དམ་ཉམས་མདོ་བྲུབ་བསྒྲུབ་ཚུལ།
དམ་ཉམས་མདོ་བྲུབ་བསྒྲུབ་ཚུལ་བཞུགས་སོ།
ན་མོ་པྲཛྙཱ་པ་ར་མི་ཏ་ཡེ། པད་འབྱུང་ཀླུ་སྒྲུབ་ལ་སོགས་ཀྱི། །བསྟན་པ་ནུབ་ལ་ཉེ་བ་ན། །སྔགས་པ་ནང་འགྲས་བྱེད་པ་འབྱུང་། །དམ་ལོག་བན་དགྲས་བསྟན་པ་སྣུབ། །དེ་ནི་བསྒྲལ་བའི་ཞིང་ཡིན་པས། །ཐུབ་པའི་བདེན་པས་སྲོག་གཅོད་ཅིང་། །ཡུམ་གྱི་བདེན་པས་གནས་ནས་སྤོར། །བསྟན་དགྲ་མ་རུངས་བརླག་པར་བགྱི། །ཕར་ཕྱིན་རྒྱལ་བའི་བཀའ་མཐུ་འདིས། །ལུས་སེམས་བླ་ཚེ་སྲོག་དང་བྲལ། །།བྱད་མའི་སྲོག་གི་སྤུ་གྲི་སྟེ། །བསྟན་པ་སྲུང་བའི་མཚོན་ཆ་སྟེ། །བན་དགྲ་སྔགས་ཟློག་མཁན་གྱི་གཤེད། །མྱུར་མགྱོགས་རླུང་གི་སྤུ་གྲི་འདི། །རྫས་སླ་
མཐུ་མྱུར་འགྲུབ་ཐག་ཉེ། །ནང་དུ་འཇམ་ལ་ཕྱི་རུ་རྩུབ། །མཁུ་ལྡོག་ཆུང་ལ་ནུས་པ་ཆེ། །རྒྱལ་མཐུ་ཚན་ཆེ་ཚུར་མི་ལྡོག །ཉམས་པའི་དགྲ་བོ་མཐོ་རིས་དྲོངས། །རྣམ་སྨིན་མི་འོང་ཚོགས་སུ་འགྲོ། །འདི་ལ་མཚམས་ཡང་བཅད་མི་དགོས། །སྐབས་སུ་བདག་ལ་ལྷ་སྒྲུབ་དགའ། །བསྟན་པ་སྲུང་བའི་སྒྲུབ་ཡིག་ལ། །འདི་ལས་ལྷག་པ་ཡོད་རེ་ཀན། །གསུངས་པའི་ལག་ལེན་འདི་ལྟར་རོ། །དམ་ལོག་སེར་ཆགས་རང་གཤེད་ལ། །འབེབས་ཕྱིར་རས་ནི་སེར་པོ་ལ། །ལིང་ལྕེ་ཡི་བྲང་ཁེབས་བྲི། །ལྕེ་དཀྱིལ་རྡོ་རྗེ་རྒྱ་གྲམ་མཐར། །ཁཾ་ཡིག་ནག་པོ་དྲུག་
བྲིའོ། །དེ་མཐར་སྔགས་མགོ་ནང་དུ་བསྟན། །སྔགས་འདི་གཡོན་བསྐོར་དག་ཏུ་བྲི། །ཏདྱ་ཐཱ། བྷ་ག་བ་ཏི་པྲ་ཛྙ་པ་ར་མི་ཏ་ཧྲི་དཱ་ཡ། དྷེ་བ་དྷ་ཏུ། ཀ་ཀ་ར་ཙི་ཀྲོ་དྷ་ཡ་རྩ་བའི་གནོད་བྱེད་ཛ་ལ་ས་ཡ་མུག་ཤག་ནན། ལྟེ་བར་ཁ་སྤྲོད་ཛ་ཡིག་བར་ཚིགས་དང་དེ་མཐར་མིང་རུས་མཐར། ཁུག་ཅིག་ཕོབ་ཅིག་ཨཾ་ཀུ་ཤ་ཛཿ ཅེས་ཡིག་མགོ་ཕྱིར་བསྟན་གཡོན་བསྐོར་བྲི། །སྤྱི་བོར་ནན་དང་རྐང་ཞབས་ཡཾ། །ཡན་ལག་ཛཿཧཱུྃ་བཾ་ཧོཿབྲི། །ཐ་མར་ཛདང་ཁྲོམ་གྱིས་བསྐོར། །ཁྱི་སྤུ་ར་བལ་སྐུད་པ་ནི། །ནི༔ཡིག་ཟངས་ཁབ་ཕུག་ལ་བཏགས། །ཟློབག་ཟན་ནང་བཅུག་ལིངྒ་བཅས། །སྐུད་སྣེ་ཟངས་ཁབ་ཕྱིར་ཕྱུངས་ནས། །སྤྱི་བོ་ནས་དྲངས་མགྲིན་པར་ཕྱུང་། །སླར་ཡང་སྙིང་གར་བཙུགས་ལ་བཞག །མདུན་དུ་ཧོ་ཁུང་ནང་དུ་བཅུག །ཁ་བཀབ་ཚ་ཚ་ནག་པོས་མནན། །མདོ་སྒྲུབ་སྙིང་པོ་ག་ཏེ་དང་། །ལིངྒའི་ནང་བྲིས་སྔགས་དེ་ཉིད། །དུག་ཤོག་དག་ལ་ཕྲེང་གཅིག་བྲི། །སྐྱེར་ཚེར་གཅིག་གི་རྩེ་ལ་བཏགས། །མི་རོ་བསྲེགས་པའི་ཐལ་བ་དང་། །མི་བསད་ཤུལ་གྱི་རྡོ་ནག་དང་། །ཕུང་ཐུན་རི་གཉན་རྡོ་ནག་ཐུན། །དེ་ལྟར་བཅས་རྣམས་རྫོགས་པ་དང་། །ཨ། སྐད་ཅིག་
དྲན་རྫོགས་རང་ཉིད་ནི། །བཅོམ་ལྡན་ཤཱཀ་ཐུབ་སྐུ་མདོག་ནག །དར་ལིང་ནག་པོའི་ཆོས་གོས་གསོལ། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །ཕྱག་གཉིས་འཁར་གསིལ་གདིང་བ་བསྣམས། །ཡེ་ཤེས་དམ་ཚིག་དབྱེར་མེད་པའི། །བྲུབ་ཁུང་གནམ་ལྕགས་ཁང་སྒྲོམ་ནང་། །ནཾལས་དགྲ་བོ་སྔོ་ཞིང་རིད། །སྐྲ་ཟིང་ལུས་འདར་ཁྲག་སྐྱུགས་པ། །ཡན་ལག་ལྕགས་སུ་བཅུག་པ་གསལ། །ཡུམ་ཆེན་རྒྱལ་བ་སྲས་དང་བཅས། །ཐུབ་པ་ནག་པོའི་བདེན་མཐུ་ཡིས། །དམ་ཉམས་ཆེའི་བླ་སྲོག་རྣམས། །ལིངྒ་འདི་ལ་མྱུར་དུ་ཁུག་བཛྲ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ འགུགས་གཞུག་ཉེར་གཅིག་བྱ། བདེན་མཐུས་དབང་མེད་བཀུག་པར་བསམ། །རང་གི་རྒྱབ་ཏུ་བརྒྱད་སྟོང་གི །པོ་ཏི་ཁུར་ལ་ལིངྒ་ལ།། ཕྱག་འཚལ་ཁོ་ལ་འཚལ་བར་བསམ། །བདག་ཉིད་ཐུབ་པ་ནག་པོ་དང་། །དུས་གསུམ་སངས་རྒྱས་ཐམས་ཅད་ཀྱི། །རྗེ་ཁྱོད་ལ་ཕྱག་འཚལ་ལོ། །སངས་རྒྱས་ཕྱག་སྣ་མི་ཁྱག་པའི། །དགྲ་ཡི་ལྷ་སྲུང་ཐམས་ཅད་བྲོས། །མ་བྲོས་པ་རྣམས་སྙིང་གས་ནས། །ཐལ་བ་རྡུལ་དུ་བརླག་པར་འགྱུར། །ལྷ་དང་བྲལ་བའི་དམ་ཉམས་དེས། །ལྕེ་སྟེང་པཾ་ཡིག་ནག་པོ་
དེ། །མཆོད་རྟེན་ནག་པོ་དྲུག་ཏུ་གྱུར། །ངག་མནན་སྨྲ་མེད་མིག་ཧྲིག་ནས། །ཏདྱ་ཐཱ། བྷ་ག་ཝ་ཏི་པྲཛྙཱ་པཱ་ར་མི་ཏ་ཧྲི་དཱ་ཡ་དྷེ་ཝ་དྷ་ཏུ། ཀ་ཀ་ར་ཙི་ཀྲོ་དྷ་ཡ། ཆེ་གེའི་ངག་གི་ནུས་པ་ཛ་ལ་ཡ་མུག་ཤག་ནན། སྔགས་དེ་ཉེར་གཅིག་ཙམ་རེ་བཟླ། །རོ་སྐུ་རོ་གཡམ་བདུག་པ་དང་། །བནེ་སྡོམ་ཉམས་དྲི་ཆེན་དང་། །ལྷམ་འབོལ་དྲི་ཚིལ་གུ་གུལ་གྱི། །ཐུམ་བུ་ལིངྒའི་སྙིང་གར་བཞག །ལིངྒ་དྲིལ་འདྲེག་རྫ་ས་དེ་རྣམས། །དུད་པ་རང་ལ་མ་ཕོག་བདུག །རང་ཉིད་ཐུབ་པ་ནག་པོ་ཡི། །ཐུགས་ལས་སྤྲུལ་པའི་ལས་མཁན་ནི། །ལྷ་ཡི་ཐུབ་པ་བརྒྱ་བྱིན་ནི། །དུད་ཁ་གླང་ཆེན་ས་སྲུང་ཞོན། །ལག་ནི་སྤུ་གྲི་ཐོད་ཁྲག་ཐོགས། །ཁོ་ཡི་བཤང་ལམ་ནས་ཞུགས་ཏེ། །ཁྲག་འཐུང་ཤ་རྣམས་ཟད་པར་ཟོས། །དགྲ་བོའི་སེམས་ཉིད་ཨ་ཡིག་དཀར། །སྤྱི་བོ་ཚངས་པའི་བུ་ག་ནས། །ཐོན་ཏེ་མདུན་གྱི་ནམ་མཁའ་ན། །སངས་རྒྱས་སྟོང་རྩའི་ཐུགས་ཀར་ཕོག །ཆོས་སྐུ་སྐྱེ་མེད་ཐོབ་པར་བསམ། །ཨོཾ་ན་མོ་བྷུདྡྷ་ཡ༔ དྷརྨཱ་ཡ། སང་གྷ་ཡ། བྷྱོ་དྷི་སཏྭ་ཡ། ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བྷྱོ་དྷི་སྭཱ་ཧཱ། ཧང་ཁྲི་ཏ་ཁྲ་ཁ་ཁ་རཾ་ཀྲེ། ཅ་རོ་ཀྲེ། ཀུ་རུ་དུ་རུ། ཙིཏྟཾ་ཐཾ། མཱ་
ར་མ་ར། སྒྲའི་ཙིཏྟ་ཡ། ཧ་ར་ཧ་ར། ཁ་རླངས་མཆི་མ་མ་སོང་བར། །ཐུན་ལ་ཕུ་བཏབ་ལིངྒ་བྲབ། །ཚེར་ལྕགས་སྔགས་བྱང་བཏགས་པ་སྟེ། །ཐུབ་པ་ནག་པོ་འཁར་གསིལ་གྱུར། །དམ་ཉམས་དགྲ་བོའི་མགོ་ལ་བརྒྱབས། །མར་མེ་རླུང་གིས་བསད་པ་བཞིན། །དྲན་མེད་ནག་ཆོམ་དབང་པོ་གཏོར། །སྟོང་གསུམ་དུག་གི་ནུས་པ་ཀུན། །ཕྱག་གཡོན་གདིང་བའི་ནང་དུ་བསྡུས། །ཐུན་རྣམས་ཧ་ལ་ཆེན་པོར་གྱུར། །དུག་ཆུ་རྡོ་ཐུན་བྲབ་པ་ཡིས། །འདུ་བ་རྣམ་བཞིའི་ནད་རིགས་ཀུན། །དམ་ཉམས་དགྲ་ལ་ཆར་ལྟར་ཕོབ། །སྟོབས་ཉམས་རྣམ་ཤེས་རྟེན་དང་ཕྲལ། །སྔགས་ནི་དྲག་པོར་བཟླ་ཞིང་བྲབ། །སྐབས་སུ་གོས་ནི་མགོ་བཤམ་བསྒྱུར། །ཤེས་རབ་སྙིང་པོ་ཚར་གསུམ་བཟླ། །སྒོ་ཐེམ་ལ་ནི་སྔས་གཏད་ལ། །འབུམ་བཟློག་བརྒྱ་རྩ་བརྒྱད་དུ་བཟླ། །དེ་ལྟར་ཞག་གྲངས་གཉིས་སམ་གསུམ། །ཤིན་ཏུ་གལ་ཆེ་ཞག་བདུན་བསྒྲུབ། །སྒྲུབ་པའི་རྟགས་ནི་འདི་ལྟར་རོ། །བྱ་དང་རི་དྭགས་དུད་འགྲོ་བསད། །ཤ་ཟོས་ཁྲག་འཐུང་རུས་པ་མུར། །གློ་སྙིང་ནང་རོལ་སྟེར་དང་ཟོས། །དགྲ་བོ་དངོས་སུ་བསད་པ་དང་། །ཤིང་བཅད་བྲག་གཤག་རྦབ་ཆེན་
འཕང་། །དགྲ་བོའི་བླ་དག་བསད་པ་དང་། །རང་གི་སྔས་མགོ་གཡས་གཡོན་དུ། །དགྲ་དེ་སྲོག་ཆགས་བསད་རྨིས་ན། །ངེས་པར་འགྲུབ་པའི་རྟགས་ཡིན་ཏེ། །འདི་ལ་གྱེར་དང་ལྷ་གཏོར་མ་མེད། །དགྲ་བོའི་བཟློག་པ་བྱས་གྱུར་ཀྱང་། །རང་ལ་མི་བཟློག་ཁོ་རང་འཆི། །ལྷ་ཆེན་ཚངས་པ་བརྒྱ་བྱིན་ཡང་། །ཞག་པོ་བདུན་ནས་འཆི་གསུངས་ན། །སེམས་ཅན་གཞན་ལ་སྨོས་ཅི་དགོས། །བསད་པའི་སྦྱོར་བ་མ་བྱས་པར། །བཟློག་པ་ཁོ་ལ་བརྒྱབས་པས་ཀྱང་། །ལོ་མི་འགོར་བར་འཆི་འདུག་ཅེས། །བླ་མ་པཎ་གྲུབ་རྣམས་ཀྱིས་གསུངས། །གལ་ཏེ་ལན་གཅིག་མ་འགྲུབ་ན། །ལན་གཉིས་ལན་གསུམ་བསྐྱལ་ལ་བྱ། །དེ་ཡིས་ཐེ་ཚོམ་མེད་པར་འགྲུབ། །དགྲ་བོ་ཁྲག་ཏུ་བསྐྱུགས་ནས་འཆི། །ནུས་པ་ཆུང་དང་བོན་པོ་ལ། །བསད་ལས་འདི་ཙམ་བྱེད་མི་དགོས། །བྱས་ན་རང་ཉིད་ལྷ་དང་བྲལ། །མི་རྟགས་རྫོགས་ནས་ལིངྒ་དེ། །སྡོམ་པ་ཤོར་བའི་ཆོས་གོས་ཀྱི། །དུམ་བུས་བཏུམ་ལ་སྔགས་པ་ནི། །དམ་ཚིག་ཉམས་པའི་སྐུ་ཡིས་བཅིངས། །གླང་བུའི་ཐོད་པར་བཅུག་བྱས་ལ། །དེ་སྟེང་གདིང་བ་འཁར་གསིལ་བརྡེག །དེ་སྟེང་སྣམ་སྦྱར་བལྟེབས་ལ་བཞག །དེ་ནས་ལིངྒ་
གླང་ཐོད་བཅས། །ལྷ་ཁང་ཐེམ་འོག་དོང་བྲུས་མནན། །རྡོ་ལེབ་རྒྱ་གྲམ་བྲིས་པས་བཅད། །ལེགས་པར་བརྡུང་ལ་མིང་དོན་སྦས། །རྗེས་སུ་རིང་བསྲུང་སྒོམ་བཟླས་དང་། །བསྔོ་སྨོན་སྲུང་བའི་སྐབས་ལྟར་བྱ། །མན་ངག་གབ་སྦས་ཡོད་པ་རྣམས། །ཕལ་ཆེར་གསལ་བར་བཀོད་པའོ། །འབུམ་བཟློག་ལ་སོགས་ཞལ་ཤེས་འགའ། །ཡོད་པ་གསེར་གྱིས་སྒྲུབ་པར་གྱིས། །ཞལ་ཤེས་མེད་པར་འདི་བསྒྲུབས་ན། །དགྲ་སྲོག་བས་ཀྱང་རང་སྲོག་མྱུར། །འདི་འདྲ་བྲི་བར་མི་རིགས་ཀྱང་། །སེང་གེ་འབུ་ཡིས་གསོད་པ་བཞིན། །ཐུབ་བསྟན་སེར་གོས་གྱོན་པས་བཤིགས། །སློབ་མ་དམ་ཉམས་སེང་ལྟར་འཕྱོ། །དེ་ཕྱིར་དམ་ཉམས་བསྒྲལ་བའི་ཐབས། །བསྟན་ལ་ཕན་ཕྱིར་རཱ་གས་བསྒྲིགས། །ཉེས་པ་ལྷ་དང་སྲུང་མར་བཤགས། །དགེ་བས་ཐུབ་བསྟན་འཕེལ་རྒྱས་ཤོག །མངྒ་ལཾ།། །ཤེར་སྙིང་ཡང་ཟློག་གི་དགྲ་བོ་བམ་ལོག་ཤིད་ཏུ་བསད་པ་དང་། པྲཛྙཱ་པ་ར་མི་ཏ་ན་མོ། དམ་ཉམས་བསྟན་པའི་རུ་ཏྲ་ཡིས། །ཚུར་ལ་ཟློག་པ་བྱེད་པའམ། །ཤེར་སྙིང་མཁན་པོ་ནང་འགྲས་ན། །ཡང་ཟློག་དུག་གི་སྤུ་གྲི་ནི། །དུག་ཤོག་དག་ལ་ཡི་གེ་བྲི། །ལྕེ་ཕྱུང་སྟེང་དུ་
འཁོར་ལོ་ནི། །རྩིབས་དྲུག་བོ་ཡིག་དྲུག་གིས་མཚན། །དབུས་སུ་རྡོ་རྗེ་རྒྱ་གྲམ་བྲི། །ལྟེ་བར་ནཾ༔ལ་མིང་གིས་བསྐོར། །ཡན་ལག་ཛཿཧཱུྃ་བཾ་ཧོཿས་འཛེར། །བྲུབ་ཁུང་ནང་བཅུག་ཤར་ངོས་བཞག །དགོང་མོའི་གྲིབ་སོ་ཚུར་གུག་དུས། །ཉི་མ་དག་ལ་རྒྱབ་རྟེན་ནས། །རང་ཉིད་ཐུབ་པ་རི་རབ་ཙམ། །སྐུ་མདོག་སོལ་བ་རྒྱ་སྣག་མདོག །སྐྱིལ་ཀྲུང་དར་ནག་ཆོས་གོས་གསོལ། །ཕྱག་གཡས་ས་གནོན་ཕྱག་རྒྱ་ཡིས། །བྱད་མའི་ལྷ་སྲུང་འགུལ་མི་ནུས། །ཕྱག་གཡས་པར་བུ་ནག་པོའི་ནང་། །བྱད་མ་ལྷ་སྲུང་བཅས་པ་བཅུག །གནམ་ལྕགས་རྡོ་རྗེ་རྒྱ་གྲམ་གྱིས། །ཁ་བཅད་ཐར་དུས་མེད་པར་བསམ། །མདུན་དུ་ཧཱུྃ་ལས་བྱད་མ་དེ། །རིད་ཅིང་སྔོ་ཧམ་ལྕེས་བྲང་ཁྱབ། །ལྕེ་སྟེང་འཁོར་ལོ་རྩིབས་དྲུག་པ། །བཻ་ཡིག་དྲུག་མཚན་འཁོར་ལོའི་ལྟེ། །གསེར་གྱི་རྡོ་རྗེ་རྒྱ་གྲམ་མནན། །ལུས་ངག་གཡོ་འགུལ་བྲལ་བར་གྱུར། །ཁཾ་ཡིག་སྟོང་ཕྲག་གསུམ་བཟླས་ལ། །ཉུང་ནག་ཐུན་ལ་ཁ་རླངས་དང་། མཆིལ་མ་མ་སོང་ཕུ་ཡིས་སྔགས། །ཐུན་དེར་བྲབ་ཅིང་སྒྲུབ་པ་ནི། །ཉི་མ་དམར་ཐག་འདས་པར་བསྒྲུབ། །དམར་ཐག་ཆད་ནས་ཤོག་ལིང་དེ། །བྲ་བོ་ནག་པོའི་སོག་མས་
བསྲེགས། །ཐལ་བ་གཡག་རོག་ལྕི་བར་བསྲེ། །ཉ་བོ་བྱས་ལ་མིང་ཡིག་བཅུག །རྒྱས་པར་ལིངྒ་སྔོན་བཞིན་བཅུག །ལིངྒ་མིང་ཡིག་མེད་ཀྱང་ཆོག །ཉ་བོ་ལྷ་ཁང་ཐེམ་པའི་འོག །བཀུག་གཞུག་བྱས་ལ་དོང་བྲུས་མནན། །ལེགས་པར་མི་མངོན་དམ་དུ་སྦས། །བན་དགྲ་སྔགས་ཟློག་མཁན་གྱི་གཤེད། །མྱུར་མགྱོགས་རླུང་གི་སྤུ་གྲི་འདི། ཡང་བཟློག་ནག་པོ་ཞེས་བྱ་བ། །བསྟན་པ་སྲུང་བའི་མཚོན་ཆ་སྟེ། །བྱད་མའི་སྲོག་གི་སྤུ་གྲི་ཡིན། །ཀུན་ལ་མེད་པའི་ཁྱད་ཆོས་འདི། །སྣོད་མིན་རྣམས་ལ་ཤིན་ཏུ་གསང་། །འདི་བྲིས་ཉེས་པ་རབ་ཏུ་འཆགས། །དགེ་བས་ཐུབ་བསྟན་དར་རྒྱས་ཤོག །རཱ་ག་ཨ་སྱས་ཟིན་བྲིས་བྱས། །ཞལ་ཤེས་ཐུགས་ལ་གབ་བོ་རྒྱ། །སྤྱི། པ་དསབ་དུ་གོལ་མབ་བོ་གྲད་གི་གཟློབ་ངཡ་ངསི་རཤེ། ༈ ན་མོ་པྲཛྙཱ་པཱ་ར་མི་ཏ་ཡེ། ཤེས་རབ་སྙིང་པོའི་བཟླས་བརྗོད་ལ། །བརྟེན་ནས་རྔོད་གཏོང་ཟློག་པ་ནི། །རང་ཉིད་ཐུབ་པའི་བསྐྱེད་རིམ་ནི། །སྲུང་བ་དུས་ལྟར་བསྒོམས་བྱས་ཏེ། །སྲུང་འཁོར་བར་དུ་སངས་རྒྱས་ཀྱི། །སྐུ་རྣམས་སྒོམ་པར་མི་བྱའོ། །རང་ཉིད་ཐུབ་པའི་འོད་ཟེར་ཕྱོགས་བཅུར་འཕྲོས། །གནོད་བྱེད་བྱད་མ་རང་
དབང་མེད་པར་བཀུག །ཕྱི་རོལ་འཁོར་ལོའི་རྩིབས་བར་རྣམས་སུ་བཞག །འཁོར་ལོའི་རྩིབས་སྟོང་སྤུ་གྲི་ངར་རྣོ་བས། །གནོད་བྱེད་ཧྲུག་ཧྲུག་གཏུབས་ནས་བེམ་རིག་བྲལ། །མེས་བསྲེགས་རླུང་གིས་གཏོར་ནས་རྗེས་མེད་བཏང་། །ཁོ་ཡི་རྣམ་ཤེས་ཨ་ཡིག་རྣམ་པ་རུ། །སྟོན་པའི་མཛོད་སྤུར་ཐིམ་པས་ཆོས་སྐུ་ཐོབ། །ཟབ་མདོ་བདུན་ནམ་གསུམ་བཟླས་དེ་ཡི་རྗེས། །ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བྷྱོ་དྷི་སྭཱ་ཧཱ། གནོད་བྱེད་བྱད་མ་ཨ་བྷྱོ་ཛཿ ཨ་ཝཱཀྐ་ཙིཏྟ་ཧཱུཾ་བྷ་ཡ་ནན་ཟློག །ཨོཾ་ཟློག །ཨཱཿཟློག །ཧཱུྃ་ཟློག་སྭཱ་ཧཱ། སྔགས་གྲངས་བརྒྱའམ་ཉེར་གཅིག་བདུན་སོགས་བཟླ། །རང་ཉིད་ཤཱཀ་ཐུབ་ནམ་མཁའ་ཁྱབ་པའི་སྐུ། །ཕྱག་གཡས་ཉི་མ་བསྐལ་པའི་མེ་ཆེན་འབར། །ཕྱག་གཡོན་ཟླ་བ་བསྐལ་པའི་རླུང་ནག་འཚུབ། །ཐུགས་ཀའི་འོད་ཀྱིས་གནོད་བྱེད་དགྲ་བགེགས་རྣམས། །རང་དབང་མེད་པར་ཉི་ཟླའི་བར་དུ་བཀུག །ཕྱག་གཉིས་བརྡབས་པས་གནོད་བྱེད་བྱད་མ་རྣམས། །མེས་བསྲེགས་ཐལ་བ་རླུང་གཏོར་ལུས་ངག་བརླག།སེམས་ཀྱི་གདུག་རྩུབ་ཁོ་རང་ཉིད་ལ་སྨིན། །ན་མོ་བླ་མ་ལ་ཕྱག་འཚལ་ལོ། །ནས། རབ་ཏུ་ཞི་བར་གྱུར་ཅིག །ཏདྱ་ཐཱ།
ཨོཾ་ག་ཏེ་སོགས་དང་། གནོད་བྱེད་བྱེད་མ་ལ་ཨ་བྷྱོ་ཛ། ཨ་ཝཀྐ་ཙིཏྟ་སྭཱ་བྷ་ཡ་ནན་ཟློག །ཨོཾ་ཟློག །ཨཱཿཟློག ཧཱུྃ་ཟློག་སྭཱ་ཧཱ། གནོད་བྱེད་སྡེ་བརྒྱད་བྱད་མའི་ཤ་རུས་ཁྲག་རྩ་ལ་ཧུར་ཧུར་ཟློག །ཐལ་མོ་བརྡབ་ཅིང་འབུམ་ཟློག་ཉེར་གཅིག་བཀླག །བགེགས་རིགས་སྟོང་ཕྲག་བརྒྱད་ཅུ་ཞི་བ་ལ་སོགས་བརྗོད། །འདི་ལ་ཞལ་ཤེས་ཐུགས་ལ་སྦས་། །དེ་ནས་དམིགས་མེད་སྟོང་ཉིད་རྒྱ་ཡིས་གདབ། །ཟློག་པ་འདི་ཉིད་ཁོ་ན་བྱས་པས་ཀྱང་། །ལོ་ལ་མི་འགོར་ཕ་རོལ་བརླག་པར་གསུངས། །བཟློག་རྟགས་ནམ་མཁར་སྔགས་སྒྲ་གྲག་པ་དང་། །གཞན་གྱིས་ཕྱག་འཚལ་ཤག་ལས་རྒྱལ་བ་དང་། །གཡུལ་ལས་རང་རྒྱལ་སེར་བ་ཟློག་སོགས་འབྱུང་། །འདི་བྲིས་ཉེས་བཤགས་དགེ་བ་འགྲོ་ལ་བསྔོ། །རཱ་ག་ཨ་སྱས་བྲིས་པ་སྤྱི་རྒྱུ། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།