དེ་བཞིན་གཤེགས་པ་སྨན་བླ་མཆེད་བདུན་གྱི་བྱིན་རླབས་དབང་གི་རིམ་པ།
དེ་བཞིན་གཤེགས་པ་སྨན་བླ་མཆེད་བདུན་གྱི་བྱིན་རླབས་དབང་གི་རིམ་པ་ཁྱེར་བདེ་བ་བཞུགས་སོ། །
ན་མོ་གུ་རུ་བྷཻ་ཥ་ཛྱཻ་ཡེ། བླ་མ་སྨན་གྱི་ལྷ་ལ་ཕྱག་འཚལ་ནས། སྨན་བླ་མཆེད་བདུན་བྱིན་རླབས་རིམ་པ་བྲི། མཎྜལ་ལ་འབྲུའི་ཚོམ་བུ་བདུན་བཀོད། ཟླུམ་གཏོར་མེ་ཏོག་གི་རྒྱན་ཅན་ལ་ཡོད་ན་སྨན་བླའི་ཙཀླུ་བཙུགས། བཀའ་སྲུང་གནོད་སྦྱིན་སྡེ་དཔོན་རྣམས་ལ་དཀར་གཏོར་བཤམས། གཞི་བདག་དང་འབྱུང་པོ་ལ་སྔོན་འགྲོ་གཏོར་མ་བཤམས། །དཀྱིལ་འཁོར་མཐར་མཆོད་པ་བཤམས། བདག་བསྐྱེད་ནི། རང་ཉིད་སྐད་ཅིག་གིས་སྨན་གྱི་ལྷར་གསལ་བའི་ཐུགས་ཀ་ནས་འོད་ཟེར་འཕྲོས་པས་བླ་མ་མི་བསྐྱོད་པའི་རྣམ་པ་དབུའི་ཆ་ལ་བཞུགས་པའི་བཅོམ་ལྡན་འདས་སྨན་བླ་མཆེད་བདུན་ལ་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་
སྤྱན་དྲངས། བཛྲ་ས་མཱ་ཛཿ གུ་རུ་བྷེ་ཥ་ཛེ་ན་མཿ ཞེས་ཕྱག་འཚལ་ནས། ཨགྷཾ་སོགས་ཀྱིས་མཆོད་ལ། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་དང་། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དམ་པ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཅེས་ཚད་མེད་བཞི་བསྒོམས་ནས། བཛྲ་མུ༔ ཚོགས་ཞིང་རང་བཞིན་གནས་སུ་གཤེགས། ཨོཾ་སྭ་བྷ་ཝཱ་
ཤདྡྷཿསརྦ་སོགས། སྟོང་པའི་ངང་ལས་པཾ་ལས་པདྨ་ཨ་ལས་ཟླ་བའི་སྟེང་དུ། རང་སེམས་སྒྲའི་རྣམ་པ་ཨོཾ་དཀར་པོ་ལས་འོད་འཕྲོས་དོན་གཉིས་བྱས་ནས་ཚུར་འདུས་པ་ལས། ཨཱཿཙྪདམར་པོར་གྱུར། དེ་ལས་འོད་འཕྲོས་དོན་གཉིས་བྱས་ནས་ཚུར་འདུས་པ་ལས། ཧཱུཾ་སྔོན་པོར་གྱུར། དེ་ལས་འོད་འཕྲོས་དོན་གཉིས་བྱས་ཚུར་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་སྨན་གྱི་བླ་སྐུ་མདོག་མཐིང་ཀ་བེཟླུརྒྱ་ལྟ་བུར་ཞལ་གཅིག་ཕྱག་གཉིས་ཞབས་རྡོ་རྗེའི་སྐྱིལ་ཀྲུང་གིས་པད་ཟླ་ལ་བཞུགས་པ། དར་དམར་པོའི་ཤམ་ཐབས་དང་ཆོས་གོས་གསོལ་བ། ཕྱག་གཡས་མཆོག་སྦྱིན་གྱི་ཕྱག་རྒྱས་སྨན་མཆོག་ཨ་རུ་ར་རྣམ་པར་རྒྱལ་བ་འཛིན་ཅིང་། གཡོན་མཉམ་བཞག་གི་སྟེང་ན་བདུད་རྩིའི་ལྷུང་བཟེད་འཛིན་པ་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་ཅིང་འོད་དང་འོད་ཟེར་འཕྲོ་བ། དབུ་གཙུག་ན་བླ་མ་མི་བསྐྱོད་པ་ཡིད་བཞིན་གྱི་ནོར་བུ་དབང་གི་རྒྱལ་པོའི་ངོ་བོར་བཞུགས་པའོ། །དེའི་གཡས་སུ་ཟླ་བ་ལ་མཾ་ལས་རྒྱལ་སྲས་ཉི་ལྟར་སྣང་མཛད་དམར་སེར། ཕྱག་གཡོན་པདྨའི་ཡུ་བ་ཐུགས་ཀར་འཛིན་པའི་པདྨའི་སྟེང་དུ་ཉི་མ་ལ་གནས་
པ། གཡོན་དུ་པད་ཟླ་ལ་ཨ་ལས་རྒྱལ་སྲས་ཟླ་ལྟར་སྣང་མཛད་དཀར་པོ་ཕྱག་གཡོན་ཟླ་བས་མཚན་པའི་པདྨའི་ཡུ་བ་ཐུགས་ཀར་འཛིན་པ་གཉིས་ཀའང་ཕྱག་གཡས་མཆོག་སྦྱིན་མཛད་ཅིང་། ལོངས་སྤྱོད་རྫོགས་པའི་རྒྱན་ཅན་བཞེངས་པའི་སྟབས་ཀྱིས་གཙོ་བོ་ལ་གཟིགས་པའོ། །གཙོ་འཁོར་གསུམ་ཀའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཧཱུྃ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས། བཛྲ་ས་མཱ་ཛཿ ཨགྷཾ་སོགས། ཛཿཧཱུྃ་བཾ་ཧོཿ དམ་ཚིག་པ་དང་དབྱེར་མེད་པར་གྱུར། སླར་ཡང་ཐུགས་ཀའི་འོད་ཀྱིས་རིགས་ལྔ་སྤྱན་དྲངས། ཨནྡྷཾ་སོགས། བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་རིགས་ལྔས་དབང་བསྐུར། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་དབང་བསྐུར་རིགས་བདག་ཆུ་ལྷག་ཡར་ལུད་པ་ལས་མི་བསྐྱོད་པ་རིགས་བཞིས་བསྐོར་བས་དབུ་བརྒྱན་པར་གྱུར། དེ་ནས་རང་གི་དཔྲལ་བའི་ཨོཾ་དཀར་པོ་ཡོངས་སུ་གྱུར་པ་ལས་རྣམ་པར་སྣང་མཛད་ལ་འཁོར་རྒྱལ་བ་རིགས་བཞིས་བསྐོར་བ། མགྲིན་པའི་དམར་པོ་ཡོངས་སུ་གྱུར་པ་ལས་འོད་དཔག་མེད་ལ་གཞན་
རིགས་བཞིས་བསྐོར་བ། ཐུགས་ཀར་ཧཱུྃ་མཐིང་ནག་ཡོངས་སུ་གྱུར་པ་ལས་མི་བསྐྱོད་པ་ལ་གཞན་རིགས་བཞིས་བསྐོར་བ། དེ་ལྟར་སྐུ་གསུང་ཐུགས་ཀྱི་ལྷ་གསུམ་གྱི་ཐུགས་ཀར་སྨན་བླ་ཡེ་ཤེས་སེམས་དཔའ་རེ་རེའི་ཐུགས་ཀར་ཟླ་བའི་གདན་ལ་ཧཱུཾ་མཐིང་ནག་གི་མཐར་ཉེ་སྙིང་དང་གཟུངས་རིང་གཉིས་ཀྱིས་བསྐོར་བ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཏེ་བྱང་ཆུབ་ཀྱི་ས་ལ་བཀོད། སངས་རྒྱས་ཐམས་ཅད་མཉེས་པར་བྱས། འོད་ཟེར་ཚུར་འདུས་པ་ལས་བདེ་གཤེགས་བདུན་གྱི་བྱིན་རླབས་ཞུགས་པར་གྱུར། ཏདྱ་ཐཱ། ཨོཾ་བྷི་ཥ་ཛེ་གྷོ་ཥ་ཛེ་མ་ཧཱ་བྷི་ཥ་ཛོ་རཱ་ཛ་ས་མུཏྟ་ཏེ་སྭཱ་ཧཱ། ཞེས་ཉེ་སྙིང་དང་། ཨོཾ་ན་མོ་བྷ་ག་ཝ་ཏེ། བྷི་ཥ་ཛེ་གུ་རུ་བཻཌཱུརྱ་པྲ་བྷ་རཱ་ཛ་ཡ་ཏ་ཐཱ་ག་ཏཱ་ཡ། ཨརྒ་ཏེ་སམྱཀཾ་བུདྡྷ་ཡ། ཏདྱ་ཐཱ། ཨོཾ་བྷི་ཥ་ཛེ་གྷོ་ཥ་ཛེ་མ་ཧཱ་བྷེ་ཥ་ཛྭ་རཱ་ཛ་ས་མུཏྟ་ཏེ་སྭཱ་ཧཱ། ཞེས་མཚན་སྔགས་གཟུངས་རིང་དང་། ཏདྱ་ཐཱ། གྷུ་མེ་གྷུ་མེ། ཨི་མི་ནི་མི་ཧི། མ་ཏི་མ་ཏི། །སཔྟ་ཏ་ཐཱ་ག་ཏ་ས་མཱ་དྨ་དྷིཊྛི་ཏེ། ཨ་ཏི་མ་ཏེ། པཱ་ལེ། །པཱ་པཾ་ཤོ་དྷ་ནི། སརྦ་པཱ་པཾ་ནཱ་ཤ་ཡ། མ་མ་བུདྡྷེ། བུདྡྷོཏྟ་མེ། ཨུ་མེ། ཀུ་མེ། བུདྡྷ་ཀྵེ་ཏྲ་པ་རི་ཤོ་དྷ་ནི།
དྷ་མེ། ནི་དྷ་མེ། མེ་རུ་མེ་རུ། མེ་རུ་ཤི་ཁ་རེ། སརྦ་ཨ་ཀཱ་ལ་ཨ་མྲྀཏུ་ནི་ཝཱ་ར་ཎི། བུདྡྷེ་སུ་བུདྡྷེ་བུདྡྷ་ཨ་དྷིཥྛ་ན། རཀྵནྟུ་མེ། སརྦ་དེ་ཝཱ། ས་མེ་ཨ་ས་མེ་ས་མ་ནཱ་ཧ་རནྟ་མེ། སརྦ་བུདྡྷཾ། བོ་དྷི་ས་ཏྭཱ་ནཾ། ཤ་མེ་ཤ་མེ། པྲ་ཤ་མནྟུ་མེ་སརྦ་ཨི་ཏུ་པ་དྲ་བ་བྱུ་དྷ་ཡ༔ པཱུ་ར་ཎི་པཱུ་ར་ཎི། པཱུ་ར་ཡ་མི། སརྦ་ཨཱཿ་ཤཱ་ཡ་བེཟླུརྨ་པྲ་ཏི་བྷ་སེ་སརྦ་པཱ་པཾ་ཀྵ་ཡཾ་ཀ་རི་སྭཱ་ཧཱ། ཅི་ནུས་བཟླས་ལ། ཨགྷཾ་སོགས། ཐུགས་རྗེས་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སྐྱོབས། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུརྱ་ཡི་འོད་ལ་ཕྱག་འཚལ་ལོ། །བཅོམ་ལྡན་འདས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོས། སྔོན་སྨོན་ལམ་ཆེན་པོ་བཅུ་གཉིས་བཏབ་པའི་བཀའ་དྲིན་དང་། མཚན་ཐོས་པའི་མདོ་ལས་ཇི་སྐད་བཤད་པ་ཐམས་ཅད་བདག་དང་སེམས་ཅན་ཐམས་ཅད་ཀྱིས་ད་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཅེས་བརྗོད། མདུན་བསྐྱེད་ཚོམ་བུ་བསང་སྦྱངས། ཨོཾ་ཨ་མྲྀ་ཏེ་ཧཱུྃ་ཕཊ༔ ཨོཾ་སྭ་བྷ་ཝ་སོགས། སྟོང་པའི་ངང་ལས་མཎྜལ་རིན་པོ་ཆེའི་གཞལ་ཡས་ཁང་ཡངས་ཤིང་རྒྱ་ཆེ་བའི་དབུས་སུ་པདྨ་འདབ་
མ་དྲུག་གི་དབུས་དང་འདབ་མར་སེང་གེའི་ཁྲི་པདྨ་དང་ཟླ་བའི་གདན་བདུན་ལ་དབུས་སུ་བཅོམ་ལྡན་འདས་སྨན་གྱི་བླ་མཐིང་ཀ་མཆོག་སྦྱིན་དང་མཉམ་བཞག་གི་ཕྱག་གིས་ཨ་རུ་ར་དང་ལྷུང་བཟེད་འཛིན་པ། འདབ་མ་དྲུག་ལ་རིམ་པ་ལྟར་དུ་མཚན་ལེགས་སེར་པོ་སྐྱབས་སྦྱིན་མཉམ་བཞག །རིན་ཆེན་ཟླ་བ་དམར་སེར་མཆོག་སྦྱིན་མཉམ་བཞག །གསེར་བཟང་དྲི་མེད་སེར་པོ་ཆོས་འཆད་མཉམ་བཞག །མྱ་ངན་མེད་མཆོག་དམར་སྐྱ་མཉམ་བཞག །ཆོས་བསྒྲགས་རྒྱ་མཚོའི་དབྱངས་དཀར་དམར་ཆོས་འཆད་མཉམ་བཞག །ཆོས་བློ་མངོན་མཁྱེན་དམར་སྨུག་མཆོག་སྦྱིན་མཉམ་བཞག་མཛད་པ། དེ་ཐམས་ཅད་མཚན་དང་དཔེ་བྱད་ཀྱིས་བརྒྱན་ཅིང་ཆོས་གོས་གསུམ་གྱིས་བཀླུབས་ནས་རྡོ་རྗེའི་སྐྱིལ་ཀྲུང་གིས་བཞུགས་པ་འཇམ་དཔལ་དང་སྐྱབས་གྲོལ་དང་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་བཅུ་དྲུག་དང་། ཚངས་པ་དང་བརྒྱ་བྱིན་དང་ཕྱོགས་སྐྱོང་བ་བཅུ་དང་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་འཁོར་བདུན་འབུམ་བདུན་འབུམ་དང་བཅས་པ་དང་། སྒོ་བཞི་ལ་རྒྱལ་པོ་ཆེན་པོ་བཞི་དང་བཅས་པ་གསལ་བར་གྱུར། ལྷ་རྣམས་ཀྱི་གནས་གསུམ་ཡི་གེ་གསུམ་
ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་ས་མཱ་ཛཿ ཛཿཧཱུྃ་བཾ་ཧོཿ དམ་ཚིག་པ་དང་ཡེ་ཤེས་པ་དབྱེར་མེད་པར་གྱུར། སླར་ཡང་དབང་ལྷ་སྤྱན་དྲངས་དབང་བསྐུར་དབང་རྟགས་སུ་རྡོ་རྗེ་སེམས་དཔས་དབུ་བརྒྱན་པར་གྱུར། སྨན་བླ་མཆེད་བདུན་ཐུགས་ཀར་ཟླ་བའི་གདན་ལ་ཧཱུྃ་ཡིག་གི་མཐར་གཟུངས་ཀྱིས་བསྐོར་བའི་འོད་ཀྱིས་བདག་དང་སློབ་མས་གཙོར་བྱས་སེམས་ཅན་ཐམས་ཅད་ཀྱི་སྒྲིབ་པ་སྦྱང་བར་གྱུར། ཏདྱ་ཐཱ། གྷ་མེ་སོགས་ཅི་ནུས་བཟླས་ལ། ཨོཾ་བཛྲ་སྤ་ར་ཎ་ཁཾ་ཞེས་བྱིན་གྱིས་བརླབས་ནས། དངོས་འབྱོར་ཡིད་ཀྱིས་རྣམ་སྤྲུལ་པའི། །ལྷ་རྫས་དག་པའི་ཉེར་སྤྱོད་རྣམས། །བཅོམ་ལྡན་འཁོར་དང་བཅས་ལ་འབུལ། །བཞེས་ནས་བདག་ལ་དངོས་གྲུབ་སྩོལ། །ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨབྷཾ་པཱཏྱཾ་སོགས་དང་། སྲབ་འཇམ་ཡངས་པ་ལྷ་ཡི་གོས། །སོགས་ནས། ཨོཾ་བཛྲ་
ཝསྟྲ་ཨཱཿཿཧཱུྃ། གཏོར་མ་བྲན་ལ། བྷྲུཾ་ལས་རིན་པོ་ཆེའི་སྣོད་དུ་ཨོཾ་ཨཱཿཿཧཱུཾ་འོད་དུ་ཞུ་བ་ལས་གཏོར་མ་བདུད་རྩིའི་རྒྱ་མཚོར་གྱུར། ན་མཿསརྦ་ཏ་ཐཱ་ག་ཏེ་བྷྱོ་སོགས་ཀྱིས་བྱིན་གྱིས་བརླབས། ནམ་མཁའ་མཛོད་ཀྱི་ཕྱག་རྒྱ་བྱས་ལ། ཨོཾ་སརྦ་ཏ་ཐཱ་ག་ཏ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། གཏོར་མ་གཉིས་ལ། ཨ་ཀཱ་རོས་བྱིན་གྱིས་བརླབས་ལ། ཨོཾ་ཡཀྵ་ལོ་ཀ་པ་ལ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བསྔོ་ཞིང་འབུལ་བའི་གནས་ནི། སྨན་བླ་མཆེད་བདུན་འཁོར་དང་བཅས་པ་དང་ཚངས་པ་དང་བརྒྱ་བྱིན་ཕྱོགས་༈ སྐྱོང་བ་བཅུ་རྒྱལ་པོ་ཆེན་པོ་བཞི་འཁོར་དང་བཅས་པ། གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་གཡོག་བདུན་འབུམ་བདུན་འབུམ་དང་བཅས་པའི་ཞལ་དུ་ཁ་ཁ་ཁཱ་ཧི་ཁཱ་ཧི། བཅོམ་ལྡན་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པའི་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་
ལ་སྲུངས། །དངོས་གྲུབ་ཀུན་གྱིས་སྡོང་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་མཛོད། །ཅེས་ཕྲིན་ལས་བཅོལ། འགྲོ་བའི་ནད་གསོ་མཛད་པ་སྨན་གྱི་མཆོག །བཻཌཱུརྨ་ལྟར་དྭངས་བའི་སྐུ་མངའ་ཞིང་། །སྐུ་ཡི་འོད་ཀྱིས་འགྲོ་བ་སྒྲོལ་མཛད་པ། །སྨན་གྱི་རྒྱལ་པོ་དེ་ལ་ཕྱག་འཚལ་བསྟོད། །མཚན་ལེགས་སྒྲ་དབྱངས་གསེར་བཟང་མྱ་ངན་མེད། །ཆོས་བསྒྲགས་མངོན་མཁྱེན་སྨན་བླ་ཤཱཀྱ་ཐུབ། །སྨོན་ལམ་རྒྱ་ཆེན་དགོངས་པ་ཡོངས་རྫོགས་མཛད། །བདེ་བར་གཤེགས་པ་བརྒྱད་ལ་ཕྱག་འཚལ་བསྟོད། །བདེར་གཤེགས་བསྟན་པ་སྲུང་བའི་དགེ་བསྙེན་མཆོག །འཇིགས་པའི་གཟུགས་དང་རྔམས་པའི་ཆ་ལུགས་ཅན། །བདུན་འབུམ་འཁོར་གྱིས་བསྐོར་བའི་བཅུ་གཉིས་པོ། །གནོད་སྦྱིན་སྡེ་དཔོན་རྣམས་ལ་ཕྱག་འཚལ་བསྟོད། །བསྟོད་པར་འོས་པ་
ཐམས་ཅད་ལ། །སོགས་བསྟོད། ༈ དེ་ནས་སློབ་མ་རྣམས་འདུས་ལ་ཁྲུས་བྱས་མེ་ཏོག་བཀྱེ། སྔོན་འགྲོ་གཏོར་མ་བྲན་ལ། བགེགས་དང་འབྱུང་པོ་གནས་བདག་ལ་བསྔོས་ནས་བགེགས་བསྐྲད། ཧཱུྃ། དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ངས་ནི་གནས་འདིར་དཀྱིལ་འཁོར་ཆེན་པོ་བསྒྲུབ། །ཁྱོད་རྣམས་འདི་ནས་གཞན་དུ་འགྲོ་བར་གྱིས། །གལ་ཏེ་ང་ཡི་བཀའ་ལས་འདའ་བྱེད་ན། །ཡེ་ཤེས་ཅན་གྱི་རྡོ་རྗེ་འབར་བ་ཡིས། །མགོ་བོ་ཚལ་པ་བརྒྱར་ནི་འགས་འགྱུར་ཞིང་། །བགེགས་རྣམས་བརླག་པར་འགྱུར་བ་གདོན་མི་ཟ། །སུམ་བྷ་ནི་བརྗོད་པས་བསྲུང་ངོ།། ༈ འོ་ན་ད་ལམ་ཁྱེད་རྣམས་ལ་བདེ་གཤེགས་སྨན་བླ་མཆེད་བདུན་གྱི་དབང་བསྐུར་བྱིན་རླབས་དང་བཅས་པ་བྱེད་པ་ལ། ཐོག་མར་ལོ་རྒྱུས་ནི། སྔོན་སྟོན་པ་ཤཱཀྱ་ཐུབ་པ་དེ་ཉིད་འཁོར་དཔག་ཏུ་མེད་པ་དང་ཐབས་ཅིག་ཏུ་ཡངས་པ་ཅན་གྱི་རོལ་མོའི་སྒྲ་ཅན་གྱི་ཤིང་དྲུང་ན་བཞུགས་པའི་ཚེ་འཇམ་དཔལ་གྱིས་མ་འོངས་པའི་སེམས་ཅན་རྣམས་རྗེས་སུ་འཛིན་པའི་ཕྱིར། གང་ཐོས་པ་ཙམ་གྱིས་སྡིག་སྒྲིབ་ཐམས་ཅད་སྦྱངས་ཤིང་བྱང་ཆུབ་ལས་ཕྱིར་མི་ལྡོག་པར་འགྱུར་བའི།
དེ་བཞིན་གཤེགས་པ་དེ་དག་གི་མཚན་དང་སྨོན་ལམ་རྒྱས་པར་ཞུས་པའི་ངོར། བཅོམ་ལྡན་འདས་སྨན་གྱི་བླ་མའི་མདོ་དང་། སྨན་བླ་མཆེད་བདུན་གྱི་མདོ་གཉིས་སུ་གསུངས་ཏེ། དེ་ཡང་འདི་ནས་ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་འདས་པའི་ཕ་རོལ་ན། འཇིག་རྟེན་གྱི་ཁམས་གཞན་གྱིས་མི་ཐུབ་པ་ན་སངས་རྒྱས་མཚན་ལེགས་དང་། འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ན་སངས་རྒྱས་རིན་ཆེན་ཟླ་བ་དང་། འཇིག་རྟེན་གྱི་ཁམས་སྤོས་ཀྱིས་ཡོངས་སུ་གང་བ་རིན་པོ་ཆེ་བརྩེགས་པ་ན་སངས་རྒྱས་གསེར་བཟང་དྲི་མེད་དང་། འཇིག་རྟེན་གྱི་ཁམས་མྱ་ངན་མེད་པ་ན་སངས་རྒྱས་མྱ་ངན་མེད་མཆོག་དང་། འཇིག་རྟེན་གྱི་ཁམས་ཆོས་ཀྱི་རྒྱལ་མཚན་ན་སངས་རྒྱས་ཆོས་བསྒྲགས་རྒྱ་མཚོའི་སྒྲ་དབྱངས་དང་། འཇིག་རྟེན་གྱི་ཁམས་རིན་པོ་ཆེའི་རྒྱ་མཚོར་ལེགས་པར་གནས་པ་ན་སངས་རྒྱས་ཆོས་བློ་མངོན་མཁྱེན་དང་། འཇིག་རྟེན་གྱི་ཁམས་བཻཌཱུརྨ་སྣང་བ་ན། སངས་རྒྱས་སྨན་གྱི་བླ་རྣམས་བཞུགས་ཏེ། སངས་རྒྱས་ཀྱི་ཞིང་དེ་དག་ནི་ཡོན་ཏན་ཕུན་སུམ་ཚོགས་པ་བདེ་བ་ཅན་ལྟ་བུའི་བཀོད་པ་དང་། སངས་
རྒྱས་དེ་དག་གི་སྔོན་གྱི་སྨོན་ལམ་གྱི་ཁྱད་པར་དང་། སངས་རྒྱས་དེ་དག་གི་མཚན་ཐོས་ཤིང་བཟུང་བའི་ཕན་ཡོན་དཔག་ཏུ་མེད་པ་རྣམས་རྒྱ་ཆེར་གསུངས་སོ། །དེའི་ཚེ་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་རེ་རེ་ལ་གཡོག་བདུན་འབུམ་བདུན་འབུམ་དང་བཅས་པས། ཚིག་གཅིག་ཏུ་མ་འོངས་པ་ན་སངས་རྒྱས་སྨན་གྱི་བླ་ཡི་མཚན་འཆང་བ་དང་། མཆོད་པར་བྱེད་པ་དེ་རྣམས་སྲུང་ཞིང་སྐྱོང་བ་དང་བསམ་པ་ཐམས་ཅད་ཡོངས་སུ་རྫོགས་པར་ཁས་བླངས་དམ་བཅས་སོ། །དེའི་ཚེ་ལྷའི་བུ་ཤེས་རབ་ཆུང་བ་ཁ་ཅིག་གིས་ཤར་ཕྱོགས་འཇིག་རྟེན་གྱི་ཁམས་གངྒའི་ཀླུང་འདས་པའི་ཕ་རོལ་ན་བཞུགས་པའི་སངས་རྒྱས་དེ་རྣམས་ཀྱི་མཚན་ཐོས་པ་དང་བཟུང་བའི་ཕན་ཡོན་དེ་ཙམ་ཇི་ལྟར་ཐོབ་བམ་ཞེས་ཐེ་ཚོམ་དུ་གྱུར་པ་དེའང་། སྟོན་པ་ཤཱཀྱ་ཐུབ་པས་མཁྱེན་ནས་ཏིང་ངེ་འཛིན་ལ་སྙོམས་པར་ཞུགས་པ་དང་། འཇིག་རྟེན་གྱི་ཁམས་རབ་ཏུ་གཡོས་ཙནྡན་གྱི་ཕྱེ་མ་དང་མེ་ཏོག་གི་ཆར་བབས། སྨན་བླ་མཆེད་བདུན་པོ་ཡང་སྐད་ཅིག་གིས་དེར་བྱོན་ནས་བྱང་ཆུབ་སེམས་དཔའི་ཚོགས་ཀྱིས་བསྐོར་ཞིང་། ཤཱཀྱ་ཐུབ་པ་དང་ཐབས་ཅིག་ཏུ་སེང་གེའི་ཁྲི་སོ་སོ་ལ་བཞུགས་པར་སྣང་བས། ལྷའི་བུ་
དེ་དག་རབ་ཏུ་དད་ནས་ལེགས་སོ་ལེགས་སོ་བརྗོད་ཅིང་མཆོད་པ་དུ་མས་མཆོད་ཅིང་ཕྱག་དང་བསྐོར་བ་བྱས་ནས་རང་རང་གི་སྨོན་ལམ་ཡང་བཏབ་བོ། །དེ་ནས་འཇམ་དཔལ་གྱིས་མ་འོངས་པ་ན་སེམས་ཅན་བསོད་ནམས་ཆུང་བ་དང་གཟའ་སྐར་དང་དགྲའི་གནོད་པ་དང་འཇིགས་པ་ཐམས་ཅད་ལས་སྐྱོབ་པ་དང་། སངས་རྒྱས་རྣམས་མཇལ་ཞིང་བསམ་པ་ཐམས་ཅད་འགྲུབ་པའི་གཟུངས་སྔགས་གསུང་བར་ཞུས་པས་བསམ་པ་ཐམས་ཅད་འགྲུབ་ཅིང་ལས་སྒྲིབ་ཐམས་ཅད་དག་ནས་སངས་རྒྱས་ཀྱི་ཞིང་དུ་སྐྱེ་བར་བྱེད་པ། དེ་བཞིན་གཤེགས་པ་ཏིང་ངེ་འཛིན་དང་སྟོབས་བསྐྱེད་པའི་བེཟླུརྒྱའི་འོད་ཅེས་བྱ་བའི་གཟུངས། ཏདྱ་ཐཱ། གྷུ་མེ་གྷུ་མེ་ཞེས་སོགས། གསུངས་པས་ས་ཆེན་པོ་རབ་ཏུ་གཡོས་ཤིང་འོད་ཀྱི་སྣང་བ་ཆེན་པོ་བྱུང་ངོ། །དེ་ནས་ཕྱག་ན་རྡོ་རྗེ་དང་ཚངས་པ་དང་བརྒྱ་བྱིན་རྒྱལ་པོ་ཆེན་པོ་བཞི་རྣམས་ཀྱིས་མ་འོངས་པ་ན་སངས་རྒྱས་ཀྱི་མཚན་འདི་དག་འཆང་བ་དང་མཆོད་པ་རྣམས་བསྲུང་ཞིང་བསྐྱང་བ་དང་། གནོད་པ་ཐམས་ཅད་ཟློག་པ་དང་མཐུན་རྐྱེན་ཐམས་ཅད་བསྒྲུབ་པར་ཁས་བླངས་དམ་བཅས་ནས་བྲོ་བོར་རོ། །དེ་ནས་སངས་རྒྱས་མྱ་ངན་ལས་འདས་
རྗེས་ཀུན་དགའ་བོས་མདོ་སྡེ་འདི་ཡང་བཀའི་བསྡུ་བ་མཛད་དེ། མདོ་འདིའི་དབང་ལུང་མན་ངག་ཐམས་ཅད་འཇམ་དཔལ་དབྱངས་ཉིད་ཀྱིས་མཁན་པོ་བོ་དྷི་སཏཱ་ལ་གནང་། བོ་དྷི་སཏཱས་རྒྱ་གར་དུ་ཉིད་ཀྱི་དབོན་པོ་བོ་དྷི་སཏྭ་ཆུང་བ་ལ་གནང་། མཁན་པོ་ཉིད་བོད་དུ་བྱོན་ནས་སྨན་བླའི་ཆོ་ག་རྒྱས་བསྡུས་གསུམ་མཛད་ཅིང་། རྒྱལ་པོ་ཁྲི་སྲོང་ལྡེའུ་བཙན་གྱི་སྐུ་རིམ་དང་སྒྲིབ་སྦྱང་། བོད་ཀྱི་རབ་བྱུང་རྣམས་ལ་ཆོ་ག་བཙུགས། དེ་ནས་རྒྱལ་པོ་སད་ན་ལེགས། ལྷ་ལུང་དཔལ་གྱི་རྡོ་རྗེ། བཙན་པོ་འོད་སྲུང་། དཔལ་འཁོར་ཅན། ཉི་ཟླུམ་མགོན། བཀྲ་ཤིས་སྡེ། སྟོང་སྡེ། ལྷའི་སྡེ། འོད་སྡེ། མངའ་བདག་རྩེ་སྡེ། བླ་མ་མངའ་རིས་པ། ཞུ་ལྡན། དར་མ་རྒྱལ་མཚན། བྲོ་མོ་ཆེ་བ། ནམ་མཁའ་གྲགས་སོགས་ལ་རིམ་པར་བརྒྱུད་པ། སྔ་འགྱུར་རྙིང་མའི་ལུགས་དང་། ཡང་གསར་མའི་ལུགས་ནི། བོ་དྷི་སཏྭ་ཆུང་བས། རྒྱལ་པོ་དགའ་བའི་དཔལ་ལ་གནང་། །དེས་དབང་པོ་དགེ་བའི་དཔལ་ལ་གནང་། དེས་ཇོ་བོ་ལྷ་གཅིག་ལ་གནང་སྟེ། ཇོ་བོས་མངའ་རིས་བྱང་ཆུབ་འོད་ལ་གནང་ཞིང་། ཁྱད་པར་ཇོ་བོ་ཡབ་སྲས་ཡེར་པ་ན་བྱམས་པའི་སྐུ་
དྲུང་ན་བཞུགས་དུས་དགེ་བཤེས་རྔོག་ཆོས་ཞུ་ལ་བྱོན་ནས། དགེ་སློང་ཆོས་གོས་རྡོ་ཚོས་མ་གསོལ་བ་ཞིག་ཇོ་བོ་ཡབ་སྲས་ཀྱི་དབུས་ན་བཞུགས་ནས་ཆོས་གསུང་མཐོང་། བྱམས་པའི་སྐུ་འདྲའི་ཐུགས་ཀ་ནས་འོད་ཟེར་ཞིག་བྱུང་བའི་སྣ་ནས་དགེ་སློང་མི་སྣང་། དགེ་སློང་དེ་སུ་ལགས་ཞུས་པས་བྱམས་པ་ཡིན་གསུངས། དེ་མ་ཐག་ཇོ་བོ་མི་སྣང་བ་དགའ་ལྡན་དུ་གཤེགས། དེ་ནས་ཕུག་པའི་ཕྱི་དེ་ན་སྒྲ་སྙན་པ་དང་དྲི་ཞིམ་པོས་ཤར་ཕྱོགས་ནས་འཇའ་སྔོན་པོ་གཅིག་ཕུག་པའི་སྒོར་ཟུག་བྱུང་བའི་སྣ་ལ་ཁྱེའུ་སྔོན་པོ་ཟུར་ཕུད་ཅན་མང་པོ་མེ་ཏོག་དང་སྤོས་ཐོགས་ནས་གླུ་དབྱངས་སྒྲོག་ཅིང་སྣང་བ། ཕུག་པའི་ནང་དུ་སོང་ཙ་ཇོ་བོ་བྱོན་ནས་སྨན་བླའི་ཕོ་བྲང་བཞེངས་བདེར་གཤེགས་མཆེད་བརྒྱད་སོ་སོ་སྐྱེ་བོ་ལྟར་འཁོར་དང་བཅས་པ་འོད་ཀྱི་རྣམ་པར་བཞུགས་གདའ། འབྲོམ་གྱི་ཐུགས་ཀ་ནས་སྔོན་གྱི་རྒྱལ་བློན་བྱང་ཆུབ་སེམས་དཔའ་ཐམས་ཅད་མཆོད་རྫས་དུ་མ་ཐོགས་ནས་བྱོན། ཇོ་བོའི་ཐུགས་ཀ་ནས་མཁའ་འགྲོ་ཞི་བ་འཚོ་ཐོན་ནས་ཇོ་བོས་བྱམས་པ་བཞུགས་པའི་བྲག་ཁུང་དེར་རིན་པོ་ཆེ་སྣ་ཚོགས་ལས་གྲུབ་པའི་ས་གཞི་གཞལ་ཡས་ཁང་དང་བཅས་པའི་དབུས་སུ་
པད་འདབ་སེར་པོ་ལྟེ་བ་སྔོན་པོ་ལ་ཇོ་བོ་ཉིད་བསྟན་པའི་བདག་པོ་དང་ཡུམ་ཆེན་མོ་དང་སྒྲོལ་མ་ལ་སོགས་གདུལ་བྱའི་བསམ་པ་དང་མཐུན་པར་སྣང་། འདབ་མ་བརྒྱད་ལ་བདེ་གཤེགས་བརྒྱད། དེ་ལ་པད་འདབ་བཅུ་དྲུག་གྱེས་པ་ལ་སེམས་དཔའ་བཅུ་དྲུག །དེ་ལ་ཉེར་ལྔ་བྱས་ཏེ་ཕྱོགས་སྐྱོང་བཅུ་དང་གནོད་སྦྱིན་བཅུ་གཉིས་རེ་རེའི་འཁོར་བདུན་འབུམ་ཕྱོགས་སྐྱོང་རང་རང་གི་འཁོར་དང་བཅས་པ་འདབ་མ་རེ་རེའི་སྟེང་ན་མི་དོགས་པར་འདུག །གཞན་ཡང་ཁྱེའུ་དང་བུ་མོ་དཔག་ཏུ་མེད་པས་མཆོད་པ་ཕུལ་བ་དང་། ཕྱོགས་བཞིར་པདྨ་རེ་རེ་གྱེས་ཏེ་རྒྱལ་པོ་བཞི་འཁོར་དང་བཅས་པ་ཕོ་བྲང་གི་ཕྱོགས་བཞིར་པད་སྡོང་བཞི་རེ་སྣང་། དེ་ནས་ཞི་བ་འཚོ་དམར་གཡོ་གཙང་གསུམ་བླ་ཆེན་སོགས་བོད་ཀྱི་ཁྲིམས་ལྡན་ཐམས་ཅད་སྣང་བས་ཕྱག་འཚལ་ཡན་ལག་བདུན་པ་བྱེད་དོ། །དེ་ནས་འབྲོམ་སྟོན་གྱིས་རྒྱལ་བ་རྒྱ་མཚོ་བཞེངས་ཏེ་འདོད་གསོལ་བཀྲ་ཤིས་སྨོན་ལམ་སོགས་མཛད། བདེར་གཤེགས་རྣམས་དང་མཁན་སློབ་ཨ་ཏི་ཤ་ལ། རྒྱལ་བློན་ཐམས་ཅད་འབྲོམ་ལ་ཐིམ། རྒྱལ་པོ་བཞི་དང་དགེ་བསྙེན་རྣམས་འོད་ཀྱི་རྣམ་པར་གཤེགས་སོ། །དེ་ལྟར་ཡང་ཡ་མཚན་
ཆོ་འཕྲུལ་བསྟན་ཅིང་བཀའ་བབས་པས། རྒྱལ་སྲས་སྐུ་མཆེད་གསུམ་སོགས་བཀའ་གདམས་ཀྱི་དགེ་བཤེས་ཐམས་ཅད་ཀྱིས་སྨན་བླའི་ཆོ་ག་འདི་ཐུགས་དམ་མཛད་ཅིང་ལྷ་བླ་མ་བྱང་ཆུབ་འོད་ནས་ཏི་སེ་པ་ཆེན་པོ་བྱང་སེམས་ཟླ་བ་རྒྱལ་མཚན་རྗེ་འོད་ལུང་གྲགས་པ། སྤྱིའུ་ལྷས་པ་བྱང་ཆུབ་འོད། རྨ་ཤཱཀྱ་སེང་གེ །མཆིམས་ནམ་མཁའ་གྲགས་སོགས་ལ་བརྒྱུད་པ་ནི་གསར་མ་ཡིན་ལ་ཁྱད་པར་འབྲོམ་གྱི་ལུང་བསྟན་ལས། གཞན་ཡང་གྲགས་པའི་མཚན་རལ་ཅན། །མང་པོས་འགྲོ་བའི་བདེ་སྐྱིད་བསྐྲུན། །ཅེས་དང་། སྙིགས་མའི་དུས་སུ་འབྲོམ་གྱི་སྤྲུལ་པ་གྲགས་པའི་མིང་ཅན་བདུན་བརྒྱུད་འབྱུང་བར་ལུང་བསྟན་པ་ལྟར་རྒྱལ་ཚབ་ན་རིམ་རྣམས་ཀྱིས་བཀའ་གདམས་ཀྱི་ཆོས་ལུགས་གཙོ་བོར་མཛད་ཅིང་། སྨན་བླའི་ཆོ་ག་འདི་ཐུགས་དམ་དུ་མཛད་པའི་ནང་ནས། སྨན་ཆོག་བསྡུས་པ་འདི་ཕྱག་ལེན་མཐོང་བ་བརྒྱུད་པ་ལྟར་ཞྭ་དམར་དྲུག་པ་ཆོས་ཀྱི་དབང་ཕྱུག་གིས་ཟུར་དུ་འབྲི་བར་མཛད་ཅིང་། ཐུབ་བསྟན་ཉིན་བྱེད་གླིང་གི་ཚོགས་ལ་འཛུགས་པར་མཛད་ཅིང་། རྗེ་ཉིད་ཀྱི་སྨན་བླ་ཞལ་ཡང་གཟིགས་པས་བྱིན་རླབས་ཀྱི་བཀའ་བབས་ཆེན་པོ་དང་ལྡན་
ཞིང་། འདིའི་དབང་ལུང་གཉིས་ཀ་རྗེ་ཉིད་ཀྱི་དྲུང་ནས་ཐོབ་པས་ཁུངས་ཤིན་ཏུ་བཙུན་པ་ཡིན་ནོ། །དེ་ལྟ་བུའི་ཁུངས་བཙུན་པའི་དབང་ཞུ་བའི་ཕྱིར་མཎྜལ་ཕུལ། ས་གཞི་སྤོས་ཆུ་སོགས། བླ་མ་དང་བཅོམ་ལྡན་འདས་སྨན་གྱི་བླ་མར་གསལ་བ་དང་མདུན་གྱི་མཎྜལ་བདེ་བར་གཤེགས་པ་བརྒྱད་ཀྱི་དཀྱིལ་འཁོར། རྟེན་བརྟེན་པ་དང་བཅས་པ་མངོན་སུམ་དུ་བཞུགས་པའི་དྲུང་དུ་གསོལ་བ་འདེབས་པ་འདིའི་རྗེས་ཟློས་མཛོད། བླ་མ་རྡོ་རྗེ་འཛིན་པ་ལ་སོགས་པ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། བདེ་བར་གཤེགས་པ་སྨན་བླ་མཆེད་བདུན་དང་། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་བཅོམ་ལྡན་འདས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་ཡི་དམ་དུ་སློབ་དཔོན་གྱིས་བསྩལ་དུ་གསོལ། ལན་གསུམ། ད་བདེ་བར་གཤེགས་པ་བདུན་འཁོར་དང་བཅས་པའི་དྲུང་དུ་སྐྱབས་སུ་འགྲོ་བ་དང་སེམས་བསྐྱེད་པའི་སྡོམ་པ་ལེན་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་
དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར་། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། ད་ཁྱེད་རང་རྣམས་ཐ་མལ་པར་གནས་པའི་སྤྱི་བོར་གཏོར་མ་འདི་དང་ཐ་དད་མེད་པར་པཾ་ལས་པདྨ་ཨ་ལས་ཟླ་བའི་གདན་ལ་བཅོམ་ལྡན་འདས་སྨན་གྱི་བླ་སྐུ་མདོག་མཐིང་ཁ་ཕྱག་གཡས་མཆོག་སྦྱིན་གྱི་ཕྱག་རྒྱས་ནད་ཐམས་ཅད་སེལ་བའི་སྨན་མཆོག་ཨ་རུ་ར་རྣམ་པར་རྒྱལ་བ་འཛིན་ཅིང་། ཕྱག་གཡོན་མཉམ་བཞག་གི་སྟེང་ན་འཆི་མེད་བདུད་རྩིས་གང་བའི་ལྷུང་བཟེད་འཛིན་པ། དར་དམར་པོའི་ཤམ་ཐབས་དང་ཆོས་གོས་གསོལ་ནས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་དབུ་གཙུག་ཏུ་ཆོས་བློ་མངོན་མཁྱེན་དམར་སྨུག་མཆོག་སྦྱིན་མཉམ་བཞག་མཛད་པ། དེའི་དབུ་གཙུག་ཏུ་ཆོས་
བསྒྲགས་རྒྱ་མཚོའི་དབྱངས་དཀར་དམར་ཆོས་འཆད་མཉམ་བཞག་མཛད་པ། དེའི་དབུ་གཙུག་ཏུ་མྱ་ངན་མེད་མཆོག་དཔལ་དམར་སྐྱ་མཉམ་བཞག་མཛད་པ། དེའི་དབུ་གཙུག་ཏུ་ཤུགསེར་བཟང་དྲི་མེད་སེར་པོ་ཆོས་འཆད་མཉམ་བཞག་མཛད་པ། དེའི་སྟེང་གི་ནམ་མཁར་རིན་ཆེན་ཟླ་བ་དམར་སེར་མཆོག་སྦྱིན་མཉམ་བཞག་མཛད་པ། དེའི་དབུ་གཙུག་ཏུ་མཚན་ལེགས་སེར་པོ་སྐྱབས་སྦྱིན་མཉམ་བཞག་མཛད་པ། དེ་ཐམས་ཅད་ཀྱང་མཚན་དང་དཔེ་བྱད་ཀྱིས་བརྒྱན་ཅིང་ཆོས་གོས་གསུམ་གྱིས་བཀླུབས་ནས་རྡོ་རྗེའི་སྐྱིལ་ཀྲུང་གིས་བཞུགས་པར་སྒོམས། དེ་རྣམས་ཀྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་མཐིང་ག །ཐུགས་ཀའི་ཧཱུཾ་ལས་འོད་ཟེར་ཤར་ཕྱོགས་སུ་འཕྲོས་པས་རང་རང་གི་སངས་རྒྱས་ཀྱི་ཞིང་ནས་སྨན་བླ་མཆེད་བདུན་སྤྱན་དྲངས་ནས་གཉིས་སུ་མེད་པར་ཐིམ་ནས་མངོན་སུམ་དུ་བཞུགས་པ་ལ་ཚོགས་བསག་པའི་ཕྱིར་ཡན་ལག་བདུན་པ་འབུལ་བ་འདིའི་རྗེས་ཟློས་མཛོད། ཅེས་བརྗོད་ནས། དེ་ཡང་དེ་བཞིན་གཤེགས་པ་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་འདིས་དང་པོ་བྱང་ཆུབ་ཏུ་ཐུགས་བསྐྱེད་ནས་བཟུང་
སྟེ། སྨོན་ལམ་ཆེན་པོ་བརྒྱད་རྒྱུན་མ་ཆད་པར་བཏབ་སྟེ། བདག་སངས་རྒྱས་པའི་ཚེ་བདག་གི་མིང་ཡིད་ལ་བྱས་ཤིང་ཡིད་ཀྱིས་བརྗོད་པའི་ཚེ། ནད་དང་གདོན་དང་རིམས་ཐམས་ཅད་ཞི་བ་དང་། ནད་ཀྱིས་ལོང་བ་དང་།། འོན་པ་དང་། སྨྱོ་བ་དང་། དབང་པོ་མ་ཚང་བ་ཐམས་ཅད་ཚང་བ་དང་། དུག་གསུམ་དང་མཚམས་མེད་པ་ལྔ་དང་། ཆོས་སྤངས་པས་དམྱལ་བར་སྐྱེས་པའི་སྒྲིབ་པ་ཐམས་ཅད་བྱང་ནས་ནམ་དུའང་དམྱལ་བ་དང་། ངན་སོང་དུ་མི་ལྟུང་བར་བདེ་འགྲོར་སྐྱེ་བ་དང་། དབུལ་པོ་རྣམས་ཟས་གོས་འབྲུ་ནོར་ཕུན་སུམ་ཚོགས་པ་དང་། བཙོན་དུ་བཅུག་ཅིང་བཅིངས་བ་དང་། བརྡེག་པ་ལས་ཐར་བ་དང་།། གཅན་གཟན་དང་དུག་སྦྲུལ་གྱི་གནོད་པ་ཞི་བ་དང་། འཁྲུག་པ་དང་འཐབ་རྩོད་ཀྱི་གནོད་པ་ཞི་བ་དང་། ཆུ་ཡི་འཇིགས་པས་སྲོག་འདོར་བའི་འཇིགས་པ་ཞི་བའི་སྨོན་ལམ་ཆེན་པོ་བརྒྱད་བཏབ་བོ། །དེ་ལྟར་སངས་རྒྱས་དེའི་སྨོན་ལམ་དེ་རྣམས་ཀྱི་བཀའ་དྲིན་ཁྱོད་རང་གིས་ཐོབ་པའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་
སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་མཚན་ལེགས་ཡོངས་བསྒྲགས་དཔལ་གྱི་རྒྱལ་པོས་སྔོན་སྨོན་ལམ་ཇི་ལྟར་བཏབ་པ་བཞིན་དུ་བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་བར་བྱིན་གྱིས་བརླབ་ཏུ་གསོལ། རྒྱས་པར་ལན་གསུམ་བསྡུ་ན་གཅིག །དེ་ལྟར་གསོལ་བ་བཏབ་པས་བཅོམ་ལྡན་འདས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོའི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་རྣམས་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་སྙམ་པའི་མོས་པ་རྩེ་གཅིག་ཏུ་མཛོད། གཏོར་མ་སྤྱི་བོར་བཞག་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོས་སྔོན་སྨོན་ལམ་ཆེན་པོ་བརྒྱད་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་རྡོ་རྗེའི་སློབ་མ་འདི་རྣམས་ཀྱིས་ཐོབ་པར་བྱིན་གྱིས་བརླབ་པར་མཛད་དུ་གསོལ། ཏདྱ་ཐཱ་གླུ་མེ་སོགས། དེ་ནས་མེ་ཏོག་འཐོར་ཞིང་། མཚན་གྱི་མེ་ཏོག་རྒྱས་ཤིང་དག་པ་ལ། །དཔེ་བྱད་
བཟང་པོའི་འབྲུ་ཆགས་མཛེས་པའི་སྐུ། །གང་གི་མཐོང་ཐོས་དྲན་པའི་དཔལ་གྱུར་པ། །མཚན་གྱི་རྒྱལ་པོ་དེ་ཡི་བཀྲ་ཤིས་ཤོག །ཅེས་བཀྲ་ཤིས་འགྲེས་སོ། །དེ་ནས་མཚན་ལེགས་རྒྱལ་པོ་ཐུགས་རྗེའི་དབང་གིས་འོད་དུ་ཞུ་ནས་རིན་ཆེན་ཟླ་བའི་དབུ་གཙུག་ཏུ་ཐིམ་པར་སྒོམས་ཤིག །དེ་ཡང་སངས་རྒྱས་རིན་ཆེན་ཟླ་བ་འདི་ཉིད་སྔོན་བྱང་ཆུབ་སེམས་དཔར་གྱུར་པའི་ཚེ་སྨོན་ལམ་ཆེན་པོ་བརྒྱད་བཏབ་སྟེ། མ་འོངས་པ་ན་བདག་འཚང་རྒྱ་བའི་ཚེ་བདག་གི་མིང་རྣ་ལམ་དུ་གྲག་ཅིང་དྲན་པ་དང་བརྗོད་པས། དབུལ་ཏེ་ཞིང་ལ་སོ་ནམ་དང་ཚོང་ལ་དགའ་བའི་ཉེས་པ་བྱང་ཞིང་དག་ནས་ཚེ་རབས་ཐམས་ཅད་དུ་ལོངས་སྤྱོད་ཕུན་སུམ་ཚོགས་ཤིང་ངན་སོང་དུ་མི་ལྟུང་བ་དང་། སྐྱེ་གནས་གསུམ་དང་ཚ་གྲང་བཀྲེས་སྐོམ་གྱི་སྡུག་བསྔལ་ལས་ཐར་བ་དང་། ནམ་དུའང་སྐྱེ་གནས་གསུམ་གྱི་སྡུག་བསྔལ་མི་མྱོང་བ་དང་། བུད་མེད་རྣམས་ཀྱིས་བཙས་པའི་སྡུག་བསྔལ་ཞི་བ་དང་། འཆི་བ་དང་དགྲའི་གནོད་པ་མྱ་ངན་ཐམས་ཅད་ཞི་བ་དང་། མུན་ནག་གི་ནང་དུ་འཇིགས་པ་དང་སྡུག་བསྔལ་སྣ་ཚོགས་མྱོང་བའི་སྡུག་བསྔལ་ལས་ཐར་བ་དང་། བློ་དམན་ཞིང་ཤེས་རབ་ཆུང་བ་
རྣམས་བློ་དང་ལྡན་ཞིང་ཤེས་རབ་ཐོབ་པ། ཐེག་པ་དམན་ལ་ཞུགས་པ་རྣམས་ཐེག་པ་ཆེན་པོར་འཇུག་ནས་ཕྱིར་མི་ལྡོག་པར་འགྱུར་བ་དང་། བསྐལ་པ་འཇིགས་པའི་དུས་བསྐལ་པའི་མེས་སྲེག་པའི་ལས་སྒྲིབ་བྱང་ནས་བརྫུས་ཏེ་སངས་རྒྱས་ཀྱི་ཞིང་དུ་སྐྱེ་བ་དང་། དེ་ལྟར་སྨོན་ལམ་ཆེན་པོ་དེ་བརྒྱད་བཏབ་པ་ཡིན་པས་སངས་རྒྱས་ཀྱི་བཀའ་དྲིན་དེ་ཞུ་བའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །བཅོམ་ལྡན་འདས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོས་སྔོན་སྨོན་ལམ་ཇི་ལྟར་བཏབ་པ་བཞིན་དུ་བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་པར་བྱིན་གྱིས་བརླབ་ཏུ་གསོལ། །འོ་དེ་ལྟར་གསོལ་བ་བཏབ་པས་བཅོམ་ལྡན་འདས་རིན་ཆེན་ཟླ་བའི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་རྣམས་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་
སྙམ་པའི་མོས་པ་རྩེ་གཅིག་ཏུ་མཛོད་ཅིག །གཏོར་མ་བཟུང་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོས་སྔོན་སྨོན་ལམ་ཆེན་པོ་བརྒྱད་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་རྡོ་རྗེའི་སློབ་མ་འདི་རྣམས་ལ་ད་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཏདྱ་ཐཱ། གྷུ་མེ་སོགས་བྱ། དེ་ནས་བཀྲ་ཤིས་ནི། རིན་ཆེན་ཟླ་བ་པདྨས་རབ་བརྒྱན་ཅིང་། །ཤེས་བྱ་ཀུན་ལ་མཁས་པའི་མཁྱེན་པ་འཕགས། །རྒྱ་མཚོ་ལྟ་བུར་ཟབ་པའི་སྐུ་མངའ་བ། །སྒྲ་དབྱངས་རྒྱལ་པོ་དེ་ཡི་བཀྲ་ཤིས་ཤོག །མེ་ཏོག་འཐོར། དེ་ནས་རིན་ཆེན་ཟླ་བ་ཐུགས་རྗེའི་དབང་གིས་འོད་དུ་ཞུ་ནས་གསེར་བཟང་དྲི་མེད་ཀྱི་དབུ་གཙུག་ཏུ་ཐིམ་པར་སྒོམས་ཤིག །དེ་ཡང་སངས་རྒྱས་གསེར་བཟང་དྲི་མེད་འདི་སྔོན་བྱང་ཆུབ་སེམས་དཔར་གྱུར་པའི་ཚེ་སྨོན་ལམ་ཆེན་པོ་བཞི་བཏབ་སྟེ་མ་འོངས་པ་ན་བདག་འཚང་རྒྱ་བའི་ཚེ། བདག་གི་མིང་ཐོས་པ་བཟུང་བས། སེམས་ཅན་སྣ་ཚོགས་ཀྱི་སྲོག་བཅད་པས་ཚེ་ཐུང་ཞིང་ནད་མང་བ་དང་། ཆུ་
དང་། དུག་དང་། མཚོན་གྱིས་དུས་མ་ཡིན་པར་འཆི་བར་འགྱུར་བའི་ལས་སྒྲིབ་ཐམས་ཅད་བྱང་ནས་ཚེ་རིང་བ་དང་ནད་མེད་པར་འགྱུར་བ་དང་། །གཞན་གྱི་ནོར་རྫས་རྐུ་འཕྲོག་བྱས་པའི་རྣམ་སྨིན་གྱིས་དབུལ་པོར་སྐྱེས་ནས་བཀྲེས་སྐོམ་གྱི་སྡུག་བསྔལ་མྱོང་བའི་ལས་སྒྲིབ་ཐམས་ཅད་དག་ནས་ཚེ་རབས་ཐམས་ཅད་དུ་བཟའ་བཏུང་ཕུན་སུམ་ཚོགས་པར་འགྱུར་བ་དང་། ཕན་ཚུན་གཅིག་གིས་གཅིག་ལ་གནོད་སེམས་དང་། འཐབ་རྩོད་བྱེད་པ་ཐམས་ཅད་ཞི་ནས་བྱམས་པའི་སེམས་སུ་གནས་པ་དང་། དུག་གསུམ་གྱི་དབང་གིས་ཚུལ་ཁྲིམས་འཆལ་ཏེ། སྡིག་པ་བྱེད་པས་ངན་སོང་དུ་ལྟུང་བའི་ལས་སྒྲིབ་བྱང་ནས་ཚེ་རབས་ཐམས་ཅད་དུ་ཉོན་མོངས་པ་དང་བྲལ་ནས་ཚུལ་ཁྲིམས་དང་ལྡན་པར་གྱུར་ཏེ། སྨོན་ལམ་ཆེན་པོ་དེ་བཞི་བཏབ་པ་ཡིན་པས་སངས་རྒྱས་དེའི་སྨོན་ལམ་དེ་བཞིའི་བྱིན་རླབས་དང་བཀའ་དྲིན་ཁྱེད་རང་གིས་ཐོབ་པའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་
མཆིའོ། །བཅོམ་ལྡན་འདས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པས་སྨོན་ལམ་ཇི་ལྟར་བཏབ་པ་བཞིན་དུ་བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་བར་བྱིན་གྱིས་བརླབ་ཏུ་གསོལ། དེ་ལྟར་གསོལ་བ་བཏབ་པས་བཅོམ་ལྡན་འདས་གསེར་བཟང་དྲི་མེད་ཀྱི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་རྣམས་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་སྙམ་པའི་མོས་པ་རྩེ་གཅིག་ཏུ་མཛོད། གཏོར་མ་བཟུང་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པས་སྨོན་ལམ་ཆེན་པོ་བཞི་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་རྡོ་རྗེའི་སློབ་མ་འདི་རྣམས་ཀྱིས་ད་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཏདྱ་ཐཱ་གླུ་མེ་སོགས་བརྗོད། འཛམ་བུ་ཆུ་བོའི་གསེར་ལྟར་ལྷང་ངེ་བ། །ཉི་མ་སྟོང་བས་ལྷག་པའི་གཟི་བརྗིད་ཅན། །དྲི་མེད་གསེར་གྱི་མཆོད་སྡོང་ལྟ་བུའི་སྐུ། །གསེར་བཟང་དྲི་མེད་སྣང་བའི་བཀྲ་ཤིས་ཤོག །མེ་ཏོག་འཐོར་རོ། །དེ་ནས་གསེར་བཟང་དྲི་མེད་ཐུགས་རྗེའི་དབང་གིས་
འོད་དུ་ཞུ་ནས་མྱ་ངན་མེད་མཆོག་གི་དབུ་གཙུག་ཏུ་ཐིམ་པར་སྒོམས་ཤིག །དེ་ཡང་སངས་རྒྱས་མྱ་ངན་མེད་མཆོག་འདི་སྔོན་བྱང་ཆུབ་སེམས་དཔར་གྱུར་པ་ན་སྨོན་ལམ་ཆེན་པོ་བཞི་བཏབ་སྟེ། མ་འོངས་པ་ན་བདག་འཚང་རྒྱ་བའི་ཚེ། བདག་གི་མིང་ཐོས་པ་དང་ཡིད་ལ་བྱེད་ན་ཚེ་རིང་ཞིང་མྱ་ངན་དང་སྡུག་བསྔལ་དང་ཡིད་མི་བདེ་བ་ཐམས་ཅད་ཞི་བ་དང་། །སྡིག་པ་མི་དགེ་བ་སྣ་ཚོགས་བྱས་ནས་དམྱལ་བར་སྐྱེས་ན་ཡང་། སངས་རྒྱས་དེའི་སྐུའི་འོད་ཟེར་གྱིས་དམྱལ་བ་ནས་འདྲེན་པ་དང་། སྡིག་པ་མི་དགེ་བ་སྣ་ཚོགས་དང་རྐུ་འཕྲོག་བྱས་ནས་དབུལ་པོར་སྐྱེས་ནས་ཟས་གོས་དང་ནོར་མེད་ཅིང་བཀྲེས་སྐོམ་འཁྱག་པ་དང་། ངལ་དུབ་ཀྱི་སྡུག་བསྔལ་འབྱུང་བ་ཐམས་ཅད་བྱང་ཞིང་དག་ནས། སྐྱེ་བ་ཐམས་ཅད་དུ་ཟས་གོས་ལོངས་སྤྱོད་ཕུན་སུམ་ཚོགས་པ་དང་། གདོན་སྣ་ཚོགས་ཀྱི་གནོད་པས་ནད་ཀྱི་སྡུག་བསྔལ་མྱོང་བ་ཐམས་ཅད་ཞི་ཞིང་ཚེ་རབས་ཐམས་ཅད་དུ་ནད་གདོན་ལས་ཐར་བ་དང་། སྨོན་ལམ་ཆེན་པོ་དེ་བཞིའི་བྱིན་རླབས་དང་བཀའ་དྲིན་ཁྱེད་རང་གིས་ཐོབ་པའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་རྫོགས་པའི་སངས་རྒྱས་མྱ་ངན་མེད་མཆོག་དཔལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་མྱ་ངན་མེད་མཆོག་དཔལ་གྱི་སྔོན་སྨོན་ལམ་ཇི་ལྟར་བཏབ་པ་བཞིན་དུ་བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་བར་བྱིན་གྱིས་བརླབ་ཏུ་གསོལ། འོ་དེ་ལྟར་གསོལ་བ་བཏབ་པས་མྱ་ངན་མེད་མཆོག་དཔལ་གྱི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་རྣམས་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་སྙམ་པའི་མོས་པ་རྩེ་གཅིག་ཏུ་མཛོད་ཅིག །གཏོར་མ་ཐོགས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་གྱིས་སྔོན་སྨོན་ལམ་ཆེན་པོ་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་རྡོ་རྗེའི་སློབ་མ་འདི་རྣམས་ཀྱིས་དེ་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཏདྱ་ཐཱ་གྷ་མེ་སོགས་བརྗོད་ལ་མེ་ཏོག་འཐོར་ཞིང་། བཀྲ་ཤིས་བརྗོད་པ་ནི། མྱ་ངན་འདས་ཞི་བདེ་བའི་མཆོག་བརྙེས་པ། །འགྲོ་བའི་སྡུག་བསྔལ་གདུང་བ་ཞི་མཛད་ཅིང་། །འགྲོ་དྲུག་མགོན་དང་དཔལ་དུ་གྱུར་པ་ཡི། །མྱ་ངན་མེད་མཆོག་དཔལ་གྱི་
བཀྲ་ཤིས་ཤོག །ཅེས་མེ་ཏོག་དོར། དེ་ནས་མྱ་ངན་མེད་མཆོག་ཐུགས་རྗེའི་དབང་གིས་འོད་དུ་ཞུ་ནས་ཆོས་བསྒྲགས་རྒྱ་མཚོའི་དབུ་གཙུག་ཏུ་ཐིམ་པར་གྱུར། ཆོས་བསྒྲགས་རྒྱ་མཚོའི་དབྱངས་འདི་སྔོན་བྱང་ཆུབ་སེམས་དཔར་གྱུར་པ་ན་སྨོན་ལམ་ཆེན་པོ་བཞི་བཏབ་སྟེ། བདག་མ་འོངས་པ་ན་འཚང་རྒྱ་བའི་ཚེ་བདག་གིས་མིང་ཐོས་པས་དཀོན་མཆོག་གསུམ་དང་ཆོས་ལ་ལོག་པར་ལྟ་བ་ཅན་དུ་གྱུར་པའི་སྒྲིབ་པ་བྱང་ནས་དཀོན་མཆོག་གསུམ་ལ་དད་པ་དང་། བྱང་ཆུབ་ཀྱི་སེམས་རྒྱུད་ལ་ལྡན་པར་འགྱུར་བ་དང་། དཀོན་མཆོག་གསུམ་དང་ཆོས་ཀྱི་སྒྲ་མི་གྲག་པའི་ཡུལ་འཐའ་ཁོབ་ཏུ་སྐྱེས་ནས་སྡིག་པ་སྣ་ཚོགས་བྱས་ཏེ་དམྱལ་བར་སྐྱེ་བར་འགྱུར་བའི་སྡིག་པ་དག་ནས། སྐྱེ་བ་ཐམས་ཅད་དུ་བྱང་ཆུབ་ཀྱི་སེམས་དང་མི་འབྲལ་བར་འགྱུར་བ་དང་། ནོར་དང་ལོངས་སྤྱོད་མེད་པས་སྡིག་པ་སྣ་ཚོགས་བྱས་པའི་སྡིག་སྒྲིབ་བྱང་ནས་སྐྱེ་བ་ཐམས་ཅད་དུ་ནོར་དང་ལོངས་སྤྱོད་ཕུན་སུམ་ཚོགས་པ་དང་། སྔོན་ལས་ཀྱིས་དགྲ་དང་འཐབ་རྩོད་མང་སྟེ་གཅིག་གིས་གཅིག་ལ་གནོད་པ་དང་འཐབ་རྩོད་དང་མཚོན་འདེབས་པ་དང་གསོད་པར་འགྱུར་བ་ཐམས་ཅད་ཞི་ནས་སྐྱེ་བ་ཐམས་ཅད་དུ་དགྲ་མེད་ཅིང་
བྱམས་པར་འགྱུར་བ་དང་། སྨོན་ལམ་ཆེན་པོ་དེ་བཞི་བཏབ་པས། སངས་རྒྱས་དེའི་སྨོན་ལམ་དེ་བཞིའི་བྱིན་རླབས་དང་བཀའ་དྲིན་ཐམས་ཅད་ཁྱེད་རང་གིས་ཐོབ་པའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་ཆོས་བསྒྲགས་རྒྱ་མཚོའི་དབྱངས་ཀྱིས་སྔོན་སྨོན་ལམ་ཇི་ལྟར་བཏབ་པ་དེ་བཞིན་དུ་བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་བར་བྱིན་གྱིས་བརླབ་ཏུ་གསོལ། འོ་དེ་ལྟར་གསོལ་བ་བཏབ་པས་ཆོས་བསྒྲགས་རྒྱ་མཚོའི་དབྱངས་ཀྱི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་རྣམས་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་སྙམ་པའི་མོས་པ་རྩེ་གཅིག་ཏུ་མཛོད་ཅིག །གཏོར་མ་བཟུང་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ཀྱིས་སྔོན་སྨོན་ལམ་ཆེན་པོ་བཞི་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་རྡོ་
རྗེའི་སློབ་མ་འདི་རྣམས་ཀྱིས་ད་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཏདྱ་ཐཱ་གླུ་མེ་སོགས་བརྗོད་ལ། ཆོས་སྒྲ་ཆེན་པོས་ཕ་རོལ་རྒོལ་བ་འཇོམས། །རྒྱ་མཚོ་ལྟ་བུར་ཟབ་པའི་སྐུ་མངའ་ཞིང་། །འགྲོ་བའི་དུག་གསུམ་མ་ལུས་ཞི་མཛད་པ། །ཆོས་བསྒྲགས་རྒྱ་མཚོའི་དབྱངས་ཀྱི་བཀྲ་ཤིས་ཤོག །མེ་ཏོག་འཐོར་རོ། །དེ་ནས་ཆོས་བསྒྲགས་རྒྱ་མཚོའི་དབྱངས་ཐུགས་རྗེའི་དབང་གིས་འོད་དུ་ཞུ་ནས་ཆོས་བློ་མངོན་པར་མཁྱེན་པའི་དབུ་གཙུག་ཏུ་ཐིམ་པར་སྒོམས་ཤིག །དེ་ཡང་སངས་རྒྱས་ཆོས་བློ་མངོན་མཁྱེན་འདི་སྔོན་བྱང་ཆུབ་སེམས་དཔར་གྱུར་པ་ན། སྨོན་ལམ་ཆེན་པོ་བཞི་བཏབ་སྟེ་མ་འོངས་པ་ན་བདག་འཚང་རྒྱ་བའི་ཚེ་བདག་གི་མིང་ཐོས་པས་ཞིང་གི་སོ་ནམ་དང་ཚོང་ཁེ་དང་འཐབ་རྩོད་ཀྱི་ལས་སྒྲིབ་བྱང་ནས་ལོངས་སྤྱོད་དང་ལྡན་ཞིང་དགེ་བ་བྱེད་པར་འགྱུར་བ་དང་། མི་དགེ་བ་བཅུ་བྱས་པས་དམྱལ་བར་འགྲོ་བའི་ལས་སྒྲིབ་བྱང་ནས་དགེ་བ་བཅུ་ལ་སྤྱོད་པར་འགྱུར་བ་དང་། གཞན་གྱིས་ཆད་པ་བཅད་པ་བཙོན་ཏུ་བཟུང་བ་བརྡེག་ཅིང་གསོད་པར་ཤོམ་པ་ལས་ཐར་ནས་སྐྱེ་བ་ཐམས་ཅད་དུ་དེ་ལྟར་མི་འགྱུར་བ་དང་། ཚེ་ཐུང་བ་རྣམས་ཀྱིས་འཆི་ཁ་རྣ་ལམ་དུ་ཐོས་
པས་སྡིག་པ་ཐམས་ཅད་དག་ནས་མཐོ་རིས་སུ་སྐྱེས་ཏེ་བྱང་ཆུབ་མ་ཐོབ་ཀྱི་བར་དུ་ལྷ་དང་མིའི་བདེ་བ་མྱོང་བར་འགྱུར་བ་དང་། སྨོན་ལམ་ཆེན་པོ་དེ་བཞི་བཏབ་པ་ཡིན་པས་སངས་རྒྱས་དེའི་སྨོན་ལམ་དེ་བཞིའི་བྱིན་རླབས་དང་བཀའ་དྲིན་ཐམས་ཅད་ཁྱེད་རང་གིས་ཐོབ་པར་བྱའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོའི་མཆོག་གི་བློས་རྣམ་པར་རོལ་པ་མངོན་པར་མཁྱེན་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོའི་མཆོག་གི་བློས་རྣམ་པར་རོལ་པ་མངོན་པར་མཁྱེན་པས་སྔོན་གྱི་སྨོན་ལམ་ཇི་ལྟར་བཏབ་པ་དེ་བཞིན་ཏུ་བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་བར་བྱིན་གྱིས་བརླབ་ཏུ་གསོལ། འོ་དེ་ལྟར་གསོལ་བ་བཏབ་པས་ཆོས་བློ་མངོན་པར་མཁྱེན་པའི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་སྙམ་པའི་མོས་པ་རྩེ་གཅིག་ཏུ་མཛོད་ཅིག །
གཏོར་མ་ཐོགས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོའི་མཆོག་གི་བློས་རྣམ་པར་རོལ་པ་མངོན་པར་མཁྱེན་པས་སྔོན་སྨོན་ལམ་ཆེན་པོ་བཞི་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་རྡོ་རྗེའི་སློབ་མ་འདི་རྣམས་ཀྱིས་ད་ལྟ་ཉིད་དུ་ཐོབ་པ་བྱིན་གྱིས་བརླབ་ཏུ་གསོལ། ཏདྱ་ཐཱ་གྲུ་མེ་སོགས་བརྗོད། ཆོས་ཀྱི་བློ་གྲོས་གཏིང་དཔག་དཀའ་བའི་ཐུགས། །རྣམ་དག་ཆོས་ཀྱི་དབྱིངས་ལ་རོལ་མཛད་ཅིང་། །ཤེས་བྱ་མ་ལུས་མངོན་སུམ་གཟིགས་པ་པོ། །ཆོས་བློ་མངོན་པར་མཁྱེན་པའི་བཀྲ་ཤིས་ཤོག །མེ་ཏོག་འཐོར། དེ་ནས་ཆོས་བློ་མངོན་མཁྱེན་ཐུགས་རྗེའི་དབང་གིས་འོད་དུ་ཞུ་ནས་སངས་རྒྱས་སྨན་གྱི་བླའི་དབུ་གཙུག་ཏུ་ཐིམ་པར་སྒོམས་ཤིག །དེ་ཡང་སངས་རྒྱས་སྨན་གྱི་བླ་འདི་སྔོན་བྱང་ཆུབ་སེམས་དཔར་གྱུར་པ་ན་སྨོན་ལམ་ཆེན་པོ་བཅུ་གཉིས་བཏབ་སྟེ། བདག་མ་འོངས་པ་ན་འཚང་རྒྱ་བའི་ཚེ་བདག་གི་མིང་ཐོས་པའི་ཚེ་སྡོམ་པ་གསུམ་གྱིས་བསྡམས་པས་ཚུལ་ཁྲིམས་ཉམས་པ་མེད་པར་འགྱུར་བ་དང་། དབང་པོ་མ་ཚང་ཞིང་ཡན་ལག་ཉམས་པ་དང་། འོན་པ་དང་། ལོང་བ་དང་། ནད་སྣ་
ཚོགས་ཀྱིས་བཏབ་པ་རྣམས་ཀྱང་སྒྲིབ་པ་དག་ནས་ནད་ཞི་ཞིང་དབང་པོ་ཡན་ལག་ཚང་བར་འགྱུར་བ་དང་། ཉམ་ཐག་པ་ནད་སྣ་ཚོགས་ཀྱིས་སྡུག་བསྔལ་བ་མགོན་སྐྱབས་མེད་པ་དབུལ་འཕོང་དམན་པ་དང་། སྨན་མི་འབྱོར་བ་རྣམས་ཀྱི་ནད་ཐམས་ཅད་རབ་ཏུ་ཞི་ཞིང་སྐྱེ་བ་ཐམས་ཅད་དུ་ནད་མེད་པར་འགྱུར་བ་དང་། དེ་ལྟར་མཚན་ཐོས་པའི་ཕན་ཡོན་གྱི་སྨོན་ལམ་གསུམ་དང་། གཞན་ཡང་གསོལ་བ་རྩེ་གཅིག་ཏུ་བཏབ་ན་བུད་མེད་གང་དག་བུད་མེད་ཀྱི་སྐྱེ་གནས་ལས་ཐར་བར་འདོད་ན་བུད་མེད་ཀྱི་སྐྱེ་སྒོ་ཆོད་ཅིང་སྐྱེ་བ་ཐམས་ཅད་དུ་སྐྱེས་པའི་ལུས་ཐོབ་ནས། ལྟ་བ་ངན་པ་སྣ་ཚོགས་སུ་གྱུར་པ་རྣམས་ཡང་དག་པའི་ལྟ་བ་ཅན་དུ་འགྱུར་བ་དང་། རྒྱལ་པོའི་འཇིགས་པས་བཅིངས་ཤིང་བརྡེག་ལ་གསོད་པར་འོས་པ་ལས་ཐར་བ་དང་། བཀྲེས་ཞིང་སྐོམ་པས་ཟས་ཀྱི་ཕྱིར་སྡིག་པ་བྱེད་པ་རྣམས་ཀྱང་ཟས་ཕུན་སུམ་ཚོགས་པ་རྙེད་ནས་ཕྱིན་ཆད་ཆོས་ལ་གནས་པར་འགྱུར་བ་དང་། །གོས་མེད་པས་ཚ་གྲང་གི་སྡུག་བསྔལ་མྱོང་བ་རྣམས་གོས་བཟང་པོ་སྣ་ཚོགས་རྙེད་ཅིང་བསམ་པ་འགྲུབ་པ་དང་། སྐྱེ་བ་ཐམས་ཅད་དུ་ལོངས་སྤྱོད་མི་ཟད་པ་དང་ལྡན་ཞིང་ཕོངས་པ་མེད་
པ་དང་། ལམ་ངན་པར་ཞུགས་པ་རྣམས་བྱང་ཆུབ་ཀྱི་ལམ་དུ་འཇུག་པ་དང་། དེ་ལྟར་འགྲོ་དོན་འགྲུབ་པའི་སྨོན་ལམ་བདུན་དང་། སྐུ་ལུས་ཀྱི་འོད་ཀྱིས་འཇིག་རྟེན་གྱི་ཁམས་དཔག་ཏུ་མེད་པ་གསལ་ཞིང་། ཞིང་དེའི་སེམས་ཅན་ཐམས་ཅད་མཚན་དང་དཔེ་བྱད་དང་ལྡན་པ་དང་། སྐུ་ལུས་ཀྱི་འོད་ཀྱིས་འཇིག་རྟེན་གྱི་ཁམས་མང་པོའི་མུན་པ་བསལ་བ་དང་། ཞིང་དེའི་སེམས་ཅན་ཐམས་ཅད་ལུས་ནོར་བུ་བཻཌཱུརྨ་ལྟར་དག་ཅིང་གཙང་བ་དང་གཟི་བརྗིད་འབར་ཞིང་ཉི་མ་དང་ཟླ་བ་དང་ལྷའི་འོད་ཀྱི་དྲྭ་བས་བརྒྱན་པར་འགྱུར་བ་སྟེ། ཞིང་ཁམས་ཡོངས་སུ་དག་པའི་སྨོན་ལམ་གཉིས་དང་སྨོན་ལམ་ཆེན་པོ་བཅུ་གཉིས་བཏབ་པ་ཡིན་པས། སངས་རྒྱས་དེའི་སྨོན་ལམ་བཅུ་གཉིས་ཀྱི་བྱིན་རླབས་དང་བཀའ་དྲིན་ཁྱེད་རང་ཟགིས་ཐོབ་པར་བྱ་བའི་ཕྱིར་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་ཁེཌཱུརྱ་འོད་ཀྱི་རྒྱལ་པོ་ལ་ཕྱག་འཚལ་ལོ། །།མཆོད་དོ་སྐྱབས་སུ་མཆིའོ། །སངས་རྒྱས་སྨན་གྱི་བླ་བཻཀརྨ་འོད་ཀྱི་རྒྱལ་པོས་སྔོན་སྨོན་ལམ་ཆེན་པོ་ཇི་ལྟར་བཏབ་པ་དེ་བཞིན་དུ། །
བདག་དང་སེམས་ཅན་ཐམས་ཅད་ལ་སྐད་ཅིག་གིས་འབྱོར་བར་བྱིན་གྱིས་བརླབ་ཏུ་གསོལ། དེ་ལྟར་གསོལ་བ་བཏབ་པས་སྨན་བླའི་སྐུ་ལས་འོད་ཟེར་ཁ་དོག་སྣ་ཚོགས་བྱུང་ནས་ཁྱེད་རང་རྣམས་ལ་ཐིམ་པས་སྐུ་གསུང་ཐུགས་ཀྱི་བྱིན་རླབས་ཞུགས་བྱུང་སྙམ་པའི་མོས་པ་རྩེ་གཅིག་ཏུ་མཛོད། གཏོར་མ་མགོར་བཞག་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོས་སྔོན་སྨོན་ལམ་ཆེན་པོ་བཅུ་གཉིས་ཇི་ལྟར་བཏབ་པའི་བྱིན་རླབས་དང་བཀའ་དྲིན་ཐམས་ཅད་ད་ལྟ་ཉིད་དུ་ཐོབ་པར་བྱིན་གྱིས་བརླབ་ཏུ་གསོལ། ཏདྱ་ཐཱ་གླུ་མེ་སོགས་སྔགས་རིང་ཐུང་གཉིས་དང་། ལྷ་མའི་སྟོན་པ་སྨན་པའི་རྒྱལ་པོ་སྟེ། །བཅོམ་ལྡན་འཇིག་རྟེན་གསུམ་ན་སྐྱབས་མཛད་པ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུརྱ་ཡི་འོད་ཀྱི་བཀྲ་ཤིས་ཤོག །མེ་ཏོག་འཐོར། འོ་དེ་ནས་སྤྱི་བོའི་སངས་རྒྱས་སྨན་གྱི་བླ་ལ་འདུན་པ་རྩེ་གཅིག་ཏུ་བྱས་པས་བཅོམ་ལྡན་འདས་སྨན་གྱི་བླ་དེ་ཐུགས་རྗེའི་ཤུགས་ཀྱིས་འོད་དུ་ལྟེམ་གྱིས་ཞུ་སྟེ། །ཁྱེད་རང་གི་སྤྱི་བོ་ཚངས་པའི་བུ་ག་ནས་འོད་དེ་མར་ཐིམ་པས་འོད་དེས་ཁྱེད་རང་
རྣམས་ཀྱི་ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ནད་གདོན་བར་དུ་གཅོད་པ་ཐམས་ཅད་དེད་ནས་འོག་སྒོ་དང་རྐང་མཐིལ་གཉིས་ནས་ནག་ནུ་རུ་རུ་སོང་བས་རང་གི་ལུས་ཕུ་མ་ཕུས་བཏབ་པ་ལྟར་སོང་སྟེ་ཤེལ་སྒོང་གཡའ་དག་པ་ལྟར་དྲི་མ་དང་བྲལ་བའི་མོས་པ་མཛོད། འོ་དེས་ཁྱེད་རང་གི་སྡིག་སྒྲིབ་ཐམས་ཅད་དག་ནས་ཐ་མལ་གྱི་ལུས་མ་ཡིན་པར་སྐད་ཅིག་གིས་ཁྱེད་རང་རྣམས་བཅོམ་ལྡན་འདས་སྨན་གྱི་བླ་བཻཌཱུརླ་འོད་ཀྱི་རྒྱལ་པོ་ཞལ་གཅིག་ཕྱག་གཉིས། གཡས་མཆོག་སྦྱིན་གྱི་ཕྱག་རྒྱས་ནད་བཞི་བརྒྱ་རྩ་བཞིའི་གཉེན་པོ་ཨ་རུ་ར་རྣམ་པར་རྒྱལ་བ་ལོ་མ་དང་བཅས་པ་འཛིན་ཅིང་། ཕྱག་གཡོན་མཉམ་བཞག་གི་ཕྱག་རྒྱས་འཆི་མེད་བདུད་རྩིས་བཀང་བའི་ལྷུང་བཟེད་འཛིན་པ། སྐུ་ལ་དར་ལིང་དམར་པོའི་ཆོས་གོས་དང་ཤམ་ཐབས་གསོལ་ཞིང་། རྡོ་རྗེ་སྐྱིལ་ཀྲུང་གིས་པདྨ་དང་ཟླ་བའི་གདན་ལ་བཞུགས་པ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་ཅིང་འོད་དང་འོད་ཟེར་དཔག་ཏུ་མེད་པ་འཕྲོ་བ། ཡིད་ལ་དྲན་པ་ཙམ་གྱིས་ཀྱང་འཁོར་བ་དང་ངན་སོང་གི་སྡུག་བསྔལ་ཐམས་ཅད་ཞི་ཞིང་ནུས་པ་གཅིག་ཏུ་གྱུར་པར་སྒོམས།
དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿཿདམར་པོ། ཐུགས་ཀར་ཧཱུཾ་སྔོན་པོས་མཚན་པ། ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས་པས། ཕྱོགས་བཅུ་དུས་གསུམ་ན་བཞུགས་པའི་བླ་མ་ཡི་དམ་སངས་རྒྱས་བྱང་ཆུབ་སེམས་དཔའི་ཚོགས་དཔག་ཏུ་མེད་པ་ཁ་བ་བུ་ཡུག་ལྟར་སྤྱན་དྲངས་ནས་ཁྱེད་རང་གི་སྤྱི་བོ་ནས་མར་སིབ་སིབ་ཐིམ་མི་པར་སྒོམས་ཤིག །ཏདྱ་ཐཱ་གྷ་མེ་སོགས་ཞེས་པའི་སྔགས་རིང་མཇུག་ཏུ། ཨོཾ་བཛྲ་ཨཱཿ་བེ་ཤ་ཡ་ཨ་ཨཱཿ ཞེས་བརྗོད་ནས་སྤོས་དང་རོལ་མོ་བྱ། ནས་བྲབ་སྲོལ་ཡང་ཡོད། དེ་ལྟར་བྱིན་རླབས་དབབ་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་བརྟན་པར་གྱུར། ཨོཾ་ཏིཥྛ་བཛྲ། ཞེས་རྡོ་རྗེ་རྒྱ་གྲམ་མེ་ཏོག་དང་བཅས་པས་ཚངས་བུག་བཀག །དེ་ནས་མདུན་གྱི་མཎྜལ་འདི་ཉིད་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་རྒྱན་རྟ་བབས་དང་བཅས་པའི་དབུས་སུ། སེང་གེའི་ཁྲི་དང་པདྨ་དང་ཟླ་བའི་གདན་རྣམས་ལ་དེ་བཞིན་གཤེགས་པ་བདུན། ཤར་གྱི་སྣམ་བུ་ལ་འཇམ་དཔལ་སྐྱབས་གྲོལ་ཕྱག་ན་རྡོ་རྗེ་ལ་སོགས་བྱང་ཆུབ་སེམས་དཔའ་བཅུ་དྲུག །གཡས་གྲལ་དུ་ཚངས་པ་དང་བརྒྱ་བྱིན། གཡོན་གྲལ་དུ་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས། སྒོ་
བཞི་ལ་རྒྱལ་པོ་ཆེན་པོ་བཞི་དང་བཅས་པ་མངོན་སུམ་དུ་བཞུགས་པའི་མོས་པ་མཛོད་ལ། དེ་ནས་ཁྱེད་རང་རྣམས་སྨན་བླར་གསལ་བའི་ཐུགས་ཀའི་ཧཱུཾ་ལས་འོད་ཟེར་འཕྲོས། མདུན་བསྐྱེད་ལ་ཕོག་པས། མདུན་བསྐྱེད་ལས་བདེ་བར་གཤེགས་པ་བདུན་གྱི་ལྷ་ཚོགས་སྐུ་ཆེ་བ་རི་རབ་ཙམ་ཆུང་བ་ཡུངས་དཀར་གྱི་འབྲུ་ཙམ་ཁ་བ་བུ་ཡུག་ལྟར་བྱོན་ནས་ཁྱེད་རང་རྣམས་ལ་ཐིམ་པའི་མོས་པ་རྩེ་གཅིག་ཏུ་མཛོད་ཅིག །གཏོར་མ་བཟུང་ནས་མགོར་བཞག །བཅོམ་ལྡན་འདས་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ། མཚན་ལེགས། རིན་ཆེན་ཟླ་བ། གསེར་བཟང་དྲི་མེད། མྱ་ངན་མེད་མཆོག།ཆོས་བསྒྲགས་རྒྱ་མཚོ། ཆོས་བློ་མངོན་མཁྱེན། སྟོན་པ་ཤཱཀྱ་ཐུབ་པ། བྱང་ཆུབ་སེམས་དཔའ་སྐྱབས་གྲོལ། ཕྱག་ན་རྡོ་རྗེ་ལ་སོགས་པ་སེམས་དཔའ་བཅུ་དྲུག་དང་། མགོན་པོ་འཇམ་པའི་དབྱངས། མཁན་པོ་བོ་དྷི་སཏཱ། །ཆོས་རྒྱལ་ཁྲི་སྲོང་ལྡེའུ་བཙན། ལྷ་སྲས་སད་ན་ལེགས། ལྷ་ལུང་དཔལ་གྱི་རྡོ་རྗེ། བཙད་པོ་འོད་སྲུང་ལ་སོགས་པ་སྔ་འགྱུར་བརྒྱུད་པའི་བླ་མ་རྣམས་དང་། བོ་དྷི་སཏཱ་ཆུང་བ། རྒྱལ་པོ་དགའ་བའི་དཔལ། དབང་པོ་དགེ་བའི་དཔལ། ཇོ་བོ་ཨ་ཏི་ཤ །ལྷ་བླ་
མ་བྱང་ཆུབ་འོད་ལ་སོགས་པ་གསར་མ་བརྒྱུད་པའི་བླ་མ་རྣམས་དང་། རྒྱལ་ཚབ་གྲགས་པ་དོན་གྲུབ། དཔལ་ལྡན་གར་དབང་ཆོས་ཀྱི་དབང་ཕྱུག་ལ་སོགས་བཀའ་བབས་བརྒྱུད་པའི་བླ་མ་རྣམས་ཀྱིས་བྱིན་གྱིས་རློབས་ཤིག །འཁོར་བ་དང་ངན་སོང་གི་སྡུག་བསྔལ་ཐམས་ཅད་ལས་ཐར་བ་དང་། ལས་དང་ཉོན་མོངས་པའི་སྡིག་སྒྲིབ་ཐམས་ཅད་བྱང་ཞིང་དག་པ་དང་། འཇིགས་པ་ཆེན་པོ་བརྒྱད་དང་བཅུ་དྲུག་ལས་ཐར་བ་དང་། ནད་རིགས་བཞི་བརྒྱ་རྩ་བཞི་ཐམས་ཅད་ཞི་ཞིང་བྱང་བ་དང་། གདོན་ཐམས་ཅད་དང་བྱད་སྟེམས་དང་དུས་མ་ཡིན་པར་འཆི་བ་ཐམས་ཅད་ཉེ་བར་ཞི་བ་དང་། བཀྲ་མི་ཤིས་པ་དང་ལྟས་ངན་པ་དང་། འཐབ་རྩོད་དང་དབུལ་ཕོངས་ཐམས་ཅད་ཞི་བ་དང་། ཚེ་དང་བསོད་ནམས་བཀྲ་ཤིས་བདེ་ལེགས་ཐམས་ཅད་འཕེལ་ཞིང་རྒྱས་པ་དང་། དགེ་བ་བཅུ་དང་ཕ་རོལ་ཏུ་ཕྱིན་པ་བཅུ་ལ་ལོངས་སྤྱོད་ཅིང་། ཕྱི་མ་སངས་རྒྱས་ཀྱི་ཞིང་ཁམས་རྣམ་པར་དག་པར་སྐྱེས་ནས་མྱུར་དུ་འཚང་རྒྱ་བར་བྱིན་གྱིས་རློབས་ཤིག །ཏདྱ་ཐཱ། གྷུ་མེ་སོགས་མཚན་སྔགས་རིང་ཐུང་གཉིས་ཀྱང་སྤྲོ་ན་འདོན་ནོ། །འགྲོ་བའི་ནད་གསོ་མཛད་པ་སྨན་པའི་མཆོག །
བཻ་ཌཱུརྻ་ལྟར་དྭངས་བའི་སྐུ་མངའ་ཞིང་། །སྐུ་ཡི་འོད་ཀྱིས་འགྲོ་བ་སྒྲོལ་མཛོད་པ། །སྨན་པའི་རྒྱལ་པོ་དེ་ཡི་བཀྲ་ཤིས་ཤོག །མེ་ཏོག་འཐོར། འོ་དེ་ཡན་ཆད་སྨན་བླ་མཆེད་བདུན་གྱི་བྱིན་གྱིས་བརླབས་པའི་རྗེས་གནང་ཞེས་བྱ་བ་དེ་ལེགས་པར་སོང་བ་ཡིན། ད་གཉིས་པ་སྔགས་ཀྱི་རྗེས་གནང་གི་དོན་དུ་དམིགས་པ་འདི་ལྟར་དུ་མཛོད། མདུན་བསྐྱེད་དང་སློབ་དཔོན་གྱི་ཐུགས་ཀ་ནས་སྔགས་ཀྱི་ཕྲེང་བ་ལྷ་སོ་སོའི་ཁ་དོག་ཅན་འཕྲོས་ནས་ཁྱེད་རང་གི་ཐུགས་ཀར་ཧཱུྃ་མཐིང་གི་མཐར་འཁོད་ཅིང་། འགའ་ཞིག་ཧཱུྃ་ཡིག་ལ་ཐིམ་པའི་མོས་པས་སྔགས་འདིའི་རྗེས་ཟློས་ཤེས་ན་མཛོད། ཏདྱ་ཐཱ། གྷུ་མེ་སོགས་དང་། སྤྲོ་ན་མཚན་སྔགས་རྒྱས་པ། ཨོཾ་བྷི་ཥ་དྲི་བྷི་ཥ་ཕྱི་མ་ཧཱ་བྷི་ཥ་ཛྭ་རཱ་ཛ་ས་མུཏྟ་ཏེ་སྭཱ་ཧཱ། སྙིང་པོ་འདི་ལན་གསུམ་བྱ། །གཟུངས་རིང་ལན་གསུམ་ཐོན་ན་ལེགས། མ་ཐོན་ན་སྙིང་པོ་གཉིས་གསུམ་བྱའོ། །ད་སློབ་དཔོན་ལ་མེ་ཏོག་གི་ཕྲེང་བ་ཞིག་ཕུལ་བར་མོས་པས་འདིའི་རྗེས་ཟློས་ལན་གསུམ་མཛོད། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །ཕྲིན་ལས་
རྫོགས་པར་མཛད་དུ་གསོལ། །སློབ་དཔོན་གྱིས་མདུན་བསྐྱེད་ཀྱི་ཚོམ་བུ་རྡོ་རྗེ་དང་བཅས་པ་སློབ་མའི་སྤྱི་བོར་བཞག་ལ། བཅོམ་ལྡན་འདི་ལ་བསྩལ་ལགས་ཀྱིས། །ཞེས་སོགས་གོང་ལྟར་དང་། བཅོམ་ལྡན་འདས་སྨན་བླ་མཆེད་བདུན་འཁོར་དང་བཅས་པའི་སྐུ་གསུང་ཐུགས་ཀྱི་བྱིན་རླབས་དང་ཡོན་ཏན་གཟུངས་སྔགས་ཀྱི་ནུས་པ་ཐམས་ཅད་རྡོ་རྗེའི་སློབ་མ་འདི་རྣམས་ལ་འཇུག་ཅིང་བརྟན་པར་གྱུར་ཅིག །ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། མེ་ཏོག་དོར་ཞིང་། སྨོན་ལམ་རྒྱ་ཆེན་ཡོངས་སུ་དག་གྱུར་པའི། །ཡིད་བཞིན་ནོར་བུ་ལྟ་བུར་གཞན་དོན་མཛད། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུརྱ་ཡི་འོད་ཀྱི་བཀྲ་ཤིས་ཤོག །འོ་དེས་སྔགས་ཀྱི་རྗེས་གནང་ཞེས་བྱ་བ་དེ་ལེགས་པར་སོང་བ་ཡིན། ད་གསུམ་པ་དམ་བཅའ་ཁས་ལེན་པ་ཞེས་བྱ་བའི་དོན་དུ་ཕན་ཡོན་ཅུང་ཟད་ཞུ་ན། སྤྱིར་བདེ་གཤེགས་བདུན་པོ་འདིའི་མཚན་བཟུང་ནས་ཡི་དམ་དུ་བྱས་ན་སོ་སོ་ནས་ཕན་ཡོན་དཔག་ཏུ་མེད་པ་ཡོད་ལ། ཁྱད་པར་དུ་བཅོམ་ལྡན་འདས་སྨན་གྱི་བླ་མ་འདི་ཉིད་ཀྱི་མཚན་ཐོས་པ་ཙམ་ཁོ་ན་ཡང་ཕན་ཡོན་མཐའ་ཡས་ཏེ། དེ་ཡང་མི་གང་དག་སེར་སྣ་ཆེན་པོས་བཅིངས་ཏེ།
སྦྱིན་པ་ཅུང་ཟད་ཀྱང་མི་བྱེད་པར་གྱུར་པ་རྣམས་ཀྱིས་ཡི་དྭགས་དང་དུད་འགྲོར་སྐྱེ་བར་འགྱུར་ཏེ། དེས་ཀྱང་ད་ལྟ་སྨན་གྱི་བླའི་མཚན་ཐོས་ན་ཡི་དྭགས་དང་དུད་འགྲོར་སྐྱེས་ཀྱང་སངས་རྒྱས་དེའི་བྱིན་རླབས་ཀྱིས་སྨན་བླའི་མཚན་ཡིད་ལ་དྲན་ནས་མྱུར་དུ་ཐར་ཏེ་མིར་སྐྱེ། དེར་ཡང་སྦྱིན་པ་ལ་དགའ་ཞིང་སྦྱིན་པའི་ཕ་རོལ་ཏུ་ཕྱིན་པའི་ཚོགས་རྫོགས་པར་འགྱུར་བར་གསུངས་སོ། །ཡང་རབ་ཏུ་བྱུང་ནས་ཚུལ་ཁྲིམས་ལོག་པར་ཞུགས་པ་དང་། ལྟ་བ་ལོག་པར་ཞུགས་པ་དང་། ཚུལ་ཁྲིམས་སྲུང་ཡང་མང་དུ་ཐོས་པ་སྤང་བར་བྱེད་པས་རྒྱལ་བའི་གསུང་རབ་ཀྱི་དོན་མི་ཤེས་པ་དང་། མང་དུ་ཐོས་པའི་ང་རྒྱལ་གྱིས་གཞན་ཁྱད་དུ་གསོད་པས་ཆོས་སྤང་གི་ལས་བསགས་པ་རྣམས་ནི་དམྱལ་བ་ཆེན་པོར་ལྟུང་བར་འགྱུར་ཏེ། དེས་ཀྱང་སྨན་བླའི་མཚན་ཐོས་པའི་བྱིན་རླབས་ཀྱི་མཐུས་དམྱལ་བ་ན་ཡང་མཚན་དེ་དྲན་ནས་མྱུར་དུ་ཐར་ནས། དེ་མིར་སྐྱེས་ནས་དད་པ་དང་བརྩོན་འགྲུས་དགེ་བའི་བསམ་པ་ཅན་དུ་འགྱུར་བ་དང་། རབ་ཏུ་བྱུང་སྟེ་བྱང་ཆུབ་ཀྱི་སྤྱོད་པ་སྤྱད་པར་འགྱུར་བར་གསུངས་སོ། །གང་དག་ཕྲག་དོག་གི་དབང་གིས་བདག་ལ་བསྟོད་ཅིང་གཞན་ལ་སྨད་པར་བྱེད་པ་རྣམས་ནི་
ངན་སོང་དུ་ལོ་སྟོང་ཕྲག་མང་པོར་སྡུག་བསྔལ་མྱོང་ཞིང་། རྟ་དང་རྔ་མོང་བོང་བུ་རྣམས་སུ་སྐྱེས་ནས་ཁལ་ཆེན་པོ་འགལ་ཞིང་རྡུང་རྩོག་གི་སྡུག་བསྔལ་མྱོང་ལ། དེ་ནས་མིར་སྐྱེས་ཀྱང་བྲན་དུ་སྐྱེ་བར་འགྱུར་ལ། དེ་ཡང་སྨན་བླའི་མཚན་ཐོས་ན་དེའི་བྱིན་རླབས་ཀྱིས་ངན་སོང་ལས་ཐར་ནས་དུད་འགྲོར་མི་སྐྱེ་ཞིང་། མིར་སྐྱེས་ནས་དབང་པོ་གསལ་བ་དང་ཤེས་རབ་ཆེ་བ་དང་ཆོས་ལ་མོས་པར་འགྱུར་ཏེ། དགེ་བའི་བཤེས་གཉེན་ལ་བསྟེན་ཏེ། རིམ་གྱིས་འབྲས་བུ་ཐོབ་པར་གསུངས་སོ། །གཞན་ཡང་གཞན་གྱི་ཕྲ་མ་དང་འཐབ་རྩོད་དང་གནོད་སྦྱིན་དང་སྲིན་པོ་ཤ་ཟ་དང་འབྱུང་པོ་དང་རོ་ལངས་རྣམས་ཀྱི་ངན་སྔགས་ཀྱིས་བྱེད་དུ་བཅུག་ཀྱང་། སྨན་གྱི་བླའི་མཚན་ཐོས་པ་དེ་ལ་བར་ཆད་བྱ་བར་མི་ནུས་པར་གསུངས་ཤིང་འདིའི་མཚན་ཐོས་ན་ངན་སོང་དུ་འགྲོ་བའི་གོ་སྐབས་མེད་པར་གསུངས་ལ། གཞན་ཡང་ཕན་ཡོན་མཐའ་ཡས་པ་གསུངས་པས། སངས་རྒྱས་སྨན་གྱི་བླ་བཻཌཱུརྨ་འོད་ཀྱི་རྒྱལ་པོ་ལ་ཕྱག་འཚལ་ལོ། །ཞེས་པ་འདི་ཞག་རེ་རབ་བརྒྱ་རེ། འབྲིང་ཉེར་གཅིག །ཐ་མ་བདུན་རེ་མི་ཆག་པར་ཡི་དམ་བྱེད་པའི་དམ་བཅའ་ཁས་ལེན་པ་དབང་འདིའི་དམ་
ཚིག་ཡིན་པས་ཤིན་ཏུ་གལ་ཆེ། ཁས་ལེན་སོ་སོར་བྱེད་བཅུག །ཡང་བྱེ་བ་འབུམ་ཕྲག་ཁྲི་སོགས་ཁས་ལེན་ཡང་བྱེད། འོ་ད་ནས་བཟུང་སྟེ་སངས་རྒྱས་སྨན་གྱི་བླ་ཡི་དམ་དུ་བཟུང་ལ་མཚན་དེ་མ་བརྗེད་པར་འདོན་པ་དང་། ཤེས་ན་སྨན་བླའི་ཆོ་ག་མཆོད་བསྟོད་བཟླས་བརྗོད་ལ་བརྩོན་པ་དང་། མི་ཤེས་ན་ཡང་སངས་རྒྱས་སྨན་གྱི་ལྷ་ལ་ཕྱག་འཚལ་བ་དང་ཟས་ཀྱི་ཕུད་མཆོད་པ་རྣམས་མཛད་པའི་ཕྱིར་དམ་ཚིག་ཁས་ལེན་པ་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་བསྩལ་པ། །སོགས་ལན་གསུམ། ཐུགས་རྗེས་ཀུན་ལ་སྙོམས་པའི་བཅོམ་ལྡན་འདས་། །སོགས་ནས། བཀྲ་ཤིས་ཤོག །བར་དང་། མེ་ཏོག་གཏོར། འོ་དེས་དམ་བཅའ་ཁས་ལེན་པ་དེ་སོང་ནས། དེས་སྨན་བླ་མཆེད་བདུན་གྱི་དབང་ཡོངས་སུ་རྫོགས་པ་ཐོབ་པ་ཡིན་པས་གཏང་རག་གི་མཎྜལ་ཕུལ། ས་གཞི་སྤོས་ཆུས་བྱུགས་སོགས། དེ་ནས་སློབ་མ་གྲོལ་ལ། ཨོཾ་སརྦ་ཏ་ཐཱ་ག་ཏ་རྒྱུ་སོགས་ཀྱིས་མཆོད། བསྟོད་པར་འོས་པ་ཐམས་ཅད་ལ། །སོགས་ཀྱིས་བསྟོད་ནས། དེ་བཞིན་གཤེགས་པ་བདུན་གྱིས་སྔོན་སྨོན་ལམ་ཇི་ལྟར་བཏབ་པའི་བཀའ་དྲིན་ཐམས་ཅད། བདག་དང་སེམས་ཅན་ཐམས་ཅད་ཀྱིས་ད་ལྟ་ཉིད་དུ་ཐོབ་པར་བྱིན་
གྱིས་བརླབ་ཏུ་གསོལ། མ་འབྱོར་པ་དང་ཉམས་པ་དང་། །སོགས། ཨོཾ་བཛྲ་ས་ཏྭ་ས་མ་ཡ་ཞེས་སོགས་ཡིག་བརྒྱས་ཆད་ལྷག་ཁ་བསྐང་། རྟེན་ཡོད་ན་བརྟན་བཞུགས། ཡེ་ཤེས་པ་རྣམས་རྟེན་འདི་ལ་བརྟན་པར་བཞུགས། ཨོཾ་སུ་པྲ་ཏིཥྛ་བཛྲ་སྭཱ་ཧཱ། རྟེན་མེད་ན། ཨོ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ནས། བཛྲ་མུ༔ འཇིག་རྟེན་པ་རྣམས་རང་གནས་སུ་བཛྲ་མུ༔ དམ་ཚིག་པ་རང་ལ་ཐིམ་ནས་མི་དམིགས་པར་གྱུར། ཉིན་མོ་བདེ་ལེགས་མཚན་བདེ་ལེགས། །སོགས་བཀྲ་ཤིས་བརྗོད། མི་གཙང་ལུས་འདི་བོར་བར་གྱུར་མ་ཐག །ཅེས་སོགས་བསྔོ་སྨོན་བྱའོ། །དེ་ཡང་མཚན་བརྗོད་པའི་ཕན་ཡོན་གོང་དུ་སོང་བ་ལྟ་བུ་དང་། གཟུངས་འདི་བརྗོད་པས་བསམ་པ་ཐམས་ཅད་འགྲུབ་པ་སངས་རྒྱས་ཀྱིས་དགོངས་ཤིང་བྱིན་གྱིས་བརླབས་པ་དང་། །ལས་ཀྱི་སྒྲིབ་པ་ཐམས་ཅད་དག་ནས་སངས་རྒྱས་ཀྱི་ཞིང་དུ་སྐྱེ་བར་འགྱུར་རོ། །མཆོད་བསྟོད་བྱས་པས་ལྟས་ངན་དང་བཀྲ་མི་ཤིས་པ་ཐམས་ཅད་དང་། མེ་ཆུ་དུག་མཚོན་དང་གཡང་ས། གཅན་གཟན་དང་། དམག་དང་ཆོམ་རྐུན་གྱི་འཇིགས་པ་ཞི་བ་དང་། ཚུལ་ཁྲིམས་འཆལ་བའི་སྒྲིབ་པ་དག་ནས་ངན་སོང་དུ་མི་ལྟུང་བ་དང་། བུད་མེད་སྦྲུམ་མ་ཡང་བདེ་བར་བཙའ་ཞིང་། བྱི་སྦ་ནད་ཉུང་ཞིང་ཤེས་རབ་ཅན་དུ་འགྱུར་བ་སོགས་ཕན་ཡོན་མང་པོ་གསུངས་ཏེ། དབང་
སྒྲུབ་དུས་བདག་མདུན་མཆོད་བསྟོད་བཟླས་པ་དང་བཅས་པ་ཡོད་པས་ཕན་ཡོན་དེ་དག་འབྱུང་བ་དང་། དབང་ཚར་གཅིག་གིས་རང་གཞན་གྱི་དོན་ཐམས་ཅད་འགྲུབ་པ་ཡིན་ནོ། །འདི་ནི་སྔོན་གྱི་མཁས་པ་རྣམས་ཀྱིས་མཛད་པ་ལ་གཞི་བྱས། རྗེ་ཞྭ་དམར་དྲུག་པས་གཏོར་དབང་བསྐུར་བར་མཛད་པའི་སྤྱན་ལྟོས་ཅུང་ཟད་མཐོང་ཡང་གྲྭ་ཚང་དུ་འདིའི་དཔེ་དཀོན་ལ། གྲྭ་པ་འགའ་ཞིག་གིས་ཞུས་ནས་བླ་མ་ཝ་རྒན་པས་འདིའི་དབང་ཆོག་ཞིག་བརྩམས་ཤིང་འདུག་པ་ལ་ཡང་བདག་གི་རྟོག་པ་བཅུག་པ་ཡིན་ལ། འདིའི་རྗེས་གནང་སྤྱི་མཚམས་དང་ཁྱད་པར་དུ་མ་ལ་ཡུན་རིང་དུ་གོམས་པར་བྱས་ཤིང་མདོ་སྡེ་གཉིས་དང་། བོ་དྷི་སཏཱའི་ཆོ་ག་རྒྱས་བསྡུས་དང་། ཆོ་གའི་རྣམ་བཤད་རྒྱས་པ་དང་། སྨན་བླ་སྤྲུལ་སྐུ་ལྟར་སྒྲུབ་པ་དང་། བདེ་གཤེགས་བདུན་གྱི་བྱིན་རླབས་སོགས་དོན་བསྡུས་ནས་ཁྱེར་བདེ་བར་བྱས་པའོ། །འདི་ལ་འགལ་འཁྲུལ་གང་མཆིས་བདེ་གཤེགས་བདུན་ལ་བཤགས། །དགེ་བས་བདག་དང་བདག་གི་རྗེས་འབྲང་དང་། །དབང་ཆོག་འདི་ལ་འབྲེལ་ཐོགས་འགྲོ་བ་ཀུན། །ལུས་འདི་བོར་ནས་ལུས་གཞན་མི་ལེན་པར། །བདེ་བ་ཅན་གྱི་ཞིང་དེར་སྐྱེ་བར་ཤོག །དེ་རུ་སྐྱེས་ནས་རྫུ་འཕྲུལ་སྟོབས་ཀྱིས་ནི། །སྨན་བླ་མཆེད་བདུན་མཆོད་པས་མཉེས་བྱེད་ཤོག །དེ་སྐད་བརྗོད་པ་རཱ་གའི་མིང་ཅན་ནོ། །བཀྲ་ཤིས་དགེ་ལེགས་ཕུན་སུམ་ཚོགས་པར་ཤོག །མངྒ་ལཾ། དགེའོ།། །།