་པ་སེལ། །འདི་དང་ཕ་རོལ་གཉིས་ཀ་ཕུན་སུམ་ཚོགས། །འདོད་པ་གཞན་ཡང་ཡིད་ལ་འབྱུང་བ་བཞིན། །དེ་བཞིན་འདོད་པ་ཐམས་ཅད་ལག་ཏུ་སྦྱིན། །སྨན་སྟོང་ལྟ་ན་སྡུག་པས་དུག་གཞིལ་འདྲ། །དཀོན་མཆོག་གཙུག་ལག་ཁང་ནི་སྐྱོང་བར་མཛད། །དགེ་བསྙེན་འཁོར་ཀུན་ལེགས་པར་འཕེལ་བར་མཛད། །གཞོན་ནུ་གཞོན་སྡེ་ཀུན་གྱིས་རྒྱས་པར་མཛད། །།ལོག་འདྲེན་དགྲ་བགེགས་མ་ལུས་འདུལ་བར་མཛད། །སེམས་ཅན་ཀུན་ལ་ཕན་གདག་སྙིང་ལ་བསམ། །ཞེས་དང་། ལྷ་མོ་བསྟོད་པའི་རྒྱུད་ཆེན་པོ་ལས། ཕྱག་ན་རྡོ་རྗེས་བཀའ་སྩལ་པ། ལྷ་མོ་འདི་ལ་བསྟོད་པ་ནི། ང་ལ་བསྟོད་པ་ཡིན་ནོ། །སངས་རྒྱས་ལ་བསྟོད་པ་ཡིན་ནོ། །ལྷ་མོས་ཀྱང་མི་དེ་ལ་སྲུང་བར་བྱེད་དོ། །སྐྱོབ་པར་བྱེད་དོ། །དེ་ཡི་འདོད་པའི་དངོས་གྲུབ་སྟེར་རོ། །ཞེས་དང་། ནག་པོ་སྲོག་གི་འཁོར་ལོའི་རྒྱུད་ལས། ལེགས་ལྡན་བཀའ་ཆད་འབྱུང་བའི་གནས། །ཅི་ཡང་ངེས་པ་མེད་པ་ནི། །ལེགས་ལྡན་ནག་པོ་སྒྲུབ་པ་ན། །དམ་ལ་ཉམས་པ་བྱུང་མ་ཐག །དུས་དེ་ཉིད་དུ་ལས་རྣམས་བྱེད། །
ལེགས་ལྡན་སྔགས་ཀྱིས་སུས་ཟིན་པ། །ཐ་མ་རྩ་བ་བདུན་བརྒྱུད་ཆོད། །གང་ལ་དམིགས་པའི་སྲོག་དབུགས་ལེན། །ཉམས་པ་རྣམས་ལ་ཆད་པ་གཅོད། །ཅེས་གསུངས་པས། གདན་ས་ཆེན་པོ་འདི་ལ་གནོད་འཚེ་དང་དམ་ལས་འདས་ན། རྩ་བ་བདུན་བརྒྱུད་ཆད་པ་ནི་ཕྱག་ན་རྡོ་རྗེའི་བཀའོ། མགོན་པོའི་འཁོར་གྱི་ཕྱག་ན་རྡོ་རྗེ་དང་། ཡེ་ཤེས་མགོན་པོའི་དྲུང་དུ་ཁས་བླངས་སོ། །སྟོན་པ་ཁྱོད་ཀྱི་སངས་རྒྱས་ཀྱིས། །ངེད་ལ་ཐུགས་རྗེ་མ་ཆུང་ཞིག །སེམས་ཅན་མི་བསྲུན་ལས་ངན་པ། །བདག་ཅག་རྣམས་ཀྱི་འདུལ་སྐལ་གྱིས། །གསང་བདག་ཕྱག་ན་རྡོ་རྗེ་དང་། །ལེགས་ལྡན་ནག་པོ་ཉིད་དང་ནི། །བདག་ཅག་འཁོར་རྣམས་ཐམས་ཅད་ཀྱིས། །སངས་རྒྱས་བསྟན་པ་མ་ནུབ་བར། །དམ་ཚིག་ཅན་གྱི་གྲོགས་བྱ་ཞིང་། །སྔགས་དང་སྙིང་པོ་སུས་འདྲེན་པ། །རང་ཅག་རྣམས་ཀྱི་དམ་ཚིག་ལགས། །ཆོས་བྱེད་རྣམས་ལ་མགོན་བྱ་ཞིང་། །དམ་ལས་ཉམས་ན་ཆད་པ་གཅོད། །གང་ཞིག་ངེད་ལ་སུས་བརྟེན་པ། །ཚེ་དང་དབང་ཐང་སྤེལ་བྱ་ཞིང་། །འཁོར་བཅས་ནོར་ཕྱུགས་སྤེལ་བར་བྱ། །དུས་ལས་ཡོལ་བར་མི་བྱ་ཞིང་། །དམ་ལ་འདའ་བར་མི་བྱའོ། །ངེད་ཀྱི་བཀའ་ལས་
སུས་འདས་པ། །དུག་དང་རིམས་དང་སྨྱོ་འབོག་དང་། །རྡོ་རྗེ་སྲིན་པོའི་ཁྲག་འཐུངས་ནས། །།རྡོ་རྗེ་དམྱལ་བར་ན་ར་ཀན། །སྒྲུབ་པ་པོ་ཡི་གྲོགས་བྱ་ཞིང་། །འཁོར་རྣམས་བཀྲ་ཤིས་ཕུན་སུམ་ཚོགས། །ཞེས་གསུངས་པས། གདན་ས་ཆེན་པོ་འདི་ལ་བཀུར་སྟི་དང་གུས་ཞབས་བྱས་ན་བཀྲ་ཤིས་དང་བདེ་ལེགས་འབྱུང་། ནད་གདོན་དང་བར་ཆད་ཞིའོ། །གདན་ས་ཆེན་པོ་འདི་ལ་གནོད་པ་དང་བསམ་པ་ངན་པ་ཕྱི་ནང་སུས་བྱས་ན། བཀའ་ཆད་ངེས་པར་འབྱུང་བ་ནི། སྐྱེས་བུ་ཆེན་པོ་དང་། ཁྱབ་འཇུག་རཱ་ཧུ་ལ་དང་། ཀླུ་བདུད་རྡོ་རྗེ་རྒྱལ་པོ་དང་། བཙན་ཀླུ་བདུད་གསུམ་ལ་སོགས་པ་མགོན་པོའི་འཁོར་གདུག་པ་ཅན་རྣམས་ཀྱིས་ལས་མྱུར་མགྱོགས་སུ་སྒྲུབ་པ་ནི། ཁོ་རང་རྣམས་ཀྱི་དམ་ཚིག་ཡིན་པས། གདན་ས་འདི་དང་། གནས་འདི་དང་། ཁྱད་པར་བཀྲ་ཤིས་གསར་མ་འདི་ཤིན་ཏུ་གཉན་ཏེ། ཆོས་སྐྱོང་བཀའ་སྲུང་ཐམས་ཅད་རང་བཞིན་ཤུགས་ཀྱིས་འདུ་བ་དུར་ཁྲོད་བསིལ་བ་ཚལ་དང་ཁྱད་པར་མེད་དེ། གཙང་ལ་སྟོད་བྱི་བོལ་གྱི་གཏེར་རྙིང་ལུང་བསྟན་ཨོ་རྒྱན་རིན་པོ་ཆེའི་གསུང་ལས། ལར་ལྔ་བརྒྱ་དུས་ན་དུ་རུ་ཀའི་དམག་དང་། སོག་པོའི་དམག་
འོང་། རྒྱ་གར་བལ་པོ་ལ་ཡང་བརྡེག །བོད་འདི་དམ་པའི་ཆོས་ཀྱི་བསྟན་པ་གཉིས་སུ་གྱེས་ཏེ་རེས་མོས་སུ་དམའ་བར་བྱེད། ནུབ་ཀྱིས་དམག་དེས་བྱང་རིགས་པ་ཐམས་ཅད་འཇོམས། དེ་ནས་དབུས་གཙང་ཁམས་གསུམ་ཐམས་ཅད་ལ་བརྡེགས། དེ་འདུལ་བའི་གཉེན་པོ་མང་དུ་འབྱུང་ཡང་སེམས་ཅན་གྱིས་སྲོག་སྐྱབས་དགེ་བ་སྤྱོད་པ་དང་། རྒྱ་གར་བསིལ་བ་ཚལ་གྱི་མགོན་པོའི་སྤྲུལ་པ་ཀརྨ་པ་ཞེས་གྲགས་པ། དབུས་ཀྱི་མཚུར་ཕུ་ཞེས་པར། སྤྱོད་པ་རྩིང་རྩུབ་བསྣོལ་མར་སྟོན་པ་ཞིག །བྱ་བབ་པ་ལྟར་སྔོན་གྱི་ལས་དང་སྨོན་ལམ་སྟོབས་ཀྱིས་འབྱུང་སྟེ། དེ་ཡི་དུས་སུ་ཨོ་རྒྱན་ང་ཡི་སྤྲུལ་པ་ལྔ་འབྱུང་། བྱིན་གྱིས་རླབས་པ་བརྒྱ་རྩ་བརྒྱད་འབྱུང་། སྨོན་ལམ་ལས་འཕྲོ་དང་ལྡན་པ་སྟོང་རྩ་ལྔ་ཡོངས་སོ། །ས་འོག་གི་གཏེར་ཐམས་ཅད་བརྡོལ། ཀུན་ཀྱང་གཏེར་ལ་ཡིད་གཏད་པ་འབྱུང་། མ་ཎིའི་བསྟན་པ་ཐམས་ཅད་རྒྱས། ཐུགས་རྗེ་ཆེན་པོའི་འགྲོ་དོན་རྒྱས་པར་འགྱུར། ཐམས་ཅད་འབྲི་ཀློག་ལ་བརྩོན་པས་ཨོ་རྒྱན་པདྨ་ང་ཡི་བསྟན་པ་དར་བར་འགྱུར་རོ། །རྒྱལ་པོ་གཅིག་གིས་མངའ་འོག་ལ། བོད་འབངས་ལྷག་མ་བག་ཀྱིས་སྐྱིད་པར་འགྱུར། ཞེས་གསུངས་པས། ཀརྨ་པ་བཅུ་
པའམ། བཅུ་གཅིག་པ་སོགས་ཀྱིས་སྟོད་སོག་ཟློག་པ་དང་ལྷ་ས་ཆུས་འཇིགས་རྗེས་ཞིག་གསོས་མཛད་པར་གསུངས་པ་དང་། ད་ལྟ་བཞུགས་པ་དང་སླད་ནས་འབྱོན་པའི་ཞྭ་ནག་འཛིན་པ་རྣམས་ཀྱང་། ཡེ་ཤེས་མགོན་པོ་དངོས་ཡིན་པ་དང་བསྟན་པ་རྫོགས་པ་མ་ཡིན་པས། ལྷ་རྟགས་དངོས་སུ་འབྱུང་བ་ཐེ་ཚོམ་མེད་པ་ལགས་སོ། །དེ་ཡན་ནི་གནས་བཤད་དང་རྟེན་གྱི་དཀར་ཆག་ཟུར་ཙམ་ཡིན་ལ། རྒྱས་པ་རྟེན་ཡིག་ལས་ཤེས་སོ། ༈ །སྤྱི་དོན་ལྔ་པ་ཕན་ཡོན་དགོས་ཆེད་བསྟན་པ་ལ་ཡང་། ས་བཅད་གསུམ་་སྟེ། གནས་ལ་ཡིད་ཆེས་པའི་ལུང་གནས་ཀྱི་ཕན་ཡོན། བཀུར་སྟིའི་ཕན་ཡོན། ཞར་བྱུང་བསྟན་པའི་མཐའ་རྒྱས་ཚུལ་དང་གསུམ་སྟེ། དང་པོ་འདུལ་བ་ལུང་ལས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྱང་ཕྱོགས་གངས་རའི་ཁྲོད་ནས། རྡོ་བེམ་པོས་ཀྱང་སེམས་ཅན་གྱི་དོན་བྱེད་པ་ཡོད་དོ། །གཤིན་རྗེ་གསལ་ཤིང་གི་རྒྱུད་ལས། ཉི་ཤུ་རྩ་བཞི་གནས་ཀྱི་མཆོག །ཉི་མ་བྱང་ཤར་མཚམས་ཤེད་ནས། །འདི་ནས་རི་བོ་བཅུ་གསུམ་འདས། །གངས་རིའི་བསྐོར་བའི་ར་བ་ན། །རྡོ་རྗེ་ཕག་མོའི་དཀྱིལ་འཁོར་གནས། །ཞེས་དང་། །
མངོན་འབྱུང་གི་རྒྱུད་ལས། ཀུན་དགའ་གཞོན་ནུའི་གྲོང་ཁྱེར་ན། །བདེ་གཤེགས་ཞི་ཁྲོའི་ཕོ་བྲང་གནས། །ཞེས་དང་། ཨོ་རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། ལ་ལར་སངས་རྒྱས་རྣམས་ཀྱི་སྤྲུལ་པ་ལས༔ ས་རྡོ་རི་བྲག་ལམ་འཕྲང་ལ་སོགས་སུ༔ སྐུ་གསུང་ཐུགས་ཀྱི་སྤྲུལ་པར་རང་བྱོན་འབྱུང་༔ དེ་མཐོང་ཐོས་དང་གང་འབྲེལ་ངན་སོང་མེད༔ ཕྱོགས་ནི་མ་ངེས་ཕྱོགས་མཚམས་དབུས་ལ་སོགས༔ ཉེ་རིང་མེད་ཕྱིར་ཀུན་ཏུ་འབྱུང་བར་འགྱུར༔ དེ་བཞིན་དུས་ལ་ངེས་མེད་ནམ་ཡང་འབྱོན༔ ཡུན་ལ་ཚད་བཟུང་མེད་དེ་འཁོར་མཐའི་བར༔ ཞེས་དང་། ཡིག་དྲུག་ལ་སོགས་རང་བྱོན་བསམ་མི་ཁྱབ༔ དེ་སོགས་རྣམ་པ་དུ་མར་སྤྲུལ་ནས་ཀྱང་༔ འགྲོ་བའི་དོན་མཛད་བསྟན་པ་གནས་པར་འགྱུར༔ ཞེས་གསུངས་པ་དང་། རྗེ་རང་བྱུང་རྡོ་རྗེས་མཛད་པའི་རྩྭ་རིའི་གནས་བསྟོད་ལས། སྨད་རོང་བཙན་ཁ་བ་དཀར་པོ་ལ་ཐུག་ཅིང་། སྟོད་བལ་པོའི་ཡུལ་གྲུབ་པའི་གནས་ཆེན་ལ་ཐུག་གི་བར་དང་། ལྷོ་ཕྱོགས་ཀ་མ་རུ་ཡི་མཐར་ཐུག་གི་གནས་ལ་སོགས་པ་ཚུན་ཆད། གནས་དེ་དང་ཉེ་བའི་གནས་ལ་སོགས་པའི་གནས་ཕྲན་སྟོང་ཡོད་པར་བཤད། ཅེས་གསུངས་པ་དང་། ཨོ་
རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། དེ་བཞིན་གནས་དང་གནས་ཕྲན་ལ་སོགས་པ༔ ཡུལ་དང་ཡུལ་འདྲ་སྦས་པའི་ཚུལ་རྣམས་སུ༔ སྒྲུབ་པ་བྱས་པའི་ཡོན་ཏན་བསམ་མི་ཁྱབ༔ ཕལ་པའི་གནས་སུ་ལོ་གཅིག་སྒྲུབ་པ་བས༔ དེ་དག་རྣམས་སུ་ཞག་གཅིག་འགྲུབ་ཐག་ཉེ༔ དེ་དོན་ཤེས་པར་མཛོད་ཅིག་རྗེས་འཇུག་རྣམས༔ ཞེས་གསུངས་པས། ༧ གཞན་དུ་ལོ་གསུམ་སྒྲུབ་པ་དང་། འདིར་ཞག་གསུམ་སྒྲུབ་པ་ཕན་ཡོན་མཉམ། གཞན་དུ་མར་མེ་སུམ་བརྒྱ་དང་དྲུག་ཅུ་ཕུལ་བ་དང་། འདིར་གཅིག་ཕུལ་བ་མཉམ། གཞན་དུ་དར་ལྕོག་སུམ་བརྒྱ་དྲུག་ཅུ་བཙུགས་པ་དང་། འདིར་གཅིག་བཙུགས་པ་མཉམ། གཞན་དུ་བསྐོར་བ་སུམ་བརྒྱ་དྲུག་ཅུ་བྱས་པ་དང་། འདིར་བསྐོར་བ་གཅིག་མཉམ། དེ་བཞིན་དུ་ཚོགས་བརྒྱ། ཆོས་སྤྱོད། བསྐང་གསོལ། ཡིག་དྲུག་ལ་སོགས་པ་དགེ་བའི་བྱ་བ་གང་དང་གང་བྱས་པ་ཐམས་ཅད་སུམ་བརྒྱ་དྲུག་ཅུའི་འགྱུར་ཡོད་དོ། །པར་སྐྱེས་མཆོག་ཀརྨ་པཀྵིས། གཙུག་ལག་ཁང་འདི་མཇལ་བ་དང་། འབུམ་ཐང་ལ་རྡོག་པ་བཞག་ཚད་ཐམས་ཅད་ལ་ངན་སོང་མེད་ཅེས་དབུ་བསྙུང་བཞེས་པར་གྲགས་སོ། །དེས་
གནས་ཀྱི་ཕན་ཡོན་དགོས་ཆེད་སོང་ནས། བཀུར་སྟིའི་ཕན་ཡོན་ནི། བཅོམ་ལྡན་འདས་ཀྱིས་གསུངས་པའི་མཆོད་རྟེན་བསྐོར་བའི་ཕན་ཡོན་ཚིགས་སུ་བཅད་པའི་མདོ་སྡེ་ལས། སྐད་ཅིག་ཙམ་གྱི་བར་དུ་ཡང་། །མཆོད་རྟེན་བསྐོར་བ་བྱས་པས་ནི། །མི་ཁོམ་བརྒྱད་རྣམས་སྟོང་བར་འགྱུར། །མཆོད་རྟེན་བསྐོར་བ་བྱས་པས་ནི། །རིན་ཆེན་བདུན་དང་ལྡན་པ་ཡི། །འཁོར་ལོས་སྒྱུར་བའི་རྒྱལ་པོ་ཡིས། །ཆོས་ཀྱི་འཁོར་ལོ་སྐོར་བར་བྱེད། །མཆོད་རྟེན་བསྐོར་བ་བྱས་པས་ནི། །འཇིག་རྟེན་དག་ཏུ་དེ་བཞིན་གཤེགས། །མཚན་རྣམས་ཀྱིས་ནི་བརྒྱན་པ་དང་། །གསེར་གྱི་སྐུ་མདོག་ཐོབ་པར་འགྱུར། །ཞེས་སོགས་མཐར་ཐུག་གི་ཕན་ཡོན་དང་། མཆོད་རྟེན་བསྐོར་བ་བྱས་པ་ཡི། །ཤ་ཟ་དང་ནི་གྲིབ་རྣམས་ཀྱིས། །དེ་དག་གནོད་པར་མི་ནུས་སོ། །ལོངས་སྤྱོད་དག་ལ་སྐྱོན་མེད་སྤྱོད། །ཅེས་བར་ཆད་སེལ་ཞིང་དངོས་གྲུབ་ཐོབ་ཚུལ། མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མཆོད་པ་གཅིག་བོར་ན། །འཛམ་བུ་ཆུ་ཀླུང་གསེར་སྲང་འབུམ་གྲངས་རྙེད། །དེ་ནི་དེ་དང་མཚུངས་པ་ཡོད་མ་ཡིན། །ཞེས་གསུངས་པས་ན། གསེར་སྲང་འབུམ་ཕྲག་གཅིག་བས་
ནི། རང་འཆི་བའི་ནང་པར་བསྐོར་བ་ཅུང་ཟད་ཅིག་དགའ་ཞིང་མཆོག་ཡིན་ནོ། །རྒྱས་པར་མདོ་དེ་ཉིད་ལ་བལྟ་བར་བྱའོ། །མར་མེ་ཕུལ་བའི་མདོ་ལས། མར་མེ་ཕུལ་བའི་རྣམ་སྨིན་འདི་ཡིན་ནོ། །འཆི་དུས་བྱས་ཚེ་རྣམ་སྨིན་སྡུག་བསྔལ་དེས་མི་མྱོང་། །བྱང་ཆུབ་དམ་པ་མཆོག་ལ་སེམས་ཀྱང་དགའ། །དེ་ལ་འཆི་བའི་འཇིགས་པ་འབྱུང་མི་འགྱུར། །དྲང་སྲོང་མཆོད་རྟེན་མར་མེ་ཕུལ་བ་ནི། །དེ་ཡི་ལུས་ནི་རབ་ཏུ་འོད་གསལ་ཞིང་། །གཞན་གྱིས་མི་ཚུགས་དཔལ་དང་ལྡན་པ་དང་། །ལྷ་སྟོང་གིས་ནི་གཙོ་བོར་དེར་འགྱུར་རོ། །དེ་ནི་དེ་ཡི་མར་མེ་ཕུལ་བའི་འབྲས། །དེ་དང་དེ་ནི་ཚེ་རབས་དེས་དྲན་འགྱུར། །བྱ་བའི་འོས་མིན་ལ་ནི་དེས་མི་སྤྱོད། །གདོན་མི་ཟ་བར་དེ་ནི་ཁྱིམ་ནས་འབྱུང་། །ལོང་བར་མི་འགྱུར་ཞུ་བར་མི་འགྱུར་ཞིང་། །དེ་ཡི་མིག་ནི་མེད་པར་འགྱུར་མ་ཡིན། །བདེ་གཤེགས་མཆོད་རྟེན་མར་མེ་ཕུལ་བའི་འབྲས། །རྣམ་གྲོལ་བློ་ལྡན་སྟོབས་བཅུ་རྣམས་ལྡན་ཞིང་། །དེ་བཞིན་མ་འདྲེས་ཆོས་ཀྱི་ཕ་རོལ་སོན། །ཀུན་ལས་སྤྱན་ལྡན་བདེ་བར་གཤེགས་པར་འགྱུར། །ཞེས་སོགས་རྒྱ་ཆེར་གསུངས་པ་ཡང་རྒྱས་པར་མདོ་དེ་ཉིད་ལ་བལྟའོ། ༈ །འདི་ཡི་
གནས་བཤད་དང་མཇལ་ཁ་ལེགས་པར་བྱས་ན། སྐྱེ་བ་ཐམས་ཅད་དུ་སྐད་སྙན་པ་དང་། སོ་སོ་ཡང་དག་པའི་རིགས་པ་བཞི་ཐོབ་པར་འགྱུར་ཏེ། གསལ་རྒྱལ་གྱིས་ཞུས་པའི་མདོ་ལས། སུ་དག་རྒྱལ་བའི་མཆོད་རྟེན་སྟོན་བྱེད་པ། །དེ་དག་གླིང་བུའི་སྒྲ་དང་གླུ་སྙན་དང་། །སྒྲ་སྙན་ཡིད་དུ་འོང་བར་ཐོབ་པ་དང་། །སོ་སོ་ཡང་དག་རིག་པ་ཐོབ་པར་འགྱུར། །ཞེས་གསུངས་སོ།། ༈ སྙན་དར་ཕུལ་བའི་ཕན་ཡོན་མདོ་དེ་ཉིད་ལས། རྒྱལ་བའི་མཆོད་རྟེན་ལ་ནི་གོས་ཕུལ་བས། །བསོད་ནམས་བྱམས་པ་ཆེ་བའི་གོས་གྱོན་ཏེ། །དགའ་ཞིང་ཡོན་ཏན་ཀུན་ལྡན་སེར་སྣ་མེད། །མདོག་ཀྱང་འཇམ་ཞིང་ཁ་དོག་གསེར་འདྲར་འགྱུར། །ཞེས་གསུངས་སོ། །ཕྱག་འཚལ་བའི་ཕན་ཡོན་ནི། འཕགས་པ་སྤྱན་རས་གཟིགས་ཀྱི་མདོ་ལས། གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ། །བསྐལ་པ་བྱེ་བ་བརྒྱ་སྟོང་བསྟི་སྟང་བྱེད་པ་བས། །གང་ཞིག་ཕྱི་དུས་བསྐལ་པ་མི་ཟད་འདི་ལ་ནི། །མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ། །ཞེས་དང་། གསལ་རྒྱལ་གྱིས་ཞུས་པའི་མདོ་ལས། མི་རྣམས་གང་དག་སངས་རྒྱས་མཆོག་རྣམས་དང་། །སྐུ་གཟུགས་དག་ལ་མགོས་
བཏུད་གུས་ཕྱག་འཚལ། །དེ་དག་ལྷ་རྣམས་དང་ནི་མི་རྣམས་ཀྱིས། །ཆེར་ཡང་རྟག་ཏུ་བཀུར་བའི་གནས་སུ་འགྱུར། །ཞེས་དང་། དམ་པའི་ཆོས་པདྨ་དཀར་པོའི་མདོ་ལས། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་པའི་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པའམ། །གང་གིས་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་ཉིད་ཐོབ། །ཅེས་|གསུངས། དར་ལྕོག་ཕན་ཡོན་ནི། དགོངས་འདུས་རྩ་བའི་རྒྱུད་ལས། དུག་ཤིང་མིན་པའི་དར་ཤིང་ལ། །དྲི་མེད་དར་ལ་གཟུངས་སྔགས་བྲི། །རི་མཐོ་དགོན་གནས་གྲོང་ཡུལ་དང་། །ཚོང་འདུས་མི་མང་འདུ་སར་བཙུགས། །བདེ་བ་ལྡན་ཞིང་སྡུག་བསྔལ་བྲལ། །རླུང་རྟ་བསྐྱེད་ཅིང་བསོད་ནམས་ལྡན། །རླུང་གིས་གང་ཕོག་སེམས་ཅན་ཀུན། །གཟུངས་སྔགས་དེ་ཡིས་ཞིང་དུ་སྐྱེ། །འདི་ཡི་ཕན་ཡོན་བརྗོད་མི་ནུས། །ཞེས་གསུངས་སོ། །ཞིག་གསོས་བྱས་པའི་ཕན་ཡོན་ནི། ལུང་བསྟན་ཆེན་མོ་བཀའ་རྒྱ་མ་ལས། ཨོ་རྒྱན་རིན་པོ་
ཆེས་གསུངས་པ། ད་དུས་གཙུག་ལག་རྟེན་བཞེངས་བསོད་ནམས་ལས། །མ་འོངས་ལྔ་བརྒྱ་དུས་ཀྱི་མཐའ་མ་ལ། །གང་གིས་གཙུག་ལག་རྟེན་ཉམས་གསོ་བྱེད་པ། །བརྒྱ་སྟོང་ཆར་མི་ཕོད་ཅིང་དེ་དོན་ཆེ། །གང་ཞིག་ཞིག་གསོས་བྱེད་པའི་གང་ཟག་ནི། །སྔགས་པ་བླ་དཔོན་སྐྱེ་བོ་བྱ་བྲལ་བ། །རིགས་དང་རུས་དང་ཆོ་འབྲང་ཅི་འདྲ་ཡང་། །དེ་རྣམས་རྒྱལ་བའི་ཡུལ་ལམ་སྐལ་ལྡན་མཆོག །ཐ་མ་མ་ཡིན་ཁྱད་པར་ཅན་ཡིན་པས། །བཀུར་སྟི་རིམ་གྲོ་ཕུ་དུད་གུས་པས་མཆོད། །ཅེས་གསུངས་སོ། །དེ་ལྟར་ཞིག་གསོས་དུས་ལས་མི་རྣམས་ཀྱིས། །དགའ་ཞིང་གུས་པར་བྱས་ན་ཕན་ཡོན་ནི། གསལ་རྒྱལ་གྱིས་ཞུས་པའི་མདོ་ལས། མི་རྣམས་སུ་དག་དགའ་ཞིང་གུས་པ་ཡིས། །བླ་མེད་མཆོད་རྟེན་རྣམས་དང་སྐུ་གཟུགས་ལ། །ལུས་ཀྱི་ལས་རྣམས་བྱེད་པ་དེ་དག་གི །སྲིད་པ་ཀུན་ཏུ་མཛོད་རྣམས་ཤིན་ཏུ་རྒྱས། །ཞེས་གསུངས་སོ།། གཞན་ཡང་ལེགས་ཉེས་ཀྱི་རྒྱུད་དང་འབྲས་བུ་བསྟན་པའི་མདོ་བསྡུས་ཏེ་བཤད་ན། མཆོད་རྟེན་ལ་མེ་ཏོག་ཕུལ་ན། ལུས་མཛེས་ཤིང་དྲི་ཞིམ་པ་དང་། མཐོ་རིས་སུ་སྐྱེ་ཞིང་འཁོར་དང་ལོངས་སྤྱོད་ཆེ་བ་དང་། མྱུར་དུ་དགྲ་བཅོམ་པ་ཐོབ་པ་
སོགས་ཕན་ཡོན་བཅུ་དང་། སྤོས་ཕུལ་བས་གཟུགས་མཛེས་དྲི་ཞིམ་འཁོར་འདུ་བ། ལོངས་སྤྱོད་ཆེ་ཞིང་མཐོ་རིས་སུ་སྐྱེ་བ་དང་། མྱུར་དུ་མྱ་ངན་ལས་འདས་པ་སོགས་ཕན་ཡོན་བཅུ་དང་། དེ་བཞིན་རོལ་མོ་ཕུལ་བ་དང་། ཐལ་མོ་སྦྱར་བ་དང་། ན་བཟའ་འབུལ་བ་སོགས་ལ་ཕན་ཡོན་བཅུ་རེ་གསུངས་སོ། ༧ །ཡོན་ཆབ་ཀྱི་ཕན་ཡོན་ནི། །མདོ་སྡེ་མཛངས་བླུན་ལས། གང་ཞིག་དད་པའི་སེམས་ཀྱིས་ཆུ་སྙིམ་པ་གང་ཙམ་སངས་རྒྱས་ལ་མཆོད་དམ། དགེ་འདུན་ལ་ཕུལ་བའམ། དབུལ་ཕོངས་ལ་སྦྱིན་ན། བསོད་ནམས་འདི་ནི་བསྐལ་པ་དུ་མར་ཡང་མི་ཟད། ཅེས་གསུངས་སོ། །དེ་ཡིས་ཕན་ཡོན་དགོས་ཆེད་སོང་ནས། ཞལ་བྱུང་བཤད་པ་ནི། རྗེ་ནཱ་རོ་པས། མར་པ་ལ་ལུང་བསྟན་པ་ནི། རིགས་རྒྱུད་ནམ་མཁའི་མེ་ཏོག་ཡལ། །ཆོས་བརྒྱུད་ཆུ་བོའི་གཞུང་བཞིན་རྒྱས། །ཞེས་དང་། མར་པས་མི་ལ་ལ་ལུང་བསྟན་པ་ནི། སངས་རྒྱས་བསྟན་པ་གནས་ཀྱི་བར་དུ་ཉམས་དང་རྟོགས་པའི་བརྒྱུད་པ་མི་ཆད་གསུངས་པ་དང་། རྗེ་ཀརྨ་པཀྵིའི་ཞལ་ནས། ཡང་དུས་གསུམ་མཁྱེན་པའི་རིང་བསྲེལ་མང་དུ་བྱོན་སྙམ་བྱེད་དེ། ད་དུང་སྒོམ་ཆེན་མང་པོ་འབྱུང་བའི་
བརྡར་འདུག་གསུངས་པ་དང་། རླུང་སེམས་ནར་སོན་པའི་སྟོབས་ཀྱིས་དག་སྣང་དཔའ་བོ་མཁའ་འགྲོ་རྣལ་འབྱོར་ཕོ་མོའི་ཚོགས་འོད་དང་གཟུགས་བརྙན་གྱི་ཚུལ་དུ་སྣང་ཞིང་། རྣལ་འབྱོར་དབང་ཕྱུག་གྲངས་མཐའ་ཡས་རྒྱུན་མི་ཆད་པར་འབྱུང་ཞེས་དང་། གྲུབ་ཆེན་ཀརྨ་པ་ལ། རྗེ་བཙུན་སྒྲོལ་མས་ལུང་བསྟན་པ་ལ།་རྣལ་འབྱོར་རང་བྱུང་རྡོ་རྗེ་ལ། །མོས་གུས་བྱེད་པའི་གདུལ་བྱ་རྣམས། །བརྒྱུད་འཛིན་རྣམ་ཐར་སྐྱོང་བ་འོང་། །བུ་སློབ་རྣམས་ཀྱིས་གོ་བར་མཛོད། །ཅེས་དང་། བརྒྱུད་པའི་མཆོག་གྱུར་འདི་ཉིད་ས། །སྔགས་འཆང་རྣལ་འབྱོར་དཔག་མེད་འབྱུང་། །མཐོང་ཐོས་དྲན་པའི་སྐལ་ལྡན་ཀུན། །ཡུན་མི་རིང་བར་སྨིན་གྲོལ་འགྱུར། །དུས་གསུམ་དུས་མེད་ཐམས་ཅད་ཀྱི། །སྐལ་ལྡན་རྣམས་ཀྱིས་མཁྱེན་པར་མཛོད། །ཅེས་དང་། གཞན་ཡང་སེམས་དཔའ་རང་བྱུང་རྡོ་རྗེ། ཚད་མ་དེའི་ཐུགས་རྗེ་ཕྲིན་ལས་རབ་འབྱམས་ལས། ཀརྨ་པའི་ཆོས་གདམས་ངག་བུ་སློབ་གདུལ་བྱའི་ཚོགས་དང་། སྐུ་གསུང་ཐུགས་ཀྱི་རྟེན་རིས་སུ་བྲིས་པ། ལུགས་སུ་བླུགས་པ་འབུར་དུ་བཏོད་པ། ཆོས་ཁྲི། བཞུགས་མལ། སྐུ་དང་སེན་མོ་ལ་སོགས་པ་རྣམས་དང་། འཛམ་གླིང་
ཡུལ་ཁམས་སྣ་ཚོགས་ཁྱབ་པར་དུས་གསུམ་འགྲོ་དོན་རྒྱུན་ཆད་མེད་པར་འབྱུང་སྟེ། ཐུགས་རྗེ་ཆེན་པོའི་མཚན་ལས་ཀྱང་། །བ་སྤུའི་ཉག་མ་རེ་རེ་ཡང་། །སེམས་ཅན་ཀུན་གྱི་གསོས་སུ་འགྱུར། །ཞེས་གསུངས་པ་བཞིན་ནོ། །ཞེས་གྲུབ་ཆེན་ཀརྨ་པ་ཉིད་ཀྱིས་གསུངས་སོ། ༈ །དེ་ལྟ་བུའི་བསྟན་པ་དང་ཕྲིན་ལས་ཀྱི་མཐའ་དར་རྒྱས་སུ་བྱེད་པ་ཡང་། སི་པའི་སྐུ་ཡིས་མཛད་དགོས་པ་སྟེ། རྗེ་དུས་གསུམ་མཁྱེན་པས། འགྲོ་མགོན་རས་ཆེན་ལ། ཁྱེད་ཀྱིས་གདན་ས་འདི་ཟུང་ལ་དར་རྒྱས་སུ་གྱིས་ལ། ཚེ་རབས་ཐམས་ཅད་དུ་ཁོ་བོ་དང་འབྲལ་བ་མེད་ཅིང་། ཁོ་བོའི་ཕྲིན་ལས་ཀྱི་མཐའ་ཡང་ཁྱེད་ཀྱིས་སྐྱོང་དགོས་པ་ཡིན། ཞེས་གསུངས་པའི་ཕྱིར་རོ། །དེས་ཕན་ཡོན་དང་དགོས་ཆེད་སོང་ནས། ༈ དེ་ནས་བརྩམ་དོན་ནི། འོད་དཔག་མེད་མགོན་མི་གཟུགས་ཅན། །ཀུན་མཁྱེན་ཆོས་ཀྱི་དབང་ཕྱུག་གི །ཞབས་རྡུལ་སྤྱི་བོར་རེག་པའི་མཐུས། །ལྡོག་མེད་དད་པའི་གདུང་ཤུགས་ཅན། །དགེ་སློང་རཱ་ག་ཨ་སྱ་བདག །ཕག་ལོ་ཐ་སྐར་ཟླ་བ་ལ། །འོག་མིན་ཀརྨ་མཇལ་འདོད་ཕྱིར། །ཡོར་དུ་འོང་ནས་ཆོས་རྭ་བྱས། །ཉེར་གཅིག་འོང་རྒྱུའི་ཉི་
ཤུའི་ནུབ། །དགེ་འདུན་རྣམས་དང་མཐུན་མི་མཐུན། །མཇལ་ཁ་ཅུང་འོང་བརྟགས་པའི་ཚེ། །ཉམས་དང་རྨི་ལམ་འདྲེས་པའི་མཚམས། །མདུན་དེར་མ་མགོན་མགར་གསུམ་ནི། །སྐུ་ཆེ་ཆ་ལུགས་མཐུན་པར་སྣང་། །གཡས་ཕྱོགས་ལྷ་མོ་བཞུགས་པ་ཡིས། །བདག་ལ་ཤིན་ཏུ་དགྱེས་ཚུལ་གྱིས། །ལན་གསུམ་ལྷག་ལྷག་བཞད་པ་མཐོང་། །དེ་ནང་ཐོག་ཏུ་རང་མདུན་དུ། །བྱིས་པ་མང་པོས་སྐྲ་ཕུད་ཕུལ། །ཕྱིར་ཉིན་ཀརྨར་ཕྱིན་པ་ཡི། །ཉེར་གཉིས་ལྷ་བབས་དུས་ཆེན་དང་། །རྒྱལ་ཕུར་འཛོམ་པའི་སྔ་དྲོ་ལ། །བཀྲ་ཤིས་གསར་མར་གདན་འདྲེན་བྱུང་། །སྙན་དར་སྔགས་དམིགས་རྟེན་འབྲེལ་བསྒྲིགས། །སྒར་དུ་རྒྱས་པའི་སྦྱིན་སྲེག་དང་། །གསོལ་ཁ་རྒྱས་པར་བྱེད་བཅུག་ཅིང་། །རང་ཡུལ་གསོལ་ཁ་རྟེན་འབྲེལ་བསྒྲིགས། །དེ་ནུབ་ཉམས་དང་རྨི་ལམ་མཚམས། །ནམ་ཕྱེད་ཉི་མ་མཚན་མོ་ཤར། །ཡར་བལྟས་ནམ་མཁའི་དཀྱིལ་དབུས་ན། །ཉི་ཟླ་གཉིས་པོ་གཅིག་གྱུར་ནས། །ཆེ་ཆུང་ཉི་མ་བཞི་འགྱུར་ཙམ། །ཁ་དོག་བཅོ་ལྔའི་ཟླ་བའི་མདོག །འོད་ཟེར་དབྱར་ལས་བཞི་འགྱུར་ཚ། །དེ་འདྲ་ཤར་རྨིས་བསྟན་པ་ནི། །དར་ཞིང་རྒྱས་པའི་རྟགས་སུ་གོ །དེ་ནས་འཚོགས་
དབུས་གདན་ཁ་རུ། །སྡོད་ཟེར་རང་ཡང་རུས་སྒོག་ཆེ། །བོད་རྗེའི་གདུང་རིགས་ཡིན་རློམས་བསྡད། །དེ་ནུབ་ཉལ་ཁའི་རྣམ་རྟོག་ལ། །རུང་ངམ་མི་རུང་བརྟགས་པ་ཡིས། །རྨི་ལམ་འཚོགས་དབུས་བདག་འདུག་པའི། །མདུན་གཡས་འཚོགས་འཇུག་བུད་མེད་ནི། །ལྟ་བས་མི་ངོམ་རྒྱན་ལྡན་གསུམ། །ལྷ་མོས་སྤྲུལ་པར་ངོས་ཟིན་ནས། །འཚོགས་དབུས་བསྡད་པ་ལེགས་ཟེར་བའི། །བརྡའ་ཡང་བསྟན་ཞིང་དགའ་ཚུལ་བསྟན། །སྡོམ་ལུང་མང་དུ་ཕོག་པའི་ནུབ། །ལྷ་མོ་དགེ་སློང་མ་ཡི་ཚུལ། །བལྟ་བས་ཆོག་མི་ཤེས་པར་སྤྲུལ། །མདུན་དུ་དགྱེས་པའི་ཚུལ་གྱིས་བཞུགས། །ལྷ་མོ་རང་བྱུང་རྒྱལ་མོ་ཡིས། །སྤྲུལ་པ་ཡིན་པར་འདུག་སྙམ་ནས། །དེ་ཉིད་དངོས་ཡིན་ཟེར་བའི་སྒྲ། །ནམ་མཁའི་མཐོངས་ནས་གསལ་བར་གྲག །དེ་མ་ཐག་ཏུ་བུད་མེད་དེ། །མོ་རང་འདྲ་བ་གསུམ་དུ་སྤྲུལ། །རེ་ཏི་མཆེད་གསུམ་ཡིན་པར་གོ །སྐུ་རིམ་སྦྱིན་སྲེག་འགའ་བླུགས་པས། །དམ་སྲི་རྒྱལ་འགོང་གཟུགས་ཅན་ཞིག །ང་ཡི་གནས་དང་ལོངས་སྤྱོད་བཅས། །མེ་ཡིས་ཚིག་ཅེས་སྨྲེ་ངག་འདོན། །རོད་ངན་བྱོལ་ཏེ་འགྲོ་བ་རྨིས། །ཅུང་ཞིག་ནུས་པ་ཉམས་སམ་སེམས། །
གྲགས་གྲས་ལྷ་གཉེར་ལ་སོགས་ཀྱིས། །བསྐུལ་ཏེ་ལེགས་པར་བསྒྲིགས་པ་ཡིན། །འགལ་བར་གྱུར་ན་མཁས་ལ་བཤགས། །དགེ་བས་འདི་ཉིད་མཐོང་ཐོས་རྣམས། །བདེ་བ་ཅན་དུ་བརྫུས་ཏེ་སྐྱེས། །ལུས་རྟེན་དེ་ལ་བྱང་ཆུབ་ཤོག །ཀརྨ་པ་དང་དབྱེར་མེད་ཤོག །སརྦ་མངྒ་ལཾ། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།