སཱཙྪའི་ཕན་ཡོན་མདོར་བསྡུས་པ་རིན་པོ་ཆེའི་ཕུང་པོ།
སཱཙྪའི་ཕན་ཡོན་མདོར་བསྡུས་པ་རིན་པོ་ཆེའི་ཕུང་པོ་ཞེས་བྱ་བ་བཞུགས་པའི་དབུ་ཕྱོགས་ལགས་སོ། །
ན་མོ་ལོ་ཀི་ཤྭ་ར་ཡེ། འཕགས་པ་ཐུགས་རྗེ་ཅན་ལ་ཕྱག་འཚལ་ནས། །སྐུ་གདུང་སཱཙྪའི་ཕན་ཡོན་ཅུང་ཟད་བརྗོད། །དེ་ལ་སངས་རྒྱས་བཅོམ་ལྡན་འདས་ཀྱི་རྟེན་ནི། ཆོས་སྐུའི་རྟེན་དང་། ལོངས་སྐུའི་རྟེན་དང་། སྤྲུལ་སྐུའི་རྟེན་གསུམ་ལས། སཱཙྪ་ཆོས་སྐུའི་རྟེན། སྐུ་ལོངས་སྤྱོད་རྫོགས་སྐུ། པར་བཏབ་པ་ལོངས་སྐུའི་རྟེན། ཐུབ་དབང་དང་བླ་མ་སོགས་སྐུ་གཟུགས་པར་བཏབ་པ་སྤྲུལ་པའི་སྐུའི་རྟེན་ཡིན་ནོ། །ཆོས་སྐུའི་རྟེན་ལ་ལྷུང་བཟེད་ཁ་སྦུབ་པ་ལྟར་ཡོངས་སུ་གྲགས་པ་དང་། ཁང་བུ་ལྟར་ཡོངས་སུ་གྲགས་པ་དང་།། རྒྱལ་མཚན་ལྟར་ཡོངས་སུ་གྲགས་པ་
དང་། གསུམ་ལས། སཱཙྪ་འདི་རྒྱལ་མཚན་ལྟར་ཡོངས་སུ་གྲགས་པ་དེ་ཡིན་ནོ། །རྒྱལ་མཚན་ལྟར་ཡོངས་སུ་གྲགས་པ་དེ་ལའང་དབྱེ་ན། བདེ་གཤེགས་མཆོད་རྟེན་བརྒྱད་ཡོད་པ་ལས། བརྒྱད་ཁ་སཱཙྪ་འདི་ལ་ཚང་བ་ཡིན་ཏེ། བརྒྱད་ཁ་ལ་མཆོད་རྟེན་གྲུ་བཞིའམ་ཟླུམ་པོའམ། །པདྨའམ་ཟླ་གམ་ཅི་མཛེས་ཆོག་པར་གསུངས་པས་འདི་པདྨའི་གདན་ཡིན་པས་རྨང་དགེ་བ་བཅུ་མཚོན་ནོ། །པདྨའི་འདབ་མ་ཅན་ནི་པདྨ་ཅན་ཏེ་སྐུ་བལྟམས་པའི་མཆོད་རྟེན། བང་རིམ་བཞི་པ་ནི་རྡོ་རྗེ་གདན་དུ་བྱང་ཆུབ་པའི་མཆོད་རྟེན། བཀྲ་ཤིས་སྒོ་མང་གི་མཆོད་རྟེན་ནི་ཆོས་ཀྱི་འཁོར་ལོ་བསྐོར་
བའི་མཆོད་རྟེན། ཕྱོགས་བཞི་འབུར་ཡོད་པ་ནི་ཆོ་འཕྲུལ་ཆེན་པོ་བསྟན་ནས་མུ་སྟེགས་ཕམ་བྱེད་མཆོད་རྟེན། སྐས་ཡོད་པ་ནི་ལྷ་བབ་མཆོད་རྟེན། བང་རིམ་བཞིའི་ཟུར་བཅད་པ་ནི་དགེ་འདུན་དབྱེན་ཟླུམ་མཆོད་རྟེན། བང་རིམ་གསུམ་པོ་ཟླུམ་པོ་ནི་སྐུ་ཚེ་བྱིན་གྱིས་བརླབས་པའི་མཆོད་རྟེན། མགུལ་ཆུ་མན་ཆད་བཞུགས་པ་ནི། མྱ་ངན་འདས་པའི་མཆོད་རྟེན། རླུང་དགེ་བ་བཅུ། བང་རིམ་དང་པོ་དྲན་པ་ཉེར་བར་གཞག་པ་བཞི། གཉིས་པ་ཡང་དག་པའི་སྤོང་བ་བཞི། གསུམ་པ་རྫུ་འཕྲུལ་གྱི་རྐང་པ་བཞི། བཞི་པ་དབང་པོ་ལྔ། བུམ་རྟེན་མགུལ་ཆུ་ནི་སྟོབས་ལྔ། བུམ་པ་ནི་བྱང་ཆུབ་ཀྱི་ཡན་ལག་བདུན། པུ་ཤུ་སྟེ་བྲེ་ནི་འཕགས་པའི་ལམ་ཡན་ལག་བརྒྱད། སྲོག་ཤིང་ནི་ཤེས་པ་བཅུ། །ཆོས་འཁོར་ནི་སྟོབས་བཅུ་དང་དྲན་པ་ཉེར་གཞག་གསུམ། གདུགས་ནི་ཐུགས་རྗེ་ཆེན་པོ། ཏོག་ནི་ཆོས་སྐུའི་རང་བཞིན་མཚོན་ནོ། །དེ་ལྟར་མཆོད་བརྒྱད་མ་ནི། བདེ་གཤེགས་མཆོད་རྟེན་བརྒྱད་ཚང་ལ། །མཆོད་བརྒྱ་མ་ལ་ཡང་། མྱ་འདས་མཆོད་རྟེན་བརྒྱ་རྩ་ཚང་བ་ཡིན་ཏེ། ཨོ་རྒྱན་རིན་པོ་ཆེས། མཚོན་པ་རྟོགས་ཀྱི་མཆོད་རྟེན་ལ་རྣམ་པ་མང་ཡང་། བདེ་བར་གཤེགས་པའི་སྐུ་གདུང་
བཅུ་གཉིས་ལ་སོགས་པ་མང་ཡང་འདིར་བྱ་སླ་ལ་ཕན་ཡོན་ཆེ་བ་ཚ་ཚའི་རིམ་པ་བསྟན་པ་ནི། ཞེས་གསུངས་སོ། །དེ་ལྟར་སྐུ་གདུང་ཚ་ཚ་ཡང་། ཆོས་སྐུ་སྐྱེ་མེད་ཆོས་ཀྱི་དབྱིངས་དང་ཐ་དད་མེད་དེ། ཐུགས་རྗེ་ཆེན་པོ་གསང་འདུས་ཀྱི་སྐུ་གདུང་ཚ་ཚའི་རིམ་པ་ལས། ངོ་བོ་རང་བཞིན་ཆོས་སྐུ་སྐྱེ་བ་མེད་པ་ལས། གཟུགས་སྐུ་ཡང་དོན་ཆོས་སྐུའི་གདུང་ལས་འགྱུར་བ་མེད་པས་སྐུ་གདུང་ཞེས་བྱ། དེས་ལས་དང་ཉོན་མོངས་སྲེག་ཅིང་འགྲོ་བའི་དཔལ་དུ་འབར་བས་སྐུ་གདུང་ཞེས་བྱའོ། །ཞེས་གསུངས་སོ། །ཆོས་སྐུའི་རྟེན་ཡིན་པར་མ་ཟད། སངས་རྒྱས་སྐུ་གསུམ་ཚ་ཚ་ལ་ཚང་སྟེ། ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས། དེ་ནས་ཚོགས་ཆེན་བསག་པའི་ཕྱིར། །ཚ་ཚའི་རིམ་པ་བཤད་པར་བྱ། །ས་བཟང་རིན་ཆེན་བརྡར་བ་ལ། །ཡིག་བདུན་བཟླ་ཞིང་འབི་འབི་བྱ། །རང་ཉིད་ཡི་དམ་ལྷར་གསལ་བས། །སྐུ་པར་སྟོང་པ་ཆོས་སྐུ་ལ། །འབི་འབི་ལོངས་སྤྱོད་རྫོགས་པའི་སྐུ། །ཚ་ཚ་སྤྲུལ་སྐུ་འགྲོ་བའི་དོན། །ཐུགས་རྗེ་ཆེན་པོར་ལམ་ལམ་བྱོན། །ཨོཾ་མ་ཎི་པདྨེ་ཧཱུྃ་ཧྲཱིཿ ཆོས་སྐུ་སྟོང་པའི་ངང་ཉིད་ལས། །རང་བྱུང་ཐུགས་རྗེ་ཆེན་པོར་ཤར། །འགྲོ་བའི་དོན་
ལ་བཞུགས་སུ་གསོལ། །ཞེས་པ་བརྗོད་ཅིང་གདབ་པར་བྱ། །ཞེས་གསུངས་སོ། །ཚ་ཚ་བཏབ་པས་རྫོགས་པའི་སངས་རྒྱས་ཀྱང་འཐོབ་ན་གཞན་ཡོན་ཏན་ལྟ་ཅི་སྨོས། དམ་པའི་ཆོས་པདྨ་དཀར་པོ་ཞེས་བྱའི་མདོ་ལས། ས་དང་སོ་ཕག་དག་ལ་རྩིག་པ་ཡིས། །རྒྱལ་བའི་མཆོད་རྟེན་འགའ་ཞིག་བྱས་པ་དང་། །དེས་ནི་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་པ་གང་དུ་བྱས་པ་དང་། །བྱིསྱའི་རྩེད་མོ་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་འགའ། །བྱེ་མ་ལས་ནི་ཕུང་པོ་བྱས་པ་ཡང་། །དེ་དག་རྣམས་ཀྱང་བྱང་ཆུབ་ཐོབ་པར་འགྱུར། །ཅེས་གསུངས་ལ། ས་ལ་སྐུ་གཟུགས་པར་བཏབ་པ་ཡང་དེ་དང་ཕན་ཡོན་འདྲ་སྟེ། མདོ་སྡེ་དེ་ཉིད་ལས། རོ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་སྐུ་བྱས་ཏེ། །ལྟ་ན་སྡུག་པ་འཇིམ་པའི་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཅེས་གསུངས་སོ། །སྐུ་གཟུགས་པར་བཏབ་པས་སྡིག་པ་དག་སྟེ། དེ་བཞིན་གཤེགས་པའི་སྐུ་གཟུགས་ལེའུ་ལས། གང་ཡང་མི་དགེ་བཅུའི་ལས་ཀྱི་ལམ་དང་ལྡན་པར་གྱུར་ལ། དེ་བཞིན་གཤེགས་པ་ལ་དད་པ་རྙེད་ནས། དེ་
བཞིན་གཤེགས་པ་དེའི་སྐུ་གཟུགས་བྱེད་ན། དེས་སྡིག་པ་དེ་ཡང་མི་མངོན་པར་འགྱུར་རོ། །ཞེས་གསུངས་སོ། །ཁྱད་པར་དུ་རང་གི་ལག་གིས་ཚ་ཚ་བཏབ་ན་ཕན་ཡོན་ཆེ་སྟེ། འཇམ་དཔལ་རྩ་རྒྱུད་ལས། ལུས་སྦྱང་བར་བྱས་ལ་རང་གི་ལག་གིས་མཆོད་རྟེན་བྱས་ན། མཚམས་མེད་པ་ལྔ་བྱས་པས་ཀྱང་འགྲུབ་བོ། །མཆོད་རྟེན་འབུམ་བྱས་ན་རིག་པ་འཛིན་པའི་འཁོར་ལོས་སྒྱུར་བའི་རྒྱལ་པོར་འགྱུར་ཏེ། བསྟན་པ་ཐམས་ཅད་མངོན་པར་ཤེས་པ་དང་ལྡན་ཞིང་བསྐལ་པར་གནས་ལ་ཤི་ནས་ཀྱང་སྐྱེ་བ་རྣམས་སུ་རྒྱལ་པོ་བྱེད་ཅིང་ངན་སོང་དུ་མི་འགྲོའོ། །ཡུལ་དབུས་སུ་ཉི་མ་ཤར་བ་ལྟ་བུའི་དབང་པོ་ཐམས་ཅད་ལྡན་པར་འགྱུར་རོ། །ཐོས་པ་འཛིན་པ་དང་སྐྱེ་བ་དྲན་པར་འགྱུར་རོ། །ཞེས་གསུངས་པས་ཚ་ཚ་མཆོད་བརྒྱད་མ་ཁྲི་ཕྲག་གཅིག་དང་། སྟོང་ཕྲག་གཅིག་དང་། བརྒྱ་ཕྲག་གཅིག་དང་བཅུ་གཉིས་བཏབ་ན་མཆོད་རྟེན་འབུམ་ཐེར་ཡིན་ལ། མཆོད་བརྒྱ་མ་ཡིན་ན་ནི། ཚ་ཚ་སྟོང་ཕྲག་གཅིག་གིས་མཆོད་རྟེན་འབུམ་
ཐེར་འགྲོ་བས། ཚེ་འདི་ལ་ཡང་མངོན་ཤེས་དང་ཚེ་བསྐལ་པར་གནས་པ་སོགས་རིག་འཛིན་གྱི་ས་ལ་གནས་པ་དང་། སྐྱེ་བ་ཐམས་ཅད་དུ་ཡང་འཁོར་ལོས་སྒྱུར་རྒྱལ་འཐོབ་ཅིང་མཐར་འཚང་རྒྱའོ། །ཁྱད་པར་དུ་ཡི་དམ་ཇི་ལྟར་བསྒྲུབས་ཀྱང་འགྲུབ་པའི་རྟགས་མ་བྱུང་ན། རང་གི་ལག་གིས་ཚ་ཚ་སྟོང་ཁྲི་ཙམ་བཏབ་ནས་བསྒྲུབས་ན་མྱུར་དུ་འགྲུབ་སྟེ། གོང་གི་རྒྱུད་ལུང་དེས་ཤེས་པའོ། །ཕྲིན་ལས་གང་སྒྲུབ་ཀྱང་ཡིག་དྲུག་གམ་ཡིག་བདུན་མཇུག་ཏུ་ཤམ་བུར་སྦྱར་བའམ།གཟུངས་སོགས་གང་དགོས་བཟླ་ཞིང་ཚ་ཚ་བཏབ་ན་འགྲུབ་སྟེ། ཐུགས་རྗེ་ཆེན་པོ་གསང་འདུས་ཀྱི་རྒྱུད་ལས། དེ་ལས་ཁ་བསྒྱུར་ཡིག་བདུན་ནི། །ཤམ་བུར་བཏགས་པ་ཤེས་པར་བྱ། །ཞི་རྒྱས་དབང་དྲག་རིམ་པ་རུ། །ཤཱནྟིཾ་ཀུ་རུ་སྭཱ་ཧཱ། པུཎྚི་ཀུ་རུ་སྭཱ་ཧཱ། པ་ཤང་ཀུ་རུ་སྭཱ་ཧཱ། མཱ་ར་ཡ་ཕཊ། སྒྲིབ་པ་སྦྱང་ན་ཡིག་བརྒྱ་བཟླ། །ཚེ་རིང་བ་ལ་ཚེ་དཔག་གཟུངས། །བཟླ་ཞིང་ཅོད་པན་ན་བཟའ་འབུལ། །རབ་གནས་ལེགས་བྱས་དབེན་པར་གཞུག །ཡོན་ཏན་མཐའ་ཡས་བསམ་པ་འགྲུབ། །ཅེས་དང་། རྒྱུད་སྡེའི་འགྲེལ་པ་ཨོ་རྒྱན་རིན་པོ་ཆེས་མཛད་པ། ཐུགས་རྗེ་ཆེན་པོ་གསང་བ་འདུས་པའི་སྐུ་གདུང་ཚ་ཚའི་རིམ་པ་
ལས། དེ་ལྟར་བཏབ་པའི་ཕན་ཡོན་ནི། རྒྱུད་ལས། ཡོན་ཏན་མཐའ་ཡས་བསམ་པ་འགྲུབ། །ཅེས་པས། ཚ་ཚ་སྤྲུལ་སྐུ། གསུང་སྔགས་དང་ཡིག་འབྲུ། ལོངས་སྐུ། ཏིང་འཛིན་ཆོས་སྐུ་སྟེ། ཚ་ཚ་རེ་ལ་སྐུ་གསུང་ཐུགས་རྟེན་ཡོངས་སུ་རྫོགས་པའི་ཡོན་ཏན་དཔག་ཏུ་མེད་དོ། །གནས་སྐབས་ལམ་གྱི་བར་ཆད་སེལ་ཞིང་མཐར་ཐུག་སངས་རྒྱས་སྐུ་གསུམ་ཐོབ་པར་འགྱུར་ཏེ་ཡོན་ཏན་ཐམས་ཅད་འགྲུབ་སྟེ་ངོ་མཚར། ཞེས་གསུངས་སོ། །དེ་བཞིན་དུ་ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་འགྲེལ་ཨོ་རྒྱན་རིན་པོ་ཆེས་མཛད་པ་ཚ་ཚའི་རྣལ་འབྱོར་ལས། བཞི་པ་ཚ་ཚའི་དགོས་ཆེད་ནི། རྒྱུད་ལས། ཞིང་ཁམས་རྣམ་དག་དེས་འགྲུབ་འགྱུར། །ཅེས་པས། རབ་བདེ་བ་ཅན་དུ་སྐྱེ། འབྲིང་འཁོར་ལོས་སྒྱུར་བའི་རྒྱལ་པོ། ཐ་མ་འཇིག་རྟེན་གྱི་ཁམས་སུ་ཚེ་རིང་ཞིང་བདེ་བར་གཤེགས་པར་འགྱུར་རོ། །ཞེས་གསུངས་ཤིང་། དེ་དང་མཚུངས་པར་ཐུགས་སྒྲུབ་ཡང་སྙིང་འདུས་པའི་སྐུ་གདུང་ཚ་ཚའི་རིམ་པ་ལས། མདོར་ན་བསོད་ནམས་དང་ཡེ་ཤེས་གཉིས་ཀའི་ཚོགས་དང་ལམ་གྱི་བར་ཆད་ཐམས་ཅད་སེལ་བ་ལ། སྐུ་གདུང་ཚ་ཚ་བཏབ་པ་ལས་ཕན་ཡོན་ཆེ་བ་མེད་པ་
མདོ་རྒྱུད་ལུང་དུ་མ་ནས་གསུངས་སོ། །ཞེས་འབྱུང་ངོ། །ཁྱད་པར་ཚེ་འདས་ཀྱི་དོན་ལ་ཚ་ཚ་བཏབ་ན། ངན་སོང་སྦྱོང་བའི་ཐབས་ཆེན་པོ་ཟབ་ལ་རྒྱ་ཆེ་བ་ཡིན་ཏེ། འཇམ་དཔལ་ཆོ་ག་འདུས་པའི་རྒྱུད་ལས། གང་ཟག་ཚེ་ཡི་དུས་བྱས་པའི། །ངན་སོང་སྦྱོང་བའི་ཐབས་ཆེན་པོ། །རུས་པ་གོས་སམ་མིང་ལ་ནི། །ཡེ་ཤེས་སྐུ་ཡི་སྔགས་ཀྱིས་གདབ། །རྫས་རྣམས་ཀུན་དང་བསྲེས་ཏེ་འབྱུང་། །འཇིམ་པའི་ཕུང་པོ་རིན་ཆེན་ལྔ། །སྔགས་པ་རྣལ་འབྱོར་ལྡན་པ་ཡིས། །ཚ་ཚའི་ཕུང་པོ་དཔག་མེད་བྱ། །ནམ་མཁའི་ལྷ་རྣམས་སྤྱན་དྲངས་ལ། །གཉིས་སུ་མེད་པར་མཆོད་པས་མཆོད། །།རབ་ཏུ་གནས་པ་ཚུལ་བཞིན་བྱ། །ཞེས་གསུངས་སོ། །དེ་དང་མཚུངས་པར་ངན་སོང་སྦྱོང་རྒྱུད་ལས། ཡང་ན་མེད་པར་གྱུར་ན་ཡང་། །བཟླ་ཞིང་བསྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ཀྱང་། །མཆོད་རྟེན་ཕྲེང་བ་བྱ་བ་དང་། །ཡང་ན་གཟུགས་སུ་བྱས་ཀྱང་རུང་། །སྦྱིན་སྲེག་མངོན་པར་དབང་། བསྐུར་ན། །གདོན་མི་ཟ་བར་བདེ་འགྲོར་སྐྱེ། །ཞེས་དང་། དེ་ཡི་མིང་ནི་སྨོས་ནས་ནི། །གུར་གུམ་བཟང་པོས་སྔགས་བྲིས་ལ། །རིམ་གྱིས་འབུམ་གྱི་ཚད་ཙམ་དུ། །མཆོད་
རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེས་ནི་ངེས་པར་དམྱལ་གནས་ལ། །འདི་བྱས་པས་ནི་གྲོལ་བར་འགྱུར། །ཡི་དྭགས་བྱོལ་སོང་སྡུག་བསྔལ་ལས། །གྲོལ་ཏེ་ལྷ་ཡི་གནས་སུ་སྐྱེ། །ཞེས་གསུངས་པས། ཚེ་འདས་སྡིག་པ་ཆུང་བའི་རིགས་ལ་མཆོད་རྟེན་ཕྲེང་བ་སྟེ། མཆོད་རྟེན་བརྒྱ་ཡིན་ཏེ། ཚ་ཚ་བཅུ་གཉིས་ཙམ་གྱིས་ངན་སོང་ལས་གྲོལ་བ་དང་། སྡིག་པ་ཆེ་བ་ལ་མཆོད་རྟེན་འབུམ་སྟེ། མཆོད་བརྒྱད་མ་གཅིག་ཁྲི་གཅིག་སྟོང་བརྒྱ་དང་བཅུ་གཉིས་སམ།། མཆོད་བརྒྱ་མ་སྟོང་ཕྲག་གཅིག་གིས་ངན་སོང་ལས་ཐར་ཞིང་། ཚེ་འདས་ཤིན་ཏུ་སྡིག་ཆེན་ཡིན་ན། མཆོད་རྟེན་བྱེ་བ་སྟེ། མཆོད་བརྒྱ་མ་ཁྲི་ཕྲག་གཅིག་གམ།། མཆོད་བརྒྱད་མ་གོང་གི་དེ་བཅུ་འགྱུར་དེའི་མཆོད་རྟེན་བྱེ་ཆུང་གཅིག་ཡིན་པས་དེས་ངན་སོང་ལས་ཐར་བར་གསུངས་སོ། །དཔག་ཏུ་མེད་པའི་སྡིག་སྟོབས་ཅན་ལ་ནི་བྱེ་ཆེན་ཏེ། བྱེ་ཆུང་བཅུ་ཡིན་ནོ། །མི་འཁྲུགས་པའི་རྒྱུད་ལས་ཀྱི་སྒྲིབ་པ་རྣམ་པར་སྦྱོང་བའི་གཟུངས་ལས་ཀྱང་། དེའི་མིང་བྲིས་པ་གཟུངས་སྔགས་བཟླས་བརྗོད་བྱེད་ཅིང་མཆོད་རྟེན་འབུམ་བྱས་པར་གདུགས་དང་རྒྱལ་
མཚན་དང་བ་དན་ལ་སོགས་པས་ལེགས་པར་མཆོད་ནས་རྒྱ་མཚོ་ཆེན་པོའམ། ཡང་ན་ཆུ་ཀླུང་དུ་བཏང་ན། དེས་ནི་སེམས་ཅན་དམྱལ་བ་ལ་སོགས་པ་ལས་ཐར་བར་འགྱུར་རོ། །ཞེས་གསུངས་པས། ཚ་ཚའི་ནང་དུ་མིང་བཅུག་པའམ། རུས་པ་སྐྱ་སོགས་འདྲེས་པ་ནི། བསྐོར་བ་མི་ཕོག་སར་བཞག་དགོས་ཀྱི། གལ་ཏེ་དེ་ལ་བསོད་ནམས་དང་ཡོན་ཏན་ཆེ་བས་བསྐོར་ན། ཚེ་འདས་ལ་གནོད་པ་འོད་སྲུང་རྫོགས་བྱེད་ཀྱི་གཏམ་རྒྱུད་ལས་གསུངས། མི་འཁྲུགས་པའི་ལས་ཚོགས་ཚ་ཚ་འདི། ཆུར་གཤེགས་པར་བཤད་པ་ནི། འདིའི་ཁྱད་ཆོས་ཡིན་གྱི་ཚ་ཚ་གཞན་ཆུར་དོར་མི་རུང་བར་རྗེ་ཆོས་ཀྱི་དབང་ཕྱུག་དང་། དཀོན་མཆོག་འབངས་དང་། སྟག་ཚང་ལོ་ཙཱ་རྣམས་ཀྱིས་གསུངས་སོ། །ཡང་རྟེན་འབྲེལ་སྙིང་པོའམ་ཨོཾ་ཨཱཿཧཱུཾ་ལྟ་བུའི་ནང་གཞུག་ཅན་གྱི་སཱཙྪ་བཏབ་པས་སྡིག་པ་འདག་པར་བཤད་དོ། །དཔུང་བཟང་གིས་ཞུས་པའི་རྒྱུད་ལས། བདེ་གཤེགས་མཆོད་རྟེན་རྟེན་འབྲེལ་སྙིང་པོ་ཅན། སྡིག་པ་དག་ཕྱིར་རྟག་ཏུ་གདབ་པར་བྱ། ཞེས་གསུངས་ལ། དེ་དང་མཚུངས་པར་ཐུགས་སྒྲུབ་ཚ་ཚའི་གཞུང་ལས་ཀྱང་། ཨོཾ་ཨཱཿཿཧཱུྃ་གང་སྒྲུབ་པའི་སྙིང་པོ། ཡི་གེ་བརྒྱ་པ། ཡེ་དྷརྨཱ་སོགས། རབ་
གསེར། འབྲིང་དངུལ། ཐ་མ་ཡང་སྣག་ཚས་བྲིས་ནས་བསྡུས་ཙམ་ལོན་པ་ནང་དུ་གཞུག་སྟེ། དེ་ནས་སྐུ་གསུང་ཐུགས་ཀྱི་རྟེན་གསུམ་ཡོངས་སུ་འགྱུར་བར་ཤེས་པར་བྱ། ཞེས་གསུངས་ལ། གྲྭ་ས་རྣམས་སུ་ནི་འབྲུ་སྣ་སྨན་སྣ་རིན་པོ་ཆེ་སྣ་ཚོགས་ཇ་བུ་རམ་སོགས་ཟས་ཕུད་སྣ་ཚོགས། བྱིན་རླབས་རྟེན་སྣ་ཚོགས་ཀྱི་གསུང་ཕྱེ་མ་རྣམས་ནང་དུ་འཇུག་སྲོལ་སྣང་ཡང་། དེ་རྣམས་མ་འཛོམས་ན་ནས་འབྲུ་བདུན་རེས་ཆོག །ཇོ་བོ་རྗེས་ཚ་ཚ་རྣམ་པ་དགུར་གསུངས་ཏེ། དང་པོ་དགེ་བའི་བཤེས་གཉེན་གྱི་ཐུགས་དགོངས་རྫོགས་པའི་དོན་དུ་གདབ། གཉིས་པ་ཕ་མའི་དོན་དུ་གདབ། གསུམ་པ་བསླབ་བྱ་དང་འགལ་བའི་དོན་དུ་གདབ། བཞི་པ་སྡིག་པ་ལྕི་བའི་དོན་དུ་གདབ། ལྔ་པ་ལོག་པའི་བཤེས་གཉེན་དང་སྡིག་པའི་གྲོགས་པོའི་དབང་དུ་མི་འགྲོ་བའི་དོན་དུ་གདབ། དྲུག་པ་འགྲོ་བ་མཐའ་དག་གི་དོན་དུ་གདབ། བདུན་པ་འཆི་ཁ་མའི་སེམས་ཅན་ཐམས་ཅད་ཀྱི་དོན་དུ་གདབ། བརྒྱད་པ་བར་དོའི་སེམས་ཅན་ཐམས་ཅད་ཀྱི་དོན་དུ་གདབ། དགུ་པ་སེམས་ཅན་ཐམས་ཅད་ཀྱི་དོན་དུ་གདབ། ཅེས་གསུངས་སོ། །དེ་དག་ལ་དོན་གང་འདོད་སྨོན་ལམ་བཏབ་པས་དོན་གང་ཡིན་
ཐམས་ཅད་འགྲུབ་པར་གསུངས་སོ། །དེ་ལྟར་དོན་གང་འདོད་ཐམས་ཅད་འགྲུབ་པ་ནི་ཕན་ཡོན་ཡིན་ལ། ཚ་ཚ་འདེབས་ལུགས་རྒྱས་པ་ནི། གསར་རྙིང་གི་གཞུང་སོ་སོར་ཤེས་པར་བྱོས་ལ། འདིར་ཐམས་ཅད་ལ་ཕན་པའི་བསྡུས་པ་བཤད་ན། དགེ་སློང་མ་དཔལ་མོའི་ལུགས་ཀྱི་ཐུགས་རྗེ་ཆེན་པོའི་དམར་ཁྲིད་ལས། ས་རྐོ་བ། ས་བྱིན་གྱིས་རླབས་པ། འབི་འབིའི་སྔགས། འདེབས་པའི་སྔགས། ཕྱུང་བའི་སྔགས། བཞུགས་གསོལ་སྔགས། ཡེ་ཤེས་བསྟིམ་སྔགས། རབ་གནས་སྔགས། ཨོཾ་མ་ཎི་པདྨེ་ཧཱུྃ་གིས་ཆོག་པར་བཤད་དོ། །དེ་བཞིན་དུ་ཐུགས་རྗེ་ཆེན་པོ་ཡང་སྙིང་འདུས་པ་དང་། ཐུགས་རྗེ་ཆེན་པོ་གསང་འདུས་རྒྱུད་གཞུང་ནས། ཨོཾ་མ་ཎི་པདྨེ་ཧཱུྃ་ཧཱུྃ༔ བཟླ་ཞིང་བཏབ་པས་ཆོག །སྔགས་གཞན་མི་དགོས་པར་གསུངས་སོ། ཚ་ཚའི་དམིགས་རིམ་ཡང་། འཇིམ་པ་རིན་པོ་ཆེ་སྣ་ལྔའི་ཕུང་པོ། །བརྐོས་ཕོར་སྟོང་པ་ཆོས་སྐུ། འབི་འབི་ལོངས་སྤྱོད་རྫོགས་སྐུ། ཚ་ཚ་སྤྲུལ་པའི་སྐུ་ཡིན་སྙམ་དུ་མོས་ལ། ཚ་ཚ་མཆོད་རྟེན་རིན་པོ་ཆེའི་རང་བཞིན་རི་རབ་ཙམ་གྱི་བུམ་པར། གཞལ་ཡས་ཁང་གི་ནང་དུ། སྔགས་གང་འདོན་པའི་ལྷ་དེ། འཁོར་བཅས་བཞུགས་པར་
ལམ་ལམ་བསྒོམས་ལ། འོག་མིན་ནས་ཡེ་ཤེས་པ་བསྟིམ་མོ། །ལྷ་དེ་དང་མཆོད་རྟེན་ལས་འོད་ཟེར་འཕྲོས་ནས་རང་དང་བསྒྲུབ་བྱ་ལ་ཕོག་པས། སྡིག་པ་སྦྱང་བ་དང་བསོད་ནམས་འཕེལ་བ་སོགས་དོན་གང་ཡིན་འགྲུབ་པར་བསྒོམ་མོ། །དེ་ནས་འབྱུང་བཞི་ལ་གདབ་པ་ནི། ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། དེ་ནས་ཚ་ཚའི་རྣལ་འབྱོར་བཤད། ས་ཆུ་མེ་རླུང་འབྱུང་བཞི་ལ། ཡང་སྙིང་བཟླ་ཞིང་བརྐོས་ཕོར་གདབ། །ཅེས་དང་། དེའི་འགྲེལ་པ་ཨོ་རྒྱན་རིན་པོ་ཆེས་མཛད་པ་ལས། འབྱུང་བ་མེ་ཆུ་རླུང་གསུམ་ལ་བརྐོས་ཕོར་བསྟན་ཞིང་ཡང་སྙིང་བརྗོད་ཅིང་བཏབ་པས་འཕགས་པའི་སྐུ་ཝལ་ཝལ་བསམ་སྟེ། འཇིག་རྟེན་སྐྱོང་ཞིང་འགྲོ་དོན་མཛད་པར་བསམ་མོ། །ཞེས་དང་། ཐུགས་སྒྲུབ་ཚ་ཚ་ལས། ནམ་མཁའ་རླུང་ཆུ་མེ་ལ་ཡང་སྔགས་དང་ཏིང་ངེ་འཛིན་རྣམས་གསལ་བར་བཏབ་ན། བསོད་རྣམས་གོང་དང་མཉམ་མོ། །ཞེས་གསུངས་སོ། །དེ་ཡང་ཆུ་རྒྱུན་འབབ་གཙང་མ་དང་། མེ་དྲི་བཟང་ཤིང་གི་མེ་དང་། རླུང་ཤར་ནས་ནུབ་ཏུ་རྒྱུ་བ་ལ་བྱ་བར་བཤད་དོ། །དེ་ལྟར་དངོས་གཞི་བཤད་ནས། ལས་ཚོགས་སོགས་རྒྱུད་གཞུང་དུ་མ་ནས་གསུངས་པ་གོ་
བདེ་བར་ཚིགས་སུ་བཅད་དེ་བརྗོད་པ་ནི། བདེ་གཤེགས་ཆོས་སྐུའི་རྟེན་མཆོག་ཚ་ཚ་འདིའི། །ཕན་ཡོན་རྒྱུད་གཞུང་རྒྱ་མཚོ་ལྟ་བུ་ནས། །བཅུད་བསྡུས་ཆུ་ཐིགས་ཙམ་ཞིག་བཤད་ཀྱིས་ཉོན། །ཚ་ཚ་གཅིག་ལ་མཆོད་རྟེན་བརྒྱ་རྩ་ཚང་། །ཇི་ལྟར་ཉུང་ཡང་དགུ་ལས་ཉུང་བ་མེད། །མཆོད་རྟེན་རེ་ལ་དགེ་བ་བཅུ་དང་ནི། །བྱང་ཆུབ་ཕྱོགས་ཀྱི་ཆོས་རྣམས་ཐམས་ཅད་ཚང་། །སྐུ་པར་ཆོས་སྐུ་འབི་འབི་ལོངས་སྤྱོད་རྫོགས། །ཚ་ཚ་སྤྲུལ་པའི་སྐུ་སྟེ་སྐུ་གསུམ་ཚང་། །ས་ལ་མཆོད་རྟེན་གཟུགས་བརྙན་ཚ་ཚ་དང་། །བྱིས་པས་རྩེད་མོར་ཚ་ཚ་བཏབ་ན་ཡང་། །བྱང་ཆུབ་ཐོབ་པར་ཤཱཀྱའི་སྐྱེས་མཆོག་གསུངས། །དེ་བཞིན་སྐུ་གཟུགས་པར་དུ་བཏབ་ན་ཡང་། །བྱང་ཆུབ་འཚང་རྒྱ་འགྱུར་ཞེས་ཐུབ་དབང་གསུངས། །རང་གི་ལག་གིས་ཚ་ཚ་བཏབ་བྱས་ན། །མཚམས་མེད་ལྔ་ཡི་སྡིག་པ་བྱང་འགྱུར་ཞེས། །རྒྱལ་བས་འཇམ་དཔལ་རྩ་བའི་རྒྱུད་ལས་བཤད། །།མཆོད་བརྒྱད་མ་ཡི་ཚ་ཚ་གཅིག་ཁྲི་དང་། །གཅིག་སྟོང་གཅིག་བརྒྱ་དང་ནི་བཅུ་དང་གཉིས། །ཡང་ན་མཆོད་བརྒྱ་མ་ཡི་ཚ་ཚ་སྟོང་། །བཏབ་པ་དེ་ནི་མཆོད་རྟེན་འབུམ་ཐེར་ཡིན། །གང་གིས་དེ་བཞིན་བསྐལ་པའི་ཚེ་ཐུབ་ཅིང་། །ཚེ་འདིར་
མངོན་པར་ཤེས་པ་ལྔ་ཐོབ་ནས། །སྐྱེ་བ་ཀུན་ཏུ་ཡུལ་དབུས་རྒྱལ་པོར་འགྱུར། །སྐྱེ་བ་དྲན་ཞིང་ཐོས་པ་རྒྱ་མཚོ་འདྲ། །རིམ་གྱིས་བླ་མེད་བྱང་ཆུབ་ཐོབ་པར་གསུངས་། །རིམ་གྲོ་མདོས་ཟློག་དུས་སུ་ཚ་ཚ་བཏབ། །རིམ་འགྲོའི་རྒྱབ་རྟེན་མཆོག་ཏུ་དེ་འགྱུར་རོ། །སྒྲུབ་པ་དགེ་སྦྱོར་སྔོན་དུ་ཚ་ཚ་བཏབ། །བར་ཆད་མེད་ཅིང་དངོས་གྲུབ་མྱུར་དུ་འགྲུབ་། །སྔགས་པས་ལྷ་སྒྲུབ་རྟགས་མཚན་མ་ཐོན་ན། །རང་གི་ལག་གིས་ཚ་ཚ་སྟོང་ངམ་ཁྲི། །བཏབ་པས་སྒྲུབ་ན་མྱུར་དུ་འགྲུབ་པར་འགྱུར། །རང་གི་ཡི་དམ་སྔགས་ཤམ་ཕྲིན་ལས་བཞིའི། །ཤམ་བུར་བཏགས་ན་འོད་ཟེར་ལས་མཐུན་སྤྲོ། །ཚ་ཚ་བཏབ་ན་ཕྲིན་ལས་རྣམ་བཞི་འགྲུབ། །མི་འཁྲུགས་པ་ཡི་གཟུངས་ནི་བཟླ་བྱེད་ཅིང་། །ཚ་ཚ་བཏབ་ན་ལས་སྒྲིབ་རྒྱུན་ཆད་འགྱུར། །ཡིག་བརྒྱ་བཟླ་ཞིང་ཚ་ཚ་བཏབ་པ་ན། །སྡིག་པ་འདག་ཅིང་ཉམས་ཆག་བསྐང་བར་འགྱུར། །ཚེ་དཔག་མེད་པའི་གཟུངས་སམ་སྙིང་པོ་བཟླ། །ཚ་ཚ་བཏབ་ན་ཚེ་ནི་འཕེལ་བར་འགྱུར། །སྦྱོང་རྒྱུད་རྩ་རིག་བཟླ་ཞིང་ཚ་ཚ་བཏབ། །ཚེ་འདས་ངན་སོང་གནས་ནས་ཐར་བར་འགྱུར། །ཚེ་འདས་སྡིག་པ་ཤིན་ཏུ་ཆུང་བའི་དོན། །ཚ་ཚ་བཏབ་སྟེ་
དེ་ནི་མ་ཞིག་བར། །ཚེ་འདས་དེ་ནི་ངན་སོང་མི་འགྲོ་ཞེས། །ཡོངས་འཛིན་རྣམས་ཀྱི་གསུང་ལས་བདག་གིས་ཐོས། །ཅུང་ཟད་སྡིག་ཡོད་ཚེ་ལས་འདས་པའི་དོན། །ཚ་ཚ་བཅུ་གཉིས་བཏབ་ན་ངན་སོང་གྲོལ། །དེ་བས་སྡིག་ཆེ་ལ་ནི་ཚ་ཚའི་གྲངས། །གཅིག་ཁྲི་གཅིག་སྟོང་གཅིག་བརྒྱ་བཅུ་གཉིས་ཏེ། །དེ་ལས་ཀྱང་ནི་སྡིག་པ་ཆེ་བ་ལ། །དེ་ཡི་བཅུ་འགྱུར་བཏབ་ན་ངེས་པར་ཐར། །དེ་ཡང་ཚེ་འདས་དེ་ལ་བསྔོ་གལ་ཆེ། །གང་དག་མི་འཁྲུགས་པ་ཡི་གཟུངས་བཟླ་ཞིང་། །ཚ་ཚ་ཁྲི་དང་གཅིག་སྟོང་བརྒྱ་དང་བཅུ་གཉིས་བཅས། །བཏབ་ནས་མཆོད་པ་བྱས་ཏེ་ཆུར་གཤེགས་ན། །ཚེ་འདས་ངན་སོང་གནས་ལས་ཐར་བར་ངེས། །བླ་མ་ཞིང་གཤེགས་དོན་དུ་ཚ་ཚ་བཏབ། །ཐུགས་དགོངས་རྫོགས་ཤིང་ས་ལམ་བར་ཆད་ཞི། །རྗེས་འཇུག་སྨིན་གྲོལ་ལམ་ལ་འགོད་པར་ངེས། །ཕ་མའི་དོན་དུ་ཚ་ཚ་བཏབ་བྱས་ན། །སྡིག་སྒྲིབ་དག་ཅིང་ཚོགས་རྫོགས་དྲིན་ལན་འཁོར། །།སྡིག་པ་བཤགས་ཕྱིར་སཱཙྪ་བཏབ་བྱས་ན། །མི་དགེ་མཚམས་མེད་རྩ་ལྟུང་ལ་སོགས་བྱང་། །ལྟུང་བ་བཤགས་ཕྱིར་སཱཙྪ་བཏབ་བྱས་ན། །སོ་ཐར་བྱང་སྡོམ་སྔགས་ཀྱི་ཉམས་ཆག་བསྐང་། །ཁྱད་པར་སཱཙྪ་འབུམ་ཐེར་གཅིག་བཏབ་
ན། །།སྐུ་ཡི་དམ་ཚིག་ཉམས་པ་སོས་འགྱུར་ཞེས། །ཡེ་ཤེས་མགོན་པོའི་རྒྱུད་ནས་གསུངས་པ་ཡིན། །སཱཙྪ་བཏབ་པས་གྲོགས་ངན་སྡིག་གྲོགས་འགྲོགས། །ལོག་པའི་བཤེས་གཉེན་བསྟེན་པའི་ཉེས་སྒྲིབ་བྱང་། །ནད་པའི་དོན་དུ་སཱཙྪ་བཏབ་པ་ན། །རླུང་མཁྲིས་བད་ཀན་འདུས་པའི་ནད་རྣམས་ཞི། །འཆི་ཁའི་སེམས་ཅན་དོན་དུ་སཱཙྪ་བཏབ། །གནད་གཅོད་འཁྲུལ་སྣང་འཇིགས་སྐྲག་རབ་ཞི་ནས། །ངན་སོང་ལམ་འགག་དག་པའི་ཞིང་དུ་སྐྱེ། །བར་དོའི་སེམས་ཅན་དོན་དུ་སཱཙྪ་བཏབ། །འཁྲུལ་སྣང་འཇིགས་སྐྲག་ཞི་ནས་བྱུང་ཆུབ་ཐོབ། །སྡིག་ཆེན་ཡིན་ཡང་མི་དང་ལྷར་སྐྱེས་ཏེ། །དགེ་སེམས་སྐྱེས་ནས་ཆོས་ལ་འབད་པར་འགྱུར། །སེམས་ཅན་ཐམས་ཅད་དོན་དུ་སཱཙྪ་བཏབ། །ང་ཉིད་བྱང་ཆུབ་ཞིང་ཁམས་དག་པ་ཐོབ། །སོ་འབྲང་མ་ཡི་སྔགས་བཟླ་ཚ་ཚ་བཏབ། །སྲིའུ་ཤི་འཕྲོ་ཆད་ཅིང་ནད་མེད་འཚོ། །འཛམ་བྷ་ལ་ཡི་སྔགས་བཟླ་སཱཙྪ་བཏབ། །བསོད་ནམས་ལོངས་སྤྱོད་འབྱོར་པ་འཕེལ་བར་འགྱུར། །ནོར་རྒྱུན་མ་ཡི་སྔགས་བཟླ་སཱཙྪ་བཏབ། །ནོར་དང་རིགས་རྒྱུད་དར་ཞིང་རྒྱས་པར་འགྱུར། །ཡིག་དྲུག་ལ་སོགས་ཡི་དམ་སྔགས་ཤམ་དུ། །ཤིནཾ་ཀུ་རུ་ཡེ་སྭཱ་
ཧཱ་ཞེས་སྔགས། །བཏགས་ནས་བཟླ་ཞིང་ཚ་ཚ་བཏབ་ན་ནི། །མེ་ཆུ་གཅན་གཟན་རྒྱལ་པོའི་ཆད་པ་དང་། །དུག་སྦྲུལ་ཤ་ཟ་དགྲ་འཇིགས་ཆོམ་རྐུན་ཞི། །པུཏྟིཾ་ཀུ་རུ་སྭཱ་ཧཱ་བཏགས་ཤིང་བཏབ། །བསོད་ནམས་ཚེ་དཔལ་འབྱོར་བ་རྒྱས་པར་འགྱུར། །པཱ་ཤཾ་ཀུ་རུ་ཧོ་བཏགས་སཱཙྪ་བཏབ། །རླུང་སེམས་སྣང་སེམས་མོས་བཞི་དབང་སྡུད་འགྱུར། །མཱ་ར་ཡ་ཕཊ་བཏགས་བཟླ་སཱཙྪ་བཏབ། །བདུད་དང་དགྲ་དང་བགེགས་རྣམས་ཚར་གཅོད་འགྱུར། །རྒྱུན་དུ་སཱཙྪ་བདུན་རེ་མ་ཆག་ན། །རྒྱལ་དང་རྒྱལ་བའི་སྲས་ལ་སྡིག་བསགས་དང་། །སྐུར་པ་བཏབ་པའི་སྡིག་པ་དག་འགྱུར་ཞེས། །སྒྲོལ་མས་ཇོ་བོ་རྗེ་ལ་གསུངས་པ་ཡིན། །སྔོན་ཚེ་མི་གཅིག་ཚ་ཚ་གཅིག་བཏབ་ནས། །ལམ་དཀྱིལ་བཞག་ཅིང་གཅིག་གིས་ལམ་གཉར་བཞག །ཆར་གྱིས་ཞིག་དོགས་གཅིག་གིས་ལྷམ་སྐད་བཀབ། །གཅིག་གིས་ལྷམ་སྐད་དོར་ནས་བྲག་ཕུག་བསྐྱལ། །དེ་ལྟར་བཞི་ཀས་བསོད་ནམས་འབྲས་ཐོབ་ཅེས། །སྔོན་རབས་གཏམ་རྒྱུད་འཆད་པའི་ངག་ལས་ཐོས། །གང་དག་དྲག་སྔགས་སྦྱོར་བས་གཞན་བསྒྲལ་ནས། །ཚ་ཚ་མང་བཏབ་དེ་ཡི་སྒྲིབ་བྱང་ཞེས། །སྔགས་གཞུང་འགའ་ནས་གསུངས་པའི་མན་
ངག་ཡིན། །གང་དག་རུས་ཚ་མིན་པའི་ས་གཙང་ལ། །ཚ་ཚ་བཏབ་ནས་ལམ་མདོར་ཚ་ཁང་བྱ། །དེ་ལ་བསྐོར་ཞིང་འགྲོ་བའི་ཕན་ཡོན་ནི། །སྤྱན་རས་གཟིགས་ཀྱི་མདོ་ལས་འདི་སྐད་གསུངས། །ཨོཾ་མ་ཎི་པདྨེ་ཧཱུྃ་ཧཱུྃ༔ ཐུགས་རྗེ་ཆེན་པོ་ལ་ཕྱག་འཚལ་ལོ། །འཇིག་རྟེན་མགོན་གྱི་མཆོད་རྟེན་ལ། །མི་གང་བསྐོར་བ་བྱས་པ་ཡི། །བསྔགས་པ་བསྐལ་པ་བྱེ་བར་ཡང་། །།བརྗོད་པས་ཟད་པར་བྱ་མི་ནུས། །མཆོད་རྟེན་བསྐོར་བ་བྱས་ན་ནི། །བརྩོས་འགྲུས་བརྟན་ཞིང་མཐུ་བརྟན་ལ། །བརྟན་ཅིང་རྣམ་པར་བཏོན་བརྟན། །དེ་ནི་མྱུར་དུ་མཁས་པར་འགྱུར། །ཞེས་གསུངས་ཕྱིར་ན་ཡོན་ཏན་བསམ་མི་ཁྱབ། །ཚ་ཁང་གཅིག་ན་ཚ་ཚ་མཆོད་བརྒྱད་མ། །ཁྲི་དང་གཅིག་སྟོང་བརྒྱ་དང་བཅུ་གཉིས་པ། །ཡང་ན་མཆོད་བརྒྱ་མ་ཡི་ཚ་ཚ་སྟོང་། །ཡོད་ན་དེ་ནི་མཆོད་རྟེན་འབུམ་ཐེར་ཡིན། །དེ་ལ་བསྐོར་བ་བཅུ་གཅིག་ཕོག་པ་ན། །བསྐོར་བ་འབུམ་ཐེར་གཅིག་ཏུ་འགྱུར་བའི། །འགྲོ་དོན་དེ་འདྲ་བསམ་གྱིས་ག་ལ་ཁྱབ། །བསྐོར་བསམ་མེད་ཀྱང་བསོད་ནམས་ཐོབ་པ་ནི། །སྦྱར་བ་ཆུས་ཁྱེར་བསྐོར་བ་བསྐོར་འདྲ་བའི། །དགེ་བའི་རྩ་བས་དགྲ་བཅོམ་
ཐོབ་པ་ཐོས། །དེས་ན་ཚ་ཚ་འདེབས་དང་ཚ་ཁང་བཞེངས། །འདི་ལས་བསོད་ནམས་ཁྱད་འཕགས་བསམ་མཐའ་ཡས། །དེ་ཡང་གྲོང་ཁྱེར་རམ་ནི་དགོན་པ་ཡི། །ཤར་དང་ལྷོ་ཕྱོགས་ལྟག་ཏུ་མི་རུང་སྟེ། །ནུབ་ཕྱོགས་ཚ་ཁང་བྱས་པས་ན་ཚ་ཉུང་། །བྱང་དུ་ཚ་ཁང་བྱས་པས་དགྲ་ཇག་ཞི། །ཚ་ཁང་བྱེད་སར་རབ་ཏུ་ས་བསླང་བྱ། །ཡང་ན་བསང་དང་གཏོར་མ་བཀའ་བསྒོ་བྱ། །ཚ་ཁང་མ་འཛོམས་གཉའ་དང་ཤར་མིན་པའི། །བྲག་ཕུག་གམ་ནི་ཁང་པའི་ནུབ་ངོས་བླུགས། །བཀྲ་ཤིས་སྨོན་ལམ་བསྔོ་སྦྱང་གང་ཤེས་བྱ། །དེ་ནི་ཚ་ཚའི་ཁྱད་པར་གོ་སླ་ཡིན། །དོན་དམ་ནང་དང་གསང་བའི་ཚ་ཚ་ནི། །ཡང་སྙིང་འདུས་པའི་རྒྱུད་ལས་འདི་སྐད་གསུངས། །རང་ལུས་གཞལ་ཡས་མཆོད་རྟེན་ཁང་། །རྟོག་ཚོགས་ལྷར་གསལ་ཚ་ཚ་དེ། །ཆོས་དབྱིངས་སྟོང་པའི་བརྐོས་ཕོར་དུ། །རིག་པ་ཡེ་ཤེས་མཆོད་རྟེན་གཞུག །མཆོད་རྟེན་མཆོག་ཏུ་བདག་འགྱུར་ངེས། །ཐབས་ཤེས་རྒྱུ་རྐྱེན་བརྐོས་ཕོར་དུ། །རང་ལུས་མཆོད་རྟེན་རང་སེམས་ནི། །ཐུགས་རྗེ་ཆེན་པོའི་ལྷ་ཚོགས་ཡིན། །ཆོས་དབྱིངས་སྟོང་པའི་བརྐོས་ཕོར་དུ། །སྣང་སྟོང་དབྱེར་མེད་མཆོད་རྟེན་ཏེ། །དེ་ལྟར་རྟོགས་པ་མཐར་ཕྱིན་
ན། །རང་ཉིད་མཆོད་རྟེན་མཆོག་ཏུ་འགྱུར། །ནང་དང་གསང་བའི་ཚ་ཚ་ཡིན། །སཱཙྪའི་ཕན་ཡོན་མདོར་བསྡུས་འདི། །དོན་གཉེར་འགའ་ཡིས་བསྐུལ་བའི་ངོར། །༧རཱ་གའི་མིང་ཅན་དེ་ཡིས་སྦྱར། །འགལ་འཁྲུལ་མཁས་པའི་སྤྱན་སྔར་བཤགས། །དགེ་བས་འགྲོ་བའི་ཚོགས་རྫོགས་ཤོག །འདེབས་ཚུལ་རྒྱས་པ་གཞན་དུ་ལྟོས། །འདི་ནི་ཀུན་ལ་ཕན་ཕྱིར་ཡིན། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབངོ་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།