ནང་གཞུག་བཞག་པའི་ཞལ་ཤེས་མཐོང་བ་བརྒྱུད་པ།
ནང་གཞུག་བཞག་པའི་ཞལ་ཤེས་མཐོང་བ་བརྒྱུད་པ་ཡོད།
ན་མོ་གུ་རུ་མཉྫགྷོ་ཥ་ཡེ། བླ་མ་འཇམ་པའི་དབྱངས་ལ་ཕྱག་འཚལ་ནས། །ནང་གཞུག་བཞག་ལུགས་མཐོང་བ་བརྒྱུད་པ་བྲི། །སྐུ་གཟུགས་མཆོད་རྟེན་ཆེ་ཆུང་ཁྱད་པར་གྱིས། །ནང་གཞུག་བཞག་ལུགས་གཅིག་ཏུ་མ་ངེས་ཏེ། །དང་པོ་ས་ནས་སྲོག་ཤིང་རིང་པོ་བཙུགས། །དེ་ནས་འོག་ནས་ནང་རྟེན་རིམ་བཞིན་བཞག །ཕྱི་ནས་རིམ་བཞིན་བརྩེགས་ཤིང་ཡར་ལ་བཟོ། །དེ་ནི་སྐུ་གཟུགས་མཆོད་རྟེན་ཆེན་པོའི་ལུགས། །བླུགས་སྐུ་ལྡེར་སོ་མི་ཚད་ཚུན་ཆད་ལ། །དང་པོ་འདག་ཆལ་ཆུ་ཡིས་ཁྲུས་གསོལ་ཏེ། །བླུགས་སྐུ་ཡིན་ན་ནང་རྣམས་ལེགས་པར་བཀྲུ། །ལྡེར་སོ་
ཡིན་ན་མེ་ལོང་ངོས་ནས་བཀྲུ། །བཟོ་བོའི་མཆིལ་མ་དྲི་མ་བཀྲུ་ཚུལ་ཡིན། །དེ་དང་མཉམ་དུ་གུ་གུལ་གྱིས་ཀྱང་བདུག །སྤོས་སྣ་སྨན་སྣ་སྦྱར་བའི་འདེ་གུ་ཡིས། །ནང་རྣམས་ཐམས་ཅད་འཐུག་པོར་བྱུགས་སྲོལ་གདའ། །གནས་ཡིག་ལ་སོགས་གཟུངས་གཞུག་སྔགས་རྣམས་ཀུན། །ཡིག་འབྲུའི་རྐང་པ་ནོན་ཙམ་ཤར་གྱིས་བྱུག །ལེགས་པར་སྐམ་པའི་གནས་ཡིག་སོ་སོ་ནི། །སྐུ་འདྲའི་ནང་ནས་སྤྱན་ཤངས་སོ་སོའི་ཐད། །ཡིག་ངོ་ཕྱིར་བསྟན་སྦྲང་གིས་སྦྱར་སྲོལ་གདའ། །སྐུ་འདྲ་ཆུང་ནས་ལག་པ་མི་ཐར་ན། །གནས་ཡིག་ཐམས་ཅད་ཤོག་དྲིལ་བྱས་པ་དེ། །སྲོག་ཤིང་སྟོད་དུ་
དཀྲི་བའི་ཕྱག་སྲོལ་གདའ། །སྲོག་ཤིང་ཤུག་པ་རྩ་རྩེ་མ་ལོག་པ། །གྲུ་བཞི་ཐིག་ཤིང་འདྲ་བ་ཅུང་རྩེ་ཕྲ། །རྩེ་མོ་གྲུ་བཞིའི་དབྱིབས་སུ་སོ་བཏོན་པ། །གས་མེད་འཇམ་པར་སྤོས་ཀྱི་ལྡེ་གུས་བྱུགས། །རྩེ་ཡི་ཕྱོགས་བཞིར་ཨོཾ་བྷཾ་སྭཱ་ཧཱ་ནི། །ཕྱོགས་བཞིར་ཡིག་འབྲུ་རེ་རེ་བྲི་བའམ། །ཨོཾ་གྱི་ཐད་དུ་ཐུར་དུ་ཨོཾ་དང་ནི། །ཨཱཿཧཱུྃ་སྭཱ་ཧཱ་གནས་ལྔར་ཐུར་དུ་བྲི། །དེ་ལ་གཟུངས་གཞུག་ཐམས་ཅད་དཀྲི་བྱ་སྟེ། །རྩེ་རུ་བླ་མ་བརྒྱུད་པའི་མཚན་སྔགས་དང་། །དེ་འོག་གཉིས་མེད་རྒྱུད་དང་ཨ་ཏིའི་རྒྱུད། །དེ་འོག་ནང་རྒྱུད་ཨ་ནུ་ཡོ་གའི་རྒྱུད། །དེ་འོག་མ་རྒྱུད་མ་ཧཱ་ཡོ་གའི་རྒྱུད། །དེ་འོག་རྣལ་འབྱོར་རྒྱུད་སྡེའི་སྔགས་རྣམས་དང་། །དེ་འོག་བྱ་སྤྱོད་རྒྱུད་དང་གཟུངས་ཀྱི་རིགས། །དེ་ཡང་ཕ་རྒྱུད་དང་ནི་ཕོ་ཡི་རིགས། །ཡིག་ངོ་ཕྱི་ལ་བསྟན་ནས་མཇུག་ནས་དྲིལ། །བདེ་མཆོག་ལ་སོགས་མ་རྒྱུད་མོ་ཡི་རིགས། །ཡིག་ངོ་ནང་དུ་བསྟན་ནས་མཇུག་ནས་དྲིལ། །ཤོག་བུས་བཏུམས་ནས་དར་རས་སྐུད་པས་བཅིངས། །སྲོག་ཤིང་ནང་དུ་བཅུག་དུས་འདི་སྐད་བརྗོད།། ༈ སེམས་ཅན་ཤེས་བཅུ་ལྡན་གྱུར་ཅིག །བསྟན་པ་ཡུན་རིང་གནས་པར་ཤོག །སེམས་ཅན་ལྷག་བསམ་ལྡན་པ་ཡིས།
ཀུན་བཟང་སྨོན་ལམ་ལ་འཇུག་ཤོག །ཨོཾ་བཛྲ་ཨཱཿཡུ་ཥེ་སྭཱ་ཧཱ། ཞེས་བརྗོད་སྲོག་ཤིང་ནང་དུ་བཅུག་པར་བྱ། །འདི་ནི་སྤྱི་ཙམ་ཡིན་གྱི་ཞིབ་པར་ནི། །གཟུངས་པར་མ་སོ་སོའི་ཁ་ཡིག་གསལ། །དེ་ལ་མི་གསལ་ཁྱད་པར་གདམས་ངག་ནི། །རང་གི་ཡི་དམ་གཙོ་བོ་གང་ཡིན་གྱི། །སྙིང་པོ་གསེར་དངུལ་མཚལ་སོགས་རིན་ཆེན་གྱིས། །ལ་རབ་ཏུ་བརྒྱ་ཚར་ཐ་ནའང་། །བདུན་བས་མི་ཉུང་བཞག་ན་བྱིན་རླབས་ཆེ། །བླ་མའི་མཚན་སྔགས་རྡོ་རྗེ་འཆང་ནས་བཟུང་། །ཟུང་འཇུག་བརྒྱུད་པའི་མཚན་སྔགས་ཚང་མ། །དེ་མིན་ས་ཐོབ་མིན་པའི་བླ་མ་ཡི། །མཚན་སྔགས་བཅུག་པས་བྱིན་རླབས་མི་འབྱུང་ཞིང་། །ཕྱག་སྐོར་འགྲོ་བས་བླ་མ་ཉིད་ལ་གནོད། །བླ་བརྒྱུད་ཚང་མ་ཀུན་གྱི་མཚན་སྔགས་ནི། །ཨོཾ་ཨཱཿསརྦ་གུ་རུ་ཧཱུྃ་སྭཱ་ཧཱ། དེ་ལ་མཚན་སྔགས་ཐམས་ཅད་འདུས་པ་ཡིན། །ས་ཐོབ་འཕགས་པ་ཡིན་ངེས་བླ་མ་ཡི། །གདུང་རུས་ཐམས་ཅད་སྐུ་གདུང་རིང་བསྲེལ་ཡིན། །དབུ་ལོ་ཕྱག་སེན་ན་བཟའ་ལ་སོགས་པ། །སྐུ་བལ་རིང་བསྲེལ་ཞེས་ནི་བྱ་བ་སྟེ། །རང་བྱོན་ལ་སོགས་ཡོད་མེད་ཁྱད་པར་མེད། །དབུ་ལོ་ན་བཟའ་བཞུགས་གདན་སྐུ་ཆས་
སོགས། །གོ་རིམ་མ་འཆུགས་སྤྱི་སྲོལ་བཞིན་དུ་བཞག །ས་ཐོབ་མིན་ན་བླ་མ་བཟང་ནའང་། །ཐུགས་ལྗགས་རིང་བསྲེལ་སྐུ་གཟུགས་ཡིག་འབྲུ་སོགས། །བྱོན་པ་རྣམས་ནི་དར་གྱིས་བཏུམས་ལ་བཞག །དེ་མིན་གདུང་རུས་རྩིང་ཞིབ་ཐམས་ཅད་ཀུན། །ཉེ་ཐག་མིན་ཅིང་སྡིག་ཅན་མིན་པའི་མིས། །བྱིན་རླབས་རྟེན་དང་བསྲེས་ནས་ཞིབ་པར་བཏགས། །ཆུ་ལ་སྤྱོས་པས་སྤར་སྐུ་ཚ་ཚ་བཏབ། །སྐམ་ཐག་ཆོད་པར་བྱས་ནས་ནང་གཞུག་བཞག །སྐུ་འདྲ་ཆུང་ངུ་མཐོ་རེ་ཚུན་ཆད་ལའང་། །གནས་ཡིག་གཟུངས་གཞུག་གཞན་རྣམས་མི་དགོས་ཏེ། །དབྱངས་གསལ་རྟེན་འབྲེལ་སྙིང་པོ་ཡི་དམ་སྔགས། །གང་ཡིན་ལྷ་དེའི་སྙིང་པོ་ཙམ་གྱིས་ཆོག །སྲོག་ཤིང་བྱིན་རླབས་རྫ་ས་སོགས་སྔོན་དང་འདྲ། །ཁྱད་པར་རིལ་བུ་རིང་བསྲེལ་ནང་ཐིག་སོགས། །དར་རམ་རྒྱ་ཤོག་སོགས་སུ་དམ་པར་དྲིལ། །མྱུ་གུས་སག་ལ་དམ་དུ་བརྫོང་བྱ་སྟེ། །ལག་པས་གཡུགས་ན་ཁྲོག་སྒྲ་མི་གྲག་བྱ། །ཁྲོག་སྒྲ་གྲག་ན་ནང་འཁྲུག་འོང་ཞེས་ཟེར། །དེ་ནས་སྐུ་ལུས་དང་ནི་པད་གདན་གཉིས། །པད་གདན་ལ་ཡང་སྟོད་སྨད་རྣམ་གཉིས་ཏེ། །སྟོད་ཆར་ཆོས་སྐྱོང་ཡེ་ཤེས་པ་རྣམས་དང་། །དེ་འོག་འཇིག་རྟེན་
པ་ཡི་ཆོས་སྐྱོང་རྣམས། །རྒྱལ་ཆེན་ཆོས་སྐྱོང་ལ་སོགས་སྔགས་རྣམས་གཞུག། ༈ དེ་ནས་འཛམ་ལྷ་ཕོ་དགུ་མོ་དགུ་ཡི། །ཕོ་དགུ་སྟེང་དང་མོ་དགུ་འོག་ཏུ་བྱ། །སྦྲང་དང་བུ་རམ་མར་དཀར་བསྲེས་པ་ཡིས། །ཡབ་ཡུམ་འཁོར་ལོ་མ་འཆུགས་འཕྲོད་པར་སྦྱོར། ་མི་གཅིག་སོ་སོ་ཡིན་པའི་མཚོན་བྱེད་དུ། །རས་སམ་ཤོག་བུས་བར་ལ་ཆོད་བྱ་ཞིང་། །པད་གདན་ལ མཆན། །དར་སེར་གྱིས་བཏུམ་སྐུད་པ་སེར་པོ་ཡིས། །རྒྱ་གྲམ་བཅིངས་པའི་ཁུག་སོ་སྟེང་དུ་བྱ། །ཤར་ངོས་མདུན་དུ་འོང་བར་བྱས་ལ་གཞུག །དེ་ཡི་འོག་དང་གཡས་གཡོན་གར་བདེ་རུ། །རུ་རམ་རས་ནི་སེར་པོའི་ཁུག་མའི་ནང་། །འབྲུ་སྣ་སྨན་སྣ་རིན་ཆེན་སྣ་ཚོགས་དང་། །གསེར་དངུལ་ལ་སོགས་མར་ཆ་གང་ཡོད་བཅུག །ཁྱད་པར་གནོད་སྦྱིན་འཁོར་ལོའི་འོག་དེ་རུ།།གྲི་དང་མདེའུ་མཚོན་ཆའི་རིགས་རྣམས་བཞག །མཚོན་གྱི་བསྐལ་པ་ཞི་བའི་རྟེན་འབྲེལ་ཡིན། །སྐུ་འདྲ་ཆུང་ཆུང་ལ་སོགས་ཡིན་ན་ནི། །ཞབས་སྡོམ་ལེགས་པར་བཙུད་པའི་ཕྱི་དེ་རུ། །བབ་བླ་སོགས་ཀྱིས་རྡོ་རྗེ་རྒྱ་གྲམ་བྲི། །མཆོད་རྟེན་ཆེན་པོ་ལ་སོགས་ཡིན་ན་ནི།། །པད་གདན་ནང་གི་དེ་དག་སེང་ཁྲིར་བཅུག །བླ་མ་ཕལ་པའི་གདུང་རུས་མ་འདྲེས་
པའི་། །ཐལ་སོལ་མེ་དྲག་ཕོག་པའི་ས་རྣམས་ཀུན། །ཚ་ཚ་གྲུབ་ལེགས་གལ་ཏེ་མ་གྲུབ་ཀྱང་། །སེང་ཁྲི་ནང་དུ་བླུགས་པར་བྱ་བ་ཡིན། །མཆོད་རྟེན་སྐུ་འདྲ་ཆེན་པོ་ལ་སོགས་པ། །ནང་གཞུག་བཞག་ཁ་ཁྲུས་གསོལ་མེད་ནའང་། །རབ་གནས་དུས་སུ་བྱས་པར་ཆོག་པར་བརྩི། ༈ ཐང་སྐུའི་རྒྱབ་ཏུ་མཆོད་རྟེན་བྲི་བ་དང་། །དེའི་ནང་སངས་རྒྱས་རབས་བདུན་གསོ་སྦྱོང་བྲི། །ཨཱཿ་ལི་ཀཱ་ལི་རྟེན་འབྲེལ་སྙིང་པོ་བྲི། །གཞན་ཡང་ལྷ་མགྲོན་དེ་དག་ཐམས་ཅད་ཀྱི། །གནས་གསུམ་ཡིག་འབྲུ་གསུམ་པོ་བྲི་བར་བྱ། །གནས་ཡིག་གཟུངས་གཞུག་འོག་མིན་ཀརྨ་སོགས། །དགོན་སྡེ་རྣམས་སུ་རྒྱས་འབྲིང་བསྡུས་སོགས་ཀྱི། །པར་ཤིང་བཞུགས་པས་པར་ལ་འདེབས་པར་གྱིས། །བྲིས་ཀྱང་མི་དག་མང་པོ་བྲི་མི་གྲུབ། །མཐོང་བ་བརྒྱུད་པར་པར་མ་བཞག་པ་མཐོང་། །རྒྱལ་བ་ཆོས་ཀྱི་དབང་ཕྱུག་ཞིང་བརྗེས་ནས། །སྐུ་ཚབ་སྐུ་འདྲ་གསེར་སྐུ་སྐུ་ཚད་བཞེངས། །གྲྭ་ཚང་ནམ་མཁའི་དབོན་པོ་ཀུན་མཁྱེན་གྱིས་། །གནས་ཡིག་གཟུངས་གཞུག་འཛམ་ནག་སྲོག་འཁོར་བཅས། །ཟླ་དུམ་ཙམ་དུ་བྲིས་ནས་བཞག་རན་ཛ། །དེ་ལ་ཡིན་མིན་རྩོད་གཞི་མང་པོ་བྱུང་། །རྒྱལ་བ་ཆོས་ཀྱི་དབང་
ཕྱུག་ཁོང་རང་གིས། །ཕྱག་ཁྲིད་ཕྱག་གཡོག་ལན་མང་བྱས་པ་ཡིས། །ཆོས་རྗེ་ཁྲ་ཚང་པ་དེ་སྒར་ཆེན་ན། །བཞུགས་པ་སྤྱན་དྲངས་དེ་ཡིས་ཕྱག་ཁྲིད་བྱས། །སྔོན་དུ་བྲིས་པ་ཕལ་ཆེར་གཞུག་མ་ཉན། །དེ་ཚེ་ཀུན་མཁྱེན་ཁོང་ལ་ཀུན་གྱིས་འབར། །འདི་ཡིས་མི་ཤེས་པ་དེ་མཁས་འདོད་ཆེ། །གྲྭ་ཚང་བརླགས་ཤོམ་བྱས་པ་རེད་ཅེས་འབར། །དེ་དུས་གཟུངས་གཞུག་བཞག་ལུགས་དེ་རྣམས་ལ། །གྲྭ་པ་ཀུན་གྱིས་རྟོགས་དཔྱོད་ལེགས་པར་བཞག །སློབ་དཔོན་སྐུ་འདྲ་པར་མ་མཐོ་གང་ཙམ། །པར་བཏབོ་གྲྭ་པ་མི་རེས་རེ་རེ་བཞེངས་། །ཁམས་སུ་གདན་དྲངས་དད་པའི་རྟེན་དུ་བྱས། །ཞལ་གྱི་མཁུར་ཚོས་འབུ་རུ་བུད་པ་ལྟར། །རིང་བསྲེལ་རྡོལ་ལ་ཁད་པ་གཅིག་ཀྱང་བྱུང་། །ཕྱིས་སུ་མགྲིན་པ་ཅུང་ཟད་གས་བྱུང་བས། །དེ་དུས་སྐབས་སུ་གྲྭ་ཚང་དུས་ལོག་ཟིན། །ད་ལྟ་ཨོ་རྒྱན་གསེར་སྐུའི་ཐུགས་ཀ་རུ། །ཡེ་ཤེས་སེམས་དཔའི་ཚུལ་དུ་བཞུགས་ནས་ཡོད། །དེ་ལྟར་གཟུངས་གཞུག་དེ་དག་རྣམས་ཀྱི་མཇུག །བཀྲ་ཤིས་བསྔོ་སྨོན་གང་འདོད་བྲི་ཆོག་སྟེ། །ཀཾ་པོ་གནས་སུ་མར་མེ་མཛད་ཀྱི་སྐུ། །ཆོས་ཀྱི་དབང་ཕྱུག་ཉིད་ཀྱིས་བཞེངས་པ་ཡི། །ནང་གཞུག་བཀྲ་ཤིས་
སྨོན་ལམ་མཇུག་ཏུ་ནི། །ཆོས་ཀྱི་དབང་ཕྱུག་ཉིད་ཀྱི་མཚན་བྲིས་ཀྱང་། །དེ་དང་རང་རེ་ཕལ་པ་མི་འདྲ་བས། །རང་དང་ཡོན་བདག་རྣམས་ཀྱི་མིང་ཡིག་ཀྱང་། །བྲི་བར་བཤད་ཀྱང་བྲི་བར་མི་རུང་སྟེ། ༈ །དེ་ནས་གསུང་རྟེན་ཆོས་ཀྱི་དཀར་ཆག་ལའང་། །མིང་ནི་བྲི་སྲོལ་འདུག་ཀྱང་བྲི་མི་རུང་། །ཅི་ཕྱིར་ལྷ་ཆེན་མཆོད་རྟེན་ཆོས་བརྩེགས་ཀྱི། །ཞབས་སུ་མིང་ཡིག་མནན་པ་མཐུ་རུ་འགྱུར། །བཀའ་འགྱུར་བྲིས་པ་མི་འཕག་ཟེར་ན་ཡང་། །དེ་ཡི་ཉེས་སྐྱོན་ཡིན་པར་ཁོ་བོས་གོ །རང་དང་སྦྱིན་བདག་བསྔོ་དགོས་གང་ཡོད་རྣམས། །རབ་གནས་སྐབས་སུ་བསྔོ་བ་བྱས་པས་འཐུས། །ཐ་མལ་པ་ཡི་མིང་དང་རུས་ཚིག་སོགས། །ས་ཐོབ་རྣམས་ཀྱི་ཕྱག་སྲོལ་བྱས་པ་ན། །མི་ཁྱག་ཚེ་འདས་དེ་ལ་གནོད་པ་སྟེ། །མུ་སྟེགས་སྟོན་པ་འོད་སྲུང་རྫོགས་བྱེད་ཀྱི། །སྐུ་གདུང་མཉན་ཡོད་གྲོང་ཁྱེར་བཞི་མདོ་རུ། །མཆོད་རྟེན་བྱས་ནས་ལོ་མང་སོང་བའི་རྗེས། །ཐུབ་པའི་ཉན་ཐོས་མོའུ་འགལ་གྱི་བུ། །རྫུ་འཕྲུལ་ཆེ་ནས་ཉིན་རེ་ལན་རེ་ལ། །འགྲོ་བ་རིགས་དྲུག་གནས་སུ་གཟིགས་སུ་བྱོན། །འོད་སྲུང་རྫོགས་བྱེད་དམྱལ་བར་སོང་ནས་འདུག །དེ་ཡིས་མོའུ་འགལ་བུ་ལ་ཆ་བཏང་ནས། །ང་ཡི་
མཆོད་རྟེན་གྲོང་ཁྱེར་མདོར་བརྩེགས་སར། །ཕལ་པས་བསྐོར་བ་བྱས་ཀྱང་མི་གནོད་དེ། །ང་བས་ཐེག་པ་མཐོ་བ་ཐུབ་པའི་འཁོར། །རྣམས་ཀྱིས་འབྱོན་ཞོར་བསྐོར་བ་ཤུགས་ལ་འགྲོ། །དེ་ཡིས་ང་ལ་གནོད་པ་ཆེན་པོ་བྱུང་། །འཕགས་པ་ཁྱེད་ཀྱིས་ང་ཡི་རྗེས་འཇུག་ལ། །མཆོད་རྟེན་ཤིག་ལ་དབེན་པར་བརྩེགས་གསུངས་ཟེར། །དེ་ནས་མུ་སྟེགས་པ་ཀུན་འཚོགས་པའི་སར། །ཆ་འཕྲིན་དེ་ཉིད་གསུངས་པས་མུ་སྟེགས་ཁྲོས། །མོའུ་འགལ་གྱི་བུ་བརྡུང་ལང་ཉམས་མེད། །ཉན་ཐོས་རྣམས་ཀྱིས་ཆ་བཅིངས་ཁུར་དགོས་བྱུང་། །ཁྱེད་ནི་རྫུ་འཕྲུལ་ཆེ་བའི་མཆོག་ཡིན་པས། །རྫུ་འཕྲུལ་མ་བསྟན་འདི་ཙམ་བརྡུངས་བཅུག་ཞུས། །འཕྲུལ་བ་ཕར་སྐྱུར་རྫུ་བའང་མ་དྲན་གསུངས། །དེ་དོན་ཅི་ཡིན་སྟོན་པ་ལ་ཞུས་པས་། །བསྐལ་པ་དཔག་མེད་གོང་རོལ་མོའུ་འགལ་བུས། །མུ་སྟེགས་དེ་རྣམས་ཕར་ལ་བརྡུངས་བ་ཡི། །ལས་ཀྱི་རྣམ་སྨིན་ཡིན་ཚུལ་སྐྱེས་རབས་གསུངས། །དེ་ལྟར་ལས་ཀྱི་རྣམ་པར་སྨིན་པ་ནི། །རྫུ་འཕྲུལ་ཐོབ་ཀྱང་བཟློག་ཏུ་མེད་པའི་ཚུལ། །རྒྱས་པར་གསུངས་པའི་ལོ་རྒྱུས་འབྱུང་ཕྱིར་རོ། །དེ་ལྟར་ནང་གཞུག་བཞག་ཚུལ་ཞལ་གདམས་འདི། །རབ་གནས་
བྲིས་པའི་བུ་ཡིག་ཚུལ་དུ་བཀོད། ༧ །རཱ་ག་ཨ་སྱས་ངག་ནས་སྨྲས་པ་ལྟར། །དགེ་སློང་བརྩོན་འགྲུས་བརྩོན་འགྲུས་ཆེ་ཕྱིར་བྲིས། །འགལ་འཁྲུལ་མཆིས་ན་མཁས་པ་རྣམས་ལ་བཤགས། །དགེ་བས་མ་འོངས་འབྱོར་ལྡན་སྐྱེས་བུ་རྣམས། །སྐུ་གསུང་ཐུགས་རྟེན་ཆེ་ཕྲ་ཅི་བཞེངས་ཀྱང་། །འགལ་འཁྲུལ་མེད་ཅིང་ལམ་དུ་འགྲོ་བ་དང་། །རབ་གནས་ཆགས་ཤིང་ཡུལ་ཕྱོགས་བཀྲ་ཤིས་དགེ །སྦྱིན་བདག་རྣམས་ཀྱི་རིགས་རྒྱུད་ཆོས་བརྒྱུད་ཀྱང་། །རྒུད་ཅིང་ཉམས་པར་མི་འགྱུར་འཕེལ་རྒྱས་ཤོག །མངྒ་ལཾ། བཀྲ་ཤིས་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།