སྤོམ་ཎེ་རྡོ་རྗེའི་བྲག་གི་ར་བའི་གནས་ཡིག་ངོ་མཚར་ལྷའི་རྔ་ཆེན།
སྤོམ་ཎེ་རྡོ་རྗེའི་བྲག་གི་ར་བའི་གནས་ཡིག་ངོ་མཚར་ལྷའི་རྔ་ཆེན། རྒྱ་གར་གྱི་ཕྲག་སང་ཞེས་བྱ་བའི་སྐད་དུ་སྤོམ་ཎེ་ལ། བོད་སྐད་དུ་འོད་དཀར་ཅན། དོན་དམ་པ་གནས་འོད་དཀར་རྡོ་རྗེའི་བྲག་དང་། ད་ལྟ་མི་རྣམས་ཀྱི་སྤོམ་ཎེ་བྲག་ཅེས་ཟེར་རོ། །དེའི་ལོ་རྒྱུས་རྒྱས་པར་བཀོད་པ་ནི་ལྟ་ས་ལགས་སོ། །
ན་མོ་གུ་རུ་དྷེ་ཝ་ཌཱ་ཀི་ནཱི་ཧཱུྃ། དུས་གསུམ་སངས་རྒྱས་ཐམས་ཅད་ཀྱི། །ཐུགས་རྗེ་བྱིན་རླབས་ཀུན་འདུས་པ། །པདྨ་འབྱུང་གནས་ཞབས་ལ་འདུད། །དེ་ཡི་ཕྲིན་ལས་འགྲོ་དོན་སྒོ། །སྤོམ་ཎེ་རྡོ་རྗེའི་བྲག་རི་ཡི། །ངོ་མཚར་གནས་ཡིག་རྒྱས་པ་ནི། །སྤྲུལ་སྐུས་གསུངས་པའི་རྩ་ཚིག་ལ། །ཡིད་ཆེས་ལུང་གིས་བརྒྱན་པ་བཀོད། །གནས་བདག་ཌཱ་ཀིས་བཀའ་གནང་སྩོལ། །དེ་ལ་ས་བཅད་རྣམ་ལྔ་སྟེ། །དང་པོ་གནས་ཀྱི་བྱུང་ཁུངས་དང་། །གཉིས་པ་གནས་རི་བྱིན་བརླབ་ཚུལ། །གསུམ་པ་གནས་སྒོ་ཕྱེ་ཚུལ་དང་། །དེ་ནས་ལུང་ཁུངས་ཕན་ཡོན་བཅས། །ཞལ་གདམས་
མན་ངག་བསྟན་པའོ། །དང་པོ་གནས་ཀྱི་བྱུང་ཁུངས་ནི། །དེ་ལ་དང་པོ་ཆགས་པའི་དུས། །མཁའ་ལ་རླུང་གི་དཀྱིལ་འཁོར་ཆགས། །དེ་སྟེང་ཆུ་ཡི་དཀྱིལ་འཁོར་དང་། །དེ་སྟེང་ས་ཡི་དཀྱིལ་འཁོར་རྣམས། །ཡུམ་ཆེན་དབྱིངས་ཕྱུག་མ་དང་ནི། །མ་མཱ་ཀི་དང་གོས་དཀར་མོ། །དམ་ཚིག་སྒྲོལ་མའི་སྤྲུལ་པ་ནི། །འབྱུང་བ་ལྔ་རུ་སྤྲུལ་ནས་ཆགས། །འབྱུང་བའི་བཅུད་དང་དྭངས་མ་རྣམས། །གང་དེ་འདུས་པའི་ས་དེ་རུ། །རི་དང་བྲག་དང་མཚོ་རྣམས་ཀྱང་། །གཞན་ལས་ངོ་མཚར་ཆེ་བ་བྱུང་། །དེ་ནས་མི་རྣམས་ཆགས་ཚར་ནས། །འཇིག་རྟེན་ཀུན་གྱི་མེས་པོ་
ནི། །ལྷ་ཆེན་དབང་ཕྱུག་ཆེན་པོ་དང་། །ལྷ་མོ་ཨུ་མ་དེ་ཝ་ཡིས། །དྲག་པོ་འཇིགས་བྱེད་ནག་པོ་དང་། །དུས་མཚན་དམར་མོ་གཉིས་སུ་སྤྲུལ། །འཛམ་བུ་གླིང་དུ་འོང་ནས་ཀྱང་། །ཡབ་ཀྱིས་དྲག་པོ་ཉི་ཤུ་བཞི། །ཡུམ་གྱིས་དྲག་མོ་ཉེར་བཞིར་སྤྲུལ། །ཡུལ་ཆེན་ཉི་ཤུ་རྩ་བཞི་ཡི། །གནས་ཆེན་གནས་ཕྲན་བདག་ཏུ་བཟུང་། །དེ་ཕྱིར་གནས་རྣམས་ཕལ་ཆེར་ན། །དབང་ཕྱུག་ཨུ་མའི་མཚན་མ་ཡོད། །དབང་ཕྱུག་རྒྱུད་དང་སྒྲུབ་ཐབས་བཤད། །མི་རྣམས་ལམ་ལོག་མུ་སྟེགས་ཀྱི། །ལམ་ལ་བཀོད་པར་བྱས་པའི་ཚེ། །འོག་མིན་འཐུག་པོ་བཀོད་པ་ནས། །སངས་རྒྱས་རྣམ་སྣང་ཆེན་པོ་ཡིས། །འཁོར་ལོ་བདེ་མཆོག་སྐུ་རུ་སྤྲུལ། །ཡུམ་ཆེན་རྡོ་རྗེ་དབྱིངས་ཕྱུག་མས། །རྡོ་རྗེ་ཕག་མོའི་སྐུ་རུ་སྤྲུལ། །བྱང་ཆུབ་སེམས་དཔའ་ཉེར་བཞི་ཡིས། །དཔའ་བོ་ཉི་ཤུ་རྩ་བཞིར་སྤྲུལ། །བྱང་ཆུབ་སེམས་མ་ཉེར་བཞི་ཡིས། །དཔའ་མོ་ཉི་ཤུ་རྩ་བཞིར་སྤྲུལ། །བདེ་མཆོག་དྲུག་ཅུའི་དཀྱིལ་འཁོར་གཅིག །འཛམ་གླིང་འདི་རུ་བྱོན་ནས་ཀྱང་། །འཇིགས་བྱེད་དུས་མཚན་ཞབས་ཀྱིས་མནན། །དྲག་པོ་དྲག་མོ་བཞི་བཅུ་བརྒྱད། །དམ་ལ་བཏགས་ནས་སྲུང་མར་བསྐོས། །དབང་ཕྱུག་ཆེན་པོའི་གནས་ཆེན་
དང་། །གནས་ཕྲན་གང་ཡོད་མ་ལུས་དང་། །བདེ་མཆོག་གནས་སུ་བྱིན་གྱིས་བརླབས། །དེ་ཡི་ལོ་རྒྱུས་རྒྱས་པ་ནི། །བདེ་མཆོག་རྒྱུད་འགྲེལ་རྣམས་ན་གསལ། །དེ་དུས་བདེ་མཆོག་ཡབ་ཡུམ་གྱིས། །གནས་འདི་བྱིན་གྱིས་རླབས་པའི་རྟགས། །མཁའ་འགྲོ་རིགས་བཞིའི་ཀ་བ་དང་། །ལས་མགོན་བྱ་རོག་གདོང་ཅན་དང་། །རྩ་འཇིབ་དམར་མོའི་སྐུ་ཡང་ཡོད། །དང་པོ་དབང་ཕྱུག་དྲག་པོ་ཡི། །གནས་འདི་བདག་ཏུ་བཟུང་བའི་རྟགས། །དབང་ཕྱུག་ཆེན་པོ་ཞི་བའི་ཆ། །ལྷ་ཆེན་ཚངས་པའི་སྒེའུ་སྐར་དང་། །མེ་ལྷ་ཨག་ནེ་ར་ཙ་ཡི། །ཕྲེང་བའི་རྗེས་ཀྱང་ཡོད་པ་ཡིན། །དེ་ནས་འོད་སྲུང་བསྟན་པའི་མཇུག །ཤཱཀྱ་ཐུབ་པ་མ་བྱོན་སྔོན། །བདུད་པོ་མ་ཏྲཾ་རུ་ཏྲ་ཡིས། །ལྷ་སྲིན་ཐམས་ཅད་བྲན་དུ་བཀོལ། །བདུད་རིགས་བྱེ་བའི་འཁོར་དང་བཅས། །མ་མོ་ཤ་ཟ་དབང་དུ་བསྡུས། །གནས་ཆེན་གནས་ཕྲན་ཐམས་ཅད་ཀུན། །ཁོ་ཡི་འཁོར་དང་གཡོག་གིས་བདག །དེ་ཚེ་དཔལ་ཆེན་རྟ་མགྲིན་གྱིས། །རུ་ཏྲའི་ཁོག་པའི་ནང་དུ་ཞུགས། །རྣམ་ཤེས་སྤར་ནས་ལུས་ཀྱང་ཕྲོག །ཁོ་ཡི་འཁོར་རྣམས་དམ་ལ་བཏགས། །གནས་རྣམས་རྟ་མགྲིན་གནས་སུ་
བྱས། །ཁོ་ཡིས་བདག་ཏུ་བཟུང་བ་ཡི། །གནས་དང་གནས་ཕྲན་ཐམས་ཅད་ཀུན། །རྟ་མགྲིན་གནས་སུ་བྱིན་གྱིས་བརླབས། །དེ་དུས་སྤོམ་ཎེའི་གནས་འདི་ཡང་། །དང་པོ་རུ་ཏྲས་བདག་པའི་རྟགས། །བདུད་ཀྱི་མཆོད་རྟེན་བསྐྱིལ་པ་ཡོད། །དེ་ནས་ཁྲོ་བོ་རྟ་མགྲིན་གྱིས། །བདུད་བཏུལ་གནས་འདི་བྱིན་རླབས་རྟགས། །རྟ་མགྲིན་སྐུ་དང་ཁྲོ་བཅུ་ཡི། །ཐོད་སྐམ་དབུ་རྒྱན་ལ་སོགས་ཡོད། །དེ་ཡི་ལོ་རྒྱུས་རྒྱས་པ་ནི། །རྒྱུ་འཕྲུལ་སྡེ་བརྒྱད་རྔམས་གློག་སོགས། །རྫོགས་ཆེན་རྒྱུད་སྡེ་རྣམས་ན་གསལ། །དེ་ནས་ཤཱཀ་ཐུབ་མྱ་ངན་ལས། །འདའ་ཁར་སྤྱན་རས་གཟིགས་དབང་གིས། །ད་དུང་བོད་ཡུལ་ཁ་བ་ཅན། །ཁྱེད་ཀྱི་ཞབས་ཀྱིས་མ་བཅགས་ཤིང་། །སྐུ་ཡི་འོད་ཀྱིས་མ་ཁྱབ་པའི། །མྱ་ངན་མི་འདའ་བཞུགས་གསོལ་ཞུས། །དེ་ཚེ་ཐུབ་པས་བཀའ་སྩལ་པ། །བོད་ཡུལ་ཁ་བ་ཅན་གྱི་ཡུལ། །ང་ཡི་འདུལ་སྐལ་མ་ཡིན་པས། །བྱང་ཆུབ་སེམས་དཔའ་ཁྱོད་ཉིད་ཀྱིས། །འདུལ་ཞིང་ཡིན་པས་ཐུལ་ཅིག་གསུངས། །ཐུབ་པའི་ཞལ་ནས་འོད་ཟེར་ནི། །ཁ་དོག་སྣ་ཚོགས་དཔག་མེད་པ། །སྤྲོས་ནས་བོད་ཡུལ་བྱིན་གྱིས་བརླབས། །དེ་དུས་འོད་ཟེར་གར་ཕོག་རུ། །
སྐུ་གསུང་ཐུགས་རྟེན་རང་བྱོན་བྱུང་། །དེ་དུས་སྤོམ་ཎེའི་གནས་འདི་ཡང་། །ཐུབ་པས་འོད་ཟེར་ཕོག་པའི་རྟགས། །ཐུབ་པའི་མཛད་བཅུ་ཕལ་ཆེར་དང་། །རང་བྱོན་མཆོད་རྟེན་མང་དུ་ཡོད། །དེ་ནས་བདེ་ཆེན་ཞིང་ཁམས་ན། །སངས་རྒྱས་སྣང་བ་མཐའ་ཡས་ཀྱིས། །སྤྱན་རས་གཟིགས་ལ་བཀའ་སྩལ་པ། །བོད་ཡུལ་ཁ་བ་ཅན་གྱི་ཡུལ། །སེམས་དཔའ་ཁྱོད་ཀྱི་འདུལ་ཞིང་ཡིན། །དང་པོ་མི་ཡི་འགྲོ་བ་སྤེལ། །དེ་ནས་འཇིག་རྟེན་རྒྱལ་ཁྲིམས་སྟོན། །དེ་ནས་དམ་པའི་ཆོས་ལ་འགོད། །མཐར་ནི་སེམས་ཅན་དེ་དག་རྣམས། །ང་ཡི་ཞིང་འདིར་ཁྲིད་ཤོག་གསུངས། །སྤྱན་རས་གཟིགས་ཀྱིས་ཞུས་པ་ནི། །ང་ལ་འབྲེལ་པ་ཆེར་བཞག་པའི། །བོད་ཀྱི་སེམས་ཅན་དེ་དག་རྣམས། །ཞིང་འདིར་ཁྲིད་ཟླནི་འོང་ངོ་ཞུས། །དེ་ནས་འཕགས་པ་སྤྱན་རས་གཟིགས། །རི་བོ་གྲུ་འཛིན་རྩེ་མོར་བྱོན། །བོད་ཡུལ་ཁ་བ་ཅན་དུ་གཟིགས། །སྐུ་ལས་འོད་ཟེར་དཔག་མེད་སྤྲོས། །བོད་ཡུལ་ས་ཡི་འོག་རོལ་དུ། །གྲང་དམྱལ་ཡོད་པ་ཐམས་ཅད་དྲངས། །བོད་ཡུལ་གངས་ཀྱི་རང་རུབ་བཞུས། །དེ་དུས་སྐུ་ཡི་འོད་ཟེར་དེ། །གར་ཕོག་སྐུ་གཟུགས་ཡིག་འབྲུ་རྣམས། །རང་
བྱོན་དཔག་ཏུ་མེད་པ་བྱུང་། །དེ་དུས་སྤོམ་ཎེའི་གནས་འདི་རུ། །ཐུགས་རྗེ་ཆེན་པོའི་འོད་ཟེར་རྣམས། །ཕོག་པའི་རྟགས་ལ་བཅུ་གཅིག་ཞལ། །སྐུ་གསུང་ཐུགས་ཀྱི་མཆོད་རྟེན་གསུམ། །ཨོ་ཨཱཧཱུྃ་གི་ནང་གཞུག་ཅན། །ཐུགས་མཚན་མེ་ཏོག་འདབ་བཞི་དང་། །།ཕྱག་མཚན་ཆུ་སྐྱེས་པདྨ་ཡོད། །དེ་དག་ལོ་རྒྱུས་རྒྱས་པ་ནི། །ཆོས་རྒྱལ་སྲོང་བཙན་སྒམ་པོ་ཡི། །བཀའ་ཆེམས་བཀའ་འབུམ་རྒྱས་པ་དང་། །མ་གཅིག་ལབ་ཀྱི་སྒྲོལ་མ་ཡི། །གཅོད་ཀྱི་ས་བཅད་རྒྱས་པ་ཡི། །ནང་དུ་དེ་དོན་གསལ་བར་ཡོད། །དེ་ལྟར་གནས་ཆེན་གནས་ཕྲན་དང་། ཁྱད་པར་སྤོམ་ཎེའི་རྡོ་རྗེ་ཡི། །བྲག་གི་ར་བའི་གནས་འདི་ན། །དང་པོ་མ་ཧཱ་དེ་བས་བཟུང་། །དེ་ནས་ལྷ་ཆེན་དམ་ལ་བཏགས། །བདེ་མཆོག་གནས་སུ་བསྒྱུར་བར་མཛད། །བར་སྐབས་རུ་ཏྲ་འཁོར་གྱིས་བཟུང་། །དེ་ནས་རུ་ཏྲ་བཏུལ་བའི་ཚེ། །རུ་ཏྲའི་འཁོར་གྱིས་རྟ་མགྲིན་ལ། །ཕུལ་ནས་རྟ་མགྲིན་གནས་སུ་བྱས། །དེ་ནས་ཤཱཀ་ཐུབ་འོད་ཟེར་དང་། །ཐུགས་རྗེ་ཆེན་པོའི་འོད་ཟེར་ཕོག །བྱིན་གྱིས་བརླབ་ཕྱིར་རང་བྱོན་མང་། །གནས་ཀྱི་བྱུང་ཁུངས་ཀྱི་ལེའུ་སྟེ་དང་པོའོ།། ༈ །།དེ་ནས་གནས་མཆོག་སྤོམ་ཎེ་
ཞེས། །རྡོ་རྗེའི་བྲག་གི་ར་བ་འདི། །རིག་འཛིན་གྲུབ་ཐོབ་མང་པོ་ཡིས། །བྱིན་གྱིས་རླབས་ཤིང་ཞབས་ཀྱིས་ནི། །ཇི་ལྟར་བཅགས་པའི་ཚུལ་བཤད་པ། །ཆོས་རྒྱལ་ཁྲི་སྲོང་ལྡེའུ་བཙན་གྱིས། །ཨོ་རྒྱན་ཆེན་པོ་སྤྱན་དྲངས་ནས། །བོད་ཡུལ་ལྷ་འདྲེ་དམ་ལ་བཏགས། །བོན་སྐྱོང་རྣམས་ཀྱང་ཆོས་སྐྱོང་བྱས། །དཔལ་གྱི་བསམ་ཡས་གཙོར་བྱས་པའི། །མཐའ་འདུལ་གཙུག་ལག་བརྒྱ་རྩ་བརྒྱད། །ཡང་འདུལ་གཙུག་ལག་སྟོང་རྩ་བཞེངས། །མདོ་སྔགས་དམ་ཆོས་བོད་དུ་བསྒྱུར། །རྗེ་འབངས་ཉི་ཤུ་རྩ་ལྔ་སོགས། །གྲུབ་ཐོབ་རྣམས་ཀྱིས་ལུང་པ་བཀང་། །ས་འོག་ས་སྟེང་ཆོས་ཀྱིས་བཀང་། །དེ་དུས་རྒྱལ་པོས་ཞུས་པ་ནི། །ང་ཡིས་བཞེངས་པའི་གཙུག་ལག་རྣམས། །དར་རྒུད་འཕེལ་འགྲིབ་ཇི་ལྟར་འབྱུང་། །མ་འོངས་ལུང་བསྟན་གསུངས་དགོས་ཞུས། །དེ་དུས་ཨོ་རྒྱན་རིན་པོ་ཆེས། །གཞུ་གང་ཙམ་གྱིས་ནམ་མཁའ་ལ། །འཇའ་དང་འོད་ཀྱིས་གུར་ནང་བཞུགས། །སྐུ་ལས་༔ འོད་ཟེར་སྣ་ཚོགས་འཕྲོས། །རྒྱལ་བློན་འཁོར་རྣམས་ཁྱབ་པར་མཛད། །དེ་ནས་སློབ་དཔོན་བཀའ་སྩལ་པ། །སྤྱིར་ནི་འདུས་བྱས་ཆོས་རྣམས་ཀུན། །ཐམས་ཅད་མི་རྟག་ཆོས་ཉིད་
ཡིན། །རྒྱལ་པོ་ཁྱེད་ཀྱང་མྱ་ངན་འདས། །ང་ཡང་སྲིན་པོ་འདུལ་དུ་འགྲོ། །རྒྱལ་མཚན་དབོན་ལ་གླང་དར་སྐྱེས། །སངས་རྒྱས་བསྟན་པ་སྣུབ་པར་བྱེད། །ཡིག་ཆ་ཕལ་ཆེར་མེར་བསྲེགས་པས། །ཟབ་ཆོས་ཕལ་ཆེར་གཏེར་དུ་སྦོས། །ཁྱེད་ཀྱིས་བཞེངས་པའི་གཙུག་ལག་རྣམས། །དར་རྒུད་ཞིག་རལ་མང་དུ་འགྱུར། །དེ་དུས་གསོ་བའི་ཆ་རྐྱེན་དུ། །གསེར་དངུལ་སྤྱད་ཆ་གཏེར་དུ་སྦོས། །སྤྲུལ་པས་འདོན་ཞིང་གསོ་བར་འགྱུར། །གསུངས་ཕྱིར་ཆོས་གཏེར་ནོར་གཏེར་སྦོས། །འོན་ཀྱང་རྒྱལ་པོ་ཐུགས་མ་ཚིམ། །བཞེངས་པའི་གཙུག་ལག་རྟེན་གསུམ་ལ། །ཞིག་རྒྱུ་ཡོད་པས་བློ་མ་བདེ། །མ་འོངས་སྙིགས་མའི་སེམས་ཅན་རྣམས། །ཚོགས་བསགས་སྒྲིབ་པ་སྦྱོང་བའི་རྟེན། །འབྱུང་བཞིའི་གནོད་པས་མི་འཇིགས་པ། །དར་རྒུད་ཞིག་རལ་མེད་པ་ཞིག །སློབ་དཔོན་ཐབས་མཁས་ཐུགས་རྗེ་ཆེ།། །སེམས་ཅན་དོན་དུ་གནང་བར་ཞུས། །ཞུས་པས་སློབ་དཔོན་རབ་ཏུ་མཉེས། །དེ་འདྲ་ཐབས་ཀྱང་ཡོད་གསུངས་ནས། །སློབ་དཔོན་རྒྱལ་པོ་རྗེ་འབངས་རྣམས། །སྐུ་ཡི་བཀོད་པ་མང་དུ་སྤྲུལ། །གངས་རི་ཏི་སེ་མན་ཆད་ནས། །རི་བོ་རྩེ་ལྔ་ཡན་ཆད་ཀྱི། །གནས་ཆེན་གནས་ཕྲན་
ཐམས་ཅད་དུ། །ལོ་ནི་བཅུ་གཉིས་བར་དུ་བྱོན། །གནས་རི་ཐམས་ཅད་བྱིན་གྱིས་བརླབས། །དེ་ཡི་བར་གྱི་བོད་ཡུལ་གྱི། །གནས་ཀྱི་གྲངས་ཀ་མདོར་བསྡུས་ནས། །ཟམ་བུ་ལུང་སོགས་ལུང་པ་ལྔ། །འབྲས་མོ་གཤོང་སོགས་ལྗོངས་ཡུལ་གསུམ། །པདྨ་བཀོད་དང་པདྨ་གླིང་། །གླིང་ནི་གསུམ་སྟེ་གཅིག་ཏུ་བརྩི། །མཆོག་གི་སྒྲུབ་གནས་ཆེན་པོ་ལྔ། །གྲུབ་པ་ཐོབ་པའི་གནས་ཆེན་བརྒྱད། །ཀཾ་པོ་ལ་སོགས་གངས་ར་བཞི། །རོང་བཙན་ལ་སོགས་གངས་ཉེར་གཅིག །གནས་ཆེན་བརྒྱ་དང་རྩ་བརྒྱད་དང་། །ངོ་མཚར་གནས་མཆོག་ཉི་ཤུ་ལྔ། །གནས་ཕྲན་སྟོང་དང་རྩ་གཉིས་རྣམས། །ཞབས་ཀྱིས་བཅགས་ཤིང་བྱིན་གྱིས་བརླབས། །གནས་འདྲེ་ཐམས་ཅད་དམ་ལ་བཏགས། །གནས་བདག་བཀའ་སྲུང་ཆོས་སྐྱོང་བསྐོས། །ཆོས་གཏེར་ནོར་གཏེར་མང་དུ་སྦས། །གཏེར་སྲུང་རྣམས་ལ་གཉེར་དུ་གཏད། །དེ་དག་ལོ་རྒྱུས་གསུང་ཆེ་བ། །པདྨ་བཀའ་ཐང་རྒྱས་བསྡུས་གསུམ། །བཀའ་ཐང་སྡེ་ལྔ་ཞེས་བྱ་དང་། །ཨོ་རྒྱན་རྣམ་ཐར་མདོར་བསྡུས་པ། །ཉང་དང་རཏྠ་འཇའ་ཚོན་པ། །གཏེར་ཁ་དུ་མ་ནས་བྱུང་དང་། །ལུང་བསྟན་ཆེན་པོ་བཀའ་རྒྱ་མ། །ཙཱ་རི་ཏྲ་
དང་འབྲས་མོ་ཡི། །གནས་ཡིག་རྒྱས་པ་རྣམས་ན་གསལ། །དེ་ལྟར་གནས་ནི་མང་ན་ཡང་། །སྤོམ་ཎེ་རྡོ་རྗེའི་བྲག་ར་འདི། །གུ་རུ་པདྨ་འབྱུང་གནས་ཀྱིས། །ཚེ་དཔག་མེད་པ་གསུང་གི་གནས། །ཚེ་ཡི་བར་ཆད་བསལ་བ་དང་། །ཚེ་ཡི་དངོས་གྲུབ་འབྱུང་བ་དང་། །གནས་སུ་བྱིན་གྱིས་བརླབ་པའི་རྟགས། །ཨོ་རྒྱན་ཉིད་དང་ཚེ་དཔག་མེད། །གོས་དཀར་མོ་ཡི་བཞུགས་ཁྲི་ཡོད། །ཚེ་དཔག་མེད་ཀྱི་སྐུ་དང་ནི། །མཆོད་རྟེན་སྣང་བ་མཐའ་ཡས་ཡོད། །ཚེ་དཔག་མེད་པའི་བརྙན་གཟུགས་དང་། །ཚེ་དཔག་མེད་པའི་དབུ་རྒྱུན་ཡོད། །ཚེ་དཔག་མེད་པའི་ཚེ་བུམ་ནས། །ཚེ་ཡི་བདུད་རྩི་འཕྱུར་བ་ཡོད། །དེ་སོགས་རང་བྱོན་ཡོད་ཚུལ་ནི། །སྤྲུལ་སྐུའི་གནས་ཡིག་ཉིད་ན་གསལ། །འདི་རུ་བྲི་བར་མ་ལོང་ངོ། །ཨོ་རྒྱན་གསང་ཆབ་ཆུ་མིག་ཏུ། །བྱིན་གྱིས་རླབས་པ་ཡོད་པ་ནི། །གྲིབ་ཅན་རྣམས་ཀྱིས་འཁྱོར་ཆུའི་དག །བྱས་ན་སྐམ་དོག་མ་བསྟན་གསུངས། །དེ་ནས་ཛྙཱ་ན་ཏ་པ་དང་། །མི་ཏྲ་ཇོ་ཀི་ལ་སོགས་པ། །རྒྱ་གར་གྲུབ་ཆེན་འགའ་རེ་དང་། གྲུབ་ཆེན་གྲགས་པའི་དཔལ་ཞབས་དང་། །དྷརྨེ་ཤྭ་ར་ལ་སོགས་པ། །སྐྱེས་བུ་དམ་པ་དུ་མ་ཡིས། །གནས་རི་བཟང་བར་
གཟིགས་ནས་ཀྱང་། །ཞབས་ཀྱིས་བཅགས་ཤིང་དོན་གྱིས་ནི། །གནས་རི་བྱིན་གྱིས་རླབས་པར་ངེས། །རིག་འཛིན་སེམས་དཔའ་མཆོག་རྣམས་ཀྱིས། །གནས་བྱིན་གྱིས་བརླབས་པའི་ལེའུ་སྟེ་གཉིས་པའོ།། ༈ །།གསུམ་པ་གནས་སྒོ་འབྱེད་ཚུལ་ནི། །སྔོན་ཚེ་སློབ་དཔོན་པདྨ་ཡིས། །གནས་ཆེན་གནས་ཕྲན་ཐམས་ཅད་ལ། །ཡེ་ཤེས་ལས་དང་འཇིག་རྟེན་གྱི། །བཀའ་སྲུང་སྒོ་སྲུང་མང་དུ་བསྐོས། །མ་འོངས་འགྲོ་དོན་དུས་བབས་ཚེ། །ལས་ཅན་སྐྱེས་བུ་འབྱུང་བའི་ཚེ། །གནས་སྒོ་གཏོད་ལ་ཕྲིན་ལས་སྒྲུབས། །སྐལ་མིན་དུས་མིན་སྒོ་ཕྱེ་བ། །དེ་ཡི་སྙིང་ཁྲག་ཐང་ལ་ཕོས། །ཞེས་གསུངས་བཀའ་བསྒོས་དམ་བཞག་མཛད། །ཁྱད་པར་སྤོམ་ཎེའི་བྲག་ར་འདི། །ལས་མགོན་བྱ་རོག་གདོང་ཅན་zདང་། །ཡུམ་ཆེན་ལྷ་མོ་རྩ་འཇིབ་མ། །བཀའ་སྲུང་ནག་མོ་ཀླུ་འདུལ་དང་། །ས་བདག་ཧ་ས་གནྡྷ་དང་། །བཞི་ལ་བཀའ་སྲུང་གཉེར་དུ་གཏད། །དེ་ཕྱིར་སྐྱེས་བུ་དམ་པ་རྣམས། གནས་ཆེན་ཡིན་པར་དགོངས་ན་ཡང་། །གནས་སྒོ་འབྱེད་པའི་དབང་མེད་དོ། །སྤྱིར་ནི་གནས་ཆེན་གནས་ཕྲན་རྣམས། །ལ་ལ་སྔར་ནས་གནས་སྒོ་ཕྱེས། །འགྲོ་དོན་རྫོགས་ནས་
སྐོར་མཁན་ཉུང་། །ལ་ལ་བར་སྐབས་གནས་སྒོ་ཕྱེས། །ད་རུང་འགྲོ་དོན་མ་རྫོགས་པས། །སྐོར་མཁན་དག་ཀྱང་ཅི་རིགས་འབྱུང་། །ལ་ལ་ད་རུང་དུས་མ་བབས། །མ་འོངས་དུས་ལ་བབ་པའི་ཚེ། །གནས་སྒོ་ཕྱེ་བས་འགྲོ་དོན་འབྱུང་། །གནས་སྒོ་ཕྱེ་མཁན་གང་ཟག་ནི། །བླ་མ་སྔགས་པ་མི་སྐྱ་དང་། །སྨོན་པ་བྱ་བྲལ་རྟོགས་ལྡན་སོགས། །ལྟར་སྣང་བཟང་ངན་ཅི་བྱུང་ཡང་། །སྤྲུལ་པ་དོན་གྱི་འགྲོ་དོན་ཡིན། །ཅི་ཕྱིར་ཚུལ་མིན་ཐོ་ཅོ་ཅན། །ཡིན་ན་སྒོ་སྲུང་གནས་བདག་གིས། །སྲོག་གི་དབང་པོ་སྣུབ་པར་ངེས། །ཁྱད་པར་སྤོམ་ཎེ་རྡོ་རྗེ་ཡི། །བྲག་གི་ར་བའི་གནས་ཆེན་འདི། །གནས་སྒོ་འབྱེད་པའི་གང་ཟག་ནི། །སྔོན་ཚེ་ཨོ་རྒྱན་ཆེན་པོ་ཡིས། །གཏེར་ཁ་དུ་མར་ལུང་བསྟན་ཏེ། །སངས་རྒྱས་གླིང་པའི་བཀའ་ཐང་རྒྱས་པ་དང་། །ཨོ་རྒྱན་གླིང་པའི་བཀའ་ཐང་འབྲིང་པོ་གཉིས། །ཚིག་མཐུན་གཏེར་ཆེན་བཞི་བཅུ་ཞེ་དགུ་ཡིས། །རྫོགས་སོ་མི་འགྱུར་རྡོ་རྗེས་ལུང་བསྟན་ལ། །རྡོ་རྗེ་ནང་དམེ་དམ་འཁྲུག་བྱེད་པའི་ཡུལ། །གཙུག་གིས་བློ་གཏད་སྤྱི་ཡི་དཔོན་དུ་འགྱུར། །མཐུ་དང་ནང་འཁྲུག་དུག་ནད་དར་བའི་དུས། །རྟེན་དང་མཆོད་ཆ་རང་བྱོན་སྤྱི་འབྱམས་ཞེས་བྱའི་
གནས། །གཡས་ཀྱི་བྲག་དཀར་གནམ་འཕྱོང་གཏེར་ཁ་ནི། །མི་བཞག་འདོན་པའི་རྟགས་དེ་བསྟན་ནས་བླང་། །གཏེར་སྟོན་མི་འགྱུར་རྡོ་རྗེ་ཞེས་བྱ་འབྱུང་། །ཁམས་ཀྱི་ཕྱོགས་ཀྱི་གཏེར་ཁ་བརྒྱ་ལ་དབང་། །ཞེས་གསུངས་དེ་བཞིན་རྒྱལ་པོ་བཀའ་ཐང་ལས། །ཤཱཀྱའི་ཞིང་ཁམས་མདོ་ཁམས་ཞེས་པ་ན། །གསང་སྔགས་ཐེག་ཆེན་སྤྱོད་པའི་རྣལ་འབྱོར་པ། །སྔགས་ཀྱི་བདག་པོ་རྡོ་རྗེ་གྲགས་ཞེས་འབྱུང་། །དེ་ནས་འཕོས་ཏེ་སྤྱོད་པ་རླབས་ཆེན་མཛད། །སྟོང་གསུམ་འཇིག་རྟེན་འདི་ཡི་བྱང་ཕྱོགས་སུ། །ཞིང་ཁམས་རྣམ་དག་ཙནྡན་ནགས་ཞེས་སུ། །དེ་བཞིན་གཤེགས་པ་སྐྱེས་བུ་ཁ་ལོ་སྒྱུར། །བླ་མེད་སྟོན་པ་སུམ་སྟོང་འདུས་པ་འབྱུང་། །རྒྱལ་བ་ཡེ་ཤེས་ཀུན་བཟང་ཞེས་བྱ་འབྱུང་། །ཞེས་གསུངས་རཏྣ་གླིང་པའི་གཏེར་ཁ་ཡི། །གཏེར་ཁ་སྤྱི་ཡི་ལུང་བསྟན་འབྲིང་པོ་ནས། །ཆོས་དབྱིངས་རྡོ་རྗེའི་སྐུ་རིང་ལ། །གཏེར་སྟོན་མི་འགྱུར་རྡོ་རྗེ་འབྱོན། །གནས་མཆོག་དེ་ཡི་གཏེར་རྣམས་འབྱོན། །ཁམས་ཀྱི་གཏེར་ཁ་བརྒྱ་ལ་དབང་། །ཞེས་སམ་རཏྣ་གླིང་པའི་གཏེར་ཁ་ཡི། །ཆོས་ཀྱི་བརྒྱུད་པ་འཛིན་པ་ལུང་བསྟན་པ། །རྡོ་རྗེའི་མིང་ཅན་ངོམ་གྱི་ཕྱོགས་ནས་
འབྱུང་། །གཏེར་སྟོན་ཁྱོད་དང་རྟེན་འབྲེལ་འགྲིགས་པའམ། །འོན་ཏེ་ཡིན་ཀྱང་མ་འོངས་ཆོས་ལ་སྤྱོད། །ཅེས་གསུངས་བདུད་འདུལ་རྡོ་རྗེའི་གཏེར་ཁ་ནས། །ཤུད་བུ་དཔལ་སེང་བླ་མ་ཡབ་ཡུམ་གྱིས། །རིན་ཆེན་མཎྜལ་སྤྱི་བོའི་གཙུག་ཏུ་ཕོག །ཡི་དམ་ལྷ་དབང་རིག་པའི་རྩལ་དབང་ཐོབ། །མ་འོངས་མདོ་ཁམས་རི་ཆེན་ཉེ་བ་ན། །རྡོ་རྗེའི་མིང་འཛིན་ཁ་བྱང་འཛིན། །མཐོང་ཐོས་སྐྱེ་འགྲོ་ངན་སོང་མེད་པར་འགྱུར། །རྟེན་འབྲེལ་ལོག་པའི་དམ་སེལ་མ་བྱུང་ན། །ཟབ་གསང་ཆོས་ཀྱི་བདག་པོར་སྨོན་ལམ་རྒྱ་ཡིས་བཏབ། །ཅེས་གསུངས་གཏེར་ཁ་དུ་མར་ལུང་བསྟན་པའི། །སྤྲུལ་སྐུ་འདི་ཡི་ངོ་བོ་གང་ཞེ་ན། །ཉིད་ཀྱི་གནམ་ཆོས་ཐུགས་ཀྱི་གཏེར་ཁ་ནས། །བེ་རོ་ཙ་ནའི་སྐུ་ཡི་སྤྲུལ། །ཤུད་བུ་དཔལ་སེང་གསུང་གི་སྤྲུལ། །ལང་གྲོ་དཀོན་མཆོག་ཐུགས་ཀྱི་སྤྲུལ། །།སྣ་ནམ་ཡེ་ཤེས་ཡོན་ཏན་སྤྲུལ། །ཤྲཱི་བཛྲ་ཕྲིན་ལས་སྤྲུལ། །ཨོ་རྒྱན་ང་ཡི་སྤྲུལ་པ་ཡིན། །ཞེས་གསུངས་དོན་དང་མཐུན་པ་སྟེ། །དབང་དྲག་རྒྱ་མཚོའི་ཞལ་ཆེམས་ལས། །ང་ནི་འདི་ནས་ཚེ་འཕོས་ནས། །རི་བོ་ཆེ་དང་ཀརྨ་ཡི། །སྟེང་མཚམས་གཅིག་ཏུ་སྐྱེ་བ་ལེན། །གཏེར་སྟོན་མི་འགྱུར་རྡོ་རྗེ་
སྟེ། །གཏེར་དང་གནས་སྒོ་ཕྱེ་བར་གསུངས། །ལུང་བསྟན་དེ་དང་རྗེས་མཐུན་པར། །དང་པོ་དབང་དྲག་རྒྱ་མཚོ་དེ། །ཞིང་བརྗེས་དམྱལ་བའི་གནས་སུ་བྱོན། །འབྲེལ་ཐོགས་འགྲོ་བ་དཔག་མེད་པ། །དྲངས་ཚུལ་བར་དོའི་རྣམ་ཐར་ཡོད། །སྔོན་གྱི་གཏེར་ཁ་འགའ་རེ་ནས། །གཡོ་སྟོད་ཕྱོགས་སུ་འཁྲུངས་གསུངས་ལྟར། །དེ་རུ་སྐྱེ་བ་གཅིག་བླངས་ཀྱང་། །བར་ཆད་དབང་གིས་ཆུང་ངུ་ནས། སྐུ་གཤེགས་ཟངས་མདོག་དཔལ་རིར་བྱོན། །ཨོ་རྒྱན་ཆེན་པོས་དབང་བསྐུར་ནས། །བོད་ཀྱི་སེམས་ཅན་རྣམས་ཀྱི་དོན་དུ་བརྫོང་། །ཁམས་ཀྱི་གཏེར་དང་གནས་སྒོ་རྣམས། །ཕལ་ཆེར་ཁྱོད་ཀྱིས་དབང་བ་ཡིན། །ཁྱད་པར་སྤོམ་ཎེ་བྲག་ར་ཡི། །གནས་སྒོ་འབྱེད་པ་རེམ་རེམ་གསུངས། །ཕྱག་མཛུབ་ནས་འཇུས་གསུང་བསྒོས་མཛད། །དེ་ལྟར་བྱེད་པའི་དམ་བཅའ་ཕུལ། །དེ་ནས་སྔོན་གྱི་ལུང་བསྟན་ལྟར། །སྐུ་འཁྲུངས་རྟགས་དང་རྟེན་འབྲེལ་སོགས། །བྱུང་ཚུལ་རྣམ་ཐར་རྒྱས་པར་གསལ། །དགུང་ལོ་བཅུ་བཞི་གནམ་འཕྱང་ལོ། །ཐ་སྐར་ཟླ་བའི་དམར་པོའི་ཕྱོགས། །རྒྱལ་བ་ལྷ་ལས་བབ་པའི་དུས། །དུས་ཆེན་ཉིད་ལ་སྒོ་ཕྱེས་སོ། །འཇིག་རྟེན་སྲུང་མར་
བསང་མཆོད་བརྔན། །ཡེ་ཤེས་ལྷ་ལ་ཚོགས་མཆོད་ཕུལ། །དེ་ནས་ལྷ་ངོ་སྤྲད་པར་མཛད། །སྤྲད་ཚུལ་གནས་ཡིག་ཉིད་ལ་གསལ། །གནས་སྒོ་ཕྱེ་བའི་ལེའུ་སྟེ་གསུམ་པའོ།། ༈ །དེ་ནས་གནས་ཆེན་གནས་ཕྲན་འདི་རྣམས་བོད་དུ་ཡོད་ཚུལ་གྱི་ལུང་བསྟན་ནི། འདུལ་བ་ལུང་ལས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྱང་ཕྱོགས་གངས་རིའི་ཁྲོད་ན་ས་རྡོ་བེམ་པོས་ཀྱང་སེམས་ཀྱི་དོན་བྱེད་པ་ཡོད་དོ་ཞེས་གསུངས་པ་དང་། འཕགས་པ་གཤིན་རྗེའི་གཤེད་གསལ་ཤིང་རྒྱུད་ལས། ཉི་ཤུ་རྩ་བཞི་གནས་ཀྱི་མཆོག །ཉི་མ་བྱང་ཤར་མཚམས་ཤེད་ན། །འདི་ནས་རི་བོ་ནག་པོ་བཅུ་གསུམ་འདས་པ་ན། །གངས་རིའི་བསྐོར་བའི་ར་བ་ན། །རྡོ་རྗེ་ཕག་མོའི་དཀྱིལ་འཁོར་གནས། །ཞེས་གསུངས་པ་དང་། དུར་ཁྲོད་མངོན་འབྱུང་གི་རྒྱུད་ལས། ཀུན་དགའ་གཞོན་ནུའི་གྲོང་ཁྱེར་ན། །བདེ་གཤེགས་ཞི་ཁྲོའི་ཕོ་བྲང་གནས། །ཞེས་གསུངས་སོ། །།ཨོ་རྒྱན་ཆེན་པོའི་རྣམ་ཐར་གསེར་གྱི་ཕྲེང་བ་རཏྣ་གླིང་པའི་གཏེར་མ་ལས། མཆིམས་ཕུའི་སྣ་དྲངས་བོད་ཀྱི་ཡུལ་གནས་མ་ལུས་པ། གངས་རི་ཏི་སེ་མན་ཆད་ཁམས། ཙོང་ཁ།་ལྕིམ་བྲག །རྒྱ་ནག་རི་བོ་རྩེ་
ལྔ། གན་འཇང་། ཧུ་དང་ལི་ཡུལ། གྲུ་གུ་ཀོང་པོ་རྒྱ་ལ། མོན། སྟག་སྒོ། བུམ་ཐང་། སྤོམ་ཎེ་ལ་སོགས་ཐམས་ཅད་དུ། སྒྲུབ་གནས་གཏེར་སྒོ། ས་གཞི་ཐམས་ཅད་བྱིན་གྱིས་བརླབས་ཤིང་། འགྲོ་དོན་དཔག་ཏུ་མེད་ཅིང་ཐམས་ཅད་སྨིན་གྲོལ་ལ་བཀོད་དོ། །མཆོག་གི་སྒྲུབ་གནས་ལྔ། ངོ་མཚར་གྱི་གནས་མཆོག་ཉི་ཤུ་རྩ་ལྔ། གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས། དེ་ལ་སོགས་པ་རྣམས་སུ་མ་འོངས་མཐོང་ཐོས་དྲན་རེག་ཐམས་ཅད་གྲུབ་པ་ཐོབ་ཅིང་དངོས་གྲུབ་ཐོབ་པ་ནི་དཔག་ཏུ་མེད་པར་མཛད། ཅེས་གསུངས་པའི་ནང་ནས། སྤོམ་ཎེ་རྡོ་རྗེའི་བྲག་ར་ནི་ངོ་མཚར་བའི་གནས་མཆོག་ཉི་ཤུ་རྩ་ལྔའི་ཡ་རྒྱལ་བ་གཅིག་ལགས་སོ། །ཨོ་རྒྱན་ཆེན་པོའི་ལུང་བསྟན་བཀའ་རྒྱ་མ་སྤྲུལ་སྐུ་སངས་རྒྱས་གླིང་པའི་གཏེར་མ་ལས། དེ་བཞིན་གནས་དང་གནས་ཕྲན་ལ་སོགས་དང་། །ཡུལ་དང་ཡུལ་འདྲ་སྦས་པའི་ཡུལ་རྣམས་སུ། །བསྒྲུབས་པ་བྱས་པའི་ཡོན་ཏན་བསམ་མི་ཁྱབ། །ཕལ་པའི་གནས་སུ་ལོ་གཅིག་སྒྲུབ་པ་བས། །དེ་དག་རྣམས་སུ་ཞག་གཅིག་འགྲུབ་ཐག་ཉེ། །དེ་དོན་ཤེས་པར་མཛོད་ཅིག་རྗེས་འཇུག་རྣམས། །ལ་ལར་སངས་
རྒྱས་རྣམས་ཀྱི་སྤྲུལ་པ་ནི། །ས་རྡོ་རི་བྲག་ལམ་འཕྲང་ལ་སོགས་སུ། །སྐུ་གསུང་ཐུགས་ཀྱི་སྤྲུལ་པ་རང་བྱུང་འབྱོན། །དེ་མཐོང་ཐོས་དང་འབྲེལ་པ་ངན་སོང་མེད། །ཕྱོགས་ནི་མ་ངེས་ཕྱོགས་མཚམས་དབུས་ལ་སོགས། །ཉེ་རིང་མེད་ཕྱིར་ཀུན་ལ་འབྱོན་པར་འགྱུར། །དེ་བཞིན་དུས་ལ་ངེས་མེད་ནམ་ཡང་འབྱོན། །ཡུལ་ལ་ཚད་བཟུང་མེད་དེ་འཁོར་མཐའི་བར། །ཞེས་གསུངས་སོ། །དེས་ན་བཟོ་བོའི་ལག་གི་འདུ་བྱེད་ཀྱི་བཞེངས་མ་དགོས་པར། སངས་རྒྱས་རྣམས་ཀྱི་ཐུགས་རྗེ་དང་བྱིན་རླབས་ཀྱི་སྟོབས་ཀྱིས། རང་བྱུང་དུ་བྱོན་པའི་སྐུ་གཟུགས་དང་ཡིག་འབྲུ་དང་། མཆོད་རྟེན་དང་ལྷའི་ཕྱག་མཚན་ལ་སོགས་པ་འདི་རྣམས་དང་། ལྷ་དང་བཅས་པའི་འགྲོ་བ་ཐམས་ཅད་ཀྱིས་མཆོད་པར་འོས་པའི་རྟེན་མཆོག་ཏུ་གྱུར་པ་ཡིན་པས། །འདི་ལ་བསྐོར་བ་དང་ཕྱག་དང་མར་མེ་དང་ཚོགས་འཁོར་སོགས་བཀུར་བསྟི་བྱས་པའི་ཕན་ཡོན་ནི་དཔག་ཏུ་མེད་དེ། ཅུང་ཟད་ཙམ་ཡིད་ཆེས་ཕྱིར་ལུང་འདྲེན་པར་བྱའོ། །མཆོད་རྟེན་བསྐོར་བའི་ཚིགས་སུ་བཅད་པ་ལས། བཅོམ་ལྡན་ཤཱཀྱ་ཐུབ་པས་བཀའ་སྩལ་པ། མཆོད་རྟེན་བསྐོར་བ་བྱས་པ་ནི། །མི་ཁོམ་བརྒྱད་རྣམས་སྤངས་བར་འགྱུར། །མཆོད་རྟེན་བསྐོར་
བ་བྱས་པ་ནི། །དྲན་དང་ལྡན་ཞིང་བློ་གྲོས་ལྡན། །ཁ་དོག་ལྡན་ཞིང་མཛངས་པ་དང་། །ཐམས་ཅད་དུ་ནི་མཆོད་པར་འགྱུར། །མཆོད་རྟེན་བསྐོར་བ་བྱས་པ་ནི། །ལྷ་དང་དེ་བཞིན་མི་རྣམས་ཀྱིས། །ཚེ་རིང་པ་ཡང་དེ་ཡིས་ཐོབ། །གྲགས་པ་ཆེན་པོ་འཐོབ་པར་འགྱུར། །མཆོད་རྟེན་བསྐོར་བ་བྱས་ན་ནི། །འཛམ་བུ་གླིང་གི་རིགས་ཀྱི་མཆོག །ཆེ་རིགས་ཡོངས་སུ་དག་པ་དང་། །བློ་ལྡན་དུ་ཡང་སྐྱེ་བར་འགྱུར། །མཆོད་རྟེན་བསྐོར་བ་བྱས་ན་ནི། །ཁ་བཞིན་དག་ཀྱང་བཟང་བ་དང་། །མདོག་སྡུག་པ་དང་མཁས་པ་དང་། །བདེ་བར་གནས་པ་ཐོབ་པར་འགྱུར། །ཕྱུག་ཅིང་ནོར་ཡང་མང་བ་དང་། །སེར་སྣ་མེད་ཅིང་གཏོང་ཕོད་དང་། །སྦྱིན་པ་དག་ལ་དགའ་བར་འགྱུར། །ཡིད་དུ་འོང་ཞིང་ལྟ་ན་སྡུག །མདོག་བཟང་མཐོང་ན་དགའ་བ་དང་། །ལོངས་སྤྱོད་རྒྱ་ཆེན་ཐོབ་པར་འགྱུར། །མཆོད་རྟེན་བསྐོར་བ་བྱས་ན་ནི། །རྒྱལ་རིགས་མཆོག་ཏུ་སྐྱེ་བ་དང་། །བུ་སྨད་དང་ཡང་ལྡན་པ་དང་། །སྟོབས་དང་བརྩོན་འགྲུས་ལྡན་པར་འགྱུར། །མཆོད་རྟེན་བསྐོར་བ་བྱས་ན་ནི། །བྲམ་ཟེ་ཆེ་ཞིང་མཐོང་བ་དང་། །ཚུལ་ཁྲིམས་ལྡན་ཞིང་ཐོས་དང་ལྡན། །རིག་བྱེད་གསང་
སྔགས་ལྡན་པར་འགྱུར། །མཆོད་རྟེན་བསྐོར་བ་བྱས་ན་ནི། །ཁྱིམ་བདག་ཆེ་ཞིང་མཐོ་བར་སྐྱེ། །ཕྱུག་ཅིང་ནོར་ཡང་མང་བ་དང་། །ནོར་དང་འབྲུ་དང་ལྡན་པར་འགྱུར། །འཛམ་བུ་གླིང་གི་མངའ་བདག་རྗེ། །ས་སྟེང་མཐོ་དག་དབང་བྱེད་པའི། །ཆོས་དང་ལྡན་པའི་རྒྱལ་པོར་འགྱུར། །རིན་ཆེན་བདུན་དང་ལྡན་པ་ཡི། །འཁོར་ལོས་སྒྱུར་བའི་རྒྱལ་པོ་སྟེ། །ཆོས་བཞིན་འཁོར་ལོ་བསྐོར་བར་བྱེད། །མཆོད་རྟེན་བསྐོར་བ་བྱས་ན་ནི། །འདི་ནས་ཤི་འཕོས་མཐོ་རིས་འགྲོ། །སངས་རྒྱས་བསྟན་ལ་དགའ་བར་འགྱུར། །རྣལ་འབྱོར་ལྡན་ཞིང་རྫུ་འཕྲུལ་ཆེ། །མཆོད་རྟེན་བསྐོར་བ་བྱས་ན་ནི། །ཤ་ཟ་དང་ནི་གྲིབ་རྣམས་ཀྱིས། །དེ་ལ་གནོད་པར་མི་ནུས་སོ། །ལོངས་སྤྱོད་དག་ལ་སྐྱོན་མེད་སྤྱོད། །མཆོད་རྟེན་བསྐོར་བ་བྱས་ན་ནི། །བསྐལ་པ་བརྒྱར་ཡང་དེ་དག་རྣམས། །ཞར་བ་རྒུར་སོགས་ཡང་མི་འགྱུར། །ལུས་ཀྱང་རྣམ་པར་དག་པར་འགྱུར། །མཆོད་རྟེན་བསྐོར་བ་བྱས་ན་ནི། །མིག་ཀྱང་རྣམ་པ་དག་པ་དང་། །སྤྱན་རིང་མཐོན་མཐིང་སྡུག་པ་དང་། །ལྷ་ཡི་སྤྱན་ཡང་དེ་ཡིས་ཐོབ། །མཆོད་རྟེན་བསྐོར་བ་བྱས་ན་ནི། །སུམ་ཅུ་རྩ་གསུམ་དབང་ཕྱུག་རྗེ། །རྫུ་འཕྲུལ་ཆེ་བའི་
བརྒྱ་བྱིན་དང་། །ལྷ་ཡི་དབང་པོ་ཆེན་པོར་འགྱུར། །མཆོད་རྟེན་བསྐོར་བ་བྱས་ན་ནི། །མཐའ་བྲལ་ལྷ་ཡི་རྒྱལ་པོ་དང་། །དེ་བཞིན་ཡོངས་སུ་དགའ་ལྡན་དང་། །འཕྲུལ་དགའ་གཞན་འཕྲུལ་དབང་བྱེད་འགྱུར། །མཆོད་རྟེན་བསྐོར་བ་བྱས་ན་ནི། །ཚངས་པའི་འཇིག་རྟེན་ཚངས་པ་ཡི། །དབང་པོ་ཉིད་དུ་དེ་འགྱུར་ཞིང་། །ལྷ་རྣམས་བྱེ་བ་སྟོང་གིས་མཆོད། །མཆོད་རྟེན་བསྐོར་བ་བྱས་ན་ནི། །དྲན་པ་ཉེ་བར་བཞག་པ་བཞིན། །སེམས་ཅན་ཚད་མེད་བཞི་པོ་དང་། །རྫུ་འཕྲུལ་རྐང་པ་བཞི་ཡང་ཐོབ། །འཕགས་པའི་བདེན་པ་བཞི་པོ་དང་། །བྱང་ཆུབ་ཡན་ལག་འབྲས་བུ་ཐོབ། །མངོན་ཤེས་དྲུག་ལྡན་ཟག་མེད་པ། །ཉོན་མོངས་ཐམས་ཅད་སྤང་བ་ཡིས། །དགྲ་བཅོམ་རྫུ་འཕྲུལ་ཆེན་པོར་འགྱུར། །འདོད་ཆགས་ཐམས་ཅད་སྤངས་བ་དང་། །འཁོར་བ་ཐམས་ཅད་སྤོང་བ་ཡིས། །རང་རྒྱལ་བྱང་ཆུབ་ཐོབ་པར་འགྱུར། །འཇིག་རྟེན་དག་ཏུ་དེ་བཞིན་གཤེགས། །མཚན་རྣམས་ཀྱིས་ནི་བརྒྱན་པ་དང་། །གསེར་གྱི་སྐུ་མདོག་ཐོབ་པར་འགྱུར། །ཞེས་སོགས་དང་། མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་གོམ་པ་གཅིག་
བོར་བའི། །འཛམ་བུ་ཆུ་ཀླུང་གསེར་སྲང་འབུམ་གྲངས་རྙེད། །དེ་ནི་དེ་དང་མཚུངས་པ་ཡོད་མ་ཡིན། །མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་གོམ་པ་གཅིག་བོར་བའི། །འཛམ་བུ་ཆུ་ཟླ་གསེར་གྱི་ཕ་ཝང་འབུམ། །དེ་ནི་དེ་དང་མཚུངས་པ་ཡོད་མ་ཡིན། །ཞེས་སོགས་གསུངས་པ་དང་། རྒྱལ་པོ་གསལ་རྒྱལ་གྱིས་ཞུས་པའི་མདོ་ལས། སུ་དག་དད་པ་ཐོབ་པའི་མཆོད་རྟེན་ནམ། །སྐུ་གཟུགས་གང་ལ་སྐོར་བ་བྱེད་པ་དང་། །ཕྱི་མའི་དུས་ན་དགེ་འདུན་རྣམས་ཀྱི་རྒྱུད།། །བཟང་པོའི་སྣོད་གྱུར་ཡོན་ཏན་རྣམས་དང་ལྡན། །ཞེས་དང་། འཕགས་པ་སྤྱན་རས་གཟིགས་ཀྱི་མདོ་ལས། སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །འཇིག་རྟེན་མགོན་གྱི་མཆོད་རྟེན་ལ། །སུ་ཞིག་བསྐོར་བ་བྱས་ན་ནི། །སྐྱེ་བ་དག་ནི་ཐམས་ཅད་དུ། །བྱང་ཆུབ་སངས་རྒྱས་སྤྱོད་པའི་ཚེ། །དྲན་དང་ལྡན་ཞིང་བློ་གྲོས་ལྡན། །བསོད་ནམས་ལྡན་ཞིང་འཇིགས་མེད་འགྱུར། །ཞེས་དང་། འཇིག་རྟེན་མགོན་གྱི་མཆོད་རྟེན་ལ། །མི་གང་སྐོར་བ་བྱེད་པ་ཡི། །བསྔགས་པ་བསྐལ་པ་བྱེ་བར་ཡང་། །བརྗོད་པས་ཟད་པར་བྱ་མི་
ནུས། །ཞེས་དང་། མཆོད་རྟེན་བསྐོར་བ་བྱས་ན་ནི། །བརྩོན་འགྲུས་བརྟན་ཞིང་མཐུ་བརྟན་ལ། །བརྟན་ཞིང་རྣམ་པར་སྟོན་བརྟན་དང་། །དེས་ནི་མྱུར་དུ་མཁས་པར་འགྱུར། །ཞེས་སོགས་བཅོམ་ལྡན་འདས་ཀྱིས་བསྐོར་བའི་ཕན་ཡོན་མཐའ་ཡས་པ་གསུངས་པའི་ཕྱིར་བསྐོར་བ་བཅུ་གསུམ་དུང་ཕྱུར་དང་མཉམ་པའོ། །དེ་ཡང་ཕལ་པ་རྣམས་བསྐོར་བ་སུམ་བརྒྱ་དྲུག་ཅུ་བྱས་པ་དང་། ཨོ་རྒྱན་རིན་པོ་ཆེས་བྱིན་གྱིས་རླབས་པའི་གནས་སུ་བསྐོར་བ་གཅིག་བྱས་པ་ཕན་ཡོན་མཉམ་པ་གུ་རུ་རིན་པོ་ཆེ་ཉིད་ཀྱིས་གསུངས་པའི་གོང་གི་ལུང་གིས་གྲུབ་པའོ། །ཁྱད་པར་གནས་འདི་མཇལ་ཞིང་ཕྱག་འཚལ་མཆོད་བསྟོད་བྱས་ན་ཚེ་རིང་བ་དང་ཚེའི་བར་ཆད་ཟློག་པ་སོགས་ཕན་ཡོན་དཔག་ཏུ་མེད་ཅིང་བསམ་གྱིས་མི་ཁྱབ་པར་གསུངས་པ་ནི། འདི་ཉིད་ཚེ་དཔག་མེད་གསུང་གི་གནས་ཡིན་པའི་ཕྱིར། དེ་བཞིན་ཕྱག་འཚལ་བ་དང་མཆོད་བསྟོད་བྱས་པའི་ཕན་ཡོན་ཡང་། འཕགས་པ་སྤྱན་རས་གཟིགས་ཀྱི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། །ངས་ནི་གང་དག་བསྟན་པ་ཡིས། །མི་ཁོམ་བརྒྱད་པོ་དེ་དག་སྤོངས། །སངས་རྒྱས་འབྱུང་བ་རབ་མཛེས་པ། །མཉེས་པར་བྱེད་
འདི་དལ་བ་ཞིག །མདོག་ལྡན་གཟུགས་ནི་ཕུན་སུམ་ཚོགས། །མཚན་གྱིས་ལེགས་པར་བརྒྱན་པ་དང་། །མཐུ་དང་སྟོབས་དང་ལྡན་པར་འགྱུར། །ལེ་ལོ་ཅན་དུ་དེ་མི་འགྱུར། །དེ་ནི་ཕྱུག་ཅིང་ནོར་འཕེལ་འགྱུར། །བསོད་ནམས་ལྡན་ཞིང་རྫི་བ་མེད། །འཇིག་རྟེན་སྒྲོན་མ་མཉེས་བྱས་ནས། །ཡང་དང་ཡང་དུ་བསྟི་སྟང་བྱེད། །ཚོང་དཔོན་ཁྱིམ་དང་རྒྱལ་པོ་དང་། །ཕྱུག་པོ་རྣམས་སུ་སྐྱེ་བར་འགྱུར། །དཔའ་ཞིང་སྦྱིན་པའི་བདག་པོར་འགྱུར། །གཏོང་བ་གཏོང་ཞིང་སེར་སྣ་མེད། །རིས་བསྐོར་རྒྱ་མཚོ་ཚུན་ཆད་ཀྱི། །ས་ཀུན་ལ་ནི་གང་ཟློསྟོན་པ། །གླིང་བཞི་དག་གི་དབང་ཕྱུག་བླ། །རྒྱལ་པོ་ཆོས་དང་ལྡན་པར་འགྱུར། །འཁོར་ལོས་སྒྱུར་བ་རྫུ་འཕྲུལ་ཆེ། །རིན་ཆེན་བདུན་དང་ལྡན་པར་འགྱུར། །རྒྱལ་སྲིད་གནས་ནས་སངས་རྒྱས་ལོ། །ཡང་དང་ཡང་དུ་བསྟི་སྟང་བྱེད། །འདི་ནས་ཤི་འཕོས་མཐོ་རིས་སུ། །སོང་ནས་སངས་རྒྱས་བསྟན་ལ་དད། །ལྷུན་པོ་ཟོམ་གྱི་དབང་ཕྱུག་པོ། །ལྷ་ཡི་དབང་པོ་བརྒྱ་བྱིན་འགྱུར། །ཞེས་དང་། གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ། །བསྐལ་པ་བྱེ་བ་བརྒྱ་སྟོང་བསྟི་སྟང་བྱེད་པ་བས། །གང་ཞིག་ཕྱི་དུས་མི་ཟད་བསྐལ་པ་འདི་ལ་
ནི། །མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ། །ཞེས་གསུངས་སོ། །མར་མེ་ཕུལ་བའི་ཕན་ཡོན་ཡང་། མདོ་དེ་ཉིད་ལས། སངས་རྒྱས་མཆོད་རྟེན་མར་མེ་གཅིག་ཕུལ་ན། །འདི་ནས་བཟུང་སྟེ་སྲིད་པའི་རྩེ་མོའི་བར། །སངས་རྒྱས་ཞིང་གི་འཛམ་གླིང་གསེར་གྱིས་གང་། །དེ་འདྲའི་དཔའ་དེ་ཟད་པར་བྱ་མི་ནུས། །བཅོམ་ལྡན་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ནི་མདོག་ངན་ཡོངས་མི་འགྱུར། །གཟུགས་མཆོག་སྲ་ཞིང་ལག་པ་གཟུ་བ་འདྲ། །སྣང་བ་ཐོབ་ནས་འཇིག་རྟེན་ཀུན་ཏུ་ཡང་། །གལ་ཏེ་ཁྲག་ཁྲིག་བརྒྱ་སྟོང་སངས་རྒྱས་ཞིང་། །ཡུངས་འབྲུ་དག་གིས་ཕྱུར་བུར་གང་གྱུར་པ། །བགྲང་བ་དང་ནི་གཞལ་ཞིང་བརྗོད་པར་ནུས། །བདེ་གཤེགས་མར་མེ་གཅིག་ཕུལ་དེ་zལྟར་མིན། །ཞེས་དང་། མར་མེ་འབུལ་བ་ཞེས་པའི་མདོ་ལས། མར་མེ་ཕུལ་བའི་རྣམ་སྨིན་འདི་ཡིན་ཏེ། །འཆི་དུས་བྱེད་ཚེ་དྲན་པ་ཉམས་མི་འགྱུར། །དེ་ལ་ཕྱོགས་རྣམས་སྣང་ཟློབར་བྱེད་པར་འགྱུར། །སྔོན་ཆད་མ་མཐོང་གཟུགས་བཟང་རྣམས་ཀྱང་མཐོང་། །དེ་ནས་ཤི་འཕོས་མཐོ་རིས་ངེས་འགྲོ་ཞིང་། །ལྷ་ཡི་སྟན་ལ་དེ་ལུས་འདུག་པ་ཤེས། །ཞེས་གསུངས་
སོ། །བདེ་བར་གཤེགས་པའི་མཆོད་རྟེན་རང་བྱོན་དུ་ཡོད་པའི་གནས་བཟང་པོ་འདི་ལྟ་བུ་ལ། དར་ལྕོག་བཙུགས་པའི་ཕན་ཡོན་ཡང་འཕགས་པ་སྤྱན་རས་གཟིགས་ཀྱི་མདོ་ལས། འཇིག་རྟེན་མགོན་པོ་སྐྱོབ་པ་ལ། །དར་གྱི་དབུལ་བ་ཕུལ་བྱས་ནས། །ལྷ་ཡི་དག་དང་མི་རྣམས་ཀྱིས། །དོན་རྣམས་ཐམས་ཅད་འགྲུབ་པར་འགྱུར། །ཞེས་དང་། འཇིག་རྟེན་འགྱུར་ཞེས་མོས་བསྐྱེད་དེ། །བཅོམ་ལྡན་མཆོད་རྟེན་བ་དན་ཕུལ་བྱས་ན། །དེ་ནི་སྐྱེ་བོ་མང་པོས་མཆོད་འོས་འགྱུར། །ཞེས་དང་གསང་སྔགས་རྙིང་མ་མདོ་དགོངས་འདུས་ཞེས་བྱ་བ་ལས། རླུང་རྟ་དར་བར་བྱེད་པའི་མཆོག །དར་ཤིང་རི་རབ་ལྷུན་པོར་བསྒོམ། །ཞེས་སོགས་དར་ཅོག་བྱ་ཐབས་རྒྱས་པར་གསུངས་ཤིང་། དུག་ཤིང་མིན་པའི་དར་ཤིང་ལ། །དྲི་མེད་དར་ལ་གཟུངས་སྔགས་བྲི། །རི་མཐོ་དགོན་གནས་གྲོང་ཡུལ་དང་། །ཚོང་དུས་མི་མང་འདུ་སར་བཙུགས། །བདེ་བ་ལྡན་ཞིང་སྡུག་བསྔལ་བྲལ། །རླུང་རྟ་བསྐྱེད་ཅིང་བསོད་ནམས་ལྡན། །རླུང་གིས་གང་ཕོག་སེམས་ཅན་ཀུན། །གཟུངས་སྔགས་དེ་ཡིས་ཞིང་དུ་སྐྱེ། །འདི་ཡི་ཕན་ཡོན་བརྗོད་མི་ལང་། །འབད་པར་རིགས་སོ་ས་མ་ཡ། །ཞེས་གསུངས་
པས་དར་ཅོག་ཕུལ་ན། རླུང་རྟ་དར་ཞིང་བསོད་ནམས་སྐྱེའོ། །ས་གཞན་དུ་དར་ཅོག་སུམ་བརྒྱ་དྲུག་ཅུ་བཙུགས་པ་དང་། གནས་འདིར་དར་ཅོག་གཅིག་བཙུགས་པ་ཕན་ཡོན་མཉམ་མོ། །དེ་བཞིན་དུ་ཚོགས་མཆོད་ལ་སོགས་པ་ཡང་གཞན་དུ་བྱས་པ་བས་གནས་བཟང་པོ་འདི་ལྟར་བུར་བྱས་ན་ཕན་ཡོན་ཆེ་སྟེ། དཔའ་བོ་ཌཱ་ཀི་རང་བཞིན་གྱིས་འདུ་བའི་གནས་ཡིན་ནོ། །དེ་ནས་གནས་འདི་ལ་རང་བྱོན་ངོ་མཚར་ཅན་ཡོད་ཚུལ་སྤྲུལ་སྐུའི་གསུངས་པའི་གནས་ཡིག་ཚིགས་སུ་བཅད་དེ་བརྗོད་པར་བྱ་སྟེ། ༈ ཨེ་མ་ངོ་མཚར་རྨད་དུ་བྱུང་། །ཆོས་སྐུ་ཀུན་ཁྱབ་སྣང་མཐའ་ཡས། །ལོངས་སྐུ་འགྲོ་འདུལ་སྤྱན་རས་གཟིགས། །སྤྲུལ་སྐུ་པད་འབྱུང་འགྲོ་བའི་མགོན། །སྐུ་གསུམ་བླ་མའི་ཕྲིན་ལས་ལ། །ཤཱཀྱའི་རྒྱལ་པོས་ལུང་བསྟན་པའི། །བོད་ཡུལ་ཁ་བ་ཅན་གྱི་ཡུལ། །ཐུགས་རྗེ་ཆེན་པོས་ཞིང་ཁམས་ན། །སྐུ་གསུང་ཐུགས་ཀྱི་གནས་གསུམ་ཡོད། །ཕྲིན་ལས་བཞི་ཡི་གནས་བཞི་ཡོད། །མཆོག་གི་གནས་ཆེན་རྣམ་ལྔ་ཡོད། །གྲུབ་པ་ཐོབ་པའི་གནས་བརྒྱད་ཡོད། །ངོ་མཚར་གནས་མཆོག་ཉེར་ལྔ་ཡོད། །གནས་ཆེན་བརྒྱ་དང་རྩ་བརྒྱད་ཡོད། །གནས་ཕྲན་སྟོང་དང་རྩ་
གཉིས་ཡོད། །གནས་ནི་དེ་དག་ཐམས་ཅད་ལ། །དགེ་བའི་ལས་ནི་གང་བྱས་པ། །འགྱུར་ནི་སུམ་བརྒྱ་དྲུག་ཅུ་ཡོད། །ངོ་མཚར་གནས་མཆོག་ཉེར་ལྔ་ལགས། །སྤོམ་ཎེ་རྡོ་རྗེའི་བྲག་ར་ན། །མདུན་རི་མཆོད་པ་སྤུངས་འདྲ་ཡོད། །གཡས་རི་རྟ་མཆོག་འདྲ་བ་ཡོད། །རྒྱབ་རི་གླང་ཆེན་འགྱིང་འདྲ་ཡོད། །གཡོན་རི་ནམ་མཁའ་བཏེག་འདྲ་ཡོད། །ཕུག་པ་སེར་པོ་གྲུ་བཞི་ཡོད། །དེ་གཉའ་ལྷོ་སྤྲིན་དམར་པོ་ཡོད། །འོག་ན་ཚ་ཚ་དམར་པོ་གཉིས། །ཕུག་སྒོ་རྨ་བྱའི་གདན་ཁྲི་ཡོད། །སྒོ་སྲུང་བྱ་རོག་གདོང་ཅན་ཡོད། །པདྨ་སཾ་བྷའི་དབུ་ཞྭའི་རྗེས། །མཁའ་འགྲོ་མ་ཡི་འཐེན་གླུ་ཡོད། །ཚེ་དཔག་མེད་ཀྱི་སྤྱན་གཟུགས་དང་། །མཚོ་རྒྱལ་དབུ་ཞྭའི་རྗེས་ཀྱང་ཡོད། །ཨོ་རྒྱན་ཕྱག་མཛུབ་བཙུགས་རྗེས་ཡོད། །ལྷ་མི་གཉིས་ཀྱི་གནས་མཇལ་བའི། །སྒོ་ནི་ཆེ་ཆུང་གཉིས་ཀྱང་ཡོད། །འཇིགས་བྱེད་མེ་ཡི་སྤུ་གྲི་ཡོད། །སྒོ་སྲུང་ཧ་ས་གཅུ་ཡོད། །བཀའ་ཡི་སྲུང་མ་ཀླུ་འདུལ་གྱིས། །སྦྲུལ་དང་སྦལ་པ་མནན་ས་ཡོད། །བྱ་རོག་ཆེན་པོའི་ཡ་མཆུ་དང་། །ལས་མགོན་བྱ་རོག་གདོང་ཅན་ཡོད། །ལྷ་མོ་རྩ་འཇིབ་དམར་མོ་ཡོད། །རྒྱ་མཚོ་གསེར་གྱི་རུས་སྦལ་ཡོད། །ཨོ་རྒྱན་སེང་གེ་ཆིབས་
བྱོན་པའི། །སེང་གེའི་ལག་གཉིས་རྗེས་ཀྱང་ཡོད། །ཕྱག་གི་རྡོ་རྗེའི་རྗེས་ཀྱང་ཡོད། །གུ་རུ་དྲག་པོའི་སྐུ་རྗེས་ཡོད། །ལྷ་ཡི་ཡུལ་ནས་གདན་དྲངས་པའི། །གསེར་གྱི་ལྷ་ལུག་གཟུགས་ཀྱང་ཡོད། །བར་དོར་བསྒྲོད་པའི་འཕྲང་ཡང་ཡོད། །མཁའ་འགྲོའི་དར་ཐག་འཐེན་ས་ཡོད། །མཁའ་འགྲོ་མ་ཡི་དབུ་རྒྱན་ཡོད། །རུས་སྦལ་ཕྲག་ལ་འཕྱང་བ་ཡོད། །སེང་གེ་ཕྱི་ལྟས་བྱས་པ་ཡོད། །དུང་དཀར་གྱེན་དུ་འགྲོ་བ་ཡོད། །ཟེར་ཆེན་ཉ་མོ་ཐུར་རྒྱུག་ཡོད། །མཁའ་འགྲོ་གཡུ་ཕྱེ་མཆོད་ས་ཡོད། །ཨོ་རྒྱན་གུ་རུའི་ཕྱག་གཉིས་ཀྱིས། །ཕུག་པ་བརྒྱངས་བའི་རྗེས་ཀྱང་ཡོད། །ཀླུ་ཡི་ནོར་བུ་མིག་གསུམ་ཡོད། །མཁའ་འགྲོ་རིགས་བཞིའི་ཀ་བ་ཡོད། །ཚེ་དཔག་མེད་ཀྱི་ཚེ་བུམ་ནས། །བདུད་རྩི་ཡར་ལ་ཕྱུར་བ་ཡོད། །ལྷ་མོ་སྒྲོལ་མའི་རྣ་རྒྱན་ཡོད། །འཕགས་པ་ཕྱག་སྟོང་སྤྱན་སྟོང་ཡོད། །མཁའ་འགྲོ་རིགས་བཞིའི་ནུ་མ་ཡོད། །སྲིན་པོའི་གྲོང་ཁྱེར་གཟུགས་ཀྱང་ཡོད། །རང་བྱོན་མཆོད་རྟེན་སྟོང་རྩ་ཡོད། །ཕྱག་རྡོར་དབུ་ཡི་འདྲ་དཔེ་ཡོད། །མཐའ་ཡི་རྒྱ་མཚོའི་གཟུགས་ཀྱང་ཡོད། །ཐུབ་པ་ལྷ་སྦྱིན་རྩལ་འདྲེན་པའི། །གླང་ཆེན་གཉིས་ཀྱི་གཟུགས་ཀྱང་
ཡོད། །ཐུབ་པས་དཀའ་ཐུབ་མཛད་པ་ཡོད། །ཚེམས་ཤིང་གཉིས་དང་ཆུ་གཉིས་ཡོད། །མཆོད་རྟེན་རྣམ་དག་དྲུང་དུ་ནི། །དབུ་སྐྲ་བསིལ་བའི་ཚུལ་ཡང་ཡོད། །ལུམ་བི་ཚལ་དུ་སྐུ་འཁྲུངས་ཡོད། །ལྷུམས་སུ་སེམས་ཅན་ཆོས་སྟོན་གཟུགས། །གླང་ཆེན་ཐལ་དཀར་གཟུགས་ཀྱིས་ནི། །ལྷ་ལས་བབས་པའི་ཚུལ་ཀྱང་ཡོད། །རིལ་བ་བུམ་པའི་མཆོད་རྟེན་ཡོད། །གྲོང་ཁྱེར་སེར་སྐྱའི་སྒོ་སྲུང་དུ། །སྤྲིན་གྱི་གསེབ་ནས་བྱོན་ས་ཡོད། །བཙུན་མོ་རྣམས་ཀྱི་སྐུ་གཟུགས་དང་། །བྱང་ཆུབ་ཤིང་དྲུང་སངས་རྒྱས་ཤིང་། །བདུད་བཏུལ་བ་ཡི་བཀོད་པ་ཡོད། །འདུས་པ་རྣམས་ལ་ཆོས་འཁོར་བསྐོར། །སྤྲེའུས་སྦྲང་རྩི་ཕུལ་བ་ཡོད། །ཐུབ་པ་གནས་བཅུས་བསྐོར་བ་དང་། །རྒྱལ་པོ་ཆེན་པོ་སྡེ་བཞི་ཡོད། །སངས་རྒྱས་ཞིང་ཁམས་སྟོང་རྩ་ཡོད། །འཇམ་དཔའི་དབྱངས་དང་རྟ་མགྲིན་དང་། །ཕྱག་ན་རྡོ་རྗེའི་སྐུ་ཡང་ཡོད། །སངས་རྒྱས་བྱང་སེམས་སྟོང་རྩ་ནི། །བྲག་རྣམས་ཀུན་ལ་ཚོན་པ་ཡོད། །མ་ནིང་ཛོ་ལྷ་ནག་པོའི་སྐུ། །དུང་དཀར་ཡུངས་དཀར་དཱར་བ་དང་། །གྷི་ཝང་མེ་ལོང་བིལ་བ་དང་། །ཞོ་དང་ལི་ཁྲི་ཕུལ་བ་ཡོད། །རྟ་མགྲིན་རྒྱལ་པོའི་དབྱུག་ཐོ་དང་། །གཤིན་རྗེ་གཤེད་
ཀྱི་དབྱུག་ཐོ་ཡོད། །སྨན་ལྷ་ཁྲི་དང་རྒྱབ་ཡོལ་བཅས། །ཤཱཀ་ཐུབ་གཙོ་འཁོར་གསུམ་པོ་ཡོད། །བྱང་ཆུབ་ཆེན་པོའི་མཆོད་རྟེན་བརྒྱད། །ལྷ་ཀླུ་མི་ཡིས་མཆོད་པ་ཡོད། །གཞན་ཡང་མཆོད་རྟེན་རྣམ་གསུམ་ཡོད། །རྗེ་བཙུན་སྒྲོལ་མའི་རྣ་རྒྱན་ཡོད། །མཆོད་པ་སྣ་ཚོགས་སྤུངས་པ་ཡོད། །རིན་པོ་ཆེ་ཡི་སྲོག་ཞུ་ཡོད། །རིག་འཛིན་ལྔ་ཡི་སྐུ་ཡང་ཡོད། །ཀུན་ཏུ་བཟང་པོའི་བཞུགས་ཁྲི་ཡོད། །ཚེ་དཔག་མེད་ཀྱི་བཞུགས་ཁྲི་ཡོད། །གོས་དཀར་མོ་ཡི་བཞུགས་ཁྲི་ཡོད། །ཨོ་རྒྱན་པདྨའི་བཞུགས་ཁྲི་ཡོད། །སྐུ་གསུང་ཐུགས་ཀྱི་མཆོད་རྟེན་གསུམ། །ཨོཾ་ཨཱཧཱུྃ་གི་ནང་གཞུག་ཡོད། །ལོངས་སྐུ་རྣམ་པར་སྣང་མཛད་ཡོད། །ཁྲོ་རྒྱལ་མི་གཡོ་མགོན་པོ་ཡོད། །ཚ་ཚ་མཆོད་རྟེན་བརྒྱད་མ་ཡོད། །ཚེ་དཔག་མེད་ཀྱི་རྒྱབ་ཡོལ་ཡོད། །དུར་ཁྲོད་བདག་པོའི་དབུ་དཔེ་ཡོད། །བཅུ་གཅིག་ཞལ་གྱི་མཚོན་བྱེད་ཡོད། །མཁའ་འགྲོ་མ་ཡི་ཚོགས་ཀྱང་ཡོད། །ཚེ་དཔག་མེད་ཀྱི་སྐུ་ཡང་ཡོད། །མཁའ་འགྲོ་མ་ཡི་འོ་རྒྱུན་ཡོད། །བདུད་ཀྱི་མཆོད་རྟེན་མགོ་ཐུར་ཡོད། །མཁའ་འགྲོ་བྲན་མོའི་ཚོགས་ཀྱང་ཡོད། །ཨོ་རྒྱན་རབ་གནས་མཐོར་བ་ཡོད། །ཐུབ་པ་དང་ནི་ཀུན་དགའ་བོར། །
མཆོད་རྟེན་བརྒྱད་ཀྱིས་བསྐོར་བ་ཡོད། །ཕྱག་ན་རྡོ་རྗེའི་ཞབས་རྗེས་ཡོད། །ཨོ་རྒྱན་བྱ་རྒོད་ཆིབས་པ་ཡི། །གཤོག་པའི་འདྲ་དཔེ་གསལ་པོར་ཡོད། །མཁའ་འགྲོ་མ་ཡི་གཏོར་གསོས་ཡོད། །མཁའ་འགྲོའི་ཚོགས་ཕུད་བླངས་རྗེས་ཡོད། །ཁྲོ་བཅུའི་ཐོད་སྐམ་དབུ་རྒྱན་ཡོད། །གྲི་བཙན་འདུལ་བ་བྱེད་པ་ཡིས། །མཆོད་རྟེན་འབུར་མང་ཞེས་བྱ་ཡོད། །བཀའ་སྲུང་འབུར་མང་ཞེས་བྱ་ཡོད། །ཚངས་པ་དང་ནི་མཁའ་འགྲོ་མས། །མཆོད་རྟེན་བསྐོར་ལམ་བྱས་ན་ཡང་། །མཆོད་རྟེན་གནམ་བཏེག་ནང་ཚུད་པས། །ལམ་མོ་བཏོད་པའི་གཟུགས་ཀྱང་ཡོད། །ལྷ་ཆེན་ཚངས་པའི་གཟིགས་སྐར་དང་། །པདྨ་འདབ་སྟོང་སྟོང་ཡང་ཡོད། །མཁའ་འགྲོ་མ་ཡིས་གཟིགས་སྐར་ཡོད། །མཆོད་རྟེན་སྣང་བ་མཐའ་ཡས་ཡོད། །མཆོད་རྟེན་མཐོང་བ་བཟང་པོ་ཡོད། །མཆོད་རྟེན་གནམ་བཏེག་ཅེས་བྱ་ཡོད། །རྒྱ་མཚོ་ཆུ་ཡི་འཁྱིལ་ཡང་ཡོད། །ཚེ་དཔག་མེད་ཀྱི་བརྙན་གཟུགས་ཡོད། །མཁའ་འགྲོ་རྡོ་ཡི་ཕོ་བྲང་ལས། །རྡོ་ཡི་ཀ་བ་བརྒྱན་པ་ཡོད། །མེ་ཏོག་ཆུ་སྐྱེས་མང་པོ་ཡོད། །རྣམ་པར་སྣང་མཛད་ཕྱག་བྲིས་ཡོད། །མེ་ཏོག་འདབ་ལྡན་རྗེས་ཀྱང་ཡོད། །ཆེ་དཔག་མེད་ཀྱི་དབུ་རྒྱན་
ལ། །རིན་ཆེན་ཕྲ་ཡིས་བརྒྱན་པ་ཡོད། །ཚེ་དཔག་མེད་ཀྱི་བཞུགས་ས་ཡོད། །མཆོད་རྟེན་མ་རིག་མུན་བསལ་ཡོད། །རྣམ་སྲས་མདུང་དམར་མདུང་ཡུའི་རྗེས། །བཅོམ་ལྡན་རྡོ་རྗེ་སེམས་དཔའི་སྐུ། །གླང་ཆེན་ལངས་ནས་ཁྲི་བཏེག་གཟུགས། །དེ་ཡི་རྒྱུད་དུ་སྐྱེས་བུ་ནི། །ལས་ཅན་མཇལ་དུ་འགྲོ་ཚུལ་ཡོད། །དཔག་བསམ་ལྗོན་ཤིང་གཟུགས་ཀྱང་ཡོད། །ཤང་པ་ལྷ་མགོན་རྔ་གཤང་ཡོད། །ཨཧྥེ་ར་ཙའི་ཕྲེང་བ་ཡོད། །གཞན་ཡང་མཆོད་རྟེན་མང་པོ་ཡོད། །གོས་དཀར་ལྷ་མོའི་གསང་བ་ཡོད། །ཤིང་ཏོག་བི་ཛོ་པུ་རི་ཡོད། །དེ་ལྟར་རང་བྱོན་ཡོད་པ་རྣམས། །བཅག་དང་འཁྱེར་བ་མི་རུང་སྟེ། །བཀའ་སྲུང་རྣམས་ཀྱིས་ར་མདའ་ཡོད། །དེ་ནས་བསྐོར་བའི་མན་ངག་བཤད། །ཕུག་པ་བྲག་རི་དང་བཅས་པ། །རིན་ཆེན་གཞལ་ཡས་རྒྱ་ཆེའི་ནང་། །གཙོ་བོ་ཚེ་དཔག་མེད་པ་ལ། །སངས་རྒྱས་བྱང་སེམས་དཔག་མེད་ལ། །བསྐོར་བ་དམ་ཡེ་དབྱེར་མེད་བཞུགས། །ཕ་མས་གཙོར་བྱས་སེམས་ཅན་ཀུན། །རང་གིས་ཁྲིད་ནས་བསྐོར་བར་དམིགས། །ལྷ་ཚོགས་རྣམས་ལས་འོད་ཟེར་འཕྲོས། །བདག་དང་སེམས་ཅན་ཀུན་ལ་ཐིམ། །སྡིག་སྒྲིབ་ཚེ་ཡི་
བར་ཆད་ཞི། །ཚོགས་གཉིས་བསོད་ནམས་རྒྱས་པར་བསྒོམ། །དེ་ནས་གསོལ་འདེབས་བྱེད་འདོད་ན། ༈ ན་མོ་གུ་རུ་སིདྡྷི་ཧཱུྃ། གནས་ནུབ་ཕྱོགས་བདེ་ཆེན་ཞིང་ཁམས་དང་། །དོན་དབྱེར་མེད་རྡོ་རྗེའི་བྲག་ར་ནས། །ལྷ་སྣང་བ་མཐའ་ཡས་ཚེ་དཔག་མེད། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་ལྷོ་ཕྱོགས་རི་བོ་གྲུ་འཛིན་དང་། །དོན་དབྱེར་མེད་སྤོམ་ཎེའི་བྲག་ར་ན། །ལྷ་ཐུགས་རྗེ་ཆེན་པོ་སྤྱན་རས་གཟིགས། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་ལྷོ་ནུབ་ཟངས་མདོག་དཔལ་རི་དང་། དོན་དབྱེར་མེད་སྤོམ་ཎེའི་སྒྲུབ་ཕུག་ན། །ལྷ་པདྨ་འབྱུང་གནས་རིག་འཛིན་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་ནུབ་ཕྱོགས་ཨོ་རྒྱན་ཕོ་བྲང་དང་། །དོན་དབྱེར་མེད་སྤོམ་ཎེའི་བྲག་ར་ན། །མ་མཁའ་འགྲོ་སྡེ་ལྔ་ཤུགས་འགྲོར་བཅས། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་བསིལ་བ་ཚལ་གྱི་དུར་ཁྲོད་དང་། །དོན་དབྱེར་མེད་རྡོ་རྗེ་བྲག་ར་ན། །མགོན་བྱ་རོག་གདོང་ཅན་ཡབ་དང་ཡུམ། །བདག་གསོལ་བ་འདེབས་སོ་ཐུགས་རྗེས་ཟུངས། །གནས་སྐུ་གསུམ་དག་པའི་ཞིང་ཁམས་
དང་། །དོན་དབྱེར་མེད་རྡོ་རྗེའི་བྲག་ར་ན། །ལྷ་རིག་འཛིན་ཡི་དམ་མཁའ་འགྲོའི་ཚོགས། །བདག་གསོལ་བ་འདེབས་སོ་ཐུགས་རྗེས་ཟུངས། །ལས་ངན་པའི་སྡིག་སྒྲིབ་དག་པ་དང་། །རྐྱེན་ཕྱི་ནང་བར་ཆད་ཞི་བ་དང་། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །ཞེས་གསོལ་བ་འདེབས་པར་བྱའོ། །ཞེས་བྱ་བ་འདི་ནི་བདག་རྣལ་འབྱོར་པ། རཱ་ག་ཨ་སྱས་རི་བོ་ཆེ་མཇལ་ཞོར་གནས་དེ་མཇལ་བསམ་པ་རྩེ་གཅིག་ཏུ་ཡོད་ཀྱང་སྟབས་མ་བདེ། རང་གི་རི་ཁྲོད་དུ་འོང་ནས་མཚམས་ཀྱི་བཅད་རྒྱ་གཅིག་ལ་བསྡད་ཀྱང་ཀླུ་གནས་དེ་ལ་ཡང་ཡང་ཡིད་ཕྲེང་བར་བྱུང་དུས། རྒྱལ་བས་ཆོས་ཀྱི་འཁོར་ལོ་བསྐོར་བའི་དུས་ཆེན་གྱི་ནུབ་ཉམས་དང་རྨི་ལམ་འདྲེས་པའི་སྐབས་སུ་སྤྲིན་གྱི་ཕུང་པོའི་སྟེང་ན་སངས་རྒྱས་ཚེ་དཔག་མེད་ཀྱི་སྐུ་སྣང་ལ་རང་བཞིན་མེད་པ་ཞིག་མཇལ། དེའི་ཕྱིར་ནུབ་རྨི་ལམ་གྱི་སྣང་བར་སྤོམ་ཎེ་བྲག་རའི་གནས་ཡིག་སྔར་མ་མཐོང་བ་ཞིག་ལག་ཏུ་གཏད་བྱུང་བ་ལ་བལྟས་པས། །ལྷའི་སྐད་དང་། ཀླུའི་སྐད། མིའི་སྐད་དང་། རྒྱ་སྐད་སུམ་རྩ་ག་ཡོད་པ་ཞིག་གདའ། ཚིག་རྣམས་ཡིད་ལ་མ་ཟིན་ཀྱང་རྟེན་འབྲེལ་གཅིག་ཡོད་པ་འདྲ་བསམས་པས་སྔར་སྤྲུལ་སྐུས་
གསུངས་པའི་གནས་ཡིག་ལ་གཞིར་བྱས། མདོ་རྒྱུད་བཀའ་གཏེར་གྱི་ལུང་གིས་བརྒྱན་ཏེ་ཆུ་སྟོད་ཟླ་བའི་ཡར་ཚེས་དྲུག་ལ་ཨ་རཱ་གས་རྫོགས་པར་བྲིས་པ་ལ་ཉེས་འགལ་མཆིས་ན་གནས་བདག་ཌཱ་ཀིའི་ཚོགས་ལ་བཤགས་ཤིང་དགེ་བས་འབྲེལ་ཚད་ཐམས་ཅད་བདེ་ཆེན་ཞིང་དུ་སྐྱེ་བར་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།