ས་ཆོག་མདོར་བསྡུས།
ས་ཆོག་མདོར་བསྡུས་བྱ་ཚུལ་གསལ་བ་བཞུགས་སོ།
ན་མོ་མཉྫུ་ཤྲཱི་ཡེ། སྤུར་རམ་ལྷ་ཁང་མཆོད་རྟེན་གསས་མཁར་སོགས། །ས་ཆོག་དགོས་པ་ལྟོ་འཕྱེ་ལེགས་པར་བརྩིས། །གདོང་མི་གཏུག་ལ་ས་ལྷའི་གཏོར་མ་གཅིག །འགྲུབ་ན་རྣམ་ལྔ་མ་གྲུབ་ཡིད་ཀྱིས་སྤྲུལ། །སློབ་དཔོན་སྐད་ཅིག་གསང་བའི་བདག་པོ་དང་། །པད་འབྱུང་ལ་སོགས་ཡི་དམ་གང་རུང་བ། །སྐད་ཅིག་བསྒོམས་ལ་ལག་གཡས་རྡོ་རྗེ་གཡས། །ས་ལ་ལན་གསུམ་འདེབས་ཚུལ་འདོན་སྒོམ་སྦྲགས། ཧཱུྃ། རང་ཉིད་ཡི་དམ་རྗེ་ཡི། །ཕྱག་གཡས་ས་ལ་བརྡབ་པ་ཡིས། །ས་གས་རྣམ་པ་དྲུག་ཏུ་གཡོས། །དེ་ནང་ས་ལྷ་གསེར་གྱི་མདོག །ཐར་སྦྱར་བུམ་བསྣམས་སྐུ་སྟོད་ཐོན། །དགྱེས་པའི་འཛུམ་མདངས་ཕྱུང་བར་གྱུར། །ཨོཾ།
ཚུར་སྤྱོན་ཚུར་སྤྱོན་ས་ཡི་ལྷ། །ལྷ་མོ་བརྟན་མ་ད་ཚུར་བྱོན། །སྔོན་བྱོན་ཐུབ་པའི་དབང་པོ་ཡི། །སྤྱན་སྔར་ཅི་བགྱིས་དམ་བཅས་ལྟར། །ས་གླུད་གཏོར་མ་གསེར་སྐྱེམས་འབུལ། །མཆོད་པ་རྣམ་པ་བདུན་གྱིས་མཆོད། །ཨོཾ་པྲ་བྷཾ་དེ་བཱི་ས་པ་རི་བཱ་ར་ཨརྒྱུ་ནས། ཤརྡ་པྲ་ཏིཙྪ་པཱུ་ཛ་ཧོ༔ ཨོ། སྔོན་བྱུང་བཅོམ་ལྡན་དབང་མཛད་ལྟར། །ས་འདི་བདག་ཞུ་གནས་འདི་དོར། །བཅོམ་ལྡན་འདས་ཀྱི་ཞབས་བརྟེན་པ། །ས་ཡི་ལྷ་མོར་ཕྱག་འཚལ་ལོ། །ཞེས་བསྟོད་ནས། ས་ཡི་ལྷ་མོ་འཛུམ་ཕྱུངས་ནས། །ས་འདི་ཁྱོད་འབུལ་ཅི་བདེར་སྤྱོད། །ཅེས་གསུངས་
ལྷ་མོ་ས་དེར་ཐིམ། །ས་ཡང་གསེར་གྱི་ཕུང་པོར་གྱུར། །ཧཱུཾ་ལས་རིན་ཆེན་སྣོད་ཡངས་པར། །དཀར་གསུམ་གཏོར་མ་བདུད་རྩིའི་མཚོ། །ས་གླུད་བཟང་པོ་བཅས་པ་འདི། །ཨོཾ་ཨཱཿཧཱུྃ་གིས་བྱིན་བརླབས་ནས། །ས་ཡི་ལྷ་མོ་བརྟན་མ་དང་། །ལྟོ་འཕྱེ་ས་འཛིན་ལག་པ་ཆེ། །ཐེ་སེ་སྤྲེལ་ཁོག་ས་སྨན་དང་། །ས་ལ་དབང་བའི་ལྷ་ཀུན་དང་། །ལོ་སྐོར་བཅུ་གཉིས་སྟེང་གནས་པའི། །ས་བདག་གདུག་པའི་རིགས་ཅན་རྣམས། །ཁྱད་པར་ཡུལ་ཕྱོགས་འདི་ཡི་བདག །བྲག་བདག་ཆུ་བདག་རྡོ་ཡི་བདག །ཤིང་བདག་རི་བདག་ཀུན་ལ་འབུལ། །ཁྱད་པར་ས་སྐོར་ས་མིག་འདིར། །གཉུག་མར་གནས་པ་ཀུན་ལ་འབུལ། །མཆོད་སྦྱིན་གཏོར་མ་འདི་བཞེས་ལ། །ས་འདི་གནང་བར་མཛད་དུ་གསོལ། །ཨོཾ་པྲ་ཤྲཱི་དེ་ཝཱི་སརྦ་བྷུ་མི་པ་ཏི་ས་པ་རི་ཝཱ་ར་ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་འབུལ། ས་གླུད་ས་སྲིན་བཀྲོལ་བ་ནི། འབྱུང་པོ་ས་འདྲེ་ས་སྲིན་དང་། །ས་ལ་བགེགས་བྱེད་བར་ཆད་རྣམས། །ས་གླུད་བཟང་པོ་འདི་བཞེས་ལ། །འབྱུང་པོའི་ཚོགས་རྣམས་གནས་བཟུར་ལ། །ས་བདག་རྣམས་ཀྱིས་ས་འདི་འདུལ། །བཀྲ་ཤིས་བྱིན་ལྡན་
མཛད་དུ་གསོལ། །སརྦ་ཨུཙྪིཥྛ་བྷ་ལི་ཏ་གྷཾཏྟ་ཁཱ་ཧི་ཁཱ་ཧི་སྭཱ་ཧཱ། དེ་ནས་སློབ་དཔོན་ལངས་ཏེ་ཕུར་པ་འདྲིལ་ལ། སྐད་ཅིག་གིས་དབང་ཆེན་རྟ་མགྲིན་སྐུ་སྨད་ཕུར་པ་མགལ་གྱི་སོལ་མལ་ལས་བླང་བ་ལྟར་དུ་དམར་ཟང་ངེ་བ་ཕྱག་གི་ཕུར་པ་འདྲིལ་བས་ས་འདྲེ་ས་སྲིན་ཐམས་ཅད་དམྱལ་ཁམས་རྡོ་རྗེ་གདན་ལ་གཟིར་བར་བསམས་ལ་ངག་ཏུ། ཧཱུྃ་ཧཱུྃ་ཧ་ཧ་ཝེ་ཕོ། ལན་བདུན་ཙམ་དུ་ཕྱོགས་བཅུར་གདང་མིག་ཏུ་བལྟ་ཞིང་ཕུར་པ་འདྲིལ། འཆམས་སྟབས་བྱ་ཞིང་། ས་འདུལ་དྲག་སྔགས་ནི། ཨོཾ་གྷ་གྷ་གྷ་ཏ་ཡ་སརྦ་དུཏྟཾ་ཨཛཱ་པ་ཡ་ཏི་ཀཱ་ཡ་ཝཱཀ་ཙིཏྟ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཕཊ་ཕཊ་ས་འདྲེ་ས་སྲིན་ཨུཙཊྚ་ཡ་ཕཊ། དེས་ས་འདུལ་བའོ། །ས་སྦྱོང་བ་ནི། ཨོཾ་སྭ་བྷ་ཝ་ལན་བདུན་གྱིས་སྦྱང་། ས་ཉིད་གསེར་གྱི་ཕུང་པོར་གྱུར། །དེ་ནས་མེ་ཏོག་ཚོམ་བུ་ལྔ་བཀོད་ལ་སྔགས་འདི།བཏབ། ཨོཾ་བུདྡྷ་བཛྲ་རཏྣ་པདྨ་ཀརྨ་སརྦ་ཧཱུཾ། ལན་གསུམ། སྟོང་པའི་ངང་ལས་གཞལ་ཡས་ཁང་གྲུ་བཞི། །སྒོ་བཞི་རྟ་བབས་བཞི་ལྡན་མཚན་ཉིད་རྫོགས། །འཇའ་འོད་དྲ་བས་བྲེས་ཤིང་ཤིན་ཏུ་དྭངས། །སྐྱུག་བཀོད་ཡོན་ཏན་དང་མཉམ་དེ་དབུས་སུ། །སེང་ཁྲིར་རྣམ་སྣང་དཀར་པོ་འཁོར་ལོ་འཛིན། །ཤར་དུ་གླང་ཁྲིར་མི་བསྐྱོད་རྡོ་རྗེ་བསྣམས། །ལྷོ་རུ་
རྟ་ཁྲིར་རིན་འབྱུང་རིན་ཆེན་བསྣམས། །ནུབ་ཏུ་རྨ་བྱར་སྣང་མཐའ་པདྨ་བསྣམས། །བྱང་དུ་ཤང་ཤང་དོན་གྲུབ་རྒྱ་གྲམ་བསྣམས། །གཡོན་རྣམས་དྲིལ་བུ་རིགས་ཀྱི་སེམས་དཔས་བསྐོར་། །གནས་གསུམ་འོད་འཕྲོས་རང་འདྲ་སྤྱན་དྲངས་བསྟིམ། །ཧཱུྃ། སྟུག་པོ་བཀོད་དང་མངོན་དགའ་དཔལ་ལྡན་མཛེས། །བདེ་བ་ཅན་དང་ལས་རབ་ཞིང་ཁམས་ནས། །རིགས་ལྔའི་སངས་རྒྱས་བྱང་སེམས་བཅས་པ་རྣམས། །འདིར་བྱོན་ཚེ་འདས་ལས་སྒྲིབ་སྦྱང་དུ་གསོལ། །སྐུ་གདུང་གསས་མཁར་འདི་ལ་རྒྱས་པར་མཛོད། །སོགས་སྦྱར་རོ། །ལུས་ངག་ཡིད་གསུམ་དད་པས་ཕྱག་འཚལ་ལོ། །ཚེ་འདས༴ ཡོན་བདག༴ །གནས་མར་བདེ་ཕྱིར་བཞུགས་སུ་གསོལ། །གཞན་ཡང་མཆོད་བསྟོད་དཔག་མེད་ཡིད་སྤྲུལ་མཆོད་། །ཨོཾ་བུདྡྷ་བཛྲ་རཏྣ་པདྨ་ཀརྨ་བོ་དྷི་སཏྭ་ས་པ་རི་བཱ་ར་ཨརྒྱུ་ནས། ཤབྡའི་བར་གྱི་སྔགས་དང་ཕྱག་རྒྱ་འགྲེས། མཎྜལ་པཉྩཀཱི་ལ་ག་ཎ་ཙཀྲ་རཏྣ་སརྦ་པཱུ་ཛ་ཧོ༔ རྡོ་རྗེ་གཏི་མུག་དྭངས་ལ་འདུད། །རྡོ་རྗེ་ཞེ་སྡང་དྭངས་ལ་འདུད། །རྡོ་རྗེ་ང་རྒྱལ་བཅོམ་ལ་འདུད། །རྡོ་རྗེ་འདོད་ཆགས་འཇོམས་ལ་འདུད། །རྡོ་རྗེ་ཕྲག་དོག་ཞི་ལ་འདུད། །ཕྱོགས་བཅུའི་
སངས་རྒྱས་ཐམས་ཅད་དང་། །བླ་མ་ཡི་དམ་མཁའ་འགྲོ་བཅས་ལ་འདུད། །དྲང་སྲོང་རིག་འཛིན་གྲུབ་པའི་བདེན་པ་ཡིས། །རིགས་ལྔའི་སངས་རྒྱས་བྱང་སེམས་བཅས་པ་རྣམས། །གནས་འདིར་བརྟན་བཞུགས་སྡིག་སྒྲིབ་སྦྱང་བར་མཛོད། །བར་ཆད་ཐམས་ཅད་སེལ་བར་མཛད་དུ་གསོལ། །ཨོཾ་བུདྡྷཱ་བེ་རོ་ཙ་ན་ཨོྃ། ཡེ་དྷརྨཱ་དང་བཅས་ལན་བདུན་བརྗོད། ཨོཾ་བཛྲ་ཨཀྟ་བྷཧཱུྃ། ཡེ་དྷརྨ་བདུན། ཨོཾ་རཏྣ་སཾ་བྷ་བ་ཏྭཾ། ཡེ་དྷརྨ་བདུན། ཨོཾ་པདྨ་དྷེ་བ་དྷཱི། ཡེ་དྷརྨ་བདུན། ཨོཾ་ཀརྨ་ཨ་མོ་གྷ་སིདྡྷི་ཨཱཿ ཡེ་དྷརྨ་བདུན་སོགས་གོང་ལྟར་བདུན་བརྗོད་ལ་རབ་ཏུ་གནས་པར་བྱའོ། །དམར་དུར་སོགས་ཀུན་ལ་མཁོ་ཆེ་བ་ཚེ་འདས་བླ་དང་རྣམ་སྣང་གཉིས་དབྱེར་མེད་བསྐྱེད་པས་ཕན་ཡོན་ཆེའོ། །གཞན་ཚོམ་བུ་རང་ལ་བསྐྱེད་དོ། །དེ་ལྟར་ས་བྱིན་རླབས་སོང་ནས་དཀར་ལས་གསས་མཁར་ཁང་བཟོ་སོགས་འདི་འདྲ་མ་གཏོགས་གཞན་མི་དགོས། དེ་རྗེས་དཀར་གཏོར་ཡུལ་ལྷ་དེ་ལ་བྱིན་ནས་ལས་འདི་ཞེས་བྱ་བ་ལ། རུ་ང་དང་ཕྲག་དོག་མ་མཛད། །ཅེས་བཀའ་བསྒོའོ། །དེ་ནས་བཀྲ་ཤིས་ཚིག་བརྗོད་ནས་ས་མིག་དེར་རིགས་ལྔའི་ཕྱག་མཚན་བཀོད་ལ། ཧཱུྃ། དབུས་ནས་བཀྲ་ཤིས་དོན་གྱི་ལྷ། །རྣམ་པར་སྣང་མཛད་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་
འདིར་བདེ་ལེགས་ཤོག །ཤར་ནས་བཀྲ་ཤིས་དོན་གྱི་ལྷ། །རྡོ་རྗེ་སེམས་དཔའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ལྷོ་ནས་བཀྲ་ཤིས་དོན་གྱི་ལྷ། །རིན་ཆེན་འབྱུང་ལྡན་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ནུབ་ནས་བཀྲ་ཤིས་དོན་གྱི་ལྷ། །སྣང་བ་མཐའ་ཡས་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བྱང་ནས་བཀྲ་ཤིས་དོན་གྱི་ལྷ། །དོན་ཡོད་གྲུབ་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གཞན་ཡང་བཀྲ་ཤིས་ཚིགས་བཅད་གང་ཤེས་བརྗོད། །ཚེ་འདས་དོན་ལ་ཚེ་འདས་སྤྱན་རས་གཟིགས་དང་། དུར་ས་བདེ་བ་ཅན་དུ་བསྐྱེད་ལ་ཡེ་ཤེས་པ་བསྐྱེད་བསྟིམ་བྱ། ཡིག་དྲུག་བརྒྱའམ་སྟོང་བཟླས་ནས་རབ་ཏུ་གནས་པར་བྱས་བཀྲ་ཤིས་སྨོན་ལམ་མདོར་བསྡུས་བཏབ་པས་ཕན་ཡོན་ཆེན་པོ་དཔག་ཏུ་མེད་པ་ཡོད་པ་དང་། དུར་གྱི་འདྲེ་ལྟོགས་དྲི་ཟའི་གནོད་པ་མི་བྱེད་པར་འགྲོ་གསུངས། གཅོད་ལས་ཐོས་སོ། །ཨེ་མ། རྒྱ་ནག་ནས་འགྱུར་ས་ཕབ་ས་མིག་བཙལ། །རྒྱ་གར་ནས་འགྱུར་ས་ཕབ་རྒྱ་གྲམ་བཅའ། །མེ་ཉག་ནས་འོངས་ས་མདའ་ས་མིག་བཙུགས། །ནག་རྩིས་སོགས་ལས་མ་བྱུང་ཡོད་པ་ཀུན། །ཉེས་པ་ཆེ་བས་ས་མཁན་དམྱལ་བར་སྐྱེ། །
དེ་ཕྱིར་ཀྲི་ཡ་དང་ནི་དགོངས་འདུས་ལས། །ས་འདུལ་ས་སློང་བྱིན་རླབས་དང་། །ས་གཞི་རབ་གནས་ཉུང་ཙམ་མདོར་བསྡུས་བྲིས། །ཡི་གེ་དོན་ཚིག་འདོན་ཆ་ཚང་བར་ཡོད། །ཕྱི་རབས་བླུན་རྨོངས་འགའ་ལ་ཕན་པའི་ཕྱིར། །སྔགས་རྒན་རྭག་ཨ་སྱས་འཕྲལ་དུ་བྲིས། །སྔགས་ཆུང་ཨོ་རྒྱན་མགོན་གྱིས་ཡི་གེར་བཏབ། །ཉེས་འགལ་ས་སྙིང་ལ་བཤགས་དགེ་བ་དེས། །འགྲོ་ཀུན་ས་འཁྲུགས་ཉེས་པ་ཞི་གྱུར་ཅིག ༈ །ལྟོ་འཕྱེ་ཁ་གྲུ་ཕྱོགས། དཔྱིད་གསུམ་བྱུང་། དབྱར་གསུམ་ཤར། སྟོན་གསུམ་ལྷོ། དགུན་གསུམ་ནུབ་ལ་གྲུ་ནས་ས་བརྐོ་མཁན་རང་ཡང་དེ་ལྟར་ཁ་གྲུ་ནས་ས་མིག་ཏུ་འབྱོར་བུ་ལན་གསུམ་བརྡེག་གོ །ཚེས་བཅུ་གཉིས་ནམ་ཡང་བརྐོ་མི་རུང་བས་ཕྱིར་ནངས་བརྐོ་ཆོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།