རྒྱལ་བའི་བཀའ་ཟབ་མོ་མདོ་སྡེ་སྒྲོགས་སྐབས་ཀློག་བསྒོམ།
རྒྱལ་བའི་བཀའ་ཟབ་མོ་མདོ་སྡེ་སྒྲོགས་སྐབས་ཀློག་བསྒོམ་བྱ་བ་ནི། བདག་གཞན་མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཆོས་སྐུ་ཡུམ་ཆེན་མོ་ལ་སྐྱབས་སུ་མཆིའོ། །བསྟན་པའི་གཙོ་བོ་རྒྱལ་བ་ཤཱཀྱ་ཐུབ་པ་ལ་སྐྱབས་སུ་མཆིའོ། །བསྐལ་པ་བཟང་པོའི་སངས་རྒྱས་སྟོང་རྩ་གཉིས་ལ་སྐྱབས་སུ་མཆིའོ། །མཁྱེན་རབ་ཀྱི་མངའ་བདག་འཕགས་པ་འཇམ་དཔལ་དབྱངས་ལ་སྐྱབས་སུ་མཆིའོ། །སྙིང་རྗེའི་མངའ་བདག་སྤྱན་རས་གཟིགས་ལ་སྐྱབས་སུ་མཆིའོ། །མཐུ་སྟོབས་ཀྱི་མངའ་བདག་ཕྱག་ན་རྡོ་རྗེ་ལ་སྐྱབས་སུ་མཆིའོ། །འདས་མ་འོངས་ད་ལྟ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་སྐྱབས་སུ་མཆིའོ། །།སྐྱབས་འོག་དམ་པ་རུ་ཚུད་པར་མཛད་དུ་གསོལ། །སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། མར་གྱུར་
སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སྡུག་བསྔལ་མེད་པའི་བདེ་བ་དམ་པ་དང་མི། འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ཆེན་པོ་ལ་ཡུན་རིང་དུ་གནས་པར་གྱུར་ཅིག །ལན་གསུམ། མདུན་བསྐྱེད་ནི། སྟོང་པའི་ངང་ལས་མདུན་གྱི་ནམ་མཁར་གྱད་དང་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ། དེ་ཡི་སྟེང་དུ་བསྟན་པའི་གཙོ་བོ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མའི་མདོག་ལྟར་འཚེར་བ། ཞལ་གཅིག་ཕྱག་གཉིས་གཡས་སྐྱབས་སྦྱིན། གཡོན་མཉམ་བཞག་གིས་ལྷུང་བཟེད་འཛིན་ཅིང་། ཆོས་གོས་གསུམ་གྱི་གྲྭ་བསྟན་པ། སྐུ་ལ་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། འོད་དང་འོད་ཟེར་དཔག་ཏུ་མེད་པ་འཕྲོ་བ། དེའི་གཡས་སུ་ཤཱ་རིའི་བུ་སྐུ་མདོག་དམར་སེར། གཡོན་དུ་མོའུ་འགལ་གྱི་བུ་སྐུ་མདོག་དམར་སེར། མདུན་དུ་རབ་འབྱོར། རྒྱབ་ཏུ་ཀུན་དགའ་བོ་ལ་སོགས་པ་འཁོར་ཉན་ཐོས་ཆེན་པོ་མཆོག་བརྒྱད། གཞན་ཡང་སངས་རྒྱས་དང་བྱང་ཆུབ་སེམས་དཔའི་ཚོགས་
དཔག་ཏུ་མེད་པས་བསྐོར་བ་མདུན་གྱི་ནམ་མཁའི་གནས་སུ་བཛྲ་ས་མཱ་ཛཿ མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །པདྨ་ཀ་མ་ལཱ་ཡ་ཧཱུཾ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་སྣང་གསལ་དྲི་ཆབ་དང་། །ཞལ་ཟས་རོལ་མོ་ལ་སོགས་པ། །ཇི་སྙེད་རྒྱལ་བ་སྲས་དང་བཅས། །དེ་ཉིད་རྣམས་ལ་མཆོད་འབུལ་ན། །ཐུགས་རྗེའི་མངའ་བདག་ཁྱེད་རྣམས་ཀྱིས། །ཅི་བདེ་བར་ནི་བཞེས་ནས་ཀྱང་། །སེམས་ཅན་དོན་ཀུན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཨནྡྷཾ་པཱཏྱཾ་སོགས། ས་གཞི་སྤོས་ཆུས་སོགས། བསྟོད་པ་ནི། སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབ་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་
ཆེ། །བླ་མེད་དཀོན་མཆོག་གསུམ་ལ་ཕྱག་འཚལ་ལོ། །ཐབས་མཁས་ཐུགས་རྗེ་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། །གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱེད་ལ་འཚལ་ལོ། །འཇམ་དབྱངས་ཕྱག་ན་རྡོ་རྗེ་སྤྱན་རས་གཟིགས། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་བྱམས་པ་ཀུན་ཏུ་བཟང་། །ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགགས་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །གཞོན་ནུ་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་ཏུ་རྒྱན། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ལ་ཕྱག་འཚལ་ལོ། །སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱི་དབུ་ལ་བརྒྱན། །
ཐུགས་རྗེ་ཅན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་ལོ། །ལྕང་ལོ་ཅན་གྱི་གནས་མཆོག་དམ་པ་རུ། །གསང་སྔགས་རིག་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །གསང་བདག་རྡོ་རྗེ་འཛིན་ལ་ཕྱག་འཚལ་བསྟོད། །བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། །ཧཱུྃ། འཇིགས་པའི་ཧཱུཾ་སྒྲ་ངེས་སྒྲོག་ཅིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་ལོ། །ཧཱུཾ། ཆོས་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་སྒྱུ་པའི་བགེགས་ཚོགས་ཀུན་ཉོན་ཅིག །ང་ཡིས་གནས་འདིར་སྲུང་བའི་འཁོར་ལོ་སྒྲུབ། །ཁྱེད་རྣམས་འདིར་གནས་གཞན་དུ་འགྲོ་བར་གྱིས། །གལ་ཏེ་ང་ཡི་བཀའ་ལས་འདའ་བྱེད་ན། །ཡེ་ཤེས་སྤྱན་གྱི་རྡོ་རྗེ་འབར་བ་ཡིས། །མགོ་བོ་ཚལ་པ་བརྒྱར་ནི་འགས་འགྱུར་ཞིང་། །བགེགས་རྣམས་བརླག་པར་འགྱུར་བ་གདོན་མི་ཟ། །དེ་བས་ད་ལྟ་ཉིད་དུ་ཕྱིར་
དེངས་ཤིག །ཨོཾ་སུམྦྷ་ནི་བརྗོད། འོག་ཐམས་ཅད་རྡོ་རྗེའི་ས་གཞི། བར་ཐམས་ཅད་རྡོ་རྗེ་ར་བ་དང་དྲྭ་བ། སྟེང་ཐམས་ཅད་རྡོ་རྗེའི་གུར་དང་བླ་བྲེ་བཅས་པའི་དབུས་སུ་བཛྲ་རཀྵ་རཀཱ་ཡེ་སྭཱ་ཧཱ། ཨཱཿ སྟོང་ཉིད་སྙིང་རྗེའི་ངང་ཉིད་ལས། །མི་འཇིགས་སེང་གེའི་ཁྲི་སྟེང་དུ། །རང་ཉིད་བསྟན་པའི་གཙོ་བོ་ནི། །སྐུ་མདོག་སེར་པོ་གསེར་འདྲ་ཞིང་། །མཚན་དང་དཔེ་བྱད་རྣམས་ཀྱིས་སྤྲས། །ཤཱ་རིའི་བུ་ལ་སོགས་པ་ཡི། །འཁོར་ཉན་ཐོས་ཆེན་པོ་མཆོག་བརྒྱད་ནི། །སྤྲིན་གྱི་ཕུང་པོ་ལྟ་བུར་གྱུར། །ཞལ་གཅིག་པ་ལ་ཕྱག་གཉིས་པ། །ཕྱག་གཉིས་ས་གནོན་མཉམ་བཞག་མཛད། །ལྗགས་ཀྱི་དཀྱིལ་དུ་པདྨ་སྟོང་། །པདྨའི་འདབ་སྟོང་རེ་རེ་ལ། །བསྐལ་བཟང་སངས་རྒྱས་རེ་རེ་བཞུགས། །ཤཱཀྱ་༈ ཐུབ་པའི་ཐུགས་ཀ་ནས། །མ་ཡུམ་ཆེན་ཤེས་རབ་ཕ་རོལ་ཕྱིན། །མ་གཅིག་སྐྱེ་མེད་ཡི་གེ་ཨཱཿ། །པདྨའི་འོད་ཀྱི་ཟེའུ་འབྲུ་ལས། །འོད་དང་འོད་ཟེར་ཕྱོགས་བཅུར་འཕྲོས། །འོད་དེ་གང་ལ་ཕོག་པ་ཡིས། །འགྲོ་དྲུག་སེམས་ཅན་གང་སུ་དག །དེང་འདིར་དམ་པ་ཆོས་ཀྱི་ཆར་འབེབས་ཀྱི། །ཟབ་མོ་རྒྱལ་བའི་བཀའ་ལ་གུས་པར་ཉོན། །གང་དག་
ཕྱོགས་བཅུའི་སྟོང་གི་འཇིག་རྟེན་ན། །བདེ་གཤེགས་སློབ་མར་གྱུར་པ་གང་སུ་དག །དེང་འདིར་སྟོན་པའི་ཆོས་ཀྱི་ཆར་འབེབས་ཀྱིས། །གསན་པར་འདོད་པ་ཐམས་ཅད་འདིར་གཤེགས་ཤིག །དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱ་རྣམས་དང་ནི་ཤིང་རྣམས་ལ། །འོད་ཟེར་སྣ་ཚོགས་མཁའ་ལ་འཕྲོ། །དམ་པ་ཆོས་ཀྱི་སྒྲ་རྒྱུན་མི་འཆད་པ། །འགྲོ་བ་ལུས་ཅན་ལུས་མེད་རྣམས་ཀྱིས་ཐོས་ནས་ཀྱང་། །སྐྱེ་གནས་ཀུན་གྱི་ཕ་མ་དང་། །དུས་གསུམ་ཀུན་གྱི་ཕ་དང་མ། མཁན་པོ་དང་སློབ་དཔོན། རྒྱུ་སྦྱོར་ཡོན་གྱི་བདག་པོས་གཙོར་བྱས་པའི། ནམ་མཁའ་དང་མཉམ་པའི་སེམས་ཅན་ཐམས་ཅད་ལ། སྟེང་ལྷ་ཡི་གདུག་པ། འོག་ཀླུ་ཡི་གདུག་པ། བར་གཉན་གྱི་གདུག་པ། །འབྱུང་པོ་མི་དང་མི་མ་ཡིན་གྱི་ཁ་རླངས་གདུག་རྩུབ་དབལ་ཟུར་མི་མཐུན་པའི་ཕྱོགས་ཐམས་ཅད་ཉེ་བར་ཞི་ནས། འཕྲལ་གྱི་རྐྱེན་ཟློག །ཡུན་གྱི་སྒྲིབ་པ་བྱང་། མཐར་ཐུག་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེ་ཡི་ཆེད་དུ་གསུང་རབ་བདེ་བར་གཤེགས་པའི་བཀའ་ཟབ་མོ་ཆོས་ཀྱི་འཁོར་ལོ་བསྐོར་བར་བགྱིའོ། །ཆོས་ལ་དགའ་
བར་བགྱིའོ། །ཆོས་ལ་མོས་པའི་རྣལ་འབྱོར་ལ་བརྩོན་པར་བགྱིའོ། །ཏདྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ནེ་ཡེ་སྭཱ་ཧཱ། སྨྲ་བའི་མཆོག་རྒྱལ་བའི་གསུང་རབ་རིན་པོ་ཆེ་ལ་བློ་ལུས་ངག་ཡིད་གསུམ་གྱི་སྒོ་ནས་ཕྱག་འཚལ་ཞིང་སྐྱབས་སུ་ཉེ་བར་མཆིའོ། །རང་ཉིད་བསྟན་པའི་བདག་པོ་ཡི། །ཆོས་ཀྱི་སྒྲ་ཆེན་སྒྲོགས་པ་ཡིས། འགྲོ་བ་མི་དང་མི་མ་ཡིན་གྱིས་ཐོས་པ་ཙམ་གྱིས་གྲོལ་ནུས་པར་གྱུར་ཅིག །ལུས་ཅན་ཀུན་གྱི་བྱ་རྣམས་དང་། །ཤིང་དང་འོད་ཟེར་ཐམས་ཅད་དང་། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་འཆད་པ་ཐོས་པར་ཤོག །སེམས་ཅན་རྣམས་ཀྱི་བསམ་པ་དང་། །བློ་ཡི་བྱེ་བྲག་ཇི་ལྟ་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །ན་མོ། གང་ཞིག་ལྷ་ཡི་སྐད་དང་ཀླུ་དང་གནོད་སྦྱིན་སྐད། །དྲི་ཟ་གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་སྐད་ཇི་ཙམ་པར། །ཐམས་ཅད་རང་རང་སྐད་དུ་བདག་གིས་ཆོས་བསྟན་ཏོ། །ཨ་རཱ་གས་སོ།། །།