འབུམ་རྫོང་ཆོས་ཀྱི་ཕོ་བྲང་གི་གནས་ཀྱི་ལོ་རྒྱུས་རྒྱས་པར་བཀོད་པ།
འབུམ་རྫོང་ཆོས་ཀྱི་ཕོ་བྲང་གི་གནས་ཀྱི་ལོ་རྒྱུས་རྒྱས་པར་བཀོད་པ་བཞུགས་སོ།
ན་མོ་གུ་རུ་དེ་ཝ་ཌཱ་ཀི་ནཱི་ཡེ། འབུམ་རྫོང་ཆོས་ཀྱི་ཕོ་བྲང་གི་གནས་ཀྱི་ལོ་རྒྱུས་ལ་ས་བཅད་གསུམ་ལས། དང་པོ་གནས་ཀྱི་བྱུང་ཁུངས། བར་དུ་གནས་བྱིན་གྱིས་བརླབས་ཚུལ། ཐ་མ་གནས་སྒོ་ཕྱེ་ལུགས་དང་ཕན་ཡོན་བཤད་པའོ། །བསྐལ་པ་འདི་ཆགས་ནས་སྲིད་པའི་མེས་པོ་ལྷ་དབང་ཕྱུག་ཆེན་པོ་ཡབ་ཡུམ་གྱིས། དྲག་པོ་འཇིགས་བྱེད་ཉི་ཤུ་རྩ་བཞིར་སྤྲུལ་ནས། ཡུལ་ཉི་ཤུ་རྩ་བཞི་གནས་ཆེན་པོ་སུམ་ཅུ་རྩ་གཉིས་དང་། །དེ་ལས་འཕྲོས་པའི་གནས་ཕྲན་ཐམས་ཅད་བདག་ཏུ་བཟུང་། དེ་ལ་འཁོར་ལྷོ་མ་སྲིན་དཔག་ཏུ་མེད་པས་བསྐོར་ནས་སེམས་ཅན་ལ་གནོད་འཚེ་བྱེད་
དོ། །དེའི་ཚེ་དབང་ཕྱུག་ཡབ་ཡུམ་གྱིས་བདག་ཏུ་བཟུང་བའི་ཕྱིར། འདིར་དབང་ཕྱུག་ཡབ་ཡུམ་གྱི་གསང་གནས་ཁ་སྤྲོད་བྱུང་སེམས་བབས་པའི་ཤུལ་ཡང་ཡོད། དེ་ཡི་དུས་ན་འོག་མིན་འཐུག་པོ་བཀོད་པའི་ཞིང་ཁམས་ནས། སངས་རྒྱས་རྣམ་པར་སྣང་མཛད་ཀྱིས་བཅོམ་ལྡན་འདས་འཁོར་ལོ་བདེ་མཆོག་ཏུ་སྤྲུལ་ཡུམ་རྡོ་རྗེ་དབྱིངས་ཕྱུག་མ་ཕག་མོར་སྤྲུལ། བྱང་ཆུབ་སེམས་དཔའ་ཉི་ཤུ་རྩ་བཞི་དཔའ་བོ་ཉི་ཤུ་རྩ་བཞིར་སྤྲུལ། བྱང་ཆུབ་སེམས་མ་ཉི་ཤུ་རྩ་བཞི་དཔའ་མོ་ཉི་ཤུ་རྩ་བཞིར་སྤྲུལ་ནས། འཛམ་བུ་གླིང་འདིར་བྱོན་ཏེ། དབང་ཕྱུག་གི་སྤྲུལ་པ་ཇི་ཙམ་ཡོད་པའི་གྲངས་
དང་མཉམ་པའི་བདེ་མཆོག་ཡབ་ཡུམ་དུ་སྤྲུལ་ནས། དབང་ཕྱུག་ཡབ་ཡུམ་ཞབས་འོག་ཏུ་མནན་ནས་དམ་ལ་བཏགས། དབང་ཕྱུག་ཡབ་ཡུམ་གྱིས་གནས་ཐམས་ཅད་བདེ་མཆོག་ཡབ་ཡུམ་ལ་ཕུལ་ནས་བདེ་མཆོག་ཡབ་ཡུམ་གྱིས་གནས་སུ་བྱིན་གྱིས་བརླབས་པས། གནས་འདིར་ཡང་བདེ་མཆོག་ཡབ་ཡུམ་གྱི་སྐུ་རང་བྱོན་ཡོད་དོ། །དེ་ནས་སངས་རྒྱས་འོད་སྲུང་གི་བསྟན་པ་ནུབ་ནས་སངས་རྒྱས་ཤཱཀྱ་ཐུབ་པའི་བསྟན་པ་མ་བྱུང་གི་བར་དུ་དེར་བདུད་ཕོ་མ་ཏྲཾ་རུ་ཏྲས་འཇིག་རྟེན་གྱི་ལྷ་འདྲེ་ཐམས་ཅད་དབང་དུ་བསྡུས་ཏེ། བདུད་དམག་བྱེ་བ་འཁོར་དང་བཅས་ནས་ལྷ་མི་ལ་སོགས་པའི་སྲོག་ཆགས་ཐམས་ཅད་ལ་གནོད་པ་བྱེད་དོ། །དེའི་ཚེ་དཔལ་རྟ་མགྲིན་ཡབ་ཡུམ་གྱིས་བདུད་རུ་ཏྲ་ཐར་པ་ནག་པོ་དམ་ལ་བཏགས། དེའི་ཚེ་དབང་ཕྱུག་ཉི་ཤུ་རྩ་བརྒྱད་ཀྱིས་གནས་ཉི་ཤུ་རྩ་བརྒྱད་ཕུལ། ལྷ་ཨ་འཁྲོ་རྒྱལ་པོའི་གནས་འདི་རྟ་མགྲིན་ཡབ་ཡུམ་ལ་ཕུལ། དེར་གནས་བདུད་སྲིན་མོ་སྐུ་ཡི་རལ་པ་ཅན་ཞེས་བྱ་བ་འདིར་གནས་པ་ལ། །སྲིན་མོ་དེ་བསྒྲལ་ནས་གནས་འདི་རྟ་མགྲིན་ཡབ་ཡུམ་གྱི་གནས་སུ་བྱིན་གྱིས་བརླབས་པས། ཕུག་པ་ཟླ་གམ་དམར་པོ་རྟ་མགྲིན་དབང་གི་གནས་དང་། རྟ་མགྲིན་ཡབ་ཡུམ་གྱི་བྱང་
སེམས་དང་། སྲིན་མོ་བསྒྲལ་བའི་ཐོད་པ་རྣམས་ཡོད་དོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་མྱ་ངན་ལ་འདའ་ཁར་བྱང་ཆུབ་སེམས་དཔའ་སྤྱན་རིས་གཟིགས་བྱོན་ནས་ད་དུང་ཁ་བ་ཅན་ཞབས་ཀྱིས་མ་བཅིགས་པས་མྱ་ངན་ལས་མི་འདའ་བར་བོད་ཀྱི་དོན་མཛད་པར་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། ང་ནི་གདུལ་བྱ་རྫོགས་པས།་མྱ་ངན་ལས་འདའོ། །བོད་ཁ་བ་ཅན་འདི་བྱང་ཆུབ་སེམས་དཔའ་ཁྱོད་ཀྱི་གདུལ་བྱ་ཡིན་པས་ཐུལ་ཅིག་གསུངས་ནས། །བཅོམ་ལྡན་འདས་ཀྱི་ཞལ་ནས་འོད་ཟེར་ཁ་དོག་སྣ་ཚོགས་འཇའ་ཚོན་ལྟ་བུར་འཕྲོས་ཏེ་བོད་ཡུལ་དུ་སོང་ནས་འོད་དེ་གར་ཐིམ་པ་རྣམས་སུ་རང་བྱོན་དང་གནས་རྣམས་བྱུང་སྟེ། གནས་འདིར་ཡང་སངས་རྒྱས་ཀྱིས་འོད་ཟེར་ཕོག་པས་སངས་རྒྱས་རྡོ་རྗེ་སེམས་དཔའི་སྐུ་རང་བྱོན་དང་། མཁའ་འགྲོའི་འཇའ་ལམ། དབྱངས་གསལ་གྱི་ཡི་གེ་རྣམས་ཡོད་དོ། །དེ་ནས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་ལྷོ་ཕྱོགས་རི་བོ་གྲུ་འཛིན་གྱི་རྩེ་ནས་བོད་ཁ་བ་ཅན་ལ་གཟིགས་ཏེ། སྐུ་ལས་འོད་ཟེར་སྣ་ཚོགས་འཕྲོས་ནས་བོད་ཁ་བ་ཅན་གྱི་གནས་རྣམས་བྱིན་གྱིས་བརླབས་ནས། དེ་དུས་འོད་ཟེར་གང་དུ་ཐིམ་པ་རྣམས་
རང་བྱོན་བྱུང་བས། གནས་འདིར་ཡང་དགྱེས་རྡོར་གྱི་སྐུ། ཕག་མོའི་ཞལ་གཟུགས་དང་གསང་བ་ལ་སོགས་པ་རང་བྱོན་མང་པོ་དང་། ཐུགས་རྗེ་ཆེན་པོའི་གསུང་སྤྲུལ་དམ་པ་རྒྱ་གར་གྱི་སྐུ་དང་། སྒྲོལ་མའི་སྤྲུལ་པ་མ་ལབ་སྒྲོན་གྱི་སྐུ་རང་བྱོན་ཡོད་དོ། །སྤྱིར་དབང་ཕྱུག་ཡབ་ཡུམ་གྱི་གནས་བདེ་མཆོག་ཡབ་ཡུམ་གྱི་གནས་སུ་བྱིན་གྱིས་བརླབས་པ་ཡང་། ས་འོག་སྤྱོད་སྐུའི་དབང་དུ་བྱས་ནས་སྤང་རིའི་ནང་དུ་འཛུལ་ས་ཡོད་པས། ས་འོག་སྤྱོད་སྐུའི་འཁོར་ལོའི་གནས་ཡིན་ཏེ། དཔའ་བོ་མཁའ་འགྲོའི་སྐུ་རང་བྱོན་མང་དུ་ཡོད་དོ། །ཁྱད་པར་ས་འོག་ནས་བྲག་རྒྱུད་འབྲེལ་ནི་ཡོད་པས། ས་འོག་སྤྱོད་པའི་དཔའ་བོ་ཌཱ་ཀི་རྣམས་རྒྱུ་བའི་ལམ་ཡོད་པའི་ཕྱིར། བོད་ཀྱི་རི་བོ་རྩེ་ལྔ། བྱང་ནཱ་ལེནྡྲའི་རྒྱབ་རི་དང་། དབུས་རི་དྲང་སྲོང་སྲིན་པོ་རི་ནས་མཆིམས་ཕུ་ཀུན་བཟང་ནགས་ཁྲོད། ཟངས་རི་མཁར་དམར་ནས་རི་རྒྱུད་རྒྱ་ལ་རྩེ་བདུན། དེ་ནས་མདོ་ཁམས་ཟལ་མོ་སྒང་ནས། རྒྱ་ནག་རི་བོ་རྩེ་ལྔའི་བར་འབྲེལ་ནས་ཡོད་པ་གྲུབ་ཐོབ་ཐང་སྟོང་རྒྱལ་པོས་གསུངས་པ་ལྟར། འདི་ཡང་རྒྱ་ནག་རི་བོ་རྩེ་ལྔའི་གནས་ལག་འཇམ་དབྱངས་ཀྱི་གནས་ཀྱང་ཡིན་པས། འཇམ་དབྱངས་ཀྱི་རལ་གྲི་པུ་ཏིའི་རྗེས་དང་། །
མ་ཧཱ་གསེར་གྱི་རུས་སྦལ་ཡོད་དོ། །ས་སྤྱོད་གསུང་གི་འཁོར་ལོའི་གནས་ནི། ས་ཡི་སྟེང་དུ་ཡོད་པའི་གནས་ཏེ། དཔལ་ཙཱ་རི་ཏྲ་རང་བྱུང་གི་མཆོད་རྟེན་གྱི་ཕྱོགས་མཚམས་བརྒྱད་དུ་གནས་བརྒྱད་ཡོད་པར་བཤད་པའི། རྫ་རྒྱལ་གོ་བོ་ཁྱུང་ཕུག་ཙཱ་རིའི་ཤར་སྒོའི་གནས། འབུམ་རྫོ་ང་ཆོས་ཀྱི་ཕོ་བྲང་ཙཱ་རིའི་བྱང་ཤར་གྱི་གནས་ལག་ཡིན་པས། སིན་ར་རིགས་ལྔ། མཆོད་པ་རྣམ་པ་ལྔ་སོགས་ས་སྟེང་དུ་ཡོད་དོ། །མཁའ་སྤྱོད་ཐུགས་ཀྱི་འཁོར་ལོའི་གནས་ནི། གནས་བཟང་པོ་འདི་དག་གི་ཐད་ཀྱི་ནམ་མཁའ་ལ། ཕལ་པས་མི་མཐོང་བའི་སངས་རྒྱས་བྱང་སེམས་དཔའ་བོ་མཁའ་འགྲོ་སྤྲིན་གྱི་ཕུང་པོ་ལྟ་བུར་དུས་རྟག་ཏུ་བཞུགས་པས་བསྐོར་བ་བྱས་པས་ཕན་ཡོན་ཆེའོ། །དེ་ཡན་ཆད་སྤྱིར་གནས་ཐམས་ཅད་དང་། །ཁྱད་པར་གནས་འདི་ཡི་བྱུང་ཁུངས་ལགས་སོ།། ༈ །།དེ་ནས་དོན་གཉིས་པ་གནས་བྱིན་གྱིས་རླབས་ལུགས་ནི། ཨོ་རྒྱན་རིན་པོ་ཆེ་བོད་དུ་ཕེབས་ནས་ས་གཞི་རྟ་རྨིག་ཙམ་མ་ལུས་པ་ཞབས་ཀྱིས་བཅགས་ནས། ཁྱད་པར་བོད་ཁ་བ་ཅན་གྱི་རྒྱལ་ཁམས་སུ། ཕྱོགས་བཞིར་སྦས་པའི་ཡུལ་ཆེན་པོ་བཞི། མཚམས་བཞིར་ལུང་ཕྲན་ཆེན་པོ་བཞི། གངས་ཆེན་པོ་
ཉི་ཤུ་རྩ་གཅིག་དང་། སྒྲུབ་གནས་ཆེན་པོ་བརྒྱ་དང་རྩ་བརྒྱད་ལ་སོགས་པ་རྣམས་སུ། སྒྲུབ་པ་མཛད་ནས་གནས་བྱིན་གྱིས་རླབས་པའི་དུས་སུ། གནས་འདིར་ཡང་ཨོ་རྒྱན་རིན་པོ་ཆེས་སྒྲུབ་གནས་སུ་བྱིན་གྱིས་རླབས་ཤིང་། ཤེར་ཕྱིན་སྟོང་ཕྲག་བརྒྱ་པ་ཤོ་ལོ་ཀ་འབུམ་ཡོད་པ། མཁའ་འགྲོའི་བརྡའ་ཡིག་ཏུ་བྲིས་ནས་གཏེར་དུ་སྦས་པས་འབུམ་རྫོང་དུ་གྲགས་སོ། གནས་ཀྱི་བཀའ་སྲུང་རཱ་ཧུ་ལ་བསྐོས་པས་གཟའ་ཡི་སྐུ་རང་བྱོན་ཡོད། གཞན་ཡང་ཨོ་རྒྱན་རིན་པོ་ཆེ་ཡབ་ཡུམ་གྱི་ཕྱག་ཞབས་ཀྱི་རྗེས་དང་། རྗེ་འབངས་སངས་རྒྱས་ཡེ་ཤེས་ཀྱི་ཞབས་རྗེས་སོགས་ཡོད་དོ། །དེ་ནས་ཨོ་རྒྱན་རིན་པོ་ཆེས་ཡེ་ཤེས་ཀྱི་མགོན་པོ་བྱ་རོག་གདོང་དང་།་མ་མོ་ཨེ་ཀ་ཛཱ་ཊི་དང་། གཟའ་རཱ་ཧུ་ལ་གདོང་མོ་མཆེད་བཞི་དང་བཅས་པ་བཀའ་སྲུང་དུ་བསྐོས་ནས་བཞག་པས། སུ་ཡིན་གྱི་གནས་སྒོ་འབྱེད་པའི་དབང་མེད་དོ། །བསྟན་པ་ཕྱི་དར་གྱི་སྐབས་སུ་རྗེ་ཏེ་ལོ་སངས་རྒྱས་ཀྱི་རྣམ་འཕྲུལ་དྲུང་རྨ་སེ་རིན་པོ་ཆེས་གནས་འདི་བྱིན་རླབས་ཆེ་བར་དགོངས་ནས་ཡུན་རིང་པོར་སྒྲུབ་པ་མཛད་པས་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་སྟེ་དབེན་གནས་འབུམ་རྫོང་དུ་གྲགས་པ་ངོ་མཚར་དེ་ཡན་ནི་གནས་བྱིན་
གྱིས་བརླབས་ཚུལ་ལོ།། ༈ །།གསུམ་པ་གནས་སྒོ་ཕྱེ་ལུགས་དང་ཕན་ཡོན་ནི། པདྨ་བཀའ་ཐང་འབྲིང་པོ་དང་། རྒྱལ་པོ་བཀའ་ཡི་ཐང་ཡིག་དང་། །རཏྣ་གླིང་པ་དང་། བདུད་འདུལ་རྡོ་རྗེ་སོགས། སྔོན་གྱི་གཏེར་ཁ་དུ་མ་ནས་ལུང་བསྟན་པ་ལྟར། ལོ་ཆེན་ཤུད་བུ་དཔའ་སེང་གི་སྐྱེས་མཐའ་རིག་འཛིན་མི་འགྱུར་རྡོ་རྗེ་བདུད་འདུལ་རོལ་པ་རྩལ་དགུང་ལོ་བཅུ་བཞི་པར་ས་ཕྱོགས་དེར་ཕེབས་དུས་རྨང་ལམ་དུ་གནས་འདི་ཡི་ཁ་བྱང་གི་ཡི་གེ་མཚལ་གྱིས་བྲིས་པ་གཅིག་ཕྱག་ཏུ་བྱུང་བར་བརྟེན་ནས་གནས་སྒོ་ཕྱེས། གནས་ནང་དུ་ཨོ་རྒྱན་རིན་པོ་ཆེའི་ཕྱག་ཏུ་གསེར་གྱི་སྒྲོམ་བུའི་ཕྱོགས་བཞིར་འཇའ་གོར་ནང་དུ་ཞལ་གདམས་ལུང་བྱང་གི་ཡི་གེ་ཡོད་པ་རྣམས་ཞལ་གཟིགས། དེ་མ་ཐག་ཨོ་རྒྱན་རིན་པོ་ཆེ་རྩ་བ་གསུམ་གྱི་ལྷ་ཚོགས་དཔག་ཏུ་མེད་པ་གནས་འགྱུར་བར་གཟིགས་པ་ལ་བརྟེན་ནས། རང་བྱོན་རྣམས་འདི་ཡིན་ནོ་ཞེས། ཕྱི་ནང་གི་གནས་ཡིག་ཐམས་ཅད་ཐུགས་ལ་བཀྲ་ལམ་མེར་བྱུང་ནས་མི་རྣམས་ལ་ངོས་སྤྱད་པར་མཛད་དོ། །དེ་ཡང་གནས་བདག་འདི་གཉན་པས་དམ་ཚིག་ཅན་ལ་མཆོག་ཐུན་མོང་གི་དངོས་གྲུབ་ཐོབ། དད་པ་ཅན་གྱིས་མཇལ་ན་སྒྲིབ་པ་དག །
དད་པ་མེད་པ་དང་ལོག་ལྟ་ཅན་དམ་ཉམས་ཀྱིས་མཇལ་ན་དུག་ཏུ་འགྱུར་ཏེ་བྱུང་དོན་ཡོད་པས་གནས་ནང་དུ་འགྲོ་ཁ་དད་པ་བྱེད་པ་གལ་ཆེའོ། །དད་པ་ཡོད་ཀྱང་རང་བྱོན་རྣམས་བཀོག་ནས་མ་ཁྱེར། བཀའ་སྲུང་གཟའི་ར་མདའ་འོང་དོགས་ཡོད། དེ་ཡང་གནས་འདི་ལ་ཡོད་ལུགས་ཀྱི་གནས་ཡིག་རྒྱས་པ་ནི་འདི་ལྟ་སྟེ། གཡས་རི་གསེར་ཕྲེང་འཐེན་པ་འདྲ། །གཡོན་རི་རྒྱལ་མཚན་ཕྱར་བ་འདྲ། །མདུན་རི་ཕྱག་གི་སོར་ཀ་འདྲ། །རྒྱབ་རི་བསིལ་ཡབ་བཀྲམ་པ་འདྲ། །ཁ་དོག་ལྔ་ནི་རིགས་སྡེ་ལྔ། །འབྱུང་བ་ལྔ་ཡབ་ཡུམ་ལྔའོ། །གཡས་ཕྱོགས་སུ་ཕྱིའི་སྒོ་སྲུང་གད་པ་དུག་སྦྲུལ་གྱི་གཟུགས། བན་དང་བདུད་རྩིར་ཁར་བཟུང་བ། རྡོ་སྦྲུལ་གྱི་གཙུག་གི་ནོར་བུ། གནས་གང་ནས་མཇལ་ཡང་དེར་གཏུགས་དགོས་ལ། དམ་ཚིག་ཅན་ལ་བདུད་རྩི་དང་། དམ་མེད་ལ་དུག་ཏུ་འགྱུར་རོ། །ལུང་པར་སྡིག་པ་རྭ་ཙས་གནས་མཇལ་བའི་གཟུགས་དགོན་པ་ཆེན་པོའི་ཆོས་རྗེ་འཚོགས་པ་སྟོང་གི་ཚོགས་དཔོན་དང་༔ བླ་མ་བརྒྱ་འདུས་སྟོང་འདུས་ཀྱི་ཚོགས་དཔོན་གནས་མཇལ་བའི་ཚུལ། འབུ་བསེ་ཁྲབ་པས་འགྲོ་བ་རིགས་དྲུག་གནས་ནང་དུ་ཁྲིད་པའི་ཚུལ། མ་ཧཱ་གསེར་གྱི་རུས་སྦལ་གྱིས་
གནས་མཇལ་བའི་ཚུལ། སིན་ར་རིགས་ལྔ། མཆོད་པ་རྣམ་པ་ལྔ་ཡོད། ལྷ་འདྲེ་བརྒྱ་གཤར་བའི་སྒོ་མོ། སྟོང་འཚོགས་པའི་འདུ་ར། བྲག་གི་ནང་ནས་ནམ་མཁའ་མཐོང་བ། འཇའ་ཡི་ནང་ནས་སྤྲིན་མཐོང་བ་ཡོད། རྨ་སེ་བློ་གྲོས་རིན་ཆེན་གྱི་སྒྲུབ་ཕུག །གཤིན་རྗེའི་ཕོ་དོང་། གཤིན་རྗེའི་མོ་དོང་། གཤིན་རྗེའི་དོང་ཆེན། སེམས་ཅན་དམྱལ་བའི་གནས། ཕྱག་འབུལ་སྒང་། མཁའ་འགྲོ་ཕྱག་རྒྱབ་མ། རི་ཡི་རྒྱལ་པོ་ལྷུན་པོ་རི་བོ་མཆོག་རབ། གླིང་བཞི། གླིང་ཕྲན་བརྒྱད་དང་བཅས་པའི་མཎྜལ་སྒང་། བསྟོད་པ་བྱེད་ས། མི་འཇིགས་པ་སེང་གེའི་ཁྲི་གཡུ་རལ་དང་བཅས་པ། དེ་སྟེང་མ་ཆགས་པདྨའི་གདན། ཁྲི་དྲུག་མགྱོགས་ཁྱུང་གིས་བརྒྱན་པ། གཡོན་བྲག་མཚོན་ཆ་གཟིང་འདྲ། གནས་སྲུང་གཏེར་མགོན་ཕྱག་བཞི་པའི་སྤྲུལ་པའི་བྱ་རོག་གི་གཟུགས། རྣམ་པར་ཐར་པའི་སྒོ་གསུམ་མཚོན་པའི་ལམ་གསུམ། ཕུག་པ་ཟླ་གམ་དམར་པོ། རྟ་མགྲིན་དབང་གི་གནས་དགྲ་བགེགས་ལོག་འདྲེན་ཚར་གཅོད་པའི་བརྡར་ཧོ་ཁུང་ནང་དུ་ཕུར་པ་བཏབ་པའི་ཚུལ་ཁྲོ་བོའི་ཞལ་གཟུགས། དབུ་མ་རོ་མ་རྐྱང་མ་གསུམ་གྱི་ངོ་བོ་ནང་དུ་ལམ་གསུམ།
དགོས་འདོད་ལྷུན་གྱིས་གྲུབ་པའི་ཕྱིར། རིན་པོ་ཆེའི་སྤུག །གཡས་སུ་རིན་པོ་ཆེ་དགོས་འདོད་ཀུན་འབྱུང་ངོ། །དེ་གཉིས་ལ་ཐོད་པ་གཏུགས་ནས་སྨོན་ལམ་གང་བཏབ་ཐམས་ཅད་འགྲུབ་བོ། །དེ་སྟེང་དག་པ་སངས་རྒྱས་ཀྱི་ཞིང་ཁམས་ཡོད་པའི་འོག་ཏུ་མ་དག་འཁོར་བའི་གྲོང་ཁྱེར་དུ་འགྲོ་དོན་མཛད་པ། དེ་ན་སྲིན་པོའི་གྲོང་ཁྱེར་ཡོད་པ་ལ་མགོ་གཏུགས་དང་སྨོན་ལམ་འདེབས་མི་རུང་། གཡོན་ཕྱོགས་སུ་མཁའ་འགྲོའི་ཐག་ར། དེ་སྟེང་སྲིན་པོ་དང་། དམྱལ་དོང་། སྒོ་ཐོད་ཨོ་རྒྱན་རིན་པོ་ཆེའི་ཕྱག་སྦུབ་ཁ་ཡ་ལུང་ཆད་ནས་ཤོར་བའི་མལ་དུ་ཤིང་སྐྱེས་པ། བར་དོའི་འཕྲང་ཆེན་དུ་མཁའ་འགྲོ་མ་རྣམས་འཚོགས་པའི་ཚོགས་དཔོན་རྟ་མགྲིན་ཡབ་ཡུམ་བྱང་སེམས་དཀར་དམར་ནམ་མཁའ་བྲག་གི་གཞལ་ཡས་སུ་བྲག་གི་ཀ་བ་བརྒྱབ་པ། མཁའ་འགྲོ་མ་རྣམས་ཀྱི་འབྱོན་ལམ། ཕུག་པ་དེའི་སྟེང་འོག་ཕྱོགས་མཚམས་ཐམས་ཅད་རྟེན་འབྲེལ་སྙིང་པོ་དང་དབྱངས་གསལ་གྱི་ངོ་བོ་རྣམས་སོ། །ཤལ་མ་ལི་ཡི་སྡོང་པོ། རྡོ་རྗེ་ཕག་མོའི་ཤེལ་གུར་དཀར་མོ་ལ་ཤེལ་གྱི་ཀ་བ་བརྒྱབ་པ། རྡོ་རྗེ་འཆང་གི་སྐུ། སྤྱན་རས་གཟིགས་ཀྱི་སྐུ། ཡི་གེ་དྲུག་རང་བྱོན་ཡོད། སྒོ་བ་ཡབ་ཡུམ་བརྒྱད། མར་
མེ་རང་འབར། ཤར་སྟག་སྲིན། ཟོར་བའི་གདོང་སོགས་གདོང་མོ་མཆེད་བཞི། རྡོ་རྗེ་རྣམ་པར་འཇོམས་པའི་སྐུ། རིན་པོ་ཆེའི་བེ་ཅོན། མེ་ཏོག་པདྨ་ཡུམ་ཆེན་པདྨ། སློབ་དཔོན་པདྨའི་གསང་རྗེས་གདམས་པ་དང་། མ་ལབ་སྒྲོན་གྱི་སྐུ། དགྱེས་པ་རྡོ་རྗེའི་སྐུ། རིན་པོ་ཆེའི་གཏེར་གྱི་བང་མཛོད་ཀྱི་སྒོ། ལྷ་འདྲེའི་དོང་དུ་མི་ཁྱེར་བའི་ཁ་གནོན་དུ་ཨོ་རྒྱན་རིན་པོ་ཆེའི་ཁྲི། ཅོག་ཙེ་ལྷ་འདྲེའི་ཆོས་ཞུ་ས། ལྷ་འདྲེས་ཕུལ་བའི་ཐུད།་དཔལ་འཁོར་ལོ་བདེ་མཆོག་གི་སྐུ། སློབ་དཔོན་པདྨའི་སྐུ། སློབ་དཔོན་པདྨའི་ཞབས་རྗེས། ཕྱག་གི་རྡོ་རྗེ་རྒྱབ་མལ་དུ་བདུད་རྩི་རྡོལ་བ། མཁའ་འགྲོ་ཡེ་ཤེས་མཚོ་རྒྱལ་གྱི་ཞབས་རྗེས། འཁོར་ལོ་རྩིབས་བརྒྱད། གུ་རུ་པདྨའི་ཕྱག་རྗེས། ཡེ་ཤེས་མཚོ་རྒྱལ་གྱི་ཕྱག་རྗེས། འགྲོ་བ་རིགས་དྲུག་གི་དོང་ཡོད་པར་ལྟ་མི་རུང་། ཨེ་ཀ་ཛཱ་ཊིའི་སྐུ། རྒྱལ་མཚན། ཁྲོ་ཆུའི་སྐུ། ཨོ་རྒྱན་རིན་པོ་ཆེའི་བྷནྡྷའི་རྗེས། ཁ་ཊཾ་རྩེ་དབུས་མའི་རྗེས། གུ་རུ་དྲག་པོའི་ཐོད་སྐམ་གྱི་རྗེས། སངས་རྒྱས་ཡེ་ཤེས་ཀྱི་ཞབས་རྗེས། དུང་གི་ཕུག་རོན་མགོན་དཀར་གྱི་གཟུགས། ལྷ་ཨ་འཁྲོ་རྒྱལ་པོའི་རྟ་རྗེས། འདྲ་དཔེ། ལྷ་དབུ་དཀར་ཅན་གྱི་
དམག་ཚོགས་བྱེ་བ་དང་ཉི་ཁྲི། མི་དབུ་ནག་ཅན་གྱི་དམག་ཚོགས་བྱེ་བ་དང་ཉི་ཁྲི། ཀླུ་དབུ་སྔོན་ཅན་གྱི་དམག་ཚོགས་བྱེ་བ་དང་ཉི་ཁྲི། མཁའ་འགྲོ་མའི་གཤག་ར། མུན་ནག་གི་གླིང་། ལྷ་ཡི་ནུ་མ་བརྒྱད་བརྒྱད། ཀླུ་ཡི་ནུ་མ་བརྒྱད་བརྒྱད། མི་ཡི་ནུ་མ་བརྒྱད་བརྒྱད། མཁའ་འགྲོ་མའི་ཆའུ། སྨན་སྦྲུལ་དང་དུག་སྦྲུལ་གཉིས་ལྕེ་བརྐྱངས་སུ་སྔ་བྱས་པས། །སྨན་སྦྲུལ་ལྕེ་བརྐྱངས་བས་སེམས་ཅན་ཐམས་ཅད་ལ་བདེ་སྐྱིད་འབྱུང་བ། དུག་སྦྲུལ་གྱི་ལྕེ་བསྐུམ་པ། མ་ཧེ་ཕོ་མོའི་ནུ་མ། མཁའ་འགྲོ་སྡེ་བཞིས་ཀ་བའི་རྒྱན་ནས་མར་མེ་བཟུང་བ། །ལྷ་ཆེན་དབང་ཕྱུག་ཆེན་པོ་དང་། ལྷ་མོ་ཨུ་མ་དེ་ཝ་གཉིས་ཀྱི་གསང་རྗེས། བྱང་སེམས་འབབ་པ། ཨ་འཁྲོ་རྒྱལ་པོའི་ཐེབ་རྗེས། གཏེར་གྱི་བང་མཛོད། ཕུག་པ་ལྷ་འདྲེའི་སྔགས་ཁང་རྔ་བརྡུང་བའི་སྐད་བོང་བ། འོ་མའི་ཆུ་མགོ །ཨ་འཁྲོ་རྒྱལ་པོས་ཕྱུག་རྗེས། ཨ་འཁྲོ་རྒྱལ་པོའི་ངལ་གསོའི་མལ། ཨེ་ཀ་ཛཱ་ཊིའི་གཏོར་ཟོར་བརྒྱབ་པ། བདུད་རྩི་ཆུའི་འབྱུང་ཁུངས། གླང་ཆེན་དྲོད་པར་བདུད་རྩིའི་ཆུ་འཁྱིལ་བ། པ་ཏྲ། སྤྱན་རས་གཟིགས་ཀྱི་ཕྱག་གི་མེ་ཏོག་རང་བྱོན། སྨན་ལྷའི་ཕྱག་གི་ཨ་རུ་ར་རང་བྱོན། མཁའ་འགྲོའི་སྐྱ་འཐེན་
རུས་སྦལ་གྱི་རྒྱབ། མཁའ་འགྲོའི་སྐྲ་ཆུ།་དུག་སྦྲུལ། སྲིན་པོའི་ཨོལ་ཀྲོང་། དུག་སྦྲུལ་ཆུན་པོ། མཁའ་འགྲོའི་སྐྲ་བསླས། མཁའ་འགྲོའི་འཇའ་ལམ། །ཟངས་མདོག་དཔལ་རི། རྡོ་རྗེ་ཕག་མོའི་ཞལ་གཟུགས། སྲིན་པོའི་ལྗགས། སྲིན་མོ་བསྒྲལ་བའི་ཐོད་པ། ཨ་འཁྲོ་རྒྱལ་པོའི་སྐུ་གཟུགས། སྲིན་པོའི་བྷནྡྷ། མཁའ་འགྲོ་མས་འོ་མས་ཆག་ཆག་བརྡབ་མལ། སྨན་སྦྲུལ་ལྕེ་བརྐྱང་བའི་རྩ་བ་ནས་བདུད་རྩི་འབབ་པ། ལྷ་བླ་མ་ཡི་དམ་མཁའ་འགྲོ་ཐམས་ཅད་ཀྱི་སྤྲུལ་པའི་བྱ་གཅན་རི་དྭགས་གཡུང་དྭགས་སྣ་ཚོགས་ཀྱི་རྩེ་ཀྱུ་བྱས་མལ། མཁའ་འགྲོའི་ཚོགས་ཁང་འདིར་ཨོ་རྒྱན་རིན་པོ་ཆེ་རྩ་བ་གསུམ་གྱི་ལྷ་ཚོགས་གནས་འགྱུར་བ། རྡོ་རྗེ་གསེར་སྒྲོམ་བསྣམས་པ་སྒམ་དེའི་ཕྱོགས་བཞིར་འཇའ་གུར་དང་དུང་མཚལ་གྱི་ཡི་གེ་ཡོད་པ་ཞལ་གཟིགས། འགྲོ་བ་རིགས་དྲུག་གི་ལམ་རང་རང་གི་མདོག་ཅན་པདྨ་སཾ་བྷའི་ཞབས་རྗེས། ཨོ་རྒྱན་རིན་པོ་ཆེའི་ཆའུ་ཆ་ཚང་། མཁའ་འགྲོའི་ལམ་འཁྱིལ་བ་ལ་རྡོའི་སྐྱོལ་བརྒྱབ་པ། མཁའ་འགྲོའི་ཚོགས་ཁང་ལ་ཀ་བ་བརྒྱབ་པ། མཁའ་འགྲོའི་ཚོགས། ཡུར་བ་དང་བཅས་པ། མཁའ་འགྲོའི་གསོལ་བཀྱག་མཁའ་འགྲོའི་དཔོན་
མོའི་གསོལ་བཀྱག་དང་གསོལ་སྐྱེམས། མཁའ་འགྲོ་མའི་གཏེར་མ་དང་བཅས་པ། མཆོད་རྟེན་བརྒྱ་དང་རྩ་བརྒྱད། མཁའ་འགྲོའི་ཀ་བ་ལ་སྐུ་འདྲ་མང་པོ། མཁའ་འགྲོའི་གཙོ་བོའི་དངུལ་སྐུ། མཁའ་འགྲོས་ཆུ་ལེན་པའི་ཆུ་བོ། མཁའ་འགྲོ་མའི་བྱང་སེམས་དཀར་པོའི་རིལ་བུ། རྡོ་རྗེ་སེམས་དཔའི་སྐུ། ཧོམ་ཁུང་། གསེར་ཉ། ལྷ་ཨ་འཁྲོ་རྒྱལ་པོའི་གསེར་གྱི་ཐག་པ་འདོམ་སྐོར་འདོམ་པ་བརྒྱད་ཅུས་གནས་ལྷ་ཡུལ་དུ་གདན་འདྲེན་ཤོམ་བྱས་པ། བར་དོའི་འཕྲང་ཆུང་ངུ་སྲིན་པོའི་མཆེ་བ། ཚོགས་ཟན་ལན་ས། མཁའ་འགྲོའི་འཇའ་འོད། བཀྲ་ཤིས་པའི་རྟགས་བརྒྱད། མཁའ་འགྲོ་མའི་འོ་མ་བླུགས་པའི་སྐྱེམས། གུ་རུ་སྐུ་ལྔ་མཚན་བརྒྱད་ཀྱི་ཕྱག་རྔ་བཏགས་པ། དུག་སྦྲུལ་མགོ །ཞབས་རྗེས་དང་། པད་ཞྭའི་རྗེས། ཨ་འཁྲོ་རྒྱལ་པོའི་རྟ་རྗེས་ཆ་གཅིག །རྡོ་རྗེ་ཕག་མོའི་གསང་བ། སྲིན་མོ་གནས་འདྲེ་མ་བསྒྲལ་བའི་ཐོད་པ། གསུང་རབ་པོ་ཏི་དམར་པོའི་རྩིག་པ། མཁའ་འགྲོ་མ་རྣམས་ཀྱི་བྲོ་ར་ལ། སྲིན་མོ་སྐུ་ཡི་རལ་པ་ཅན་གྱིས་གཡང་ས་བཟོས་པ། མཁའ་འགྲོ་མ་གཙོ་མོའི་གསོལ་ཞལ་བཞག་པ། ཚོགས་ཀྱི་མཆོད་པ། །དྲང་སྲོང་རཱ་ཧུ་ལའི་སྐུ་ཤིན་ཏུ་གསལ་
བ། རྡོ་རྗེ་ཕག་མོའི་སྐས་བཙུགས་པ། སྲིན་མོ་སྐྲ་རོལ་མས་འཕྲོག་པ། ལྷ་ཁང་གི་སྒོ་བཀྲ། མཁའ་འགྲོ་མས་དར་དཀར་གྱི་ཡོལ་བ་བཀྱག་པ། མཁའ་འགྲོ་མར་ཁུའི་མཚོ་ལ་རིན་པོ་ཆེ་དང་རྡོ་ཡིས་སྐྱོལ་བརྒྱབ་པ། བར་དོའི་འཕྲང་འབྲིང་བ། བར་དོའི་འཕྲང་། བདུད་རྩི་མར་ཁུའི་ཆུ་འདི་ཁར་སོང་ཚད་ནད་གདོན་བར་ཆད་ཞི། མཁའ་འགྲོའི་དར་དཀར་བདུད་རྩི་ཞུ་བ། མཁའ་འགྲོ་མས་མེ་ཏོག་གི་མཆོད་པ་ཕུལ་བ་འཕགས་པ་འཇམ་དཔལ་གྱི་པདྨའི་སྟེང་དུ་པོ་ཏི་དང་རལ་གྲི་གསུམ་གྱི་རྗེས། ཕུག་སྲུང་སྦལ་གདོང་ཅན། ཕུག་སྲུང་སྤེལ་གདོང་ཅན། མཁའ་འགྲོ་མ་ཡེ་ཤེས་གྱི་གདོང་པ་ཅན་གྱི་ཤངས། རྒྱལ་ཆེན་རྣམ་ཐོས་སྲས་ཀྱི་སྐུ། ལྕགས་སྡིག་གི་གཟུགས། དེ་ཡི་སྟེང་དུ་འབུམ་བཞུགས་སོ། །ཨ་འཁྲོ་རྒྱལ་པོའི་མདའ་མཆོང་གི་ནོར། རིན་པོ་ཆེ་རྔ་མོང་ཉི་ཤུའི་རྒྱབ། གསེར་གྱི་ནོར་བུ་རིན་པོ་ཆེ་གླང་པོ་ཆེ་ལྔ་བརྒྱའི་རྒྱབ། དངུལ་གྱི་ནོར་བུ་རིན་ཆེན་རྟ་སྟོང་གི་རྒྱབ། གཡུ་ཡི་ནོར་བུ་རིན་ཆེན་རྔ་མོང་ལྔ་བརྒྱའི་རྒྱབ། གསེར་གྱི་ནོར་བུ་རིན་པོ་ཆེ་གླང་ཆེན་ཁྲི་ཡི་རྒྱབ། དངུལ་གྱི་ནོར་བུ་རིན་ཆེན་རྟ་ཁྲི་ཡི་རྒྱབ། མཆོང་གི་ནོར་བུ་རིན་ཆེན་མཛོ་ཁྲི་ཡི་
རྒྱབ། དུང་གི་ཕ་བོང་དཀར་པོ་ལ་གཡུ་ཡི་དྲེག་པ་ཆགས་པའོ། ༈ །དེ་ནས་གནས་ཀྱི་ཕན་ཡོན་ནི། ཁ་བྱང་གི་ཡི་གེ་ལས། ཕྱི་སྐོར་བདུན། བར་སྐོར་བཅུ། ནང་སྐོར་ཉི་ཤུ་དུང་ཕྱུར་ཡིན། ཞེས་པ་སྣང་གསུངས་པས། ཕན་ཡོན་ཡིག་དྲུག་དུང་རེ་དང་མཉམ། གཞན་ཡང་ཨོ་རྒྱན་རིན་ཆེའི་ལུང་བསྟན་བཀའ་རྒྱ་མ་ལས། དེས་ན་གནས་ཆེན་གནས་ཕྲན་ལ་སོགས་དང་༔ ཡུལ་དང་ཡུལ་འདྲ་སྦས་པའི་ཡུལ་རྣམས་སུ༔ བསྒྲུབས་པ་བྱས་པའི་ཡོན་ཏན་བསམ་མི་ཁྱབ༔་ཕལ་པའི་གནས་སུ་ལོ་གཅིག་བསྒྲུབ་པ་བས༔ དེ་དག་རྣམས་སུ་ཞལ་གཅིག་འགྲུབ་ཐག་ཉེ༔ དེ་དོན་ཤེས་པར་མཛོད་ཅིག་རྗེས་འཇུག་རྣམས༔ ཞེས་གསུངས། གནས་ནང་དུ་འགྲོ་དུས་གསོལ་འདེབས་ཡིག་དྲུག་གམ་བཛྲ་གུ་རུ་གཅིག་བཟླས་ཀྱང་བྱེ་བ་མང་པོའི་འགྱུར་ཡོད་དོ། །ཁྱད་པར་བདུད་རྩི་མར་ཁུའི་ཆུ་ཁར་སོང་ཚད་གདོན་རིགས་ཐམས་ཅད་ཀྱི་གནོད་པ་ཞི་ཕྱི་མ་ངན་སོང་མེད་པར་གསུངས། གཞན་ཡང་གནས་འདི་ནི་ཨོ་རྒྱན་རིན་པོ་ཆེ་དང་། གནུབས་སངས་རྒྱས་ཡེ་ཤེས། དམ་པ་སངས་རྒྱས། དྲུང་རྨ་སེ་རྣམས་ཀྱི་སྒྲུབ་གནས་ཡིན་པས་གནས་འདི་མཇལ་བ་དང་བསྐོར་བ་བྱས་ན་བྱིན་རླབས་
འཇུག་ཉམས་རྟོགས་སྐྱེ། ཙཱ་རིའི་གནས་ལག་ཡི་དམ་འཁོར་ལོ་བདེ་མཆོག་གི་གནས་ཡིན་པས་མཆོག་ཐུན་མོང་གི་དངོས་གྲུབ་ཐོབ། མཁའ་འགྲོ་རྡོ་རྗེ་ཕག་མོ་དང་ཡེ་ཤེས་མཚོ་རྒྱལ་ལབ་སྒྲོན་མ་རྣམས་ཀྱི་གནས་ཡིན་པས་བར་ཆད་ཐམས་ཅད་སེལ། རི་བོ་རྩེ་ལྔའི་གནས་ལག་འཇམ་དབྱངས་སྐུ་ཡི་གནས་ཡིན་པས་ལུས་ཀྱི་སྒྲིབ་པ་དག །ཤེས་རབ་འཕེལ། རྟ་མགྲིན་གསུང་གི་གནས་ཡིན་པས་ངག་གི་སྒྲིབ་པ་ཐམས་ཅད་འདག་ངག་ལ་ནུས་པ་སྐྱེ། དཔལ་ཀྱེ་རྡོ་རྗེ་དང་ཐུགས་མཆོག་རྡོ་རྗེ་སེམས་དཔའི་གནས་ཡིན་པས་ཡིད་ཀྱི་སྒྲིབ་པ་འདག་ཉམས་རྟོགས་འཕེལ། མགོན་པོ་བྱ་རོག་ཅན་དང་སྔགས་སྲུང་ཨེ་ཀ་ཛཱ་ཊི། གཟའ་བདུད་དུག་གི་སྤུ་གྲི་ལྷ་སྲིན་སྡེ་བརྒྱད་དང་བཅས་པའི་འདུ་ར་ཡིན་པས་བར་ཆད་སེལ། །ཚོགས་མཆོད་གཏོར་མ་མར་མེ་ཕུལ་ན་བསམ་པའི་དོན་དང་ཕྲིན་ལས་གང་བརྩམ་འགྲུབ། རྒྱལ་ཆེན་རྣམ་ཐོས་སྲས་ཀྱི་གནས་ཡིན་པས་ནོར་བུ་རིན་པོ་ཆེ་དགོས་འདོད་ཀུན་འབྱུང་སོགས་རིགས་མང་པོ་ཡོད་པས་གནས་འདི་ལ་མཆོད་བསྟོད་བསྐོར་བ་བྱས་ན་ཚེ་དང་བསོད་ནམས་དབང་ཐང་ཐམས་ཅད་འཕེལ་ཞིང་རྒྱས་སོ། །ཞེས་པ་འདི་ནི་སྤྲུལ་སྐུ་མི་འགྱུར་རྡོ་རྗེ་བདུད་འདུལ་
རོལ་པ་རྩལ་གྱིས་གསུངས་པའི་གནས་ཡིག་ལ་གཞིར་བྱས། གསར་རྙིང་གི་རྒྱུད་སྡེའི་བཤད་པ་རྣམས་དང་། རྒྱལ་པོའི་བཀའ་ཆེམས། པདྨ་བཀའ་ཐང་། ལུང་བསྟན་བཀའ་རྒྱ་མ་སོགས་ནས་གནས་ཀྱི་བཤད་པ་རྒྱ་ཆེར་བྱུང་བའི་དོན་བསྡུས། ཡི་གེ་མང་དོགས་པས་ལུང་འདྲེན་རྣམས་སྤྲོས་པ་སྐྱུང་སྟེ་གོ་བདེ་བར། དགེ་སློང་༧ རཱ་ག་ཨ་སྱས་བྲིས་པ་ལ་འགལ་བ་མཆིས་ན་གནས་གསུམ་མཁའ་འགྲོའི་ཚོགས་ལ་འཆགས་ཤིང་། དགེ་བས་འདི་ལ་འབྲེལ་པ་ཐོགས་ཚད་མཆོག་དང་ཐུན་མོང་གི་དངོས་གྲུབ་མྱུར་དུ་ཐོབ་པར་གྱུར་ཅིག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།