གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་རྟེན་གསུམ་རབ་གནས།
གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས༔
ཨོ་རྒྱན་རིན་པོ་ཆེ་ལ་ཕྱག་འཚལ་ལོ༔ རྟེན་གསུམ་རབ་ཏུ་གནས་པ་ནི༔ ཧཱུྃ༔ སྒེའི་སྐུ་གཟུགས་འདི་ལ་ནི༔ བར་དུ་གཅོད་དང་འཁྲི་བ་དང་༔ ཐོས་དང་རེག་དང་རྟོག་པ་ཡི༔ གདོན་བགེགས་རྒྱལ་འགོང་ཐམས་ཅད་ཀྱིས༔ མཐེབ་སྐྱ་ཏིང་ལོ་འདི་བཞེས་ལ༔ མ་གནས་གཞན་དུ་འགྲོ་བར་གྱིས༔ གལ་ཏེ་འགྲོ་བར་མི་བྱེད་ན༔ བདག་ནི་ཁྲོ་རྒྱལ་དབང་ཆེན་ཏེ༔ རྡུལ་ཕྲན་བཞིན་དུ་བརླགས་ནས་ཀྱང་༔ རྡོ་རྗེ་དམྱལ་བར་ཤི་ཀ་རེ༔ དེ་བས་མ་འདུག་གཞན་དུ་དེངས༔ ཧཱུྃ་ཧཱུྃ་ཨུ་ཙ་ཏ་ཡ་ཕཊ༔ སུམྦྷ་ནི་སོགས། འདིར་ཡུངས་ཀར་རམ་མེད་ན་ནས་ལྕགས་བྲབ་ཅིང་
སུམྦྷ་ནི་མང་དུ་བརྗོད༔ རོལ་མོ་བྱ་ཡོད་ན་གུ་གུལ་བདུག་གོ༔ ཧཱུྃ༔ སྟེང་ཡང་རྡོ་རྗེའི་གུར་ཁང་ལ༔ འོག་ཀྱང་རྡོ་རྗེའི་ས་གཞི་སྟེ༔ བར་མཚམས་རྡོ་རྗེའི་ར་བར་གྱུར༔ ཨོཾ་བཛྲ་རཀྵ་རཀྵ་ཧཱུྃ༔ མང་དུ་བརྗོད༔ རོལ་མོ་བྱ༔ ཨོཾ་སྭ་བྷ་ཝ་སོགས། སྟོང་པ་ཉིད་དུ་གྱུར༔ སྟོང་པའི་ངང་ལས་སྐུ་འདི་ཉིད༔ ཅེས་སོ་སོ་གང་ཡིན་བསྐྱེད༔ སྐུ་གཟུགས་བསྟན་པའི་བདག་པོ་ནི༔ སྐུ་མདོག་གསེར་གྱི་རི་བོའི་མདོག༔ ཞལ་གཅིག་ཕྱག་གཉིས་གཡས་ས་ནོན༔ གཡོན་པས་མཉམ་བཞག་འོད་ཟེར་འཕྲོ༔ ཆོས་གོས་རྣམ་གསུམ་སྐུ་ལ་གསོལ༔ རྫོགས་པའི་སངས་རྒྱས་ཆ་ལུགས་རྫོགས༔
པདྨ་ཉི་ཟླ་སེང་ཁྲིར་བཞུགས༔ ཨཻ༔ འདི་གནམ་ཆོས་གནས་བཅུ་ནས་སོབ་པ་སྟེ༔ ལྷ་སོ་སོའི་མངོན་རྟོགས་མ་ཐོན་ཀྱང་༔ ཐུབ་པ་བསྐྱེད་པས་ཐམས་ཅད་འཐུས་པར་བཤད་དོ༔ བུམ་པ་ཐོགས་ལ༔ ཧཱུྃ༔ བདག་གིས་དྲི་ལྡན་དྲི་ཆབ་ཀྱིས་རྒེའི་སྐུ་ལ་ཁྲུས་གསོལ་ལོ༔ ལྷ་ལ་དྲི་མ་མི་མངའ་ཡང་༔ སྡིག་སྒྲིབ་དག་པའི་རྟེན་འབྲེལ་བགྱི༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ༔ རས་དཀར་ཐོགས་ལ། ཧཱུྃ༔ རས་དཀར་འཇམ་དྲི་དང་ལྡན་པ་ཡིས༔ རྨེའི་སྐུ་ཉིད་ཕྱི་བར་བགྱི༔ སྐུ་ལ་དྲི་མ་མི་མངའ་ཡང་༔ སྡུག་བསྔལ་བྲལ་བའི་རྟེན་འབྲེལ་བགྱི༔ གསེར་གྱི་སྤྱན་ཐུར་ཐོགས་ལ༔ གསེར་གྱི་ཐུར་མ་མཛེས་པ་ཡིས༔ རྒྱལ་བ་རྒེའི་སྤྱན་དབྱེའོ༔ སྤྱན་ལ་མ་རིག་མི་མངའ་ཡང་༔ ཡི་དམ་ཞལ་མཐོང་རྟེན་འབྲེལ་བགྱི༔ དངུལ་གྱི་རྣ་བྲུས་ཐོགས་ལ༔ ཧཱུྃ༔ དངུལ་གྱི་སྙན་བྲུས་མཛེས་པ་ཡིས༔ རྒྱལ་བ་རྒུའི་སྙན་བསལ་ལོ༔ སྙན་ལ་མ་ལེགས་མི་མངའ་ཡང་༔ ཆོས་སྒྲས་ཁྱབ་པའི་རྟེན་འབྲེལ་བགྱི༔ གསེར་གྱི་སོ་བྲུས་ཐོགས་ལ༔ ཧཱུྃ༔ གསེར་གྱི་ཚེམས་བྲུས་མཛེས་པ་ཡིས༔ རྒྱལ་བ་ཚེའི་ཚེམས་བསལ་ནས༔ ཚེམས་ལ་དྲི་མ་མི་མངའ་ཡང་༔ བདེ་ལེགས་འབྱུང་བའི་
རྟེན་འབྲེལ་བགྱི༔ གསེར་གྱི་སྐྲ་བཞར་ཐོགས་ལ༔ ཧཱུྃ༔ གསེར་གྱི་སྤུ་གྲི་མཛེས་པ་ཡིས༔ རྒྱལ་བ་རྒོའི་དབུ་སྐྲ་བསིལ༔ དབུ་སྐྲ་རིང་བར་མི་ལྡན་ཀྱང་༔ བཀྲ་ཤིས་འབྱུང་བའི་རྟེན་འབྲེལ་བགྱི༔ དུང་གི་སོ་མང་ཐོགས་ལ༔ ཧཱུྃ༔ དུང་གི་སོ་མང་མཛེས་པ་ཡིས༔ རྒྱལ་བ་རྨེའི་དབུ་སྐྲ་བཤད༔ དབུ་སྐྲ་འཛིང་བ་མི་མངའ་ཡང་༔ ཆོས་བསིལ་ཁྱབ་པའི་རྟེན་འབྲེལ་བགྱི༔ གསེར་གྱི་འཇབ་རྩེ་ཐོགས་ལེ། ཧཱུྃ༔ གསེར་གྱི་རྨང་མཛེས་ལེགས་པ་ཡིས༔ རྒྱལ་བའི་སྨྲ་ར་འབྱེད་པར་བགྱི༔ ཞལ་ལ་ངན་རྟོག་སྤུ་མེད་ཀྱང་༔ སེམས་ཅན་དགེ་བའི་རྟེན་འབྲེལ་བགྱི༔ ཆོས་གོས་ཐོགས་ལ༔ ཧཱུྃ༔ ན་བཟའ་མཛེས་ལྡན་ངུར་སྨྲིག་འདི༔ རྒྱལ་བའི་སྐུ་ལ་གསོལ་བར་བགྱི༔ སྐུ་ལ་བསིལ་བ་མི་མངའ་ཡང་༔ བཀྲག་མདངས་འཕེལ་བའི་རྟེན་འབྲེལ་བགྱི༔ རིན་ཆེན་རྒྱན་ཕྲེང་ཐོགས་ལ༔ ཧཱུྃ༔ རིན་ཆེན་རྒྱན་ཆ་མཛེས་པ་འདི༔ རྒྱལ་བའི་སྒེའི་སྐུ་ལ་གསོལ༔ སྐུ་ལ་རྒྱན་གསོལ་མི་མངའ་ཡང་༔ གཟི་བརྗིད་ཆེ་བའི་རྟེན་འབྲེལ་བགྱི༔ ཧཱུྃ༔ དེ་ཡི་གནས་གསུམ་འབྲུ་གསུམ་ལས༔ ཨོཾ་དཀར་ཨཱཿཉྩདམར་ཧཱུྃ་མཐིང་དང་༔ ས་བོན་ལས་ནི་འོད་འཕྲོས་
པས༔ ཆེགེའི་ཡེ་ཤེས་པ་དུང་ཕྱུར༔ ཁ་བ་བུ་ཡུག་འཚུབ་བཞིན་བྱོན༔ སྐུ་དང་གཉིས་སུ་མེད་པར་ཐིམ༔ སྤྲོ་ན་སྐབས་འདིར༔ མ་ལུས་སེམས་ཅན་ཀུན་གྱི་སོགས། ལྷ་སོ་སོའི་སྤྱན་འདྲེན་དང་༔ བྱིན་འབེབས་རྒྱས་བསྡུས་གང་འདོད་སྦྱར༔ མ་སྦྱར་ཀྱང་ཆོག་གོ༔ བུམ་པ་ཐོགས་ལ༔ ཧཱུྃ༔ རྒྱལ་བ་ཚེའི་སྐུ་ལ་ནི༔ བདག་གི་བུམ་པས་དབང་བསྐུར་རོ༔ ལྷ་ལ་དབང་བསྐུར་མི་མངའ་ཡང་༔ ཡོན་ཏན་རྫོགས་པའི་རྟེན་འབྲེལ་བགྱི༔ ཀུམྦྷ་ཨ་བྷི་ཥིཉྩ་ཧཱི༔ གཞུང་འདིས་ཀྱང་ཚང་ལ༔ སྤྲོ་ན་འདིར་ཇི་ལྟར་བལྟམས་པ་སོགས༔ རྗེས་གནང་དུས་ལྟར་བུམ་པས་དབང་བསྐུར་ཚུལ་ལམ༔ ཀུན་རིག་ལྟར་དབུ་རྒྱན་དར་དཔྱངས་མེ་ཏོག་ཕྲེང་དབང་གསུམ་བྱའོ༔ དབུ་རྒྱན། ཧཱུྃ༔ དེ་ཡི་སྤྱི་བོར་ཨོཾ་ཧཱུཾ་དང་༔ ཏྭཾ་ཧཱིཝཨཱཿཋལས་འོད་འཕྲོས་པས༔ རྒྱལ་བ་རིགས་ལྔ་སྤྱན་དྲངས་ནས༔ རྒེའི་དབུ་ལ་བརྒྱན་པར་གྱུར༔ འདིར་དབུ་རྒྱན་བསྐོན་ཚུལ་བྱས་ན་ལེགས་མ་བྱས་ཀྱང་རུང་༔ འདོན་ཡོན་ལྔ༔ ཧཱུྃ༔ མེ་ཏོག་བདུག་སྤོས་མར་མེ་དྲི༔ གཟུགས་སྒྲ་དྲི་རོ་རེག་བྱའི་ཆོས༔ བདག་གིས་མཆོད་པ་འབུལ་བར་བགྱི༔ བདག་ཅག་ཚོགས་གཉིས་རྫོགས་པར་ཤོག །ཨགྷཾ་སོགས་དང་། རཱུ་པ་སོགས། བཀྲ་ཤིས་རྫས་བརྒྱད༔ ཧཱུྃ༔ བཀྲ་ཤིས་གཙོ་
བོ་རྫས་བརྒྱད་དེ༔ གཙོ་མཆོག་རྒྱལ་པོ་ཡུངས་ཀར་སོགས༔ བདག་གིས་ལྷ་ལ་མཆོད་པ་འབུལ༔ ཚོགས་གཉིས་ཡོངས་སུ་རྫོགས་པར་ཤོག༔ མངྒ་ལཾ་ཨརྦ་སིདྡྷི་ཧཱུྃ༔ བཀྲ་ཤིས་རྟགས་བརྒྱད༔ ཧཱུྃ༔ བཀྲ་ཤིས་གཙོ་བོ་རྟགས་བརྒྱད་དེ༔ གཙོ་མཆོག་རྒྱལ་པོ་བུམ་པ་སོགས༔ བདག་གིས་ལྷ་ལ་མཆོད་པ་འབུལ༔ སེམས་ཅན་ཚོགས་གཉིས་རྫོགས་པར་ཤོག༔ མངྒ་ལཾ་ཀུམྦྷ་ཧཱུྃ༔ རྒྱལ་སྲིད་སྣ་བདུན༔ ཧཱུྃ༔ འདོད་ཡོན་རྩ་བ་རིན་ཆེན་བདུན༔ གཙོ་མཆོག་རྒྱལ་པོ་ནོར་བུ་སོགས༔ བདག་གིས་ལྷ་ལ་མཆོད་པར་འབུལ༔ བདག་ནི་ཚོགས་གཉིས་རྫོགས་པར་ཤོག༔ ཨོཾ་མ་ཎི་རཏྣ་ཧཱུྃ༔ རི་རབ་གླིང་བཞི༔ ཀུན་གྱི་གཙོ་བོ་རི་རབ་གླིང་༔ རི་རབ་གླིང་བཞི་གླིང་ཕྲན་བཅས༔ བདག་གིས་ལྷ་ལ་མཆོད་པར་འབུལ༔ ཚོགས་གཉིས་ཡོངས་སུ་རྫོགས་པར་ཤོག༔ འདིར་མཎྜལ་རྒྱས་པ་ཕུལ་ན་རུང་མེད་ཀྱང་ཆོག༔ དེ་ནས་མེ་ཏོག་ག་ཏོར་བྱ་ཞིང༔ ཨོཾ་ཡེ་དྷརྨཱ༔ ཧེ་ཏུ་པྲ་བྷ་ཝཱ༔ དུན་ཏེ༔ ཥཱནྟ་ཐཱ་ག་ཏོ༔ རྒྱ་ཝ་དཏཿ ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི༔ མ་ཧཱ་ཤྲཱ་མ་ཎ་ཡེ་སྭཱ་ཧཱཿ ཚར་གང་མང་དང་༔ ཨོཾ་ཏིཥྛ་བཛྲ་ཡེ་སྭཱ་ཧཱཿ རྒྱས་པར་སྤྲོ་ན༔ ཨོཾ་སུ་པྲ་ཏིཥྛ་བཛྲ་
ཡེ་སྭཱ་ཧཱཿ ཞེས་མང་དུ་བརྗོད་ལ་ནས་གཏོར༔ ཨོཾ༔ ཧཱུྃ༔ རྒྱལ་བ་རྒེ་ཡེ་ཤེས་པ༔ སྐུ་གཟུགས་འདི་ལ་བཞུགས་སུ་གསོལ༔ མེས་བསྲེགས་ཆུས་ཁྱེར་གྲུམ་ཞིང་ཆག༔ འབྱུང་བས་མ་ཞིག་བར་དུ་བཞུགས༔ ཏིཥྛ་བཛྲ་ཡེ་སྭཱ་ཧཱཿ བཀྲ་ཤིས་བརྗོད༔ ས་མཱ་ཡ༔ རྒྱ་རྒྱ་རྒྱ༔ ཁ་ཐཾ་གུ་ཧྱ༔ ཅེས་པ་འདི་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་བྱ་ལོ་ཆོ་འཕྲུལ་ཆེན་པོའི་བཅུ་བདུན་ཉིན་ཨོ་རྒྱན་ཆེན་པོས་དངོས་སུ་གསུངས་སོ༔ སྐུ་གསུམ་བླ་མ་རྣམས་ཀྱི་བཀྲ་ཤིས་ཤོག༔ ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག༔ མཁའ་འགྲོ་ཆོས་སྐྱོང་ནོར་ལྷའི་བཀྲ་ཤིས་ཤོག༔ གཏེར་སྲུང་དམ་ཅན་རྒྱ་མཚོའི་བཀྲ་ཤིས་ཤོག༔ ཅེས་གནམ་ཆོས་ནས་བྱུང་བའི་བཀྲ་ཤིས༔ ཞལ་གདམས་ལ༔ གནམ་ཆོས་རབ་གནས་ལ་པདྨ་འོད་འབར་སོགས་ཡི་དམ་ཞིག་འདོན་ཅིང་༔ བུམ་པ་དང་མཆོད་པ་རྣམས་འཛོམས་ན་བཤམས༔ མེད་ན་ཡང་ཙཀ་ལི་སྟོན་ཅིང་དམིགས་པ་བསྒོམ་པ་ཁོ་ནས་རྒྱས་པར་ཚང་བའོ༔ ༈ གལ་ཏེ་རྒྱས་པར་འདོད་ན་རང་གིས་ཡི་དམ་རྒྱལ་བ་རྒྱ་མཚོའི་བདག་མདུན་རྒྱས་པར་བྱ༔ དེ་ནས་ཆ་གསུམ་བཏང་ལ༔ ཙཀ་ལི་རྫོགས་པར་བྱས་རྗེས་ཚོགས་བྱ༔ ཚོགས་ཕུད་གཏོར་མར་བླུག་པ་ལྷ་མདུན་དུ་བཞག་ལ་གཏོར་བསྔོས་དང་༔ དེ་ཡང་སྔོན་དུ་ཀུན་རིག་ལྟར་ཁྲུས་གསོལ་རྒྱས་པ༔ མཎྜལ་རྒྱས་པ༔ རབ་འབྱམས་སོགས་མཆོད་པ་
ཐམས་ཅད་ཕྱག་རྒྱ་དང་བཅས་པས༔ ཡོད་ན་དངོས་སུ་ཕུལ༔ རྗེས་ནས་རྒྱལ་བ་རྒྱ་མཚོ་ལྟར་རམ་ཆོས་སྤྱོད་ལྟར་བཀྲ་ཤིས་གང་ཤེས་ཐམས་ཅད་རྒྱས་པར་བྱའོ༔ དེ་ནས་གཏོར་འབུལ་བྱས་ལ་བཀའ་སྲུང་དུ་བཀའ་བསྒོ་བ་ཡིན་ནོ༔ ཞག་བདུན་དུ་མཆོད་པ་ཅི་ཙམ་འབྱོར་པ་རྒྱས་པར་ཕུལ་བཅུག་པ་ནི་རྟེན་ཞལ་བསྲོ་ཞེས་གསུངས་ཏེ་གལ་ཆེ༔ སྙན་དར་ཡོད་ན་འབུལ་བ་དང་༔ དེ་ཉིན་གནམ་འཇམ་རྩུབ་དང་ཁ་ལྟས་བཟང་ངན་ལ་རྟེན་འབྲེལ་ཆེན་པོ་ཡོད་པར་གསར་རྙིང་ཐམས་ཅད་ནས་རྒྱ་ཆེར་གསུངས་སོ༔ འཇའ་དང་ཉི་སྤྲིན་འཛོམ་པ༔ སེམས་བདེ་ཉམས་ལེན་གསལ་ན་བཟང་བར་གསུངས་སོ༔ ཨ་རཱ་གས་བྲིས་པའོ༔ མངྒ་ལཾ། བྷ་ཝནྟུ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།