ལྟུང་བཤགས་ཀྱི་ཟིན་བྲིས་ཉུང་ངུ་གོ་བདེ་སྡིག་ལྟུང་དག་བྱེད་ཡེ་ཤེས་བདུད་རྩིའི་ཁྲུས་ཆར།
ལྟུང་བཤགས་ཀྱི་ཟིན་བྲིས་ཉུང་ངུ་གོ་བདེ་སྡིག་ལྟུང་དག་བྱེད་ཡེ་ཤེས་བདུད་རྩིའི་ཁྲུས་ཆར་ཞེས་བྱ་བ་བཞུགས་སོ།།
ཀྱེ། མ་གསོན་དང་བདག་དང་བདག་འདྲ་ཀུན། །བསྐལ་པ་གྲངས་མེད་འདས་པའི་སྔོན་རོལ་ནས། །ལུས་ལ་མ་བླངས་པ་ནི་གཅིག་ཀྱང་མེད། །སྟོང་གསུམ་འཇིག་རྟེན་ཁམས་ཀྱི་སེམས་ཅན་ཀུན། །སྐྱེ་མ་མྱོང་དང་ཤི་མ་མྱོང་བའི་ས། །ཁབ་ཀྱི་རྩེ་མོ་ཙམ་ཞིག་མེད་པར་གསུངས། །དེ་ཚེ་སྡིག་སྒྲིབ་བསགས་པའི་ལས་ངན་ནི། །གཟུགས་སུ་གྲུབ་ན་ནམ་མཁར་མི་ཤོང་ཙམ། །དེ་དག་ནམ་ཞིག་རང་ལ་ངེས་པར་སྨིན། །སྐྱེ་བ་འདི་དང་མ་འོངས་ཐམས་ཅད་དུ། །སྡུག་བསྔལ་འབྱུང་བའི་རྒྱུ་ནི་སྡིག་སྒྲིབ་སྟེ། །དེ་དག་བཤགས་ན་དག་ཅིང་མ་བཤགས་ན། །བསྐལ་པ་བྱེ་
བ་བརྒྱར་ཡང་ཆུད་མི་ཟ། །ནམ་ཞིག་རང་གི་ལུས་ངག་ཡིད་ལ་སྨིན། །རང་རེ་དམ་པའི་ཆོས་ཀྱི་སྒོར་ཞུགས་ནས། །སྡོམ་གཙང་དམ་ཚིག་ལྡན་པར་རློམ་ན་ཡང་། །ཕྲ་ཞིབ་ལྟུང་བའི་ཆར་རྒྱུན་བར་མཚམས་མེད། །རང་གིས་ཚོར་དང་མ་ཚོར་ལྟུང་བ་མང་། །དེ་དག་ཚུལ་བཞིན་བཤགས་པ་མ་བྱས་ན། །ལྟུང་བ་རེ་རེས་ངན་སོང་གནས་དེར་ལྟུང་། །དེ་ཕྱིར་ལྟུང་བ་ཞེས་བྱ་ཡིན་པར་གསུངས། །ཉེས་བྱས་བདུན་བསགས་ལྟུང་བ་གཅིག་ཏུ་གྲགས། །བཤགས་པ་མ་བྱས་པ་ཡི་ཉེས་ལྟུང་རྣམས། །ཞག་རེ་སོང་ཞིང་སྐྱེད་རེ་འཕེལ་བའི་ཕྱིར། །སྡིག་ལྟུང་ཆུང་ངུ་རེ་ཡང་ཆེན་པོར་
གྱུར། །དེ་ཕྱིར་བླུན་པོའི་སྡིག་པ་ཆུང་ཡང་ལྗི། །བཤགས་པ་བྱས་ན་རྩད་ནས་མ་དག་ཀྱང་། །དེ་ཕྱིར་སྐྱེད་ནི་འཕེལ་བར་མི་འགྱུར་ཏེ། །དེ་ཕྱིར་མཁས་པའི་སྡིག་པ་ཆེ་ན་ཡང་། །སྡིག་པ་ཆུང་ངུ་སྐྱོན་མེད་མ་ཡིན་ཏེ། །བཙན་དུག་ཆུང་ངུས་ཚེ་སྲོག་གཅོད་དང་མཚུངས། །དེ་དོན་རྒྱ་མཚོའི་ཞུས་པའི་མདོ་སྡེ་ལས། །དང་པོ་བསྐལ་པ་ཆགས་པའི་དུས་ཙམ་ན། །རྒྱ་མཚོའི་ནང་ན་ཀླུ་ནི་མང་པོ་མེད། །ད་ནི་རྒྱ་མཚོའི་ནང་ན་མི་ཤོང་ཙམ། །འདི་ཡི་དོན་དེ་ཅི་ཡིན་ཐུབ་པར་ཞུས། །འཁོར་བ་འཇིག་དང་གསེར་ཐུབ་འོད་སྲུང་དང་། །འདས་པའི་སངས་རྒྱས་གསུམ་གྱི་བསྟན་པ་ལ། །འདུལ་ཁྲིམས་ཞུས་ནས་ཆེ་ཁོག་མ་ཉམས་ཏེ། །ལྟ་བ་རྣམ་པར་དག་པ་ཡོད་ན་ཡང་། །སྤྱོད་པ་འདུ་ཁྲིམས་ཕྲ་ཞིབ་མ་བསྲུངས་ནས། །དེ་དག་དམྱལ་བ་ཡི་དྭགས་མི་སྐྱེས་ཏེ། །བཙུན་པ་དེ་དག་ཀླུ་རུ་སྐྱེ་བའི་ཕྱིར། །དེ་ཕྱིར་ཀླུ་རྣམས་མང་བ་ཡིན་ནོ་གསུངས། གསུངས་འདི་རང་རེ་བཙུན་པ་རྣམས་ལ་འཇིགས། །དེ་ཕྱིར་ཕྲ་ཞིབ་བསྲུང་བར་དཀའ་ན་ཡང་། །འཕྲལ་དུ་བཤགས་པ་བྱེད་པ་གདམས་ངག་ཡིན། །བཤགས་པ་དེ་ལ་སྟོབས་བཞི་ཚང་དགོས་ཏེ། །སྟོབས་བཞིའི་སྒོ་ནས་བཤགས་པ་བྱས་པ་ན། །
མི་དག་པ་ཡི་སྡིག་ལྟུང་གཅིག་ཀྱང་མེད། །རྟེན་གྱི་སྟོབས་དང་རྣམ་པར་སུན་འབྱིན་སྟོབས། །གཉེན་པོ་ཀུན་ཏུ་སྤྱོད་དང་ཆུར་ལོན་སྟོབས། །དེ་བཞི་ཚང་ན་སྡིག་སྒྲིབ་ཐམས་ཅད་འདག །རྒྱ་གར་ཉ་པ་རྣམས་ལ་ཕན་པའི་ཕྱིར། །འཕགས་པ་ཉེ་བ་འཁོར་གྱིས་ཞུས་ནས་ཀྱང་། །ཐུབ་པས་ལྟུང་བ་བཤགས་པའི་མདོ་གསུངས་པས། །ཉ་པ་ཉར་བཅས་དག་པའི་ཞིང་དུ་སྐྱེས། །བྱང་ཆུབ་སེམས་དཔའ་ཆོས་རྒྱལ་ཁྲི་སྲོང་གིས། །བཀའ་འགྱུར་བསྟན་འགྱུར་བོད་དུ་བསྒྱུར་བའི་དུས། །མཐའ་དབུས་མཁས་པ་བརྒྱ་དང་རྩ་བརྒྱད་ཀྱིས་། །རྒྱལ་པོའི་ཁྲིམས་བཅད་དམག་འདྲེན་མང་བ་ཡིས། །སྒྲིབ་སྦྱོང་ལྟུང་བཤགས་འདི་ཉིད་ལྷག་གསུངས་ཕྱིར། །རྒྱལ་པོའི་སྒྲིབ་སྦྱོང་འདི་ཉིད་འདོན་སྲོལ་བཙུགས། །རྒྱལ་པོའི་ཐུགས་དམ་མདོ་བཅུའི་ནང་ན་ཡོད། །དགེ་འདུན་སྡེ་རྣམས་རྒྱུན་གྱི་འཚོགས་འདོན་དར། །རྒྱ་གར་ཡུལ་དུ་སྡིག་སྒྲིབ་ཆེན་པོ་ཅན། །རེ་རེས་སྐབས་འགར་འདོན་པ་མ་གཏོགས་པ། །རྒྱུན་དུ་འདོན་པའི་སྲོལ་ནི་མེད་པ་སྟེ། །བོད་དུ་ལྟུང་བཤགས་རྒྱུན་དུ་འདོན་དགོས་པའི། །སྡིག་ཆེན་དེ་འདྲ་ཡོད་ཅེས་འཕྱ་འོ་སྐད། །ལྷ་ཚོགས་སུམ་ཅུ་སོ་ལྔ་འདི་དག་གི །
རེ་རེའི་མཚན་ནི་ཐོས་པའི་ཕན་ཡོན་དང་། །རེ་རེར་ཕྱག་འཚལ་སྡིག་པ་དག་ལུགས་རྣམས། །རྒྱས་པར་བོ་དྷི་ས་ཏཱའི་འགྲེལ་ཆེན་གསལ། །ལྷ་ཚོགས་སོ་སོའི་སྐུ་མདོག་ཕྱག་མཚན་ནི། །གསར་མའི་གཞུང་དུ་འདྲ་མིན་སྣ་ཚོགས་ཏེ། །བླ་མ་རྣམས་ཀྱིས་ཞལ་གཟིགས་ལུགས་ཀྱང་ཡོད། །གཡུལ་ལས་རྣམ་པར་རྒྱལ་བས་གོ་མཚོན་བསྣམས། །དེ་ཉིད་མི་འཐད་ས་པཎ་བཀག་པ་ཡོད། །དེ་བཞིན་རྟ་ཕག་ཡིད་བཞིན་ནོར་བུ་ཡི། །ཕྱི་སྒྲུབ་ལྟུང་བཤགས་ལྷ་ཚོགས་སོ་ལྔ་ཡི། །སྐུ་མདོག་ཕྱག་མཚན་མངོན་རྟོགས་གསལ་ན་ཡང་། །དེ་ཉིད་འདོན་པ་གཅིག་ཀྱང་མི་འགྲུབ་ཅིང་། །བློ་ཆུང་རྣམས་ཀྱིས་དམིགས་པ་ཟིན་པར་དཀའ། །དེ་བས་མདོར་བསྡུས་ཁྱེར་བདེ་འདི་བརྗོད་ན། །ས་ཕྱོགས་འདི་ཉིད་སྤང་ལྗོངས་མེ་ཏོག་ཚལ། ཁོད་སྙོམས་སྤོས་དྲི་འཇའ་གུར་མེ་ཏོག་ཆར། །དག་པའི་ཞིང་ཁམས་ལྟ་བུར་གྱུར་པའི་དབུས། །མདུན་དུ་སྣ་ཚོགས་པདྨའི་སྡོང་པོ་ནི། །ནང་དུ་འདབ་བཞི་དེ་རྒྱབ་རིམ་པ་གསུམ། །འདབ་མ་བཅུ་རེ་ལྡན་ཞིང་རྒྱ་ཆེ་བ། །དབུས་སུ་བཅོམ་ལྡན་ཤཱཀ་ཐུབ་གཞུང་ལྟར་ལས། །འདབ་མ་སོ་བཞི་སངས་རྒྱས་སུམ་ཅུ་བཞི། །ཐམས་ཅད་གཅིག་པར་གསེར་མདོག་མཚན་
དཔེ་ལྡན། །རྡོ་རྗེའི་སྐྱིལ་ཀྲུང་ཆོས་གོས་རྣམ་གསུམ་བཀླུབས། །ཕྱག་ཀུན་སྡིག་སྒྲིབ་བསྲེགས་པའི་རྟེན་འབྲེལ་གྱིས། །རྡོ་རྗེ་མེ་ཡི་ཕྱག་རྒྱ་མཛད་པ་སྟེ། །གཙོ་བོ་རྩ་བའི་བླ་མ་དབྱེར་མེད་བསྒོམ། །སྤྱན་འདྲེན་མི་དགོས་དམ་ཡེ་དབྱེར་མེད་དེ། །གང་ཞིག་སངས་རྒྱས་ཡིད་ལ་བྱེད་རྣམས་ཀྱི། །མདུན་དུ་ཐུབ་དབང་བཞུགས་པར་གསུངས་ཕྱིར་རོ། །དེ་ནི་སྡིག་སྒྲིབ་གང་ལ་བཤགས་པའི་ཡུལ། །རྟེན་གྱི་སྟོབས་ཞེས་བྱ་བ་ཡིན་པའོ། །དེ་མདུན་རང་གི་ལུས་ནི་གྲངས་མེད་སྤྲུལ། །ཐོགས་མེད་དུས་ནས་ད་ལྟ་ཡན་ཆད་ཀྱི། །སྡིག་སྒྲིབ་བསགས་ལ་ངོ་གནོང་ངོ་ཚ་དང་། །འགྱོད་པ་དྲག་པོས་ཁོང་དུག་སོང་བ་བཞིན། །སྙིང་ནས་བསྒོམ་པ་རྣམ་པར་སུན་འབྱིན་སྟོབས། །དེ་དོན་འོག་ནས་སེམས་ཅན་དམྱལ་བ་སོགས། །གསུངས་པའི་དོན་དེ་ཡིན་པ་ཤེས་པར་བྱ། །དེ་ལྟར་སྡིག་སྒྲིབ་ཉེས་པས་གོས་པ་དེ། །སངས་རྒྱས་ཁྱེད་རྣམས་ཐུགས་རྗེས་བྱང་བ་དང་། །དག་པ་ཐུགས་རྗེས་ཟུངས་སྙམ་རྒྱུདད་གུས་ཀྱིས། །སྐྱབས་འགྲོ་ནས་བཟུང་ཕྱག་རབས་སོ་ལྔ་བརྗོད། །གྲངས་མེད་སྤྲུལ་པའི་ལུས་ཀྱིས་ཕྱག་འཚལ་བསྒོམ། །རང་ཉིད་གཅིག་པུ་ཡིན་ན་དངོས་སུ་འཚལ། །དེ་ལྟར་
ཕྱག་འཚལ་སྡིག་པ་སྦྱོང་བའི་ཐབས། །གཉེན་པོ་ཀུན་ཏུ་སྤྱོད་པའི་སྟོབས་ཡིན་ནོ། །བདག་ལ་དགོངས་སུ་གསོལ་ཞེས་བྱ་བ་ནས། །མི་འཆབ་མི་སྦེད་ཅེས་པའི་བར་དེ་ནི། །གོང་དུ་བཤད་པའི་རྣམ་པར་སུན་འབྱིན་སྟོབས། །སྡིག་པ་བྱས་ཀྱང་སྐྱོན་མེད་བཤགས་ཆོག་སྙམ། །ཕྱིན་ཆད་མི་བྱའི་སྡོམ་སེམས་མེད་ན་ནི། །བཤགས་པ་བྱས་ཀྱང་དག་པར་མི་འགྱུར་གསུངས་། །དེ་ཕྱིར་ཕྱིན་ཆད་མི་བྱེད་དམ་བཅའ་ཡིས། །གཅོད་ཅིང་བསྡོམས་པར་བགྱིད་ཅེས་ཚིག་གཅིག་དེ། །ཕྱིན་ཆད་མི་བགྱིད་ཆུར་ལོན་སྟོབས་ཡིན་ནོ། །ཚུར་ལོན་ཞེས་བྱ་ཚུ་རགས་བརྩིགས་པའི་མིང་། །དེ་ནི་མི་དགེ་སྡིག་པ་འདྲེས་དོགས་ཀྱིས། །སེམས་ལ་དམ་བཅའ་དྲག་པོས་རིགས་བརྩིག་གོ །དེ་ནས་དེ་ཡི་དགེ་བའི་རྩ་བ་དེ། །ལྷ་མའི་བདེ་བ་འདོད་ཕྱིར་མི་བསྔོ་ལ། །རང་ཉིད་ཐར་འདོད་ཁོ་ནར་མི་བསྔོ་སྟེ། །འགྲོ་བའི་དོན་དུ་སངས་རྒྱས་ཐོབ་ཕྱིར་བསྔོ། །དེ་ཡང་རང་རེ་སོ་སོ་སྐྱེ་བོ་ཡིས། །འཁོར་གསུམ་ཡོངས་དག་བསྔོ་བ་མི་ཤེས་པས། །དུས་གསུམ་སངས་རྒྱས་རྣམས་ཀྱིས་བསྔོ་བ་མཆོག །མཛད་པ་དེ་བཞིན་ཡོངས་སུ་བསྔོ་ཞེས་བརྗོད། །དེ་ནས་ཡན་ལག་བདུན་པའི་མཇུག་སོགས་ཀྱི། །གོང་གི་དེ་
རྣམས་ཚིགས་བཅད་དུ་གསུངས་པ། །དེ་དག་ཝོར་ལོགས་ཡིན་པས་བཤད་མི་དགོས། །མདོ་སྡེ་དབྱངས་སུ་སྙེད་པའི་སྡེ་རྣམས་ལས། །ཚིག་ལྷུག་རྗེས་ནས་ཚིགས་བཅད་གསུང་ཝིག་སྲོལ། །འདི་ཡང་དོན་ལ་དེ་དང་འདྲ་བར་སྣང་། །དེ་ནས་མདུན་གྱི་སངས་རྒྱས་སུམ་ཅུ་བཞི། །གཙོ་བོ་ལ་ཐིམ་གཙོ་བོ་ཤཱཀྱ་ཐུབ། །བླ་མ་དབྱེར་མེད་རང་གི་སྙིང་གར་ཐིམ། །དེ་ནས་བཤགས་ཡུལ་བཤགས་མཁན་བཤགས་བྱའི་སྡིག །གང་ཡང་མ་གྲུབ་རང་རིག་སྟོང་པའི་གཤིས། །དེ་ཡི་ངང་ལ་མཉམ་པར་བཞག་པའི་ཚེ། །ནམ་མཁའ་སྟོང་པ་ཅིས་ཀྱང་མ་གཡོགས་བཞིན། །སེམས་ཉིད་སྟོང་པར་དགེ་སྡིག་གོས་པ་མེད། །དེ་དོན་མདོ་ལས་ཐུབ་པའི་དབང་པོ་ཡིས། །གལ་ཏེ་བཤགས་པ་བྱེད་པར་འདོད་པ་ན། །དྲང་པོར་བཞག་ལ་ཡང་དག་ལྟོས་གསུང་ཞིང་། །བཤགས་བྱ་བཤགས་བྱེད་བྲལ་བའི་བཤགས་པ་དེ། །དྲི་མེད་བཤགས་པའི་རྒྱུད་ལས་རྒྱས་པར་གསུངས། །ཕུང་པོ་ཞེས་པ་མང་པོ་སྤུངས་པའི་མིང་། །དང་པོ་ཕྱག་འཚལ་དགེ་བའི་ཕུང་པོ་གཅིག །དེ་ནས་བཤགས་པ་དགེ་བའི་ཕུང་པོ་གཉིས། །དེ་ནས་བསྔོ་བ་དགེ་བའི་ཕུང་པོ་གསུམ། །དེ་ཕྱིར་ཕུང་པོ་གསུམ་པའི་མདོ་
ཞེས་བྱ། །དེ་སྐད་དྲིན་ཅན་ཆོས་ཀྱི་དབང་ཕྱུག་གིས། །འདི་ཡི་ལྗགས་ལུང་གནང་སྐབས་གསུངས་པ་ཐོས། །ལྟུང་བཤགས་དམིགས་རིམ་ཤིན་ཏུ་བསྡུས་པ་འདི། །གྲྭ་སློབ་རྣམས་ལ་ཕན་པར་བྱ་བའི་ཕྱིར། །༧ རཱ་ག་ཨ་སྱས་ཐུན་སྐབས་ཤིག་ལ་སྨྲས། །སྔོན་གྱི་བཀའ་གདམས་དགེ་བཤེས་ཐམས་ཅད་ཀྱིས། །ཉིན་མོའི་ཉེས་བྱས་ལྟུང་བ་ནུབ་མོ་བཤགས། །མཚན་མོའི་ཉེས་བྱས་ལྟུང་བ་ཐོ་རངས་བཤགས། །ལྟུང་བ་དང་ནི་ཞག་ལ་མི་འགྲོགས་གསུངས། །དེ་མ་གྲུབ་ན་ཞག་གཅིག་ཉེས་ལྟུང་རྣམས། །ནམ་ལངས་དུས་སུ་བཤགས་དགོས་མི་ལས་གསུངས། །དེ་ཕྱིར་དེང་སང་གྲོང་ཆོག་པ་ཀུན་གྱིས། །དང་པོ་ལངས་ནས་ལྟུང་བཤགས་འདོན་སྲོལ་དར། །ཁྱད་པར་དགེ་འདུན་ལྷག་མའི་ལྟུང་བ་འདི། །དགོན་སྡེ་ཀུན་ཏུ་ཁྲིམས་མེད་དར་ཆེ་ཞིང་། །སྤངས་བར་དཀའ་ཡང་རང་ལ་སྙིང་རྗེ་ལྟོས། །ལྟུང་བཤགས་ལ་སོགས་བཤགས་པ་གྱིས་ཤིག་ཅེས། །མཆོག་གི་སྤྲུལ་སྐུའི་བཙའ་ཡིག་ནང་དུ་གསུངས། །དེ་ཕྱིར་ཉེས་ལྟུང་ཕྲ་ཞིབ་བྱུང་བ་རྣམས། །ལྟུང་བཤགས་འདི་ལ་ཐུགས་དམ་མཛད་གལ་ཆེ། །ཡི་གེ་པ་ནི་པདྨ་མཐར་ཕྱིན་ནོ། །འདི་ཡིས་གཞན་ཕན་དཔག་མེད་འབྱུང་བར་ཤོག །སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།