སྤར་ཁ་དགུ་མིག་བཅོས།
སྤར་ཁ་དགུ་མིག་བཅོས་དང་། བརྒྱད་ཅུ་གྱ་གཅིག་དང་ཅི་བྱེད་ཀྱང་ཆོག་པའི་བཅོས་ཐབས་ཡིད་བཞིན་བསམ་འཕེལ་དགོས་འདོད་ཀུན་འབྱུང་བཞུགས་སོ། །སྤར་ཁའི་དགུ་མིག་གཏོ་བཅོས་ལ། སྤར་ཁ་དུར་འདོན་གྱི་གཅིག་དགུ་མིག་གཏོ་ལ། གཡང་གཞི་དཀར་པོའི་སྟེང་ནས་ཀྱི་ཚོམ་བུ་དགུ་བཀོད། ཚ་ཚ་མར་མེ་ལྷ་བཤོས་དགུ་རེས་བསྐོར། དབུས་སུ་ཐུབ་པའི་སྐུ་བཞག་དེ་ནི་ཡར་གཏོ་ཡིན། མར་གཏོ་ལ་གཞི་ནག་པོའི་སྟེང་དུ་འབྲུ་ནག་ཚོམ་བུ་དགུ་བཀོད། སྟེང་དུ་གླང་མའི་སྣལ་ཆུ་དགུ། ངར་མི་དགུ། བཤོས་བུ་དགུ། ཟུར་གསུམ་དགུ། ཕྱིང་པའི་སྐྱ་མི་དགུ། མགལ་པ་དགུ་བཞག་བསྲེག་དང་སྐྱུར་བ་ཅི་བྱེད་ཀྱང་རུང་དེ་ནི་བཅོས་ཡིན། ཀྱཻ། འགྲོ་བའི་མགོན་པོ་འཕགས་པ་འཇམ་དཔལ་དང་། །གཞི་མ་གསེར་མདོག་སྤྲུལ་པའི་སྐུ། །གབ་རྩེ་མངའ་བདག་ཁྱེད་ལ་ཕྱག་འཚལ་ལོ། །རྒྱུ་སྦྱོར་ཡོན་གྱི་བདག་པོ་འདི་ཉིད་ལ། །དང་པོ་རང་གི་སྐག་ནས་ད་ཐོན་ཅིག །གཉིས་པ་འཆི་བའི་སྐག་ནས་ད་ཐོན་ཅིག །གསུམ་པ་སུམ་ཟུར་སྐག་ནས་ད་ཐོན་ཅིག །བཞི་པ་བཞི་གཤེད་སྐག་ནས་ད་ཐོན་ཅིག །ལྔ་པ་བྱེ་བྲལ་སྐག་ནས་ད་ཐོན་ཅིག །དྲུག་པ་དྲུག་འགྲམས་སྐག་ནས་ད་ཐོན་ཅིག །བདུན་པ་བདུན་ཟུར་སྐག་ནས་ད་ཐོན་ཅིག །བརྒྱད་པ་སྤར་བརྒྱད་ཀྱི་སྐག་ནས་ད་ཐོན་ཅིག །དགུ་
པ་དགུ་མིག་སྐག་ནས་ད་ཐོན་ཅིག །བཅུ་པ་གཤེད་ཆུའི་སྐག་ནས་ད་ཐོན་ཅིག །བཅུ་གཅིག་པ་ལན་གྲངས་སྐག་ནས་ད་ཐོན་ཅིག །བཅུ་གཉིས་པ་ལོའི་སྐག་ནས་ད་ཐོན་ཅིག །གནམ་ལོ་རྒྱལ་པོའི་སྐག་ནས་ད་ཐོན་ཅིག །ཟླ་བ་བློན་པོའི་སྐག་ནས་ད་ཐོན་ཅིག །ཞག་དམག་མིའི་སྐག་ནས་ད་ཐོན་ཅིག །དུས་ཚོད་མཚོན་ཆའི་སྐག་ནས་ད་ཐོན་ཅིག །དགུ་མིག་སྐག་ནས་ད་ཐོན་ཅིག །དུར་མིག་སྐག་ནས་ད་ཐོན་ཅིག །རུས་མིག་གི་སྐག་ནས་ད་ཐོན་ཅིག །ཤི་སྒོ་ཆོད་ཅིག །གཤེད་སྒོ་ཆོད་ཅིག །དུར་སྒོ་ཆོད་ཅིག །གཅིག་དཀར་གཉིས་ནག་གསུམ་མཐིང་བཞི་ལྗང་ལྔ་སེར་དྲུག་དཀར་བདུན་དམར་བརྒྱད་དཀར་དགུ་དམར་སྨེ་བ་དགུ་དགུ་བརྒྱད་ཅུ་གྱ་གཅིག །ལོ་བཅུ་གཉིས་སྤར་ཁ་བརྒྱད་ལོ་རྒན་དྲུག་ཅུའི་སྐག་དང་བགེགས་ངན་པ་ཐམས་ཅད་ལས་ཐར་བར་གྱུར་ཅིག །འགྲུབ་པར་གྱུར་ཅིག་སྭཱ་ཧཱ། ཡར་གཏོ་ཡར་ཕུལ། མར་གཏོ་རོ་དང་མཉམ་དུ་མར་ཁྱེར་དུར་ཐོག་ཏུ་ཕུལ་ལམ་རོ་བསྲེགས་ན་མཉམ་དུ་བསྲེག་ཡང་རུང་སྒྱུར་ཡང་གང་བདེ་བྱེད་ཆོག །ཚར་དགུ་བཏོན་ལ་ཕུལ་བས་འཐུས་སོ། །སརྦ་མངྒ་ལཾ།། །།