གནམ་ཆོས་ཐུགས་ཀྱི་གཏེར་ཁའི་ཁ་བཀང་སཱཙྪའི་ཆོ་ག་བསོད་ནམས་རི་བོ།
གནམ་ཆོས་ཐུགས་ཀྱི་གཏེར་ཁའི་ཁ་བཀང་སཱཙྪའི་ཆོ་ག་བསོད་ནམས་རི་བོ་བཞུགས་སོ། །
གུ་རུ་རིན་པོ་ཆེ་ལ་ཕྱག་འཚལ་ལོ༔ དེ་ཡང་གནམ་ཆོས་ཐུགས་ཀྱི་གཏེར་ཁ་ལས༔ བསོད་ནམས་འཕེལ་ཐབས་སཱཙྪ་རིགས་གཉིས་གསུངས༔ དེ་ཉིད་ལག་ལེན་གསལ་བ་འདིར་བཀོད་བྱ༔ ས་ནི་ས་བདག་ཡིན་པས་ས་སླང་དགོས༔ དེ་མིན་ས་བདག་ཁྲོས་པས་བཀྲ་མི་ཤིས༔ ས་མ་བྱིན་བླངས་པའི་ཉེས་པས་ཕན་ཡོན་ཆུང་༔ དཀར་གཏོར་འབྲུ་སྣ་ཕུད་དང་སྐག་ལེ་ཁྱེར༔ ས་སྤྱིན་ཡོད་སར་སོང་ལ་དཀར་གཏོར་བྲན༔ ཧཱུྃ༔ དམ་ཚིག་ཡེ་ཤེས་དབྱེར་མེད་པའི༔ རང་ཉིད་འཇིག་རྟེན་དབང་ཕྱུག་དཀར༔ ཞལ་གཅིག་ཕྱག་གཉིས་གཡས་མཆོག་སྦྱིན༔ གཡོན་པས་པདྨ་དཀར་པོ་འཛིན༔ དར་དང་རིན་ཆེན་རྒྱན་གྱིས་སྤྲས༔ པདྨ་ཟླ་གདན་སྐྱིལ་ཀྲུང་
བཞུགས༔ ཕྱག་གཡས་ས་ལ་ལན་གསུམ་བརྡབ༔ ས་ཡང་རྣམ་པ་དྲུག་ཏུ་གཡོས༔ ས་ཡི་འོག་ནས་བརྟན་མ་ནི༔ གསེར་མདོག་རྒྱན་རྣམས་ཀུན་ཏུ་སྤྱས༔ ཕྱག་གཡས་ཁས་ལེན་ཕྱག་རྒྱ་དང་༔ གཡོན་པས་གཏེར་གྱི་བུམ་པ་འཛིན༔ ལྟེ་བ་མན་ཆད་ས་ནས་ཐོན། ས་བདག་ཚོགས་ཀྱིས་བསྐོར་ཏེ་བྱོན༔ ཨོཾ་པྲི་ཐི་དེ་ཝཱི་ས་པ་རི་ཝཱ་ར༔ བཛྲ་ས་མཱ་ཛཿ ཏིཥྛ་ལྷན༔ ཨགྷཾ་སོགས། རིན་ཆེན་སྣོད་དུ་གཏོར་མ་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཿཧཱུྃ་ཧ་ཧོ༔ཧྲཱིཿ ས་ཡི་ལྷ་མོ་བརྟན་མ་དང་༔ ལྟོ་འཕྱེ་ལ་སོགས་ས་བདག་ཚོགས༔ འདིར་གནས་ས་ཡི་བདག་
པོ་ཀུན༔ ས་གླུད་མཆོད་གཏོར་འདི་བཞེས་ལ༔ ས་འདི་བདག་ལ་གནང་བར་མཛོད༔ བདག་གིས་མཆོད་རྟེན་མང་བཞེངས་པའི༔ དགེ་བའི་ཆ་ཤས་ཁྱེད་ལ་བྱིན༔ དེ་ཕྱིར་དགེ་ཞིང་བྱང་སེམས་ཀྱིས༔ ས་འདི་བཀྲ་ཤིས་མཛད་དུ་གསོལ༔ བརྗོད་པས་བརྟན་མ་ལ་སོགས་དགྱེས་ས་འདི་གནང་བས་འགྲོ་དོན་སྤྱོད༔ གསུངས་ནས་བརྟན་མ་ས་ལ།ཐིམ༔ ས་བདག་གཞན་རྣམས་བྱེར་བར་གྱུར༔ སེང་ལྡེང་ཕུར་པ་སོར་བརྒྱད་པ༔ སྟོད་ནི་རྟ་མགྲིན་དམར་པོ་སྟེ༔ རྟ་སྐད་སྒྲོག་ཅིང་གྲི་ཐོད་འཛིན༔ སྐུ་སྨད་ཕུར་པ་མེ་དཔུང་འབར༔ གདེངས་ཤིང་ས་ལ་བཏབ་པ་ཡིས༔ གཏོར་མས་བྲིད་ཀྱང་མི་ཉན་པའི༔ གདུག་པ་ཅན་རྣམས་བྲོས་པར་གྱུར༔ ཨོཾ་པདྨནྟ་ཀྲིཏྟ་བཛྲ་ཀཱི་ལི་ཀཱི་ལ་ཡ་སརྦ་དུཥཱན་ཧཱུྃ་ཕཊ༔ དེ་ནས་ཧཱུྃ་མཛད་ཕྱག་རྒྱས་སྐག་ལེ་བཟུང་༔ དཔྱིད་གསུམ་བྱང་དང་དབྱར་གསུམ་ཤར་གྱི་ཕྱོགས༔ སྟོན་གསུམ་ལྷོ་དང་དགུན་གསུམ་ནུབ་ཀྱི་ཕྱོགས༔ ཁ་གྱུ་བྲུས་པས་ལྟོ་འཕྱེའི་ལྟོ་ཚིལ་ལོན༔ ས་ཡང་རིན་ཆེན་སྣ་ལྔའི་གཏེར་ཁ་སྟེ༔ ས་གཡང་དངོས་གྲུབ་ཐམས་ཅད་ཐོབ་པར་འགྱུར༔ ཨོཾ་ག་རུ་ཊ་ཧཱུྃ་ཕཊ༔ ཅེས་གསུངས་སྐག་ལེ་ས་ལ་ལན་གསུམ་རྒྱབ༔ ས་ཡང་རིན་ཆེན་སྣ་ལྔའི་ཕུང་པོར་གྱུར༔ ཨོཾ་བཛྲ་རཏྭ་ས་མ་ཏེ་ཡེ་ཧཱུྃ༔ ཚེས་
གྲངས་བཅུ་གཉིས་ཐེ་སེ་སྤྲེལ་ཁོག་རྒྱུ༔ དེ་ཉིན་སོར་གྲངས་དུ་བརྐོས་མི་རེ་འཆི༔ དེ་ཕྱིར་བཅུ་གཉིས་ས་ཆོག་ས་བརྐོ་སྤངས༔ དེ་མིན་ས་སློང་ཚར་ནས་ནམ་འདོད་དུས༔ ལས་མི་རྣམས་ཀྱིས་རྐོ་དང་ལེན་པར་རུང་༔ ས་སློང་བའི་ལེའུ་སྟེ་དང་པོའོ༔ ས་རྣམས་ཁྱིམ་དུ་བླངས་ནས་སྤུངས་བྱས་ཏེ༔ སྤོས་ཆུའི་ནང་དུ་རིན་ཆེན་བརྡར་བས་བྲན༔ ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སརྦ་ས་མ་ཏྲི་ས་ལེ་ཡེ་སྭཱ་ཧཱཿ ཞེས་པས་མི་གཙང་བ་རྣམས་སོང་བར་བསམ༔ རང་ཉིད་ཁྲོ་བོ་བདུད་རྩི་འཁྱིལ་པ་ལྗང་༔ ཕྱག་གཉིས་རྡོ་རྗེ་རྩེ་ལྔའི་ཕྱག་རྒྱ་ཡིས༔ ས་ལ་ལན་གྲངས་ཉེར་གཅིག་རེག་པ་ཡིས༔ ས་དེ་སྟོང་ཉིད་ཆོས་སྐུ་རྣམ་དག་འགྱུར༔ ཨོཾ་སྭ་བྷ་ཝ་སོགས། སྟོང་པའི་ངང་ལས་པདྨ་ཟླ་བའི་སྟེང་༔ ཧཱུྃ་ལས་ས་ཕུང་རིན་ཆེན་ཕུང་པོར་གྱུར༔ ཨོཾ་བཛྲ་ཁ་ན་ཁ་ན་ཧཱུྃ༔ རང་གི་ཐུགས་ཀའི་ཧཱུཾ་ལས་འོད་འཕྲོས་པས༔ འོག་མིན་རྣམ་པར་སྣང་མཛད་ཆེན་པོ་ཡི༔ ཐུགས་ཀར་ཕོག་པས་ཐུགས་དམ་རྒྱུད་བསྐུལ་ནས༔ སྨིན་མཚམས་མཛོད་སྤུའི་འོད་ཟེར་འཕྲོས་པ་ཡིས༔ ས་ཕུང་དེར་ཐིམ་ཡེ་ཤེས་ལྔ་རུ་གྱུར༔ ལག་གཉིས་མཛུབ་ཆུང་མཐེ་བོང་གཉིས་ཀྱིས་མནན༔ སོར་མོ་གསུམ་བརྐྱང་ལག་གཡོན་གན་རྐྱལ་ཏེ༔ ལག་གཡས་སྒྲུབ་པས་སོར་མོ་དྲུག་པ་སྟེ༔ ལན་རེ་རེག་ཅིང་གཟུངས་འདི་ཚར་རེ་སྟེ༔
ལན་གྲངས་ཉེར་གཅིག་ཕྱོགས་རྣམས་ཀུན་ནས་རེག་ན་མོ་བྷ་གཱ་ཝཱ་ཏེ་བེ་རོ་ཙ་ན་པྲ་བྷ་རཱ་ཛཱ་ཡ༔ ཏ་ཐཱ་ག་ཏཱ་ཡ༔ ཨརྡ་ཏེ་སཾམྱཀཾ་བུདྡྷ་ཡ༔ ཏདྱ་ཐཱ༔ སུཀེ་སུམྦྷེ༔ ས་མེ་ས་མ་ཡ༔ ཤཱནྟེ་དནྟེ༔ ཨ་ས་མ་རོ་པེ༔ ཨ་ན་ལམྦྷེ༔ ཏ་རམྦྷེ༔ ཡ་ཤོ་ཝརྟི༔ མ་ཧཱ་ཏེ་ཛཿ ནིར་ཀུ་ལེ༔ ནིརྡ་ཎེ། སརྦ་བུདྡྷ་ཨདྷིཥྛ་ན༔ ཨ་དྷིཥི་ཏེ་སྭཱ་ཧཱཿ ལག་པ་རྡོ་རྗེ་རྩེ་ལྔའི་ཕྱག་རྒྱ་ཡིས༔ ས་ཕུང་གདབ་པ་རྡོ་རྗེའི་གདན་གྱི་སྟེང་༔ ས་སྒང་བརྡུང་བས་བདག་དང་འགྲོ་ཀུན་གྱི༔ ལས་དང་ཉོན་མོངས་སྒྲིབ་པ་བཅོམ་པར་གྱུར༔ ཨོཾ་བཛྲ་མུདྨ་ར་ཨཱཿ་ཀོ་ཊ་ཡ་ཨཱཿ་ཀོ་ཊ་ཡ་ཧཱུྃ་ཕཊ༔ སློབ་དཔོན་གྱིས་བརྡུང་ཚུལ་བྱ༔ སཱཙྪ་གཙང་མ་ཡིག་བདུན་ལ་སོགས་ཀྱི༔ གཟུངས་ཆུའམ་བུམ་ཆུས་ཁྲུས་བྱ་ཁྲུས་ཆོག་གིས༔ གལ་ཏེ་ཚེ་འདས་རུས་ཚྭ་འདེབས་ན་ནི༔ ཨོཾ་བཛྲ་ས་མཱ་ཛཿཛཿཧཱུྃ་བཾ་ཧོཿ བརྗོད་ཅིང་རུས་པ་སྣོད་གཙང་ནང་དུ་བླུག༔ མེ་ལོང་ངོས་སུ་རུས་པ་འཆར་བཅུག་ལ༔ གཟུངས་ཆུ་འམ་ནི་བུམ་ཆུ་ནས༔ ཇི་ལྟར་བལྟམས་པ་ལ་སོགས་ཁྲུས་གསོལ་བྱ༔ སྡིག་ཅན་མིན་ཞིང་ཉེ་དུ་མིན་པས་ནི༔ རུས་པ་ཞིབ་པར་བརྡུང་ལ་ཆུ་ལ་སྦྱང་༔ སེ་གཅིག་མེད་ཅིང་ཆུ་མདོག་འགྱུར་ཙམ་བྱ༔ དེ་ཡིས་ས་ཝིས་སྦྲུ་བར་བྱ་བ་སྟེ༔ གསོན་པོའི་སོ་དང་སྐྲ་སེན་དེ་དང་མཚུངས༔ འཇིམ་པ་བྱ་བའི་ལེའུ་སྟེ་གཉིས་པའོ༔ རབ་ནི་གསེར་དངུལ་འབྲིང་ནི་མཚལ་རྒྱ་སྣག༔ ཐ་མ་དྲི་བཟང་སྦྱར་བའི་སྣག་ཚ་
ཡིས༔ ཨོཾ༔ ཡིག་དྲུག་ཤམ་དུ་རྟེན་འབྲེལ་སྙིང་པོའི་སྔགས༔ བྲིས་པའི་ཤོག་དྲིལ་དག་ཀྱང་བཅུག་བྱས་ཏེ༔ ཨོཾ་མ་ཧཱ་ཀཱ་ལ་རེ་མ་ཏི་ཧཱུྃ་ཕཊ༔ ཧ་སྭཱ་ཧཱཿ ཧ་སྭ་ཧྭ༔ མུ་ནེ་མུ་ནེ་སྭཱ་ཧཱཿ པུཎེ་པུཎྱེ་པུཊྚི་ཀུ་རུ་སྭཱ་ཧཱཿ ཞེས་བྲིས་པ་ཡི་ཤོག་དྲིལ་ཉི་ཤུ་བྱ༔ ཨོཾ་ཨཱཿཿཧཱུྃ་ཞེས་བྲིས་པའི་ཤོག་དྲིལ་ལ༔ མང་ཉུང་དང་བསྟུན་ཅི་འབྱོར་ཙམ་ཞིག་བྱ༔ བྱིན་རླབས་རྟེན་དང་སྨན་སྣ་ཞིབ་པར་བཏུལ༔ རིན་ཆེན་སྣ་ལྔ་ཅི་འབྱོར་ཕྱེ་མ་དང་༔ འབྲུ་སྣ་ཟས་ཕུད་རྙེད་ཚད་གཟུངས་ཆུས་སྦག༔ དེ་སྲིད་སྨན་སྣ་བྱིན་རྟེན་བཏབ་པ་དཀྲུགས༔ ནང་གཞུག་ཤོག་དྲིལ་ཡོད་པའི་སཱཙྪ་རྣམས༔ བཏབ་ནས་མ་ནོར་སཱཙྪ་སོ་སོར་བཞག་པར་བྱ༔ ནང་དུ་གཟུངས་འཇུག་མེད་པ་འབྲུ་སྣ་ཁོ་ན་སྟེ༔ ནས་འབྲུ་བདུན་བས་ཉུང་བ་མི་རུང་ཞིང་༔ ཧ་ཀྱང་མང་ན་ལྗང་བུས་སཱཙྪ་འཇིག༔ དེ་ཕྱིར་མང་ཉུང་ཚོད་དང་སྦྱར་ལ་བཅུག༔ ནང་གཞུག་གི་ལེའུ་སྟེ་གསུམ་པའོ༔ སཱཙྪ་འདེབས་པའི་མཁན་སློབ་གཙོ་བོ་ཉིད་ཤཱཀྱ་ཐུབ་པ་སྤྲུལ་སྐུའི་ཆ་ལུགས་ཅན༔ ཆོས་གོས་གསུམ་གསོལ་སེང་གེའི་ཁྲི་ལ་བཞུགས༔ དྲན་རྫོགས་དམ་ཡེ་དབྱེར་མེད་གསལ་བ་ཡི༔ ཕྱག་གཡོན་བརྐོས་ཕོར་ཤེས་རབ་སྟོང་པ་ཉིད༔ ཕྱག་གཡས་འབི་འབྲི་ཐབས་ཀྱི་རང་བཞིན་གཉིས༔ སྦྱར་བས་ལྷ་དང་མི་ཡི་བསོད་ནམས་བསྟན༔ གཟུགས་སྐུ་མཆོད་རྟེན་དཔག་མེད་འབྱོན་པར་གྱུར༔ ཨོཾ་ཡེ་དྷརྨ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱན་ཏ་ཐཱ་ག་ཏོ་ཧྱ་ཝ་དཏ་ཏེ་ཥཉྩཡོ་ནི་རོ་དྷ་ཨེ་བཾ་བཱ་དཱི་མ་ཧཱ་
ཤཱ་མ་ཎཿཡེ་སྭཱ་ཧཱཿ དེ་ནས་འཇིམ་པ་བཅད་ཅིང་༔ ན་མ་ས་མནྟ་བུདྡྷཱ་ནཾ༔ ཨོབཛྲ་ཨཱཿ་ཡུ་ཥེ་སྭཱ་ཧྭ༔ ནང་འཇུག་གཞུག་ཅིང་༔ ཨོཾ་བཛོདྡྷཱ་བཱ་ཡ་སྭཱ་ཧཱཿ འབི་འབི་བྱ་ཞིང་༔ ཨོཾ་བཛྲ་ཨ་ར་ཛེ་བི་ར་ཛེ་སྭཱ་ཧཱཿ སྣུམ་བྱུག་ཅིང་༔ བྱང་ཆུབ་སེམས་ཀྱིས་བསྒོས་པར་གྱུར༔ ཨོཾ་བཛྲ་དྷརྨ་དྷ་ཏུ་གནྡྷེ་སྭཱ་ཧཱཿ དེ་ནས་འབི་འབི་ཡར་བཞག་ཅིང་༔ ཨོཾ་ཨ་ས་ཏིཥྛ་ཏི་བཛྲ་ཡེ་སྭཱ་ཧཱཿ བརྐོས་ཕོར་དུ་བཅུག་ཅིང་༔ ཐབས་ཤེས་ཟུང་དུ་འཇུག་པར་གྱུར༔ ཨོཾ་དྷརྨ་དྷ་ཏུ་གནྡྷེ་སྭཱ་ཧཱཿ བརྐོས་ཕོར་རྡེབ་བམ་ཐོ་བས་བརྡུང་༔ ཨོཾ་བཛྲ་མུངྒ་ར་ཨཱཿ་ཀོ་ཊ་ཡ་ཨཱཿ་ཀོ་ཊ་ཡ་ཧཱུྃ་ཕཊ༔ དེ་ནས་བརྐོས་ཕོར་ནས་ཕྱུང་ཞིང་༔ རྒྱུ་འབྲས་ཚོགས་རྣམས་ཡོངས་རྫོགས་གྱུར༔ ཨོཾ་དྷརྨ་ར་ཏེ་སྭཱ་ཧཱཿ ཚེ་འདས་དོན་དུ་ཡིན་ན་རྩ་རིག་དང་༔ ཀཾ་ཀ་མ་ཎི་བཟླ་ཞིང་འདེབས་ཆོག་གོ༔ ཀུན་གྱིས་མི་འཁྲུགས་པ་ཡི་གཞུང་བཞིན་གསུངས༔ ཨོཾ༔ དེ་ནས་ས་ལ་བཞག་ཅིང་༔ རྒྱལ་བ་རྒྱ་མཚོའི་སྐུ་ཡི་བདག་ཉིད་དུ་གྱུར༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ མཆོད་རྟེན་རྩེ་ལ་ལག་པས་རེག་ཚུལ་གྱིས༔ ཨོཾ་སརྦ་ཏ་ཐཱ་ག་ཏ་མ་ཎི་ཤབ་ཏིཊྛི་ཛཱ་ལ་དྷརྨ་དྷ་ཏུ་གནྡྷེ་སྭཱ་ཧཱཿ ཞེས་བརྗོད་དེ་ནི་འཕྲལ་གྱི་རབ་གནས་ཡིན༔ གཅིག་གིས་ཡིན་ན་དེ་དག་རིམ་པ་བྱ༔ ཤེས་མཁན་མང་ན་སྔགས་རྣམས་སོ་སོར་དགོས༔ མི་རེས་ལས་ཀ་རེ་དང་སྔགས་རེ་བྱ༔ ཤེས་མཁན་ཉུང་ན་ཀུན་གྱིས་ཡིག་བདུན་ནམ༔ ཡིག་དྲུག་བཟླས་
པས་སྔགས་ཀུན་དེས་ཆོག་པར༔ གསར་རྙིང་ཐུགས་རྗེ་ཆེན་པོའི་གཞུང་ནས་གསུངས༔ སྒྲིབ་པ་དག་པར་འདོད་ན་ཡིག་བརྒྱ་དང་༔ ཚེ་རིང་འདོད་ན་ཚེ་གཟུངས་ཚེ་དཔག་སྔགས༔ དེ་བཞིན་ནད་ཞི་འདོད་ན་སྨན་ལྷའི་སྔགས༔ སྲིའུ་གསོ་བར་འདོད་ན་སོ་འབྲོང་སྔགས༔ ལོངས་སྤྱོད་རྒྱས་པར་འདོད་ན་འཛམ་ལྷའི་སྔགས༔ དེ་ལྟར་བཟླ་ཞིང་མཆོད་རྟེན་སོ་སོར་འབུལ༔ གང་ཡིན་ལྷ་དེའི་སྐུ་ནི་ལམ་ལམ་གསལ༔ དེ་ལས་འོད་འཕྲོས་དམིགས་ཡུལ་ལ།ཐིམ་པས་འདོད་དོན་འགྲུབ་པར་སྒོམ་ཞིང་སྨོན་ལམ་གདབ༔ དེ་ནས་སྐམ་ཐག་ཆོད་པར་སྐམ་བཅུག་སྟེ༔ ཡིག་དྲུག་ནང་གཞུག་ཅན་རྣམས་སེར་པོ་བྱ༔ མགོན་པོའི་སྔགས་ཅན་ཉི་ཤུ་སྔོན་པོ་བྱ༔ འབྲུ་གསུམ་ནང་གཞུག་ཅན་རྣམས་སེར་པོ་བྱ༔ གཞན་ཀུན་དཀར་རྩི་གསོལ་ན་ལེགས༔ སཱཙྪ་འདེབས་པའི་ལེའུ་སྟེ་བཞི་པའོ༔ གཤིན་པོའི་རུས་ཆོག་གསོན་པོའི་སྐྲ་ཚ་ནི༔ བསྐོར་བ་མི་ཁྱག་བསོད་ནམས་ཉམས་འགྱུར་ཕྱིར༔ གནས་བདག་གདུག་པ་ཅན་ནི་མི་གནས་ཤིང་༔ ས་དཔལ་བཟང་ཞིང་ས་དགྲ་མེད་པའི་ས༔ འོག་ཏུ་བརླན་མེད་ཆར་པ་ཁེབས་པ་ཡི༔ བྲག་ཕུག་ས་ཕུག་སོགས་སུ་སྦས་བྱས་ཏེ༔ གནས་བདག་དེ་ལ་དཀར་གཏོར་ཕུལ་བར་བྱ༔ དགོན་པ་གྲོང་པ་རི་ཁྲོད་གང་རུང་གི །ཤར་དུ་ཚ་ཁང་བྱས་ན་བཀྲ་མི་ཤིས༔ ཤར་ལྷོ་མཚམས་སུ་བྱས་ན་ཟ་ཁ་འགགས༔ ལྷོ་རུ་བྱས་ན་ནོར་དང་ལོངས་སྤྱོད་ཉམས༔ ལྷོ་ནུབ་མཚམས་བྱས་བྱི་ཕག་ལོ་ལ་ངན༔ ནུབ་ཏུ་བྱས་ན་ནད་ཉུང་རིམ་གྲོ་མཆོག༔ ནུབ་བྱང་མཚམས་སུ་
བྱས་ན་སད་སེར་ཉུང་༔ བྱང་དུ་བྱས་ན་དགྲ་དང་ཁ་མཆུ་ཉུང་༔ བྱང་ཤར་མཚམས་བྱས་ཆུ་ཁམས་པ་ལ་ངན༔ ལྟག་ཏུ་བྱས་ན་གཉའ་གནོན་མར་འགྲོ་ཆེ༔ འོག་ཏུ་བྱས་ན་མལ་ས་ནོན་པ་ཡིན༔ ཁྱིམ་གྱི་ནང་དུ་བླུགས་ཀྱང་ཕྱོགས་དེར་བརྩི༔ ཁྱིམ་ནང་གང་དུ་ཚ་ཁང་བྱས་པ་ཡིས༔ ས་རྒོད་གཉན་པོ་ཡིན་ཀྱང་ངེས་པར་ནོན༔ སྐྲ་རྒན་གཡང་ཅན་རུས་ཚ་ཁྱིམ་བཞག་ན༔ མི་གཡང་མི་ཉམས་བཀྲ་ཤིས་དགེ་བ་ཡིན༔ འཆི་ལུགས་ངན་དང་གཞོན་ཤི་རུས་ཚ་ནི༔ ཁྱིམ་དུ་མི་ཉལ་རི་ལ་བསྐྱལ་བ་ལེགས༔ གསོན་པོའི་སྐྱ་སོའི་སཱཙྪ་ཁྱིམ་དུ་རུང་༔ དེ་མིན་ཚ་ཚ་གཙད་མི་ཚྭ་ཁང་ནི༔ གང་དུ་བྱ་སར་ས་འདེབས་རྒྱས་པར་བྱ༔ དེ་མ་བྱས་ན་ལྷ་འདྲེའི་ཕོག་ཐུག་འོང་༔ དེ་ལྟར་ཚ་ཁང་ནང་དུ་སཱཙྪ་རྣམས༔ གཟའ་སྐར་བཟང་པོའི་ཉིན་པར་ཁྱེར་བའི་ཚེ༔ སྤྱན་འདྲེན་སྔགས་འདི་བརྗོད་ཅིང་སྤྱན་འདྲེན་ནོ༔ ཨོཾ་སྭ་བྷ་ཝ་བི་ཤུདྡྷེ་ཨ་ཧ་ར་ཨཙྩ་ཨཙཱ་དྷརྨ་དྷ་ཏུ་གནྡྷེ་སྭཱ་ཧཱཿ ཚ་ཁང་ནང་དུ་སཱཙྪ་རྣམས༔ མགོ་མཇུག་མ་ལོག་ལེགས་པར་སྤུངས༔ སྤྱན་འདྲེན་བྱེད་ཚེ་ཆག་གྲུག་སོགས༔ འོ་རྒྱལ་བྱུང་བའི་བཟོད་གསོལ་སྔགས༔ ཨོཾ་ཨཱཿཤ་ཤ་དྷ་ཏུ་གནྡྷེ་སྭཱ་ཧཱཿ ཞེས་པ་མང་ཞིག་བརྗོད་པར་བྱ༔ ཚ་ཁང་གི་ལེའུ་སྟེ་ལྔ་པའོ༔ ཡིག་དྲུག་ནང་གཞུག་ཅན་གྱི་ཚ་ཚ་བརུ༔ ཨོཾ་མ་ཎི་པདྨེ་ཧཱུྃ༔ མ་མ་པུཎེ་པུཊྚི་ཀུ་རུ་སྭཱ་ཧཱཿ སྟོང་བཟླས་སཱཙྪ་རྣམས་ལ་ཕུ་བཏབ་ལ༔ སཙྪ་ཀུན་གྱི་སྟེང་དང་དབུས་སུ་བཞག༔ མགོན་པོའི་སྔགས་གཞུག་སཱཙྪ་ཉི་ཤུ་པོ༔ ཨོཾ་མ་ཧ་ཀ་ལ་རེ་མ་ཏི་ཧཱུྃ་
ཕཊ༔ ཧ་སྭཱ་ཧཱཿ ཧ་སྭཱ་ཧཱཿ མུ་ནེ་མུ་ནེ་སྭཱ་ཧཱཿ པུཎྱེ་པུཎྱེ་པུཎྚི་ཀུ་རུ་སྭཱ་ཧཱཿ སྟོང་བཟླས་ཚ་ཚ་ལ་ཕུས་གདབ་བྱས་ལ༔ སཱཙྪ་མང་མའི་སྟེང་གི་ཕྱོགས་མཚམས་ཀྱི༔ མཐའ་ནས་བསྐོར་ཏེ་བཞག་པར་བྱ་བ་ཡིན༔ རབ་གནས་རྒྱས་པར་གནམ་ཆོས་གཞུང་ལྟར་བྱ༔ བསྡུ་ན་བགེགས་གཏོར་བཏང་ཞིང་བགེགས་བསྐྲད་ལ༔ གནས་བདག་དེ་ལ་དཀར་གཏོར་ཕུལ་བའི་རྗེས༔ མེ་ལོང་ངོས་ནས་ཁྲུས་གསོལ་སྤྱི་ལྟར་བྱ༔ ཨོཾ་སྭ་བྷཱ་ཝ་སོགས། ཆོས་རྣམས་མི་དམིགས་ཡེ་ནས་སྟོང་པ་ཉིད༔ དེ་ཡི་ངང་ལས་འབྱུང་བ་རིམ་བརྩེགས་སྟེང་༔ ཚ་ཁང་ཡེ་ཤེས་ཧཱུཾ་ཡིག་ཡོངས་གྱུར་ལས༔ རིན་ཆེན་སྣ་ཚོགས་ལས་གྲུབ་གཞལ་ཡས་ཁང་༔ ཡངས་ཤིང་རྒྱ་ཆེ་ཆོས་ཀྱི་དབྱིངས་དང་མཉམ༔ དེ་དབུས་སྣ་ཚོགས་པད་ཟླ་གྲངས་མེད་སྟེང་༔ ཧཱུཾ་ཡིག་དགུ་ཚོམ་དཔག་མེད་ཡོངས་གྱུར་ལས། རིན་ཆེན་སྣ་ཚོགས་ལས་གྲུབ་མཆོད་རྟེན་ནི༔ གཙོ་འཁོར་དགུ་དགུ་དཔོག་ཏུ་མེད་པ་ཡི༔ བུམ་པ་རྣམས་ཀྱི་ནང་དུ་གཞལ་ཡས་ཁང་༔ དེ་དབུས་པདྨ་འདབ་མ་སྟོང་ལྡན་རེ་དབུས་ཀྱི་ལྟེ་བར་བཅོམ་ལྡན་ཤཱཀྱ་ཐུབ༔ འདབ་མ་སྟོང་ལ་སངས་རྒྱས་སྟོང་གིས་བསྐོར༔ ཕྱོགས་མཚམས་བརྒྱད་པོའི་ལྟེ་བར་ཉེ་སྲས་བརྒྱད༔ རེ་རེར་བྱང་ཆུབ་སེམས་དཔའ་
སྟོང་རེས་བསྐོར༔ ཀུན་གྱིས་ཡི་གེ་དྲུག་པའི་ཆོས་གསུངས་ཤིང་༔ གནས་གསུམ་འབྲུ་གསུམ་ཐུགས་རྗེའི་ཧཱུཾ་འོད་ཀྱིས༔ ཕྱོགས་བཅུའི་ཞིང་ནས་རྒྱལ་བ་སྲས་བཅས་ཀུན༔ ཤཱཀ་ཐུབ་ཉེ་སྲས་བརྒྱད་དང་མཆོད་རྟེན་གྱི༔ རྣམ་པར་ཆར་བཞིན་བབས་ནས་རྟེན་ལ་ཐིམ༔ ཧཱུྃ༔ ཤཱཀ་ཐུབ་ཉེ་སྲས་བརྒྱད་དང་སྐུ་གདུང་ཚོགས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ ཐུགས་རྟེན་སྐུ་གདུང་རྣམས་ལ་དབང་མཆོག་བསྐུར༔ ལོག་འདྲེན་བགེགས་ཀྱི་བར་ཆད་བསལ་དུ་གསོལ༔ ཨོཾ་ཤཱཀྱ་མུ་ནེ་སརྦ་སཏཱ་ཤ་རི་རི་བཛྲ་ཨཱཿ་ཝེ་ཤ་ཡ་ཨ་ཨཱཿཿ རྡོ་རྗེ་བསྡུ་བའི་ཕྱག་རྒྱ་དང་བཅས་ཏེ༔ རོལ་མོ་འཁྲོལ་ཞིང་སྔགས་དེ་ལན་བདུན་བརྗོད༔ ཇི་སྲིད་འབྱུང་བཞིའི་གནོད་པས་མ་ཞིག་བར༔ རྟེན་འདི་རྣམས་ལ་བརྟན་པར་བཞུགས་སུ་གསོལ༔ ཏིཥྛ་ལྷན༔ རྟེན་འབྲེལ་སྙིང་པོ་བརྒྱ་རྩིས་སྔགས་ལ༔ ཕྱོགས་བཅུའི་ཞིང་ནས་རྒྱལ་བ་སྲས་བཅས་ཀྱི༔ སྐུ་གསུང་ཐུགས་ཀྱི་ངོ་བོ་ཨོཾ་དཀར་དང་༔ ཨཱཿདམར་ཧཱུྃ་མཐིང་རྣམ་པ་ཆར་ལྟར་བབ༔ རྟེན་ལ་ཐིམ་པས་སྐུ་གསུམ་ཡོངས་རྫོགས་གྱུར༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱཿ ཞེས་བརྗོད་ནས་དེ་ལན་བདུན་གཏོར་བར་བྱ༔ དེ་ནས་གདུགས་ནི་དངོས་སམ་ཙཀླུ་འམ༔ ཡང་ན་ལག་
པ་གདུགས་ཀྱི་ཕྱག་རྒྱ་འགྲོ་བ་ཀུན་གྱིས་འདི་འདོན་བྱ༔ བླ་མེད་སྐྱབས་དང་ལྡན་པ་ཡི༔ མཆོད་རྟེན་རྣམས་ཀྱི་དབུ་ལ་གདུགས་འབུལ་ལོ༔ ཨོཾ་བཛྲ་བྷ་ལ་ན་ཡེ་སྭཱ་དོམ་ཆོས་མི་ནུབ་བརྟན་པའི་སྲོག་ཤིང་འབུལ༔ ཨོཾ་བཛྲ་ཨཱཿ་ཡུ་ཥེ་སྭཱ་ཧཱཿ འགྲོ་ཀུན་སྟོབས་བཅུ་ཐོབ་ཕྱིར་འཁོར་ལོ་འབུལ༔ ཨོཾ་པྲ་མར་ད་ན་ཡ་སྭཱ་ཧཱཿ རྒྱལ་བ་བསྙེན་བཀུར་བྱ་ཕྱིར་ཅོད་པན་འབུལ་ཨོཾ་པ་ཌ་ཀ་ལཾ་བྷ་ཡ་སྭཱ་ཧཱཿ ཆོས་ཀྱི་སྙན་གྲགས་ཐོབ་ཕྱིར་དར་པན་འབུལ༔ ཨོཾ་བཛྲ་པ་ཏཾ་ཀི་སྭཱ་ཧཱཿ བདུད་བཞིའི་གཡུལ་ལས་རྒྱལ་བའི་རྒྱལ་མཚན་འབུལ༔ ཨོཾ་ཧཱུྃ་བྷི་ར་དྷ་ཛཡ་སྭཱ་ཧཱཿ འགྲོ་ཀུན་དཔེ་བྱད་ཐོབ་ཕྱིར་ཕྲེང་བ་འབུལ༔ ཨོཾ་རཏྣ་མཱ་ལེ་ཧཱུྃ་སྭཱ་ཧཱཿ འགྲོ་ཀུན་པད་གདན་ཐོབ་ཕྱིར་གདན་ཁྲི་འབུལ༔ ཨོཾ་པུཎྜེ་དྷ་རི་ཛ་ཡེ་སྭཱ་ཧཱཿ འགྲོ་ཀུན་ལོངས་སྤྱོད་ལྡན་ཕྱིར་ཞལ་ཟས་འབུལ༔ ཨོཾ་བཛྲ་ནེ་ཝིདྱ་པྲ་ཏིཙྪ་སྭཱ་ཧཱཿ དེ་རྣམས་དངོས་སམ་ཕྱག་རྒྱ་འམ༔ ཡིད་ཀྱིས་དམིགས་པས་ཡུལ་ཀྱང་ཆོག་པ་ཡིན༔ དེ་ནས་མར་མེ་ཅི་འབྱོར་ཕུལ་བྱས་ལ༔ མར་མེ་སྟོང་དུ་འགྱུར་བར་ཤོག༔ བི་ཛ་ཀ་ལ་ཨ་ཛི་ཏེ༔ སྔགས་དེ་བདུན་ནམ་ཉེར་གཅིག་བརྗོད༔ དེ་ནས་དེར་ཡོད་ཀུན་གྱིས་ཕྱག་འཚལ་ཞིང་༔ ཨ་མྲྀ་ཏ་ཡེ་བི་ཛ་ཡེ༔ ཕྱག་གཅིག་ཁྲི་རུ་
འགྱུར་བར་ཤོག༔ དེ་ནས་སྐོར་བ་བདུན་སོགས་བྱ་བའི་དུས༔ རྒྱལ་ཆེན་ཕྱོགས་སྐྱོང་ཡུལ་དེའི་གཞི་བདག་དང་༔ འགྲོ་དྲུག་ཀུན་གྱིས་སྐོར་བ་བྱེད་པར་གྱུར༔ ད་ལོ་ཤཱ་ཙ་ཀོ་རོ་རོ༔ སྐོར་བ་འབུམ་དུ་འགྱུར་བར་ཤོག༔ འཇིག་རྟེན་སྐྱོང་བ་ཐམས་ཅད་དང་༔ ཡུལ་འདིའི་གཞི་བདག་ཐམས་ཅད་དང་༔ ཁྱད་པར་གནས་འདིའི་གཞི་བདག་གིས༔ སྐུ་གདུང་ཚ་ཚའི་ཁང་བུ་འདི༔ བདག་ཏུ་བཟུང་ལ་གཉེར་ཁ་མཛོད༔ ཞིག་རལ་མ་བཏང་སྲུང་ཞིང་སྐྱོངས༔ སྔོན་གྱི་དམ་ལ་མ་འདའ་བར༔ བཅོལ་བའི་ཕྲིན་ལས་འགྲུབ་པར་མཛོད༔ ཨ་ཡ་མ་དུ་རུ་ཙ་ཤ་ན་ས་མ་ཡ་རཀྟ༔ དེ་ནས་ཡིག་དྲུག་འུར་འདོན་བྱ༔ བཀྲ་ཤིས་གང་ཤེས་རྒྱས་པར་བརྗོད༔ མི་དམིགས་ངང་ནས་བསྔོ་སྨོན་བྱ༔ དེ་ཡིས་སཱཙྪ་བཞེངས་མཁན་དང་༔ སྐོར་བ་བྱེད་མཁན་ཐམས་ཅད་ཀྱི༔ སྐྱེ་བོ་བསོད་ནམས་འཕེལ་བ་ཡི༔ རབ་གནས་ལེའུ་སྟེ་དྲུག་པའོ༔ ༈ ཡང་སྙིང་འདུས་པའི་རྒྱུད་ལས༔ ཞིང་ཁམས་རྣམ་དག་དེས་འགྲུབ་འགྱུར༔ ཅེས་དང་༔ རབ་བདེ་བ་ཅན་དུ་སྐྱེ༔ འབྲིང་འཁོར་ལོས་སྒྱུར་བའི་རྒྱལ་པོ༔ ཐ་མ་འཇིག་རྟེན་གྱི་ཁམས་སུ་བདེ་ལེགས་ཤིང་༔ ཚེ་རིང་བར་འགྱུར་རོ༔ དགོངས་འདུས་སཱཙྪ་ལས༔ བསྐལ་པ་གྲངས་མེད་པར་ལས་དང་ཉོན་མོངས་པའི་སྡིག་པ་དང་སྒྲིབ་པ་ཉེས་བྱས་ཅི་བསགས་པ་ཐམས་ཅད་དག་པ་དང་༔ བསོད་ནམས་ཀྱི་ཚོགས་རྒྱ་ཆེན་པོ་ཡར་ལྡན་དུ་འཕེལ་ཞིང་༔ འབྲས་བུ་ཡེ་ཤེས་ཀྱི་ཚོགས་ཡུན་རིང་འགྱང་
བ་མྱུར་དུ་སྨིན་པ་དང་༔ གནས་སྐབས་ཚེ་འདིར་ནད་དང་གནོད་པ་རྐྱེན་ངན་བར་ཆད་འབྱུང་པོ་མི་དང་མི་མ་ཡིན་པའི་གནོད་འཕ་རོལ་གྱི་བསམ་སྦྱོར་རིག་སྔགས་ཀྱི་སྦྱོར་བ་ངན་པ་ལ་སོགས་མི་མཐུན་པའི་ཕྱོགས་ཐམས་ཅད་བཟློག་ཅིང་ཞི་ནས༔ ཚེ་རིང་ནད་མེད་ཟས་ནོར་ལོངས་སྤྱོད་དང་༔ དཔལ་འབྱོར་ཆོས་སྲིད་ལ་སོགས་བདེ་ལེགས་ཀྱི་ཡོན་ཏན་ཐམས་ཅད་འཕེལ་ཏེ༔ བསམ་པའི་དངོས་པོ་ཐམས་ཅད་འཕེལ་ཏེ༔ ཡིད་བཞིན་དུ་འགྲུབ་པར་འགྱུར་བ་སྟེ༔ མདོར་ན་ལེགས་པའི་ཡོན་ཏན་ཐམས་ཅད་ཡར་ལྡན་དུ་འཕེལ་ནས་ཉེས་པའི་སྐྱོན་མཐའ་དག་མྱུར་དུ་བྱུང་བར་འགྱུར༔ མཐར་ཐུག་བླ་ན་མེད་པ་ཡང་དག་པར་རྫོགས་པའི་སངས་རྒྱས་མྱུར་དུ་ཐོབ་པར་བྱེད་པའི་རྒྱུར་གྱུར་ཅིག༔ གང་གིས་གཟུངས་སྔགས་ཀྱི་ཆོ་ག་དང་བཅས་འཇིམ་པའི་གང་བུ་ལ་སཱཙྪ་གཅིག་བཏབ་ན༔ བྱེ་བ་བཏབ་པར་འགྱུར་རོ༔ དེ་བཞིན་དུ་བརྒྱ་རེ་བཏབ་པའི་ཕན་ཡོན་ནི༔ འཕགས་པ་ཉན་ཐོས་དགྲ་བཅོམ་པ་རྣམས་ཀྱིས་ཀྱང་བརྗོད་པར་མི་ནུས་སོ༔ སྟོང་བཏབ་པའི་ཕན་ཡོན་ནི༔ བྱང་ཆུབ་སེམས་དཔའ་རྣམས་ཀྱིས་ཀྱང་བརྗོད་པར་མི་ནུས་སོ༔ འབུམ་བཏབ་པའི་ཕན་ཡོན་ནི༔ ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱིས་ཀྱང་བརྗོད་པར་མི་ནུས་སོ༔ གསང་འདུས་རྒྱུད་ལས༔ བསོད་ནམས་མཐའ་ཡས་བསམ་པ་འགྲུབ༔ ཅེས་དང་༔ སཙྪ་སྤྲུལ་སྐུ༔ གསུང་སྔགས་ཡིག་འབྲུ་ལོངས་སྐུ༔ ཏིང་འཛིན་ཆོས་ཀྱི་སྐུ་སྟེ༔ ཚ་ཚ་རེ་རེ་ལ་སྐུ་གསུང་ཐུགས་རྟེན་ཡོངས་སུ་རྫོགས་པའི་ཡོན་ཏན་དཔག་ཏུ་མེད་དོ།
གནས་སྐབས་ལ་ཕྱི་ནང་གི་བར་ཆད་སེལ་ཞིང་མཐར་ཐུག་སྐུ་གསུམ་ཐོབ་པར་འགྱུར་ཏེ༔ ཡོན་ཏན་ཐམས་ཅད་འགྲུབ་སྟེ་ངོ་མཚར་རོ༔ ཐུགས་སྒྲུབ་ཡང་སྙིང་འདུས་པའི་ཚ་ཚ་ལས༔ མདོར་ན་བསོད་ནམས་ཡེ་ཤེས་ཀྱི་ཚོགས་བསག་དང་ལམ་གྱི་བར་ཆད་ཐམས་ཅད་སེལ་བ་ལ་སྐུ་གསུམ་ཚ་ཚ་བཏབ་པ་ལས་ཕན་ཡོན་ཆེ་བ་མེད་པར་མདོ་རྒྱུད་དང་ལུང་དུ་མ་ནས་གསུངས་སོ༔ དཔུང་བཟང་གིས་ཞུས་པ་ལས༔ བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན༔ སྡིག་པ་དག་ཕྱིར་རྟག་ཏུ་གདབ་པར་བྱ༔ ཞེས་དང་༔ འཇམ་དཔལ་ཆོ་ག་འདུས་པའི་རྒྱུད་ལས་ཀྱང་གསུངས་པ་ལྟར༔ ཡུན་རིང་བསྒོམས་ཀྱང་ཉམས་རྟོགས་མ་སྐྱེས་སམ༔ ཡི་དམ་བསྒྲུབས་ཀྱང་ཡི་དམ་མ་འགྲུབ་ན༔ ཚ་ཚ་ཁྲི་སྟོང་བརྒྱ་དང་བཅུ་གཉིས་བཏབ། མཆོད་རྟེན་འབུམ་ཕྲག་ལྷག་ཙམ་ཡིན་པའི་ཕྱིར༔ ཉམས་དང་རྟོགས་པའི་གོ་སྐྱེད་ཆེན་པོ་དང་༔ ཡི་དམ་ལྷ་ཡི་འགྲུབ་རྟགས་གསལ་པོར་འཆར༔ དེ་ཡི་ཚ་ཚ་ལེགས་པར་ཚར་བའི་རྗེས༔ མཚམས་སྒྲུབ་ཅུང་ཟད་བྱ་དགོས་མན་ངག་ཡིན༔ དེ་ལྟར་གནམ་ཆོས་ཁ་བཀང་ཚ་ཚ་འདི༔ ཐག་རིང་དགའ་རྗེའི་ཕྱོགས་ནས་བྱོན་པ་ཡི༔ བཙུན་པ་བཞི་ཡིས་ནན་གྱིས་བསྐུལ་བའི་ཕྱིར༔ གཏེར་བློན་རཱ་ག་ཨ་སྱ་ཞེས་བྱ་བས༔ མཚམས་ཀྱི་ཁུང་ནས་ངག་ནས་སྨྲས་པ་ལྟར༔ དགེ་སློང་བརྩོན་འགྲུས་ཞེས་བྱས་བྲིས༔ ཉེས་འགལ་མཆིས་ན་སྲུང་མ་རྣམས་ལ་བཤགས༔ དགེ་བས་གཏེར་སྟོན་དགོངས་པ་རྫོགས་པ་དང་༔ གནམ་ཆོས་བསྟན་པ་འཕེལ་ཞིང་རྒྱས་པར་མཛོད༔ སརྦ་མངྒ་ལཾ༔ ༔