ཐུགས་དམ་གསལ་འདེབས་སྐོར་བསྡུས་པ།
ཐུགས་དམ་གསལ་འདེབས་སྐོར་བསྡུས་པ་བཞུགས་སོ།
ན་མོ་གུ་རུ་མ་ཧཱ་མུ་དྲ་ཡེ། དཔལ་ལྡན་བླ་མའི་ཞབས་ལ་ཕྱག་འཚལ་ནས། །བར་དོ་དང་པོའི་མན་ངག་ཅུང་ཟད་བྲི། །གནས་གསུམ་ཌཱཀྐིས་བཀའ་གནང་བྱིན་གྱིས་རློབས། །དེ་ལ་ས་མཚམས་ནི། སྒོམ་མེད་ཀྱི་རྟོགས་པ་གཤའ་མ་སྐྱེས་པ་དེ་རྟེན་འབྲེལ་འགྲིགས་ན་འཇའ་ལུས་སུ་འགྱུར་ཏེ་ཕུང་པོ་ལྷག་མེད་དུ་མཁའ་སྤྱོད་དུ་འགྲོའོ། །རྟེན་འབྲེལ་མ་འགྲིགས་ན་ཡང་གསོན་དུས་ནས་སངས་རྒྱས་པ་ཡིན་པས། འཆི་དུས་སླར་འོད་གསལ་བཟུང་ནས་ཆོས་སྐུ་སླར་ཐོབ་མི་དགོས་ཏེ། དབུགས་ཆད་མ་ཐག་ཏུ་དག་པའི་ཞིང་དུ་ལོངས་སྤྱོད་རྫོགས་སྐུར་སྣང་ཞིང་མ་
དག་པའི་ཞིང་ཐམས་ཅད་དུ་གང་ལ་གང་འདུལ་གྱི་སྤྲུལ་སྐུ་འཆར་རོ། །དེ་གཉིས་པོ་ནི་ཚེ་འདིར་སངས་རྒྱས་པ་ཡིན་པས། ཐུགས་དམ་ཟིན་མ་ཟིན་གྱི་སྤྲོས་པ་མེད་པའི་ཕྱིར། རྒྱ་བོད་ཀྱི་གྲུབ་ཐོབ་ཆེས་མང་པོ་དང་། སངས་རྒྱས་བཅོམ་ལྡན་འདས། རྒྱལ་བ་ཡབ་སྲས་ལ་ཐུགས་དམ་ཟེར་བའི་སྲོལ་མེད་པ་དེ་ཡིན་ནོ། །རོ་གཅིག་ཆེན་པོའི་མན་ཆད་དེ་ནང་དབུགས་ཆད་མ་ཐག་སྐད་ཅིག་དང་པོ་ལ་འོད་གསལ་འཆར།། གཉིས་པ་ལ་ངོས་ཟིན། གསུམ་པ་ལ་གྲོལ་ཏེ་སྐད་ཅིག་གསུམ་གྱི་ཡུན་ལ་སངས་རྒྱས་པར་རྫོགས་ཆེན་རྣམས་ནས་རྒྱ་ཆེར་གསུངས་སོ། །རོ་
གཅིག་ཆུང་ངུ་མན་ཆད་སྤྲོས་བྲལ་ཡན་ཆད་རྟོགས་པ་གཅིག་འོད་གསལ་ཟིན་ནས་ཞག་ཞེ་དགུ་གནས་ནུས་ན་འོད་གསལ་རོ་གཅིག་རྟོགས་ནས་སྒྲིབ་པ་ཐམས་ཅད་བཅོམ་ནས་དེ་ཉིད་དུ་སངས་རྒྱས་པར་འགྱུར་ཏེ། དེ་ལ་འཆི་བ་ཆོས་ཀྱི་སྐུར་སངས་རྒྱས་པ་ཞེས་བྱའོ། །དེ་བས་ཡུན་ཐུང་ན་ཡང་རང་རྟོགས་པའི་ས་མཚམས་མང་དུ་ཡོད་པ་དེའི་རྩལ་དང་ཡོན་ཏན་རྫོགས་པར་འགྱུར་རོ། །ཞེས་དྲུང་པས་གསུངས་སོ། །ལ་ལས་ཞག་གསུམ་སོགས་ཐུགས་དམ་གོ་མི་ཆོད་རྣམ་ཤེས་ཞག་གསུམ་དྲོས་བཞི་ཐམས་ཅད་སྡོད་པ་ཡིན་ཟེར་མཁན་འདུག་སྟེ༔ རྣལ་འབྱོར་པས་འོད་གསལ་ཟིན་ནས་དེའི་ངང་ལ་ཡུད་ཙམ་བསྡད་ན་ཡང་གསོན་དུས་ལོ་ཟླར་སྒོམ་པ་བས་སྟོབས་དང་ཡོན་ཏན་ཆེ་ལ། ཐ་མལ་པའི་དབུགས་ཆད་ནས་འོད་གསལ་ཤར་བ་ལ་སྐྲག་སྣང་སྐྱེས་ནས་བརྒྱལ་ཏེ་དྲན་མེད་དུ་ཞིག་གསུམ་མམ་རྩ་བཟང་བ་ཞག་བདུན་དུ་ཡང་འདུག་པར་བཀའ་གདམས་གླེགས་བམ་ནས་བཤད་དེ། འདུག་ལུགས་གཉིས་ལ་ཁྱད་ཆེན་པོ་ཡོད་པས་ཤེས་པར་བྱའོ། །ཡང་འོད་གསལ་མ་ཟིན་ན་བསྒོམས་ཚད་འཕྲོ་བརླག་པ་ནི་མ་ཡིན་ཏེ།། ལུས་སེམས་བྲལ་ཚར་ནས་བར་དོའི་འཁྲུལ་སྣང་མ་ཤར་
བའི་བར་དེར་འོད་གསལ་གཉིས་པ་འཆར་བ་ཟིན་པར་གསུངས་པས་སོ། །འོད་གསལ་མ་ཟིན་ན་བར་དོར་སྒྱུར་ལུས་འཆར་དུས་དང་པོ་ལྷ་བསྒོམ། དེ་ནས་འོད་གསལ་བསྒོམས་པས་དེའི་ངང་ལ་ཞག་ཞེ་དགུ་གནས་ནུས་ན་ལོངས་སྤྱོད་རྫོགས་སྐུར་སངས་རྒྱས་པར་གསུངས་སོ། །ལར་ངོ་བོ་ཅུང་ཟད་ཙམ་དང་རྩེ་གཅིག་ལྟག་འོག་རྣམས། འཆི་བའི་འོད་གསལ་ཟིན་དཀའ། བར་དོའི་སྐབས་སུ་ཟིན་པར་གསུངས་སོ། །དེ་ལ་ཟིན་ནམ་མི་ཟིན་གྱི་ཚད་ནི། ད་ལྟ་གཉིད་དུས་འོད་གསལ་རྒྱུན་དུ་ཟིན་ན་ཐུགས་དམ་བསྐུལ་མ་མི་དགོས་མཚམས་སྦྱོར་བཟང་ངན་དང་གནད་གཅོད་ཆེ་ཆུང་ལ་མི་ལྟོས་པར་ཟིན་ནོ། །ད་ལྟ་གཉིད་ཀྱི་འོད་གསལ་མི་ཟིན་རྨི་ལམ་འོད་གསལ་ཟིན་ན། འཆི་བའི་འོད་གསལ་མི་ཟིན་བར་དོར་ཟིན་ནོ། །ཟིན་གྲངས་ནི་ཟླ་རེ་ལན་རེ་ཙམ་ཟིན་པའམ། ལར་རྨི་ལམ་ལན་བདུན་ཟིན་ན་བར་དོར་ཟིན་པ་ཨོ་རྒྱན་རིན་པོ་ཆེས་གསུངས་ལ། དྭགས་པོ་རིན་པོ་ཆེས་ནི་རྨི་ལམ་དུས་ད་ལྟ་བས་མི་གསལ་དུ་འགྲོ། བར་དོ་ན་ད་ལྟ་བས་གསལ་དུ་འགྲོ་བས་རྨི་ལམ་མ་ཟིན་ཀྱང་བར་དོར་ཟིན་གསུངས། ད་ལྟ་སེམས་ངོ་ཨིན་ཙམ་མཐོང་བས་ཀྱང་ཟིན་
གསུངས་སོ། །ཐིམ་རིམ་ངོ་སྤྲོད་བཤད་པ་རྒྱ་ཆེར་ཡོད་ཀྱང་རྒོད་ཚང་པ་སོགས་བཀའ་བརྒྱུད་ཀྱི་བཞེད་པས་སྤ་སྤོ་མང་པོ་མེད་པར་ཉམས་ལེན་ཁོ་རང་གི་ངང་ལ་བཞག་པས་ཟིན་པར་འགྱུར་གསུངས། བར་དོ་ཐོས་གྲོལ་ཆེན་མོ་ལས། གང་ཟག་གོ་བ་བཟང་ཡང་ངོ་མ་འཕྲོད་པ་དང་། ངོ་འཕྲོད་ཀྱང་གོམས་འདྲིས་ཆུང་བ་རྣམས་དང་། སོ་སོའི་སྐྱེ་བོ་ཉམས་ཁྲིད་ཞུ་མྱོང་བ་རྣམས་ལ་འདི་ལྟར་ངོ་སྤྲད་པས་གཞིའི་འོད་གསལ་ཆོས་སྐུ་སྐྱེ་བ་མེད་པར་འཐོབ་གསུངས་སོ། །དེས་ན་དོན་ལ་རྨི་ལམ་དང་གཉིད་དུས་འོད་གསལ་ཡང་ཡང་ཟིན་ན། །བསྐུལ་མ་མེད་ན་ཡང་མཚམས་སྦྱོར་བཟང་ན་ཟིན་ལ། མཚམས་སྦྱོར་བཟང་ཞིང་ཐུགས་དམ་བསྐུལ་མ་མཁས་པས། དུས་གནད་ཟིན་པར་བསྐུལ་ན་སེམས་ངོ་ཨེན་ཙམ་མཐོང་བས་ཀྱང་ཟིན་པར་ངེས་ཏེ་མཐོང་བ་བརྒྱུད་པ་ལ་ཡང་གསལ་ལོ། །དེང་སང་བསྐྱེད་རིམ་རྐྱང་པས་ཐུགས་དམ་ཟིན་ན་བརྟན་པོ་འོང་ཟེར། དེ་འདྲ་མཐོང་ཡང་མཐོང་སྟེ་འདིས་འོད་གསལ་ཟིན་པའི་གོ་མི་ཆོད་ལ། འདི་ཐེར་ཟུག་ཏུ་གོལ་ན་སྐྱོན་ཡང་ཆེ་བར་མངོན་ནོ། །དེ་བཞིན་དུ་ཞི་གནས་བདེ་གསལ་མི་རྟོག་པ་ལ་ཆགས་ན་ཡང་གོལ་ས་ཡོད་པར་སྣང་། ལ་
ལས་གཞིའི་འོད་གསལ་ལ་གོལ་ས་མི་སྲིད་ཟེར་ཡང་། གོལ་སར་ཤོར་ན་དེ་ལ་ཡང་བསྐུལ་མ་གདབ་ལུགས་སྦྱོར་དྲུག་གི་བར་དོའི་འོད་གསལ་ངོ་སྤྲོད་ནས་གསུངས་པའི་ཕྱིར་ཐུགས་དམ་ལ་གོལ་ས་ཡོད་པར་ངེས་སོ། །དེ་ཡང་ད་ལྟར་གོལ་ནས་ཡོད་ན་དེ་ཡང་གོལ། ད་ལྟ་མ་གོལ་ན་དེར་མི་གོལ་ལོ། །འཆི་ཁ་ཆགས་ཞེན་ཐམས་ཅད་སྤངས་བ་དང་། འཆི་དུས་དམ་ཚིག་གི་སེལ་དང་ཆགས་སྡང་སྐྱེ་ཡུལ་དྲུང་དུ་མེད་པ་དང་། ཐུགས་དམ་ཟིན་ནས་ཉམས་གྲིབ་དང་ཀུ་ཅོ་སྤོས་དང་མར་མེའི་གསུར་དྲི་ལྡེག་ཆོམ་ངུ་སྒྲ་རོལ་མོའི་སྒྲ་ཐམས་ཅད་སྤངས་དགོས་པར་གསར་རྙིང་ཐམས་ཅད་ནས་བཤད་ཅིང་། བླ་མའི་གསུང་རྒྱུན་དང་རང་གི་མྱོང་བས་འགྲུབ་བོ། །ལ་ལས་ཐུགས་དམ་བསྐུལ་མ་ལ་བཤད་པ་རྒྱ་ཆེན་མཛད་སྲོལ་འདུག་ཅིང་། ལུང་འདྲེན་དང་བཤད་པ་བྱས་ན་ཟད་མཐའ་མེད་ཀྱང་། བཤད་མང་ན་སྣང་མཆེད་ཐོབ་པའི་ཡུན་སྐད་ཅིག་ཙམ་ལས་མེད་དུས་ཡོལ་ནས་འགྲོ་བས། མ་ཟིན་པའི་རྐྱེན་དུ་གྱུར། ལ་ལས་འབྱུང་བའི་ཐིམ་རིམ་བཤད་པ་མང་དུ་བྱེད་ནའང་། ཐིམ་རིམ་ངོ་སྤྱད་ན་ཕྱི་དབུགས་མ་ཆད་ཚུན་ལ་བཤད་དགོས། དབུགས་ཆད་
ནས་བྱུང་ཚར་བ་བཤད་པས་ཕན་མེད་པར་སྣང་ངོ། །ངོ་སྤྲོད་དངོས་ཀྱང་ལུང་འདྲེན་རྣམས་ཕལ་པས་གོ་ཡང་དཀའོ་བས། གནད་དུ་ཐེབ་པའི་ཚིག་བྱིན་རླབས་ཆེ་བ་འགའ་ཟུང་སྤྱོད་པ་ཟབ་བོ། །དེ་ནས་འཆི་ཁ་ནུབ་ནས་རྣམ་སྣང་ཆོས་བདུན་བྱས་བསྒོམ་སྐྱེད་བསྒོམ་ཤིང་མན་ཏ་རྒྱབ་ལ་གྲོགས་ཀྱིས་བརྟེན། དེ་མ་ནུས་ན་ཙོག་པུར་མེ་ཐབ་དྲུག་ཆིངས་ལྟར་འདུག་ལ་བསྒོམ་ཐག་གིས་བསྡམ་མ་རག་པ་བྱས་ལ་བརྟེན་ནི་འདུག །དེ་ཡང་མ་ནུས་ན་སེང་གེའི་ཉལ་ཐབས་བྱས་ལ་ཕྱི་དབུགས་ཆད་མ་ཐག་ཤིན་ཏུ་མྱུར་བར་གདུང་ཆས་བྱས་ལ། མིང་ཚུནས་དལ་བུས་བོས་ལ་རྣ་བ་ལ་ཁ་གཏད་ནས། ཐུགས་དམ་མ་ཡེངས་ཞེས་བརྗོད་ནས། མདོ་ལས། ལུས་ཅན་རྣམས་ནི་འཆི་བ་ན། །དབང་པོ་ཐིམ་དང་འབྱུང་བ་ཐིམ། །སྣང་བ་ཐིམ་དང་རྟོག་པ་ཐིམ། །རགས་པ་ཐིམ་དང་ཕྲ་བ་ཐིམ། །ཐིམ་པའི་རྗེས་ལ་གོམས་པ་ཡིས། །རང་བཞིན་གྱིས་ནི་འོད་གསལ་འཆར། །ཞེས་གསུངས་པ་ལྟར། ཕྱིའི་འབྱུང་བ་བཞི་གཅིག་ལ་གཅིག་ཐིམ་དབང་པོ་རྣམས་འགགས་ནས། ད་ལྟ་ཕྱི་རོལ་དུ་ཟླ་བ་ཤར་བ་ལྟ་བུ། ནང་དུ་སྨིག་རྒྱུ་དང་དུད་ལོང་ལྟ་བུ་འཆར་ཞིང་། སྒོམ་རྩེ་གཅིག་གི་
རྟོགས་པ་དེ་སྐད་ཅིག་ལ་འཆར་བས་ངོས་ཟུངས་ཤིག །དེ་ནས་ཕྱི་རོལ་ཐམས་ཅད་ཉི་འོད་ལྟ་བུ་དམར་ལམ་མེ་བ་དང་། ནང་དུ་དམར་ཚེག་ཚེག་པ་ཞིག་འབྱུང་སྟེ་ཁྱེད་ལ་ད་ལྟ་སྒོམ་སྤྲོས་བྲལ་གྱི་རྟོགས་པ་དེ་སྐད་ཅིག་གཉིས་ལ་དངོས་སུ་འཆར་བས་ངོས་ཟུངས་ཤིག །དེ་ནས་ཕྱི་རོལ་ཐམས་ཅད་ནག་ཐིབས་སེ་མུན་རུབ་པ་ལྟ་བུ་ལ་ནང་དུ་གསལ་སེང་ངེ་བ་གཅིག་ཁྱེད་ལ་ད་ལྟ་ཡོད་དོ། །ད་ལྟ་སྒོམ་རོ་གཅིག་གི་རྟོགས་པ་དེ་སྐད་ཅིག་གསུམ་ལ་འཆར་བས་ངོ་ཤེས་པར་མཛོད། དེ་ནས་ད་ལྟ་ཁྱེད་ལ་ཕྱི་རོལ་རྣམས་སྐྱ་རེངས་ཤར་བ་ལྟ་བུར་ཅུང་ཟད་གསལ་ཞིང་། ནང་དུ་ནམ་མཁའ་དྭངས་བ་ལ་ཉི་མ་ཤར་བ་ལྟ་བུར་སྟོང་ཞིང་གསལ་བ། སྨྲ་བརྗོད་དང་བྲལ་བ། ཕྱག་རྒྱ་ཆེན་པོ་སྒོམ་མེད་ཀྱི་རྟོགས་པ་མངོན་སུམ་དུ་འཆར་རོ། །དེ་ལ་ངོ་མ་ཤེས་ན་ནི་གཉུག་མའི་སྐད་ཅིག་བཞིའམ་རིང་ན་ལུག་བཤའ་ཡུན་ཙམ་ལས་མི་གནས་པར་ནཱ་རོ་པས་གསུངས་སོ། །སྟོང་ཉིད་ཆོས་སྐུ་དེའི་ངང་ལ་མ་ཡེངས་པར་ཞོག་ཅིག །རྡོ་རྗེའི་ཚིག་རྐང་ལས། དཀར་དམར་སེམས་གསུམ་ཆུ་སྐྱེས་དབུས་སུ་འཛོམ། །དབང་པོ་ཡང་རབ་ཆོས་སྐུའི་རྒྱལ་ས་ཟིན། །ཞེས་གསུངས་པས།
ད་ལྟ་ཆོས་སྐུའི་རྒྱལ་ས་འདི་ཟུངས་ཤིག །འདི་ལ་ཞག་ཞེ་དགུ་གནས་ནུས་ན་འཆི་བ་ཆོས་སྐུར་སངས་རྒྱས་པ་ཡིན་ནོ། །མ་ཡེངས་པར་འདིའི་བར་དུ་བཞུགས་ཤིག །ཅེས་བརྗོད་ནས་བསྐྱོར་ལ་ཡུན་ཨེན་ཙམ་བསྡད་པས་ཤ་བཀྲག་གསལ་ཞིང་སྣུམ་ལ་འོད་ཆགས་པ་མིག་ཟིན་བུ་ཞལ་འཛུམ་པ་འདྲ་ན་ཟིན་པ་ཡིན་ནོ། །དེ་ནི་ཕྱག་རྒྱ་ཆེན་པོའི་གསལ་འདེབས་ལུགས་སོ། ༈ ཡང་ཐབས་ལམ་གཏུམ་མོ་ལ་གོམས་པ་གཅིག་ཡིན་ན། འོ་ཆེ་གེ་མོ་མ་ཡེངས་པར་ཐུགས་དམ་ཟུངེས་མཛོད། དེ་ཡང་རྒྱུད་ལས། ལུས་ཅན་རྣམས་ནི་འཆི་བ་ན། །བདུད་རྩིའི་ཟླ་བ་ཐུར་དུ་འབབ། །དམར་ཚ་ཉི་མ་གྱེན་ལ་འབར། །ཞེས་གསུངས་པས། འབྱུང་བ་བཞིའི་རླུང་དང་རྣམ་པར་རྟོག་པ་རགས་པ་རྣམས་བསྐྱེད་པའི་རླུང་ཉི་ཁྲི་ཆིག་སྟོང་དྲུག་བརྒྱ་ལས་རླུང་ཕྲ་བ་ལ་ཐིམ་ཞིང་། ཡེ་ཤེས་ཀྱི་རླུང་དང་རོ་གཅིག་པར་གྱུར་པའི་སྐབས་ཡིན་པས། སྤྱི་བོ་ནས་ཡབ་ཧེ་རུ་ཀའི་ངོ་བོ་ཐིག་ལེ་ཧཾ་ཡིག་དབུ་མའི་ལམ་ནས་ཐུར་དུ་བབས་ནས། ད་ལྟ་ཁྱེད་ལ་དགའ་བའི་ཡེ་ཤེས་སྐད་ཅིག་ལ་འཆར་བས་ངོ་ཤེས་པར་གྱིས་ཤིག་།དེ་ནས་ལྟེ་འོག་ནས་ཨ་ཐུང་ཕག་མོའི་ངོ་བོ་བྱང་སེམས་དམར་པོ་གྱེན་དུ་འཕར་བས་མཆོག་དགའི་ཡེ་ཤེས་སྐད་ཅིག་གཉིས་ལ་འཆར་བས་
ངོས་ཟིན་པར་མཛོད་ཅིག །དེ་ནས་འཁོར་ལོ་ལྔ་ཡི་རྩ་ཡི་ནུས་པ་ཐམས་ཅད་དབུ་མ་དོན་དམ་གྱི་རྩ་ལ་ཐིམ། ཐིག་ལེ་རླུང་སེམས་དབུ་མའི་ནང་དུ་ཞུགས་པས་ཕྱིའི་རྟོག་པ་ཐམས་ཅད་འགགས་ནས། ད་ལྟ་དགའ་བྲལ་གྱི་དགའ་བ་ཁྱེད་ལ་སྐད་ཅིག་གསུམ་དུ་འཆར་བས་ངོ་ཤེས་པར་གྱིས་ཤིག །དེ་ནས་སྙིང་ཁ་ཆོས་ཀྱི་འཁོར་ལོའི་དབུས་ན་ཐིག་ལེ་དཀར་དམར་ཁ་སྦྱོར་བའི་བར་ན་ཀུན་གཞིའི་རྣམ་ཤེས་ཚུད་དེ། ད་ལྟ་ཁྱེད་ལ་ལྷན་ཅིག་སྐྱེས་པའི་དགའ་བ་སྐད་ཅིག་བཞིའམ་ལུག་བཤའ་ཡུན་ཙམ་ལ་འཆར་རོ། །ངོ་ཤེས་པར་གྱིས། ཐབས་ལམ་བསྒོམས་པའི་དོན་གོ །བདེ་སྟོང་ཟུང་འཇུག་གི་རྟོགས་པ་རྡོ་རྗེ་འཆང་ཆེན་པོའི་དགོངས་པ་དེ་ད་ལྟ་ཤར་ནས་ཡོད་དོ། །ངོ་ཤེས་པར་མཛོད་ཅིག །སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པས། སྔགས་ལུགས་ཀྱི་མངོན་པར་བྱང་ཆུབ་པའི་དུས་ད་ལྟ་ཡིན་པས་མ་ཡེངས་པར་རྩེ་གཅིག་དེ་ཡི་ངང་ལ་ཡུན་དུ་བཞུགས་པར་ཞུ། ཞེས་གསལ་བཏབ་བོ། ༈ །འོད་གསལ་ལ་གོམས་པ་གཅིག་ཡིན་ན། འོ་ལགས་ཆེ་གེ་ཞེས་བྱ་བ་ད་ལྟ་འོད་གསལ་བཟུང་བའི་དུས་ལ་བབ་ནི་ཡོད་དེ། ཕྱི་རོལ་གྱི་འབྱུང་བ་བཞི་དང་
དབང་པོ་ལྔ་སྙིང་པདྨ་འདབ་བཞི་ལ་ཐིམ་པས་ཕྱི་རོལ་མི་གསལ་བར་གདའོ། །པད་འདབ་བཞིའི་ཤར་དུ་ཨ་དཀར་པོ། དེ་ཡང་མི་དམིགས་པར་གཡོས་སུ་ནུ་སེར་པོ། དེ་ཡང་མི་དམིགས་པར་རྒྱབ་ཏུ་རྟ་དམར་པོ། དེ་ཡང་མི་དམིགས་པར་གཡོན་དུ་ར་ལྗང་གུ། དེ་ཡང་མི་དམིགས་པར་སྙིང་དབུས་ཧཱུྃ་ལ་སེམས་ཟུངས་ཤིག་དང་། སྣང་མཆེད་ཐོབ་པའི་འོད་གསལ་གཞི་རིམ་པར་འཆར་རོ། །ཕྱིའི་རྣམ་ཤེས་ཚོགས་དྲུག་གི་རྟོག་པ་མེད་པར་ནང་དུ་སེམས་ཀྱི་ངོ་བོ་ཅུང་ཟད་གསལ་བ་ཞིག་སྐད་ཅིག་ཙམ་འབྱུང་བ་དེ་སྣང་བའི་ཡེ་ཤེས་ཡིན་པས་ངོ་ཤེས་པར་གྱིས་ཤིག །ཡེ་ཤེས་དེ་ཆེར་མཆེད་ནས་གསལ་ལ་རྟོག་པ་མེད་པ་ཞིག་སྐད་ཅིག་གཉིས་ལ་འཆར་བས་དེ་མཆེད་པའི་ཡེ་ཤེས་ཡིན་པས་ངོ་ཤེས་པར་གྱིས་ཤིག །ཡེ་ཤེས་དེ་གསལ་སེང་ངེ་གནས་པ་ཞིག་སྐད་ཅིག་གསུམ་འབྱུང་བ་དེ་ཐོབ་པའི་ཡེ་ཤེས་ཡིན་པས་ངོ་ཤེས་པར་གྱིས་ཤིག །དེའི་རྗེས་སུ་གསལ་སྟོང་སྤྲོས་པའི་མཐའ་ཐམས་ཅད་དང་བྲལ་བ་ནམ་མཁའ་གཡའ་དག་པ་ལྟ་བུ་ཞིག་སྐད་ཅིག་བཞིའི་ལུག་བཤའ་ཡུན་ཙམ་ལ་འཆར་རོ། །དེ་ནི་ཉེར་ཐོབ་ཀྱི་ཡེ་ཤེས་འོད་གསལ་སྟོང་པ་ཉིད་ཡིན་པས་ངོ་ཤེས་པར་གྱིས་ཤིག །
སྔར་འོད་གསལ་བསྒོམ་པའི་དོན་གོ་གཞིའི་འོད་གསལ་ད་ལྟ་ཤར་ནི་ཡོད་དོ། །མ་ཡེངས་པར་དེའི་ངང་ལ་བཞུགས་ཤིག །གསང་འདུས་གཉིས་མེད་རྣམ་རྒྱལ་ལས་ཉེ་བར་ཐོབ་པ་དྲི་མ་མེད་པ་སྟེ། །རང་བྱུང་རང་གསལ་བདེ་བ་དམིགས་སུ་མེད། །ཕྲ་རགས་རབ་ཞི་ཏིང་འཛིན་མཆོག་ཏུ་འགྱུར། །ཞེས་གསུངས་པའི་དོན་ཡིན་པས་མཉམ་པར་ཞོག་མཛོད། ཅེས་གསལ་བཏབ་བོ།། ༈ རྫོགས་ཆེན་ལ་གོམས་པ་གཅིག་ཡིན་ན། འོ་ལགས་ད་ནི་འཆི་བ་སླེབ་ནི་གདའོ། །ད་ལྟ་ཕྱི་དབུགས་ཆད་མ་ཐག་གི་དུས་འདིར་ཁྱེད་རང་སྤྱན་གཉིས་ནས་འོད་གསལ་ཁ་དོག་ལྔ་པ་སྐས་ལྟ་བུ་དུང་གི་ཐག་པ་ལྟ་བུ་གཅིག་ད་ལྟ་འཆར་རོ། །དེ་ནི་རྡོ་རྗེ་སེམས་དཔའི་སྣ་དག་ཐུགས་རྗེས་རྒྱུན་ལམ་ཡིན་ནོ། །དེ་ཡེ་ཤེས་སུ་ངོ་ཤེས་པར་གྱིས་ལ་སེམས་རྫོགས་པ་ཆེན་པོའི་ངང་ལ་མ་ཡེངས་ཤིག །འོ་ལགས་ད་ནི་ཐིག་ལེ་དཀར་དམར་དབུ་མར་ཞུགས་པའི་རྟེན་འབྲེལ་ལ། བདེ་གསལ་མི་རྟོག་ཉམས་གསུམ་ཡུན་པར་ཡུད་ཙམ་རེ་འཆར་རོ། །དེ་ངོ་ཤེས་པར་མཛོད་ཅིག །དེའི་རྗེས་ལ་དབྱར་མ་སྟོན་གྱི་ནམ་མཁའ་ལྟ་བུ་གཅིག་འཆར་རོ། །ནམ་མཁའ་སྤྲིན་དང་བྲལ་བ་ལྟར་སྟོང་
རྗེན་ལྷན་ནེ་བ། གསལ་སྟོང་མཐའ་དབུས་མེད་པའི་དྲི་མེད་རྗེན་པ་གཅིག་ཤར་ནས་ཡོད་དོ། །ད་ལྟ་ཁྱེད་ལ་ཆོས་ཉིད་དག་པའི་སྣང་བ་འོད་གསལ་ཤར་ནས་ཡོད་དོ། །ངོ་ཤེས་པར་གྱིས་ཤིག །ད་ལྟའི་ཤེས་རིག་གི་ངོ་བོ་སེང་ངེ་བ་འདི་དངོས་པོ་མཚན་མ་ཁ་དོག་ཅི་ཡང་མ་གྲུབ་པ་སྟོང་སེང་ངེ་འདུག་པ་འདི་ཀ །ཆོས་ཉིད་ཀུན་ཏུ་བཟང་པོ་ཡིན་ནོ། རང་གི་ཤེས་རིག་སྟོང་བརྣོ་ཙམ་སྟོང་པ་ཕྱལ་ཆེད་དུ་མ་སོང་བར། རང་གི་ཤེས་རིག་མ་འགགས་པར་ས་ལེ་སིང་ངེ་བ་འདི་ཀ་རིག་པ་སངས་རྒྱས་ཀུན་ཏུ་བཟང་མོ་ཡིན་ནོ། །རང་གི་རིག་པ་དངོས་པོ་ཅིར་ཡང་མ་གྲུབ་པའི་ངོ་བོ་སྟོང་པ་དང་། རང་གི་ཤེས་རིག་ས་ལེ་བར་འདུག་པ་འདི་གཉིས་དབྱེར་མི་ཕྱེད་པར་འདུག་པ་འདི་ཀ་སངས་རྒྱས་ཆོས་ཀྱི་སྐུ་ཡིན་ནོ། །རང་གི་རིག་པ་གསལ་སྟོང་དབྱེར་མེད་འོད་ཀྱི་ཕུང་པོ་ཆེན་པོར་བཞུགས་པ་འདི་སྐྱེ་འཆི་མེད་པ་སངས་རྒྱས་འོད་མི་འགྱུར་བ་འདི་ཀ་ཡིན་ནོ། །དེ་ངོ་ཤེས་པས་ཆོག་གོ །དེའི་ངང་ལ་ཡུན་རིང་དུ་བཞུགས་ཤིག །ཅེས་གསལ་བཏབ་བོ།། ༈ དབུ་མ་ལ་གོམས་པ་གཅིག་ཡིན་ན། འོ་ཆེ་གེ་ལགས། ཁྱེད་སྐུ་ཚེའི་འདུ་བྱེད་བཏང་བའི་དུས་ལ་བབ་ནི་གདའ་བས། སེམས་
ཅན་ཐམས་ཅད་ཀྱི་དོན་དུ་འཆི་བ་དོན་དམ་པའི་བདེན་པ་མངོན་སུམ་རྟོགས་པར་བྱ་སྙམ་པའི་ཐུགས་བསྐྱེད་དང་ལྡན་པས་གསན་འཚལ། ད་ལྟ་ཕྱི་འབྱུང་བཞིའི་གཏོང་ལེན་ཚར་ནས་ནང་ཆོས་ཉིད་ཀྱི་ཐོབ་པའི་ཏིང་ངེ་འཛིན་སྟོང་པ་ཉིད་བཞི་པོ་འཆར་བའི་སྐབས་སུ་གདའ་ལགས། ད་ལྟ་ཤེས་པ་སྨིག་རྒྱུའི་དུ་བ་ལྟར་ལང་ལོང་འབྱུང་ཞིང་། ཞེ་སྡང་གི་རྟོག་པ་སོ་གསུམ་འགགས་ནས་སྟོང་པ་ཉིད་སྐད་ཅིག་ལ་ལྷང་ངེ་འཆར་རོ། །ངོ་ཤེས་པར་གྱིས་ཤིག །སྣང་བ་སྲིན་བུ་མེ་ཁྱེར་ལྟར་དམར་ཕྲ་ཕྲོ་བྱེད་ཅིང་ཕྱི་མ་གང་དུ་སྐྱེ་བའི་སྲིད་པའི་ས་བོན་འཇོག་པས། དེར་སངས་རྒྱས་ཀྱི་ཞིང་ཁམས་དྲན་པར་མཛོད་ཅིག །སྟོང་ཉིད་ཀྱི་དོན་གསལ་ལ་འཛིན་པ་མེད་པ་ཞིག་སྐད་ཅིག་གཉིས་ལ་འཆར་རོ། །དེ་ངོ་ཤེས་པར་གྱིས་དང་ཤིན་ཏུ་སྟོང་པ་ཡིན་ནོ། །དེ་ནས་ཀུན་གཞིའི་རྣམ་ཤེས་སྤྱོད་པས་ཚོགས་བརྒྱད་འགགས་ནས། ནང་གི་རྣམ་པར་ཤེས་པ་གསལ་སང་ངེ་བ་སྐད་ཅིག་གཅིག་ལ་འབྱུང་སྟེ། དེ་ངོ་ཤེས་པར་གྱིས་དང་སྟོང་པ་ཆེན་པོ་ཞེས་བྱའོ། །དེ་ནས་ཕྱི་འབྱུང་བ་བཞིའི་འདུས་པ་ཞིག །འབྱུང་བ་ལྔའི་རླུང་དབུ་མར་གནས་པའི་ཚེ། ནམ་མཁའ་གཡའ་
དག་པ་ལྟ་བུའི་གསལ་དང་ངེ། ཡོད་མེད་རྟག་ཆད་སྐྱེ་འགག་གནས་གསུམ་དང་བྲལ་བ་བསམ་བརྗོད་ཀྱི་ཡུལ་ལས་འདས་པ་མཐའ་བྲལ་དབུ་མའི་དོན། འཕགས་པ་ཀླུ་སྒྲུབ་ཡབ་སྲས་ཀྱི་བཞེད་དགོངས་ཇི་ལྟ་བ་དེ་ད་ལྟ་ཆོས་ཉིད་ཀྱི་སྟོབས་ཀྱིས་ཁྱེད་ལ་ཤར་ནི་ཡོད་པས། དེ་ངོས་ཟུངས་ལ་དེའི་སྟེང་དུ་མཉམ་པར་ཞོག་ཅིག །གང་གི་རྟེན་ཅིང་འབྲེལ་པར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལས་རག་ལས་གང་དེ་སྟོང་པ་དེ། །གང་གིས་སྟོང་ཉིད་ཤེས་ཏེ་བག་ཡོད་ཡིན། །འོ་དེ་ནི་རང་བཞིན་གྱི་སྟོང་པ་ཉིད་ཅེས་བྱ་བ་སྟེ། ལྟ་བ་ཐམས་ཅད་ཀྱི་མཆོག་དབུ་མ་ཐལ་འགྱུར་བའི་ལྟ་བ་ཡིན་པས། དེའི་ངང་དུ་ཡུན་རིང་དུ་བཞུགས་པར་ཞུ་ལགས། ཞེས་གསལ་གདབ་བོ།། ༈ ཕར་ཕྱིན་ལ་གོམས་པ་གཅིག་ཡིན་ན། འོ་ལགས་ཁྱེད་འདའ་ཁ་རུ་སོང་ནས་གདའ་བས། འདའ་ཀའི་
ཡེ་ཤེས་ངོས་འཛིན་པར་ཞུ། སྐུ་ཚེའི་འཕེན་པ་ཟད་ནས་ཕྱི་དབུགས་ཆད་ནི་ད་ལྟ་ཆོས་ཉིད་ཀྱི་ཐོབ་པའི་ཏིང་ངེ་འཛིན་བཞི་འཆར་བ། བཟུང་བའི་སྐབས་སུ་གདའ་ལགས། ནང་དུ་དུད་པ་ལྟ་བུ་ལང་ལོང་དུ་འབྱུང་ཞིང་འཆི་བ་ཡོང་ངོ་ཤེས་ཏེ། དེར་ཕ་རོལ་ཏུ་ཕྱིན་པའི་དོན་སྐད་ཅིག་ལ་ལྷང་ངེར་འཆར་རོ། །དེ་ངོ་ཤེས་པར་གྱིས་དང་སེང་གེ་རྣམ་པར་འགྱིང་བའི་ཏིང་ངེ་འཛིན་ཞེས་བྱ་བ་ཡིན་ནོ། །དེ་ནས་སྲིན་བུ་མེ་ཁྱེར་ལྟ་བུ་དམར་ཚེག་ཚེག་པ་དང་། གང་དུ་སྐྱེ་བའི་སྣང་བ་ཡུད་ཙམ་འཆར་བས་ཕྱི་མའི་ས་བོན་འཇོག་པས། དགའ་ལྡན་ན་བྱམས་པ་བཞུགས་པ་དེ་དྲན་པར་མཛོད་ཅིག །དེ་དང་མཉམ་དུ་ཕ་རོལ་ཏུ་ཕྱིན་པའི་དོན་གསལ་སེང་ངེ་བར་ཡུད་ཙམ་འཆར་བས། དེ་ངོ་ཤེས་པར་གྱིས་དང་། སྒྱུ་མ་ལྟ་བུའི་ཏིང་ངེ་འཛིན་ཞེས་བྱའོ། །དེ་ནས་ཚོགས་དྲུག་འགགས་ནས་ནང་དུ་རྣམ་པར་ཤེས་པ་གསལ་ཏ་ལེ་གནས་པ་ཞིག་སྐད་ཅིག་གསུམ་ལ་འཆར་ཏེ། དེ་ངོ་ཤེས་པར་གྱིས་དང་། དཔའ་བར་འགྲོ་བའི་ཏིང་ངེ་འཛིན་ཞེས་བྱ་བ་ཡིན་ནོ། །དེ་ནས་ཕྱི་རོལ་ཡང་སྐྱ་རེངས་ཤར་བ་ཙམ་དུ་གསལ་བའི་ཉམས་དང་། ནང་གི་སེམས་ཉིད་དོན་གྱི་ནམ་
མཁའི་སྤྲིན་དང་ཁུ་རླངས་དང་བྲལ་བ་ལྟ་བུ་ཞིག་འཆར་རོ། །ད་ལྟ་ཁྱེད་ལ་སྨྲ་བསམ་བརྗོད་དུ་མེད་པའི་དོན་དེ་མངོན་སུམ་དུ་ཤར་ནས་ཡོད་དོ། །དེ་ནི་རྡོ་རྗེ་ལྟ་བུའི་ཏིང་ངེ་འཛིན་ཞེས་བྱ་བ་སྟེ། སྤང་བྱ་ཐམས་ཅད་འཇོམས་ཤིང་གཞན་གྱིས་གཞོམ་དུ་མེད་པས་སོ། །ཡུམ་ཕ་རོལ་ཏུ་ཕྱིན་མ་ཞེས་བྱ་སྟེ། འཕགས་པ་བཞི་ཀ་འདི་ཁོ་ན་ལས་སྐྱེད་པར་བྱེད་པ་ཡིན་ནོ། །དོན་དམ་པ་སྟོང་པ་ཉིད་ཀྱང་འདི་ཡིན་ནོ། །ཡེ་ཤེས་ཀྱང་འདི་ཡིན་ནོ། །གཞི་འབྲས་དབྱེར་མེད་དོ། །འདའ་ཀ་ཡེ་ཤེས་ལས། སེམས་རྟོགས་ན་སངས་རྒྱས་ཡིན་པས་སངས་རྒྱས་གཞན་ནས་མི་འཚོལ་བའི་འདུ་ཤེས་བསྒོམ་པར་བྱའོ། །ཞེས་གསུངས་པས། འབྲས་བུ་སངས་རྒྱས་ཆོས་སྐུ་འདི་རང་ཡིན་པས་འདིའི་ངང་ལ་ཡུན་རིང་དུ་མཉམ་པར་ཞོག་ཅིག །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་འོད་གསལ་བའོ། །ཞེས་ངོ་སྤྲོད་གསལ་བཏབ་པར་བྱའོ། ། ༈ ཡང་དབང་བཞིའི་འགྲོས་ལ་གོམས་པ་ཞིག་ཡིན་ན།
འོ་ཆེ་གེ་ལགས་ཁྱེད་རྣམ་སྨིན་གདོས་བཅས་ཀྱི་ལུས་འདི་བཏུལ་ནས་ཕྱི་དབུགས་ཆད་པའི་སྐབས་སུ་གདའ་བས། ད་ལྟ་ཁྱེད་ལ་ཆོས་ཉིད་ཀྱི་ཐོབ་པའི་དབང་བཞིའི་ཡེ་ཤེས་རྣམས་འཆར་ཞིང་འདུག་པ་ངོས་བཟུང་བར་འཚལ། དེ་ཡང་ཕྱི་རྟེན་དང་བརྟེན་པའི་དཀྱིལ་འཁོར་དང་དཀྱིལ་འཁོར་པ་ཐམས་ཅད་ནང་འོད་གསལ་ཞུགས་ནས་ཐིམ་པས། ཚོགས་བརྒྱུད་རྣམས་འགགས་ནས་ཐལ་ལོ། །དེ་ནས་སྤྱི་བོ་ནས་ཡབ་ཧེ་རུ་ཀའི་ངོ་བོ་བྱང་སེམས་དཀར་པོ་དེ་བུམ་པ་ཆུའི་དབང་བསྐུར་བའི་ཚུལ་དུ་བབས་པས། གསལ་སྟོང་གི་ཉམས་ཤིག་སྐད་ཅིག་ལ་སྐྱེ་བ་དེ་བུམ་དབང་གི་དབང་དོན་དུ་ངོ་ཤེས་པར་གྱིས་ཤིག །ལུས་ཀྱི་རྩ་གནས་ཐམས་ཅད་ནས་ལས་རླུང་ཉི་ཁྲི་ཆིག་སྟོང་དྲུག་བརྒྱ་པོ་དེ་དབུ་མའི་ནང་དུ་ཞུགས་པས། ལྟེ་བ་ནས་ཨ་ཐུང་ཕག་མོའི་ངོ་བོ་གྱེན་དུ་འབར་ནས། བདེ་སྟོང་གི་ཉམས་ཤིག་སྐད་ཅིག་གཉིས་ལ་འཆར་བ་དེ་གསང་དབང་གི་དབང་དོན་དུ་ངོ་ཤེས་པར་གྱིས་ཤིག །དེ་ནས་ཐིག་ལེ་གཉིས་སྙིང་ཁར་འཕྲད་པས་རིག་སྟོང་གི་རྟོགས་པ་ཁྱད་པར་ཅན་ཞིག་སྐད་ཅིག་གསུམ་ལ་འཆར་བས་ཤེས་རབ་ཡེ་ཤེས་ཀྱི་དབང་དོན་དུ་ངོ་ཤེས་པར་གྱིས་ཤིག །དེ་
ནས་དཀར་དམར་སེམས་གསུམ་སྙིང་གར་དབུ་མའི་ནང་དུ་ཚུད་པས་ཚིག་དབང་རིན་པོ་ཆེ་སྔར་བླ་མས་ངོ་སྤྲད་པའི་ཕྱག་རྒྱ་ཆེན་པོ་སྤྲོས་པའི་ཡུལ་ལས་འདས་པ་དེ་ད་ལྟ་ཁྱེད་ལ་མངོན་སུམ་དུ་ཤར་ནས་ཡོད་པས།་དེ་ངོ་ཤེས་པར་གྱིས་མ་ཡེངས་པར་དེའི་སྟེང་དུ་མཉམ་པར་ཡུན་རིང་དུ་ཞོག་ཅིག །ཆོས་ཐམས་ཅད་དངོས་པོའི་དེ་ཉིད་དུ་མ་གྲུབ། ཁྱེད་རང་གི་སེམས་གཞི་མེད་རྩ་བྲལ་སྤྲོས་པའི་མཐའ་ཐམས་ཅད་དང་བྲལ་བ། སྣང་སེམས་དབྱེར་མེད་ཆོས་ཀྱི་སྐུར་ངོས་བཟུང་མེད་པར་ངོ་ཤེས་པར་གྱིས་ཤིག །ཅེས་ངོ་སྤྲད་དོ།། ༈ ཡང་བླ་མའི་རྣལ་འབྱོར་ལ་གོམས་པ་ཞིག་ཡིན་ན། འོ་ན་ཁྱོད་ལ་ད་ལྟ་ཕྱི་འབྱུང་བ་བཞིའི་ཐིམ་སྡུད་ཚར་ནས། ད་ལྟ་ཁྱེད་ལ་བླ་མ་སྐུ་བཞིའི་དགོངས་པ་དངོས་སུ་འཆར་སྐབས་སུ་གདའོ། །ཁྱེད་རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་དབྱེར་མེད་ལྷུན་གྲུབ་ཏུ་བཞུགས་ནས་ཡོད་དོ། །དཀར་ལམ་གྱི་སྣང་བ་དང་གསལ་སྟོང་གི་ཉམས་སྐད་ཅིག་ལ་འཆར་བ་དེ་གསལ་སྟོང་དབྱེར་མེད་བླ་མ་སྤྲུལ་པའི་སྐུ་ཡིན་ནོ། །ངོ་ཤེས་པར་གྱིས་ཤིག །དམར་ལམ་གྱི་སྣང་བ་དང་བདེ་སྟོང་གི་ཉམས་སྐད་ཅིག་གཉིས་ལ་འཆར་བ་དེ་བདེ་སྟོང་ཟུང་འཇུག་བླ་
མ་ལོངས་སྤྱོད་རྫོགས་པའི་སྐུ་ཡིན་ནོ། །དེ་ནས་ཕྱིའི་ཚོགས་དྲུག་འགགས་ནས་ནང་དུ་བདེ་སྟོང་གསལ་ཡེ་རེ་སྐད་ཅིག་གསུམ་གནས་པ་དེ་རིག་སྟོང་དབྱེར་མེད་བླ་མ་ཆོས་ཀྱི་སྐུ་ཡིན་ནོ། །དེ་ནས་སྤྲོས་པ་ཐམས་ཅད་དང་བྲལ་བ་ནམ་མཁའ་དག་པའི་དཀྱིལ་ལྟར་འཆར་བ་དེ་ནི་དྲན་སྟོང་དབྱེར་མེད་བླ་མ་ངོ་བོ་ཉིད་ཀྱི་སྐུ་ཡིན་པས། ད་ལྟ་བླ་མའི་སྐུ་གསུང་ཐུགས་དང་རང་སེམས་ཆོས་སྐུ་སྐྱེ་བ་མེད་པ་དང་། དུས་གསུམ་སངས་རྒྱས་ཐམས་ཅད་ཀྱི་དགོངས་པ་རྣམས་དབྱེར་མེད་གཅིག་ཏུ་འདྲེས་ནས་གདའོ། །ངོ་ཤེས་ཐག་ཆོད་པའི་ངང་ནས་ཡུན་རིང་དུ་དེའི་ངང་དུ་བཞུགས་པར་ཞུ། བླ་མ་རང་སེམས་ཆོས་སྐུ་གསུམ། །དབྱེར་མེད་གཅིག་ཏུ་འདྲེས་ནས་གདའ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་གསོལ་བ་འདེབས་སོ། །ཞེས་སོགས་བརྗོད། །ཀྱེ་སྣང་ཞིང་སྟོང་ལ་སྟོང་ཞིང་སྣང་། །ཞེས་སོགས་བརྗོད་དོ།། ༈ ཡང་བླ་མེད་ཀྱི་དཀྱིལ་འཁོར་གང་ཡང་རུང་བའི་བསྐྱེད་རྫོགས་ལ་གོམས་པ་ཞིག་ཡིན་ན། འོ་ཆེ་གེ་ཁྱེད་ཐུགས་དམ་མ་ཡེངས་ཤིག །ཁྱེད་ཀྱི་ཐོབ་པའི་བསྐྱེད་རིམ་རྫོགས་རིམ་དུ་སྡད་པའི་སྐབས་སུ་གདའོ། །ཕྱི་རོལ་སྣོད་
བཅུད་ཐམས་ཅད་གཞལ་ཡས་ཁང་ལ་ཐིམ་ནས་ཡུམ་བཞི་འོད་གསལ་ལ་ཞུགས་པས་འབྱུང་བ་བཞིར་ཐིམ། སེམས་དཔའ་ཡབ་ཡུམ་འོད་གསལ་དུ་ཞུགས་པས། ཚོགས་བརྒྱད་དང་ཡུལ་བརྒྱད་འགགས། རིགས་བཞི་གཞལ་ཡས་ཁང་དང་བཅས་པ་འོད་གསལ་ལ་ཞུགས་པས་ཕུང་པོ་ལྔར་ཐིམ། དེ་ནས་སྤྱི་བོ་ནས་སྐུ་རྡོ་རྗེས་ངོ་བོ་ཧཱུྃ་ཡིག་དང་སྐུའི་སྟོད་ཆ་མར་ཐིམ་པས། རྟོག་མེད་ཀྱི་ཡེ་ཤེས་སྐད་ཅིག་ལ་འཆར་ཏེ། དེ་དམ་ཚིག་གི་ཕྱག་རྒྱ་ཡིན་ནོ། །ངོ་ཤེས་པར་གྱིས་ཤིག །ལྟེ་བར་གསུང་རྡོ་རྗེའི་ངོ་བོ་ཨ་ཡིག་དང་སྐུ་སྨད་ཡར་ཐིམ་པས་རྟོག་མེད་ཀྱི་ཡེ་ཤེས་སྐད་ཅིག་གཉིས་ལ་འཆར་བ་དེ་ཆོས་ཀྱི་ཕྱག་རྒྱ་ཡིན་པས་ངོ་ཤེས་པར་གྱིས་ཤིག །དེ་ནས་སྐུ་བྱིང་ཐམས་ཅད་ཐུགས་ཀའི་ས་བོན་ཧཱུྃ་ཡིག་ལ་ཐིམ་པས། ཕྱི་རོལ་གྱི་སྣང་བ་ཐམས་ཅད་འགགས་ནས་ནང་དུ་ཡེ་ཤེས་མར་མེ་ལྟར་གསལ་བ་སྐད་ཅིག་གསུམ་ལ་འཆར་བ་དེ་ལས་ཀྱི་ཕྱག་རྒྱའི་དོན་ཡིན་པས་ངོ་ཤེས་པར་གྱིས། དེ་ནས་ཧཱུྃ་ཡིག་ཞབས་ཀྱུ་ནས་གྱེན་རྫོགས་སུ་ཡལ་ནས་ཐེག་ལེ་ནཱ་ད་ལས་འདས་ཏེ་འོད་གསལ་ལ་ཞུགས་ནས། སྤྲིན་མེད་པའི་ནམ་མཁའ་ལྟར་སྨྲ་བསམ་བརྗོད་ལས་འདས་པའི་འོད་གསལ་ཆོས་སྐུ་
སྐྱེ་བ་མེད་པ་ད་ལྟ་དངོས་སུ་ཤར་ནས་ཡོད་དོ། །དེ་ནས་ཕྱག་བཞིའི་ནང་ནས་གནས་ལུགས་ཕྱག་རྒྱ་ཆེན་པོ་ཡིན་ནོ། །དེའི་སྟེང་དུ་གཡོ་འགུལ་མེད་པར་ཡུན་རིང་དུ་མཉམ་པར་ཞོག་ཅིག །དོན་དམ་པའི་དཀྱིལ་འཁོར་ནི་དེ་ཡིན་ནོ། །ལྷ་ཡེ་ཤེས་སེམས་དཔའ་ཡང་དེ་ཡིན་ནོ། །དེའི་ངང་ལ་བཞུགས་ཤིག །ཅེས་གསལ་བཏབ་པར་བྱའོ།། ༈ ཡང་རོ་སྙོམས་དང་ཞི་བྱེད་སོགས་ལ་གོམས་པ་ཞིག་ཡིན་ན། འོ་ཆེ་གེ་ལགས་ད་ལྟ་ཁྱེད་འཆི་བའི་དུས་ལ་བབ་ནི་འདུག་པས། འཆི་བ་ལམ་ཁྱེར་གྱི་གདམས་ངག་ཉམས་སུ་ལེན་པར་མཛོད། འབྱུང་བའི་ཐིམ་སྡུད་དང་སྣང་མཆེད་ཐོབ་གསུམ་གྱི་རྟགས་ཅི་དང་ཅི་ཤར་ནི་བྱུང་ན་ཡང་། ལོག་ནས་འཆར་རྒྱུ་རྡུལ་ཙམ་ཡང་མེད་དོ། །རང་གི་སེམས་ཁོ་ན་ཡིན། །སེམས་ནི་གདོད་མ་ནས་ཆོས་སྐུ་སྐྱེ་བ་མེད་པ་ཡིན་པས། ཅི་ཤར་ཡང་སེམས་རང་ལུགས་སུ་ཀློད་ལ་མ་ཡེངས་ཙམ་དུ་ངོ་བོ་སྐྱོང་མཛོད། འཇིགས་སྐྲག་བྱུང་ན་ཡང་དེའི་ངོ་བོ་ལ་ལྟོས་ལ་མཉམ་པར་ཞོག་མཛོད། ལྷ་དང་མཁའ་འགྲོའི་སྣང་བ་བྱུང་ཡང་དགའ་བྲོད་མེད་པར་དེའི་ངོ་བོ་ལ་མཉམ་པར་ཞོག་མཛོད། གཞིའི་འོད་གསལ་ཞིག་ཚུར་ལ་འཆར་ནི་འོང་
བས་དེའི་ངང་དུ་ཡུན་རིང་དུ་མཉམ་པར་བཞག་པར་ཞུ། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་བྱམས་པས་གསུངས་སོ། །དེ་ལྟར་ཡུན་རིང་དུ་བཞུགས་ཤིག །ཅེས་གསལ་བཏབ་བོ།། ༈ འཕོ་བ་ལ་གོམས་པ་དང་གཅོད་ཡུལ་བ་ཞིག་ཆོས་སྐུར་འཕོ་ནས་ཐུགས་དམ་དང་འཕོ་བ་དབྱེར་མེད་བྱེད་ན། འོ་ལགས་ཆེ་གེ་ཁྱེད་འདས་པར་འདུག་པས། འཕོ་མེད་ཆོས་སྐུ་འཕོ་བ་ཉམས་སུ་ལེན་པར་ཞུ།་རིག་པ་ལྷན་ཅིག་སྐྱེས་པའི་ཡེ་ཤེས་འདི་དང་པོ་གང་ནས་ཀྱང་མ་འོང་མ་སྐྱེས། བར་དུ་གང་དུ་ཡང་མི་གནས། ཐ་མར་གང་དུ་ཡང་མི་འགྲོ་མི་འགགས་པའི་ཕྱིར། གང་འཕོ་བའི་གང་ཟག་ཀྱང་མ་གྲུབ། གང་དུ་འཕོ་བའི་ཡུལ་ཡང་མུ་མེད་དོན་ལ་སྐྱེ་བ་མེད་པའི་ཕྱིར་འཆི་བ་ཡང་མ་གྲུབ་མི་དམིགས་ཏེ། ཐམས་ཅད་རང་གི་སེམས་ཉིད་ཁོ་ན་ལས་གཞན་དུ་མ་གྲུབ་པས་རང་སེམས་དང་ཆོས་ཉིད་ཡི་དམ་བླ་མའི་ཐུགས་རྣམས་དབྱེར་མེད་དུ་འདྲེས་པ་ལས་སྣང་བ་དཀར་ལམ་དམར་ལམ་ནག་ལམ་སོགས་ཅི་ཤར་ནི་བྱུང་ཡང་སེམས་མ་བཅོས་ཆོས་སྐུའི་ངང་ལ་ཞོག་ཅིག་དང་། གཞིའི་འོད་གསལ་ཆོས་སྐུ་
སྐྱེ་བ་མེད་པ་དེ་སྤྲིན་མེད་པའི་ནམ་མཁའ་ལྟ་བུར་འཆར་རོ། །དེ་ནི་ཆོས་སྐུ་ཡུམ་ཆེན་མོའི་ཞལ་མཐོང་བ་ཡང་དེ་ཡིན། དང་པོའི་སངས་རྒྱས་ཀྱང་དེ་ཡིན། །འོད་གསལ་ཆོས་སྐུ་ཡང་དེ་ཡིན་པས། དེའི་ངང་ལ་ཡུན་རིང་དུ་ཞོག་མཛོད། འཕོ་བྱ་འཕོ་བྱེད་བྲལ་བའི་བྱ་བཏང་གི། །ལུས་གནས་ཡེ་ཤེས་བརྗོད་མེད་ཕྱག་རྒྱ་ཆེ། །དེ་ལས་གུད་ན་སངས་རྒྱས་གཞན་མེད་པར། །རང་གྲོལ་དྭགས་པོ་བཀའ་བརྒྱུད་འགྲུབ་གྱུར་ཅིག །ཅེས་གསལ་འདེབས་མ་ཟིན་པར་བསྐྱར་ལ་བྱའོ། །དེ་ཡན་ཆད་ནི་འཆི་བ་འོད་གསལ་ཆོས་སྐུར་སྦྱངས་ནས་བར་དོ་དང་པོའི་འོད་གསལ་ངོས་བཟུང་ནས། འཆི་བ་ཆོས་ཀྱི་སྐུར་སངས་རྒྱས་པའི་མན་ངག་གོ་བདེ་ཚིག་ཉུང་བར་བྱས་སོ། །བསྐྱེད་རིམ་གྱི་བར་དོ་གཉིས་ལོངས་སྐུར་སྦྱངས་ནས་སངས་རྒྱས་པར་གསུངས་ཀྱིས། བར་དོ་དང་པོར་བསྐྱེད་རིམ་བསྒོམ་པར་རྒྱུད་གཞུང་ནས་གསལ་བར་གསུངས་པ་ནི་མེད་ཀྱང་། དེང་སང་ཐུགས་དམ་གྲགས་ཆེ་བས། རྫོགས་རིམ་ལ་བློ་ཁ་མ་ཕྱོགས་པར་བསྐྱེད་རིམ་རྐྱང་པ་སྒོམ་མཁན་རྣམས་ཐུགས་དམ་ལ་བཞུགས་ལུགས་ཀྱི་གསལ་འདེབས་ནི། འོ་ལགས་ཆེ་གེ ཁྱེད་འཆི་བའི་དུས་ལ་བབ་པས། ཡི་དམ་གྱི་ལྷ་རྗེས་སུ་དྲན་པ་དང་། སྔགས་རྗེས་སུ་དྲན་པ་གལ་ཆེ་ཁྱེད་རང་གི་ལུས་ངག་ཡིད་གསུམ་དང་ཡི་དམ་ལྷའི་སྐུ་གསུང་
ཐུགས་དབྱེར་མེད་དུ་བཞུགས་ནས་གདའོ། །ཁྱེད་རང་ཡི་དམ་གྱི་ལྷ་ཚོགས་གསལ་བའི་ཐུགས་ཀར་ཡེ་ཤེས་སེམས་དཔའི་སྐུ་ཚོན་གང་བ། མེ་ལོང་གི་གཟུགས་བརྙན་ལྟར་སྣང་ལ་རང་བཞིན་མེད་པ་ལ་མར་མེ་རླུང་གིས་མ་བསྐྱོད་པ་ལྟར་གསལ་ཞིང་འོད་འབར་བ་མེ་ཤེལ་ལྟར་དྭངས་ཤིང་སྒྲིབ་པ་མེད་པའི་ཐུགས་ཀར། ས་བོན་ནམ་ཧཱུྃ་ཡིག་ཏིལ་གྱི་མར་མེ་ལྟ་བུ་ལ་སེམས་མ་ཡེངས་པར། རིག་པ་རྩེ་གཅིག་ཏུ་གཏོད་ཅིག་དང་། དཀར་ལམ་འཆར་བ་ཡབ་ཐབས་ཀྱི་ངོ་བོ་ཡིན་པར་ངོས་ཟུངས་ཤིག །དམར་ལམ་འཆར་དུས་ཡུམ་ཤེས་རབ་ཀྱི་རང་བཞིན་ཡིན་ནོ། །འདིའི་སྐབས་སུ་ཡི་དམ་གྱི་ལྷ་དེ་ཁྱེད་རང་བསུ་ལ་འོང་བས། དེའི་བསྐྱེད་རིམ་གསལ་ཐོབ་ལ་དེའི་ངང་དུ་མ་ཡེངས་པར་མཉམ་པར་ཞོག་མཛོད། དེ་ནས་སྟོང་ཉིད་ནམ་མཁའ་ལྟ་བུ་གཅིག་འཆར་བས། ཡི་དམ་གྱི་སྐུ་དེ་ཡང་ངོ་བོ་སྟོང་ལ་རང་བཞིན་གསལ་བ་འཇའ་ཚོན་ལྟ་བུར་སྒོམས་ཤིག །ཐུགས་ཀའི་ཡེ་ཤེས་སེམས་དཔའི་ཐུགས་ཀར་ཏིང་འཛིན་སེམས་དཔའི་ངོ་བོ་ས་བོན་དེ་ལ་མ་ཡེངས་པར་རིག་པ་རྩེ་གཅིག་ཏུ་གཏོད་ལ་ཡུན་རིང་དུ་བཞུགས་པར་ཞུ། རྒྱས་པར་ཡི་དམ་གང་ཡིན་དེའི་སྐུ་མདོག་ཕྱག་མཚན་རྣམས་གསལ་
འདེབས་པར་བྱའོ། །དེ་ནས་ཐུགས་དམ་གྱི་གེགས་སེལ་ནི། དམ་ཉམས་དང་གྲིབ་ཆེན་དང་སྡིག་ཆེན་རྩར་མི་བཏང་། ཕྱིར་ལྡོག་རོལ་མོ་མི་བྱེད། བླ་མ་ཆེན་པོ་ཐུགས་དམ་བརྟན་པོ་ལ་ཁྲུས་གསོལ་བྱེད་རུང་གསུངས་ཕལ་ཆེར་གྲོལ་དོགས་ཡོད། གཟའ་སྲུང་གི་འཁོར་ལོ་ཟབ་མོ་ཕུང་པོ་ལ་བཏགས། ཐུགས་དམ་ཟིན་ནས་འོད་གསལ་ལ་ཡེངས་བས་ཞག་དུ་སོང་མི་འབྱེད་པར་ཞག་ཉུང་ངུ་ལ་མང་པོ་སོང་སྣང་གི་གྲོལ་དོགས་ཡོད་པ་དང་། ཞག་བདུན་ཕྲག་ཟླ་རེ་རེའི་སོ་ལ་རྣམ་པར་རྟོག་པ་རེ་རེ་ལྡང་བར་གསུངས་པས་དེ་གཉིས་ཀྱི་གཉེན་པོ་ནངས་སྔ། རྟག་པར་རམ་ཞག་བདུན་ཕྲག་གི་མཚམས་རྣམས་སུ་མིང་ནས་དང་པོ་མི་བཟླ་བར། འོད་གསལ་མ་ཡེངས་ཁྱེད་འོད་གསལ་ལ་བཞུགས་ནས་ཞག་འདི་ཙམ་སོང་ད་རུང་ཞག་འདི་ཙམ་ལ་བཞུགས་པར་ཞུ། འོད་གསལ་ཆོས་སྐུ་སྐྱེ་བ་མེད་པ་དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་རྗེའི་དགོངས་པ་འདི་ལ་ཡུན་རིང་དུ་བཞག་པ་གལ་ཆེ། ཞེས་ཞུའོ། །དེ་ནས་ཐོས་གྲོལ་ཆེན་མོ་ལས་སྣ་བུག་ནས་ཁྲག་དང་ཆུ་སེར་མ་ཐོན་གྱི་བར་དུ་གསལ་ཡང་ཡང་གདབ་གསུངས་པའི་དོན་ཡིན་ནོ། །དེ་ནས་ཚེ་འདིར་ལྷག་མཐོང་ལ་ངེས་ཤེས་ཆུང་ཞིང་བདེ་གསལ་མི་རྟོག་པ་ལ་ཅུང་ཟད་ཆགས་འཛིན་ཡོད་པ་དེ་ཐུགས་དམ་བརྟན་དྲགས་འདུག་ན། གོལ་ས་ཡོད་དོགས་འདི་སྐད་གསལ་བཏབ་བོ། ༈ །ཆེ་གེ་ཁྱོད་སྒོམ་དུ་མེད་པའི་དོན་ལ་བློས་ཐུག་རེག་མེད་པར་
མཉམ་པར་ཞོག །བདེ་བའི་ཉམས་ལ་ཆགས་ཞེན་མ་བྱེད་ཅིག །འདོད་པའི་ཁམས་སུ་གོལ་ཉན་ནོ། །གསལ་བའི་ཉམས་ལ་མཆོག་འཛིན་མ་བྱེད་ཅིག །གཟུགས་ཁམས་སུ་གོལ་ཉན་ནོ། །མི་རྟོག་ལྟེང་པོའི་ཉམས་ལ་མ་ཞེན་ཅིག །གཟུགས་མེད་དུ་གོལ་ཉན་ཡོད། ཆོས་ཐམས་ཅད་སྟོང་པ་ཉིད་ཡིན་ནོ་བསམ་པའི་འཛིན་པ་དང་། ཅི་ཡང་མེད་དོ་བསམ་པ་དང་། སེམས་ནི་མཐའ་ཡས་སྙམ་པ་དང་། ནམ་མཁའ་དང་སེམས་དབྱེར་མེད་མཐའ་ཡས་སོ་སྙམ་པ་དང་།། བློ་ཡི་འཛིན་པ་ཐམས་ཅད་རྣམ་རྟོག་ཡིན་ནོ། །རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །ཞེས་གསུངས་སོ། །ཅི་ཡང་དྲན་པ་མེད་པ་ནི་འགོག་པ་ཆ་མཐུན་ཡིན་ནོ། །ཀྱེ་མ་རིགས་ཀྱི་སྐྱེས་བུ་ཁྱེད། །མ་བསྒོམ་མ་བསྒོམ་བློ་མ་བསྒོམ། །བློ་བསྒོམ་རྟོག་པའི་མུན་པར་ཞུགས། །རྟོག་པ་བྲལ་ལ་བསྒོམ་དུ་མེད། །བསྒོམ་མེད་བློ་འདས་མ་རྙེད་ན། །བསྐལ་པར་བསྒོམ་ཡང་འགོག་པ་ཡིན། །འགོག་ཆུང་མུན་པའི་ཏིང་འཛིན་ཡིན། །རྨོངས་གོལ་ལམ་ལ་མ་ཞུགས་སམ། །དེ་བས་སྤྲོས་བྲལ་སྟོང་པ་ཉིད། །སྨྲ་བརྗོད་བྲལ་བའི་ཆོས་སྐུ་ལ། །ཡུན་
རིང་བཞུགས་ཤིག་སྐལ་ལྡན་ཁྱེད། །ཅེས་གེགས་སེལ་ལོ། །དེ་ནས་དགོངས་ཞག་ལྷག་སོང་ཡང་མ་གྲོལ་ལམ། ད་ནི་གྲོལ་དགོས་ཀྱང་མ་གྲོལན། གཤེགས་གསོལ་བྱ་བ་ནི། འདིར་འཕོ་བ་བཏབ་ན་ཡང་ལེགས་མོད། བླ་མ་ཆེན་པོར་འཕོ་བ་མི་བདེ་བ་ཡིན་ན། འོ་ཆེ་གེ་ཁྱེད་གསོན་དང་། ཀྱེ་ཀྱེ་དྲན་པའི་ཡེ་ཤེས་བཞེངས། །ཡུམ་ཆེན་བཞི་ཡི་ཕྱོགས་བཞི་ནས། །དཔལ་ཆེན་ཁྱེད་ལ་གསོལ་བ་འདེབས། །འོད་གསལ་སྒྱུར་མའི་སྐུར་བཞེངས་ཤིག །ཡར་བྱོན་ཚངས་པའི་ལམ་ནས་བྱོན། །རིགས་བདག་རྩ་བའི་བླ་མ་དེ། །ཁྱེད་ཀྱི་དབུ་ཡི་གཙུག་ན་གདའ། །ཡར་བྱོན་བླ་མའི་དྲུང་དུ་བྱོན། །ཕྱོགས་བཅུའི་སྟོང་ཕྲག་ཞིང་ཁམས་སུ། །སངས་རྒྱས་དཔག་མེད་ཆོས་འཁོར་བསྐོར། །ཏིང་ངེ་འཛིན་གྱིས་ཁྱེད་ལ་བསྐུལ། །ད་ནི་འགྲོ་བའི་དོན་ལ་བཞེངས། །ད་ནི་སངས་རྒྱས་ཞལ་བལྟ་རན། །ད་ནི་འོད་གསལ་གཉུག་རེ་རིང་། ད་ནི་ཞིང་ཁམས་བསྒྲོད་རེ་རན། །ད་ནི་ཡི་དམ་སུན་མ་བསླེབས། །སྟོང་པའི་ངང་ཉིད་ལས། །ཟུང་འཇུག་ཡི་དམ་ལྷ་ཡི་སྐུ། །འཇའ་ཚོན་ལྟ་བུར་ད་བཞེངས་ཤིག །ཐུགས་རྗེས་སེམས་ཅན་དོན་ལ་དགོངས། །།ཕཊ་ཕཊ་ཕཊ། ཅེས་རོལ་
མོ་དང་སྤོས་བྱ། སྤྲོན་རང་གི་ཡི་དམ་གྱི་འོད་གསལ་ལས་བསྐུལ་བ་གླུ་དཀྱིལ་ཆོག་རྣམས་ནས་འབྱུང་བ་རྣམས་དབྱངས་དང་བཅས་པས་བྱའོ། །ཐུགས་དམ་གྲོལ་རྟགས་གཞུང་ནས་བཤད་པ་ནི་སྣ་བུག་ནས་ཁྲག་དང་ཆུ་སེར་དོན་པ་ཡིན་ཀྱང་། ལུས་ཤིན་ཏུ་རྒོག་ཆེ་བ་ལ་དོན་རྒྱུ་མེད་གསུངས་ལ་ནད་ཀྱི་དབང་གིས་མ་གྲོལ་བར་སྣ་ཁྲག་འབྱུང་བ་ཡང་སྲིད་པས་བརྟག་གོ །སྣའི་ཀ་བ་དེབ་པ་ཤ་བཀྲག་ངན་ཅིང་རོ་ངོ་ཆགས་པ། ཕུང་པོ་རུལ་ཞིང་འབུས་འཛིན་པ་ཡང་འཕོས་རྟགས་ཡིན་ནོ། །ཐུགས་དམ་ཟིན་དུས་དང་གྲོལ་དུས་སམ། གདུང་བཞུ་དུས་སམ། བདུན་ཕྲག་གི་མཚམས་སུ་ནམ་མཁའ་གཡའ་དག་ཅིང་སྤྲིན་དང་སེར་བུ་མེད་པ། འཇའ་ཚོན་ཟུག་པ་དང་མེ་ཏོག་གི་ཆར་འབེབས་པའམ། རིང་བསྲེལ་དང་ཐུགས་མ་ཚིག་པར་འབྱོན་པ་དང་། ཨ་དང་ཧཱུྃ་དང་རྡོ་རྗེ་དང་། རྡོ་རྗེ་འཆང་གི་སྐུ་སོགས་འབྱོན་ན་ཐུགས་དམ་སུ་ངེས་སོ། །འོད་གསལ་ངེས་པར་ཟིན་པ་དེ་ཆོས་སྐུར་སངས་རྒྱས་པ་ཡིན་པས། དེ་སྐོར་དུ་ཉམས་ལེན་བྱེད་པ་ཐམས་ཅད་སྔར་བས་ཉམས་བཟང་བ་སྐྱེ་བ་དང་། དེ་ལ་དད་གུས་ཀྱིས་གསོལ་བ་འདེབས་པ་དང་། རྗེས་སུ་འཇུག་པ་ཐམས་ཅད་ལ་རྟོགས་པ་བཟང་པོ་སྐྱེ་བར་ངེས་ཏེ་བཀའ་བརྒྱུད་ཀྱི་བླ་མ་རྣམས་བཞུགས་དུས་བས་འདས་ཚར་ནས་བྱིན་རླབས་ཆེར་འགྲོ་བ་གདའ་གསུངས་པས་དེའི་དོན་ཡིན་ནོ། །དེ་ལྟར་ཐུགས་དམ་གསལ་འདེབས་ཉུང་བསྡུས་འདི། རང་བྱུང་ཞབས་དང་རོལ་པའི་རྡོ་རྗེ་དང་། །ཆོས་ཀྱི་དབང་ཕྱུག་པདྨ་དཀར་པོ་སོགས། །དམ་པ་དུ་མས་མཛད་པའི་ཆོས་
དྲུག་དང་། །ཡང་དགོན་པ་་་རྒྱལ་མཚན་དཔལ་བཟང་པོ་དང་ཀུན་དགའ་རྣམ་རྒྱལ་ཟུར་མང་པ་དྲུང་ཚེར་ལུང་ཀུན་དགའ་རྣམ་རྒྱལ་དང་། །མཁའ་སྤྱོད་པ་་་་དྲུང་མཁའ་སྤྱོད་ནམ་མཁའ་རྒྱལ་མཚན། སོགས་མཛད་པའི་བར་དོའི་སྐོར། །ངམ་རྫོང་སྙན་བརྒྱུད་རོ་སྙོམ་ཞི་བྱེད་དང་། །གཅོད་ཀྱི་རྣམ་བཤད་ལ་སོགས་དུ་མ་དང་། །ཀློང་གསལ་སྙིང་ཐིག་མཁའ་འགྲོ་སྙིང་ཐིག་དང་། །བར་དོ་གསང་སྐོར་བར་དོ་ཐོས་གྲོལ་དང་། །སྦྱོར་དྲུག་རིམ་ལྔ་དྭགས་པོའི་བཀའ། འབུམ་སོགས། །བར་དོའི་གདམས་པ་ཀུན་གྱི་བཅུད་ཕྱུངས་ཏེ། །ལག་ཏུ་བླང་བདེར་གོ་སླ་ཚིག་ཉུང་བས། །བཤད་པའི་ན་ཡམ་ཚིག་གིས་མ་སྦག་ཅིང་། །མདོ་རྒྱུད་ལུང་འདྲེན་ངལ་བ་སྐྱུང་བྱས་ནས། །མངོན་སུམ་ལག་བཅང་ཉིད་དུ་གཏད་པ་འདི། །ཉམས་ལེན་ཅུང་ཟད་ཡོད་པ་ཐམས་ཅད་ལ། །ལོང་བའི་མིག་བུ་ཉིད་དུ་འདི་གྱུར་ཅིག །འདི་ཉིད་མཐོང་དང་ཐོས་དང་འབྲེལ་ཐོགས་རྣམས། །བར་དོ་དང་པོར་མངོན་སངས་རྒྱས་གྱུར་ཅིག །དེ་སྐད་རཱ་གའི་མིང་ཅན་དེས་སྨྲས་སོ། །འགལ་འཁྲུལ་ནོངས་པ་ཅི་མཆིས་མཁས་ལ་བཤགས། །འདི་ཕྱི་ཀུན་དུ་སྒྲིབ་པར་མ་གྱུར་ཅིག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།