མཆོད་རྟེན་དབྱེ་བ།
མཆོད་རྟེན་དབྱེ་བ་བཞུགས་སོ།། ན་མོ་ལོ་ཀེ་ཤྭ་ར་ཡེ། འཇིག་རྟེན་མགོན་པོ་ལ་ཕྱག་འཚལ་ལོ། །ཆོས་སྐུའི་རྟེན་གྱི་རྣམ་དབྱེ་བརྗོད། །ལྷུང་བཟེད་ཁ་སྦུབ་ལྟ་བུ་དང་། །ཁོང་བུ་རྒྱལ་མཚན་ལྟར་གྲགས་གསུམ། །པད་ཟླའི་སྟེང་དུ་ལྷུང་བཟེད་སྦུབ། །ཆོས་སྐུ་མཚན་མ་བྲལ་བའི་མཚོན། །འབིམ་པའམ་ནི་འབུམ་པ་ཟེར། །གྲུ་བཞི་གཅིག་གམ་གཉིས་བརྩེགས་པ། །ཆོས་སྐུ་ཡོན་ཏན་ཐམས་ཅད་རྫོགས། །མཉམ་པ་ཉིད་མཚོན་ཁང་བུ་ཟེར། །རྒྱལ་མཚན་ལྟར་གྲགས་མཆོད་རྟེན་ལ། །བདེ་གཤེགས་མཆོད་རྟེན་རིགས་བརྒྱད་ཡོད། །ཐམས་ཅད་གདན་ཁྲི་ངེས་པ་མེད། །གྲུ་བཞི་ཟླུམ་པོར་པད་ཟླ་དང་། །ཟླ་གམ་ལ་སོགས་ཅི་མཛེས་ཏེ། །རྨང་འདི་དགེ་བ་བཅུ་ཡིན་ནོ། །མགུལ་ཆུ་ཟླ་དཀྱིལ་ཡན་རྣམས་མཐུན། །འོན་ཀྱང་སྒོ་མང་འབུམ་པ་ལ། །ཕྱོགས་བཞི་སྒོ་འབུར་རེ་རེ་འབྱུང་། །བར་གྱི་བང་རིམ་ཐོག་མ་ལ། །ཟླུམ་པོ་པདྨའི་འདབ་མ་ཅན། །བཞིའམ་བདུན་རེ་ཕྱོགས་བཞིར་བརྩེགས། །སེར་སྐྱ་སྐུ་བལྟམས་གོམ་བདུན་བོར། །པདྨ་པདྨ་སྐྱེས་དུས་བཞེངས། །པདྨ་ཅན་ཞེས་བྱ་བ་ཡིན། །བང་རིམ་བཞི་པོ་གྲུ་བཞི་པ། །རྡོ་རྗེ་གདན་དུ་བྱང་ཆུབ་
དུས། །བྱུང་བ་བྱང་ཆུབ་མཆོད་རྟེན་ཟེར། །ཕྱོགས་བཞི་བང་རིམ་ཕྱོགས་བཞི་ལ། །སྒོ་ནི་བཞིའམ་བརྒྱད་བཅུ་གཉིས། །བཅུ་དྲུག་བདེན་བཞི་རྣམ་ཐར་བརྒྱད། །རྟེན་འབྲེལ་སྟོང་ཉིད་བཅུ་དྲུག་མཚོན། །ཝཱ་ར་ཎཱ་སཱིར་ཆོས་གསུངས་ཆེ། །བྱུང་བ་ཆོས་འཁོར་མཆོད་རྟེན་ནམ། །བཀྲ་ཤིས་སྒོ་མང་ཆོས་སྒོ་མཚོན། །ཡེ་ཤེས་མཆོད་རྟེན་ཞེས་ཀྱང་ཟེར། །བང་རིམ་བཞི་ལྡན་ཕྱོགས་བཞི་ན། །འབུར་བཞི་ཡོད་པ་མཉན་ཡོད་ན། །མུ་སྟེགས་རྫུ་འཕྲུལ་འདྲེན་དུས་བྱུང་། །མུ་སྟེགས་ཕམ་བྱེད་མཆོད་རྟེན་ནི། །ཆོ་འཕྲུལ་ཆེར་བསྟན་མཆོད་རྟེན་ཟེར། །བང་རིམ་ཕྱོགས་བཞིར་སྐས་གདོང་བཞི། །སེམས་ཅན་དོན་ལ་འབྱོན་པ་མཚོན། །ཟླ་གསུམ་ལྷ་ལ་ཆོས་བསྟན་ནས། །ཚངས་དང་བརྒྱ་བྱིན་ལ་སོགས་ཀྱིས། །གསེར་དངུལ་བེཟླུར་སྐས་བཙུགས་སར། །གྲོང་ཁྱེར་གསལ་ལྡན་བབས་དུས་བརྩེགས། །ལྷ་ལས་བབ་པའི་མཆོད་རྟེན་ནམ། །སུམ་ཅུས་ལྷས་མཆོད་མཆོད་རྟེན་ཟེར། །བང་རིམ་ཟུར་བཅད་བརྒྱད་བཞོག་འདྲ། །ཟུར་བརྒྱད་ལོགས་བརྒྱད་བང་རིམ་བཞི། །རྣམ་འཕྲུལ་དུ་མས་འགྲོ་དོན་མཚོན། །རྒྱལ་པོས་ཁབ་ཏུ་བྱུང་བ་སྟེ། །དགེ་འདུན་དབྱེན་ཟླུམ་མཆོད་རྟེན་
ནམ། །བྱམས་དངོས་མཆོད་རྟེན་ཞེས་སུ་གྲགས། །བང་རིམ་གསུམ་པོ་ཟླུམ་པོ་ནི། །རྣམ་པར་ཐར་པའི་སྒོ་གསུམ་མཚོན། །ཡངས་པ་ཅན་གྱི་གྲོང་ཁྱེར་དུ། །ལ་སྐུ་ཚེ་འདུ་བྱེད་བྱིན་རླབས་དུས། །བྱུང་བ་རྣམ་རྒྱལ་མཆོད་རྟེན་ནམ། །སྐུ་ཚེ་བྱིན་རླབས་མཆོད་རྟེན་ཟེར། །གདན་ཁྲི་ངེས་མེད་གང་རུང་སྟེང་། །བུམ་ལྡན་མགུལ་ཆུ་ཡན་ཆད་བཞུགས། །བྲེ་ལ་ཕྱོགས་བཞིར་འབུར་ཡོད་དང་། །ཁྲེ་དང་བྲེ་སྐེ་ཟླུམ་པོའང་མཐོང་། །སྤྲོས་པ་ཐམས་ཅད་ཉེར་ཞི་མཚོན། །རྩྭ་མཆོག་དྲུང་དུ་འདས་དུས་བྱུང་། །པུ་རིའི་རྒྱུ་འདས་མཆོད་རྟེན་ཟེར། །དེ་ལྟར་མཆོད་རྟེན་དེ་རྣམས་ཀྱི། །མཚོན་བྱ་རྣམ་པར་དག་ཚུལ་ནི། །རྨང་ནི་དགེ་བཅུའི་བང་རིམ་ནི། །དང་པོ་དྲན་པ་ཉེར་གཞག་བཞི། །གཉིས་པ་ཡང་དག་སྤོང་བ་བཞི། །གསུམ་པ་རྫུ་འཕྲུལ་རྐང་པ་བཞི། །བང་རིམ་བཞི་པ་དབང་པོ་ལྔ། །བུམ་གདན་མགུལ་ཆུ་སྟོབས་ལྔ་སྟེ། །བུམ་པ་བྱང་ཆུབ་ཡན་ལག་བདུན། །པུ་ཤུ་ཞེས་བྱ་བྲེ་ཡིན་ཏེ། །འཕགས་ལམ་ཡན་ལག་བརྒྱད་མཚོན་ནོ། །སྲོག་ཤིང་ཤེས་པ་བཅུ་ཡིན་ཏེ། །འཁོར་ལོ་བརྩེགས་མ་བཅུ་གསུམ་ནི། །བཅུ་ནི་སྟོབས་བཅུ་ལྷག་མ་གསུམ། །
དྲན་པ་ཉེར་གཞག་གསུམ་མཚོན་ནོ། །ཆར་ཁེབས་གདུགས་ཏེ་ཐུགས་རྗེ་ཆེ། །ཏོག་ནི་མཉམ་མེད་ཆོས་སྐུའོ། །འཁོར་ལོ་ཆོས་འཁོར་གདུགས་དོན་གཅིག །རྫོགས་སངས་རྒྱས་ལ་བཅུ་གསུམ་མོ། །བསེ་རུ་ལྟ་བུ་ཆར་ཁེབས་མེད། །རང་རྒྱལ་བདུན་ལ་དགྲ་བཅོམ་ལྔ། །ཕྱིར་འོང་ཕྱིར་མི་འོང་ལ་གསུམ། །རྒྱུན་ཏུ་ཞུགས་ལ་གཅིག་ཀྱང་སྟེ། །སོ་སྐྱེའི་མཆོད་རྟེན་ཆོས་འཁོར་མེད། །མཆོད་རྟེན་བྱི་བོ་ཞེས་བྱའོ། །འོན་ཀྱང་ཆོས་སྐུའི་རིང་བསྲེལ་ཞེས།། །གཟུངས་སྔགས་གཞུག་ན་སངས་རྒྱས་ཡིན། །མཆོད་རྟེན་ཡིན་ཕྱིར་བཅུ་གསུམ་རུང་། །སྟེང་གི་གདུགས་ཆེན་ཆར་ཁེབས་གཅིག།དེ་དག་མཆོད་རྟེན་དངོས་གཞི་ཡིན། །གཞན་ཡང་མཆོད་རྟེན་རྒྱན་རྣམས་ཀྱང་། །སངས་རྒྱས་ཡེ་ཤེས་རྣམ་དག་མཚོན། །རྡོ་རིང་མི་འཇིགས་པ་བཞིའོ། །ཐེམ་སྐས་བསྲུང་བ་མེད་པ་གསུམ། །ཆུ་སྲིན་གྱི་ནི་རྒྱལ་མཚན་བཞི། །བདུད་བཞི་དགྲ་ལས་རྒྱལ་བའོ། །མེ་ཏོག་ཕྲེང་བ་ཚུལ་ཁྲིམས་ཀྱི། །ཕུང་པོ་ལེགས་བསྒྲུབ་མཚན་དཔེའི་མཚོན། །འཇིག་རྟེན་སྐྱོང་བ་བདེན་པ་བཞི། །བཤད་པས་སྐྱེ་བོ་བཞི་ལ་ཕན། །དྲིལ་བུས་གསུང་དབྱངས་དྲུག་ཅུ་སྟོན། །ཟླ་ཚེས་བླ་མེད་ཡེ་ཤེས་
ཀྱི། །བྱང་ཆུབ་སེམས་ནི་སྣང་བར་བྱེད། །གདུགས་ཀྱིས་འགྲོ་ཀུན་སྐྱོབ་པར་འགྱུར། །ཏོག་ནི་ཆོས་སྐུའི་སྟེང་ན་གཡོགས། །ཏོག་ཆེན་པོ་ཏི་མངོན་ཤེས་དྲུག །མེ་ལོང་ཡེ་ཤེས་བཞི་ཡིན་ཏེ། །དར་གྱི་ཅོད་པན་བླ་མེད་ཀྱི། །ཡེ་ཤེས་བྱང་ཆུབ་ཅོད་པན་འཐོབ། །བ་དན་ཆོས་ཀྱི་སྙན་གྲགས་ཁྱབ། །དེ་ལྟར་མཆོད་རྟེན་རྒྱན་རྣམས་ཀྱང་། །སངས་རྒྱས་ཉིད་ཀྱི་རྣམ་འཕྲུལ་མཚོན། །མཚོན་པ་རྟགས་ཀྱི་མཆོད་རྟེན་ཡིན། །ངོ་བོ་རང་བཞིན་ཆོས་ཀྱི་སྐུ། །སྐྱེ་བ་མེད་པའི་ངང་ཉིད་ལས། །ཀུན་རྫོབ་གཟུགས་བརྙན་མཆོད་རྟེན་ཀྱང་། །དོན་དམ་ཆོས་སྐུའི་གདུང་ཉིད་ལས། །འགྱུར་བ་མེད་ཕྱིར་སྐུ་གདུང་ཟེར། །དེ་ནི་མཆོད་རྟེན་ངོ་བོ་ཡིན། །དེ་ཉིད་བཞེངས་དང་ཕྱག་མཆོད་དང་། །བསྐོར་བ་ལ་སོགས་མཐོང་ཐོས་རེག །ལས་དང་ཉོན་མོངས་ཀུན་བསྲེགས་ནས། །བསོད་ནམས་ཡེ་ཤེས་དཔལ་འབར་བའི། །ལྷ་མི་ཀུན་གྱི་མཆོད་པའི་རྟེན། །འདི་ནི་མཆོད་རྟེན་ངེས་ཚིག་ཡིན་། །དབྱེ་བ་མཆོད་རྟེན་རྣམ་གསུམ་བརྒྱད། །གོང་དུ་བཤད་པ་དེ་དག་གོ །རང་རིག་སྐྱེ་མེད་ཆོས་ཀྱི་སྐུ། །འཁོར་འདས་དབྱེར་མེད་ཡེ་སངས་རྒྱས། །།དམ་རྟོགས་དོན་གྱི་
མཆོད་རྟེན་ཏེ། །མཚོན་བྱའི་མཆོད་རྟེན་ཡིན་པར་བཤད། །མདོར་ན་བདེ་གཤེགས་མཆོད་རྟེན་ནི། །སྐུ་གསུམ་ཡོངས་སུ་རྫོགས་པ་སྟེ། །རི་རབ་ལྟ་བུ་གྲུ་བཞི་པ། །ལོངས་སྤྱོད་རྫོགས་པའི་རྟེན་ཡིན་ནོ། །དེ་སྟེང་ལྷུང་བཟེད་སྒྲུབ་འདྲ་བ། །ཆོས་ཀྱི་སྐུ་ཡི་རྟེན་ཡིན་ནོ། །དེ་སྟེང་རྒྱལ་མཚན་འདྲ་བ་ནི། །སྤྲུལ་པའི་སྐུ་ཡི་རྟེན་དུ་བཤད། །དཀྱིལ་འཁོར་ཆེན་པོའི་རྒྱུད་དང་ནི། །གསང་འདུས་ཡང་སྙིང་འདུས་པའི་རྒྱུད། །ཀླུ་སྒྲུབ་མཆོད་རྟེན་རྟོགས་པ་དང་། །པཎ་ཆེན་ཞི་བའི་སྙིང་པོ་ཡི། །མཆོད་རྟེན་ཆ་དབྱེ་ཞེས་བྱ་དང་། །ཨོ་རྒྱན་ཆེན་པོའི་གསུངས་པ་དང་། །མཆོད་རྟེན་མང་དུ་མཐོང་བ་དང་། །གཞན་ཡང་བོད་གཞུང་འགའ་བསྟུན་ནས། །རཱ་གའི་མིང་ཅན་བདག་གིས་བྲིས། །འགལ་འཁྲུལ་ཆོས་ཀྱི་སྐུ་ལ་བཤགས། །དགེ་བས་འགྲོ་ཀུན་སྒྲིབ་དག་ནས། །སྐྱེ་མེད་ཆོས་སྐུ་ཐོབ་པར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།