བསང་རབ་བསྐྱེད་ཆོག་རིན་པོ་ཆེའི་ཕྲེང་བ།
བསང་རབ་བསྐྱེད་ཆོག་རིན་པོ་ཆེའི་ཕྲེང་བ་ཞེས་བྱ་བ་བཞུགས་སོ།
སློབ་དཔོན་པདྨ་འབྱུང་གནས་ལ་ན་མོ། །ཞི་བའི་བསང་མཆོད་བྱེད་པར་འདོད་པས། ཕྱེ་མར་དཀར་གསུམ་མངར་གསུམ་ཤ་ཕུད་ཆང་ཕུད་ཇ་ཕུད་སྨན་སྣ་འབྲུ་སྣ་དར་ཟབ་གང་འཛོམ་དང་། གཡག་ལུག་ར་གསུམ་བཤོས་བུ་མདའ་དར་མཆོད་པ་སྣ་བདུན་གཞན་ཡང་སྤོས་རིགས་གང་རྙེད་དང་། མཁན་སུར་ཤུག་པ་ལ་སོགས་པའི་བསང་ཁང་དང་། རོལ་མོ་ལ་སོགས་པའི་མཆོད་པ་གང་འཛོམ་བཤམས་ལ། དང་པོ་སྐྱབས་སུ་འགྲོ་བ་ནི། དབྱངས་སྙན་པོའི་འདི་སྐད་དོ། །ན་མོ། ནམ་མཁའི་གནས་སུ་ནམ་མཁའ་གང་། །དྲིན་ཆེན་བླ་མ་རྒྱལ་བ་དགོངས་བརྒྱུད་དང་། །རིག་འཛིན་བརྡའ་བརྒྱུད་གང་ཟག་སྙན་བརྒྱུད་སོགས། །དུས་གསུམ་བླ་མ་རྣམས་ལ་
སྐྱབས་སུ་མཆི། །གསང་སྔགས་གསར་རྙིང་རྒྱུད་སྡེ་ཕྱི་ནང་གི །ཡི་དམ་ཞི་ཁྲོ་དཔའ་བོ་མཁའ་འགྲོ་དང་། །དཀྱིལ་འཁོར་ལྷ་ཚོགས་རྣམས་ལ་སྐྱབས་སུ་མཆི། །ཡེ་ཤེས་དང་ནི་ལས་ལ་གྲུབ་པ་ཡི། །དཔའ་བོ་མཁའ་འགྲོ་ཆོས་སྐྱོང་དམ་ཅན་ཚོགས། །སྐྱབས་གནས་དམ་པ་རྣམས་ལ་སྐྱབས་སུ་མཆི། །སངས་རྒྱས་ཆོས་དང་འཕགས་པའི་དགེ་འདུན་སོགས། །མཐོང་ཐོས་དྲན་པས་འཁོར་བའི་སྡུག་བསྔལ་སེལ།སྐྱབས་གནས་དཀོན་མཆོག་གསུམ་ལ་སྐྱབས་སུ་མཆི། །ལྟ་སྒོམ་སྤྱོད་གསུམ་གཞི་ལམ་འབྲས་གསུམ་དང་། །རྩ་ཐིག་རླུང་གསུམ་ངོ་རང་ཐུགས་
རྗེར་བཅས། །མཐར་ཐུག་སྙིང་པོ་མཆོག་ལ་སྐྱབས་སུ་མཆི། །གང་ལ་སྐྱབས་ན་དངོས་གྲུབ་ཀུན་སྩོལ་ཞིང་། །གནས་སྐབས་མཐར་ཐུག་བསླུ་བ་མེད་པའི་སྐྱབས། །དཀོན་མཆོག་རིན་ཆེན་རྣམས་ལ་སྐྱབས་སུ་མཆི། །དེ་ནས་སེམས་བསྐྱེད་པ་ནི། བདག་དང་མཐའ་ཡས་སེམས་ཅན་རྣམས། །གདོད་ནས་ཡེ་སངས་རྒྱས་པ་ལ། །མ་རིག་རྟོག་པའི་གཉིས་འཛིན་གྱིས། །མཉམ་ཉིད་ཆོས་སྐུར་དོན་མ་རྟོགས། །དེ་ཕྱིར་བདག་གཞན་འཁོར་བ་ཡིས། །སྡུག་བསྔལ་རྒྱ་མཚོ་ལས་བསྒྲལ་ཕྱིར། །སྙིང་རྗེ་ཆེན་པོའི་བྱང་ཆུབ་སེམས། །སྨོན་འཇུག་མཆོག་ཏུ་སེམས་བསྐྱེད་དོ། །དེ་ནས་བདག་བསྐྱེད་པ་ནི། ན་མོ། གཉིས་བསྡུས་ཆོས་རྣམས་གདོད་ནས་བརྡལ་བའི་ངང་། །བདག་ལུས་སྒྱུ་མའི་གྲོང་ཁྱེར་རབ་སྦྱངས་ཡོ་ནས། །ཤེས་རིག་རྒྱལ་པོ་གྷིཡིག་དཀར་ལ་འཚེར། །སྤྲོས་པས་འོད་ཀྱིས་གོང་བུར་འགྲེལ་བ་ལ། །ངོ་བོ་བཅོམ་ལྡན་ཐུགས་རྗེ་སྤྱན་རས་གཟིགས། །དཀར་གསལ་མདངས་ལྡན་ཞལ་གཅིག་ཕྱག་བཞི་པ། །དང་པོའི་ཕྱག་གཉིས་ཐུགས་ཀར་ཐལ་མོ་སྦྱར། །འོག་མའི་གཡས་གཡོན་ཤེལ་ཕྲེང་པད་དཀར་འཛིན། །པད་ཟླའི་སྟེང་དུ་རྡོ་རྗེ་སྐྱིལ་ཀྲུང་
བཞུགས། །ཤིན་ཏུ་མཛེས་པའི་ཞལ་དང་འཛུམ་བག་ཅན། །དབུ་སྐྲ་ལྕང་ལོ་དང་བཅས་འཁྱིལ་བའི་དབུས། །བླ་མ་འོད་དཔག་མེད་པས་མཚན་པའོ། །མཚན་དང་དཔེ་བྱད་ལོངས་སྤྱོད་བརྒྱན་པའི་སྐུ། །སྣ་ཚོགས་དར་དང་རིན་ཆེན་བརྒྱན་ཆས་སྤྲས། །གངས་རིའི་ཕུང་པོ་ལྟ་བུར་བརྗིད་པའི་སྐུ། །འོད་ཟེར་དྲྭ་བ་རབ་ཏུ་འབར་བས་གཡོགས། །ཐུགས་སྲོག་ཧཱུྃཡིག་མཐའ་མར་གཡས་སྐོར་དུ། །ཡི་གེ་དྲུག་པ་རྡོ་རྗེའི་སྒྲ་དང་བཅས། །ཨོཾ་མ་ཎི་པདྨེ་ཧཱུྃ། ཞེས་སྙིང་པོ་བརྒྱ་རྩ་རེ་བསྒྲང་བར་བྱས་ནས། མཆོད་བསྟོད་བྱ་བ་ནི། ཨོ་ཨརྱ་ལོ་ཀི་ཤྭ་ར་ས་པཱ་རི་ཝཱ་ར་ཨརྒྷཾ་སོགས། ཤབྟ་པྲ་ཏིཙྪ་སྭཱ་ཧཱ། ཨེ་མ་ཧོ༔ སྣང་བ་མ་འགགས་ཐུགས་རྗེ་ཆེན་པོའི་སྐུ། །གྲག་སྟོང་སྙིང་པོ་ཡི་གེ་དྲུག་པའི་གསུང་།ཐམས་ཅད་མཁྱེན་ཅིང་ཐམས་ཅད་གཟིགས་པའི་ཐུགས། །སྐུ་གསུང་ཐུགས་མཆོག་སྤྱན་རས་གཟིགས་དབང་ལ། །ལུས་ངག་ཡིད་གསུམ་གུས་པས་ཕྱག་འཚལ་བསྟོད། །མཆོད་པ་བྱིན་རླབས་ནི། ཨོཾ་སྭ་བྷཱ་ཝ་ཤུདྡྷསརྦ་དྷརྨཱསཱ་བྷཱ་ཤུདྡྷོཉཧཾ། སྟོང་ཉིད་ངང་ལས་ཧཱུྃ་ལས་རིན་ཆེན་སྣོད། །ཡངས་ཤིང་རྒྱ་ཆེ་དཀར་ལ་ཟླུམ་པའི་ནང་། །བསང་རྫས་མི་དམིགས་པ་
ཡི་ངང་ཉིད་ལས། །ཨོཾ་ཨཱཿཧཱུྃ་དང་ཨོཾ་བྷྲཱུཾ་ཏྲཱཾ་ཧྲཱིཿཨཱཿ །དེ་རྣམས་འོད་འཕྲོས་སྲིད་གསུམ་བཅུད་རྣམས་བསྡུས། །ཡི་གེ་དེ་དག་ཡོངས་སུ་གྱུར་པ་ལས། །གཟུགས་སྒྲ་དྲི་རོ་རེག་བྱ་ཆོས་ལ་སོགས། །འདོད་ཡོན་ལྔ་ཡི་ལོངས་སྤྱོད་ཕུན་སུམ་ཚོགས། །དཀར་གསུམ་རི་བོ་མངར་གསུམ་རྒྱ་མཚོ་འདི། །རཾལས་མེ་བྱུང་ཉོན་མོངས་བག་ཆགས་བསྲེགས། །ཡཾ༔ ལས་རླུང་བྱུང་ཞེ་སྡང་དངོས་འཛིན་གཏོར། །ཁཾལས་ཆུ་བྱུང་གཉིས་འཛིན་རྣམ་རྟོག་བཀྲུས། །རཾཡཾཁཾཝགིས་བསྲེག་ཅིང་གཏོར་དང་བཀྲུས། །དག་ཅིང་གཙང་ལ་རྙོག་པ་མེད་པར་བྱས། །ཀུན་བཟང་མཆོད་སྤྲིན་ནམ་མཁའ་མཉམ་པས་མཆོད། །རྒྱ་ཆེ་གཏིང་ཟབ་ཆོས་ཀྱི་དབྱིངས་མཉམ་བྱུང་། །ཞེས་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས། ཆབ་ཀྱིས་བྲན་པ་ནི༔ ཧཱུྃ། སྟོང་གསུམ་ཀུན་ནས་དྲི་མཆོག་འབྱུང་གྱུར་པའི། །སྤོས་དང་སྨན་སྦྱར་ཆུ་གཙང་སྦྱར་བའི་ཁྲུས། །ཡིད་བཞིན་སྤྲིན་ཕུང་མཁའ་ལས་ཆར་འབེབས་པ། །མི་གཙང་དྲི་མའི་ཚོགས་ཀུན་དག་གྱུར་ཅིག །ཨོཾ་ཤུདྡྷེ་ཤོ་དྷ་ན་ཡེ་སྭཱ་ཧཱ། ཤཱཀྱ་ཐུབ་པའི་བྱིན་རླབས་ཀྱིས། །ཐལ་མོ་ཁོང་སྟོང་ཕྱག་རྒྱའི་ནང་། །ཨཱདཀར་འོད་འཕྲོས་དངོས་
འཛིན་སྦྱངས། །ཨོཾ་སྭ་བྷཱ་ཝ་ཤུདྡྷསརྦ་དྷརཿསྭ་བྷ་ཝ་ཤུདྡྷོཉཧཾ། བྷཾ་ལས་དངུལ་གྱི་སྣོད་མཆོག་རྒྱ་ཆེ་བར། །ཀ་ར་བུ་རམ་སྦྲང་རྩི་འོ་ཞོ་མར། །རིན་ཆེན་ལྔ་དང་དར་ཟབ་སྟག་གཟིག་རས། །བཟང་དྲུག་ཀླུ་སྨན་རྣམ་པ་སྣ་ཚོགས་དང་། །ཞིབ་མོར་སྤོས་སྤྲིན་ནམ་མཁའི་ཁམས་ཁྱབ་པ། །དྲི་ཚོར་ཙམ་གྱིས་ནད་དང་སྡུག་བསྔལ་ཀུན།མ་ལུས་ཞི་བར་བྱེད་པ་ཉིད་དུ་གྱུར། །ཨོཾ་ཨཱཧཱུྃ་ཧ་ཧོ་ཧཱུྃ༔ རྣམ་པར་སྣང་མཛད་བྱིན་རླབས་ཀྱིས། །ཐལ་མོ་ཚིགས་བཅག་ཕྱག་རྒྱའི་ནང་། །ཁཾ་སྔོན་འོད་འཕྲོས་སྣོད་བཅུད་སྤེལ། །ཨོཾ་ན་མསརྦ་ཏ་ཐཱ་ག་ཏ་བྷོ་བྷི་ཤྭ་མུ་ཁེ་བྷྱཿ སརྦ་ཐ་ཁཾ་ཨུཏྤ་ཏེ་སྤ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། བདུད་རྩི་འཁྱིལ་པའི་བྱིན་རླབས་ཀྱིས། །ཐལ་མོ་ཁ་གྱེད་ཕྱག་རྒྱའི་་ནང་། །ཛདམར་འོད་འཕྲོས་བདུད་རྩིར་བསྒྱུར། །ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། རིན་ཆེན་འབྱུང་ལྡན་བྱིན་རླབས་ཀྱིས། །མཆོད་སྦྱིན་ཕྱག་རྒྱ་ཏཱཾ་སེར་ལས།འོད་འཕྲོས་ཀུན་གྱིས་འབད་མེད་ཐོབ། །ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། དོན་ཡོད་གྲུབ་པའི་བྱིན་རླབས་ཀྱིས། །ཁུ་ཚུར་མཆོག་སྦྱིན་ཕྱག་རྒྱའི་
ནང་། །ཧ་ལྗང་འོད་འཕྲོས་བདུད་རྩིར་གྱུར། །ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མ་ས་མནྟ། ཨ་མྲྀ་ཏ་སྤ་ར་ཎ་རསྨི་བྷ་ཝ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་སྭཱ་ཧཱ། ཕྱག་ན་རྡོར་རྗེའི་བྱིན་རླབས་ཀྱིས། །སོར་བསྣོལ་ཕྱག་རྒྱ་ཛདམར་ལས། །འོད་འཕྲོས་མགྲོན་བཞིའི་མཐུ་སྟོབས་བསྡུས། །ན་མས་མནྟ་བུདྡྷཱ་ནཾ་ག་རི་ཀྲོ་ཏི་ཤྭ་རི་པྲ་བྷ་ཛྷཱ་ན་མཱ་ར་ཡ་སྭཱ་ཧཱ། ཞེས་བྱིན་རླབས་སོ། །དེ་ནས་བསང་ཁང་བསྐྱེད་ཅིང་བྱིན་གྱིས་རླབས་པ་ནི། བསང་ཁང་བྲན་ལ། ༈ བསང་ཁང་དྷཾ་ཡིག་ལས་བྱུང་བའི། །དུ་བའི་ལྷ་མོ་མཛེས་སྡུག་ནི། །རིན་ཆེན་དར་ཟབ་སྣ་ཚོགས་བརྒྱན། །ཕྱག་གཡས་ཤེལ་དཀར་བུམ་པ་ནི། །དྲི་མེད་བདུད་རྩིའི་གང་བ་བསྣམས། །ལྷ་དང་སྲུང་མའི་ཉམས་གྲིབ་བཀྲུ། །ཕྱག་གཡོན་སྤོས་ཀྱི་གཞོང་པ་ནས།། སྤོས་སྤྲིན་ནམ་མཁའི་མཐར་ཐུག་ཁྱབ། །རབ་འབྱམས་སངས་རྒྱས་ཞིང་རྣམས་ཀུན། །སྤོས་ཀྱི་ཁྲི་ཤིང་དྲ་བ་འབྲེལ། །དུད་པའི་ཟེར་མ་རེ་རེ་ལ། །བཀྲ་ཤིས་རྫས་བརྒྱད་རྟགས་བརྒྱད་དང་། །རྒྱལ་སྲིད་རིན་ཆེན་སྣ་བདུན་དང་། །ཉེར་སྤྱོད་བདུན་དང་འདོད་ཡོན་ལྔ། །ངོ་མཚར་མཆོད་པ་བཅུ་དྲུག་སོགས། །ལྷ་མའི་ལོངས་སྤྱོད་ཆར་དུ་
འབེབས། །ལྷ་རྣམས་དགྱེས་པ་བསྐྱེད་པར་གྱུར། །ཨོཾ་བཛྲ་དྷུ་པེ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡ་ཨཱཿཧཱུྃ། དེ་ནས་བསང་མགྲོན་ལྷ་བསྐྱེད་པ་ནི། སྟོང་པའི་ངང་ལས་མདུན་གྱི་ནམ་མཁའ་ལ། །ཧཱུྃ་ལས་རིན་ཆེན་སྣ་ཚོགས་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་བང་རིམ་དང་། །བཅས་པ་ཡངས་ཤིང་རྒྱ་ཆེའི་དབུས་སུ་ནི།པདྨའི་སྡོང་པོ་ཡལ་ག་སྟོང་དང་ལྡན། པདྨ་གེ་སར་འདབ་བཞིའི་དབུས་སུ་ནི། །པདྨ་འབྱུང་གནས་སྤྲུལ་སྐུའི་ཆ་ལུགས་ཅན། །སྐུ་མདོག་དཀར་དམར་མདངས་ལྡན་ཞི་འཛུམ་ཅན། །ཤིན་ཏུ་བརྗིད་ཅིང་སྣང་སྲིད་ཟིལ་གྱིས་གནོན། །ཟ་འོག་བེར་དང་ཆོས་གོས་རྣམ་གསུམ་གསོལ། །པད་ཞ་མཐིང་ཁ་སྒོ་དར་མེ་ལོང་བརྒྱན། །གཡས་གཡོན་ཕྱག་གཉིས་རྡོ་རྗེ་བདུད་རྩི་བསྣམས། །མི་མགོ་གསུམ་མཚོན་ཁཊཾ་རྩེ་གསུམ་ལ། །ཌ་མ་རུ་དང་དར་སྣའི་ཅོད་པན་དང་། །དྲིལ་བུ་གཡེལ་ཁས་བརྒྱན་པ་གཡོན་ཟུར་བསྟན།ཞབས་གཉིས་རྡོ་རྗེ་སྐྱིལ་ཀྲུང་བརྗིད་པར་བཞུགས། །དེ་ཡི་སྟེང་གི་ཆ་ལ་པད་ཟླའི་སྟེང་། །སྣང་བ་མཐའ་ཡས་ཐུགས་རྗེ་ཆེན་པོ་དང་། །ཀུན་ཏུ་བཟང་པོ་རྡོ་རྗེ་འཆང་ཆེན་ལ། །
གསར་རྙིང་གཏེར་བརྒྱུད་བླ་མ་རྣམས་ཀྱིས་བསྐོར། །བར་གྱི་ཆ་ལ་པད་ཟླའི་གདན་སྟེང་དུ། །དྲག་པོ་ཐོད་ཕྲེང་སྒྲུབ་པ་བཀའ་བརྒྱད་ལ། །ཡི་དམ་རྒྱུད་སྡེའི་ལྷ་ཚོགས་རྣམས་ཀྱིས་བསྐོར། །ཨོ་རྒྱན་གཡས་སུ་པད་ཟླའི་གནད་སྟེང་དུ། །བཅོམ་ལྡན་རྒྱལ་བ་ཤཱཀྱ་ཐུབ་པ་ལ། །སངས་རྒྱས་དཀོན་མཆོག་མགྲོན་གྱི་ཚོགས་ཀྱིས་བསྐོར། །ཨོ་རྒྱན་རྒྱབ་ཏུ་པད་ཟླའི་གདན་སྟེང་དུ། །ཆོས་སྐུ་ཡུམ་ཆེན་ཤེས་རབ་ཕར་ཕྱིན་ལ། །དམ་ཆོས་དཀོན་མཆོག་མགྲོན་གྱི་ཚོགས་ཀྱིས་བསྐོར། །ཨོ་རྒྱན་གཡོན་དུ་པད་ཟླའི་གདན་སྟེང་དུ། །འཇམ་དབྱངས་སྤྱན་རས་གཟིགས་དབང་ཕྱག་རྡོར་ལ། །དགེ་འདུན་དཀོན་མཆོག་མགྲོན་གྱི་ཚོགས་ཀྱིས་བསྐོར། །ཨོ་རྒྱན་མདུན་དུ་པད་ཟླའི་གདན་སྟེང་དུ། །དབང་ཆེན་རྟ་མགྲིན་རྡོ་རྗེ་ཕག་མོ་ལ། །རིག་འཛིན་དཔའ་བོ་མཁའ་འགྲོའི་ཚོགས་ཀྱིས་བསྐོར། །ཞབས་ཀྱི་ཆ་ལ་པད་ཟླའི་གདན་སྟེང་དུ། །དཔལ་ཆེན་ཡེ་ཤེས་མགོན་པོ་ཡབ་ཡུམ་ལ། །ཆོས་སྐྱོང་ཕོ་རྒྱུད་མོ་རྒྱུད་ཚོགས་ཀྱིས་བསྐོར། །དེ་ཡི་ཕྱི་རོལ་པད་ཟླའི་གདན་སྟེང་དུ།།འཛམ་ལྷ་དཀར་དམར་རྒྱལ་ཆེན་རྣམ་སྲས་ལ། །གནོད་སྦྱིན་ནོར་ལྷ་ཕོ་མོའི་ཚོགས་ཀྱིས་
བསྐོར། །དེ་ཡི་ཕྱི་རོལ་དར་ཟབ་པད་ཟླའི་སྟེང་། །ལྷ་མོ་བསྟན་མ་ས་ལྷའི་རྒྱལ་པོ་ལ། །ཕྱི་རྒྱུད་སྲུང་མ་སྟོང་གསུམ་ལྷ་ཀླུ་དང་། །རྒྱུ་སྐར་ལྷ་མོ་ཉི་ཤུ་རྩ་བརྒྱུད་སོགས། །ཡུལ་ལྷ་གཞི་བདག་གནས་བདག་རྣམས་ཀྱིས་བསྐོར། །དེ་ཡི་ཕྱི་རོལ་རིགས་དྲུག་སྙིང་རྗེ་ལ། །བགེགས་རིགས་ལན་ཆགས་མགྲོན་གྱི་ཚོགས་ཀྱིས་བསྐོར། །ཚོགས་མ་ལུས་དེ་དག་ཐམས་ཅད་ཀྱི། །སྤྱི་བོར་ཨོཾ་དཀར་མགྲིན་པར་ཨཱདམར་དང་། །ཐུགས་ཀའི་ཧཱུྃ་སྔོན་གསུམ་ལས་འོད་འཕྲོས་པས། །རང་རང་གནས་ནས་མཆོད་པའི་གནས་འདིར་བྱོན། །བཛྲ་ས་མ་ཡ་ཛཿཛཿ དེ་ནས་སྤྱན་འདྲེན་པ་ནི། རོལ་མོ་དབྱངས་དང་བཅས་པས། ཧཱུྃ། ནུབ་ཕྱོགས་བདེ་ཆེན་ཕོ་བྲང་ནས། །བཅོམ་ལྡན་མགོན་པོ་འོད་དཔག་མེད། །གོས་དཀར་ལྷ་མོ་ཡུམ་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །རི་བོ་ལྟ་ལའི་ཕོ་བྲང་ནས། །འཕགས་པ་སྤྱན་རས་གཟིགས་དབང་སྐུ།གསང་བ་ཡེ་ཤེས་ཡུམ་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །ཟངས་མདོག་དཔལ་རིའི་ཕོ་བྲང་ནས། །གུ་རུ་པདྨ་འབྱུང་གནས་སྐུ། །མནྡ་ར་ཝ་མཚོ་
རྒྱལ་དང་། །རིག་འཛིན་དཔའ་བོ་མཁའ་འགྲོ་བཅས། །གནས་འདིར་སྤྱན་འདྲེན་གཤེགས་སུ་གསོལ། ཀྱཻ། ཕྱོགས་བཅུའི་དུས་གསུམ་རབ་འབྱམས་ཀྱི། །འདྲེན་མཆོག་རྒྱལ་བ་ཐམས་ཅད་དང་། །བྱང་ཆུབ་སེམས་དཔའ་མ་ལུས་དང་། །མཐུ་ཆེན་ཁྲོ་རྒྱལ་ཐམས་ཅད་དང་། །བླ་མེད་དཀོན་མཆོག་གསུམ་པོ་དང་། །རྩ་བ་གསུམ་གྱི་ལྷ་ཚོགས་རྣམས། །གནས་འདིར་སྤྱན་འདྲེན་གཤེགས་སུ་གསོལ། །སངས་རྒྱས་བསྟན་སྲུང་བདུད་སྡེ་འཇོམས། །མ་རུངས་འཇོམས་མཛད་དགྲ་བགེགས་གཤེད། །ཆོས་སྐྱོང་ཕོ་རྒྱུད་མོ་རྒྱུད་དང་། །བསྟན་སྲུང་དམ་ཅན་རྒྱ་མཚོ་རྣམས། །གནས་འདིར་སྤྱན་འདྲེན་གཤེགས་སུ་གསོལ། །གནོད་སྦྱིན་ནོར་ལྷ་འཁོར་བཅས་དང་། །ཚངས་པ་བརྒྱ་བྱིན་ཕྱོགས་སྐྱོང་བཅུ། །ལྷ་བརྒྱད་ཀླུ་བརྒྱད་གཟའ་ཆེན་བརྒྱད། །རྒྱལ་པོ་ཆེན་པོ་སྡེ་བཞི་དང་། །རྒྱུ་སྐར་ཉི་ཤུ་རྩ་བརྒྱད་སོགས། །ཉོན་མོངས་འགྲོ་ལ་བརྩེར་དགོངས་ནས། །ཀུན་གྱིས་ཐུགས་དམ་གྱིས་བསྐུལ་ཏེ། །ཆག་ཐོག་མེད་པའི་རྫུ་འཕྲུལ་གྱིས། །སྐད་ཅིག་ཙམ་གྱིས་གཤེགས་སུ་གསོལ། །གཞན་ཡང་སྟོབས་ལྡན་སྲུང་མའི་ཚོགས། །ཆོས་རྒྱལ་
མེས་དབོན་རྣམ་གསུམ་དང་། །རིག་འཛིན་སློབ་དཔོན་པདྨ་སོགས། །སྔོན་གྱི་མཁས་གྲུབ་ཐམས་ཅད་ཀྱིས། །སྤྱན་སྔར་ཁས་བླངས་ཐུགས་བསྐྱེད་ནས། སྲོག་གི་སྙིང་པོ་ཕུལ་བ་ཡིས། །ལྷ་སྲིན་སྡེ་བརྒྱད་ཐམས་ཅད་དང་། །མགུར་ལྷ་བསྟན་མ་བཅུ་གཉིས་དང་། །གཏེར་བདག་དམ་ཅན་དགེ་བསྙེན་དང་། །འཛམ་གླིང་གཞི་བདག་ལྷ་ཀླུ་གཉན། །ས་བདག་བཙན་དང་རྒྱལ་པོ་སྨན། །ལྷ་མོ་བསྟན་མས་གཙོར་བྱས་པའི། །ཡུལ་ལྷ་གཞི་བདག་གནས་བདག་དང་། །ཕན་བྱེད་འགོ་བའི་ལྷ་ལྔ་ཡང་།མཆོད་པའི་གནས་འདིར་གཤེགས་སུ་གསོལ། ཀྱཻ། གནས་འོག་མིན་ཆོས་དབྱིངས་ཕྱིན་ཆད་ན། །རླུང་རྡོ་རྗེ་རྒྱ་གྲམ་ཡན་ཆད་དུ། །རི་རབ་གླིང་བཞི་གླིང་ཕྲན་བརྒྱད།ས་ཆུ་མེ་རླུང་ནམ་མཁའ་དང་། །འཇིག་རྟེན་ཁམས་ཀྱི་མཐུ་བོ་ཅན། །སྟོང་ཁམས་ཁྱབ་པའི་རྫུ་འཕྲུལ་ཅན། །སྟོན་པའི་བསྟན་པ་སྲུང་བ་དང་། །སེམས་ཅན་བདེ་ལ་འགོད་པ་དང་། །རྣལ་འབྱོར་སྡོང་གྲོགས་བྱེད་པ་དང་། །མི་མཐུན་བར་ཆད་བསལ་བ་དང་། །དགྲ་བགེགས་རྡུལ་དུ་བརླག་པའི་ཕྱིར། །འཁོར་བཅས་གནས་འདིར་གཤེགས་སུ་
གསོལ། ཀྱཻ། བསང་མཆོད་ཆེན་པོའི་དཀྱིལ་འཁོར་འདིར། །འཇའ་འོད་གུར་ཕུབ་ཉམས་རེ་དགའ། །གཞལ་ཡས་འོད་ཕུང་ལམས་སེ་ལམ། །འཇའ་ཚོན་རི་མོ་ཁྱུགས་སེ་ཁྱུག །སྤོས་བཟང་ངད་པ་ཐུ་ལུ་ལུ། །བདུད་རྩིའི་སྦྲང་ཆར་སི་ལི་ལི། །བདུད་རྩིའི་བསང་མཆོད་དྲི་རེ་ཞིམ། །དྲི་ཞིམ་དུད་པ་ཐུ་ལུ་ལུ། །དར་གྱི་ཅོད་པན་པུ་རུ་རུ། །རོལ་མོ་སྒྲ་སྙན་ཁྲོ་ལོ་ལོ། །ལྷུན་གྲུབ་གནས་འདིར་གཤེགས་སུ་གསོལ། །དེ་ནས་བཞུགས་སུ་གསོལ་བ་ནི། །ན་མོ། དཀོན་མཆོག་གསུམ་དང་རྩ་བ་གསུམ། །ཆོས་སྐྱོང་དམ་ཅན་ཚེ། །ནོར་ལྷ་དང་། །ཕྱི་རྒྱུད་དཀར་ཕྱོགས་དགེ་བསྙེན་དང་། །ལྷ་ཀླུ་གཞི་བདག་འཁོར་བཅས་རྣམས། །ཚུར་གཤེགས་འདིར་གནས་བྱོན་པ་ལེགས། །མ་ཆགས་དྲི་མེད་པདྨའི་གདན། །ཡིད་འོང་ཉི་ཟླ་བརྩེགས་པ་ཡི། །རིན་ཆེན་དར་ཟབ་གདན་སྟེང་དུ། །འགྲོ་བའི་དོན་ཕྱིར་བཞུགས་སུ་གསོལ། །བདག་ནི་རབ་གུས་དང་བ་ཡིས། །སྒོ་གསུམ་གུས་པས་ཕྱག་བགྱི་འོ། །བཛྲ་ས་མ་ཡ་ཛ༔ ཛཧཱུྃ་བཾ་ཧོ༔ ཏིཥྛ་ལྷན་ཨ་ཏི་པུ་ཧོ༔ དེ་ནས་མཆོད་པ་འབུལ་བ་ནི། །ཨོཾ། དངོས་འབྱོར་ཡིད་ཀྱིས་རྣམ་སྤྲུལ་པའི། །ཉེར་སྤྱོད་སྣ་
བདུན་འདོད་ཡོན་ལྔ། །བཀྲ་ཤིས་རྫས་རྟགས་རིན་ཆེན་བདུན། །གཡག་ལུག་ར་གསུམ་གཟུགས་འགྲོས་དང་། །འབྲུ་སྣ་སྨན་སྣ་དར་ཟབ་དང་། །ཇ་ཆང་ཤ་ཐུད་ཟས་སྣའི་ཕུད། །ཕྱེ་མར་སྤོས་དཀར་དུད་པ་དང་། །ལོངས་སྤྱོད་བརྒྱན་གྱིས་གཏོར་མ་དང་། །དཀར་གསུམ་མངར་གསུམ་རིན་པོ་ཆེ། །མདའ་དར་གོ་མཚོན་སྤྱན་གཟིགས་དང་། །གར་དང་རོལ་མོ་རྔ་དང་དུང་། །བསང་མཆོད་བདུད་རྩིའི་སྤྲིན་དཔུང་དང་། །འདོད་ཡོན་ལོངས་སྤྱོད་མཆོད་པའི་ཚོགས། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་ཐམས་ཅད་མཆོད། །དམ་ཅན་ནོར་ལྷ་གཏེར་བདག་དང་། །མགུར་ལྷ་བསྟན་མ་དགེ་བསྙེན་དང་། །ཕྱི་རྒྱུད་འཇིག་རྟེན་སྲུང་མ་མཆོད། །འཇིག་རྟེན་སྐྱོང་བ་ཡུལ་གྱི་ལྷ། །གཞི་བདག་གནས་བདག་ས་བདག་དང་། །ཕ་མཚུན་དགྲ་བླ་ཐམས་ཅད་མཆོད། །ནོར་ལྷ་རྟ་ལྷ་ལུག་ལྷ་དང་། །ཁྱིམ་ལྷ་མཁོར་ལྷ་ཞིང་ལྷ་དང་། །ཕ་ལྷ་མ་ལྷ་ཞང་ལྷ་མཆོད། །ཐབ་ལྷ་ལ་སོགས་སྲིད་པ་ཡི། །ལྷ་སྲུང་མགོན་བྱེད་ཐམས་ཅད་མཆོད། །ཐམས་ཅད་མཉེས་ཤིང་ཚིམ་གྱུར་ཅིག །གུ་རུ་དྷེ་ཝ་ཌཱཀྐི་ནི། སརྦ་དྷརྨ་
པཱ་ལ། ལོ་ཀ་པཱ་ལ། སརྦ་དེ་ཝ་ས་པ་རི་ཝཱ་ར་ཨབྷཾ་སོགས། ཤཔྟ་རུ་པ་གྷནྡྷེ་རྭ་ས་སྤརེ་ཨབྦ་མངྒ་ལཾ་དྲ་བྱ་བྷ་ལིང་ཏ་སརྦ་པུ་ཙ་པྲ་ཏིཙྪ་ཡེ་སྭཱ་ཧཱ། ཞེས་མཆོད་པ་རྣམས་རྒྱས་པར་བྱས་ནས། བསང་ཁང་བྲན་ནས་དུད་པ་ལས་འདོད་ཡོན་གྱི་ལྷ་མོ་དཔག་ཏུ་མེད་པ་འཕྲོས་ནས་ཕྱག་ན་མཆོད་རྫས་སྣ་ཚོགས་བཟུང་ནས། ཕྱོགས་བཅུའི་སངས་རྒྱས་ཀྱི་ཞིང་ཁམས་མཐའ་ཡས་ན་བཞུགས་པ་ཐམས་ཅད་ལ་སོ་སོར་ཅི་དགྱེས་ཕུལ་བར་དམིགས་ལ་འདི་སྐད་དོ། ཀྱཻ། ཡེ་ཤེས་མེ་དང་དུད་པ་མི་དམིགས་ཀྱང་། །མཆོད་པའི་ལྷ་མོ་སྤྲིན་དཔུང་ལྟ་བུར་གཏིབས། །འདོད་ཡོན་མཆོད་པ་སྣ་ཚོགས་དཔག་ཏུ་མེད།དཔག་བསམ་ཤིང་དང་རིན་ཆེན་གཏེར་བུམ་དང་། །བདུད་རྩི་ཆུ་མིག་འདོད་འཇོའི་བ་ལ་སོགས། །མ་མོའི་ལོ་ཐོག་ལ་སོགས་རྩི་བཅུད་དང་། །རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད། །རོ་མཆོག་བརྒྱ་ལྡན་བཟའ་བཏུང་སྣ་ཚོགས་དང་། །དར་དང་ཟ་འོག་གོས་རྣམས་རེག་བྱའི་ཚོགས། །དཀར་གསུམ་རི་བོ་མངར་གསུམ་རྒྱ་མཚོའི་ཚོགས།རིན་ཆེན་སྣ་བདུན་གཡག་ལུག་ར་ཡི་གཟུགས། །འབྲུ་བཅུད་ཆང་དང་རྩི་བཅུད་སྙིང་པོ་དང་། །དཀར་མདར་མདངས་ལྡན་ཤ་ཕུད་སྤོས་ཀྱི་རིགས། །མཁོ་དགུའི་ལོངས་སྤྱོད་
འདོད་དགུའི་དཔལ་འབྱོར་གྱིས། །ས་དང་བར་སྣང་ནམ་མཁའ་ཡོངས་གང་བ། །དངོས་འབྱོར་ཡིད་སྤྲུལ་ཀུན་བཟང་མཆོད་སྤྲིན་འདི། །རྣལ་འབྱོར་དྭངས་བའི་སེམས་ཀྱིས་འབུལ་ལགས་ན། །སོ་སོར་གང་ལ་ཅི་དགྱེས་བཞེས་སུ་གསོལ། །ཅེས་མཆོད་ནས་མཆོད་པའི་ལྷ་མོ་རྣམས་ཀྱི་ཕྱག་ན་རོལ་མོའི་བྱེ་བྲག་དཔག་ཏུ་མེད་པ་བསྣམས་ནས་བསྟོད་དབྱངས་ཡན་ལག་རྒྱ་མཚོའི་སྒྲས་བསྟོད་པར་བསྒོམས་ལ། ཀྱཻ། དུས་གསུམ་རྒྱལ་བའི་ཕྲིན་ལས་བདག །བླ་མ་རྣམས་ལ་ཕྱག་འཚལ་བསྟོད། །མཆོག་ཐུན་དངོས་གྲུབ་ཀུན་གྱི་བདག །ཡི་དམ་ལྷ་ལ་ཕྱག་འཚལ་བསྟོད། །ཕྲིན་ལས་ཀུན་འགྲུབ་ཐོགས་པ་མེད། །མཁའ་འགྲོ་རྣམས་ལ་ཕྱག་འཚལ་བསྟོད། །རྒྱལ་བའི་བསྟན་པ་སྙིང་ལྟར་གཅེས། །ཆོས་སྐྱོང་རྣམས་ལ་ཕྱག་འཚལ་བསྟོད། །སྟོང་གསུམ་རིན་ཆེན་གཏེར་གྱི་བདག །ནོར་ལྷའི་ཚོགས་ལ་ཕྱག་འཚལ་བསྟོད། །ཕྱོགས་དུས་འཇིག་རྟེན་ཐམས་ཅད་སྐྱོང་། །དཀར་ཕྱོགས་དགེ་བསྙེན་ཀུན་ལ་བསྟོད། །ཅེས་བསྟོད་ནས། བསང་རབ་ནི། ཀྱཻ། སྔོན་ཚེ་གྲངས་མེད་བསྐལ་པའི་སྔོན། །ཐུབ་དབང་རྒྱལ་བུར་གྱུར་པའི་ཚེ། །སྤོས་ཀྱི་རིལ་བུ་གཅིག་བསྲེགས་ནས།
སིལ་སྙན་བཀྲོལ་ནས་བསང་མཆོད་མཛད། །ཞག་བདུན་སྤོས་སྤྲིན་འཛམ་གླིང་ཁྱབ། །དེ་ནས་ཤཱཀྱའི་བསྟན་པ་ལ། །དཔལ་མགོན་འཕགས་པ་ཀླུ་སྒྲུབ་ཀྱིས། །འཛམ་གླིང་སྤྱི་བསང་བསྡུས་པ་མཛད། །རྡོ་རྗེ་གདན་ལ་སོགས་པ་ཡི། །རྒྱ་གར་གཙུག་ལག་བརྒྱ་རྩ་གྲུབ། །དེ་ནས་མགར་བློན་རིགས་ཅན་གྱིས། །བསང་དང་མཆོད་པ་མཛད་པ་ཡིས།ཤཱཀྱ་མུ་ནེ་གདན་དྲངས་སོ། །དེ་ནས་པདྨ་འབྱུང་གནས་ཀྱིས། །བརྔན་དང་བསང་མཆོད་མཛད་པ་ཡིས། །བསམ་ཡས་གཙུག་ལག་བརྒྱ་རྩ་བཞེངས། །དེ་ནས་རང་བྱུང་རྡོ་རྗེ་ཡིས་། །འཛམ་གླིང་སྤྱི་བསང་མཛད་པ་ཡིས། །སོག་གི་ཆུ་ལ་དགེ་ཟམ་ཚུགས། །དེ་བཞིན་རྣལ་འབྱོར་ཡོན་བདག་གི །བཀྲ་ཤིས་བདེ་ལེགས་རྒྱས་པའི་ཕྱིར། །དེ་རིང་བསང་དང་མཆོད་པ་བྱ། །དེ་ནས་བསང་གཞུང་གང་འདོད་འདོན་པའོ། །ཞེས་རིག་སྔགས་འཆང་བའི་སློབ་བུ་པདྨ་མཐར་ཕྱིན་རྡོ་རྗེ་ཞེས་བྱས་བསྐུལ་ནས་རཱ་ག་ཨ་སྱས་སྦྱར་བ་ལ། འགལ་འཁྲུལ་ཉེས་པའི་ཆ་མཆིས་ན། པད་འབྱུང་རྩ་བ་གསུམ་ཆོས་བདག་བཀའ་སྲུང་དང་བཅས་པའི་སྤྱན་སྔར་མཐོལ་ལོ་བཤགས་སོ། །དགེ་བས་རྐྱེན་ལས་གྲོལ་ནས། གུ་རུ་པདྨའི་གོ་འཕང་མྱུར་ཐོབ་ཤོག །སརྦ་མངྒ་ལཾ།། །།