སྨན་བླའི་ཆོ་ག་བསྡུས་པ་རྗེ་ཞྭ་དམར་པ་ཆོས་ཀྱི་དབང་ཕྱུག་གིས་མཛད་པའི་ཕྱག་ལེན་ཞལ་ཤེས་ཟིན་བྲིས།
སྨན་བླའི་ཆོ་ག་བསྡུས་པ་རྗེ་ཞྭ་དམར་པ་ཆོས་ཀྱི་དབང་ཕྱུག་གིས་མཛད་པའི་ཕྱག་ལེན་ཞལ་ཤེས་ཟིན་བྲིས་བཞུགས་སོ།།
ན་མོ་བྷེ་ཥ་ཕྱི་ཡེ། བཅོམ་ལྡན་ཤཱཀྱའི་རྒྱལ་པོ་ཡིས། །སྨན་མདོ་རྒྱས་བསྡུས་གཉིས་གསུངས་པ། །ཀུན་དགའ་བོ་ཡིས་ཡི་གེར་བཀོད།སྟོན་པ་འདས་རྗེས་འཇམ་དབྱངས་ཀྱིས། །མཁན་པོ་བྷྱོ་དྷི་སཏྭ་ལ། །དེ་ཡི་དབང་ལུང་མན་ངག་གནང་། །མཁན་པོས་སྨན་བླའི་ཆོ་ག་ནི། །རྒྱས་འབྲིང་བསྡུས་གསུམ་མཛད་པ་ལས། །འདི་ནི་བསྡུས་པའི་ལུགས་ཡིན་ཏེ། །།གཞུང་ཚིག་མཁན་པོས་གསུང་དངོས་ཡིན། །དེ་ཕྱིར་རྒྱ་གཞུང་བྱིན་རླབས་ཆེ། །བོད་དུ་ཁྲི་སྲོང་ལྡེའུ་བཙན་གྱི། །སྐུ་རིམ་སྒྲིབ་སྦྱོང་གཉིས་ཀ་ལ། །སྨན་བླའི་ཆོ་ག་རྒྱས་པ་བཙུགས། །དེ་ཉིད་ད་རུང་མ་
ནུབ་དར། །ཟ་ཧོར་མཁན་པོས་དབོན་པོ་ནི། །བྷྱོ་དྷི་སཏྭ་ཆུང་བར་གནང་། །དེ་ནས་ཇོ་བོ་རྗེས་བསྒྱུར་བ། །གསར་མ་ཡིན་ཏེ་ཚིག་དོན་གཅིག །བཀའ་གདམས་ལུགས་ལ་དར་ཞིང་རྒྱས། །མཚན་ཉིད་དགེ་བཤེས་མཁས་པ་ཀུན། །ཆོས་རྣམས་ཕལ་ཆེར་སྐྱོན་འདོགས་ཤིང་། །ཤིན་ཏུ་མགུ་བར་དཀའ་ན་ཡང་། །རབ་འབྱམས་གྲྭ་སྐོར་གཏོང་བའི་ས། །དཔལ་འཁོར་ཆོས་སྡེར་སྟོང་ར་ཆེན། །ངམ་སྟེང་སུམ་སྟོང་བརྒྱད་བརྒྱ་འཚོགས་། །ཀུན་གྱི་འདོན་རྒྱུ་སྨན་བླ་ཡིན། །བཀའ་གདམས་ལུགས་ཀྱི་ཁྱད་པར་ཆོས། །ཀུན་རིག་མི་དར་སྨན་བླ་ཡིན། །སྙིགས་དུས་འབྲོམ་གྱི་
སྤྲུལ་པ་ནི། །གྲགས་པའི་མིང་ཅན་བདུན་བརྒྱུད་འབྱུང་། །གར་དབང་ཆོས་ཀྱི་དབང་ཕྱུག་གིས། །ཆོ་ག་འདི་ཉིད་པར་དུ་བཀོད། །གཙང་པ་ཕུན་ཚོགས་རྣམ་རྒྱལ་གྱིས། །གཤེགས་རྫོངས་ཉིན་གླིང་ཆོ་ག་བཙུགས། །དེས་ན་འདི་ཉིད་ཁུངས་བཙུན་ནོ། །ཕྱག་ལེན་རྒྱས་པ་བསྡུས་པ་གཉིས། །སྤྲོས་མེད་ལུགས་དང་རྣམ་པ་བཞི། །རྒྱས་པར་དཀྱིལ་འཁོར་བྲིས་པ་སྟེ། །གྲུ་བཞི་སྒོ་བཞི་སྤྱི་དང་མཚུངས། །ཁྱད་པར་དུར་ཁྲོད་མེད་པའོ། །དབུས་སུ་པད་མ་འདབ་བརྒྱད་དེ། །དེ་རྒྱབ་འདབ་མ་བཅུ་དྲུག་གོ །དེ་རྒྱབ་འདབ་མ་ཉི་ཤུ་གཉིས། །སྒོ་བཞིར་རྒྱལ་ཆེན་ཐིག་ལེ་བཀོད། །དེ་སྟེང་དབུས་སུ་མཉྫིའི་སྟེང་། །དར་སྣ་ལྔ་ཡིས་དྲིལ་བ་ཡི། །སྨན་མདོའི་གླེགས་བམ་བཞུགས་པར་བྱ། །སྟེང་ན་ལྷ་གྲངས་ཙཀ་གདུགས་ཕུབ། །མཐའ་སྐོར་མཆོད་པ་སྣ་བདུན་ནི། །ལྷ་གྲངས་མཉམ་པ་བཀོད་པར་བྱ། །ཟུར་བཞིར་རྒྱལ་མཚན་བཞི་དང་ནི། །ལོགས་བཞིར་ཚོན་སྐུད་དྲྭ་བ་བྲི། །སྟེང་ན་གདུགས་སམ་བླ་བྲེ་ཕུབ། །དེ་ནི་དཀྱིལ་འཁོར་རྒྱས་པ་སྟེ། །ཙཀ་གདུགས་དབུས་གཙང་ཀུན་ཏུ་དར། །འབྲིང་པོ་སྨན་བླའི་ཐང་སྐུའམ། །མེད་ན་ཐུབ་པའི་གསེར་སྐུའི་མདུན། །
མཎྜལ་སྟེང་དུ་འབྲས་སམ་ནས། །ཚོམ་བུ་དགུ་ནི་བཀོད་པར་བྱ། །བདེ་གཤེགས་བརྒྱད་ནི་གླེགས་བམ་ཡིན། །དེ་མདུན་ལྷ་བཤོས་བརྒྱད་དང་ནི། །དེ་མདུན་མར་མེ་བརྒྱད་དང་ཡོན་ཆབ་བརྒྱད། །བདེ་གཤེགས་བརྒྱད་པོ་འཁོར་བཅས་མཆོད། །དེ་ནི་རྒྱུན་དུ་ཕྱག་ལེན་སྲོལ། །བསྡུས་པར་དེ་ལྟར་མ་འཛོམས་ཀྱང་། །གཙུག་ལག་ཁང་ངམ་མཆོད་ཁང་དུ། །སྨན་བླའི་སྐུ་དང་མར་མེ་དང་། །ཡོན་ཆབ་ཡོད་ན་དམིགས་པ་གཏད། །སོ་སོར་ནམ་འདོད་འདོན་སྲོལ་ཡོད། །སྤྲོས་མེད་ལུགས་ལ་གཞི་བྱས་ཀྱི། །འགྲོ་འདུག་ལ་སོགས་བྱེད་དུས་ཀྱང་། །མདུན་གྱི་ནམ་མཁར་དཀྱིལ་འཁོར་བསྒོམ། །མཆོད་པ་ཡིད་ཀྱིས་སྤྲུལ་པ་དང་། །འཇིག་རྟེན་ཁམས་ནི་དཔག་མེད་ན། །ཡོད་པ་ཐམས་ཅད་ཡིད་ཀྱིས་ཕུལ། །འགྲོ་འདུག་སྤྱོད་ལམ་ཚེ་ན་ཡང་། །ཆབ་བསིལ་ཚེ་ན་མི་རུང་ངོ། །དེ་མིན་ནམ་ཡང་འདོན་དུ་རུང་། །ཕྱག་ལེན་གྱི་ལེའུ་སྟེ་གཉིས་པའོ།། ༈ །།དེ་ནས་བསྒོམ་བྱའི་དམིགས་རིམ་ལ། །གང་གིས་བརྟེན་ཅིང་ཞེས་པ་ནས། །བག་ཡོད་ཡིན་ཞེས་བྱ་བའི་བར། །རང་སེམས་ངོ་བོ་བལྟས་པས་འཐུས། །སེམས་ཅན་ཐམས་ཅད་བདེ་ལྡན་སོགས། །
ཚད་མེད་བཞི་པོའི་ཚིག་དེ་ནི། །དེ་ལྟར་གྱུར་ཅིག་བསམ་པ་ལས། །གཞན་གྱི་དམིགས་པ་བསྒོམ་མི་དགོས། །སངས་རྒྱས་ཆོས་ཚོགས་སྐྱབས་སེམས་དེ། །གོ་སླ་ལན་གསུམ་བཏོན་ན་ལེགས། །འདི་ནི་བྱ་རྒྱུད་འདོན་ཆོག་སྟེ། །བདག་བསྐྱེད་མེད་དེ་མདུན་བསྐྱེད་ཡིན། །ས་ཕྱོགས་ཐམས་ཅད་ཁོད་མཉམ་པ། །བཻཌཱུརླ་ཡི་ས་གཞི་ལ། །མེ་ཏོག་སྣ་ཚོགས་ཚལ་རྒྱས་པ། །འཇའ་གུར་མེ་ཏོག་ཆར་པ་འབེབས། །དག་པའི་ཞིང་ཁམས་ལྟ་བུའི་དབུས། །རིན་ཆེན་སྣ་ཚོགས་ལས་གྲུབ་པའི། །གཞལ་ཡས་ཁང་པ་བསམ་འདས་བསྒོམ། །དཀྱིལ་འཁོར་དེ་ཡི་ཕྱི་ཁྱམས་ལ། །མཆོད་རྫས་འདོད་པའི་ཡོན་ཏན་ཚོགས། །དཔག་མེད་ཟད་མི་ཤེས་པ་བསྒོམ། །དཀྱིལ་འཁོར་ནང་གི་པད་འདབ་རྣམས། །བྲིས་པ་བཞིན་དུ་བྷཻཾ་པ་ཡིན། །འདབ་མ་བརྒྱད་དང་དགུ་སོགས་ལ། །སེང་ཁྲི་པད་ཟླའི་གདན་རེ་བསྒོམ། །དེ་མིན་འདབ་མ་ཐམས་ཅད་དང་། །སྒོ་བཞིར་ཟླ་བའི་གདན་རེ་བསམ། །བདེན་པའི་བྱིན་རླབས་བརྗོད་པ་ཡིས། །དེ་ལྟར་དངོས་སུ་གྱུར་དམིགས་ཤིང་། །དཀོན་མཆོག་གསུམ་གྱི་ཞེས་པ་ནས། །གྱུར་ཅིག་བར་དུ་ལན་གསུམ་བརྗོད། །ས་གཞི་བྱིན་གྱིས་རླབས་པ་དང་། །
ཕོ་བྲང་གཞལ་ཡས་བསྐྱེད་པ་དང་། །མཆོད་པ་བྱིན་རླབས་གསུམ་ཁ་ཡིན། །དེ་ནས་སྤྲོས་པ་ལ་དགའ་ན། །ཆོས་གོས་ལ་སོགས་ལུས་ཚག་གཟབ། །ཐལ་མོ་སྦྱར་བའི་བར་དུ་ནི། །མེ་ཏོག་གམ་ནི་སྤོས་ཐུར་སྦར། །ཤར་གྱི་ཕྱོགས་སུ་ཁ་གྱུས་ཏེ། །བཅོམ་ལྡན་འདས་ཞེས་བྱ་བ་ནས། །བྱིན་གྱིས་རློབས་པ་ཅི་གནང་བར། །སྙན་གསན་དབབ་པའི་ཚིག་ཡིན་ཏེ། །དེ་བརྗོད་སངས་རྒྱས་བྱང་སེམས་རྣམས། །མངོན་པར་ཤེས་པས་དེ་མཁྱེན་ཏེ། །རྡོ་རྗེའི་སྙན་གྱིས་ཚིག་དེ་གསན། །སྔོན་གྱི་སྨོན་ལམ་དམ་བཅའ་དྲན། །འབྱོན་པར་དགོངས་པ་གཏད་པར་བསྒོམ། །མ་ལུས་སེམས་ཅན་ཞེས་པ་ནས། །གཤེགས་སུ་གསོལ་ལོ་ཞེས་པའི་བར། །སངས་རྒྱས་དཀོན་མཆོག་བདེ་གཤེགས་བརྒྱད། །ཆོས་རྣམས་པོ་ཏི་གླེགས་བམ་ཚུལ། །དགེ་འདུན་བྱང་ཆུབ་སེམས་དཔའི་ཚོགས། །དེ་དག་ཞབས་འབྲིང་རྒྱལ་ཆེན་བཞི། །ཕྱོགས་སྐྱོང་གནོད་སྦྱིན་སྡེ་དཔོན་བཅས། །བོད་ཀྱི་དགེ་བཤེས་ཐམས་ཅད་ཀྱང་། །ནམ་མཁའ་གང་བར་བྱོན་བྱུང་བས། །དགའ་ནས་ལེགས་པར་ཚིག་བརྗོད་ཅིང་། །སྔོན་ནས་བསྒོམས་པའི་གཞལ་ཡས་ཁང་། །གདན་དང་བཅས་པ་ཕུལ་བ་
ཡིས། །ཆོས་ཀུན་དབུས་ཀྱི་གླེགས་བམ་ཐིམ། །དེ་ཉིད་སྐད་ཅིག་དྲན་རྫོགས་སུ། །ཆོས་སྐུ་ཡུམ་ཆེན་ལི་ཁྲིའི་མདོག །ཕྱག་གཡས་ཆོས་འཆད་གཡོན་མཉམ་བཞག །འོག་གཉིས་རྡོ་རྗེ་གླེགས་བམ་འཛིན། །རྡོ་རྗེའི་སྐྱིལ་མོ་ཀྲུང་གིས་བཞུགས། །གཡས་ཕྱོགས་སེང་གེའི་ཁྲི་ལ་བཞེངས། །མཚན་ལེགས་རྒྱལ་པོ་ནས་བཟུང་སྟེ། །བདེ་གཤེགས་བརྒྱད་པོ་གཡས་བསྐོར་བཞུགས། །མདུན་ངོས་སངས་རྒྱས་སྨན་བླ་དང་། །གཡས་ཟུར་ཤཱཀ་ཐུབ་བྷེ་པ་ཡི། །སྤྲོ་བསྡུའི་དམིགས་པ་བདེ་བ་ཡིན། །དེ་རྒྱབ་འདབ་མ་བཅུ་དྲུག་ལ། །སེམས་དཔའ་བཅུ་དྲུག་བཞུགས་པར་བྷྱོ། །དེ་རྒྱབ་འདབ་མ་ཉེར་གཉིས་ལ། །གཡས་ངོས་ཕྱོགས་སྐྱོང་བཅུ་པོ་སྟེ། །རེ་རེའི་འཁོར་ནི་འབུམ་ཕྲག་སྟེ། །གཡོན་ངོས་སྡེ་དཔོན་བཅུ་གཉིས་ལ། །རེ་རེའི་འཁོར་ནི་བདུན་འབུམ་སྟེ། །མི་ཤོང་མེད་པར་ཡངས་བར་བྷེ། །སྒྱུ་མ་མེ་ལོང་གཟུགས་བརྙན་བཞིན། །སྣང་ལ་རང་བཞིན་མེད་པའོ། །སྒོ་བཞིར་རྒྱལ་པོ་ཆེན་པོ་བཞི། །ཕྱི་ཡི་བར་ཁྱམས་འཁོར་ཡུག་ལ། །ཕྱོགས་བཅུ་དུས་གསུམ་སངས་རྒྱས་ནི། །བྱང་སེམས་ཉན་ཐོས་འཁོར་དང་བཅས། །ཆོས་རྒྱལ་གསུམ་དང་མཁན་སློབ་གཉིས། །བོད་ཀྱི་ཁྲིམས་
ལྡན་དགེ་བཤེས་རྣམས། །ཁྲོམ་ཚོགས་བཞིན་དུ་བཞུགས་པར་དམིགས། །སོ་སོའི་ཞིང་ཁམས་ཞེས་པ་ནས། །བཞུགས་པར་གྱུར་ཞེས་བྱ་བའི་བར། །འདོན་ཚེའི་དམིགས་པ་དེ་ཡིན་ནོ། །ཁྲུས་གསོལ་མཎྜལ་གཉིས་པོ་ནི། །རྒྱས་པ་དངོས་སུ་བྱེད་སྲོལ་ཡོད། །མ་འཛོམས་ཡིད་ཀྱིས་བྱས་ཀྱང་ཆོག།འདི་ནི་ཕྱག་ལེན་ཡིན་མོད་ཀྱི། །གཞུང་གི་པར་མའི་ནང་ན་མེད། །དེ་ཕྱིར་མ་བྱས་ན་ཡང་བཟོད། །རྒྱུན་དུ་ཉུང་ངུ་སྦྱར་ན་ལེགས། །གེལ་དུ་བྱེད་ན་དམིགས་པ་ནི། །དཀྱིལ་འཁོར་དེ་ཡི་ཤར་ཁྱམས་སུ། །ཁྲུས་ཀྱི་ཁང་པ་ཤེལ་ལས་གྲུབ། །མེ་ལོང་དག་པ་ལྟ་བུའི་ངོས། །དཀྱིལ་འཁོར་ལྷ་ཚོགས་སྐུ་འཆར་བ། །དེ་ལ་ཁྲུས་གསོལ་རས་ཀྱིས་ཕྱི། །སྤོས་ཀྱིས་བྱུག་ཅིང་ན་བཟའ་གསོལ། །མཎྜལ་ཡོད་ན་ལག་ཏུ་ཐོགས། །ཚོམ་བུ་བཀོད་ཅིང་རྒྱས་པར་འབུལ། །མེད་ན་ལག་པས་ཕྱག་རྒྱ་བྱ། །གླིང་བཞི་རི་རབ་ཉི་ཟླས་བརྒྱན། །ལྷ་མིའི་ལོངས་སྤྱོད་དུ་མས་བསྐོར། །ཡིད་ཀྱིས་སྤྲུལ་ཏེ་འབུལ་བ་དང་། །སྟོང་གསུམ་འཇིག་རྟེན་རབ་འབྱམས་ན། །དངོས་སུ་ཡོད་རྣམས་ཡིད་ཀྱིས་འབུལ། །ཚོགས་ཞིང་བསྙེན་པའི་ལེའུ་སྟེ་གསུམ་པའོ།། ༈ །།དེ་
ནས་རང་ཉིད་ཐ་མལ་ལུས། །བྱེ་བ་དུང་ཕྱུར་གྲངས་མེད་སྤྲུལ། །ཕྱག་འཚལ་ཟེར་དུས་ཕྱག་ཕུལ་བསྒོམ། །མཆོད་བསྟོད་ཟེར་དུས་སྔར་བསྒོམས་པའི། །མཆོད་པ་དེ་དག་ཕུལ་བར་བསྒོམ་། །སྐྱབས་མཆི་ཟེར་དུས་ཐལ་མོ་སྦྱར། །དད་པས་སངས་རྒྱས་ཞལ་ལྟ་བསྒོམས། །།དེ་དག་འོག་མ་ཀུན་ལ་འགྲེས། །སྐབས་འདིར་ཚར་གསུམ་འདོན་པའི་ཚེ། །སངས་རྒྱས་སྐུ་ལ་སེམས་གཏད་དེ། །མཚན་ལེགས་སེར་པོ་སྐྱབས་སྦྱིན་དང་། །མཉམ་བཞག་ཆོས་གོས་རྣམ་གསུམ་ཅན། །རིན་ཆེན་ཟླ་བ་སྐུ་མདོག་སེར། །མཆོག་སྦྱིན་མཉམ་བཞག་མཛད་པའོ། །གསེར་བཟང་སེར་པོ་ཕྱག་གཉིས་ཀྱིས། །ཐུགས་ཀར་ཆོས་འཁོར་ཕྱག་རྒྱ་མཛད། །མྱ་ངན་མེད་མཆོག་སྐུ་མདོག་དམར། །ཕྱག་གཉིས་མཉམ་བཞག་ཕྱག་རྒྱ་མཛད། །ཆོས་གྲགས་རྒྱ་མཚོ་སྐུ་མདོག་དཀར། །ཕྱག་གཉིས་ཐུགས་ཀར་ཆོས་འཁོར་རྒྱ། །ཆོས་བློ་མངོན་མཁྱེན་སྐུ་མདོག་དམར། །མཆོག་སྦྱིན་མཉམ་བཞག་མཛད་པའོ། །འདི་དག་ཕྱག་དང་སྐུ་མདོག་ལ། །འདྲ་མིན་འགའ་རེའང་བྱེད་སྲོལ་འདུག །ཤཱཀ་ཐུབ་སྨན་བླ་གཞུང་ལྟར་ཡིན། །སྐྱབས་གྲོལ་འཇམ་དབྱངས་ཕྱག་རྡོར་གསུམ། །ཞི་བ་བྱང་ཆུབ་སེམས་དཔའི་
ཚུལ། །སྤྱི་དང་འདྲ་བས་བཤད་མི་དགོས། །རྒྱལ་ཆེན་བཞི་དང་ཕྱོགས་སྐྱོང་བཅུ། །གནོད་སྦྱིན་སྡེ་དཔོན་བཅུ་གཉིས་སོགས། །ཞི་བ་ཙཀ་གདུགས་ནང་ལྟར་ཏེ། །མོས་པ་ཙམ་ཆོག་བཤད་མི་དགོས། །དེ་ནས་དེ་དག་ཐམས་ཅད་ལ། །འཕགས་པའི་ཚོགས་ཞེས་བྱ་བ་ནས། །མཆོད་པའི་བར་ལྟར་གཞུང་ལྟར་བསྒོམ། །བདག་ཅག་རྣམས་ཀྱི་ཞེས་པ་ནས། །འཚལ་ལོའི་བར་ལྟར་གཞུང་ལྟར་བསྒོམ། །དེ་ནས་མཛད་དུ་གསོལ་གྱི་བར། །དངོས་གྲུབ་ཞུ་བའི་ཚིག་ཡིན་ནོ། །བདག་ཅག་ལ་སོགས་ཟེར་བའི་མལ༔ །ཚེ་འདས་ཡིན་ན་མིང་བརྗོད་དོ། །ཆོ་གའི་དངོས་གཞིའི་ལེའུ་སྟེ་བཞི་པའོ།། ༈ །།དེ་ནས་གཟུངས་བཟླ་དམིགས་པ་ནི། །བདེ་གཤེགས་བརྒྱད་ཀྱི་ཐུགས་ཀ་རུ། །ཟླ་སྟེང་རང་མདོག་ཧཱུྃ་ཡིག་མཐར། །གཟུངས་རིང་གཡས་སུ་བཅུད་ནས་འཁོར། །ཏདྱ་ཐཱ་ནི་ཕྱི་ཡིན་ཏེ། །སྭཱ་ཧཱ་ནང་དུ་ཡོད་པའོ། །ཁྱད་པར་སྨན་བླའི་ཐུགས་ཀ་རུ། །གཟུངས་རིང་ནང་དུ་གཟུངས་ཐུང་བསྒོམ། །དེ་ནས་གཟུངས་ཉིད་བཟླས་པའི་ཚེ། །བདག་གི་རམ་བུའི་ཚུལ་དུ་ནི། །ལྷ་ཚོགས་ཀུན་གྱིས་གཟུངས་བཟླས་པ། །བདེ་གཤེགས་བརྒྱད་ཀྱི་
ཐུགས་རྒྱུད་བསྐུལ། །སྔགས་ཕྲེང་གཡས་སུ་ཀྱི་ལི་ལི། །དེ་ལས་འོད་ཟེར་སྣ་ཚོགས་བྱུང་། །མཛོད་སྤུའི་སྒོ་ནས་ཕྱིར་ཐོན་པ། །མུན་པར་ཉི་མ་ཤར་བ་བཞིན། །འཇིག་རྟེན་ཐམས་ཅད་འོད་ཀྱིས་གང་། །བདག་དང་སེམས་ཅན་ཐམས་ཅད་ཀྱི། །ལས་དང་ཉོན་མོངས་སྒྲིབ་པ་ཀུན། །བ་མོར་ཉི་ཟེར་ཕོག་པ་བཞིན། །གཟུངས་ནི་གསལ་ལ་དག་པར་བཟླ། །རབ་ལ་བརྒྱ་དང་བརྒྱད་ཡིན་ཏེ། །འབྲིང་ནི་ཉི་ཤུ་རྩ་གཅིག་གསུངས། །ཐ་མ་བདུན་ལས་ཉུང་ཐབས་མེད། །གལ་ཏེ་ལོང་སྐབས་མ་བྱུང་ན། །གཟུངས་རིང་གསུམ་པོའམ་གཅིག་གི་མཇུག །གཟུངས་ཐུང་ཅི་ནུས་བཟླས་པས་འཐུས། །གཟུངས་རིང་བརྒྱད་ཁའི་ཐུན་མོང་ཡིན། །གཟུངས་ཐུང་སྨན་ལྷ་ཁོ་ནའོ། །དེ་ནས་ཏིང་འཛིན་སྒོམ་པ་ནི། །གཟུངས་སམ་སྔགས་ནི་ཡིད་ཀྱིས་བཟླ། །བརྒྱད་ཁའམ་ནི་སྨན་བླ་ཡི། །ཐུགས་ཀའི་ས་བོན་ཟླ་བ་སྔགས། །དབུགས་ནི་ཕར་ལ་འགྲོ་བའི་དུས། །དེ་ལ་རིག་པ་རྩེ་གཅིག་གཏད། །དབུགས་ནི་ཚུར་ལ་རྔུབ་པའི་དུས། །ཟླ་བ་སྔགས་ཕྲེང་ས་བོན་བཅས། །ཚུར་བྱོན་རང་གི་ཁོག་ཏུ་ཞུགས། །དབུགས་ནི་ཁོག་ཏུ་བཟུང་བའི་ཕྱིར། །སྙིང་དཀྱིལ་ཟླ་བ་ས་བོན་དང་། །སྔགས་
ཕྲེང་བཅས་ལ་དམིགས་པ་གཏད། །ཡང་ན་དབུགས་གཅིག་ཕར་བཏང་དུས། །མདུན་གྱི་ཐུགས་ཀར་སྔར་བཞིན་དུ། །ཟླ་བ་ས་བོན་སྔར་བཞིན་བསྒོམ། །དེ་ནས་སྔར་བཞིན་བྱ་བ་སྟེ། །དེ་འདྲ་ཡུན་རིང་བསྒོམས་ན་ནི། །ཞི་ལྷག་ཏིང་འཛིན་སྐྱེ་བ་དང་། །སྒྲིབ་པ་དག་པའི་རྟགས་རྣམས་འབྱུང་། །གཟུངས་སྒྲུབ་ཏིང་འཛིན་གྱི་ལེའུ་སྟེ་ལྔ་པའོ།། ༈ །།དེ་ནས་སྔར་ལྟར་ལུས་གྲངས་མེད། །སྤྲུལ་པའི་ཕྱག་ནི་འཚལ་བར་བསྒོམ། །རབ་ནི་ཚིག་རིས་དང་བསྒྲག་ནས། །འཚོགས་པ་བཞེངས་ནས་ཕྱག་འཚལ་སྲོལ། །མ་འཛོམས་ཐལ་མོ་སྦྱར་བྱས་ནས། །མགོ་བོས་འདུད་པ་རེ་བྱ་ཞིང་། །ཐ་མ་ངག་གིས་ཕྱག་འཚལ་ཞིང་། །ཡིད་ཀྱིས་ཕྱག་འཚལ་བསྒོམས་པས་འཐུས། །དེ་ནས་འཕགས་པའི་ཚོགས་ཞེས་པའི། །མཆོད་པ་དེ་ནི་རྗེས་ཆོག་ཡིན། །དེ་ནས་བསྔོ་སྦྱང་དེ་ཡི་སྐབས། །བདག་ཅག་གི་ནི་ཟེར་བའི་བར། །ཚེ་འདས་ཡིན་ན་མིང་བཙུད་དོ། །ཞིང་ཁམས་དེ་དག་ཅེས་པའི་བར། །ཞིང་ཁམས་བདེ་བ་ཅན་ཞེས་སྦྱར། །དེ་རྣམས་རང་གི་འདོད་པ་ཡིན། །བཟོད་གསོལ་གཞུང་ལྟར་གོ་བ་སླ། །སྐུ་གཟུགས་དཀྱིལ་འཁོར་མེད་པའི་
སར། །གཤེགས་གསོལ་གཞུང་ལྟར་བྱ་ཡོད་ཀྱི། །སྐུ་གཟུགས་དཀྱིལ་འཁོར་ཡོད་ན་ནི། །སོ་སོའི་སྐུ་གཟུགས་འདི་རྣམས་ལ། །འབྱུང་བ་བཞི་ཡིས་གནོད་པས་མ་ཞིག་བར། །བརྟན་པར་བཞུགས་སུ་གསོལ་ཞེས་བརྗོད། །ཞག་མང་ངམ་ནི་ཚར་མང་དུས། །གཤེགས་གསོལ་བྱ་བ་མ་ཡིན་ཏེ། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིས་བར། །དེ་སྲིད་བཅོམ་ལྡན་བཞུགས་སུ་གསོལ། །ཞེས་བརྗོད་སྨན་བླའི་ཆོ་ག་འདི། །དྲིལ་བུ་སྦུབས་ཆོལ་སྲོལ་མེད་དོ། །རབ་ལ་རྔ་དང་ཟི་ཆལ་དང་། །དུང་སོགས་མཆོད་རོལ་བྱེད་སྲོལ་ཡོད། །འབྲིང་ལ་ཏིང་ཤག་འཁར་རྔ་སྟེ། །ཐ་མ་མེད་ཀྱང་ཆོག་པ་ཡིན། །རང་གི་སྙིང་གར་བསྒོམས་པ་ཡི། །སྔགས་ཕྲེང་མི་དམིགས་ངོ་བོ་ལ། །གཤེགས་གསོལ་བྱེད་ན་ལྷ་ཚོགས་རྣམས། །རང་རང་གནས་སུ་གཤེགས་པར་བསྒོམ། །བརྟན་བཞུགས་བྱས་ན་ལྷ་ཚོགས་རྣམས། །འོད་ཞུ་རྟེན་ལ་ཐིམ་པར་བསྒོམ། །གཞལ་ཡས་གདན་ཁྲི་བཅས་པ་དེ། །གནས་དང་ས་དེར་ཐིམ་བསྒོམས་པས། །ས་གཞི་བྱིན་རླབས་མཆོག་ཏུ་འགྱུར། །འགྲོ་འདུག་ལ་སོགས་སྐབས་ཡིན་ན། །འོད་དུ་
ཞུ་ནས་རང་ལ་བསྟིམ། །རྗེས་ཀྱི་ལེའུ་སྟེ་དྲུག་པའོ།། ༈ །།འདི་ཡི་སྒྲུབ་པ་བྱེད་ན་ནི། །ཚོགས་རྫས་མིན་པའི་ཤ་ཆང་སྤང་། །ཆབ་ལེན་གཙང་སྦྲ་དག་ལ་འབད། །གལ་ཏེ་ཁྱིམ་པ་ཡིན་ན་ནི། །བསྙེན་གནས་ཡན་ལག་བརྒྱད་པ་བསྲུང་། །ཟླ་དྲུག་ཟླ་གསུམ་ཟླ་གཅིག་དང་། །ཞག་བདུན་ཡན་ཆད་གང་འགྲུབ་སྟེ། །གྲངས་ནི་གཟུངས་རིང་འབུམ་ཕྲག་བཞི། །གསུམ་མམ་ཡང་ན་གཅིག་བྱའོ། །ཡང་ན་གཟུངས་ཐུང་འབུམ་ཕྲག་བཞི། །རྟགས་ནི་སྒྲིབ་པ་དག་རྟགས་འབྱུང་། །ཕན་ཡོན་བྲི་བར་མི་ལོང་སྟེ། །སྨན་མདོ་གཉིས་ལ་གཟིགས་དང་གསལ། །བདེ་ཆེན་ཞིང་དུ་སྐྱེ་འདོད་པས། །སྨན་བླ་འདི་ལ་འབྲེལ་བཞག་ན། །བར་དོའི་སྐབས་སུ་སེམས་དཔའ་བརྒྱད། །བྱོན་ནས་ལམ་སྟོན་མཛད་པར་གསུངས། །ཚེ་འདིར་འདུལ་ཁྲིམས་སྡོམ་པ་ལ། །ཉེས་ལྟུང་གང་བྱུང་དག་པ་དང་། །ནད་རྣམས་ཐམས་ཅད་ཞི་བ་དང་། །གདོན་དང་དགྲ་དང་བྱད་ཁ་སོགས། །འཇིགས་པ་ཐམས་ཅད་སྐྱོབས་པར་བཤད། །ཞལ་ཆེམས་ཀྱི་ལེའུ་སྟེ་བདུན་པའོ།། ༈ །།གྲྭ་པ་སྨན་སྒྲུབ་ཐུགས་དམ་མཁན། །འགའ་རེ་ཡོད་པས་ཕན་སྙམ་ནས། །རཱ་ག་ཨ་
སྱས་ཐུན་མཚམས་གཅིག །སྨྲས་པ་མཐར་ཕྱིན་ཞེས་བྱས་བྲིས། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།