གནས་ཆེན་རཱ་ཛ་རྫོང་གི་གནས་ཡིག
གནས་ཆེན་རཱ་ཛ་རྫོང་གི་གནས་ཡིག་བཞུགས་སོ།
ན་མོ་གུ་རུ་སིདྡྷི་ཧཱུྃ། བླ་མ་ཡི་དམ་དབྱེར་མེད་པའི། །འགྲོ་བ་ཀུན་གྱི་གཙུག་གི་རྒྱན། །དགོས་འདོད་ཀུན་འབྱུང་ཡིད་བཞིན་ནོར། །པདྨ་འབྱུང་གནས་ཞབས་ལ་འདུད། །སྔོན་གྱི་བཀའ་བརྒྱུད་ཐམས་ཅད་ཀྱིས། །ཉམས་མགུར་གནས་བསྟོད་མཛད་པ་ལྟར། །ཁྱུང་ཆེན་རྗེས་སུ་བྱེ་སླེབ་ལྟར། །རྣལ་འབྱོར་ངས་ཀྱང་གནས་བསྟོད་ཀྱི། །གླུ་ཞིག་རིག་པ་དྭངས་ཕྱིར་ལེན། །སྔོན་ཚེ་བསྐལ་པའི་དང་པོ་ལ། །དབང་ཕྱུག་འཇིགས་བྱེད་ནག་པོ་དང་། །ཡུམ་གཅིག་དུས་མཚན་དམར་མོ་ཡིས། །འཇིག་རྟེན་ཐམས་ཅད་དབང་དུ་བསྡུས། །གནས་ཆེན་གནས་ཕྲན་བདག་ཏུ་
བཟུང་། །ལྷ་སྲིན་མ་མོ་བྲན་དུ་ཁོལ། །།འཇིག་རྟེན་མུ་སྟེགས་ལམ་ལ་བཀོད། །དེ་ཚེ་འོག་མིན་ཞིང་ཁམས་ཀྱི། །འཐུག་པོ་བཀོད་པའི་གནས་མཆོག་ནས། །བཅོམ་ལྡན་རྣམ་པར་སྣང་མཛད་དང་། །ཡུམ་ཆེན་ནམ་མཁའི་དབྱིངས་ཕྱུག་གིས། །འཁོར་ལོ་སྡོམ་པ་ཡབ་ཡུམ་སྤྲུལ། །སེམས་དཔའ་ཉི་ཤུ་རྩ་བཞི་དང་། །དཔའ་བོ་དཔའ་མོ་ཉེར་བཞིར་སྤྲུལ། །འོག་མིན་གནས་ནས་ཞིང་འདིར་བྱོན། །འཇིགས་བྱེད་དུས་མཚན་ཞབས་ཀྱིས་མནན། །ཞིང་སྐྱོང་ཡབ་ཡུམ་ཉེར་བཞི་རྣམས། །དཔའ་བོ་དཔའ་མོ་ཉེར་བཞི་ཡིས། །དམ་ལ་བཏགས་ནས་ཞབས་སུ་མནན། །
འཇིགས་བྱེད་ཡབ་ཡུམ་འཁོར་བཅས་ཀྱིས། །བདག་ཏུ་བཟུང་བའི་གནས་རྣམས་ནི། །བདེ་མཆོག་ཡབ་ཡུམ་འཁོར་བཅས་ཀྱི། །རང་གི་གནས་སུ་བྱིན་གྱིས་རློབས། །དེ་ཚེ་གནས་ཆེན་རཱཛ་རྫོང་། །བདེ་མཆོག་ཡབ་ཡུམ་གནས་ཉིད་དུ། །བྱིན་གྱིས་རླབས་པའི་མངོན་རྟགས་སུ། །རྒྱབ་རི་བདེ་མཆོག་ཡབ་ཡུམ་སྐུ། །མངོན་སུམ་རང་བྱོན་གསལ་བ་བཞུགས། །ཕ་བོང་འཇིགས་བྱེད་དུས་མཚན་གདན། །སྒོ་དང་རྟ་བབས་སྒོ་རྒྱན་སོགས། །རང་བྱུང་དཀྱིལ་འཁོར་ལྷུན་གྱིས་གྲུབ། །ཆོས་འབྱུང་དྲུག་ཅུ་རྩ་བཞི་ནི། །བདེ་མཆོག་དཀྱིལ་འཁོར་ལྷ་གྲངས་རྫོགས། །སྤང་འབུར་ཆོས་འབྱུང་གྲུ་གསུམ་ནི། །ཡུམ་ཆེན་ཕག་མོའི་དཀྱིལ་འཁོར་རྫོགས། །དེ་ནས་ཤཱཀྱའི་བསྟན་པ་ལ། །ཤཱཀ་ཐུབ་མྱ་ངན་འདའ་ཁའི་ཚེ། །སྤྱན་རས་གཟིགས་ཀྱིས་ཞུས་པའི་ངོར། །ཐུབ་པའི་ཞལ་ནས་འོད་ཟེར་ནི། །བྱང་ཕྱོགས་ཁ་བ་ཅན་དུ་འཕྲོས། །ས་གཞི་བྱིན་གྱིས་བརླབས་པའི་ཚེ། །འོད་དེ་གང་དུ་ཕོག་པའི་སར། །སྐུ་གསུང་ཐུགས་རྟེན་རང་བྱོན་བྱུང་། །དེ་ཚེ་འོད་ཟེར་འདིར་ཕོག་རྟགས། །མཆོད་རྟེན་བརྒྱད་པོ་རང་བྱུང་བྱོན། །རིགས་ལྔ་མཚོན་པའི་བྲག་མདོག་ནི། །ཁ་དོག་སྣ་ལྔ་ལྷུན་གྱིས་གྲུབ། །
དེ་ནས་ཨོ་རྒྱན་པདྨ་འབྱུང་། །སྤྲུལ་པ་བྱེ་བ་ཕྲག་བརྒྱ་ཡིས། །གངས་ཅན་བོད་ཡུལ་ས་གཞི་ཁོལ། །རྟ་རྨིག་ཙམ་ཡང་མ་ལུས་པར། །ཐམས་ཅད་ཞབས་ཀྱིས་བཅགས་ནས་ཀྱང་། །ལྷ་འདྲེ་ཐམས་ཅད་དམ་ལ་བཏགས། །དེ་ཚེ་མཆོག་གི་གནས་ཆེན་ལྔ། །གྲུབ་པ་ཐོབ་པའི་གནས་ཆེན་བརྒྱད། །ལུང་ལྔ་ལྗོངས་གསུམ་གླིང་གཅིག་དང་། །གངས་རི་གཉན་པོ་ཉི་ཤུ་གཅིག །ངོ་མཚར་གནས་མཆོག་ཉི་ཤུ་ལྔ། །གནས་ཆེན་བརྒྱ་དང་རྩ་བརྒྱད་དང་། །གནས་ཕྲན་སྟོང་དང་རྩ་གཉིས་དང་། །སྒྲུབ་པའི་རྫོང་ཆེན་རྫོང་ཆུང་དང་། །མཐའ་དམག་འབྱུང་དུས་གབ་པའི་གནས། །ས་ཁོལ་བྲག་སྐྱིབ་དཔག་མེད་པ། །བྱིན་གྱིས་རླབས་པར་གསུངས་པ་ལྟར། །འདན་གྱི་ཡུལ་ན་རྡོ་རྗེ་རྫོང་། །ཆམ་གྱི་ཡུལ་ན་ན་བུན་རྫོང་། །ལྕི་ཡི་ཡུལ་ན་རཱ་ཛ་རྫོང་། །རཱ་ཛ་རྒྱ་གར་ཟུར་ཆག་སྐད། །རཱ་ཛ་གནས་ཀྱི་རྒྱལ་པོ་ཡིན། །ཨོ་རྒྱན་ཆེན་པོའི་སྒྲུབ་ཕུག་ཡོད། །ཆོས་དང་ནོར་གྱི་གཏེར་ཁ་སྦས། །དེ་ནས་བསྟན་པ་ཕྱི་དར་ལ། །ཨོ་རྒྱན་ཆེན་པོའི་ཐུགས་སྤྲུལ་ཏེ། །འཁོར་ལོ་སྡོམ་པ་མིར་སྤྲུལ་པ། །བླ་མ་དཔལ་ཆེན་སྒ་ལོ་དེ། །ཧེ་རུ་ཀ་ཡི་སྐུར་བཞེངས་ནས། །
གཟའ་དང་ཀླུ་དང་ཐེའུ་རང་དང་། །ཐོག་སེར་སྡེ་བརྒྱད་དམ་ལ་བཏགས། །སྲ་མཁྲེགས་རྡོ་ལ་ཞབས་རྗེས་བཞག །ཆིབས་དྲེལ་རྗེས་དང་ཐོག་སེར་རྗེས། །རྒྱ་མཚོའི་ཀློང་ནས་ཀླུ་གཉན་རྣམས། །དམ་བཏགས་ཡར་ལ་དྲངས་བའི་གཟུགས། །མངོན་སུམ་ཀུན་གྱིས་མཐོང་བར་ཡོད། །གྲུབ་ཆེན་དཔལ་ཆེན་སྐྲ་ལོ་དེ། །འཇའ་ལུས་རྡོ་རྗེའི་སྐུ་བརྙེས་ཀྱང་། །གདུལ་བྱ་རྟག་འཛིན་རྫོགས་པའི་ཕྱིར། །མཛད་པའི་ཐ་མ་བསྟན་པ་ཡིས། །གདུང་ཞུས་མལ་གྱི་ས་འབུངས་ལ། །དུས་བཟང་འཇའ་ཡིས་གུར་ཕུབ་པས། །འཇའ་དིལ་མིང་དུ་ཐོགས་པ་ཡོད། །ལ་ཆུང་སྟེང་དུ་འོད་ཕུང་འཁྲིགས། །འོད་འབུར་མིང་དུ་ཐོགས་པ་ཡོད། །སྒ་ལོ་ཆུ་བྲག་ཐོགས་མེད་པ། །རྫུ་འཕྲུལ་བྲག་དཀྱིལ་ཕུག་པ་ན། །རྡོར་དྲིལ་ལ་སོགས་མཆོད་རྫས་ཡོད། །བྲག་རྩེ་མིག་གིས་མི་མཐོང་སར། །རྫུ་འཕྲུལ་བྱོན་ནས་གྱང་བརྡུང་གསལ། །སྒ་ལོའི་ཆོས་འབྲེལ་ཞུས་པ་ཡིས། །ས་ཆེན་ཀུན་སྙིང་མཆོད་རྟེན་ཡོད། །རྒྱལ་སྲིད་སྣ་བདུན་ནོར་བུ་བདུན། །དགོས་འདོད་ལྷུན་གྱིས་གྲུབ་ཚུལ་ཡོད། །རི་བོ་ཁྱུང་ཆེན་ལྡིང་བ་དང་། །བྲག་དཀར་སེང་ལྕམ་དཀར་མོ་ཡོད། །རྒྱངས་ནས་སྐྱེན་པོའི་འབེན་
དང་འདྲ། །གནས་དང་གནས་ལེན་ཡིན་པའི་ཕྱིར། །རྟ་རྣ་བདེ་མཆོག་ཕོ་བྲང་གི །བདེ་མཆོག་ཡབ་ཡུམ་རང་བྱོན་དང་། །རཱ་ཛའི་བདེ་མཆོག་ཡབ་ཡུམ་གཉིས། །སྐྱེན་པོའི་འབེན་དང་འདྲ་བ་ཡོད། །དེ་ནས་གནས་ཀྱི་བརྡའ་དོན་བཤད། །རྒྱབ་རི་བདེ་མཆོག་ཡབ་ཡུམ་ནི། །འཁོར་ལོས་སྒྱུར་རྒྱལ་ཡབ་ཡུམ་འདྲ། །ཐབས་ཤེས་ཟུང་དུ་འཇུག་པ་དང་། །མཆོག་ཐུན་དངོས་གྲུབ་ཐོབ་པའི་བརྡའ། །ནམ་མཁའ་ཟླུམ་ལ་འཁྱིལ་བ་ནི། །བེ་ཌཱུརྱ་ཡི་མདོག་དང་འདྲ། །ཆོས་དབྱིངས་མཐའ་དབུས་མེད་པ་ཡིས། །ལྟ་བ་ཡས་ནས་ཕུབ་པའི་བརྡའ། །ས་གཞི་པདྨ་འདབ་སྟོང་ལ། །འབུར་དོད་པདྨའི་ཟེའུ་འབྲུ་འདྲ། །འཁོར་བའི་སྐྱོན་གྱིས་མ་གོས་ཤིང་། །སྤྱོད་པ་མས་ནས་འཛེགས་པའི་བརྡའ། །ཆུ་གཉིས་ཆབ་མ་བརྡབ་འདྲ་ནི། །བདེ་སྟོང་ཟུང་དུ་འཇུག་པ་དང་། །སྒྲུབ་བརྒྱུད་ཆུ་བོ་འབྲུབ་པའི་བརྡའ། །ཕ་བོང་གཡས་ནི་འཇིགས་བྱེད་གདན། །རྟག་ཆད་མཐའ་གཉིས་སྤང་བའི་བརྡའ།འཇའ་དིལ་འཇའ་ཚོན་བསྐོར་བ་ནི། །དཔའ་བོ་མོ་ཚོགས་འདུ་བའི་བརྡའ། །འོད་འབུར་འོད་ཕུང་འཁྲིགས་པ་ནི། །དཔའ་བོ་ཕོ་ཚོགས་འདུ་བའི་བརྡའ། །གནས་ཆེན་
འདི་ཡི་མཐའ་སྐོར་དུ། །ཆོ་འཕྲུལ་རྩུབ་སློང་ཆེ་བ་ནི། །ལས་མགོན་བྱ་རོག་གདོང་པ་ཅན། །ནག་པོ་སྟོང་དང་ཤ་ཟ་འབུམ། །མ་མོ་བྱེ་བ་གནོད་སྦྱིན་ཁྲི། །ལྷ་སྲིན་སྡེ་བརྒྱད་འཁོར་དང་བཅས། །དཔལ་ཆེན་གདུང་ལ་མཆོད་པ་དང་། །བཀའ་སྲུང་མེལ་ཚེ་བྱེད་པའི་རྟགས། །གཞན་ཡང་གུར་དང་གཉན་མགོན་དང་། །པཱུ་ཊ་མིང་སྲིང་ལ་སོགས་ཀྱིས། །ས་ཆེན་གདུང་ལ་མཆོད་པ་དང་། །བཀའ་སྲུང་མེལ་ཚེ་བྱེད་པའི་རྟགས། །རྒྱལ་སྲིད་སྣ་བདུན་བསྐོར་བ་ནི། །ལུགས་གཉིས་ཆབ་སྲིད་བསྟན་པ་དང་། །ཆོས་ཀྱི་འཁོར་ལོས་སྒྱུར་བའི་བརྡའ། །ནོར་བུ་ཆ་བདུན་ཡོད་པ་ནི། །དགོས་འདོད་ལྷུན་གྱིས་གྲུབ་པའི་བརྡའ། །བྲག་ཕུག་ཆོས་འབྱུང་རང་བྱུང་ལ། །ནེའུ་ལེའི་རྐྱལ་པ་རང་བྱོན་ནི། །ཆོས་འབྱུང་འཛད་མེད་ནམ་མཁའི་མཛོད། །ནེའུ་ལེའི་རྐྱལ་པ་རིན་ཆེན་སྣོད། །འཛད་མེད་དངོས་གྲུབ་གནང་བའི་བརྡའ། །རིན་ཆེན་ཁྱུང་ཆེན་ལྡིང་འདྲ་ནི། །ལྟ་བའི་ནམ་འཕང་གཅོད་པ་དང་། །ཀླུ་གཉན་གནོད་པ་སྐྱོབས་པའི་བརྡའ། །བྲག་འབུར་སེང་གེ་གནམ་མཆོང་ནི། །སྒོམ་པའི་ཉམས་རྩ་ལ་རྫོགས་པ་དང་། །མི་འཇིགས་གདེང་དང་ལྡན་པའི་བརྡའ། །དེ་ཚོ་དོན་གྱི་
བརྡའ་མཚོན་ལགས། །ཀུན་རྫོབ་འཇམ་དབྱངས་གསུངས་པའི་གཞུང་། །རྟེན་འབྲེལ་ས་ཡི་དཔྱད་བཤད་ན། །ཤར་ཕྱོགས་ཕྱེས་པ་འདྲ་བ་ནི། །རྣལ་འབྱོར་སྐུ་ཚེ་རིང་བ་དང་། །ཞི་བའི་ཕྲིན་ལས་འགྲུབ་པའི་བརྡའ། །ལྷོ་ཕྱོགས་སྤྱང་པ་འདྲ་བ་ནི། །རྒྱས་པའི་ཕྲིན་ལས་འགྲུབ་པ་ནི། །ལོངས་སྤྱོད་མངའ་ཐང་འཕེལ་བའི་བརྡའ། །ནུབ་ཕྱོགས་སྐྱོལ་བ་འདྲ་བ་ནི། །རི་དམར་གཏེར་གནས་ཡོད་པ་ནི། །དབང་གི་ཕྲིན་ལས་འགྲུབ་པའི་བརྡའ། །བྱང་ཕྱོགས་ཡོལ་བ་བྲིས་འདྲ་ནི། །སྡང་དགྲའི་གནོད་པ་མི་འབྱུང་ཞིང་། །དྲག་པོའི་ཕྲིན་ལས་འགྲུབ་པའི་རྟགས། །ཕྱོགས་བཞིར་བསྲུང་བཞི་ཚང་བ་ནི། །གདུང་རྒྱུད་དཔའ་གཡང་ཐོབ་པའི་རྟགས། །གཡས་འབབ་རྒྱལ་པོའི་ཕྱག་དཀར་ཏེ། །གཡོན་འབབ་བཙུན་མོའི་གསེར་སྐྱེམས་ཡིན། །མདུན་དུ་འཁྱིལ་བ་ཞག་གི་མཚོ། །དབང་ཐང་རྒྱ་མཚོ་འདྲ་བའི་རྟགས། །མདུན་དུ་བྲག་འབུར་མངོན་པ་ནི། །གཡང་ཤ་སྡེར་དུ་བཞག་པ་སྟེ། །ཟས་ནོར་ལོངས་སྤྱོད་རྒྱས་པའི་རྟགས། །མདུན་དུ་ཆུ་ཤིང་ན་སྤང་ཕྱུག །མི་ནོར་ཟས་གསུམ་འཛོམས་པའི་རྟགས། །དེ་ཚོ་ཀུན་རྫོབ་ས་ཡི་དཔྱད། །འཕྲལ་སྐྱིད་པ་མི་ཡི་
ཆོས་ལགས་སོ། །ཕུག་སྐྱིད་པ་དམ་པ་ལྷ་ཡི་ཆོས། །འཇམ་དབྱངས་མིར་སྤྲུལ་ཀུན་སྙིང་དང་། །བདེ་མཆོག་མིར་སྤྲུལ་སྒ་ལོ་ཡི། །སྐུ་གདུང་མཆོད་རྟེན་འཛམ་གླིང་རྒྱན། །འདི་ལ་ཕྱག་དང་བསྐོར་བ་དང་། །ཞིག་གསོས་མཆོད་པ་སུས་བྱས་པ། །ངན་སོང་སྐྱེ་སྒོ་ཆོད་ནས་ཀྱང་། །མཐར་ཐུག་བྱང་ཆུབ་གོ་འཕང་ཐོབ། །ཅི་ཕྱིར་ཞེ་ན་ཤཱཀ་ཐུབ་ཀྱིས། །བསྐོར་བའི་ཚིགས་བཅད་མདོ་སྡེ་ལས། །མཆོད་རྟེན་བསྐོར་བ་བྱས་པ་ཡིས། །ཕན་ཡོན་བསྐལ་པ་བྱེ་བར་ཡང་། །བརྗོད་པར་ནུས་པ་མིན་གསུངས་ཤིང་། །འཛམ་བུ་ཆུ་གསེར་གསང་ཆེན་གྱིས། །དེ་ལས་བསྐོར་བ་གཅིག་དགའ་གསུངས། །ལུང་བསྟན་ཆེན་པོ་བཀའ་རྒྱ་དང་། །གུ་རུའི་རྣམ་ཐར་གསེར་ཕྲེང་ལས། པདྨ་འབྱུང་གནས་བྱིན་རླབས་པའི། །གནས་ཆེན་གནས་ཕྲན་ཐམས་ཅད་དུ། །འབྲེལ་ཐོགས་ཐར་པའི་ལམ་སྣ་ཟིན། །གཞན་དུ་ལོ་གཅིག་བསྒྲུབ་པ་ལས། །འདི་རུ་ཞག་གཅིག་དགའ་བར་གསུངས། །དེ་ཕྱིར་སུམ་བརྒྱ་དྲུག་ཅུས་འགྱུར། །ཡོད་ཕྱིར་དེ་ཡི་འགྱུར་བརྩིས་ན། །འདི་རུ་བསྐོར་བ་གཅིག་བྱས་ན། །བསྐོར་བ་སུམ་བརྒྱ་དྲུག་ཅུའི་འགྱུར། །འདི་རུ་ཕྱག་གཅིག་འཚལ་བ་ན། །ཕྱག་ནི་སུམ་བརྒྱ་དྲུག་
ཅུར་འགྱུར། །འདི་རུ་མར་མེ་གཅིག་ཕུལ་ན། །མར་མེ་སུམ་བརྒྱ་དྲུག་ཅུར་འགྱུར། །འདི་རུ་བཟླས་བརྗོད་གཅིག་བྱས་ན། །བཟླས་བརྗོད་སུམ་བརྒྱ་དྲུག་ཅུར་འགྱུར། །འདི་རུ་དར་ལྕོག་གཅིག་བཙུགས་ན། །དར་ལྕོག་སུམ་བརྒྱ་དྲུག་ཅུར་འགྱུར། །འདི་རུ་ཞག་གཅིག་སྒྲུབ་པ་ན། །ལོ་སྒྲུབ་གཅིག་ནི་བྱས་དང་མཉམ། །འདི་རུ་གཏོར་མ་ཚར་གཅིག་བཏང་། །གཏོར་མ་སུམ་བརྒྱ་དྲུག་ཅུར་འགྱུར། །འདི་རུ་ཚོགས་གཅིག་བྱས་པ་ན། །ཚོགས་ནི་སུམ་བརྒྱ་དྲུག་ཅུར་འགྱུར། །དེ་ཕྱིར་བསོད་ནམས་འདོད་པ་ཡིས། །འདི་རུ་ཕྱག་བསྐོར་མཆོད་པ་དང་། །སྒོམ་བཟླས་བསྙེན་སྒྲུབ་མཛད་པར་ཞུ། །པད་འབྱུང་གསུངས་ལ་ངེས་ཤེས་མཛོད། །གནས་ཀྱི་འགྱུར་དང་གང་ཟག་འགྱུར། །དུས་ཀྱི་འགྱུར་དང་རྣམ་པ་གསུམ། །མདོ་རྒྱུད་ཀུན་ནས་གསུངས་ལགས་པས། །འདི་ནི་གནས་ཀྱི་འགྱུར་བརྩི་ཡིན། །དེ་སྐད་རཱ་ག་ཨ་སྱ་ཡིས། །ཕན་ཡོན་ས་ག་ཟླ་བ་ཡི། །དམར་པོ་ཡི་ནི་ཚེས་བརྒྱད་ཉིན། །གནས་ཆེན་དེ་ཡི་རྩེ་མོར་བྲིས།། །།